/@##/ /rgya gar skad du/ Ar+ya pra ti b+hA na ma ti ba ri prIts+tsha nA ma ma hA yA na sU tra/ bod skad du/ 'phags pa spobs pa'i blo gros kyis zhus pa zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa'i dus gcig na/ bcom ldan 'das mnyan du yod pa na rgyal bu rgyal byed kyi tshal mgon med zas byin gyi kun dga' ra ba na dge slong stong nyis brgya lnga bcu'i dge slong gi dge 'dun chen po dang / byang chub sems dpa' khri dang thabs gcig tu bzhugs te/ de nas bcom ldan 'das 'khor mang pos yongs su bskor cing mdun gyis bltas nas chos ston to/ /de'i tshe tshong dpon spobs pa'i blo gros shes bya ba zhig tshong dpon gyi bu lnga brgya tsam so so'i g.yog lnga brgya lnga brgyas yongs su bskor cing mdun du bdar ba dang lhan cig tu/ mnyan du yod pa'i grong khyer nas byung ste/ rgyal bu rgyal byed kyi tshal mgon med zas sbyin gyi kun dga' ra ba ga la ba dang / bcom ldan 'das ga la ba de logs su song ste phyin nas/ bcom ldan 'das kyi zhabs la mgo bos phyag 'tshal te/ bcom ldan 'das la lan gsum bskor ba byas nas g.yog 'khor dang bcas te phyogs gcig tu 'dug go/ /de nas sangs rgyas kyi mthus tshong dpon spobs pa'i blo gros stan las langs te/ bla gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas 52.279b bcom ldan 'das la 'di skad ces gsol to/ /bcom ldan 'das ni bla ma'i mchog /khams gsum pa'i dam pa/ byang chub kyi bsod nams kyi lhag pa'i gzhi/ sems can thams cad nges par sgrol bar mdzad pa/ kun du khyab pa'i thabs la mkhas pa'i phyogs thug pa ma mchis pa nges par thob par mdzad pa lags na/ bcom ldan 'das ma mchis pa'i dus snyigs ma'i rnyog pa lnga dang ldan pa la dug gsum 'bar zhing rab tu 'bar la/ gcig la gcig gdung bar bgyid pa'i sems can rnams kyi nang na gang nyes par bsam pa sems pa'i dus na gtso bo ma mchis shing de gang gi yang ma lags pa dang / rgyal po dang / blon po chen po rnams yul la sred pas zil gyis non te phan tshun mi mthun zhing gcig la gcig g.yul bgyed pa dang / de dag gcig la gcig g.yul 'gyed pa na gzhan dag gi dmag gi dpung gi tshogs dang / de las gzhan pa yul gyi mi lus chab 'tshal ba rnams kyi ming yang mi gda' ba dang / sangs rgyas kyi bsod nams kyi mthus sangs rgyas kyi slob ma gang zag bzhi po mang po de dag kyang bstan pa 'di la 'jug cing rab tu byung ba'i tshul 'thob pa dang / de dag kyang phyi rol gyi gos ngur smrig tsam dang / khong pa'i nang gi 'dun pa dang / zhe sdang dang / shin du ma gus shing phan tshun mi mthun la gcig la gcig skur pa 'debs par bgyid pa dang / skyon sgrogs par bgyid pa dang / yon tan nges par sbed par bgyid pa dang / nga rgyal dang / rgyags pa dang / dregs pas non cing ngar 'dzin pa dang / nga yir 'dzin par bgyid pa dang / de dag shi 'phos na yang ngan song gsum du skye zhing yud tsam zhig rnyed pa'i dpal yang ma 'tshal ba dang / tshe rabs gzhan dag tu bskal pa mang por sdug bsngal gyi tshor ba mi bzad pa/ rtsub pa/ tsha ba/ yid du mi mchi ba dag 'byung bar 'gyur ba yang mthong lags so/ /bcom ldan 'das de'i slad du sems can 'di dag yongs su smin par bgyi ba dang / ngan 'gro'i lam las rnam par bzlog nas bsod nams kyis 52.280a gzhal med khang thob par bgyi ba'i chos rnams gang lags/ de skad ces gsol pa dang / bcom ldan 'das kyis tshong dpon spobs pa'i blo gros la 'di skad ces bka' stsal to/ /spobs pa'i blo gros de ltar khyod seng ge'i sgra bsgrags pas de bzhin gshegs pa la zhu zhing / de ltar sems can thams cad de bzhin gshegs pa la chos zhu bar spro ba skyed pa legs so legs so/ /spobs pa'i blo gros sems can rnams gang thob nas legs par rab tu dpal dang ldan par 'gyur zhing / nag po'i phyogs sgrub pa spangs nas dkar po'i phyogs la zhugs shing don thams cad 'grub par 'gyur ba'i chos de dag khyod zhus shig zhus nas kyang the tsom med par nyon cig dang bshad par bya'o/ /de nas bcom ldan 'das la spobs pa'i blo gros kyis zhus pa/ bcom ldan 'das las gang dag gis ni lha rnams kyi ris su skye bar 'gyur/ gang dag gis ni mi rnams kyi ris su skye bar 'gyur/ gang dag gis ni sems can dmyal ba rnams su skye bar 'gyur/ gang dag gis ni dud 'gro rnams su skye bar 'gyur/ gang dag gis ni yi dgas rnams su skye bar 'gyur/ gang dag gis ni rigs mthon po rnams su skye bar 'gyur/ gang dag gis ni bran dang bran mo rnams su skye bar 'gyur bcom ldan 'das las gang dag gis ni mi rnams kyi nang du sems can skyes pa rnams skal ba bzang por 'gyur zhing khyim khol dang ldan pa dang / kha dri bda' ba dang / kha dog dang ldan pa dang / mthong na dga' ba dang / gnod pa ma mchis pa dang / lus dang sems shin du tha mal du gnas pa dang / skye bo mang pos bsngags pa rnams su 'gyur/ las gang dag gis ni sems can rnams mi'i dam pa thob nas rtag tu skur pa 'debs pa thob par 'gyur zhing skye bo mang po mi dga' ba dang / mdog mi sdug pa dang / kha dri mi bda' ba dang / gnod pa mang ba dang / sems mi dga' ba dang / lus shin du sbyangs pa ma lags pa dang / nyes byas kyi las thams cad bgyid par 'gyur/ bcom ldan 'das las gang dag gis ni legs par gsungs 52.280b pa'i chos 'dul ba 'di la rab tu byung ba dge sbyong dang rigs kyi bu dang / rigs kyi bu mo nye bar zhi ba gtso bor 'dzin pa rnams gang dang gang du skye ba'i skye ba thams cad du rgyun du sangs rgyas dang / chos dang / dge 'dun dkon mchog rnams dang mi 'bral bar 'gyur zhing / sangs rgyas bcom ldan 'das rnams mthong nas kyang de dag las chos thos nas yid dga' zhing ci bsams pa bzhin du don yang grub par 'gyur/ bdag gis zhu ba bcu po de dag zhus pa lags na 'byung po grangs ma mchis pa thams cad la sman pa'i slad du bcom ldan 'das gsol ba ma btab par dge ba'i bshes gnyen mdzad pa/ thugs rje chen po dang ldan pa/ dbang dang ldan pa/ chos thams cad la lkog tu ma gyur pa'i spyan dang ldan pas rnam par phye ste rgyas par lan stsal du gsol/ de nas bcom ldan 'das kyis spobs pa'i blo gros la bka' stsal pa/ spobs pa'i blo gros khyod kyis ji lta bu zhu ba zhus pa rnams rgyas par rnam par phye ste bshad kyis nyon gcig /tshong dpon spobs pa'i blo gros kyis/ bcom ldan 'das de bzhin 'tshal lo zhes gsol nas bcom ldan 'das kyi ltar nyan pa dang / bcom ldan 'das kyis 'di skad ces bka' stsal to/ /spobs pa'i blo gros sems can las lnga dang ldan pa rnams kyis ni lha nyid thob par 'gyur te/ lnga gang zhe na/ dang po byams pa dang ldan pa'i sems kyis gnod pa med par sems can rnams yongs su skyong bar byed cing bzod pa dang ldan pa rnams yin/ gzhan gyis nor 'phrog par mi byed cing bkren pa'i sems dang ldan pa ma yin pas yongs su gtong bar byed pa yin/ gzhan gyi chung ma la spyod pa rnams kyang yongs su dag pa ma yin te/ bslab pa'i gzhi rnams kyang srung bar byed pa yin/ gso sbyong la brtson zhing bden par smra ba yin rang bzhin du 'dug cing rang gi skyon tshad med pa spong bar byed la myos par 'gyur ba'i btung ba spangs pa yin te/ las lnga po de dag dang ldan pa rnams lha'i 52.281a lus thob par 'gyur ro/ /de nas bcom ldan 'das kyis de'i tshe tshigs su bcad pa 'di dag bka' stsal to/ /srog chags gsod las ldog pa byas pas lha dang mi dang lha min rnams/ /'jig rten du ni mi thub lus can tshe ring nad med 'gyur ba yin/ /'od kyi dkyil 'khor dag pa'i lus can shes ldan dri med rdzogs pa'i lus/ /lha nang rab mchog de yi longs spyod sna tshogs dpal can rtag tu 'byung / /bor ma thag tu lha nang rtag tu lha yi dbang phyug rnams su 'gyur/ /bsam med bsal ba 'phro ba rnam log rin chen longs spyod rnams dang ldan/ /rtag tu dga' zhing rab tu yid dga' dpal ldan gzhal med khang gnas shing / /rtse zhing dga' ba'i dpag bsam shing gi yul na me tog gtor lus ldan/ /mkhas shing 'dod pa mi phan yongs spangs dri mchog dag pa'i lus dang ldan/ /tshe rabs kun du dpe med gser mchog lus dang ldan zhing rab tu mdzes/ /rtag tu lha yi nang du skal ba bzang thob lus las 'od 'byung 'gyur/ /lha mo sna tshogs tshogs kyis bskor cing 'dod pa'i dpal la spyod par byed/ /sngon chad cho ga bzhin du ngag skyon bzhi spangs kha ni dri zhim ldan/ /gsal zhing thogs med mi 'jigs tshig mchog lha rnams 'dir ni nges par 'byung / /yang dag lan 'debs rnam bsgrags snyan cing skye bos shin du tshig bzung 'os/ /pi bang rol mo sgra 'byor sprin sgra skad snyan pho brang 'khor skad ldan/ /ma rmongs sems kyis myos 'gyur ma legs rjod byed spangs pas lhar 'gyur zhing / /grangs med dge ba'i lha yis mchod pa lha yi gnas par 'gyur/ /blo dang ldan zhing lus brtan yid bzang bag yod kun dang ldan par 'gyur/ /de dag rtag tu bde 'gyur dbang rnams de dag phan pa rjod par byed/ /gal te tshe zad lha yi yul nas lhung ba'i lha rnams de tshe smad/ /sdig med lo brgya nyi shu 'gro na lha yi gnas su 'gro bar 'gyur/ /bsod nams lnga mngon gyur pas de ni dam pa dpal ldan lus 'od can/ /lha rnams lam sel 52.281b byed cing lha rnams bye bas mchod de brtan par 'gro/ /de nas bcom ldan 'das kyis yang spobs pa'i blo gros la bka' stsal pa/ spobs pa'i blo gros sems can las lnga dang ldan pa rnams mi rnams kyi nang du skye bar 'gyur te/ lnga gang zhe na/ dang po byas pa gzo bas sbyin pa dang / bkren pa dang / dbul po dang / sdug bsngal ba la kun bged pa dang / dge ba bcu'i las kyi lam ma nyams par sten pa dang / sems can thams cad la zhe 'gras pa med pa'i bzod pa dang / brtson 'grus kyis sems can le lo can rnams dge ba'i chos la spro bar byed cing nges pa'i sems kyis gus pa dang bcas la 'thun par 'dzin pa ste/ spobs pa'i blo gros sems can las lnga po de dag dang ldan pa rnams mi nyid 'thob par 'gyur zhing longs spyod kyang chen por 'gyur ba dang / tshe ring ba dang / mdzes pa dang / gzi brjid dang ldan pa dang / 'jig rten gyi rje dpon du 'gyur ro/ /de nas bcom ldan 'das kyis de'i tshe tshigs su bcad pa 'di dag bka' stsal to/ /sbyin pa byin pas mi yi rgyal po dam par 'gyur/ /rtag tu longs spyod 'byor dang ldan par rab tu 'gyur/ /lus ngan po dang mtshungs par sbyin dang spyod par byed/ /rigs dang dam pa thob pas rtag tu dga' bar 'gyur/ /tshul khrims ma nyams de ni dkon mchog mchod par byed/ /nyes byas yongs su spangs pas shin du nges pa ste/ /tshe ring dam pa thob pas 'chi 'pho med pa yin/ /bde ba thob pas skyon med rab tu dga' bar 'gyur/ /des pa'i mi ni pha rol sems 'khrugs ma byas shing / /gzhan dag rnams kyis gnod byas phyir ni gnod mi byed/ /de bzhin tshig ngan brjod kyang gshe bar mi byed pas/ /dge ba mchog gi tshul thob nas ni mdzes par 'gyur/ /brtson 'grus bzang la lhag pa'i bsam pas sems dkar zhing / /stobs dang gzi brjid chen po dge ba rnams dang ldan/ /dmag dpon nyid kyi dam pa thob par gyur pas na/ /longs spyod 'byor pa'i spyod yul ldan pas lha der 'gyur/ /mi 'phrog sems ldan mkhas shing 52.282a shin du 'thun pa ste/ /byas pa gzo zhing las la 'dod par rab tu byed/ /dkon mchog gsum dang ma la sogs la mchod mdzangs pa/ nam yang kun la the tsom byed par mi 'gyur ro/ /mi gang khyad par 'phags pa dge ba lnga po rnams/ /byed pa de ni sa yi bdag por rab tu 'gyur/ /stobs la sogs dang gzugs dang longs spyod mi zad ldan/ /grags ldan shin du gtso bo rnams kyis rim gro byas/ /de nas bcom ldan 'das kyis yang spobs pa'i blo gros la bka' stsal pa/ spobs pa'i blo gros sems can las lnga dang ldan pa rnams ni sems can dmyal ba rnams su skye bar 'gyur zhing skyes nas kyang de dag tu bskal pa bye ba mang por gnas par 'gyur te/ lnga gang zhe na/ 'di lta ste/ sangs rgyas dang / chos dang / dge 'dun dkon mchog la dad par mi byed la kun du bsngags pa ma yin brjod pas skur pa 'debs par byed cing 'phags pa'i lam la brnyas pa dang / de bzhin gshegs pa'i mchod rten 'jig pa dang / bar gyi dus na yang dge slong dang / dge slong ma dang / dge bsnyen dang / dge bsnyen ma gang zag bzhi po mang por mi gus pa 'thun par mi 'dzin pa/ 'jig rten gyi smra ba lhur len pa/ dkon mchog gsum gyi dkor 'phrog pa dang / gcig la gcig nyes rtsom gyis/ gcig la gcig skur pa 'debs pa'i tshig gis rgyal po dang / rje dpon dang / blon po dang / pha dang / bu rnams gcig la gcig mi 'thun pas mi gus pa rnams dang / ma 'ongs pa'i dus na dge slong rnams de bzhin gshegs pa'i bstan pa la zhugs te/ de bzhin gshegs pa dgra bcom pa yang dag par rdzogs pa'i sangs rgyas ston pa la brten nas khyim nas khyim med par rab tu byung ste/ bdag nyid dge slong yin par khas 'che zhing dge ba'i chos yang dag par sgrub pa la mi gnas la/ mkhan po dang / slob dpon rnams mgu bar mi byed cing bka' blo mi bde la 'thun par mi 'dzin cing yang dag par rjes su bstan kyang rjes su bstan pa la sgrub par mi byed cing sangs rgyas kyi byang chub spong bar byed la 52.282b bdag la bstod par byed/ gzhan la smod par byed cing nga rgyal dang / rgyags pa dang / dregs pa'i shas che la bla ma rnams la brnyas par byed/ rnyed pa dang bkur sti la lhag par zhen cing skur pa 'debs par byed pa ste/ spobs pa'i blo gros sems can las lnga po de dag dang ldan pa rnams ni sems can dmyal ba rnams su skye bar 'gyur zhing skyes nas kyang ji srid du stong gsum gyi stong chen po'i 'jig rten gyi khams 'dir 'jig pa ma byung ba de srid du gnas par 'gyur zhing / 'jig pa byung nas kyang 'jig rten gyi khams gzhan na sems can dmyal ba gang dag yod pa de dag tu 'phen par 'gyur ro/ /gang gi tshe der yang 'jig pa byung bar gyur na/ de'i tshe 'jig rten gyi khams gzhan na sems can dmyal ba gang dag yod pa de dag tu 'phen par 'gyur ro/ /de bzhin du sbyar te/ kun du 'jig rten gyi khams grangs med pa dag na sems can dmyal ba gang dag yod pa de dag tu 'khyam zhing sdug bsngal nyams su myong la 'byung ba'i mtha' med do/ /de nas bcom ldan 'das kyis de'i tshe tshigs su bcad pa 'di dag bka' stsal to/ /rmongs pas thog ma med nas 'jigs pa'i sdug bsngal bying gyur pa'i/ /'jig rten sangs rgyas yon tan rgya mtsho khas len mi byed de/ /de ni kun rig ma yin rnal 'byor rgyal po ma yin zhes/ /bdag nyid chud gzan skye bo gzhan rnams la yang slu bar byed/ /bde bar gshegs pa'i mchod rten 'byor pa sdug pa'i mchog byas na/ /de ni dge ba chung 'gyur 'jig par byed pa'i char 'gyur zhes/ /mi dge 'di ni mngon sum dge ba mdun na yod bzhin du/ /'on kyang sdig pa rnam pa sna tshogs kun du spyod par byed/ /bar ma rtsod pa'i dus 'dir bzhi po bkres pas nyam thag pa/ /phan tshun 'khon du 'dzin pas dkrugs shing bla ma smod par byed/ /'khor du 'dus pa 'dul ba'i dga' ba 'di ni rnam bshig pas/ /mi bzad ro med log par ltung ba'i sar ni 'gro bar 'gyur/ /rgyal po pha dang sring mo spun dang gzhon nu bu mo rnams/ /byams 52.283a pa'i yid ni log gyur longs spyod rnams la brkam chags te/ /byis pa bu ltar thams cad gcig la gcig ni bzhad gad byed/ /log ltung dam pa rnam par 'bying bar myur du 'gro bar 'gyur/ /ma 'ongs dus 'dir gang dag shin du sdig can sems can rnams/ /'thun par mi 'dzin dge sbyong kha dog 'dzin pa gzugs mi sdug /ngan pa'i bdag nyid ldan pa sdig pa khrag khrig byed 'gyur ba/ /de dag shi 'phos nas ni sdig pa rtsod pa'i mchog gis gnon/ /mi yis bskal pa brgya phrag mang por sdig pa lnga po dag /bsgrubs shing byas pa dag ni bshags par nus pa ma yin te/ /gang du sangs rgyas khrag khrig gis kyang bskyab par mi spyod pa'i/ /me ri drag po mnar med pa yi mer ni sreg par 'gyur/ /de nas bcom ldan 'das kyis yang spobs pa'i blo gros la bka' stsal pa/ spobs pa'i blo gros sems can las lnga dang ldan pa rnams ni dud 'gro rnams su skye bar 'gyur te/ lnga gang zhe na/ dang po 'chal pa'i tshul khrims dang / chom rkun dang / gzhan gyi bu lon blangs nas gnod sems su byed pa dang / srog gcod pa dang / ma dad pas dam pa'i chos ma yin pa nyan par dga' zhing dam pa'i chos ma yin pa nyan pa la dga' bas log pas 'tsho ba thams cad la dga' ba ste/ spobs pa'i blo gros sems can las lnga po de dag dang ldan pa rnams ni dud 'gro rnams su skye bar 'gyur ro/ /de nas bcom ldan 'das kyis de'i tshe tshigs su bcad pa 'di dag bka' stsal to/ /rtag tu gzhan gyi nor 'phrog pa la dga' ba'i mi rnams ni/ /bu lon byin pa rnam par blangs nas mi gzhan gsod par byed/ /srog gcod pa la dga' ba'i ri dgas 'chi bdag rgyal po rnams/ /rgya la sogs pas bzung nas sems can rnams la gsod par byed/ /dad pa la sogs dman pa'i blo gros dkar po'i 'du shes can/ /nag po dpag tu med pa bdag cag spyod par mi shes pa/ /rmongs pa 52.283b rnams ni dam chos dkon mchog gtam la dga' mi byed/ /'jig rten zhugs pa'i chos la 'dir ni rjes su 'gro bar 'gyur/ /ji ltar gangs ri las 'dir kha ba bab dang rab bab pa/ /chu ni chu yi shugs kyis 'phral du sa 'og 'gro ba bzhin/ /lha mi'i grong du sdig pa'i phung po mang du byas pas na/ /rmongs pa rnams ni de bzhin dud 'gro rnams su myur du 'gro/ /rta dre'u rnga bong glang chen ba lang ma he seng ge dang / /wa dang sbrul dang phag dang khyi la sogs par gyur nas su/ /rtswa za ba dang sha dang bdud rtsi lo ma'i zas za zhing / /de dag rtag tu gzhan gyi khur khyer byed cing dub par 'gyur/ /bkres pas zil gyis non pas gcig la gcig za lhur byed pa/ /bskal pa khrag khrig rnams su'ang nam yang thar bar mi 'gyur zhing / /ji ltar rgya mtsho gcig na ru sbal mig ni gcig yod pas/ /gnya' shing bu gar mgrin pa btad par nus pa ma yin pa/ /de bzhin lha dang mi dang dbang phyug che nyid bde blag tu/ /log par lhung ba brgya yis thob par nus pa ma yin te/ /sangs rgyas 'od zer dam pa'i tshogs can dpag tu med pa dang / /byang chub sems dpa' khyu mchog 'od kyis de dag 'byin par 'gyur/ /de nas bcom ldan 'das kyis yang spobs pa'i blo gros la bka' stsal pa/ spobs pa'i blo gros sems can las lnga dang ldan pa rnams ni yi dgas kyi 'jig rten du skye bar 'gyur te/ lnga gang zhe na/ dang po bkren zhing chags pa dang / mun pa mun nag chen po'i bshes gnyen dang / sogs pa lhur byed pa'i phyir bdag nyid kyang longs spyod par mi byed pa dang / chos ma yin pa dang ldan pa'i phyir phrag dog dang / ser sna lhur byed pas spun dang / sring mo dang / bu dang / chung ma dang / bran dang / las byed pa dang / zho shas 'tsho ba dang / mdza' bshes dang / blon po dang / nye du dang / 'brel pa dang / sbyin gnas dang / dge sbyong dang / bram ze dang / bkren pa thams cad la rab tu sbyin par mi byed cing pha ma dag la yang rab tu sbyin par mi 52.284a byed pa dang / nges par bskyang bar 'os pa dag mi skyong la bsnyen bkur mi byed cing bla ma la mi gus la gces par mi byed pa ste/ spobs pa'i blo gros sems can las lnga po de dag dang ldan pa rnams ni yi dgas rnams su skye bar 'gyur ro/ /de nas bcom ldan 'das kyis de'i tshe tshigs su bcad pa 'di dag bka' stsal to/ /bkren pa'i nyes pas bcom pa nor gtong mi phod pa/ /de dag gzhan dag las ni blang bar 'dod par byed/ /mdzod rnams kyi ni sgo 'phar dam du bsdams pa rnams/ /'dir ni bskyang 'os rtsa lag mchog rnams gso mi byed/ /gzhan nor chud gzon pa yis rtag tu skrag pa rnams/ /bla ma la yang de dag rab rtsub byams can min/ /de dag bdag gi chung ma la sogs g.yog tshogs la/ /dbyig sbyin mi byed shin du snying brtse shes med cing / /dkar po dag las log pa de dag 'di nas shi 'phos nas/ /yun ring mchog tu lus 'bar sdug bsngal yi dgas 'gyur/ /de dag lo brgya rnams su rmi lam rmis par yang / /gos dang zas dang btung ba 'ang nam yang rmi mi 'gyur/ /khab 'dra'i kha dang rin chen lta bu'i lto can rnams/ /nyam thag shar dang nub kyi rgya mtshor rgyug par byed/ /kha nas me 'bar lus ngan phyogs dang lho phyogs gzhan/ /skams par mthong nas rin chen me nang lhung bar 'gyur/ /gshin rje'i pho nya dpung mgo las grub rab stug cing / /sra ldan rnams kyis mnan nas zangs zhun bzod dka' rab/ /mi 'dra ro bro med pa de dag rnams la ldud/ /rmongs rnams yan lag brgyad ldan chu bzhin 'thung bar byed/ /nang grol lus kyi khog pa bsregs pa bsal ba'i rlung gis su/ /skyes pa'i bdag nyid rnams la stobs chen yang ldud byed/ /de nas shi 'phos mi yi 'jig rten 'dir skyes rnams/ /rigs dang longs spyod lus g.yog rnams kyis dman par 'gyur/ /de nas bcom ldan 'das kyis yang spobs pa'i blo gros la bka' stsal pa/ spobs pa'i blo gros sems can las lnga dang ldan pa rnams ni rigs mthon po rnams su 52.284b 'gyur te/ lnga gang zhe na/ 'di lta ste/ zang zing dang chos kyi sbyin pa dag gis 'jig rten thams cad la gnod sems med par gyur pa dang / dkon mchog gsum dang pha ma la gus pa dang / lhan cig skyes pa'i bzod pa dang des pa dang / shin du gya nom pa dang sangs rgyas kyi gsung rnam pa sna tshogs klog pa dang kha ton bya ba la brtson pa ste/ spobs pa'i blo gros sems can las lnga po de dag dang ldan pa rnams ni/ rigs mthon po rnams su 'gyur ro/ /de nas bcom ldan 'das kyis de'i tshe tshigs su bcad pa 'di dag bka' stsal to/ /bsam byas gang dag bsod nams tshogs pa skal bzang sbyin pa'i cho ga bzhin/ /kun du sems can mang la kun bged de dag rtag tu nad med 'gyur/ /tshe dang kha dog stobs ldan lus can 'jig rten mchog tu 'gyur/ /mtshungs dang rgya chen khyad par can gyis mdzes mdzod rin chen ri dbang bzhin/ /'dul ba nyams dga'i dkon mchog mtshungs med pha ma rnams la bsnyen bkur bas/ /shin du rgya chen gtso mchog khyim du skyes pa grangs med skye bos mchod/ /shin du nus kyang yid 'khrug rnam spangs kun du gzugs kyis 'phags pa rnams/ /'jig rten rnams kyi mig tu sdug pa skal bzang rigs ni mthon por 'gyur/ /gang zag brtan zhing kun bzod shin du yid bzang dkar dang 'thun rnams dang / /mi rnams gang dag shes rab dag mchog sangs rgyas gsung la kha ton brtson/ /de dag 'byor pa thob nas rigs mchog skyes pa kun du kun mchog mdzes/ /de dag dge bas rgyas pas lus chen rgya mtsho chen po bzhin du spa/ /de nas bcom ldan 'das kyis yang spobs pa'i blo gros la bka' stsal pa/ spobs pa'i blo gros sems can las lnga dang ldan pa rnams ni bran dang bran mo nyid 'thob par 'gyur te/ lnga gang zhe na/ 'di lta ste/ pha ma rnams la mi gus pa dang / gya nom pa'i sems ma yin pa dang / zlog pa med cing ci dgar sdig pa spyod pa dang / gzhan gyi nor 'phrog pa dang / bu lon phrogs nas bdag sbed pa ste/ spobs pa'i 52.285a blo gros sems can las lnga po de dag dang ldan pa rnams ni bran dang / bran mo nyid 'thob par 'gyur ro/ /de nas bcom ldan 'das kyis de'i tshe tshigs su bcad pa 'di dag bka' stsal to/ /bsod nams rgya chen 'byor pa gangs 'od lta bu'i khyim du skye thob nas/ /blun po gang dag rgyags khengs dregs pas dkrugs shing gus par mi byed la/ /pha ma rnams la rmad byung sbyin gnas 'dra bar 'du shes mi byed pa/ /de dag nyes pas gzhan du 'jig rten dbang gyur dman zhing g.yon can 'gyur/ /dkon mchog mtshungs med rnams la ma gus lhur byed ma rungs brlang tshig 'gyur/ /gang dag byams dang de bzhin snying rje ma lus dge ba chud gzan pa/ /de dag grangs med skye bar 'dzin med gzhan 'joms ngo tsha mi shes shing / /mi yi yul du bran nyid spangs nas skad cig gis ni dma' bar 'gyur/ /gzugs dang dbang phyug rigs mchog blo bral dman la mos pa'i glen par 'gyur/ /dkon mchog rnams ma mchod pas nga rgyal med cing zhan la mdangs ngan 'gyur/ /dpal kun med cing ting 'dzin bral ba las rnams kyis ni bsdigs par 'gyur/ /de dag 'jig rten kun dga' dga' ston che sogs med cing tshegs kyis 'tsho/ /de nas bcom ldan 'das kyis yang spobs pa'i blo gros la bka' stsal pa/ spobs pa'i blo gros sems can las lnga dang ldan pa rnams ni skal ba bzang por 'gyur zhing khyim khol dang / kha dri zhim pa dang / gnod pa med pa dang / lus dang sems shin du sbyangs pa dang / blta na sdug pa dang / skye bo mang pos bsngags pa rnams su 'gyur te/ lnga gang zhe na/ 'du shes ji lta ba bzhin du yang dag pa dang / ma tshang ba med pa dang / sgro btags pa med pa'i tshig dang / nyan thos dang / rang sangs rgyas dang / theg pa chen po dang / theg pa rnam pa gsum po thams cad kyi tshig gi rang bzhin la mi bzod pa med cing mi smod la/ mi spong zhing de thams cad gzung ba dang / bshad pa dang / bklag pa dang / kha ton la sogs pa 52.285b byed pa dang / ngag gi skyon bzhi po tshad med pa rnam par spong zhing 'phags pa'i lam la skur pa mi 'debs pa dang sems can log par sgrub pa la gnas pa rnams la snying brtse zhing yongs su bskyang ba dang / skyon de las bzlog cing dge ba la dgod pa dang gzhan gyi skyon mthong ba'i brjod pa yal bar 'jog pa ste/ spobs pa'i blo gros sems can las lnga po de dag dang ldan pa rnams ni mi rnams kyi nang du skyes nas skal ba bzang por 'gyur zhing khyim khol dang ldan pa dang / kha dri zhim pa dang / yid gzhungs pa dang / 'thun pa dang / skye bo mang po dga' ba dang / mya ngan med pa dang / sems tha mal du gnas pa dang / khro ba med pa dang / gnod pa med pa dang / kha dog dang ldan pa dang / grags pa dang ldan pa rnams su 'gyur ro/ /de nas bcom ldan 'das kyis de'i tshe tshigs su bcad pa 'di dag bka' stsal to/ /sangs rgyas sogs la shin du shas cher gus 'bad pha ma rnams mchod pas/ /rtag tu ngag skyon kun bral 'jig rten dag tu rmad du byung bar 'gyur/ /tshig gi yon tan gzung 'os rnga sgrar bcas shing tshe rabs kun du phan/ /ud pal dri dang mdzes pa'i rlung ldan kha yis phyogs su snyan pa grags/ /gang dag bdag byams gzhan mtshungs mi phan skyon brjod sdig pa ngan pa las/ /phral nas dge ba kun la sems can rnams ni sbyor du 'jug byed pa/ /de dag 'jig rten thob nas skal ba bzang po kun du thams cad dga'/ /shin du yid 'ong rin chen yul can bde gnas sdig las log par 'gyur/ /dam pa'i chos ni gzung dang bstan brtson de sems med cing des par 'gyur/ /'dir ni sems can kun la pha ma 'dra bar byams pa'i sems ldan 'gyur/ /'das pa'i dus su lus can kun ni nged kyi rtsa lag tshogs gyur ces/ /de lta zla ba lta bu'i sems sbyangs de dag la ni phan par byed/ /'gran dregs khyad gsod la sogs rnam pa sna tshogs phan tshun sun 'byin pa'i/ /sdig pa yongs su spangs nas dag pa'i yid can skyon rnams kun sbas nas/ /sems can lhag pa'i bsam pa dge bas snyan tshogs phan tshun rjod 52.286a par byed/ /myur du lha yi dbang phyug mtshungs med thob nas sangs rgyas dge bar 'gyur/ /de nas bcom ldan 'das kyis yang spobs pa'i blo gros la bka' stsal pa/ spobs pa'i blo gros sems can las lnga dang ldan pa rnams ni mi'i dam pa thob nas rtag tu skur pa 'debs pa thob par 'gyur zhing skye bo mang po mi dga' ba dang / kha dri mi zhim pa dang / sems mi dga' ba dang / gnod pa mang ba dang / lus shin du sbyangs pa ma yin par 'gyur te/ lnga gang zhe na/ brdzun du smra ba dang / brdzun du smra bas rtag tu gzhan slu ba'i sems lhur len pa dang / chos kyi 'bel ba'i gtam chen po la 'dus pa na chos kyi gtam de la rnam par smod pa dang / tshangs pa mtshungs par spyod pa rnams mthong na de dag la brnyas shing khyad du gsod pa dang / dma' ba'i sems su byed pa ste/ spobs pa'i blo gros sems can las lnga po de dag dang ldan pa rnams ni mi'i dam pa thob nas rtag tu skur pa 'debs pa thob par 'gyur zhing skye bo mang po mi dga' ba dang / mdog mi sdug pa dang / kha dri mi zhim pa dang / sems mi dga' ba dang / gnod pa mang ba dang / lus shin du sbyangs pa ma yin par 'gyur ro/ /de nas bcom ldan 'das kyis de'i tshe tshigs su bcad pa 'di dag bka' stsal to/ sems yid rnams kyis gzhan sems drag tu 'khrug dang sdig pa rnams byas pas/ /log pa'i ngag dang gzhan la gnod par dga' ba tha ma rnams sems dang / /lus kyis sdug bsngal gzhal med rdzogs pa bar med nyams su myong bar 'gyur/ /lcags kyi lcags kyu chen po rnon po rnams kyis nyam thag lce 'byin 'gyur/ /gshin rje'i dbang phyug gnas su'ang mi rnams shin du zangs bskol ldud par 'gyur/ /dmyal bar mi bden tshig can skyes pa de dag dga' bar yong mi 'gyur/ /gang tshe 'dir ni tshig bzang bral ba ro ltar kha dri mi zhim zhing / /'jig rten mig tu yid 'ong blta na sdug pa ma yin rnams su 'gyur/ /rgyal po'i pho brang 'khor du mi snyan skur 'debs 52.286b rtsod pa'i skyon mang zhing / /de dag rtag tu skyon gnas mi ni sa ya mang pos gleng bar 'gyur/ /sems can brdzun smra rnams kyis tha mal sems dang lus bde ma yin phyir/ /sngar bshad nyes 'gro de yi 'bras bu sdug bsngal mang po spyod par 'gyur/ /mi nyid spangs nas dbang med mi rnams bde ba kun la slu byed pa'i/ /sems can dmyal ba'i 'jig rten 'gro 'gyur de nas shi 'phos gyur nas ni/ /'gro ba lnga po'i 'khor ba'i 'khor lo rtsub par dud 'gro rnams su skye/ /de ltar lus can 'khyam pa rnams kyi sdug bsngal zad par 'gyur ba med/ de nas bcom ldan 'das kyis yang spobs pa'i blo gros la bka' stsal pa/ spobs pa'i blo gros dge sbyong dang / rigs kyi bu dang / rigs kyi bu mo nye bar zhi ba gtso bor 'dzin pa'i sems can chos lnga dang ldan pa rnams ni gang dang gang du skye ba'i skye ba thams cad du rtag par sangs rgyas dang / chos dang / dge 'dun dang phrad pa thob par 'gyur zhing / sangs rgyas bcom ldan 'das rnams mthong nas kyang de dag las chos kyang thos nas yid dga' zhing ci bsams pa bzhin du byang chub rnams thob par 'gyur la/ ci 'dod pa bzhin du phun sum tshogs pa rnams kyang thob par 'gyur te/ lnga gang zhe na/ 'di lta ste/ bdag nyid dkon mchog gsum la skyabs su song nas gzhan dag kyang gsum la skyabs su 'gro ba sgrub pa la rnam par 'jog par byed pa dang / rnam pa thams cad kun du rdzogs shing rgyas la rgya chen po legs par byas pa'i de bzhin gshegs pa'i sku gzugs byed du 'jug pa dang / mkhan po dang slob dpon shes shing gus pa dang bcas pa dang / bka' blo bde ba dang 'thun par 'dzin par sgrub pa dang / kun du thogs pa med pa'i 'od zer rnams kyis sems can thams cad bdag dang 'dra zhing bu gcig pa'i byis pa dang 'dra bar mthong ba dang / ji ltar brtsams pa'i mdo sgrub pa dang / bklag pa dang / kha ton dang / lung mnod pa dang / bshad pa rnams yid la byed pa yangs shing rnam pa sna 52.287a tshogs pa dag gis bar chad med par bsgom pa la mngon par zhen cing sgrub par byed pa ste/ spobs pa'i blo gros dge sbyong dang / rigs kyi bu dang / rigs kyi bu mo nye bar zhi ba gtso bor 'dzin pa'i sems can chos lnga po de dag dang ldan pa rnams ni gang dang gang du skyes pa'i skye ba de dang de thams cad du bar chad med par sangs rgyas dang / chos dang / dge 'dun dkon mchog rnams dang mi 'bral bar 'gyur zhing / sangs rgyas bcom ldan 'das rnams mthong nas kyang de dag las chos kyang thos nas yid dga' zhing ci bsams pa bzhin du byang chub rnams thob par 'gyur la/ ci 'dod pa bzhin du phun sum tshogs pa rnams kyang thob par 'gyur ro/ /de nas bcom ldan 'das kyis de'i tshe tshigs su bcad pa 'di dag bka' stsal to/ /gang dag sangs rgyas yon tan mchog gi chos la gnas/ /de dag nyid kyis sems can thams cad 'dul bar byed/ /sangs rgyas sku gzugs gzugs legs rnams ni byed par 'gyur/ /mkhas pa rnams ni slob dpon tshig la mchod par byed/ /gang dag phyogs bcu rnams kyi 'jig rten ma lus la/ /bdag dang bu gcig byis pa rnams dang 'drar mthong ba/ /de dag sred pa kun du mya ngan med nges 'gyur/ /shin du rnam dag thugs mnga' sangs rgyas rnams kyang mthong / /gang dag shes rab rin chen chen po 'byor mdzad rnams/ /nyin dang mtshan du dge ba kun du spyod par byed/ /'dir ni rmad du byung ba'i 'od dang ldan pa rnams/ /'jig rten mun pa che la snang ba mchog byed 'gyur/ /kun du chos rnams thams cad rab tu rnam phye nas/ /sangs rgyas lam las mchog ni gzhan med par/ /nges par byas nas lha dang bcas pa'i 'jig rten gyi/ /mthar thug 'gro bar 'gyur ba'i rgyu ni shes par 'gyur/ /de nas tshong dpon spobs pa'i blo gros chos kyi rnam grangs 'di thos nas tshim zhing mgu ste/ yi rangs nas rab tu dga' ste/ dga' ba dang / yid bde ba skyes nas mi skye ba'i chos la bzod pa thob nas tshong dpon gyi bu lnga brgya tsam po dang / so so'i g.yog 'khor lnga brgya tsam po de dag ni chos rnams la chos kyi 52.287b mig rdul med cing dri ma dang bral ba thob bo/ /bcom ldan 'das kyi 'khor gyi dkyil 'khor du lha dang klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dang / mi dang / mi ma yin pa ji snyed 'dus par gyur pa de dag thams cad kyis ni ci bsams pa bzhin gyi theg pa rnams la sems bskyed do/ /ci 'dod pa bzhin du phun sum tshogs pa yang thob cing / me tog dang / phreng ba dang / gos dang / rgyan la sogs pa dpag tu med pa rnams kyis bcom ldan 'das la gtor to/ /de nas tshong dpon spobs pa'i blo gros stan las langs te bla gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas 'di skad ces gsol to/ /bcom ldan 'das khams gsum pa'i bla mas chos lnga po 'di dag legs par gsungs pa legs so legs so/ /chos lnga po de dag thos nas 'khor 'di yid bzhin du thams cad rdzogs par don grub par gyur lags so/ /ma 'ongs pa'i sems can rnams kyang 'di nyid thos nas nag po'i phyogs spangs te/ dkar po'i phyogs la zhugs shing brtul zhugs 'grub par 'gyur lags so/ /bcom ldan 'das dge slong gi dge 'dun dang thabs gcig tu sang bdag gi sdum par spyan 'dren na bdag cag la thugs brtse ba'i slad du khyod kyis de ltar gnang bar mdzad du gsol/ bcom ldan 'das kyis tshong dpon spobs pa'i blo gros la thugs brtse ba'i slad du gnang bar mdzad do/ /de nas tshong dpon spobs pa'i blo gros bcom ldan 'das kyis gnang bar rig nas tshim zhing mgu ste yid rangs nas rab tu dga' ste/ dga' ba dang yid bde ba skyes nas bcom ldan 'das kyi zhabs la mgo bos phyag 'tshal te/ bcom ldan 'das la lan gsum bskor ba byas nas g.yog 'khor dang bcas te/ bcom ldan 'das kyi thad nas song ngo / /de rang gi khyim du song nas pha ma gnyis kyi rkang pa la phyag byas te thal mo sbug 52.288a sbug por sbyar nas 'di skad ces smras so/ /yab yum 'di ltar gang 'jig rten na shin du dkon mchog gshegs pa bla na med pa chos kyi rgyal po khams gsum pa thams cad las 'das pa bcom ldan 'das dge slong gi dge 'dun dang thabs gcig tu sang bdag gis gdugs tshod la spyan drangs na/ des kyang bdag cag la thugs brtse ba'i slad du gnang lags kyis mkhyen par mdzod cig /de nas spobs pa'i blo gros kyi pha ma dag yid dga' ste 'di skad ces smras so/ /bu legs so/ /khyod kyis legs par byas so zhes mngon par bstod de/ de bzhin gshegs pa mchod pa'i las la spro bar gyur to/ /de nas spobs pa'i blo gros kyis rang gi chung ma pad ma g.yog 'khor dang bcas pa la bsgo ba/ bzang mo khyod kyis bcom ldan 'das de bzhin gshegs pa dgra bcom pa yang dag par rdzogs pa'i sangs rgyas 'khor dang bcas pa'i don du bza' ba dang btung ba ro brgya dang ldan pa mang ba dang bsod par sbyor cig /sbyar nas kyang khyim thams cad chag chag gdab pa dang / phyag dar bya ba dang / bla re bre ba dang / dar gyi lda ldi gdags pa dang / me tog chal par dgram pa dang / bdug spos dri zhim pos bdug par byed du bcug la/ de bzhin gshegs pa dge slong gi dge 'dun dang thabs gcig pa'i gdan ci 'os su thing ste/ mchod yon dang zhabs la dbul ba spyan sngar bzhag pas bcom ldan 'das dam pa de la sdod cig ces bsgo ste/ spobs pa'i blo gros mdza' bshes dang / blon po dang / nye du dang / rgan rabs la sogs pa dang lhan cig 'grogs shing ji skad smras pa thams cad byas so/ /de nas bcom ldan 'das de'i mtshan mo 'das nas dge slong gi dge 'dun dang thabs gcig tu rgyal bu rgyal byed kyi tshal bskyed mos tshal chen po nas byung nas sems can rnams la thugs brtse bas de bzhin gshegs pa'i rdzu 'phrul gyi dpal rnam par 'phrul pa yang dag par bstan pa'i rol pas cho 'phrul dang bcas pas mnyan du yod pa'i grong khyer chen por 52.288b gshegs so/ /gshegs nas kyang rim gyis spobs pa'i blo gros kyi khyim ga la ba de logs su bzhud do/ /de nas spobs pa'i blo gros g.yog 'khor dang bcas pas bcom ldan 'das bsu nas mchod yon dang zhabs la 'bul bas bcom ldan 'das kyi zhabs la mgo bos phyag 'tshal nas/ bcom ldan 'das zhabs 'bring ba dang bcas par khyim gyi nang du gshegs te/ bcom ldan 'das ni ci 'os pa'i gdan mchog la bzhugs so/ /dge slong gi dge 'dun ni ci 'os pa la 'khod do/ /de nas spobs pa'i blo gros kyi pha ma dang / slas dang / mdza' bshes dang / blon po dang / nye du dang / rgan rabs rnams ni yid dga' zhing 'dud la bla ma la gus pa dang gces pa'i byed pa chen pos bcom ldan 'das dge slong gi dge 'dun dang thabs gcig pa la 'drim par rtsom mo/ /spobs pa'i blo gros ni me tog dang / spos chur bcas pas bkang ba'i ril ba thogs nas ston pa'i spyan sngar 'dug par gyur to/ /yang de'i tshe sdug bsngal ba'i grogs po gnyis shig spobs pa'i blo gros kyi khyim du phyin par gyur nas/ de gnyis las gcig ni dge 'dun gyi nang du zhugs so/ /de'i tshe dge slong thams cad la bza' ba dang btung ba 'byor tshogs shes ma smras la/ bcom ldan 'das kyis kyang rjes su thugs rang ba ma gsungs pas/ de gang gis kyang ci yang ma byin nas/ de khros te phyir byung nas 'di snyam du kye ma sdug bsngal ba bdag la gang gis ci yang ma byin pa ni dge sbyong bdag nyid ngan pa rnams te/ sems nye bar zhi ba ma yin zhing snying rje med la byams pa'i sems dang ldan pa ma yin pa dag go/ /gang de dag la byin yang 'bras bu med pa de lta bu dag la sbyin par byed pa ni sbyin bdag blun po ste/ gal te bdag rgyal por gyur na thams cad kyi mgo lcags kyi 'khor los gcad do snyam du sems par gyur to/ /de nas de'i 'og tu dge slong thams cad la bza' ba dang / bca' ba dag 'byor tshogs shes byas 52.289a shing / bcom ldan 'das kyis kyang rjes su thugs rang bar mdzad pa dang / gcig shos 'ongs par gyur to/ /des ni bza' ba dang / tung ba mang ba dang / bsod pa thob nas de yi rangs te/ phyir byung nas 'di snyam du kye ma sdug bsngal ba bdag la gang dag gis bza' ba dang / btung ba mang ba dang / bsod pa byin pa ni dge sbyong bdag nyid chen po rnams te/ snying brtse bar byed la sems nye bar zhi ba yin zhing byams pa'i bdag nyid can dag go/ /'dis ni bdag zhag bdun du tshim par 'gyur bar byaso/ /gang 'di dag la byin na 'bras bu che ba sbyin gnas chen po 'di lta bu dag la sbyin par byed pa ni sbyin bdag chen po mkhas pa ste/ legs so/ /gal te bdag rgyal por gyur na sangs rgyas la sogs pa dge slong gi dge 'dun la zhag bdun du bsnyen bkur thams cad kyis rim gro byed par gyur cig snyam du sems par gyur to/ /de nas bcom ldan 'das gdugs tshod gsol nas/ gtsang bder gyu ste phyag bcabs nas/ tshe dang ldan pa kun dga' bo la bka' stsal pa/ kun dga' bo deng phyin chad bza' ba dang / btung ba ma blangs pa nyid du rjes su yi rang ba rjod cig /de nas spobs pa'i blo gros g.yog 'khor dang bcas te/ bcom ldan 'das kyi spyan sngar 'dug go/ /bcom ldan 'das kyis de la yang dag par dga' ba dang / yang dag par gzeng bstod pa dang / yang dag par 'dzin du gzhug pa sngon du mdzad pa'i chos kyi gtam sems can mang po'i dge ba'i rtsa ba rnam pa sna tshogs bskyed pa mdzad de/ gdan las bzhengs nas bzhud de/ rgyal bu rgyal byed kyi tshal du gshegs nas de na bzhugs so/ /de nas sdug bsngal ba de gnyis 'khor 'khor 'khyam 'khyam ste/ yul gzhan zhig tu song nas pha zad tshu zad tsam gyi phyogs su nyal bar gyur to/ /der bsod nams kyi las can de la steng 52.289b gi nam mkha' la grib ma'i don du sprin gyi bla re glog dang rlung 'byung ba dang bcas pa rab tu gnas par gyur to/ /de'i tshe yul de na rgyal po gang yin pa de 'chi ba'i dus byas so/ /de na gang rgyal srid la dbang bskur bar bya ba'i rgyal po'i mtshan dang ldan pa yang gzhan med do/ /de na tshong dpon dang / grong mi dang / yul mi dang / blon po chen po dang / blon po dang / sgo ba dang / 'khor na 'khod pa rnams ni mtshan mkhan dang / stas mkhan dang / skar ma dang / gza' spyod pa la mkhas pa la rgyal por 'gyur ba su yod ces brtson par gyur cing 'dri'o/ /des smras pa/ skyes bu dbul po mtshan dang ldan pa zhig yod do/ /de ni rgyal por 'gyur ro/ /de nas de dag rgyan thams cad kyis brgyan pa rgyal po la 'os pa rin thang che ba'i khri stan bzang po gser gyi rkang rten dang bcas pa dang / yu ba nor bu las byas pa'i gdugs dkar po dang / yu ba gser las byas shing nor bu dang ldan pa'i rnga ma'i bsil yab dang / spos chus bkang ba'i bum pa du ma dang / me tog dang / rgyan phreng dang / gos dang / dbu rgyan dang / thod dang bcas pa la sogs pa'i rgyan dang / spos kyi phur ma dang / slo ma dag thogs te/ sil snyan dang / pheg rdob pa dang / glu dbyangs dang bcas pa dag dang / rgyal po'i pho brang 'khor nas byung ste/ kun nas de kun tu btsal to/ /ltas mkhan des sprin kyi tshogs kyis bkab pa'i phyogs de mthong ste/ mthong nas kyang de dag la smras pa/ grogs po dag khyed cag gis sprin ston po'i dkyil 'khor gyis khebs pa dga' zhing gsal ba'i phyogs de mthong ngam/ de dag gis smras pa/ grogs po mthong ngo / /des smras pa/ de na rgyal po'i mtshan dang ldan pa'i skyes bu de 'dug ste/ de'i bsod nams kyi las kyis grib ma'i don tu sprin de dag 'dus so/ /de nas de dag der dong nas/ sil snyan dang / 52.290a glu dbyangs kyi sgras sbran te btud nas de la 'di skad ces smras so/ /dbang bskur ba bzhes la rgyal por gyur cig /des smras pa/ kho bo lta bu rgyal po'i 'os ga la yin/ de dag gis smras pa/ bsod nams kyi las can khyod de skad ma zer bar gdon mi za bar rgyal po bya dgos so/ /smras pa de bzhin du gyur cig de nas de dag gis mal gyi rkang rten la rkang pa gzhag pa de sten bzang po la 'dug tu bcug nas bkra shis thams cad kyis rgyas par byed cing dbang bskur te/ dbu rgyan dar thod can la sogs pa'i rgyan rnams kyis brgyan nas/ shing rta'i mgo logs su gdugs chen po bsgreng ste/ btsugs shing yu ba gser las byas pa nor bu can gyi rnga ma'i bsil yab dag gis g.yob cing / lha rgyal bar gyur cig /rgyal bar gyur cig ces kun nas mngon par bstod de rgyal po'i pho brang 'khor du khrid do/ /de nas rgyal po'i shing rta de bsgyur ba'i 'khor los bkren pa gcig shos gnyid log pa'i mgo chad do/ /de nas bsod nams kyi las can de yang rgyal srid la gnas par gyur to/ /de'i rgyal srid de yang yams kyi nad dang / gnod pa med pa dang / 'byor pa dang / rgyas pa dang / bde ba dang / lo legs pa dang / skye bo dang / mi mang pos gang bar gyur to/ /rgyal po'i ming gis yon tan thams cad 'byor cing ldan par gyur la/ dga' dgur spyod pa de 'di snyam du 'di gang gi mthu yin/ bdag gi rgyal srid skal ba bzang po dang ldan pa 'di gang gis byung bar gyur snyam pa dang / de sangs rgyas kyi mthus sngon gyi las mngon par 'du byas pa de thams cad rjes su dran no/ /yang dag par dran nas kyang bcom ldan 'das kyi thad du bcom ldan 'das bdag cag sems can mang po gzhan rnams la thugs brtse ba'i slad du tshur gshegs su gsol zhes pho nya zhig btang ngo / /pho nya btang nas kyang rgyal bu rgyal byed kyi tshal gyi bar dang / rang gi khyim gyi bar du bar der bcom ldan 'das 52.290b kyi thams cad dang ldan pa'i lam chag chag btab cing phyag dar byas te/ me tog chal par bkram nas gdugs dang rgyal mtshan dang / ba dan dang / rta babs btsugs shing pog phor dag gis bdugs nas mngon par brgyan te/ bcom ldan 'das kyang de la thugs brtse ba'i slad du gshegs so/ /de nas rgyal po de grong khyer gyi mi dang / yul mi dang bcas shing blon po chen po dang / blon po dang / sgo ba dang / 'khor gyi tshogs dang bcas pas bsu'o/ /des bcom ldan 'das kyi zhabs la me tog dang / spos dang / me tog phreng dang / byug pa dang / phye mas bsgos pa'i slo ma dpag tu med pas mchod de/ dge slong gi dge 'dun dang bcas pa'i zhabs la lus thams cad kyis phyag 'tshal nas/ 'khor dang bcas te bcom ldan 'das la bla ma la gus pa dang gces par byed pa chen po mchog gis bcom ldan 'das dge 'dun dang thabs gcig tu rang gi khyim gyi nang rin po che thams cad kyis brgyan pa/ bskyed mos tshal chen pos yongs su bskor bar gshegs su gsol nas/ zhag bdun du bde ba'i yo byad thams cad kyis rim gro byas so/ /de nas rgyal po des bcom ldan 'das gdugs tshod gsol nas/ bstsang sder gyu ste/ phyag bcabs par rigs nas/ chos mnyan pa'i phyir g.yog 'khor dang bcas par bcom ldan 'das kyi spyan sngar 'dug ste 'di skad ces kyang gsol to/ /bcom ldan 'das bdag ni dma' ba dang / dbul ba lags na/ bdag gi rgyal srid phun sum tshogs pa 'di ga las mchis lags/ bcom ldan 'das kyis bka' stsal pa/ rgyal po chen po mnyan du yod pa'i grong khyer chen po na sbyin bdag chen po spobs pa'i blo gros shes bya ba zhig yod de/ des dus gzhan zhig na rang gi khyim du sangs rgyas la sogs pa dge slong gi dge 'dun gdugs tshod gsol to/ /de nas der sdug bsngal ba gnyis shig lhags shes bya ba nas rgyas par snga ma bzhin te/ gcig gi mgo khyed 52.291a kyis shing rta'i 'khor los chod pa zhes bya ba'i bar du'o/ /de yang shi 'phos nas sems can dmyal bar skyes te/ der skyes pa de'i mgo skad cig skad cig la skyes so cog na lcags kyi 'khor lo 'bar bas bcad do/ /de yang de nas bskal pa bye bas thar bar 'gyur ro/ /khyod kyis ni rgyal po'i dpal thob ste/ bdag de lta bur gyur nas sangs rgyas la sogs pa dge slong gi dge 'dun zhag bdun du gdugs tshod gsol bar gyur cig ces khyod kyis smon lam btab ste/ khyod kyi bsam pa de yang rdzogs so/ /de phyin cad ni tshe rabs dpag tu med pa thams cad du phun sum tshogs pa ches khyad par du 'phags pa dag 'thob par 'gyur ro/ /de nas bcom ldan 'das kyis de'i tshe tshigs su bcad pa 'di dag bka' stsal to/ /'jig rten nag po 'byung ba'i phyir/ /yid ni dug gi rtsa ba yin/ /nyes par smra rnams 'byung ba'i phyir/ /kha ni sdig pa'i sgo nyid do/ /sems kyis sna tshogs sems par byed/ /de nas tshig tu smra bar 'gyur/ /ngag yid dag gis sdig byas pa/ /lus skyes sdug bsngal sbyin par byed/ /phan dang mi phan ma bsams par/ /gla med pas ni sdig byed pa/ /des na sdug bsngal snod 'gyur te/ /nyon mongs pa dag de ltar 'gyur/ /mkhas pa rnams kyi mgo bo dag /yid kyis gcod par 'dod pa de/ /blo gros ngan pa mi shes pa'i/ /mgo ni 'khor los yang dag chod/ /dpal ldan yid 'di kho nas ni/ /chos dkar bdud rtsi rten pa yi/ /sems can bsod nams byas dge rnams/ /lha'i 'jig rten rnams su khrid/ /'dir ni snying gis kun bsams nas/ /tshig tu rjod pas legs smras pa/ /de phyir de ni lus kyis su/ /bsod nams mdzod ni len par 'gyur/ /mi yis blo ni sngon 52.291b btang ste/ /las dge mi dge rnams phye nas/ /gal te bsod nams che byed na/ /rtag tu rab tu lha der 'gyur/ /sems kyis mi dge ba yi las/ /rtag tu yongs su spangs nas ni/ /rab tu dga' bas bsod nams nyid/ /mi yis bya ste sdig pa min/ /tshe rabs bye ba grangs med par/ /'khor los sgyur sogs go 'phang gi/ /lha mi'i nang du rgyal po'i dpal/ /thams cad thob nas khyod bzhin no/ /mi yi dbang phyug dus kun du/ /srid rnams snying po med shes nas/ /khyod kyis sangs rgyas chos rnams la/ /mngon par brtson pa mtha' yas bya/ /de nas bcom ldan 'das la rgyal po des yang dag phul gyi chos bstan pa 'di thos nas mchog tu yid byung ste/ 'khor dang bcas pas rgyun du zhugs pa'i 'bras bu thob po/ /gzhan stong phrag mang po zhig gis ni bcom ldan 'das mthong ba dang / chos mnyan pas lha dang mi'i phun sum tshogs pa rnam pa sna tshogs thob par 'gyur ba dang / thar pa'i cha dang 'thun pa'i dge ba'i rtsa ba dag bskyed do/ /de nas bcom ldan 'das kyis der gang sems can rnams kyi don mdzad pa de thams cad rgyas par mdzad nas rgyal bu rgyal byed kyi tshal du byon te/ gtsug lag khang gi skyobs shig tu/ dge slong gi dge 'dun gyi nang du sangs rgyas kyi gdan bshams pa nyid la bzhugs nas/ tshe dang ldan pa kun dga' bo la bka' stsal pa/ kun dga' bo khyod kyis chos kyi rnam grangs 'di zung shig /chongs shig lhogs shig /gzhan dag la yang rgya cher yang dag par rab tu ston cig /kun dga' bo rigs kyi bu 'am/ rigs kyi bu mo gang su dag chos kyi rnam grangs 'di 'dzin par byed pa de thams cad kyis de bzhin gshegs pa dgra bcom pa yang dag par rdzogs pa'i sangs rgyas byams pa las ji ltar smon lam btab pa'i theg pa rnams la lung bstan pa thob par 'gyur ro/ /de nas bcom ldan 52.292a 'das la tshe dang ldan pa kun dga' bos 'di skad ces gsol to/ /bcom ldan 'das chos kyi rnam grangs 'di'i ming ci lags/ 'di ji ltar gzung bar bgyi/ bcom ldan 'das kyis bka' stsal pa kun dga' bo de'i phyir chos kyi rnam grangs 'di ni las rnam par 'byed pa bstan pa zhes bya bar zung shig /tshong dpon spobs pa'i blo gros kyis zhus pa zhes bya bar yang zung shig /bcom ldan 'das kyis de skad ces bka' stsal nas/ tshe dang ldan pa kun dga' bo dang / dge slong de dag dang / byang chub sems dpa' de dag dang / tshong dpon spobs pa'i blo gros g.yog 'khor dang bcas pa dang / thams cad dang ldan pa'i 'khor dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do// //'phags pa spobs pa'i blo gros kyis zhus pa zhes bya ba theg pa chen po'i mdo/ rdzogs so// // rgya gar gyi mkhan po pradz+nyA barma dang / zhu chen gyi lo ts+tsha ba ban de ye shes sde la sogs pas bsgyur cing zhus te gtan la phab pa/ /yang zhus byang / 'jam pa'i dbyangs kyi sprul pa lo ts+tsha ba chen po 'thon mi sam b+ho skra'i bzhed pa dang / de'i dgongs pa lo ts+tsha ba chen po mkhas pa'i dbang po nam mkha' bzang po zhes bya ba'i 'grel pa dang / gzhan yang legs bshad du ma dang / bstun nas glegs pam 'di'i mgo mjug gi sdeb sbyor rnams legs par gtan la phab nas bzhag cing / sngar gyi rnams kyis ma dag pa mang po shes lo byas nas bcos 'dug pas shin tu ma dag par btang zhing / da phyin cad mi bcos par bzhag go/ gal te bcos na legs bshad du ma las nyams shing chos skyong rnams kyis bkas tshar bcad gsol lo// // # |