@#/ /rgya gar skad du/ Ar+ya bi ma la nA ma d+hA ra Ni/ bod skad du/ 'phags pa dri ma med pa zhes bya ba'i gzungs/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na/ bya rgod kyi phung po'i ri la bzhugs te/ de nas bcom ldan 'das kyis byang chub sems dpa' blo gros rnam par dag pa la bka' stsal pa/ blo gros rnam par dag pa tshul khrims yongs su dag pas de bzhin gshegs pa yongs su dag go/ /blo gros rnam par dag pa ting nge 'dzin yongs su dag pas de bzhin gshegs pa yongs su dag go/ /blo gros rnam par dag pa bzod pa yongs su dag pas de bzhin gshegs pa yongs su dag go/ /blo gros rnam par dag pa phan pa'i dngos po yongs su dag pas de bzhin gshegs pa yongs su dag go/ /blo gros rnam par dag pa byams pa yongs su dag pas de bzhin gshegs pa yongs su dag go/ /blo gros rnam par dag pa snying rje yongs su dag pa dang / dga' ba yongs su dag pa dang / btang snyoms yongs su dag pas de bzhin gshegs pa yongs su dag go/ /blo gros rnam par dag pa rnam par grol ba yongs su dag pa dang / rnam par grol ba'i ye shes mthong ba yongs su dag pas de bzhin gshegs pa 106.88a yongs su dag go/ /blo gros rnam par dag pa stobs yongs su dag pa dang / mi 'jigs pa yongs su dag pa dang / sangs rgyas kyi chos yongs su dag pas de bzhin gshegs pa yongs su dag go/ /blo gros rnam par dag pa thams cad mkhyen pa'i ye shes yongs su dag pas de bzhin gshegs pa yongs su dag go/ /blo gros rnam par dag pa de ltar de bzhin gshegs pa yongs su dag pa la su zhig me tog dang / phreng ba dang spos dang gdugs dang rgyal mtshan la sogs pa dang rol mo'i sgra dang byug pa rnams kyis sti stang du byed pa de'i bsod nams kyi phung po'i mtha' rtogs par mi nus te/ de'i mtha' ni theg pa gsum po las theg pa gang yang rung bas mya ngan las 'das pa'i mtha' thug pa ma gtogs par bsod nams kyi phung po de phyi ma'i mthar yang zad par mi nus so/ /de ci'i phyir zhe na/ blo gros rnam par dag pa ji ltar de bzhin gshegs pa'i sangs rgyas kyi chos thams cad kyi tshad med pa de bzhin du/ de bzhin gshegs pa la yon phul ba yang tshad med do/ /mtha' yas so/ /bsam gyis mi khyab bo/ /mtshungs pa med do/ /grangs med do/ /dpag gis mi lang ngo / /brjod du med do/ /blo gros rnam par dag pa su zhig de bzhin gshegs pa da ltar bzhugs te/ 'tsho zhing gzhes pa la sti stang du byed pa dang / bla mar byed pa dang ri mor byed pa dang mchod pa dang rjed pa dang / phyi ma'i tshe phyi ma'i dus lnga brgya tha ma la su zhig de bzhin gshegs pa yongs su mya ngan las 'das pa'i ring bsrel yungs 'bru tsam la sti stang byed pa dang / bla mar byed pa dang ri mor byed pa dang mchod pa dang brjed pa dang yang dag par sems nye bar bzhag ste/ byang chub tu gzhol ba'i sems bskyed pas phyag 'tshal ba dang / phyag byed pa dang sti stang byed pa dang bla mar byed pa dang / ri mor byed pa dang mchod pa dang brjed pa dang gsol ba dang bsngags pa dang / skor ba byed pa des phan yon lngar shes par bya ste/ lnga gang zhe na/ dran pa dang ldan 106.88b par 'gyur ba dang / rtogs pa dang ldan par 'gyur ba dang / ngo tsha shes shing khrel yod pa dang ldan par 'gyur ba dang / myur du sangs rgyas bcom ldan 'das mthong bar 'gyur ba dang / mthong nas kyang dad pa skyed par 'gyur ba ste/ phan yon lnga po de dag tu shes par bya'o/ /de las gzhan yang chos bzhir shes par bya ste/ bzhi gang zhe na/ de bzhin gshegs pas bstan pa'i tshig so sor 'dzin pa dang / de dag kyang ji skad bstan pa bzhin du sgrub pa dang / sangs rgyas bcom ldan 'das rnams dang nye bar 'gyur ba dang / myur du sangs rgyas kyi zhing yongs su dag par skye bar 'gyur ba ste/ chos bzhi po de dag yongs su 'dzin par 'gyur ro/ /blo gros rnam par dag pa byang chub sems dpa' chos bzhi dang ldan na bdud dam bdud kyi ris kyi lha'i bu rnams kyis mi rdzi bar 'gyur te/ bzhi gang zhe na/ rigs che ba dang / btsas ma thag tu sangs rgyas bcom ldan 'das rnams yid la byed pa dang / phyi ma'i dus na dam pa'i chos 'dzin pa dang / rtag tu de bzhin gshegs pa dgra bcom pa yang dag par rdzogs pa'i sangs rgyas rnams kyis byin gyis brlabs par 'gyur ba ste/ blo gros rnam par dag pa byang chub sems dpa' chos bzhi po de dag dang ldan na bdud dam bdud kyi ris kyi lha'i bu rnams kyis mi rdzi bar 'gyur ro/ /blo gros rnam par dag pa byang chub sems dpa'i theg pa la yang dag par zhugs pa gang gis de bzhin gshegs pa'i mchod rten mthong nas dad pa bskyed de/ pus mo gnyis ka'i lha nga sa la btsugs nas phyag 'tshal te/ de bzhin gshegs pa skyes bu chen po'i mtshan sum bcu rtsa gnyis kyis sku legs par brgyan pa de ci 'dra bar bdag kyang de 'dra ba'i lus thob par gyur cig ces de ltar mos pa bskyed na/ 106.89a blo gros rnam par dag pa bsod nams kyi phung po de'i mtha' brjod par mi nus te/ bla na med pa yang dag par rdzogs pa'i byang chub la gnas pa'i phyir ro/ /bsod nams kyi phung po de ni rgyal po nyid dam/ brgya byin nyid dam/ tshangs pa nyid dam/ nyan thos nyid dam/ rang sangs rgyas nyid dam/ bla na med pa yang dag par rdzogs pa'i sangs rgyas nyid kyis kyang zad par byar mi nus so/ /de ci'i phyir zhe na/ blo gros rnam par dag pa rigs kyi bu'am/ rigs kyi bu mo des bsod nams kyi phung po bsam gyis mi khyab pa yongs su bzung ba yin te/ blo gros rnam par dag pa 'di lta ste/ dper na de bzhin gshegs pa bla na med pa yang dag par rdzogs pa'i byang chub mngon par rdzogs par sangs rgyas pa grong khyer du 'jug gam/ gtsug lag khang ngam/ grong du 'jug kyang rung / de bzhin gshegs pa thams cad du rgyu yang rung / 'chag kyang rung / 'greng yang rung / 'dug kyang rung / chos ston kyang rung / stong gsum gyi stong chen po'i 'jig rten gyi khams na sems can lha'am/ klu 'am/ gnod sbyin nam/ dri za'am/ lha ma yin nam/ nam mkha'i lding ngam/ mi'am ci'am/ lto 'phye chen po'am/ mi'am/ mi ma yin pa'am/ shing ngam/ ri'am/ khung bu'am/ bya skyibs kyang rung ste/ thams cad de bzhin gshegs pa ga la ba de logs su 'dud pa dang / rab tu 'dud pa dang / kun du 'dud pa mi byed pa de gang yang med de/ ji ltar de bzhin gshegs pa dge ba'i rtsa ba thams cad dang ldan pa la byed pa de bzhin du rigs kyi bu'am/ rigs kyi bu mo de dag grong ngam/ grong khyer ram/ grong rdal lam/ yul 'khor ram/ pho brang 'khor na rgyu ba la sems can rnams 'dud/ rab tu 'dud/ kun tu rab tu 'dud par 'gyur ro/ /bcom ldan 'das 'od dpag med la phyag 'tshal lo/ /a mi tA/ ma te pra b+he/ ma hA pra b+he/ pra b+ha ba ti/ pra b+ha ba ti/ pra b+ha ba ti/ pra b+ha ba ti/ pra b+ha ba ti/ pra b+ha ba ti/ 106.89b pra b+ha ba ti/ pra b+ha ba ti/ pra b+ha ba ti/ pra b+ha ba ti/ bcom ldan 'das mthus bstan du gsol/ bcom ldan 'das mthus bstan du gsol/ tad+ya thA/ ma ti ma ti/ ma ti ma ti/ ma ti ma ti/ ma ti ma ti/ ma ti ma ti/ smriti/ smriti/ smriti/ smriti/ smriti/ smriti/ smri ti/ smriti/ smriti/ smriti/ ma hA smri ti/ ma hA smri ti/ ma hA smri ti/ chags pa mi mnga' ba gti mug bsal tu gsol/ so me/ so me/ so me/ so me/ so me/ so me/ so me so me/ so me so me/ so'u man s+ya mu pa na ya/ so'u ma na s+ya mu pa na ya/ so'u ma na s+ya mu pa na ya/ so'u ma na s+ya mu pa na ya/ so'u ma na s+ya mu pa na ya/ so'u ma na s+ya mu pa na ya/ so'u ma na s+ya mu pa na ya/ so'u ma na s+ya mu pa na ya/ so'u ma na s+ya mu pa na ya/ so'u ma na s+ya mu pa na ya/ shi khi shi khi/ shi khi shi khi/ shi khi shi khi/ shi khi shi khi/ shi khi shi khi/ zhi bar gyur cig /bgegs med par gyur cig /pra b+ha ba ti/ ma hA mat+ye/ rash+mi/ rash+mi/ rash+mi/ rash+mi/ rash+mi/ rash+mi/ rash+mi/ rash+mi/ rash+mi/ rash+mi/ /sangs rgyas bcom ldan 'das 'di dag gi mtshan kyang gzung bar bya zhing phyag bya'o/ /'di lta ste/ bcom ldan 'das rin chen 'byung gnas dang / bcom ldan 'das rin chen nyi ma dang / bcom ldan 'das rin chen mkhregs dang / bcom ldan 'das rin chen tog dang / bcom ldan 'das rin chen 'od 'phro dang / bcom ldan 'das rin chen mthu dang / bcom ldan 'das mi 'khrugs pa dang / bcom ldan 'das 'od dpag med dang / bcom ldan 'das dbyangs dpag med dang / bcom ldan 'das thub dka' dang / bcom ldan 'das grags pa mtha' yas dang / bcom ldan 'das rin chen 'od dang / bcom ldan 'das bde chen brnyes dang / bcom ldan 'das skar ma 'i 'od dang / bcom ldan 'das bden dbyangs dang / bcom ldan 'das nad kyi dri ma bral ba dang / bcom ldan 'das zla ba dkar dang / bcom ldan 'das dri ma med pa'i 'od dang / bcom ldan 'das nyi ma dkar ba dang / 106.90a bcom ldan 'das nyi ma'i 'od dang / bcom ldan 'das 'od dag pa dang / bcom ldan 'das rin chen mtha' yas dang / bcom ldan 'das rin chen snying po dang / bcom ldan 'das rin chen 'byung ba dang / bcom ldan 'das zla ba'i sgron ma dang / bcom ldan 'das pad ma'i sde dang / bcom ldan 'das pad ma'i sgra dang / bcom ldan 'das pad ma'i mchog dang / bcom ldan 'das yon tan mchog dang / bcom ldan 'das gser 'od dang / bcom ldan 'das tshangs pa'i dbang phyug rgyal po dang / bcom ldan 'das gser lta bur snang ba dang / bcom ldan 'das gser gyi 'byung gnas dang / bcom ldan 'das klu'i dbang phyug rgyal po dang / bcom ldan 'das me tog dang / bcom ldan 'das spos thams cad kyi dbang phyug rgyal po dang / bcom ldan 'das phreng ba'i rgyal po dang / bcom ldan 'das dpa' brtan pa'i sde dang / bcom ldan 'das mtshon cha spong dang / bcom ldan 'das dpal gyi snying po nor bu rin chen snang dang / bcom ldan 'das dpag med rtogs 'od dang / bcom ldan 'das seng ge sgra dang / bcom ldan 'das seng ge dbang phyug rgyal po dang / bcom ldan 'das mthu chen brtson 'grus nges 'byung dang / bcom ldan 'das snying pos zil gnon dang / bcom ldan 'das rnga sgra rgyal po dang / bcom ldan 'das zla ba mchog dang / bcom ldan 'das pad mas zil gnon dang / bcom ldan 'das 'jig rten sgron ma dang / bcom ldan 'das me dang / bcom ldan 'das skrag byed dang / bcom ldan 'das rin chen mu khyud dang / bcom ldan 'das rtag tu yongs su mya ngan las 'das pa dang / bcom ldan 'das blo yangs dang / bcom ldan 'das rin chen dpag med sprul 'od dang / bcom ldan 'das ri rab ltar rnam par gnon pa dang / bcom ldan 'das phyag na rin chen mchog dang / bcom ldan 'das rin chen 'dus pa'i dpal dang / 106.90b bcom ldan 'das phyir mi ldog pa'i 'khor lo rin po che'i tshig gi dpal dang / bcom ldan 'das kun nas rnam par snang mdzad rnam par dag pa brnyes pa dang / bcom ldan 'das nyi zla sgron ma dang / bcom ldan 'das lhun po dang / bcom ldan 'das lhun po chen po dang / bcom ldan 'das ri rab dang / bcom ldan 'das shin tu lhun po dang / bcom ldan 'das ri rab lta bu'o/ /tad+ya thA/ pa ta pa ta/ da ma da ma/ g+ha ma g+ha ma swA hA/ shar phyogs logs na sangs rgyas bcom ldan 'das 'di dag la sogs pa 'khor dang bcas pa gang dag bzhugs pa 'dren pa de dag la phyag 'tshal lo/ /de dag gis kyang bdag 'khor dang bcas pa la nad med pa dang / zhi bar bsrung du gsol/ lho phyogs logs na sangs rgyas bcom ldan 'das gang dag bzhugs pa 'dren pa de dag la phyag 'tshal lo/ /de dag gis kyang bdag la nad med pa dang zhi bar bsrung du gsol/ /nub phyogs logs na sangs rgyas bcom ldan 'das gang dag bzhugs pa 'dren pa de dag la phyag 'tshal lo/ /de dag gis kyang bdag la nad med pa dang / zhi bar bsrung du gsol/ byang phyogs logs na sangs rgyas bcom ldan 'das gang dag bzhugs pa 'dren pa de dag la phyag 'tshal lo/ /de dag gis kyang bdag la nad med pa dang / zhi bar bsrung du gsol/ 'og gi phyogs logs na sangs rgyas bcom ldan 'das gang dag bzhugs pa 'dren pa de dag la phyag 'tshal lo/ /de dag gis kyang bdag la nad med pa dang / zhi bar bsrung du gsol/ steng gi phyogs logs na sangs rgyas bcom ldan 'das gang dag bzhugs pa 'dren pa de dag la phyag 'tshal lo/ /de dag gis kyang bdag la nad med pa dang / zhi bar bsrung du gsol/ phyogs mtshams logs na sangs rgyas bcom ldan 'das gang dag bzhugs pa 'dren pa de dag la phyag 'tshal lo/ /de dag gis kyang bdag la nad med pa dang / zhi bar bsrung du gsol/ tad+ya thA/ 106.91a ma le/ bi ma lA ka re/ bi ma la sa~M b+ha be swA hA/ bi ma le/ ma bi ma le/ bi ma le/ bi ma le/ bi ma le/ bi ma le/ bi ma le/ bi ma le/ bi ma lA ka re/ bi ma lA ka re/ bi ma lA ka re/ bi ma lA ka re/ bi ma lA ka re/ bi ma lA ka re/ bi ma lA ka re/ bi ma lA ka re/ bi ma la sa mud ga te/ bi ma la sa mud ga te/ bi ma la sa mud ga te/ bi ma la sa mud ga te/ bi ma la sa mud ga te/ bi ma la sa mud ga te/ bi ma la sa mud ga te/ bi ma la sa mud ga te/ bi ma la sa mud ga te/ rig sngags 'di ni rig sngags che/ /lha rnams kyis ni brjod pa yin/ /'di ni dus gsum brjod byas na/ /nad rnams las ni yongs su thar/ /mi ma yin gyis gang byas dang / /sdig pa gang dag sbyor byas dgrol/ /de dag dran pa brjed mi 'gyur/ /bzung ba rnams kyang chud mi za/ /de dag skye ba rnams su yang / /rtag tu sangs rgyas 'bral mi 'gyur/ /su zhig dri ma med pa'i gzungs/ /'di ni dga' bas 'dzin byed pa/ /zhing rnams kun tu rgyu ba na/ /dpal ldan pad ma'i snying por 'byung / /mtshan rnams kyis ni legs par brgyan/ /yan lag 'od zer dra ba 'byung / /tad+ya thA/ ku Ti ku Ti/ kud tsA lo/ e la/ e la/ mug ta/ kod thA lo/ /e ri ri/ ra mri ti swA hA/ bcom ldan 'das kyis de skad ces bka' stsal nas/ byang chub sems dpa' sems dpa' chen po blo gros rnam par dag pa dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon bar bstod do/ /'phags pa dri ma med pa zhes bya ba'i gzungs/ rdzogs s+ho// //rgya gar gyi mkhan po dzi na mi tra dang / dA na shI la dang / zhu chen gyi lots+tsha ba ban de ye shes sdes bsgyur cing zhus te/ skad gsar chad kyis kyang bcos nas gtan la phab pa/ skar zhus// |