@#/ /rgya gar skad du/ Ar+ya bud+d+ha hri dA 106.71a ya nA ma d+hA ra NI d+harma pa r+yA ya/ bod skad du/ 'phags pa sangs rgyas kyi snying po zhes bya ba'i gzungs kyi chos kyi rnam grangs/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das de bzhin gshegs pa'i spyod yul chos kyi dbye dgon pa rin po che bkod pa'i 'khor gyi khyams/ ye shes kyi rnam par dpyad pa/ sngon sangs rgyas kyis byin gyis brlabs pa/ sems can thams cad kyis mngon bar bstod pa/ byang chub sems dpa' chen po'i gnas rnam pa thams cad kyi mchog dang ldan pa/ chos thams cad mnyam pa nyid kyi rjes su spyod pa/ kun nas 'od kyi khang bzangs kyi dbus na byang chub sems dpa' bye ba khrag khrig 'bum phrag du ma thams cad kyang lung bstan pa/ thams cad kyang 'jig rten gyi khams tha dad pa nas 'dus pa/ thams cad kyang de bzhin gshegs pa chos kyi rgyal po'i sras/ thams cad kyang gzungs dang ting nge 'dzin sna tshogs thob pa sha stag gis yongs su bskor cing mdun gyis bltas nas thabs gcig tu bzhugs te chos ston to/ /de nas bcom ldan 'das kyis byang chub sems dpa'i 'khor rgya chen po la bka' stsal pa/ rigs kyi bu dag skye bo mang po la phan pa dang / skye bo mang po la bde ba dang / 'jig rten la thugs brtse ba dang / lha dang mi'i skye bo phal po che'i don dang / phan pa dang / bde ba'i phyir de bzhin gshegs pa dgra bcom pa yang dag par rdzogs pa'i sangs rgyas gang gA'i klung gi bye ma snyed kyis gsungs pa sangs rgyas kyi snying po zhes bya ba'i gzungs kyi chos kyi rnam grangs yod do/ /rigs kyi bu'am rigs kyi bu mo gang la la sangs rgyas kyi snying po zhes bya ba'i gzungs kyi chos kyi rnam grangs 'di 'chang ngam/ 'dzin tam/ klog gam/ kun chub par byed dam/ gzhan dag la yang rgya cher yang dag par rab tu ston tam/ dad dam/ lhag pa'i bsam 106.71b pas mos par byed na/ de bla na med pa yang dag par rdzogs pa'i byang chub las phyir mi ldog par 'gyur/ chos thams cad 'dzin pa dang mi 'bral bar 'gyur/ sangs rgyas bcom ldan 'das rnams dang mi 'bral bar 'gyur/ de bzhin gshegs pa la blta ba dang / bsnyen bkur byed pa dang mi 'bral bar 'gyur/ chos nyan pa dang mi 'bral bar 'gyur/ dge 'dun la rim gro byed pa dang mi 'bral bar 'gyur/ bskal pa stong du 'khor ba'i srid pa'i rgya mtsho phyir bsnyil bar 'gyur/ bla na med pa yang dag par rdzogs pa'i byang chub mngon bar rdzogs par sangs rgyas kyi bar du tshe rabs dran par 'gyur/ myur du bla na med pa yang dag par rdzogs pa'i byang chub tu mngon bar rdzogs par 'tshang rgya bar 'gyur/ de la 'byung po'i tshogs thams cad srung bar 'gyur/ lha dang klu dang gnod sbyin dang dri za dang / lha ma yin dang nam mkha' lding dang mi 'am ci dang lto 'phye chen po dang mi dang mi ma yin pa thams cad dga' bar 'gyur/ de'i lus la nad kyis mi tshugs par 'gyur/ pha rol gyi gnod pas 'chi ba'i dus byed par mi 'gyur/ chad pa spang ba dang / mtshon cha spang ba dang / dug bcil nas 'chi ba'i dus byed par mi 'gyur/ de la bdud sdig can gyis glags rnyed par mi 'gyur/ bdud kyi ris kyi lha rnams kyis skabs rnyed par mi 'gyur te/ gang du yid la byas pa der bdud kyi ris kyi lha de dag thams cad skrag cing dngang bar 'gyur zhing phyogs bcur 'bros par 'gyur ro/ /de la 'di dag ni sangs rgyas kyi tshig go/ /sangs rgyas kyi tshig chen po'o/ /sangs rgyas kyis gnang ba'i tshig chen po'o/ /sangs rgyas thams cad kyi tshig go/ /de bzhin gshegs pa thams cad kyi tshig yin no/ /tad+ya thA/ bud+d+he su bud+d+he/ ma hA bud+d+he/ i hA bud+d+he/ tad tra bud+d+he/ bud+d+he/ bud+d+he/ ma ti/ bud+d+he/ sarba bud+d+ha/ a nu ma ti/ sarba bud+d+ha/ a nu dz+nyA na te/ bud+d+ha/ bud+d+ha/ bud+d+ha/ bud+d+ha/ bud+d+ha/ 106.72a bud+d+ha/ bud+d+ha/ bud+d+ha/ bud+d+ha/ bud+d+ha/ sangs rgyas kyi yul mtha' yas te/ chos bstan pa yang mtha' yas mod kyi/ gcig tu yid la bya ba ni mdor na bsgom pa'o/ /gzungs 'di ni sems can rnams la thugs brtse ba'i phyir/ sangs rgyas thams cad kyis gsungs pa ste/ chos thams cad kyi phyag rgya yin no/ /tad+ya thA/ shud+d+he/ su shud+d+he/ su shud+d+he/ sho d+ha ni/ sa~M ni rma le/ ma la a pa ga te/ ga ti sa ma d+hi d+hi tran ti/ kra me sa ma sa re/ sa rA sa ra pa ri a sho ke /bi sho ka /sho ka sha ma ni/ shan te/ u pa shan te/ pra shan te/ a ba b+hA se/ sarba pu N+ye pa ri maN ti te/ sarba d+harma pra ti maN ti te/ ha ra ha ra/ ma la ha ra/ tsa ra tsa ra/ sa~M tsa ra/ tsa la tsa la sa~M tsa la/ ta la ta la/ ma ta la sa ma ta la/ ri ne ri ne/ su mi ni/ ni ne/ sa ma ri ne/ ri na ma ti/ lo ka d+ha re/ lo ka d+ha ri Ne/ d+ha ra d+ha ra/ Da ra Da ra/ ro d+ha ro d+ha/ ma hA bi dza ya/ bA hi ni/ ha na ha na/ sarba bud+d+he/ hri phre shi/ tra si/ sarba dz+nyA pa the/ sarba dz+nyA pa ra mi te/ ma hA pra ti b+ha na sa~M/ phan ne/ sa man ta/ a lo ke bud+d+ha/ bi sha ye/ bud+d+ha/ pra ti maN Di te/ b+ha ga ba te sa ra sa ra/ pra sa ra pra sa ra/ bi sa ra bi sa ra/ pra sa ra sarba sho sha a pa ga te swA hA/ bcom ldan 'das kyis sangs rgyas kyi snying po'i gzungs kyi chos kyi rnam grangs 'di bshad ma thag tu ri dang gnas su bcas pa dang / tshal rnam pa drug tu g.yos/ stong gsum gyi stong chen po'i 'jig rten gyi khams kyi sa yang g.yos so/ rab tu g.yos so/ kun du rab tu g.yos so/ /rgya mtsho chen po yang 'khrugs/ rab tu 'khrugs/ kun du rab tu 'khrugs so/ /ri'i rgyal po ri rab kyang ldeg cing 'gul to/ /bdud kyi gnas thams cad skrag nas/ bdud kyi ris kyi lha rnams dang / bdud sdig can rnams shin du sdug bsngal zhing yid mi bde bar gyur nas nyams thag go/ /sems can gang dag sa chen po g.yos par mthong ba de dag gis de bzhin gshegs pa dgra bcom pa yang dag par rdzogs pa'i sangs rgyas la 106.72b phyag 'tshal lo/ /de bzhin gshegs pa dgra bcom pa yang dag par rdzogs pa'i sangs rgyas la phyag 'tshal lo/ /zhes ched du brjod pa lan gsum ched du brjod do/ /lha gang dag sangs rgyas la mngon bar dad pa de dag gis lha'i ma tog man dA ra ba dang / man dA ra ba chen pos bcom ldan 'das la gtor/ mngon bar gtor nas/ gang dag sangs rgyas la skyabs su dong ba de dag thams cad rab tu dga' ba skyes so/ /de la 'di skad ces bya ste/ shAkya seng ge yang dag rdzogs pa yi/ /sangs rgyas skyob pas skad cig yud gang la/ /sangs rgyas thams cad kyi ni snying po yi/ /gzungs 'di dag ni rab tu bshad pa yi/ /skad cig yud der sa yang rnam drug g.yos/ /rgya mtsho 'khrugs shing bdud kyi gnas kun kyang / rab tu g.yos nas bdud kyi ris rnams kyi/ /lha dag rab tu dngangs shing 'khrugs par 'gyur/ /bdud yid mi bde sdug bsngal mya ngan non/ /de tshe lha rnams ngo mtshar rab thos nas/ /'jig rten mgon la mchod pa bya ba'i phyir/ /nam mkhar gnas nas me tog man dA 'thor/ /gang dag sangs rgyas mngon dad gzhan rnams kyi/ /se mo do dang do shal spos rnams dang / /phye ma dag dang byug pa gos rnams dang / /rgyan dang dpung rgyan dag kyang rab tu 'bul/ /brgyad po 'di dag ni de'i yon tan gyi phan yon gyi rgyan du 'gyur ba'o/ /brgyad gang zhe na/ 'di lta ste/ byang chub kyi sems mi brjed pa'i rgyan dang / thos pa thams cad yongs su tshol bas mi ngoms pa'i rgyan dang / chos zab mo rnam par nges pa rten cing 'brel par 'byung ba'i rgyan dang / sems can thams cad kyi dbang po mchog dang mchog ma yin pa shes pa'i rgyan dang / ji ltar thos pa dang ji ltar khong du chud pa'i chos rnams la tshul bzhin so sor rtog cing dpyod pa'i rgyan dang / sems can thams cad yongs su smin par bya ba'i phyir chos thams cad mi dmigs pa'i rgyan dang / rgyan de yang sangs rgyas kyis byin gyi brlabs kyis thabs la mkhas pa'i 106.73a rgyan dang / gzungs thob pa'i rgyan te/ brgyad po de dag ni de'i yon tan gyi phan yon gyi rgyan du 'gyur ro/ /gzungs 'di rtag par rgyun du yid la bya'o/ /sangs rgyas rjes su dran pa bsgom par bya'o/ /gzungs kyi gzhi 'di dag rnams yid la byas na las kyi sgrib pa thams cad yongs su byang bar 'gyur ro/ /pad ma rnam par bkod pa zhes bya ba'i ting nge 'dzin kyang thob bo/ /nad thams cad dang / na ba thams cad la lag pas byab par bya'o/ /bzlas brjod kyang dpag tu med par bya'o/ /bcom ldan 'das kyis de skad ces bka' stsal nas/ byang chub sems dpa' sems dpa' chen po de dag dang / nyan thos chen po de dag dang / lha dang mi dang lha ma yin dang dri zar bcas pa'i 'jig rten yi rangs te/ bcom ldan 'das kyis gsungs pa la mngon bar bstod do/ /'phags pa sangs rgyas kyi snying po zhes bya ba'i gzungs kyi chos kyi rnam grangs rdzogs so// //rgya gar gyi mkhan po dzi na mi tra dang / dA na shI la dang / zhu chen gyi lo ts+tsha ba ban de ye shes sdes bsgyur cing zhus te/ skad gsar chad kyis kyang bcos nas gtan la phab pa/ skar zhus// |