@#/ /rgya gar skad du/ Ar+yA gra ha mA tri ka nA ma d+hA ra NI/ bod skad du/ 'phags ma gza' rnams kyi yum zhes bya ba'i gzungs/ 'phags ma bcom ldan 'das ma gza' rnams kyi yum la phyag 'tshal lo/ /'di skad bdag gis thos pa dus gcig na/ bcom ldan 'das 'brog gnas kyi grong khyer chen po na/ lha dang / klu dang / gnod sbyin dang / srin po dang / dri za dang / lha ma yin dang / nam mkha' lding dang / mi 'am ci dang / lto 'phye chen po dang / bdud dang / gshin rje dang / nyi ma dang / zla ba dang / mig dmar dang / gza' lhag dang / phur bu dang / pa ba sangs dang / spen pa dang / sgra gcan dang / mjug rings dang / rgyu skar nyi shu rtsa brgyad la sogs pa du mas bstod cing / rdo rje chen po dam tshig gi rgyan gyis byin gyis brlabs pa'i seng ge'i khri la bzhugs te byang chub sems dpa' du ma dang thabs gcig pa la 'di lta ste/ byang chub sems dpa' sems dpa' chen po phyag na rdo rje dang / byang chub sems dpa' sems dpa' chen po rdo rje gtum po dang / byang chub sems dpa' sems dpa' chen po rdo rje sde dang / byang chub sems dpa' sems dpa' chen po rdo rje gzhu dang / byang chub sems dpa' sems dpa' chen po rdo rje'i bdag po dang / byang chub sems dpa' sems dpa' chen po rdo rje rgyan dang / byang chub sems dpa' sems dpa' chen po rdo rje 'od dang / byang chub sems dpa' sems dpa' chen po 'phags pa spyan ras gzigs dang / byang chub sems dpa' sems dpa' chen po kun du gzigs dang / 107.137a byang chub sems dpa' sems dpa' chen po 'jig rten dpal dang / byang chub sems dpa' sems dpa' chen po pad ma'i rtog dang / byang chub sems dpa' sems dpa' chen po zhal ras rgyas pa dang / byang chub sems dpa' sems dpa' chen po sa'i snying po dang / byang chub sems dpa' sems dpa' chen po pad ma'i spyan dang / byang chub sems dpa' sems dpa' chen po 'jam dpal dang / byang chub sems dpa' sems dpa' chen po byams pa la sogs pa'i byang chub sems dpa'i dge 'dun brgya phrag du ma rnams kyis yongs su bskor zhing mdun du bdar ba la chos ston te/ bkod pa chen po'i rgyan yid bzhin gyi nor bu zhes bya ba/ thog mar dge ba/ bar du dge ba/ tha mar dge ba/ don bzang po/ tshig 'bru bzang po/ ma 'dres pa/ yongs su dag pa/ yongs su byang ba'i chos ston par mdzad do/ /de nas sangs rgyas kyi byin gyis brlabs kyis phyag na rdo rjes 'khor de rnams la bltas nas langs te/ rdzu 'phrul gyi byin gyis brlabs kyis bcom ldan 'das la lan stong phrag du mar bskor ba byas te phyag 'tshal nas spyan sngar 'dug ste/ snyems pa dang bcas pas dkyil mo dkrung legs par bcas pas 'khor de rnams la bltas te/ rdo rje thal mo rang gi snying gar sbyar nas bcom ldan 'das la 'di skad ces gsol to/ /bcom ldan 'das gza' rnams ni gtum zhing gtum pa'i gzugs can drag cing drag pa'i gzugs can khro zhing khro ba'i sems kyis sems can rnams la rnam par 'tshe zhing gnod par bgyid la mdangs 'phrog par bgyid de/ kha cig ni nor rdzas 'phrog par bgyid/ kha cig ni srog 'phrog par bgyid/ sems can tshe ring po kha cig ni tshe thung bar bgyid/ de ltar sems can rnams la gnod pas 'tshe bar bgyid pas na/ de'i phyir bcom ldan 'das kyis chos kyi rnam grangs gang gis sems can rnams la srung bar 'gyur ba bshad du gsol/ bcom ldan 'das kyis bka' stsal pa/ lag na rdo rje gang khyod kyis sems can rnams la phan par bya ba'i don du snying rje bskyed nas gsang ba chen po shin du gsang ba de bzhin gshegs pa la zhu bar byed pa legs so legs so/ /de dag ngas bshad kyis nyon 107.137b la legs par rab tu zung la yid la gyis shig /gza' rnams gtum pa'i gzugs la shin du khro zhing 'jigs pa rnams la mchod pa bzang po mchod yon dang bzlas brjod bzang po gsang ba las ches gsang ba ngas bshad par bya'o/ /de dag mchod pas mchod 'gyur zhing / /gnod pa byas na gnod byed pa/ /gza' de kun gyi kha dog dang / /ji ltar dga' bar 'gyur ba dang / /lha rnams dang ni lha min dang / /mi 'am ci dang klu dag dang / /gnod sbyin rnams dang srin po dang / /srul po dang ni mi rnams dang / /drag po gzi brjid chen po dag /khros pa zhi bar byed pa yi/ /gsang sngags dang ni mchod pa dag /rim pa bzhin du bshad par bya/ /de nas bcom ldan 'das shAkya thub pa nyid kyi thugs ka nas snying rje rnam par rol pa zhes bya ba'i 'od zer 'bar ba phyung nas gza' rnams kyi spyi bor zhugs par gyur to/ /de nas de nyid kyi skad cig nyid la nyi ma la sogs pa'i gza' rnams langs nas bcom ldan 'das la 'di skad ces gsol to/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas kyis bdag cag rnams la sman yon btags par gyur te/ bcom ldan 'das kyis chos kyi rnam grangs bstan du gsol/ bcom ldan 'das gang gis bdag cag rnams tshogs nas yo byad du gyur par byed pa'i chos smra ba rnams la bsrung ba dang / yongs su bskyab pa dang / zhi ba dang / bde legs su 'gyur ba dang / rim gro dang chad pa bzlog pa dang / mtshon cha spang ba dang / dug gzhil ba dang / dug gsad pa dang / mtshams gcad pa dang / sa bcing bar 'gyur ba rnams bshad du gsol/ de nas bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pas gza' rnams kyi mchod pa dang gsang sngags bka' stsal pa/ ji lta ba'i rim pa'i kha dog gi dbye bas phyogs rnams su dri'i dkyil 'khor byas la pad ma sor bcu gnyis kyi tshad du byas pa'i 'dab ma bris te/ lte ba yang sor bcu gnyis pa la sgo bzhis mdzes pa rim pa bzhin du byas pa la pad ma rgyas pa'i steng du lha nyi ma bsam par bya ba ni lus gzi brjid kyi phung po li khri nye bar 'bar ba lta bu nyi ma stong dang 107.138a mtshungs pa'i 'od zer can no/ /o~M` mai g+hol ga ya swA hA/ shar du zla ba dkar po/ o~M` shi ta~M sha be+e swA hA/ me'i mtshams su mig dmar dmar po/ o~M rag ku ma ra ya swA hA/ gshin rje'i phyogs su rgyal rigs gza' lhag mdog ser po/ o~M bu da ya swA hA/ bden bral du phur bu dmar ser/ o~M b+h+ri ha spa ti ye swA hA/ nub kyi phyogs su spa ba sangs dkar po/ o~M a su rod ta ma ya swA hA/ rlung du spen pa mig sman ltar shin du gnag pa/ o~M` kriSh+Na war+N+Na ye swA hA/ lus ngan po'i phyogs su sgra gcan dmar nag /o~M` a mri ta pri yA ya swA hA/ dbang ldan gyi mtshams su dud sprin gyi mdog lta bu'i mjug rings/ o~M` dz+h+yo ti ke ta be+e swA hA/ shar gyi sgor rje btsun sangs rgyas/ lho sgor phyag na rdo rje/ nub sgor 'jig rten mgon po/ byang gi sgor 'jam dpal lo/ /dkyil 'khor gyi phyi rol gyi byang shar du gza' thams cad do/ /shar lho'i mtshams su khyim rnams dang rgyu skar rnams so/ /lho nub du gnod pa thams cad do/ /nub byang du rje btsun rig pa chen mo'o/ /dkyil 'khor gyi sgo'i phyi rol gyi shar du yul 'khor srung / lhor 'phags skyes po/ nub tu mig mi bzang / byang du lus ngan po'o/ /nyi ma'i 'o thug dang / zla ba'i zho zan dang / mig dmar gyi sran ma/ ma sha'i bza' ba dang / lhag pa'i mar gyi 'khu ba dang / phur bu'i 'o ma dang / pa ba sangs kyi khur ba dang / spen pa'i sran ma/ ma sha dang / mud kha bsres pa dang / sgra gcan gyi til gyi thug pa dang / mjug rings kyi til gyi thug pa dang / bu ram gyi tshod ma'o/ /gnod sbyin gyi gtor ma ni yul 'khor srung gi zho zan no/ /'phags skyes po'i zho dang sran ma/ ma sha'i gza' ba'o/ /mig mi bzang gi'o thug gi gza' ba'o/ /lus ngan po'i zho dang sran ma/ ma sha'i bza' ba dang bu ram chang dang sbyar ba'o/ /ji lta ba'i rim pa'i kha dog gi me tog dbul lo/ /ji lta ba'i rim pa'i kha dog gi bdug spos dbul lo/ /ji lta ba'i rim pa'i kha dog gi ba dan dbul lo/ /so so la mar me dbul lo/ /ji lta ba'i rim pa'i mchod pa bya'o/ /mar dang sbrang rtsis dung phor bkang ste rin chen sna lnga bcug la mchod yon dbul zhing gdong la yang dar bcing bar bya'o/ /lag na rdo rje gza' 'di rnams 107.138b kyi snying po'i sngags bklags pas 'grub pa rnams yin te/ ji lta ba'i rim pa'i kha dog dang 'thun pa'i spos kyi dkyil 'khor sor bcu gnyis pa byas pa'i dbus su mchod par bya'o/ /kham pa 'am zangs la sogs pa 'am/ gser ram dngul gyi snod du mchod yon phul nas/ re re la yang bzlas brjod lan brgya rtsa brgyad rtsa brgyad bya'o/ /lag na rdo rje de nas yang de'i 'og tu/ gza' rnams kyi yum zhes bya ba'i gzungs kyi sngags kyi tshig rnams lan bdun brjod par bya'o/ /de nas gza' nyi ma la sogs pa'i gza' thams cad kyis srung bar byed par 'gyur ro/ /dbul ba'i gdon las grol bar byed do/ /tshe zad pa rnams tshe ring bar 'gyur ro/ /lag na rdo rje yang gang zhig dge slong dang / dge slong ma dang / dge bsnyen dang / dge bsnyen ma rnams sam/ sems can gzhan sems can gyi skye bar gtogs pa gang dag gi rna lam du thos na de dag kyang dus ma yin par 'chi ba'i dus byed par mi 'gyur ro/ /lag na rdo rje yang gang zhig gza' rnams kyi dkyil 'khor gyi dbus su mchod cing / nyin gcig bzhin du klog par byed pa'i chos smra bar byed pa de la gza' rnams thams cad kyis rnam pa thams cad du bdag nyid kyis bsam pa thams cad yongs su rdzogs par byed do/ /de'i rigs rgyud kyi dbul ba yang nyams par byed do/ /de nas bcom ldan 'das de bzhin gshegs pa shAkya thub pas gza' rnams kyi yum zhes bya ba'i gzungs bka' stsal pa/ na mo bud d+hA ya/ na mo badzra d+ha rA ya/ na mo pad ma d+ha rA ya/ na mo ku mA rA ya/ na mo gra hA na~M/ sarba shwa pa ri pU ra kA na~M/ na mo nak+Sha tra na~M/ na mo dwi da sha rA shaM na~M/ tad+ya thA/ o~M bud d+he bud d+he/ badzre badzre/ pad me pad me/ sa ra sa ra/ pra sa ra pra sa ra/ sma ra sma ra/ krI DA ya krI DA ya/ mA ra ya mA ra ya/ mar+d+ha ya mar+d+ha ya/ g+ha Ta ya g+ha Ta ya/ sarba big na~M/ ku ru ku ru/ ma mA kar+yA~M/ tshin d+ha tshin d+ha/ sarba duSh+Ta~M/ k+ShA pa ya k+ShA pa ya/ shAn te shAn te/ dAn te dAn te/ dA ma ya dA ma ya swA hA/ dru dan dar sha ya/ ad ma na~M/ rak+Sha rak+Sha ma~M/ sarba satwAM Sh+tsa/ sarba gra hA na k+Sha tra/ bi d+h+wa~M sa ni brtA ye/ b+ha ga ba ti ma hA ma ye/ pra sa da ye/ sarba duSh+Ta~M sho d+hA ya sarba pa pa~M/ tsaN De tsaN De/ tu ru tu ru/ tsaN De ni tsaN De ni/ mu yu mu yu/ 107.139a mu tsu mu tsu/ ba ha ba ha/ u gre u gra ta me/ pU ra ya me/ ma no ra tha~M pa ri pu rA ya/ sarba ta thA ga ta a d+hiSh+Thi te sa ma ye swA hA/ o~M swA hA/ hU~M swA hA/ hrI swA hA/ hA/ swA hA/ d+h+ri~M swA hA/ pad ma d+ha rA ya swA hA/ a di d+ya ye swA hA/ sau ma ya swA hA/ d+ha ra Ni su tA ya swA hA/ bau dA ya swA hA/ bri ha s+pha ti ye swA hA/ shU krA ye swA hA/ kriSh+Na war+N+Na ye swA hA/ rA ha be swA hA/ ke ta be+e swA hA/ bu dA ya swA hA/ badzra d+ha rA ya swA hA/ pad ma d+ha rA ya swA hA/ ku mA rA ya swA hA/ sarba gra he b+h+yaHswA hA/ sarba na k+Sha tre b+h+yaHswA hA/ sarba dwi da sha rA shi na~M b+h+yaHswA hA/ sarba u pa dra be b+h+yaHswA hA/ o~M sarba bi d+ye hU~M hU~M phaT phaT swA hA/ lag na rdo rje gza' rnams kyi yum zhes bya ba'i gzungs kyi sngags kyi tshig dag ston zla tha chungs smin drug gi zla ba'i yar ngo'i tshes bdun nas brtsams te/ gso sbyong blangs nas tshes bcu bzhi'i bar du nyin gcig bzhin du mchod cing brjod par byas nas de nas nya la nyin mtshan thog thag bklags na de la lo dgu bcu rtsa dgu'i bar du 'chi ba'i 'jigs pa 'byung bar mi 'gyur ro/ /skar mda' ltung ba dang / gza' dang rgyu skar gyis gdung ba'i 'jigs pa 'byung bar mi 'gyur ro/ /skye ba dran par 'gyur ro/ /gza' thams cad kyis mchod par 'gyur ro/ /gza' rnams kyis de la ci 'dod pa'i mchog ster bar 'gyur ro/ /de nas gza' de rnams kyis bcom ldan 'das la legs so zhes gsol nas mi snang bar gyur to/ /'phags ma gza' rnams kyi yum zhes bya ba'i gzungs rdzogs s+ho// //rgyal blon byang chub sems dpa' rnams kyi sku ring la bsgyur ba las/ dus phyis dge bsnyen grags pa rgyal mtshan gyis dpal ldan sa skya'i dben gnas su rgya dpe la gtugs nas shin du dag par byas pa'o// // |