@/ /rgya gar skad du/ pradz+nyA b+ha ga ba na ma hA rA dzA/ bod skad du/ bcom ldan 'das gnyis med kyi rgyal po chen po la phyag 'tshal lo/ /de nas spyod pa bstan te/ lung a nu yo ga pa rdzogs pa'i rnal 'byor du bstan te/ lta ba dang ni spyod pa dang / gzungs kyi mtshan nyid 'di gsungs so/ /de bzhin dam tshig chen po 'ang bstan/ /las 'di lung gis bsgrub bya na/ /mi spong ba ni dang du blang / /spyod pa dam tshig bcwa lnga bsrung / /shes pa lnga dang bsrung ba gsum/ /stong rtsa brgyad du bsrungs pas ni/ /rtsa brgyad stong zhes de la bya'o/ /de yang ma hA sa ma ya/ /bzhi po rdzogs na kun tu bzang / /zhi rgyas dbang dang mngon spyod dang / /gnan bzlog drug ni gcig tu'o/ /dang la ga ni lung bshad de/ /khru tshad bzhi dang ldan pa ni/ /yon tan bcu gcig dang yang ldan/ /bzhin bzangs mig gis dkyus ring ba/ /stod smad phyed la rked pa phra/ /tshigs pa zlum la sor mo ring / /yon tan 'od can bcu gcig lo/ /ye shes rigs can yin par bshad/ /bcu gsum rdo rje rigs su 'grub/ /bcu drug sngags pas 'grub nges pa'o/ /rin chen rigs mchog yin par bstan/ /nyi shu gcig pa pad+ma'i rigs/ /spyan ras gzigs dbang rta mchog 'grub/ /nyi shu rtsa lnga lon pas ni/ /thogs med byang chub sems kyang 'dren/ / 104.192b thams cad las kyi rigs mchog 'grub/ /sum bcu rtsa gcig phan chad kyis/ /sems phebs tshun chad kun du dge'o/ /yid du 'ong ba dam pa yin/ /bder gshegs rigs su 'grub par bshad/ /bde chen 'du 'bral med pa'i gzungs/ /de dag ma lus gang rnyed pa/ /lus kyang khrus byas gtsang mar bya'o/ /dri zhim tsan dan go ban dang / /dz+ha ti pa la ku ru tshe/ /ka ko la dang ga bur dang / /a ka ru dang du ruska/ /g+hi hwang glang po'i spos rnams kyis/ /byugs nas rgyan dang phreng ba gdags/ /dar dang ras bal 'jam po dang / /gos rgyan chas klubs bskon nas ni/ /gser gyi rna cha gdub kor dang / /do shal dpung rgyan se mo do/ /rin chen sna tshogs brgyan du gdags/ /ji bzhin bde ba'i stan dag la/ /g.yon phyogs su ni gzhag par bya/ /bsnyen pa dang ni nye bsnyen dang / /bsgrub dang bsgrub chen bya ba ni/ /dkyil 'khor 'dom gang gru bzhi pa/ /'phang du sor bzhi'i tshad du bya/ /rdo rje dri chus man Dal byug /sha chen gu gul pog gis bdug /dkyil 'khor de la bskor te bdug /g.yon du de byi bzhag nas ni/ /b+ha ga de nyid byin gyis brlab/ /spyi bor o~M dkar 'od ldan pa/ /lce la a~M dmar dam pa bsam/ /snying kar zla dkyil hU~M mthing ka /lte bar swa sngon 'od ldan pa/ /rkang par ha ljang 'od ldan pa/ /pa las pad+ma'i dbyings su yang / /gru gsum me 'od 'bar ba bsam/ /nyon mongs lnga rnams sbyang ba dang / /sdug bsngal lnga ni tshar gcad phyir/ /lag g.yas gzhan gyis mi thub ma/ /g.yon pa ro langs chen mo ste/ /de yi kha la khro gnyer ma/ /ral pa gcig ma pad+ma la'o/ /gsang yum lnga dang khro mo bzhi/ /byin gyis brlabs te sngags bzlas pa/ /\u0f00 A~M:hU~M swA hA/ b+ha ga ban ni nyid kyi bka'/ /phyag rgya bzhi ru bdag gyur pas/ /gnyis su med par mnyam sbyar nas/ /lha yi bdud dam phung po'i bdud/ /nyon mongs bdud dang 'chi bdag bcom/ /phyag rgya chen po bzhi dang ldan/ /mkha' la sems phebs 'phros pa'i tshe/ /byang chub 'khor ba mya ngan 'das/ /gnyis su med pa'i sar phyin no/ /bcom ldan 'das kyis bka' stsal to/ /sangs rgyas sems can thams cad dang / /mtshan mar btags pa thams cad kun/ /bde chen nyid las gzhan ma yin/ /bde chen nyid las gzhan 104.193a pa'i chos/ /sangs rgyas nyid kyis mi mkhyen to/ /phyi nang ma lus snod bcud kyang / /byang chub sems su rnam dag pas/ /skye med ye shes yum gyi dbyings/ /gnyis med bdud rtsi chen po ste/ /yab yum bde ba'i ngang du gsal/ /'di ni snying po byang chub sems/ /bder gshegs kun gyis bka' stsal to/ /lus kun yongs su 'khyud pa yis/ /rdo rje pad+mar ldan byas nas/ /rang 'byung rnams ni bde mchog sems/ /phul bas myur du grub pa ni/ /o~M ra ga pU dza ho/ /dngos grub blang zhing 'di brjod do/ /byang chub sems kyis dbang bskur te/ /dngos grub bsgrub pa la gzung ngo / /bdud rtsi chen po mchog gi lung gi nang nas/ bsgrub pa chen po'i lung dang / gzungs kyi mtshan nyid dang / sbyor ba'i man ngag dang / gA na bsgrub pa'i lung dang / byang chub kyi sems kyi yon tan dang / a mr-i ta grub pa'i lung ste/ bam po chen po gsum pa// // |