//thams cad mkhyen pa la phyag 'tshal lo/ /'dul ba gzhung ni dam pa 'di/ /'phags pa nye ba 'khor gyis ni/ /ma 'ongs pa yi gang zag gi /ma rtogs la sogs bsal ba'i phyir/ /gzhi dang rnam 'byed la sogs kyi/ /'grel bshad nges pa don gyi lung / /zhus nas rgyal bas bka' stsal to/ /de dag rnams kyang gang zhe na/ /spyi'i sdom la/ zhu ba 'dul byed gcig las 'phros/ /lnga tshan bcu drug tshan dang ni/ /gleng gzhi rkyang pa gtam gyi gzhi/ /ma na pi ka ma mo dang / /lus sogs ston pa tha ma ste/ /le'u dag tu yang dag 'dod/ /thog mar zhus pa de yang ni/ /rnam 'byed ltung ba sde bzhi dang / /rang byung la sogs gzhi rnams kyi/ /gtan la 'bebs pa dag tu 'dod/ /de nyid dris lan zhes kyang bsgrags/ /de nas 'dul byed dag yin te/ /pham pa bzhi dang lhag ma yi/ /smyan gyi ltung ba yan chad dag /gtan la 'bebs par byed pa yin/ /de nas gcig las 'phros pa ste/ /gcig nas bcu yi bar du yin/ /gcig las 'dzegs pa zhes kyang bsgrags/ /de nas 'dul ba lnga tshan te/ /lnga lnga ston phyir lnga tshan no/ /bcu drug sde tshan ston pa'i phyir/ /de nas 'dul ba bcu drug tshan/ /gleng gzhi la ni sgo lnga las/ /dang po bzhi la sdom gyi ni/ /tshigs bcad bcu bcu'o lnga pa la/ /sdom gyi tshigs bcad drug yod de/ /gleng gzhi dag la brten pa'i phyir/ /gleng gzhi zhes ni btags pa yin/ /rkyang pa sgo bzhi re re yang / /tshigs bcad bcu bcu'o de nyid la/ /sil bu zhes bya bslab pa'i gzhi/ /rigs mi 'thun pa phra mo rnams/ /ston phyir don dang ldan pa yin/ /'dul ba gtam gyi dngos po ni/ /ldebs kyi tshul du byung ba ste/ /sdom gyi tshig gis bsdus pa med/ / 13.318b mU la zhes pa'i sgra yi don/ /gzhi dang rtsa ba dngos po la'ang / /'jug phyir gtam gyi gzhir yang 'gyur/ /ma na pi ka'i sgo dang po/ /tshigs bcad bcu yin gnyis pa la/ /tshigs bcad bcu dang lhag tsam yod/ /shin du phra zhib che bas na/ /bram ze'i bu mo lta bu zhes/ /don dang 'thun pa'i mtshan yin no/ /'dul ba ma mo lta bu la/ /bsnyen par rdzogs pa'i phung po dang / /rab tu ldan dang bya ba yi/ /phung po gsum du shes par bya/ /ma dang 'dra phyir ma mo'o/ /lus dang dmigs pa byin brlab dang / /mtshan nyid gleng gzhi ngo bo dang / /'bras bu'i don rnams tha ma ste/ /u pA li yis zhus pa ni/ /de dag rnams kyis rdzogs pa yin/ /mtshan gyi grangs kyi rim pa dang / /mtshan gyi bshad pa de yin pas/ /de ltar bsdogs nas blta bar bya/ /de ltar na gzhung dam pa'i brjod bya don gyi lus ni de dag nyid yin la/ rjod byed gzhung gi lus ni zhu ba ma rdzogs pa la 'grel par/ 'phags pa nye ba 'khor gyis zhus pa'i gzhung rgya gar yul pa yang sho lo ka nyis stong tsam gyi tshad cig la lan spyod pa kho na'o zhes yul kha cig na zhu ba ma rdzogs pa la sho lo ka nyis stong las med pa'ang bshad mod kyi/ bod du 'gyur ba'i zhu ba ma rdzogs pa la sho lo ka sum stong drug brgya ste bam po bcu gnyis dang / zhu ba rdzogs pa la sho lo ka khri lnga stong dgu brgya ste/ bam po lnga bcu rtsa gsum yod pas spyir bsdoms na sho lo ka khri dgu stong lnga brgya ste/ bam po drug bcu rtsa lnga yod do// //bsod nams chen po'i dpal gyis phyogs las rnam par rgyal ba stobs kyi 'khor los sgyur ba'i rgyal po dang mtshungs pa rgyal po chen po'i bla'i mchod gnas bde bar gshegs pa'i gzhung lugs mang du thos pa/ rig pa dang grol ba'i spobs pa dge ba can/ lung dang rigs pa'i dbang phyug /gangs can gyi rgyud kyi mkhas pa chen po/ sdom brtson dam pa shAkya'i dge slong 'jam pa'i dbyangs kyis/ bka' 'gyur legs par bzhengs pa 13.319a rnams las 'di dag ni mkhan po chen po mchims kyis dge ba'i bshes gnyen rgya 'dul ba 'dzin pa zhal bzhugs pa'i dus na/ dge ba'i bshes gnyen 'dul ba 'dzin pa zhing mo che ba byang chub seng ges gnyer mdzad nas/ lung phran tshegs kyi bam po bcu gnyis ma tshang ba dang / gzhung bla ma'i zhu ba ma rdzogs pa bam po bcu gnyis dang / sdom tshig yi ge tshar gnyis ma tshang ba rnams bsam yas mchims phu la sogs pa dbus gtsang gi gtsug lag khang rnams nas btsal te/ la stod 'ol rgod kyi gtsug lag khang du gnas brtan d+harmA seng ges lung sde bzhi tshang bar bzhengs pa snar thang gi gtsug lag khang du gdan drangs te/ de la dpe phyi mdzad nas bzhengs pa dang / gzhan yang chu mig ring mo'i gtsug lag khang dang / rung klung shod grog gi gtsug lag khang gi 'dul ba lung la sogs pa rnams la gtugs te snga zhus legs par bgyis nas bzhengs pa sangs rgyas kyi bstan pa'i rtsa ba legs par gsungs pa dam pa'i chos 'dul ba lung sde bzhi'o/ /de'i bka' 'gyur gyi dpe phyi rnam par dag pa rnams/ mkhas pa'i 'byung gnas dpal snar thang gi gtsug lag khang nas gdan drangs te/ 'phags pa 'jig rten dbang phyug gi sprul pa'i sku chos rgyal srong btsan sgam po'i nang blon chen po mgar stong btsan yul zungs kyi rgyud pa/ gtsug lag gnyis kyi mdzad pas/ bstan pa rin po che'i zhabs tog la g.yel ba mi mnga' zhing / 'gro ba mang po'i mgon skyabs dam par gyur pa dpal ldan rgyal ba'i sde yis/ 'gro ba ma lus pa'i gnas skabs dang mthar thug gi phan bde ma lus pa'i 'byung gnas rgyal ba'i bstan pa rin po che yun ring du gnas shing / phyogs kun du dar zhing rgyas par bya ba'i phyir/ bod khams su smon lam gyi stobs can mnga' bdag lha btsan po byang chub sems dpa' rnams dang / lo paN skyes mchog khyad par can rnams kyi bdag rkyen la brten nas/ bde bar gshegs pa'i 13.319b gsung rab thog mtha' bar du dge zhing sgro skur gyi mtha' dang bral la gzhung lugs ngan pa'i dri mas dben pa mdo sde dang / rgyud sde'i phyogs snga phyir bod du 'gyur ro cog rnams mi'i dbang po tho ge na the mur gyi ring la/ ti shri kun dga' rgyal mtshan dpal bzang po bstan pa skyong ba'i dus/ rgyal ba'i bstan pa lnga brgya bdun pa'i mthar nye ba/ 'gro ba'i bla ma ston pa gdul bya'i ngor zhi bar gshegs pa'i tshul bstan nas lo sum stong bzhi brgya brgyad bcu 'das pa me mo phag gi lo gsar gyi zla ba tshes grangs gza' skar bzang po la dbu btsugs te/ rgyal ba'i sras po rig pa 'dzin pa byang chub dpal ldan gyis/ bstan pa la shes nas mi phyed pa'i dad pa brtan pos kun nas bslang nas zhal ta'i rim pa rnams dang / rgyu'i dngos po bzang zhing mang la kha na ma tho ba med pas 'thun pa'i rkyen bsgrubs nas bstan pa'i 'byung gnas dpal na len dra dang mtshungs pa sprul pa'i rgyal po se chen gan gyi dgos kyi lha khang dpal gung thang gi gtsug lag khang chen por legs par bzhengs te/ sde snod kyi tshul la cung zad blo kha phyogs pa thang po che ba'i btsun pa kun dga' 'bum gyis kha ta dang / zhus dag gi dang dos pa bgyis shing / gzhan yang dad pa dang brtson 'grus che zhing blo gros gsal ba'i sdom brtson dam pa mang du thos shing sde snod 'dzin pa mkhas pa rnams kyis/ rgya gar skad la sogs pa legs par sbyar ba'i skad sor bzhag rnams ni sngon gyi lots+tsha ba chen po rnams kyis mdzad pa'i bye brag tu rtogs byed chen po dang / sgra sbyor bam po gnyis pa la sogs pa la brten nas dag par byas shing / bod skad rnams ni yul skad dang / 'phral skad ngan pa rnams dang ma 'dres par bod yul gyi sngon gyi brda' mes mkhan po rnams dang / sgyur byed dam pa snga phyir byon pa rnams kyi brda' gsar rnying dang / skad gsar bcad la sogs pa'i rjes su 'brangs nas da drag dang / ma mya dang / sa stsogs la sogs pa yod med rnams mkhas pa rnams kyis ji ltar 13.320a mdzad pa ltar brda' don ma nor bar dag par bgyis nas/ gzhi dung gi sa gzhi ltar dkar 'jam mkhregs pa lho rgyal po lha khang gi sho gu la/ dam che zhing mdangs gsal ba ud pal sngon po lta bu rgya nag chen po las 'ongs pa'i snag tshas/ 'bur dkyus tshugs gsum la mkhas pa'i mthar phyin pas yi ge'i rig byed la slob dpon gyi go 'phang thob pas dag snyoms mdzes par bzhengs pa dpon dpal bzangs rin chen dang / sangs rgyas grags la sogs pa dbus gtsang gi yi ge pa yid gzhungs shing mkhas pa rnams kyis legs par bris pa la zhus dag lan gsum du bgyis te bzhengs pa rnams/ sa mo glang gi lo bkra shis lo gsar gyi zla ba la legs par grub cing / 'bras bu dang bsgrub pa'i dus kyi lnga brgya phrag drug dang / lung mngon pa'i dus kyi bzhi brgya brgyad bcu rtsa gnyis 'das la/ lhag ma mngon pa'i lo bcwa brgyad dang / mdo sde/ 'dul ba/ rtags tsam 'dzin pa'i lnga brgya phrag gsum ste/ stong lnga brgya bcwa brgyad bstan pa'i lhag mar yod pa'i dus su bka' 'gyur legs par grub pa rnams las 'di dag ni lung sde bzhi'o/ /'dul ba lung phal che ba la dge slong pha ma'i so sor thar pa dang zhu ba ma rdzogs pa bzhengs pa med mod kyi 'on kyang so sor thar pa gnyis rnam 'byed gnyis kyi rtsa ba yin zhing / rnam 'byed gnyis ni so sor thar pa rnam pa gnyis kyi 'grel pa yin la/ zhu ba ma rdzogs pa ni zhu ba dag shos yin pa'i phyir lung rnam 'byed so so'i dbu dang / gzhung bla ma ma rdzogs pa dbu nyid du bzhengs so/ /lung sde bzhi'i go rim ni gzhi dang / rnam par 'byed pa dang / de dag gi dka' ba'i gnas zhus lan gyis gtan la 'bebs pa gzhung bla ma dang / de dag tu ma tshang ba kha skong ba phran tshegs so/ /don gyi go rims de ltar yin yang mkhas pa rnams kyis gzhi dang / rnam par 'byed pa'i rjes la phran tshegs dang / de'i rjes la gzhung dam pa nyid bris shing / ka cog la sogs pas mdzad pa'i mtshan byang dkar chag 13.320b las kyang rim pa de kho na ltar 'byung bas 'dir yang gzhung dam pa mjug nyid du bris so/ /'di rnams kyi bam po'i grangs ni sho lo ka sum brgya la bam po rer byas nas lung gzhi la bam po brgya dang dgu/ dge slong pha'i rnam 'byed la bam po brgyad bcu rtsa gsum dang bam po sum cha/ dge slong ma'i rnam 'byed la bam po nyi shu rtsa brgyad/ phran tshegs la bam po lnga bcu rtsa dgu/ gzhung bla ma'i zhu ba ma rdzogs pa la bam po bcu gnyis/ zhu ba rdzogs pa'i gzhung dam pa la bam po lnga bcu rtsa gsum ste bsdoms na gzhung dam pa la bam po drug bcu rtsa lnga yod pas spyir lung sde bzhi chad pa la bam po sum brgya bzhi bcu rtsa bzhi dang bam po sum cha yod do/ /sngar ma tshang ba rnams tshang bar bzhengs pa'i tshul ni phran tshegs dang / zhu ba ma rdzogs pa'i mjug dag tu bris zin pa'i phyir de dag tu blta bar bya'o// de ltar bsod nams dpal gyis rab mtho ba/ /'dzam gling mi dbang chen po'i mdzad pa ltar/ /mchog gi blo gros mtshungs pa med pa des/ /sdom brtson dam pa dge sbyong chen po de'i/ /thugs dgongs bla med rdzogs par bya phyir dang / /bstan pa spel phyir bde bar gshegs pa'i gsung / /gangs ri'i khrod 'dir ji snyed 'gyur ro cog /legs par bzhengs par gyur ba de dag las/ /'di ni ston pa'i gsung rab bstan pa yi/ /rtsa ba legs gsungs dam chos 'dul ba lung / /de ltar dpal ldan lhag bsam dag pa'i mthus/ /gsung rab rin chen tshul bzhin bzhengs pa las// byung ba'i dge ba ston ka'i zla 'od dang / /mkha' ltar dag cing yangs pa gang thob des/ /'gro kun phan bde'i 'byung gnas rgyal ba yi/ /bstan pa rin phyogs dus kun khyab cing / /sde 'dzin skyong dang bsrung ba'i dam pa rnams/ /skye dgu'i dpal du yun ring bzhugs gyur cig /gang gis gsung rab dri med 'di bzhengs ba'i/ /rgyal ba'i sras po byang chub dpal ldan yang / /bstan dang 'gro ba'i rtsa lag dam par ni/ /sa chen steng 13.321a 'dir yun ring bzhugs gyur cig /khyad par du yang des pas sa skyong ba'i/ /mi dbang yon mchod 'khor dang bcas pa rnam/ /snyun med sku tshe ring zhing chab srid brtan/ /byams brtse'i thugs kyis 'gro ba skyong gyur cig /srid 'bangs rnams kyang phan tshun byams ldan zhing / /nad dang mu ge 'thab rtsod las sogs pa/ /phyi nang nyer 'tshe'i gnod pa kun zhi nas/ /tshe ring 'byor ldan bstan la dad gyur cig /gang dag 'di la sgo gsum gus pa yis/ /bya ba byed dang rjes su yi rang dang / /rgyu rkyen 'bul dang chos spyod rnam bcu yis/ /tshul bzhin sgrub par byed pa de dag kyang / /tshe 'dir tshe ring nad med 'byor ldan zhing / /skye zhing skye ba'i skye ba thams cad du'ang / /'khor lo bzhi dang yon tan rnam bdun dang / /rnam smin brgyad ldan dal 'byor lus thob nas/ /mthong dang bsgom pas spang bya'i nyon mongs dang / /shes bya'i sgrib pa bag chags bcas pa kun/ /spong byed gnyen po lam lnga sa bcu rnams/ /rim gyis bgrod nas kun mkhyen thob par shog /gang gis dgag sgrub gnang ba'i gnas ston cing / /mtha' gnyis spyod pa spangs nas 'khor ba las/ /nges par 'byung ba'i tshul khrims gsal byed pa/ /legs gsungs dam chos 'dul ba'i bkra shis shog / |