@/ /de nas bcom ldan 'ad sa kyis de'i tshe tshigs su bcad pa 'di gsungs so/ /'jig rten 'di 'am yang na 'das pa dang / /mtho ris dag na rin chen mchog yod pa/ /de bzhin gshegs pa lha'i lhar gyur pa/ /mi mchog de dang 'dir ni mtshungs pa med/ /de bas 'dir ni rin chen mchog tu gsungs/ /bden pa de yis 'dir ni bde legs shog /zad pa chags bral bdud rtsi 'dus ma byas/ /shes pas shAkya thub des rab tu phye/ /bdud rtsi zhi ba 'dus byas ma yin pa/ /chos de dang ni mtshungs pa gang yang med/ /de bas 'dir ni rin chen mchog tu gsungs/ /bden pa de yis 'dir ni dge bar shog /mchog tu gang 'dod tshul bzhin rab tu bstan/ /ston pa bla med rnal 'byor rtag sgrub pa/ /rdo rje lta bu'i mig gnyis lam mthong ba/ /ting 'dzin de dang mnyam pa yod ma yin/ /de bas 'dir ni rin chen mchog 13.335a tu gsungs/ /bden pa de yis 'dir ni dge bar shog /gang zag chen po brgyad po rab bsngags shing / /gang zag zung bzhir brjod pa de dag ni/ /drang srong chen po gang zag mtshungs med pa/ /bde bar gshegs pas sbyin pa'i gnas shes gsungs/ /de la byin na 'bras bu cher 'gyur te/ /zhing rab gshin las sa bon btab pa bzhin/ /'di ni dge 'dun rin chen mchog tu gsungs/ /bden pa de yis 'dir ni dge bar shog /gang dag brtan pa'i yid kyis rab brtson zhing / /gau ta ma'i bstan la 'jug byed pa/ /de dag thos nas bdud rtsi mchog thob ste/ /mun pa bsal nas mya ngan 'das thob pa/ /de bas dge 'dun rin chen mchog tu gsungs/ /bden pa de yis 'dir ni dge bar shog /lta ba 'di la sbyar ma thag tu ni/ /'jig tshogs lta dang tshul khrims brtul zhugs dang / /the tsom dang ni nyon mongs gsum po dag /gcig char spangs te 'phags pa'i bden mthong ba/ /des na dge 'dun rin chen mchog tu gsungs/ /bden pa de yis 'dir ni dge bar shog /lus sam ngag gam 'on te yid kyis kyang / /sdig pa rnam gsum nam yang mi byed ci nga / /blo bur byas na'ang 'chab par mi byed la/ /de ltar de la lta bas 'dzin mi byed/ /des na dge 'dun rin chen mchog tu gsungs/ /bden pa de yis 'dir ni dge bar shog /ji ltar dbang po'i sdong po sar btsugs pa/ /phyogs bcu'i rlung rnams kyis ni mi g.yo ltar/ /'phags pa'i lam gyi dam pa mthong ba yi/ /gang zag 'phags pa'i dge 'dun de bzhin no/ /des na dge 'dun rin chen mchog tu gsungs/ /bden pa de yis 'dir ni dge bar shog /shes rab zab mos shin tu bstan pa yi/ /'phags pa'i bden pa su dag rnam sgom zhing / /lus kyang sbyin par yid la byas pas ni/ /de dag 'jigs pa brgyad dang phrad mi 'gyur/ /de bas dge 'dun rin chen mchog tu 13.335b gsungs/ /bden pa de yis 'dir ni dge bar shog /ji ltar me ni rlung gis rab gtor ba/ /lag tu blangs te bgrang du med pa nyid/ /de ltar kun du sbyor ba rab btang ba'i/ /sangs rgyas sras rnams bstan du med par 'gro/ /des na dge 'dun rin chen mchog tu gsungs/ /bden pa de yis 'dir ni dge bar shog /sems can gang dag 'gro dang mi 'gro ba/ /de dag thams cad 'dir ni dge bar shog /ston mchog dam pa lha mis mchod 'os pa/ /sangs rgyas phyag 'tshal ding 'dir bde legs shog /sems can gang dag 'gro dang mi 'gro ba/ /de dag thams cad 'dir ni dge bar shog /zhi ba chags bral lha mis mchod 'os pa/ /chos la phyag 'tshal ding 'dir bde legs shog /sems can gang dag 'gro dang mi 'gro ba/ /de dag thams cad 'dir ni bder gyur cig /tshogs kyi dam pa lha mis mchod 'os pa/ /dge 'dun phyag 'tshal ding 'dir dge bar shog /'byung po gang dag 'dir ni lhags gyur de/ /sa 'am 'on te bar snang 'khod pa dag /skye dgu rnams la rtag tu byams byed cing / /nyin dang mtshan du chos kyang spyod par shog /'di ni rgyal ba dgra rgyal bden gang gis/ /shin du bden pa gsung zhing brdzun med pa/ /bden pa de yis 'dir ni dge bar shog /de kun 'jigs pa che las thar gyur cig /@/ /rdzogs sangs rnam par sangs rgyas tshe/ /'jig rten skyong bas phyogs bzhi nas/ /snod bzhi dag ni blangs nas su/ /bde bar gshegs la phul ba dang / /mthu yis gcig tu sprul mdzad pa/ /lha'i snod mchog de dang ni/ /bdud rtsi 'dra ba'i sman gyi rnams/ /ston pa'i phyag na bsnams gyur pa/ /bden pa'i tshig ni de dag gis/ /sman rnams bdud rtsir gyur par shog /de bzhin lha mo 'phrog ma yis/ /lha rdzas dge ba a ru ra/ /blangs nas ston la rab phul ba/ / 13.336a bdud rtsi 'dra ba'i sman gyi rnams/ /bden pa'i tshig ni de dag gis/ /nad pa rnams kyis nad sel cing / /nyes pa thams cad 'phrog byed pa/ /sman rnams bdud rtsir gyur par shog /sangs rgyas rnam gzigs gzi brjid dang / /gtsug tor can gyis stobs rnams dang / /thams cad skyob kyi bden tshig dang / /log dad sel gyi ting 'dzin dang / /gser zhes bya ba'i ye shes dang / /'od srung gi ni rdzu 'phrul dang / /shAkya seng ge'i mthu rnams kyis/ /sman rnams bdud rtsir gyur par shog /sangs rgyas kun gyi gzi brjid dang / /rang rgyal dag gi gzi brjid dang / /dgra bcom rnams kyi mthu dag dang / /gsang sngags 'dzin pa thams cad dang / /shA ri'i bu yi shes rab dang / /maud gal bu yi rdzu 'phrul dang / /ma 'gags pa'i mig dang ni/ /'od srung sbyangs pa'i yon tan dang / /kauN+Di n+ya'i sngar thob dang / /kun dga' bo'i thos pa dang / /tshangs pa yi ni byams pa dang / /brgya byin gyi ni dbang rnams dang / /'jig rten skyong gi yul rnams dang / /dbang phyug chen po'i stobs dag dang / /sde dpon rnams kyi mthu dag dang / /'phrog ma'i gzi brjid rdzu 'phrul dang / /de dag rnams kyi mthu dang gzis/ /bdag gi dug ni dug med shog /'phags pa stong chen mo rab tu 'joms pa las gsungs pa'i smon lam/ rdzogs s+ho// |