@#/ /rgya gar skad du/ Ar+ya a nan ta mu kha ni ha ra nA ma d+hA ra NI/ bod skad du/ 'phags pa sgo mtha' yas pas sgrub pa zhes bya ba'i gzungs/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das yul yangs pa na tshal chen po'i khang pa brtsegs pa'i khang bzangs na/ dge slong brgyad stong gi dge slong gi dge 'dun chen po dang / byang chub sems dpa' sems dpa' chen po rab tu mang po dang thabs gcig tu bzhugs te/ de'i tshe zla ba gsum po 'di dag 'das nas de bzhin gshegs pa yongs su mya ngan las 'da'o zhes bcom ldan 'das kyis dran pa dang ldan zhing mkhyen bzhin du tshe'i 'du byed dag btang bar gyur to/ /de nas bcom ldan 'das kyis tshe dang ldan pa maud gal gyi bu chen po la bka' stsal te/ maud gal gyi bu chen po khyod song la stong gi 'jig rten gyi khams na dge slong ji snyed 106.242b gnas pa de dag thams cad tshal chen po'i khang pa brtsegs pa'i khang bzangs 'dir sdus shig /de nas tshe dang ldan pa maud gal gyi bu chen pos bcom ldan 'das de bzhin no zhes gsol te/ bcom ldan 'das kyi ltar mnyan nas/ skad cig de nyid la rang gi rdzu 'phrul gyi stobs kyis ri rab kyi rtse mo la 'dug ste/ stong gi 'jig rten gyi khams skad kyis go bar byas pa/ bder gshegs slob ma sems can gang su dag /'jig rten khams 'dir gnas pa kun nyon cig /deng 'dir ston pa chos kyi char 'bebs kyis/ /gang dag nyan par 'dod pa 'dir sheg shig /de'i tshe tshal chen po'i khang pa brtsegs pa'i khang bzangs su dge slong bzhi khri 'dus par gyur te/ de dag lhags nas bcom ldan 'das mthong ba dang / bcom ldan 'das kyi zhabs la mgo bos phyag 'tshal te/ bcom ldan 'das la lan gsum bskor ba byas nas phyogs gcig tu 'khod do/ /de nas tshe dang ldan pa shA ri'i bu sangs rgyas kyi mthus skad cig de nyid la 'di snyam du sems te/ bdag gis rdzu 'phrul mngon bar 'du bya ba gang mngon bar 'du byas pas stong gsum gyi stong chen po'i 'jig rten gyi khams na nyan thos kyi theg pa can nam/ rang sangs rgyas kyi theg pa can nam/ theg pa chen po can yang rung ste/ dge slong ji snyed gnas pa de dag thams cad tshal chen po'i khang pa brtsegs pa'i khang bzangs su 'du bar 'gyur ba de 'dra ba'i rdzu 'phrul mngon bar 'du bya ba mngon bar 'du bya gor ma chag snyam mo/ /de nas tshe dang ldan pa shA ri'i bus rdzu 'phrul mngon par 'du bya ba de lta bu mngon bar 'du byas te/ rdzu 'phrul mngon bar 'du bya ba de mngon bar 'du byas pas stong gsum gyi stong chen po'i 'jig rten gyi khams na nyan thos kyi theg pa can nam/ rang sangs rgyas kyi theg pa can nam/ theg pa chen po can yang rung ste/ dge slong ji snyed gnas pa de dag thams cad tshal chen po'i khang pa brtsegs pa'i khang bzangs su 'dus par gyur te/ de dag lhags nas bcom ldan 'das mthong ba dang / bcom ldan 106.243a 'das kyi zhabs la mgo bos phyag 'tshal te/ bcom ldan 'das la lan gsum bskor ba byas nas phyogs gcig tu 'khod do/ /de nas bcom ldan 'das kyis skad cig de nyid la byang chub sems dpa' sems dpa' chen po rnams la bka' stsal pa/ 'di lta ste/ byang chub sems dpa' sems dpa' chen po mthong ba don yod ces bya ba dang / 'jam dpal gzhon nur gyur pa dang / byang chub sems dpa' sems dpa' chen po ngan song thams cad spong ba dang / byang chub sems dpa' sems dpa' chen po mya ngan thams cad kyi mun pa nges par 'joms pa dang / byang chub sems dpa' sems dpa' chen po sgrib pa thams cad rnam par sel ba dang / byang chub sems dpa' sems dpa' chen po dra ba can gyi 'od dang / byang chub sems dpa' sems dpa' chen po yul thams cad kyi mun pa nges par 'joms pa'i blo gros dang / byang chub sems dpa' sems dpa' chen po 'phags pa spyan ras gzigs dbang phyug dang / byang chub sems dpa' sems dpa' chen po mthu chen thob dang / byang chub sems dpa' sems dpa' chen po yid yongs su mi skyo dang / byang chub sems dpa' sems dpa' chen po spos kyi glang po che dang / byang chub sems dpa' sems dpa' chen po dpa' ba dang / byang chub sems dpa' sems dpa' chen po nam mkha' mdzod dang / byang chub sems dpa' sems dpa' chen po 'od dpag med dang / byang chub sems dpa' sems dpa' chen po zla 'od dang / byang chub sems dpa' sems dpa' chen po ye shes tog dang / byang chub sems dpa' sems dpa' chen po bzang skyong dang / byang chub sems dpa' sems dpa' chen po blo gros rgya mtsho dang / byang chub sems dpa' sems dpa' chen po blo gros mi zad pa dang / byang chub sems dpa' sems dpa' chen po rdo rje snying po dang / byang chub sems dpa' sems dpa' chen po nam mkha'i snying po dang / byang chub sems dpa' 106.243b sems dpa' chen po kun du bzang po dang / byang chub sems dpa' sems dpa' chen po lag na rdo rje dang / byang chub sems dpa' sems dpa' chen po spobs pa brtsegs pa dang / byang chub sems dpa' sems dpa' chen po byams pa la bka' stsal pa/ rigs kyi bu dag khyed deng la phyogs bcu thams cad kyi sangs rgyas kyi zhing gang gA'i klung gi bye ma snyed dag na byang chub sems dpa' srid pa tha ma pa 'am/ skye ba gcig gis thogs pa'am/ phyir mi ldog pa'am/ mi skye ba'i chos la bzod pa thob pa'am/ dad pas mos pa ji snyed gnas pa de dag thams cad tshal chen po'i khang pa brtsegs pa'i khang bzangs 'dir sdus shig /de nas byang chub sems dpa' sems dpa' chen po de dag gis bcom ldan 'das kyi ltar mnyan te/ bcom ldan 'das legs so legs so zhes gsol nas/ skad cig de nyid la ltas de lta bu byas te/ ltas de byas pas tshal chen po'i khang pa brtsegs pa'i khang bzangs su byang chub sems dpa' srid pa tha ma pa bye ba khrag khrig brgya stong brjod du med pa'i brjod du med pa bye ba khrag khrig phrag 'bum dag lhags par gyur to/ /byang chub sems dpa' skye ba gcig gis thogs pa bye ba khrag khrig 'bum phrag dgu bcu brgya stong phrag dgu bcu dang / byang chub sems dpa' phyir mi ldog pa bye ba khrag khrig brgya 'bum phrag stong phrag brgyad bcu dang / byang chub sems dpa' sems dpa' chen po mi skye ba'i chos la bzod pa thob pa bye ba khrag khrig 'bum phrag brgya stong phrag sum bcu dang / byang chub sems dpa' sems dpa' chen po dad pas mos pa bye ba khrag khrig 'bum phrag brgya stong phrag brgyad lhags par gyur to/ /de dag thams cad lhags te bcom ldan 'das mthong nas/ bcom ldan 'das kyi zhabs la mgo bos phyag 'tshal te/ bcom ldan 'das la lan gsum bskor ba byas nas phyogs gcig tu 'khod do/ /de nas tshe dang ldan pa shA ri'i bus byang chub sems dpa' 'dus pa chen po de mthong nas skad cig de nyid la 'di snyam du sems te/ 106.244a zhu ba lung bstan pa ji lta bus byang chub sems dpa' sems dpa' chen po 'di dag gi som nyi thams cad spong bar 'gyur ba dang / sgrib pa med pa'i ye shes dang / spobs pa myur du thob par 'gyur ba dang / sangs rgyas kyi zhing gang gA'i klung gi bye ma snyed kyi de bzhin gshegs pa dgra bcom pa yang dag par rdzogs pa'i sangs rgyas thams cad las chos bstan pa thos par 'gyur ba dang / thos nas kyang 'dzin par 'gyur zhing bla na med pa yang dag par rdzogs pa'i byang chub mngon par rdzogs par sangs rgyas kyi bar du brjed par mi 'gyur ba dang / byang chub sems dpa' sems dpa' chen po rnams kyi spyod pa yongs su dag pa gang yin pa bzhi po de dag rjes su thob par 'gyur ba ste/ bzhi gang zhe na/ 'di lta ste/ sems can yongs su dag pa dang / chos yongs su dag pa dang / smon lam yongs su dag pa dang / sangs rgyas kyi zhing yongs su dag pa ste/ de dag rjes su 'thob par 'gyur ba dang / gya nom pa yid du 'ong bar byed pa'i chos bzhi rjes su 'thob par 'gyur ba ste/ bzhi gang zhe na/ 'di lta ste/ lus yid du 'ong ba dang / ngag yid du 'ong ba dang / sems yid du 'ong ba dang / skye ba yid du 'ong ba rjes su 'thob par 'gyur ba dang / gzungs kyi sgor 'jug pa bzhi rjes su 'thob par 'gyur ba ste/ bzhi gang zhe na/ 'di lta ste/ sgo mi zad pas sgrub pa'i gzungs kyi sgor 'jug pa dang / sems can rnams kyi dbang po la mkhas pa'i gzungs kyi sgor 'jug pa dang / las dang rnam par smin pa la mkhas pa 'dus ma byas kyi gzungs kyi sgor 'jug pa dang / chos zab mo la bzod pa'i gzungs kyi sgor 'jug pa rjes su thob par 'gyur ba de lta bu'i zhu ba de bzhin gshegs pa dgra bcom pa yang dag par rdzogs pa'i sangs rgyas la bdag gis zhu gor ma chag snyam mo/ /de nas tshe dang ldan pa shA ri'i bus zhu ba ji skad smos pa/ ji ltar yid la bzung ba/ ji ltar yid la byas pa/ ji ltar kun chub par byas pa de dag sangs rgyas bcom ldan 'das la rgya cher gsol to/ /'di skad ces kyang gsol te/ bcom ldan 'das zhu ba ji skad smos pa/ ji ltar 106.244b yid la bzung ba/ ji ltar yid la bgyis pa/ ji ltar kun chub par bgyis pa 'di dag gis byang chub sems dpa' sems dpa' chen po 'di dag gi spyod pa ji ltar yongs su dag par 'gyur ba de ltar bcom ldan 'das kyis bshad du gsol/ /de skad ces gsol pa dang / bcom ldan 'das kyis tshe dang ldan pa shA ri'i bu la 'di skad ces bka' stsal to/ /sha ri'i bu legs so legs so/ /sha ri'i bu khyod de bzhin gshegs pa la don 'di zhu bar sems pa khyod yang legs so/ /shA ri'i bu de'i phyir khyod legs par rab tu nyon la yid la zung shig dang ngas khyod la bshad do/ /tshe dang ldan pa shA ri'i bus bcom ldan 'das de ltar 'tshal lo/ /de bzhin no zhes gsol te/ bcom ldan 'das kyi ltar nyan pa dang / bcom ldan 'das kyis de la 'di skad ces bka' stsal to/ /shA ri'i bu 'di la byang chub sems dpa' sems dpa' chen po gang chos thams cad khas mi len cing 'dzin par mi byed pa des gzungs kyi gsang sngags kyi tshig 'di dag gzung bar bya'o/ /tad+ya thA/ a ne a ne a ne/ mu khe mu khe mu khe/ sa man ta mu khe/ dz+yo ti so me/ sa t+yA rA me/ sau ti yug te/ ni rug te/ ni rug te/ pra b+he/ hi li hi li/ ka la pe ka la pe si sA re sa ra ba ti/ bud d+ha ba ti/ hi li hi li/ hi le hi le/ hi le hi le/ hi le hi li/ ma hA hi li le/ hi le duN De/ tsaN De tsaN De/ tsa rA tsa rA Ne/ a tsa le ma tsa le/ a nan te a nan ta ga te/ a ra Ne/ nir ma re/ nir b+ha ba ne/ nir brta ne/ nir dan ne/ d+harma d+ha re/ ni ha ra ni ha ra/ bi ma le bi sho d+ha ne/ shI la bo Sh+ha ne/ pra kri ti dI ba ne b+ha ba ne/ b+ha ba bi/ b+ha ba ni/ a sa~M ge a sa~M ga bi ha re/ da me sha me/ bi ma le/ bi ma la pra b+he/ sa~M ga ra sha ne/ d+hi re d+hi d+hi re/ ma hA d+hi d+hi re/ ya she ya she ba ti/ tsa le a tsa le/ ma tsa le/ sa ma tsa le/ Di D+ha san d+hi/ su s+tha re/ a sa~M ge/ a sa~M g+ha b+hi ha re/ sa~M g+ha nir ha re/ nir ha ra ni bi ma le/ nir ha ra bi sho d+ha ni/ Di D+ha so me s+tha re/ s+tha ma s+tha ma/ ba ti ma hA pra b+he/ sa man ta pra b+he/ bi pu la pra b+he/ bi pu la rash+mi sa~M b+ha be/ sa man ta mu khe/ sarbA trA nu ga te/ a nan tshe d+ye bri ti ba ne/ ng+ha ra NI d+hA NA+e/ d+harma ni d+ha ne tre+e/ sa man ta b+ha dre/ sarba ta thA ga ta a ng+ha Sh+ThA na a d+hiSh+ThI te 106.245a swA hA/ sha ri'i bu byang chub sems dpa' sems dpa' chen po gzungs 'di dag 'dzin pa ni 'dus byas dang / 'dus ma byas kyi chos rnams la rlom sems su mi byed/ dmigs par mi byed/ dmod par mi byed/ btang snyoms su mi byed/ 'dzin par mi byed/ rtsom par mi byed de/ de dag thob par bya ba dang spang bar bya ba dang bsgom par bya ba dang rnam par 'phel bar bya ba'i phyir mi byed/ rnam par mi byed/ mngon par 'du mi byed/ mtshungs par ldan pa'i chos rnams kyang mi mthong / ldan pa rnams kyang mi mthong / chos rnams kyi skye ba yang mi mthong / /'gog pa yang mi mthong / 'das pa'i chos rnams kyang mi mthong / ma 'ongs pa'i chos rnams kyang mi mthong / da ltar byung ba'i chos rnams kyang mi mthong / chos rnams kyi 'phel ba dang 'bri bar yang mi mthong / chos gang yang sogs par yang mi byed/ 'grib par yang mi byed/ 'dogs par yang mi byed/ rnam par rig par yang mi byed par sangs rgyas dran pa 'ba' shig sgom ste/ de bsgom pa na gzugs su ma yin/ gzugs med par ma yin/ mtshan du ma yin/ mtshan med par ma yin/ dpe byad bzang por ma yin/ dpe byad bzang po med par ma yin/ rnam par shes par ma yin/ rnam par shes pa med par ma yin/ nyon mongs par ma yin/ nyon mongs pa med par ma yin/ tshul khrims su ma yin/ tshul khrims med par ma yin/ ting nge 'dzin du ma yin/ ting nge 'dzin med par ma yin/ shes rab tu ma yin/ shes rab med par ma yin/ rnam par grol bar ma yin/ rnam par grol ba med par ma yin/ rnam par grol ba'i ye shes mthong bar ma yin/ rnam par grol ba'i ye shes mthong ba med par ma yin/ skye bar ma yin/ skye ba med par ma yin/ rigs su ma yin/ rigs med par ma yin/ rus su ma yin/ rus med par ma yin/ 'khor du ma yin/ 'khor med par ma yin/ gnas par ma yin/ gnas med par ma yin/ thob par ma yin/ thob pa med par ma yin/ mngon par rtogs par ma yin/ mngon par rtogs pa med par ma yin/ nyon 106.245b mongs pa zad par ma yin/ nyon mongs pa ma zad par ma yin/ phung po dang / khams dang / skye mched du ma yin/ phung po dang / khams dang / skye mched med par ma yin/ shes par ma yin/ shes pa med par ma yin/ chos ston par ma yin/ chos mi ston par ma yin/ bdag rnam par dag par bya bar ma yin/ gzhan rnam par dag par bya ba ma yin/ sems can rnam par dag par bya ba ma yin/ sems can med pa rnam par dag par bya bar ma yin/ bdag gi don tu ma yin/ gzhan gyi don du ma yin/ chos su ma yin/ 'dul bar ma yin/ lus rnam par dag par ma yin/ ngag rnam par dag par ma yin/ yid rnam par dag par ma yin/ spyod pa rnam par dag par ma yin/ sngon gyi mtha'i spyod pa rnam par dag par ma yin/ phyi ma'i mtha'i spyod pa rnam par dag par ma yin/ da ltar byung ba'i spyod pa rnam par dag par ma yin/ bdag gi rnam par ma yin/ gzhan gyi rnam par ma yin pa de ni shA ri'i bu byang chub sems dpa' sems dpa' chen po'i chos thams cad mi 'dzin pa la 'jug pa zhes bya ba'i sangs rgyas rjes su dran pa zhes bya'o/ /don dam pa sgrub pas chos thams cad yang dag par 'du ba la mi 'jigs pa thob par byed pa zhes bya ba'i gzungs so/ /gcig tu nges par thob pas bsam pa thams cad yongs su rdzogs par byed pa zhes bya ba'i ting nge 'dzin to/ /dge ba'i rtsa ba thams cad gzhan la rag ma las pa'i ye shes sgrub pas chos kyi gter mtshan dang dpe byad bzang po'i rigs zil gyis mi non pa zhes bya ba'i gzungs so/ /dam pa yongs su tshol ba la mkhas pas bdud kyi las thams cad las yang dag par 'da' ba zhes bya ba'i gzungs so/ /shA ri'i bu byang chub sems dpa' gang dag sgo mtha' yas bsgrub pa'i gzungs 'di'i don thob pa de dag ni phyir mi ldog cing / myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /de ci'i slad du zhe na/ sha ri'i bu 'dir sangs rgyas thams cad kyi gter nges pa'i phyir ro/ /dmigs pa med pa'i spyod pa dang ldan pa'i gzungs 'di nyid las 106.246a byang chub sems dpa'i spyod pa thams cad kyi bye brag chod pa'i phyir ro/ /rab tu dbye bar 'gyur ro/ /de nas bcom ldan 'das kyis de'i tshe tshigs su bcad pa 'di dag bka' stsal to/ /chos rnams stong par dogs med cing / /byang chub ched du spros mi byed/ /chos dbyings 'khrugs par mi byed na/ /de phyir gzungs ni thob par 'gyur/ /mdo sde 'di ni mnyan par bya/ /'di la gzungs ni zad pa med/ /ye shes 'byor 'di 'di lta ste/ /des na byang chub thob par 'gyur/ /byang chub sems dpa' 'jigs med pa/ /gzungs 'di rab tu gzung byas na/ /phyogs bcu dag gi sangs rgyas kyi/ /chos bstan pa ni thos par 'gyur/ /don dang tshig 'brus bskyod kun gyi/ /mchog gi chos ni rnam par shes/ /nyi ma'i 'od zer ji snyed pa/ /de snyed tshig rnams shes par 'gyur/ /gang dag chos kyi mchog 'gyur ba/ /rlabs chen gzungs kyi sgo rnams te/ /gang zhig mdo 'di 'dzin de la/ /thams cad rtag tu mngon du 'gyur/ /gal te sems can thams cad kyis/ /de la bskal par dogs dris te/ /the tshom thams cad chad gyur kyang / /de yi ye shes mi zad do/ /mdo sde 'di la su dga' ba/ /de ni chos kyi rgyal po'i sras/ /byang chub mchog la nye ba ste/ /yid brtan gyur dang chos 'dzin pa'o/ /gzungs 'di 'dzin par su byed pa/ /de la sems can thams cad dga'/ /sangs rgyas rnams kyang de la dgyes/ /grags pa 'jig rten 'byung bar 'gyur/ /su zhig mdo sde 'di 'dzin pa/ /de ni 'chi ba'i dus byed tshe/ /sangs rgyas bye ba brgyad bcu mthong / /lag pa de la nye bar 'jog /gzungs 'di 'dzin par byed pa ni/ /bskal pa bye ba stong rnams su/ /sngon chad sdig pa gang byas pa/ /zla ba gcig gis byang bar 'gyur/ /byang chub sems dpa'i bsod nams gang / /bskal pa bye bar bsgrubs pa kun/ /gzungs 'di 'dzin par byed pa yis/ /zla ba gcig gis zil gnon 'gyur/ /khams gsum sems can ji snyed pa/ /gal te thams cad bdud gyur kyang / /mdo sde 'di ni gang 'dzin pa/ /de la 106.246b bar chad byed mi nus/ /byang chub 'tshang rgya bar du de/ /dran dang blo gros rtogs ldan 'gyur/ /gzungs kyi dam pa gang yin pa/ /de yi lce yi rtse mor gnas/ /ji ltar mdo sde bstan 'di la/ /gzungs ni so sor nges pa bzhin/ /'di las thams cad mkhyen pa bstan/ /'di las byang chub thob par 'gyur/ /gzungs 'di bshad ma thag tu yang / /mar me zhes byas nga lung bstan/ /skad cig de la sangs rgyas ni/ /gang gA'i klung gi bye snyed mthong / /gang zhig sangs rgyas thams cad kyis/ /bstan pa 'dir ni rtogs 'dod cing / /mdo sde 'di la bsten pa des/ /thams cad myur du thob par 'gyur/ /sangs rgyas zhing ni rnam dag dang / /nyan thos phun sum tshogs pa dang / /'od dang mtshan kyang rnam dag pa/ /mdo sde 'dis ni byed par 'gyur/ /de bas bag ni yod gyur la/ /zhag bdun bar du 'di sems pa/ /sangs rgyas bye ba brgyad bcu yis/ /de yi 'og tu gzungs sbyin 'gyur/ /bsam bya sems par mi bsam ste/ /bsam bya min yang mi bsam mo/ /soms shig 'gal bar ma sems shig /de'i 'og tu gzungs thob 'gyur/ /dper na rgya mtshor phyin pa'i mi/ /nor la som nyi med pa ltar/ /de bzhin gzungs 'di thob gyur nas/ /bde ba la yang som nyi med/ /'di las rdzogs pa'i byang chub nye/ /de bas 'di la sbyor bar gyis/ /zhi ba'i gnas ni thob gyur nas/ /rdzogs pa'i byang chub thob par 'gyur/ /de nas bcom ldan 'das kyis yang tshe dang ldan pa shA ri'i bu la bka' stsal pa/ shA ri'i bu byang chub sems dpa' sems dpa' chen po chos bzhi dang ldan na gzungs 'di thob par 'gyur ro/ / bzhi gang zhe na/ 'di lta ste/ 'dod pa rnams la lhag par chags pa med pa yin/ sems can thams cad la phrag dog med pa yin/ bdog pa thams cad yongs su gtong zhing 'gyod pa med par sbyin pa'i tshul can yin/ nyin mtshan du chos 'dod cing chos kyi kun dga' la dga' ba yin te nyin mtshan du chos la dga' zhing chos 'dod pa yin te/ shA ri'i bu byang chub sems dpa' sems dpa' chen po chos bzhi po de dag dang ldan na gzungs 'di thob par 'gyur ro/ / 106.247a de nas bcom ldan 'das kyis de'i tshe tshigs su bcad pa 'di dag bka' stsal to/ /ngan cing bdud kyi spyod yul ba/ /'dod pa dri nga spang bar byos/ /de dag sems can dmyal ba'i rkyen/ /ngan song rnams kyi rgyu yang yin/ /shes kyi khe dang rnyed dang grags pa'i phyir/ /pha rol dag la phrag dog mi bya ste/ /dga' ba'i mig gis sems can bltas byas na/ /mthu che ba dang gzugs kyang mdzes par 'gyur/ /sems can gang dag kha cig rtsod 'gyur ba/ /de yi gzhi rtsa yongs su 'dzin pa ste/ /de ltar gang la sred par 'gyur ba spangs/ /sred pa spang ba byas na gzungs su 'gyur/ /gal te byang chub 'dod na gzhan ma sems/ /nyin dang mtshan du chos ni btsal bar byos/ /chos tshig 'di 'dra 'di dag sten byed na/ /de la gzungs ni mngon du 'gyur bar 'ong / /shA ri'i bu gzhan yang byang chub sems dpa' sems dpa' chen po chos bzhi dang ldan na gzungs 'di thob par 'gyur ro/ /bzhi gang zhe na/ 'di lta ste/ dgon pa dang / dben pa la gnas pa dang / chos zab mo la bzod pa'i stobs skyed pa nyid dang rnyed pa dang bkur sti dang tshigs su bcad pa dag la lhag par chags pa med pa dang sdug pa'i dngos po thams cad la mi lta zhing / tha na lus dang srog kyang yongs su gtong ba ste/ shA ri'i bu byang chub sems dpa' sems dpa' chen po chos bzhi po de dag dang ldan na gzungs 'di thob par 'gyur ro/ /de nas bcom ldan 'das kyis de'i tshe tshigs su bcad pa 'di dag bka' stsal to/ /rgyal bas bsngags pa'i dgon par gnas par gyis/ /de la gnas pas gzhan la brnyas mi bya/ /zab mo'i bzod la 'dun pa bskyed nas su/ /bag yod mgo la 'bar bzhin gnas par gyis/ /'di ltar tshul 'chos byed kyi gzhir gyur pa/ /shes khe rnyed pa rnams la gnas ma byed/ /bya dang 'dra bar ngan ngon dag gis chog byas te/ /mir gyur pa'i 'bras bu yod par byos/ /kye ma sangs rgyas bstan pa legs par rnyed/ /sdug bsngal mang po'i rtsa ba khyim yang spongs/ /lus dang ngag dang yid kyang yongs dag pas/ /sangs rgyas dang ni chos la gus par gyis/ / 106.247b rnyed 'dod dran pa ma yin shes rab min/ /dad dang tshul khrims ma yin chos sems min/ /de ni byang chub ring ste gnam sa bzhin/ /de ltar rnyed pa yongs su spang bar bya/ /shA ri'i bu gzhan yang byang chub sems dpa' sems dpa' chen po chos bzhi dang ldan na gzungs 'di thob par 'gyur ro/ /bzhi gang zhe na/ 'di lta ste/ yi ge 'bru brgyad kyi don khong du chud par bya'o/ /brgyad po de dag gang zhe na/ 'di lta ste/ pa zhes bya ba don dam par chos thams cad la bdag med pa la 'jug pa khong du chud pa dang / la zhes bya ba mtshan dang dpe byad bzang po dang mtshan dang dpe byad bzang po med par de bzhin gshegs pa'i chos kyi sku la 'jug pa khong du chud pa dang / ba zhes bya ba byis pa'i chos rnams dang mkhas pa'i chos rnams ji lta ba bzhin du gnyis su med pa la 'jug pa khong du chud pa dang / dza zhes bya ba skye ba dang rga ba dang 'chi ba dang skye ba dang rga ba dang 'chi ba med pa'i 'gro ba mi skye mi 'gag pa la 'jug pa khong du chud pa dang / ka zhes bya ba las dang rnam par smin pa dang / las dang rnam par smin pa med pa la 'jug pa khong du chud pa dang / d+ha zhes bya ba gzungs kyi chos kyi rnam grangs kyi stong pa nyid dang / mtshan ma med pa dang / smon pa med pa dag chos kyi dbyings la 'jug pa khong du chud pa dang / sha zhes bya ba zhi gnas dang lhag mthong dang / zhi gnas dang lhag mthong med par chos thams cad kyi de bzhin nyid la 'jug pa khong du chud pa dang / k+Sha zhes bya ba chos thams cad skad cig pa ste/ gzod ma nas zhi ba'i phyir zad pa med pa dang / 'jig pa med pa dang / rgyu ba med pa dang / chos thams cad mya ngan las 'das par 'jug pa khong du chud pa ste/ de ltar yi ge 'bru brgyad po de dag gi don khong du chud par rtogs par bya ba 'di ni don khong du chud pa dang po'o/ /gzungs kyi chos kyi rnam grangs 'di legs par bris te gzung bar bya ba 'di ni don khong du chud pa gnyis pa'o/ /zla ba phyed phyed cing gzungs kyi chos kyi rnam grangs 'di rtag tu klog pa dang / rjes su dran par bya ba'i phyir brtson par bya ba 'di ni don khong du chud pa gsum pa'o/ / 106.248a gzungs kyi chos kyi rnam grangs 'di la mngon par brtson pa'i byang chub sems dpa' sems dpa' chen pos sems can thams cad yang dag par dga' bar bya ba dang / yang dag par 'dzin du gzhug pa dang / yang dag par gzengastod pa la gzud pa'i phyir brtson par bya ba 'di ni don khong du chud pa bzhi pa ste/ shA ri'i bu byang chub sems dpa' sems dpa' chen po chos bzhi po de dag dang ldan na gzungs 'di thob par 'gyur ro/ /de nas bcom ldan 'das kyis de'i tshe tshigs su bcad pa 'di dag bka' stsal to/ /yi ge 'bru brgyad 'di dag bsam par bya/ /mdo sde 'di ni bris nas bcang bar bya/ /zla ba phyed cing rtag tu bklag par bya/ /sems can rnams kyang 'di 'dzin gzhug par bya/ /byang chub nye dang shes rab rgya yang che/ /phyogs bcu rnams na sangs rgyas gang su dag /bzhugs pa thams cad des ni mdun du mthong / /de phyir 'dun pa bskyed de 'di la bslab/ /shA ri'i bu bzhi po 'di dag ni gzungs 'di la mngon par brtson pa'i byang chub sems dpa' sems dpa' chen po'i phan yon yin te/ bzhi gang zhe na/ 'di lta ste/ phyogs bcu'i sangs rgyas bcom ldan 'das thams cad de la dgongs pa dang / de la bdud kyi las mi 'byung ba dang / de'i las kyi sgrib pa myur du 'byang ba dang spobs pa rgyun mi 'chad par myur du 'thob pa ste/ shA ri'i bu bzhi po de dag ni gzungs 'di la mngon bar brtson pa'i byang chub sems dpa' sems dpa' chen po'i phan yon yin no/ /de nas bcom ldan 'das kyis de'i tshe tshigs su bcad pa 'di dag bka' stsal to/ /sangs rgyas kun gyis de ni yid la mdzad/ de la bdud kyis glags ni rnyed mi 'gyur/ /de'i las kyi sgrib pa myur du 'byang / /spobs pa mtha' yas rnams kyang thob par 'gyur/ /shA ri'i bu sngon byung ba 'das pa'i dus na bskal pa grangs med pa'i yang ches grangs med pa/ yangs brgya cher gyur pa/ tshad med pa de'i tshe de'i dus na de bzhin gshegs pa dgra bcom pa yang dag par rdzogs pa'i 106.248b sangs rgyas rin chen dpal gyi gzi brjid rgyal po lta bu zhes bya ba/ rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das 'jig rten du byung ste/ shA ri'i bu bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rin chen dpal gyi gzi brjid rgyal po lta bu de yongs su mya ngan las 'da' ba'i dus kyi tshe 'khor los sgyur ba'i rgyal po snang ba 'dzin ces bya ba mi'i dbang po rin po che sna bdun dang ldan pa zhig byung ngo / /de'i bu yon tan rin po che bsam gyis mi khyab pa'i dpal zhes bya ba zhig yod de/ de skyes nas lo bcu drug lon pa dang / des sgo mtha' yas pas sgrub pa'i gzungs kyi chos kyi rnam grangs 'di bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rin chen dpal gyi rgyal po lta bu de las thos te/ des gzungs 'di thos ma thag tu thob par bya ba'i phyir brtson par gyur to/ /de lo bdun khrir rmugs pa dang gnyid kyis ma bsten to/ /non par ma gyur to/ /de lan 'ga' yang rgyal srid la dga' ba'am/ nor la dga' ba'am/ bdag la dga' bar ma gyur to/ /de lo bdun khrir lan 'ga' yang sa la glos ma phab ste/ gcig tu nges par nang du yang dag 'jog la gnas so/ /sangs rgyas bye ba phrag dgu bcu las chos bstan pa thos te/ thos nas kyang nyams su blangs so/ /thams cad bzung ngo / /gzung nyams su blangs nas kyang bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rin chen dpal gyi gzi brjid kyi rgyal po lta bu de nyid las rab tu byung ngo / /de rab tu byung nas de lo dgu khri 'das pa dang / des sgo mtha' yas pas sgrub pa'i gzungs 'di bsgrubs te/ bsgrubs nas kyang sems can rnams la rgya cher yang dag par bshad do/ /des tshe gcig po de nyid la sems can bye ba khrag khrig brgya stong phrag brgyad bcu bla na med pa yang dag 106.249a par rdzogs pa'i byang chub yang dag par 'dzin du btsud cing / /phyir mi ldog pa'i sa la bkod par gyur to/ /shA ri'i bu 'khor de na tshong dpon gyi bu zla ba'i tog ces bya ba zhig yod do/ /des sgo mtha' yas pas sgrub pa'i gzungs kyi chos kyi rnam grangs 'di chos smra ba'i dge slong de las thos so/ /thos nas kyang rjes su yi rang bar gyur te/ de rjes su yi rang ba'i mod las skyes pa'i dge ba'i rtsa ba des sangs rgyas bye ba phrag dgu bcu las chos bstan pa thos so/ /thos nas kyang nyams su blangs so/ /thams cad bzung ngo / /thams cad du yang gzungs thob pa rnams kyi mchog dang / tshig btsun pa gzung ba'i tshig dang ldan pa rnams kyi mchog dang / byang chub sems dpa' sems dpa' chen po spobs pa rgyun mi chod pa rnams kyi mchog tu gyur to/ /des bskal pa gsum du de bzhin gshegs pa dgra bcom pa yang dag par rdzogs pa'i sangs rgyas de dag mnyes par byas so/ /mnyes par byas nas bskal pa gsum 'das pa dang bla na med pa yang dag par rdzogs pa'i byang chub tu mngon bar rdzogs par sangs rgyas so/ /shA ri'i bu de'i tshe de'i dus na tshong dpon gyi bu zla ba'i tog ces bya bar gyur pa de gzhan zhig yin pa snyam du khyod som nyi'am/ yid gnyis sam/ the tshom za bar gyur na/ shA ri'i bu khyod kyis de ltar mi blta'o/ /de ci'i phyir zhe na/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas mar me mdzad de'i tshe de'i dus na tshong dpon gyi bu zla ba'i tog ces bya bar gyur to/ /shA ri'i bu de'i tshe de'i dus na yon tan rin po che bsam gyis mi khyab pa'i dpal zhes bya ba chos smra bar gyur pa de gzhan zhig yin pa snyam du khyod som nyi dang / yid gnyis sam/ the tshom za bar gyur na/ shA ri'i bu khyod kyis de ltar mi blta 'o/ /de ci'i phyir zhe na/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas tshe dpag med de'i tshe de'i dus na dge slong chos smra ba yon tan rin po che bsam gyis mi khyab pa'i dpal zhes bya bar gyur to/ / 106.249b shA ri'i bu nga dang bskal pa bzang po'i byang chub sems dpa' sems dpa' chen po rnams kyis kyang de'i tshe gzungs kyi chos kyi rnam grangs 'di thos so/ /thos nas kyang rjes su yi rang ste/ rjes su yi rang ba'i mod las skyes pa'i dge ba'i rtsa ba des ngas bskal pa bye ba 'bum phrag bzhi khrir 'khor ba phyir brnyil to/ /sangs rgyas bye ba phrag dgu bcu las chos bstan pa yang thos te/ thams cad du yang gzungs thob pa rnams kyi mchog dang / tshig btsun pa gzung ba'i tshig dang ldan pa rnams kyi mchog dang / byang chub sems dpa' sems dpa' chen po spobs pa rgyun mi 'chad pa rnams kyi mchog tu gyur to/ /shA ri'i bu de lta bas na byang chub sems dpa' sems dpa' chen po myur du bla na med pa yang dag par rdzogs pa'i byang chub mngon bar rdzogs par 'tshang rgya bar 'dod pas tha na gzungs kyi chos kyi rnam grangs 'di la rjes su yi rang bar yang brtson par bya'o/ /de ci'i phyir zhe na/ de nyid byang chub sems dpa' sems dpa' chen po de'i bla na med pa yang dag par rdzogs pa'i byang chub kyi ched du phyir mi ldog pa'i sa dang / chos smra ba rnams mgu bar byed pa'i rgyur 'gyur na/ gang yi ger 'dri ba dang / lung 'bog pa dang / 'dzin pa dang / klog pa dang / kun chub par byed pa dang / tshul bzhin du yid la byed pa dang / gzhan dag la rgya cher yang dag par ston pa lta ci smos te/ bsod nams kyi phung po de'i tshad ni de bzhin gshegs pa ma gtogs par sems can thams cad kyis kyang shes pa'am/ bsam par mi nus so/ /de nas bcom ldan 'das kyis de'i tshe tshigs su bcad pa 'di dag bka' stsal to/ /mdo sde thos nas rjes su yi rang dang / /yi ger bris dang gzung dang bklags pa yis/ /bsod nams chu bo ji tsam bskyed pa ni/ /sems can kun gyis shes par yong mi nus/ /de ni tshe rabs kun du rgyal ba mthong / /de dag la yang dad pa bsam yas rnyed/ /mdo sde zab mo'i tshul yang shes par 'gyur/ /de ni myur du byang chub mchog 'tshang rgya/ /bla med byang chub ma reg bar du 106.250a yang / /de ni ting nge 'dzin dang mngon shes dang / /gzungs rnams dang ni gzugs dang longs spyod dang / /sangs rgyas mthong las nyams par yong mi 'gyur/ /rjes su dran pa sngon gyi tshe rabs na/ /tshong dpon bus ni gzungs 'di thos gyur nas/ /sangs rgyas gang gA'i bye snyed mthong gyur te/ /des ni 'dod bzhin byang chub rnams sangs rgyas/ /mar me mdzad pa de tshe tshong dpon bu/ /sngon gyi tshe rabs 'od zer mtha' yas gyur/ /de tshe chos smra sangs rgyas tshe dpag med/ /nga ni bskal pa bzang dang bcas yi rang / /byang chub myur du reg par su 'dod dang / /bdud rnams myur du gzhom par su 'dod dang / /bsod nams brgya'i mtshan bzangs su 'dod pa/ /'di la brtson na rnyed par dka' mi 'gyur/ /gang gA 'i klung gi bye snyed 'jig rten khams/ /gang gis rin chen bkang ste sbyin byin yang / /bris dang bzung ba'i bsod nams gang yin pa/ /de la sbyin pas dper yang mi 'gyur ro/ /de ltar thos nas rtse gcig bag yod par/ /byang chub sems dpa' mkhas pas 'di bzung ngam/ /gzungs 'di bris shing sems pa de dag ni/ /byang chub rnyed pa dka' ba med par bshad/ /de nas bcom ldan 'das kyis tshe dang ldan pa shA ri'i bu la bka' stsal pa/ shA ri'i bu sgo mtha' yas pas sgrub pa'i gzungs 'di la mngon bar brtson pa'i byang chub sems dpa' sems dpa' chen po'i lus la gangs la gnas pa'i gnod sbyin brgyad gzi brjid dang mdangs 'jug cing nyin mtshan du bsrung ba dang / skyob pa dang / sbed par byed do/ /brgyad gang zhe na/ 'di lta ste/ gnod sbyin dpa' bo zhes bya ba dang / brtan po dang / bdag po dang / sred med kyi bu'i stobs dang / spyod pa'i blo gros dang / thub dka' dang / 'jigs su rung ba dang / gnod sbyin lag bzangs shes bya ba ste/ gnod sbyin brgyad po de dag 'ong bar bya ba'i phyir shin du khrus bya ba dang / gos shin du gtsang ma bgo ba dang / 'chag sar 'gro ba dang / sems can thams cad la zhe 'gras pa med pa'i sems su bya/ gzungs 106.250b kyi chos kyi rnam grangs 'di yang yid la byas te/ de ltar byas na de la gnod sbyin brgyad po de dag myur du bzhin ston par 'gyur ro/ /byang chub sems dpa' sems dpa' chen po 'dod pa na spyod pa'i lha rnams kyi nang du skyes pa'i brgyad po 'di dag kyang de la sems par 'gyur te/ brgyad gang zhe na/ 'di lta ste/ byang chub sems dpa' sems dpa' chen po rnam par snang byed ces bya ba dang / snang byed dang / shes rab 'od dang / nyi ma'i 'od dang / yang dag skul byed dang / bsam pa thams cad yongs su rdzogs byed dang / skar ma'i rgyal po dang / byang chub sems dpa' sems dpa' chen po spyod pa'i blo gros shes bya ba ste/ byang chub sems dpa' sems dpa' chen po brgyad po de dag des gzungs thob par bya ba'i phyir mngon bar brtson par 'gyur ro/ /gzungs 'di la brtson pa'i byang chub sems dpa' sems dpa' chen pos kyang bden pa'i dam bca' bar bya'o/ /byas pa gzo ba dang / byas pa tshor ba can dang / chos 'dod pa dang / chos la dga' ba dang / zab mo'i chos la bzod pa mngon bar brtson par bya'o/ /byang chub sems dpa' sems dpa' chen po gzungs la brtson pas kun 'ged bgo bsha' byed pa'i ngang tshul can du bya ste/ des ji ltar chung ba dang / ji ltar nyung ba las kyang sbyin pa sbyin par bya na mang po las lta smos kyang ci dgos/ bcom ldan 'das kyis gzungs kyi chos kyi rnam grangs 'di bshad pa na byang chub sems dpa' bye ba khrag khrig brgya stong phrag gang gA'i klung gi bye ma sum cus ni sgo mtha' yas pas sgrub pa'i gzungs 'di thob ste/ bla na med pa yang dag par rdzogs pa'i byang chub las kyang phyir mi ldog par gyur to/ /lha dang mi dang lha ma yin gyi skye dgu sngon sems ma bskyed pa dkrigs pa bye ba khrag khrig brgya 'bum phrag stong phrag drug bcus ni bla na med pa yang dag par rdzogs pa'i byang chub tu sems bskyed do/ /bcom ldan 'das la tshe dang ldan pa sha ri'i bus 'di skad ces gsol to/ /bcom ldan 'das chos 106.251a kyi rnam grangs 'di'i ming ci lags/ 'di ji ltar gzung bar bgyi/ bcom ldan 'das kyis bka' stsal pa/ sha ri'i bu de'i phyir khyod kyis chos kyi rnam grangs 'di sgo mtha' yas pas sgrub pa'i gzungs shes bya bar zung shig /byang chub sems dpa' gcig tu nges par mngon bar 'phags par byed pa zhes bya bar yang zung shig /bdud thams cad rnam par 'jigs par byed pa zhes bya bar yang zung shig /gcig tu nges pa rnam pa thams cad mkhyen pa nyid shin du thob par byed pa zhes bya bar yang zung shig /bcom ldan 'das kyis de skad ces bka' stsal nas/ tshe dang ldan pa shA ri'i bu dang / dge slong de dag dang / byang chub sems dpa' de dag dang lha dang mi dang lha ma yin dang dri zar bcas pa'i 'jig rten yi rangs te/ bcom ldan 'das kyis gsungs pa la mngon bar bstod do/ /'phags pa sgo mtha' yas pas sgrub pa'i gzungs shes bya ba'i mdo rdzogs s+ho// //rgya gar gyi mkhan po pradz+nya bar ma dang / zhu chen gyi lo ts+tsha ba ban de ye shes sdes TI ka dang sbyar te slad kyis zhus nas gtan la phab pa/ skar zhus// |