@#/ /rgya gar skad du/ da sha b+hU mi d+hA ra NI/ bod skad du/ sa bcu pa'i gzungs/ sangs rgyas dang / byang chub sems dpa' thams cad la phyag 'tshal lo/ /de nas gsang sngags la 'jug pa rnams kyis dgos pa thams cad so sor bsgrub par 'gyur ba ni/ o~M zhes bya ba don yod zhags pa pad ma gtsug tor gyi dkyil 'khor thams cad du gsang sngags yi ge gcig po 'jig rten mgon po'i spyan sngar 'bum dran par byas nas dang po la gnas par 'gyur ro/ /sngon sdig pa bsags pa'i sems can dmyal ba mi bzad pa gang ci yang rung ba de dag thams cad ji ltar rlung 106.223b gis phyag dar gtor ba bzhin 'jig par 'gyur ro/ /dngos grub thams cad thob par 'gyur/ don thams cad rjes su 'jug par 'gyur/ de bzhin gshegs pa thams cad dang / gang dkyil 'khor gyi lha gzhan yang dgyes par 'gyur la/ 'phags pa spyan ras gzigs dbang phyug rtag tu mchog sbyin par mdzad do/ /gsang sngags o~M zhes bya ba dran nas tshe 'phos pa ni 'jig rten gyi khams bde ba can du 'gro bar 'gyur ro/ /gsang sngags yi ge gcig pa'o/ /o~M b+huH/ yi ge gnyis pa 'bum bzlas brjod byas na sa gnyis pa'i yon tan thob par 'gyur ro/ /de bzhin gshegs pa snang ba mtha' yas kyi spyan snga na 'dug par 'gyur zhing mchog thams cad rjes su sbyin par mdzad do/ /sdig pa thams cad kyang rnam par dag par mdzad/ sngon gyi las ngan gyi nad kyang sos par 'gyur/ nor gyi dbang phyug nor bu bzang po'i bu dbang du 'gyur zhing nye bar gnas par 'gyur ro/ /mi gang gis kyang phyir zhing bar chad byed nus par mi 'gyur/ tshe 'phos nas kyang ri gru 'dzin du skye bar 'gyur/ don yod zhags pa'i dngos grub kyang thob par 'gyur ro/ /yi ge gnyis pa'o/ /o~M pad me/ gsang sngags yi ge gsum pa 'bum bzlas brjod byas na sa gsum pa la yang dag par 'jug par 'gyur/ pad ma yangs pa'i dkyil 'khor gyi phyag rgya dang gsang sngags gang yin pa thams cad la zhugs par 'gyur/ 'phags pa spyan ras gzigs dbang phyug gzhon nu'i cha byad can mdun na bzhugs par 'gyur ro/ /'dod pa thams cad kyi mchog rjes su sbyin par mdzad do/ /don yod zhags pa'i pad ma gtsug tor gyi dkyil 'khor ston par mdzad/ de bzhin gshegs pa thams cad kyi gsang ba'i dkyil 'khor rnams ston par mdzad/ thams cad du dngos grub rjes su sbyin par mdzad do/ /yi ge gsum pa'o/ /o~M pad ma hri/ gsang sngags yi ge bzhi pa 'bum bzlas brjod byas na sa bzhi pa la 'jug par 'gyur ro/ /'phags pa de bzhin 106.224a gshegs pa mi 'khrugs pa sku mdog gser gyi kha dog can mdun na bzhugs shing dpung pa brkyang nas phyag spyi bor 'jog par mdzad la/ rig sngags 'chang la legs so zhes bya ba rjes su sbyin par mdzad de/ rig sngags 'chang tshur shog khyod kyi sdig pa dang sgrib pa thams cad yongs su dag ste/ rang gi ngo bo thams cad shin tu dri ma med par yongs su dag go/ /mi'i 'jig rten 'di nas tshe 'phos nas nga'i sangs rgyas kyi zhing du 'ong zhing tshe rabs dran par 'gyur ro/ /phyir zhing nams kyang mngal na gnas pas gos par mi 'gyur/ 'jig rten pa'i dgos pa thams cad 'grub par 'gyur ro/ /sa bzhi pa'o/ /o~M pad ma b+hu dze/ gsang sngags yi ge lnga pa 'bum bzlas brjod byas na sa lnga pa la gnas par 'gyur ro/ /de bzhin gshegs pa dgra bcom pa yang dag par rdzogs pa'i sangs rgyas pad ma'i bla ma rab tu ston par mdzad do/ /sgrib pa thams cad yongs su zad par 'gyur ro/ /rig sngags 'chang la legs so zhes bya ba'i sgra sbyin par 'gyur te/ rig sngags 'chang legs so legs so/ /khyod la bsod nams kyi phung po chen po skyes te/ rig sngags 'chang khyod dge ba'i rtsa ba chen po bskyed pas rig sngags 'chang khyod tshe 'phos nas de bzhin gshegs pa bye ba khrag khrig dgu bcu rtsa gnyis kyi drung du dge ba'i rtsa ba mtshungs pa med par skyed par 'gyur zhing / nga'i sangs rgyas kyi zhing du skye bar 'gyur/ khyod kyis don yod zhags pa'i pad ma'i gtsug tor gyi snying po dang / gsang ba'i dkyil 'khor dang / phyag rgya chen po 'i rim par phye ba 'grub cing / rig sngags 'chang khyod sdig pa dang sgrib pa thams cad spangs kyis bya ba thams cad gyis shig /yid la bya ba'i bsgrub pa thams cad ji ltar 'dod pa bzhin du de dag thams cad shin du grub par 'gyur ro/ /sa lnga pa'o/ /o~M pad ma lo ki te/ gzungs sngags drug pa 'bum bzlas brjod byas na sa drug pa 'thob ste 'jug par 'gyur/ de bzhin gshegs pa thams cad snang bar mdzad par 'gyur/ stong gsum gyi stong chen po'i 'jig rten gyi khams kyi rdul 106.224b phra mo snyed kyis de bzhin gshegs pa dgra bcom pa yang dag par rdzogs pa'i sangs rgyas rnams gzigs shing mngon sum du ston par mdzad/ dbugs 'byin par mdzad do/ /de nas de bzhin gshegs pa dgra bcom pa yang dag par rdzogs pa'i sangs rgyas pad ma gzigs pa'i rgyal mtshan des rig sngags 'chang de la yang dag par dbugs 'byin par mdzad de/ rig sngags 'chang khyod nga'i sangs rgyas kyi zhing nas byang chub snying po'i mthar thug gi bar du tshur shog /las byas pa shin du yongs su zad cing / khyod kyis sems can dmyal ba'i sgo rnams ni bcad/ khyod kyis sangs rgyas kyi zhing thams cad kyi sgo rnams ni phye/ khyod kyis de bzhin gshegs pa rnams kyi sa bon dang rigs spyi ni khong du chud/ khyod kyis don yod pa'i zhags pa'i pad ma'i gtsug tor gyi snying po dang / gsang ba'i dkyil 'khor ni grub/ khyod kyis thams cad du gnas kyi sgo rnams ni phye bas/ 'jig rten dang 'jig rten las 'das pa'i las sgrub pa rnams ji ltar yid la byas pa bzhin las thams cad byos shig /o~M pad ma dz+wa la hU~M d+h+rig /yi ge bdun pa 'bum bzlas brjod byas ma thag tu ting nge 'dzin pad ma dri ma med pa sgrib pa dang bral ba dag pa zhes bya ba thob par 'gyur la/ ting nge 'dzin gang thob pas lus shin du 'bar bar 'gyur zhing / 'od zer kha dog sna tshogs su 'gyur/ sa bdun pa la gnas par 'gyur/ lus kyi snang ba gang gis stong gsum gyi stong chen po'i 'jig rten gyi khams kyi sangs rgyas kyi zhing thams cad kyi gnas rnams snang bar byed cing / gang dang gang du 'od zer rin po che 'bar ba rnam pa sna tshogs pa dag bab pa las me tog gi char sna tshogs pa rnams 'byung bar 'gyur la/ de bzhin gshegs pa la mchod par 'gyur ro/ /de nas de bzhin gshegs pa dgra bcom pa yang dag par rdzogs pa'i sangs rgyas dri ma med pa'i 'od zer 'bar ba gser gyi kha dog can dpung pa brkyang ste/ phyag g.yas pa rig sngags 'chang gi spyi bor 'jog cing legs so zhes bya ba byin 106.225a nas dbugs 'byin par mdzad de/ rig sngags 'chang legs so legs so/ /'di ni sangs rgyas bcom ldan 'das kyi snying po gsang ba bzlas brjod kyi cho ga mchod pa'i mchog yin no/ /'di ni 'phags pa spyan ras gzigs kyi dbang phyug gi snying po gsang ba ces pa'i dkyil 'khor don yod zhags pa pad ma gtsug tor gyi snying po yang dag pa'o/ /rig sngags 'chang khyod kyis dkyil 'khor mtha' dag rdzogs pa dang / pad ma gtsug tor gyi snying po'i cho ga zhib mo dang / don yod zhags pa'i rnam par sprul pa grub kyis/ rig sngags 'chang ba'i sangs rgyas kyi zhing du song la sangs rgyas kyi mdzad pa gyis shig /\u0f00 a mo g+ha ma Ni pad me/ gzungs kyi snying po yi ge brgyad pa 'bum bzlas brjod byas na lus shin du yongs su dag cing dri ma med par 'gyur bzlas brjod byas pa tsam gyis nor bu rin po che me shel ltar phyi nang shin du yongs su dag pa ste/ de ltar rig sngags 'chang lus yongs su dag par 'gyur/ sa brgyad pa la gnas par 'gyur/ byang chub sems dpa' sems dpa' chen po 'phags pa spyan ras gzigs dbang phyug rang gi lus yongs su dag pa rang gi gzugs kyi ngo bor ston cing / rig sngags 'chang gi mdun du gnas pa la rig sngags 'chang yang dag par dbugs 'byin par mdzad de/ phyag g.yas pa mgo bo'i spyi bor 'jog pa mdzad/ legs so zhes bya ba yang sbyin par mdzad de/ rig sngags 'chang legs so legs so/ /rig sngags 'chang khyod lhag pa'i bsam pa dga' ba la zhugs so/ /rig sngags 'chang sangs rgyas kyi zhing mnyam par 'brel pa'i 'jig rten rnam par lta bar tshur shog /der khyod kyis sangs rgyas kyi mdzad pa byed par 'gyur ro/ /khyod kyis don yod zhags pa pad ma'i gtsug tor gyi snying po dkyil 'khor gsang ba grub kyis 'jig rten dang / /'jig rten las 'das pa'i sgrub pa dam pa bya ba thams cad gyis shig /\u0f00 pad ma lo tsa ne hU ru hU~M/ gzungs sngags yi ge dgu pa 'bum bzlas brjod byas na sa dgu pa la gnas par 106.225b 'gyur/ 'phags pa spyan ras gzigs dbang phyug gi sras kyi gtso bor 'gyur/ de bzhin gshegs pa dgra bcom pa yang dag par rdzogs pa'i sangs rgyas bye ba khrag khrig dgu bcu rtsa dgu dag rig sngags 'chang la mngon sum du ston cing / /sangs rgyas kyi yul rnam par sprul pa sna tshogs ston par byed/ rig sngags 'chang gi spyi bor thams cad kyi phyag 'jog par mdzad de legs so zhes bya ba yang sbyin par mdzad de/ rig sngags 'chang chen po legs so legs so/ /khyod kyis ngal zhing sbyangs pa'i las legs par bsgrub par byas so/ /khyod kyis 'jig rten pa dang 'jig rten las 'das pa sangs rgyas nyid du bsgrub pa grub ste/ don yod zhags pa'i dkyil 'khor gyi cho ga zhib mor bsgrub pa dang / mdo sde dang lung dang bcas pa bsgrub pa dang / 'jig rten gyi 'dren pas bstan pa gang yin pa de dag grub pa yin no/ /o~M pad mo Sh+NI Sha bi ma le hU~M phaT/ gsang sngags yi ge bcu pa 'bum bzlas brjod byas na phyir mi ldog par gyur nas sa bcu la gnas par 'gyur zhing / lha dang mi'i skye dgu dag 'di ni de bzhin gshegs pa'o zhes brjod la/ bla na med pa yang dag par rdzogs pa'i byang chub las phyir mi ldog par 'gyur/ don yod zhags pa pad ma'i gtsug tor gyi 'khor los sgyur bar 'gyur te the tshom mi bya'o/ /gsang sngags yi ge bcu pa'i sgrub pa de kho na nyid kyis dngos grub bla na med pa 'di ni don yod zhags pa'i snying po rnam par sprul pa bzlas brjod tsam gyis 'grub pa yin te/ bdag gis sngar bstan pa thams cad la lhag par zhen pa gtsang ma/ gtsang sbra spyod pa/ gos gtsang ma bgos pa/ byams pa'i sems dang / snying rje skyes pa/ bden par smra ba/ bla ma la gus pa/ dkon mchog gsum la dad pa che ba/ bla ma dang slob dpon la rtag tu mchod pa byed pa 'di ni bzlas brjod kyi cho ga yin te/ sangs rgyas kyi byang chub bla na med par bstan to/ /sa bcu pa'i gzungs phan yon dang rtog pa/ rdzogs s+ho// // |