@#/ /rgya gar skad du/ Ar+ya pra tI t+ya sa mud pA da hri da ya bi 107.89a d+hi d+hA ra NI/ bod skad du/ 'phags pa rten cing 'brel bar 'byung ba'i snying po'i cho ga'i gzungs/ sangs rgyas dang / byang chub sems dpa' thams cad la phyag 'tshal lo/ /chos gang rgyus byung de dag ni/ /rgyu las 'gog pa gang yin pa/ /de bzhin gshegs pas bka' stsal te/ /de skad gsungs pa dge sbyong che/ /tshig 'di bsgrub pa'i cho ga ni/ /sems can rnams la phan byed pa/ /las kun grub par byed pa'i phyir/ /de bzhin gshegs pas rab tu gsungs/ /rigs kyi bu dag gang gis ni/ /dang por bcom ldan sangs rgyas la/ /gus shing dang ba'i sems bskyed nas/ /bcom ldan 'das kyis bka' stsal pa/ /rten 'brel zab mo'i cho ga bshad/ /thams cad las dang 'thun par gsungs/ /dang por 'jug pa'i tshig gsungs pa/ /'di ltar las dang nyon mongs yod gyur na/ /sems can rnams ni 'khor bar 'gro 'gyur la/ /las dang nyon mongs med na 'khor ba las kyang ldog /bden pa 'di yis bdag gi bsam pa grub gyur cig /sangs rgyas la phyag 'tshal lo/ /chos la phyag 'tshal lo/ /dge 'dun la phyag 'tshal lo/ /yang dag par rdzogs pa'i sangs rgyas gang gA'i klung gi bye ma snyed bzhugs pa rnams la phyag 'tshal lo/ /rang sangs rgyas rnams la phyag 'tshal lo/ /dgra bcom pa rnams la phyag 'tshal lo/ /phyir mi 'ong ba rnams la phyag 'tshal lo/ /lan cig phyir 'ong ba rnams la phyag 'tshal lo/ /rgyun du zhugs pa rnams la phyag 'tshal lo/ /'phags pa byams pa la sogs pa'i byang chub sems dpa' rnams la phyag 'tshal lo/ /brtul zhugs grub pa rnams la phyag 'tshal lo/ /sems can gyi sman pa rnams la phyag 'tshal lo/ /nor bu grub pa rnams la phyag 'tshal lo/ /'di lta ste/ na mo rad na tra yA ya/ o~M` ye d+harmA he tu pra b+ha bA he tun te ShA~M ta thA ga to h+ya ba data/ te ShAny+tsa yo ni ro d+ha e ba~M bA dI ma hA shra ma Na ye swA hA/ las rnams kun gyi cho ga la/ /tshigs su bcad pa 'di dag brjod/ /bsam rgyud rang gi lag mthil la/ /sangs rgyas bcom ldan 'das kyi sku/ /skyes bu chen po'i mtshan gyis brgyan/ /dpe byad 107.89b bzang po brgyad cus spras/ /me yi khams la bzhugs par bsgom/ /da ni lha dag rjes su dran/ /da ni sbyor ba'i las bshad de/ /rim pa bzhin du so sor bstan/ /rims kyis btab nas na ba dang / /klad pa na dang mig nad dang / /khong nad la sogs nad rnams la/ /tshigs bcad 'di dang snying po 'di/ /mang por bzlas shing langs nas ni/ /lag pa g.yas pa'i khu tshur gyis/ /byug pa'i thabs su byab par bya'o/ /nad rnams thams cad sos par 'gyur/ /nyin gcig nyin gnyis nyin gsum dang / /nyin bzhi rtag pa'i rims rnams la/ /bu mo gzhon nus bkal ba yi/ /skud pa dkar po sum sgril la/ /bzlas brjod nyi shu brgyad bzlas nas/ /mgul du btags na bde bar 'tsho/ /nad la phan pa'i sman rnams la/ /gzungs sngags 'di dag bzlas shing btang / /snying nad rtsib logs na ba dang / /khong na nad rnams ci yod la/ /chu la sngags 'di mang bzlas nas/ /blud na phan zhing bde bar 'gyur/ /nad la phan pa'i sman rnams la/ /bzlas shing btang na 'tsho bar 'gyur/ /g.yan pa dang ni 'brum bu dang / /phol mig dang ni rma red la/ /grog tshang sa la snying po 'di/ /mang du bzlas shing btab na 'tsho/ /gzhang 'brum gzhang nad za khu dang / /pho mtshan skrangs shing na ba la/ /skyer pa'i kha 'da'i ri lu 'am/ /byang chub sems dpa'i ri lu la/ /nyi shu bzlas shing bskus na phan/ /nad kyi rnam pa gang na yang / /na tshabs che chung tshod brtags nas/ /tshigs su bcad pa'i bzlas brjod la/ /mang nyung nad dang sbyar nas kyang / /lus la byab cing bzlas na phan/ /'khru bag nad kyis btab pa la/ /sman nam ri lu kha zas la/ /bdun nam nyi shu bzlas nas kyang / /khong du btang na phan par 'gyur/ /de yi bzlas brjod snga ma ste/ /'di dag rab tu bzlas par bya/ /na mo rad na tra yA ya/ o~M` ye d+harmA he tu pra b+ha bA he tun te ShA~M ta thA ga to h+ya ba data/ te ShAny+tsa yo ni ro d+ha e ba~M bA dI ma hA shra ma NaHye swA hA/ de dag bzlas na nad rnams 'tsho/ /de ni nad rnams 'tsho ba'o/ /de nas yang ni bka' stsal pa/ /nas dang gro dang sran ma dang / /'bras dang sran chung mon sran dang / /shing tog rgun 'brum a ru ra/ /de dag kun la za ba yi/ /srin bu sbur bu phye 107.90a ma leb/ /byi'u dang byi ba ne tso dang / /lo tog za ba kha bcing na/ /zhing gi khyon dang sbyar nas kyang / /bye ma sa dang thal ba la/ /bzlas brjod brgya ni rtsa brgyad bzlas/ /zhing dang shing tog gtor byas na/ /de dag kun kyang kha bcings 'gyur/ /ha cang char pa ches pa na/ /bcom ldan 'das la phul ba yi/ /me tog sman ma re re la/ /bzlas brjod nyi shu rtsa gcig bya/ /gtsang zhing bde ba'i gnas dag tu/ /dkyil 'khor chen po'i dbus dag tu/ /bum pa gang ba'i steng dag tu/ /kham phor gtsang ma'i nang du yang / /me tog gtsang ma bzlas pa de/ /bsregs na char pa 'chad par 'gyur/ /ser ba drag po 'ong ba na/ /se ba nya mig lcug ma la/ /bzlas brjod brgya ni rtsa brgyad bzlas/ /ser ba gang nas yong ngos su/ /klad la bskor zhing byabs na 'chad/ /yang na thal chen yungs dkar la/ /bzlas brjod brgya ni rtsa brgyad bya/ /thum po byas te lcug ma la/ /btags te btsugs na ser ba chad/ /'byung po sha za yi dgas dang / /brjed byed gdon gyis zin pa la/ /dkyil 'khor 'dom gang gru bzhi la/ /bum pa gtsang ma lnga bzhag ste/ /gu gul dud pas bdugs nas kyang / /yungs dkar ga pur tsan dan dang / /gli rtsi la sogs sman sbyar te/ /bzlas brjod brgya ni rtsa brgyad bzlas/ /gos dang zas ni dkar po sbyar/ /dkyil 'khor de yi nang du gzhug /bum pa'i chu yis bkru bar bya/ /sangs rgyas sku bsil byas pa'i chus/ /bkrus shing blud na rab tu phan/ /nad dang gnod pa kun las thar/ /'byung po brjed byed sha za yis/ /glags kyang rnyed par mi 'gyur ro/ /byis pa gdon gyis 'jigs pa la/ /'gi hang la ni sngags bzlas nas/ /snying po stobs chen 'di bris gdags/ /o~M badzra kro d+ha ma hA ba la ha na da ha pa tsa bi d+h+wan sa ya dza Ti la la~M b+ho d+ha ra uts+tshuSh+ma kro d+ha hU~M phaT swA hA/ gtsang sbra byas te mgul par gdags/ /de bzhin yungs dkar dag la yang / /bzlas brjod byas te btums la gdags/ /mkha' 'gro'i gdon gyis zin pa na/ /yungs dkar dang ni gu gul la/ /sngags gnyis lan ni bdun bdun bzlas/ /dud pas bdugs na 'tsho bar 'gyur/ /de la the tshom mi za'o/ /byis pa gdon dang nad las thar/ /bud med bu 107.90b ni thogs gyur na/ /chu la bzlas brjod lnga bdun byas/ /blud na legs par btsas par 'gyur/ /bud med mo sham bu med la/ /sangs rgyas sku bsil byas pa'i chu/ /de la bzlas brjod nyi shu bya/ /khrus byas lus ni gtsang ma la/ /chu de blud na bu tsha 'phan/ /rigs rgyud dag ni 'phel bar 'gyur/ /lam du zhugs te 'gro ba na/ /skud pa dang ni gos kyi grwar/ /bzlas brjod bdun bzlas mdud pa bdun/ /mdud cing bzlas te song ba na/ /bde bar 'gro zhing don yang 'grub/ /dgra dang nye zho med par 'gro/ /yid ni gzhungs par 'dod pa na/ /shu dag tshon gang tsam pa dang / /mar srang sum brgya drug bcu la/ /bzlas brjod byas te bsres nas kyang / /bum pa gcig tu blugs la dkrug / /nyi ma re re lo gcig tu/ /shu dag dag ni dum re dang / /mar srang dag ni re re la/ /bzlas brjod re re bya zhing bza'/ /des ni yid gzhungs blo ldan 'gyur/ /de bzhin pa ni ser skya ma'i/ /mar dang 'o ma dag la yang / /bzlas brjod brgya ni rtsa brgyad du/ /bzlas te 'o thug dkrug cing bza'/ /yid gzhungs pa yi mchog tu 'gyur/ /mi dang 'grogs shing mdza' 'dod na/ /gang dag yid dang 'thad pa la/ /me tog dang ni rtswa shing la/ /'bras bu 'am ni 'jim pa dag /lag pa g.yas pa'i chang par bcug /bzlas brjod brgya ni rtsa gcig gdab/ /gang gi lag tu byin pa na/ /de dang rtag tu mdza' bar 'gyur/ /rta la sogs pa'i phyugs rnams kun/ /'chi bar nye bar gnas pa na/ /chu dang yungs dkar bcas pa la/ /bzlas brjod brgya ni rtsa brgyad bya/ /de la gtor na sos par 'gyur/ /yang na yungs dkar brgya brgyad la/ /bzlas pa'i thum po mgul du gdags/ /des ni nad med bde bar 'gyur/ /mi rnams 'chi bas 'jigs gyur na/ /yungs dkar la ni bzlas brjod bya/ /thum po byas te sgo la gdags/ /bzlas brjod brgya stong 'bum yang bzlas/ /mi nad dang ni phyugs nad kun/ /ming yang med cing bde bar 'gyur/ /de dag kun gyi bzlas brjod ni/ /'di dag kun du rgya cher gsungs/ /na mo rad na tra yA ya/ o~M ye d+harmA he tu pra b+ha bA he tun te ShA~M ta thA ga to h+ya bad ta/ /te ShAny+tsa yo ni ro d+ha e ba~M bA dI ma hA shra ma NaHye swA hA/ rtag tu bzlas 107.91a brjod byas na ni/ /bsam pa yongs su rdzogs par 'gyur/ /gnod pa cis kyang tshugs mi 'gyur/ /dam chos yongs su bzung bar 'gyur/ /tshigs su bcad pa 'di dag ni/ /mthu dang rdzu 'phrul bsam mi khyab/ /cho ga 'di dag thams cad ni/ /gang la dad pas yid ches na/ /'grub par the tshom med par 'gyur/ /bzlas brjod 'bum ni byas gyur na/ /dgos pa thams cad 'grub par 'gyur/ /ston pa shAkya'i thugs rje 'di/ /dge slong ner ban rak+Shi tas/ /tho gar yul nas rnyed pa ste/ /'gro ba kun gyi dpal du shar/ /'phags pa rten cing 'brel bar 'byung ba'i snying po'i cho ga'i gzungs/ rdzogs so// // |