@#/ /rgya gar skad du/ Ar+ya sarba bud+d+ha ang ga ba ti nA ma d+hA ra NI/ bod skad du/ 'phags pa sangs rgyas thams cad kyi yan lag dang ldan pa zhes bya ba'i gzungs/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 106.75a 'das gang gA'i klung chen po'i 'gram na 'jig rten skyong ba bzhi dang thabs gcig tu bzhugs te/ de'i tshe bcom ldan 'das kyis rnam thos kyi bu la sogs pa rgyal po chen po bzhi la 'di skad ces bka' stsal to/ /rgyal po chen po dag skyes pa dang / bud med dang khye'u dang bu mo rnams la 'jigs pa chen po bzhi po 'di dag 'byung ngo / /bzhi gang zhe na/ 'di lta ste/ rga ba dang na ba dang rgud pa dang 'chi ba'o/ /de la yang 'jigs pa chen po gcig ste/ 'di ltar 'chi bdag gi 'jigs pa chen po ste/ btsam pa med pa/ gnyen po med pa/ rtag tu phyi bzhin 'brang ba'o/ /rgyal po chen po dag de la 'jigs pa chen po gcig po de'i gnyen po ngas 'dir brjod par bya'o/ /de nas bcom ldan 'das la rgyal po chen po bzhis 'di skad ces gsol to/ /bcom ldan 'das gang gi slad du bcom ldan 'das kyis srog rab tu stsal bas/ skye dgu rjes su bzung ba ni deng bdag cag gis rnyed pa legs par rnyed do/ /de nas bcom ldan 'das shar phyogs su mngon du phyogs te bzhugs nas/ se gol gyi sgras de bzhin gshegs pa thams cad la bskul te 'di skad ces/ de bzhin gshegs pa dgra bcom pa yang dag par rdzogs pa'i sangs rgyas gang su dag sems can rnams la thugs brtse ba'i slad du bla na med pa yang dag par rdzogs pa'i byang chub mngon bar rdzogs par sangs rgyas pa de dag bdag gi grogs mdzod cig /des na bdag 'dir sangs rgyas thams cad kyi byin gyi brlabs kyis byin gyis brlabs nas sems can thams cad kyi dus ma yin par 'chi ba rab tu bzlog par bgyi'o/ /sngon ma bskor ba'i chos kyi 'khor lo gnyis pa yang bskor bar bgyi'o zhes gsung ngo / /de bzhin du lho dang nub dang byang dang steng dang 'og gi de bzhin gshegs pa thams cad la bskul te/ 'di skad ces/ de bzhin gshegs pa dgra bcom pa yang dag par rdzogs pa'i sangs rgyas gang su dag 106.75b sems can rnams la thugs brtse ba'i don du bla na med pa yang dag par rdzogs pa'i byang chub mngon bar rdzogs par sangs rgyas pa de dag bdag gi grogs mdzod cig ces gsung ngo / /de bzhin du phyogs mtshams rnams su yang 'di skad ces gang gi phyir 'di dag tshe dang stobs dang kha dog dang ldan pa yongs su 'grub cing dus ma yin par 'chi ba'i 'jigs pa 'byung bar mi 'gyur bar sangs rgyas thams cad bdag gi grogs mdzod cig ces gsung ngo / /de nas phyogs bcu'i sa'i khams ji snyed sangs rgyas kyi spyan la snang bar 'gyur ba de snyed kyi 'jig rten gyi khams dag sangs rgyas bcom ldan 'das kyis til gyi gang bu bzhin du gang ste/ de dag gis de bzhin gshegs pa'i grogs mdzad par zhal gyis bzhes nas de bzhin gshegs pa de dag thams cad 'di skad gsung ngo / /tad+ya thA/ tsa lA tsa lA tsa le/ bi na ti/ swa sti ke /tsakra/ ang ga ti/ pra sha man tu/ sarba ro ga /a na Te/ ku na Te/ ma hA ku na Te/ tsa re tsa re re/ he ma gi ri/ he ma gau ri/ he ma ni shun ti/ he ma si si/ ko 'ur be ko 'ur ba be/ he ku ra re/ ku ra re/ ku ma ti/ bi Sha sa ma Ne/ shi Shu b+hi/ tsa le tsa le/ bi tsa le/ mA bi lam ba/ hu mu hu mu swA hA/ gsang ba pa'i bdag po ji snyed pa thams cad kyang de bzhin gshegs pa thams cad dang nye bar 'dug nas de dag gis smras pa/ hU~M hU~M/ si si swA hA/ de skad ces bka' stsal pa dang de bzhin gshegs pa thams cad mi snang bar gyur to/ /de nas bcom ldan 'das la rgyal po chen po rnam thos kyi bus 'di skad ces gsol to/ /bcom ldan 'das bdag gis kyang de bzhin gshegs pa'i byin gyi brlabs kyis bsrung bar bgyi'o/ /dus ma lags par 'gum pa las bzlog par bgyi'o/ /tad+ya thA/ shwe te/ shwe te/ shwe ta/ le li li/ 'phags skyes pos kyang smras pa/ mA ta~M ge mA ta~M ge/ mA ta~M gi ni/ shU mA shU mu/ /yul 'khor srung gis kyang smras pa/ tsa re tsa re re swA hA/ mig mi bzang gis kyang 106.76a smras pa/ ba lim ba pa/ bcom ldan 'das kyis 'di skad ces bka' stsal to/ /rgyal po chen po dag gang la la zhig sangs rgyas thams cad kyis gzigs pa'i rig sngags 'di nyin re la lan re 'don na rigs kyi bu'am/ rigs kyi bu mo de la ston par 'du shes bskyed par bya'o/ /rigs kyi bu'am rigs kyi bu mo de ngan song gsum du 'gro bar mi 'gyur ro/ /'dis sems can thams cad kyi srog la phan btags par 'gyur ro/ /gang zhig sems can thams cad kyi don du nyin gcig bzhin du tshig tu 'don pa dang / gang yang 'di klog pa de la dus ma yin par 'chi ba'i 'jigs pa med do/ /de'i lus la nad ngan pa 'byung bar mi 'gyur ro/ /chus 'chi ba'i dus byed par mi 'gyur ro/ /mes ma yin/ mtshon gyis ma yin/ dug gis ma yin/ lce 'bab pas ma yin no/ /gang na rgyal ba'i bu dag rig sngags 'don pa'i sa phyogs de sangs rgyas dang / byang chub sems dpa' thams cad kyis dgongs par rig par bya'o/ /yi ger 'dri'am/ yi ger 'drir 'jug pa des sangs rgyas bcom ldan 'das la rim gror bya ba thams cad kyis sti stang byas par 'gyur ro/ /de ci'i phyir zhe na/ sems can rnams la rim gro byed pa ni sangs rgyas la rim gro byed pa yin no zhes de bzhin gshegs pa rnams gsung ba'i phyir ro/ /su zhig gis 'di bris nas yan lag la btags na de'i yan lags thams cad bsrungs par 'gyur ro/ /bcom ldan 'das kyis de skad ces bka' stsal nas/ rgyal po chen po bzhi dang / thams cad dang ldan pa'i 'khor de dang / lha dang mi dang lha ma yin dang dri zar bcas pa'i 'jig rten yi rangs te/ bcom ldan 'das kyis gsungs pa la mngon bar bstod do/ /'phags pa sangs rgyas thams cad kyi yan lag dang ldan pa zhes bya ba'i gzungs rdzogs so// //rgya gar gyi mkhan po dzi na mi tra dang / dA na shI la dang / zhu chen gyi lo ts+tsha ba ban de 106.76b ye shes sdes bsgyur cing zhus te/ skad gsar chad kyis kyang bcos nas gtan la phab pa/ skar zhus/ / |