@#/ /rgya gar skad du/ Ar+ya sa man ta b+ha dra nA ma d+hA ra NI/ bod skad du/ 'phags pa kun du bzang po zhes bya ba'i gzungs/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod phung po'i ri la/ dge slong brgyad stong gi dge 'dun chen po dang / byang chub sems dpa' bye ba khrag khrig 'bum phrag dgu bcu rtsa dgu dang thabs gcig tu bzhugs te/ gnas gtsang ma'i ris kyi lha'i bu 'bum phrag du mas yongs su bskor cing mdun gyis bltas nas chos ston to/ /de nas byang 106.228a chub sems dpa' sems dpa' chen po spyan ras gzigs dbang phyug stan las langs te bla gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /bcom ldan 'das de dag ni bdag gis de bzhin gshegs pa zla ba bla ma'i 'od las blangs pa kun du bzang po'i gzungs yang dag par ston par 'tshal te/ gzungs de thos ma thag tu byang chub sems dpa'i theg pa pa rnams phyir mi ldog cing myur du bla na med pa yang dag par rdzogs pa'i byang chub mngon par rdzogs par 'tshang rgya'o/ /las kyi sgrib pa thams cad kyang sel to/ /longs spyod chen po phun sum tshogs pa yang yongs su 'dzin to/ /lus rnam par dag pa yang 'thob bo/ /ngag rnam par dag pa yang 'thob bo/ /sems rnam par dag pa yang 'thob bo/ /pha rol tu phyin pa rgya mtsho thams cad kyang yongs su rdzogs par bgyid do/ /gzungs rgya mtsho thams cad kyang 'thob bo/ /de bzhin gshegs pa mthong ba thams cad kyang mnyes par bgyid do/ /bcom ldan 'das bdag gis gzungs 'di thos ma thag tu mi skye ba'i chos la bzod pa thob par gyur to/ /dpa' bar 'gro ba'i ting nge 'dzin kyang thob/ rin chen phyag rgya'i ting nge 'dzin kyang thob/ 'bar ba'i sgron ma'i ting nge 'dzin kyang thob/ rgya mtsho phyag rgya'i ting nge 'dzin kyang thob/ rdo rje dkyil 'khor gyi ting nge 'dzin kyang thob/ /mi zad pa'i za ma tog gi ting nge 'dzin kyang thob/ /sgyu ma lta bu'i ting nge 'dzin kyang thob/ /phyogs bcu rgyas par 'gengs pa'i ting nge 'dzin kyang 'thob ste/ bcom ldan 'das de la sogs pa ting nge 'dzin bye ba khrag khrig 'bum phrag gang gA'i klung gi bye ma snyed bdag la mngon sum du gyur to/ /bcom ldan 'das des na bdag da ltar dran pa 'di lta bu dang ldan/ blo gros 'di lta bu dang ldan/ chags pa ma mchis pa'i ye shes 'di lta bu dang ldan zhing / mthong ba 106.228b dang thos pa dang bsnyen bkur bgyis pa don mchis par gyur te/ bcom ldan 'das bdag thos pa don mchis/ gzungs 'di thos pa don mchis na/ bcom ldan 'das kyis gnang bar mdzad cing / 'khor bzhi po de yang yongs su dgod du gsol/ /bcom ldan 'das kyis bka' stsal pa/ sems can dag pa de'i dus la bab par shes na smros shig /de bzhin gshegs pas 'khor bzhi po 'di byin gyis brlabs zin to/ /de nas byang chub sems dpa' sems dpa' chen po 'phags pa spyan ras gzigs dbang phyug gis skad cig thang cig yud tsam de nyid la rdo rje'i dkyil 'khor gyi ting nge 'dzin la snyoms par zhugs nas gzungs 'di smras so/ /dkon mchog gsum la phyag 'tshal lo/ /byang chub sems dpa' sems dpa' chen po snying rje chen po dang ldan pa 'phags pa spyan ras gzigs dbang phyug la phyag 'tshal lo/ /tad+ya thA/ kha ga me kha ga me/ tsak+Shu ga be/ shro tra kha be/ g+hA na kha be/ dzi hwA kha be/ kA ya kha be/ ma na kha be/ sa ra kha be/ sa ra kha be/ shUn tra kha be/ a na mid ta kha be/ a pra Ni hi da kha be/ sa mA d+hi kha be/ pA ra mi tA kha be/ bo d+hi kha be/ sa ra sa ra sa ra/ sarba bud d+ha a d+hiSh+Thi ti/ b+ha ra b+ha ra b+ha ra/ d+harma a d+hiSh+Thi te/ ka la ka la ka la/ sang g+ha a d+hiSh+Thi te/ na mo dwA na ba ti NA~M/ bud d+ha ko Ti NA~M/ a d+hiSh+Than tu man/ tsa tra sra bar sha do a yur ba lan tsa da dan du/ tad+ya thA/ su ra b+hi su ra b+hi/ ma hA su ra b+hi/ mu ni mu ni/ ma hA mu ni/ ma ti ma ti/ ma hA ma ti/ na mo rad na tra yA ya/ na ma Ar+ya a ba lo ki te shwa rA ya/ bo d+hi satwA ya/ ma hA satwA ya/ ma hA kA ru Ni kA ya/ sa mri dAn du man/ sa man ta b+ha dra d+hA ra NI swA hA/ /gzungs 'di thos ma thag tu byang chub sems dpa' bye ba phrag dgu bcu rtsa gnyis po de dag gis dpa' bar 'gro ba'i ting nge 'dzin thob par gyur to/ /byang chub sems dpa' dpag tu med pa dag ni gzungs sna tshogs thob par gyur to/ /gzungs 'di'i cho ga ni 'di lags te/ nang par langs nas lan brgya rtsa brgyad bzlas brjod bgyi'o/ /lan nyi shu rtsa gcig bzlas brjod bgyis na 'phags 106.229a pa spyan ras gzigs dbang phyug mthong bar 'gyur ro/ /phongs par gyur pa'i tshe lan bdun yid la bgyis na thar bar 'gyur ro/ /rims nad thams cad la rna bar bzlas brjod bgyi'o/ /rlung gis zin na mar dang 'bru mar la lan nyi shu rtsa gcig bzlas brjod bgyis te bsku bar bgyi'o/ /so na na so shing la lan nyi shu rtsa gcig yongs su bzlas te bca' bar bgyi'o/ /rna ba na na ras bal gyi sa bon 'bru mar dang lhan cig tu bskol ba la lan bdun bzlas brjod bgyis te zangs kyi snod kyis rna bar blugs par bgyi'o/ /klad pa na ba la 'bru mar ro/ /lto na ba la byab par bgyi'o/ /gdon gyis btab pa la tshon skud sna lnga la lan brgya rtsa brgyad bzlas te mgul du gdags so/ /mkha' 'gro ma'i gdon gyis btab na 'bru mar la lan bdun bzlas te gshis thams cad du byug go/ /nad thams cad la byab par bgyi'o/ /'di ni sgrub pa ma mchis pa'i cho ga'o/ /ji ste sangs rgyas dang / byang chub sems dpa' mthong ba dang / gzungs dang / ting nge 'dzin 'thob pa dang / rdzu 'phrul gyis 'gro ba dang / mi snang bar bgyi ba dang / mig bsku ba dang / ldong ros la sogs pa bsgrub par 'tshal na/ des sku gdung dang bcas pa'i mchod rten dang sku gzugs kyi spyan sngar dkyil 'khor bgyis te/ bum pa gang ba brgya rtsa brgyad bzhag la/ gdugs dang rgyal mtshan dang ba dan bres te/ me tog sna tshogs kyis chal par bkang la/ tsan dan dang a ka ru dang kun du ra'i bdug pas bdugs te/ mar me brgya rtsa brgyad bud cing mchod pa chen po bgyis te/ tshangs par spyod pa gtsang bas gos gtsang ma bgos la gzungs kyi gsang sngags 'di dag gis mtshams gcad par bgyi'o/ /na mo rad na tra yA ya/ na mo Ar+ya a ba lo ki te shwa rA ya/ bo d+hi satwA ya/ ma hA satwA ya/ tad+ya thA/ ti li ban d+ha mi/ mi li ban d+ha mi/ tsi li mi li ban d+ha mi/ sI mi ban d+ha mi/ bdag gi mtshams las su yang 'da' bar ma gyur cig swA hA/ chu la lan nyi shu rtsa gcig yongs su bzlas te phyogs bcur mtshams gcad par bgyi'o/ /gang 106.229b gis 'gugs par 'gyur ba'i gzungs 'di dag kyang thog mar brjod par bya'o/ /na mo rad na tra yA ya/ na mo Ar+ya a ba lo ki te shwa rA ya/ bo d+hi satwA ya/ ma hA satwA ya/ ma hA kA ru Ni kA ya/ tad+ya thA/ tsi li tsi li/ mi li mi li/ tsi le li/ e hi b+ha ga ban/ Ar+ya a ba lo ki te shwa ra ya swA hA/ 'di ni bdag gi snying po bshad pa ste/ des bdag 'gug par 'gyur ro/ /de'i 'og tu zla ba yar gyi ngo'i tshes brgyad nas bzung ste nya'i bar du lan brgya rtsa brgyad bzlas brjod bgyis te dus gsum du bzlas brjod bgyi/ dus gsum du khrus bgyi/ dus gsum du gos brje bar bgyi'o/ /de nas tshes bcwa lnga la mchod pa chen po bgyis te bzlas brjod dpag tu ma mchis par bgyi'o/ /'on tang nam gyi gung thun la 'phags pa spyan ras gzigs dbang phyug gser gyi kha dog gi lus dang ldan pa/ mtshan dang dpe byad bzang pos legs par brgyan pa/ lus las 'od zer bye ba stong 'byin cing mchi bar 'gyur ro/ /de la rig sngags 'chang gis skrag par mi bgyi zhing brtan par bgyis na mthong ma thag tu sa thob par 'gyur ro gzungs dang ting nge 'dzin kyang thob par 'gyur ro/ /shar phyogs su de bzhin gshegs pa mi 'khrugs pa mthong bar 'gyur ro/ /lho phyogs su rin chen tog dang / nub phyogs su 'od dpag med dang / byang phyogs su de bzhin gshegs pa rnga sgra mthong bar 'gyur ro/ /de la sogs pa phyogs bcu'i de bzhin gshegs pa grangs med dpag tu med pa dag rags pa'i tshul gyis mthong bar 'gyur ro/ /'di nas shi 'phos nas sangs rgyas kyi zhing yongs su dag pa rnams su skye bar 'gyur te/ thams cad du yang sangs rgyas bcom ldan 'das rnams mnyes par bgyid par 'gyur ro/ /de skad ces bka' stsal nas/ byang chub sems dpa' sems dpa' chen po 'phags pa spyan ras gzigs dbang phyug dang / byang chub sems dpa' de dag dang / gnas gtsang ma'i ris kyi lha'i bu rnams dang / thams cad dang ldan pa'i 'khor de dang lha dang mi dang lha ma yin dang dri zar bcas pa'i 'jig rten yi rangs te/ bcom ldan 'das kyis gsungs 106.230a pa la mngon par bstod do/ /'phags pa kun tu bzang po zhes bya ba'i gzungs/ rdzogs s+ho// //rgya gar gyi mkhan po 'dzi na mi tra dang / dA na shI la dang / zhu chen gyi lots+tsha ba ban de ye shes sdes bsgyur cing zhus te skad sar chad kyis kyang bcos nas gtan la phab pa// |