'phags pa nam mkha'i snying po'i mtshan brgya rtsa brgyad pa gzungs sngags dang bcas pa/ 'phags pa nam mkha'i snying po zhal ras rgya che zhing spyan gyi 'od 'phro bas nam mkha'i dkyil dri zhim par mdzad pa la phyag 'tshal lo/ /nam mkha'i spyod yul can sa'i dkyil 'khor thams cad snang bar mdzad pa la phyag 'tshal lo/ /o~M swa sti ka mA la k+Shi bi pu la sam b+ha ba/ d+harma d+harma go tsa ra swA hA/ gzungs 'di brjod ma thag tu ngan song dang ngan 'gro thams cad ni rab tu zhi bar gyur/ sa yang g.yos par gyur/ rnga bo che dag gi sgra yang grags par gyur/ sangs rgyas thams cad kyis kyang legs so zhes bya ba byin no/ /de nas bcom ldan 'das rnam par snang mdzad kyis bka' stsal pa/ kyi 'khor gyi dkyil 'khor na 'khod pa'i sems can rnams nam mkha'i snying po'i snying po dkyil 'khor mngon sum pa rnams kyi swA hA mchog gi gzungs 'byung bar shin du dka' ba/ bsod nams chen po/ sdig pa dang nyon mongs pa thams cad sreg pa/ byang chub sems dpa' thams cad kyi ma/ rin po che'i phung por gyur pa 'di nyon cig dang / 'di thos pas dri ma med par 'gyur zhing legs par khrus byas par 'gyur la shin du rnam par dag par 'gyur ro/ /pad ma lta bur 'gyur te/ 'khor gyi 'dam gyis mi gos so/ /nyi ma lta bur 'gyur te/ sems can thams cad snang bar byed do/ /zla ba lta bur 'gyur te/ sems can thams 106.103b cad rab tu sim par byed do/ /nam mkha' lta bur 'gyur te/ ngan song gi sdug bsngal thams cad kyis mi gos so/ /sa gzhi lta bur 'gyur te/ mtho dman med do/ /lhun po lta bur 'gyur te/ sems can thams cad kyis bskyod par mi nus so/ /thar ba lta bur 'gyur te/ bde ba dang sdug bsngal gyis mi gos so/ /de la sogs pa yon tan stong phrag bgrangs ba tshad med grangs med pa dag thob par 'gyur te/ nyan pa dang / 'chang ba dang / klog pa dang / rjod pa dang / ston pa tsam dang / bzlas brjod byas pa tsam gyis gang ci yang rung ste/ de'i 'dod pa dang / smon pa dang / re ba de dag 'grub par 'gyur ro/ /bzlas brjod byas pa tsam gyis kyang char ches pa dang / char mi 'bab pa dang / sdang bas dkrugs pa dang / mi nad dang / rmi lam ngan pa dang / gnod pa 'byung ba dang / 'jigs pa'i dus dang / 'chi ba dang / chom rkun dang / dgon pa dang / g.yul 'gyed pa dang / gcan zan dang / mu ge'i sdug bsngal rnams las yongs su srung bar byed la/ bde ba dang 'byor pa dang / ci 'dod pa dang / ci la dga' ba thams cad kyang 'grub par 'gyur ro/ /de nas 'khor de dag thams cad kyis ha ha zhes ca co dang ga zha bton te/ sgra ring zhes byas nas gos dang / rgyan sna tshogs bskyod de/ snying nas phyag 'tshal nas byang chub sems dpa' thams cad la dbang byed pa 'phags pa nam mkha'i snying po'i mtshan brgya rtsa brgyad pa'i bsngags pa rgya mtsho'i bstod pa yang dag par brjod pa/ nam mkha'i snying po'i srid gsum sems can mchog /'byor ldan blo gros rin chen rgya mtsho mnga'/ /sems can dag pa bla med rin chen mchog /thar pa'i sa bon 'khor ba'i sdug bsngal sel/ /kun mkhyen tshul mkhyen legs dang legs min mkhyen/ /thar mkhyen chos mkhyen bde dang mi bde mkhyen/ /lam mkhyen gces mkhyen dge dang mi dge mkhyen/ /dus mkhyen dge mkhyen stobs 106.104a dang stobs min mkhyen/ /'gro mchog chos mchog sems can yon tan mchog /lam mchog sngags mchog tshul dang tshul min mchog /rgyan mchog chos mchog 'dzin dang 'dzin min mchog /dag mchog rtogs mchog mchog dang mchog min mchog /zhi rab snying rje'i rab ste 'khor gyi rab/ /'od rab thar pa'i rab ste rten gyi rab/ /rgya rab sngags kyi rab ste thugs brtse'i rab/ /mnyam rab sems can rab ste gsum rig rab/ /legs sgron mchog sgron stobs dang stobs min sgron/ /thar sgron rigs sgron rgyal dang rgyal min sgron/ /dge sgron gzi sgron nor bu'i 'od kyi sgron/ /rgyu skar zla ba'i rgyan las shar ba'i sgron/ /mchog 'od yon tan kun gyi 'od zer 'od/ /legs 'od thar pa'i pho brang rten gyi 'od/ /'od chen gti mug rab tu 'byed pa'i 'od/ /rdo rje'i 'od 'bar bde ba'i 'od 'char ba/ /rdo rje'i dbang po 'dren dbang sems can dbang / /rin chen 'od kyi dkyil 'khor rgyan dbang po/ /rgyal dbang rgyal ba'i stobs rgyun tshad med dbang / /dpa' bo rig sngags 'chang dbang srid gsum dbang / /rdo rje bzang po rdo 'od rdo rje 'bar/ /rdo rje sems dpa' rdo rje 'bar bas brgyan/ /rdo rje 'od can rdo 'dzin rdo rje drag /rdo rje rgya chen rdo rje rab mchog dbang / /na bza' sngo zhing sku yi cha lugs sngo/ /sku mdog sngo zhing sngo ba'i 'od kyis brgyan/ /ral gri rno 'jebs sngo zhing brtan pa bsnams/ /mkha' sngo gzhal med khang 'bar nang na bzhugs/ /lha zhal dri med shin du mi bzad 'bar/ /rab tu drag la 'od zer 'phro zhing 'gyu/ /sdig sel rdul ltar 'khrug byed phreng mchog can/ /glog gi stobs kyis snang bas bsgeg la brtan/ /ral gri mtshon thogs dbang ldan mthu stobs mtshon/ /rdo yi yi mtshon thogs mda' dang mdung thung 'jigs/ /'khor lo'i mtshon thogs bcibs pa ri dang 'khrul/ /gsal shing mtshon thogs bgegs kyi stobs 'joms pa/ / 106.104b bde 'byung 'jig rten gsum bdag rdo rje'i dbyug /sku rnams thams cad nyi ma'i 'od kyis brgyan/ /grags pa'i rigs su byung bas rgyal po mdzad/ /mu tig phreng bas bsgegs shing mdzes par bgyis/ /sku mdzes brnyes shing phun sum tshogs pa brnyes/ /rab 'byam mchog brnyes sa la 'jug pa brnyes/ /mthu stobs lhag pa brnyes shing grub brnyes la/ /rig pa gsum gyi stobs brnyes mthu brnyes pa/ /bde 'dren zhi ba 'dren cing 'od 'dren pa/ /cha lugs gsal mchog dar ba chen po 'dren/ /byams 'dren nyi ma 'dren cing skye ba 'dren/ /legs 'dren zhing gi stobs 'dren snying rje can/ dri med cha lugs gsal ba cha lugs 'bar/ /rnam grags bsgeg pas grags pa'i ba dan can/ /'gro ba'i skabs 'byed 'jug dang ldog pa mkhyen/ /longs spyod gsal bar ston pa'i sems kyis 'jug /sku dmar sku mthon sku mdzes sku bzang ba/ /sku ser sku dkar dar ba chen po'i sku/ /sku rol rdo rje'i sku mnga' spyan legs sku/ /rigs sku rig sngags 'chang ba rin chen bsnams/ /gtsug gi nor bu gtsug can cod pan mchog /cod pan can te chos 'dzin rdo rje mchog /dpal 'dzin rin chen dam pa 'chang ba'i mchog /sngags gzhi phyag rgya 'chang ba phun sum tshogs/ /rab mdzes mkha' la gshegs shing rab tu rgyu/ /srid gsum nyi ma gcig pu 'od stong mnga'/ /ri rtser 'char ba bdal legs bkra shis pa/ /yon tan mthu stobs khyad par rnam par grags/ /nor bu chen po nor sdug nor bu'i 'od/ /nyi ma'i nor bu tshul spyod nor bu 'bar/ /yid bzhin nor bu 'gro kun mgon gcig pu/ /nam mkha'i dkyil na nor bu gcig snang ba/ /sems can rnam dag yangs shing rnam par grags/ /srid gsum srung ma gcig pu rgyal sras mchog /zhi ba rab tu zhi ba skyabs 'os stag /skye dgu'i bdag po pad byung pad ma skyes/ /kun nas 'od bzang legs 106.105a bshad chos mnga' ba/ /dar ba legs bshad rab dul legs bshad phyag /blo bzang 'od bzang bde ldan skye gnas bzang / /mkhas rab zhi rab mchog gi chos dang ldan/ /zhi mdzad rgyal 'byung bde ba 'byung ba'i gnas/ /'od kyi 'byung gnas bde mdzad dbang du mdzad/ /legs 'byung shes rab 'byung gnas stobs skyed pa/ /snying rje'i 'byung gnas blo bzang rnam grags mdzad/ /rnam grol nges grol shin tu grol ba'i blo/ /blo yangs rnam par bkram zhing rnam par grags/ /kun tu longs spyod sgo ste blo yi mchog / blo gros brtan pa dkon mchog gsum las bsgrubs/ /sangs rgyas pad ma 'dab rgyas 'dra ba'i zhal/ /dag cing spyan yangs cha lugs yid du 'thad/ /snying po gsal ba'i snying po brten zhing dul/ /ngo bo nyid kyis rgyun brnyes rab gsal ba/ /spyan zur mda' ni rab tu gtad legs pa/ /'jigs med zhal ras ston gyi zla ba 'dra/ /mdung thung brgya yi mtshon mchog mtshon cha rdzogs/ /drag po 'jigs pa sdig sel gsum las skyes/ /rab dul mkhas pa 'grogs dga' 'dris par sla/ /rab tu drag pa gnyen rab gser mdog can/ /lha chen bde byed gsal shing phyag na bsnams/ /spyan gsum rig pa gsum ldan me gsum sel/ /'dod bzang me tog mtshon thogs me tog mda'/ /na bza' bzang banabs g.yas 'phen tshabs cher 'phen/ /legs bris sna tshogs mtshon cha sna tshogs mda'/ /na bza' sna tshogs sna tshogs rgyan gyi dpal/ /zhal ras zla ba 'od zer rgyas pa 'dra/ /zhal mdangs bstan pas 'jig rten kun 'byor mdzad/ /bshad pa nyi ma'i 'od zer rab 'jebs mnga'/ /zhal mdangs rgya mtsho gsal mdzad lam me ba/ /dbang chen rdo rje'i thog lags 'jigs pa'i sgra/ /rdo rje drag po nor bu g.yo ba 'dzin/ /sgra snyan snang bar mdzad pa'i mthu dang ldan/ /blo gros chen po blo gros rno ba'i mchog / 106.105b rgyan 'dzin dpal 'dzin rin chen zhal dang ldan/ /rgyu dang mi rgyu 'gro ba kun gyi gnas/ /de bzhin gshegs pa mgon sras phreng ba bzang / /stobs chen 'jig rten blo gros ngo bo nyid/ /skye dgu'i bdag po bka' lung mnyam zhing brtags/ /mi yi mnga' bdag mtho ris skyed pa'i rgyu/ /sgyu 'dra 'dod pa'i mda' dang rdo rje can/ /mthu stobs mnga' zhing spyan bzang sdug par ldan/ /ston pa bzang po stong nyid lam gyi stegs/ /gces gsum 'phel ba'i rgyu la 'jug pa mdzad/ /brtan po rgyu la rab tu nges gyur pa/ /dkyil 'khor dam pa kun gyi slob dpon lags/ /gcig pu skye dgu'i dkyil 'khor cho ga mkhyen/ /rnam par snang mdzad zhing gi gnas nas skyes/ /dbang bskur brnyes shing sa bcur legs par gnas/ /gnas chen son pa mchog gnas gcig pu lags/ /skye dgu rnams kyi nyon mongs sel ba dang / /sdig 'joms mtshan brgya rtsa brgyad 'di thos nas/ /bde gshegs sras mchog su zhig 'don byed pa/ /'jig rten zla ba gcig shar bzhin du snang / /nam mkha'i snying po sems can gcig pu yi/ /mdun 'dug nang par bstod pa 'di brjod gang / /de ni srid gsum sems can mchog 'gyur zhing / /dri ma'i gnas kun las kyang thar bar 'gyur/ /g.yul dang 'thab rtsod shin du mi bzad dang / /mu ge'i gnod pa mi nad byung ba na/ /mkhas pa su zhig sngar langs dad bskyed nas/ /nam mkha'i snying po la ni bstod byed pa/ /de ni 'jigs pa'i 'byung gnas thams cad dang / /sdug bsngal 'byung 'dren sdig pa rnams las grol/ /des ni zhi mchog mchog bde kun gnas dang / /bde ba rgya chen nges par thob par 'gyur/ /bde 'thob longs spyod 'phel bar bya ba 'am/ /rgyal srid 'thob dang byad gzugs nor 'thob dang / /rigs 'thob yon tan kun gyi gzhi bsgrub phyir/ /bton na 'grub 'gyur 'di la the tshom med/ /de phyir ji ste rtag tu 'dod bde kun/ /'dod na 'gro ba kun la 106.106a gcig dpa' ba/ /nam mkha'i snying po srid gsum mgon po la/ /rtag tu brtan cing bsngags kyang bstan par bgyi/ /'phags pa nam mkha'i snying po'i mtshan brgya rtsa brgyad pa gzungs sngags dang bcas pa/ rdzogs s+ho// |