rgya gar skad du/ Ar+ya ba su d+ha ra nA ma d+hA ra NI/ bod skad du/ 'phags pa nor gyi rgyun ces bya ba'i gzungs/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das kau sham+bi na tsher ma can zhes bya ba'i nags mchog chen po na/ dge slong lnga brgya tsam gyi dge slong gi dge 'dun chen po dang / byang chub sems dpa' sems dpa' chen po sangs rgyas kyi yon tan thams cad dang ldan pa rab tu mang po dang thabs gcig tu bzhugs te/ de'i tshe kau sham+bi'i grong khyer chen po na khyim bdag zla ba bzang po zhes bya ba/ dbang po nye bar zhi ba/ yid nye bar zhi ba/ bu pho dang / bu mo mang ba/ gza' mi mang po dang ldan pa/ dad cing cher dad pa zhig gnas pa de/ bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te/ lan 'bum phrag du mar bskor ba byas nas phyogs gcig tu 'dug go /phyogs gcig tu 'dug nas khyim bdag zla ba bzang pos bcom ldan 'das la 'di skad ces gsol to/ /gal te zhus nas zhu ba lung bstan pa'i slad du bcom ldan 'das kyis bdag la skabs phye 107.156b na/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas la bdag phyogs 'ga' zhig zhu lags so/ /de skad ces gsol pa dang / bcom ldan 'das kyis khyim bdag zla ba bzang po la 'di skad ces bka' stsal to/ /khyim bdag ci dang ci 'dod pa dris shig dang / khyod kyis ji skad dris pa'i dri ba lung bstan pas ngas khyod kyi sems rangs par bya'o/ /de skad ces bka' stsal pa dang / khyim bdag zla ba bzang pos bcom ldan 'das legs so zhes gsol te/ bcom ldan 'das kyi ltar mnyan nas bcom ldan 'das la 'di skad ces gsol to/ /bcom ldan 'das rigs kyi bu 'am/ rigs kyi bu mo dbul por gyur pa las ji ltar dbul ba ma mchis par 'gyur zhing / bro nad kyis thebs na yang bro nad ma mchis par 'gyur ba lags/ de nas bcom ldan 'das kyis mkhyen bzhin du khyim bdag zla ba bzang po la 'di skad ces bka' stsal to/ /khyim bdag khyod ci'i phyir dbul po'i don du 'dri/ de skad ces bka' stsal pa dang / bcom ldan 'das la khyim bdag zla ba bzang pos 'di skad ces gsol to/ /bcom ldan 'das bdag ni dbul ba mang ba dang / gso ba mang ba/ bu pho dang / bu mo mang ba/ bza' mi mang po dang ldan pa lags te/ de'i slad du gang gi sems can dbul po rnams kyi dbul ba ma mchis par 'gyur ba dang / bro nad kyis thebs pa rnams bro nad ma mchis par 'gyur ba dang / nor dang / 'bru dang / mdzod dang / bang mdzod mang po dang ldan par 'gyur ba dang / sdug pa dang / yid du mchi ba dang / mthong na yid du 'thad pa dang / dbang phyug tu 'gyur ba dang / sbyin bdag mdzod pas mi 'tshal zhing / dbyig dang / gser dang / nor dang / 'bru'i mdzod dang / bang mdzod rnams dang / nor bu dang / mu tig dang / rdo rje dang / bai dUr+ya dang / dung dang / man shel dang / byi ru dang / sa le sbram dang / dbul bas ma 'tshal cing 'byor par 'gyur ba dang / khyim gyi bu smad dang / bza' mi rnams brtan par 'gyur ba'i chos 107.157a kyi rnam grangs de bcom ldan 'das kyis legs par bshad du gsol/ de skad ces gsol pa dang / bcom ldan 'das kyis khyim bdag zla ba bzang po la 'di skad ces bka' stsal to/ /khyim bdag 'das pa'i dus bskal pa grangs med pa 'das par gyur pa de'i tshe de'i dus na/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba/ bla na med pa/ lha dang mi rnams kyi ston pa/ sangs rgyas bcom ldan 'das rdo rje 'chang rgya mtsho'i dbyangs zhes bya ba 'jig rten du byung ste/ rigs kyi bu ngas de bzhin gshegs pa de las nor gyi rgyun ces bya ba'i gzungs 'di thos te bzung zhing bcangs/ bklags/ kun chub par byas/ rjes su yi rang par byas shing / gzhan dag la yang rgya cher yang dag par rab tu bstan te/ rigs kyi bu da yang ngas de bshad par bya'o/ /rigs kyi bu gzungs sngags 'di'i mthus mi rnams rnam par mtho 'tsham par mi byed do/ /mi ma yin pa rnams rnam par mtho 'tsham par mi byed do/ /gnod sbyin rnams rnam par mtho 'tsham par mi byed do/ /srin po rnams rnam par mtho 'tsham par mi byed do/ /yi dgas rnams rnam par mtho 'tsham par mi byed do/ /sha za rnams rnam par mtho 'tsham par mi byed do/ /'byung po rnams rnam par mtho 'tsham par mi byed do/ /grul bum rnams rnam par mtho 'tsham par mi byed do/ /rjed byed rnams rnam par mtho 'tsham par mi byed do/ /gnon po rnams rnam par mtho 'tsham par mi byed do/ /lus srul po rnams rnam par mtho 'tsham par mi byed do/ /lha ma yin rnams rnam par mtho 'tsham par mi byed do/ /zas su mi gtsang ba za ba rnams dang / zas su gcin 'thung ba rnams dang / zas su khrag 'thung ba rnams dang / zas su sha za ba rnams dang / 107.157b zas su rnag 'thung ba rnams dang / zas su zhag za ba rnams dang / zas su rkang za ba rnams dang / zas su ngar snabs za ba rnams dang / zas su gtor khung nas 'bab pa za ba rnams dang / zas su dbug rngub pa dang / 'byung ba za ba'i bar rnams rnam par 'tshe bar mi 'gyur ro/ /rigs kyi bu nor gyi rgyun gyi gzungs 'di rigs kyi bu 'am/ rigs kyi bu mo gang gi khyim na yod dam/ snying la yod dam/ lag na yod dam/ glegs bam du chud dam/ thos par gyur tam/ kun chub par byas sam/ bklags sam/ bzung ngam/ rjes su yi rang bar byas sam/ gzhan dag la rgya cher rab tu bstan pa'i rigs kyi bu 'am/ rigs kyi bu mo de la yun ring po'i don dang / phan pa dang / dge ba dang / grub pa dang / bde ba dang / lo legs par 'gyur ro/ /su zhig de bzhin gshegs pa rnams la mchod pa byas te/ nor gyi rgyun gyi gzungs 'di nam phyed na lan gnyis sam/ lan gsum 'am/ lan bzhi bton na de'i lha yi rangs te/ de bzhin gshegs pa'i bstan pa la dga' ba dang / chos gdags pa byas pas dga' ba dang / dge 'dun gdags pa byas pas dga' ba dang / chos smra ba la dga' ba dang lhag pa'i bsam pas bdag nyid 'ongs te 'bru'i char 'bebs so/ /na mo badzra d+ha ra sA ga nir go ShA ya/ ta thA ga tA ya/ tad+ya thA/ o~M su ru pe/ b+ha dre/ b+ha drA ba ti/ ang ga le/ mang ga le/ mang ga la ba ti/ a le/ a tsa le/ a tsa la ba le/ ud g+ha ta ni/ ud b+he da ni/ bas+ya ba ti/ dA na pa ti/ d+ha n+ya pra ti/ shri ma ti/ pra b+ha ba ti/ a ma le/ bi ma le/ nir ma le/ ru ru/ su ru pe/ su ru pa ma le/ bi ma le/ tsa le/ artsa naste/ a nan ste/ bin naste/ bi shwo ke shi/ bi sho ni shi/ ang ku re/ mang ku re/ pra bang ku re/ bi ra me/ bi ra me/ bi d+ha me/ ri ri me/ di di me/ du du me/ kha kha me/ ta ta re/ ta ra ta ra/ tA ra tA ra/ badzre badzre badzre ba me/ Ta ke Ta ke /Tha ke Tha ke /ug ke /bug ke /Tha ke Tha ra ke /a 107.158a brta ni/ ba ra sha na/ Sha da ni badzra d+hA ra sA ga ra nir go ShA na/ ta thA ga ta ma nu sma ra/ sma ra/ sma ra/ sarba ta thA ga tA sa t+ya ma nu sma ra/ d+harma sa t+ya ma nu sma ra/ sang g+ha sa t+ya ma nu sma ra/ da Ta da Ta/ pU ra pU ra pU ra ya/ pU ra ni/ b+ha ra b+ha ra ni/ a ma le/ su mang ga le/ shAn ta ma ti/ shu pA ma ti/ mang ga la b+ha ni/ ma hA ba ti/ b+ha dra ba ti/ pra b+ha ba ti/ su tsan dra ma ti/ a gad tshe a gad tshe/ sa ma ya ma nu sma ra swA hA/ a ba ra ni ma nu sma ra swA hA/ pra b+ha ba ma nu sma ra swA hA/ d+hi di ma nu sma ra swA hA/ te dza ma nu sma ra swA hA/ bi dza ya ma nu sma ra swA hA/ hri da ya ma nu sma ra swA hA/ sarba swa twa bi na ya ma nu sma ra swA hA/ o~M ba su d+ha re swA hA/ o~M ba su shri+A ye swA hA/ o~M shrI ba su swA hA/ o~M ba su swA hA/ rigs kyi bu 'di ni nor rgyun ces bya ba'i gzungs te/ gzungs sngags 'di'i mthus mu ge dang / nad dang / 'chi ngas 'byung bar mi 'gyur ro/ /rigs kyi bu su zhig de bzhin gshegs pa dgra bcom pa yang dag par rdzogs pa'i sangs rgyas rnams la mchod pa byas te/ nor gyi rgyun gyi gzungs kyi gsang sngags kyi tshig 'di dag nub gcig bton na/ de nas dngos grub tu 'gyur ro/ /rgyas pa'i don du bdag gi khyim 'am/ gzhan gyi khyim 'am/ gnas gtsang ma bang mdzod dam/ gnas gang du yang rung bar de bzhin gshegs pa spyan ras gzigs dbang phyug dang / sangs rgyas dang / byang chub sems dpa' thams cad dang / gsang sngags kyi lha'i phyir tsan dan gyis dkyil 'khor gru bzhir byas te nub gcig bton na/ rigs kyi bu de'i khyim nor dang / 'bru dang / gser dngul dang / lo byad thams cad kyi rgyun mi chen po'i mtshan tsam gyis gang bar 'gyur ro/ /'jigs pa dang / gnod pa thams cad kyang med par 'gyur ro/ /rigs kyi bu de'i phyir khyod rab tu sgrims la nor gyi rgyun gyi gzungs 'di 107.158b zung shig /chongs shig /lhogs shig /ston cig /gzhan dag la yang rgya cher yang dag par rab tu ston cig dang / de khyod kyi yun ring po'i don dang / phan pa dang / bde bar 'gyur ro/ /bcom ldan 'das legs so zhes gsol te/ khyim bdag zla ba bzang pos bcom ldan 'das las nor gyi rgyun gyi gzungs 'di thos nas tshim zhing dga' la mgu zhing yi rangs te rab tu dga' nas/ dga' ba dang / yid bde ba skyes te/ bcom ldan 'das kyi zhabs la mgo bos phyag 'tshal nas bcom ldan 'das la 'di skad ces gsol to/ /bcom ldan 'das bdag gis nor gyi rgyun ces bgyi ba blangs lags/ gzungs su zin lags/ gzungs lags/ bklags lags/ kun chub par bgyis lags/ rjes su yi rang bar bgyis lags te/ gzhan dag la yang rgya cher yang dag par rab tu bstan par bgyi lags so/ /de'i skad cig tsam la khyim bdag zla ba bzang po'i bang mdzod rnams yongs su gang bar gyur to/ /de nas khyim bdag zla ba bzang pos bcom ldan 'das la lan 'bum phrag du mar bskor ba byas te/ bcom ldan 'das kyi zhabs la phyag 'tshal nas/ bcom ldan 'das kyi thad nas song ngo / /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo khyod song la khyim bdag zla ba bzang po'i khyim nor dang / 'brus yongs su gang ba phun sum tshogs pa dang / mdzod chen po dang / bang mdzod yongs su gang ba rnams la ltos/ de nas tshe dang ldan pa kun dga' bos bcom ldan 'das kyi ltar mnyan nas kau sham+bi'i grong khyer chen po ga la ba dang / khyim bdag zla ba bzang po'i khyim ga la ba der song ste / phyin nas nang du zhugs pa dang / nor dang / 'brus yongs su gang ba phun sum tshogs pa dang / rin po che phun sum tshogs pa dang / yo byad thams cad kyi mdzod chen po dang / bang mdzod rnams kyang yongs su gang bar mthong ngo / / 107.159a mthong nas kyang tshim zhing dga' la 'gu zhing yi rangs te rab tu dga' nas dga' ba dang / yid bde ba skyes te/ bcom ldan 'das ga la ba der song ngo / /de nas tshe dang ldan pa kun dga' bo ya mtshan du 'dzin cing / dga' ba dang / yid bde ba skyes nas bcom ldan 'das la 'di skad ces gsol to/ /bcom ldan 'das gang gis khyim bdag zla ba bzang po nor mang zhing mdzod chen po dang / bang mdzod rnams kyang nor dang 'bru phun sum tshogs pa'i rgyu gang lags/ rkyen gang lags/ bcom ldan 'das kyis bka' stsal pa/ kun dga' bo rigs kyi bu khyim bdag zla ba bzang po dad cing mchog tu dad cing dge ba'i bsam pa can des nor gyi rgyun gyi gzungs 'di bzung zhing rab tu bton te/ blangs shing / bklags/ kun chub par byas/ rjes su yi rang bar byas shing / gzhan dag la yang rgya cher yang dag par rab tu bstan pa'i phyir ro/ /kun dga' bo de'i phyir khyod kyis kyang nor gyi rgyun gyi gzungs 'di long shig /chongs shig /lhogs shig /ston cig /zung shig /kun chub par gyis shig /gzhan dag la yang rgya cher yang dag par rab tu ston cig dang / de ni skye bo mang po la phan pa dang / skye bo mang po la bde ba dang / 'jig rten la snying brtse ba dang / skye bo phal po che dang / lha dang / mi rnams kyi don dang / phan pa dang bde bar 'gyur ro/ /kun dga' bo su zhig rig sngags 'di las gzhan du smra ba ni lha dang bcas pa dang / bdud dang bcas pa dang / tshangs pa dang bcas pa dang / dge sbyong dang bram zer bcas pa dang / lha dang / mi dang / lha ma yin du bcas pa'i 'jig rten na ngas ma mthong ngo / /lan gnyis su bton tam/ lan gsum du bton kyang 'gal bar byed pa de ni gnas med do/ /kun dga' bo gzungs kyi gsang sngags kyi tshig 'di dag ni mi phyed pa yin no/ /kun dga' bo 'di dag ni sems can dge ba'i rtsa ba zad pa rnams kyi rna lam du grags par mi 'gyur na glegs bam la yi ger bri ba dang / yid la gzung ba lta ci smos/ de ci'i phyir zhe na/ 'di ni de bzhin gshegs pa thams cad kyi bka' ste/ gzungs sngags 'di ni sems can dbul po dang / nad sna 107.159b tshogs kyis gzir ba dang / 'jigs pa dang / sems can sdang bas gnod par byas pa thams cad kyi don du de bzhin gshegs pa thams cad kyis gsungs pa dang / bshad pa dang / rjes su yi rang ba dang / rab tu phye ba dang / bsngags pa dang / bkrol ba dang / gsal bar mdzad pa dang / bskyed pa dang / byin gyis brlabs pa dang / chos kyi phyag rgyas btab pa dang / bstod pa dang / snyan par brjod pa dang / go bar mdzad pa dang / bsnyad pa'i phyir ro/ /de nas tshe dang ldan pa kun dga' bo stan las langs te/ de'i tshe thal mo sbyar nas ched du brjod pa 'di ched du brjod cing tshigs su bcad pa 'di dag gsol to/ /sangs rgyas bcom ldan bsam gyis mi khyab ste/ /sangs rgyas chos kyang bsam gyis mi khyab lags/ /bsam gyis mi khyab pa la dad rnams kyi/ /rnam par smin pa 'ang bsam gyis mi khyab lags/ /zhi ba ci yang mkhyen pa thams cad mkhyen/ /chos kyi rgyal po rga shi mi mnga' ba/ /ye shes pha rol bgrod par phyin gyur pa/ /sangs rgyas dpa' bo khyod la phyag 'tshal lo/ /de nas tshe dang ldan pa kun dga' bo tshim zhing dga' la mgu zhing yi rangs nas rab tu dga' ste/ dga' ba dang yid bde ba skyes nas bcom ldan 'das la 'di skad ces gsol to/ /bcom ldan 'das chos kyi rnam grangs 'di'i ming ci lags/ 'di ji ltar gzung bar bgyi/ bcom ldan 'das kyis bka' stsal pa/ kun dga' bo 'di ni khyim bdag zla ba bzang pos zhus pa zhes bya bar zung shig /nor dang / 'bru dang / rin po che thams cad kyi gter zhes bya bar yang zung shig /de bzhin gshegs pa thams cad kyis bsngags pa nor gyi rgyun gyi gzungs zhes bya bar yang zung shig /bcom ldan 'das kyis de skad ces bka' stsal nas/ tshe dang ldan pa kun dga' bo dang / dge slong de dag dang / byang chub sems dpa' de dag dang / thams cad dang ldan pa'i 'khor de dang / lha dang / mi dang / lha ma yin dang / dri 107.160a zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa nor gyi rgyun ces bya ba'i gzungs rdzogs s+ho// |