(da) @#/ ! /mdo sde sna tshogs kyi skor bzhugs so/ /[(黃) 經藏第十一部] 50.1b @##/ /rgya gar skad du/ Ar+ya sarba d+harma swa b+hA ba sa ma ta pi pan tsi ta sa mA d+hi rA dza nA ma ma hA yA na sU tra/ bod skad du/ 'phags pa chos thams cad kyi rang bzhin mnyam pa nyid rnam par spros pa ting nge 'dzin gyi rgyal po zhes bya ba theg pa chen po'i mdobam po dang po/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na/ bya rgod kyi phung po'i ri la dge slong 'bum du tshang ba'i dge slong gi dge 'dun chen po dang thabs gcig tu bzhugs so/ /byang chub sems dpa' bye ba khrag khrig phrag brgyad bcu dang yang thabs gcig ste/ thams cad kyang skye ba gcig gis thogs pa/ mngon par shes pas mngon par shes pa/ phyogs bcu'i 'jig rten gyi khams dag nas 'dus pa/ gzungs dang mdo sde rtogs par khong du chud pa/ sems can thams cad 50.2a la chos kyi sbyin pas tshim par byed pa/ mngon par shes pa chen po'i ye shes brjod pa la mkhas pa/ pha rol tu phyin pa thams cad kyi dam pa'i pha rol tu son pa/ byang chub sems dpa'i ting nge 'dzin dang snyoms par 'jug pa thams cad rnam par gzhag pa shes pa la mkhas pa/ sangs rgyas thams cad kyis bstod cing bsngags te rab tu bkur ba/ sangs rgyas kyi zhing thams cad du rdzu 'phrul gyis 'gro ba la mkhas pa/ bdud thams cad skrag par bya ba'i shes pa la mkhas pa/ chos thams cad ji lta ba bzhin du shes pa la mkhas pa sems can thams cad kyi dbang po mchog dang mchog ma yin pa shes pa la mkhas pa/ sangs rgyas thams cad la mchod pa'i las yang dag par sgrub pa shes pa la mkhas pa/ 'jig rten pa'i chos thams cad kyis mi gos pa/ lus dang ngag dang sems yang dag par brgyan pa/ byams pa chen po dang snying rje chen po'i go cha bgos pa/ bskal pa grangs med par yid mi skyo bar brtson 'grus che ba/ seng ge'i sgra chen po sgrog pa/ phas kyi rgol ba thams cad kyi zil gyis mi non pa/ phyir mi ldog pa'i phyag rgyas btab pa/ sangs rgyas thams cad kyi chos kyi dbang bskur ba thob pa sha stag la 'di lta ste/ byang chub sems dpa' sems dpa' chen po lhun po dang rab tu lhun po dang lhun po'i rtse mo 'dzin dang lhun po mar me'i rgyal po dang lhun po brtsegs pa dang lhun po'i rgyal mtshan dang lhun po'i rgyal po dang lhun po'i rtsi kun g.yo bar byed pa'i rgyal po dang lhun po'i dbyangs dang / sprin gyi rgyal po dang rnga dbyangs dang rin po che'i 'byung gnas dang rin po che'i tog dang rin po che'i rtse mo dang rin po che 'byung ba dang / rin po che snang ba dang rin po che'i khar ba dang lag na phyag rgya rin po che dang rin po che'i bkod pa dang rin po che'i dra ba dang rin po che'i 'od dang rin po che'i gling dang / dga' bar byed pa dang chos bkod pa dang bkod pa'i rgyal po dang mtshan gyis kun 50.2b du brgyan pa dang dbyangs bkod pa dang dbyangs rnam par dag pa'i 'od dang rin po che brtsegs pa dang nyi ma me'i 'od 'phro can dang skar ma la dga' ba dang zla ba'i 'od zer dang / sems bskyed ma thag tu chos kyi 'khor lo skor ba dang gser bzang po rnam par dag pa'i 'od dang byang chub sems dpa' sems dpa' chen po rtag tu mi 'jigs sbyin zhes bya ba dang / byang chub sems dpa' mi pham pa la sogs pa bskal pa bzang po'i byang chub sems dpa' sems dpa' chen po thams cad dang / 'jam dpal la sogs pa sems dpa' dpe med pa drug cu dang / bzang skyongs la sogs pa skyes bu dam pa bcu drug dang / rgyal po chen po bzhi la sogs pa rgyal chen bzhi'i ris kyi lha'i bu rnams dang / tshangs pa la sogs pa tshangs ris kyi lha'i bu rnams kyi bar du de bzhin du sbyar te/ de ma yin pa gzhan yang dbang che ba dang dbang che bar grags pa'i lha dang klu dang gnod sbyin dang dri za dang lha ma yin dang nam mkha' lding dang mi 'am ci dang lto 'phye chen po dang mi dang mi ma yin pa rgya che zhing rlabs che ba dag dang thabs gcig go/ /bcom ldan 'das la bkur stir byas/ bla mar byas/ ri mor byas/ mchod par byas/ rjed par byas/ gsol bar byas te/ 'khor bzhi dang lhar bcas pa'i 'jig rten gyis kyang phyag bya ba/ mchod par bya ba/ bkur stir bya ba/ bla mar bya ba/ ri mor bya ba/ rjed par bya ba/ gsol bar bya bar gyur to/ /de nas bcom ldan 'das 'khor brgya stong du mas yongs su bskor cing mdun gyis bltas nas chos ston te/ tshangs par spyod pa/ thog mar dge ba/ bar du dge ba/ tha mar dge ba/ don bzang po/ tshig 'bru bzang po/ ma 'dres pa/ yongs su rdzogs pa/ yongs su dag pa/ yongs su byang ba yang dag par rab tu ston to/ /de'i tshe 'khor tshogs pa de nyid du zla 'od gzhon nur gyur pa zhes bya ba sngon gyi rgyal ba la bya ba byas pa/ dge ba'i rtsa ba bskyed pa/ skye ba dran pa/ spobs pa thob pa/ theg pa chen po la 50.3a yang dag par zhugs pa/ snying rje chen po la brtson pa zhig 'dus te 'dug par gyur to/ /de nas zla 'od gzhon nur gyur pa stan las langs te bla gos phrag pa gcig la bzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /gal te zhus nas zhu ba lung bstan pa'i slad du bcom ldan 'das kyis bdag la skabs phye na bdag bcom ldan 'das de bzhin gshegs pa dgra bcom pa yang dag par rdzogs pa'i sangs rgyas la phyogs 'ga' zhig zhu'o/ /de skad ces gsol pa dang bcom ldan 'das kyis zla 'od gzhon nur gyur pa la 'di skad ces bka' stsal to/ /de bzhin gshegs pa dgra bcom pa yang dag par rdzogs pa'i sangs rgyas la gzhon nu khyod ci dang ci 'dod pa dris shig dang dri ba dris pa de dang de nyid lung bstan pas ngas khyod kyi sems rangs par bya'o/ /gzhon nu nga ni thams cad mkhyen pa/ thams cad gzigs pa/ chos thams cad la stobs dang mi 'jigs pas khyu mchog tu gyur pa rjes su thob pa/ sgrib pa med pa'i rnam par thar pa'i ye shes dang ldan pa ste/ gzhon nu 'jig rten gyi khams mtha' yas mu med pa na de bzhin gshegs pa la mi mkhyen pa 'am/ mi gzigs pa 'am/ mi gsan pa 'am/ thugs su ma chud pa 'am/ mngon sum du ma mdzad pa 'am/ mngon par rdzogs par sangs ma rgyas pa ci 'ang med de/ gzhon nu de bzhin gshegs pa la dri ba dang yongs su dri ba'i phyir khyod la rtag tu skabs phyes/ dri ba dris pa de dang de lung bstan pas ngas khyod kyi sems rangs par bya'o/ /de nas bcom ldan 'das kyis skabs phye ba dang / zla 'od gzhon nur gyur pas bcom ldan 'das la tshigs su bcad de gsol pa/ 'jig rten mgon po rdzogs sangs rgyas/ /'od mdzad ji ltar spyad pa yis/ /bsam gyis mi khyab ye shes 50.3b 'thob/ /phan mdzad lung yang bstan du gsol/ /mi yi khyu mchog mi dang lhas mchod pa/ /mi dbang bden gsungs ji ltar spyad pa yis/ /theg mchog dam pa gzhal med thob par 'gyur/ /mgon po gsung mchog zhus pa lung bstan gsol/ /bdag la g.yo ni ma mchis te/ /lhag pa'i bsam pas zhu ba lags/ /skyes bu dam pa ma gtogs par/ /bdag gi dbang ni gzhan ma mchis/ /'dun dang smon lam rgya che bdag la mchis/ /bdag gi spyod pa shAkya seng ges mkhyen/ /bdag ni tshig la gtsor 'dzin ma lags kyis/ /mi dbang sgrub pa bdag la myur du gsungs/ /sangs rgyas theg par gces spras bgyid/ /yongs su sdud pa'i chos rnams gang / chos rnams kun gyi mthar phyin pa/ /dpa' bo chen po lung bstan gsol/ /ci nas mis bsten shes rab rnor 'gyur zhing / /mi bzad 'jigs dang bral te mi skrag pas/ /tshul khrims phung po gtong bar mi bgyid cing / /rgyags dang zhe sdang gti mug chags bral te/ /nyes pa kun zhi spyad pa spyod pa yi/ /phan par bgyid pa'i chos rnams bdag la gsungs/ /ji ltar tshul khrims mi gtong zhing / /ji ltar bsam gtan 'dor mi 'gyur/ /dgon pa la ni ji ltar bsten/ /shes rab dag gis ji ltar 'phel/ /ji ltar stobs bcu'i bstan pa rgya che la/ /tshul khrims srung zhing mngon dga' rnyed par 'gyur/ /ji ltar tshul khrims phung po skyon med 'gyur/ /ji ltar 'dus byas rang bzhin 'jal bar 'gyur/ /ji ltar lus dang ngag gis kyang / /mkhas pa rnam par dag par 'gyur/ /kun nas nyon mongs med sems kyis/ /sangs rgyas ye shes tshol bar 'gyur/ /lus kyi las ni ji ltar rnam dag 'gyur/ /tshig gi skyon ni ji ltar spangs par 'gyur/ /ji ltar sems la nyon mongs med 'gyur ba/ /skyes mchog zhus pa bdag la lung bstan gsol/ /de skad ces gsol pa dang / bcom ldan 'das kyis zla 'od gzhon 50.4a nur gyur pa la 'di skad ces bka' stsal to/ /gzhon nu byang chub sems dpa' sems dpa' chen po chos gcig dang ldan na yon tan 'di dag thob par 'gyur zhing myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /chos gcig po gang zhe na/ gzhon nu 'di la byang chub sems dpa' sems dpa' chen po sems can thams cad la sems snyoms pa yin/ phan pa'i sems dang khong khro ba med pa'i sems dang mi mnyam pa med pa'i sems yin te/ gzhon nu byang chub sems dpa' sems dpa' chen po chos gcig po 'di dang ldan na yon tan 'di dag thob par 'gyur zhing myur du bla na med pa yang dag par rdzogs pa'i byang chub mngon par rdzogs par 'tshang rgya'o/ /de nas bcom ldan 'das gyis de'i tshe zla 'od gzhon nur gyur pa la tshigs su bcad de gsungs pa/ chos gcig yang dag blangs nas ni/ /byang chub sems dpa' gang gnas pa/ /yon tan 'di dag nges thob ste/ /myur du byang chub 'tshang yang rgya/ /de yi sems ni gang la'ang zhi mi sdang / /zhe sdang med sems byang chub sems dpa' gang / /tha ba mi skyed zhe sdang med pa dag /khyad par ji skad brjod pa thob par 'gyur/ /mnyam pa'i sems la bsten pa yis/ /rnam par smin pa mnyam par 'gyur/ /rkang pa'i mthil yang mnyam pa dang / /cho ga spyod yul mnyam par 'gyur/ /mnyam zhing mi mnyam ma yin sems bsgoms nas/ /tha ba'i skyon bral nem nur rab spangs na/ /de yi rkang lag mthil yang mnyam 'gyur te/ /mchog tu 'od gsal dag cing blta na sdug / /byang chub sems dpa' phyogs bcur lhang nger snang / /sangs rgyas zhing du dpal dang 'od kyis khyab/ /nam des zhi ba'i sa ni thob pa'i tshe/ /sangs rgyas mkhyen la sems can mang po 'god/ /gzhon nu de la byang chub sems dpa' sems can thams cad la sems snyoms pa dang / phan par sems dpa' dang sems khong khro ba 50.4b med pa dang sems mi mnyam pa med pa ni chos thams cad kyi rang bzhin mnyam pa nyid rnam par spros pa zhes bya ba'i ting nge 'dzin thob par 'gyur ro/ /gzhon nu chos thams cad kyi rang bzhin mnyam pa nyid rnam par spros pa zhes bya ba'i ting nge 'dzin gang zhe na/ 'di lta ste/ lus kyi sdom pa dang ngag gi sdom pa dang yid kyi sdom pa dang las yongs su dag pa dang dmigs pa las yang dag par 'da' ba dang phung po yongs su shes pa dang / khams mnyam pa nyid dang skye mched sel ba dang sred pa spongs ba dang mi skye ba mngon sum du byed pa la 'jug pa dang rgyu gsal bar byed pa dang las kyi 'bras bu chud mi gson pa dang chos mthong ba dang lam sgom pa dang de bzhin gshegs pa la sten pa dang shes rab rno ba dang bden pa'i rjes su 'jug pa dang chos shes pa dang so so yang dag par rig pa la 'jug pa shes pa dang yi ge dang tshig rab tu dbye ba shes pa dang dngos po rnams las yang dag par 'da' ba dang / sgra yongs su shes pa dang dga' ba rab tu thob pa dang chos kyi dga' ba rjes su myong ba dang drang ba dang / mnyen pa dang shugs drang ba dang gya gyu med pa dang khro gnyer dang bral ba dang des pa dang ngang tshul dge ba dang byams par 'dzin pa dang 'jam pa dang bzhin 'dzum pa dang gsong por smra ba dang legs par 'ongs so/ /tshur shog ces smra ba dang le lo med pa dang bla ma la gus pa dang bla ma la sri zhu che ba dang skye bas chog shes pa dang chos dkar pos mi ngoms pa dang 'tsho ba rnam par dag pa dang dgon pa la gnas pa mi gtong ba dang sa rnam par bzhag pa shes pa dang dran pa chud mi gzon pa dang / phung po la mkhas pa dang khams la mkhas pa dang skye mched la mkhas pa dang mngon par shes pa mngon sum du bya ba la 'jug pa dang / nyon mongs pa sel ba dang bag chags kyi mtshams sbyor ba yang dag par 'joms pa dang / khyad par 'gro ba dang bsgom pa'i rgyu 'thun pa dang nyes pa las dbyung ba la mkhas pa dang kun nas ldang ba gnon pa dang bag la nyal spong ba dang srid pa las 50.5a yang dag par 'da' ba dang skye ba dran pa dang las kyi rnam par smin pa la nem nur med pa dang chos sems pa dang thos pa tshol ba dang / ye shes rno ba dang ye shes la sred pa dang ye shes rjes su rtogs pa dang cang shes kyi sa dang sems ri lta bu dang mi sgul ba dang mi g.yo ba dang phyir mi ldog pa'i sa rnam par gzhag pa shes pa dang / dge ba'i chos kyi rgyu 'thun pa dang sdig pa'i chos la smod pa dang nyon mongs pa rnams kyi rgyu ba med pa dang bslab pa yongs su mi gtong ba dang / ting nge 'dzin rnam par 'jog pa dang sems can rnams kyi bsam pa shes pa dang / skye ba'i khyad par shes pa dang mnyam pa nyid shes pa dang tshig gi mtshams sbyar ba shes pa dang khyim na gnas pa yongs su gtong ba dang / khams gsum la mngon par mi dga' ba dang sems zhum pa med pa dang chos la mngon par zhen pa med pa dang dam pa'i chos yongs su 'dzin pa dang chos srung ba dang las kyi rnam par smin pa la yid ches pa dang 'dul ba la mkhas pa dang rtsod pa'i gzhi zhi bar byed pa dang 'gyed pa med pa dang rtsod pa med pa dang bzod pa'i sa dang bzod pa yang dag par 'dzin pa dang 'gro ba mnyam pa dang chos rab tu dbye ba la mkhas pa dang chos gtan la dbab pa la mkhas pa dang chos kyi tshig rab tu dbye ba shes pa dang chos kyi tshig nges par dgod pa la mkhas pa dang / sngon gyi mtha' shes pa dang phyi ma'i mtha' shes pa dang da ltar byung ba shes pa dang dus gsum mnyam pa nyid shes pa dang 'khor gsum yongs su dag pa shes pa dang / lus gnas pa shes pa dang sems gnas pa shes pa dang spyod lam srung ba dang spyod lam mi 'khrugs pa dang spyod lam mi 'chos pa dang spyod lam mdzes pa dang don dang don ma yin pa la mkhas shing shes pa dang rigs par smra ba dang / 'jig rten shes pa dang lhug par gtong ba dang lag brkyang ba dang sems kyis 'dzin pa med pa dang ngo tsha shes pa dang khrel yod pa dang mi dge ba'i sems la smod pa dang sbyangs pa'i yon tan mi gtong 50.5b ba dang cho ga yang dag par 'dzin pa dang dga' bar spyod pa dang bla ma la ldang zhing stan 'ding ba dang nga rgyal tshar gcod pa dang sems yang dag par rab tu 'dzin pa dang sems skye ba shes pa dang don rtogs par shes pa dang ye shes rjes su rtogs pa dang / mi shes pa med par gyur pa dang sems la 'jug pa shes pa dang sems kyi rang bzhin rjes su rtogs pa shes pa dang / sgrub pa dang nges par sgrub pa dang nges par sgrub pa la mkhas pa'i shes pa dang sgra skad thams cad shes pa dang nges pa'i tshig rnam par gzhag pa shes pa dang don gtan la dbab par shes pa dang gnod pa rnam par spong ba dang / skyes bu dam pa dang 'grogs pa dang skyes bu ngan pa rnam par spong ba dang bsam gtan rnams sgrub cing de la ro myong bar mi byed pa dang mngon par shes pas rnam par 'phrul ba dang / ming dang brda dang gdags pa'i ngo bo nyid la 'jug pa shes pa dang / btags pa yang dag par 'joms pa dang 'du byed rnams la skyo ba dang bkur sti mi 'dod pa dang bkur sti med pa la btang snyoms su byed pa dang rnyed pa la don du mi gnyer ba dang rnyed pa med pa la zhum pa med pa dang snyan pa mi 'dod pa dang mi snyan pa la khong khro ba med pa dang bstod pa la dga' ba med pa dang smad pa la mi dga' ba med pa dang sdug bsngal la yid byung bar mi byed pa dang 'du byed rnams len par mi byed pa dang bsngags pa yang dag pa la ma chags pa dang bsngags pa yang dag pa ma yin pa la mi mjed pa dang / khyim pa dang rab tu byung ba dag dang mi sten pa dang / spyod yul ma yin pa rnam par spong ba dang spyod yul du rgyu ba dang spyod pa phun sum tshogs pa dang spyod pa ma yin pa rnam par spong ba dang / rigs sun par mi byed pa dang bstan pa srung ba dang smra ba nyung zhing mnyen pa dang dal gyis smra ba dang tshig gi lan blan pa la mkhas pa dang phyir rgol ba tshar gcod pa dang dus su 'gro bar byed pa dang so so'i skye bo la yid mi rton pa dang sdug bsngal ba rnams la khyad du gsod par mi byed cing de dag la nor sbyin pa dang / dbul po rnams la brnyas par mi byed pa dang tshul khrims 'chal pa la snying rje ba dang phan 50.6a pa'i dngos po dang snying brtse ba'i blo dang chos kyis phan 'dogs pa dang zang zing yongs su gtong ba dang / mi stsogs par gnas pa dang tshul khrims la stod cing 'chal pa'i tshul khrims la smod pa dang tshul khrims dang ldan pa la g.yo med par sten pa dang / bdog pa thams cad yongs su gtong ba dang lhag pa'i bsam pas gnyer ba dang / ji skad smras pa bzhin byed pa dang rgyun mi chad par sbyor ba dang gus par byas te dga' ba myong bar byed pa dang / dpe shes pa dang sngon byung ba la mkhas pa dang dge ba'i rtsa ba sngon du 'gro ba dang thabs la mkhas pa dang mtshan ma spongs ba dang 'du shes zlog pa dang dngos po rnams yongs su shes pa dang / mdo sde mngon par sgrub pa dang 'dul ba la mkhas pa dang bden pa gtan la 'bebs pa dang rnam par grol ba mngon sum du bya ba la 'jug pa dang / tshigs mgo cig tu smra ba dang ji lta ba bzhin du shes shing mthong ba mi gtong ba dang nem nur med pa'i tshigs dang stong pa nyid la sten pa dang mtshan ma med pa la sten pa dang smon pa med pa'i ngo bo nyid rtogs par byed pa dang mi 'jigs pa thob pa dang ye shes kyis snang bar byed pa dang tshul khrims dam pa dang snyoms par 'jug pa la gzhol ba dang / gcig pur dga' ba dang bdag shes pa dang shes kyi khe nyung ngus chog shes pa dang sems la rnyog pa med pa dang lta bar gyur pa rnam par spongs ba dang / gzungs thob pa dang ye shes la 'jug pa dang gnas dang gnas ma yin pa dang / 'jug pa dang sgrub pa shes pa dang gtan tshigs dang / rigs pa dang tshul dang sgo dang rgyu dang lam dang nan tan dang sgrub pa dang phrin dang gdams pa dang bstan pa la spyod pa dang / rjes su 'thun pa'i bzod pa dang bzod pa'i sa dang mi bzod pa dang bral ba dang ye shes kyi sa dang mi shes pa spongs ba dang shes pa la gnas pa dang rnal 'byor spyod pa'i sa dang byang chub sems dpa'i spyod yul dang / skyes bu dam pa la sten pa dang skyes bu dam pa ma yin pa spong ba dang / 50.6b chos thams cad kyi ngo bo nyid rtogs shing khong du chud par shes pa dang / de bzhin gshegs pas gsungs pa'i sangs rgyas kyi sa dang mkhas pa rnams kyis rjes su yi rang ba dang byis pa rnams kyis spangs pa dang nyan thos rnams kyis shes par dka' ba dang rang sangs rgyas rnams kyis mi shes pa dang mu stegs can gyi sa ma yin pa dang byang chub sems dpa' rnams kyis yongs su gzung ba dang stobs bcu dag gis rjes su rtogs pa dang / lha rnams kyis mchod par bya ba dang tshangs pas phyag bya ba dang brgya byin rnams kyis sngon du 'gro bar bya ba dang / klu rnams kyis phyag bya ba dang gnod sbyin rnams kyis rjes su yi rang bar bya ba dang mi 'am ci rnams kyis bstod par bya ba dang lto 'phye chen po rnams kyis bsngags par bya ba dang byang chub sems dpa' rnams kyis bsgom par bya ba dang mkhas pa rnams kyis kun chub par bya ba dang bla na med pa'i nor du gyur pa dang zang zing med pa'i sbyin pa dang nad pa rnams kyi sman du gyur pa dang ye shes kyi mdzod du gyur pa dang spobs pa mi zad pa dang mdo sde rnams kyi tshul du gyur pa dang dpa' bo dag gi g.yul du gyur pa dang khams gsum yongs su shes pa dang pha rol tu 'gro ba dag la gzings lta bu dang chu bo'i nang du zhugs pa dag la gru lta bu dang grags pa 'dod pa dag gi grags pa dang / sangs rgyas rnams kyis bstod pa dang de bzhin gshegs pa rnams kyis bsngags pa dang stobs bcu rnams kyis bstod pa dang byang chub sems dpa' dag gi yon tan dang snying rje can dag gi btang snyoms dang nyes pa zhi bar 'dod pa dag gi byams pa dang theg pa chen po dag gi dbugs 'byin pa dang seng ge'i sgra sgrogs pa rnams kyi nan tan dang / sangs rgyas kyi ye shes kyi lam dang / chos thams cad kyi phyag rgya dang / thams cad mkhyen pa'i ye shes yongs su grub pa dang / byang chub sems dpa' rnams kyi bskyed mos tshal du gyur pa dang / bdud kyi sde rnams skrag par 50.7a byed pa dang / bde bar 'gro ba rnams kyi rig pa dang don sgrub pa rnams kyi don dang dgra'i nang du song ba dag gi skyabs dang phyir rgol ba rnams chos dang 'thun pas tshar gcod pa dang mi 'jigs pa rnams kyi bden pa'i rnams pa dang stobs rnams yang dag par tshol ba dang sangs rgyas kyi chos ma 'dres pa bcwa brgyad kyi snga ltas su gyur pa dang chos kyi sku'i rgyan dang spyod pa rnams kyi rgyu 'thun pa dang sangs rgyas kyi sras rnams kyi rgyan dang thar pa 'dod pa rnams kyi dga' ba dang sras thu bo rnams kyi dga' ba dang sangs rgyas kyi ye shes yongs su rdzogs pa dang nyan thos dang rang sangs rgyas thams cad kyi sa ma yin pa dang sems rnam par dag pa dang lus yongs su dag pa dang rnam par thar pa'i sgo rnams yongs su rdzogs pa dang sangs rgyas kyi ye shes kun nas nyon mongs pa med pa dang 'dod chags 'byung ba med pa dang zhe sdang dang bral ba dang gti mug gi sa ma yin pa dang / ye shes 'byung ba dang rig pa skye ba dang ma rig pa spong ba dang rnam par grol ba snying por byed pa rnams tshim pa dang ting nge 'dzin snying por byed pa rnams kyi dga' ba dang lta 'dod pa rnams kyi mig tu gyur pa dang rnam par 'phrul par 'dod pa rnams kyi mngon par shes pa dang / mngon par sgrub par 'dod pa rnams kyi rdzu 'phrul dang thos pa don du gnyer ba rnams kyi gzungs dang dran pa mi brjed pa dang sangs rgyas rnams kyi byin gyis brlabs dang 'dren pa rnams kyi thabs mkhas pa dang mi brtson pa rnams kyi phra ba dang shes par dka' ba dang ma grol ba dag gis mi shes pa dang yi ge rnams ldog pa dang / sgra shes par dka' ba dang rtogs pa rnams kyis kun shes pa dang nges pa rnams kyis shes pa dang 'dod pa chung ba rnams kyis rab tu rtogs pa dang brtson 'grus brtsams pa rnams kyis gzung ba dang dran pa dang ldan pa rnams kyis bcangs pa dang / sdug bsngal zad pa dang chos thams cad skye ba med pa dang srid pa'i 'gro ba dang skye ba'i gnas thams cad gcig tu nges 50.7b par bstan pa ste/ gzhon nu 'di ni chos thams cad kyi rang bzhin mnyam pa nyid rnam par spros pa'i ting nge 'dzin ces bya'o/ /chos thams cad kyi rang bzhin mnyam pa nyid rnam par spros pa zhes bya ba'i ting nge 'dzin bstan pa 'di bcom ldan 'das kyis bshad pa na lha dang mi'i skye dgu sngon yongs su sbyang ba byas pa khrag khrig phrag brgyad bcus mi skye ba'i chos la bzod pa thob par gyur to/ /khrag khrig phrag dgu bcu rtsa drug gis rjes su 'thun pa'i bzod pa thob par gyur to/ /khrag khrig phrag dgu bcu rtsa gsum gyis sgra'i rjes su 'brang ba'i bzod pa thob par gyur to/ /dge slong stong du tshang ba len pa med par zag pa las sems rnam par grol lo/ /lha dang mi'i skye dgu las srog chags stong phrag drug bcus chos rnams la chos kyi mig rdul med cing dri ma dang bral ba rnam par dag go/ /dge slong ma brgyad khri len pa med par zag pa las sems rnam par grol lo/ /dge bsnyen lnga brgyas phyir mi 'ong ba'i 'bras bu thob par gyur to/ /dge bsnyen ma drug stong gis lan cig phyir 'ong ba'i 'bras bu thob par gyur to/ /stong gsum gyi stong chen po'i 'jig rten gyi khams 'di yang rnam pa drug tu g.yos/ rab tu g.yos kun du rab tu g.yos/ 'gul rab tu 'gul kun tu rab tu 'gul/ ldeg rab tu ldeg kun tu rab tu ldeg /'khrugs rab tu 'khrugs kun tu rab tu 'khrugs/ chem chem rab tu chem chem kun du rab tu chem chem/ 'ur 'ur rab tu 'ur 'ur kun du rab tu 'ur 'ur te/ shar phyogs dma' na nub phyogs mtho/ nub phyogs dma' na shar phyogs mtho/ byang phyogs dma' na lho phyogs mtho/ lho phyogs dma' na byang phyogs mtho/ mtha' dma' na dbus mtho/ dbus dma' na mtha' mtho ste/ tshad med pa'i snang ba 'jig rten du byung nas 'jig rten gyi bar mun nag smag tu gyur pa gang yin pa de dag kyang snang ba des gsal bar gyur to/ /sems can gang dag der skyes 50.8a pa de dag gcig gis gcig shes par gyur te/ 'di skad du kye sems can gzhan dag kyang 'dir skyes par gyur to zhes 'dzer te/ mnar med pa'i sems can dmyal ba chen po'i bar du yang de bzhin no/ /gling gzhi'i le'u ste dang po'o// // de'i tshe bcom ldan 'das kyis zla 'od gzhon nur gyur pa la bka' stsal pa/ gzhon nu ngas dran pa sngon byang chub sems dpa'i spyad pa spyod pa na 'khor los sgyur ba'i rgyal por gyur te/ ting nge 'dzin 'di 'dod cing myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas bya rgod kyi phung po'i ri 'di nyid la bskal pa bye ba khrag khrig brgya stong du mar de bzhin gshegs pa dgra bcom pa yang dag par rdzogs pa'i sangs rgyas grangs med dpag tu med pa rnams la ngas rin po che thams cad dang me tog dang spos dang dri dang phreng ba dang byug pa dang phye ma dang gdugs dang rgyal mtshan dang ba dan dang sil snyan dang pheg rdob pa dang rnam par rgyal ba'i ba dan dang rin po che'i gtsug lag khang rnams pa sna tshogs rnam par bkra ba bye ba khrag khrig phrag brgya stong du ma'i bkod pa thams cad kyis bkur stir byas bla mar byas ri mor byas mchod par byas rjed par byas gsol bar byas te/ gzhon nu ngas de bzhin gshegs pa de dag thams cad las chos thams cad kyi rang bzhin mnyam pa nyid rnam par spros pa'i ting nge 'dzin 'di rgyas par thos te/ gzung ngo / /dris so/ /bcangs so/ /blags so/ /rab tu bton to/ /nyon mongs pa med pa'i bsgom pas bsgoms so/ /mang du byas shing gzhan la yang rgya cher yang dag par rab tu bstan to/ /gzhon nu de bzhin gshegs pa de dag thams cad kyi tha ma ni de bzhin gshegs pa dgra bcom pa yang dag par rdzogs pa'i sangs rgyas sA la'i dbang po'i rgyal po zhes bya ba zhig byung ste/ gzhon nu de bzhin 50.8b gshegs pa sA la'i dbang po'i rgyal po de'i nyan thos dang byang chub sems dpa' khrag khrig brgya stong gi dge 'dun byung ste/ de dag gi tshe'i tshad ni lo 'bum phrag bdun cu rtsa drug tu gyur to/ /gzhon nu de bzhin gshegs pa dgra bcom pa yang dag par rdzogs pa'i sangs rgyas sA la'i dbang po'i rgyal po de la ngas lo bye ba stong phrag bcwa brgyad du mchod pa dang rim gro byas te lha'i tsan dan dang rin po che'i gtsug lag khang bye ba byas so/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas sA la'i dbang po'i rgyal po de'i tshe'i tshad ni lo bye ba stong phrag bdun bcu rtsa drug tu gyur te/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas sA la'i dbang po'i rgyal po de'i drung du nga rab tu byung nas lo bye ba stong phrag bcu bzhir chos thams cad kyi rang bzhin mnyam pa nyid rnam par spros pa'i ting nge 'dzin 'di mnyan cing gzung ste dris so/ /bcangs so/ /blags so/ /rab tu bton to/ /nyon mongs pa med pa'i sgom pas bsgoms so/ /mang du byas shing gzhan la yang rgya cher yang dag par rab tu bstan to/ /de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na ting nge 'dzin 'di 'dod cing myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod na khyod kyis kyang nga bzhin du de bzhin gshegs pa thams cad la mchod pa dang rim gro dang g.yog bya ba la brtson par bya'o/ /gzhon nu de ci'i phyir zhe na/ byang chub sems dpa' sems dpa' chen po dag gis de bzhin gshegs pa thams cad la mchod pa dang rim gro dang g.yog byas pa'i rgyu 'thun pas bla na med pa yang dag par rdzogs pa'i byang chub kyang rnyed par dka' ba ma yin na ting nge 'dzin 'di lta ci smos/ gzhon nu de lta bas na khyod kyis de bzhin gshegs pa thams cad 50.9a la mchod pa dang rim gro dang g.yog bya ba la rtag tu yid yongs su mi skyo bar bya'o/ /de nas bcom ldan 'das kyis de'i tshe zla 'od gzhon nur gyur pa la sngon byung ba'i le'u 'di nyid rgyas par tshigs su bcad pa'i dbyangs kyis rgya cher yang dag par rab tu bstan to/ /dran pa stobs bcu bye ba drug bcu dag /sngon tshe bya rgod phung po'i ri la bzhugs/ /nga sngon byang chub spyad pa spyod pa'i tshe/ /ting 'dzin zhi ba'i mchog 'di bshad byas te/ /de dag gi yang tha ma ni/ /'jig rten mgon po 'od byed pa/ /sA la'i dbang rgyal zhes bya ste/ /de la nga yis yongs su dris/ /nga yang rgyal rigs nyid gyur te/ /rgyal po sa bdag gtso bo yin/ /nga yi bu yang lnga brgya ste/ /de dag las ni mi nyung byung / /sangs rgyas de yi gtsug lag khang / /tsan dan khyad par can rnams dang / /kha cig rin chen brtsegs pa yi/ /bye ba snyed ni ngas byas te/ /skye bo mang po dga' zhing yid 'ong ba/ /'jigs pa'i bla ma zhes bya rgyal por gyur/ /sangs rgyas la ni mchod pa dam pa dag /lo stong bye ba bcwa brgyad bar du byas/ /rnam par 'dren pa sA la'i dbang po rgyal/ /rkang gnyis gtso bo rgyal ba ma smad pa/ /de yi dus na de yi tshe tshad ni/ /lo bye stong phrag bdun bcu drug tu gyur/ /nyan thos mtshungs pa khrag khrig brgyad bcu ste/ /gsum rig mngon shes drug ldan dbang po thul/ /zag pa zad cing tha ma'i lus 'dzin pa/ /de tshe mi mchog gi ni dge 'dun byung / /lhar bcas 'jig rten dag la phan pa'i phyir/ /de tshe ting 'dzin 'di ni bdag 'dod pas/ /rgyal ba rkang gnyis gtso bo de dag la/ /mchod pa rnam pa mang po ngas byas te/ /rgyal ba sA la'i dbang rgyal drung du yang / /nga ni btsun mo sras bcas rab tu byung / /lo yang bye ba stong phrag bcu bzhir ni/ /ting nge 'dzin 'di ngas kyang yongs dris te/ /tshigs bcad khrag khrig stong phrag brgyad bcu dang / /gzhan yang 50.9b dkrigs phrag bye ba brgya rnams ni/ /ting 'dzin 'di nyid kyi ni le'u gcig po/ /ngas ni bde bar gshegs pa de las blangs/ /ting 'dzin dam pa 'di ni 'dod pa'i phyir/ /mgo dang rkang lag chung ma de bzhin bu/ /rin chen mang po de bzhin bza' bca' rnams/ /sngon chad ngas ni ma btang chung zad med/ /sangs rgyas dag ni bye ba phrag stong dang / /de las lhag par gang ga'i bye ma snyed/ /gang dag bya rgod phung po 'dir bzhugs nas/ /ting 'dzin zhi mchog 'di ston ngas dran te/ /de kun mtshan kyang shAkya khyu mchog yin/ /kun gyi sras kyang dgra gcan zin ces bya/ /zhabs 'bring ba yi ming yang kun dga' bo/ /ser skya'i grong nas thams cad rab tu byung / /phrugs mchog shA ri'i bu dang pang nas skyes/ /skyob pa kun kyang mtshan ni 'thun par gyur/ /de tshe 'jig rten khams kyang ming 'dra ste/ /thams cad kyang ni snyigs ma'i dus su byung / /byang chub spyad pa 'di ni spyod pa'i tshe/ /mi dbang de kun nga yis bkur sti byas/ /ting 'dzin 'di ni yongs su tshol ba'i tshe/ /rgyal la mchod pa ma byas ci yang med/ /nan tan gyis ni ting 'dzin 'di rnyed de/ /nan tan dag kyang rnam pa mang du gsungs/ /yon tan kun la rab tu gnas pa dag /de la ting 'dzin 'di ni rnyed mi dka'/ /bro ba dag la ma zhen mi bskam zhing / /khyims rnams la yang ma chags phrag dog med/ /byams la gnas shing khro ba med pa gang / /de la ting 'dzin 'di ni rnyed mi dka'/ /rnyed dang bkur sti dag kyang mi 'dod cing / /'tsho ba gtsang zhing ci yang mi 'chang ba/ /tshul khrims rnam par dag cing 'jigs med pa/ /de la ting 'dzin 'di ni rnyed mi dka'/ /g.yel ba med cing brtson 'grus brtsams pa dang / /dgon par gnas shing sbyangs la gnas gyur dang / /bdag med bzod pa la yang rab gnas pa/ /de la ting 'dzin 'di ni rnyed mi dka'/ /rgod pa med cing shin du dul ba'i sems/ /spyod dang 50.10a spyod lam dag la rab tu gnas/ /gtong la mos shing ser sna med pa dag /de la ting 'dzin 'di ni rnyed mi dka'/ /ting 'dzin zhi ba 'di ni gang 'dzin pa/ /de la dpe byad bzang dang mtshan rnams dang / /'dren pas sangs rgyas chos ni bcwa brgyad dang / /stobs dang mi 'jigs gang brjod rnyed mi dka'/ /sangs rgyas spyan gyis gzigs pa'i sems can gang / /de dag dus gcig sangs rgyas nyid gyur la/ /de rnams re re'i tshe yi tshad kyang ni/ /bskal pa bye ba stong phrag bsam mi khyab/ /de dag re re la yang mgo bo ni/ /rgya mtsho kun gyi bye ma de snyed yod/ /mgo bo ji snyed yod pa thams cad la/ /de snyed lce yang mgo bo kun la yod/ /de dag kun gyis ting 'dzin 'di las gang / /tshigs bcad 'dzin 'di'i phan yon brjod kyang ni/ /cung zad yongs su brjod par mi 'gyur na/ /gang gis bslabs shing gzung ba ci zhig smos/ /ting 'dzin blta dka' zhi ba gang 'dzin pa/ /sbyangs pa'i yon tan blangs shing spyod pa dag /de la lha dang lha min gnod sbyin smon/ /rgyal po dag kyang phyi bzhin 'brang bar byed/ /ting 'dzin zhi ba rnyed dka' gang 'dzin pa/ /rgyal ba dag gis yongs su gzung bar 'gyur/ /lha dang klu rnams rtag tu rjes su 'brang / /phas kyi rgol bas de yi gzi mi bzod/ /ting 'dzin zhi ba 'di ni gang 'dzin pa/ /de yi spobs pa dag ni mtha' yas 'gyur/ /mdo sde dag ni stong rnams rab ston kyang / /de la nam yang rgyun ni 'chad mi 'gyur/ /gang rnams mi zad chen po'i phyi dus na/ /ting nge 'dzin 'di thos nas 'dzin pa rnams/ /sangs rgyas 'dren pa snang ba dpag med dang / /bde ldan 'jig rten khams kyang mthong bar 'gyur/ /phan yon 'di dag rab tu bstan mdzad nas/ /yongs su mya ngan nga 'das phyi ma'i tshe/ /ting 'dzin rnam par dag pa 'di zung zhes/ /rang byung ston pa bdag nyid gsol ba 'debs/ /yongs su mya ngan gang 'das sangs rgyas dang / /gang rnams 50.10b ma byon da ltar byung ba yi/ /rgyal ba thams cad ting 'dzin 'di bslabs nas/ /byang chub rdul bral 'dus ma byas pa rtogs/ /sA la'i dbang po'i rgyal po'i le'u ste gnyis pa'o// // de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas rnams kyis sangs rgyas kyi yon tan brjod pa yang dag par bstan pa dang / don dang 'bru yongs su mi zad par bya ba dang bdag gi tshig thams cad sangs rgyas kyis yongs su gzung zhing 'byung bar 'dod na/ gzhon nu byang chub sems dpa' sems dpa' chen po des sems can thams cad kyi don du ting nge 'dzin 'di gzung bar bya/ kun chub par bya/ bcang bar bya/ bklag par bya/ rab tu gdon par bya/ lung mnod par bya/ kha ton du bya/ nyon mongs pa med pa'i bsgom pas bsgom par bya/ mang du bya/ gzhan la yang rgya cher rab tu bstan par bya'o/ /gzhon nu de bzhin gshegs pa'i sangs rgyas kyi yon tan yang dag pa gang yin zhe na/ gzhon nu 'di la byang chub sems dpa' sems dpa' chen po dgon pa na 'dug kyang rung / shing drung na 'dug kyang rung / bla gab med pa na 'dug kyang rung / khyim stong pa na 'dug kyang rung 'di la yang dag par slob ste/ 'di ltar bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba/ bla na med pa lha dang mi rnams kyi ston pa/ sangs rgyas bcom ldan 'das so/ /de bzhin gshegs pa de ni bsod nams dag gi rgyu 'thun pa/ dge ba'i rtsa ba rnams chud mi za ba bzod pas brgyan pa/ bsod nams kyi gter rnams kyi gzhi/ dpe byad bzang po rnams kyis spras pa/ mtshan gyi me tog rgyas 50.11a pa/ spyod yul ran par 'thun pa/ mthong na mi mthun pa med pa/ dad pas mos pa rnams mngon par dga' ba/ shes rab zil gyis mi non pa/ stobs rnams la rdzi ba med pa/ sems can thams cad kyi ston pa/ byang chub sems dpa' rnams kyi yab/ 'phags pa'i gang zag rnams kyi rgyal po las dang po pa rnams kyi ded dpon/ ye shes dpag tu med pa/ spobs pa bsam gyis mi khyab pa/ gsungs rnam par dag pa/ dbyangs snyan pa/ sku byad blta bas chog mi shes pa/ sku mtshungs pa med pa/ 'dod pa dag gis ma gos pa/ gzugs dag gis nye bar ma gos pa/ gzugs med pa dag dang ma 'dres pa/ phung po dag las rab tu rnam par grol ba/ khams rnams dang mi ldan pa/ skye mched rnams bsdams pa/ mdud pa rnams shin du bcad pa/ yongs su gdung ba dag las rnam par grol ba/ srid pa las yongs su grol ba/ chu bo las rgal ba/ ye shes yongs su rdzogs pa/ 'das pa dang ma byon pa dang da ltar gyi sangs rgyas bcom ldan 'das rnams kyi ye shes la gnas pa/ mya ngan las 'das pa la mi gnas pa/ yang dag pa nyid kyi mtha' la gnas pa/ sems can thams cad la gzigs pa'i sa la bzhugs pa ste/ gzhon nu 'di dag ni de bzhin gshegs pa'i sangs rgyas kyi yon tan yang dag pa ste/ byang chub sems dpa' sems dpa' chen pos sangs rgyas kyi yon tan dang / bsngags pa 'di dag dang ldan zhing ting nge 'dzin 'di la brten nas spobs pa rgyun mi 'chad pas de bzhin gshegs pa dgra bcom pa yang dag par rdzogs pa'i sangs rgyas rnams kyis sangs rgyas kyi yon tan dang bsngags pa yang dag par bstan na don dang 'bru yongs su zad par mi 'gyur te/ de'i tshig thams cad kyang sangs rgyas kyis yongs su bzung bar 'gyur ro/ /de nas de'i tshe bcom ldan 'das kyis don de nyid 50.11b gsal bar bya ba'i phyir zla 'od gzhon nur gyur pa la rgyas par tshigs su bcad pa'i dbyangs kyis rgya cher yang dag par rab tu bshad do/ /bskal pa stong phrag mang por rab bshad kyang / /rgyal ba'i bsngags pa thams cad brjod mi sla/ /ting 'dzin zhi mchog 'di ni tshol ba'i phyir/ /rgyal bas de lta'i yon tan yang dag bsgrubs/ /ngas ni ting 'dzin zhi mchog 'di tshol bas/ /sngon tshe zhum pa med pa'i yid kyis su/ /bu mo gzugs bzang shin tu blta na sdugs/ /legs par lus brgyan yid du 'ong ba byin/ /ngas ni ting 'dzin zhi mchog 'di tshol bas/ /sngon tshe zhum pa med pa'i yid kyis su/ /de bzhin bran pho bran mo nor dang 'bru/ /de bzhin nor bu mu tig gser dngul byin/ /ngas ni ting 'dzin zhi mchog 'di tshol bas/ /nor bu rin chen sna tshogs mu tig phreng / /gos dang gdu bu gser skud mdzes pa dag /sngon tshe 'dren pa rnams la ngas btang byas/ /bskal pa bye ba mtha' yas dpag med par/ /dri mchog dri ldan dbyar gyi me tog dag /rab tu bla na med pa'i sems bskyed nas/ /rgyal ba'i mchod rten dag la nga yis phul/ /'khor gyi nang du ri mo bskyed nas kyang / /de bzhin chos kyi sbyin pa ngas byin te/ /chos kyi sbyin pa byin pas nga grags snyam/ /nga la nam yang de 'dra'i sems ma skyes/ /sdug pa'i mchog byin bdag nyid spyad par ni/ /de snyam chags pa nga la yong ma byung / /sbyin pa'i chos ni mang du ngas byin te/ /rtag tu sangs rgyas ye shes ngas thob snyam/ /sbyangs pa'i yon tan dag kyang ngas sngon bsgrubs/ /nags mchog sgra nyung rtag tu gnas byas te/ /thams cad dus su snying rje mang bar gyur/ /rtag tu sangs rgyas ye shes ngas thob snyam/ /byams shing 'jam la bged pa'i ngang tshul can/ /thos pa 'dzin cing bzhin 'dzum tshig kyang 'jam/ /shin du tshig snyan mang po kun kyang dga'/ / 50.12a nga la skye bo kun lta ngoms mi 'gyur/ /ser sna can du skad cig ma gyur te/ /srid pa mang por nam yang ser sna med/ /rtag tu bsod snyoms dag la nga dga' ste/ /'gron du bos pa thams cad ma lus spangs/ /'di las rtsa bzhi tshigs bcad gcig bzung na/ /mang du thos shing thos pa 'dzin par 'gyur/ /des ni nga la bla na med pa yi/ /dad pa'i mchog bskyed rtag tu bkur sti byas/ /ngas ni ting 'dzin zhi mchog 'di tshol phyir/ /rnam par 'dren la mchod pa mang po byas/ /sbyin pa rnam pa mang po mtha' yas byin/ /de bzhin tshul khrims dag kyang yun ring bsrungs/ /'jig rten khams yangs sna tshogs mtha' yas pa/ /nor bu rin chen bkang ste sbyin byin pas/ /ting 'dzin 'di las tshigs bcad gcig bzung na/ /de bas bsod nams 'di ni rgya cher 'phags/ /bskal pa mtha' yas dpag med mang por yang / /me tog mang po ji snyed yod pa dang / /de bzhin spos rnams yid 'ong rgya che ba/ /bsod nams 'dod phyir rgyal ba mchod pa dang / /bskal pa mtha' yas dpag med mang por ni/ /sil snyan mang po ji snyed yod pa dang / /de bzhin mnabs stsal zhal zas na bza' yis/ /bsod nams 'dod phyir rgyal ba mchod pa bas/ /rang byung rgyal ba chos rjer bdag gyur ces/ /mi gang byang chub tu ni sems bskyed nas/ /mnyam par bzhag pas tshigs bcad gcig bzung na/ /de bas bsod nams 'di ni rgya cher 'phags/ /gang gA'i bye ma mang po ji snyed pa/ /bskal pa de snyed du'ang phan yon rnams/ /brjod kyang yongs su zad par mi nus te/ /ting 'dzin 'di bzung bsod nams shin du che/ /de phyir sangs rgyas phan yon dag /shin du bzang po 'di thos nas/ /sangs rgyas bsngags pa'i ting 'dzin 'di/ /myur du lung yang mnod par gyis/ /sangs rgyas bye ba bdun bcu gsum/ /sngon gyi skye bar bkur sti byas/ /sangs rgyas de dag thams cad 50.12b kyis/ /mdo sde 'di ni rab tu bshad/ /mdo sde 'di yi ming yang ni/ /snying rje chen por 'jug ces bya/ /'di la mang du thos bslabs na/ /sangs rgyas chos ni rnyed mi dka'/ /'jig rten 'dren pa mya ngan 'das/ /phyi ma'i dus na dge slong ni/ /sdom pa med pa mang po dag / /mang du thos pa mi 'dod 'byung / /tshul khrims bsngags pa rjod byed la/ /tshul khrims don du gnyer ba med/ /ting 'dzin bsngags pa rjod byed la/ /ting 'dzin don du gnyer ba med/ /shes rab bsngags pa rjod byed la/ /shes rab don du gnyer ba med/ /rnam grol bsngags pa rjod byed la/ /rnam grol don du gnyer ba med/ /ji ltar skyes bu la la dag / /tsan dan dag ni 'di 'dra ste/ /spos kyi rnam pa yid 'ong zhes/ /tsan dan dag gi yon tan brjod/ /de nas mi gzhan la la yis/ /de ltar bsngags pa brjod pa yi/ /tsan dan chung zad srel tam zhes/ /skyes bu la las de dris na/ /skyes bu de la slar smras pa/ /gang gis 'tsho bar byed pa yi/ /spos kyi bsngags pa nga brjod pa/ /spos de nga la med ces smra/ /de bzhin rnal 'byor mi brtson pa/ /tshul khrims bsngags pas 'tsho ba dag /phyi ma'i dus la 'byung 'gyur te/ /de dag la ni tshul khrims med/ /de bzhin rnal 'byor mi brtson pa/ /ting 'dzin bsngags pas 'tsho ba dag /phyi ma'i dus la 'byung 'gyur te/ /de dag la ni ting 'dzin med/ /de bzhin rnal 'byor mi brtson pa/ /shes rab bsngags pas 'tsho ba dag /phyi ma'i dus la 'byung 'gyur te/ /de dag la ni shes rab med/ /de bzhin rnal 'byor mi brtson pa/ /rnam grol bsngags pas 'tsho ba dag /phyi ma'i dus la 'byung 'gyur te/ /de dag la ni rnam grol med/ /ji ltar skyes bu dbul po la la zhig /skye bo mang pos yongs su brnyas gyur la/ /de yis phyis gdod nor gyi gter rnyed nas/ /nor yod rig pas skye bo ri mor 50.13a byed/ /de bzhin ting 'dzin 'di ni ma thob na/ /byang chub sems dpa' de yang lha mi dang / /grul bum srin po mang pos mi bkur te/ /ji ltar skyes bu dbul po nor med bzhin/ /mkhas pas gzhal du med pa'i chos kyi gter/ /sa 'di nam zhig rab tu thob gyur na/ /lha dang mi dag de la re ba skyed/ /des kyang skye dgu bla med nor rnams byin/ /de phyir rgyal ba dag gis brjod pa yi/ /phan yon dam pa bzang po 'di thos nas/ /shes kyi khe dang bde rnyed kun spangs te/ /ting 'dzin zhi mchog 'di ni lung nod gyis/ /sangs rgyas su dag phyogs su mya ngan 'das/ /gang dag da ltar byung dang ma 'ongs pa/ /de dag thams cad ting 'dzin 'di bslabs nas/ /byang chub bsam yas mtshungs med rnam sangs rgyas/ /zla 'od gzhon nur gyur pa sems dga' nas/ /sangs rgyas spyan sngar 'dug ste tshig smras pa/ /skyes bu dam pa mya ngan yongs 'das nas/ /ma rung dus na bdag gis mdo 'di gzung / /bdag gis lus dang srog kyang yongs btang ste/ /'jig rten skyed pa ci mchis kun btang la/ /bdag gis 'jigs pa chen po'i dus der yang / /ting 'dzin zhi mchog 'di ni bzung bar bgyi/ /sems can mang la snying rje cher skyed de/ /sems can sdug bsngal mgon med mthong nas kyang / /de dag la ni byams pa nyer sbyar zhing / /ting 'dzin zhi mchog 'di ni bzung bar bgyi/ /de yi tshe na ting 'dzin 'dzin pa dag /lnga brgya las ni mi nyung der byung ste/ /mdo sde mchog 'di rgya cher gzung ba la/ /de dag sngon du 'dren pa gzhon nu yin/ /sangs rgyas kyi yon tan yang dag par bsngags pa'i le'u ste gsum pa'o// // 'phags pa ting nge 'dzin gyi rgyal po/ bam po gnyis pa/ de nas zla 'od gzhon nur gyur pa stan las langs te/ bla gos phrag pa gcig tu gzar nas pus mo g.yas 50.13b pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /gal te zhus nas zhu ba lung bstan pa'i slad du bcom ldan 'das kyis bdag la skabs phye na bdag bcom ldan 'das de bzhin gshegs pa dgra bcom pa yang dag par rdzogs pa'i sangs rgyas la phyogs 'ga' zhig zhu'o/ /de skad ces gsol pa dang bcom ldan 'das kyis zla 'od gzhon nur gyur pa la 'di skad ces bka' stsal to/ /gzhon nu khyod la de bzhin gshegs pas rtag tu skabs phyes/ de bzhin gshegs pa dgra bcom pa yang dag par rdzogs pa'i sangs rgyas la khyod ci dang ci 'dod pa dris shig /de skad ces bka' stsal te bcom ldan 'das kyis skabs phye ba dang / bcom ldan 'das la zla 'od gzhon nur gyur pas 'di skad ces gsol to/ /bcom ldan 'das ting nge 'dzin ces bgyi ba de chos gang gi tshig bla dgas lags/ de skad ces gsol pa dang / bcom ldan 'das kyis zla 'od gzhon nur gyur pa la 'di skad ces bka' stsal to/ /gzhon nu ting nge 'dzin ting nge 'dzin ces bya ba ni 'di lta ste/ sems nges par rtogs pa dang / skye ba med pa dang mtshams sbyor ba med pa dang mtshams sbyor ba shes pa dang khur bor ba dang de bzhin gshegs pa'i ye shes dang sangs rgyas kyi khyu mchog tu gyur pa dang / 'dod chags gso ba dang zhe sdang nye bar zhi ba dang gti mug bsal ba dang rigs par rnal 'byor du byed pa dang / mi rigs pa rnam par spong ba dang dge ba'i chos la 'dun pa dang 'khor ba las thar par 'dod pa dang lhag pa'i bsam pas sgrub pa dang / mi nyal ba la sten pa dang spong ba mi gtong ba dang chos dkar po rnams yongs su srung ba dang skye bo rnams la yid mi rton pa dang las rnams la mngon par 'du mi byed pa 50.14a dang nang gi skye mched rnams yid la mi byed pa dang / phyi'i skye mched rnams la kun du mi spyod pa dang bdag la mi stod pa dang gzhan la mi smod pa dang khyim la chags pa med pa dang so so'i skye bo la yid mi rton pa dang / tshul khrims kyi rgyu 'thun pa dang bsnyen par dka' ba dang gzi chen po dang bdag shes pa dang mi rgod pa dang spyod lam phun sum tshogs par gnas pa dang gnod sems med pa dang mi rtsub pa dang gzhan la mi gnod pa dang / bshes gnyen rnams la rjes su srung ba dang gsang ba'i sngags kun srung ba dang tshul khrims dang ldan pa la rnam par mi 'tshe zhing gnod pa med pa dang 'jam por smra ba dang khams gsum thams cad la mi gnas pa dang chos thams cad la stong pa nyid kyi rjes su 'thun pa'i bzod pa dang thams cad mkhyen pa'i ye shes la shin du 'dun pa ni gzhon nu ting nge 'dzin ces bya ste/ gzhon nu gang de lta bu'i chos de dag la sgrub par byed kyi log par sgrub par mi byed pa 'di ni ting nge 'dzin ces bya'o/ /de nas bcom ldan 'das kyis de'i tshe chos thams cad kyi rang bzhin mnyam pa nyid rnam par spros pa'i ting nge 'dzin 'di nyid ston cing de'i tshe zla 'od gzhon nur gyur pa la rgyas par tshigs su bcad pa'i dbyangs kyis rgya cher yang dag par rab tu bstan to/ /ngas ni bdud rtsi'i sgo yang rab tu phye/ /chos kyi rang bzhin ci 'dra de bzhin bshad/ /skye ba dag kyang ci 'dra ngas bstan te/ /mya ngan 'das pa phan yon bcas pa bshad/ /sdig pa'i grogs po rtag tu rnam par spang / /dge ba'i bshes gnyen la yang bsnyen par bya/ /'du ba spangs te nags khrod gnas bca' zhing / /byams pa'i sems ni rtag tu bsgom par bya/ /tshul khrims dag pa rtag tu bsrung byas te/ /sbyangs la dga' ba'ang rtag tu thob par bya/ /gtong ba dang ni shes rab bsnyen byas na/ /ting 'dzin 'di ni rnyed par dka' mi 50.14b 'gyur/ /nyan thos mang po yi ni sa min pa/ /zhi ba'i sa 'di dag kyang thos nas ni/ /bde bar gshegs pa'i chos la mngon sum gyur/ /sangs rgyas yon tan bsam yas thob par 'gyur/ /skyes bu blo ldan snod 'gyur mthong nas kyang / /de dag byang chub sems la yang dag chud/ /bla med ye shes la ni rab bkod na/ /ting 'dzin rgyal po 'di ni rnyed mi dka'/ /yongs su tshol dang kun du longs spyod dang / /kha zas rgyu 'thun dag ni gang gi phyir/ /phrag dog skyes pa de la rab tu rtogs/ /ting 'dzin 'di ni rnyed par yong mi dka'/ /ting 'dzin rgyal po stong pa 'di sgom pa/ /tshul khrims dag pa'i mgo la de 'dug ste/ /chos rnams rang bzhin rtag tu mnyam bzhag na/ /byis pa mi rigs brtson pas mi shes so/ /su dag ting 'dzin zhi ba 'di 'dod pa/ /de la nam yang 'jigs pa'i blo mi 'byung / /rab tu zhi ba'i sa 'di bsten nas ni/ /mi mchog rnams kyang rtag tu mthong bar 'gyur/ /de bzhin gshegs pa'i sku byad gang dran pa/ /de ni yid zhi dbang po zhi bar 'gyur/ /sems la 'khrul med rtag tu mnyam par bzhag /thos dang shes pa dag ni rgya mtsho bzhin/ /ting 'dzin 'di la rab tu gnas nas ni/ /byang chub sems dpa' 'chag sar su 'chag pa/ /des ni sangs rgyas bye ba phrag stong dang / /de bas lhag par gang gA'i bye snyed mthong / /su dag sangs rgyas chos la tshad 'dzin pa/ /mi de'i sems ni shin du myos par 'gyur/ /tshad las 'das pa la ni tshad gzung med/ /'dren pa yon tan thams cad bsam mi khyab/ /phyogs bcu dag na sems can su yang ni/ /'jig rten mgon dang mnyam med su zhig lhag /thams cad mkhyen pa'i yon tan kun ldan pa/ /sangs rgyas ye shes 'dod cing thob par gyis/ /sku lus dag ni gser gyi mdog 'dra bas/ /'jig rten mgon po kun nas rab tu mdzes/ /dmigs pa 'di la gang gi sems 'jug pa/ /byang chub sems dpa' de ni mnyam bzhag yin/ / 50.15a mkhas pas 'dus byas 'dus ma byas rig ste/ /mtshan ma'i 'du shes dag ni rnam bshig nas/ /mtshan ma med pa la ni de gnas na/ /chos rnams thams cad stong par rab tu shes/ /gang dag chos kyi sku la gnas gyur pa/ /de ni dngos po thams cad dngos med shes/ /de yis dngos po'i 'du shes rnam bshig nas/ /rgyal ba'i dbang po gzugs kyi skur mi lta/ /khyod la bsgo zhing khong du chud par bya/ /ji ltar mi dag mang du rtog byed pa/ /de la gnas pa'i rtogs pa de dag gis/ /de bzhin du ni de la sems gzhol 'gyur/ /de bzhin rgyal ba yi ni sku byad dang / /ye shes dpag tu med par thub dbang dran/ /rtag par rjes su dran pa bsgom byas na/ /de la sems gzhol rab tu 'bab par 'gyur/ /de ni 'chags 'dug 'greng zhing gnas pa'i tshe/ /skyes bu dam pa'i ye shes rab tu 'dod/ /'jig rten rgyal ba bla med bdag 'gyur bar/ /'dod pas byang chub tu yang smon lam 'debs/ /des ni sangs rgyas shes shing sangs rgyas mthong / /sangs rgyas chos nyid la yang so sor rtog /ting 'dzin 'di la rab tu gnas byas nas/ /mthu chen sangs rgyas la ni phyag kyang 'tshal/ /lus dang ngag dang yid rab dang ba yis/ /rtag tu sangs rgyas dag gi bsngags pa brjod/ /de ltar des ni sems kyi rgyud bsgoms pas/ /nyin mtshan du yang 'jig rten mgon po mthong / /nam zhig de ni na zhing mi bde nas/ /shi la thug pa'i sdug bsngal tshor byung na/ /sangs rgyas la ni dran pa mi nyams te/ /sdug bsngal tshor bas 'phrogs par yong mi 'gyur/ /de ltar de dag ye shes rnam brtags pas/ /'ongs dang ma 'ongs chos rnams stong par shes/ /de 'dra'i chos kyi tshul la de gnas pa/ /spyod pa yongs su spyod pas sems mi skyo/ /de phyir phan yon 'di dag thos nas ni/ /mtshungs med byang chub la yang mos pa skyed/ /bde gshegs dam pa mthong ba rnyed dka' yis/ /phyi ma'i dus na 'gyod pa skyes sa re/ /ngas ni rab tu bzang ba'i chos bshad 50.15b kyang / /khyed kyis thos nas yang dag ma spyad na/ /nad pa sman gyi rgyal ba thogs pa dag /bdag gi nad ni gso bar mi nus bzhin/ /de phyir mkhas pa shin du rtogs pa dag /rtag tu ting 'dzin 'di ni 'dod pa yis/ /tshul khrims thos pa gtong ba bsnyen byas na/ /ting 'dzin 'di ni rnyed par yong mi dka'/ /ting nge 'dzin gyi le'u ste bzhi pa'o// // de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na/ byang chub sems dpa' sems dpa' chen pos ting nge 'dzin 'di 'dod cing myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas mgo dang gos la me 'bar ba lta bu'i sems kyis pha dang ma dang bu dang bu mo dang nye du dang snag gi gnyen mtshams dang gnyen dang rtsa lag dang chung ma la sogs pa me bzhin du spangs la rgyal srid kyi bde ba thams cad mchil ma'i thal ba bzhin du bor te/ dgon pa la mngon du phyogs shing khyim gyi gnas nas mngon par 'byung bar bya'o/ /de ci'i phyir zhe na/ gzhon nu dgon pa la mngon du phyogs shing khyim gyi gnas nas mngon par 'byung ba'i byang chub sems dpa' sems dpa' chen pos bla na med pa yang dag par rdzogs pa'i byang chub kyang rnyed par dka' ba ma yin na ting nge 'dzin 'di lta ci smos te/ gzhon nu de lta bas na bu dang mdza' bo dang / nye du dang snag gi gnyen mtshams dang gnyen dang rtsa lag dang chung ma la sogs pa me bzhin du spangs la rgyal srid kyi bde ba thams cad mchil ma'i thal ba bzhin du bor te/ dgon pa la mngon du phyogs shing / khyim gyi gnas nas mngon par 'byung bar bya'o zhes gzhon nu khyod kyis de ltar rtag tu bslab par bya'o/ /gzhon nu de lta bas na rnam grangs 'dis kyang khyod kyis 'di ltar rig par bya ste/ gzhon nu sngon byung ba 'das pa'i dus na bskal pa grangs med pa bas kyang ches grangs med pa/ rgya che ba/ 50.16a dpag tu med pa/ bsam gyis mi khyab pa gzhal du med par gyur pa de'i tshe de'i dus na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dbyangs byin zhes bya ba rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa lha dang mi rnams kyi ston pa sangs rgyas bcom ldan 'das 'jig rten du byung ngo / /gzhon nu de'i tshe de'i dus na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dbyangs byin de'i nyan thos 'dus pa dang po ni thams cad kyang dgra bcom pa sha stag bye ba phrag brgyad cu byung ngo / /nyan thos 'dus pa gnyis pa ni dgra bcom pa bye ba phrag bdun bcu byung ngo / /'dus pa gsum pa ni dgra bcom pa bye ba phrag drug cu byung ngo / /byang chub sems dpa' sems dpa' chen po dam pa'i chos yongs su 'dzin pa yang dpag tu med pa dag byung ngo / /gzhon nu de'i tshe bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dbyangs byin de'i tshe'i tshad ni lo bzhi khrir gyur to/ /'dzam bu'i gling 'di yang 'byor pa rgyas pa bde ba/ lo legs pa/ nyams dga' ba/ skye bo dang mi mang pos gang bar gyur to/ /'dzam bu'i gling 'di na rgyal po stobs brtan dang / stobs chen zhes bya ba gnyis yod de/ de la gcig ni 'dzam bu'i gling 'byor pa/ rgyas pa bde ba lo legs pa/ nyams dga' ba/ skye bo dang mi mang pos gang ba'i phyed la dbang ngo / /gcig shos kyang de'i phyed la dbang ngo / /gzhon nu de'i tshe de'i dus na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dbyangs byin de rgyal po stobs chen gyi rnam par rgyal ba'i sar byung ste/ gzhon nu de ltar rgyal po stobs chen gyis bcom ldan 'das de bzhin gshegs pa 50.16b dgra bcom pa yang dag par rdzogs pa'i sangs rgyas dbyangs byin de byang chub sems dpa'i dge 'dun dang dge slong gi dge 'dun dang bcas pa la na bza' dang bsod snyoms dang / snyun gsos kyi sman dang yo byad brtags pa kun du spyad par rung ba/ kha na ma tho ba med pa la lo brgya stong tshang bar spyan drangs so/ /gzhon nu de'i tshe de'i dus na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dbyangs byin de byang chub sems dpa'i dge 'dun dang bcas/ nyan thos kyi dge 'dun dang bcas pa rnyed pa dang bkur sti dang grags pa che bar gyur to/ /bram ze dang khyim bdag dad pa dag gis kyang bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dbyangs byin byang chub sems dpa'i dge 'dun dang bcas/ nyan thos kyi dge 'dun dang bcas pa la rnyed pa dang bkur sti cher byas so/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dbyangs byin la bram ze dang khyim bdag de dag gis kyang 'di lta ste/ rgyal po stobs chen gyi rjes su slob cing 'jig rten gyi zang zing gi mchod pas rnyed pa dang bkur sti bya ba'i phyir brtson par gyur to/ /gzhon nu de lta bas na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dbyangs byin 'di snyam du gyur te/ kye ma'o sems can 'di dag ni tshul khrims dang gso sbyong yang dag par blang ba dang de bzhin gshegs pa rnams kyi drung du nye bar 'gro ba dang / de bzhin gshegs pa la bsnyen bkur bya ba dang / tshangs par spyod pa la gnas pa dang rab tu byung zhing bsnyen par rdzogs pa dge slong gi dngos por 'gyur ba las yongs su nyams par gyur te/ sems can 'di dag ni de'i 'og tu bde ba la lhur byed par 'gyur ro/ /de ci'i phyir zhe na/ de ni 'di ltar de'i 'og tu bde ba ni 'di lta ste/ 50.17a 'jig rten gyi zang zing gi mchod pa ni 'di yin te/ sems can 'di dag ni 'di lta ste/ mtho ris kyi 'jig rten la dmigs shing tshe 'di lhur byed pa/ tshe phyi ma lhur mi byed pa ste/ dge ba'i rtsa ba shin du mthar gtugs pa'i phyir na ma yin no/ /gzhon nu de la dge ba'i rtsa ba shin du mthar gtugs pa gang zhe na/ 'di lta ste/ shin du rnam par dag pa dang tshangs par spyod pa la shin du gnas pa dang shin du mthar phyin pa dang shin du mthar gtugs pa'o/ /ngas sems can de dag la ci nas kyang bla na med pa'i chos kyi mchod pa dang chos kyi nan tan gyis de bzhin gshegs pa la mchod par 'gyur ba de lta de ltar chos bshad par bya'o snyam mo/ /gzhon nu de nas de bzhin gshegs pa dgra bcom pa yang dag par rdzogs pa'i sangs rgyas dbyangs byin gyis de'i tshe rgyal po stobs chen dang bram ze dang khyim bdag de dag skyo bar bya bar dgongs pas tshigs su bcad pa 'di dag gsungs so/ /sbyin pa rab byin gcig la gcig bsten pa/ /de dag phan tshun ri mor byed mi 'gyur/ /mkhas pa bag chags rab tu spangs pa yi/ /sangs rgyas dag gis bsten pa de mi bsngags/ /gang dag srogs chags phan phyir chos ston pa/ /de 'dra'i mi des shin du bsten pa yin/ /de dag gcig la gcig kyang mi phyed mdza'/ /bye ba snyed kyi bdud kyis dbye mi nus/ /'jig rten zang zing dag gis sten pa'i mi/ /de dag tshe 'di'i don du kun 'gyur gyi/ /zang zing med pa'i chos la bsten pa ni/ /mi dag gi yang rab tu don cher 'gyur/ /zang zing med pa'i sems ni nyer bzhag ste/ /zang zing med pa'i chos rnams rab bshad la/ /gang dag zang zing med pa'i dga' ldan pa/ /de 'dra de dag myur du sangs rgyas 'gyur/ /'dod pa dag la rab tu sten byed cing / /bu dang chung ma la yang srid bskyed nas/ /khyim gnas smad pa nyid la sten byed na/ /bla med byang chub mchog des yong mi 'thob/ / 50.17b su dag me mur bzhin du 'dod spong zhing / /bu dang chung ma la yang srid spangs nas/ /skrag cing dngangs pas khyim nas mngon byung ba/ /de dag byang chub mchog 'di rnyed mi dka'/ /gang dag khyim gyi dbus na 'dug bzhin du/ /byang chub dam pa mchog 'di thob pa ni/ /de 'dra'i sangs rgyas gang yang sngon ma byung / /ma byon pa dang da ltar bzhugs pa'ang med/ /rgyal srid mchil ma bzhin du rab spongs la/ /dben pa 'dod pas dgon par gnas par gyis/ /nyon mongs rab spangs bdud kyang rnam bcom na/ /byang chub rdul med 'dus ma byas pa rtogs/ /sangs rgyas dpa' bo gang gA'i bye ma snyed/ /bskal pa bye mang rim gro sus byas pas/ /gang zhig yongs su skyo ba'i yid kyis ni/ /khyim nas mngon par byung na 'di mchog 'gyur/ /ji ltar rab tu byung nas chos spyod pa/ /de ltar zas dang skom dang chos gos dang / /me tog dang ni spos dang byug pa yis/ /mi mchog rgyal ba rim gro byas ma yin/ /su dag byang chub tu yang 'dod mos shing / /sems can don phyir 'dus byas yongs skyo nas/ /dgon par bltas te gom pa bdun bor na/ /de bas bsod nams 'di ni khyad par 'phags/ /de nas gzhon nu bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dbyangs byin gyis khyim nas mngon par 'byung ba dang ldan pa'i gtam brjod pa de lta bu rgyal po stobs chen gyis thos so/ /thos nas kyang ji ltar bdag gis bcom ldan 'das kyis bshad pa'i don shes pa ltar na bcom ldan 'das ni sbyin pa'i pha rol tu phyin pa'i bsngags pa mi brjod kyi bcom ldan 'das ni tshul khrims kyi pha rol tu phyin pa shin du mthar gtugs pa'i bsngags pa brjod de/ bcom ldan 'das kyis shin du rnam par dag pa dang tshangs par spyod pa la shin du gnas pa dang shin du yongs su mya ngan las 'das pa bsngags so zhes bsams nas de 'di snyam du khyim 50.18a na gnas pas bla na med pa'i chos kyi nan tan sgrub pa'am/ don rjes su thob par 'gyur ba 'di ni sla ba ma yin te/ bla na med pa'i chos kyi nan tan las bdag yongs su nyams par 'gyur gyis/ bdag ni skra dang kha spu bregs te gos ngur smrig bgos nas khyim nas khyim med par rab tu 'byung ngo snyam mo/ /gzhon nu de nas rgyal po stobs chen bram ze dang khyim bdag brgyad khris bskor cing mdun du bdar te/ de dag dang lhan cig tu bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dbyangs byin ga la ba der song ste phyin pa dang / bcom ldan 'das kyi zhabs la mgo bos phyag 'tshal nas/ bcom ldan 'das la lan gsum bskor ba byas te phyogs gcig tu 'dug go/ /de nas gzhon nu bcom ldan 'das de bzhin gshegs pa dgra bcom pa yang dag par rdzogs pa'i sangs rgyas des rgyal po stobs chen gyi lhag pa'i bsam pa mkhyen nas chos thams cad kyi rang bzhin mnyam pa nyid rnam par spros pa'i ting nge 'dzin 'di bshad do/ /de nas gzhon nu rgyal po stobs chen ting nge 'dzin 'di thos nas dga' ba dang mgu ba dang rangs pa dang rab tu mos pa dang yid bde ba skyes nas skra dang kha spu bregs te gos ngur smrig bgos nas yang dag par dad pas khyim nas khyim med par rab tu byung bar gyur to/ /de de ltar rab tu byung nas ting nge 'dzin 'di bzung ste bzung zhing kun chub par byas/ bcangs shing blags nas bsgom pa'i rnal 'byor la rjes su brtson par gnas par gyur to/ /de dge ba'i rtsa ba de nyid kyis bskal pa bye ba phrag bcu'i bar du nam yang ngan 'gro log par ltung bar ma song ste/ sangs rgyas bye ba phrag nyi shu la bsnyen bkur byas shing de bzhin gshegs pa de dag thams cad las kyang ting nge 'dzin 'di thos so/ /sangs rgyas de dag las 50.18b thos nas des bzung ste/ kun chub par byas/ bcangs shing blags nas bsgom pa'i rnal 'byor la rjes su brtson par gnas so/ /de de'i 'og tu dge ba'i rtsa ba de nyid kyis bskal pa bye ba phrag bcu 'das pa dang / bskal pa 'bum tshangs nas bla na med pa yang dag par rdzogs pa'i byang chub mngon par rdzogs par sangs rgyas par gyur te/ de bzhin gshegs pa dgra bcom pa yang dag par rdzogs pa'i sangs rgyas ye shes dpa' ba zhes bya bar gyur nas des sems can dpag tu med pa rnams kyi don byas te/ phyis sangs rgyas kyi mya ngan las 'da' bas yongs su mya ngan las 'das par gyur to/ /gzhon nu de nas srog chags brgya stong phrag brgyad bcu rgyal po stobs chen dang lhan cig tu de bzhin gshegs pa dbyangs byin gyi drung du 'ongs pa de dag thams cad kyis kyang ting nge 'dzin 'di thos nas dga' mgu yi rangs shing rab tu dga' ste/ dga' ba dang yid bde ba skyes nas skra dang kha spu bregs te gos ngur smrig bgos nas yang dag par dad pas khyim nas khyim med par rab tu byung bar gyur to/ /de ltar de dag kyang rab tu byung nas ting nge 'dzin 'di bzung ste/ kun chub par byas/ bcangs shing blags nas bsgom pa'i rnal 'byor la rjes su brtson par gnas so/ /dge ba'i rtsa ba de nyid kyis de dag bskal pa bye ba phrag nyi shu'i bar du nam yang ngan 'gro log par ltung bar ma song ste/ bskal pa thams cad la yang sangs rgyas bye ba rnams mnyes par byas nas/ de bzhin gshegs pa de dag thams cad las ting nge 'dzin 'di thos nas ting nge 'dzin 'di bzung ste/ kun chub par byas/ bcangs shing blags nas sgom pa'i rnal 'byor la rjes su brtson par gnas te/ sngon gyi dge ba'i rtsa ba de nyid kyis bskal pa bye ba phrag nyi shu 'das pa dang / de'i 'og tu bskal pa 'bum tshang nas bla na med pa yang dag par rdzogs pa'i byang chub mngon par rdzogs par sangs rgyas te/ de bzhin gshegs 50.19a pa dgra bcom pa yang dag par rdzogs pa'i sangs rgyas mtshan dpa' brtan zhes bya ba sha stag 'jig rten du byung ste/ de dag gis kyang sems can dpag tu med pa yongs su smin par byas shing / de dag gi don byas nas de'i 'og tu sangs rgyas kyi mya ngan las 'da' bas yongs su mya ngan las 'das par gyur to/ /gzhon nu de lta bas na rnam grangs 'di nyid kyis 'di ltar ting nge 'dzin 'di ni byang chub sems dpa' sems dpa' chen po rnams kyis gces spras byed pa yin te/ thams cad mkhyen pa'i ye shes bla na med pa sdud pa yin par rig par bya'o/ /de nas de'i tshe bcom ldan 'das kyis zla 'od gzhon nur gyur pa la sngon byung ba'i le'u 'di nyid rgyas par tshigs su bcad pa'i dbyangs kyis rgya cher yang dag par rab tu bstan to/ /ngas dran bsam gyis mi khyab bskal pa na/ /'das pa'i dus na mi yi gtso bo ni/ /drang srong chen po 'jig rten don mdzad byung / /de yi mtshan ni dbyangs kyi byin zhes bya/ /bye brag brgyad bcur yongs su tshang ba yi/ /de yi nyan thos 'khor mang dang po byung / /gnyis pa bye ba bdun bcur tshang ba byung / /gsum pa dgra bcom bye ba drug bcu yod/ /kun kyang zag pa zad cing nyon mongs med/ /thams cad rdzu 'phrul stobs kyis pha rol phyin/ /tshe tshad lo ni stong phrag bzhi bcu ste/ /zhing yang yongs su dag cing mdzes par gyur/ /skyob pa de yi byang chub sems dpa' gang byung ba/ /dpag med de dag gzhan phan dbang bskur thob/ /dbang dang sa la rab tu gnas pa ste/ /shing mchog drung du byang chub 'tshang rgyar nye/ /'dzam bu'i gling 'dir rgyal po byung ba ni/ /stobs brtan dang ni stobs chen zhes bya ba/ /gcig ni de yi phyed dbang rgyal po byed/ /gcig shos phyed la dbang ba'i rgyal por gyur/ /rgyal po stobs chen rnam par rgyal ba'i sar/ /lha dang mis mchod sangs rgyas 50.19b byung bar gyur/ /bde bar gshegs la rgyal po dad rnyed nas/ /lo grangs stong du tshang bar bsnyen bkur byas/ /sems can gzhan mang de yi rjes slob pas/ /de bzhin gshegs pa la yang bkur sti byed/ /'jig rten zang zing gis te chos kyis min/ /nyan thos bcas pa rnyed pa mang bar gyur/ /skyes bu dam pa'i sems ni 'di snyam ste/ /ci nas 'di kun 'dod pa rab spangs nas/ /nga yi bstan pa 'di la rab 'byung bar/ /chos 'dod 'di dag la ni chos bstan snyam/ /bde bar gshegs pa'i sbyangs chos bslab pa dang / /khyim gnas nyes pa sdug bsngal mtha' yas dang / /chos la sgrub pa chos kyi mchod yin zhes/ /mi mchog des ni tshigs su bcad pa gsungs/ /sa bdag rgyal pos tshigs bcad de thos nas/ /mi dbang gcig pu dben song bsams pa ni/ /khyim na gnas bzhin du yang thams cad kyis/ /chos kyi mchod mchog bya bar mi nus snyam/ /mchil ma bzhin du rgyal srid des btang ste/ /srog chags stong phrag brgyad bcur bcas pa dag /rgyal ba de yi drung du nyer 'ongs te/ /zhabs la phyag 'tshal nas ni spyan sngar 'dug /rgyal bas de dag gi yang bsam mkhyen nas/ /ting 'dzin zhi ba blta dka' 'di bshad de/ /de dag dga' zhing rab mos bde bas tshim/ /mgu zhing rangs pas de tshe rab tu byung / /de dag rab byung ting 'dzin 'di bzung ste/ /bcangs shing blags te yongs su chub byas nas/ /bskal pa bye ba nyi shu tshang bar ni/ /nam yang ngan 'gro log ltung song ma gyur/ /de dag thams cad dge ba'i rtsa ba des/ /sangs rgyas bye ba phrag stong legs par mthong / /rgyal ba de dag kun gyi bstan pa la/ /de dag rab byung ting 'dzin 'di la bsgom/ de dag phyi ma'i dus la sangs rgyas gyur/ /mtha' yas brtson pa ming ni dpa' brtan yin/ /srog chags bye ba mang po'i don byas te/ /phyi ma'i dus la mi bzhin mya ngan 'das/ /sngon tshe rgyal po stobs chen byung ba ni/ / 50.20a sangs rgyas ye shes dpa' ba 'jig rten byung / /de tshe srog chags bye stong mang po rnams/ /byang chub bkod nas phyi dus mya ngan 'das/ /de phyir sangs rgyas dag gis brjod pa yi/ /mdo 'di phyi dus thos nas gzungs bar gyis/ /'di lta bu yi chos mdzod 'di bzung na/ /mi yi gtso bor myur du 'grub par 'gyur/ /dbyangs byin gyi le'u ste lnga pa'o// // de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po ting nge 'dzin 'di 'dod cing / myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas ting nge 'dzin 'di yongs su sbyang bar bya'o/ /gzhon nu de la ting nge 'dzin yongs su sbyang ba gang zhe na/ gzhon nu 'di la byang chub sems dpa' sems dpa' chen pos snying rje chen po la zhugs pa'i sems kyis de bzhin gshegs pa bzhugs pa 'am/ yongs su mya ngan las 'das pa rnams la 'di lta ste/ chos gos dang bsod snyoms dang mal cha dang na ba'i gsos sman dang yo byad rnams dang me tog dang bdug pa dang spos dang phreng ba dang byug pa dang phye ma dang na bza' dang gdugs dang rgyal mtshan dang rnam par rgyal ba'i ba dan rnams dang rol mo dang sil snyan rnams kyis mchod par bya ba la brtson pa yin te/ dge ba'i rtsa ba de yang ting nge 'dzin thob par yongs su bsngo'o/ /de chos gang la yang re ba'i phyir de bzhin gshegs pa la mchod par mi byed de/ 'dod pa la re ba ma yin/ longs spyod la re ba ma yin/ mtho ris la re ba ma yin/ 'khor ba la re ba ma yin gyi de ni chos la sems pa yin no/ /de 'dod na de bzhin gshegs pa chos kyi skur yang mi dmigs na de gzugs kyi skur lta ga la zhig dmigs par 'gyur/ gzhon nu de lta bas na de bzhin gshegs 50.20b pa rnams la mchod pa de ni 'di yin te/ 'di lta ste/ de bzhin gshegs pa mi mthong ba dang / bdag nyid mi dmigs pa dang las kyi rnam par smin pa la mi re ba'o/ /gzhon nu 'khor gsum yongs su dag pa'i mchod pa 'dis de bzhin gshegs pa la mchod na ting nge 'dzin 'di rab tu 'thob cing / bla na med pa yang dag par rdzogs pa'i byang chub kyang myur du mngon par rdzogs par 'tshang rgya'o/ /de nas de'i tshe bcom ldan 'das kyis zla 'od gzhon nur gyur pa la ting nge 'dzin yongs su sbyangs pa bstan pa 'di rgyas par tshigs su bcad pa'i dbyangs kyis rgya cher yang dag par rab tu bstan to/ /ye shes mtha' yas pa la spos phul bas/ /skyes bu rnams kyi dri yang mtha' yas 'gyur/ /bskal pa bye bar ngan 'gror de mi 'gro/ /de dag dri bsung nga bar yong mi 'gyur/ /de dag bskal pa bye bar spyad spyod cing / /sangs rgyas bye ba stong la mchod byas nas/ /de dag ye shes spos kyis mngon 'phags te/ /sangs rgyas tshul khrims dri mchog ldan par 'gyur/ /gal te sems can gang dag spos byin dang / /de bzhin gang la sbyin par bya ba dang / /sems 'dis sbyin par byed pa med shes na/ /de ni de yi 'thun bzod chung ngu yin/ /bzod pa chen po bsten pa de la ni/ /bskal pa bye ba gang gA'i bye snyed du/ /mi yis kham tshad tsam du bcad gtubs kyang / /de yi sems ni ldog par yong mi 'gyur/ /ci yi phyir na bzod pa'i ming du gdags/ /ji ltar rjes su 'thun pa zhes kyang bya/ /gang gi rgyus ni phyir mi ldog ces bya/ /ji ltar byang chub sems dpa' zhes kyang brjod/ /rang bzhin bdag med chos la de bzod de/ /bdag med 'du shes pa la nyon mongs med/ /chos rnams thams cad nam mkha' ji bzhin shes/ /de phyir de la bzod pa'i ming du btags/ /rgyal ba kun gyi rjes su 'thun slob cing / /mkhas pa de ni chos min mi spyod de/ / 50.21a sangs rgyas chos la the tsom mi skyod pa/ /de ni rjes su 'thun pa'i bzod pa yin/ /de ltar spyod pa dag la 'jig rten na/ /ji snyed bdud yod sangs rgyas gzugs bsgyur nas/ /byang chub rnyed dkas nyan thos gyis shig ces/ /tshig tu smra yang mi 'dzin ldog mi 'gyur/ /sems can mi mthun lta las rtogs byed cing / /mi 'chi 'thob pa'i lam ni 'di'o zhes/ /log pa'i lam spangs lam la 'jog par byed/ /de phyir byang chub sems dpa' zhes kyang bya/ /rjes su 'thun bzod lam la gnas pa dang / /bdag med shes pas sad par byas pa la/ /rmi lam na yang mi dang gang zag dang / /srog dang sems can yod par yong mi 'dzin/ /bdud rnams bye ba gang gA'i bye ma snyed/ /sangs rgyas gzugs bsgyur de dag drung 'ongs te/ /lus kyi nang na srog med gyur na ni/ /khyed cag sangs rgyas 'grub pa min zhes smra/ /ye shes kyis ni phung po stong par shes/ /shes nas nyon mongs rnams dang nga mi 'grogs/ /tha snyad tsam gyis rnam par spyod byed cing / /'jig rten 'di na mya ngan 'das par gnas/ /ji ltar skyes bu dag gi bu skyes nas/ /'di yi ming ni 'di zhes ming btags pa/ /phyogs rnams su'ang de yi ming mi rnyed/ /ming de gang nas kyang ni 'ongs pa med/ /de bzhin byang chub sems dpa' ming btags te/ /byang chub sems dpa' 'di zhes yongs btsal kyang / /phyogs rnams na yang de yi ming mi rnyed/ /de ltar gang shes byang chub sems dpa' yin/ /rgya mtsho'i dbus nas ji ste me 'bar yang / /byang chub sems dpa' 'jig tshogs lta ba med/ /'di ltar byang chub sems bskyed tshun chad ni/ /de la srog tu lta bar 'gyur ba med/ /'di la gang yang skyes shing shi med de/ /ming dang shing skyes sems can byung ba med/ /chos rnams rang bzhin stong pa sgyu ma bzhin/ /mu stegs can gyis rnam par rig mi nus/ /kha zas dag la shin du brkam pa dang / /lhung bzed gos 50.21b la chags shing zhen med dang / /'phyar ba rnams dang khengs pa dag gis kyang / /sangs rgyas byang chub 'di ni shes mi nus/ /gnyid dang rmugs pas non pas le lo can/ /nga rgyal can dang khrel med 'gying ba dang / /su dag sangs rgyas la ni dad med pa/ /de dag byang chub dam pa shes mi nus/ /tshul nyams pa yi so so'i skye bo dang / /gang dag chos la dad pa med pa dang / /tshangs pa mtshungs spyod dag la ri mo med/ /de dag byang chub 'di ni rtogs mi nus/ /tshul ma nyams shing khrel yod ngo tsha shes/ /chos dang sangs rgyas dag la gang dga' zhing / /tshangs pa mtshungs spyod dag la rab tu gus/ /de dag byang chub dam pa mchog 'thob 'gyur/ /gang dag spyod yul dran pa nye bar gzhag /bde zhing dga' ba'i mal du zhugs pa dang / /zas su bsam gtan skom du ting nge 'dzin/ /de dag gis kyang byang chub mchog rab 'thob/ /bdag med pa yi 'du shes nyin par gnas/ /'chag sar stong pa dang ni rjes su dran/ /byang chub yan lag me tog yid 'ong gsungs/ /brtson pa de dag byang chub dam pa thob/ /byang chub sems dpa' mkhas pa'i spyod pa dag /skye bo gzhan rnams dang ni nyan thos dang / /rang sangs rgyas kyi sa yang ma yin na/ /de la rtogs par su zhig 'dun mi skyed/ /gal te bskal bye gang gA'i bye ma snyed/ /de srid du ni tshe yi tshad gyur nas/ /ngas ni sangs rgyas kyi yang ye shes kyi/ /spu gcig bsngags pa brjod kyang mthar mi phyin/ /de phyir zil gyis mi non rgyal ba yis/ /bshad pa'i phan yon 'di dag thos nas ni/ /ting 'dzin 'di ni myur du lung mnod gyis/ /byang chub mchog ni rnyed par dka' mi 'gyur/ /ting nge 'dzin yongs su sbyang ba bya ba'i le'u ste drug pa'o// // de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po ting nge 'dzin 'di 'dod cing / myur du bla na med pa yang 50.22a dag par rdzogs pa'i byang chub mngon par rdzogs par 'tshang rgya bar 'dod pas bzod pa gsum gyi ye shes la mkhas par bya'o/ /des bzod pa dang po rab tu shes par bya/ bzod pa gnyis pa rab tu shes par bya/ bzod pa gsum pa rab tu shes par bya ste/ bzod pa gsum gyi khyad par la mkhas par bya'o/ /bzod pa gsum gyi ye shes kyi khyad par la mkhas par bya'o/ /de ci'i phyir zhe na/ gzhon nu 'di ltar nam byang chub sems dpa' sems dpa' chen po bzod pa gsum gyi khyad par la mkhas par gyur cing / bzod pa gsum gyi ye shes kyi khyad par la mkhas par gyur pa de'i tshe gzhon nu byang chub sems dpa' sems dpa' chen po de myur du ting nge 'dzin 'di 'thob cing / myur du bla na med pa yang dag par rdzogs pa'i byang chub mngon par rdzogs par 'tshang rgya'o/ /gzhon nu de lta bas na byang chub sems dpa' sems dpa' chen po bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas bzod pa gsum la 'jug pa'i chos kyi rnam grangs 'di gzung bar bya'o/ /gzung nas kyang gzhan la rgya cher yang dag par rab tu bstan par bya ste/ de ni skye bo mang po la phan pa dang / skye bo mang po la bde ba dang 'jig rten la snying brtse ba dang / skye bo phal po che dang lha dang mi rnams kyi don dang / phan pa dang bde bar 'gyur ro/ /de nas bcom ldan 'das kyis zla 'od gzhon nur gyur pa la bzod pa gsum la 'jug pa'i chos kyi rnam grangs 'di tshigs su bcad pa'i dbyangs kyis yang dag par rab tu bstan to/ /su dag dang yang rtsod par mi byed cing / /don med ldan pa'i tshig rnams mi smra ste/ /don dang chos la rtag par rab tu gnas/ /'di dag bzod pa dang por bshad pa yin/ /chos rnams thams cad sgyu ma 'drar shes te/ /de ni mtshan ma'i spyod yul ldan ma yin/ /ye shes 'phel ba'i sa las mi nyams te/ /'di dag bzod pa dang po'i khyad par ro/ / 50.22b mdo sde'i tshul kun la yang de mkhas shing / /legs par smras la mkhas pa shin du mos/ /bder gshegs mkhyen la mtha' yas ye shes can/ /'di dag bzod pa dang po'i khyad par ro/ /legs par bshad pa'i chos ni gang thos kyang / /sangs rgyas dag gis bshad par the tshom med/ /rgyal ba kun gyi chos la de mos te/ /'di dag bzod pa dang po'i khyad par ro/ /stong pa bde bar gshegs pas bshad pa ltar/ /nges don mdo sde dag gi bye brag shes/ /gang las sems can gang zag skyes bu bstan/ /chos de thams cad drang ba'i don du shes/ /'jig rten 'di na mu stegs mang yod pa/ /de dag la yang de ni yid mi khro/ /de dag la ni snying rje nye bar 'jog / /'di dag bzod pa dang po'i khyad par ro/ /de la gzungs rnams yongs su snang bar 'gyur/ /snang ba de la nam yang the tshom med/ /bden pa'i rjes su 'brang ba'i tshig smras te/ /'di dag bzod pa dang po'i khyad par ro/ /rlung dang chu dang me dang sa rnams kyi/ /khams bzhi po ni rnam pa gzhan 'gyur yang / /sangs rgyas byang chub las ni de mi ldog /'di dag bzod pa dang po'i khyad par ro/ /'jig rten bzo gnas mang po ci yod pa/ /thams cad byang chub sems dpa' des bslabs te/ /bdag las lhag pa su yang mi mthong ba/ /'di dag bzod pa dang po'i khyad par ro/ /zhi gnas stobs kyis bskyod pa med gyur cing / /lhag mthong gis ni ri bo lta bur gyur/ /sems can kun gyis 'khrugs par mi nus te/ /de ni bzod pa gnyis su bshad pa yin/ /mnyam par bzhag bzhin du ni ldang zhing smra/ /mnyam par bzhag pas 'dug cing 'chag par byed/ /mkhas pa ting nge 'dzin gyi pha rol phyin/ /'di dag bzod pa gnyis pa'i khyad par ro/ /mnyam par bzhag pas mngon shes lnga thob ste/ /chos rnams ston cing zhing ni brgyar yang 'gro/ /de ni rdzu 'phrul stobs las mi nyams te/ /'di dag 50.23a bzod pa gnyis pa'i khyad par ro/ /de ni de 'dra'i ting 'dzin zhi ba bstan/ /mnyam par bzhag pa de yi sems kyi chod/ /'dzin nus pa yi sems can gang yang med/ /'di dag bzod pa gnyis pa'i khyad par ro/ /'jig rten 'di na gang yod sems can kun/ /de dag sangs rgyas mkhyen pas chos ston kyang / /bshad pa thams cad de bzhin 'dzin nus te/ /'di dag bzod pa gnyis pa'i khyad par ro/ /shar dang lho dang nub dang byang phyogs dang / /steng dang 'og dang de bzhin phyogs mtshams ni/ /thams cad na yang 'jig rten mgon po mthong / /de ni bzod pa gsum par bstan pa yin/ /gser gyi kha dog lta bu'i sku lus su/ /'phrul pa bsam gyis mi khyab sprul nas ni/ /srog chags bye ba mang la chos ston te/ /'di dag bzod pa gsum pa'i khyad par ro/ /sangs rgyas zhing 'di'i 'dzam bu'i gling kun na/ /byang chub sems dpa' de ni snang bar 'gyur/ /'jig rten lha dang lha min bcas par grags/ /'di dag bzod pa gsum pa'i khyad par ro/ /sangs rgyas spyod yul de bzhin cho ga dang / /bde bar gshegs pa'i spyod lam ci 'dra ba/ /kun la byang chub sems dpa' des bslabs te/ /'di dag bzod pa gsum pa'i khyad par ro/ /'jig rten khams 'di sems can ci yod pas/ /byang chub sems dpa'i bsngags pa brjod gyur la/ /de la yid ni rjes su dgar byed na/ /sangs rgyas ye shes la ni bslabs ma yin/ /'jig rten khams 'di'i sems can su yod pas/ /byang chub sems dpa' la ni mi snyan brjod/ /de dag la ni yid kyis khro byed na/ /da dung sangs rgyas ye shes des ma bslabs/ /nor rnyed pas ni yid bder mi 'gyur te/ /nor rnams ma rnyed na yang mi dga' med/ /ri dang 'dra ba'i sems la rtag tu gnas/ /'di dag bzod pa gsum pa'i khyad par ro/ /sgra yi rjes 'gro bzod pa 'di bstan te/ / 50.23b bsam pa sgom pa rjes su 'thun pa dang / /thos pa las byung de ni skye ba med/ /'di la gang bslabs de ni byang chub lam/ /bzod pa bla na med pa gsum po 'di/ /byang chub sems dpas nam zhig thob gyur na/ /mi mchog bde bar gshegs pa des mthong ste/ /rdul med byang chub tu'ang de lung ston/ /de nas lung bstan pa ni de thob nas/ /sa yang rnam pa drug tu rab tu g.yos/ /zhing rnams 'od kyis shin du gsal bar gyur/ /lha rnams bye ba me tog char pa 'bebs/ /de la lung bstan de yang thos nas ni/ /sems can bye ba khrag khrig bsam yas kyang / /bdag cag mchod rten rgyal bar 'gyur snyam ste/ /byang chub dam pa mchog la sems skyed 'gyur/ /nam zhig bla med bzod pa gsum po 'di/ /byang chub sems dpas thob par gyur pa na/ /de ni mi skye 'chi bar mi 'gyur te/ /de la 'chi 'pho med cing skye ba'ang med/ /nam zhig bla med bzod pa gsum po 'di/ /rdzogs pa'i byang chub sems dpas thob gyur na/ /skye ba dang ni 'chi ba'ang mi mthong ste/ /chos rnams thams cad chos nyid gnas par mthong / /'di ltar mi bden par ni des rig ste/ /chos rnams sgyu ma lta bur rang bzhin stong / /stong pa dag kyang mi mthong 'chi ba'ang med/ /chos 'di thams cad ngo bo nyid kyis stong / /nam zhig la las de la gus byas shing / /rim gro bkur sti mchod pa byas na yang / /de la yid ni dga' bar mi byed de/ /chos rnams rang bzhin stong par de yis shes/ /sems can dag gis spyos bsdigs brdegs na yang / /de dag la ni nga rgyal khro mi srid/ /de dag sems can thar par bya ba'i phyir/ /de dag la ni byams pa brtan par skyed/ /rdo dang dbyug pa dag gis brdegs btsogs kyang / /mkhas pa de la khro bar mi byed de/ /bdag med bzod la rab tu gnas pa la/ /nga rgyal dang ni khro ba'i tha ba med/ /'di ltar des ni mi bden nyid du shes/ /sgyu ma lta bur chos rnams 50.24a rang bzhin stong / /chos tshul de 'dra ba la de gnas na/ /lhar bcas 'jig rten dag na shin du bkur/ /nam zhig sems can dag ni mtshon thogs nas/ /de yi lus dang yan lag mang gtubs kyang / /de dag la ni yid kyis khro ba med/ /snying rje byams pa las kyang nyams mi 'gyur/ /de dag lus dang yan lag gcod pa'i tshe/ /de ni de la 'di ltar sems bskyed de/ /'di dag byang chub mchog la ma bkod par/ /de srid zhi bar mya ngan nga mi 'da'/ /de 'dra'i bzod stobs bla na med pa la/ /bdag med bzod pa mnyam nyid gnas pa yi/ /byang chub sems dpa' grags pa chen po yis/ /bskal pa bye bar rtag tu shin du bsgoms/ /de las lhag par gang gA'i bye snyed du/ /ji tsam sangs rgyas mkhyen pas don mi byed/ /de srid byang chub reg pa ma yin na/ /de bzhin gshegs pa'i ye shes ci zhig smos/ /grags pa chen po brjod pa mtha' yas pa/ /bdag med bzod la rab tu gnas pa yi/ /bskal pa bsam gyis mi khyab brgyar brjod kyang / /de yi bsngags pa zad par sla ba min/ /de phyir byang chub mchog rab bla na med/ /ye shes phung po 'tshang rgyar su 'dod pa/ /de ni rgyal bas bsngags pa'i bzod pa sgoms/ /byang chub dam pa rnyed par dka' mi 'gyur/ /bzod pa la 'jug pa'i le'u ste bdun pa'o// // de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po ting nge 'dzin 'di 'dod cing / myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas chos thams cad kyi dngos po med pa'i ngo bo nyid kyi ye shes la mkhas par bya'o/ /gzhon nu ji ltar na byang chub sems dpa' sems dpa' chen po chos thams cad kyi dngos po med pa'i ngo bo nyid kyi ye shes la mkhas pa yin zhe na/ gzhon nu 'di la byang chub sems 50.24b dpa' sems dpa' chen pos chos thams cad dngos po med pa/ ngo bo nyid med pa/ mtshan ma med pa/ mtshan nyid med pa/ ma skyes pa/ ma 'gags pa/ yi ge med pa/ stong pa/ gzod ma nas zhi ba/ rang bzhin gyis rnam par dag pa yin par rab tu shes par bya'o/ /gzhon nu byang chub sems dpa' sems dpa' chen pos nam chos thams cad dngos po med pa/ ngo bo nyid med pa/ mtshan ma med pa/ mtshan nyid med pa/ ma skyes pa/ ma 'gags pa/ yi ge med pa/ stong pa/ gzod ma nas zhi ba/ rang bzhin gyis rnam par dag pa yin par rab tu shes par gyur pa de'i tshe gzhon nu byang chub sems dpa' sems dpa' chen po yang dag pa ji lta ba bzhin du chos thams cad kyi dngos po med pa'i ngo bo nyid kyi ye shes la mkhas pa zhes bya'o/ /gzhon nu byang chub sems dpa' sems dpa' chen po chos thams cad kyi dngos po med pa'i ngo bo nyid kyi ye shes la mkhas pa de ni gzugs dang sgra dang dri dang ro dang reg bya dang chos thams cad la 'dod chags par mi byed/ zhe sdang bar mi byed/ gti mug par mi byed do/ /de ci'i phyir zhe na/ 'di ltar des chos de yang dag par rjes su mi mthong zhing / chos de mi dmigs te/ gang 'dod chags pa dang gang la 'dod chags pa dang gang gis 'dod chags pa dang gang zhe sdang ba dang gang la zhe sdang ba dang gang gis zhe sdang ba dang gang gti mug pa dang gang la gti mug pa dang gang gis gti mug par 'gyur ba'i chos de des yang dag par rjes su mi mthong zhing mi dmigs so/ /chos de yang dag par rjes su mi mthong zhing ma dmigs na khams gsum thams cad la ma chags par 'gyur te myur du ting nge 'dzin 'di 'thob bo/ /myur du bla na med pa yang dag par rdzogs pa'i byang chub kyang mngon par rdzogs par 'tshang rgya'o/ /de la 'di skad ces bya ste/ chos rnams thams cad dngos po med pa ste/ /thams cad 50.25a mtshan ma med cing mtshan nyid med/ /skyes pa med cing 'gags pa med par yang / /de ltar chos rnams shin du rig par gyis/ /thams cad dngos po med cing yi ge med/ /stong pa zhi ba gzod nas dri ma med/ /de ltar chos rnams gang gis shes pa ni/ /gzhon nu de ni sangs rgyas zhes kyang brjod/ /de phyir rang bzhin mnyam nyid rnams spros pa/ /ngo bo nyid kyis chos kun rang bzhin med/ /bde bar gshegs pa'i yum 'di su 'dod pa/ /rgyal ba rnams kyi yum 'di 'thob par 'gyur/ /gzhon nu de lta bas na rnam grangs 'dis kyang 'di ltar rig par bya ste/ gzhon nu sngon byung ba 'das pa'i dus na bskal pa grangs med pa bas kyang ches grangs med pa/ rgya che ba/ gzhal du med pa/ bsam gyis mi khyab pa/ tshad med par gyur pa de'i tshe de'i dus na de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa sangs rgyas bcom ldan 'das dngos po med pa las byung ba zhes bya ba 'jig rten du byung ngo / /gzhon nu 'di ji snyam du sems/ ci'i phyir de bzhin gshegs pa de dngos po med pa las byung ba zhes bya zhe na/ gzhon nu de bzhin gshegs pa de skyes ma thag tu sting gi nam mkha' la ta la bdun tsam du 'phags nas gom pa bdun bor te tshig 'di skad gsung ngo / /chos thams cad dngos po med pa las byung ba'o/ /chos thams cad dngos po med pa las byung ba'o zhes gsungs te/ gzhon nu sgra de'i dbyangs kyis stong gsum gyi stong chen po'i 'jig rten gyi khams go bar byas so/ /de nas sa'i lha nas bzung ste tshangs pa'i 'jig rten gyi bar du sgra bsgrags shing dbyangs kyis rjes 50.25b su go bar byas te/ e ma de bzhin gshegs pa 'di skyes ma thag tu steng gi nam mkha' la ta la bdun srid du 'phags nas gom pa bdun bor te/ dngos po med pa'i sgra 'byin pa las na dngos po med pa las byung ba zhes bya bar 'gyur ro zhes mtshan dngos po med pa las byung ba/ dngos po med pa las byung ba'o zhes btags so/ /bcom ldan 'das de byang chub thob pa na shing thams cad kyi lo ma dang rtsa ba dang shing gel pa dang nags tshal thams cad dang ri'i rtse mo thams cad las kyang dngos po med pa las byung ba'o zhes sgra byung ngo / /'jig rten gyi khams de na sgrar btags pa ji snyed yod pa thams cad las dngos po med pa las byung ba'o zhes rnam par rig par byed pa'i sgra byung ngo / /gzhon nu de'i tshe de'i dus na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dngos po med pa las byung ba de'i gsung rab la rgyal bu gzhon nu snying rje chen po sems shes bya ba gzugs bzang zhing mdzes la blta na sdug pa zhig byung ngo / /gzhon nu de nas rgyal bu gzhon nu snying rje chen po sems de bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dngos po med pa las byung ba ga la ba der song ste phyin nas bcom ldan 'das kyi zhabs la mgo bos phyag 'tshal te/ bcom ldan 'das la lan gsum bskor ba byas nas phyogs gcig tu 'dug go/ /de nas bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dngos po med pa las byung bas rgyal bu gzhon nu snying rje chen po sems kyi lhag pa'i bsam pa mkhyen nas ting nge 'dzin 'di bshad do/ /de ting nge 'dzin 'di thos nas rab tu dad de/ sems rab tu dad pas skra dang kha spu bregs te gos ngur smrig gyon nas dad pas khyim nas khyim med par rab tu byung ngo / /de rab tu byung nas ting nge 'dzin 'di bzung ste/ bzung zhing bcangs 50.26a blags kun chub par byas nas sgom pa'i rnal 'byor la rjes su brtson par gnas te/ de dge ba'i rtsa ba des bskal pa bye ba phrag nyi shur nam yang ngan 'gro log par ltung bar ma song ngo / /sangs rgyas bye ba phrag nyi shu mnyes par byas te/ de bzhin gshegs pa de dag thams cad las kyang ting nge 'dzin 'di mnyan to/ /sangs rgyas de dag thams cad las mnyan nas kyang bzung ngo kun chub par byas so/ /bcangs so/ /blags so/ /bton to/ /nyon mongs pa med par bsgoms shing mang du byas te/ bsgom pa'i rnal 'byor la rjes su brtson par gnas so/ /de dge ba'i rtsa ba des bskal pa nyi shu 'das nas de bzhin gshegs pa dgra bcom pa yang dag par rdzogs pa'i sangs rgyas don legs par bsams pa zhes bya ba 'jig rten du byung ste/ des sems can grangs med dpag tu med pa yongs su smin par byas/ sems can tshad med pa'i don byas nas de'i 'og tu shing zad pa'i me ltar yongs su mya ngan las 'das so/ /gzhon nu de lta bas na rnam grangs des kyang 'di ltar ting nge 'dzin 'di byang chub sems dpa' sems dpa' chen po rnams kyi gces spras byed pa ste/ sangs rgyas kyi ye shes bla na med pa yongs su rdzogs par byed pa yin par rig par bya'o/ /de nas yang bcom ldan 'das kyis de'i tshe zla 'od gzhon nur gyur pa la sngon byung ba'i le'u 'di nyid rgyas par tshigs su bcad pa'i dbyangs kyis rgya cher yang dag par rab tu bstan to/ /sngon 'das dus kyi bskal pa bsam yas na/ /mi yi gtso bo byung ba ngas dran te/ /drang srong chen po gzengs kyis don mdzad pa/ /de ming dngos po med las byung zhes bya/ /skyes ma thag tu mkha' la rab 'dug nas/ /chos rnams thams cad dngos po med par bstan/ /de tshe de dang 'thun par mtshan btags te/ /sgras ni 'jig rten kun du grags par byas/ /lha rnams thams cad rab tu sgra 'byin pa/ /dngos po med ces bya ba'i rgyal bar 'gyur/ /skyes ma 50.26b thag tu gom pa bdun bor te/ /rgyal bas chos rnams dngos po med par bshad/ /thub pa chos rnams thams cad ston pa yi/ /sangs rgyas chos kyi rgyal por nam 'gyur tshe/ /rtsi shing gel ba ri dang brag rnams las/ /chos rnams dngos po med ces sgra yang byung / /'jig rten de na ji snyed sgra yod pa/ /thams cad dngos med ci'ang med pa zhes/ /de lta bur ni 'jig rten 'dren pa yi/ /sgra dbyangs rnam pa shin du byung bar gyur/ /de yi dus na rgyal po'i bu skyes pa/ /ming ni rtag tu snying rje sems shes bya/ /shin du gzugs bzang blta na sdug pa zhig /rgyal ba de yi drung du nyer 'ongs te/ /thub pa khyu mchog zhabs la phyag 'tshal nas/ /ri mor bcas pas bskor bar byas nas ni/ /rdul bral bla na med pa'i chos mnyan phyir/ /rab tu dang ba'i sems kyis der 'dug go/ /rgyal ba dpa' bo des ni bsam mkhyen nas/ /ting 'dzin 'di ni rab tu bshad pa mdzad/ /des ni rdul bral ting 'dzin 'di thos nas/ /rgyal mchog bstan la myur bar rab tu byung / /rab tu de byung ting 'dzin 'di yang ni/ /bzung zhing blags te yongs su chub byas pas/ /bskal pa bye ba nyi shu tshang bar ni/ /log par ltung ba'i sar yang yong ma song / /de ni dge bar byas pa'i las de yis/ /sangs rgyas bye phrag nyi shu mnyes par byas/ /rgyal ba de dag kun gyi drung du yang / /ting 'dzin zhi mchog 'di ni goms par byas/ /de phyis 'jig rten du yang sangs rgyas gyur/ /ming ni don legs bsams shes rtag tu brjod/ /sems can bye ba mang po'i don byas nas/ /phyi ma'i dus la me bzhin mya ngan 'das/ /dngos po med pa las byung ba'i le'u ste brgyad pa'o// // 'phags pa ting nge 'dzin gyi rgyal po'i mdo/ bam po gsum pa/ de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po gang ji ltar na bdag myur du bla na med pa yang dag par rdzogs pa'i byang chub 50.27a mngon par rdzogs par 'tshang rgya zhing / sems can thams cad srid pa'i rgya mtsho las bsgral bar 'dod pa'i byang chub sems dpa' sems dpa' chen pos sangs rgyas thams cad kyis bsngags pa/ de bzhin gshegs pa thams cad kyi yum/ chos thams cad kyi rang bzhin mnyam pa nyid rnam par spros pa'i ting nge 'dzin gyi rgyal po 'di mnyan par bya/ gzung bar bya/ bcang bar bya/ kun chub par bya/ klag par bya/ rab tu gdon par bya/ lung nod cing kha ton du bya/ nyon mongs pa med par sgom pas bsgom par bya/ mang du bya/ gzhan la yang rgya cher rab tu bstan par bya'o/ /de ci'i phyir zhe na/ gzhon nu chos thams cad kyi rang bzhin mnyam pa nyid rnam par spros pa'i ting nge 'dzin gyi rgyal po 'di ni de bzhin gshegs pa dgra bcom pa yang dag par rdzogs pa'i sangs rgyas rnams skyed pa ste/ 'di las de bzhin gshegs pa dang nyan thos dang rang sangs rgyas thams cad byung ngo / /gzhon nu de lta bas na khyod kyis kyang sangs rgyas thams cad kyis bsngags pa/ de bzhin gshegs pa thams cad skyed pa/ chos thams cad kyi rang bzhin mnyam pa nyid rnam par spros pa ting nge 'dzin gyi rgyal po gzung bar bya'o/ /de la 'di skad ces bya ste/ de phyir byang chub tu ni 'tshang rgya zhing / /srid pa'i mtsho las sems can sgrol 'dod pas/ /sangs rgyas bsngags pa'i mdo sde 'di zung shig /byang chub dam pa rnyed par dka' mi 'gyur/ /de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po ting nge 'dzin 'di 'dod cing myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas chos zab mo bzod pa la mkhas par bya'o/ /gzhon nu ji ltar na byang chub sems dpa' sems dpa' chen po chos zab mo bzod pa la mkhas pa yin zhe na/ gzhon nu 'di la byang chub sems 50.27b dpa' sems dpa' chen pos chos thams cad sgyu ma lta bur rab tu shes par bya'o/ /chos thams cad rmi lam lta bu dang smig rgyu lta bu dang brag cha lta bu dang mig yor lta bu dang chu zla lta bu dang sprul pa lta bu dang gzugs brnyan lta bu dang nam mkha' lta bur rab tu shes par bya'o/ /gzhon nu byang chub sems dpa' sems dpa' chen pos nam chos thams cad sgyu ma lta bur yongs su shes shing / chos thams cad rmi lam lta bu dang smig rgyu lta bu dang brag cha lta bu dang mig yor lta bu dang chu zla lta bu dang sprul pa lta bu dang gzugs brnyan lta bu dang nam mkha' lta bur yang dag pa ji lta ba bzhin yongs su shes pa de'i tshe/ gzhon nu byang chub sems dpa' sems dpa' chen po 'di chos zab mo bzod pa la mkhas pa zhes bya'o/ /chos zab mo bzod pa dang ldan pa de 'dod chags par 'gyur ba'i chos la mi chags/ zhe sdang bar 'gyur ba'i chos la mi sdang / gti mug par 'gyur ba'i chos la mi rmongs so/ /de ci'i phyir zhe na/ 'di ltar des chos de yang dag par rjes su mi mthong / chos de mi dmigs te/ gang 'dod chags pa dang gang la 'dod chags pa dang gang gis 'dod chags pa dang gang zhe sdang ba dang gang la zhe sdang ba dang gang gis zhe sdang ba dang gang gti mug pa dang gang la gti mug pa dang gang gis gti mug par 'gyur ba'i chos de des yang dag par rjes su mi mthong zhing chos de mi dmigs so/ /chos de yang dag par rjes su mi mthong zhing mi dmigs pas 'dod chags pa med pa/ zhe sdang ba med pa/ gti mug pa med pa/ sems phyin ci ma log pa/ mnyam par bzhag pa zhes bya'o/ /spros pa med pa zhes bya'o/ /rgal ba pha rol tu phyin pa zhes bya'o/ /skam la phyin pa zhes bya'o/ /bde bar son pa zhes bya'o/ /mi 'jigs pa thob pa zhes bya'o/ /tshul khrims can zhes bya'o/ /ye shes can zhes bya'o/ /shes rab can zhes bya'o/ /bsod nams can zhes bya'o/ /rdzu 'phrul can zhes bya'o/ /dran pa can zhes bya'o/ /blo gros can zhes bya'o/ /rtogs pa can zhes bya'o/ / 50.28a ngo tsha shes pa dang ldan pa zhes bya'o/ /brtan pa dang ldan pa zhes bya'o/ /spyod pa dang ldan pa zhes bya'o/ /sbyangs pa'i yon tan yo byad bsnyungs pa dang ldan pa zhes bya'o/ /nyon mongs pa med pa zhes bya'o/ /ci'ang med pa zhes bya'o/ /dgra bcom pa zhes bya'o/ /zag pa zad pa zhes bya'o/ /nyon mongs pa med pa/ dbang dang ldan par gyur pa/ sems shin du rnam par grol ba/ shes rab shin tu rnam par grol ba/ cang shes pa/ glang po chen po/ bya ba byas pa byed pa byas pa 'khor bur ba/ bdag gi don rjes su thob pa/ srid par kun du sbyor ba yongs su zad pa/ yang dag pa'i shes pas sems shin du rnam par grol ba/ shes rab shin du rnam par grol ba/ sems kyi dbang thams cad kyi dam pa'i pha rol tu phyin pa'i dge sbyong zhes bya'o/ /bram ze zhes bya'o/ /khrus byas pa zhes bya'o/ /pha rol du song ba zhes bya'o/ /rig par byed pa zhes bya'o/ /gtsang sbra can zhes bya'o/ /sangs rgyas kyi sras shes bya'o/ /shAkya'i sras shes bya'o/ /tsher ma dkrugs pa zhes bya'o/ /khrims ma dral ba zhes bya'o/ /'obs dral ba zhes bya'o/ /'obs las rgal ba ces bya'o/ /zug rngu phyung ba ces bya'o/ /nad med pa ces bya'o/ /dge slong zhes bya'o/ /kun nas dkris pa med pa zhes bya'o/ /skyes bu zhes bya'o/ /skyes bu dam pa zhes bya'o/ /skyes bu mchog ces bya'o/ /skyes bu chen po zhes bya'o/ /skyes bu seng ge zhes bya'o/ /skyes bu glang po che zhes bya'o/ /skyes bu cang shes pa zhes bya'o/ /skyes bu lcid khyer ba ces bya'o/ /skyes bu dpa' bo ces bya'o/ /skyes bu rtsal po che zhes bya'o/ /skyes bu me tog ces bya'o/ /skyes bu pad ma zhes bya'o/ /skyes bu pad ma dkar po zhes bya'o/ /skyes bu 'dul ba zhes bya'o/ /skyes bu zla ba zhes bya'o/ /skyes bu phal pa ma yin pa zhes bya'o/ /mi gos pa zhes bya'o/ /de nas bcom ldan 'das kyis chos zab mo'i bzod pa la 'jug pa'i chos 50.28b kyi rnam grangs 'di bstan pa'i phyir tshigs su bcad pa 'di dag gsungs so/ /nam zhig 'jig rten khams 'di 'byung ba dang / /'jig rten thams cad nam mkhar gyur pa'i tshe/ /ji ltar sngon bzhin phyis kyang de bzhin te/ /chos rnams thams cad de bzhin shes par gyis/ /'jig rten 'di na ji snyed ci yod pa/ /chu yi phung po 'di ni 'og tu 'gro/ /'og tu ci 'dur sting du'ang de bzhin te/ /chos rnams thams cad de bzhin shes par gyis/ /ji ltar bar snang chung zad sprin med las/ /skad cig tu ni sprin gyi dkyil 'khor snang / /thog ma ga las byung bar shes par bya/ /de bzhin chos rnams thams cad shes par gyis/ /de bzhin gshegs pa mya ngan 'das pa dag /ji ltar yid la byas bzhin gzugs brnyan snang / /sngon mtha' ji bzhin phyis kyang de bzhin te/ /chos rnams thams cad de bzhin shes par gyis/ /ji ltar dbu ba mang po rdos pa dag /chu bos khyer ba skyes bus nges mthong ste/ /de la brtags na snying po yong mi snang / /chos rnams thams cad de bzhin shes par gyis/ /ji ltar char pa'i thigs chen bab pa na/ /chu'i chu bur dag ni tha dad 'byung / /byung nas zhig ste chu yi chu bur med/ /chos rnams thams cad de bzhin shes par gyis/ /ji ltar spring yig grong gzhan bskur ba las/ /dge dang mi dge'i bya ba so sor 'byung / /sgra las spring yig tu yang 'phos pa med/ /chos rnams thams cad de bzhin shes par gyis/ /ji ltar mi dag chang gis myos nas ni/ /sa 'di kun tu 'khor snyam byed mod kyi/ /sa 'di 'gul zhing g.yos pa'ang med pa ltar/ /chos rnams thams cad de bzhin shes par gyis/ /me long ngos dang 'bru mar snod rnams la/ /bud med kha bzhin rgyan pas bltas pa na/ /byis pa de ni de la chags bskyed nas/ /'dod pa tshol ba'i phyir yang shin du rgyug /bzhin ni der yang 'phos pa ma yin te/ /gzugs brnyan la ni nam yang bzhin 50.29a mi rnyed/ /rmongs pa de dag 'dod chags skyes pa ltar/ /chos rnams thams cad de bzhin shes par gyis/ /ji ltar smig rgyu dri za'i grong khyer dang / /sgyu ma ji bzhin rmi lam ji lta bur/ /mtshan ma sgom pa ngo bo nyid kyis stong / /chos rnams thams cad de bzhin shes par gyis/ /ji ltar nam mkha' dang bar zla shar ba/ /de yi gzugs brnyan dang ba'i mtshor snang ste/ /zla ba chu yi nang du 'phos pa med/ /chos kun mtshan nyid de 'drar shes par gyis/ /ji ltar mi dag nags ri'i khrod 'dug nas/ /glu len smra dang rgod dang ngu ba las/ /brag cha thos kyang snang ba med pa ltar/ /chos rnams thams cad de bzhin shes par gyis/ /glu dang rol mo de bzhin ngu ba yang / /de la brten nas brag cha 'byung mod kyi/ /sgra la dbyangs de nam yang yod ma yin/ /chos rnams thams cad de bzhin shes par gyis/ /ji ltar rmi lam na yang 'dod bsten pa/ /skyes bu sad par gyur nas mi mthong ste/ /byis pa shin du 'dod la chags shing zhen/ /chos rnams thams cad de bzhin shes par gyis/ /sgyu ma byed pa dag gis gzugs sprul te/ /rta dang glang po shing rta sna tshogs byas/ /de la ji ltar snang ba gang yang med/ /chos rnams thams cad de bzhin shes par gyis/ /ji ltar bu mo gzhon nu'i rmi lam na/ /bu pho byung zhing shi ba des mthong nas/ /byung nas dga' zhing shi nas mi dga' ltar/ /chos rnams thams cad de bzhin shes par gyis/ /ji ltar mtshan mo chu yi zla ba dag /dang zhing rnyog pa med pa'i chu nang snang / /chu zla stong pa gsog ste gzung du med/ /chos rnams thams cad de bzhin shes par gyis/ /ji ltar sos ka'i nyi ma phyed dus na/ /skyes bu skom pas gdungs shing 'gro ba yis/ /smig rgyu dag la chu yi phung por mthong / /chos rnams thams cad de bzhin shes par gyis/ /smig rgyu la yang chu ni yong med na/ /sems can 50.29b rmongs pa de la 'thung 'dod de/ /mi bden chu ni 'thung bar yong mi nus/ /chos rnams thams cad de bzhin shes par gyis/ /ji ltar chu shing rlon pa'i sdong po la/ /snying po 'dod phyir skyes bus de gshegs kyang / /nang dang phyi rol kun na snying po med/ /chos rnams thams cad de bzhin shes par gyis/ /mig dang rna ba sna yang tshad ma min/ /lce dang lus dang sems kyang tshad ma min/ /dbang po 'di dag gal te tshad yin na/ /'phags pa'i lam gyis su la ci zhig bya/ /'di ltar dbang po 'di dag tshad min zhing / /ngo bo nyid kyis bems po lung ma bstan/ /de phyir mya ngan 'da' ba'i lam 'dod pa/ /des ni 'phags pa'i lam gyis bya ba byos/ /lus la sngon gyi mtha' ma rab brtags na/ /de la lus med lus su 'du shes med/ /gang la lus med lus su shes med pa/ /de ni 'dus ma byas kyi rigs shes bya/ /mya ngan 'das pa'i chos la chos med de/ /gang phyir 'di med nam yang yod mi 'gyur/ /rtog can dag gi yod dang med ces bya/ /de ltar spyod pa sdug bsngal zhi mi 'gyur/ /yod dang med ces bya ba gnyi ga mtha'/ /gtsang dang mi gtsang 'di yang mtha' yin te/ /de phyir gnyis ka'i mtha' ni rnam spangs nas/ /mkhas pa dbus la'ang gnas par yong mi byed/ /yod dang med ces bya ba rtsod pa ste/ /gtsang dang mi gtsang 'di yang rtsod pa yin/ /rtsod par gyur pa sdug bsngal zhi mi 'gyur/ /rtsod pa med par gyur pa sdug bsngal 'gag / /dran pa nye bar gzhag pa'i gtam byas te/ byis pa bdag nyid lus la mngon sum snyems/ /lus la mngon sum gyur pa rlom sems med/ /de ni rlom sems med do thams cad spangs/ /bsam gtan bzhi dag gi yang gtam byas nas/ /byis pa bdag nyid bsam gtan spyod yul smra/ /bsam gtan nyon mongs med cing rlom sems med/ /shes pas rtogs nas dregs pa rab tu spongs/ /bden pa bzhi yi gtam rnams byas nas kyang / /byis pa bdag nyid bden pa mthong zhes zer/ /bden pa 50.30a mthong la rlom sems gang yang med/ /rlom sems med pa bden pa rgyal bas gsungs/ /tshul khrims srung zhing de yis snyems mi bya/ /chos rnams mnyan cing des ni mi snyems te/ /gang dag shes rab chung ngu de snyems pa/ rtsa ba de las de yi sdug bsngal 'phel/ /'jig rten 'dren pa thams cad mkhyen pa yis/ /dregs pa sdug bsngal rtsa ba yin par bstan/ /rgyags pas dregs pa sdug bsngal rab tu 'phel/ /rlom sems med pa sdug bsngal 'gag par 'gyur/ /ji snyed chos mang yongs su chub byas nas/ /thos pas rgyags shing tshul khrims mi srung na/ /tshul khrims 'chal bas ngan 'gror de 'gro la/ /thos pa mang pos de la skyob mi nus/ /gal te tshul khrims grags pas de rgyags shing / /mang du thos la brtson par mi byed na/ /tshul khrims 'bras bu ma lus zad nas ni/ /phyir yang sdug bsngal rab tu myong bar 'gyur/ /'jig rten dag na ting 'dzin sgom byed kyang / /de ni bdag tu 'du shes gzhig mi byed/ /de yi nyon mongs phyir yang rab tu ldang / /lhag spyod kyis ni ting 'dzin 'dir bsgoms bzhin/ /gal te bdag med chos la rab rtog cing / /de dag brtags nas gal te sgom byed na/ /'bras bu mya ngan 'das thob rgyu de yin/ /rgyu gzhan de dag zhi bar 'gyur mi srid/ /mi zhig chom rkun mang pos rab gtses nas/ /'tsho bar 'dod pas bros shing 'gror brtsal na/ /de yi rkang pa 'gro zhing rgyug ma nus/ /chom rkun dag gis de bzung bcom pa ltar/ /de bzhin tshul khrims nyams pa rmongs pa'i mi/ /'dus byas dag las 'bros par 'dod mod kyi/ /tshul khrims nyams pas de yang 'bros mi nus/ /na rga 'chi ba dag gis shin du bcom/ /ji ltar mi rgod stong phrag mang po dag / /rnam pa du ma'i sgo nas sdigs pa byed/ /de bzhin nyon mongs sgo rnams du ma nas/ /mi rgod bzhin du dge ba'i phyogs rnams 'joms/ /gang gis phung po bdag med rab brtags te/ / 50.30b spyos shing brgyad kyang zhum par mi 'gyur ba/ /nyon mongs bdud kyi dbang du de mi 'gro/ /stong pa shes pa de la 'khrug pa med/ /'gro mang phung po stong par ston mod kyi/ /ji ltar bdag med de dag mi shes te/ /mi shes de dag gzhan gyis brgal na yang / /khro ba'i zil gyis non cing tshig rtsub smra/ /mi dag na zhing lus ni sdug bsngal te/ /lo grangs mang por res 'ga' ma thar ba/ /de ni yun ring nad kyis nyon mongs pas/ /nad rnams gso ba'i phyir yang sman pa btsal/ /yang dang yang ni de yis btsal ba dang / /sman pa mkhas shing rig pa des rnyed de/ /des kyang snying rje nye bar bzhag nas ni/ /sman 'di gtang bar gyis shis smras pa dang / /sman mang bzang zhing phangs pa des blangs nas/ /na ba 'tsho bar 'gyur ba'i sman mi 'thung / /sman pas ma lan sman gyis ma nyes te/ /nad pa de nyid kyis ni nyes pa yin/ /de bzhin bstan pa 'di la rab byung ste/ /stobs dang bsam gtan dbang po kun rig nas/ /sgom pa la ni mngon par brtson mi byed/ /rigs par mi brtson ga la mya ngan 'da'/ /rtag tu chos kun rang bzhin stong pa ste/ /rgyal ba'i sras rnams dngos po rnam par 'jig /srid pa thams cad yong ye stong pa ste/ /nyi tshe'i stong pa mu stegs can dag gi/ /mkhas pa byis pa dag dang rtsod mi byed/ /byis pa dag ni ri mor byas nas spongs/ /zhe sdang sems kyis bdag gi drung 'ong zhes/ /byis pa'i chos la sten par yang mi byed/ /byis pa dag gi rang bzhin rgyud rig nas/ /mkhas pa byis pa dag dang mi 'grogs te/ /ji srid du ni byis pa legs bsnyen kyang / /de dag phyir yang dgra dang 'dra bar 'gyur/ /mkhas pa byis pa dag la yid mi rton/ /mkhas dang byis pa'i rang bzhin chos nyid ni/ /byis pa'i rang bzhin ngang tshul tha dad de/ /so so'i skye bo la ni mdza' ba med/ /chos dang ldan pa'i tshig tu smras na yang / /yid mi ches dang zhe sdang khro ba dag /mngon par ston pa 'di ni byis pa'i chos/ /don 'di rnam par rig pas 50.31a yid mi rton/ /byis pa dang ni byis par 'thun 'byor ba/ /ji ltar mi gtsang ba dang mi gtsang bzhin/ /mkhas pa dag ni mkhas pa'i skye bo dang / /'thun zhing 'byor pa mar dang snying ku bzhin/ /'khor ba'i nyes la so sor ma brtags te/ /las kyi rnam par smin la mi 'jug cing / /sangs rgyas rnams kyi tshig la ma dad pas/ /byis pa de dag bcad cing gtub par 'gyur/ /mi 'thob rab tu rnyed dka' thob nas ni/ /bzo yi gnas dag la ni mkhas ma gyur/ /dbul por gyur cing nor yang yong med de/ /de nas 'tsho ba med pas rab tu 'byung / /sangs rgyas bstan 'dir de dag rab byung nas/ /lhung bzed chos gos dag la chags par 'gyur/ /de dag sdig pa'i grogs pos yongs zin pas/ /bde bar gshegs pa'i bslab pa mi spyod de/ /de dag bdag gi tshul khrims ma mthong bas/ /byis pa dag ni sems gnas mi rnyed cing / /nyin mtshan rnal 'byor la yang mi brtson pas/ /de dag sdig pa'i lam la smod mi byed/ /lus dang sems ni shin du mi sdom pa/ /de ni tshig tu mi smra ci 'ang med/ /su yis nyes pa ci byas brgal lo zhes/ /rtag tu gzhan gyi nyes pa tshol zhing rtog /byis pa dag ni zas la chags gyur nas/ /zas la tshod rig par ni mi byed de/ /sangs rgyas bsod nams kyis ni zas rnyed kyang / /de la byis pa byas pa gzo mi 'gyur/ /de dag kha zas ro zhim bsod pa dag /rnyed nas rnal 'byor mi brtson za zhing 'thung / /de dag la ni zas de gdug par 'gyur/ /bal glang phru gus rtsa ba ma bkrus bzhin/ /mkhas shing rtogs pa blo gros ldan pa ni/ /kha zas bzang po gtsang ma za mod kyi/ /de dag la ni chags par mi 'gyur te/ /ma chags bzhin du za zhing rnal 'byor brtson/ /mkhas shing rtogs pa blo gros ldan pa dag /byis pa gang nas legs par 'ongs shes smra/ /de bzhin snyan pa'i tshig gis nyer bsdus nas/ /de dag la ni snying rje nye bar 50.31b 'jog /byis pa la ni gang phan snying brtse ba/ /de la gnod pa byung na byis pa dga'/ /de lta'i nyes phyir byis pa rnam spangs te/ /ri dgas bzhin du gcig pu dgon par gnas/ /mkhas pas 'di 'dra'i nyes pa rig nas ni/ /shes rab dman bsten bdag ni mtho ris nyams/ /byang chub thob par ga la 'gyur snyam ste/ /byis pa rnams dang nam yang yong mi sten/ /byams pa la ni mkhas pa gnas par 'gyur/ /snying rje dag la gnas shing dga' spyod dang / /srid pa kun la rtag tu btang snyoms pa/ /ting nge 'dzin bsgoms byang chub reg par 'gyur/ /mya ngan med zhi byang chub des rtogs shing / /sems can na rgas gzir bar rig nas ni/ /de la snying rje rab tu nyer bzhag ste/ /don dam ldan pa'i gtam rnams ston par byed/ /rgyal ba'i chos nyid brjod du med pa dang / /bde bar gshegs pa'i bden pa sus shes pa/ /de dag 'di lta bu yi chos thos nas/ /'phags pa zang zing med pa'i bzod pa 'thob/ /chos zab mo la bzod pa'i le'u ste dgu pa'o// // de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na nan tan snying por bya'o zhes gzhon nu khyod kyis de ltar bslab par bya'o/ /de ci'i phyir zhe na/ gzhon nu byang chub sems dpa' sems dpa' chen po nan tan snying por byed pa la bla na med pa yang dag par rdzogs pa'i byang chub kyang rnyed par dka' ba ma yin na ting nge 'dzin 'di lta ci smos/ de nas zla 'od gzhon nur gyur pa stan las langs te/ bla gos phrag pa gcig tu bzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar nas bcom ldan 'das la 'di skad ces gsol to/ /bcom ldan 'das 'di ltar bcom ldan 'das kyis byang chub sems dpa' sems dpa' chen po rnams la gdams pa dang / rjes su bstan pa 'di legs par bstan cing legs par bkod pa dang / byang chub sems dpa'i bslab 50.32a pa thams cad bstan te/ legs par bshad pa dang legs par bkod pa bcom ldan 'das ngo mtshar to/ /bcom ldan 'das 'di ni de bzhin gshegs pa'i spyod yul te/ nyan thos dang rang sangs rgyas thams cad kyi sa'ang ma lags na mu stegs can gzhan gyi lta ci smos/ bcom ldan 'das bdag kyang nan tan snying por bgyis te lus dang srog la yang mi lta bar bgyis la de bzhin gshegs pa'i rjes su slob bo/ /de ci'i slad du zhe na/ bcom ldan 'das bdag ni de bzhin gshegs pa'i rjes su slob par 'tshal lo/ /bcom ldan 'das bdag ni bla na med pa yang dag par rdzogs pa'i byang chub mngon par rdzogs par 'tshang rgya bar 'tshal lo/ /bcom ldan 'das bdag ni bdud sdig can shin du gzhig par 'tshal lo/ /bcom ldan 'das bdag ni sems can thams cad 'jigs pa thams cad dang sdug bsngal thams cad las bsgral bar 'tshal lo/ /bcom ldan 'das kyis phyag g.yas pa bdag gi spyi bo la gzhag par gsol/ de la 'di skad ces bya ste/ nam mkha' 'dra zhing rdul bral gzugs bzang 'chang / /shes rab sras po lus dang mtshan mi mnga'/ /yon tan rgya mtsho rab zab thugs rje can/ /mtshungs med phyag ni bdag gi spyi bor zhog /de skad ces gsol pa dang / bcom ldan 'das kyis phyag g.yas pa dge ba'i rtsa ba du ma las byung ba/ mtshan sna tshogs kyis shin du brgyan pa/ lha'i gser gyi kha dog lta bu zla 'od gzhon nur gyur pa'i spyi bor bzhag go/ /bcom ldan 'das kyis zla 'od gzhon nur gyur pa'i spyi bor phyag g.yas pa bzhag ma thag tu skad cig de nyid la zla 'od gzhon nur gyur pa la dpa' bar 'gro ba dang nam mkha' mdzod dang rdo rje lta bu dang yid ltar mgyogs pa dang gzugs thams cad ston pa dang sgrib pa med pa'i mtha' dang de bzhin gshegs pa thams cad ston pa dang stong pa nyid thams cad kyi dbang bskur ba thob pa la sogs pa shes rab 50.32b kyi pha rol tu phyin pa las byung ba'i ting nge 'dzin gyi sgo bye ba khrag khrig brgya stong du ma brjod du med pa'i yang brjod du med pa dag mngon du gyur to/ /gzungs dang rnam par thar pa'i sgo du ma mngon du gyur to/ /dga' ba dang bde ba gang de 'phags pas brjod pa/ lha yul ba rgya che zhing dpe med pa/ sangs rgyas dang byang chub sems dpa' thams cad kyi spyod yul du rig pa rab tu thob bo/ /de la 'di skad ces bya ste/ dra bas mdzes 'brel bum pa lcags kyu'i mtshan mnga' zhing / /dpal be'u 'khor lo rgyal mtshan ba dan nya ris mnga'/ /bskal pa bye mang rin chen gtong la zhugs pa'i phyag /bcom ldan 'das kyis zla 'od gzhon nu'i spyi bor bzhag /de nas lha yul pa rgya che zhing dpe med pa/ sangs rgyas dang byang chub sems dpa' thams cad kyi spyod yul du rig pa'i dga' ba dang / bde ba dang ldan par gyur nas stan las langs te bla gos phrag pa gcig tu bzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas bcom ldan 'das la tshul dang 'thun pa'i tshigs su bcad pa dag gis mngon par bstod do/ /bla med mi 'jigs sbyin pa khyod la phyag 'tshal lo/ /gzhan phan sems can gnyen rtsa khyod la phyag 'tshal lo/ /stobs bcu bden pa'i rtsal mnga' khyod la phyag 'tshal lo/ /bde gshegs mi mnyam mnyam pa khyod la phyag 'tshal lo/ /mgon po shin du thugs rje can la phyag 'tshal lo/ /dpa' bo dgra bzhi rnam par btul la phyag 'tshal lo/ /brtson pa dam pa'i don rnams mkhyen la phyag 'tshal lo/ /chos kyi sku mchog mnga' ba'i lha la phyag 'tshal lo/ /snying rje byams 'od rgyal ba'i nyi ma mun sel ba/ /shes rab shin du yangs pa'i nam mkha'i dkyil du shar/ /don dam shin du zab pa'i chos rnams ston mdzad pa/ /lha khyod la ni rtag tu bdag kyang skyabs su mchi/ /de nas zla 'od gzhon nur 50.33a gyur pas bcom ldan 'das la tshul dang 'dra ba'i tshigs su bcad pa dag gis mngon par bstod nas bcom ldan 'das la 'di skad ces gsol to/ /bcom ldan 'das bdag la thugs brtse ba'i slad du byang chub sems dpa'i dge 'dun dang dge slong gi dge 'dun dang bcas pa sang bdag gi sdum par bshos gsol bar thugs la gnang bar mdzad du gsol/ de la 'di skad ces bya ste/ bdag gi sdum par gtsang ma'i bshos gsol bar/ /mi dbang sras dang bcas la gsol ba 'debs/ /thub pa'i dbang po bdag la thugs brtse'i phyir/ /mgon po lha yi gtso bos gnang bar mdzod/ /de nas bcom ldan 'das cang mi gsung bar gyur te/ zla 'od gzhon nur gyur pa la thugs brtse ba'i phyir/ byang chub sems dpa'i dge 'dun dang / nyan thos kyi dge 'dun dang thabs gcig tu zla 'od gzhon nur gyur pa'i khyim du sang bshos gsol bar cang mi gsung bar gyur pas gnang ngo / /de nas zla 'od gzhon nur gyur pas bcom ldan 'das cang mi gsung bar gyur pas gnang bar rig nas stan las langs te bla gos phrag pa gcig tu bzar nas bcom ldan 'das kyi zhabs la mgo bos phyag 'tshal te/ bcom ldan 'das la lan gsum bskor ba byas nas bcom ldan 'das kyi drung nas song ngo / /de nas zla 'od gzhon nur gyur pa bya rgod kyi phung po'i ri las babs nas de'i tshe rgyal po'i khab kyi grong khyer chen po nas ri'i rgyal po bya rgod kyi phung po'i bar du de'i bar gyi lam thams cad legs par brgyan te/ 'di ltar bcom ldan 'das la mchod pa bya ba'i phyir lam yangs shing che la rtswa dang sdong du dang tsher ma dang rdo dang gyo mo dang gseg ma med par bsal te bye ma gtsang mas bdal nas/ ka tsa lin di ka ltar 'jam zhing reg na bde ba/ dbyangs dga' bar byas te/ lha'i me tog ud pa la dang pad ma dang ku mu da dang pad ma dkar po dang dri mchog dang a ti mug ta ka dang ma li ka dang tsam pa ka dang skya nar dang kun da dang ti la ka dang ke sa ra 50.33b dang mya ngan 'tshang la sogs pa dus thams cad kyi me tog bzang pos ni kun du khebs par byas/ gdugs dang rgyal mtshan dang ba dan dang rnam par rgyal ba'i ba dan dang rin po che'i rta babs dang bla re ni bres/ rin po che'i bdug spos kyi snod sna tshogs ni ngos la spyangs/ rin po che'i bdug spos kyi snod de dag thams cad nas ni a ga ru nag pos gang ba'i du ba 'thul/ phyogs phyogs su ni bro mkhan dang gar mkhan lha'i glu gar dang rol mo shin du 'byor cing legs par bslabs pa rnams bkod/ skyes pa dang bud med dang khye'u dang bu mo shin du brgyan pa khar rnga dang tu Na ba dang pi bang rgyud gcig pa dang pi bang dang gling bu dang rdza rnga dang rnga mu kun da dang rdza rnga chen po thogs pa rnams bkod/ lam gyi ngos gnyis su shing rta la mthon po lha'i rin po che sna tshogs dang 'dzam bu'i chu bo'i gser las byas pa'i dril bu g.yer ka'i dra ba bres shing sgra 'khrol bas brgyan pa rnams dang rin po che sna tshogs kyi mkha' rten bye ba khrag khrig brgya stong du ma dang / rin po che sna bdun gyi shing sna tshogs khrun dang sboms su ldan pa sna tshogs dang dus thams cad kyi lo ma dang / me tog dang 'bras bu phun sum tshogs pa dag btsugs so/ /de la 'di skad ces bya ste/ lam ni sna tshogs shin du legs par brgyan/ /bla res dang ni gdugs dang ba dan sgreng / /sil snyan dag gi sgra dag rab tu 'byin/ /glu sgra yid du 'ong ba'ang de bzhin te/ /bud med mang po bro rdung gar byed dang / /gos bzang khrag khrig rnam mang sna tshogs dang / /me tog phreng ba bzang zhing mdzes pa yis/ /lam mchog yangs pa de ni rab tu brgyan/ /grong mchog gtsang ma 'dir ni thugs rje can/ /sangs rgyas thub pa'i zla ba gshegs so zhes/ /zla 'od gzhon nus dad pa rab bskyed nas/ /rgya che yangs pa'i lam ni shin du brgyan/ /lha rdzas kyi ni bye ma gtsang ma bdal/ /rab tu yid 'ong me tog mchog rnams bkram/ /rin chen rta babs dag kyang legs par btsugs/ /lam ni lha yi grong khyer bzhin du mdzes/ /zla 'od gzhon nu shin du yid 50.34a dga' bas/ /de ltar lam rnams sna tshogs legs brgyan te/ /lha dang lha min klu yis de mthong nas/ /ngo mtshar gyur cing a la la zhes smra/ /lam gyi g.yas g.yon 'dzam bu'i chu gser gyi/ /ta la mtho zhing bzang la zlum pa dag /rin chen dril bu'i dra bas g.yogs shing dkris/ /sgra 'khrol rnam pa du ma mang po btsugs/ /de bzhin rin chen sdong po khrag khrig ni/ /dus kun gyi yang me tog rgyas pa btsugs/ /de yis yangs pa'i lam brgyan mdzes gyur pa/ /mtho ris na ni dga' ba'i tshal bu bzhin/ /rin po che las byas pa'i mkha' rten ni/ /dra ba'i chun po 'od 'bar shin du mdzes/ /dpe med mthong zhing che la rgyas pa dag / /lam gyi g.yas g.yon 'gram du btsugs shing bkod/ /sangs rgyas 'jig rten gsum dbang gang nas ni/ /rgyal po'i khab kyi grong du gshegs pa yi/ /lam chen de ni de dag rab brgyan pas/ /rnam pa thams cad du yang mdzes par gyur/ /g.yas g.yos su ni rin chen pog phor spyangs/ /de dag a ga ru yang nag pos bkang / /pog phor kun nas du ba sprin bzhin 'khrigs/ /lha'i dri zhim rnam pa sna tshogs 'byung / /ji srid grong khyer chu dron sgo bar dang / /ri rgyal bya rgod phung po ji srid par/ /zla 'od gzhon nur gyur pas rgyal ba'i phyir/ /lha rdzas dpe med yangs pas brgyan pa byas/ /de nas zla 'od gzhon nur gyur pas lam de rin po che bkod pa rnam pa sna tshogs du mas brgyan pa byas nas zla 'od gzhon nur gyur pa bya rgod kyi phung po'i ri las babs te/ rgyal po'i khab kyi grong khyer chen po gang na ba dang rang gi lha'i khyim mtho zhing che la yangs pa gang na yod pa der song ste phyin nas rang gi khyim du zhugs so/ /zhugs nas bza' ba dang bca' ba dang myang ba mang zhing bzang ba g.yor bcug ste/ zhal zas ro sna brgya pa sbyar nas de'i mtshan mo 'das pa dang rgyal po'i khab kyi grong khyer chen po chag chag legs par btab/ byi dor legs par byas nas me tog sil ma ni 50.34b bkram/ bdug spos kyis ni bdugs/ bla re ni bres/ dar gyi lda ldi dang chun po ni spyangs/ gdugs dang rgyal mtshan dang ba dan ni bsgreng ste/ de ltar rgyal po'i khab kyi grong khyer chen po'i lam srang dang grong bar du bcas pa rdo dang gyo mo dang gseg ma med par byas/ me tog sna tshogs ni bkram/ tsan dan gyi phye mas ni gtor/ skar khung dang rta babs dang sgo gang dang ba gam dang skar khung dra ba ris dang zla ba kham pa lta bus ni brgyan cing tsan dan gyis byug pa byas te/ de ltar rgyal po'i khabs kyi grong khyer chen po dpag tu med pa'i bkod pas rab tu brgyan nas/ rang gi khyim yang rgyan sna tshogs pa rnam pa du mas brgyan te/ rin po che'i phreng ba rnam pa du ma ni rab tu spyangs/ dga' ldan gyi ris kyi lha'i gos kyis ni brgyan cing nye 'khor yang mdzes par byas/ phreng ba dang lda ldi rnam pa tha dad pa du mas ni brgyan pa byed du bcug /rin po che'i stan bye ba khrag khrig brgya stong du ma ni 'ding du bcug ste/ bcom ldan 'das la mchod pa bya ba'i phyir de'i dbus su bcom ldan 'das kyi lha rdzas kyi seng ge'i khri lha'i dang mi'i las 'das pa bshams so/ /rin po che sna tshogs kyi pog phor ni phyogs bzhir spyangs te/ de dag nas a ga ru 'ba' zhig gi du ba 'thul bar byas so/ /zla 'od gzhon nur gyur pas khyim mchog de yang 'di lta ste/ bcom ldan 'das kyis yongs su longs spyad pa'i phyir lha'i glu gar dang sil snyan ni bsgrags/ gdugs dang rgyal mtshan dang ba dan ni bsgreng / lha dang klu dang gnod sbyin dang / dri za dang lha ma yin dang nam mkha' lding dang mi 'am ci dang lto 'phye chen po dang mi dang mi ma yin pa brgya stong gis ni gang zhing rnam par bltas/ rin po che'i me tog sna tshogs rnam pa du mas ni gang bar byas so/ /de la 'di skad ces bya ste/ zla 'od kyis ni khyim mchog yangs pa yang / /rgya cher thams cad shin du brgyan par byas/ /gang la 'jig rten sgron ma bzhugs pa yi/ /lha rdzas seng ge'i khri ni dbus su btsugs/ /'jig rten sgron mdzad rgyal ba gtso 50.35a bo yi/ /dge 'dun dag ni gang la 'dug 'gyur ba/ /rin chen shin tu rnam par bkra ba'i stan/ /bye ba stong phrag mtha' yas legs par bting / /rin chen sna tshogs kun gyi bdug spos snod/ /a ga ru yis shin du gang byas te/ /phyogs rnams thams cad du'ang rnam par spyangs/ /de dag nas ni yid 'ong dri rnams 'thul/ /zla 'od kyis ni stobs bcu gshegs pa'i phyir/ /rin chen me tog mdzes pa sna tshogs dang / /me tog dri mchog bzang po rnam mang gis/ /khyim gyi sa gzhi bzang po kun du bkram/ /gar byed glu len sil snyan sgra dag gis/ /khyim mchog thams cad kun du sgra yis gang / /gdugs dang ba dan dag kyang shin du sgreng / /khyim kun lam mer mdzes pa lha yi bzhin/ /zla 'od gzhon nu'i khyim mchog chen po yang / /skyes bu na chung tshogs kyis rgyan gyur cing / /klu dang gnod sbyin lha min mang pos gang / /brgya phrag mang po'i lha yis rnam par bltas/ /de nas zla 'od gzhon nur gyur pas rgyal po'i khab kyi grong khyer chen po yang brgyan/ bdag gi khyim yang legs par brgyan nas de'i mtshan mo 'das pa dang / nang par snga rab kyi dus kyi tshe sil snyan sna tshogs brgya dag ni rab tu dkrol/ gdugs dang rgyal mtshan dang ba dan bye ba du ma ni bsgreng ste/ byang chub sems dpa' bye ba khrag khrig brgya stong phrag brgyad bcu thams cad kyang lha'i me tog mAn+dA ras snyim pa bkang ste/ de dag las la la ni skye ba gcig gis thogs pa'i byang chub sems dpa' sems dpa' chen po 'di lta ste/ spyan ras gzigs dbang phyug dang mthu chen thob dang spos kyi glang po che dang rin po che'i tog dang mngon par 'byung dka' dang 'jam dpal gzhon nur gyur pa dang dpa' bo'i sde dang lag bzang dang rin chen me tog dang mthong ba don yod dang byams pa la sogs pa byang chub sems dpa'i tshogs chen pos yongs su bskor cing mdun du bdar te/ rta dang ba lang du ma shin du brgyan cing ma zhon par khrid 50.35b pa mang po dang 'dres pa/ gzhan yang yul gyi mi dpag tu med pa'i tshogs dang bdag nyid kyang lha'i me tog mAn+dA ras snyim pa bkang ste byang chub sems dpa'i mthu chen po dang byang chub sems dpa'i rdzu 'phrul chen po dang byang chub sems dpa'i cho 'phrul chen po dang / byang chub sems dpa'i a la la zhes lha'i ga zha'i sgra yid du 'thad cing yid du 'ong ba yid 'phrog pa dag sgrog cing / rgyal po'i khab kyi grong khyer chen po'i chu dron gyi sgo nas phyir byung ste/ ri'i rgyal po bya rgod kyi phung po ga la ba dang / bcom ldan 'das ga la ba der song ste phyin nas bcom ldan 'das kyi zhabs la mgo bos phyag 'tshal te/ bcom ldan 'das la lan gsum bskor ba byas nas lha'i me tog mAn+dA ra bas snyim pa gang bas bcom ldan 'das la mngon par gtor te phyogs gcig tu 'khod do/ /byams pa la sogs pa byang chub sems dpa' sems dpa' chen po de dag kyang bcom ldan 'das kyi zhabs la mgo bos phyag 'tshal nas bcom ldan 'das la lan gsum bskor ba byas te/ so so'i snyim pa na me tog mAn+dA ra ba yod pa des bcom ldan 'das la mngon par gtor nas phyogs gcig tu 'khod do/ /zla 'od gzhon nur gyur pa phyogs gcig tu 'dug pa stan las langs te/ bla gos phrag pa gcig tu gzar nas pus mo g.yas pa'i lha nga sa la btsugs te bcom ldan 'das ga la ba de logs su thal mo sbyar ba btud nas gdugs tshod la bab pa/ bcom ldan 'das bshos gtsang sbyar lags te/ da de'i dus la bab par bcom ldan 'das kyis mkhyen na/ byang chub sems dpa'i dge 'dun dang dge slong gi dge 'dun du bcas pa dang dbang che ba/ dbang che bar grags pa rgya che zhing rlabs che ba'i lha dang klu dang gnod sbyin dang dri za dang lha ma yin dang drang srong dang nam mkha' lding dang mi 'am ci dang lto 'phye chen po dang grul bum dang yi dgas dang srul po dang mi dang mi ma yin pa dag dang yang thabs gcig tu rgyal po'i khab kyi grong 50.36a khyer chen por gshegs shing bdag gi sdum par yang gdugs tshod gsol ba'i dus la bab bo/ /bde bar gshegs pa gdugs tshod la bab po/ /de la 'di skad ces bya ste/ bdag gis grong khyer mchog kun legs par brgyan/ /mgon po bdag gi sdum pa'ang de bzhin te/ /lha'i zhal zas ro brgya bshams shing sbyar/ /gdugs tshod bab kyis bde gshegs bzhengs su gsol/ /drang srong mchog gis phyag bgyis stobs bcu yon tan 'chang / /sras kyi tshogs kyis yongs su bskor cing grong du gshegs/ /snang byed nyi ma mun pa'i tshogs sel bzhengs su gsol/ /bcom ldan bdag gi sdum par bshos gsol gdugs tshod bab/ /sras dang thabs gcig bdag gi sdum par gshegs su gsol/ /'gro ba mang po'i tshogs kyi don kyang bgyis par 'gyur/ /ji ltar mar me mdzad kyis khyod la lung bstan pa/ /de bzhin bdag kyang 'jig rten mngon sum lung ston cig /bdag 'dir lung bstan 'jig rten thos nas ni/ /sems kyang mchog tu rgya cher rab bskyed de/ /'gro ba 'di dag thams cad sangs rgyas 'gyur/ /'di na snod min sems can gang yang med/ /bzhengs shig bzhengs shig stobs bcu mnga' ba'i lha/ /bdag la rjes su phan mdzod sdum par gshegs/ /ji ltar bdag gi sdum par khyod gshegs pa/ /de bzhin byang chub shing dbang drung bdag mchi/ /byang chub shing dbang de drung bdag mchis nas/ /mi g.yo mi 'gul bar ni gnas bcas te/ /byams pas sder bcas bdud rnams pham bgyis nas/ /khyod kyis brnyes bzhin byang chub thob par bgyi/ /de nas bcom ldan 'das kyis zla 'od gzhon nur gyur pas gsol pa mkhyen nas/ zla 'od gzhon nur gyur pa la tshigs su bcad pas slar bka' stsal pa/ longs shig zla 'od rgyal ba'i sras/ /longs shig sbyin dga' sems can mchog / /longs shig snying rje tshul khrims brtan/ /zan la deng ni khyim du 'dod/ / 50.36b de nas bcom ldan 'das kyis tshigs su bcad pa 'di gsungs nas sngar gdan las bzhengs te/ sham thabs gsol/ chos gos dang lhung bzed bsnams nas dge slong 'bum du tshang ba'i dge slong gi dge 'dun chen po dang thabs gcig tu byang chub sems dpa' sems dpa' chen po shin du mang pos bskor cing mdun du bdar te/ lha dang klu dang gnod sbyin dang dri za dang lha ma yin dang drang srong dang nam mkha' lding dang mi 'am ci dang lto 'phye chen po dang grul bum dang yi dgas dang srul po dang mi dang mi ma yin pa brgya stong du mas mchod cing mngon par bstod nas/ sangs rgyas kyi mthu chen po dang / sangs rgyas kyi rdzu 'phrul chen po dang sangs rgyas kyi cho 'phrul chen po dang sangs rgyas kyi spyod lam gyis 'od zer bye ba khrag khrig brgya stong du ma ni rab tu gtong / sil snyan bye ba khrag khrig brgya stong ni rab tu dkrol/ gdugs dang rgyal mtshan dang ba dan bye ba khrag khrig brgya stong du ma ni mngon par sgreng / gzugs dang kha dog rags pa du ma rnam pa sna tshogs kyi ngang ba dang khrung khrung dang ngur pa dang bzhad dang tsa ko ra dang rma bya dang tsa sha dang ri skegs dang khu byug dang ka la ping ka dang ku na la la sogs pa bya'i khyu mang po du ma sgra snyan cing 'jam la yid du 'ong ba rnam pa du ma 'byin pas ni bar snang la lha bzhin du so so'i nga ros rol mo'i sgra dbyangs 'byin/ lha'i rin po che sna tshogs kyi bdug spos kyi snod yangs shing che ba bye ba khrag khrig brgya stong du ma thams cad kyang bai dUr+ya dang an da rnyil dang shel dang spug gi yu ba can dag gnod sbyin gyi dbang po gzugs bzang dang dbang po'i tog dang rad rod can dang ba ku la dang lngas rtsen dang shAkya 'phel la sogs pa bye ba khrag khrig brgya stong du ma dag gi lag pa gnyis na gtun 'dzin pa bzhin du thogs te/ spos sbrul gyi snying po dang go Shir Sha dang mri Na la dang ha ri dang ma la ya dang tsan dan dmar po dang a ga ru la sogs pas bkang ba'i du ba ni 'thul/ phyogs so so nas lhags pa'i rgyal po 50.37a dbang che ba/ dbang che bar grags pa rnams rta dang ba lang rgyan gyis shin du brgyan cing ma zhon par khrid pa'i tshogs du ma dang shing rta dang dpung bu chung gis yongs su bskor cing phreng ba dang lda ldi mang po dang rin po che'i phreng ba lag na thogs shing sngon logs nas rkang gis 'gro'o/ /rta dang glang po che legs par brgyan pa/ ma zhon par khrid pa dag kyang / rang gi stabs kyis mngon par 'gro zhing skad yid du 'ong la snyan pa 'byin to/ /tshangs pa yang bcom ldan 'das kyi g.yas phyogs nas mchod pa dang rim gro bsnyen bkur byed cing 'gro'o/ /g.yon phyogs nas ni lha'i dbang po brgya byin lha'i bu dbang che ba/ dbang che bar grags pa/ rgya che zhing rlabs che ba/ bgrang ba las 'das pa rnams lha'i cod pan bzang po dang gdu bu rgyan can dang rna cha dang gdu bu dang me tog rna rgyan dang rin po che'i tsong tsong dang me tog gi phreng bas lus brgyan cing / gzugs mngon par snang bas lha'i me tog mAn dA ra dang mdog mdzes dang ko bi dA ra dang s+thA la ka dang ku ra ba ka dang tsam pa ka dang dong ka'i me tog dang mya ngan 'tshang dang skya snar dang a ti mug ta ka dang ut+pal dang ba ku la dang mal li ka dang kun da dang ke sa ra dang pad ma dang ku mu da dang pad ma dkar po dang dri mchog dang rin po che'i phreng ba dang rin po che'i a ga ru dang shing rin po che'i 'bras bu can dag lag na thogs shing sil snyan sna tshogs brgya stong ni shin du dkrol/ gos bye ba ni g.yob cing a la la zhes ga zha'i sgra dag ni 'byin/ me tog gi char chen po ni rab tu 'bebs shing / bcom ldan 'das la mchod pa bya ba'i phyir nam mkha'i ngos thams cad bar mtshams med par gang bar 'khod de/ me tog dang spos dang phreng ba dang byug pa dang phye ma dang rin po che'i char rab tu 'bebs shing / bcom ldan 'das chu dron yod pa'i sgo nas rgyal po'i khab kyi grong khyer chen por gdugs tshod la gshegs so/ /de'i chos nyid ni 'di yin te/ de la 'di skad ces bya'o/ /sangs rgyas de bzhin gshegs pas dus mkhyen nas/ /dpa' bo yon tan kun gyi 50.37b rab brgyan pa/ /zhing rnams bsam gyis mi khyab snang mdzad cing / /bcom ldan mi yi seng ge gshegs par gyur/ /spyan ras gzigs dang mthu chen don yod dang / /spos kyi bal glang rin chen lag bzung dang / /rin chen tog dang 'byung dka' dpa' bo dang / /de dang gzhan dag rgyal ba'i zhabs 'bring byed/ /g.yas phyogs na ni mi pham 'dug gyur te/ /de ming byams pa yon tan mtha' yas phyug /bar du ma chod sangs rgyas 'gyur ba ste/ /bsod nams ye shes tshogs kyang rab tu rdzogs/ /byams dang btang snyoms dga' bas lus bsgoms shing / /chos kyi bdag nyid chen po snying rjes skyed/ /yon tan mtha' yas thub dbang yon tan sems/ /bde gshegs thugs rje can gyi zhabs 'bring byed/ /de yi rjes la bskal pa bzang po yi/ /blo gros chen po ldan pa ji snyed pa'i/ /sangs rgyas stong du bzhis ma tshang ba dag /de dag gis kyang byams pa mdun du bdar/ /gang sngon rgyal po'i khab kyi grong khyer 'dir/ /bskal pa dag la rgyal ba mtha' yas mchod/ /zla ba mdzes pa'i 'od 'dra lha yi lus/ /zla 'od dpa' bo yang ni mdun na 'dug /snying rje mchog gi g.yon phyogs 'dug pa ni/ /'jam dpal bye ba brgya phrag mang po dang / /dpa' bo rdzu 'phrul stobs kyis mngon 'phags pa/ /brgya phrag mtha' yas zhing du 'gro ba'o/ /de yi 'og tu nyan thos dge 'dun te/ /shA ri'i bu 'og maud gal nag po dang / /'od srung rab 'byor dga' bo ka phi na/ /bzang ldan rgyal po de bzhin kauN+Di n+ya/ /kun dga' de bzhin gnas brtan sgra gcan zin/ /legs 'ongs kron tsi gang po 'char ba po/ /nam gru gsus chen nye 'khor ma 'gags pa/ /ral pa can ni stong du tshang ba dag /nyan thos dge 'dun 'og tu thams cad kyang / /dka' thub drag mchog rig byed cho ga shes/ /dmod pa 'dor dang phan 'dogs nus pa yi/ /drang srong dul ba thal sbyor 'dud pa byed/ /zhi ba'i yid dang dul ba'i yid rnams kyis/ /sangs rgyas 50.38a 'jig rten sgron ma mdun bdar te/ /thugs rjer ldan pa'i mi yi seng ge gshegs/ /sems can stong rnams rab tu thar bar mdzad/ /ston zla tha chungs zla ba nya ba ltar/ /skar tshogs dbang po yongs su dag pa bzhin/ /tshangs pa stong phrag dag ni brgya mang gis/ /mtshungs pa med pa'i ston pa yongs su bskor/ /grong khyer gyi ni sgo stengs zhabs bzhag tshe/ /nags tshal stug por bcas pa'i sa yang g.yos/ /lha dang lha min lto 'phye'i tshogs rnams kyang / /me tog bzang po dri mchog 'thor bar byed/ /de nas bcom ldan 'das kyi zhabs g.yas pa 'khor lo rin po ches brgyan pa/ dge ba'i rtsa ba dpag tu med pa bsags pa/ sgo'i them pa la bzhag ma thag tu stong gsum gyi stong chen po'i 'jig rten gyi khams 'di rnam pa drug tu g.yos/ rab tu g.yos/ kun du rab tu g.yos/ 'gul rab tu 'gul kun du rab tu 'gul/ ldeg rab tu ldeg kun du rab tu ldeg /'khrugs rab tu 'khrugs kun du rab tu 'khrugs/ /chem chem rab tu chem chem kun du rab tu chem chem/ 'ur 'ur rab tu 'ur 'ur/ kun du rab tu 'ur 'ur te/ shar phyogs dma' na nub phyogs mtho/ nub phyogs dma' na shar phyogs mtho/ byang phyogs dma' na lho phyogs mtho/ lho phyogs dma' na byang phyogs mtho/ mtha' dma' na dbus mtho/ dbus dma' na mtha' mtho bar gyur nas 'jig rten du snang ba chen po yang byung bar gyur to/ /ngo mtshar dang rmad du byung ba'i cho 'phrul grangs med dpag tu med pa gzhan dag kyang snang ngo // //'phags pa ting nge 'dzin gyi rgyal po'i mdo/ bam po bzhi pa/ de'i chos nyid ni 'di yin te/ de la 'di skad ces bya'o/ /grong khyer mchog der 'dren pa gshegs pa na/ /sgo yi them pa la ni zhabs mchog bzhag pa'i tshe/ /de yi dpal gyis sa 'di rab tu g.yos/ /grong khyer mchog 'di'i sems can rab tu dga'/ /mi gang bkres shing skom par gyur pa dag /de tshe de dag bkres pa med par gyur/ /rgyal bas sgo yi them steng zhabs 50.38b bzhag tshe/ /bkres shing skom pa dag dang bral bar gyur/ /rgyal bas sgo yi them steng zhabs bzhag tshe/ /dmus long gyur pa'i mi gang ci yod dang / /rna bas mi thos mgon med bsod nams chung / /de dag thams cad mig dang rna ba thob/ /rgyal bas sgo yi them steng zhabs bzhag tshe/ /gshin rje'i yul gyi yi dgas gang yod pa/ /shin du sdug bsngal ngar snabs mchil ma za/ /thams cad 'od kyis reg pas bde bar gyur/ /rgyal bas sgo yi them steng zhabs bzhag tshe/ /brag gi rtse dang ri yi rtse mo dang / /shing mchog sA la dang ni dong ka rnams/ /thams cad sangs rgyas bzhugs pa'i phyogs su 'dud/ /rgyal bas sgo yi them steng zhabs bzhag tshe/ /rgya mtsho mthar thug grong dang grong khyer rnams/ /sa kun rnam pa drug tu rab tu g.yos/ /'dir ni gang la'ang gnod par gyur pa med/ /lha dang mi dang grul bum srin po dang / /skyes bu gnas pa dga' mgu sems rangs te/ /byang chub dam pa mchog la dad bskyed nas/ /'jig rten rnam par 'dren pa'i gdugs kyang 'dzin/ /rgyal bas sgo yi them steng zhabs bzhag tshe/ /sil snyan stong dag ma brdungs sgra 'byin te/ /shin du yid 'ong rol mo'i dbyangs thos pas/ /de tshe sems can thams cad rab tu dga'/ /sdong po stong phrag brgya dag 'dud par gyur/ /de tshe me tog kun kyang rab tu rgyas/ /bar snang las ni lha rnams brgya stong dag /rgyal ba la yang mi min mchod pa byed/ /rgyal bas sgo yi them steng zhabs bzhag tshe/ /glang po brgya dag sems dga' sgra 'byin te/ /rta dang ba glang rgyal po lus kyang stod/ /ri dgas rgyal po seng ge sgra 'byin byed/ /sa dbang rgyal po gang su ji snyed cig /phyogs dang phyogs mtshams dag nas lhags pa rnams/ /rgyal ba'i dpal gzi de 'dra mthong nas ni/ /rab tu sems dga' sa la 'dug cing 'dud/ /kha cig 'jig rten mgon la mngon par bstod/ /kha cig rgyal la me tog char 'bebs shing / /kha cig sor bcu 50.39a thal mo sbyar nas su/ /e ma rgyal ba thugs rje can zhes smra/ /kha cig mu tig do shal bzang po dang / /sna tshogs rgyan mang dga' skyed 'thor bar byed/ /byang chub sems mchog dpe med bskyed nas su/ /kha cig na bza' rin chen 'thor bar byed/ /kha cig gser gyi dra ba bzang po 'thor/ /kha cig spen tog rgyan bzang 'thor bar byed/ /la la gser gyi rgyan ni dam pa 'thor/ /kha cig de bzhin gdu bu 'thor bar byed/ /la la gdu bu bzang po de 'thor te/ /kha cig rin chen spras pa'i dpung rgyan 'thor/ /kha cig bdag cag sangs rgyas gyur cig ces/ /sems bskyed gos phran bzang po 'thor bar byed/ /'jig rten mgon po sgo na bzhugs pa'i tshe/ /mi dag kha cig gser gyi tsong tsong 'thor/ /sems dad gtsug gi nor bu mchog kyang mthor/ /la la rin chen dra ba 'thor bar byed/ /sems can shin du mi bzad sdug bsngal zhing / /gtse ba rnam mang zug rngus zug pa yang / /'dren pa skyes bu gtso bo'i dpal gyis ni/ /thams cad bde ba dang yang ldan par gyur/ /khu byug dang ni ri skregs rma bya dang / /de bzhin khrung khrung dang ni mtsho bya dang / /bya mang kun ni nam mkhar 'dug nas su/ /shin du yid 'ong mchog gi sgra yang 'byin/ /de tshe bya tshogs mang po rab dga' bas/ /'jam zhing yid du 'ong ba'i sgra phyung ste/ /gang gis snyan pa'i sgra skad de thos pa/ /de dag 'dod chags zhe sdang gti mug zhi/ /sems can bye bas dga' ba'i sgra thos nas/ /thams cad rjes su 'thun pa'i bzod thob ste/ /ma 'ongs dus na rgyal bar khyed 'gyur zhes/ /de dag kun la bde gshegs lung yang ston/ /de yi dus na nyon mongs mi 'byung ste/ /chos kyi rgyal la thams cad ri mor bcas/ /de tshe 'dren pa'i sku byad mthong nas ni/ /sangs rgyas ye shes mchog la mos bskyed de/ /bdag cag nam zhig 'di 'dra'i mkhyen thob snyam/ /bsam pa mkhyen nas rgyal ba lung ston te/ /bde bar gshegs pa'i ba spu khung re nas/ / 50.39b 'od zer dag ni stong phrag brgya yang byung / /de las lhag par gang gA'i bye snyed de/ /de dag gi yang mtshan ma gzung mi nus/ /de tshe nyi ma'i 'od kyang mi snang ste/ /me dang nor bu lha kun 'od kyang med/ /rgyal ba grong gshegs sangs rgyas rnam mdzes pa/ /de tshe 'od rnams thams cad yong mi mngon/ /tshogs chen dang ni bde gshegs lam bzhud tshe/ /gang du stobs bcu yi ni zhabs 'jog par/ /sa las pad ma dag ni stong phrag brgya/ /'dab ma bye ba stong ldan gtsang ma byung / /'dren pa grong khyer mchog tu gshegs pa'i tshe/ /de na nyal nyil mi gtsang med par gyur/ /grong khyer thams cad dri mchog bdug pa yi/ /spos ngad yid du 'ong ba kun nas ldang / /grong dang srang rnams yongs su dag gyur te/ /rdo dang bseg ma med cing spos chus btab/ /stobs bcu ldan pa'i bsod nams de 'dra ste/ /rnam pa sna tshogs me tog sil ma bkram/ /gnod sbyin brgya stong gtum por sems pa dag /sangs rgyas mi dbang gser 'dra mthong nas ni/ /'dren la dga' ba rgya che rab bskyed nas/ /sangs rgyas chos dang dge 'dun skyabs su 'gro/ /lha rnams bye ba dang ni brgya phrag stong / /mi dbang lta bar 'ongs pa de dag kun/ /bde bar gshegs la me tog char phab ste/ /me tog gtor nas nam mkha'i dkyil na 'dug /rgyal la mi yis me tog gang gtor ba/ /nam mkha'i ngos la me tog gdugs su gyur/ /lha rnams kyis ni me tog gtor ba yang / /sa steng lha yi me tog bkram par gyur/ /lha dang mi dang grul bum srin po rnams/ /de mthong nas ni nam yang ngoms mi myong / /mgon po stobs bcu ldan pa mthong nas kyang / /rab tu dga' zhing sems bde rangs par gyur/ /nam tshe skyes bu mchog gi sku mthong nas/ /sems can thams cad dga' mgu rangs gyur pas/ /lha yi me tog la yang yid mi sems/ /de dag la ni ngo mtshar 'dzin pa med/ /stobs bcu'i g.yas phyogs na ni tshangs pa ste/ /de bzhin g.yon na brgya byin lha yi rgyal/ /nam mkha'i dkyil na lha mang bye 'khod de/ /skyes bu mchog 50.40a la shin tu gus pa skyed/ /lha dang lha min dag gis rgyal ba bskor/ /lha dang mi yi dpal gzi kun phrogs nas/ /zhabs mthil sa la ri mo 'byin bzhin du/ /grong khyer du ni bcom ldan spyan drangs gshegs/ /sku lus dpe byad bzang pos brgyan pa ni/ /nam mkha' skar ma dag gis gang ba bzhin/ /nam mkha' la ni zla ba nya ba ltar/ /rgyal po'i lam na sangs rgyas lam me bzhugs/ /nor bu rin chen rnam dag bzang po ni/ /nyes pa'i skyon bral rab tu snang bar byed/ /phyogs dang phyogs mtshams su'ang 'od gtsang byung / /de bzhin rgyal ba 'jig rten kun snang mdzad/ /lha dang lha min dag gis rgyal ba bskor/ /mi yi gtso bo rgyal po'i khabs tu gshegs/ /zhabs mthil sa la ri mo 'byin bzhin du/ /zla 'od gzhon nu'i khyim du sangs rgyas gshegs/ /grong khyer mchog ni kun du legs brgyan te/ /rgyal mtshan bye ba phrag stong rab tu sgreng / /de yi sa kun spos bzang rnam par byugs/ /yid 'ong de bzhin dbyar gyi me tog gtor/ /gang tshe bde gshegs gtam rnams ston pa na/ /mgon po srang bzhud mi la thugs brtse'i phyir/ /rgyal bas der ni 'phrul pa rnam sprul te/ /de dag la yang sangs rgyas chos bzang ston/ /srog chags brgya stong dag gis de thos nas/ /sangs rgyas ye shes mchog la smon lam 'debs/ /nam bdag 'di 'dra'i ye shes thob snyam ste/ /bsam pa mkhyen nas rgyal ba lung yang ston/ /gang gis rgyal ba mi dbang spyan drangs pa/ /sbyin pa de ni mu mtha' med gyur pa/ /rnyed mchog bsam gyis mi khyab des rnyed ces/ /la la dag ni de la mos pa skyed/ /'khor ba dag na shin du mthong dka' ba/ /skye dgu dag la phan mdzad thugs kyang brtse/ /thugs rje can de bdag gis sang la yang / /spyan drang snyam du la la sems kyang skyed/ /la la ba gam cog gi steng 'dug cing / /lus ni shin du sdug cing mdzes par brgyan/ /byang chub sems mchog dam pa bskyed nas ni/ /stobs bcu ldan la lha yi mi 50.40b tog 'thor/ /la lus bla med sems mchog rab bskyed nas/ /me tog tsam pa mdzes pa'i phreng ba dang / /a ti mug ta de bzhin dbyar gyi spos/ /dar gyi lda ldi dag kyang la la 'thor/ /kha cig gos kyis shin du lus brgyan te/ /me tog bzang po dag kyang thogs shing 'greng / /me tog sna tshogs dar gyi lda ldi thogs/ /rgyal ba thub chen de yi phyogs su 'thor/ /la la pad ma dang ni ku mu da/ /ut+pal gser gyi me tog bzang po 'thor/ /la la rin chen me tog der 'thor te/ /la la tsan dan phye ma 'thor bar byed/ /'dren pa grong khyer mchog tu gshegs pa'i tshe/ /ngo mtshar dpag tu med pa rnams kyang byung / /mtshungs med de dag brjod par mi nus te/ /sangs rgyas ye shes skye bo bye mangs bkod/ /mi che mi gdung bden pa mthong ba dang / /gzhan yang gya nom snang dang shin du mthong / /de bzhin 'og min 'dod chags bral ba rnams/ /thams cad mi dbang blta phyir nye bar lhags/ /de bzhin dge ba'i lha rnams dpag med dang / /dge chung lha gzhan dag kyang sems dga' zhing / /dge rgyas khrag khrig dpag tu med pa rnams/ /'dren pa drang srong chen po lta phyir lhags/ /tshad med 'od kyang de bzhin dpag med dang / /'od chung gi ni lha rnams ci yod dang / /'od gsal ba yang khrag khrig mang po der/ /'jig rten mgon po blta phyir de dag lhags/ /tshangs 'khor ba dag brgya stong mang po dang / /tshangs pa'i 'dun 'don dad pa de bzhin te/ /tshangs ris kyang ni brgya phrag mang po rnams/ /thams cad 'dren pa lta phyir nye bar lhags/ /de bzhin gzhan 'phrul gyi yang lha rnams dang / /gzhan yang 'phrul dga'i sems can dag pa dang / /dga' ldan 'thab bral lha rnams rab dga' zhing / /thams cad sangs rgyas phyag 'tshal nye bar lhags/ /brgya byin lha rgyal sum bcu rtsa gsum pa/ /lha yi bu mo bye ba brgya dag lhags/ /'dir ni me tog char kyang rab 'bebs shing / /sangs rgyas thub dbang blta 50.41a phyir nye bar lhags/ /phyogs bzhi'i 'jig rten skyong ba bzhi po yang / /rnam thos bu dang klu dbang mig mi bzang / /yul 'khor srung dang 'phags skyes sems dga' ste/ /de kun mi dbang bstod cing nye bar lhags/ /gnod sbyin rgyal po mthu ldan ir bir yang / /dga' ba skyes shing gnod sbyin brgyas bskor te/ /nam mkha'i dkyil na 'dug cing sems dga' nas/ /me tog sna tshogs du ma'i char kyang 'bebs/ /rtag tu myos dang phreng 'dzin lha rnams kyang / /spos dang phreng ba rnam pa sna tshogs thogs/ /'khor dang bcas pa thams cad sems dga' zhing / /de na skyes bu mchog la mchod pa byed/ /gnod sbyin lag na gzhong thogs mang po yang / /gnod sbyin bu mo de dag rab brgyan te/ /gnod sbyin rol mo rab tu snyan pa dang / /shin du yid 'ong brgyas ni sangs rgyas mchod/ /glu dbyangs sil snyan 'jam zhing snyan pa la/ /mkhas pa mi 'am ci yi bu mo stong / /mi 'am ci yi rgyal po ljon pa yang / /rgyal mchog mchod par spos ngad ldang las lhags/ /bde mchog stobs ldan sgra gcan thags bzang ris/ /lha min bu mo stong gi 'khor bcas dang / /lha min rdzu 'phrul chen po gzhan mang yang / /rin po che yi char phab nye bar lhags/ /srin po khrag khrig brgya phrag mtha' yas kyang / /srin po bye ba brgya yis bsnyen bkur zhing / /me tog sil ma sna tshogs mang po yang / /skyes bu mchog la gus par rab tu 'thor/ /klu yi rgyal po ri bo legs pa yang / /'khor mang de bzhin gshegs pa'i drung du lhags/ /rin chen me tog rnam mang mchog thogs te/ /bde gshegs zhabs gnyis la ni rab tu 'dud/ /klu dbang pad ma dang ni pad ma che/ /de bzhin nor yod mtha' yas gdengs ka can/ /de dag khyu mchog drung du nyer lhags te/ /bde bar gshegs la gus pas rab tu 'dud/ /klu yi rgyal po nor bu yid dga' zhing / / 50.41b khyu mchog zhabs kyi drung du nye bar 'ongs/ /klu yi me tog dri zhim mchog thogs te/ /ha cang mi ring bde gshegs spyan sngar 'dug /de bzhin ma dros klu yi rgyal po yang / /klu yi bu mo shin du bslabs pa'i mchog /rnga dang sil snyan stong phrag brgya rdung zhing / /'jig rten mgon po mchod phyir nye bar lhags/ /ma dros pa yi bu pho lnga brgya dag /ye shes yangs pa bla med tshol ba'i phyir/ /gnyen mdab dag gis bskor cing dgar gyur nas/ /rang gis rang byung mchod phyir nye bar lhags/ /de bzhin klu yi rgyal po sog med kyang / /skyes bu mchog la thar sbyar rab btud nas/ /klu yi mu tig mdzes shing bzang ba thogs/ /mkha' la 'dug nas thub rgyal mchod pa byed/ /de bzhin klu yi rgyal po btang bzung yang / /rab tu yid bde dga' mgu skyes nas ni/ /rin chen mu tig sna tshogs thogs nas su/ /der 'ongs 'dren pa la yang mngon par 'thor/ /de bzhin klu yi rgyal po dus can yang / /de bzhin gshegs pa'i drung du nyer 'ongs te/ /dga' zhing rin chen phreng ba mdzes mchog thogs/ /skyes bu dam pa la yang mchod rab byas/ /de yang bde gshegs yon tan rjes dran zhing / /gus pa chen po shin du bskyed nas ni/ /gnyen mdab klu mang dag gis de bskor cing / /'dren pa'i bsngags pa rnam pa mang po brjod/ /de bzhin klu dbang dga' bo nye dga' dang / /de bzhin 'jog po gau tam nag po yang / /rgyal ba blta zhing der ni nye bar 'ongs/ /bde bar gshegs pa'i zhabs la 'dud pa byed/ /klu yi rgyal po e la'i 'dab ma yang / /thub mchog rgyal ba 'od srung dran pa dang / /bdag nyid mi khom skyes pa mthong nas ni/ /klu brgyas yongs su bskor te ngu zhing 'ongs/ /kye ma bdag sngon the tshom byung gyur te/ /bdag gis e la'i 'dab kyang sngon bcad pas/ /des ni mi khom par yang bdag skyes te/ /rgyal ba'i chos ni rig par sla ba min/ /shin du smad pa'i skye bo'i lus 'di dang / /klu yi skye gnas bdag gis rab spangs la/ /chos gang byang chub snying por skyes 50.42a mchog gis/ /rtogs pa bsil ba bdag gis rtogs par bya/ /klu yi rgyal po rgya mtsho 'khor los bsgyur/ /bye ba gsum snyed klu yi 'khor gyis bskor/ /chu lha gzi can rin chen do shal thogs/ /bcom ldan 'das la mchod phyir nye bar 'ongs/ /rgyal ba la ni rdo 'phangs des bzung ste/ /de tshe nam mkha' la'ang 'dug gyur pa/ /rgyal po'i khab kyi gnod sbyin ci zhig 'dzin/ /bde bar gshegs pa'i spyan sngar gus par 'dug /lcang lo can gyi rgyal po'i gnas kun kyang / /stong par gyur cing gnod sbyin gang yang med/ /thams cad kyis kyang phan tshun dam bcas te/ /'jig rten mgon po blta bar thams cad lhags/ /de bzhin bong rna dang ni khab spu dang / /gnod sbyin 'brog gnas 'jigs byed de bzhin te/ /gangs gnas rir 'du gnod sbyin bong bu dag /rgyal ba rang byung drung du nye bar lhags/ /dbang po'i tog dang gzugs bzang rad rod can/ /bak+ku la dang dus 'phel lnga po dang / /gnod sbyin dbang po gzhan yang stong rnams ni/ /bdug spos snod rnams thogs shing nye bar lhags/ /lus dbyibs ma legs mi sdug mang po rnams/ /gzugs kyi rnam pa mang zhing rgyan bor ba/ /de yi dus na brgya stong mang po dag /gnod sbyin gyi ni me tog thogs te lhags/ /gau tam ri byi phur bu rgyal byed dang / /kau shi ka dang 'od srung mArkaN+Da/ /thams cad bshes dang par sha gar gA dag / /thams cad sangs rgyas phyag 'tshal nye bar lhags/ /mi sbyin yang ni de bzhin dga' mgu ste/ /drang srong rgyas pa kud tsa ang 'gi ra/ /shed can ngan spong bad tsa gnas 'jog rnams/ /de dag sangs rgyas phyag 'tshal nye bar lhags/ /'dza' man bA man be'i sham bA ya dang / /'dza' mag nI dang grog mkhar drang srong mchog /dkar bar gnas dang mi'u thung spen pa rnams/ /'dren pa blta zhing grong khyer mchog tu lhags/ /drang srong mthong nas de tshe drang srong dga'/ /thub rgyal zhabs mchog la ni phyag 'tshal zhing / /'jig rten sgron la phyag byas mngon bstod de/ /thal mo sbyar nas 50.42b dpa' bo'i spyan sngar 'greng / /'jig rten ci yod drang srong mang po kun/ /de dag mi dbang blta bar nyer lhags te/ /mthong nas mchod pa rgya cher byas nas kyang / /sangs rgyas spyan sngar thal mo rab sbyar 'dug /rgya mtsho dag na gnas pa'i nam mkha' lding / /bram ze'i cha byad du yang sprul byas nas/ /cod pan sna tshogs blta na sdug pa thogs/ /bde bar gshegs la phyag 'tshal nam mkhar 'khod/ /grong brgya dang ni 'dzam gling nags tshal na/ /gnas shing rten pa'i lha rnams gang yod dang / /grong gi lha mo ma lus thams cad kyang / /nye bar lhags shing gtso bo mchod par byed/ /nags tshal gyi yang lha rnams mtha' yas dang / /ri yi lha rnams thams cad nye bar 'ongs/ /'bab chu'i lha kun mtha' dag de bzhin du/ /'dren pa mchod pa byed cing nye bar lhags/ /mya ngam dgon pa'i lha mo brgya rnams dang / /ri rtse'i lha mo ji snyed ma lus dang / /mtsho dang chu mig rdzing gi lha rnams dang / /rgya mtsho'i lha yang sangs rgyas drung du lhags/ /lha dang lha min klu dang gnod sbyin tshogs/ /mi 'am ci dang grul bum nam mkha' lding / /de bzhin yi dgas srul po mang po dag /skyes bu mchog la ri mor bya ba byed/ /'dren pa grong khyer mchog der gshegs pa na/ /rgyal ba mchog la de dag mchod pa byed/ /lha dang lha min klu dang gnod sbyin rgyal/ /blta bas rtag tu chog par yang mi 'gyur/ /sngon gyi srid par 'jig rten mgon po yis/ /sngon gyi rgyal ba dag la mchod mchog byas/ /bsod nams 'bras bu smin pa de 'dra ste/ /skyes bu mi dbang blta bas ngoms mi myong / /rgyal bas sangs rgyas zhing du 'od btang tshe/ /lhun po de bzhin rab lhun khor yug ri/ /kha ba can gyi ri dang spos ngad ldang / /de dag rgyal ba'i 'od la sgrib pa med/ /sangs rgyas zhing 'di'i rgya mtsho ci yod pa/ /de dag de tshe sa dang 'dra bar gyur/ /sangs rgyas zhing 'di thams cad kun du yang / /me tog dag gis gtor cing mnyam par gyur/ /'od zer brgya stong dpag tu med pa dag /chos kyi rgyal po'i zhabs kyi mthil nas byung / / 50.43a sems can dmyal ba thams cad bsil bar gyur/ /sdug bsngal med par byas nas bde ba myong / /der ni stobs bcu ldan pas chos bshad pas/ /lha dang mi yi mig kyang rnam par dag /srog chags brgya stong dpag tu med pa rnams/ /thams cad sangs rgyas ye shes nges par gyur/ /'dren pa grong khyer mchog tu gshegs pa na/ /bde gshegs cho 'phrul mang po dag gis ni/ /bskal pa bye bar brjod du mi sla ste/ /rgyal ba bde gshegs 'gro ba thams cad dga'/ /bde gshegs yon tan de dag dpag med de/ /mi mchog yon tan rab kyi pha rol phyin/ /yon tan khyad par kun gyi pha rol son/ /sangs rgyas bsod nams zhing la mgos phyag 'tshal/ /grong khyer du gshegs pa'i le'u ste bcu pa'o// // de nas bcom ldan 'das zla 'od gzhon nur gyur pa'i khyim gyi srang du byung ste/ zla 'od gzhon nur gyur pa'i khyim du gshegs so/ /gshegs nas gdan bshams pa la bzhugs so/ /byang chub sems dpa'i dge 'dun dang dge slong gi dge 'dun kyang so sor gar 'os pa'i stan la 'khod do/ /de nas zla 'od gzhon nur gyur pas bcom ldan 'das byang chub sems dpa'i dge 'dun dang / dge slong gi dge 'dun bzhugs par rig nas mchod yon chen po rim kyis gsol te/ zhal zas ro brgya dang ldan pa bzang zhing mang ba'i bza' ba dang / bca' ba dang bldag pa dang bzhib pa dang btung ba rnams bdag nyid kyis gsol cing bdar te/ bcom ldan 'das bshos gsol nas lhung bzed bzhag ste phyag bcabs par rig nas ras bcos bu phrugs bye ba stong phrag brgya ri ba bcom ldan 'das kyi sku la gsol to/ /byang chub sems dpa' de dag dang dge slong gi dge 'dun la yang so sor chos gos sum phrugs phul nas stan las langs te bla gos phrag pa gcig tu gzar nas bcom ldan 'das la lha'i me tog mAn dA ras gtor te/ mchod cing mngon par bstod nas bcom ldan 'das ga la ba de logs su thal mo sbyar ba btud nas bcom 50.43b ldan 'das la tshul dang 'dra ba'i tshigs su bcad pas mngon par bstod do/ /skyes pa med cing 'gags med pa/ /sku lus mi mnga' bsam mi khyab/ /gzugs dang mtshan ni phun sum tshogs/ /yon tan rgya mtsho phyag 'tshal lo/ /dpa' bo shes rab mchog gis bskyed/ /thabs dang stobs kyi rtsal kyang mnga'/ /sangs rgyas nam mkha' 'dra ba ste/ /bzod mthar phyin la phyag 'tshal lo/ /dran pa nye bar gzhag pa bzhugs pa'i spyod yul te/ /de bzhin gshegs pa'i gzims mal rab tu dga' dang bde/ /btung bar ting nge 'dzin te bshos su bsam gtan mchog /stong nyid dgon par gnas pa khyod la phyag 'tshal lo/ /rgyal bas thugs rje bsnyen pas na/ /gzugs kyi sku yang ston par mdzad/ /sems can dag la thugs brtse'i phyir/ /btung dang bshos kyang gsol bar gda'/ /e ma sangs rgyas bsam mi khyab/ /'jig rten kun gyi 'dren pa ste/ /'jig rten 'di ni khyod mchod nas/ /mya ngan 'das pa mchog tu mchi/ /mi mnyam mnyam pa'i mgon gcig po la de skad bstod/ /gzhon nu yid kyang rab tu dgar gyur tshig smras pa/ /sangs rgyas mtshungs med bsam yas sku mnga' bshos gsol bas/ /lha yi lha khyod bzhin du bdag kyang sangs rgyas gyur/ /de ltar zla 'od gzhon nur gyur pas bcom ldan 'das la lha'i zhal zas ro brgya pa ni gzhos par gsol/ lha'i na bza' rin thang med pa phrugs kyis ni sku la gsol/ lha'i me tog mAn dA ras ni bcom ldan 'das la mchod/ tshul dang 'dra ba'i tshigs su bcad pas ni mngon par bstod nas/ bcom ldan 'das ga la ba de logs su thal mo sbyar te bcom ldan 'das la yid kyis tshigs su bcad pas zhu ba zhus pa/ byang chub sems dpa' mkhas pas ci spyad na/ /rtag tu chos rnams rang bzhin rab tu 'tshal/ /mkhas pa bgyi ba dag la ji ltar 'jug /bgyi bar 'jug pa 'dren pas bstan du gsol/ /'dren pa skye ba dran par ji ltar 'gyur/ /ji ltar mngal dag tu yang yong mi skye/ /ji lta bur na 'khor rnams mi phyed 'gyur/ /'di la ji ltar 50.44a spobs pa mtha' yas 'gyur/ /sems can kun gyi spyod pa rab tu mkhyen/ /chos rnams kun la mngon par mkhyen pa 'jug /rkang gnyis gtso bo zil gyis mi non pa/ /zhu ba zhu yis bdag la lung ston cig /chos kyi rang bzhin dngos med rab mkhyen la/ /brjod du med pa tshig tu brjod par mdzad/ /seng ges wa rnams ji ltar pham bgyis pa/ /mu stegs gzhan la'ang sangs rgyas de bzhin te/ /sems can kun gyi spyod pa rab mkhyen cing / /chos rnams kun la'ang ye shes rjes su 'jug /ye shes chags med spyod yul yongs su dag /chos kyi mnga' bdag bdag la de lung ston/ /'das pa mkhyen cing ma 'ongs de bzhin te/ /da ltar 'di na ci mchis pa yang mkhyen/ /dus gsum la ni ye shes thogs med 'jug /de phyir bdag zhu shAkya seng ge la/ /dus gsum ldan pa'i rgyal ba'i chos nyid ni/ /chos kyi rgyal pos chos nyid rab tu mkhyen/ /rang byung chos kyi ngo bo nyid la mkhas/ /de phyir bdag zhu ye shes rgya mtsho la/ /khyod la 'khrul pa'i chos ni ci yang med/ /de bas khyod kyi sems pa ma lus spangs/ /mdud spangs tha ba gti mug rab tu bcad/ /mi dbang bdag la byang chub spyod pa ston/ /chos kyi mtshan nyid ci 'drar rgyal bas mkhyen/ /chos kyi mtshan nyid de 'dra bdag la ston/ /bdag gis mtshan nyid de 'dra'i chos rtogs nas/ /mtshan nyid de 'dra'i byang chub spyod pa spyad/ /sems can spyod pa mi mthun mtha' yas pa/ /ji ltar spyod pa spyad par 'jug pa lags/ /gang thos sems can spyod pa 'tshal 'gyur ba/ /spyod la 'jug pa bdag la bshad du gsol/ /mtshan nyid mi mthun chos kyi rang bzhin mtshan/ /ngo bo nyid stong rang bzhin rnam dag pa/ /byang chub sems dpas ji ltar mngon sum 'gyur/ /chos kyi tshul rnams bdag la bstan du gsol/ /'di la chos rnams kun gyi pha rol phyin/ /bstan pa'i tshig kun la yang shin du mkhas/ /the tshom mi mnga' nem nur the tshom chod/ /bdag la sangs rgyas byang chub bstan du gsol/ /de nas 50.44b bcom ldan 'das kyis zla 'od gzhon nur gyur pa'i sems kyi rtogs pa sems kyis mkhyen nas zla 'od gzhon nur gyur pa la bka' stsal pa/ gzhon nu byang chub sems dpa' sems dpa' chen po chos gcig dang ldan na yon tan 'di dag rab tu 'thob ste/ myur du bla na med pa yang dag par rdzogs pa'i byang chub kyang mngon par rdzogs par 'tshang rgya'o/ /chos gcig po gang zhe na/ gzhon nu 'di la byang chub sems dpa' sems dpa' chen pos chos thams cad kyi ngo bo nyid shes pa yin no/ /gzhon nu ji ltar na byang chub sems dpa' sems dpa' chen pos chos thams cad kyi ngo bo nyid shes zhe na/ gzhon nu 'di la byang chub sems dpa' sems dpa' chen pos chos thams cad ming med cing ming dang bral bar rab tu shes so/ /chos thams cad sgra med pa/ tshig gi lam dang bral ba/ yi ge dang bral ba/ skye ba dang bral ba/ 'gog pa dang bral ba/ rgyu dang mtshan nyid mi mthun pa/ rkyen dang mtshan nyid mi mthun pa/ dben pa'i mtshan nyid 'di lta ste/ mtshan nyid med par mtshan nyid gcig pa/ mtshan nyid dang bral ba/ bsam gyis mi khyab pa/ bsam pa dang bral ba/ yid dang bral bar rab tu shes so/ /de nas de'i tshe bcom ldan 'das kyis tshigs su bcad pa 'di dag gsungs so/ /chos rnams bstan pa gcig po ni/ /chos rnams thams cad mtshan nyid med/ /yang dag ji bzhin rab mkhyen pas/ /shes rab mchog gis bshad pa yin/ /de lta bur ni chos bstan rnams/ /byang chub sems dpa' sus shes pa/ /mdo sde bye ba rab ston kyang / /de la byang chub rgyun 'chad med/ /'dren pas byin gyis brlabs pas na/ /yang dag nyid kyi mtha' yang shes/ /yang dag mtha' de rab shes na/ /de la ci yang bshad pa med/ /gcig gis kyang ni thams cad shes/ /gcig gis kyang ni thams cad mthong / /ji snyed mang por bshad na yang / /de la dregs pa skye ba med/ /chos rnams thams cad bdag med par/ /de ltar sems kyis nges brtags 50.45a shing / /ming du bstan pa bslabs pas na/ /yang dag nyid du tshig kyang smra/ /sgra dbyangs gang dag ci thos pa/ /de yi sngon gyi mtha' shes te/ /sgra yi sngon gyi mtha' shes nas/ /sgra dag gis ni de mi 'phrogs/ /sgra yi sngon mtha' ji 'dra bar/ /chos rnams mtshan nyid de bzhin te/ /chos rnams de ltar rab shes na/ /mngal du skye bar mi 'gyur ro/ /chos rnams thams cad mi skye zhing / /'byung ba med par rab tu shes/ /bstan pa 'di ni rab shes na/ /rtag tu skye ba dran par 'gyur/ nam zhig skye ba dran gyur na/ /de tshe bya ba dag la 'jug /bya ba dag la zhugs pa yi/ /'khor rnams shin du mi phyed 'gyur/ /de ltar chos rnams stong par ni/ /byang chub sems dpa' sus shes pa/ /des ni gang yang mi shes med/ /'di ni ci yang med pa'i mtha'/ /ci yang med pa'i mtha' la yang / /byis pa dag gis ci dag brtags/ /bskal pa bye bar de dag des/ /yang dang yang du 'khor bar gyur/ /ji ltar 'dren pas mkhyen pa bzhin/ /gal te de dag rtog ri na/ /de las sdug bsngal mi skye ste/ /ngan 'gro rnams su'ang de mi 'gro/ /so so'i skye bo thams cad kyis/ /de ltar tshul 'di ma shes pas/ /gang du chos rnams 'gag pa yi/ /'di 'dra'i chos rnams spong bar byed/ /chos kun rnyed pa med par ni/ /chos kyi 'du shes gang byung ba/ /de lta bu yi 'du shes te/ /'du shes de ltar rig par gyis/ /rnam par shes dang 'du shes su/ /byis pa dag gis 'di brtags te/ /brtags pa yi ni chos rnams la/ /mkhas pa 'dir ni rmongs mi 'gyur/ /stong pa rnyog pa med pa'i chos/ /'di ni mkhas pa'i sa yin te/ /'di la byis pa'i spyod yul med/ /sangs rgyas sras kyi spyod yul lo/ /zhi ba stong pa rab bstan pa/ /'di ni byang chub sems dpa'i sa/ /'di ni sangs rgyas sras spyod pa/ /sangs rgyas chos kyi rgyan yin no/ /'di ltar byang chub sems dpa' dag /bag chags rab tu spangs gyur pa/ /de dag gzugs kyis mi 'phrogs te/ /sangs rgyas rigs la de dag gnas/ /chos rnams thams cad gnas med de/ /de dag la ni gnas yod 50.45b min/ /gang gis de ltar gnas shes pa/ /de la byang chub rnyed mi dka'/ /sbyin dang tshul khrims thos dang bzod/ /bshes gnyen bzang po bsten byas nas/ /bya ba 'di dag rnam rig na/ /byang chub myur du de 'tshang rgya/ /de la lha klus rtag tu bkur sti byed/ /gnod sbyin lha min lto 'phye dri za dang / /nam mkha' lding gi rgyal po thams cad dang / /mi 'am ci dang srin pos mchod pa byed/ /sangs rgyas bye ba de yi snyan pa brjod/ /bskal pa bye ba mang por mi 'chad par/ /chos bshad pa yi bsngags pa brjod na yang / /de yi mu mtha' zad par nus mi 'gyur/ /byang chub sems dpa' gang gis stong shes pa/ /de ni srog chags bye ba'i don mang byed/ /shin du des pas 'khor la chos ston te/ /thos nas dga' zhing ri mor byed pa skyed/ /de dag gis ni ye shes yangs pa 'byung / /de phyir rgyal ba mi mchog mthong bar 'gyur/ /zhing rnams na yang bkod pa bzang po mthong / /'jig rten mgon po de la chos rnams ston/ /chos kun sgyu ma lta bur shes par gyis/ /ji ltar bar snang rang bzhin stong pa ltar/ /de dag gi yang rang bzhin de 'drar shes/ /de ltar spyod pa ci la'ang chags mi 'gyur/ /ye shes chags pa med cing don byed cing / /'jig rten na yang byang chub spyad mchog spyod/ /shes pas chos kun la'ang rab brtags te/ /de dag zhing rnams gzhan du'ang sprul pa 'gyed/ /sprul pa de dag sangs rgyas don byas nas/ /ji ltar chos nyid bzhin du rang bzhin 'gyur/ /byang chub sems la mi gang gnas pa rnams/ /bsam pa ji bzhin don rnams rnyed par 'gyur/ /sangs rgyas rigs ni gnas par gang brtson pa/ /de ni rtag tu sangs rgyas byas pa gzo/ /rnam par 'bar ba'i lus dang rab ldan zhing / /mtshan bzang sum bcu rtsa gnyis de la 'byung / /phan yon gzhan yang mang po mtha' yas pa/ /ting 'dzin mchog la spyod pas thob par 'gyur/ /rtag tu mi sgul stobs kyang che bar 'gyur/ /de yi gzi brjid rgyal pos mi bzod de/ /mkhas pa su dag sangs rgyas chos spyod pa/ / 50.46a byad bzhin bzang zhing shin du mdzes par 'gyur/ /bsod nams gzi brjid dpal gyis mngon 'phags te/ /lhas kyang de yi gzi brjid bzod mi 'gyur/ /su dag byang chub sems la brtan gnas pa/ /de ni rtag tu srog chags kun gyi bshes/ /sangs rgyas byang chub 'di ni rab ston pa/ /de la nam yang mun pa med par 'gyur/ /sgra dang tshig gi lam bral brjod du med/ /nam mkha' ji bzhin chos kyi rang bzhin te/ /'di lta bu yi tshul mchog rnam rig na/ /de yi spobs pa dag kyang mi zad 'gyur/ /mdo sde dag ni brgya stong rab bshad kyang / /sngon gyi mtha' ma phra zhib rab tu shes/ /chos kyi rang bzhin shin du phra shes pas/ /mkhas pa'i tshig ni rtag tu thogs pa med/ /rtag par tshul brgya dag la mkhas gyur cing / /sgra dang nges tshig rnam pa mang la mkhas/ /las dang 'bras bu rnam smin nges pa ste/ /khyad par 'phags pa'i bye brag de 'drar 'gyur/ /mkhas pa bdag nyid chen po stobs bcu'i sras/ /ma tshang med pa'i stobs kyis shugs 'chang zhing / /shin du phra ba'i rang bzhin chos shes pas/ /de yi dran pa rtag par yongs su dag /shin du phra ba'i rang bzhin chos shes pas/ /yid du mi 'ong sgra ni thos mi 'gyur/ /rtag tu snyan cing yid 'ong sgra yang thos/ /de yi tshig ni rtag tu yid 'ong 'gyur/ /shin du phra ba'i rang bzhin chos shes pas/ /dran dang blo gros shes rab rtogs dang ldan/ /de bzhin sems kyang rnyog med dang bar 'gyur/ /mdo sde brgya phrag du ma rab tu 'chad/ /yon tan 'di 'dra'i rang bzhin chos shes pas/ /yi ge dang ni tshig rnams 'byed la mkhas/ /tha dad pa yi sgra mang du ma shes/ /don dang tshig 'bru la yang mkhas par 'gyur/ /shin du phra ba'i rang bzhin chos shes pas/ /lha dang mi dang klu 'brug srin po dang / /lha min lto 'phye mi 'am ci la yang / /rtag tu sdug cing yid du 'ong bar 'gyur/ /shin du phra ba'i rang bzhin chos shes pas/ /'byung po yi dgas srin po'i tshogs rnams ni/ /sha la za ba shin du mi zad pa/ /de dag nam yang de la 'jigs mi byed/ /mkhas pa de dag yangs pa'i gtam thos nas/ /shin du dga' 50.46b zhing ba spu zing zhes byed/ /sangs rgyas la yang dga' ba rgya cher bskyed/ /de dag bsam gyis mi khyab don chen 'thob/ /bde bar gshegs pa'i chos mdzod 'di bzung ba'i/ /bskal pa stong mang de yi bsod nams stobs/ /rab tu brjod kyang rdzogs par mi nus te/ /dpag tu med cing mtha' yas tshad med do/ /ting 'dzin zhi ba'i mchog 'di bzung ba yis/ /'das pa'i rgyal ba dpag med thams cad dang / /sangs rgyas ma byon pa dang phyogs bcu na/ /sangs rgyas gang bzhugs de dag de yis mchod/ /skyes bu la la bsod nams 'dod pas 'dir/ /stobs bcu ldan pa'i thugs rje can dag la/ /dga' ba dpag tu med pa bskyed nas ni/ /bskal pa mtha' yas dpag med rim gro byas/ /skyes bu gnyis pa bsod nams 'dod pa yis/ /don dam tshul 'di las ni tshigs bcad gcig /phyi ma'i dus su gyur tshe 'dzin pa ni/ /de la snga ma'i bsod nams char mi phod/ /'di ni sangs rgyas mchod pa rab mchog ste/ /phyi ma mi bzad dus su gyur pa'i tshe/ /'di las tshig bzhi'i tshigs bcad gcig thos nas/ /'dzin pa des ni sangs rgyas thams cad mchod/ /de dag rtag tu rnyed mchog legs par rnyed/ /de dag grong gi zas mchog legs par zos/ /stobs bcu'i sras kyi thu bo dam pa ste/ /de yis rgyal ba mang po yun ring mchod/ /bya rgod phung po'i ri 'dir nga yang mthong / /de dag sangs rgyas mkhyen la ngas lung bstan/ /mya ngan nga 'das nas ni byams pa yang / /de tshe de la lung yang ston par 'gyur/ /de bzhin sangs rgyas tshe dpag med pa yang / /nga yi bde ba can du kun 'dod zhes/ /phan yon rnam pa du ma de la 'chad/ /mngon dga' der song sangs rgyas mi 'khrugs mthong / /bskal pa brgya stong dpag tu med par yang / /logs par ltung ba'i 'jigs pa yong mi 'byung / /byang chub spyad pa mchog 'di spyod pa ni/ /rtag tu yid rab bde ba myong bar 'gyur/ /de phyir bye brag 'di 'phags de 'dra ste/ /'di ni rab tu 50.47a bshad pa phan yon mchog /so so'i tshig la nga yi rjes slobs la/ /phyi ma'i dus la mdo sde 'di zung shig /mdo sde 'dzin pa'i le'u ste bcu gcig pa'o// // gzhon nu de la byang chub sems dpa' sems dpa' chen po gang chos thams cad kyi ngo bo nyid shes pa de'i yon tan dang phan yon de lta bur 'gyur ro/ /de bzhin gshegs pa'i yon tan dang bsngags pa yang dag par smra'o/ /de bzhin gshegs pa la yang dag pa ma yin pa dang med pas mi skur to/ /de ci'i phyir zhe na/ chos gang gis de bzhin gshegs par rab tu dbye ba'i chos nyid de yang dag pa ji lta ba bzhin du rab tu shes shing / sangs rgyas kyi yon tan mtha' yas par rab tu shes so/ /de ci'i phyir zhe na/ gzhon nu sangs rgyas kyi yon tan ni mtha' yas te/ bsam gyis mi khyab cing bsam pa dang bral bas na/ de dag bsam pa 'am dpag par mi nus so/ /de ci'i phyir zhe na/ gzhon nu sems kyi ngo bo nyid ni gzugs med pa bstan du med pa ste/ gzhon nu de ltar sems kyi ngo bo nyid gang yin pa sangs rgyas kyi yon tan gyi ngo bo nyid kyang de yin no/ /sangs rgyas kyi yon tan gyi ngo bo nyid gang yin pa de bzhin gshegs pa'i ngo bo nyid kyang de yin no/ /de bzhin gshegs pa'i ngo bo nyid gang yin pa chos thams cad kyi ngo bo nyid kyang de yin te/ gzhon nu byang chub sems dpa' sems dpa' chen po gang de ltar yon tan thams cad kyi ngo bo nyid don gcig tu bstan pa/ yang dag pa ji lta ba bzhin du rab tu shes pa de ni gzhon nu byang chub sems dpa' sems dpa' chen po yid kyis nges par brtags pa zhes bya ste/ 'byung ba la mkhas shing khams gsum las 'byung ba yang dag pa ji lta ba bzhin du rab tu shes so/ /ji lta ba bzhin du lta zhing log par mi smra/ rnam pa gzhan du mi smra/ ji skad smra ba de bzhin byed/ khams gsum la ma chags shing khams gsum las yang dag par 'das te/ 'dod pa'i sa dang gzugs kyi sa dang gzugs med pa'i sa dang nyon mongs pa'i sa dang ming gi sa dang sgra'i sa las 50.47b 'das shing yi ge dang chos kyi tshul la mkhas pa/ ye shes mi zad par bsgoms pa/ brjod du med pa'i chos rtogs pa/ yi ge shes pa/ yi ge la mkhas pa/ yi ge dang tshig rab tu dbye ba shes pa la mkhas pa/ yi ge dang tshig rab tu dbye ba rgyas pa shes pa la mkhas pa/ chos thams cad rab tu dbye ba shes pa la mkhas pa/ chos thams cad rab tu dbye ba rgyas pa shes pa la mkhas pa/ chos thams cad rnam par dgod pa la mkhas pa yin te/ gtan la dbab pa'i blo dang ldan zhing / bdud sdig can dang bdud kyi ris kyi lha rnams kyis zil gyis mi non to/ /chos kyi rnam grangs 'di bshad pa'i tshe lha dang mi'i skye dgu sngon yongs su sbyang ba byas pa khrag khrig phrag dgu bcu rtsa brgyad kyis bye ba brgya stong 'khyil pa'i gzungs dang sgrib pa med pa'i mtha' dang chos rnam par mthong ba'i bzod pa so sor thob nas bcom ldan 'das kyis de dag thams cad la bskal pa grangs med pa brgya stong phrag bzhi bcu rtsa brgyad na/ bla na med pa yang dag par rdzogs pa'i byang chub mngon par rdzogs par 'tshang rgya ste thams cad kyang ming ni tha dad/ tshe'i tshad ni gcig par sangs rgyas kyi zhing so sor bla na med pa yang dag par rdzogs pa'i byang chub mngon par rdzogs par 'tshang rgya'o zhes lung bstan to/ /de la 'di skad ces bya ste/ byang chub sems dpa' blo dang ldan pa gang / /bla na med pa'i byang chub rab tshol zhing / /chos dang de bzhin don la mkhas pa de/ /chos kyi ngo bo nyid la spyod pa yin/ /yang dag ma yin pa yi tshig mi smra/ /sangs rgyas yon tan bye brag ci 'dra ba/ /rgyal ba rnams kyi chos ni de yin te/ /dpa' bo the tsom bral bas shin du rig /chos kun don gcig par ni rab shes te/ /mgo gcig tu ni stong pa nyid yin pas/ /de dag la ni tha dad gyur pa med/ /don gcig la ni shin du bslabs pa yin/ /rtog pa med cing rnam rtog med pa dang / /dmigs pa med par blo gros ldan pas shes/ / 50.48a zad pa dang ni mi zad 'du shes kyang / /ma lus par ni thams cad rab tu spangs/ /de ni chos sku mi yi seng ge la/ /stobs bcu ldan pa gzugs su mi lta zhing / /de ni phyin ci log kun rab spangs pas/ /mtshan rnams su yang lta bar yong mi 'gyur/ /chos rnams 'di dag bsam mi khyab/ /bsam dang bral zhing rang bzhin zhi/ /de lta bur ni rab shes nas/ /rkang gnyis gtso bo sangs rgyas mthong / /ji ltar bdag gi 'du shes rig /de bzhin kun du blo yang gtong / /chos kun de yi rang bzhin te/ /rnam par dag pa nam mkha' bzhin/ /yid la nams kyang 'byung ba med/ /chos rnams thams cad shes pas na/ /khams gsum las ni rnam par grol/ /de la smon lam 'debs pa med/ /yang dag ji bzhin du ni mthong gyur cing / /ma log tshig smra rnam pa gzhan mi smra/ /de yi tshig dang brjod pa thams cad kyang / /rgyal ba dag gi mthu yis 'byung bar 'gyur/ /'dod pa'i sa dang nyon mongs sa rnams dang / /gzugs med las kyang shin du 'da'/ /chos rnams la ni yid kyang ma chags shing / /rab tu dga' bas 'gro la phan par spyod/ /ming gi sa las 'das shing sgra yang shes/ /ngo bo nyid kyis gsog tu gyur pa ste/ /ji srid tsam du yin ring brjod na yang / /de la gnas par byed pa yod ma yin/ /'du shes rab tu rgyu ba med/ /lta ba log pa kun nas zad/ /blo yang shin du gtan la bab/ /brtan pa nam mkha' 'dra bar spyod/ /gal te bdud bye khrag khrig rnams/ /de yi sems dkrug phyir 'ongs kyang / /bdud rnams thams cad zil mnan te/ /de yi dbang du 'gro mi 'gyur/ /bdud kyi rgya mo rnams spangs te/ /tshul khrims yongs dag gdung ba med/ /bsam gtan dag gi bde la mos/ /'jig rten stong par rab tu shes/ /'jig rten phung por smras pa yang / /de dag stong par rab tu rig /skye ba med cing 'gag med pas/ /chos rnams thams cad nam mkha' bzhin/ /de dag bdag nyid gtong byed kyi/ /stobs bcu'i tshul khrims thos mi gtong / /de ni tshul khrims pha rol phyin/ / 50.48b gar smon par yang skye bar 'gyur/ /sangs rgyas zhing du rnam par 'gro/ /sangs rgyas khrag khrig mang po mthong / /mtho ris dag ni mi 'dod de/ /smon lam rnams ni yongs mi gtong / /chos nyid dag ni de spyod tshe/ /skad cig brtson 'grus nyams mi byed/ /phyogs bcu yi ni sangs rgyas kyis/ /de ni shin tu bstod pa yin/ /de phyir gzhon nu ting 'dzin las/ /chos 'di dag ni rab thob nas/ /shes kyi khe ni rnam spongs la/ /skye bo mang la chos rab ston/ /sangs rgyas yon tan mang ldan pa/ /rang 'byung 'gyur bar gang 'dod pas/ /dge ba 'di la rab bslabs na/ /stobs bcu 'chang ba sangs rgyas 'gyur/ /ting nge 'dzin la rjes su slob pa'i le'u ste bcu gnyis pa'o// //de nas bcom ldan 'das kyis zla 'od gzhon nur gyur pa la bka' stsal pa/ de lta bas na gzhon nu byang chub sems dpa' sems dpa' chen po bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas ting nge 'dzin nges par bstan pa la mkhas par bya'o/ /gzhon nu de la ting nge 'dzin nges par bstan pa gang zhe na/ gang chos thams cad kyi ji lta ba bzhin nyid dang mnyam pa nyid mi mnyam pa med pa dang mi rtog pa/ rnam par mi rtog pa/ rnam par ma bsgrubs pa/ kun nas slong ba med pa/ skye ba med pa/ 'gag pa med pa/ rtog pa dang rnam par rtog pa dang kun nas rtog pa yongs su chad pa/ sems kyi dmigs pa med pa/ yid la byed pa med pa/ rnam par rig pa yongs su chad pa/ 'dod chags dang zhe sdang dang gti mug yongs su chad pa/ mtha' med pa/ mthar yid la byed pa dang bral ba/ yid la byed pa yongs su chad pa/ phung po dang khams dang skye mched kyi ngo bo nyid shes pa/ dran pa dang blo gros dang rtogs pa dang khrel yod pa dang brtan pa dang cho ga dang spyod yul dang nan tan gyi gnas su gyur pa/ nyon mongs pa med pa'i sa/ zhi ba'i sa 50.49a spros pa thams cad yongs su chad pa/ byang chub sems dpa' thams cad kyi bslab pa/ de bzhin gshegs pa thams cad kyi spyod yul/ yon tan thams cad yongs su rdzogs pa 'di ni gzhon nu ting nge 'dzin nges par bstan pa zhes bya ste/ byang chub sems dpa' sems dpa' chen po ting nge 'dzin nges par bstan pa 'di la gnas pa ni ting nge 'dzin dang ma bral ba yin/ sems 'khrul pa med pa yin/ snying rje chen po dang ldan zhing sems can dpag tu med pa'i don byed pa yin no/ /de nas de'i tshe bcom ldan 'das kyis tshigs su bcad pa 'di dag gsungs so/ /ting 'dzin mnyam pa med pa'i sa/ /shin du mthong dka' phra zhing zhi/ /'du shes thams cad bcom pa ste/ /de phyir ting nge 'dzin ces bya/ /rtog pa med cing rnam rtog med/ /gzung ba med cing bstan du med/ /sems kyang dmigs pa med pa ste/ /de phyir ting nge 'dzin ces bya/ /nam zhig mnyam par gzhag gyur te/ /chos kun la ni rlom sems med/ /rlom sems med pa ji bzhin pa/ /de ni ting nge 'dzin ces bsgrags/ /chos ni rdul tsam yong med de/ /rdul ces bya ba'ang yod ma yin/ /chos rnams dmigs su med pa ste/ /de phyir ting nge 'dzin ces bya/ /sems kyi dmigs pa med pa yang / /de ni rnam par rtog ces bya/ /chos de rnam par ma brtags pa/ /de ltar ting 'dzin shes par gyis/ /sgra yis don rnams rab bstan te/ /sgra de nyid kyang dngos po med/ /sgra ni brag cha lta bu ste/ /bar snang dag gi nam mkha' bzhin/ /chos 'di rnams ni mi gnas te/ /'di dag la ni gnas mi dmigs/ /mi gnas pa ni gnas kyi sgra/ /ngo bo nyid kyis mi rnyed do/ /'gro zhing 'chi 'phor brjod pa yi/ /de lta bu yi 'gro ba med/ /'gro ba med pa 'gro ba'i sgras/ /ting nge 'dzin du de phyir gsungs/ /mnyam gzhag ma yin de ni rlom sems brjod/ /mnyam gzhag 'di yang rlom sems gnyis pa ste/ /rlom 50.49b sems med par byang chub rim par spyod/ /dran pa rlom sems med pa byang chub mchog /mnyam dang mi mnyam zhi ba sangs rgyas sa/ /zhi gnas lhag mthong mtshan med 'di yin te/ /zhi ba sangs rgyas sa 'di bsten byas na/ /ting 'dzin zhi ba 'di la de brtson yin/ /don gyi rnam par rig pa 'jug pa la/ /yi ge dag gis 'jug par mi nus te/ /sgra dbyangs thams cad rnam par spangs nas ni/ /mnyam par bzhag 'gyur de la rlom sems med/ /byang chub sems dpa' gang dag ting 'dzin 'di/ /ji ltar bshad bzhin gnas shing brtson byed na/ /gal te zhing 'di bskal pas tshigs gyur kyang / /ri mchog dbus su zhugs pas mes mi tshig /bskal pa brgya phrag mang por rab bsregs kyang / /nam mkha' sngon chad nam yang mi 'tshig bzhin/ /chos rnams nam mkha' mtshungs par rnam rig pas/ /de ni me yi nang du yong mi 'tshig /gal te sangs rgyas zhing rnams 'bar gyur la/ /'bar ba 'di dag ma lus zhi shig ces/ /ting 'dzin gnas nas smon lam 'di btab na/ /sa rnams zhig kyang de la 'gyur ba med/ /de ni rdzu 'phrul stobs kyang mtha' yas 'gyur/ /nam mkha' la yang thogs pa med par 'gro/ /rjes su bstan bzhin ting 'dzin gnas pa ni/ /byang chub sems dpa'i yon tan 'di dag myong / /skye zhing 'chi 'phor de 'gyur yang / /skye ba med cing 'chi 'pho med/ /gang gis de ltar rnam rig pa/ /de la ting 'dzin rnyed mi dka'/ /'chi 'pho skye ba med par ni/ /'jig rten mgon pos rab tu bshad/ /de ltar 'jig rten mgon rig nas/ /de phyir ting nge 'dzin kyang rig /'jig rten gyis ni ma gos shing / /'jig rten chos la mi chags te/ /lus ni thogs pa med par ni/ /sangs rgyas zhing du 'gro bar byed/ /zhing dag na ni 'jig rten 'dren/ /rdzogs pa'i sangs rgyas rtag tu mthong / /sangs rgyas dag gis zhing bshad pa/ /chos rnams de dag der yang nyan/ /de la mi shes yong med de/ /chos kyi dbyings kyang 50.50a rab tu 'chad/ /chos kyi rnam pa rtag tu rig /de ni chos kyi dbyings kyi tshul/ /bskal pa bye bar 'chad ston kyang / /de yi spobs pa zad mi 'gyur/ /byang chub sems dpa' gzhan mang po/ /mkhas pa dag kyang sprul par byed/ /byang chub sems dpa' sprul pa ni/ /pad ma 'dab ma stong dag la/ /skyil mo krung bcas 'dug pa dag /zhing nas zhing du 'gro bar byed/ /ting 'dzin zhi ba bsgoms nas ni/ /gzungs dang mdo sde bzang po dang / /mdo sde gzhan yang bye ba dang / /sangs rgyas byang chub rab tu ston/ /sems can mang po bsam mi khyab/ /phyir mi ldog la 'god par byed/ /sangs rgyas byang chub rab ston kyang / /spobs pa dag ni zad mi 'gyur/ /rin chen rnam par brgyan pa yi/ /khang pa brtsegs zhugs de 'gro ste/ /dri dang ldan pa'i me tog gis/ /'dren pa la yang mngon par 'thor/ /dri dang ldan pa'i phye mas kyang / /'dren pa la ni rab tu 'thor/ /de dag thams cad byang chub phyir/ /rgya che ba yi mchod pa byed/ /byang chub sems dpa' skyob pa yi/ /yon tan dpag med de dag ni/ /nam zhig nyon mongs med gyur pa/ /de tshe rdzu 'phrul de dag 'thob/ /nyon mongs dag ni mi skye zhing / /dag pa dang ba 'od gsal ba/ /mi 'khrugs 'dus ma byas pa ni/ /byang chub sems dpa'i spyod yul lo/ /rab tu zhi zhing nye bar zhi/ /nyon mongs med cing mya ngan bral/ /spros med rnam par ma spros pa/ /spros pa dag las shin du 'das/ /yi ge'i spyod pa med pa ni/ /chos rnams kun gyi mtshan nyid de/ /dbyangs kyis rig par dga' bas na/ /de phyir ting nge 'dzin ces bya/ /zad mi shes shing nye bar zhi/ /lhun gyis 'grub cing bstan med pa/ /rnyog med yang dag nyid kyi mtha'/ /sangs rgyas kun gyi spyod yul lo/ /'ong dang 'gro ba med pa dang / /spros med lhun gyis grub pa yi/ /chos rnams kun gyi rang bzhin ni/ /sangs rgyas kun gyi bslab pa ste/ /rdzogs pa'i sangs rgyas 'di bslabs nas/ /yon tan dag gi pha rol phyin/ /tshu rol dang ni pha rol med/ /sngon mtha' rnam par ma brtags te/ /de phyir sangs rgyas de dag kun/ /yon tan dag gi pha 50.50b rol phyin/ /'ong dang 'gro ba med pa dang / /spros med lhun gyis grub pa yi/ /chos kyi rang bzhin mkhyen nas ni/ /de dag de las pha rol phyin/ /ting nge 'dzin nges par bstan pa'i le'u ste bcu gsum pa'o// //'phags pa ting nge 'dzin gyi rgyal po'i mdo/ bam po lnga pa/ de nas zla 'od gzhon nur gyur pa stan las langs te bla gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /bcom ldan 'das 'di ltar bcom ldan 'das de bzhin gshegs pa dgra bcom pa yang dag par rdzogs pa'i sangs rgyas kyis chos thams cad kyi rang bzhin mnyam pa nyid byang chub sems dpa' thams cad kyi bslab pa'i ting nge 'dzin bstan pa legs par bshad pa ni ngo mtshar to/ /'di ltar bcom ldan 'das kyis yun ring por bslab pa 'di la bslabs nas bla na med pa yang dag par rdzogs pa'i byang chub yang dag par bsgrubs pa ni bcom ldan 'das bdag spobs so/ /bde bar gshegs pa bdag spobs so/ /bcom ldan 'das kyis bka' stsal pa/ gzhon nu de'i dus la dbab par shes na khyod spobs par gyis shig /de nas bcom ldan 'das kyis zla 'od gzhon nur gyur pa la skabs phye nas bcom ldan 'das la mngon sum du tshul dang 'dra ba'i tshigs su bcad pa 'di dag gis bstod do/ /'dod dang khro bas rtag tu zil non cing / /sdug bsngal gtses pa'i sems can gzigs nas ni/ /skye dgu thar byed sangs rgyas gyur cig ces/ /byang chub phyir ni khyod kyis sems kyang bskyed/ /dpa' bos bskal pa bye ba mang spyad de/ /sbyin dang dul dang legs sdom rtag tu gnas/ /bzod dang tshul khrims de bzhin brtson 'grus des/ /sbyin pa dag kyang mtha' yas rgya cher byin/ /rkang lag dang ni srog kyang rab gtong zhing / /khyod kyi yid la nam yang skyo med de/ /gser dngul de bzhin bu dang chung ma dang / /chags med gyur nas rgyal po'i 50.51a srid kyang gtong / /khyod kyi tshul khrims dri med rnam dag ste/ /bdag nyid gtong zhing tshul khrims yong mi 'dral/ /lus dang ngag dang yid kyang rab tu bsdams/ /bde gshegs sems dul khyod la phyag 'tshal lo/ /bzod la dgyes shing bzod pa'i lam la gnas/ /lus ni dum bur byas kyang 'khrugs med de/ /byams pa bsgoms pas de las 'o ma zags/ /bde gshegs ngo mtshar khyod la phyag 'tshal lo/ /stobs bcu dag gi stobs dang ldan gyur cing / /chags med ye shes gnas pas chos kun rtogs/ /thugs rjes 'jig rten phan mdzad chos kyi rje/ /skye dgu 'di yi don bzhed thugs brtse ba/ /stong par mkhyen cing 'di na sems can med/ /de bzhin 'jig rten lam stor gzigs nas ni/ /de dag rang bzhin bdag med chos rtogs bgyis/ /rnam grol skyes kyang gang na'ang rnam grol med/ /so sor brtags te bag med thams cad spangs/ /bdud sde mtha' yas stobs dang ldan pa bcom/ /ye shes mtha' yas byang chub rgya cher mkhyen/ mchog tu rnam dag zhi ba'i chos kyang ston/ /zla ba skar mar bcas pa gnam lhung zhing / /ri dang grong du bcas pa'i sa zhigs la/ /nam mkha'i khams ni rnam pa gzhan gyur kyang / /khyod ni mi bden pa yi tshig mi gsung / /skye dgu dmigs pa dag la dga' ba dang / /sems can sdug bsngal khyod kyis gzigs nas ni/ /stong pa nyid dang zab cing zhi ba yin/ /dmigs pa med pa dag ni ston par mdzad/ /bskal pa bye ba bsam yas su/ /mi dmigs pa yi bslab pa la/ /dpa' bo chen pos bslabs pas na/ /khyod la 'khrul pa yong mi mnga'/ /ji lta bu yi chos bslabs pa/ /de lta bu yi chos ston te/ /mu stegs gzhan dag ji snyed dang / /byis pa dag gis sa 'di min/ /bdag tu 'du shes gang gnas pa/ /mi mkhas de dag 'khrul par 'gyur/ /chos rnams bdag med rigs pas na/ /khyod la 'khrul pa yong mi mnga'/ /dpa' bo chen po yang dag gsung / /yang dag chos la rab tu gnas/ /mgon po yang dag bden gnas te/ /yang dag tshig 50.51b ni rab tu gsung / /khyod kyi smon lam btab pa bzhin/ /khyod kyi yang dag spyod pa byung / /yang dag de yi rgyu 'dra bas/ /yang dag tshig ni rab tu gsung / /yang dag spyod pa phun sum tshogs/ /yang dag mtha' la shin du bslabs/ /yang dag bsam pa yang dag spyod/ /yang dag mkhyen la phyag 'tshal lo/ /khyod kyi shes rab mnyam pa med/ /ye shes gsung ba 'od mdzad pa/ /ye shes khyad par rab brnyes shing / /ye shes gsung la phyag 'tshal lo/ /khyod kyis byams pa rab bsgoms te/ /sems can kun gyi bshes gnyen khyod/ /ri rab bzhin du mi sgul te/ /mi g.yo rab tu gnas pa po/ /ston pa'i 'khor tshogs rgya che yang / /tshogs mang dag kyang sdud par mdzad/ /shes rab zab mo bde bar gshegs/ /'khor gyi nang gshegs sgra yang sgrog /sangs rgyas seng ge'i sgra sgrogs shing / /seng ge'i stabs su rnam par gshegs/ /khyod kyis mu stegs kun btul ba/ /seng ge yis ni wa rnams bzhin/ /dpa' bo ma dul dul mdzad pa/ /ma dul ba dag khyod kyis btul/ /de dag mdza' sdug brtan gyur te/ /dbyer mi phyed cing legs par gnas/ /lta ba sna tshogs gnas pa yi/ /sems can sdug bsngal gzigs nas ni/ /sdug dang mi sdug med pa yi/ /bdag med chos ni khyod ston te/ /ma bslabs pa yi byis pa dag /log pa'i lam la spyod pa rnams/ /'dren pa gang nas gshegs pa yi/ /lam yang rab tu khyod kyis bstan/ /bdag tu 'dzin la su gnas pa/ /de dag sdug bsngal nyid la gnas/ /gang la sdug bsngal med pa yi/ /bdag med de dag mi shes so/ /'khrul pa med pa'i chos tshig khyod ston te/ /khyod la 'khrul ba mi rnyed 'jig rten mgon/ /khyod ni ma log pa yi tshig gsung ste/ /sdug bsngal mang thar mdzad la phyag 'tshal lo/ /lha klu gnod sbyin bye ba khrag khrig phrag /brgya stong mang po mkha' la 'khod pa rnams/ /bcom ldan 'das kyi don ldan gsung thos nas/ /thams cad 'dren la rab tu dga' ba skyed/ /tshig ni rab tu snyan 50.52a cing bzang la 'thad/ /mnyen zhing 'jam la yid 'ong dus dang 'byor/ /gsung gi yan lag dpag tu med dang ldan/ /phan byed skye bo mang po thar byed pa/ /sil snyan brgya stong dpag tu med pa dang / /lha yi dbyangs sgra dga' bar 'gyur ba'i mchog /shin du snyan pa dus gcig 'byor gyur kyang / /bde gshegs gsung gcig gis ni zil gyis non/ /khu byug bya mang 'jam pa'i sgra 'byin dang / /kun la shin du yid 'thad dbyangs snyan dag /bya tshogs mang po thams cad sgra 'byin pa/ /sangs rgyas gsung gi char yang des mi phod/ /lha yi bu mo sgra dbyangs snyan pa dang / /sil snyan rol mo glu dbyangs 'jam pa dang / /pi bang rdza rnga rnga chen dung gi sgra/ /de dag sangs rgyas gsung gi char mi phod/ /khu byug ne tso ri skegs sgra rnams dang / /khrung khrung rma bya mi 'am ci yi sgra/ /sgra dbyangs yid 'ong snyan pa ci yod pa/ /de dag sangs rgyas gsung gi char mi phod/ /snyan cing mnyen la yid 'ong dga' ba dang / /shin du mnyen la rab bsngags zhi ba'i tshig /dbyangs rnams thams cad dus gcig bsgrags pa bas/ /de bzhin gshegs pa'i gsung mchog dgar 'gyur yin/ /lha mi mi dbang lha ma yin rnams dang / /srid gsum sems can mtha' dag ci yod pa/ /'od byed rnams kyi 'od snang de dag ni/ /bde gshegs 'od zer gcig gi zil gyis non/ /bde gshegs sku ni me tog rgyas pa bzhin/ /mtshan rnams kun gyis sna tshogs spras shing brgyan/ /bsod nams brgyas grub dag cing rnam par dang / /rgyal ba'i sku ni 'jig rten kun du lhan/ /dung gi sgra dang khar rnga sgra snyan dang / /rnga yi sgra dang de bzhin kim pa la yi sgra/ /rab tu 'jam zhing 'thad pa'i sgra de kun/ /sangs rgyas dbyangs kyi brgya yi char mi phod/ /sil snyan bye ba khrag khrig stong gi sgra/ /sgra skad gsal zhing mnyen pa lha yi 'dra/ /lha dang lha mo'i sgra dbyangs dgar 'gyur ba/ /sangs rgyas dbyangs kyi brgya yi char mi phod/ /khrung khrung rma bya ngur pa 50.52b khu byug dang / /ngang pa ku nal rnam mang bya yi tshogs/ /de dag sgra snyan dus gcig tshogs pas kyang / /sangs rgyas dbyangs kyi brgya yi char mi phod/ /klu dang gnod sbyin lha min lto 'phye dang / /lha dbang tshangs pa lha yi bdag po'i sgra/ /srid gsum yid 'ong 'thad pa ci yod pa/ /de dag sangs rgyas dbyangs kyi char mi phod/ /tshangs pa'i 'od dang lha yi dbang po dang / /nyi ma dang ni nor bu rin chen 'od/ /kun gyi 'od ni rnam pa du ma dag /'od kun rgyal ba'i 'od kyis zil gyis non/ /lus dang ngag dang yid kyang shin du rnam par dag /ye shes dag pa srid pa gsum na gos pa med/ /mi dbang yon tan dbyig tshogs yon tan rin chen mnga'/ /rang 'byung yon tan thams cad kyis ni mnyam med mnyam/ /de ltar stobs bcu bden pa gsung la bstod nas ni/ /gzhon nu yid kyang rab tu dga' bas tshig smras pa/ /sangs rgyas gzhal med dpag yas la ni mchod pa yis/ /shAkya thub bzhin bdag kyang sangs rgyas gyur cig smra/ /bde bar gshegs pas de yi spyod pa mchog mkhyen nas/ /mi dbang chags med ye shes mnga' ba 'dzum pa mdzad/ /stobs bcu sras kyi thu bo byams pas de zhus te/ /'dren pas gang gi slad du 'di ltar 'dzum pa mdzad/ /sa 'di dag kyang rnam pa drug tu yongs su g.yos/ /lha dang klu rnams mkha' la 'dug cing rab dga' ste/ /shin du sems rangs mgu bas sangs rgyas lta zhing mchis/ /bde gshegs zil gyis ma non de dag lung bstan gsol/ /skyes bu mchog gi ye shes gang la zhugs pa ni/ /bcom ldan 'das kyi nyan thos dag gi sa ma lags/ /rgyal ba khyod kyis gang gi slad du 'dzum mdzad pa/ /ye shes rnam dag dpe med ye shes ma lus gsungs/ /shAkya'i seng ge stobs bcu mnga' zhing rnam 'dren pa/ /rkang gnyis gtso bo ye shes kyi yang pha rol phyin/ /'dod chags dang ni zhe sdang tha ba gti mug sel/ /rab tu 'od snang mdzad pa khyod la zhu ba lags/ /byang chub dam pa mchog 'di rab tu tshol ba'i phyir/ / 50.53a 'dren pa khyod kyis bskal pa gang gA'i bye snyed dang / /de las lhag par yang ni spyod pa rab tu spyad/ /gang gi don du 'dzum pa 'di mdzad bstan du gsol/ /ye shes dam pa mchog 'di rab tu tshol ba'i phyir/ /ston pas phyag dang zhabs kyang yongs su btang ba mdzad/ /sras dang btsun mo gnyen bshes rtsa lag phangs pa btang / /thub pa 'dzum pa bstan pa 'di yi rgyu gang lags/ /rta dang ba glang dang ni shing rta rkang thang dang / /bran dang nor bu dngul dang mu tig khyod kyis btang / /spyod pa mchog spyod tshe ni khyod kyis ma btang ba/ /rin po che dang nor rdzas dag ni gang yang med/ /srid pa gsum na ye shes dag ni mchog tu gyur/ /sems can thams cad kyi ni spyod pa rab tu mkhyen/ /sems dang khams dang mos pa dag la'ang mkhas shing rig /gang gi don du 'dzum pa 'di dag bstan pa mdzad/ /mi yi gtso bo la ni gang gis mchod/ /gang gi don ni rgya che yangs par 'gyur/ /spyod pa 'di yang su dag rab tu 'dzin/ /thub pa gang gi don du 'dzum 'di bstan/ /sa yang rnam pa drug tu rab tu g.yos/ /pad ma bye ba mdab ma bye bar ldan/ /gser gyi pad ma shin du 'od gsal ba/ /mdzes shing yid du 'thad pa sa las byung / /byang chub sems dpa' rdzu 'phrul rab che ba/ /rgyal ba'i thugs kyi sras po de la mchis/ /chos smra ba yang mang po 'dir mchis te/ /'dren pa la ni de yi slad du zhu/ /rnga dang dung dang khar rnga sgra chen dang / /sil snyan bye ba khrag khrig brdungs pa yi/ /de dag sgra ni nam mkha' 'di las gda'/ /bde bar gshegs pa'i dbyangs ni bsam mi khyab/ /khrung khrung ngang pa ka la ping ka dang / /khu byug bya tshogs mang po 'dus pa yi/ /sgra dbyangs rab tu snyan pa phyung ba yang / /de dag sangs rgyas dbyangs kyi char mi phod/ /gang gis sbyin dang dul dang legs sdom rnams/ /sngon gyi bskal pa mang por bsnyen par bgyis/ /gang gis mi yi gtso bo rab mchod na/ /su yi slad du 'dzum pa 'di dag bstan/ /ri mo gus pa mchog kyang bskyed nas ni/ /sangs rgyas byang chub ji ltar thob 'gyur zhes/ /gang gis 50.53b rkang gnyis gtso la sngon chad zhus/ /su yi slad du 'dzum pa 'di dag bstan/ /stobs bcu ldan pa ji snyed 'das pa dang / /da ltar byung dang ma byon bde gshegs dang / /mi yi gtso bo thams cad rab tu mkhyen/ /de phyir skye dgu'i don du zhu ba lags/ /srog chags kun gyi spyod yul mtha' yas dang / /mi rnams gang gi bsam pa ji 'dra dang / /skye dgu'i sems kyi rgyud kyang rab tu mkhyen/ /de phyir mi yi gtso la zhu ba lags/ /rgyu dang rigs pa 'dul la mkhas pa dag /sangs rgyas ye shes ji ltar thob snyam pa/ /spyod pa mchog la su dag spyod pa rnams/ /de phyir bdag ni rkang gnyis gtso la zhu/ /gang gis phra zhing shin du blta dka'i chos/ /stong pa zhi ba mtshungs med bsam mi khyab/ /stobs bcu ldan pa'i spyod yul bsgoms pa rnams/ /de dag slad du 'dren pa bdag zhu'o/ /srog chags 'gro ba bsam yas kun gyi phyir/ /gang gis byams pa snying rje rab bsgoms shing / /gang la sems can 'du shes med pa dag /de phyir rkang gnyis gtso la bdag zhu'o/ /gang dag ye shes mtshungs med bsam mi khyab/ /de dag la ni gzung ba yong med de/ /sems dang spyod yul dag gi pha rol phyin/ /de phyir mgon po la ni bdag zhu'o/ /tshul khrims ye shes yon tan pha rol phyin/ /dus gsum la ni ye shes mtshungs med 'jug /khyod la 'khrul pa dag ni mi mnga' na/ /su yi slad du 'dzum pa 'di dag bstan/ /shA ri'i bu dang ma 'gags maud gal bu/ /bde gshegs nyan thos gzhan gang su mchis pa/ /'di la de dag ye shes mi 'jug ste/ /'di ni sangs rgyas spyod yul bla na med/ /chos rnams kun la dbang ba'i pha rol phyin/ /bslabs pa'i spyod pa kun gyis mngon par 'phags/ /'dren pa thugs rje dag kyang rab bskyed la/ /don dam mkhyen pa gsung sgra dbyung bar gsol/ /sngon gang bskal pa bye ba mang por yang / /skyabs dang dpung gnyen mchog tu gyur snyam ste/ /de 'dra'i sems kyis rkang gnyis gtso dris pa/ /'dren pas de yi 'bras bu deng gsung shig /gang zag chen pos lung bstan mnyan pa'i phyir/ /gnod 50.54a sbyin srin po grul bum gsang ba po/ /rkang gnyis gtso bo la ni rab rtog cing / /thams cad thal mo sbyar te gus par 'khod/ /sangs rgyas zhing ni bye ba mang po nas/ /byang chub sems dpa' 'phrul ldan mang po mchis/ /bde gshegs sras kyi gtso bo thugs las skyes/ /thams cad thal mo sbyar cing gus pas 'khod/ /shAkya seng ge mi mchog dri ba'i phyir/ /mi 'khrugs zhing phyogs 'jig rten rnam grags pa/ /shar phyogs nas ni spos kyi glang po yang / /byang chub sems dpa' khrag khrig mdun bdar mchis/ /shAkya seng ge mi mchog dri ba'i phyir/ /bde ba can gyi 'jig rten khams mchog nas/ /mthu chen thob dang spyan ras gzigs dbang yang / /byang chub sems dpa' khrag khrig lhan cig mchis/ /gang dag sngan chad bskal pa bye mang snyed/ /ye shes dam pa mchog 'di tshol ba'i phyir/ /rgya mtsho kun gyi bye ma mnyam pa yi/ /bde gshegs dpag tu med pa bsnyen bkur bgyis/ /sangs rgyas kun gyis bstod cing rab bsngags pa/ /chos rnams kun gyi yon tan pha rol phyin/ /'jig rten phyogs rnams kun du rab grags pa/ /'jam dbyangs legs par thal mo sbyar te mchis/ /sangs rgyas zhing du khrag khrig spyad bgyis kyang / /'di 'dra rnams ni mthong ba rnyed dka' ste/ /legs bslabs sangs rgyas sras po yon tan can/ /thams cad thal mo rab sbyar gus par 'khod/ /ston pa kun gyi chos kyi mdzod 'dzin pa/ /mkhas pa 'dir mchis ci 'dra de lta bu/ /snod du gyur pa 'di na gzhan ma mchis/ /'dren pa 'jam pa'i dbyangs su brjod pa gsungs/ /rgyal ba rnam 'dren gleng gzhi ma mchis par/ /gang zag dam pa 'dzum pa mi ston na/ /gang gi slad du 'dzum pa 'di bstan pa/ /rnga mchog sgra ldan gsung dbyangs dbyung du gsol/ /ngang pa khu byug rma bya sa ra sa/ /'brug gi sgra skad khyu mchog sgra 'byin bzhin/ /lha yi rol mo snyan pa'i sgra 'byin pa/ /sems can grol mdzad gsung gis lung ston cig /byams pa skyed cing dga' ba 'phel bar bgyid/ / 50.54b ye shes ston cing ma rig sel ba ste/ /don la rtog cing shes rab 'phel bgyid cing / /bskal pa khrag khrig bye bar rnam sbyong ba/ /rtogs pas nges bgyis dngos po rnam par bshig /sdug bsngal 'gog pa'i tshig don nges par ston/ /mu stegs kun gyi smra ba rnam par 'jom/ /stong pa srog med sems can med pa sgom/ /bsod nams stong phrag brgya yis legs par brgyan/ /sangs rgyas stong phrag brgya yis 'dir spyad de/ /lha rnams stong phrag brgya yis rab tu bstod/ /tshangs pa stong phrag brgya yis phyag kyang bgyis/ /gnod sbyin srin po grul bum dad bgyid de/ /klu dang lto 'phye 'dab bzangs grol bar bgyid/ /rtag tu ma chags shin du ldan pa ste/ /las dge'i 'bras bus 'phags pa gsung phyung shig /rgyal ba ji snyed mya ngan 'das pa dang / /gang dag ma byon pa dang bzhugs pa rnams/ /thams cad khyod kyis mkhyen cing thogs mi mnga'/ /'dren pa yon tan kun gyis shin du 'phags/ /'byung po 'dzin pa ri dang rgya mtshor bcas/ /sa 'di thams cad rnam pa drug tu g.yos/ /lha yi tshogs rnams mkha' las me tog 'thor/ /lha yi spos ngad yid du 'ong ba ldang / /'dod chags zhe sdang rab rib ma lus bsal/ /tshul khrims yongs dag yid kyang yongs su dag /mtshan med rab tu zhi ba'i stong la dgyes/ /seng ge'i sgra skad sgrogs shig thugs rje can/ /spobs dang ldan zhing shin du snyan pa yangs/ /rgyal ba'i shes rab rdzogs shing ye shes rdzogs/ /thugs rje ldan pa khyod 'dra 'jig rten med/ /gang gi don du 'dzum pa 'di bstan gsungs/ /rma bya khu byug ka la ping ka'i sgra/ /shang shang te'u'i sgra yang yid 'ong ba/ /dga' 'gyur skad kun dus gcig tshogs pas kyang / /bde gshegs gsung gi char ni des mi phod/ /rnga dang rdza rnga khar rnga de bzhin te/ /dung dang gling bu de bzhin pi bang dang / /sil snyan stong gi sgra rnams gcig tu 'dus/ /de dag bde gshegs sgra yi char mi phod/ / 50.55a lha yi sil snyan dam pa stong gi sgra/ /lha yi bu mo glu dbyangs snyan pa dang / /rol mo'i sgra rnams dga' ba skyed bgyid pa/ /de dag bde gshegs gsung gi char mi phod/ /'jig rten phan pa khyod kyi gsung gcig las/ /mos pa tha dad bzhin du sgra 'byung ste/ /rgyal ba bdag la ston snyam so so sems/ /gang gi slad du khyod kyis 'dzum mdzad bstan/ /lha yi sgra dang de bzhin klu yi skad/ /mi 'am ci yi sgra snyan ci mchis pa/ /de dag nam yang nyon mongs zhi mi bgyid/ /sangs rgyas gsung ni rtag tu nyon mongs sel/ /dga' ba skyed cing 'dod chags dga' ma lags/ /byams pa skyed cing zhe sdang blo ma lags/ /shes rab skyed cing gti mug blo ma lags/ /sangs rgyas gsung gis dri ma thams cad sel/ /'khor las slad rol tu ni sgra mi 'byung / /thams cad kyi yang nem nur brgya mang gcod/ /mtho ba ma lags dma' ba ma lags pa/ /thub pa'i gsung ni snyoms shing bde ba ston/ /ri dang nags bcas sa 'di gas gyur cing / /rgya mtsho'i chu dag de bzhin gas gyur la/ /zla ba nyi ma sa la lhung gyur kyang / /rgyal bas bshad pa rnam pa gzhan mi 'gyur/ /tshig gi yan lag thams cad dag pa'i gsung / /seng ge'i sgra skad 'jam zhing mnyen pa'i dbyangs/ /tshangs pa'i dbyangs mnga' bde gshegs thugs rje can/ /gang gi slad du 'dzum mdzad bstan du gsol/ /'das dang ma 'ongs pa dang da ltar gyi/ /'jig rten sems can ji snyed kun gyi yang / /sems dang spyod pa kun la rab tu mkhas/ /gang gi slad du 'dzum bstan bshad du gsol/ /rgyal ba ji snyed su dag thugs rje can/ /dbang dang ye shes kun gyi pha rol phyin/ /dri med zla zhal rgyal ba de dag ni/ /rtag tu rgyu med 'dzum pa mi mdzad do/ /bskal pa bye bar brjod kyang mtshungs med pa/ /gang gA'i bye snyed yon tan brjod bgyis kyang / /yon tan dag gi tshad brjod mi nus pa/ /gang gi slad du 'dzum bstan bshad du gsol/ /'dzum pa bstan pa'i le'u ste bcu bzhi pa'o// // de nas de'i tshe bcom ldan 'das 50.55b kyis byang chub sems dpa' byams pa la 'thun pa'i tshigs su bcad pa 'di dag gis slar bka' stsal pa/ zla 'od gzhon nur gyur pa 'di nyid kyis/ /mtshungs pa med pa'i dga' bas sangs rgyas bstod/ /sangs rgyas yon tan bye brag 'phags brjod pa/ /rtag tu khor mor shin du bsngags par 'gyur/ /sngon yang rgyal po'i khab kyi grong khyer 'dir/ /sangs rgyas dag kyang bye ba phrag stong mthong / /rgyal ba de dag kun gyi drung du 'dis/ /ting 'dzin zhi mchog 'di yang rab tu dris/ /byang chub spyod pa mchog 'di spyad pa na/ /'di ni kun du nga yi bur gyur te/ /thams cad du yang spobs dang ldan par gyur/ /kun du rtag par tshangs par spyod pa spyad/ /de ni phyi dus 'jigs pa chen po la/ /'di la ma pham khyod nyid nga yi dbang / /rtag tu tshangs spyod gtsang la gnas nas ni/ /ting nge 'dzin 'di shin du rgyas byed 'gyur/ /ting 'dzin dam pa 'di ni rab tshol zhing / /lam 'dir zhugs pas byang chub nges thob 'gyur/ /sangs rgyas bye ba mang pos yongs bzung ste/ /'dren pa rnams la mchod pa mchog byed 'gyur/ /nga ni ye shes la yang rab gnas te/ /zla 'od spyod pa khyad zhugs lung bstan cing / /'di yi srog dang tshangs par spyod pa dag /phyi ma'i dus la bar chad med par bya/ /lag mthil skyu ru 'bru lnga bkod pa bzhin/ /ma 'ongs pa na gang la mchod 'gyur ba/ /sangs rgyas bye ba dag ni phrag stong dang / /de las lhag par gang gA'i bye snyed shes/ /lha dang klu rnams bye ba brgyad bcu dang / /gnod sbyin bye ba stong phrag bdun bcu dag /phyi ma'i dus la brtson pa byed par 'gyur/ /rkang gnyis gtso bo la yang mchod pa byed/ /rkang gnyis gtso la mchod pa mchog byas te/ /ye shes bla med 'di ni rab bsgrubs nas/ /phyi dus lus la de ni 'jig rten mgon/ /rgyal ba dri med 'od ces bya bar 'gyur/ /zla 'od gzhon nur gyur pas bdag nyid kyi/ /lung bstan 'di thos dga' bas rgyas gyur te/ /ta la bdun srid du ni mngon 'phags nas/ /mkha' la 'dug ste ched du brjod pa brjod/ /e ma rgyal ba chos 50.56a mchog ston mdzad pa/ /rnal grol ye shes bdag po stobs la gnas/ /shin du nges pa'i ye shes mchog gnas pas/ /pha rol rgol ba dag gis zil mi non/ /chags pa spangs shing rnam par grol la reg /dngos po rnam bshig srid par chags mi mdzad/ /khyod la spros pa mtha' dag kun mi mnga'/ /srid pa gsum la chags med ye shes 'jug /spros pa thams cad kyis kyang mi gos shing / /lta ba spros pa mtha' dag rab tu spangs/ /lam yang shin du bsgoms shing gnas med pa/ /zil gyis ma non su dang mi 'phrod med/ /khyod ni khams gsum dag la gnas med de/ /chu bo dang ni mdud pa thams cad spangs/ /srid pa'i 'khri shing 'ching ba mtha' dag bcad/ /srid pa spangs shing srid par mtshams sbyor med/ /chos kyi rang bzhin dngos med rab mkhyen cing / /brjod du med pa'i tshig kyang thugs su chud/ /mu stegs phyin ci log la gnas pa dag /mi mkhas de bzhin seng ges wa bzhin bshig /bde bar gshegs pas bstan pa'i chos kyi gter/ /gter mchog dam pa bdag gis deng thob ste/ /ngan 'gro log par ltung ba thams cad spangs/ /'dren par mi 'gyur snyam ni the tshom med/ /gser gyi kha dog mdzes shing 'od gsal ba/ /phyag brkyang de yi mgo la rab bzhag nas/ /lhar bcas 'jig rten dag kyang dpang bkod de/ /mi yi khyu mchog byang chub dbang bskur mdzad/ /'dzum pa lung bstan pa'i le'u ste bcwa lnga pa'o// //de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen pos sems can thams cad srid pa'i sdug bsngal thams cad las thar bar bya bar 'dod pa dang / ting nge 'dzin gyi dga' zhing bde ba bla na med pa 'phags pa 'di la sems can rnams rab tu dgod par 'dod pas chos thams cad kyi rang bzhin mnyam pa nyid rnam par spros pa ting nge 'dzin gyi rgyal po 'di mnyan 50.56b par bya/ gzung bar bya/ kun chub par bya/ bcang bar bya/ bklag par bya/ rab tu gdon par bya/ lung mnod par bya/ kha ton du bya/ nyon mongs pa med pa'i bsgom pas bsgom par bya/ mang du bya/ gzhan la yang rgya cher yang dag par rab tu bstan par bya'o/ /de ci'i phyir zhe na/ gzhon nu chos thams cad kyi rang bzhin mnyam pa nyid rnam par spros pa ting nge 'dzin gyi rgyal po 'di ni ngan song thams cad las 'da' bar byed pa/ nad thams cad las rab tu thar bar byed pa yin te/ gzhon nu nam byang chub sems dpa' sems dpa' chen pos chos thams cad kyi rang bzhin mnyam pa nyid rnam par spros pa ting nge 'dzin gyi rgyal po 'di thos shing bzung ste bsgoms par gyur pa de'i tshe/ gzhon nu byang chub sems dpa' sems dpa' chen po de sems can thams cad srid pa'i sdug bsngal thams cad las thar bar byas shing ting nge 'dzin gyi dga' ba'i bde ba bla na med pa 'phags pa la sems can rnams rab tu 'god de ting nge 'dzin 'di yang myur du 'thob bo/ /bla na med pa yang dag par rdzogs pa'i byang chub kyang myur du mngon par rdzogs par 'tshang rgya'o/ /de nas de'i tshe bcom ldan 'das kyis zla 'od gzhon nur gyur pa la don 'di nyid bstan pa'i phyir tshigs su bcad pa'i dbyangs kyis sngon byung ba'i gtam bstan pa 'di yang dag par rab tu bshad do/ /sngon chad spyod pa spyad pa dran pa ni/ /bde gshegs seng ge rgyal mtshan bstan pa la/ /dge slong mkhas pa chos smra byung ba yang / /de yi ming ni tshangs pas byin zhes bya/ /nga ni blo gros zhes bya rgyal po'i bu/ /na bar gyur te mi bzad sdug bsngal tshor/ /de tshe tshangs pas byin pa chos smra ba/ /nga yi slob dpon du ni gyur pa yin/ /nga ni sman pa lnga brgya mi nyung ba/ /brtson pa'i yid kyis nad dpyad gso bar byed/ /nga yi nad ni gso bar ma nus nas/ /nga yi gnyen bshes kun kyang sdug bsngal gyur/ /nga yang na bar dge slong des thos nas/ /nad dri bar ni nga yi drung du 'ongs/ /tshangs byin nga la brtse ba rab bskyed nas/ /ting 'dzin mchog 'di de tshe bshad par gyur/ /nga ni ting 'dzin 50.57a dam pa 'di thos nas/ /'phags pa'i dga' ba zang zing med pa skyes/ /chos kyi ngo bo nyid kyang rab shes pas/ /nga yang de yi dus na nad las sos/ /mar me mdzad ni spyad pa spyod pa na/ /dge slong chos smra mkhas par gyur pa yin/ /nga ni blo gros rgyal po'i bur gyur te/ /ting 'dzin ye shes kyis ni nad las thar/ /de bas gzhon nu khyod kyis phyi dus na/ /yongs su nyams pa 'di dag rjes dran zhing / /byis pas nyes par brjod pa'i tshig bzod gyis/ /ting 'dzin 'di yang zung la legs par lhogs/ /phyi ma'i dus la dge slong mang po dag /brkam zhing gtum la ma bsdams 'byung bar 'gyur/ /sdig la dga' zhing lhung bzed chos gos chags/ /ting 'dzin 'di ni rab tu spong bar 'gyur/ /rgod cing dbang po g.yengs pa phrag dog can/ /grong la chags shing rnyed pa 'dod pa dag /sbyor ba byed pa'i skabs la rtag tu gnas/ /ting 'dzin 'di ni rab tu spong bar 'gyur/ /lag pa dang ni rkang pa rnam par rdob/ /rtse 'jo rgod la rtag par rab tu zhugs/ /gcig la gcig ni mgul 'khyud lag kyang spel/ /grong du spyod lam gzhan du sgyur bar byed/ /mi rigs sbyor ba'i mtshan nyid 'di dag ste/ /gzhan gyi bu mo la yang rtag tu chags/ /gzugs kyis rgyugs shing 'dun pa bor ba yin/ /grong dang grong khyer yul 'khor kun du rgyu/ /de dag bza' dang btung la rab tu zhugs/ /glu dang bro gar de bzhin rol mo dang / /nyo 'tshong lhag par byed cing rtag tu brtson/ /btung ba dag la chags shing ngo tsha bor/ /mi rigs brtson pa spring yig skur bar byed/ /tshul khrims de bzhin lam dag btang nas ni/ /khyim pa dag dang bsten cing khrims dral nas/ /de dag tshul zhig log par shin du gnas/ /las gang sangs rgyas kyis ni rtag smad pa/ /srang dang tshad la g.yo sgyu byed par zhugs/ /de 'dra'i sdig pa nyon mongs las byas pas/ /las ngan byed pa de dag ngan song 'gro/ /dung dang gser dang nor bu nor mang dang / /khyim dang gnyen bshes rnam spangs rab byung ste/ /sangs rgyas bstan pa 'di la rab byung nas/ / 50.57b sdig pa'i las rnams shin du spyod par byed/ /nor dang 'bru la snying por 'du shes shing / /bzhon dang ba lang shing rta rnams la chags/ /gang la bslab pa'i nan tan med pa rnams/ /de dag gis kyang ci phyir mgo bo bregs/ /ngas ni sngon tshe spyod pa spyad pa na/ /bskal pa stong du shin du dka' spyad de/ /nga yis ting 'dzin zhi ba 'di btsal na/ /de dag de tshe 'di thos gad mos 'debs/ /de dag yun ring brdzun smra tshangs mi spyod/ /rtag tu rnyed la dga' zhing ngan song gzhol/ /tshangs par spyod pa'i rgyal mtshan thogs nas ni/ /tshul khrims 'chal pa de ni chos min smra/ /de dag phan tshun dbye ba'i phyir 'jug ste/ /rigs pa ma yin pas ni rnyed pa tshol/ /gcig la gcig ni mi snyan rab brjod de/ /shi 'phos nas ni ngan song sar yang 'gro/ /de dag brgya dang stong gi nang na yang / /de tshe bzod pa'i stobs ldan shin du dkon/ /de phyir 'thab la brtson pa mang po 'byung / /bzod pa spangs nas rab tu spros pa byed/ /byang chub sems dpa' nged yin tshig tu smra/ /de yi sgra yang phyogs dang phyogs su 'gro/ /mi bden sgra yi dregs pas de rgyags te/ /tshul khrims nyams la byang chub ga la yod/ /gang la bsam pa rnam par dag med cing / /chos 'di la yang bzod pa med pa dang / /chos rnams spong byed byang chub 'di thob pa/ /ngas ni ma thos nam yang yong ma mthong / /de dag 'jigs shing skrag nas khyim spangs te/ /rab tu byung nas shin du dam du 'dzin/ /skyes bu dam pa'i theg pa spang byas nas/ /bye brag lhag par 'dod pa brlag par 'gyur/ /shes rab dman zhing yon tan rnam spangs pa/ /theg pa mchog gi nyes pa rtag tu brjod/ /gang gi skyabs su de dag rab zhugs pa/ /de nyid la yang nyes pa brgya dag brjod/ /'tsho ba med pa mang po rab byung ste/ /sangs rgyas byang chub rnam pa kun mi 'dod/ /byis pa de dag bdag tu lta la gnas/ /stong pa nyid ni thos nas skrag par 'gyur/ /phan tshun du yang rtsod pa byas nas ni/ /gnod sems khong khro tha ba 50.58a rab tu skyed/ /phan tshun du yang skur pa mngon 'debs shing / /sdig pa byas nas shin du dga' ba rnyed/ /gang dag tshul khrims gnas shing yon tan ldan/ /byams la gnas shing rtag tu bzod rtogs pa/ /mnyen zhing des la shin du bsdams pa rnams/ /de dag de tshe yongs su brnyas par 'gyur/ /gang la shin du gtum sems ldan 'byung dang / /mi bzad ma rungs ngan pa'i las byed pa/ /chos ma yin pa spyod cing 'thab la dga'/ /de dag de yi dus na mchod par 'gyur/ /bsgo bar bya zhing rab tu go bar bya/ /gzhon nu nga la dad pa'i phyir 'brang na/ /bde bar gshegs pas bstan pa 'di dran nas/ /de dag la ni nam yang yid mi rton/ /de dag 'dod chags che zhing zhe sdang che/ /gti mug che zhing nga rgyal dregs pas rgyags/ /lus kyang ma dul ngag kyang ma dul zhing / /sems kyang ma dul ngan song gzhol ba yin/ /nga ni yon tan dag gi bsngags brjod na/ /dge slong yon tan dag la mi spyod de/ /tshig tsam gyis ni byang chub thob mi 'gyur/ /nan tan lhur byed byang chub rnyed mi dka'/ /sngon byung ba'i le'u ste bcu drug pa'o// // de nas gtam 'di mthar phyin par gyur pa dang de'i tshe byang chub sems dpa' sems dpa' chen po byams pa de ltar 'dug bzhin du bcom ldan 'das la yid kyis tshigs su bcad pas zhus pa/ ri yi rgyal po bya rgod phung po ste/ /rtag tu sangs rgyas gnas par bde gshegs bzhud/ /'jig rten sgron ma der yang gshegs nas ni/ /khyod la bsam gyis mi khyab mchod pa bgyi/ /de nas bcom ldan 'das kyis byang chub sems dpa' sems dpa' chen po byams pa'i sems kyi rtog pa thugs kyis mkhyen nas byang chub sems dpa' sems dpa' chen po byams pa la yid kyis tshigs su bcad pas btang ba/ ri yi rgyal por rgyal ba mngon gnas par/ /ma pham bdud rnams pham byas khyod song shig /der ni 'gro ba kun gyi don chen yang / /bla na med pa myur du grub par 'gyur/ /de nas byang chub sems dpa' sems dpa' chen po byams pa bcom ldan 'das kyis yid kyis tshigs 50.58b su bcad pas btang ba dang / bcom ldan 'das la yid kyis phyag 'tshal/ bcom ldan 'das la yid kyis lan gsum bskor ba byas nas 'khor de nas byung ste sangs rgyas mu med pa rgya mtsho'i bye ma snyed kyi gnas ri'i rgyal po bya rgod kyi phung po mchod rten chen po gang na yod pa der song ste phyin nas 'di lta ste/ bcom ldan 'das kyis yongs su longs spyad pa'i phyir de'i mod la ri'i rgyal po bya rgod kyi phung po mnyam zhing yangs pa rgya che ba/ sdong dum dang tsher ma dang rdo dang gseg ma dang gyo mo med cing kho ra khor yug kun rin po che sna bdun du byin gyis brlabs te/ sa gzhi rin po che an da rnyil 'bar ba bsam gyis mi khyab la dpe med pa'i lha'i rgyan thams cad dang rin po ches brgyan pa/ rin po che rnam pa sna tshogs grangs med pa du ma'i bkod pas rab tu spras pa/ dga' ldan ris kyi lha'i na bzas khyim gyi nye 'khor brgyan cing spud de/ bdug spos kyi snod sna tshogs nas ni bdug pa 'thul bar byas/ phreng ba dang lda ldis ni brgyan/ me tog sna tshogs ni bkram/ lha'i rol mo'i sgra dbyangs ni bsgrags/ rgyal mtshan dang ba dan dang lhab lhub bsgreng bas ni gang / khyams kyi dkyil 'khor du ni bla re bres/ 'khor gyi khyams kyi dbus su ni rin po che sna bdun las byas pa'i lha'i seng ge'i khri mngon par sprul te rgyu spun las ma byas pa'i gos ni bting / ka tsa lin di ltar 'jam zhing reg na bde ba dga' ldan ris kyi lha'i na bzas ni g.yogs/ steng du snying po beg tsher ni bting / snam rten mtha' gnyis dmar po ni bshams/ chu zheng dang 'phang du dpag tshad tsam yod pa btsugs te/ zhabs rten ni lha dang mi'i las 'das pa/ 'dzam bu'i chu bo'i gser las byas pa/ mu tig gi dra bas g.yogs pa/ ras rin po che bcos bus g.yogs pa/ seng ge'i khri la btags pa'i lha'i rin po che'i dril bu las ni sgra 'jam zhing yid du 'ong ba gsal bar 'byung / phyogs kun du ni nor bu rin po che chen pos snang bar gyur/ /rin po che'i gdugs chen po rtsa ba ni bai dUr+ya dri 50.59a ma med pa'i rin po che chen po las byas par mngon par sprul to/ /de nas byang chub sems dpa' sems dpa' chen po byams pas ri'i rgyal po bya rgod kyi phung po khor yug dang bcas pa thams cad rin po che sna tshogs du ma'i bkod pa'i rgyan bsam gyis mi khyab pas brgyan pa mngon par sprul nas skad cig de nyid la zla 'od gzhon nur gyur pa'i khyim du zhugs par gyur to/ /zhugs nas bcom ldan 'das la yid kyis phyag byas te/ bcom ldan 'das la yid kyis lan gsum bskor ba byas nas stan la 'dug go/ /de la 'di skad ces bya ste/ ri yang lha rdzas yangs shing rgya che ba/ /rin chen rdo stengs bzang zhing dga' ba dang / /bsam gyis mi khyab lha rdzas yid kyi khyams/ /dbus su rin chen seng ge'i khri yang btsugs/ /lha rdzas gdugs las yid 'ong sgra 'byung zhing / /phyogs su nor bu rin chen 'od cher 'byung / /rtsa ba yid du 'thad pa'i bai dUr+ya/ /ma pham rgyal ba'i sras pos de ltar sprul/ /ri yang rin chen sna tshogs rnam par bkra/ /rin chen gdan mchog rgyang grags tshad tsam du/ /byams pa dpa' bos de dag rab sprul nas/ /skad cig de nyid la ni khyim du zhugs/ /de nas bcom ldan 'das 'khor chen po rgya mtsho lta bu la chos kyi gtam yang dag par bstan te/ yang dag par gzing bstod/ yang dag par rab tu dga' bar byas/ yang dag par btsud de gdan las bzhengs nas gshegs so/ /de lta bu'i sangs rgyas kyi rdzu 'phrul gyis rgyal po'i khab kyi grong khyer chen po'i chu dron gyi sgor byung nas ri'i rgyal po bya rgod kyi phung po gang na yod pa der gshegs te byon pa dang byams pas sprul pa'i khyams gang na yod pa der gshegs te byon nas byams pas mngon par sprul pa'i seng ge'i khri chen po la bzhugs te/ dge slong gi dge 'dun gyis ni yongs su bskor cing / byang chub sems dpa'i dge 'dun gyis ni mdun gyis bltas/ lha dang klu dang gnod sbyin dang dri za dang lha ma yin dang drang srong dang nam mkha' lding dang mi'am ci dang lto 'phye chen po dang mi dang mi ma yin pas ni phyag byas te 'khor rgya mtsho lta bu'i 50.59b nang na chos ston to/ /de nas zla 'od gzhon nur gyur pa srog chags bye ba khrag khrig brgya stong thams cad lhags par gyur pa rnams dang / 'jig rten gyi khams gzhan dag nas lhags pa'i byang chub sems dpa' sems dpa' chen po khrag khrig mang po dang lhan cig tu me tog dang bdug spos dang phreng ba dang byug pa thogs nas rol mo ni byed/ pheg ni rdob/ gdugs dang rgyal mtshan dang lha'i ba dan ni sgreng / phreng ba chen po dbul ba ni thogs nas bcom ldan 'das la mchod pa bya ba'i phyir rgyal po'i khab kyi grong khyer chen po zhi ba'i sgo nas byung ste/ bya rgod kyi phung po'i ri gang na yod pa dang bcom ldan 'das ga la ba der dong ste phyin pa dang / bcom ldan 'das kyi zhabs la mgo bos phyag 'tshal te/ bcom ldan 'das la lan gsum bskor ba byas nas me tog dang bdug pa dang spos dang phreng ba dang byug pa dang phye ma dang na bza' dang gdugs dang rgyal mtshan dang ba dan dang sil snyan dang pheg rdo' bas mchod pa chen po byas te phyogs gcig tu 'khod do/ /gus pa dang ldan ri mo dang ldan par chos dri ba'i phyir phyogs cig tu 'dug pa dang zla 'od gzhon nur gyur pa pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /gal te zhus nas zhu ba lung bstan pa'i slad du bcom ldan 'das de bzhin gshegs pa dgra bcom pa yang dag par rdzogs pa'i sangs rgyas kyis bdag la skabs phye na bdag phyogs 'ga' zhig zhu'o/ /de skad ces gsol pa dang bcom ldan 'das kyis zla 'od gzhon nur gyur pa la 'di skad ces bka' stsal to/ /gzhon nu de bzhin gshegs pas rtag tu khyod la skabs phyes/ de bzhin gshegs pa dgra bcom pa yang dag par rdzogs pa'i sangs rgyas la ci dang ci 'dod pa dris shig /de skad ces bka' stsal te go skabs phye nas bcom ldan 'das la zla 'od gzhon nur gyur pas 'di skad ces gsol to/ /bcom ldan 'das byang chub sems 50.60a dpa' sems dpa' chen po chos du dang ldan na chos thams cad kyi rang bzhin mnyam pa nyid rnam par spros pa'i ting nge 'dzin 'di thob par 'gyur/ de skad ces gsol pa dang / bcom ldan 'das kyis zla 'od gzhon nur gyur pa la 'di skad ces bka' stsal to/ /gzhon nu chos bzhi dang ldan na byang chub sems dpa' sems dpa' chen pos chos thams cad kyi rang bzhin mnyam pa nyid rnam par spros pa'i ting nge 'dzin 'di 'thob par 'gyur ro/ /bzhi gang zhe na/ gzhon nu 'di la byang chub sems dpa' sems dpa' chen po des shing 'grogs na bde ba yin/ dul zhing dul ba'i sa thob pa yin te/ de pha rol gyis gshes sam/ spyos pa'i tshig nyes par smra zhing / nyes par rjod pa'i tshig gi lam bzod cing mi mjed pa'i rang bzhin can yin/ las la lta zhing nga rgyal bcom pa dang chos 'dod pa yin te/ gzhon nu chos dang po 'di dang ldan na byang chub sems dpa' sems dpa' chen pos ting nge 'dzin 'di thob par 'gyur ro/ /gzhan yang gzhon nu byang chub sems dpa' sems dpa' chen po tshul khrims dang ldan pa yin/ tshul khrims yongs su dag cing tshul khrims ma zhig pa dang tshul khrims la skyon med pa dang tshul khrims 'dren ma ma yin pa dang tshul khrims sra srer ma gyur pa dang tshul khrims ma nyams pa dang tshul khrims mi gnas pa dang tshul khrims ma 'bags pa dang tshul khrims mi dmigs pa dang 'phags pas bstod pa'i tshul khrims dang mkhas pas bstod pa'i tshul khrims pa yin te/ gzhon nu chos gnyis po 'di dag dang ldan na byang chub sems dpa' sems dpa' chen pos ting nge 'dzin 'di thob par 'gyur ro/ /gzhan yang gzhon nu byang chub sems dpa' sems dpa' chen po khams gsum la sems skrag pa dang sems dngangs pa dang skyo ba dang don du mi gnyer cing mngon par mi dga' ba dang ma chags ma zhen pa dang khams gsum la yid skyo bas khams gsum las gzhan du sems can sdug bsngal ba rnams thar 50.60b bar bya'o zhes brtson zhing bla na med pa yang dag par rdzogs pa'i byang chub tu yang dag par sgrub pa yin te/ gzhon nu chos gsum po 'di dag dang ldan na byang chub sems dpa' sems dpa' chen pos ting nge 'dzin 'di thob par 'gyur ro/ /gzhan yang gzhon nu byang chub sems dpa' sems dpa' chen po dad cing chos yongs su tshol bas mi ngoms pa yin/ mang du thos shing 'jigs pa med pa yin/ chos 'dod cing chos lhur byed pa yin te/ rnyed pa dang bkur sti lhur byed pa ma yin/ shes kyi khe lhur byed pa ma yin/ phan pa'i dngos po sngon du 'gro ba'i sems kyis chos ji skad du thos pa dang / ji ltar khong du chud pa gzhan la rgya cher 'chad cing rab tu ston pa yin te/ shes kyi khe 'dod pas ni ma yin gyi ci nas sems can 'di rnams chos 'di dag thos nas bla na med pa yang dag par rdzogs pa'i byang chub las phyir mi ldog par 'gyur snyam pa ste/ gzhon nu chos bzhi po 'di dag dang ldan na byang chub sems dpa' sems chen pos ting nge 'dzin 'di thob par 'gyur ro/ /gzhon nu chos bzhi po 'di dag dang ldan na byang chub sems dpa' sems dpa' chen pos chos thams cad kyi rang bzhin mnyam pa nyid rnam par spros pa'i ting nge 'dzin 'di thob par 'gyur te/ myur du bla na med pa yang dag par rdzogs pa'i byang chub tu mngon par rdzogs par 'tshang rgya'o/ /gzhon nu rnam grangs 'dis ting nge 'dzin 'di 'di ltar sangs rgyas mang pos bshad pa sangs rgyas mang pos bsngags pa sangs rgyas mang pos yang dag par rab tu bstan pa/ sangs rgyas mang pos rab tu bstod pa yin te/ gzhon nu sangs rgyas bcom ldan 'das mang po'i drung du nga rab tu byung nas chos thams cad kyi rang bzhin mnyam pa nyid rnam par spros pa'i ting nge 'dzin 'di rgya cher mnyan te bzung ngo / /dris shing bcangs so/ /blags so bton to/ /nyon mongs pa med pa'i bsgom pas bsgoms shing mang du byas so/ /gzhan la rgya cher yang dag par rab tu bstan to/ / 50.61a de nas bcom ldan 'das kyis sangs rgyas mang po nges par brjod pa'i ting nge 'dzin gyi sgo sngon byung ba'i gtam bstan pa 'di de'i tshe zla 'od gzhon nur gyur pa la tshigs su bcad pa'i dbyangs kyis rgya cher yang dag par rab tu bstan pa/ dran pa bskal pa gzhal med dpag yas na/ /rgyal ba dbyangs kyi yan lag sgra byung ste/ /bde gshegs dbyangs kyi yan lag sgra de yi/ /tshe tshad lo yang brgya phrag drug bcur gyur/ /de yi pha rol sangs rgyas gzhan byung ba/ /mi mchog mtshan ni ye shes dbang phyug ste/ /rkang gnyis gtso bo ye shes dbang phyug gi/ /tshe tshad lo grangs stong phrag bcu gnyis so/ /ye shes dbang phyug pha rol sangs rgyas ni/ /gzi brjid dbang phyug ces bya rgyal ba byung / /rkang gnyis gtso bo gzi brjid dbang po yi/ /tshe tshad lo ni stong phrag drug bcu bdun/ /gzi brjid dbang phyug pha rol sangs rgyas ni/ /blo gros dbang phyug ces bya rgyal ba byung / /rkang gnyis gtso bo blo gros dbang phyug gi/ /tshe yi tshad ni lo grangs bye bar tshang / /blo gros dbang phyug pha rol sangs rgyas ni/ /tshangs pa'i dbang phyug ces bya rgyal ba byung / /rkang gnyis gtso bo tshangs pa'i dbang phyug gi/ /tshe yi tshad ni lo khri bzhi stong gyur/ /tshangs pa'i dbang phyug pha rol sangs rgyas ni/ /me yi dbang phyug ces bya rgyal ba byung / /rkang gnyis gtso bo me yi dbang phyug gi/ /tshe tshad lo grangs bdun khri drug stong gyur/ /me yi dbang phyug pha rol sangs rgyas ni/ /tshangs pa'i zhal zhes bya ba rgyal ba byung / /rkang gnyis gtso bo tshangs pa'i zhal de yi/ /tshe yi tshad ni nyin zhag bdun du gyur/ /tshangs pa'i zhal gyi pha rol sangs rgyas ni/ /tshogs kyi dbang phyug ces bya rgyal ba byung / /rkang gnyis gtso bo tshogs kyi dbang phyug gi/ /tshe yi tshad ni lo grangs bye bar tshangs/ /tshogs kyi dbang phyug pha rol sangs rgyas ni/ /dbyangs kyi dbang phyug ces bya rgyal ba byung / /rkang gnyis gtso bo dbyangs kyi dbang phyug gi/ /tshe tshad lo grangs bye ba phrag dgur tshang / /dbyangs kyi dbang phyug pha rol sangs rgyas ni/ /dbyangs kyi zhal zhes bya ba rgyal 50.61b ba byung / /rkang gnyis gtso bo dbyangs kyi zhal gyi yang / /tshe tshad lo grangs bye ba phrag bcur tshang / /dbyangs kyi zhal gyi pha rol sangs rgyas ni/ /zla ba'i zhal zhes bya ba rgyal ba byung / /rkang gnyis gtso bo zla ba'i zhal gyi ni/ /tshe yi tshad kyang nyin zhag gcig tu gyur/ /zla ba'i zhal gyi pha rol sangs rgyas ni/ /nyi ma'i zhal zhes bya ba rgyal ba byung / /rkang gnyis gtso bo nyi ma'i zhal gyi yang / /tshe tshad lo ni stong phrag bcwa brgyad do/ /nyi ma'i zhal gyi pha rol sangs rgyas ni/ /tshangs pa'i zhal zhes bya ba'i rgyal ba byung / /rkang gnyis gtso bo tshangs pa'i zhal gyi yang / /tshe tshad lo ni stong phrag nyi shu'o/ /tshangs pa'i zhal gyi pha rol sangs rgyas ni/ /tshangs pa'i snyan pa zhes bya rgyal ba byung / /rkang gnyis gtso bo tshangs pa'i snyan pa yi/ /tshe tshad lo grangs stong phrag bcwa brgyad gyur/ /bskal pa gcig la sangs rgyas 'di dag dang / /'jig rten rnam par 'dren pa nyis brgya byung / /zil gyis ma non de bzhin gshegs pa yi/ /mtshan rnams 'dir yang brjod kyis mnyan par gyis/ /mtha' yas dbyangs dang rnam par grags pa'i dbyangs/ /rnam par bsgrags pa'i gzi brjid rnam grags sgra/ /sgra skad rnam grags sgra dbyangs mchod pa dang / /dbyangs kyi yan lag dpa' dang dbyangs dag dang / /ye shes stobs dang ye shes bye brag 'gro/ /zil gyis ma non ye shes yang dag 'phags/ /ye shes 'od 'phro ye shes mngon par 'phags/ /ye shes rnam grags de bzhin ye shes dpa'/ /tshangs pa'i stobs dang tshangs nor tshangs pa'i mchog /tshangs pa'i lhar bcas de bzhin tshangs pa'i dbyangs/ /tshangs pa'i dbang phyug tshangs pa'i mi dbang spyan/ /tshangs pa'i sgra dbyangs yan lag tshangs pas byin/ /gzi brjid stobs dang gzi ldan gzi brjid mchog /gzi brjid dbang phyug gzi brjid mngon par 'phags/ /gzi brjid khyab dang gzi brjid shin du nges/ /gzi brjid sgra dbyangs shin du rnam grags 50.62a gzi/ /'jigs btsan stobs dang 'jigs btsan blo gros dang / /shin du 'jigs btsan 'jigs zhal 'jigs btsan 'phags/ /'jigs btsan 'od 'phro 'jigs mchog 'jigs pa'i dbyangs/ /'jig rten rnam 'dren rgyal ba 'di dag byung / /sgra dbyangs zab mo dang ni dpal 'dzin dang / /rnam dag sgra yi dbang phyug tshangs pa'i dbyangs/ /mtha' yas dbyangs dang shin du rnam grol dbyangs/ /bdud kyi stobs dang bdud rnams skrag byed dang / /spyan bzangs dang ni zhal gtsang spyan dag dang / /rnam par dag pa'i spyan dang mtha' yas spyan/ /kun nas spyan dang rnam par grags pa'i spyan/ /spyan gyis zil gyis gnon dang ma smad spyan/ /dul mchog dul dang shin du dul ba'i sems/ /dul rab zhi ba'i dbang po zhi ba'i yid/ /zhi ba'i bla ma zhi dpal rab tu zhi/ /zhi ba'i pha rol phyin dang zhi bar dpa'/ /bla mar gnas pa zhi ba dul bar sems/ /shin du dul dang zhi dbang zhi ba'i yid/ /zhi ba'i bla ma zhi ba'i dpal 'bar ba/ /zhi ba rab zhi dbang phyug zhi bar dpa'/ /tshogs dbang tshogs gtso tshogs kyi dbang phyug dang / /tshogs rnams zil gnon tshogs bzang ye shes gtsang / /tshogs kyi dbang chen tshogs dbang dpa' bo dang / /gzhan yang tshogs bzang rab tu rnam par 'byed/ /chos kyi rgyal mtshan de bzhin chos kyi tog /chos kyi bla ma chos kyi rang bzhin 'phags/ /chos kyi stobs ldan chos bzang dpa' bo dang / /rang bzhin chos kyi bla ma nges pa byung / /rang bzhin chos kyi bla ma nges par ni/ /mtshan gcig pa yang bye phrag brgyad bcu ste/ /bskal pa gnyis la 'dren pa 'di dag byung / /byang chub phyir ni 'di dag ngas mchod de/ /rang bzhin chos kyi bla ma nges pa yi/ /rgyal ba'i mtshan rnams gang dag nyan byed cing / /thos nas rnam par grags pa'i mtshan 'dzin na/ /de dag myur du ting 'dzin 'di thob 'gyur// // 'phags pa ting nge 'dzin gyi rgyal po'i mdo/ bam po drug pa/ de nas bcom ldan 'das kyis sangs rgyas 50.62b mang po'i ting nge 'dzin gyi sgo sngon byung ba'i le'u 'di zla 'od gzhon nur gyur pa la rgya cher rgyas par rab tu bstan to/ /sangs rgyas 'di dag gi yang pha rol na/ /bskal pa bsam yas dpag tu med pa'i tshe/ /lha mis mchod pa sangs rgyas gzhan zhig byung / /de yi mtshan ni mi dbang dbyangs shes bya/ /de bzhin gshegs pa mi dbang dbyangs kyi ni/ /tshe tshad lo grangs bdun khri drug stong ste/ /nyan thos dag ni bye ba brgya phrag gsum/ /de yi 'dus pa dang por gyur pa yin/ /mngon shes drug ldan gsum rig dbang po thul/ /mthu yang che zhing rdzu 'phrul chen po ste/ /zag pa zad pa tha ma'i lus 'dzin pa/ /'od mdzad kyi ni dge 'dun de tshe byung / /bye ba khrag khrig stong phrag brgyad bcu yi/ /byang chub sems dpa' rnams kyi tshogs byung ste/ /blo gros zab cing grags pa shin du che/ /mthu yang che zhing rdzu 'phrul che bar gyur/ /mngon par shes pa thob cing spobs par ldan/ /stong pa thams cad rtogs par khong du chud/ /zhing ni bye bar de las lhag par yang / /gang gA'i bye ma snyed du 'phrul gyis 'gro/ /rkang gnyis gtso la dri ba dris nas ni/ /phyir yang rgyal ba de yi drung du 'ong / /mdo sde sgrub pa nges pa'i tshig la mkhas/ /snang bar gyur pa sa yi steng na rgyu/ /sems can don phyir spyad pa rnam spyod de/ /bde bar gshegs pa'i sras po mthu chen ni/ /'dod pa'i rkyen gyis sdig pa mi byed de/ /de dag la ni lha yang smon pa skyed/ /srid pa'i 'gro bar mi gnas don mi gnyer/ /mnyam bzhag bsam gtan gnas pa'i spyod yul can/ /rnam par nges pa'i don ldan 'jigs med pa/ /dri ma med par rtag tu tshangs par spyod/ /tshig kyang rgyun mi 'chad cing spobs par ldan/ /nges tshig bstan pa'i tshig gi don la mkhas/ /sangs rgyas sras po kun du yang dag ston/ /dge ba'i las rnams kyis kyang yongs su bzung / /bskal pa mtha' yas par ni spyod pas 'phags/ /'dren pa dag gis rtag tu bstod cing bsngags/ /rnam par thar dang don tshig yang dag ston/ /tshul khrims shin du dag cing nyon mongs 50.63a med/ /chu yis pad ma bzhin du mi chags te/ /khams gsum las ni rnam grol bag yod pa/ /'jig rten chos brgyad dag gis mi gos shing / /lus kyang rnam dag las kyang yongs su dag /'dod pa nyung zhing chog shes mthu yang che/ /chags pa med cing sangs rgyas yon tan gnas/ /sems can kun gyi rten dang dpung gnyen te/ /tshig tsam ma yin nan tan snying por byed/ /gang la gnas pa de nyid gzhan la ston/ /sangs rgyas thams cad kyis kyang yongs su bzung / /rgyal ba rnams kyi mdzod 'dzin thugs brtan pa/ /khams gsum thams cad la yang skrag pa'i yid/ /rab tu sems zhi rtag tu dgon par spyad/ /'jig rten 'dren pa rnams kyis byin brlabs pas/ /mdo sde bye ba phrag stong 'chad par byed/ /'chad pa de yang sangs rgyas rnams kyis bsngags/ /'jig rten dag gi tshig kun rnam spangs te/ /stong pa nyid la mos shing don dam ston/ /bsngags pa mtha' yas yon tan rgya mtsho bzhin/ /mang du thos shing mkhas pa shes rab ldan/ /gzhon nu bskal pa bye ba mang por ni/ /rgyun chad med par bsngags pa rab brjod kyang / /de ni cung zad tsam zhig brjod par 'gyur/ /rgya mtsho las ni chu thigs gcig po bzhin/ /de tshe mi yi dbang po'i dbyangs de ni/ /ting 'dzin zhi ba mthong dka' 'di ston te/ /stong gsum chen po'i 'jig rten khams 'di yang / /lha dang klu rnams kyis ni gang bar gyur/ /de yis ting 'dzin zhi ba 'di bshad tshe/ /sa yang rnam pa drug du rab tu g.yos/ /lha dang mi rnams gang gA'i bye ma snyed/ /sangs rgyas ye shes la ni mi ldog gnas/ /der yang mi dbang rgyal po byung ba ni/ /dpal gyi stobs shes bya ba mthu che ba/ /de la bu yang brgya phrag lnga yod de/ /byad bzhin bzang zhing mdzes la blta na sdug / rgyal po de yi btsun mo'i 'khor kyang ni/ /bud med bye ba brgya phrag brgyad bcu yod/ /sa bdag rgyal po de yi bu mo yang / /bye ba stong phrag bcu bzhir tshang ba byung / /de yang ston zla tha chungs nya ba la/ /yan lag brgyad ldan 50.63b gso sbyong bzung nas ni/ /bye ba khrag khrig brgyad bcu lhan cig tu/ /'jig rten gtso bo'i drung du nye bar 'ongs/ /rkang gnyis gtso bo'i zhabs la phyag 'tshal te/ /rgyal ba de yi spyan sngar rgyal po 'dug /rgyal po de yi lhag pa'i bsam mkhyen nas/ /ting 'dzin 'di n-i rkang gnyis dbang pos bshad/ /ting 'dzin 'di ni rgyal po des thos nas/ /rgyal srid mchil ma bzhin du kun spangs te/ /gnyen dang rtsa lag sdug pa yongs btang nas/ /rgyal ba de yi drung du rab tu byung / /bu yang brgya phrag lnga dag rab byung ste/ /de bzhin btsun mo'i 'khor dang sras mo dang / /gnyen bshes rtsa lag mang po gzhan dag kyang / /bye ba khrag khrig bdun bcu rtsa drug byung / /bu dang chung mar bcas pa rab byung nas/ /kha zas sgrub pa'i sa yang bor nas ni/ /rgyun ma chad par lo brgyad bar du bcags/ /'chag cing 'gring bzhin 'chi ba'i dus kyang byas/ /rgyal po'i glang po ting 'dzin sems dpa' de/ /rtag par rab tu mnyam bzhag dus byas pas/ /de 'ang rgyal po'i pho brang der skyes te/ /mngal gyi dri mas ma gos brdzus te byung / /de yi pha ni brtan pa'i stobs shes bya/ /blo gros che zhes bya ba mar gyur te/ /gzhon nu btsas ma thag tu tshig smra ba/ /'jig rten mgon po de nyid bzhugs sam ge/ /'jig rten mgon pos bdag gi sems mkhyen nas/ /de phyir bdag la zhi ba'i ting 'dzin bshad/ /rkyen rnams med cing rkyen dang bral ba yang / /srid pa'i 'gro ba rnams ni gcig tu bstan/ /chos rnams kun gyi rang bzhin phyag rgya gang / /mdo sde bye ba khrag khrig byung ba dag /byang chub sems dpa'i nor ni bla med pa/ /ting 'dzin 'di ni rgyal bas bshad mdzad dam/ /lus kyang gtsang zhing de bzhin ngag gtsang ba/ /sems gtsang de bzhin lta ba gtsang ma dang / /dmigs pa rnams las yang dag 'da' ba yi/ /ting 'dzin de ni rgyal bas bshad mdzad dam/ /chud mi za ba'i 'bras bu chos bstan pa/ /lam mchog yan lag brgyad ldan sgom pa ste/ /de bzhin gshegs dang phrad cing shes rab rno/ / 50.64a bden la 'jug dang rtag tu chos shes pa/ /phung po yongs shes khams rnams mnyam pa nyid/ /skye mched rnam pa kun du bsal ba ste/ /skye ba med pa mngon sum 'jug pa dag /ting 'dzin de ni rgyal bas bshad mdzad dam/ /so so yang dag rig pa bzhi la 'jug /yi ge thams cad dbye ba'i ye shes dang / /dngos por 'jug pa las ni 'da' ba yi/ /ting 'dzin de ni rgyal bas bshad mdzad dam/ /dbyangs rnams yongs su shes shing dga' ba thob/ /bde gshegs bsngags pa la 'ang dgar gyur cing / /'phags pa dag gi tshul 'jam drang po yi/ /ting 'dzin de ni rgyal bas bshad mdzad dam/ /des pa nam yang khro gnyer mi byed cing / /mnyen zhing 'jam pa bzhin yang 'dzum pa ste/ /sems can mthong nas sngon du smra ba yi/ /ting 'dzin de ni rgyal bas bshad mdzad dam/ /le lo med cing bla ma'i ri mo byed/ /sri zhu che bas phyag 'tshal sdug par lta/ /skye ba dag gis chog shes dkar ba yi/ /ting 'dzin de ni rgyal bas bshad mdzad dam/ /'tsho ba dag cing de bzhin dgon gnas dang / /sbyangs pa dag la gnas shing dran mi nyams/ /phung po dang ni khams la mkhas pa yi/ /ting 'dzin de ni rgyal bas bshad mdzad dam/ /skye mched mkhas shing mngon shes ye shes dang / /nyon mongs bsal ba dul ba'i sa rnams dang / /gsang sngags mang po thams cad 'chad pa yi/ /ting 'dzin de ni rgyal bas bshad mdzad dam/ /srid pa'i 'gro ba kun las 'da' ba dang / /skye ba dran zhing chos la nem nur med/ /chos la sems shing thos pa tshol ba yi/ /ting 'dzin de ni rgyal bas bshad mdzad dam/ /khyad par 'gro zhing rtag tu sgom la 'jug /ltung ba dag la mkhas shing 'byung bar gnas/ /de la gnas pas bag la nyal ba sel/ /ting 'dzin de ni rgyal bas bshad mdzad dam/ /gang las ye shes rno ba'i mchog 'byung ba/ /mi g.yo ri bo bzhin du mi sgul ba/ /phyir mi ldog pa'i mtshan dang gzungs kyi sgo/ /ting 'dzin de ni rgyal bas bshad mdzad dam/ /rtag tu dkar 50.64b po'i chos rnams yongs tshol zhing / /sdig pa'i chos rnams khor mor rnam par spong / /rtag tu nyon mongs phyogs rnams rgyu ba med/ /ting 'dzin de ni rgyal bas bshad mdzad dam/ /bslab pa kun la rtogs par khong du chud/ /mkhas pa ting 'dzin gnas pa rtogs par rig /sems can dag gi bsam pa shes pas skul/ /sangs rgyas byang chub mchog tu chos kyang ston/ /khyad par shes pa skye ba shes pa dang / /mtha' yas shes pa shin du rdzogs par shes/ /'gro ba kun du mtshams sbyor shes pa yi/ /ting 'dzin de ni rgyal bas bshad mdzad dam/ /khyim gyi gnas spangs rab tu 'byung ba'i sems/ /khams gsum la yang mi dga' mi 'dzin cing / /sems rnams rab tu 'dzin cing dga' byed pa/ /chos rnams rkang gnyis gtso bo ston mdzad pa/ /skyob pa chos rnams la yang ma chags shing / /rtag tu chos kyi mchog kyang yongs su 'dzin/ /las kyi rnam par smin la brtan mos pa/ /chos rnams rkang gnyis gtso bo ston pa mdzad/ /'dul ba la yang mkhas shing rnam smin shes/ /de bzhin 'thab cing rtsod pa nye bar zhi/ /'thab pa med cing rtsod pa med pa'i sa/ /chos rnams rkang gnyis gtso bo ston pa mdzad/ /bzod pa yang dag 'dzin cing khro med gnas/ /chos la rnam par nges shing rtag tu mkhas/ /tshig rnams rab tu 'byed la ye shes mthong / /thugs rje bskyed nas chos rnams ston pa mdzad/ /sngon gyi mtha' shes phyi ma'i mtha' shes te/ /bde gshegs bstan la dus gsum mnyam pa nyid/ /'khor gsum dag ni yongs su chad par gsungs/ /rgyal ba chos kyi bdag po de skad ston/ /sems kyang rab tu gnas shing rtse gcig dang / /lus kyang rnam par gnas dang 'phags pa'i sa/ /spyod lam dag kyang rtag tu bsrung ba yi/ /chos ni skyes bu khyu mchog thub pa ston/ /khrel yod ngo tsha shes shing mdzes pa dang / /'jig rten shes pa rigs pa'i tshigs rnams gsung / /chos rnams 'byung ba srog chags rang bzhin dang / /byang chub dam pa mchog 50.65a gi chos kyang ston/ /rjes su phan gdags pa dang khrel yod dang / /mi dge ba yi sems la smod pa dang / /sbyangs pa rjes su mi gtong bsod snyoms sbyong / /chos rnams rkang gnyis gtso bo ston pa mdzad/ /khrel yod ngo tsha shes pa rtag tu spyod/ /bla ma la yang gus smra ldang ba dang / /thog ma nyid nas nga rgyal tshar bcad par/ /chos rnams rgyal ba chos rje de ltar ston/ /sems ni ldang ba nas kyang sems dge ste/ /ye shes khong du chud cing rtogs par byed/ /mi shes phyogs rnams rtag tu rnam par spong / /byang chub mchog gi chos rnams ston pa mdzad/ /sems la 'jug pa dang ni sgra shes pa/ /nges pa'i tshig la 'jug cing don rtogs dang / /gnod pa thams cad rtag tu rnam spang par/ /rgyal ba chos kyi bdag po de ltar ston/ /skyes bu dam pa rtag tu yang dag bsten/ /skyes bu ngan pa dag ni rnam par spang / /rgyal ba la yang rtag tu dad cing dga'/ /chos mchog rgyal ba de ltar ston pa mdzad/ /btags pa dang ni brda dang tha snyad dang / /'khor ba'i sdug bsngal rnams ni rtag par spang / /rnyed dang ma rnyed pa la zhum pa med/ /chos kyi dam pa rgyal bas de ltar bstan/ /bkur sti rnyed kyang mtshar du mi bzung zhing / /bkur sti ma byas na yang btang snyoms gzhag /yang dag bsngags pas nam yang rlom sems med/ /'jig rten phan pa'i bstan pa 'di 'dra'o/ /gshe zhing smod pa thams cad bzod par bya/ /khyim pa kun dang lhan cig mi bsten cing / /rab tu byung ba dang yang 'grogs mi bya/ /rgyal ba chos kyi bdag po de skad ston/ /spyod yul ma yin thams cad rnam spangs nas/ /sangs rgyas spyod yul la ni rab tu gnas/ /spyod pa phun sum tshogs shing dul ba'i sems/ /chos kyi tshul 'di bde bar gshegs pas bshad/ /byis pa'i chos rnams rtag tu rnam par spang / /rigs sun pa yang thams cad spang bar bya/ /sangs rgyas bstan pa rtag par yongs su bsrung / /chos kyi bdag po rgyal ba de skad ston/ /smra ba nyung zhing rab tu 'brel la snyan/ /gzhan dag la 50.65b yang tshig 'jam dge bar smra/ /phas kyi rgol ba chos dang ldan pas 'dul/ /rgyal ba'i rjes su bstan pa 'di 'dra'o/ /dus su 'gro ste dus la ma bab min/ /so so'i skye bo kun la yid mi brtan/ /sdug bsngal reg kyang yi mug med par bya/ /rgyal ba'i rjes su bstan pa 'di 'dra'o/ /dbul po mthong na nor dang ldan par bya/ /tshul khrims 'chal pa mthong na brtse ba bskyed/ /phan pa'i dngos la rtag tu gdams par bya/ /rgyal ba'i rjes su bstan pa 'di 'dra'o/ /chos kyis sems can rnams la phan gdags shing / /'jig rten zang zing rtag tu gtang bar bya/ /bsags par mi bya spung bar mi bya ste/ /rgyal ba'i rjes su bstan pa 'di 'dra'o/ /tshul khrims bsngags shing tshul khrims 'chal pa smad/ /g.yo sgyu med cing tshul khrims ldan la sten/ /nor la mi gnas bdog pa thams cad gtong / /rgyal ba'i rjes su bstan pa 'di 'dra'o/ /lhag pa'i bsam pas bla ma gnyer ba dang / /ji skad smras pa de bzhin thams cad bya/ /chos smra ba yang mi chad bsten par bya/ /rgyal ba'i rjes su bstan pa 'di 'dra'o/ /ri mor bcas shing rtag tu yid dgar bya/ /zhi ba'i lta bas khor mor gnas par bya/ /sngon spyod rnams la rtag par shin du nges/ /rgyal ba'i rjes su bstan pa 'di 'dra'o/ /dge ba'i spyod par rtag tu sngon du 'gro/ /'du shes bzlog dang dngos po'i mtshan nyid dang / /mtshan ma spang ba la yang thabs mkhas pa/ /rgyal ba'i rjes su bstan pa 'di 'dra'o/ /mdo sde sgrub pa'i tshig la mkhas pa dang / /bden pa bstan pa'i tshig la gdon mi za/ /rnam par grol ba'i ye shes mngon du byed/ /rgyal ba'i rjes su bstan pa 'di 'dra'o/ /mgo gcig tu ni tshig rnams brjod par bya/ /ji lta bzhin du mthong zhes rtogs par mkhas/ /rtag tu tshig la the tshom med par bya/ /rgyal ba'i rjes su bstan pa 'di 'dra'o/ /stong pa nyid kyi chos kyang rtag tu bsten/ /'jigs pa med cing tshul khrims stobs la gnas/ / 50.66a ting 'dzin gnas kyis mnyam par 'jug par bya/ /rgyal ba'i rjes su bstan pa 'di 'dra'o/ /shes kyi khe 'dod phyir ni yong mi bstan/ /sems kyang gya gyu can du mi bya ste/ /lta bar byas pa thams cad rnam par spang / /rgyal ba'i rjes su bstan pa 'di 'dra'o/ /spobs pa mchog dang gzugs kyang dam pa ste/ /ye shes snang ba pha rol mtha' ma med/ /gsang sngags byin rlabs rigs par spobs pa ni/ /rgyal ba'i rjes su bstan pa 'di 'dra'o/ /lam 'di sgom pa dag ni tshul gyi sgo/ /bstan pa 'di la spyad nas nan tan dang / /tshul dang gdams pa rjes su bstan pa bzang / /rgyal ba'i rjes su bstan pa 'di 'dra'o/ /rjes su 'thun pa'i bzod pa sangs rgyas bsngags/ /bzod la gnas pas nyes pa rnam par spang / /ye shes la yang gnas nas mi shes spang / /rgyal ba'i rjes su bstan pa 'di 'dra'o/ /ye shes rten yin de bzhin rnal 'byor sa/ /byang chub zhugs pa'i rnal 'byor dbang phyug ste/ /skyes bu dam pa rtag par bsten pa ni/ /rgyal ba'i rjes su bstan pa 'di 'dra'o/ /mi rigs brtson pa khor mor rnam par spang / /sangs rgyas sa ni de bzhin gshegs pas bshad/ /mkhas pa kun gyis rjes su yi rang ba/ /rgyal ba'i rjes su bstan pa 'di 'dra'o/ /byis pa mi shes pas ni spangs pa ste/ /'di ni nyan thos mang po'i sa ma yin/ /byang chub sems dpa' dag gis rtag tu bzung / /rgyal ba'i rjes su bstan pa 'di 'dra'o/ /'di ni de bzhin gshegs pa'i rjes su 'brang / /lha rnams kyis kyang mchod cing ri mor byas/ /tshangs pa bye ba phrag stong yi rang ba/ /ting 'dzin de ni rgyal ba ston mdzad dam/ /nam mkha' lding dang gnod sbyin mi 'am ci/ /klu yang stong gis rtag tu phyag byas pa/ /byang chub dam pa rgyal bas gsungs pa yi/ /ting 'dzin de ni rgyal bas bshad mdzad dam/ /shin du mkhas pas rtag tu yongs thob ste/ /nor mchog dam pa yang ni legs par rnyed/ /zang zing med pa'i ye shes gso ba mchog /ting 'dzin de ni rgyal bas bshad mdzad dam/ /ye shes mdzod yin spobs pa mi zad pa/ / 50.66b 'di ni mdo sde bye bar 'jug pa ste/ /khams gsum yongs shes yang dag shes pa yi/ /ting 'dzin de ni rgyal bas bshad mdzad dam/ /gang la ting 'dzin zhi ba 'di bshad pa/ /'di ni pha rol 'gro ba'i gzings su bstan/ /'di ni chu bo rgal ba'i gru yin te/ /'di ni snyan grags bsngags phreng 'phel bar byed/ /gang gis ting 'dzin zhi ba 'di bshad pa/ /de bzhin gshegs pa rnams la bstod pa yin/ /skyes bu khyu mchog la yang bsngags pa ste/ /byang chub sems dpa'i mi zad yon tan tshul/ /gang dag la ni ting 'dzin 'di bshad pa/ /'di ni zhe sdang zhi bar byams pa bstan/ /'di ni snying rje can gyi btang snyoms sa/ /'di ni grags pa chen po'i dbugs 'byin pa/ /seng ge'i sgra sgrogs rnams kyi nan tan te/ /'di las sangs rgyas ye shes mchog kyang 'byung / /chos rnams kun gyi rang bzhin phyag rgya ste/ /ting 'dzin 'di ni 'dren pa dag gis bshad/ /ting 'dzin zhi ba rgyal bas bshad pa 'di/ /thams cad mkhyen pa'i ye shes thob par byed/ /'di ni byang chub rab zhugs spyod pa ste/ /bdud kyi sde rnams shin du skrag par byed/ /rgyal bas ting 'dzin zhi ba 'di bshad pa/ /skyob pa chos la gnas pa'i rig sngags 'di/ /dgra yi nang du srung ba dam pa ste/ /phas kyi rgol ba chos kyis tshar gcod pa/ /ting 'dzin zhi ba 'di la bsten byas na/ /'di ni spobs pa'i sar yang rab tu bstan/ /stobs dang rnam thar de bzhin dbang po dang / /sangs rgyas chos rnams bcwa brgyad bye brag 'phags/ /stobs bcu rnams kyang yongs su tshol ba ste/ /sangs rgyas ye shes kyi yang snga ltas so/ /skyes mchog 'jig rten phan zhing thugs brtse bas/ /sangs rgyas chos rnams rab tu bstan pa'ang yin/ /sangs rgyas dag gi sras kyis 'di bzung ste/ /'di ni rnam thar 'dod pa'i lam du bstan/ /ting 'dzin zhi ba mthong dka' 'di thos nas/ /de la bde gshegs sras po dga' bar 'gyur/ /sangs rgyas ye shes yongs su rdzogs pa dang / /byang chub sems dpa' mkhas pa tshol ba 'di/ / 50.67a rnam dag sems gtsang nyon mongs med pa yis/ /ting 'dzin zhi ba 'di la bsten par gyis/ /rgyal ba bzhin du de yi lus dag ste/ /rnam par thar dang ye shes rnam grol mthong / /'dod chags 'ching bas rtag tu nyon mi mongs/ /ting 'dzin bzang po 'di la bsten par gyis/ /zhe sdang sa min gti mug bral ba ste/ /bde ba 'dod pa'i ye shes 'byung ba yin/ /rig pa skye zhing ma rig 'jig pa ste/ /ting 'dzin zhi ba 'di la bsten par gyis/ /rnam grol snying por byed pa ngoms par bshad/ /bsam gtan pa la ting 'dzin zhi 'di bstan/ /sangs rgyas ma smad pa yi spyan yin te/ /ting 'dzin zhi ba 'di la bsten par gyis/ /'di ni zhing mang ston pa'i mngon par shes/ /sangs rgyas mtha' yas ston pa'i rdzu 'phrul te/ /ting 'dzin 'di nyid sgom par byed pa la/ /gzungs de rnams kyang rnyed par dka' mi 'gyur/ /byang chub phyir ni dbang po zhi ba'i gnas/ /'di ni byin rlabs mtha' yas ston pa ste/ /ting 'dzin 'di ni bsnyen par byed pa yi/ /ye shes phra zhing yangs pa rnam par dag /gang gis ting 'dzin zhi ba 'di ma thos/ /mi rigs brtson pas 'di ni rtogs mi 'gyur/ /yi ge thams cad rnam par bzlog pa ste/ /dbyangs kyis rnam par go bar nus ma yin/ /byang chub sems dpa' rig pas 'di shes te/ /chos kyi bdag pos ji ltar gang bshad pa/ /ting 'dzin 'di la sten par byed pa yi/ /zhi ba dag dang smad pa med pas rtogs/ /brtson 'grus brtsams pas rab tu 'di bzung ste/ /bsnyen bkur byas shing rtag tu legs par bcangs/ /ting 'dzin 'di la bsnyen par byed pa ni/ /sdug bsngal zad cing skye ba 'gog pa shes/ /chos rnams kun gyi skye ba med pa bstan/ /de ltar sred pa'i 'gro ba thams cad na/ /sangs rgyas grags chen dag gi ye shes mchog / /ting 'dzin de ni rgyal bas bshad mdzad dam/ /gzhon nu de yis tshigs bcad 'di thos nas/ /khrag khrig stong phrag brgyad bcu rtsa brgyad rnams/ /dbyangs kyi rjes 'gro bzod pa der thob ste/ /sangs rgyas ye 50.67b shes las ni mi ldog gnas/ /brtan pa'i stobs kyis gzhon nu de la smras/ /da dung 'jig rten mgon po de bzhugs so/ /khye'u khyod la don 'di dri bar bya/ /ting 'dzin 'di ni khyod kyis su las thos/ /gzhon nus smras pa rgyal po gsan du gsol/ /bdag gis bskal pa gcig la sangs rgyas ni/ /bye ba khrag khrig mthong ste ri mor bgyis/ /ting 'dzin zhi ba 'di yang bdag gis dris/ /gzhan yang bskal pa dgu bcu rtsa dgu dang / /bskal pa bye ba khrag khrig phrag stong du/ /de dang der bdag skye ba dran par gyur/ /nam yang mngal du skyes par ma gyur to/ /de nas bdag gis ting 'dzin 'di bsgoms te/ /rgyal ba de dag 'chad pa dag par thos/ /thos nas bshad pa la yang mos bskyed de/ /nem nur med pas byang chub reg par bgyi/ /dge slong su dag bdag la kun 'dri zhing / /ting 'dzin 'di la yongs su chud bgyid pa/ /de la bdag ni gus par ri mor bgyid/ /'jig rten don mdzad dag la bgyi ba bzhin/ /su las bdag gis tshigs bcad gcig tsam yang / /lung mnos rjes 'thun spyad pa spyod pa'i tshe/ /de dag la yang bdag ni ston pa snyam/ /sangs rgyas bzhin du gus pas ri mo bgyid/ /ting 'dzin yongs su chub par bgyid pa 'di/ /su dag la la bdag la 'dri ba yang / /'jig rten 'dren pa rgyal bar mi 'gyur bar/ /rmi lam na yang bdag la the tshom med/ /dge slong rgan rabs bar ma gzhon nu la/ /bdag ni ri mo gus dang ldan par bgyid/ /ri mor ldan pas bdag gi snyan pa dang / /de bzhin bsod nams grags pa yon tan 'phel/ /'thab cing rtsod pa dag la brtson mi bgyid/ /de tshe bdag ni brtson pa chung bar 'gyur/ /sdig pa bgyis pas 'gro ba gzhan du 'gyur/ /dge ba bgyis pas 'gro ba gzhan du 'gyur/ /mi rigs brtson par sbyor zhing ma bsdams pa/ /de dag gi ni mi snyan tshig thos nas/ /de tshe bdag gir bgyi ba las su 'dzin/ /las rnams bgyis pa rnam par chud mi za/ /de la khro ba'i dbang du mi 'gyur te/ /sangs rgyas bsngags pa'i bzod pa'i stobs 'dzin te/ /'dren pa dag gis rtag tu bzod pa bsngags/ /bzod 50.68a pa bsgoms na byang chub rnyed mi dka'/ /bdag kyang rtag tu tshul khrims ldan par 'gyur/ /tshul khrims la yang gzhan dag rab tu 'god/ /tshul khrims bsngags pa rtag tu bdag brjod de/ /de na bdag gi tshig kyang btsun par gyur/ /dgon pa'i bsngags pa dag kyang rtag tu brjod/ /tshul khrims la ni rtag par rab gnas te/ /rtag tu gso sbyong dag kyang 'dzin du stsal/ /de dag byang chub la yang yang dag btsud/ /de dag tshangs pa'i spyod pa yang dag bstabs/ /chos dang don rnams la yang rab tu gnas/ /gang la mtha' dang chags pa 'di med pa/ /byang chub lam la de dag sad par bgyis/ /bdag dran bskal pa 'das pa'i dus shig na/ /rgyal ba sgra yi yan lag dbyangs byung ste/ /de yi spyan sngar bdag gis dam bcas pa/ /bdag ni rtag tu bzod pa'i stobs ldan bgyi/ /yi dam bcas pa de la gnas nas ni/ /lo grangs bye ba brgyad bcu phrag bzhir yang / /bdag la bdud kyis shin du smad cing spyos/ /'on kyang bdag gi sems ni yong ma 'khrugs/ /der ni bdud kyis bgams shing sad na yang / /bdag gi byams bzod brtan pa 'tshal nas ni/ /sems dang bdag gi rkang la phyag 'tshal te/ /lnga brgya byang chub mchog la rab tu zhugs/ /bdag ni rtag tu ser sna med par gyur/ /gtong ba'i bsngags pa dag kyang khor mor 'chad/ /phyug cing nor ldan bdag nyid chen por gyur/ /mu ge'i tshe yang bdag nyid sbyin bdag gyur/ /dge slong su dag ting 'dzin 'di 'dzin cing / /su dag klog cing su dag lung nod pa/ /de dag la ni bdag kyang bsnyen bkur bgyid/ /de dag thams cad mi yi mchog tu 'gyur/ /bdag ni bla na med pa'i las de yis/ /sangs rgyas 'jig rten mgon po mang po mthong / /rgyal ba'i bstan pa la yang rab byung ste/ /rtag tu chos smra ba ni mkhas par gyur/ /sbyangs pa la yang rtag tu bdag brtson te/ /bas mtha' dgon pa la yang khor mor gnas/ /kha zas phyir ni tshul 50.68b 'chos mi bgyid de/ /ngan ngon tsam dag gis kyang chog shes gyur/ /bdag ni rtag tu phrag dog ma mchis te/ /bdag ni khyim la'ang chags par mi 'gyur ro/ /khyim la chags pa dag ni phrag dog skye/ /phrag dog ma mchis nags dgon dga' bar bgyid/ /bdag ni rtag tu byams la gnas par gyur/ /gshe zhing sdigs kyang khro ba mi skyed de/ /byams pa la yang gnas pa des pa yi/ /snyan pa'i phring ba phyogs bzhir rab tu mched/ /rtag tu chog shes 'dod pa nyung bar gyur/ /dgon par gnas shing sbyangs pa'i yon tan brtson/ /bsod snyoms len pa dag kyang mi gtong ste/ /sbyangs pa la yang yi dam brtan par gyur/ /rtag tu dang bar bcas shing dad par gyur/ /khor mor sangs rgyas bstan la dad pa mang / /dad pa mang ba'i phan yon 'di lags te/ /byad bzhin bzang zhing dbang po ma nyams gyur/ /gang dag 'chad pa de la bdag gnas te/ /bdag ni rtag tu nan tan snying por bgyid/ /nan tan snying por bgyid la lha klu yang / /rab tu dang ba'i sems kyis ri mor bgyid/ /yon tan ji snyed brjod pa 'di dag dang / /gzhan yang rnam pa du ma mang po yod/ /sangs rgyas byang chub rtogs par su 'dod pa/ /mkhas pa 'di dag rtag tu bslab par bgyi/ /'di bas ches mang dka' ba spyad pa ni/ /sngon gyi bskal pa du mar mang spyad dran/ /da ltar de dag brjod par mi nus kyis/ /bde bar gshegs pa'i drung du da mchi'o/ /byang chub sems dpa' shes rab rno mkhas des/ /de yi mod la mngon shes lnga thob nas/ /de yang srog chags bye ba brgyad bcu dang / /rdzu 'phrul gyis ni rgyal ba'i drung du song / /brtan pa'i stobs kyang mchog tu dga' rangs nas/ /de tshe bye ba brgya phrag drug bcu dang / /de bzhin gshegs pa'i drung du nyer lhags te/ /zhabs la phyag 'tshal nas ni spyan sngar 'dug /rgyal po de yi lhag pa'i bsam mkhyen nas/ /rkang gnyis dbang pos ting 'dzin 'di bshad de/ /rgyal po des kyang ting 'dzin 'di thos nas/ /rgyal srid btang ste 50.69a ma chags rab tu byung / /rab tu byung nas ting 'dzin 'di la sgom/ /klog cing 'chad de rab tu ston par byed/ /bskal pa drug bcu 'das pa'i 'og tu de/ /pad ma bla ma zhes bya rgyal bar gyur/ /rgyal po lhan cig rgyal ba'i drung 'ong ba/ /bye ba brgya phrag drug bcu mi nyung ba/ /de dag kyang ni ting 'dzin 'di thos nas/ /de tshe dga' zhing mgu bas rab tu byung / /de dag rab tu byung nas ting 'dzin 'di/ /bzung zhing blags te rab tu ston par byed/ /bskal pa khrag khrig drug bcu 'das nas ni/ /bskal pa gcig la byang chub mchog reg ste/ /mtshan ni ye shes bla ma mtha' yas pa/ /lha mis mchod pa'i sangs rgyas rnams su gyur/ /de la rkang gnyis gtso bo re res kyang / /sems can gang ga'i bye snyed grol bar byas/ /byang chub spyod pa mchog 'di spyod pa na/ /nga ni rgyal po dpal gyi stobs su gyur/ /nga yi bu dag lnga brgya yod pa yang / /rjes su chos rnams skyong ba 'di dag yin/ /de tshe gang su nga yi mar gyur pa/ /de ni lha mo sgyu 'phrul nyid yin te/ /bye ba stong phrag bcu bzhir tshang ba yi/ /nga yi bu mo de kun mya ngan 'das/ /stobs brtan zhes bya rgyal po gang byung ba/ /rab tu mdzod mang 'khor los sgyur ba'i mchog /de tshe rgyal po zas gtsang de yin te/ /de dang der yang nga yi yab tu gyur/ /de ltar ngas ni bskal pa bye stong du/ /le lo med cing brtson 'grus brtsams pa yis/ /byang chub mchog 'di yang dag sgrub pa na/ /ting 'dzin yongs su tshol ba rnam par dag /gzhon nu de phyir byang chub sems dpa' gang / /ting 'dzin 'di la sgom par 'dod pa dag /brtson 'grus brtsams shing srog la mi lta bar/ /gzhon nu rtag par nga yi rjes su slobs/ /sangs rgyas mang po'i t-ing nge 'dzin gyi sgo'i le'u zhes bya ba ste bcu bdun pa'o// //de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po gang ting nge 'dzin 'di 'dzin pa dang kun chub par byed pa dang 'chang ba dang klog pa dang rab tu 'don 50.69b pa dang lung nod pa dang kha ton byed pa dang gzhan la yang rgya cher rab tu ston pa de la yon tan gyi phan yon bzhir rig par bya ste/ bzhi gang zhe na/ 'di lta ste/ bsod nams zil gyis mi non par 'gyur/ phas kyi rgol ba rnams kyis mi rdzi bar 'gyur/ ye shes dpag tu med par 'gyur/ spobs pa mtha' yas par 'gyur te/ gzhon nu byang chub sems dpa' sems dpa' chen po gang la la ting nge 'dzin 'di 'dzin pa dang / kun chub par byed pa dang 'chang ba dang klog pa dang rab tu 'don pa dang lung nod pa dang kha ton byed pa dang gzhan la yang rgya cher rab tu ston pa de la yon tan gyi phan yon 'di bzhi yod par rig par bya'o/ /de nas bcom ldan 'das kyis de'i tshe tshigs su bcad pa 'di dag gsungs so/ /sangs rgyas kun gyi spyod yul ba/ /ting 'dzin zhi ba 'di bzung na/ /rtag pa'i dus su bsod nams kyang / /shin du zil gyis ma non 'gyur/ /byang chub spyod pa bye brag 'phags/ /mchog tu dag pa spyod pa na/ /dpa' bo rtag pa'i dus su yang / /bsod nams dag gis bsrungs bar 'gyur/ /de la phas kyi rgol ba dag /su yang 'tshe bar yong mi byed/ /rtag pa'i dus su sangs rgyas kyis/ /yongs su bzung bar 'gyur ba yin/ /rtag pa'i dus su ye shes kyang / /dpag tu med par 'gyur ba yin/ /zhi ba'i rten 'di 'dzin pa ni/ /spobs pa dag kyang mtha' yas 'gyur/ /ting 'dzin zhi ba mchog 'di rab bzung na/ /rtag tu bsod nams phung po zil mi non/ /byang chub spyad pa dam pa spyod pa na/ /phas kyi rgol ba med cing mi tshugs 'gyur/ /de yi ye shes yangs shing rno bar 'gyur/ /de bzhin spobs pa dag kyang mtha' yas 'gyur/ /mig kyang dag 'gyur rtag tu mkhas pa de/ /dran pa'i stobs dang gzungs kyi stobs kyang byung / /don gyi tshig rnams rab tu ston byed na/ /mkhas pa dag gi shin du yid 'ong 'gyur/ /ting 'dzin zhi mchog 'di ni rab bshad na/ /shes rab ldan pa skye bo mang pos rig / 50.70a ting 'dzin zhi ba mchog 'di rab bzung na/ /chos gos dam pa mchog dang mal cha dang / /'gron du gnyer dang bza' zhing bca' ba'ang rnyed/ /shin du gzhon zhing blta na sdug par 'gyur/ /ting 'dzin zhi ba mchog 'di tshol ba na/ /sangs rgyas 'jig rten mgon po mang po mthong / /'dren pa dag la mtshungs med mchod pa byed/ /de la bar chad dag kyang 'byung mi 'gyur/ /ting 'dzin zhi ba mchog 'di rab bzung na/ /sems dga' tshigs bcad snyan pa brgya dag gis/ /'jig rten mgon po'i spyan sngar bstod 'gyur te/ /de ni nyams par nam yang yongs mi 'gyur/ /ting 'dzin zhi ba mchog 'di rab bzung na/ /de yi mdun du 'jig rten mgon po ni/ /mtshan dang dpe byad mdzes pa'i sku bzhugs te/ /de yi ye shes nyams par yong mi 'gyur/ /ting 'dzin zhi ba mchog 'di rab bzung na/ /nam yang zhum pa'i sems su mi 'gyur te/ /rtag tu phyug cing dbul po ma yin 'gyur/ /sems kyang 'dzin cing chags par yong mi 'gyur/ /ting 'dzin zhi ba mchog 'di rab bzung na/ /mi khom par yang gnas par mi 'gyur te/ /sa bdag 'khor los sgyur ba'i rgyal por 'gyur/ /de yi rgyal srid rtag tu bde bar 'ong / /bskal pa brgyar ni bshad kyang mi zad de/ /ye shes yangs pa de la the tshom med/ /ting 'dzin zhi ba'i sa 'di thos nas ni/ /brtan pa ji ltar bstan pa de bzhin gnas/ /bskal pa bye ba mtha' yas dpag med du/ /stobs bcus de yi phan yon brjod na yang / /cha tsam du ni yongs su brjod mi 'gyur/ /rgya mtsho las ni chu thigs blangs pa bzhin/ /de tshe gzhon nu de yang rab dga' bas/ /langs nas rab tu thal sbyar phyag 'tshal te/ /mgu rangs stobs bcu yi ni mngon sum 'dug /tshig rab mchog gis ched du rjod pa brjod/ /'jig rten mgon po 'od mdzad pa/ /mi gtsos 'di dag ji tsam du/ /phan yon legs par rab bshad pa/ /dpa' bo chen po bsam mi khyab/ /phyi ma'i dus na su dag ni/ /mdo sde 'di 50.70b la nyan par 'gyur/ /phan par dgongs shing thugs brtse ba/ /dpa' bo chen po bdag la gsungs/ /ka la ping ka'i sgra dbyangs kyis/ /ston pas de la bshad mdzad de/ /bcom ldan chags med ye shes can/ /tshig kyang 'di skad rab tu gsung / /su dag chos kyi rjes slob cing / /mdo sde 'di ni nyan 'gyur ba/ /nan tan bla na med pa yang / /gzhon nu bshad kyis mnyan par gyis/ /sangs rgyas ye shes rab tshol bas/ /mi dbang dag la mchod byed cing / /byams pa'i sems la snyen byed pa/ /mdo sde 'di ni nyan par 'gyur/ /sbyangs pa'i yon tan yo byad bsnyungs/ /yon tan mchog la bsnyen byas shing / /nan tan la yang gnas nas su/ /mdo sde 'di ni nyan par 'gyur/ /'jig rten mgon po'i bstan pa la/ /gang gis tshul khrims bshig pa dang / /sdig pa byed pa'i lag nas ni/ /mdo sde 'di yang thos mi 'gyur/ /dpa' bo tshangs par spyod pa dang / /gang gi sems kyang mi brkam zhing / /sangs rgyas dag gis byin brlabs pa/ /de dag lag nas thos par 'gyur/ /gang gis sngon gyi sangs rgyas dag /'jig rten mgon po ri mor byas/ /de dag la gnas mdo sde 'di/ /phyi ma'i dus na thos par 'gyur/ /gang dag tshe rabs snga ma la/ /mu stegs can du gyur pa ni/ /de dag mdo sde 'di thos na/ /yid ni dga' zhing bder mi 'gyur/ /nga yi bstan pa 'di la ni/ /'tsho ba 'dod phyir rab byung nas/ /rnyed dang bkur stis zil gyis non/ /gcig la gcig kyang smod par byed/ /dge slong dbang po ma bsdams pa/ /gzhan gyi bud med rab snyegs shing / /tshul khrims 'chal pa rnyed pa 'dod/ /mdo sde 'di la dad mi byed/ /sangs rgyas brnyes pa'i bsod nams dang / /bsam gtan thob par mi 'dod cing / /bdag tu 'du shes gnas pa dag / /mdo sde 'di la dad mi byed/ /phyi ma'i dus na 'byung ba ni/ /'jig rten bsam gtan 'bras bur 'dzin/ /dgra bcom bsod snyoms zos nas kyang / /sangs rgyas byang chub smod par byed/ /'dzam bu yi ni gling 'di ni/ /mchod rten ci yod kun bshig 50.71a pas/ /gang gis mdo sde 'di spangs na/ /sdig pa 'di ni khyad par che/ /gang gis gang gA'i bye snyed kyi/ /dgra bcom dag ni bsad pa bas/ /gang gis mdo sde 'di spangs na/ /sdig pa 'di ni khyad par che/ /mi bzad pa yi phyi dus la/ /dam pa'i chos ni 'jig pa'i tshe/ /mdo sde 'di ni rab bshad par/ /khyed la su dag spro ba yod/ /de tshe gzhon nu langs nas ni/ /ngu zhing rgyal la 'di skad gsol/ /sangs rgyas thugs kyi sras po yis/ /'di skad seng ge'i sgra yang bsgrags/ /rdzogs pa'i sangs rgyas mya ngan 'das/ /mi bzad pa yi phyi dus la/ /lus dang srog kyang rab btang ste/ /bdag gis mdo sde rgyas par bgyi/ /byis pa rnams kyi mi bden pa/ /brgyad cing spyos pa bzod par bgyi/ /gshe ba dang ni sdigs pa yang / /'dren pa dang du blang bar bgyi/ /byang chub sems dpa' gzhan dag la/ /ngan sems dag ni bskyed pa 'am/ /gang sngon bdag gis sdig pa yi/ /las rnams bgyis pa byang bar bgyi/ /spyi bo la ni phyag bzhag ste/ /sangs rgyas gser gyi mdog 'dra ba/ /de bzhin gshegs pa 'jam pa'i dbyangs/ /zla 'od la ni ston pa gsung / /gzhon nu phyi ma'i dus dag la/ /khyod kyis tshangs par spyod pa dang / /srog gi bar chad mi 'byung bar/ /khyod la byin gyis brlab par bya/ /chos smra ba ni gzhan dag kyang / /brgyad brgya po dag langs nas ni/ /phyi ma'i dus la bdag cag kyang / /mdo sde 'di ni 'dzin pa lags/ /lha dang klu dang gnod sbyin yang / /bye ba brgyad bcu nyer lhags te/ /gzhan yang khrag khrig drug bcu rnams/ /'jig rten mgon la 'di skad smra/ /dge slong dag ni 'di rnams las/ /de ring su dag langs pa rnams/ /phyi dus de tshe bdag cag gis/ /'dren pa rab tu bsrung bar bgyi/ /mdo sde 'di ni bshad pa'i tshe/ /ston pa yi ni byin rlabs kyis/ /gang gA'i bye ma mnyam pa yi/ /sangs rgyas zhing rnams rab tu g.yos/ /zhing rnams ji snyed rab g.yos pa/ /kun du sangs rgyas sprul pa dag /'jig rten mgon pos rab bkye ste/ /de dag gis kyang chos rab bstan/ /zhing de so so re rer yang / / 50.71b sems can bye ba bsam mi khyab/ /de tshe de 'dra'i chos thos nas/ /sangs rgyas kyi ni ye shes bkod/ /sangs rgyas kyi yang zhing 'di nas/ /sems can bye ba dgu bcu rnams/ /byang chub kyi ni sems bskyed de/ /sangs rgyas la yang me tog 'thor/ /bskal pa bye ba brgyad bcu na/ /bskal pa gcig la thams cad kyang / /rnam par 'dren pa nyid 'gyur zhes/ /de dag mi gtsos lung bstan to/ /dge slong dang ni dge slong ma/ /dge bsnyen pha dang dge bsnyen ma/ /srog chags bye ba bdun bcu drug /gang dag mdo sde 'di thos pa/ /de dag mi gtsos lung bstan te/ /byang chub spyod pa rab spyod cing / /gang gA'i bye ma mnyam pa yi/ /'jig rten 'dren pa mthong bar 'gyur/ /sangs rgyas ye shes rab tshol bas/ /thams cad la yang mchod pa byed/ /mdo sde bla na med pa 'di/ /de dang der yang thos par 'gyur/ /byams pa yi ni sangs rgyas la/ /bla na med pa'i mchod byas te/ /dam pa'i chos mchog bzung nas ni/ /bde ba can du 'gro bar 'gyur/ /gang na sangs rgyas rdul bral ba/ /tshe dpag med pa de bzhin gshegs/ /de la byang chub mchog gi phyir/ /mchod pa dag kyang byed par 'gyur/ /mdo sde dam pa 'di thos na/ /ma 'ongs pa yi bskal pa ni/ /grangs med bdun bcu rtsa gsum du/ /ngan 'gro rnams su yong mi 'gro/ /phyi ma'i dus la su dag ni/ /mdo sde dam pa nyan 'gyur zhing / /'chang ngam klog par byed pa yang / /de dag kun gyis nga la mchod/ /ji snyed mdun na 'dug pa rnams/ /thams cad la yang bsgo bya ste/ /ngas ni dka' bas thos pa yi/ /byang chub 'di yang yongs su gtad/ /ting nge 'dzin rjes su gtad pa'i le'u ste bcwa brgyad pa'o// // de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po chos thams cad kyi rang bzhin mnyam pa nyid rnam par spros pa'i ting nge 'dzin las yon tan gyi phan yon bsam 50.72a gyis mi khyab cing dpag tu med pa thos nas mi skrag par 'dod pa dang mi dngang bar 'dod pa dang dngang bar mi 'gyur bar 'dod pas sangs rgyas kyi chos bsam gyis mi khyab pa bstan pa la mkhas par bya'o/ /sangs rgyas kyi chos bsam gyis mi khyab pa la mos par bya'o/ /sangs rgyas kyi chos bsam gyis mi khyab pa yongs su dri ba la mkhas par bya'o/ /sangs rgyas kyi chos bsam gyis mi khyab pa yongs su btsal ba la mkhas par bya'o/ /sangs rgyas kyi chos bsam gyis mi khyab pa thos nas mi skrag /mi dngang dngang bar mi 'gyur bar bya'o/ /de skad ces bka' stsal pa dang / zla 'od gzhon nur gyur pas bcom ldan 'das ga la ba der logs su thal mo sbyar ba btud de bcom ldan 'das la 'di skad ces gsol to/ /bcom ldan 'das 'di ji lta bur na byang chub sems dpa' sems dpa' chen po sangs rgyas kyi chos bsam gyis mi khyab pa bstan pa la mkhas pa lags/ sangs rgyas kyi chos bsam gyis mi khyab pa la mos pa dang sangs rgyas kyi chos bsam gyis mi khyab pa yongs su 'dri ba la mkhas pa dang sangs rgyas kyi chos bsam gyis mi khyab pa thos na mi skrag mi dngang dngang bar mi 'gyur ba lags/ de skad ces gsol pa dang / bcom ldan 'das kyis zla 'od gzhon nur gyur pa la 'di skad ces bka' stsal to/ /gzhon nu byang chub sems dpa' sems dpa' chen po gang chos thams cad kyi rang bzhin mnyam pa nyid rnam par spros pa'i ting nge 'dzin 'di nyan cing thos nas kyang 'dzin pa dang kun chub par byed pa dang 'chang ba dang klog pa dang rab tu 'don pa dang nyon mongs pa med par bsgom pas sgom par byed pa dang mang du byed pa dang gzhan la yang rgya cher yang dag par rab tu ston na gzhon nu byang chub sems dpa' sems dpa' chen po de sangs rgyas kyi chos bsam gyis mi khyab pa bstan pa 50.72b la mkhas par 'gyur ro/ /sangs rgyas kyi chos bsam gyis mi khyab pa la mos pa dang sangs rgyas kyi chos bsam gyis mi khyab pa yongs su 'dri ba la mkhas pa dang sangs rgyas kyi chos bsam gyis mi khyab pa thos na mi skrag mi dngang dngang bar mi 'gyur ro/ /yang chos thams cad kyi rang bzhin mnyam pa nyid rnam par spros pa'i ting nge 'dzin las yon tan gyi phan yon bsgrub pa'i tshig 'di bcom ldan 'das kyis zla 'od gzhon nur gyur pa la nges par bstan pa na zla 'od gzhon nur gyur pas chos thams cad kyi rang bzhin mnyam pa nyid rnam par spros pa'i ting nge 'dzin las yon tan gyi phan yon bsgrub pa'i tshig dpag tu med pa bsam gyis mi khyab pa bcom ldan 'das las thos nas de'i tshe zla 'od gzhon nur gyur pas chos thams cad kyi rang bzhin mnyam pa nyid rnam par spros pa'i ting nge 'dzin gyi rgyal po 'di rab tu thob bo/ /byang chub sems dpa' sems dpa' chen po grangs med dpag tu med pa yang mngon par shes pa chen po thob par gyur to/ /sems can dpag tu med pa yang snying rje chen por 'jug pa la mngon du phyogs pa'i sems skyes so/ /stong gsum gyi stong chen po'i 'jig rten gyi khams 'di yang rnam pa drug tu g.yos/ rab tu g.yos/ kun du rab tu g.yos/ 'gul rab tu 'gul kun du rab tu 'gul/ ldeg rab tu ldeg kun du rab tu ldeg /'khrugs rab tu 'khrugs kun du rab tu 'khrugs/ chem chem rab tu chem chem kun du rab tu chem chem/ 'ur 'ur rab tu 'ur 'ur kun du rab tu 'ur 'ur/ shar phyogs dma' na nub phyogs mtho/ nub phyogs dma' na shar phyogs mtho/ byang phyogs dma' na lho phyogs mtho/ lho phyogs dma' na byang phyogs mtho/ mtha' dma' na dbus mtho/ dbus dma' na mtha' mtho zhing / snang ba dpag tu med pa yang 'jig rten du byung / lha'i spos kyi char chen po yang mngon par bab bo/ /lha dang lha'i bu ji snyed chos mnyan pa'i phyir 'dus te lhags pa de dag nam mkha' la 50.73a mngon par 'phags nas chos thams cad kyi rang bzhin mnyam pa nyid rnam par spros pa'i ting nge 'dzin las yon tan gyi phan yon gyi tshig dpag tu med pa 'di dag thos nas lha dang lha'i bu de dag thams cad dga' mgu yi rangs te/ rab tu dga' ba dang tshim pa dang yid bde ba skyes nas a la la zhes ga zha sgrogs pa'i sgra byed do/ /lha'i me tog rnam pa sna tshogs kyi me tog gi char chen po 'bebs so/ /lha'i sil snyan bye ba khrag khrig brgya stong du ma yang rab tu rdung ngo / /rjod pa gcig pa'i dbyangs kyis tshig 'di skad ces 'dzer to/ /a la la bdag cag gis ni rnyed pa legs par rnyed de/ 'di ltar bdag cag gis bcom ldan 'das las yon tan gyi phan yon sgrub pa'i tshig dpag tu med pa 'di dag thos nas bcom ldan 'das bdag cag thams cad kyang gcig char 'thun par byang chub sems dpa' sems dpa' chen po zla 'od gzhon nur gyur pas ji ltar chos thams cad kyi rang bzhin mnyam pa nyid rnam par spros pa'i ting nge 'dzin 'di thob pa de bzhin du/ bcom ldan 'das bdag cag thams cad kyis kyang chos kyi rang bzhin mnyam pa nyid rnam par spros pa'i ting nge 'dzin 'di thob par bgyi'o/ /de nas de'i tshe bya rgod kyi phung po'i ri la bcom ldan 'das 'khor rgya mtsho'i nang na chos ston pa la dri za'i bu gtsug pud lnga can zhes bya ba rim gro dang bsnyen bkur bya ba'i phyir sil snyan lnga brgya dang bcas te nam mkha' las babs nas bcom ldan 'das kyi spyan sngar 'dug go/ /de nas dri za'i bu gtsug pud lnga can 'di snyam du sems te/ bdag cag gis sum bcu rtsa gsum pa'i lha rnams dang lha'i dbang po brgya byin gyi lha'i 'dun sa chos bzang na ji lta ba bzhin du rim gro dang bsnyen bkur bya'o/ /glu dbyangs dag ji ltar len pa de bzhin du deng lha'i lha de bzhin gshegs pa dgra bcom pa yang dag par rdzogs pa'i sangs rgyas la yang mchod pa'i phyir glu dbyangs rab tu sbyar ro/ /de nas 50.73b dri za'i bu gtsug phud lnga can sil snyan thogs pa lnga brgya po de dag dang sgra gcig tu sbyar te/ pi bang gi khog pa bai dUr+ya las byas pa dag kyang thogs nas bcom ldan 'das kyi spyan sngar blangs so/ /de nas bcom ldan 'das 'di snyam du dgongs te/ rdzu 'phrul mngon par 'du bya ba ji lta bu mngon par 'du byas pas zla 'od gzhon nur gyur pa sangs rgyas kyi chos bsam gyis mi khyab pa nges par rtogs pa la mkhas pa 'thob pa dang / chos thams cad kyi rang bzhin mnyam pa nyid rnam par spros pa'i ting nge 'dzin las mi g.yo ba dang / dri za'i bu gtsug phud lnga can la yang rgyud kyi sgra dang glu'i sgra la mkhas pa bstan par 'gyur ba de lta bu'i rdzu 'phrul mngon par 'du bya ba ngas bya'o snyam mo/ /de nas bcom ldan 'das kyis de lta bu'i rdzu 'phrul mngon par 'du bya ba mngon par mdzad de/ sangs rgyas kyi mthus sil snyan lnga brgya po shin du legs par sbyangs pa/ legs par blangs pa de dag las bsam gyis mi khyab pa'i don dang ldan pa chos nyid dang ldan pa'i sgra byung ngo / /sangs rgyas kyi chos bsam gyis mi khyab pa nges par rtogs pa'i tshigs su bcad pa 'di dag kyang byung ngo / /skra gcig khyon la sangs rgyas mang po ni/ /gang gA'i klung gi bye ma ci yod snyed/ /rgyal ba de dag zhing yang de snyed de/ /de dag mtshan nyid mi 'dra skal mi mnyam/ /skra yi khyon la 'gro ba lnga rnams te/ /sems can dmyal dang dud 'gror 'gro ba dang / /gshin rje'i 'jig rten lha dang mi rnams zhugs/ /'dres pa med cing gnod par 'gyur ba'ang med/ /de yi gnas su mtsho dang rgya mtshor bcas/ /chu klung de bzhin mtshe'u dang lteng ka rnams/ /'dres pa med cing gnod par mi 'gyur te/ /de ltar rgyal ba'i chos ni bsam mi khyab/ /de yi gnas su ri bo du ma ste/ /khor yug dang ni lhun po rab lhun dang / /btang zung dang ni btang bzung chen po dang / /'bigs byed bya rgod phung po gangs kyi ri/ / 50.74a gnas der sems can dmyal ba mi bzad pa/ /tsha dang rab tu tsha ba nyams mi dga'/ /de na sems can dmyal skyes tshor ba yi/ /sdug bsngal de dag rjes su myong bar byed/ /de yi gnas na lha yi gzhal med khang / /de dag dpag tshad bcu gnyis dbyangs dga' ba/ /lha rnams stong phrag mang po de dag kyang / /lha yi dga' ba shin du bde ba myong / /de yi gnas su sangs rgyas rnams skye zhing / /'jig rten rig pa'i bstan pa 'bar ba snang / /gang gis rnam dag spyod pa ma sbyangs pa/ /ye shes bral ba dag gis de mi mthong / /de yi gnas nyid na yang chos nub cing / /'dren pa mya ngan 'das pa'i sgra yang thos/ /de yi gnas nyid na yang la la yis/ /'dren pa bzhugs te chos kyang ston ces thos/ /de yi gnas nyid na yang la la dag /tshe tshad lo ni bsam yas bzhugs snyam 'dzin/ /de yi gnas na'ang 'chi ba'i dus byed cing / /ring du mi 'tsho zhes ni sgra yang thos/ /gnas der la la 'di snyam 'du shes te/ /yid kyi 'du shes dang ni 'dzin pa yis/ /bde gshegs mthong mchod sangs rgyas mnyes byas snyam/ /skyes pa med cing mchod pa byas pa'ang med/ /mi dag bdag gi khyim na rmi lam bzhin/ /'dod pa'i yon tan dag la dga' myong nas/ /phyir sad nas kyang de yis gdod ma mthong / /de ni rmi lam yin par de yis shes/ /de bzhin mthong thos rig dang bye brag phyed/ /'di dag thams cad mi bden rmi lam bzhin/ /gang gis ting 'dzin 'di yang thob gyur pa/ /des ni chos kyi rang bzhin 'di dag shes/ /su la'ang sdug dang mi sdug med pa ni/ /mi de 'jig rten na yang bde skyid rtag /su dag nags khrod mngon par dga' ba yi/ /dge sbyong de ni shin du bde ba myong / /su dag ci la'ang bdag gir bya ba med/ /yongs su 'dzin pa rnam pa kun du spangs/ /bse ru bzhin du 'jig rten 'di na gnas/ /nam mkha' la ni rlung dag rgyu ba bzhin/ /lam rnams bsgoms shing ye shes rab tu zhugs/ /chos rnams thams cad stong pa 50.74b bdag med par/ /chos rnams 'di dag gang gis rab bsgoms pa/ /de yi spobs pa dag ni mtha' yas 'gyur/ /su dag 'jig rten na ni yid chags med/ /de dag sems ni rtag tu rlung dang 'dra/ /sdug dang mi sdug la yang chags pa med/ /'jig rten na ni mi de shin du skyid/ /mi sdug pa dang 'grogs pa sdug bsngal te/ /sdug pa dang yang bral ba sdug bsngal yin/ /mthar byas 'di gnyis rab tu spangs nas ni/ /mi gang chos la dga' ba de dag skyid/ /gang zhig chos 'di thos nas chags byed cing / /chos ma yin pa thos nas khong khro byed/ /nga rgyal rgyags pas bcom pa log pa de/ /nga rgyal dbang gis sdug bsngal rjes su myong / /su dag mnyam pa nyid la rab gnas te/ /rtag tu khengs pa med cing 'dud pa med/ /sdug dang mi sdug pa las rab grol ba/ /de dag rtag tu grol yid legs par gnas/ /tshul khrims yongs su dag par rab gnas te/ /bsam gtan bsam mi khyab la rtag gnas shing / /su dag nags khrod zhi bar dga' ba ni/ /de dag nam yang yid gnyis yong mi 'gyur/ /mi bden pa la su dag rab zhugs shing / /byis pa 'dod pa'i yon tan rtag tu dga'/ /bya rgod dag ni ro la mos pa bzhin/ /de dag rtag par bdud kyi dbang du 'gro/ /yang pi bang gi sgra de las tshigs su bcad pa mngon par sgrub pa 'di byung nas zla 'od gzhon nur gyur pas sangs rgyas kyi chos bsam gyis mi khyab pa zab mo nges par rtogs pa la mkhas pa rjes su thob bo/ /dri za'i bu gtsug phud lnga can yang sgra'i rjes su 'gro ba'i bzod pa thob par gyur to/ /lha dang mi yi skye dgu sems can dpag tu med pa bla na med pa yang dag par rdzogs pa'i byang chub tu sems skyes so/ /sems can dpag tu med pa rnams kyi yang don byas par gyur to/ /sangs rgyas kyi chos bsam gyis mi khyab pa nges par bstan pa'i le'u ste bcu dgu pa'o// // de nas yang bcom ldan 'das kyis zla 'od gzhon nur gyur pa la bka' 50.75a stsal pa/ gzhon nu de lta bas na byang chub sems dpa' sems dpa' chen po snying rje chen po la 'jug pa'i chos kyi rnam grangs 'di 'dod pa dang / myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas dge ba'i rtsa ba dang bslabs pa dang yon tan gyi tshogs thams cad gdon mi za zhing tshul khrims shin du yongs su dag par bya'o/ /'du 'dzi med pa mang zhing sdig pa'i grogs po yongs su spangs ba dang dge ba'i bshes gnyen la rten pa dang yongs su 'dri ba'i rang bzhin can dang chos tshol ba la brtson pa dang chos la don du gnyer ba dang chos 'dod pa dang chos la dga' ba dang chos yongs su 'dzin pa dang chos kyi rjes su 'thun pa'i chos la zhugs pa'i byang chub sems dpa' sems dpa' chen pos gzhon nu sems can thams cad la snying rje chen po bskyed de/ bla na med pa yang dag par rdzogs pa'i byang chub tu sems bskyed par bya'o/ /gzhan yang gzhon nu byang chub sems dpa' sems dpa' chen po snying rje chen po la 'jug pa'i chos kyi rnam grangs 'di 'dod pa dang myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas brtson 'grus brtsams shing lus dang srog la mi lta bar byas te/ gang snying rje chen po la 'jug pa'i chos kyi rnam grangs 'di ston pa'i dge ba'i bshes gnyen de dag rgyun mi chad par yongs su btsal bar bya/ g.yo med pas bsnyen par bya/ bsten par bya/ ram gror byas te/ gzhon nu byang chub sems dpa' sems dpa' chen pos dge ba'i bshes gnyen dag lhag pa'i bsam pas yongs su btsal nas kyang de dag las snying rje chen po la 'jug pa'i chos kyi rnam grangs 'di mnyan par bya/ gzung bar bya/ kun chub par bya/ bcang bar bya/ klag par bya/ rab tu gdon par bya/ lung mnod cing kha ton du bya/ nyon mongs pa 50.75b med par bsgom pas bsgom par bya/ mang du bya gzhan dag la yang rgya cher rab tu bstan par bya'o/ /gang las snying rje chen po la 'jug pa'i chos kyi rnam grangs 'di thos pa de la dga' ba dang gus pas ston par 'du shes bskyed par bya'o/ /gzhon nu nam byang chub sems dpa' sems dpa' chen po dge ba'i bshes gnyen yongs su tshol ba dang sri zhu bya ba dang g.yog bya ba la yid mi skyo bar gyur pa de'i tshe gzhon nu byang chub sems dpa' sems dpa' chen po de bde bar bla na med pa yang dag par rdzogs pa'i byang chub mngon par rdzogs par 'tshang rgya'o/ /bde bar snying rje chen po la 'jug pa'i chos kyi rnam grangs 'di 'thob bo/ /gzhon nu de lta bas na mgo dang gos la me 'bar ba bzhin du byas te rtag par dge ba'i bshes gnyen yongs su btsal bar bya/ g.yo med pas bsten par bya/ bsnyen par bya/ rim gror bya'o/ /de ci'i phyir zhe na/ gzhon nu byang chub sems dpa' sems dpa' chen po rnams kyi bla na med pa yang dag par rdzogs pa'i byang chub kyang dge ba'i bshes gnyen gyi khar las na/ snying rje chen po la 'jug pa'i chos kyi rnam grangs 'di lta ci smos/ gzhon nu de lta bas na khyod kyis dge ba'i bshes gnyen yongs su btsal ba dang sri zhu bya ba dang g.yog bya ba la yid yongs su mi skyo bar bya'o zhes gzhon nu khyod kyis rtag tu de ltar bslab par bya'o/ /de nas de'i tshe bcom ldan 'das kyis snying rje chen po la 'jug pa'i chos kyi rnam grangs 'di nyid shin du brjod pa'i phyir zla 'od gzhon nur gyur pa la sngon byung ba bstan pa tshigs su bcad pa'i dbyangs kyis rgya cher yang dag par rab tu bstan to/ /'das pa'i bskal pa bye ba mang po ste/ /dpag tu med cing gzhal med bsam mi khyab/ /de tshe dbang rtog rgyal mtshan rgyal po zhes/ /'dren pa rkang gnyis gtso bo byung bar gyur/ /des ni ting 'dzin zhi ba 'di bshad de/ /de la mi dang srog dang gang zag med/ /sgyu ma chu bur smig rgyu glog 'dra zhing / /chos rnams thams cad chu yi zla 50.76a ba bzhin/ /shi nas 'jig rten pha rol 'gro ba yi/ /sems can shed las skyes pa mi dmigs kyang / /las rnams byas pa med par mi 'gyur te/ /dkar gnag ji bzhin 'bras bu smin par byed/ /rigs pa'i tshul gyi sgo 'di bzang po ste/ /phra zhing mthong dka' rgyal ba'i spyod yul yin/ /gang la yi ge'i tshig kyang mi dmigs pa/ /sangs rgyas byang chub nyid ni bcom ldan mkhyen/ /yangs pa'i gzungs dang ye shes bsags pa ste/ /mdo sde bye ba khrag khrig rnams kyang 'byung / /sangs rgyas bye ba khrag khrig spyod yul te/ /ting 'dzin 'di ni bcom ldan rab tu 'chad/ /'di ni na ba nad las thar byed pa/ /byang chub sems dpas bsgrubs pa'i nor yin te/ /sangs rgyas kun gyis bstod cing rab tu bsngags/ /bye ba khrag khrig lha yis rab tu mchod/ /skye bo byis pa kun la yang dag ston/ /mu stegs can gyis rtag par yongs su spangs/ /tshul khrims nor ni mchog tu sangs rgyas gsungs/ /nam mkha' la ni glog bzhin chags mi 'gyur/ /gang gis rgyal ba bye ba rab mchod cing / /sbyin dang tshul khrims spyad pa mkhas pa dang / /sngan chad sdig pa'i grogs po spangs pa dag /de dag gi ni bla med pha rol nor/ /de na dge slong chos smra 'dug pa dag /tshangs par spyod pa bde gshegs thugs kyi sras/ /rjes su 'thun pa'i chos 'di thos nas ni/ /'jig rten 'dren par sems kyang bskyed par gyur/ /'dren pa dbang tog rgyal mtshan rgyal po yis/ /chos smra de la yang ni tshig gsungs pa/ /dge slong dngos po mchog tu bya dka' yis/ /byang chub dam pa mchog la sems bskyed cig /nor bu rin chen 'dra bar tshul khrims srungs/ /rjes su 'thun pa'i grogs la rtag par sten/ /sdig pa'i grogs la nam yang ma bsten dang / /sangs rgyas ye shes ring por mi thogs 'thob/ /dbang po tog gi rgyal mtshan rgyal ba'i drung / /gang gis byang chub sems mchog bskyed pa ni/ /de dag thams cad chos smrar rab 'gyur te/ /tshangs 50.76b par spyod pa bde gshegs thugs kyi sras/ /dbang po'i tog gi rgyal mtshan gyi rgyal po'i le'u ste nyi shu pa'o// // 'phags pa ting nge 'dzin gyi rgyal po'i mdo/ bam po bdun pa/ de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen pos dge ba'i rtsa ba dang bslab pa dang yon tan gyi chos thams cad la gdon mi za bar bya'o/ /'du 'dzi mang ba ma yin par bya'o/ /sdig pa'i grogs po yongs su spangs shing dge ba'i bshes gnyen la rten pa dang yongs su dri ba'i rang bzhin can dang chos yongs su tshol ba la brtson pa dang chos la don du gnyer ba dang chos 'dod pa dang chos la dga' ba dang chos yongs su 'dzin pa dang chos dang chos kyi rjes su 'thun pa la zhugs par bya'o/ /des sangs rgyas dang byang chub sems dpa' thams cad la ston par 'du shes bskyed par bya'o/ /gang las chos kyi rnam grangs 'di thos pa de la yang des dga' ba dang gus pas ston par 'du shes bskyed par bya'o/ /gzhon nu byang chub sems dpa' sems dpa' chen po gang dge ba'i rtsa ba dang bslab pa dang yon tan gyi chos thams cad gdon mi za ba'i chos kyi rnam grangs 'di yang dag par blangs te gnas na de myur du spobs pa rgyun mi 'chad pa las nges par 'byung bar 'gyur ro/ /sangs rgyas kyi chos bsam gyis mi khyab pa la mos par 'gyur ro/ /sangs rgyas kyi chos zab mo la nges par rtogs par 'gyur ro/ /lhar bcas pa'i 'jig rten gyi nem nur dang yid gnyis dang the tshom gyi mun pa sel ba'i phyir snang ba lta bur 'gyur ro/ /de nas bcom ldan 'das kyis de'i tshe dge ba'i rtsa ba dang bslab pa dang yon tan gyi chos thams cad nges par bstan pa'i chos kyi rnam grangs 'di brjod pa'i phyir zla 'od gzhon nur gyur pa la sngon byung ba'i gtam gyi rgyud tshigs su bcad pa'i dbyangs kyis yang dag par rab tu bstan pa/ sngon byung 'dzam bu'i gling zhes bya ba 'dir/ /g.yel 50.77a ba med pa'i khye'u mchog gnyis byung ste/ /bde bar gshegs pa'i bstan la rab byung nas/ /bse ru bzhin du nags khrod stug por gnas/ /rdzu 'phrul ldan zhing bsam gtan bzhi rnams thob/ /snyan dngags bstan bcos mkhas shing rdzogs pa ste/ /bar snang gi ni rjes dang sa yang rig /de dag nam mkha' la yang thogs med 'gro/ /de dag nags khrod stug po bsil ba der/ /me tog sna tshogs yid du 'ong bas gang / /bya yang sna tshogs mang pos bsnyen pa der/ /phan tshun du ni gtam dag rab tu smra/ /rgyal po ri dgas 'chor zhing song song na/ /sgra grags nas ni nags tshal der 'ongs te/ /rgyal pos chos smra de gnyis mthong nas ni/ /de la mchog tu dga' ba nye bar bzhag /de dang rjes su 'thun pa'i gtam byas nas/ /de dag rgyal po'i mdun du 'dug pa dang / /rgyal po de yi dmag mang mtha' yas pa/ /bye ba khrag khrig drug bcu nye bar lhags/ /de nas chos smra de dag so so nas/ /rgyal po de la smras pa rgyal rigs nyon/ /sangs rgyas 'byung ba mchog tu rnyed par dka'/ /sa yi bdag po rtag tu bag yod gyis/ /tshe ni rtag tu 'gro zhing mi gnas te/ /ri yi chu bo bzhin du myur du 'gro/ /nad dang mya ngan rga bas gzir ba la/ /khyod la dge ba'i lam 'dra skyabs gzhan med/ /rgyal po'i glang po chos rnams bskyang bar gyis/ /stobs bcu ldan pa'i bstan pa 'di yang srung / /zad pa'i dus la shin du 'jigs pa'i tshe/ /rgyal po'i glang po chos kyi phyogs gnas gyis/ /de ltar de tshe mkhas pa de dag gis/ /rnam pa du mar mi dbang gdams pa byas/ /rgyal po khrag khrig drug bcur bcas pa yis/ /de tshe byang chub tu ni sems bskyed do/ /de tshe rgyal po'i glang po chos thos nas/ /des shing dge ba'i chos rnams smra ba la/ /rangs shing yid bde dga' ba rab skyes nas/ /rkang pa la yang phyag 'tshal de nas song / /rgyal po de yi dge slong mang po dag /rnyed pa 'dod cing de yi khyim du 'jug /de dag de mi 'dra 50.77b ba'i spyod mthong nas/ /de la rgyal po de ltar ri mo med/ /bstan pa de yang ston pa 'das pa yi/ /de tshe lo yi tha mar gyur pa ste/ /'dzam bu'i gling na snod gyur rab tu nyung / /ma bsdams pa dag shin du mang po byung / /de nas dge slong mang po brkam zhing chags/ /rnyed pa 'dod cing dmigs pa'i lta ba can/ bde gshegs bstan pa rab tu zhig pa'i tshe/ /rgyal po de yang bsgyur cing byed du bcug /chos smra gnyis po 'di ni bsad par gyis/ /'di dag mu stegs chad par smra ba ste/ /yun ring spyod par yang dag 'dzud byed kyang / /de dag gang du'ang mya ngan 'da' mi ston/ /las kyang 'jig cing rnam par smin pa 'jig /tshul 'chos 'di dag phung po med ces smra/ /rgyal po 'di dag yul nas spangs nas ni/ /'dir yang chos ni yun ring gnas par 'gyur/ /de dag gi ni tshig thos de yi tshe/ /rgyal po'i glang po the tshom byung bar gyur/ /chos smra gnyis po 'di ni bsad par bya/ /btang snyoms bzhag na gnod par 'gyur srid snyam/ /rgyal po de phyir 'brang ba lha mo zhig /tshe rabs snga mar lhan cig spyod pa spyad/ /yun ring dus nas phan 'dod mkhas pa ste/ /de yis rgyal po de la 'di skad smras/ /rgyal rigs sdig pa'i grogs po'i tshig dag gis/ /'di lta bu yi sems ni ma bskyed cig /dge slong chos smra mkhas pa gnyis po 'di/ /sdig pa'i grogs po'i tshig gis ma spang shig /de dag gis ni nags khrod ci bshad pa/ /shin du 'jigs pa mi bzad dus kyi tshe/ /rgyal po'i glang po chos kyi phyogs gnas gyis/ /mi yi bdag po cung zad mi dran nam/ /rgyal po yang dag tshig gis bskul ba yis/ /de ni rgyal ba'i bstan pa mi gtong gyur/ /de tshe rgyal po'i nu bo ma rungs pa/ /nyen 'khor rgyal po byed pa des sbad de/ /rgyal po khyod kyi gcen ni sdig pa can/ /bdag gi srog kyang nam du 'dod mi byed/ /dge slong gnyis po rig sngags drag ldan pa/ /de dag nam mkha' la yang sngags kyis 'gro/ /de thos nas ni 50.78a khyod kyi drung du 'ongs/ /thams cad 'dus te gsol ba 'debs pa ni/ /rig sngags drag ldan 'di gnyis myur du sod/ /phyis gdod 'gyod par gyur na ma legs so/ /de tshe rgyal po'i glang po go bgos nas/ /sdig pa'i grogs kyi tshig gis der chas te/ /rgyal po dmag sde kun gyis yongs bskor nas/ /nags nas dge slong gang na yod par lhags/ /rgyal po mi zad drag shul sems rig nas/ /klu dang gnod sbyin nags der gnas pa yis/ /rdo dang so phag char phab phyir bskrad de/ /des ni rgyal po sde dang bcas pa btags/ /ltos shig sdig pa'i grogs kyi tshig gis ni/ /de tshe ma rungs rgyal po 'chi dus byas/ /chos smra dag la khro ba byas pas na/ /der ni tshe rabs drug bcur mnar med song / /rgyal rigs rgyal po gang gis sbad pa yi/ /dge slong dmigs lta mang po de dag kyang / /tshe rabs bye ba brgya phrag bsam yas su/ /sems can dmyal ba'i sdug bsngal myong bar gyur/ /lha mo gang gis rgyal po bskul bstan cing / /gang gis chos smra de dag bsrungs pa ni/ /sangs rgyas gang gA'i bye ma mnyam pa mthong / /spyad pa spyod cing de dag mchod pa byas/ /bye ba khrag khrig drug bcu mtha' yas pas/ /rgyal po dang ni lhan cig chos thos shing / /byang chub tu ni sems mchog bskyed pa dag /'jig rten khams mang du yang sangs rgyas gyur/ /de dag tshe tshad bskal pa bye ba mang / /de dag ye shes gzhal med bsam mi khyab/ /de dag kun gyis ting 'dzin bzang po 'di/ /bshad nas rkang gnyis gtso bo mya ngan 'das/ /tshul khrims tshangs pa yon tan ye shes bsags/ /bla na med pa'i tshig 'di thos nas ni/ /g.yeng ba med par bag yod spyod cig dang / /sangs rgyas ye shes ring por mi thogs 'thob/ /phyogs bcu dag gi de bzhin gshegs pa rnams/ /sems zhi snying rje byams pa'i spyan 50.78b mnga' ba/ /'jig rten kun gyi skyabs dang dpung gnyen mthong / /'jig rten kun du chos kyi char 'bebs 'gyur/ /gzhon nu khye'u mchog gnyis po byung ba yang / /gzhan yin snyam na de ltar mi blta ste/ /mar me mdzad ni de na gcig tu gyur/ /de tshe chos smra gnyis pa nga yin no/ /gang gis rjes su 'thun pa'i chos thos pa/ /rgyal po der yang byams pa de tshe gyur/ /lha mo phan 'dod mkhas pa gang byung ba/ /gzhon nu khyod ni de tshe der gyur to/ /rgyal po de yi nu bo gang byung ba/ /dge slong chos smra 'di gnyis sod cig ces/ /dge slong rnyed pa 'dod pas sbad pa ni/ /lha sbyin de yi tshe na der gyur to/ /sngon byung ba'i le'u zhes bya ste nyi shu gcig pa'o// // de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po ting nge 'dzin 'di 'dod pa dang / myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas lus dang srog la ma chags par bya'o/ /de ci'i phyir zhe na/ gzhon nu lus dang srog la chags pa'i phyir sems can rnams mi dge ba'i las mngon par 'du byed par 'gyur ro/ /gzhon nu byang chub sems dpa' sems dpa' chen po lus dang srog la ma chags pa rnams la ni bla na med pa yang dag par rdzogs pa'i byang chub kyang rnyed par mi dka' na ting nge 'dzin 'di lta ci smos/ gzhon nu de lta bas na lus dang srog la yang ma chags par bya'o zhes de ltar khyod kyis bslab par bya'o/ /de la 'di skad ces bya ste/ rtag tu khor mor rnag gi lus 'di la/ /byis pa rnams ni rab tu chags byed de/ /srog la 'ju zhing bde ba 'dod pa'i phyir/ /mi mkhas pa dag rtag tu sdig pa byed/ /su dag snying po med pa'i lus srog la/ /lhag par chags pa yod pa ma yin pa/ /de dag gis ni bdud kyi sde bcom ste/ /byang chub shing drung byang chub rab tu rtogs/ /su dag bdag med stong pa'i lus rnams dang / /srog kyang rmi lam g.yo ba zil pa 'dra/ /'di gnyis 50.79a la ni chags par byed 'gyur ba/ /de dag shi 'phos sems can dmyal bar 'gro/ /lus nges par bstan pa'i le'u ste nyi shu gnyis pa'o// // de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po ting nge 'dzin 'di 'dod pa dang myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas de bzhin gshegs pa ni gzugs kyi skur mi blta'o/ /de ci'i phyir zhe na/ sangs rgyas bcom ldan 'das rnams ni chos kyi skus rab tu phye ba yin te/ gzugs kyi skus rab tu phye ba ma yin no/ /gzhon nu de la byang chub sems dpa' sems dpa' chen po de bzhin gshegs pa'i sku la smon par 'dod pa dang / de bzhin gshegs pa'i sku shes par 'dod pas ting nge 'dzin 'di gzung bar bya/ kun chub par bya bcang bar bya/ klag par bya rab tu gdon par bya/ lung mnod cing kha ton du bya/ bsgom par bya bsgom pa'i sbyor ba la rjes su brtson par bya/ gzhan la yang rgya cher rab tu bstan par bya'o/ /gzhon nu de bzhin gshegs pa'i sku ni bsod nams brgya pa las skyes pa'i blo dang don gcig tu bstan pa yin te/ chos las skyes pa/ mtshan ma med pa/ mtshan ma thams cad dang bral ba/ zab pa tshad med pa tshad med pa'i chos mtshan ma med pa'i ngo bo nyid mtshan ma thams cad rnam par bshig pa/ mi g.yo ba mi gnas pa shin du nam mkha'i ngo bo nyid/ mi snang ba mig gi lam las yang dag par 'das pa ni chos kyi skur rab tu shes par bya ste/ bsam gyis mi khyab pa/ bsam pa'i sa dang bral ba/ bde ba dang sdug bsngal gyis mi bskyod pa/ spros pa thams cad las yang dag par 'das pa/ gnas med pa/ sangs rgyas kyi ye shes la smon par 'dod pa rnams kyi sgra las shin du 'das pa'i snying po ste 'dod chags las yang dag par 'das pa/ dbyer mi phyed pa ste zhe sdang las yang dag par 'das pa/ brtan 50.79b pa ste/ gti mug las yang dag par 'das pa stong pa nyid du bstan pas nges par bstan pa ma skyes pa skye ba las yang dag par 'das pa/ tha snyad du brtags pa/ mya ngan las 'das pa bye brag med pa/ sgras mya ngan las 'das pa dbyangs kyis zhi ba/ brdas mtshungs par gyur pa/ don dam pas brdar gyur pa/ yang dag pa ji lta ba'i tshig gis don dam pa/ yongs su gdung ba med pas bsil ba/ gnas med pa/ gzhal du med pa/ kha dog bstan pas mu med pa/ mngon par shes pa chen po yongs su sbyang ba las byung ba ste/ gzhon nu de ni de bzhin gshegs pa'i sku zhes bya'o/ /de nas bcom ldan 'das kyis de'i tshe tshigs su bcad pa 'di dag gsungs so/ /'di 'dra'i 'jig rten mgon po'i sku/ /su dag shes par 'dod pa ni/ /ting 'dzin 'di ni sgom gyis dang / /sangs rgyas sku ni shes par 'gyur/ /sangs rgyas sku ni dag pa ste/ /bsod nams brgya skyes 'od kyang gsal/ /de ni bar snang mtshungs pa ste/ /de la tha dad bya ba med/ /sangs rgyas byang chub ci 'dra ba/ /mtshan rnams kyang ni de 'dra ste/ /de yi mtshan rnams ci 'dra ba/ /de yi sku yang de 'dra'o/ /sku ni byang chub mtshan nyid de/ /sangs rgyas zhing yang de 'dra zhing / /stobs dang rnam thar bsam gtan yang / /de dag thams cad mtshan nyid gcig /de ltar sangs rgyas 'byung 'gyur te/ /'jig rten mgon po'i de 'dra bas/ /sus kyang sha yi mig gis ni/ /nam yang mthong bar mi nus so/ /mang po dag kyang 'di skad smra/ /ngas ni 'jig rten 'dren pa mthong / /sku yang gser gyi kha dog la/ /'jig rten thams cad snang bar mdzad/ /sangs rgyas dag gi byin rlabs dang / /mthu dang rnam thar sprul pa yis/ /de ltar mtshan gyis spras pa yi/ /sku dag shin du snang ba yin/ /bongs tshod khrun dang sboms su yang / /sangs rgyas sku ni bshad mod kyis/ /sku yi tshad ni ma rnyed de/ /de phyir bsam gyis mi khyab bo/ /sangs rgyas 50.80a sku ni 'di tsam zhes/ /gal te tshad kyang rnyed gyur na/ /lha dag dang ni mi rnams dang / /ston pa bye brag med par 'gyur/ /mnyam par bzhag pa'i sems kyi ni/ /rnam par smin pa'ang de yi mtshan/ /ming dang gzugs kyang de 'dra mtshan/ /rnam par dag cing 'od gsal 'gyur/ /ji ltar 'jig rten mgon po yis/ /bskal pa bye bar bsnyen pa ltar/ /sus kyang ting 'dzin zhi ba 'di/ /nam yang goms par ma byas so/ /dkar po'i chos ni mang po yis/ /ting 'dzin 'di ni bskyed pa ste/ /ting 'dzin 'di ni rgya che bas/ /nga yi lus kyang mi snang ngo / /gang gi sems ni ci 'dra ba/ /ming dang gzugs kyang de 'dra ste/ /rang bzhin med pa'i sems kyi ni/ /ming dang gzugs kyang mtshan de 'dra/ /ming dang gzugs la gang gi ni/ /'du shes rags pa 'jug pa yang / /skal pa mi mnyam 'du shes kyis/ /rags pa'i sems kyang skye bar 'gyur/ /ming dang gzugs la su dag gi/ /'du shes phra mo 'jug pa ni/ /ming dang gzugs la ma chags pas/ /sems ni rab tu 'od gsal 'gyur/ /ngas dran sngon gyi tshe rabs ni/ /grangs med pa dag bdun du yang / /sdig pa'i 'du shes gsum po dag / /nam yang skyes par ma gyur to/ /nga yi sems ni zag med de/ /bskal pa bye ba bsam yas su/ /sems can rnams kyi don byed kyang / /nga yi lus ni mi snang ngo / /ji ltar gang gi dngos po las/ /yid kyang rnam par grol gyur pa/ /de dag de yi dngos po dang / /phyir yang phrad par mi 'gyur ro/ /dngos po kun las rnam pa kun/ /nga yi rnam shes rnam grol te/ /sems kyi rang bzhin shes pas na/ /phyir yang ye shes 'byung bar 'gyur/ /zhing rnams bye ba phrag stong du/ /nga yi sprul pa dag kyang 'gro/ /sems can rnams kyi don kyang byed/ /de la lus kyang rnyed mi 'gyur/ /mtshan nyid med cing mtshan ma med/ /ji ltar nam mkha' de bzhin du/ /nga yi sku mang brjod med cing / /shes par dka' bar rab tu bstan/ /dpa' bo chen po chos kyi sku/ /sku ni chos las skyes pa ste/ /gzugs kyi skur ni nam du yang / / 50.80b rgyal ba gdags par yong mi nus/ /ji ltar bshad pa 'di dag kyang / /thos nas dga' bar 'gyur ba ni/ /de la sdig can bdud kyis kyang / /glan ka rnyed par mi 'gyur ro/ /zab mo yi ni chos thos nas/ /de la skrag pa mi 'byung ste/ /de ni srog gi phyir du yang / /sangs rgyas byang chub spong mi byed/ /mdo sde bye ba phrag stong gi/ /yang dag bstan pa shes par 'gyur/ /gang du gang du song bar yang / /'jig rten dag la snang bar 'gyur/ /gzhon nu de la de bzhin gshegs pa'i sku ni mtshan ma dang las kyis kyang shes par sla ba ma yin te/ sngon po 'am kha dog sngon po 'am/ sngon po lta bur ston pa 'am/ 'od sngon po 'byung ba 'am/ ser po 'am/ kha dog ser po 'am/ ser po lta bur ston pa 'am/ 'od ser po 'byung ba 'am/ dmar po 'am/ kha dog dmar po 'am/ dmar po lta bur ston pa 'am/ 'od dmar po 'byung ba 'am/ dkar po 'am/ kha dog dkar po 'am/ dkar po lta bur ston pa 'am/ 'od dkar po 'byung ba 'am/ leb rgan nam/ kha dog leb rgan nam/ leb rgan lta bur ston pa 'am/ 'od leb rgan 'byung ba 'am/ shel lam/ shel gyi kha dog gam/ shel lta bur ston pa 'am/ shel gyi 'od 'byung ba 'am/ me 'am/ me'i kha dog gam/ me lta bur ston pa 'am/ me'i 'od 'byung ba 'am/ mar gyi snying po 'am/ mar gyi kha dog gam/ mar lta bur ston pa 'am/ mar gyi 'od 'byung ba 'am/ gser ram/ gser gyi kha dog gam/ gser lta bur ston pa 'am/ gser gyi 'od 'byung ba 'am/ bai dUr+ya 'am/ bai dUr+ya'i kha dog gam/ bai dUr+ya lta bur ston pa 'am/ bai dUr+ya'i 'od 'byung ba 'am/ glog gam/ glog gi kha dog gam/ glog lta bur ston pa 'am/ glog gi 'od 'byung ba 'am/ tshangs pa 'am/ tshangs pa'i kha dog gam/ tshangs pa lta bur ston pa 'am/ tshangs pa'i 'od 'byung ba 'am/ lha 'am/ lha'i kha dog gam/ lha lta bur ston pa 'am/ lha'i 'od 'byung ba'o zhes shes par sla ba ma yin no/ /gzhon nu de ltar de bzhin gshegs pa'i sku ni dag pa ste/ mtshan ma dag gis bsam par bya ba ma 50.81a yin pa/ bsam gyis mi khyab par bstan pa/ mtshan ma thams cad kyis kyang bstan par bya ba ma yin pa/ bsam gyis mi khyab par bstan pa ste/ rnam pa thams cad bsam gyis mi khyab cing dpag tu med pa zhes bya ba ma gtogs par lha dang bcas pa'i 'jig rten gyis kyang gzugs kyi sku yongs su rdzogs pas sku'i tshad gzung bar sla ba ma yin no/ /de nas bcom ldan 'das kyis de'i tshe tshigs su bcad pa 'di dag gsungs so/ /'jig rten khams kyi rdul phran dang / /rdul du ming yang ston pa dang / /mtshe'u dang rdzing dang lting ka dang / /rgya mtsho na yang ji snyed chu/ /'di snyed rdul phran yod do zhes/ /de dag la ni mtha' mi rnyed/ /rgya mtsho la ni skra rtse yis/ /chu thigs gzhal bar nus kyang ni/ /'jig rten mgon po'i dpe nyid du/ /yang dag bstan par mi rung ngo / /chu yi thigs pa dpag med cing / /de bzhin rab tu phra ba'i rdul/ /de bas sems can gcig gi yang / /shin du mang du ngas mthong ste/ /mos pa dang ni sems bskyed pa/ /du ma dag ni shes mi sla/ /ngas ni sku yi yon tan dag /yang dag pa ni gang bstan pa/ /sems can kun gyi mos pa yang / /de dag dpe ru bzod mi 'gyur/ /mtshan ma dang ni las rnams dang / /kha dog snang ba 'di 'dra zhes/ /sangs rgyas kyi ni shes mi nus/ /nga yi bye brag de 'dra'o/ /sangs rgyas mtshan ma bral ba ste/ /chos kyi sku yis rab tu phye/ /zab cing dpag tu med pa ste/ /de phyir sangs rgyas bsam mi khyab/ /sangs rgyas bsam du med pa yi/ /sangs rgyas sku yang bsam du med/ /sku de bsam du med pa yi/ /chos kyi sku yis rab tu phye/ /sangs rgyas sku ni sems kyis kyang / /bsam par bzod pa ma yin te/ /de ltar de yi sku la yang / /tshad kyang nye bar mi dmigs so/ /chos rnams de dag dpag tu med/ /bskal pa bye bar bsnyen pas na/ /de phyir nga yi lus kyang ni/ /'od gsal bsam du med pa grub/ /sems can kun gyis gzung du med/ /tshad kyis gzung 50.81b bya ma yin te/ /de lta sangs rgyas sku dag ni/ /tshad med bsam gyis mi khyab pa/ /tshad med pa yi chos dag gis/ /de la tshad ni brtag tu med/ /ma brtag pa yi chos dag gis/ /de ltar sangs rgyas ma brtags so/ /rtog pa dag ni tshad du bstan/ /rtog pa med pa tshad med yin/ /mi rtog rtog dang bral bas na/ /de phyir sangs rgyas bsam du med/ /ji ltar nam mkha' tshad med la/ /sus kyang gzhal du mi nus pa/ /de bzhin sangs rgyas sku dag kyang / /nam mkha' nyid dang 'dra zhing mtshungs/ /sangs rgyas sku ni de lta bur/ /gang gis rig pa rgyal ba'i sras/ /de dag bsam gyis mi khyab pa/ /sangs rgyas 'jig rten mgon por 'gyur/ /de bzhin gshegs pa'i sku nges par bstan pa'i le'u ste nyi shu gsum pa'o// // de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po gang ci nas kyang bdag gis so so yang dag par rig pa bzhi mngon sum du bya bar 'dod de/ bzhi gang zhe na/ 'di lta ste/ don so so yang dag par rig pa dang chos so so yang dag par rig pa dang nges pa'i tshig so so yang dag par rig pa dang spobs pa so so yang dag par rig pa 'di bzhi mngon sum du bya'o snyam na/ gzhon nu byang chub sems dpa' sems dpa' chen po des ting nge 'dzin 'di gzung bar bya/ kun chub par bya/ bcang bar bya/ bklag par bya/ rab tu gdon par bya/ lung mnod cing kha ton du bya/ nyon mongs pa med par sgom pas bsgom par bya/ gzhan la yang rgya cher rab tu bstan par bya/ bsgom pa'i rnal 'byor la rjes su brtson par bya'o/ /gzhon nu de la chos so so yang dag par rig pa gang zhe na/ gzhon nu gzugs su brjod pa ji snyed yod pa gzhon nu de bzhin gshegs pa'i bsngags pa brjod pa yang de snyed do/ /de bzhin du tshor ba dang 'du shes dang 'du byed 50.82a rnams ji snyed pa dang gzhon nu rnam par shes pa'i brjod pa ji snyed pa de bzhin gshegs pa'i bsngags pa brjod pa yang de snyed de/ gzhon nu de ltar gzugs su brjod pa mtha' yas mu med bsam gyis mi khyab pa de bzhin du de bzhin gshegs pa'i bsngags pa brjod pa yang bsam gyis mi khyab ste/ de bzhin du tshor ba dang 'du shes dang 'du byed rnams dang gzhon nu 'di ltar rnam par shes pa'i brjod pa mtha' yas mu med de/ bsam gyis mi khyab pa de bzhin du de bzhin gshegs pa'i bsngags pa brjod pa yang bsam gyis mi khyab po/ /gzhon nu de ltar 'dus byas la'ang nyes pa grangs med/ mya ngan las 'das pa la yang phan yon grangs med de/ de bzhin gshegs pa'i bsngags pa yang grangs med do/ /gzhon nu 'di ltar mya ngan las 'das pa'i ming ji snyed yod pa'i de bzhin gshegs pa'i bsngags pa yang de snyed do/ /gzhon nu 'di ltar mya ngan 'das pa'i ming grangs med de/ de bzhin gshegs pa'i bsngags pa yang grangs med do/ /gzhon nu 'di bzhi ni de bzhin gshegs pa'i bsngags pa brjod pa bsam gyis mi khyab par brjod pa ste/ de dag mthar phyin pa'i gnas su bstan par sla ba ni ma yin no/ /bzhi gang zhe na/ 'di lta ste/ 'du byed brjod pa bsam gyis mi khyab pa dang dbyangs brjod pa bsam gyis mi khyab pa dang kun nas nyon mongs pa brjod pa bsam gyis mi khyab pa dang rnam par byang ba brjod pa bsam gyis mi khyab pa ste/ gzhon nu de dag ni de bzhin gshegs pa'i bsngags pa brjod pa bsam gyis mi khyab pa/ bsam gyis mi khyab pa brjod pa bzhi'o/ /gzhon nu 'di bzhi ni de bzhin gshegs pa'i brjod pa bsam gyis mi khyab pa/ bsam gyis mi khyab par bstan pa ste/ de dag ni mthar phyin pa'i gnas su bstan par sla ba ma yin no/ /bzhi gang zhe na/ bzhi po de dag nyid de/ de bzhin du rgyas par bstan par bya'o/ /gzhon nu 'di dag ni byang chub sems dpa' rnams kyi tshul bzhi ste/ bzhi gang zhe na/ 'du byed kyi tshul bsam 50.82b gyis mi khyab pa dang 'du byed yongs su bshad pa'i tshul bsam gyis mi khyab pa dang kun nas nyon mongs pa'i tshul bsam gyis mi khyab pa dang rnam par byung ba'i tshul bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi rigs pa bzhi ste/ bzhi gang zhe na/ 'du byed kyi rigs pa bsam gyis mi khyab pa dang 'du byed yongs su bshad pa'i rigs pa bsam gyis mi khyab pa dang / kun nas nyon mongs pa'i rigs pa bsam gyis mi khyab pa dang rnam par byang ba'i rigs pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi sgo bzhi ste/ bzhi gang zhe na/ 'du byed kyi sgo bsam gyis mi khyab pa dang 'du byed yongs su bshad pa'i sgo bsam gyis mi khyab pa dang kun nas nyon mongs pa'i sgo bsam gyis mi khyab pa dang rnam par byang ba'i sgo bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi nges par bstan pa bzhi ste/ bzhi gang zhe na/ 'du byed nges par bstan pa bsam gyis mi khyab pa dang 'du byed yongs su bshad pa nges par bstan pa bsam gyis mi khyab pa dang kun nas nyon mongs pa'i nges par bstan pa bsam gyis mi khyab pa dang rnam par byang ba nges par bstan pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi sgra bzhi ste/ bzhi gang zhe na/ 'du byed kyi sgra bsam gyis mi khyab pa dang 'du byed yongs su bshad pa'i sgra bsam gyis mi khyab pa dang kun nas nyon mongs pa'i sgra bsam gyis mi khyab pa dang rnam par byang ba'i sgra bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi tshig bzhi ste/ bzhi gang zhe na/ 'du byed kyi tshig bsam gyis mi khyab pa dang 'du byed yongs su bshad pa'i tshig bsam gyis mi khyab pa dang kun nas nyon mongs pa'i tshig bsam gyis mi khyab pa dang rnam par byang ba'i tshig bsam gyis mi khyab pa dang 'di bzhi'o/ / 50.83a gzhon nu 'di dag ni byang chub sems dpa' rnams kyi tshig gi lam bzhi ste/ bzhi gang zhe na/ 'du byed kyi tshig gi lam bsam gyis mi khyab pa dang 'du byed yongs su bshad pa'i tshig gi lam bsam gyis mi khyab pa dang kun nas nyon mongs pa'i tshig gi lam bsam gyis mi khyab pa dang rnam par byang ba'i tshig gi lam bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi dgongs te bshad pa bzhi ste/ bzhi gang zhe na/ 'du byed kyi dgongs te bshad pa bsam gyis mi khyab pa dang 'du byed yongs su bshad pa'i dgongs te bshad pa bsam gyis mi khyab pa dang kun nas nyon mongs pa'i dgongs te bshad pa bsam gyis mi khyab pa dang rnam par byang ba'i dgongs te bshad pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi lha la nges par rtog pa bzhi ste/ bzhi gang zhe na/ 'du byed lha la rtog pa bsam gyis mi khyab pa dang 'du byed yongs su bshad pa lha la rtog pa bsam gyis mi khyab pa dang kun nas nyon mongs pa lha la rtog pa bsam gyis mi khyab pa dang rnam par byang ba lha la rtog pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi mi la rtog pa bzhi ste/ bzhi gang zhe na/ 'du byed mi la rtog pa bsam gyis mi khyab pa dang 'du byed yongasu bshad pa mi la rtog pa bsam gyis mi khyab pa dang / kun nas nyon mongs pa mi la rtog pa bsam gyis mi khyab pa dang rnam par byang ba mi la rtog pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi ming la rtog pa bzhi ste/ bzhi gang zhe na/ 'du byed kyi ming la rtog pa bsam gyis mi khyab pa dang 'du byed yongs su bshad pa'i ming la rtog pa bsam gyis mi khyab pa dang kun nas nyon mongs pa'i ming la rtog pha bsam gyis mi khyab pa dang rnam par byang ba'i ming la rtog pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams 50.83b kya 'jug pa bzhi ste/ bzhi gang zhe na/ 'du byed la 'jug pa bsam gyis mi khyab pa dang 'du byed yongs su bshad pa la 'jug pa bsam gyis mi khyab pa dang kun nas nyon mongs pa la 'jug pa bsam gyis mi khyab pa dang rnam par byang ba la 'jug pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi sgrol ba bzhi ste/ bzhi gang zhe na/ 'du byed kyi sgrol ba bsam gyis mi khyab pa dang 'du byed yongs su bshad pa'i sgrol ba bsam gyis mi khyab pa dang kun nas nyon mongs pa'i sgrol ba bsam gyis mi khyab pa dang rnam par byang ba'i sgrol ba bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi rdo rje'i tshig bzhi ste/ bzhi gang zhe na/ 'du byed kyi rdo rje'i tshig bsam gyis mi khyab pa dang 'du byed yongs su bshad pa'i rdo rje'i tshig bsam gyis mi khyab pa dang kun nas nyon mongs pa'i rdo rje'i tshig bsam gyis mi khyab pa dang rnam par byang ba'i rdo rje'i tshig bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi gsang sngags kyi tshig bzhi ste/ bzhi gang zhe na/ 'du byed gsang sngags kyi tshig bsam gyis mi khyab pa dang 'du byed yongs su bshad pa gsang sngags kyi tshig bsam gyis mi khyab pa dang kun nas nyon mongs pa'i gsang sngags kyi tshig bsam gyis mi khyab pa dang rnam par byang ba'i gsang sngags kyi tshig bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi sgrub pa bzhi ste/ bzhi gang zhe na/ 'du byed sgrub pa bsam gyis mi khyab pa dang 'du byed yongs su bshad pa sgrub pa bsam gyis mi khyab pa dang kun nas nyon mongs pa sgrub pa bsam gyis mi khyab pa dang / rnam par byang ba sgrub pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi mdo sde'i tshig 50.84a bzhi ste/ bzhi gang zhe na/ 'du byed mdo sde'i tshig bsam gyis mi khyab pa dang 'du byed yongs su bshad pa mdo sde'i tshig bsam gyis mi khyab pa dang kun nas nyon mongs pa mdo sde'i tshig bsam gyis mi khyab pa dang rnam par byang ba mdo sde'i tshig bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi btags pa'i tshig bzhi ste/ bzhi gang zhe na/ 'du byed btags pa'i tshig bsam gyis mi khyab pa dang 'du byed yongs su bshad pa btags pa'i tshig bsam gyis mi khyab pa dang / kun nas nyon mongs pa btags pa'i tshig bsam gyis mi khyab pa dang rnam par byang ba btags pa'i tshig bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi snang ba'i tshig bzhi ste/ bzhi gang zhe na/ 'du byed snang ba'i tshig bsam gyis mi khyab pa dang 'du byed yongs su bshad pa snang ba'i tshig bsam gyis mi khyab pa dang kun nas nyon mongs pa snang ba'i tshig bsam gyis mi khyab pa dang rnam par byang ba snang ba'i tshig bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi gsal ba'i tshig bzhi ste/ bzhi gang zhe na/ 'du byed gsal ba'i tshig bsam gyis mi khyab pa dang 'du byed yongs su bshad pa gsal ba'i tshig bsam gyis mi khyab pa dang kun nas nyon mongs pa gsal ba'i tshig bsam gyis mi khyab pa dang rnam par byang ba gsal ba'i tshig bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi spyod pa'i tshig bzhi ste/ bzhi gang zhe na/ 'du byed kyi spyod pa'i tshig bsam gyis mi khyab pa dang 'du byed yongs su bshad pa spyod pa'i tshig bsam gyis mi khyab pa dang kun nas nyon mongs pa spyod pa'i tshig bsam gyis mi khyab pa dang rnam par byang ba spyod pa'i tshig bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams 50.84b kyi spyad pa'i tshig bzhi ste/ bzhi gang zhe na/ 'du byed kyi spyad pa'i tshig bsam gyis mi khyab pa dang 'du byed yongs su bshad pa spyad pa'i tshig bsam gyis mi khyab pa dang kun nas nyon mongs pa spyad pa'i tshig bsam gyis mi khyab pa dang rnam par byang ba spyad pa'i tshig bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi bsam gyis mi khyab pa'i tshig bzhi ste/ bzhi gang zhe na/ 'du byed bsam gyis mi khyab pa'i tshig bsam gyis mi khyab pa dang 'du byed yongs su bshad pa bsam gyis mi khyab pa'i tshig bsam gyis mi khyab pa dang kun nas nyon mongs pa bsam gyis mi khyab pa'i tshig bsam gyis mi khyab pa dang rnam par byang ba bsam gyis mi khyab pa'i tshig bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi mtha' yas pa'i tshig bzhi ste/ bzhi gang zhe na/ 'du byed mtha' yas pa'i tshig bsam gyis mi khyab pa dang 'du byed yongs su bshad pa mtha' yas pa'i tshig bsam gyis mi khyab pa dang kun nas nyon mongs pa mtha' yas pa'i tshig bsam gyis mi khyab pa dang rnam par byang ba mtha' yas pa'i tshig bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi rgyu ba med pa'i tshig bzhi ste/ bzhi gang zhe na/ 'du byed rgyu ba med pa'i tshig bsam gyis mi khyab pa dang 'du byed yongs su bshad pa rgyu ba med pa'i tshig bsam gyis mi khyab pa dang kun nas nyon mongs pa'i rgyu ba med pa'i tshig bsam gyis mi khyab pa dang rnam par byang ba rgyu ba med pa'i tshig bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi mu med pa'i tshig bzhi ste/ bzhi gang zhe na/ 'du byed mu med pa'i tshig bsam gyis mi khyab pa dang 'du byed yongs su bshad pa mu med pa'i tshig bsam gyis mi khyab pa dang kun nas nyon mongs pa mu med pa'i tshig bsam gyis mi khyab pa dang rnam par byang ba mu 50.85a mu med pa'i tshig bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi gzhal du med pa'i tshig bzhi ste/ bzhi gang zhe na/ 'du byed gzhal du med pa'i tshig bsam gyis mi khyab pa dang 'du byed yongs su bshad pa gzhal du med pa'i tshig bsam gyis mi khyab pa dang kun nas nyon mongs pa gzhal du med pa'i tshig bsam gyis mi khyab pa dang rnam par byang ba gzhal du med pa'i tshig bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi grangs med pa'i tshig bzhi ste/ bzhi gang zhe na/ 'du byed grangs med pa'i tshig bsam gyis mi khyab pa dang 'du byed yongs su bshad pa grangs med pa'i tshig bsam gyis mi khyab pa dang kun nas nyon mongs pa grangs med pa'i tshig bsam gyis mi khyab pa dang rnam par byang ba grangs med pa'i tshig bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi dpag tu med pa'i tshig bzhi ste/ bzhi gang zhe na/ 'du byed dpag tu med pa'i tshig bsam gyis mi khyab pa dang 'du byed yongs su bshad pa dpag tu med pa'i tshig bsam gyis mi khyab pa dang kun nas nyon mongs pa dpag tu med pa'i tshig bsam gyis mi khyab pa dang / rnam par byang ba dpag tu med pa'i tshig bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi tshad med pa'i tshig bzhi ste/ bzhi gang zhe na/ 'du byed tshad med pa'i tshig bsam gyis mi khyab pa dang 'du byed yongs su bshad pa tshad med pa'i tshig bsam gyis mi khyab pa dang kun nas nyon mongs pa tshad med pa'i tshig bsam gyis mi khyab pa dang rnam par byang ba tshad med pa'i tshig bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi shes pa'i tshig bzhi ste/ bzhi gang zhe na/ 'du byed shes pa'i tshig bsam gyis mi khyab pa dang 'du byed yongs su bshad pa shes pa'i tshig bsam gyis mi khyab pa dang kun nas nyon mongs pa shes pa'i tshig bsam gyis mi khyab pa dang rnam par byang ba shes pa'i tshig bsam gyis 50.85b mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi shes pa bsags pa bzhi ste/ bzhi gang zhe na/ 'du byed kyi shes pa bsags pa bsam gyis mi khyab pa dang / 'du byed yongs su bshad pa'i shes pa bsags pa bsam gyis mi khyab pa dang kun nas nyon mongs pa shes pa bsags pa bsam gyis mi khyab pa dang rnam par byang ba shes pa bsags pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi shes pa'i rigs bzhi ste/ bzhi gang zhe na/ 'du byed kyi shes pa'i rigs bsam gyis mi khyab pa dang 'du byed yongs su bshad pa shes pa'i rigs bsam gyis mi khyab pa dang kun nas nyon mongs pa shes pa'i rigs bsam gyis mi khyab pa dang rnam par byang ba shes pa'i rigs bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi spobs pa bsags pa bzhi ste/ bzhi gang zhe na/ 'du byed kyi spobs pa bsags pa bsam gyis mi khyab pa dang / 'du byed yongs su bshad pa'i spobs pa bsags pa bsam gyis mi khyab pa dang / kun nas nyon mongs pa'i spobs pa bsags pa bsam gyis mi khyab pa dang / rnam par byang ba'i spobs pa bsags pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi mdo sde bzhi ste/ bzhi gang zhe na/ 'du byed kyi mdo sde bsam gyis mi khyab pa dang 'du byed yongs su bshad pa'i mdo sde bsam gyis mi khyab pa dang / kun nas nyon mongs pa'i mdo sde bsam gyis mi khyab pa dang rnam par byang ba'i mdo sde bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi mdo sde bsags pa bzhi ste/ bzhi gang zhe na/ 'du byed kyi mdo sde bsags pa bsam gyis mi khyab pa dang 'du byed yongs su bshad pa'i mdo sde bsags pa bsam gyis mi khyab pa dang kun nas nyon mongs pa'i mdo sde bsags pa bsam gyis mi khyab pa dang rnam par byang ba'i mdo sde bsags pa bsam gyis mi khyab pa dang 50.86a 'di bzhi'o/ /gzhon nu 'di dag ni byang chub sems dpa' rnams kyi mang du thos pa bzhi ste/ bzhi gang zhe na/ 'du byed mang du thos pa bsam gyis mi khyab pa dang 'du byed yongs su bshad pa'i mang du thos pa bsam gyis mi khyab pa dang kun nas nyon mongs pa mang du thos pa bsam gyis mi khyab pa dang rnam par byang ba mang du thos pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi nor bzhi ste/ bzhi gang zhe na/ 'du byed kyi nor bsam gyis mi khyab pa dang 'du byed yongs su bshad pa'i nor bsam gyis mi khyab pa dang kun nas nyon mongs pa'i nor bsam gyis mi khyab pa dang rnam par byang ba'i nor bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi bslab pa bzhi ste/ bzhi gang zhe na/ 'du byed kyi bslab pa bsam gyis mi khyab pa dang 'du byed yongs su bshad pa'i bslab pa bsam gyis mi khyab pa dang kun nas nyon mongs pa'i bslab pa bsam gyis mi khyab pa dang / rnam par byang ba'i bslab pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi spyod yul bzhi ste/ bzhi gang zhe na/ 'du byed kyi spyod yul bsam gyis mi khyab pa dang 'du byed yongs su bshad pa'i spyod yul bsam gyis mi khyab pa dang kun nas nyon mongs pa'i spyod yul bsam gyis mi khyab pa dang rnam par byang ba'i spyod yul bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi las bzhi ste/ bzhi gang zhe na/ 'du byed kyi las bsam gyis mi khyab pa dang 'du byed yongs su bshad pa'i las bsam gyis mi khyab pa dang kun nas nyon mongs pa'i las bsam gyis mi khyab pa dang rnam par byang ba'i las bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi spobs pa bzhi ste/ bzhi gang zhe na/ 'du byed kyi spobs pa bsam gyis mi khyab pa dang 'du byed yongs su bshad pa'i spobs pa bsam gyis mi 50.86b khyab pa dang kun nas nyon mongs pa'i spobs pa bsam gyis mi khyab pa dang rnam par byang ba'i spobs pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi lam bsgom pa bzhi ste/ bzhi gang zhe na/ 'du byed kyi lam bsgom pa bsam gyis mi khyab pa dang 'du byed yongs su bshad pa'i lam bsgom pa bsam gyis mi khyab pa dang kun nas nyon mongs pa'i lam bsgom pa bsam gyis mi khyab pa dang rnam par byang ba'i lam bsgom pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi kun nas nyon mongs pa'i shes pa bzhi ste/ bzhi gang zhe na/ 'du byed kun nas nyon mongs pa shes pa bsam gyis mi khyab pa dang 'du byad yongs su bshad pa'i kun nas nyon mongs pa shes pa bsam gyis mi khyab pa dang kun nas nyon mongs pa shes pa bsam gyis mi khyab pa dang rnam par byang ba kun nas nyon mongs pa shes pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi 'bras bu yod pa'i shes pa bzhi ste/ bzhi gang zhe na/ 'du byed kyi 'bras bu yod pa'i shes pa bsam gyis mi khyab pa dang 'du byed yongs su bshad pa'i 'bras bu yod pa'i shes pa bsam gyis mi khyab pa dang kun nas nyon mongs pa'i 'bras bu yod pa'i shes pa bsam gyis mi khyab pa dang rnam par byang ba'i 'bras bu yod pa'i shes pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi ma rig pa shes pa bzhi ste/ bzhi gang zhe na/ 'du byed kyi ma rig pa shes pa bsam gyis mi khyab pa dang 'du byed yongs su bshad pa'i ma rig pa shes pa bsam gyis mi khyab pa dang kun nas nyon mongs pa'i ma rig pa shes pa bsam gyis mi khyab pa dang rnam par byang ba'i ma rig pa shes pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi sdug bsngal shes pa bzhi ste/ bzhi gang zhe na/ 'du byed kyi sdug bsngal shes pa bsam gyis mi khyab pa dang 50.87a 'du byed yongs su bshad pa'i sdug bsngal shes pa bsam gyis mi khyab pa dang kun nas nyon mongs pa'i sdug bsngal shes pa bsam gyis mi khyab pa dang rnam par byang ba'i sdug bsngal shes pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi yid mi bde ba shes pa bzhi ste/ bzhi gang zhe na/ 'du byed kyi yid mi bde ba shes pa bsam gyis mi khyab pa dang 'du byed yongs su bshad pa'i yid mi bde ba shes pa bsam gyis mi khyab pa dang kun nas nyon mongs pa'i yid mi bde ba shes pa bsam gyis mi khyab pa dang rnam par byang ba'i yid mi bde ba shes pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi dbul po shes pa bzhi ste/ bzhi gang zhe na/ 'du byed kyi dbul po shes pa bsam gyis mi khyab pa dang 'du byed yongs su bshad pa'i dbul po shes pa bsam gyis mi khyab pa dang / kun nas nyon mongs pa'i dbul po shes pa bsam gyis mi khyab pa dang rnam par byang ba'i dbul po shes pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi skye ba shes pa bzhi ste/ bzhi gang zhe na/ 'du byed kyi skye ba shes pa bsam gyis mi khyab pa dang 'du byed yongs su bshad pa'i skye ba shes pa bsam gyis mi khyab pa dang kun nas nyon mongs pa'i skye ba shes pa bsam gyis mi khyab pa dang rnam par byang ba'i skye ba shes pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi nang shes pa bzhi ste/ bzhi gang zhe na/ 'du byed kyi nang shes pa bsam gyis mi khyab pa dang 'du byed yongs su bshad pa'i nang shes pa bsam gyis mi khyab pa dang kun nas nyon mongs pa'i nang shes pa bsam gyis mi khyab pa dang rnam par byang ba'i nang shes pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi phyi rol 50.87b shes pa bzhi ste/ bzhi gang zhe na/ 'du byed kyi phyi rol shes pa bsam gyis mi khyab pa dang 'du byed yongs su bshad pa'i phyi rol shes pa bsam gyis mi khyab pa dang kun nas nyon mongs pa'i phyi rol shes pa bsam gyis mi khyab pa dang rnam par byang ba'i phyi rol shes pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi ngo tsha shes pa'i ye shes bzhi ste/ bzhi gang zhe na/ 'du byed kyi ngo tsha shes pa'i ye shes bsam gyis mi khyab pa dang 'du byed yongs su bshad pa'i ngo tsha shes pa'i ye shes bsam gyis mi khyab pa dang / kun nas nyon mongs pa'i ngo tsha shes pa'i ye shes bsam gyis mi khyab pa dang / rnam par byang ba'i ngo tsha shes pa'i ye shes bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi bden pa shes pa bzhi ste/ bzhi gang zhe na/ 'du byed kyi bden pa shes pa bsam gyis mi khyab pa dang 'du byed yongs su bshad pa'i bden pa shes pa bsam gyis mi khyab pa dang / kun nas nyon mongs pa'i bden pa shes pa bsam gyis mi khyab pa dang rnam par byang ba'i bden pa shes pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi srid pa shes pa bzhi ste/ bzhi gang zhe na/ 'du byed kyi srid pa shes pa bsam gyis mi khyab pa dang 'du byed yongs su bshad pa'i srid pa shes pa bsam gyis mi khyab pa dang kun nas nyon mongs pa'i srid pa shes pa bsam gyis mi khyab pa dang rnam par byang ba'i srid pa shes pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi dngos po shes pa bzhi ste/ bzhi gang zhe na/ 'du byed kyi dngos po shes pa bsam gyis mi khyab pa dang 'du byed yongs su bshad pa'i dngos po shes pa bsam gyis mi khyab pa dang kun nas nyon mongs pa'i dngos po shes pa bsam gyis mi khyab pa dang rnam par byang ba'i dngos po shes pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyi gang zag shes 50.88a pa bzhi ste/ bzhi gang zhe na/ 'du byed kyi gang zag shes pa bsam gyis mi khyab pa dang 'du byed yongs su bshad pa'i gang zag shes pa bsam gyis mi khyab pa dang kun nas nyon mongs pa'i gang zag shes pa bsam gyis mi khyab pa dang rnam par byang ba'i gang zag shes pa bsam gyis mi khyab pa dang 'di bzhi'o/ /gzhon nu 'di dag ni byang chub sems dpa' rnams kyis dmigs pa shes pa bsam gyis mi khyab pa bsam gyis mi khyab par bstan pa bzhi ste/ mthar phyin pa'i gnas su bstan par sla ba ma yin no/ /bzhi gang zhe na/ 'du byed kyi dmigs pa shes pa bsam gyis mi khyab pa dang 'du byed yongs su bshad pa'i dmigs pa shes pa bsam gyis mi khyab pa dang kun nas nyon mongs pa'i dmigs pa shes pa bsam gyis mi khyab pa dang rnam par byang ba'i dmigs pa shes pa bsam gyis mi khyab pa dang 'di dag ni byang chub sems dpa' rnams kyi dmigs pa shes pa bsam gyis mi khyab pa bsam gyis mi khyab par bstan pa bzhi ste/ de dag ni mthar phyin pa'i gnas su bstan par sla ba ma yin no/ /gzungs bzhi ste/ bzhi gang zhe na/ 'di lta ste/ 'du byed thams cad mtha' yas par bshad pa brjod pa de la gang shes pa 'di ni gzungs dang po'o/ /dbyangs mtha' yas par bshad pa brjod pa de la gang shes pa 'di ni gzungs gnyis pa'o/ /kun nas nyon mongs pa mtha' yas par bshad pa brjod pa de la gang shes pa 'di ni gzungs gsum pa'o/ /rnam par byang ba'i yon tan gyis phan yon mtha' yas par bshad pa brjod pa de la gang shes pa 'di ni gzungs bzhi pa ste/ gzungs bzhi po ni 'di dag go/ /gzhon nu 'di ltar gzungs gang yin pa de ni shes pa'o/ /de ni chos so/ /'di ltar chos shes pas chos so so yang dag par rig pa'o/ /chos shes pa la don gang yin pa de ni don so so yang dag par rig pa zhes bya'o/ /chos shes pa la 'dun pa gang yin pa de ni nges pa'i tshig so so yang 50.88b dag par rig pa zhes bya'o/ /chos shes pa la tha snyad du ston pa dang 'chad pa dang 'dogs pa dang rab tu ston pa dang rab tu 'god pa dang 'byed pa dang rnam par 'byed pa dang gsal bar byed pa dang tshig thogs pa med pa dang tshigs mi 'dor zhing ma lkugs mi dge ba dang / tshig zhum pa med pa 'di ni gzhon nu spobs pa so so yang dag par rig pa zhes bya'o/ /de nas bcom ldan 'das kyis de'i tshe tshigs su bcad pa 'di dag gsungs so/ /sangs rgyas ye shes ji snyed pa/ /gzugs su brtags pa'ang de snyed de/ /gzugs su btags pa ji snyed pa/ /gzugs su brjod pa'ang de snyed do/ /gzugs su brjod pa ji snyed pa/ /tshul khrims ming yang de snyed de/ /tshul khrims ming yang ji snyed pa/ /sangs rgyas ming yang de snyed do/ /sangs rgyas ming ni ji snyed pa/ /sems can ming yang de snyed do/ /sems can gcig gi ming yang ni/ /de snyed du ni ngas bshad do/ /ming dang brjod pa mtha' yas pa/ /gang dag ngas ni sngar bshad rnams/ /tshul khrims ming dang sangs rgyas ming / /sems can ming dang de dag mtshungs/ /'dus byas nyes pa ji snyed pa/ /mya ngan 'das bsngags de snyed de/ /sangs rgyas kyi ni bsngags pa dang / /dpe yang de snyed ngas bshad do/ /ji snyed sems can thams cad kyi/ /sems rnams skye ba nges bsten pa/ /'jig rten mgon po'i spu gcig nas/ /'od zer dag kyang de snyed 'byung / /sems can kun gyi mos pa dang / /ming rnams ji snyed yod pa bas/ /de bas mi yi dbang po yi/ /dbyangs kyi yan lag bsngags pa mang / /sems can kun gyis ming yod pa/ /de dag sems can gcig la bstan/ /sems can gcig ming ji snyed pa/ /sems can kun gyi ming du bstan/ /so so yang dag rig 'jug pa/ /'di ni sangs rgyas bstan pa ste/ /byang chub sems dpa'i phyir yang ni/ /ming rnams mtha' yas nges par bstan/ /mdo sde bye ba bsam yas rnams/ / 50.89a ji ltar bshad snyam gang sems pa/ /mdo sde 'di ni rab brjod la/ /zhum pa med par bshad par gyis/ /'khor gyi nang du thogs med par/ /mdo sde bye ba rab tu 'chad/ /ji ltar nam mkha' mtha' med pa/ /de bzhin de la'ang chos rnams ston/ /de ltar byang chub sems dpa' dag / /sems can dag pa skyob pa rnams/ /mdo sde 'di dag bzung nas ni/ /ye shes phun sum tshogs par 'gyur/ /dad pas ji lta ji lta bur/ /tshul 'di rab tu ston byed pa/ /de bzhin de yi ye shes 'phel/ /gangs ri la ni sdong po bzhin/ /de bzhin gshegs pa bsam gyis mi khyab pa'i le'u ste nyi shu bzhi pa'o// // 'phags pa ting nge 'dzin gyi rgyal po'i mdo/ bam po brgyad pa/ gzhon nu de la byang chub sems dpa' sems dpa' chen po ji ltar chos so so yang dag par rig pa la spyod na chos la chos kyi rjes su lta zhing bla na med pa yang dag par rdzogs pa'i byang chub yang dag par sgrub par 'gyur zhe na/ gzhon nu 'di la byang chub sems dpa' sems dpa' chen po chos rnams la chos kyi rjes su lta bas gzugs las gzhan du byang chub yang dag par rjes su mi mthong / gzugs las gzhan du yang byang chub la mi spyod/ gzugs las gzhan du yang byang chub yongs su mi tshol/ gzugs las gzhan du yang byang chub yang dag par mi sgrub/ gzugs las gzhan du yang sems can rnams byang chub la yang dag par mi 'dzud/ gzugs las gzhan du yang de bzhin gshegs pa mi mthong ste/ gzugs kyi mi 'jigs pa'i ngo bo nyid de bzhin gshegs pa'o zhes de bzhin gshegs par lta'o/ /gzugs kyang gzhan gzugs kyi ngo bo nyid kyang gzhan no zhes de ltar mi lta'o/ /gzugs kyi ngo bo nyid kyang gzhan de bzhin gshegs pa yang gzhan no zhes de ltar yang mi lta'o/ /gzugs kyis ngo bo nyid gang yin pa dang de bzhin gshegs pa gang yin pa de ni gnyis su med pa'i chos nyid de/ byang chub sems dpa' sems dpa' chen po de ltar 50.89b lta na chos so so yang dag par rig pa la spyod do/ /de bzhin du tshor ba las gzhan du ma yin/ 'du shes las gzhan du ma yin/ 'du byed rnams las gzhan du ma yin te/ rnam par shes pa las gzhan du byang chub mi mthong / rnam par shes pa las gzhan du yang byang chub la mi spyod/ rnam par shes pa las gzhan du yang byang chub yongs su mi tshol/ rnam par shes pa las gzhan du yang byang chub yang dag par mi sgrub/ rnam par shes pa las gzhan du yang sems can rnams byang chub la yang dag par mi 'dzud/ rnam par shes pa las gzhan du yang de bzhin gshegs pa mi mthong ste/ rnam par shes pa'i mi 'jigs pa'i ngo bo nyid de bzhin gshegs pa'o zhes de bzhin gshegs par lta'o/ /rnam par shes pa yang gzhan/ rnam par shes pa'i ngo bo nyid kyang gzhan no zhes de ltar mi lta'o/ /rnam par shes pa'i ngo bo nyid kyang gzhan de bzhin gshegs pa yang gzhan no zhes de ltar yang mi lta'o/ /rnam par shes pa'i ngo bo nyid gang yin pa dang / de bzhin gshegs pa gang yin pa de gnyis su med pa'i chos nyid de/ byang chub sems dpa' sems dpa' chen po de ltar lta na chos so so yang dag par rig pa la spyod do/ /de nas bcom ldan 'das kyis de'i tshe tshigs su bcad pa 'di dag gsungs so/ /gzugs kyis kyang ni byang chub bstan/ /byang chub kyis kyang gzugs bstan te/ /mi mtshungs pa yi sgra rnams kyis/ /chos kyi bla ma rab tu bstan/ /sgra yis gzugs kyi bla ma ste/ /ngo bo nyid kyis zab pa dag /gzugs dang byang chub mnyam pa ste/ /tha dad bya ba de mi rnyed/ /mya ngan 'das pa zab par yang / /sgra yis rab tu bstan pa ltar/ /mya ngan 'das pa mi rnyed de/ /de yi sgra yang mi rnyed do/ /sgra dang mya ngan 'das pa ni/ /gnyi ga rnyed par mi 'gyur te/ /de bzhin stong pa'i chos rnams la/ /mya ngan 'das pa rab tu bstan/ /mya ngan 'das dang 50.90a 'da' bar ni/ /mya ngan 'das pa mi rnyed de/ /'di ni chos rnams 'jug med pa/ /phyis ni ci 'dra de bzhin sngon/ /chos rnams thams cad rang bzhin gyis/ /mya ngan 'das dang mtshungs mnyam par/ /sangs rgyas bstan la brtson pa yi/ /'byung ba lhur byed rnams kyis rig /sangs rgyas kyi ni sku mthong nas/ /'dren pa mthong zhes smra mod kyi/ /nga ni gzugs kyi sku lus su/ /sus kyang blta bar mi nus so/ /gzugs kyi mtshan nyid ci 'dra bar/ /gzugs kyi ngo bo nyid shes te/ /gzugs kyi ngo bo nyid shes na/ /nga yi sku yang nges par bstan/ /de bzhin phung po lnga rnams kyi/ /chos kyi mtshan nyid ngas shes te/ /chos kyi rang bzhin shes nas ni/ /chos kyi sku la rab tu gnas/ /chos kyi sku la rab gnas nas/ /sems can rnams la chos ston to/ /chos kyi sku la mi rten par/ /sems can rnams la chos ston to/ /sangs rgyas dag gi chos rnams ni/ /tshig gis bshad par mi nus te/ /'di 'dra'i tshul rnams mi shes pas/ /sangs rgyas kyi ni sgra thos nas/ /tshig tsam gyis ni 'di skad smra/ /ngas ni 'dren pa mthong zhes te/ /'du shes thams cad spangs pa la/ /srid par 'du shes med par 'gyur/ /sgrar ni 'du shes 'dzin pa la/ /nams kyang ston pa mthong ba med/ /'di lta bu'i gzugs kyi mtshan/ /stong pa nyid ni sus shes pa/ /gzugs kyi rang bzhin gzhan yin la/ /stong nyid gzhan du ma gsungs te/ /gang gis gzugs rnams rab shes pa/ /des ni stong nyid rab tu shes/ /gzugs kyi mtshan nyid 'di 'dra bar/ /stong pa gang gis rab shes pa/ /des ni bdud rnams bye ba snyed/ /zil gyis mnan te pham byed nus/ /gang gis gzugs rnams rab shes pa/ /des ni stong pa nyid kyang shes/ /gang gis stong nyid rab shes pa/ /des ni mya ngan 'das pa shes/ /rnam pa 'di ni mi shes pas/ /dmigs pa can rnams rab tu brlag /dngos po med la dngos 'dzin cing / /dngos med la yang dngos su 'dzin/ /shes kyi 50.90b khe yis bslus pa dag /nga yi bstan las shin du 'khyams/ /'bras bur 'du shes gnas pa la/ /dge sbyong nor ni gsog tu gyur/ /brtson 'grus nyams pa le lo can/ /tshul khrims phung por mi gnas pa/ /kun nas langs pas smra ba ni/ /'di ni sangs rgyas bshad ma yin/ /la la dag ni 'di skad du/ /bdag cag byang chub zhugs shes zer/ /ma dul zhing ni ma byang ba/ /gcig la gcig kyang ri mo med/ /chos dag la yang mi gnas shing / /sgra 'dod pa dag 'byung bar 'gyur/ /de lta bu ni de mos te/ /shes kyi khe ni tshol ba'i phyir/ /'dus pa dag la sems byed cing / /rnyed pa 'dod pa 'byung bar 'gyur/ /rgyags dang bag med zil non pas/ /rnyed dang bkur sti don du gnyer/ /bkur sti rnyed la brten nas ni/ /shes kyi khe rnams tshol ba dag /gtsug lag khang dang mchod rten byed/ /khyim mi mo la chags shing myos/ /dmigs pa dag la rten byed cing / /'dod pa'i srid la shin du gnas/ /bdud kyi yul du gnas nas ni/ /khyim pa dag gi las byed 'gyur/ /'dod pa me lce 'dra ba ni/ /khyim pa dag la ston par 'gyur/ /de dag gi yang khyim zhugs nas/ /de yi rigs kyang sun byed 'gyur/ /de dag la ni khyim pa rnams/ /ston pa nyid du 'du shes 'gyur/ /rab tu gnas bcas de dag gi/ /bu dang chung ma sun par byed/ /su dag de la zas skom gyis/ /phan 'dogs pa ni byed par 'gyur/ /de yi bu mo bud med la/ /chung ma nyid du 'du shes 'gyur/ /de dag 'dir ni rab byung nas/ /ji ltar gzhan gyi bud med chags/ /khyim pa bdag gi chung ma la/ /de ltar mos shing chags mi 'gyur/ /khyim pa skya bo'i gos gyon la/ /ngas ni bslab pa gang bshad pa/ /de tshe dge slong de dag la/ /bslab pa de yang med par 'gyur/ /de dag rnga dung rdza rnga yis/ /nga la mchod pa byed 'gyur te/ /mchod pa'i dam pa gang yin pa/ /nan tan 'di ni med par 'gyur/ /de dag bdag nyid tshul khrims 'chal/ /tshul khrims gnas pa mthong nas ni/ /phan tshun du yang 'di skad du/ / 50.91a 'di dag nged dang 'dra zhes smra/ /sdig pa'i spyod yul tshul khrims 'chal/ /de dag tshul khrims bsngags thos nas/ /kun nas langs pa 'di skad du/ /sangs rgyas mkhyen pa 'di min smra/ /de dag la ni ngo tsha med/ /dge sbyong gi ni nor stor te/ /mi bden tshig gis rtsod byed cing / /sangs rgyas byang chub rab tu spong / /ngan sems ldan pa de dag ni/ /sangs rgyas bstan pa 'di bor te/ /chos rnams rab tu spangs nas ni/ /mnar med par yang gnas par 'gyur/ /gang dag spyod pa de 'dra ba/ /ngas ni ma thos ma thong ste/ /byis pa'i chos la gnas pa rnams/ /sangs rgyas ye shes thob mi 'gyur/ /de dag gi yang tshul 'chos dang / /de la g.yo yang ci yod pa/ /thams cad de bzhin ngas shes te/ /de la nga yi ye shes 'jug /de yi 'khrul pa mang po ni/ /gal te bskal par rab bshad kyang / /byang chub sems dpar khas 'che yi/ /cung zad tsam zhig brjod par 'gyur/ /gzhon nur gyur pa de dag ni/ /sdig pa mi byed yong med de/ /phyi ma'i dus la de dag dang / /khyod ni ston par ma byed cig /smra ba dang ni gtam gyis la/ /de dag la ni ri mor gyis/ /byang chub dam pa'i don gyi phyir/ /zhum pa med par bkur sti gyis/ /lo grangs du lon kun dris la/ /de dag rgan par gyur na yang / /de la ri mo legs gyis la/ /rkang pa la yang mgos phyag 'tshol/ /byang chub snying po rnam mthong na/ /de dag 'khrul pa mi blta'o/ /de la khong khro mi bskyed cing / /rtag tu byams pa'i sems su bya/ /gang gi 'khrul pa ci mthong yang / /de dag gi ni nyes mi brjod/ /ci 'dra ba yi las byas pa/ /'bras bu de 'dra thob par 'gyur/ /bzhin gyi zla ba 'dzum bzhin du/ /rgan rabs dang ni gsar bu la/ /rtag tu gsong por smra ba dang / /des shing nga rgyal bcom par bya/ /chos gos dang ni bsod snyoms kyis/ /de dag la ni phan gdags shing / /'di 50.91b dag thams cad 'dren 'gyur zhes/ /de ltar khyod kyi sems zhog shig /gal te chos kyi sbyin pa'i phyir/ /de dag khyod la gsol 'debs na/ /dang por tshig ni 'di skad smros/ /kho bos mtshungs med ma bslabs so/ /'di skad du ni tshig brjod de/ /tshe dang ldan pa mkhas shing rig /bdag nyid chen po'i mdun du ni/ /bdag gis ga la bshad nus smros/ /gya tshom du ni ma smra bar/ /de dag gi ni snod rtogs la/ /snod du rung bar rig na ni/ /ma gsol bar yang bshad par gyis/ /tshul khrims 'chal pa 'khor nang na/ /mang du gnas par mthong na khyod/ /yo byad bsnyungs pa ma 'chad par/ /sbyin pa yi ni bsngags pa brjod/ /tshul khrims gtsang la rab gnas shing / /ji ste 'dod pa nyung yod na/ /byams pa'i sems ni bskyed nas su/ /yo byad bsnyungs pa'i gtam gyis shig /gal te sdig pa 'dod nyung zhing / /tshul khrims ldan pa mang yod na/ /de tshe phyogs rnyed gyur pa'i phyir/ /tshul khrims kyi yang bsngags pa brjod/ /thog mar 'khor rnams shes bya ste/ /gal te gtsang yod de yi tshe/ /dge ba'i chos rnams ji snyed pa/ /thams cad der ni rab tu bstan/ /sbyin dang tshul khrims bzod pa dang / /brtson 'grus bsam gtan thos pa dang / /de bzhin 'dod nyung yo byad bsnyungs/ /rtag tu bsngags shing brjod par bya/ /dgon gnas bsam gtan bsten pa dang / /'du 'dzir gnas pa spangs pa ni/ /de dag gzungs kyi sgo yin te/ /'di yi bsngags pa brjod par bya/ /dgon par gnas pa mi spong zhing / /tshul khrims la yang lhur mi gzung / /nang du 'jog la bsten bya zhing / /sbyin pa la ni lhur mi bya/ /tshul khrims phung por gnas nas ni/ /mang du thos pa bsgrub par bya/ /ting 'dzin 'di ni yongs btsal zhing / /ston pa'i ring bsrel mchod par bya/ /ting 'dzin zhi ba btsal ba'i phyir/ /gdugs dang rgyal mtshan ba dan dang / /spos dang phring ba byug pa yis/ /sangs rgyas la ni mchod pa bya/ /dga' bar 'gyur ba'i sil snyan dang / /glu dbyangs sbyar cing blangs nas su/ /zhum pa med cing mi g.yel bar/ /sangs rgyas kyi 50.92a ni ring bsrel mchod/ /byang chub mchog gi don gyi phyir/ /spos dang phreng ba bdug pa dang / /gos dang phye ma ji snyed pa/ /de dag kun gyis mgon mchod gyis/ /ting 'dzin zhi ba 'di tshol phyir/ /mchod pa ji snyed ci yod pa/ /dpag med bsam gyis mi khyab pas/ /sangs rgyas kun la mchod par gyis/ /bla med sangs rgyas ye shes te/ /chags med ye shes rab tshol bas/ /sems can kun la skal ba'i shas/ /mi gnas par ni mnyam par sbyin/ /mi gnas par ni gyur nas su/ /ting 'dzin zhi ba tshol ba'i phyir/ /sangs rgyas rnams la ngas kyang sngon/ /mchod pa bsam gyis mi khyab byas/ /sangs rgyas skye ba rnyed par dka'/ /mir skye ba yang rnyed par dka'/ /bstan pa la yang dad pa dang / /rab byung bsnyen rdzogs rnyed par dka'/ /gang gis byang chub sems bsngos pa/ /de dag ston pa mnyes par byas/ /dam bcas pa las ma g.yo bar/ /khyod ni nan tan gnas par gyis/ /zad pa'i dus su nyer gnas tshe/ /gang gis mdo sde 'di bzung ste/ /rab tu brjod pa gzung byas na/ /myur du spobs pa thob par 'gyur/ /tshigs bcad gcig tsam bzung ba yang / /bsod nams phung po bsam yas na/ /nyan par 'dod pas mdo sde yang / /thams cad gzung ba ci zhig smos/ /sems can thams cad byang chub thob/ /de dag mi g.yel mchod byas te/ /bskal pa sems can snyed du yang / /rtag tu gus par mchod pa bas/ /ting 'dzin dam pa 'di las ni/ /gang gis tshigs bcad gcig bzung ba/ /bsod nams snga ma thams cad ni/ /bcu drug char yang mi phod do/ /ting 'dzin 'di ni thos nas su/ /su dag nem nur mi byed pa/ /phan yon bsam gyis mi khyab ste/ /sangs rgyas kyi ni mkhyen pas rig /so so yang dag par rig pa la 'jug pa'i le'u ste nyi shu lnga pa'o// //de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po ting nge 'dzin 'di 'dod pa dang / myur du bla na med pa yang dag par rdzogs pa'i byang chub 50.92b mngon par rdzogs par 'tshang rgya bar 'dod pas thabs mkhas par bya'o/ /gzhon nu ji ltar na byang chub sems dpa' sems dpa' chen po thabs mkhas pa yin zhe na/ gzhon nu 'di la byang chub sems dpa' sems dpa' chen pos sems can thams cad la nye du'i sems nye bar bzhag ste/ sems can thams cad kyi dge ba'i rtsa ba dang / bsod nams kyi phung po ci yod pa de la byang chub sems dpa' sems dpa' chen po des rjes su yi rang bar byas te/ nyin lan gsum mtshan lan gsum sems can thams cad kyi dge ba'i rtsa ba dang / bsod nams kyi phung po la rjes su yi rang nas/ thams cad mkhyen pa nyid la dmigs pa'i sems bskyed pas dge ba'i rtsa ba dang / bsod nams kyi phung po de sems can thams cad la btang bar bya'o/ /gzhon nu byang chub sems dpa' sems dpa' chen po de thabs mkhas pa las byung ba'i bsod nams kyi phung po dang ldan pas myur du ting nge 'dzin 'di 'thob cing / myur du bla na med pa yang dag par rdzogs pa'i byang chub mngon par rdzogs par 'tshang rgya'o/ /de nas bcom ldan 'das kyis de'i tshe tshigs su bcad pa 'di dag gsungs so/ /sems can 'di dag thams cad bdag gi gnyen/ /'di yi bsod nams mang po ci yod pa/ /nyin yang lan gsum mtshan yang lan gsum du/ /byang chub sems bskyed rjes su yi rang ngo / /su dag srog gi phyir yang sdig mi byed/ /tshul khrims rnam par dag la yi rang ngo / /byang chub sems dpa' mos pa phun sum tshogs/ /de dag bsod nams ci yod yi rang ngo / /gang dag sangs rgyas dad cing de bzhin du/ /chos dang dge 'dun dad la yi rang ngo / /byang chub nyid ni rab tu 'dod pa'i phyir/ /bde gshegs mchod pa byed la yi rang ngo / /rdzogs pa'i byang chub gdung ni gnas bya'i phyir/ /sems can don du blo gros chen po yis/ /bla med byang chub dam pa mchog tu ni/ /gang gis sems bskyed de la yi rang ngo / /byang chub 50.93a sems dpa' snying rjes non pa yis/ /nor dang 'bru dang rin chen btsun mo dang / /sras dang sras mo rgyal srid rgyas pa dang / /bdag gi sha yang gtong la yi rang ngo / /shes rab yongs su bsgoms pas lus dul zhing / /thabs la mkhas pa'i bslab pa rab bslabs pas/ /sems can don du rab tu dga' sems kyis/ /bdag gi lus kyang gtong la yi rang ngo / /gcig pu gnyis su med par nags gnas shing / /rtag tu bse ru ltar gyur 'tsho ba gtsang / /khor mor bya ba nyung zhing su dag ni/ /khe phyir tshul 'chos med la yi rang ngo / /su dag sten par mi byed phrag dog med/ /khyim la srid par mi byed rtag par yang / /khams gsum dag la rab tu 'jigs skrag ste/ /'jig rten ma chags spyod la yi rang ngo / /srid par skye ba kun la rab skyo zhing / /su dag spros pa med la yi rang ngo / /rtsod pa med cing nye bar zhi ba'i sems/ /de la ting 'dzin 'di ni rnyed mi dka'/ /gang gis 'du 'dzi nyes pa mthong nas ni/ /rtsod pa thams cad yongs spangs dgon par gnas/ /shing drung gnas shing rnam grol lhur byed pa/ /bde gshegs sras la rjes su yi rang ngo / /bdag la mi stod gzhan la mi smod cing / /dgon par gnas pa dag la yid rang ngo / /su dag bstan pa 'di la bag yod cing / /bag med spangs pa de la yi rang ngo / /byang chub phyogs kyi chos rnams ji snyed pa/ /kun gyi rtsa ba bag yod 'di yin te/ /sangs rgyas sras gang rtag tu bag yod pa/ /de dag ting 'dzin 'di ni rnyed mi dka'/ /bde bar gshegs pa'i bstan pa gter rnyed yin/ /rab tu byung ba gter ni gnyis pa ste/ /dad pa rnyed pa gter ni gsum pa yin/ /ting 'dzin 'di ni gter rnyed bzhi pa'o/ /sangs rgyas spyod yul stong pa 'di thos nas/ /'di la mi spong ba yang gter rnyed yin/ /spobs pa mtha' yas pa yang gter rnyed pa/ /gzungs rnams gang yin de dag gter gyi mchog /dge ba'i chos rnams ji snyed rjod pa dag /tshul 50.93b khrims thos gtong bzod pa de bzhin te/ /thams cad kyi yang rtsa ba bag yod 'di/ /gter rnyed yin par bde bar gshegs pas gsungs/ /sangs rgyas bstan pa 'di la bag yod cing / /su dag la ni yang dag smon lam yod/ /de dag ting 'dzin 'di ni rnyed mi dka'/ /sangs rgyas bstan pa 'di la nye bar gyur/ /rjes su yi rang ba'i le'u ste nyi shu drug pa'o// // de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na bag yod par bya'o zhes gzhon nu khyod kyis de ltar bslab par bya'o/ /de ci'i phyir zhe na/ gzhon nu bag yod pa'i byang chub sems dpa' sems dpa' chen po la bla na med pa yang dag par rdzogs pa'i byang chub kyang rnyed par mi dka' na ting nge 'dzin 'di lta ci smos/ gzhon nu ji ltar na byang chub sems dpa' sems dpa' chen po bag yod pa yin zhe na/ gzhon nu 'di la byang chub sems dpa' sems dpa' chen po tshul khrims yongs su dag pa yin no/ /gzhon nu ji ltar na byang chub sems dpa' sems dpa' chen po tshul khrims yongs su dag pa yin zhe na/ gzhon nu 'di la byang chub sems dpa' sems dpa' chen po tshul khrims yongs su dag pa ni thams cad mkhyen pa'i sems dang ma bral bas pha rol tu phyin pa drug la spyod pa yin te/ de'i phan yon 'di dag nyon cig dang ngas khyod la bshad do/ /gzhon nu byang chub sems dpa' sems dpa' chen po sbyin pa la mos pa'i phan yon ni bcu ste/ bcu gang zhe na/ 'di lta ste/ de'i ser sna'i nyon mongs pa tshar bcad pa yin/ de'i sems rtag tu gtong ba'i rjes su spel ba yin/ skye bo mang po dang thun mong pa'i longs spyod las snying po len pa yin/ longs spyod chen po'i rigs su skye zhing skyes ma thag tu de gtong ba'i sems mngon du 'gyur ba yin/ 'khor bzhi rnams la phangs shing sdug pa yin/ 'jigs pa med cing zhum pa med par 'khor gyi nang du 'gro/ phyogs dang 50.94a phyogs mtshams su de'i rgya cher brjod pa'i sgra tshigs su bcad pa mngon par 'byung / rkang lag 'jam zhing gzhon pa yin/ rkang mthil mnyam zhing rab tu gnas pa yin/ byang chub kyi snying po la 'dug gi bar du dge ba'i bshes gnyen dang mi 'bral ba yin te/ gzhon nu byang chub sems dpa' sems dpa' chen po sbyin pa la mos pa'i legs pa ni 'di bcu'o/ /de la 'di skad ces bya ste/ des ni ser sna tshar bcad cing / /gtong ba'i sems kyang rnam par spel/ /snying po dag ni blangs par 'gyur/ /shin du 'byor pa'i rigs su skye/ /skyes ma thag tu de yi sems/ /gtong ba dag la shin du 'jug / /rab tu byung dang khyim pa yi/ /sems can rnams la phangs par 'gyur/ /'jigs pa med cing 'khor du yang / /ma zhum par ni nye bar 'gro/ /grong dang grong khyer rnams su yang / /de yi sgra ni rgya cher 'gyur/ /rkang lag dag ni 'jam pa yang / /rnyed dka' bar ni yong mi 'gyur/ /sangs rgyas dang ni nyan thos dang / /dge ba'i bshes gnyen thob par 'gyur/ /ser sna'i sems ni nam yang mi 'byung ste/ /de yi sems ni rtag tu gtong la dga'/ /sems can bye ba mang la phangs par 'gyur/ /ser sna med pa'i phan yon 'di dag yin/ /de ni nor mang rigs su skye bar 'gyur/ /skyes nas de yi yid ni gtong la dga'/ /snying po blangs nas 'chi ba'i dus byed 'gyur/ /ser sna med pa'i phan yon 'di dag yin/ /'jigs pa med par 'khor gyi nang du 'gro/ /phyogs su rgya cher de yi sgra yang grags/ /de yi rkang lag rtag tu 'jam par 'gyur/ /ser sna med pa'i phan yon 'di dag yin/ /dge ba'i bshes gnyen rnyed par mi dka' ste/ /des ni sangs rgyas rnams dang nyan thos mthong / /mthong nas de dag dad pas mchod pa byed/ /ser sna med pa'i phan yon 'di dag yin/ /sbyin pa'i phan yon gyi le'u ste nyi shu bdun pa'o// // gzhon nu byang chub sems dpa' sems dpa' chen po tshul khrims yongs su dag pa'i phan yon 'di bcu ste/ bcu gang zhe na/ 50.94b 'di lta ste/ ye shes kyis rjes su bskor cing yongs su rdzogs par byed pa dang / sangs rgyas rnams kyi rjes su slob pa dang / mkhas pa rnams kyis ma smad pa dang dam bcas pa las mi g.yo ba dang / nan tan la gnas pa dang 'khor ba las 'byol pa dang mya ngan las 'das pa thob par byed pa dang kun nas ldang ba med par gnas pa dang ting nge 'dzin rab tu 'thob pa dang / mi dbul bar 'gyur te/ gzhon nu bcu po 'di dag ni byang chub sems dpa' sems dpa' chen po tshul khrims yongs su dag pa'i phan yon no/ /de la 'di skad ces bya ste/ ye shes yongs su rdzogs byed cing / /sangs rgyas dag gi rjes su slob/ /mkhas pa dag gis ma smad pa/ /rtag tu 'jigs pa med par 'gyur/ /dam bcas pa las mi g.yo zhing / /nan tan la yang rab tu gnas/ /mya ngan 'das pa thob byed cing / /'khor ba las kyang shin du 'byol/ /kun nas ldang ba med gnas shing / /ting nge 'dzin rnams myur du 'thob/ /dbul por yang ni mi 'gyur te/ /tshul khrims phung por rab tu gnas/ /de yi ye shes yongs su rdzogs par 'gyur/ /de bzhin gshegs pa rnams kyis rjes su slob/ /de ltar de yi tshul khrims yongs dag cing / /de la mkhas pa dag ni smod mi byed/ /dam bcas pa las mkhas pa mi g.yo zhing / /de ltar dpa' bo nan tan gnas par byed/ /'khor ba'i nyes pa mang po mthong nas ni/ /'byol zhing mya ngan 'da' bar de yis 'gro/ /de ltar tshul khrims stobs la gnas pas na/ /de yi sems ni kun nas ldang mi 'gyur/ /nyon mongs med pa'i ting 'dzin myur du 'thob/ /tshul khrims dag pa'i phan yon 'di dag yin/ /tshul khrims nges par bstan pa'i le'u ste nyi shu brgyad pa'o// // gzhon nu byang chub sems dpa' sems dpa' chen po bzod pa la gnas shing byams pa la spyod pa'i phan yon ni 'di bcu ste/ 50.95a bcu gang zhe na/ 'di lta ste/ mes mi tshig /mtshon gyis mi sod/ dug gis mi tshugs/ chus mi 'chi/ lha rnams de la srung bar byed/ lus mtshan gyis brgyan pa thob par 'gyur/ de'i ngan 'gro'i sgo thams cad bcad par 'gyur/ de tshangs pa'i 'jig rten du skye ba rnyed pa mi dka' bar 'gyur/ de bde bar nyin mtshan 'da' bar 'gyur/ de'i lus la dga' ba dang bde ba mi 'dor bar 'gyur te/ gzhon nu byang chub sems dpa' sems dpa' chen po bzod pa la gnas pa/ byams pa la spyod pa'i phan yon ni 'di bcu'o/ /de la 'di skad ces bya ste/ de ni mes kyang mi tshig ste/ /mtshon gyis kyang ni sod mi 'gyur/ /lus la dug gis mi tshugs te/ /chus kyang 'chi bar mi 'gyur ro/ /de la lha rnams srung byed de/ /sum bcu rtsa gnyis mtshan kyang 'byung / /de yi ngan 'gro kun bkag ste/ /bzod la gnas pa'i phan yon 'di/ /tshangs pa dang ni brgya byin yang / /de la rnyed par dka' mi 'gyur/ /rtag tu bde bar gnas byed cing / /dga' ba dag kyang bsam yas 'gyur/ /de ni me dang mtshon gyis yong mi sod/ /bye brag tu ni chu nang mi 'chi ste/ /lha dang de bzhin klu dang gnod sbyin srung / /byams la gnas pa'i phan yon 'di dag go/ /de yi lus la sum bcu gnyis mtshan 'byung / /de ni phyir yang log ltung 'gro mi 'gyur/ /shi 'phos nas ni tshangs pa'i gnas su skye/ /bzod la gnas pa'i phan yon 'di dag go/ /de ni nyin mtshan dag kyang bde bar 'da'/ /lus ni dga' bas rtag tu khyab par 'gyur/ /bzod cing des pa'i stobs la de gnas pas/ /mkhas pa rtag tu dang ba'i sems su 'gyur/ /gzhon nu byang chub sems dpa' sems dpa' chen po brtson 'grus brtsams pa'i phan yon ni 'di bcu ste/ bcu gang zhe na/ 'di lta ste/ bsnyen dka' bar 'gyur ba dang / sangs rgyas kyis yongs su bzung ba 'thob pa dang lhas yongs su bzung bar 'gyur ba dang / des thos pa'i chos yongs su mi nyams pa dang sngon ma thos pa'i chos rnams 'thob pa dang / ting nge 'dzin gyi rigs 'thob pa dang nad nyung 50.95b bar 'gyur ba dang de'i zas rnams kyang yang dag par bde bar 'ju bar 'gyur ba dang / pad ma lta bur 'gyur zhing mda' ste'u kham ltar mi 'gyur ba ste/ gzhon nu bcu po 'di dag ni byang chub sems dpa' sems dpa' chen po brtson 'grus brtsams pa'i phan yon no/ /de la 'di skad ces bya ste/ bsnyen dka' bar yang rtag tu 'gyur/ /de la le lo yod min te/ /lha rnams kyang ni srung bar byed/ /sangs rgyas dag ni myur du mthong / /smon lam yongs su rdzogs byed de/ /ting 'dzin rigs ni rnyed par 'gyur/ /de la nad kyang mi 'byung ste/ /brtson 'grus ldan pa'i yon tan 'di/ /de yi zas dang skom dag kyang / /bde bar 'ju ste rmya ba med/ /chu yi nang na ut+pal dag /rim gyis skye bar 'gyur ba ltar/ /de bzhin byang chub sems dpa' yang / /dkar po'i chos kyis rnam par 'phel/ /de yi nyin dang mtshan mo yang / /'bras bu yod par 'da' bar 'gyur/ /brtson 'grus brtsam pa de bzhin gshegs/ /bskal pa du mar bsgrubs pa yis/ /byang chub sems dpa' brtson 'grus ldan/ /de yi phan yon 'di dag bshad/ /des pa brtson 'grus brtsams 'gyur te/ /rgyal ba dag gis yongs su bzung / /lha yang de la smon pa skyed/ /sangs rgyas byang chub myur 'tshang rgya/ /de yi thos pa yang mi 'bri/ /chos gzhan mang po smra bar byed/ /de yi spobs pa rgya cher 'phel/ /brtson 'grus brtsams pa'i phan yon 'di/ /ting 'dzin rigs kyang myur du 'thob/ /de la nam yang nad mi 'byung / /des ni kha zas ci zos pa/ /bde bar yongs su 'ju bar 'gyur/ /mi g.yel brtson 'grus brtsams pa yi/ /dkar po'i phyogs ni nyin mtshan 'phel/ /de ltar brtson 'grus stobs ldan pas/ /ring por mi thogs byang chub 'gyur/ /gzhon nu byang chub sems dpa' sems dpa' chen po bsam gtan la mos pa'i phan yon ni 'di bcu ste/ bcu gang zhe na/ 'di lta ste/ spyod pa la gnas pa dang spyod yul la spyod pa dang yongs su gdung 50.96a ba med par gnas pa dang dbang po sbas par 'gyur ba dang / dga' ba myong ba dang 'dod pa las dben pa dang bsam gtan gsog gis tshim pa med pa ma yin pa dang bdud kyi yul las thar ba dang sangs rgyas kyi yul la rab tu gnas pa dang / rnam par grol ba rab tu smin par byed pa ste/ gzhon nu bcu po 'di dag ni byang chub sems dpa' sems dpa' chen po bsam gtan la mos pa'i phan yon no/ /de la 'di skad ces bya ste/ spyod pa dag la de gnas pas/ /de ni spyod pa med mi 'gyur/ /rnal 'byor pa ni spyod yul spyod/ /spyod yul ma yin rnam par spong / /gdung ba med par de gnas te/ /dbang po bsdams shing sbas pa yin/ /de ni dga' ba myong byed de/ /bsam gtan sgom pa'i spyod yul lo/ /'dod pa'i sred la 'dod chags bral/ /bsam gtan bde la sten byed de/ /bdud kyi yul las de thar cing / /sangs rgyas yul la de gnas so/ /rnal 'byor bye brag 'di yin te/ /gcig pu nags khrod mos byed cing / /rnam par grol ba yongs su skong / /de ni bcu pa'i gnas yin no/ /byang chub sems dpa' de ni spyod la gnas/ /spyod pa ma yin thams cad rnam par spang / /spyod yul ma yin spangs nas spyod yul gnas/ /ting 'dzin brtson pa'i phan yon 'di dag go/ /de la gdung ba nam yang gdung mi 'gyur/ /'phags pa'i bde bar gnas pa reg nas su/ /lus dang sems rnams kyang ni bde bar 'gyur/ /bsam gtan brtson pa'i phan yon 'di dag go/ /dgon pa'i gnas dag tu yang bsrungs shing gnas/ /de la g.yeng ba nam yang 'byung mi 'gyur/ /de ltar lus ni dben par gyur pas na/ /zang zing med pa'i dga' ba der 'thob bo/ /'dod pa dag gis mi gos nyon mongs med/ /de ltar bdud kyi yul las thar bas na/ /de bzhin gshegs pa'i yul la rab gnas te/ /de yi rnam grol yongs su smin par 'gyur/ /gzhon nu byang chub sems dpa' sems dpa' chen po shes rab spyod pa'i phan 50.96b yon ni 'di bcu ste/ bcu gang zhe na/ 'di lta ste/ bdog pa thams cad yongs su gtong la sbyin pas dag par rlom sems mi byed pa yin/ tshul khrims ma dral cing tshul khrims la mi gnas pa yin/ bzod pa'i stobs la gnas la sems can du 'du shes pa la mi gnas pa yin/ brtson 'grus brtsams la lus dang sems dben pa yin/ bsam gtan la bsam gtan du byed cing mi gnas pa'i bsam gtan pa yin/ bdud rnams kyis thub par dka' ba yin/ pha rol rgol ba thams cad kyis rab tu mi sgul ba yin/ 'du byed 'jug pa thams cad la snang ba thob pa yin/ sems can thams cad la snying rje chen po rgya cher 'jug ste/ nyan thos dang rang sangs rgyas kyi sa la re ba med pa yin/ sangs rgyas kyi bsam gtan dang ting nge 'dzin dang snyoms par 'jug pa la rab tu 'jug pa yin te/ gzhon nu bcu po 'di dag ni byang chub sems dpa' sems dpa' chen po shes rab spyod pa'i phan yon no/ /de la 'di skad ces bya ste/ dpa' bo bdog pa thams cad gtong / /des ni dag par rlom sems med/ /tshul khrims ma dral srung mod kyi/ /de la gnas par byed pa med/ /shes rab can de bzod sgom yang / /sems can 'du shes rnam par bzlog /brtson 'grus brtsams pa yin mod kyi/ /lus dang sems ni rnam par dben/ /bsam gtan la yang sgom mod kyi/ /gnas pa med cing rten pa med/ /bdud kyis thub par dka' bar 'gyur/ /shes rab ldan pa'i yon tan 'di/ /pha rol rgol ba thams cad kyis/ /de ni bskyod par mi nus 'gyur/ /'khor ba na yang snang ba 'thob/ /shes rab yon tan 'di 'dra'o/ /sems can dag ni thams cad la/ /de ni snying rje che bar 'gyur/ /nyan thos rang rgyal ye shes la/ /nam yang re ba skyed mi 'gyur/ /bdog pa thams cad gtong yang rlom sems med/ /tshul khrims ma dral tshul khrims mi gnas te/ /bzod 50.97a pa sgom yang sems can 'du shes med/ /shes rab mos pa'i phan yon 'di dag go/ /brtson 'grus brtsams kyang rnam par dben pa yin/ /mi gnas bsam gtan byed cing rten pa med/ /mkhas pa de ni bdud kyis thub par dka'/ /shes rab mos pa'i phan yon 'di dag go/ /pha rol rgol bas bskyod par mi 'gyur zhing / /des ni 'dus byas 'di yi gting rnyed pas/ /sems can dag la snying rje rgya cher skyed/ /shes rab mos pa'i phan yon 'di dag go/ /de ltar sangs rgyas yon tan de gnas pas/ /rang rgyal rnams dang nyan thos rnams la ni/ /de dag nam yang smon pa mi skyed de/ /shes rab mos pa'i phan yon 'di dag go/ /gzhon nu byang chub sems dpa' sems dpa' chen po mang du thos pa'i phan yon ni 'di bcu ste/ bcu gang zhe na/ 'di lta ste/ kun nas nyon mongs par mi byed pa dang gnod sems mi skyed pa dang the tshom rnam par 'byed pa dang lta ba drang por byed pa dang lam log pa spong ba dang lam la gnas pa dang mi 'chi ba'i sgor gnas pa dang byang chub tu bsnyen pa dang sems can thams cad la snang bar gyur pa dang ngan 'gro thams cad kyis mi 'jigs pa ste/ gzhon nu bcu po 'di dag ni byang chub sems dpa' sems dpa' chen po mang du thos pa'i phan yon no/ /de la 'di skad ces bya ste/ yang dag ji bzhin mkhyen pa yi/ /sangs rgyas de bzhin gshegs pa yis/ /mang du thos pa'i phan yon ni/ /bcu po 'di dag rab tu bshad/ /nyon mongs rnam par byang ba yi/ /phyogs gnyis po ni des shes te/ /kun nas nyon mongs yongs spangs nas/ /rnam par byang ba'i lam la ston/ /nem nur rnam 'byed ye shes ldan/ /lta ba drang por rab srong zhing / /log pa'i lam yang rnam spongs te/ /drang po'i lam la gnas par byed/ /mi 'chi sgo la de gnas shing / /byang chub tu yang nye bar 'gyur/ /sems can la yang snang 'gyur te/ /ngan song dag la 'jigs pa med/ / 50.97b kun nas nyon mongs chos mang rab shes shing / /rnam par byang ba'i phyogs kyang de bzhin shes/ /kun nas nyon mongs yongs su spangs nas ni/ /rnam par byang ba'i chos kyi mchog la slob/ /srog chags kun gyi nem nur rnam 'byed cing / /de yi lta ba rtag tu drang por 'gyur/ /de ni log pa'i lam yang rnam spangs te/ /zhi ba drang po'i lam la rtag tu gnas/ /mi 'chi lam la khor mor gnas 'gyur zhing / /dri med byang chub la yang nye bar 'gyur/ /srog chags mang po kun la'ang snang bar 'gyur/ /de ni ngan 'gro dag la'ang 'jigs pa med/ /gzhon nu byang chub sems dpa' sems dpa' chen po chos kyi sbyin pa lhur byed pa/ gzhan la chos kyi sbyin pa sbyin par byed pa'i phan yon ni 'di bcu ste/ bcu gang zhe na/ 'di lta ste/ bya ba ma yin pa rnam par spong ba dang / bya ba la 'jug pa dang skyes bu dam pa'i chos la gnas pa dang sangs rgyas kyi zhing yongs su sbyong ba dang byang chub kyi snying po thob par byed pa dang dngos po yongs su gtong ba dang nyon mongs pa tshar gcod pa dang sems can thams cad la skal ba'i shas sbyin pa dang de la dmigs pa'i byams pa sgom pa dang tshe 'di la bde ba 'thob pa ste/ gzhon nu bcu po 'di dag ni byang chub sems dpa' sems dpa' chen po sbyin pa lhur byed pa/ chos kyi sbyin pa sbyin par byed pa'i phan yon no/ /de la 'di skad ces bya ste/ su dag ser sna med par ni/ /chos kyi sbyin pa mchog sbyin byed/ /de yi legs pa rnam bcur ni/ /'jig rten mgon pos rab tu bshad/ /bya ba ma yin thams cad spong / /mkhas pa bya ba rnams la 'jug /skyes bu dam pa'i chos la dad/ /gtong ba'i sems la sten par byed/ /sangs rgyas zhing yang rnam sbyong ste/ /de yi zhing ni bsam mi khyab/ /byang chub snying por rtag tu 'dug /chos kyi sbyin pa'i 'bras bu 'di/ /dngos po thams cad gtong byed cing / /chos kyi rgyal po'i rjes su slob/ /nyon mongs pa yang tshar bcad pa/ /de la byang chub rnyed mi dka'/ /sems 50.98a can kun na skal ba'i shas/ /byams pa'i sems kyis rab tu sbyin/ /de ni phrag dog med 'gyur te/ /mi ma yin pa'i skyid pa 'thob/ /mkhas pas bya ba ma yin rnam spangs te/ /rtogs par bya ba dag la gnas par byed/ /mkhas pa su dag chos kyi sbyin pa gtong / /bdag nyid chen po'i chos la rtag tu gnas/ /de yi zhing yang rnam par dag par 'gyur/ /byang chub phyogs kyi chos rnams rnam par 'phel/ /byang chub snying por rtag tu nye bar 'gyur/ /chos rnams byin pa'i phan yon 'di dag go/ /nyon mongs med cing dngos po yongs su btang / /dngos po'i rang gi mtshan nyid rab tu shes/ /yongs su 'dzin pa kun las rnam par grol/ /de la chags pa nam yang yod mi 'gyur/ /mkhas pa'i sems ni shin du nyer gzhag pa/ /sems can thams cad bde bar gyur cig ces/ /de ni byams sems 'gyur zhing phrag dog med/ /tshe 'di dag la'ang bde ba mi nyung 'gyur/ /gzhon nu byang chub sems dpa' sems dpa' chen po stong pa nyid la gnas pa'i phan yon ni 'di bcu ste/ bcu gang zhe na/ 'di lta ste/ sas rgyas kyi spyod pa la gnas pa dang mi gnas par bsam gtan byed pa dang skye ba la mi smon pa dang tshul khrims la mchog tu mi 'dzin pa dang 'phags pa la mi skur ba dang mi 'gal bar gnas pa dang dngos po mi dmigs pa dang dben par gyur pa dang / sangs rgyas la skur pa mi 'debs pa dang dam pa'i chos 'dzin pa ste/ gzhon nu bcu po 'di dag ni byang chub sems dpa' sems dpa' chen po stong pa nyid la gnas pa'i phan yon no/ /de la 'di skad ces bya ste/ mi dbang gnas pa gang yin pa/ /sangs rgyas kun gyi spyod yul te/ /des ni rnal 'byor gnas par byed/ /de la srog rnams dmigs pa med/ /'jig rten kun la mi gnas shing / /'phags pa'i bsam gtan mi gtong ste/ /chos kyi rang bzhin mthong nas ni/ / 50.98b skye ba la yang smon mi byed/ /tshul khrims mchog tu mi 'dzin cing / /tshul khrims la yang gnas mi byed/ /zag pa med pa'i lam gzhan la/ /cung zad skur par de mi byed/ /'gal ba med par de gnas shing / /rtsod pa dag kyang yong med de/ /rnal 'byor dngos po mi dmigs shing / /rtag tu dben par gnas par byed/ /de ni srog gi don phyir yang / /sangs rgyas skur pa mi 'debs te/ /stong pa nyid la des gyur cing / /lus kyi mngon sum 'jigs pa med/ /'jig rten mgon po thams cad kyi/ /sangs rgyas byang chub bsam mi khyab/ /gus par byas nas chos 'dzin te/ /sangs rgyas chos la nem nur med/ /gang dag mu stegs mang po'i sa ma yin/ /skyes bu khyu mchog gi ni gnas pa de/ /gang la srog med gang zag sems can med/ /de la byang chub sems dpa' gnas par byed/ /de la gnas pa nam yang yod ma yin/ /mi gnas par ni bsam gtan bde ba sten/ /chos la sems can bdag med rnam rig pas/ /skye bar yang ni 'du shes yong mi 'byung / /chos rnams kyi ni rang bzhin rnam par rig /tshul khrims la yang cung zad gnas pa med/ /tshul khrims kyis ni dag par yongs mi sems/ /sangs rgyas dag la rtag tu dad par byed/ /thams cad rang bzhin stong par rnam bsgoms pas/ /de la 'gal ba nam yang 'byung mi 'gyur/ /de bzhin gshegs pa'i dam chos bzung nas ni/ /'dren pa dag la nam yang mi skur to/ /gzhon nu byang chub sems dpa' sems dpa' chen po nang du yang dag par 'jog la mngon par brtson pa'i phan yon ni 'di bcu ste/ bcu gang zhe na/ 'di lta ste/ sems rnyog pa med pa dang / bag yod par gnas pa dang / sangs rgyas rjes su dran pa dang / spyod pa la dad pa dang ye shes la nem nur med pa dang sangs rgyas la byas pa gzo ba dang chos mi spong ba dang shin du bsdams par gnas pa dang dul ba'i sa rjes su thob pa dang / so so yang 50.99a dag par rig pa bzhi mngon sum du byed pa ste/ gzhon nu bcu po 'di dag ni byang chub sems dpa' sems dpa' chen po nang du yang dag par 'jog la mngon par brtson pa'i phan yon no/ /de la 'di skad ces bya ste/ de yi sems ni rnyog pa med/ /bag med thams cad rnam spangs te/ /bag yod la yang gnas byed cing / /yang dag 'jog la spyod yul ba/ /'jig rten mgon gyi spyod thos nas/ /sangs rgyas la ni dad par byed/ /sangs rgyas ye shes bsam mi khyab/ /ye shes rnal 'byor the tshom med/ /sangs rgyas rnams la byas pa gzo/ /sangs rgyas chos la the tshom med/ /shin du bsdams shing gnas byed de/ /dul ba'i sa la rab tu gnas/ /yang dag rig pa des thob ste/ /rnyed dang bkur sti spangs nas su/ /gcig pu nags khrod mos par byed/ /yang dag 'jog la spyod yul ba/ /de yi sems ni rnyog pa med par 'gyur/ /bag med pa yang thams cad yongs spangs te/ /bdag nyid chen po rtag tu bag yod 'gyur/ /ting 'dzin brtson pa'i phan yon 'di dag go/ /rkang gnyis gtso bo sangs rgyas dran nas ni/ /de yi spyod pa bla na med la dad/ /de bzhin gshegs pa'i mkhyen la the tshom med/ /bsam gtan brtson pa'i phan yon 'di dag go/ /sangs rgyas dag la rtag tu byas pa gzo/ /de ni srog gi phyir yang chos mi spong / /thams cad dus su shin du bsdams par gnas/ /ting 'dzin brtson pa'i phan yon 'di dag go/ /shin du dul ba'i sa ni rjes thob cing / /yang dag rig pa myur du mngon sum byed/ /tshig gi rgyun mi 'chad cing spobs par ldan/ /mdo sde bye ba khrag khrig ston par byed/ /sangs rgyas byang chub myur du de 'dzin te/ /'dren pa dag gis bstan pa yongs su srung / /des ni pha rol rgol ba kun bcom ste/ /sangs rgyas kyi yang byang chub rgyas par byed/ /byang chub sems dpa' de ni shi 'phos nas/ /bde ba can gyi 'jig rten khams su 'gro/ /tshe dpag med las chos bzang mchog thos nas/ /skye ba med 50.99b pa'i chos la bzod pa 'thob// // 'phags pa ting nge 'dzin gyi rgyal po'i mdo/ bam po dgu pa/ gzhon nu byang chub sems dpa' sems dpa' chen po dgon par gnas pa lhur byed pa dag gi phan yon ni 'di bcu ste/ bcu gang zhe na/ 'di lta ste/ bya ba nyung bar gnas pa dang 'du 'dzi ring ba nas kyang ring du spong ba dang de la rtsod pa med par 'gyur ba dang / gnod pa med par gnas pa dang zag pa 'phel bar mi byed pa dang rtsod pa'i gzhir mi byed pa dang shin du zhi bar spyod pa dang shin du bsdams par gnas pa dang thar pa dang 'thun pa'i sems kyi rgyud du 'gyur ba dang / myur du rnam par grol ba mngon sum du byed pa ste/ gzhon nu bcu po 'di dag ni byang chub sems dpa' sems dpa' chen po dgon par gnas pa lhur byed pa'i phan yon no/ /de la 'di skad ces bya ste/ rtag tu bya ba nyung bar 'gyur/ /'du 'dzi dag kyang ring du spong / /nags khrod gcig pu gnas pa ni/ /rtsod pa dag kyang de la med/ /gnod pa med pa'i sems kyis ni/ /zag pa rnam par 'phel mi byed/ /de la rtsod gzhi mi 'byung ste/ /dgon par gnas pa'i yon tan 'di/ /lus dang ngag yid rab bsdams te/ /de ni nye bar zhi bar spyod/ /thar pa dang ni 'thun gyur cing / /rnam par grol ba myur du rig /rnal 'byor pa ni rtag tu bya ba nyung / /'du 'dzi mang po'i nyes pa kun spangs te/ /rnal 'byor pa dag nam yang rtsod mi byed/ /dgon par gnas pa'i phan yon 'di dag go/ /nam zhig de ni 'dus byas skyo gyur cing / /'jig rten du ni gang la'ang 'dod pa med/ /zag pa dag kyang 'phel bar mi byed pa/ /nags khrod gnas pa de'i phan yon yin/ /de la rtsod gzhi nam yang mi 'byung ste/ /rtag tu zhi la dga' zhing dben par spyod/ /lus dang ngag dang yid kyang bsdams pa ste/ /dgon par gnas pa de la yon tan mang / /de ni thar pa dang yang 'thun gyur te/ /nags khrod gnas shing rnam grol de sten pas/ /rnam grol zhi ba myur du des rtogs 'gyur/ /'di kun 50.100a dgon par gnas pa'i yon tan yin/ /gzhon nu byang chub sems dpa' sems dpa' chen po bsod snyoms spyod pa sbyangs pa'i yon tan yo byad bsnyungs pa la gnas pa'i phan yon ni 'di bcu ste/ bcu gang zhe na/ 'di lta ste/ de shes kyi khe 'dod pa ma yin pa dang / de rnyed pa dang bkur sti 'dod pa ma yin pa dang / de 'phags pa'i rigs bzhi la gnas pa dang / de tshul 'chos pa dang kha gsag med par 'gyur ba dang / de bdag la mi bstod gzhan la mi smod pa dang / de rjes su chags pa dang khong khro ba spangs pas gzhan gyi khyim du spyod pa dang / zang zing med par chos kyi sbyin pa sbyin par byed pa dang de sbyangs pa'i yon tan yo byad bsnyungs pa la gnas shing chos bstan pa gzung bar 'gyur ba yin te/ gzhon nu bcu po 'di dag ni byang chub sems dpa' sems dpa' chen po bsod snyoms spyod pa sbyangs pa'i yon tan yo byad bsnyungs pa la gnas pa'i phan yon no/ /de la 'di skad ces bya ste/ sbyangs pa dag la gang gnas pa/ /shes kyi khe yang mi 'dod cing / /snyan pa la yang mi smon te/ /rnyed dang ma rnyed mtshungs pa'i yid/ /sbyangs pa dag la gang gnas pa/ /'phags pa'i rigs ni mi gtong zhing / /tshul 'chos pa dang kha gsags rnams/ /thams cad ring du rnam par spong / /bdag nyid la ni mi stod cing / /gzhan dag la yang smod mi byed/ /khong khro rjes su chags med cing / /zang zing med par chos ston te/ /de yi tshig kyang gzung bar 'gyur/ /bsod snyoms yon tan 'di dag go/ /shes kyi khe dang snyan dang rnyed mi tshol/ /'phags pa'i rigs bzhi la ni gnas 'gyur te/ /mkhas pa tshul 'chos kha gsag med pa yin/ /sbyangs la brtson pa'i yon tan 'di 'dra'o/ /bdag la mi stod gzhan la mi smod cing / /rtsub por smras kyang 'khrug par yong mi 'gyur/ /bsngags pa thos kyang dga' ba mi skyed de/ /de ni bsod snyoms dag gis mgu bar 'gyur/ /chos kyi sbyin pa zang zing med par sbyin/ /de ni rnyed dang bkur sti mi tshol te/ /de yis bshad pa dag kyang gzung bar 'gyur/ /sbyangs par brtson pa'i phan yon 'di dag yin/ /gzhon nu 50.100b de lta bu'i chos kyi yon tan la gnas pa'i byang chub sems dpa' sems dpa' chen po dgon pa la gnas pa ni sangs rgyas kyi gter rnyed par 'gyur/ chos kyi gter rnyed par 'gyur/ ye shes kyi gter rnyed par 'gyur/ sngon gyi mtha' dang phyi ma'i mtha' dang da ltar byung ba shes pa'i gter rnyed par 'gyur ro/ /gzhon nu ji ltar na byang chub sems dpa' sems dpa' chen po sangs rgyas kyi gter rnyed par 'gyur zhe na/ gzhon nu 'di la byang chub sems dpa' sems dpa' chen po dben pa na spyod cing dgon par gnas nas mngon par shes pa lnga 'thob ste/ lnga gang zhe na/ 'di lta ste/ lha'i mig dang lha'i rna ba dang pha rol gyi sems shes pa dang sngon gyi gnas rjes su dran pa dang rdzu 'phrul gyi yul te/ gzhon nu mngon par shes pa 'di lnga thob par 'gyur ro/ /de mi'i las 'das pa'i lha'i mig gis shar phyogs kyi sangs rgyas bcom ldan 'das grangs med dpag tu med pa rnams mthong ngo / /de bzhin du lho dang nub dang byang phyogs kyi sangs rgyas bcom ldan 'das grangs med dpag tu med pa rnams mthong ste/ de sangs rgyas mthong ba dang mi 'bral bar 'gyur ro/ /gzhon nu de ltar na byang chub sems dpa' sems dpa' chen po sangs rgyas kyi gter rnyed pa yin no/ /gzhon nu ji ltar na byang chub sems dpa' sems dpa' chen po chos kyi gter rnyed pa yin zhe na/ sangs rgyas bcom ldan 'das de dag phyogs bcu na chos ci ston pa de yang byang chub sems dpa' sems dpa' chen pos lha'i rna ba'i khams kyis thos te/ de chos nyan pa dang mi 'bral bar 'gyur ro/ /gzhon nu de ltar na byang chub sems dpa' sems dpa' chen po chos kyi gter rnyed pa yin no/ /gzhon nu ji ltar na byang chub sems dpa' sems dpa' chen po ye shes kyi gter rnyed pa yin zhe na/ gzhon nu byang chub sems dpa' sems dpa' chen po ye shes de dang ldan pas chos thams cad 'dzin te/ kun bzung nas mi brjed cing sems 50.101a can rnams la chos ston te/ gang gi don gang yin pa de yang rab tu shes so/ /gzhon nu de ltar na byang chub sems dpa' sems dpa' chen po ye shes kyi gter rnyed pa yin no/ /gzhon nu ji ltar na byang chub sems dpa' sems dpa' chen po sngon gyi mtha' dang phyi ma'i mtha' dang / da ltar byung ba shes pa'i gter rnyed pa yin zhe na/ de mngon par shes pas 'das pa dang ma 'ongs pa dang da ltar byung ba'i sems can thams cad kyi sems dang / spyod pa shes pa la 'jug ste/ gzhon nu de ltar na byang chub sems dpa' sems dpa' chen po sngon gyi mtha' dang / phyi ma'i mtha' dang da ltar byung ba shes pa'i gter rnyed pa yin no/ /gzhon nu mdor na byang chub sems dpa' sems dpa' chen po de lta bu'i chos la gnas pa ni sangs rgyas kyi chos thams cad thob par 'gyur te/ de nyan thos dang rang sangs rgyas thams cad kyi sa yang ma yin na pha rol rgol ba thams cad lta ci smos/ de la 'di skad ces bya ste/ mkhas pa rtag tu dgon gnas te/ /sangs rgyas gter dang chos kyi gter/ /ye shes gter dang sngon mtha'i gter/ /mngon shes lnga yang myur du 'thob/ /phan yon bcu'i le'u ste nyi shu dgu pa'o// // de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na lha'i 'khor los sgyur ba'i rgyal srid kyi bde ba yang spangs te rab tu byung ngo zhes gzhon nu khyod kyis de ltar bslab par bya'o/ /gzhon nu rab tu byung nas kyang sbyangs pa'i yon tan yo byad bsnyungs pa la gnas shing dben par gnas pa dang / bzod pa dang des pa phun sum tshogs par bya'o/ /gzhon nu mgo dang gos la me 'bar ba bzhin du brtson 'grus brtsams te chos thams cad kyi rang bzhin mnyam pa nyid rnam par spros pa'i ting nge 'dzin 'di mnyan par bya/ gzung bar bya/ kun chub par bya bcang bar bya/ klag par bya/ rab tu gdon par bya/ lung mnod cing kha ton du bya/ nyon mongs pa med pa'i bsgom pas bsgom par bya/ 50.101b mang du bya/ gzhan la yang rgya cher yang dag par rab tu bstan par bya'o/ /gzhon nu bse ru lta bur gyur pas gnyis su med par dgon pa dang nags mdab tu rtag tu gnas par bya'o/ /gzhon nu bdag nyid yongs su gtong bas kyang sems can de dag gi don bya'o/ /de nas bcom ldan 'das kyis de'i tshe don de nyid brjod pa'i phyir/ zla 'od gzhon nur gyur pa la sngon byung ba'i le'u 'di tshigs su bcad pa'i dbyangs kyis yang dag par rab tu bstan to/ /'das pa'i bskal pa brgya mang rab dran te/ /grags pa mtha' yas 'dren pa gang byung ba/ /lha mi klu yi tshogs kyis mchod pa ste/ /mtshan ni gzi brjid tshogs rgyal rgyal ba yin/ /dge slong bye ba phrag bcu drug mngon shes/ /yang dag rig dang dbang gi pha rol phyin/ /sbyangs tshul yo byad bsnyungs pa zhi ba'i yid/ /de yi dus na de yi tshogs rnams byung / /grong khyer bye ba brgya phrag bdun bcu drug /dpag tshad lnga yi tshad dang mnyam pa ste/ /rin chen sna bdun bye brag 'phags pa'i mchog /de tshe 'dzam bu'i gling 'dir byung bar gyur/ /de tshe grong mchog dam pa de kun kyang / /bskyed mos tshal brgya mang pos rab tu brgyan/ /bskyed mos tshal kun stug pa'i sprin bzhin du/ /me tog 'bras bus brgyan cing shing rnams rgyas/ /bza' shing rig kyang sna tshogs mdzes pa dag /la ku a mra dzam bu pa nas dkrigs/ /kar ni tsam pa pur na brgya yis kyang / /skyed mos tshal mchog de dag rab tu brgyan/ /n+ya gro d+ha la bya mang sgra 'byin te/ /khu byug ka la ping ka rma bya'i rgyu/ /shang shang te'u dang ku nal sgra 'byin pa/ /bya tshogs mang po de tshe snyan par sgrog /ngang pa'i rgyal po ngang skya 'dra ba dang / /bung ba ku nal sgra dbyangs mchog sgrog ste/ /yan lag bkra zhing tshon che kha dog 'bar/ /shin du yid 'ong sgra 'jam dga' ba 'byin/ /de yi dus na bya mang de dag 'dus gyur te/ /ka la ping ka rma bya ne tso dang / /khu byug ri skegs bya rnams sna tshogs pa/ /bya mang de dag sna 50.102a tshogs sgra yang 'byin/ /bskyed mos tshal brgya dag na de dag gnas/ /btang bzung mya ngan 'tshang dang bar sha ka /a ti mug ta me tog 'dab ma dang / /pad ma ut+pal ku mud pad ma dkar/ /pad ma 'dab stong brgya yis rab tu brgyan/ /me tog de dag rdzing bu mdzes par byed/ /dri zhim spos mchog dam pas so sor brgyan/ /rdzing bu sdug cing shin du mdzes par gyur/ /de tshe 'dzam bu'i gling 'dir rgyal po ni/ /mi dbang brtan pas byin zhes bya ba byung / /de yi bu yang brgya phrag lnga yod de/ /byad bzhin bzang zhing shin du blta na sdug /de tshe rgyal srid zhi zhing bde bar gyur/ /gtse ba med cing dbyangs dga' rnal du bab/ /'dzam bu'i gling yang me tog mang pos brgyan/ /lha yi gnas dang mtshungs shing bye brag med/ /de tshe sdig med stobs bcu ldan pa yi/ /rgyal ba de ni ting 'dzin mchog 'di 'chad/ /srid pa'i 'gro ba rmi lam lta bu ste/ /'di la su yang mi skye 'chi ba med/ /sems can ming dang srog kyang mi rnyed de/ /chos 'di rnams ni rmi lam chu shing 'dra/ /sgyu ma lta bu nam mkha'i glog 'dra ste/ /chu yi zla ba 'dra zhing smig rgyu bzhin/ /mi gang 'jig rten 'dir yang shi nas ni/ /'jig rten gzhan du 'pho zhing 'gro med kyang / /las byas rnams ni nam yang med mi 'gyur/ /'khor ba na yang dkar gnag 'bras bu smin/ /rtag pa ma yin chad par mi 'gyur te/ /las bsags med cing gnas pa dag kyang med/ /de yang byas nas reg par mi 'gyur min/ /gzhan gyis byas pa tshor bar 'gyur ba'ang med/ /'pho ba med cing phyir yang 'ong ba med/ /thams cad yod pa'ang ma yin med pa'ang min/ /'di na lta gnas 'jug pa dag pa min/ /sems can spyod pa rab zhi 'jug pa med/ /bde gshegs spyod yul rgyal ba'i yon tan ni/ /skye med zhi ba mtshan ma med pa'i gnas/ /stobs dang gzungs rnams dang ni stobs bcu'i stobs/ /'di ni sangs rgyas khyu mchog gyur pa'i mchog /dkar po'i chos mchog yon tan bsags pa ste/ / 50.102b yon tan ye shes gzungs dang stobs rnams dang / /rdzu 'phrul rnam par 'phrul pa bya ba'i mchog /mngon shes mchog lnga 'thob pa dam pa'i tshul/ /'dir ni rang bzhin gang na'ang shes pa med/ /'gro dang 'jug med mkhas pa'i chos kyi 'gros/ /chos kyi dbyings ni gar yang mi 'gro ste/ /de 'dra'i 'gro ba 'gro med chos kyi 'gros/ /dbyangs kyi tshogs med ngo bo nyid kyi 'gros/ /'gro ba'i rang bzhin gang du'ang mi gnas te/ /mi gnas mi rten rang bzhin 'jug pa ni/ /rgyal ba'i spyod yul rdul bral zhi ba'i gnas/ /zhi ba rab zhi nye bar zhi ba'i 'gros/ /'gro ba de ni gar yang mi gnas te/ /rtag tu dngos po'i rang bzhin rjes su song / /mkhas shing mi g.yo mthong dka' shin du gnas/ /de ni mi g.yo bdag nyid gnas pa ste/ /mi gnas ma 'ongs rang bzhin gnas pa yin/ /rang bzhin gnas pa bshad par mi nus te/ /de ni stong pa mi g.yo chos kyi gnas/ /dbyangs kyis bshad kyang dbyangs kyi 'jug pa med/ /dbyangs kyi rang bzhin 'jug pa chos kyi 'gros/ /dbyangs kyi tshogs gnas gang na'ang yod ma yin/ /de ltar rang bzhin 'jug pa chos kyi 'gros/ /'gros kyi sgrar gsungs sems can 'gro ba med/ /chos kyi rang bzhin mkhas don 'gro ba ste/ /dbyangs kyang brjod de sems can 'gro ba med/ /dbyangs rnams mi rnyed sems can 'gro ba med/ /mtha' dang mtha' med ma yin dbus 'gro med/ /yod med ma yin phyogs su 'gro ba med/ /rang bzhin 'gro ba ci 'dra shes pa ni/ /rgyal ba mchog gi bstan pa 'di dag mnyam/ /rdul bral rnam par dag pa don dam gnas/ /zhi zhing rab zhi rdul med rdul bral ba/ /rtog dang rlom sems med pa rab zhi gnas/ /rgyal ba thugs rje'i mchog ldan ston par mdzad/ /'di la yi ge spyod pa yod ma yin/ /'gro ba yangs shing yangs don 'gro ba ste/ /sangs rgyas dag gis bsnyen cing rgyal bas bstod/ /snang ba'i chos kyi tshul ni 'jug pa phra/ /de la gnas nas bde gshegs mtshungs med pa/ /chos kyi gter ni rdul bral yangs pa dang / /rin chen chos rnams rdul bral 50.103a don dam stong / /zhi ba'i don la 'jug pa ston par mdzad/ /rkang gnyis gtso bos ting 'dzin 'di bshad pa/ /rgyal po brten byin gyis ni de tshe thos/ /de ni bye ba khrag khrig brgyad bcu dang / /rgyal ba snying rje can drung rtag tu 'ongs/ /rgyal ba stobs ldan gus pa rab bskyed de/ /zhabs la mi yi bdag po phyag 'tshal nas/ /de tshe stobs bcu ldan pa'i spyan sngar 'dug /rab tu dga' zhing sor bcu thal mo sbyar/ /de yi spyod pa yongs su dag rig nas/ /dbang po dag la dbang gi pha rol phyin/ /mi mchog rgyal ba mos pa mkhyen pa yis/ /de la ting 'dzin dam pa 'di bshad do/ /rgyal po de ni don dam 'di thos tshe/ /'phags pa'i dga' ba mtshungs med skyes nas su/ /gling bzhi dag kyang thams cad rnams spangs te/ /'dod pa bor nas khyim nas mngon par byung / /rgyal bar 'gyur zhes byang chub don du yang / /nam tshe rgyal pos sa bor rab byung tshe/ /'dzam bu'i rgyal mtshan 'di yi mi kun kyang / /'dod pa'i yon tan rnam spangs rab tu byung / /de tshe stobs bcu'i yon tan rgya che ste/ /brtson yid dge slong ma dang dge slong mang / /de tshe ma rmos ma btab rtsi 'khrungs te/ /lha rnams kyang ni g.yog dang bsnyen bkur byed/ /ngur smrig chos gos gsum dag byung bar gyur/ /dra ba mnyam zhing drub legs dpe med la/ /dri ma med cing rdul bral gser brgyan pa/ /sangs rgyas yon tan bsod nams stobs las byung / /gzhon nu ltos shig rgyal mchog de yang ni/ /sa rnams thams cad rnam spangs rab byung na/ /zad pa'i dus na sems can mang po dag /shin du longs spyod chung yang khyim mi gtong / /shing sgrog dang ni bcing ba chad pa mang / /gshi zhing spyo ba sdug bsngal mi dga' dang / /bla yi chad pa mang po bzod par byed/ /longs spyod chung rab khyim na bza' ba med/ /shin du tshe yang thung la nor yang med/ /rab tu bag chung bsod nams stobs kyang med/ /mi mkhas bzo yi gnas kyang mi shes te/ /dbul por gyur cing khyim na nor yang med/ /dri ma ma dag gzhan gyi 50.103b bud med chags/ /phrag dog byed cing shin du btsam pa med/ /nyon mongs chos ldan tshul la mi gnas kyang / /nged ni sangs rgyas nyid du 'gyur zhes smra/ /gsug gis slu zhing bab chol byed pa dag /nga ni phyug po 'jig rten chos nor sbyin/ /gnod pa byed cing tshul 'chos sgyu ma dag /nged ni sangs rgyas nyid du 'gyur zhes smra/ /gzhan dag bsad cing bcing dang gtse la dga'/ /tshul khrims 'chal pa ma rungs zhe sdang yid/ /byas pa mi gzo dbyen byed 'tshe bar gnas/ /btsun pa byang chub spyod pa ston ces smras/ /gang las des ni byang chub spyod thos pa/ /de nyid la ni khong khro rab bskyed nas/ /mkhas pas 'khrul pa'i tshig 'ga' thos na yang / /de la mi snyan brgya dag sgrog par byed/ /gzhon nu nga yi tshig 'di thos nas ni/ /de dag dang ni sten par ma byed cig /byang chub dam pa reg par 'dod na ni/ /rmi lam du yang de la yid ma rton/ /sbyangs tshul bsnyungs pa yon tan du ma rjod/ /yon tan bskal pa mang po brgyar bshad kyang / /de yi yon tan dag la mi gnas na/ /byang chub zhi ba mchog ni rtogs mi 'gyur/ /khor mor yang ni dge zhing 'jam par gyis/ /tshul khrims dag cing rtag tu dang ba'i yid/ /khor mor tshul khrims yongs su dag par gyis/ /ring por mi thogs ting 'dzin mchog thob 'gyur/ /nga rgyal ma byed tha ba ma skyed par/ /rtag tu yid ni yongs su dag par gyis/ /nga rgyal rgyags dang 'chab pa kun spongs la/ /ting 'dzin mchog 'di rab tu thob par gyis/ /rtag tu yon tan las ni rgyal ba dran/ /gser mchog mdog 'dra shin du 'od mdzad pa/ /mtshan mo gnam la skar mas gang ba ltar/ /thub pa'i sku ni mtshan gyis yongs su rgyas/ /'chag cing 'dug dang 'greng zhing nyal ba na/ /mi gang thub pa'i zla ba dran byed pa/ /de yi mdun na rtag tu ston pa bzhugs/ /de ni rgya cher mya ngan 'das par 'gyur/ /gdugs dang rgyal mtshan bla re ba dan mchog /phye ma byug pa mang po kun thogs la/ /rtag tu bde bar gshegs la mchod 50.104a pa gyis/ /ring por mi thogs ting 'dzin mchog 'di 'thob/ /spos mchog phreng ba me tog bdug pa dang / /rol mo sil snyan mang po rab thogs la/ /rgyal ba'i mchod rten dag la mchod pa gyis/ /ring por mi thogs ting 'dzin mchog 'di thob/ /glu gar bzang po sna tshogs mang po dang / /yid gtsang bzhad gad rol mo bzang po dang / /rtag par mar me'i phreng sdug bzang po yis/ /mtshungs pa med la mchod bzang rab tu gyis/ /khar rnga dang ni sgra snyan rdza rnga brgya/ /rnga dang gling bu'i sgra mchog sna tshogs dang / /sgra snyan rol mo'i yon tan sna tshogs kyis/ /dang ba'i yid ldan 'dren pa mchod par gyis/ /sangs rgyas sku gzugs shin du mdzes pa dag /rin chen byi dor legs par byas pa yang / /blta na sdug cing shin du bzang po gyis/ /ring por mi thogs ting 'dzin mchog 'di 'thob/ /de bzhin gser dag dang ni dngul dag dang / /tsan dan gyi ni sku gzugs bzang po dag /mdzes shing shin du blta na sdug pa gyis/ /ring por mi thogs ting 'dzin mchog 'di 'thob/ /'ji ga dang ni de bzhin rdo ba dang / /shing dang ri mor bris pa'i sku gzugs dag /mdzes shing shin du blta na sdug pa gyis/ /ring por mi thogs ting 'dzin mchog 'di 'thob/ /rtag tu nags khrod dben par bsnyen par gyis/ /grong dang grong khyer dga' ba rnam spongs la/ /bse ru lta bur gnyis su med par gyis/ /ring por mi thogs ting 'dzin mchog 'di 'thob/ /nga ni chos rje khyod ni nga yi bu/ /nga yi ting 'dzin spyod pa rjes su slobs/ /nga ni de tshe phyogs su grags pa yi/ /mi dbang brtan pas byin zhes bya bar gyur/ /ting 'dzin zhi ba mchog 'di tshol ba'i phyir/ /ngas sngon sangs rgyas mtha' yas mchod byas pa/ /rtag par ngas ni tshul khrims rnam dag bsrungs/ /nga yis stobs bcu dag la ri mor byas/ /ting 'dzin zhi ba mchog 'di tshol ba'i phyir/ /ngas sngon bu dang chung ma yongs btang ste/ /mgo dang rkang lag mig mchog bzang po byin/ /zhum pa'i sems 50.104b su nam yang yongs ma byas/ /ting 'dzin zhi ba mchog 'di tshol ba'i phyir/ /nor 'bru bran pho bran mo brgya mang dang / /rin chen mang po ngas ni yongs btang ste/ /slang ba mang po shin du tshim par byas/ /ting 'dzin zhi ba mchog 'di tshol ba'i phyir/ /ngas sngon gser dang mu tig shel mang dang / /dung dang man shel dang ni bai dUr+ya/ /nor bu gzugs gtsang bye ru 'bru rnams btang / /ting 'dzin zhi ba mchog 'di tshol ba'i phyir/ /ngas ni rnam pa sna tshogs rgyan rnams dang / /mu tig phreng mchog de bzhin seng ge can/ /rin chen dra ba bzang zhing mang ba btang / /ting 'dzin zhi ba mchog 'di tshol ba'i phyir/ /ngas sngon gos mchog phra mo bye ba dag /yongs su gtsang ba ka shi du kul mchog /gser gyis spras pa mang po yongs su btang / /ting 'dzin zhi ba mchog 'di tshol ba'i phyir/ /rta dang bal glang shing rta sna tshogs dang / /bu dang chung ma rab sdug ngas btang ste/ /yid mi bde ba nam yang ma byung ngo / /ting 'dzin zhi ba mchog 'di tshol ba'i phyir/ /tshol bas sdug bsngal nyon mongs gyur pa yi/ /shin du dbul ba'i mi dag ngas mthong nas/ /de dag ngas ni dbul ba med par byas/ /ting 'dzin zhi ba mchog 'di tshol ba'i phyir/ /rta dang bal glang shing rta khrag khrig dag /nor bu rin chen brgyan pa'i dra bas g.yogs/ /ngas sngon slong ba dag la sbyin par byas/ /ting 'dzin zhi ba mchog 'di tshol ba'i phyir/ /ngas sngon skyed mos tshal ni mang po dag /bye ba khrag khrig legs par brgyan byas te/ /yid kyang dga' zhing snying rje bskyed nas byin/ /ting 'dzin zhi ba mchog 'di tshol ba'i phyir/ /grong dang grong khyer yul 'khor grong 'dab kyang / /ngas sngon legs par brgyan nas yongs su btang / /byin nas rtag tu dga' ba myong bar byas/ /ting 'dzin zhi ba mchog 'di tshol ba'i phyir/ /rin chen phung po ri rab mnyam pa dang / /de bzhin gos dang rgyan rnams mang po yang / /ngas sngon slong 50.105a ba dag la sbyin pa byas/ /ting 'dzin zhi ba'i mchog 'di tshol ba'i phyir/ /shin du dbul ba ngas ni phyug por byas/ /rab tu nyon mongs gyur pa ngas bskyabs te/ /sdug bsngal gtses pa mang po bde bar byas/ /nga ni sa steng dbang phyug gyur pa'i tshe/ /skye bo'i tshogs rnams sdug bsngal mthong nas ni/ /snying rje bskyed nas bde bar gyur cig ces/ /de dag la ni nga yis rgyal srid btang / /gzhon nu ngas ni ngo mtshar byas pa dang / /bskal pa brgya mang dka' ba ci spyad pa/ /ngas ni bskal pa bye ba khrag khrig tu/ /de dag bshad kyang zad par mi nus so/ /ting 'dzin zhi ba mchog 'di tshol ba'i phyir/ /ngas ni ngo mtshar dka' ba spyad pa ni/ /bde bar gshegs pa'i spyod la ma dad pa/ /mi rnams sems ni myos shing bslad par 'gyur/ /gzhon nu khyod la shin du bsgo bar bya/ /dad par gyis shig nga la mi bden med/ /bde gshegs brdzun gyi tshig ni mi gsung ste/ /thugs rje rgyal ba rtag tu bden par gsung / /ji ltar ting 'dzin mchog kyang 'thob 'gyur zhing / /sems can khrag khrig sdug bsngal thar bya zhes/ /bskal pa mang por spyod pa 'di dag dang / /gzhan yang ngas ni rnam pa mang po sbyangs/ /skad cig gang la ting 'dzin 'di yang ni/ /nga yis rab tu thob par gyur pa'i tshe/ /ting 'dzin dam pa ye shes chen po'i lam/ /ngas thob sangs rgyas khrag khrig mang po mthong / /rdzu 'phrul dag kyang mtha' yas ngas thob ste/ /zhing brgya dag tu rnam par sprul pas 'gro/ /song nas ngas ni snying rje ldan pa la/ /dri ba bye ba khrag khrig mang po dris/ /bde gshegs dag gis nga la ci bstan pa/ /de tshe dri ba bye ba khrag khrig bzung / /nga yis ma lus thams cad bzung byas te/ /tshig gcig tsam yang nga la nyams pa med/ /dri ba khrag khrig bye ba mang po yi/ /yang dag pa yi tshul de ngas thos nas/ /rdul bral zhi ba'i gnas de ngas bshad de/ /sems can mang po ye shes lam la bkod/ /ngas ni ting 'dzin 'di la gnas nas su/ /bskal pa 50.105b brgyar yang yang dag tshul bslabs te/ /ngas sngon sems can bye ba khrag khrig rnams/ /rdul dang bral ba'i lam mchog dam par bkod/ /gang gis sngon gyi bde bar gshegs pa dag /rdul dang bral ba'i tshul 'di ston pa rnams/ /ma mthong bas ni don dam stong pa yi/ /ting 'dzin mchog la dad par mi nus so/ /mi gang dad cing mkhas la cho ga shes/ /yang dag tshul zab tshul rnams thos pa ni/ /de dag mi skrag dngang bar mi 'gyur te/ /thos nas rtag tu yid kyang rangs par 'gyur/ /de dang de dag byang chub 'di 'dzin te/ /de dag rjes su skyes pa'i nga yi bu/ /de dag u dum ba ra'i me tog 'dra/ /de phyir bskal pa brgyar yang ngas spyad do/ /ting 'dzin mchog 'di mi gang 'dzin pa ni/ /de dag log par ltung ba'i 'jigs pa med/ /rtag tu mi khom brgyad dang de bral te/ /sangs rgyas khrag khrig shin du mang po mthong / /gang gi lag na ting 'dzin mchog yod pa/ /rgyal ba byams pa grags pa mtha' yas bzhin/ /sems can rnams kyi don mang byed 'gyur zhes/ /blo gros mtha' yas de ni ngas lung bstan/ /ting 'dzin mchog 'di mi gang 'dzin pa ni/ /de dag dran dang ldan zhing blo gros ldan/ /rtogs ldan ye shes 'phags pa thos pa 'dzin/ /de yi spobs pa dag kyang rgya cher 'gyur/ /mi gang ting 'dzin mchog 'di 'dzin pa ni/ /lha rnams kyis kyang mchod par bya ba yin/ /mis kyang rtag tu phyag byar 'os pa ste/ /khor mor 'byung po'i tshogs kyis mngon par srung / /mi gang ting 'dzin mchog 'di 'dzin pa ni/ /de dag me dang chur yang mi 'chi zhing / /de la dug dang mtshon gyis mi tshugs te/ /dgra dag gis kyang brgal bar mi nus 'gyur/ /mi gang ting 'dzin mchog 'di 'dzin pa ni/ /de dag nags khrod shong gnas rtag par yang / /lha dag khor mor bsnyen bkur byed par 'gyur/ /gnod sbyin mang po de yi g.yog kyang byed/ /mi gang ting 'dzin mchog 'di 'dzin pa ni/ /ye shes dag kyang rgya mtsho 'dra bar 'gyur/ / 50.106a thub pa'i yon tan brjod la thogs pa med/ /sangs rgyas yon tan yang dag rjod par byed/ /mi gang ting 'dzin mchog 'di 'dzin pa ni/ /de yi thos pa mtha' yas mu med de/ /tshad rnyed mi 'gyur ji ltar nam mkha' bzhin/ /ye shes sgron ma 'dzin cing rab rib sel/ /mi gang ting 'dzin mchog 'di 'dzin pa ni/ /rtag par 'jam zhing rigs pa'i tshig smra ste/ /'khor gyi nang du dga' bar 'gyur ba ston/ /seng ge bzhin du de ni sgra rnams sgrog /mi gang ting 'dzin mchog 'di 'dzin pa ni/ /de ni sman pa dpyad mkhan 'dra bar yang / /mang po'i rten dang dpung gnyen skyabs su 'gyur/ /'jig rten dag na snang bar gyur cing spyod/ /mi gang ting 'dzin mchog 'di 'dzin pa ni/ /'khrig pa dag la yid kyang dga' mi byed/ /zhi gnas dga' zhing bsam gtan bde ba reg /rab tu zhi ba'i dbyings su zhi bar smra/ /mi gang ting 'dzin mchog 'di 'dzin pa ni/ /de yid mtshan ma dag la mi dga' ste/ /mtshan ma mang po thams cad rnam par bshig /mkhas pa rtag tu mnyam par bzhag cing spyod/ /mi gang ting 'dzin mchog 'di 'dzin pa ni/ /de yi mig kyang tha mal ma yin 'thob/ /des ni rgyal ba mtha' yas mthong bar 'gyur/ /mtha' yas mig ldan de ni khyu mchog 'gyur/ /mi gang ting 'dzin mchog 'di 'dzin pa ni/ /khrung khrung sgra dbyangs 'jam zhing mnyen dang ldan/ /ka la ping ka rnga yi dbyangs su 'gyur/ /glu dbyangs ldan zhing sgra skad 'jam par 'gyur/ /mi gang ting 'dzin mchog 'di 'dzin pa ni/ /sprin gyi 'brug sgra bsgrags pa'i skad rnams dang / /ngang pa'i sgra dbyangs bzhin du 'jam par sgrog /dbyangs kyi yan lag lnga brgyar ldan pa'i sgra/ /mi gang ting 'dzin mchog 'di 'dzin pa ni/ /bskal pa bye ba mang po khrag khrig tu/ /dbyangs kyi yan lag sna tshogs ldan pa yi/ /sgra dbyangs snyan pa bsam gyis mi khyab 'byung / /mi gang ting 'dzin mchog 'di 'dzin pa ni/ /zas la yid kyang chags par mi 'gyur te/ /lhung bzed chos gos dag la dga' ma yin/ /'dod pa nyung zhing chog shes yo 50.106b byad snyungs/ /mi gang ting 'dzin mchog 'di 'dzin pa ni/ /bdag nyid la yang stod par mi 'gyur zhing / /gar yang gzhan la mi snyan mi rjod de/ /rtag tu bsam gtan dga' zhing phra ba'i sems/ /mi gang ting 'dzin mchog 'di 'dzin pa ni/ /rtag tu bdag nyid la yang rtog 'gyur te/ /gzhan gyi 'khrul pa dag ni de mi tshol/ /'jig rten kun dang de ni mi 'phrod med/ /mi gang ting 'dzin mchog 'di 'dzin pa ni/ /spyod pa yongs dag sems la nyon mongs med/ /rtag tu g.yo yang med cing 'drid pa med/ /khor mor 'jam zhing rnam par thar la dga'/ /mi gang ting 'dzin mchog 'di 'dzin pa ni/ /rtag tu gtong la shin du mos par 'gyur/ /de ni ser sna'i sems la dga' mi byed/ /khor mor tshul khrims dang yang ldan par 'gyur/ /mi gang ting 'dzin mchog 'di 'dzin pa ni/ /byad bzhin bzang zhing blta sdug mdzes pa ste/ /mdog kyang gser mchog 'dra bar snang bar byed/ /sum bcu rtsa gnyis mtshan rnams 'chang bar 'gyur/ /mi gang ting 'dzin mchog 'di 'dzin pa ni/ /de dag rtag par rab tu mdzes par 'gyur/ /khor mor rtog cing skye bo mang po la/ /phangs shing sdug ste lta bas mi ngoms 'gyur/ /mi gang ting 'dzin mchog 'di 'dzin pa ni/ /lha dang klu dang de bzhin gnod sbyin rnams/ /rtag tu yi rang dga' zhing mgu nas ni/ /grong du zhugs nas de yi bsngags pa smra/ /mi gang ting 'dzin mchog 'di 'dzin pa ni/ /tshangs pa brgya byin dbang sgyur mang po dag /rtag par de la rim gro rab tu byed/ /de yi yid kyang khengs par yong mi 'gyur/ /mi gang ting 'dzin mchog 'di 'dzin pa ni/ /de la ngan 'gro'i 'jigs pa mi 'byung ste/ /mi khom med cing log ltung 'jigs pa med/ /log ltung 'jigs pa kun las yongs su grol/ /mi gang ting 'dzin mchog 'di 'dzin pa ni/ /sangs rgyas chos mchog zhib mo thos nas kyang / /de la nem nur yid gnyis mi 'byung ste/ /ye shes zab 50.107a mo'i rjes su song ba yin/ /mi gang ting 'dzin mchog 'di 'dzin pa ni/ /phra ba'i chos rnams gang dag ci thos kyang / /thams cad la ni dbang gi pha rol song / /gtan tshigs zhib cing stobs dang ldan par 'gyur/ /mi gang ting 'dzin mchog 'di 'dzin pa ni/ /rgyal bas gsung ni de skad rab bshad de/ /rtag par bdag ni de ltar bya snyam na/ /gzungs ni bye brag 'phags pa mchog thob 'gyur/ /mi gang ting 'dzin mchog 'di 'dzin pa ni/ /nam tshe de yang 'chi ba'i dus byed pa/ /'od dpag med pa thugs rjer ldan pa ni/ /dge slong tshogs bcas de yi mdun na bzhugs/ /mi gang ting 'dzin mchog 'di 'dzin pa ni/ /de dag gzungs rnams rab tu thob par 'gyur/ /chos kyi gter la dbang ba'i pha rol phyin/ /spobs dang ldan zhing tshig kyang rgyun mi 'chad/ /mi gang ting 'dzin mchog 'di 'dzin pa ni/ /chos 'dzin de dag gang du song bar yang / /'gro ba dag la kun du snang bar 'gyur/ /shin du spyod pa zhi zhing yid rab zhi/ /rab tu dga' dang dri med 'od byed dang / /'od 'phro shin du sbyang dka' mngon gyur dang / /ring du song dang mi g.yo legs pa'i blo/ /chos sprin sa bcu po yang 'thob par 'gyur/ /tshe dang las dang yo byad mos pa dang / /smon lam rdzu 'phrul skye ba'i stobs rnams dang / /chos dang sems dang de bzhin ye shes che/ /dbang bcu 'di dag dpa' bos thob par 'gyur/ /mi gang ting 'dzin mchog 'di 'dzin pa ni/ /mkhas pa chos kyi mdzod mchog rnam 'byed cing / /chos kyi sku la dbang ba'i pha rol phyin/ /de ni 'gro ba kun gyi the tshom gcod/ /sems can thams cad bcom ldan snying rje can/ /srid pa'i mthar phyin bde gshegs gyur pa la/ /bskal pa mang po brgya 'am gang gA'i/ /bye ma snyed dam lhag par mchod byas pas/ /zad pa'i dus na mi gang la la yis/ /'dir yang ting nge 'dzin 'di thos nas su/ /yid rang zhes ni tshig gcig smras na yang / /snga ma'i bsod nams phung pos char mi phod/ /gzhon nu su dag zhi ba'i spyod pa 'di/ / 50.107b don dam stong pa ting nge 'dzin gyi mchog /rab tu 'don dang de bzhin glegs bam byas/ /chos smra blo gros dam pa gnas pa yin/ /gzi brjid tshogs kyi rgyal po'i le'u ste sum bcu pa'o// // de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po gang ci nas bdag sems can thams cad kyi sgra dang skad shes pa rtogs shing / dbang po mchog dang mchog ma yin pa rnam par rig nas chos bstan to snyam pa'i byang chub sems dpa' sems dpa' chen po des gzhon nu chos thams cad kyi rang bzhin mnyam pa nyid rnam par spros pa'i ting nge 'dzin 'di mnyan par bya/ gzung bar bya/ kun chub par bya/ bcang bar bya/ bklag par bya/ rab tu gdon par bya/ lung mnod cing kha ton du bya/ nyon mongs pa med pa'i sgom pas bsgom par bya/ mang du bya/ gzhan la yang rgya cher rab tu bsnyan par bya'o/ /de nas yang bcom ldan 'das kyis de'i tshe tshigs su bcad pa 'di dag gsungs so/ /thar pa 'dod pa ting 'dzin rdul bral 'di 'dzin na/ /des ni 'das pa'i 'dren pa tshad med rnams kyang mthong / /sngon gyi srid par brtson byas 'jig rten mgon pos dris/ /byang chub sems dpa' dge ba'i rtsa ba mchog la gnas/ /thar pa 'dod pa ting 'dzin rdul bral 'di 'dzin na/ /lha dang mi yi bde ba gya nom rnyed par 'gyur/ /lha dang mi yi mchod pa dam pa des 'thob ste/ /bsam gtan bde dang 'phags pa'i bde ba mchog kyang 'thob/ /thar pa 'dod pa ting 'dzin rdul bral 'di 'dzin na/ /bsngags pa rgya cher thos kyang de ni dga' mi 'gyur/ /mi snyan pa dag thos kyang zhum par mi 'gyur te/ /'jig rten chos brgyad dag gis mi sgul ri bo bzhin/ /thar pa 'dod pa ting 'dzin rdul bral 'di 'dzin na/ /dge zhing mnyen par smra la 'jam pa'i tshig dang ldan/ /khro gnyer med cing rtag tu gsong por smra bar 'gyur/ / 50.108a bzhin yang 'dzum zhing 'dren pa dag gi rjes su slob/ /thar pa 'dod pa ting 'dzin rdul bral 'di 'dzin na/ /des shing 'grogs na bde la 'jam pa'i sems su 'gyur/ /rtag par rab tu dul zhing dul ba'i sa la gnas/ /'jam zhing dga' ba'i tshig smra shin du bde bar zer/ /thar pa 'dod pa ting 'dzin rdul bral 'di 'dzin na/ /de ni gtam byed 'gyur yang rtsod cing 'thab pa med/ /zhe sdang tha ba de dag ma lus rnam spangs te/ /rtag par rab tu dga' zhing des la mnyen pa yin/ /thar pa 'dod pa ting 'dzin rdul bral 'di 'dzin na/ /mkhas pa rtag tu gtong la mos par rab 'gyur te/ /shin du sdug bsngal skye bo mthong nas kha zas sbyin/ /gtong la shin du dga' zhing bdag nyid spyod mi dga'/ /thar pa 'dod pa ting 'dzin rdul bral 'di 'dzin na/ /lha yang brgya stong de la smon pa shin du skyed/ /klu dang lha min gnod sbyin rtag tu g.yog byed de/ /nags dang nags 'dabs gnas pa de la srung bar byed/ /tshig ni thogs pa med cing tshangs pa'i sgra dbyangs te/ /ngang pa'i sgra skad mi 'am ci yi glu yi dbyangs/ /dbyangs kyi yan lag lnga brgya dga' ba'i sgra skad de/ /sgra sgrags shin du grags pa'i sgra yi mchog tu 'gyur/ /ji snyed zhing rnams de dag skyes bu la la yis/ /phra ba'i rdul du byas pa shes par nus kyang ni/ /ting 'dzin rdul bral mchog 'di mi gang 'dzin pa dag /de yi dbyangs sgra de bas shin du mang bar 'gyur/ /ting 'dzin rdul bral 'di yang mi gang 'dzin pa ni/ /dbang bcu 'thob cing sa yang brgyad dang gnyis 'thob ste/ /mkhas pas sangs rgyas chos rnams bsam yas 'thob par 'gyur/ /bdud rnams thams cad btul nas byang chub dam pa rig /phan yon gyi le'u ste sum bcu rtsa gcig pa'o// // de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po gang ji ltar chos thams cad kyi rang 50.108b bzhin shes par bya snyam pa'i byang chub sems dpa' sems dpa' chen po des chos thams cad kyi rang bzhin mnyam pa nyid rnam par spros pa'i ting nge 'dzin 'di mnyan par bya/ gzung bar bya/ kun chub par bya/ bcang bar bya/ bklag par bya/ rab tu gdon par bya/ lung mnod cing kha ton du bya/ nyon mongs pa med pa'i sgom pas bsgom par bya/ mang du bya/ gzhan la yang yang dag par rab tu bstan par bya'o/ /de nas bcom ldan 'das kyis de'i tshe tshigs su bcad pa 'di dag gsungs so/ /chos kyi rang bzhin shin du zhi ba gang shes pa/ /de la 'dod chags ldang ba med cing zhe sdang med/ /khyu mchog la ni nam yang gti mug ldang ba med/ /des ni nyon mongs ma lus thams cad spangs pa yin/ /chos kyi rang bzhin shin du zhi ba gang shes pa/ /de ni bde gshegs thugs sras bslabs pa yong mi 'dor/ /dpa' bo bud med dbang du nam yang mi 'gro ste/ /de dang der ni bde gshegs bstan pa'i dga' ba myong / /chos kyi rang bzhin tshul gyi rigs pa gang shes pa/ /de ni mkhas pa blo ldan ye shes cho ga shes/ /de dang de ni sangs rgyas mtha' yas mu med mthong / /de ni gzugs dang ye shes mtha' yas rab tu shes/ /chos kyi rang bzhin shin du zhi ba gang shes pa/ /de ni ring por mi thogs rkang gnyis gtso bor 'gyur/ /de dang de ni sman pa dpyad shes bde ba sbyin par 'gyur/ /de ni sdug bsngal zug rngu thams cad 'byin par byed/ /chos kyi rang bzhin shin du zhi ba gang shes pa/ /de ni sems can 'di dag sdug bsngal na rig nas/ /de ni rtag tu bdud rtsi dag gi rnga dag rdung / /de dang de ni ring por mi thogs 'dren par 'gyur/ /de ni sman gyi tshul la mkhas pa sman pa'i mchog /thams cad nad kyi gzhi dang gang gis 'thar ba shes/ /de ni yang dag tshul la bslabs pa blo gros ldan/ /bslabs nas shin du 'khyams pa'i sems can mang po 'grol/ /chos kyi rang bzhin shin du zhi ba gang shes pa/ /de ni stong pa nyid kyi tshul mkhas blo gros dpa'/ /de ni 'jig rten rtag tu ma chags bsod snyoms za/ /de ni sems can mang po byang chub mchog la 'god/ / 50.109a chos kyi rang bzhin shin du zhi ba gang shes pa/ /de ni mi yi zla ba bzod pa'i stobs kyis 'phags/ /de ni rdo dang dbyug pas brdegs kyang mi khro ste/ /de ni lus dang yan lag bcad kyang 'khrug pa med/ /chos kyi rang bzhin shin du zhi ba gang shes pa/ /de ni bzod pa'i stobs la gnas pa stobs ldan yin/ /de ni rab tu zhi ba'i bzod pa'i dngos mi gtong / /de ni blo dpa' bzod pa'i stobs la rlom sems med/ /chos kyi rang bzhin shin du zhi ba gang shes pa/ /de ni bdag bcad snyam du nams kyang sems mi 'gyur/ /de yis srid pa thams cad rnam bshig rtag tu stong / /de yi 'du shes thams cad ma lus rab tu spangs/ /de dang de dag chos kyi rang bzhin dam pa ston/ /de dag ring por mi thogs bla med byang chub rig /gang dag chos kyi rang bzhin spyod yul nges rtogs pa/ /de dag gis ni sbyin pa mtha' yas mu med byin/ /chos kyi rang bzhin shin du zhi ba gang shes pa/ /de ni mdo sde bye ba mtha' yas 'chad par byed/ /de las lhag par gang gA'i klung gi bye ma snyed/ /bshad kyang de yi spobs pa'i rgyun ni 'chad pa med/ /chos kyi rang bzhin shin du zhi ba gang shes pa/ /de ni bskal pa bye ba khrag khrig stong du yang / /ye shes dag ni rtag tu 'phags pa ri rab bzhin/ /chos rnams ston pa dag ni zad par yong mi 'gyur/ /chos kyi rang bzhin shin du zhi ba gang shes pa/ /spobs pa yangs shing rgya che bsam gyis mi khyab 'gyur/ /byang chub dam pa rtag tu khor mor tshol ba na/ /mdo sde dag kyang bye ba mtha' yas rab tu 'chad/ /chos 'di thams cad dngos po med par gang shes pa/ /rkang gnyis gtso bos chos gang ji snyed bshad pa yang / /de dag thams cad thos nas yongs su rdzogs par 'dzin/ /de ni tshig gcig la yang the tshom 'byung mi 'gyur/ /chos kyi rang bzhin rtag tu stong par gang shes pa/ /de ni rtag tu bye brag 'phags shing gtong ldan 'gyur/ /sdug bsngal dag la bde ba sbyin pa'i sbyin bdag yin/ /sems can sdug bsngal mthong nas rin chen tshim par byed/ /chos kyi rang bzhin rtag tu stong par gang shes pa/ / 50.109b de ni rtag tu 'dzam bu rgyal mtshan rgyal por 'gyur/ /dus kun du yang srog chags rnams la byams ldan te/ /rtag tu mtha' yas pa yi bde ba byed par 'gyur/ /chos kyi rang bzhin rtag tu stong par gang shes pa/ /dpa' bo bu dang bu mo bran dag gtong bar byed/ /mgo dang lag pa de bzhin rgyal srid yongs su gtong / /khyu mchog de yi yid ni zhum par yong mi 'gyur/ /chos kyi rang bzhin rtag tu stong par gang shes pa/ /de yi lus dang yan lag gal te bcad gyur kyang / /rmi lam na yang de yi yid la khong khro med/ /des ni 'dren pa rkang gnyis gtso bo mchod pa yin/ /chos kyi rang bzhin rtag tu stong par gang shes pa/ /des ni 'das pa'i 'dren pa thams cad mchod pa yin/ /de bzhin ma byon pa yi rkang gnyis gtso bo mchod/ /des ni 'dren pa bzhugs pa thams cad ri mor byas/ /gang dag mdo sde 'di thos zad pa'i dus la 'dzin/ /de ni mkhas pa bde bar gshegs pa'i mdzod 'chang yin/ /de ni gzungs mchog dag la rab tu gnas pa ste/ /de ni ring por mi thogs 'jig rten 'dren par 'gyur/ /gang gis mdo sde 'di dag rab bshad mi brjed pa/ /mkhas pa de ni long bar nams kyang mi 'gyur te/ /bskal pa mang por yan lag ma tshang yong mi 'gyur/ /des ni mi khom brgyad po dag kyang rtag tu spangs/ /de ni ngan 'gror nam yang 'gro bar mi 'gyur te/ /rtag tu mtshan rnams 'chang zhing byad bzhin bzang por 'gyur/ /mngon shes lnga po de dag rtag par des bsgoms te/ /dpa' bo de ni rtag tu bde gshegs spyan sngar gnas/ /ye shes can de 'phrul pa mang po sprul byas nas/ /zhing rnams bye ba mang por 'dul ba'i don phyir gtong / /sangs rgyas sprul pa mang po gang gis mthong gyur pa/ /de yis sems can mang po byang chub mchog tu btsud/ /gang dag mdo sde 'di thos zad pa'i dus la 'dzin/ /de ni dran ldan blo gros ldan zhing shes rab can/ /de ni rtag tu mthu dang brtson 'grus stobs kyis brtan/ /gzi brjid chen po chos kyi pha rol phyin par 'gyur/ /zad pa'i dus la ting 'dzin zhi 50.110a ba 'dzin pa ni/ /dpa' bo de yang tshangs pa'i gnas la shin du gnas/ /de ni myur du sa yang brgyad dang gnyis dag 'thob/ /de ni myur zhing mgyogs par bdud rnams shin du 'dul/ /gang gis mdo sde zhi ba 'di ni rtag bsgoms pa/ /dbang dang ldan zhing mngon par 'phags pa stobs dang ldan/ /de ni sems can dam pa sems can don phyir brtson/ /de ni byang chub shing drung byang chub mchog rtogs 'gyur/ /gang gis chos 'di rnams ni stong par goms byas pa/ /de dag 'od zer bye ba stong rnams rtag tu 'gyed/ /nyi ma'i dkyil 'khor dag kyang thams cad gzi med byas/ /dpa' bo de dag mi ring 'dren par 'gyur/ /ngas sngon spyod yul zhi ba 'di ni rab tu bsgoms/ /bskal pa mang po bye ba khrag khrig stong du yang / /lam 'dir ngas ni nam yang brtson 'grus rgyun ma gcad/ /de tshe mar me mdzad kyis rgyal bar lung yang bstan/ /mdo sde 'di la khyed kyang nga yi rjes su slobs/ /tshul 'di zab cing dam pa'i don rnams bstan pa ste/ /'di la mu stegs log pa mang po 'di dag 'khyams/ /byang chub la ni smad byas ngan song 'jigs par ltung / /bskal pa mang po bye ba khrag khrig stong du yang / /de dag sdug bsngal mi bzad tsha ba der myong nas/ /bskal pa khrag khrig mang po dag ni 'das nas kyang / /de ni de dag mi 'chi 'thob pa'i rgyur 'gyur ro/ /gang dag phyi dus 'jigs la bde bar gshegs pa yi/ /mdo sde rab tu zhi ba 'di ni srung byed pa/ /de dag byang chub mchog rab 'di ni rnyed mi dka'/ /de dang de dag phyi dus chos 'dzin lung bstan yin/ /chos thams cad kyi rang bzhin nges par bstan pa'i le'u ste sum bcu rtsa gnyis pa'o// // 'phags pa ting nge 'dzin gyi rgyal po'i mdo/ bam po bcu pa/ de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po chos thams cad la mngon par shes pa chen po'i byi dor bya ba yongs su sbyang bar 'dod 50.110b pas chos thams cad kyi rang bzhin mnyam pa nyid rnam par spros pa'i ting nge 'dzin 'di mnyan par bya/ gzung bar bya/ kun chub par bya/ bcang bar bya/ bklag par bya/ rab tu gdon par bya/ lung mnod cing kha ton du bya/ nyon mongs pa med pas bsgom par bya/ mang du bya/ gzhan la yang rgya cher yang dag par rab tu bstan par bya'o/ /gzhon nu chos thams cad la mngon par shes pa chen po'i byi dor bya ba gang zhe na/ 'di lta ste/ chos thams cad la yongs su 'dzin pa med cing tshul khrims kyi phung po mchog tu mi 'dzin pa/ ting nge 'dzin gyi phung po rlom sems med pa/ shes rab kyi phung po rgyu ba med pa/ rnam par grol ba'i phung po dben par mthong ba/ rnam par grol ba'i ye shes mthong ba'i phung po yang dag pa ji lta ba bzhin du mthong ba ste/ byang chub sems dpa' sems dpa' chen po mngon par shes pa de dag dang ldan pas ting nge 'dzin gyi rnam par 'phrul pa thams cad kyis rnam par 'phrul zhing sems can rnams la chos ston pa 'di ni gzhon nu chos thams cad la mngon par shes pa chen po'i byi dor bya ba yin no/ /de nas de'i tshe bcom ldan 'das kyis chos thams cad la mngon par shes pa chen po'i byi dor bya ba bstan pa'i chos kyi rnam grangs 'di zla 'od gzhon nur gyur pa la tshigs su bcad pa'i dbyangs kyis rgya cher yang dag par rab tu bstan to/ /mngon shes chen po yongs sbyangs pa/ /rtsod pa med par bstan pa ste/ /rtsod pa dag la gang spyod cing / /'dzin par byed pa de mi thar/ /mngon shes de yi shes rab ste/ /sangs rgyas ye shes bsam mi khyab/ /'dzin pa la ni gang gnas pa/ /de la ye shes yong mi 'gyur/ /gang dag sgra yis bstan pa yi/ /chos rnams mang po bsam mi khyab/ /sgra de la yang gang chags pa/ /dgongs pa'i bshad pa mi shes so/ /ci la dgongs te bshad pa yi/ /dgongs pa dag ni mi shes pa/ /chos nyid la ni ma bslabs pas/ /chos ma yin pa chos su 'chad/ /'jig rten khams ni 50.111a stong dag tu/ /ngas ni mdo sde gang bshad pa/ /tshig 'bru tha dad don gcig ste/ /thams cad brjod par nus ma yin/ /tshig gcig rnam par bsgoms na ni/ /de dag thams cad bsgoms par 'gyur/ /sangs rgyas ji snyed thams cad kyis/ /chos rnams mang po rab bshad pa/ /chos rnams thams cad stong pa nyid/ /mi gang don la mkhas pa dag /tshig 'di bslabs par gyur pa la/ /sangs rgyas chos rnams dkon ma yin/ /ches kun sangs rgyas chos yin te/ /chos nyid la yang gang bslabs pa/ /chos nyid rab tu shes pa ni/ /chos nyid dang yang 'gal mi byed/ /tshig kun kyang ni sangs rgyas tshig /sgra kun dngos po med pa ste/ /phyogs bcu dag tu btsal na yang / /sangs rgyas tshig ni mi rnyed do/ /tshig 'di sangs rgyas tshig yin te/ /phyogs bcu dag tu rab btsal kyang / /bla med 'di ni mi rnyed do/ /ma rnyed rnyed par mi 'gyur ro/ /sangs rgyas tshig ni bla na med/ /ltag na med pa sangs rgyas tshig /de la rdul tsam mi rnyed pas/ /de tshe bla na med ces brjod/ /chos ni rdul tsam mi skye ste/ /rdul tsam sgrar ni bshad pa yin/ /rdul tsam rnyed par ma gyur kyang / /'jig rten du ni sgra yis bshad/ /chos rnams rnyed med rnyed pa ste/ /rnyed pa la yang rnyed pa med/ /de ltar chos rnams gang shes pa/ /byang chub dam pa rtogs par 'gyur/ /byang chub bla med nges rtogs nas/ /chos kyi 'khor lo rab tu bskor/ /chos kyi 'khor lo rab bskor nas/ /sangs rgyas chos rnams ston par byed/ /sangs rgyas ye shes bla med ni/ /byang chub sems dpa' rtogs par byed/ /sangs rgyas ye shes rtogs byed pas/ /sangs rgyas zhes kyang de phyir brjod/ /dngos med smon pa med pa dang / /mtshan ma med dang stong pa nyid/ /rnam thar sgo ni 'di dag gis/ /sgo dag sangs rgyas rab tu ston/ /mig dang rna ba sna dag dang / /lce dang lus dang de bzhin yid/ /de dag rang bzhin stong par ni/ /sangs rgyas dag gis rab tu bshad/ /de lta bu yi chos rnams kyi/ / 50.111b rang bzhin dag ni sus shes pa/ /chos kyi mtshan nyid shes pas na/ /de ni rtsod par mi byed do/ /'di ni byang chub sems dpa' dag /dpa' bo skyob pa'i spyod yul te/ /chos rnams stong par shes pa ni/ /de dag nam yang nem nur med/ /chos kyi rang bzhin shes pas na/ /de phyir sangs rgyas zhes bya ste/ /sems can bsam gyis mi khyab cing / /dpag tu med pa byang chub 'dul/ /sangs rgyas sgras ni gang byas pa/ /tshul khrims sgras kyang de byas te/ /sangs rgyas sgra dang tshul khrims sgra/ /de dag gnyi ga mtshan nyid gcig /'jig rten sgra dag brjod pa ni/ /rab dang 'bring dang tha ma rnams/ /mnyam par bzhag pa'i sgra gcig la/ /sangs rgyas sgras ni bstan pa yin/ /sangs rgyas sgra ni yul mi gnas/ /phyogs la'ang gnas pa ma yin rjod/ /skyes dang 'gags pa ma yin te/ /de bzhin gcig dang tha dad min/ /de dag gsar ram rnying ma yin/ /de dag la ni rlom sems med/ /ser po ma yin sngon po min/ /dkar po ma yin dmar po min/ /brjod du med cing gzung med par/ /de ltar dbyangs kyis bstan mod kyi/ /de ni dbyangs kyi sa ma yin/ /thub pa dag gi cho 'phrul 'di/ /sangs rgyas mya ngan 'das pa yi/ /sangs rgyas sku gzugs snang gyur te/ /de gnas yid la byas pa na/ /cho 'phrul rnams kyang de yis mthong / /gang gis mya ngan 'das reg pa/ /sems can de ni mi rnyed de/ /de bzhin chos rnams rab bsten cing / /sems can mang po grol bar byas/ /ji ltar nyi ma zla ba dag /khar ba'i snod du snang ba yang / /rang gi gzugs ni mi 'pho ltar/ /chos kyi mtshan nyid de 'dra'o/ /chos rnams mig yor lta bur yang / /gang gis ngo bo nyid shes pa/ /de dag gzugs kyi lus su ni/ /sangs rgyas sku la mi blta'o/ /chos 'di lus gzugs med pa ste/ /'di la lus gzugs gang yang med/ /chos gang lus gzugs med pa ni/ /de ni sangs rgyas sku lus so/ /su dag chos kyi skur lta ba/ /de dag gis ni 'dren pa mthong / /rdzogs pa'i sangs rgyas chos kyi sku/ /de ni rdzogs pa'i 50.112a sangs rgyas mthong / /rten cing so sor bstan pa ste/ /so so ma yin so sor bshad/ /dge sbyong nyid ni su 'dod pa/ /'jug pa 'di ni rig par gyis/ /gang dag bdag gis thob snyam pa/ /de phyir ma thob pa zhes bya/ /gang gis dge sbyong nyid ma thob/ /de phyir dge sbyong zhes kyang bya/ /su dag bslabs par ma gyur pa/ /zab mo'i chos 'di ga la smra/ /de dag zab mo'i ming du yang / /yongs su brjod par mi nus so/ /phung po lnga ni dngos med de/ /med pa las ni 'di dag byung / /su yi phung po byung ba yang / /de la slong bar byed pa med/ /phung po'i mtshan nyid gang yin pa/ /chos kun de yi mtshan nyid yin/ /de yi mtshan nyid yod bshad de/ /mtshan nyid kyang ni yod ma yin/ /ji ltar bar snang nam mkha' bzhin/ /chos kyi mtshan nyid de 'dra bar/ sngon gyi mtha' dang phyi ma'i mtha'/ /da ltar byung ba'ang mthong bar 'gyur/ /nam mkha' gzung ba med par bshad/ /de la gzung ba mi rnyed de/ /chos kyi rang bzhin 'di nyid yin/ /gzung ba med pa nam mkha' 'dra/ /de lta bur ni chos bstan te/ /de la gang yang mthong ba med/ /su dag chos 'di mi mthong ba/ /de yi chos rnams bsam mi khyab/ /chos 'di rnams ni rang bzhin med/ /'di dag rang bzhin mi rnyed de/ /sangs rgyas byang chub su brtson pa/ /rnal 'byor pa yi spyod yul 'di/ /de lta bur ni sus shes pa/ /de ni chos la mi chags te/ /chos rnams la yang mi chags pas/ /chos kyi 'du shes rab tu rtogs/ /byang chub sems dpa' skyob pa yis/ /chos rnams thams cad rnam par bshig /chos kyi 'du shes rnam bshig nas/ /sangs rgyas chos la rlom sems med/ /mtha' de rlom sems ma byas pa/ /brtags nas mthar ni bshad pa ste/ /de ltar mtha' ni sus shes pa/ /bskal pa bye bar rlom sems med/ /byis pas sngon gyi mtha' brtags pas/ /'khor ba rnams su 'khor 'gyur te/ /phyogs bcu dag tu btsal na yang / /de yi gnas ni mi rnyed do/ /'khor ba stong par rig nas ni/ /rgyal ba'i thugs sras chags mi 'gyur/ /byang chub don phyir spyod mod kyi/ /de dag spyod pa mi 50.112b rnyed do/ /nam mkha' la ni bya rjes bzhin/ /de dag rnyed par mi 'gyur te/ /de 'dra'i rang bzhin byang chub de/ /byang chub sems dpas rtogs par 'gyur/ /sgyu ma byed pa rab bslabs pa/ /sgyu ma dag ni ston pa ltar/ /rnam pa sna tshogs gzugs rnams kyang / /gzugs ni dmigs par mi 'gyur ro/ /rnyed dang mi rnyed rlom sems med/ /rnyed pa la yang rnyed med de/ /ye shes de ni sgyu ma 'dra/ /sgyu ma de la gnas pa min/ /de bzhin chos rnams stong pa la/ /byis pa'i blo yis rnam brtags nas/ /rnam par rtog la spyod pa dag /'gro ba drug tu gzhol bar 'gyur/ /phung po skye rga nyer 'akro ste/ /de dag skye ba zad mi 'gyur/ /skye zhing 'chi ba'i phung po rnams/ /de dag sdug bsngal mtha' yas so/ /skye zhing 'khor ba sdug bsngal te/ /byis pa'i blo yis brtags pas na/ /de dag rtog pa mi zad de/ /de dag bskal pa bye bar 'khor/ /mi sbyor ba dang rab sbyor dang / /las kyi sbyor la gang gnas dang / /las rnams len pa gang dga' ba/ /de dag las las mi 'thar ro/ /las kyi chu bos khyer ba de/ /las ni rtag tu zad mi 'gyur/ /bdud kyi phyogs la gang gnas pa/ /yang dang yang ni 'chi bar 'gyur/ /bdud kyis zil non shes rab 'chal/ /nyon mongs pa yi las rnams kyis/ /skye ba de dang de dag tu/ /skye zhing 'chi ba myong bar 'gyur/ /so so'i skye bo long ba yi/ /byis pa de dag 'chi bar 'gyur/ /de dag btag cing rnam par gzhom/ /de dag 'gro ba mi bzad 'gyur/ /byis pa'i blo can mtshon cha yis/ /gcig la gcig ni gsod pa byed/ /de lta bur ni sbyor ba dag / /de dag sbyor ba rab tu 'phel/ /nga'i bu nga yi nor snyam du/ /byis pa'i blo yis rab brtags te/ /med pa'i chos rnams brtags pas na/ /'khor ba dag ni phyir zhing 'phel/ /'khor ba dag ni 'phel byed cing / /so so'i skye bo de dag 'khor/ /so so tha dad 'gro bas na/ /so so'i skye bor brjod pa yin/ /sangs rgyas bstan pa bor nas ni/ /chos rnams mang po rab tu 'chad/ /bdud kyi dbang du song bas na/ /de dag thar pa rnyed mi 'gyur/ /'dod pa'i phyir ni byis pa rnams/ / 50.113a bud med rul la sten byed de/ /'gro ba rul bar 'gro 'gyur zhing / /des ni ngan 'gror ltung bar 'gyur/ /'jigs pa chen po'i zhags pa ni/ /bud med zhags pa mi bzad pas/ /sangs rgyas rnams kyis 'dod pa dang / /bud med bsten pa'ang ma bsngags so/ /lam 'di byang chub mi 'gyur bas/ /bud med rnams la ma rton par/ /sbrul gdug shin du khro bo ltar/ /mkhas pas de ni rnam par spong / /sangs rgyas kun gyi bstan pa yi/ /byang chub lam la bsgom par byed/ /lam de goms par bsgom byas na/ /bla med sangs rgyas 'grub par 'gyur/ /de dag bla na med 'gyur te/ /'jig rten gyi ni mchod rten 'gyur/ /bla na med pa'i ye shes kyis/ /sangs rgyas bla na med par 'gyur/ /gso sbyong dag la bsnyen byed cing / /tshul khrims phung por yang dag 'dzud/ /sems can bye ba bsam mi khyab/ /byang chub tu yang yang dag 'dzud/ /de dag sems can rnams kyi ni/ /bsam yas dpag med don byed de/ /dpa' bo shes rab chen po de/ /bdud rtsi yi ni rnga yang rdung / /bdud kyi gnas rnams g.yo byed cing / /bdud kyi ris kyang g.yo bar byas/ /bdud rnams bye ba bsam mi khyab/ /byang chub la ni yang dag 'dzud/ /pha rol rgol ba tshar gcod cing / /mu stegs can ni pham par byed/ /ri dang rgya mtshor bcas pa yi/ /sa yang rab tu g.yo bar byed/ /khyu mchog gyur pa du ma yis/ /lus kyi rnam par 'phros byed cing / /shes rab chen po de dag ni/ /cho 'phrul bsam gyis mi khyab ston/ /zhing rnams bye ba g.yo byed de/ /gang gA yi ni bye ma snyed/ /de dag bdud rnams pham byas nas/ /sangs rgyas grags pa chen por 'gyur/ /de dag zhing rnams sprul byed de/ /rin po che yis rnam par brgyan/ /me tog 'bras bu phun sum tshogs/ /dri dang ldan zhing yid du 'ong / /khang pa dang ni gzhal med khang / /khang pa brtsegs pa pu shur bcas/ /dpa' bo de dag sprul pa byed/ /rdzing bu yid du 'ong ba dag /yan lag brgyad ldan chu yis 50.113b gang / /dang zhing bsil la rnyog pa med/ /de las chu ni sus 'thungs pa/ /srid pa gsum yang spong bar 'gyur/ /bla na med pa'i chu 'thungs nas/ /de dag phyir yang mi ldog 'gyur/ /bla na med pa'i ye shes kyis/ /sangs rgyas bla na med par 'gyur/ /bla med zhi ba'i 'jug par ni/ /'gro bar shin du rig par gyis/ /'jug pa 'di ni mi shes pas/ /dmigs pa can dag shin du brlag /su dag de la rten gyur cing / /de dag skal mnyam sems can de/ /mnar med par ni de 'gro ste/ /mi bzad pa ni chen por ltung / /de yi sdug bsngal drag po ni/ /brjod par nus pa ma yin te/ /byang chub sems dpa' skyob pa dang / /ngas ni de dag rab tu shes/ /'di 'dra'i zab mo mthong dka' yi/ /chos la su dag nem nur byed/ /su dag dmigs la gnas pa yi/ /byis pa dag gi sa ma yin/ /bla med sangs rgyas zhing du ni/ /gang gis de dag 'gro 'gyur ba/ /gzugs ston pa ni du ma yi/ /bkod pa dag ni sprul par byed/ /sangs rgyas zhing ni ji snyed kyi/ /gzugs 'grub phun sum tshogs yod pa/ /de dag thams cad 'dir yang ni/ /byang chub sems dpa' 'phrul che ston/ /chos chen gyi ni go bgos te/ /dpa' chen stobs kyang che ba dag /stong pa'i don chen rdo rje yis/ /gdab pa dag kyang de dag 'debs/ /'od zer bye ba phrag stong dag /gang gA yi ni bye ma snyed/ /de yi lus las 'byung bar 'gyur/ /des ni 'jig rten rab tu snang / /de dag bud med mi chags te/ /de dag yid 'byung mi byed la/ /bud med 'du shes rang bzhin gyis/ /'du shes de dag rnam par bshig /dpa' bo de dag gar gnas pa/ /sangs rgyas zhing de mi stong ste/ /de dag la ni sdig can bdud/ /bar chad byed par ga la 'gyur/ /lta ba dag la de gnas pas/ /sangs rgyas mang po mnyes ma byas/ /gnod sems kyis ni nyer brtan cing / /'dod dang chags la rab tu gnas/ /lta la gnas pa de dag kun/ /bdud yin par ni rig par bya/ /de la sdig can bdud rnams kyang / /bar chad byed par mi 'jug go/ /sangs rgyas ye shes bsam mi khyab/ /ye shes de ltar sus shes pa/ /'du shes thams 50.114a cad rnam bshig nas/ /'du shes dag pa mi ldog gnas/ /sngon gyi mtha' dang phyi ma'i mtha'/ /da ltar mtha' yang mthong bar 'gyur/ /de ltar chos rnams bstan mod kyi/ /de la chung zad bstan pa med/ /ye shes kyis kyang shes pa med/ /mi shes pas kyang zhum mi 'gyur/ /ye shes mi shes rnam brtags nas/ /sangs rgyas ye shes brjod pa yin/ /rnam rig tshig dang brda rnams ni/ /byang chub sems dpas rab tu shes/ /de ni sems can don rnams kyang / /dpag med bsam yas byed par 'gyur/ /'du shes kun du shes pa'i phyir/ /'dzin par yang ni de bstan te/ /'du shes de ni mi 'dzin pa/ /dben pa'i don du rab tu bstan/ /dben pa gang yin 'du shes te/ /'du shes gang yin bstan pa de/ /'du shes rang bzhin ye shes te/ /de ltar 'du shes med par 'gyur/ /'du shes 'di ni spang snyam du/ /gang gi 'du shes 'byung ba ni/ /'du shes spros la spyod pa ste/ /'du shes las ni de mi 'thar/ /su yi 'du shes 'di dag byung / /su yis 'du shes 'di bskyed byas/ /sus ni 'du shes reg par byas/ /sus ni 'du shes bkag par gyur/ /gang gi 'du shes 'byung ba ni/ /sangs rgyas kyis kyang chos ma rnyes/ /'dir ni don de bsam par gyis/ /de nas 'du shes med par 'gyur/ /nam tshe 'du shes skyes pa na/ /su yi 'du shes yin zhes brjod/ /sems kyi rgyud kyi rnam thar yang / /de la ji ltar rung bar 'gyur/ /gang tshe rnam thar reg pa na/ /bsam pa thams cad bsam pa med/ /gang tshe bsam pa bsam med pa/ /de tshe bsam du med par 'gyur/ /bsam pa'i sa la gnas nas ni/ /mthar gyis rnam par bsam byas te/ /bsam pa thams cad rnam spangs nas/ /de nas bsam du med par 'gyur/ /'di ni dkar chos rnam smin te/ /'du byed med pas mthong bar 'gyur/ /sems can kun gyis rnam bsam pa/ /skad cig gcig la rab tu shes/ /sems can ci 'dra de bzhin bsam/ /bsam bzhin rgyal ba de 'dra ste/ /sangs rgyas bsam du med pa yis/ /bsam pa 'di ni rab tu bstan/ /gcig pu dben song gang sems pa/ /nam zhig sems 50.114b pa med par 'gyur/ /bsam pa dag ni mi sems na/ /bsam pa thams cad med par 'gyur/ /shi 'phos dus byas shi ba'i tshe/ /gang gi bsam pa rab 'jug pa/ /bsam pa'i rjes su rnam shes 'brang / /bsam las de ni mi thar to/ /su dag bud med 'du shes gnas/ /de dag 'dod chags rab tu 'phel/ /'du shes dag ni rnam bshig na/ /'dod chags kyis ni gos mi 'gyur/ /bsam pa 'di ni bsam pa che/ /chos kyi bsam pa bla na med/ /chos kyi bsam pa 'di yis ni/ /yang dag bsam pa rab tu 'byung / /tshul ma yin pa rnam bsams pas/ /bsam pa bsam yas mang po dag /yun ring dus su rnam bsams kyang / /bsam pa dag ni zad ma gyur/ /gang dag ming la sems pa yang / /zad pa la ni ye shes med/ /sgra shes pa la zad pa med/ /zad pa'i chos nyid de yin no/ /sgra dang rnam rig tshig gi lam/ /zad pa'i sgrar ni bstan pa ste/ /chos de rnams ni bye brag med/ /shes bzhin zad pa de bzhin te/ /ma skyes shing ni ma 'gags pa/ /mtshan ma med cing mtshan nyid med/ /bskal pa bye bar bshad kyang ni/ /mtshan ma med par bstan pa yin/ /dngos po thams cad rnam bshig nas/ /dngos po med la rab gnas pa/ /dngos po gzhan du ma bstan te/ /dngos med pa yang gzhan mi bstan/ /dngos med sgras ni rig byas te/ /dngos po med pa rab tu bstan/ /sangs rgyas dag ni kun gyis kyang / /dngos po med pa bltar mi nus/ /dngos po kun gyi dngos po ni/ /dngos po med par de bstan te/ /de ltar dngos po rnam rig na/ /dngos po med par 'gyur zhes bstan/ /dngos po med pa de yang ni/ /sus kyang nam du reg mi nus/ /dngos po med pa reg pa yis/ /kun rdzob tu ni de bstan to/ /'jig rten sangs rgyas bdag 'gyur snyam/ /de ltar gang gi blo 'gyur ba/ /srid pa'i srid pas yong mi gzir/ /mkhas pa byang chub rtogs par 'gyur/ /byang chub sems dpa' mnyam bzhag pa/ /chos ni gang la'ang smon mi byed/ /ci 'ang med cing dmigs pa med/ /de ni byang chub brjod pa yin/ /byang chub tu ni deng zhugs shes/ / 50.115a mang du de skad smra mod kyi/ /'jug pa 'di ni mi shes pas/ /de dag sangs rgyas byang chub ring / /'du byed thams cad stong par ni/ /sgra yis chos rnams rab tu bshad/ /sgra yi rang bzhin gang yin pa/ /zab cing phra ste mthong bar dka'/ /mngon shes che la mdo sde 'di/ /nges par bstan zhes bya ba yin/ /byang chub sems dpa'i don phyir ni/ /sangs rgyas rnams kyis bstan mdzad do/ /kun nas nyon mongs ji snyed pa/ /gnyen po thams cad de yis bcom/ /mngon par shes la rab gnas shing / /de dag rdzu 'phrul shin du bsgoms/ /bsams nas shes la de gnas te/ /shes pa de yang rnam par bshig /bsam gyis mi khyab dpag med kyi/ /ye shes thob pas ngoms pa med/ /ting nge 'dzin dang rdzu 'phrul phyir/ /de dag mngon par 'du byed med/ /dpa' bo'i rnam smin de yin te/ /dus kun du 'ang mnyam par bzhag /rnam smin skyes pa'i rdzu 'phrul gyis/ /zhing ni bye bar de 'gro ste/ /'jig rten sgron ma mthong ba ni/ /gang gA dag gi bye ma snyed/ /de dag 'chi 'pho skye ba yang / /sems gzhan du ni sgyur bar byed/ /sems la dbang yang thob pas na/ /de dag lus ni 'od gsal lo/ /sangs rgyas dag gi nyan thos gang / /bsgoms pa'i rdzu 'phrul gnas pa ni/ /'du byed med pa'i rdzu 'phrul la/ /de dag bcu drug char mi phod/ /lha rnams kyis kyang de dag gi/ /bsam pa shes par mi nus te/ /'jig rten gyi ni mgon po dang / /de dag mtshungs gnas ma gtogs so/ /de dag spyi cher mi 'gyur te/ /mgo la skra dkar mi 'byung zhing / /rags pa'i rga ba mi 'byung ste/ /de bzhin sdug bsngal 'chi ba med/ /the tshom yid gnyis mi 'byung ste/ /de dag la ni nem nur med/ /mdo sde bye ba brgya rnams ni/ /nyin mtshan du 'ang de dag tshol/ /ji snyed kun nas nyon mongs kyi/ /bag la nyal ni rab tu spangs/ /de dag sems can thams cad la/ /rtag tu mnyam pa'i sems su 'gyur/ /ting 'dzin bye ba khrag khrig rnams/ /phyogs bcu dag tu nges par ston/ /dris pa bye ba stong rnams kyang / / 50.115b mi gnas par ni lung ston to/ /pho dang mor ni 'du shes dang / /'du shes thams cad rnam par bshig /dngos med 'du shes gnas nas ni/ /yang dag nges par ston par byed/ /yongs su dag pa'i ye shes kyis/ /ji bzhin du ni chos ston to/ /chos rnams yang dag bstan la brtson/ /ting 'dzin ye shes spyod yul ldan/ /de yi ting 'dzin spyod pa yang / /dngos po dag la mi gnas te/ /de yi tshig kyang don med min/ /chos bstan pa yang 'bras bu yod/ /mdo sde 'di la su dga' ba/ /des ni mir 'gyur legs par 'thob/ /mi khom thams cad rab tu spangs/ /sangs rgyas kun la byas pa gzo/ /gang gis rin chen mdo 'di las/ /tshig bzhi'i tshigs bcad bzung ba yang / /des ni 'khor ba gang bor ba/ /bskal pa bsam gyis mi khyab bo/ /mdo sde 'di la su dga' ba/ /de dag sangs rgyas kun gyis gzigs/ /de ni sangs rgyas ri mor byas/ /myur du byang chub thob par 'gyur/ /mdo sde 'di la su dga' ba/ /de dag chos rnams thams cad la/ /the tshom dang ni nem nur med/ /de dag mya ngan 'das dang nye/ /bya rgod phung por de bzhin gshegs/ /dpa' bo chen po de yis mthong / /thams cad sangs rgyas lung bstan te/ /rgyal ba byams pa mthong bar 'gyur/ /sangs rgyas byams pa mthong nas ni/ /bzod pa bzang po thob par 'gyur/ /gang su zad pa'i dus la yang / /mdo sde 'di la rab gnas pa/ /de dag yang dag mtha' la gnas/ /yang dag mtha' ni bsam mi khyab/ /bsam gyis mi khyab mtha' la ni/ /de dag nem nur yod ma yin/ /rdul phran tsam yang rnam pa kun/ /de dag la yang the tshom med/ /rdul tsam rab tu spangs pa ni/ /de dag byang chub rnyed mi dka'/ /zad dus shin du 'jigs pa la/ /dka' ba dag ni spyad byas te/ /mdo sde rin chen 'di bslabs na/ /spobs pa dag kyang mi zad 'gyur/ /mdo sde 'di ni rab bton na/ /sangs rgyas rnams kyi mdzod bsrungs te/ /'di ni sangs rgyas kun mchod pa/ /chos kyi mchod pa bsam mi khyab/ / 50.116a ma rungs zad pa'i dus la ni/ /mdo sde 'di dag gang 'dzin pa/ /de dag ye shes rnyed mi dka'/ /sangs rgyas ye shes bsam mi khyab/ /gang gis sngon gyi sangs rgyas las/ /mdo sde 'di dag bzung ba ni/ /de dag lus la 'chang gyur te/ /zad pa'i dus la rab tu 'don/ /sangs rgyas zhing ni bye bar yang / /'jig rten mgon po'i spyan sngar yang / /shAkya seng ge'i spyod pa rnams/ /de dag sgrar yang sgrog par 'gyur/ /de dag sangs rgyas spyan sngar ni/ /rtag tu seng ge'i sgra sgrog ste/ /mtha' yas pa yi spobs pa yis/ /sangs rgyas byang chub 'di yang smra/ /zad dus 'jigs pa chen po'i tshe/ /byang chub 'di ni gang srung ba/ /bu ram shing gi rigs skyes rnams/ /sangs rgyas rnams kyis lung bstan yin/ /de dag gzugs ni phun sum tshogs/ /mtshan rnams kyis kyang rnam par brgyan/ /sangs rgyas bye bar phyag 'tshal du/ /rnam par 'phrul pas 'gro bar 'gyur/ /sgyu ma yi ni me tog dag /gser gyi mdog 'drar snang ba dang / /bai dUr+ya dang shel dag dang / /dngul gyi yang ni me tog rnams/ /rin chen rigs rnams thams cad kyang / /de yi lag nas 'byung bar 'gyur/ /byang chub lam rnams tshol ba'i phyir/ /de dag sangs rgyas rnams la 'thor/ /mchod pa rnam pa sna tshogs dang / /rol mo sgrub pa phun sum tshogs/ /gang gA yi ni bye ma snyed/ /ba spu'i khung nas 'byung bar 'gyur/ /sems can bye ba bsam mi khyab/ /gang dag sgra 'di thos pa ni/ /sangs rgyas ye shes bla med las/ /de dag phyir yang mi ldog 'gyur/ /sangs rgyas bye ba de dag gi/ /bsngags pa bsam gyis mi khyab brjod/ /bsam gyis mi khyab zhing rnams su/ /de dag sgra yang thos par 'gyur/ /gang gis sgra de thos pa ni/ /de dag 'du shes 'gags par 'gyur/ /'du shes dag ni 'gags nas su/ /sangs rgyas mtha' yas mthong bar 'gyur/ /de 'dra ba yi ye shes kyis/ /byang chub spyod pa spyad nas ni/ /sems can kun gyi 50.116b don byas nas/ /don byed pa yi rgyal bar 'gyur/ /gang gis ting 'dzin bzung ba yi/ /mkhas pas 'dir ni gang 'thob pa/ /yon tan phan yon 'di dag ste/ /gzhan yang dpag tu med par 'gyur/ /bud med kyis kyang mdo sde 'di/ /thos nas tshigs bcad gcig bzung na/ /bud med dngos po rnam bsgyur nas/ /chos smra ba yang de 'gyur ro/ /de ni phyis kyang bud med kyi/ /dngos po 'dzin par mi 'gyur te/ /mtshan rnams kyis ni legs brgyan cing / /rtag tu byad bzhin bzang por 'gyur/ /mdo sde mchog rab 'di yi ni/ /yon tan dag kyang mchog bshad pa/ /de la de dag thams cad 'byung / /byang chub nyid kyang myur du 'thob/ /sangs rgyas kun gyi spyod yul te/ /mdo sde 'di ni bzung nas su/ /de dag skye ba thams cad du/ /rtag tu 'jigs pa med par 'gyur/ /ting 'dzin zhi ba bshad pa ni/ /byang chub sems dpa' skyed pa ste/ /byang chub rtogs par su 'dod pa/ /mdo sde 'di ni brjod par gyis/ /de dag thub dbang bsnyen pa ste/ /sangs rgyas byang chub nye bar 'gyur/ /de dag ring por mi thogs par/ /mnyam bzhag zhi ba'i sa 'di thob/ /byang chub sems dpa' dpa' bo dag /byang chub de la rtag gnas nas/ /sangs rgyas dag ni bye ba rnams/ /gang gA'i bye snyed mthong bar 'gyur/ /ting 'dzin rdul bral zhi ba 'di ni des thob nas/ /sa bdag 'khor los sgyur ba'i rgyal por de 'gyur te/ /sangs rgyas rdul bral shin du sems zhi rnams mthong nas/ /'jig rten mgon po de dag tshigs bcad brgyas bstod 'gyur/ /shin du grags pa chen po lha dang mi yi mchog /'dren pa dag la mchod pa mtshungs med des byas te/ /des ni rgyal srid mchil ma bzhin du yongs spangs nas/ /gtsang zhing rnam par dag pas tshangs pa'i spyad pa spyod/ /de ni thub pa mchog gi bstan la rab byung nas/ /ting 'dzin rdul bral zhi ba 'di yang rab thob ste/ /de yang tshig dge dag kyang 'jam gyur nas/ /blo ldan byin gyi brlabs kyis mdo sde bye ba 'chad/ /stong pa mtshan med mchog tu gya nom zhi ba'i mchog /rab tu zhi chos spyad pa zhib cing thogs pa med/ / 50.117a shin tu zhi ba rtag tu rdul bral rang bzhin stong / /ting 'dzin 'di thob skye bo mang la rab tu ston/ /blo ni rtag tu zab cing blo yang mtha' yas te/ /blo yang rgya che dpag tu med pa'i don ldan blo/ /zab cing zhi ba'i ting nge 'dzin 'di thob nas ni/ /'jig rten thams cad du yang snang ba thob par 'gyur/ /rdul dang bral ba'i ting 'dzin zhi ba 'di rnyed na/ /de ni tshangs par spyod pa rtag tu gtsang bar 'gyur/ /dri nga med cing rtag tu kun nas nyon mongs med/ /sems can bye ba gzhan yang de la 'god par 'gyur/ /rdul dang bral ba'i ting 'dzin zhi ba 'di bzung na/ /shes rab shin du rno zhing shes rab mchog tu 'gyur/ /de thos rgya mtshor 'gyur zhing rtag tu blo mtha' yas/ /ngag dge blo gros mkhas shing cho ga shes par 'gyur/ /rdul dang bral ba'i ting 'dzin zhi ba 'di bzung na/ /las kyi gnas dang de bzhin bzo yi gnas rnams dang / /sman gyi gnas rnams dang ni de bzhin rtsi yi gnas/ /brtan pa de ni thams cad kyi yang pha rol phyin/ /rdul dang bral ba'i ting 'dzin zhi ba 'di bzung na/ /snyan dngags bstan bcos bzhad gad rol mo dang / /glu dang gar la shin du mkhas shing pha rol phyin/ /'jig rten na yang rtag tu slob dpon 'gyur ba yin/ /rdul dang bral ba'i ting 'dzin zhi ba 'di bzung na/ /byang chub spyod pa zhi ba dam pa mchog spyod cing / /de ni rtag par g.yog dang rab tu ldan par 'gyur/ /phyogs kyang rtag tu mi phyed 'thun zhing 'tsham par 'gyur/ /rdul dang bral ba'i ting 'dzin zhi ba 'di bzung na/ /mkhas pas de la mya ngan dag gi zug rngu dang / /mkhas pa'i sems la nam yang gnod pa mi 'byung ste/ /thams cad dus su rtag par nad kyang med par 'gyur/ /rdul dang bral ba'i ting 'dzin zhi ba 'di bzung na/ /lus kyi nad dang de bzhin sems kyi nad rnams dang / /so yi nad dang de bzhin mgo yi nad rnams kyang / /'tsho ba'i 'jig rten dag na de la nad mi 'byung / /rdul dang bral ba'i ting 'dzin zhi ba 'di bzung na/ /mi yi 'jig rten nad rnams mang po ci yod pa/ / 50.117b lus kyi nad dang de bzhin sems kyi nad rnams dang / /de la nad kyang de dag rtag tu yong mi 'byung / /rdul dang bral ba'i ting 'dzin zhi ba 'di bzung na/ /sems la kun nas nyon mongs pa ni gang yod dang / /lus la yang ni nad kyi rnam pa gang yod pa/ /kun nas nyon mongs mang po de dag de la med/ /rdul dang bral ba'i ting 'dzin zhi ba 'di bzung na/ /bar snang nam mkha' dag la gos pa med pa ltar/ /rnam par dag cing rgya che rab tu 'od gsal te/ /de bzhin de yi sems kyang rnam par dag par 'gyur/ /rdul dang bral ba'i ting 'dzin zhi ba 'di bzung na/ /zla ba'i 'od dang de bzhin nyi ma'i 'od rnams ni/ /dag cing gzung du med la rab tu 'od gsal ba/ /de bzhin de yi sems kyang shin du 'od gsal 'gyur/ /ji ltar tshon rtsi thogs nas bar snang nam mkha' la/ /rnam pa mang po du ma'i gzugs rnams bri bar dka'/ /de bzhin rdul bral zhi ba'i ting 'dzin 'di bsgoms na/ /de yi sems la ri mor bri ba sla ma yin/ /rlung ni ji ltar phyogs bzhi dag nas langs pa dang / /thogs pa med par phyogs rnams kun du 'gro bar 'gyur/ /de yi sems kyi rgyud kyang rlung dang 'drar 'gyur te/ /de ni 'jig rten dag na thogs med ma chags 'gro/ /rlung langs pa ni rgya mos gzung du rung yang srid/ /rlung ni zhags pa dag gis bcing bar nus gyur kyang / /rdul dang bral ba zhi ba'i ting 'dzin 'di bsgoms na/ /de yi sems ni rab tu shes par sla ma yin/ /gzugs brnyan dag ni chu yi nang du gzung bar rung / /'bru mar gang ba'i snod dang chu yi nang du 'byung / /de bzhin rdul bral zhi ba'i ting 'dzin 'di bsgoms na/ /de yi sems ni rab tu shes par sla ma yin/ /sprin las 'brug zer glog gi 'khri shing byung ba dag /mi dag gi ni lag pas gzung bar nus gyur kyang / /rdul dang bral ba zhi ba'i ting 'dzin 'di bsgoms na/ /de yi sems kyi tshad ni shes par sla ma yin/ /phyogs bcu'i sangs rgyas zhing na sems can ci yod pa/ /sems can de dag gi ni sgra skad 50.118a gzung nus kyang / /byang chub sems dpa' nam zhig ting 'dzin 'di thob na/ /de yi sems kyi mtha' ni shes par sla ma yin/ /des ni rdul bral zhi ba'i ting 'dzin 'di thob nas/ /kun nas nyon mongs med cing gos pa med par 'gyur/ /nam zhig des ni ting 'dzin zhi ba thob pa'i tshe/ /phyir yang sred pa gsum la nam yang chags mi byed/ /nam zhig rdul dang bral ba'i ting 'dzin 'di thob na/ /'dod pa dag la mi sred gzugs la mi sred de/ /bud med dag la mi sred sems kyang 'khrul pa med/ /zhi zhing rab tu zhi ba gos pa med par 'gyur/ /nam zhig rdul dang bral ba'i ting 'dzin 'di thob na/ /bu la mi sred bu mo dag la'ang sred mi 'gyur/ /chung ma dag la'ang mi sred g.yog la'ang sred pa med/ /rab tu zhi bar spyod cing gos pa med par 'gyur/ /gser la mi sred nor rnams la yang sred med de/ /mtho ris mi sred rin chen rdzas la chags mi 'gyur/ /sems kyang shin du rnam par dag cing mi rtogs pa/ /'di ni ting nge 'dzin rnams thob pa'i bye brag yin/ /rgyal srid 'dod phyir tshangs par spyod pa de mi spyod/ /mkhas pa mtho ris sred pas rtag tu sbyin mi byed/ /byang chub sems dpa' byang chub 'dod pas sbyin byed de/ /'di ni ting nge 'dzin dag thob pa'i bye brag go/ /rgyal po'i srid phyir dka' thub brtul zhugs mi spyod do/ /srid pa gsum du dbang phyug 'dod pa'i phyir ma yin/ /skye bo mang la phan phyir byang chub sred pa yis/ /de ni rdul dang bral ba'i ting 'dzin 'di sgrub bo/ /glu la mi sred gar la'ang sred pa ma yin te/ /spos la mi sred btung ba dag la'ang sred ma yin/ /zas la'ang mi sred gos la yang ni sred mi 'gyur/ /'di ni ting nge 'dzin dag thob pa'i bye brag yin/ /mig la mi sred rna ba la yang sred ma yin/ /sna la mi sred lce la sred pa ma yin zhing / /lus la mi sred sems la yang ni sred mi 'gyur/ /'di ni ting nge 'dzin dag thob pa'i bye brag yin/ /khyim la mi sred dgon par sred pa ma yin te/ /gtsug lag khang la mi sred grong la'ang sred 50.118b mi 'gyur/ /yul 'khor mi sred grong khyer la'ang mi sred de/ /'di ni ting nge 'dzin dag thob pa'i bye brag yin/ /sbyin la mi sred tshul khrims dag la sred mi 'gyur/ /bzod la mi sred brtson 'grus la'ang sred ma yin/ /bsam gtan mi sred shes rab la'ang mi sred de/ /'di ni ting nge 'dzin dag thob pa'i bye brag yin/ /sems can la'ang mi sred srog la mi sred cing / /sangs rgyas dag la mi sred chos la sred mi byed/ /dge 'dun mi sred byang chub la'ang sred mi 'gyur/ /'di ni ting nge 'dzin dag thob pa'i bye brag yin/ /yod la mi sred med pa la'ang sred ma yin/ /dbus la mi sred mtha' la'ang sred par mi 'gyur zhing / /kun la mi sred sred pa med pa'ang ma yin te/ /'di ni ting nge 'dzin dag thob pa'i bye brag yin/ /rdul dang bral ba'i ting 'dzin zhi ba 'di thob na/ /de la 'dod chags nam yang gnod pa mi skyed de/ /su dag bud med sred pa de ni sems 'khrul 'gyur/ /'di ltar des ni 'dod chags rang bzhin yongs su shes/ /rdul dang bral ba zhi ba'i ting 'dzin 'di thob na/ /de la nam yang zhe sdang gnod pa mi skyed de/ /mkhas pas 'di ltar gnod sems rab tu bshig pa'i phyir/ /byams par byed cing zhe sdang thams cad shin du bcom/ /de la nam yang gti mug gnod pa mi skyed de/ /shes rab kyis ni gti mug ma rig nges par bsal/ /ye shes rab rib med pa dpag tu med pa thob/ /ting 'dzin thob pa'i yon tan 'di dag dpag tu med/ /mi gtsang bas ni 'dod chags rtag tu tshar bcad de/ /byams pa yis kyang zhe sdang khor mor ma lus bcom/ /shes rab kyis ni gti mug nyon mongs dra ba bsal/ /ting 'dzin thob pa 'jig rten kun na rab tu mdzes/ /de la nam yang gnyid ni gnod pa mi bskyed de/ /des ni nye ba'i nyon mongs rnam mang rnam par bshig /de ni gos pa med cing shin du bral bar 'gyur/ /ting 'dzin thob pa'i yon tan 'di dag dpag tu med/ /byang chub sems dpa' gang dag ting 'dzin 'di 'dzin pa/ /de la nam yang chags pa gnod par mi 50.119a 'gyur te/ /'di ltar de ni dus kun du yang gtong la dga'/ /bdog pa thams cad gtong zhing bde ba sbyin par 'gyur/ /byang chub sems dpa' gang dag ting 'dzin 'di 'dzin pa/ /de ni dpe med pa yi mthu dang ldan par 'gyur/ /de ni rtag par stobs dang rjes su ldan 'gyur te/ /'jig rten na ni de dang mnyam pa su yang med/ /nam tshe 'jig rten du yang 'khor los sgyur ba yin/ /mi yi rgyal por de 'gyur 'dzam bu'i gling du 'ongs/ /de tshe skye bo mang pos shin du mchod par 'gyur/ /khyad par thob pas rab rib med cing shes rab mchog /su dag gtso bor gyur cing rigs che rin chen mchog /longs spyod che zhing g.yog bran mang la dbang yang che/ /gang la rta dang bal glang shing rta bzhon mchog yod/ /gser dang nor bu rin chen 'gron bu rab tu mang / /sangs rgyas ye shes dam pa 'di la su dad pa/ /de dag 'dzam gling rin chen rigs shes bya ba yin/ /de ni rin chen rigs mchog de ru skyes nas kyang / /gnyen bshes shin du mang po'i tshogs kyi don kyang byed/ /'dzam bu'i gling 'di dag na ma dad gang yod pa/ /de dag bag yod pas ni dad pa skyed par byed/ /sems can tshogs rnams byang chub sems la gang bkod pa/ /de dag sangs rgyas rang byung rgyal ba mchog tu 'gyur/ /de dag mtshungs pa med pa'i byang chub mchog thob nas/ /sangs rgyas zhing du mtshungs med 'khor lo rab tu skor/ /de tshe chos kyi 'khor lo 'di ni sus shes pa/ /de dag ma lus mi skye'i chos la gnas par 'gyur/ /byang chub sems dpa' de dag shin du mang byed de/ /de dag rtag tu sems can rnams kyis mchod par 'gyur/ /de dag dus kun du yang mtshungs med don byed de/ /de dag sems can mig ni rab rib med par byed/ /byang chub sems dpa' gang dag rab dga' byams pa'i sems/ /gos pa med pa de dag de tshe sangs rgyas 'gyur/ /de tshe byang chub sems dpa' de dag gar gnas pa/ /sems can dag gi don kyang tshad med 50.119b byed par 'gyur/ /tshangs spyod mtshungs med tshul khrims rab tu bsrung bar 'gyur/ /bskal pa mtha' yas mang por ting 'dzin sgom par byed/ /rtag tu bsam gtan rnam par thar la shin du nges/ /de tshe byang chub sems dpa' de dag sangs rgyas sras/ /de dag rdzu 'phrul rkang pa rtag tu bsnyen byed cing / /zhing rnams mtha' yas rnam pa mang por de song nas/ /bde bar gshegs pas rab tu bshad pa'i chos nyan te/ /gzungs la rab tu gnas pas thams cad 'dzin par byed/ /byang chub sems dpa' gang dag gzungs la gnas pa ni/ /mdo sde dpag tu med pa mtha' yas rab tu ston/ /byang chub sems dpa' gang dag gzungs la gnas pa ni/ /sems can dag gi don kyang dpag tu med pa byed/ /sems can 'chi 'pho skye ba dang / /'gro ba dang ni 'ong ba shes/ /des ni ci 'dra'i las byas pa/ /rnam par smin pa de 'drar 'gyur/ /las rnams 'pho bar 'gyur ba yang / /rdul tsam yang ni mi rnyed do/ /byang chub sems dpa' grags chen ni/ /de dag gi yang de shes so/ /stong pa bdag nyid chen po yi/ /gnas pa dag gi dam pa yin/ /sems can bye ba bsam yas kyang / /theg pa che la rab tu 'god/ /de la ston par byed pa na/ /sems can 'du shes mi 'jug ste/ /chos rnams 'jug pa med par ni/ /byang chub sems dpa' rab tu ston/ /chos rnams rab tu ston pa na/ /dmigs pa dag ni mi 'byung ste/ /ye shes brtan la rab gnas shing / /stong pa nyid la gnas par 'gyur/ /ston pa kun gyi gnas pa yi/ /ting 'dzin 'di ni bstan byas nas/ /bud med 'du shes rang bzhin gyis/ /de la 'du shes mi 'byung ngo / /bud med 'du shes rnam bshig nas/ /byang chub snying por 'dug par 'gyur/ /byang chub snying por 'dug nas ni/ /bdud kyi 'du shes rnam par ldog /mkhas pa des ni bdud rnams dang / /bdud kyi sde yang mi mthong ste/ /bdud kyi bu mo gsum po yang / /des ni mthong bar mi 'gyur ro/ /byang chub snying por 'dug nas ni/ /'du shes thams cad rab tu spongs/ /'du shes thams 50.120a cad rab spangs nas/ /sa 'di thams cad g.yos par gyur/ /ri rab rgya mtshor bcas pa dag /phyogs bcu na yang ci yod g.yos/ /phyogs bcu dag na sems can rnams/ /kun gyis de ni mi shes so/ /sa dag rab tu g.yos pa 'di/ /byang chub sems dpa'i rdzu 'phrul yin/ /byang chub dam pa 'tshang rgya ba/ /de tshe sa yang lan drug g.yos/ /'dus byas chos ni ji snyed dang / /chos gang 'dus ma byas pa yang / /chos de thams cad rab rtogs te/ /chos kyi sgrar ni bstan pa yin/ /'di la rtogs byed gang yang med/ /seng ge'i sgra ni 'byung mod kyi/ /'byung ba dag kyang rnam rig nas/ /'od byed sangs rgyas nyid du 'gyur/ /rten cing chos rnams 'byung bar 'gyur/ /rten cing chos rnams rab tu skye/ /chos rnams kyi ni rten pa yang / /mkhas pa de dag thams cad shes/ /chos kun gyi ni cho ga shes/ /stong nyid rtogs par khong du chud/ /de dag 'gro ba rab shes te/ /chos kun rtogs par khong du chud/ /de yi 'gro ba btsal na yang / /byang chub sems dpas mi rnyed de/ /'di ltar sangs rgyas thams cad kyi/ /'gro ba bsam yas de yis rig /'gro ba thams cad shes pa gang / /de ni 'gro ba der 'gro ste/ /dam chos mtshan nyid rig pas na/ /ngan song thams cad chad pa yin/ /dam chos mtshan nyid rig nas ni/ /zhing rnams thams cad rnam pa lta/ /zhing kun la yang rnam bltas nas/ /byang chub snying por 'dug par 'gyur/ /byang chub snying por 'dug nas su/ /seng ge yi ni sgra sgrog ste/ /de bzhin zhing rnams bye ba snyed/ /bsam yas dpag med grags par byed/ /zhing de rnams kyang g.yo byed cing / /sangs rgyas dpa' bo grags chen dag /sems can ji ltar 'dul ba bzhin/ /sems can kha lo sgyur zhing 'dul/ /byang chub dam pa reg nas ni/ /byang chub snying po de las langs/ /dpag med bsam gyis mi khyab pa/ /sems can 'dul ba'ang rnam par 'dul/ /de nas rdzogs 50.120b pa'i sangs rgyas ni/ /sangs rgyas sprul pa mtha' yas sprul/ /zhing rnams bye ba stong du yang / /sangs rgyas sprul pa 'gro bar 'gyur/ /sems can bye ba bsam yas rnams/ /byang chub mchog la rab tu 'god/ /srog chags kun la phan pa'i phyir/ /chos kyi mchog kyang ston par byed/ /ye shes chen po de 'dra ste/ /sangs rgyas ye shes bsam mi khyab/ /de phyir 'dun pa rab skyed cing / /byang chub 'dun pa bla na med/ /sangs rgyas dang ni chos rnams dang / /'dus pa'i dam pa dge 'dun la/ /byang chub sems dpa' dpa' bo rnams/ /byang chub mchog tshol gus pa skyed/ /zhum pa med pa'i sems kyis kyang / /g.yel ba med par ri mo gyis/ /de nas 'od byed sangs rgyas su/ /ring por mi thogs 'thob par 'gyur/ /byang chub sems dpa' gang dag kyang / /zhing rnams stong nas lhags pa rnams/ /'jig rten sgron ma rab mthong ste/ /chos kyis mchog kyang 'chad par mdzad/ /dpa' bo chen po 'dren pa la/ /rin chen chen pos 'thor bar byed/ /mAn dA ra ba'i me tog dag /byang chub phyir ni 'thor bar byed/ /bla na med pa'i sangs rgyas zhing / /zhing 'di rab tu brgyan par byed/ /phyogs dang phyogs ni kun du yang / /rin po che yi dra bas g.yogs/ /ba dan dag kyang gdags byas shing / /rgyal mtshan bye ba mngon par sgreng / /du ma yi ni rgyan rnams kyis/ /zhing 'di shin du legs par brgyan/ /khang pa brtsegs pa byed par 'gyur/ /rin chen kun gyis rnam par spras/ /khang pa pu shu stegs bu dag /yid du 'ong ba grangs med rnams/ /gzhal med khang dang zla gam dang / /skar khung de bzhin bya rgya bres/ /rin chen sna tshogs brgyan pa yi/ /bdug pa'i snod du bdug pa bdugs/ /bdug pa dag ni bdugs pa yis/ /sangs rgyas zhing 'di rab tu gang / /de yi dri ni yid 'ong ba/ /zhing yang bye ba stong du ldang / /de dag kun du khyab byas nas/ /spos kyi char yang 50.121a rab tu 'bebs/ /gang gis dri de bsnams pa yang / /de dag sangs rgyas 'dren par 'gyur/ /de dag 'dod chags zug rngu spangs/ /zhe sdang sred pa yong med de/ /rgya mo chen po rnam par dral/ /mun pa kun kyang med par 'gyur/ /der ni rdzu 'phrul thob gyur te/ /dbang stobs byang chub yan lag dang / /bsam gtan thar pa rnam par reg /de dag sbyin par 'os par 'gyur/ /stan yang yid du 'ong ba rnams/ /bye ba phrag lnga rab bshams te/ /rin chen dra bas brgyan pa yi/ /gos rnams bye ba rab tu bting / /de la dpa' bo grags pa che/ /byang chub sems dpa' de dag 'dug /mtshan dang de bzhin dpe byad kyis/ /de dag shin du rnam par 'bar/ /sangs rgyas zhing 'di thams cad kyang / /rin chen shing gis legs brgyan te/ /yan lag brgyad ldan chus gang ba/ /rdzing bu dag ni rnam par sprul/ /rdzing bu'i 'gram na gnas pa rnams/ /de dag de las chu 'thungs nas/ /thams cad srad pa bsal nas ni/ /'jig rten gyi yang mchod rten 'gyur/ /tha dad pa'i zhing nas kyang / /byang chub sems dpa' lhags pa rnams/ /shAkya seng ge skyob pa yi/ /sangs rgyas bsngags pa rjod par byed/ /sgra de su dag thos pa ni/ /de dag 'jig rten 'dren par 'gyur/ /phan yon bsam gyis mi khyab pa/ /mdo sde 'di ni ngas rab bshad/ /pad ma bye ba bsam mi khyab/ /'dab ma dag ni gser las byas/ /snying po sbrul gyi snying po ste/ /der ni de dag rab tu sprul/ /yal ga dag kyang bai dUr+ya/ /khog pa dag ni shel yin te/ /ze ba dpal gyi snying po can/ /der ni mdzes pa rnams kyang sprul/ /de dag dri yang bsam mi khyab/ /rgyun mi 'chad par 'byung ba yis/ /zhing rnams bye ba kun du gang / /pad ma'i dri ni bsam mi khyab/ /yid du 'ong bar 'byung ba yi/ /dri de su yis bsnams pa yang / /de dag rab tu sems dga' zhing / /nad rnams thams cad zhi bar 'gyur/ /'dod chags zhi sdang gti mug rnams/ /ma lus par ni zad 'gyur te/ /de dag nyes pa gsum 50.121b zad nas/ /sangs rgyas bde ba sbyin par 'gyur/ /de dag las ni sgra 'byung ste/ /sangs rgyas sgra ni bsam mi khyab/ /dam pa'i chos dang dge 'dun sgra/ /rnam pa kun ni 'byung bar 'gyur/ /stong pa nyid dang mtshan med dang / /smon pa med pa'i sgra 'byung ste/ /de thos sems can bye ba mang / /phyir mi ldog par rab tu 'gyur/ /sgra de dag ni byung ba yang / /zhing rnams bye bar 'gro bar 'gyur/ /sems can bye ba bsam yas rnams/ /sangs rgyas ye shes 'god par byed/ /rma bya ka la ping ka dang / /shang shang te'u dang bya rnams kyang / /de dag rab tu sgra 'byin pa/ /sangs rgyas sgra ni bla na med/ /ku nal ri skegs khrung khrung dang / /khu byug dang ni bya rnams te/ /de dag sgra ni 'byin pa yang / /bsam gyis mi khyab chos sgra 'byin/ /ne tso ngang pa ka ran 'da'/ /ngur pa dang ni sa ra sa/ /de dag sgra rnams 'byin pa ni/ /bla med dge 'dun sgra yang 'byin/ /lha dag gi dang mi yi ni/ /bya rnams ji snyed gang yod pa/ /dkon mchog gsum gyi bsngags pa rnams/ /de dag kun du sgra yang 'byin/ /rin po che yi shing rnams ni/ /bye brag 'phags shing blta na sdug / /yid 'ong nor bu'i shing rnams kyang / /zhing 'di nyid du rnam par sprul/ /shing 'di kun la rgyan rnams kyi/ /chun po thams cad rab tu 'phyang / /sangs rgyas dag gi mthu yis ni/ /zhing 'di nyid du mngon par sprul/ /zhing 'di na ni mi snang ba/ /de lta bu yi bkod pa ni/ /zhing kun na yang yong med de/ /de tshe shin du bye brag 'phags/ /gong ma bzhin du 'di dag rnams/ shAkya seng ge skyob pas bshad/ /byang chub sems dpa' grags chen rnams/ /ye shes de la nem nur med/ /gang gi mtha' 'di rtogs pa ni/ /de dag 'jug pa bsam yas te/ /ye shes kyis ni rnam par 'phel/ /'bab chu dag gis rgya mtsho bzhin/ /de dag la yang mtha' mi rnyed/ /rgya mtsho dag ni 'thung ba bzhin/ /byang chub sems dpa' rnams kyi tshul/ /bsam gyis mi khyab 'di dag bshad/ /dpa' bo mtha' 'dir gnas pa yi/ /byang chub sems 50.122a dpa' grags ldan rnams/ /dbyangs kyi yan lag rnam 'byin pa/ /gang gA yi ni bye ma snyed/ /de bas dbyangs kyang bsam yas te/ /byang chub sems dpa' rlom sems med/ /rlom sems rab tu spangs pa na/ /byang chub tu yang nye bar 'gyur/ /de dag srog gi phyir yang ni/ /tshul khrims 'dral bar mi byed de/ /byang chub sems dpa' dka' thub brtan/ /de ni mi 'dral spyod par byed/ /'dod pa yi ni 'du shes kyis/ /de kun phyir yang mi 'dral te/ /'du shes thams cad spangs pa la/ /ting 'dzin dag ni dpag tu med/ /mnyam par bzhag pas de spyod de/ /ting 'dzin la yang chags pa med/ /chags pa med cing bag yod pas/ /de ni 'jig rten chags mi byed/ /'jig rten khams ni 'das nas kyang / /bde ba can du de 'gro ste/ /der song nas ni de yis kyang / /sangs rgyas 'od dpag med pa mthong / /byang chub sems dpa' dpa' bo gang / /mtshan rnams kyis ni legs par brgyan/ /mngon shes lnga ldan shes rab che/ /gzungs rnams spyod yul gyur pa dag /zhing rnams bye bar rab 'gro zhing / /sangs rgyas zhabs la phyag kyang 'tshal/ /sangs rgyas zhing ni bsam yas su/ /snang bar byed cing 'gro bar 'gyur/ /skyon rnams thams cad rab spangs shing / /nyon mongs thams cad rnam par sbyangs/ /nyon mongs thams cad rgyun bcad de/ /rgyal bar skye ba gcig gis gnas/ /zhing de nas ni mi rnams kyang / /ngan song du yang mi 'gro ste/ /zhing der ngan song thams cad kyang / /ma lus par ni chad par 'gyur/ /skyob pa 'od ni dpag med pa/ /'jig rten mgon pos bshad pa ste/ /de la nem nur ma byed cig /bde ba can du 'gro bar 'gyur/ /mdo sde rin chen 'di yi bsngags pa rnams/ /bud med gang thos sems kyang dad 'gyur ba/ /skyes bu mkhas pa mchog tu myur 'gyur te/ /rdzu 'phrul gyis ni zhing stong bye bar 'gro/ /mchod pa tshad med rnam mang ji snyed pa/ /zhing ni bye ba khrag 50.122b khrig gtams snyed du/ /skyes bu mchog la mchod pa de byas pas/ /byams pa'i sems la grangs dang char mi phod/ /tshul khrims ting 'dzin rtag tu bsnyen byas te/ /bsam gtan rnam thar de bzhin tshad med dang / /stong pa mtshan med rtag tu bsnyen byas na/ /ring por mi thogs 'jig rten bde gshegs 'gyur/ /byang chub sems dpa' tshul khrims tshogs gnas pa/ /des ni nga la mchod pa rab mchog byas/ /zad dus tha mar byang chub sems gnas pa/ /des ni sangs rgyas thams cad rtag tu mchod/ /zad dus mi zad pa la byang chub sems dpa' gang / /bde bar gshegs pas bstan pa'i chos mchog 'di srung ba/ /de dag nga yi sras te phyi dus chos skyong ba/ /de dag sangs rgyas bye ba stong gis yongs su gtad/ /mdo sde 'dzin pa'i phan yon gyi le'u ste sum bcu rtsa gsum pa'o// // 'phags pa ting nge 'dzin gyi rgyal po'i mdo/ bam po bcu gcig pa/ de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po ting nge 'dzin 'di 'dod pa dang / myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas mtshan ma med pa la gnas te de bzhin gshegs pa bzhugs pa 'am/ yongs su mya ngan las 'das pa dag gi de bzhin gshegs pa'i mchod rten rnams la mchod pa rgya cher bya ba la mngon par brtson par bya'o/ /gzhon nu byang chub sems dpa' sems dpa' chen po des sems can thams cad la dmigs pa'i sems bskyed pas ting nge 'dzin 'di 'dod pa dang / myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas mtshan ma med pa la gnas shing las kyi rnam par smin pa la mi re bas rang gi lus dang srog gis kyang de bzhin gshegs pa bzhugs pa 'am/ yongs su mya ngan las 'das pa dag gi mchod 50.123a rten la mchod pa mngon par 'du bya ba rgya cher bya'o/ /chos thams cad kyi rang bzhin mnyam pa nyid rnam par spros pa'i ting nge 'dzin 'di yang skad gsang mtho zhing yid du 'ong ba dang / bye brag tu 'phags pa'i tshig dang yi ge rgyun chags pas snying rje chen po la dmigs pa'i sems dang / yid la byed pas gzhan la rgya cher rab tu bstan par bya'o/ /rab tu gdon par bya'o/ /bshad par bya'o/ /de ci'i phyir zhe na/ gzhon nu chos thams cad kyi rtsa ba dang gzhi ni chos thams cad kyi rang bzhin mnyam pa nyid rnam par spros pa'i ting nge 'dzin gyi rgyal po 'di yin no/ /gzhon nu gang gi tshe byang chub sems dpa' sems dpa' chen po snying rje chen po dang / thabs kyis brtan pa'i brtson 'grus dang ldan pas de bzhin gshegs pa bzhugs pa 'am/ yongs su mya ngan las 'das pa dag gi de bzhin gshegs pa'i mchod rten rnams la mchod pa rgya cher bya ba la brtson par gyur cing / chos thams cad kyi rang bzhin mnyam pa nyid rnam par spros pa'i ting nge 'dzin gyi rgyal po 'di gzhan dag la yang rgya cher rab tu ston pa de'i tshe gzhon nu byang chub sems dpa' sems dpa' chen po de stong pa nyid dang / mtshan ma med pa dang / smon pa med pa'i rnam par thar pa'i sgo la gnas par 'gyur te/ de chos gang la yang mi dmigs so/ /byang chub sems dpa' sems dpa' chen po mi dmigs pa'i ting nge 'dzin gyi rnal 'byor la gnas pa ni smon lam thams cad la gnas par 'gyur ro/ /gzhon nu byang chub sems dpa' sems dpa' chen po smon lam thams cad la gnas pa ni bdag dang sems can kun gyi smon lam thams cad yongs su rdzogs par byed de/ ting nge 'dzin 'di yang myur du thob cing / myur du bla na med pa yang dag par rdzogs pa'i byang chub mngon par rdzogs par 'tshang rgya'o/ /gzhon nu rnam grangs 'dis kyang 'di ltar rig par bya ste/ gzhon nu sngon byung ba 'das pa'i dus na bskal pa grangs med pa bas ches grangs med pa/ yangs pa/ 50.123b tshad med pa/ bsam gyis mi khyab pa/ dpag tu med par gyur pa de'i tshe de'i dus na de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das dbyangs byin zhes bya ba 'jig rten du byung ngo / /gzhon nu de bzhin gshegs pa dgra bcom pa yang dag par rdzogs pa'i sangs rgyas dbyangs byin des sems can grangs med dpag tu med pa zag pa zad pa/ dgra bcom pa nyid la bkod de/ rab tu bkod cing yongs su mya ngan las 'das nas kyang sems can grangs med dpag tu med pa bla na med pa yang dag par rdzogs pa'i byang chub las phyir mi ldog par yang rab tu bkod nas yongs su mya ngan las 'das par gyur to/ /gzhon nu de'i tshe de'i dus na 'dzam bu'i gling na rgyal po dpal dbyangs zhes bya bas/ de bzhin gshegs pa yongs su mya ngan las 'das pa la mchod pa bya ba'i phyir mchod rten de bzhin gshegs pa'i ring bsrel gyi snying po can bye ba khrag khrig brgya stong phrag brgyad khri bzhi stong byas te/ mchod rten re re la yang mar me'i yon bye ba khrag khrig brgya stong phrag brgyad khri bzhi stong btsugs so/ /de bzhin du mchod rten re re la yang rol mo dang / sil snyan dang / me tog dang / bdug pa dang / spos dang / phreng ba dang / byug pa dang / phye ma dang / na bza' dang / gdugs dang / rgyal mtshan dang / ba dan bye ba khrag khrig brgya stong phrag brgyad khri bzhi stong phul lo/ /gzhon nu 'di ltar rgyal po dpal dbyangs kyis mchod rten de bzhin gshegs pa'i ring bsrel gyi snying po can la mchod pa byas nas byang chub sems dpa' bye ba khrag khrig brgya stong phrag brgyad bcu'i byang chub sems dpa' mang po bsogs nas byang chub sems dpa' sems dpa' chen po de dag thams cad la bde ba'i yo byad thams cad kyis 50.124a mchod pa la brtson par gyur to/ /byang chub sems dpa' sems dpa' chen po de dag thams cad kyang chos smra ba yin te/ spobs pa rgyun mi 'chad pa/ ting nge 'dzin rab tu thob pa/ chags pa med pa'i gzungs rab tu thob pa/ yang dag pa'i yon tan gyi chos ston pa/ yongs su dag pa'i chos ston pa/ byang chub sems dpa'i dbang dam pa'i pha rol tu phyin pa sha stag go/ /gzhon nu de'i tshe de'i dus na/ 'khor de'i nang na byang chub sems dpa' sems dpa' chen po bde bas byin zhes bya ba yod de/ byis pa gzhon nu sgra nag pa/ dang po'i lang tsho dang ldan pa/ na tshod dar la bab pa/ 'dod pa la rnam par ma rtses shing / gzhon nur tshangs par spyad pa/ bsnyen par rdzogs nas lo gcig lon pa zhig yod do/ /gzhon nu de'i tshe de'i dus na rgyal po dpal dbyangs kyis byang chub sems dpa' sems dpa' chen po de dag la gsol ba btab pa/ 'di lta ste/ pha rol du phyin pa drug dang ldan pa yang dag par sdud pa/ byang chub sems dpa'i sde snod gzungs chen po dang / thabs la mkhas pa dang / dbang dang 'dul ba chags pa med pa mngon par bsgrub pa'i phyir byang chub sems dpa' sems dpa' chen po de dag la gsol ba btab nas/ de'i nub mo mchod rten de bzhin gshegs pa'i ring bsrel gyi snying po can rnams kyi mdun du mar me'i yon bye ba khrag khrig brgya stong dag rab tu 'bar bar byas te/ khyams kyi dkyil 'khor yang phyag dar byas shing chag chag btab nas rab tu byug pa byas/ me tog mngon par bkram zhing / mal stan sna tshogs bting ste/ rgyal po dpal dbyangs de btsun mo'i 'khor dang bcas/ grong dang yul mi 'khor dang bcas/ grong mir bcas pa khyim gyi nang nas byung ste/ rol mo dang sil snyan dang / pheg rdob pa dang / me tog dang / bdug pa dang / spos dang / phreng ba dang / byug pa dang / phye ma dang / na bza' dang / gdugs dang / rgyal mtshan dang / ba dan rnams thogs nas mchod rten de bzhin gshegs pa'i ring bsrel gyi snying po can rnams 50.124b la mchod pa byas nas chos mnyan pa'i phyir btsun mo'i 'khor dang bcas te khang thog tu dong ngo / /lha dang mi'i 'khor kyang chos nyan pa'i phyir mang du tshogs te byang chub sems dpa' bde bas byin gyis de dag mthong ba dang / mar me'i yon bye ba khrag khrig brgya stong mang po dag rab tu 'bar bar byas pas de'i 'od kyis gcig tu khyab ste/ lha dang mi'i skye bo mang po rnams chos nyan par tshogs par rig nas de 'di snyam du sems te/ bdag ni theg pa chen po la zhugs pa yin na/ da bdag ting nge 'dzin 'di 'dod pa'i phyir de bzhin gshegs pa la mchod pa zhig bya ste/ de bzhin gshegs pa la mchod pa ji lta bus lha dang mi dang lha ma yin du bcas pa'i 'jig rten ngo mtshar du 'gyur ba dang / yi rangs pa dang / dga' ba dang / mgu ba dang / yid bde ba skye bar 'gyur zhing / chos kyi snang ba thob pa dang / rgyal po dpal dbyangs kyis de bzhin gshegs pa la mchod pa byas pa thams cad dang ldan pa 'di'ang zil gyis mnan te/ rgyal po dpal dbyangs btsun mo'i 'khor dang zhabs 'bring bar bcas pa yang ngo mtshar du gyur cing yi rangs pa dang / rab tu dga' ba dang / mgu ba dang / yid bde ba skye bar 'gyur bar mchod par bya'o snyam mo/ /de nas byang chub sems dpa' sems dpa' chen po bde bas byin de ltar sems dga' zhing yid bde ba skyes te/ chos nyan pa'i skye bo'i tshogs chen po 'dus par rig nas de'i nub mo de bzhin gshegs pa'i mchod rten gyi mdun du 'dug nas lag pa g.yas pa ras kyis dkris te 'bru mar gyi nang du bcug go/ /'bru mar gyi nang du bcug nas 'bar bar byas so/ /de nas byang chub sems dpa' sems dpa' chen po bde bas byin lhag pa'i bsam pa la zhugs pa/ lhag pa'i bsam pas bla na med pa yang dag par rdzogs pa'i byang chub tu zhugs shing / byang chub yongs su tshol ba'i lag pa g.yas pa de ltar 'bar yang sems dang bzhin gyi mdog 'gyur ba med do/ /gzhon nu de nas byang chub sems dpa' sems dpa' chen po bde bas byin gyi lag pa g.yas pa bsregs 50.125a nas rab tu 'bar zhing mer gyur te/ me lce gcig tu 'bar bar gyur ma thag tu de'i tshe sa chen po 'di yang rab tu g.yos par gyur to/ /de'i lag pa 'bar bar byas pa'i 'od des mar me yon du phul ba bye ba khrag khrig brgya stong phrag du ma rnams mgo mog por byas par gyur te/ phyogs thams cad du'ang snang ba chen po byung ngo / /'od des phyogs thams cad snang bar gyur te/ kun du khyab par gyur pa dang / de dga' zhing yid bde ba skyes nas chos thams cad kyi rang bzhin mnyam pa nyid rnam par spros pa'i ting nge 'dzin 'di'ang skad 'jam zhing yid du 'ong ba tshig bye brag tu 'phags pa dang / tshig dang yi ge rgyun chags pas 'khor de dag thams cad la rgya cher go bar byed cing yang dag par rab tu bstan to/ /der sum bcu rtsa gsum ris kyi lha khri nyis stong chos nyan par 'dus pa de dag dga' zhing yid bde ba skyes nas lha'i mchod pa sna tshogs byed par gyur to/ /lha'i bu mo rnams kyang lha'i rol mo dag byed do/ /rgyal po dpal dbyangs khang pa'i steng na 'dug pa bdag gi mi mang pos bskor cing mdun du bdar te/ btsun mo'i 'khor gyi nang na 'dug pa/ gso sbyong yan lag brgyad dang ldan pa yang dag par bzung bas byang chub sems dpa' sems dpa' chen po bde bas byin gyi lag pa 'bar bar byas te/ 'od de dag thams cad zil gyis mnan cing lha'i 'od mi'i las 'das pas snang bar byas pa mthong nas de 'di snyam du sems so/ /'di ni byang chub sems dpa' sems dpa' chen po mngon par shes pa chen po thob pa yin no zhes byang chub sems dpa' sems dpa' chen po bde bas byin la shin du dga' ba dang / dad pa dang gus pa nye bar bzhag ste/ ri mor bcas shing dge ba'i rtsa ba dang / bsod nams kyi phung po chen pos brtan pas btsun mo'i 'khor brgyad bcu dang lhan cig khang pa'i steng nas bdag nyid mchongs te byang chub sems dpa' sems dpa' chen po bde bas byin blta ba dang rab tu dga' bar bya ba'i phyir mchongs te song ngo / /de gus pa las byung ba'i dge ba'i rtsa bas tshe de nyid la 50.125b 'khor dang bcas pa/ lha dang klu dang gnod sbyin dang dri za dang lha ma yin dang nam mkha' lding dang / mi 'am ci dang lto 'phye chen po rnams kyis yongs su bzung ba thob bo/ /de lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po dag gis yongs su bzung bas rgyal po dpal dbyangs kyang 'khor dang bcas pa khru stong phrag brgyar tshang ba'i khang pa'i steng nas mchongs na/ de'i lus la gnod pa 'am/ sems la gnod pa'am/ sems zhum par gyur pa med do/ /de nas rgyal po dpal dbyangs lag pa gnyis bsgreng ste/ skye bo'i tshogs chen po dang lhan cig 'di ltar byang chub sems dpa' sems dpa' chen po bde bas byin gyi lag pa bsregs shing rab tu 'bar ba mthong nas skad chen po phyung ste cho nges btab bo/ /de nas rgyal po de skye bo'i tshogs chen po dang lhan cig ngu zhing mchi ma phyung nas byang chub sems dpa' sems dpa' chen po bde bas byin gyi mdun du 'dug go/ /gzhon nu byang chub sems dpa' sems dpa' chen po bde bas byin gyis rgyal po dpal dbyangs mthong ste/ mthong nas de la smras pa/ ci'i slad du rgyal po chen po khyod skye bo'i tshogs chen po 'di dag dang bdag gi mdun na bzhugs shing skad chen po phyung ste/ cho nges btab nas bshums shing mchi ma 'byin pa mdzad/ de skad ces smras pa dang / rgyal po dpal dbyangs kyis byang chub sems dpa' sems dpa' chen po bde bas byin la tshigs su bcad pa'i dbyangs kyis smras pa/ shes rab chen po bde bas byin/ /chos smra ba ni mkhas pa yi/ /yan lag ma tshang rig nas ni/ /skye bo 'di dag de phyir du/ /gzi brjid phung pos 'phags pa yi/ /'di lta bu yi gzugs 'di yang / /lag pa nyams par shes nas ni/ /bdag kyang shin du sdug bsngal lo/ /khyod kyi lag pa 'bar byas pa/ /de yi 'od ni phyogs bcur btang / /khyod las byung ba'i lha rdzas kyis/ /mar me 'di dag mi gsal byas/ /sa 'di rab tu g.yos gyur te/ /khyod kyi sems ni zhum pa med/ / 50.126a de nas bdag gi sems skyes pa/ /mkhas pa tha mal ma yin snyam/ /bdag ni btsun mo'i 'khor bcas pa/ /khru ni stong phrag brgya pa yi/ /khang pa'i steng nas mchongs gyur na/ /bdag gi lus la gnod pa med/ /legs so ye shes ngo mtshar khyod/ /legs so sems kyang bla na med/ /brtson 'grus rab brtsams legs pa ste/ /bsam pa che ba legs pa yin/ /gang gi lag pa 'bar byas kyang / /khyod la nam yang g.yo ba med/ /dga' zhing rangs pa skyes nas su/ /phyir yang chos ni rab tu 'chad/ /ji ltar zla ba nya ba dang / /nam mkha'i dkyil na nyi ma bzhin/ /ri rab ri yi rgyal po ltar/ /grogs po de ltar shin du mdzes/ /bdag kyang de bzhin mkhas pa yi/ /smon lam yongs su rdzogs par bgyi/ /lus la phangs pa rab spangs te/ /bdag gis srog chags don rnams bgyi/ /chos kyi dga' bas rangs gyur te/ /bdag gi dga' ba bsam mi khyab/ /'di ltar yan lag ma tshang ba/ /des ni rab tu sdug bsngal lo/ /lha dang klu yi mchod pa yis/ /bde bas byin gyis rgyal po la/ /mtha' yas pa yi spobs pa yis/ /tshigs su bcad pa 'di dag smras/ /gang la lag pa med pa yang / /de ni yan lag ma tshang min/ /su la tshul khrims med pa dag /de ni yan lag ma tshang yin/ /rus pa yi ni lus 'di yis/ /bsam gyis mi khyab sbyin pa'i gnas/ /'jig rten kun gyi mchod pa'i rten/ /de bzhin gshegs pa bdag gis mchod/ /stong gsum dag ni mtha' yas pa/ /rin po che yis yongs bkang ste/ /sangs rgyas ye shes tshol ba'i phyir/ /'jig rten mgon la rab tu sbyin/ /'jig rten pa yi mchod yod kyang / /su dag chos rnams stong rig nas/ /lus dang srog kyang gtong ba yi/ /mchod pa de dag bsam mi khyab/ /bden pa'i tshig ni brjod par bgyi/ /rgyal po chen po bdag la gson/ /skye bo'i tshogs 'di thams cad kyang / /tshigs bcad 'di yi don rig bgyi/ /bden pa gang gis sangs rgyas su/ /'jig rten mchod rten bdag 50.126b 'gyur na/ /bden pa de yis sa 'di yang / /rnam pa drug tu g.yos gyur cig /tshig 'di dag ni smras pa dang / /sa yang rab tu g.yos par gyur/ /ngo mtshar gyur cing rmad byung ste/ /lha rnams bye ba rab tu dga'/ /lha dang mi dag dga' nas ni/ /byang chub tu yang sems bskyed de/ /dpag med bsam gyis mi khyab pa/ /theg pa mchog la gnas par gyur/ /dge slong bde bas byin pa yis/ /ji snyed kyi ni don byas pa/ /de ni mi zad bsam mi khyab/ /sangs rgyas dag gi ye shes 'jug /bden pa gang gis chos de ni/ /lag pa zhes kyang bya med na/ /bden pa de yis sngon ltar bdag /lag pa myur du byung bar shog /bden pa gang gis chos de ni/ /bde bas byin pa yod ma yin/ /phyogs bcu rnams su btsal na yang / /stong pa yin pas mi dmigs so/ /sgra gang 'byung bar 'gyur ba yang / /de ni stong par rig par gyis/ /sgra ni brag cha lta bu ste/ /chos rnams de ltar shes par gyis/ /nam zhig 'jigs pa med 'gyur zhing / /stong pa rtogs par khong du chud/ /bden pa yi ni tshig de yis/ /'jig rten thams cad 'tshig mi 'gyur/ /srid gsum sems can ji snyed pa/ /lha rnams dang ni mi rnams kyang / /thams cad mkhyen pa'i gzi brjid kyis/ /thams cad mnyam par bzhag par shog /ji snyed lha dang mi dag gis/ /'tshe bar gyur pa ci yod pa/ /phyir mi ldog pa'i gzi brjid kyis/ /de dag thams cad zhi bar shog /tshigs bcad 'di dag bshad pa dang / /lag pa yang ni slar skyes te/ /bde bas byin pa de yi lus/ /mtshan rnams kyis ni rnam par brgyan/ /lha yang bye ba phrag stong rnams/ /bar snang la ni 'dug nas su/ /de tshe me tog mAn dA ras/ /dge slong de la 'thor bar byed/ /mi ma yin pa'i me tog gis/ /'dzam bu'i gling 'di gang bar gyur/ /lha mo bye ba khrag khrig rnams/ /glu dbyangs rol mo rab tu byed/ /de tshe bde bas byin pa yis/ /sgra 'di dag ni phyung ba na/ /rnam 'phrul 'di ni sangs rgyas dag /bye ba stong gis gzigs par gyur/ / 50.127a rang rang gi ni zhing dag tu/ /dge slong pha dang dge slong ma/ /dge bsnyen ma dang dge bsnyen la/ /grags pa chen po go bar mdzad/ /dge slong bde bas byin pa de/ /mkhas shing stobs kyang che ba ste/ /sangs rgyas kyi ni ye shes phyir/ /des ni lag pa 'bar bar byas/ /de yis zhing rnams stong dag dang / /gang gA yi ni bye ma snyed/ /mar me des ni snang byas te/ /sreg pa'i bskal pa byung ba bzhin/ /me tog dang ni phye ma yis/ /zhing rnams thams cad gang bar gyur/ /sa gzhi dag nas yan chad du/ /pus nub tsam du gang bar gyur/ /rin chen me tog thams cad kyis/ /sangs rgyas zhing ni gang bar gyur/ /bde bas byin la mchod pa'i phyir/ /klu rnams mu tig char pa 'bebs/ /rin chen bkod pa thams cad kyis/ /zhing 'di rab tu brgyan par gyur/ /bde bas byin la mchod pa'i phyir/ /mu tig rin chen shin du bkram/ /lha dang klu dang gnod sbyin dang / /mi 'am ci dang lto 'phyer bcas/ /gang gA yi ni bye ma snyed/ /byang chub mchog la zhugs par gyur/ /bya rgod spungs pa'i ri la yang / /sangs rgyas shAkya seng ge ni/ /dge slong dag gi dge 'dun mdun/ /rgyal ba seng ge'i sgra sgrog pa/ /bskal pa bye ba stong du ni/ /byang chub spyad pa spyod pa na/ /nga ni bde bas byin par gyur/ /ma pham pa ni dpal dbyangs yin/ /dge slong bde bas byin pa ni/ /mthong ma thag tu de yi tshe/ /bud med dag kyang mtha' yas pa/ /bud med dngos po rnam par log /mi dbang gis ni lung bstan te/ /de dag phyir yang ldog pa med/ /'jig rten kun gyi 'dren pa ste/ /rang 'byung 'gyur zhes lung yang bstan/ /sbyangs pa'i yon tan bstan pa yi/ /mkhas pas mdo sde 'di thos nas/ /lus la phangs par ma byed par/ /chos 'di rjes su bslab par gyis/ /bde bas byin gyi le'u ste sum bcu rtsa bzhi pa'o// // de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po ting nge 'dzin 'di 'dod pa dang / myur du 50.127b bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas dge ba'i rtsa ba rnams la nye bar gnas na chos kyi sbyin pa'am zang zing gi sbyin pa la brtson par bya'o/ /byang chub sems dpa' sems dpa' chen po des sbyin pa de yang bsngo ba bzhis yongasu bsngo bar bya'o/ /bzhi gang zhe na/ 'di lta ste/ thabs la mkhas pa gang gis sangs rgyas bcom ldan 'das de dag bla na med pa yang dag par rdzogs pa'i byang chub mngon par rdzogs par sangs rgyas pa'i thabs mkhas pa de dag thob par 'gyur bar sbyin pa 'di'i dge ba'i rtsa ba bskyed par bya'o zhes bya ba 'di ni bsngo ba dang po'o/ /dge ba'i bshes gnyen gang dag las thabs mkhas pa thos shing 'dzin par 'gyur ba dang / kun chub par bya ba dang 'chang ba dang klog par 'gyur ba dang / gang gis bla na med pa yang dag par rdzogs pa'i byang chub mngon par rdzogs par 'tshang rgya ba'i dge ba'i bshes gnyen de dag dang bdag rtag tu 'grogs par gyur cig ces de ltar sbyin pa'i dge ba'i rtsa ba bskyed par bya'o zhes bya ba 'di ni bsngo ba gnyis pa'o/ /longs spyod thob pa gang 'jig rten thams cad 'tsho bar 'gyur ba'i longs spyod thob pa de dag dang bdag phrad par gyur cig ces de ltar sbyin pa'i dge ba'i rtsa ba des bskyed par bya'o zhes bya ba 'di ni bsngo ba gsum pa'o/ /bdag gi lus grub pas sems can rnams la chos kyi phan gdags pa dang / zang zing gi phan gdags pa dang phan gdags pa gnyis kyis phan 'dogs par 'gyur ba'i bdag gi lus grub par gyur cig ces sbyin pa'i dge ba'i rtsa ba bskyed par bya'o zhes bya ba 'di ni bsngo ba bzhi pa ste/ gzhon nu byang chub sems dpa' sems dpa' chen pos bsngo ba 'di bzhis dge ba'i rtsa ba rnams bsngo bar bya'o/ /gzhan yang gzhon nu byang chub sems dpa' sems dpa' chen po rab tu byung ba yang rung khyim pa yang rung ste/ ting nge 'dzin 'di 'dod pa dang myur du 50.128a bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas byang chub sems dpa' sems dpa' chen po dag la g.yo med pas bsten par bya/ bsnyen par bya/ rim gro bya'o/ /de la g.yo med pa de ni ting nge 'dzin 'di 'dzin pa'i dge slong byang chub sems dpa' sems dpa' chen po gang na bar gyur cing nad mi bzad pas btab par gyur pa la rang gi sha dang khrag gis kyang dge slong de na ba de las bslang bar spro bar bya'o/ /gzhon nu byang chub sems dpa' sems dpa' chen po lhag pa'i bsam pa phun sum tshogs pa ting nge 'dzin 'di 'dod pa dang / myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas g.yo ba med cing 'jigs pa med pas rang gi sha dang khrag kyang yongs su btang ste/ dge slong chos smra ba na ba las bslang bar bya'o/ /gzhon nu rnam grangs des 'di ltar rig par bya ste/ gzhon nu sngon byung ba 'das pa'i dus na bskal pa grangs med pa bas kyang ches grangs med pa/ yangs pa/ tshad med pa/ bsam gyis mi khyab pa/ dpag tu med pa de'i tshe de'i dus na de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das smon lam bsam gyis mi khyab pa/ khyad par du 'phags pa'i rgyal po zhes bya ba 'jig rten du byung ste/ gzhon nu smon lam bsam gyis mi khyab pa khyad par du 'phags pa'i rgyal po de bzhin gshegs pa dgra bcom pa yang dag par rdzogs pa'i sangs rgyas de gang gi nyin par bla na med pa yang dag par rdzogs pa'i byang chub mngon par rdzogs par sangs rgyas pa de'i nyi ma ma 'das par sangs rgyas kyi 'phrul pa grangs med dpag tu med pa mngon par sprul nas sems can tshad med pa gdul ba byas te/ zag pa zad pa dgra bcom pa nyid la bkod 50.128b nas sems can tshad med pa yang bla na med pa yang dag par rdzogs pa'i byang chub las phyir mi ldog pa la bkod nas nyi ma de ma 'das par yongs su mya ngan las 'das so/ /bcom ldan 'das yongs su mya ngan las 'das pa de'i dam pa'i chos lo bye ba khrag khrig brgya stong du gnas par gyur to/ /gzhon nu bcom ldan 'das smon lam bsam gyis mi khyab pa khyad par du 'phags pa'i rgyal po de bzhin gshegs pa dgra bcom pa yang dag par rdzogs pa'i sangs rgyas kyi bstan pa nub pa'i dus kyi tshe lnga brgya tha mar gyur pa na dge slong dmigs par lta ba mang po byung ste/ de dag 'di lta bu'i mdo sde la mi sred mi mos shing phyir zlog par byed/ spong bar byed de/ mdo sde 'di lta bu 'dzin pa'i dge slong dag la yang gnod par byed cing srog kyang gcod par byed de/ rnyed pa dang bkur sti la chags pa de dag gis mdo sde 'di lta bu 'dzin pa'i dge slong stong srog bcad par gyur to/ /gzhon nu de'i tshe de'i dus na rgyal po ye shes kyi stobs shes bya ba 'dzam bu'i gling la dbang ba/ dam pa'i chos yongs su 'dzin pa/ sngon gyi smon lam phun sum tshogs pa zhig byung ste/ gzhon nu de'i tshe de'i dus na 'dzam bu'i gling 'dir dge slong yang dag blo gros shes bya ba ting nge 'dzin 'di 'dzin pa/ chos smra ba rgyal po de'i pho brang du 'gro zhing / dge ba'i bshes gnyen byed pa/ phan par 'dod pa/ snying brtse ba don du 'dod pa zhig byung ste/ rgyal po de yang de la rgyun mi chad par blta bas mi ngoms te rtag tu 'dod par gyur to/ /de yang bstan pa dang chos kyi gtam bya ba dang nye bar 'gro ba dang / bsnyen bkur bya ba dang yongs su dri ba dang / gzung ba dang tshig gis go bar byed nus shing dge slong chos smra ba de/ sems can dag gi g.yo ba dang spyod lam dang mos pa dang khams dang bag chags la mkhas te/ sems can rnams kyi dbang po dang stobs dang brtson 'grus kyi rim pa shes shing / khams dang bag chags la yang mkhas/ bden pa dang mtshams sbyar ba la yang mkhas/ mtshams bral ba dang 50.129a tshig gi lan gtan la dbab pa la yang mkhas/ spobs pa zab cing sems can thams cad 'dul ba'i cho ga la yang mkhas/ gsong por smra zhing bzhin la khro gnyer med pa/ sems chen por gyur pa la gnas pa/ snying rje chen po la brtson pa/ pha rol rgol ba thams cad kyis zil gyis ma non pa yin no/ /gzhon nu de'i tshe de'i dus na rgyal po ye shes kyi stobs kyi bu mo skyes nas lo bcu drug lon pa/ byad bzhin bzang zhing mdzes la blta na sdug pa/ kha dog bzang zhing rgyas pa'i mchog dang ldan pa ye shes ldan zhes bya ba zhig byung ste/ de'i slob dpon ni dge slong yang dag blo gros shes bya ba yin te/ dge ba'i chos rnams la yang dag par ston pa/ yang dag par gzeng stod pa/ yang dag par rab tu dga' bar byed pa/ yang dag par 'dzin du 'jug pa yin no/ /gzhon nu de'i tshe de'i dus na dge slong chos smra ba de'i brla gnyis la 'brum bu me dbal nag po chen po gso dka' zhing sman dkon pa zhig byung ste/ na ba de sman pa dag gis spangs par gyur to/ /de nas rgyal po ye shes kyi stobs btsun mo'i 'khor dang bcas pa sras dang sras mo dang zhabs 'bring bar bcas pa dge slong de na bar rig nas rab tu ngu zhing mchi ma byung ngo / /bud med brgyad khrir bcas pa dang grong dang grong khyer gyi mi rnams su bcas pa dang yul 'khor ba dang grong mdab pa dang yul gyi mi dang rtsis pa dang blon po dang blon po chen po dang sgo ba dang 'khor rnams su bcas pa de dag thams cad kyang dge slong de na bar thos nas rab tu ngu zhing mchi ma 'byin te/ dge slong 'di 'chi ba'i dus byed par gyur ta re zhes skad 'dzer to/ /gzhon nu de'i tshe de'i dus na rgyal po ye shes stobs la lha mo sngon snag gi gnyen mtshams su gyur pa zhig yod de/ de rgyal po de'i phyi bzhin 'brang bas rmi lam du bstan pa/ rgyal po chen po gal te dge slong 'di la mi'i sha dang khrag sar pa ma rul pas 'brum bu me dbal nag po 'di la byugs te/ mi'i sha sar pa ma rul pa las ro sna tshogs su g.yos 50.129b byas te byin na dge slong 'di nad 'di las 'tsho bar 'gyur ro zhes zer ro/ /de nas rgyal po ye shes kyi stobs mtshan mo de 'das pa dang gnyid kyis log pa las sad de btsun mo'i 'khor gyi nang du 'ongs nas rmi lam gyi rnam pa de dag btsun mo'i 'khor rnams la bzlas te/ nga'i rmi lam 'di lta bu zhig mthong ngo zhes bzlas nas go bar byas na/ gzhon nu de ltar bud med kyi khyim de dang rgyal po'i pho brang de nas dge slong de la rtsi de sbyin par su yang spro ba med do/ /rgyal po'i bu mo ye shes ldan yang rmi lam de lta bu zhig rmis nas sad pa dang btsun mo'i 'khor gyi nang du song ste/ rmi lam gyi rnams pa de dag ma dang zhabs 'bring ba rnams la gtam byas kyang dge slong de la rtsi de sbyin par su yang spro ba med do/ /de nas rgyal po'i sras mo ye shes ldan de dga' zhing mgu yi rangs shing rab tu dga' ba dang mos pa dang yid bde ba skyes nas 'di lta bur brtson par byas te/ 'di ltar bdag gis rtsi 'di dag bdag gi lus las bcad de ji skad bstan pa bzhin du khrag sar pa dang sha sar pa sbyin par bya'o/ /rgyal po'i pho brang na bdag ni thams cad kyi nang na gzhon zhing chung ste/ lus dang ngag dang yid kyi las kyang kun nas nyon mongs pa ma yin la/ kun nas nyon mongs pa med pa'i ye shes btsal bar 'dod pas chos smra ba kun nas nyon mongs pa med pa la bdag gi lus kyi sha dang khrag phul te/ dge slong 'di ci nas nad 'di las sos par bya'o snyam mo/ /de nas rgyal po'i bu mo ye shes ldan de rang gi gnas su song nas mtshon rnon po thogs te chos la zhugs pa'i yid kyis bdag gi brla las sha bcad nas/ ro sna tshogs dang ldan pa gya nom par g.yos byas nas/ khrag kyang thogs te 'phags pa de'i drung du song nas rgyal po ye shes stobs kyi mdun du 'dug ste/ khrag gis 'brum bu me dbal nag po de byugs nas/ g.yos legs par byas pa'i zas de dge slong de zar bcug ste/ 'drangs par byed cing legs par bstabs so/ /de 50.130a nas dge slong de mi shes ma rig ma dogs pas zas de zos so/ /zas de zos ma thag tu dge slong de'i na tsha thams cad med par gyur te nad de thams cad kyang sos so/ /de yongs su gdung ba dang bral zhing bde ba dang ldan pas de lta de lta bur chos bstan te/ btsun mo'i 'khor de dang grong pa dang yul mi dang yul 'khor ba 'dus pa de dag las srog chags khri nyis stong bla na med pa yang dag par rdzogs pa'i byang chub tu sems skyes so/ /de nas rgyal po ye shes stobs kyis bdag gi bu mo la tshigs su bcad pa 'di dag smras so/ /bu mo khyod kyis khrag 'di ga las rnyed/ /mi yi sha 'di dag kyang gang nas blangs/ /bu mo khyod kyis kha zas 'di byas pas/ /chos smra 'di yang 'di ltar bde bar gyur/ /sna tshogs bro dang ldan pa'i g.yos byas pa/ /bsad pa yin nam de ste shi ba rnyed/ /bu mo khyod kyis khrag 'di ga las rnyed/ /des ni sdig pa'i nad las 'di thar byas/ /bu mo des ni pha yi tshig thos nas/ /bu mo ye shes ldan gyis 'di skad smras/ /zhum sems med par tshig kyang rab smras te/ /bdag ni ci mchi yab khyod gsan du gsol/ /lha yis bstan pa'i rmi lam dag /bdag gis mthong bar gyur to yab/ /sa yi bdag po bdag la gson/ /yang dag don ni mkhyen par mdzod/ /lha des bdag la 'di skad ston/ /mi yi sha dang khrag rnams ni/ /dge slong 'di la sus byin na/ /sdig pa'i nad las thar bar 'gyur/ /bdag ni mal nas langs nas su/ /btsun mo'i 'khor du mchis nas ni/ /bdag gis de tshe rmi lam rnams/ /ma yi gtso la bzlas shing smras/ /bran mo rnams la bdag gis bsgo/ /'di lta bu dag su byed nus/ /mi yi khrag dang sha rnams ni/ /khu bar btsos pa g.yos byas te/ /zas su rab tu sbyin bya zhing / /khrag dag gis kyang byugs nas su/ /me dbal nag po 'di las kyang / /dge slong ji ltar thar bar bya/ /cho ga myur du ma byas na/ /rtsi sman dag ni ma byas pas/ /dge slong 'di ni nad 'di yis/ /myur du 'chi ba'i dus byed 'gyur/ /rang gi sha dang khrag gtong ba/ /srid pa gsum na sems can gang / / 50.130b mkhas pa su zhig 'di mthong nas/ /lus la yang ni gnas par byed/ /btsun mo'i 'khor du bdag gis go bar bgyis/ /bud med gcig kyang sbyin zhes mi mchi nas/ /bdag la dge slong de phangs bdag phangs kyang / /byang chub phyir ni bdag gis sha khrag btang / /byang chub zhi ba mya ngan med tshol ba/ /de dag lus la mos shing rten pa min/ /bdag nyid la yang rdul tsam phangs pa med/ /bdag nyid btang yang yid ni mi dga' med/ /btsun mo'i 'khor rnams de thos nas/ /thams cad rmugs pa bzhin du gyur/ /bya ba de dag sbyar bar ni/ /su yang spro bar ma gyur to/ /de nas bdag gi sems skyes pa/ /dge slong 'di ni zas byin te/ /bdag gi sha yang bcad nas ni/ /khrag rnams kyis kyang bsku bar bya/ /bdag gi brla las sha bcad de/ /sha rnams dang ni khrag blangs nas/ /sha yi sna gu bdag gis bskal/ /bro ba sna tshogs g.yos legs bgyis/ /dge slong na ba de la ni/ /mi sha yi ni kha zas dang / /khrag rnams kyis kyang byug pa dag /bdag gis yab kyi spyan sngar stsal/ /mi yi bdag po bdag gi tshig la gson/ /sa bdag mi sha dag ni ma rnyed nas/ /bdag gi brla las sha dag bcad nas su/ /de bsgrubs chos smra 'di la stsal pa lags/ /bdag gis bla med byang chub don phyir du/ /rang gi lus kyis don chen 'di dag bgyis/ /dge slong 'di yang thar bgyis mi bde med/ /bdag gi bsod nams dag ni tshad med bgyis/ /bu mo de la rgyal pos 'di skad smras/ /bu mo khyod kyis rtsir ni bya ba'i phyir/ /ji ltar lus las rang gi sha bcad na/ /khyod kyi lus la na tshar ma gyur tam/ /rgyal po'i bu mo blo ldan 'jigs med pas/ /de tshe smras pa rgyal po sa bdag gson/ /las kyi rnam smin bsam yas de 'dra bas/ /de dag gsan nas tshul bzhin mkhyen par mdzod/ /yab cig sdig pa'i las rnams bgyis pa yis/ /sems can sems dmyal mi bzad ltung gyur te/ /sha med gyur nas phyir yang sha dag skye/ /las kyi 'bras bu bsam gyis mi khyab gzigs/ / 50.131a sdig pa'i las kyis sha khrag med gyur cing / /skad cig tu yang sha khrag 'byung 'gyur na/ /dge ba'i las dang mos pa de dag las/ /sha dang khrag rnams skye ba smos ci 'tshal/ /sha bcad bdag la na tsha ma mchis te/ /khrag phyung bdag la g.yo ba yong ma mchis/ /bdag gi sha rnams thams cad bcad na yang / /chos kyi lus la rma dang skyon ma mchis/ /bdag gis chos la dga' ba mchog bskyed nas/ /rang gi brla las sha bcad rab tu stsal/ /rma dang sdug bsngal bdag la ma mchis te/ /bdag gi lus kyang sngon gyi bzhin du gyur/ /'di 'dra ba yi chos smra 'di lta bu/ /brgya lam na yang 'dzam bu'i gling du 'byung / /yab cig u dum ba ra'i me tog bzhin/ /bskal pa bye ba mang la res 'ga' gda'/ /ji ltar 'dzam bu'i chu bo gser 'bar ba/ /sems can lta bas ngoms par mi 'gyur te/ /de bzhin du ni chos smra de 'dra ba/ /lha dang mi dag mthong bas chog mi shes/ /skye bo skom pa dang ba'i chu 'thungs nas/ /skom pas gdungs pa skom pa med par 'gyur/ /de bzhin chos smra mkhas pa 'di dag kyang / /chos kyi bdud rtsis srog chags sred pa sel/ /dge slong mi bzad na ba 'di la yang / /sha dang khrag ni bdag gis rab tu btang / /chos smra ba ni me dbal rab zhi ste/ /bdag gis sangs rgyas bsngags pa'i rim gro bgyis/ /mang du thos shing spyod dang ldan pa ste/ /ting 'dzin dam pa 'di ni 'dzin pa la/ /'di ltar bdag gis rang gi sha btang bas/ /chos 'di rnams kyang bdag gis thob par shog /ji ltar spos rab dri zhim yid 'ong ba/ /dus 'brang dang ni tsan dan dmar po yi/ /dri dag phyogs bcu rnams su ldang ba ltar/ /chos smra de yi dri yang de bzhin no/ /ji ltar ri rab phyogs su rab snang zhing / /kun nas mdzes pa mthong na dga' bar 'gyur/ /phyogs su rab tu snang zhing gsal bar bgyid/ /de bzhin chos smra 'di yang ri rab 'dra/ /ji ltar mchod rten la la zhig pa ni/ /skyes bu mkhas pas bcos shing slar bslang ste/ /mchod 50.131b rten de la dad par bgyid pa ni/ /de ltar bslang ba de yang de yi rgyu/ /de bzhin chos kyi mchod rten na ba yang / /chos la gus par rang gi sha dang ni/ /khrag gis byug pa dag gis thar bar bgyis/ /'dzam bu'i gling du bdag gis mar me bltam/ /dge slong 'di ni 'chi ba'i dus bgyis na/ /'dzam bu'i gling du ting 'dzin sgra yang ni/ /sems can rnams la rtag tu nub par 'gyur/ /'di gsos pas ni ting 'dzin rnams kyang 'thob/ /dge slong 'di ni 'jig rten kun gyi skyabs/ /'jig rten ldongs pa dag la mig sbyin pa/ /'dod chags dang ni zhe sdang gti mug la/ /sman pa'i rgyal po chen po gso bar bgyid/ /chen por gyur par rtag tu sems gnas te/ /de yi spyod pa dag ni tshad mi rnyed/ /nges pa'i don dang tshig la shin du bslabs/ /pha rol rgol ba kun gyis zil mi non/ /chos smra ba la rim gro mchog bgyis pas/ /bskal pa bye ba phrag ni stong du yang / /bdag la phyir yang log ltung 'jigs ma mchis/ /bud med dngos por bdag ni phyis mi 'gyur/ /de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na shin du dka' ba spyad pa ngo mtshar rmad du byung ba'i byang chub sems dpa'i chos 'di thos nas chos smra ba na ba la sman shin du dkon pas rim gro bya ba la brtson zhing bdag gi sha dang khrag gis kyang rim gror byas te/ tha na sor mo gcig tsam sbyin pas kyang 'gro ba'i chos kyi mchod rten la rim gro bya'o/ /de nas de'i tshe bcom ldan 'das kyis zla 'od gzhon nur gyur pa la sngon byung ba'i gtam nges par bstan pa 'di rgya cher tshigs su bcad pa'i dbyangs kyis yang dag par rab tu bstan to/ /gang gis gang gA'i bye snyed sangs rgyas zhing / /rin chen bkang nas 'dren la phul ba bas/ /gang gis rkang pa'i sor mo gcig byin na/ /de bas bsod nams mchog 'di bye brag 'phags/ /bu mo de ni 'di nas shi 'phos nas/ /sangs rgyas bye ba stong dag mthong bar gyur/ / 50.132a kun gyi bstan pa la yang rab byung nas/ /ting 'dzin zhi ba'i mchog 'di rab tu bzung / /rkang gnyis gtso bo de dag thams cad ni/ /yongs su mya ngan 'das pa phyi dus na/ /de ni rtag par rab tu byung gyur te/ /bde gshegs sras mo kun nas nyon mongs med/ /mar me mdzad pa de bzhin gshegs pa yi/ /bstan pa la yang tshangs par spyod pa spyad/ /der yang bud med dngos po bsgyur nas su/ /de tshe de ni dge slong chos smrar gyur/ /rtag tu dam pa'i chos ni yongs 'dzin pa/ /mi dbang ye shes stobs ni byams pa yin/ /mar me mdzad ni chos smra der gyur te/ /de tshe nga ni rgyal po'i bu mor gyur/ /lha mo sngon gyi snag gi gnyen gyur pa/ /mi dbang ye shes stobs kyi phyir 'brang zhing / /rgyal po'i rmi lam du yang ston pa ni/ /mi 'khrugs spyad pa spyod tshe der gyur to/ /ting 'dzin 'di ni rab tu 'dod pa'i phyir/ /g.yo sgyu thams cad yongs su spangs nas su/ /bdag gi sha dag dang ni khrag gis kyang / /chos smra ba la ngas kyang rim gro byas/ /dge slong na ba na tshas gzir ba de/ /gang dag mthong nas de tshe ngus pa yang / /phyir mi ldog par de dag rab gyur te/ /log par ltung ba'i sar ni yong ma song / /de dag rtag tu mig kyang na ba med/ /glad pa'i nad med rna ba'i nad med de/ /sna yi nad med lce yi nad kyang med/ /so yang na bar nams kyang ma gyur to/ /dge slong na ba de tshe sus bsnyon pa/ /de dag rtag tu kun nas mdzes par gyur/ /sum bcu rtsa gnyis bsod nams brgya pa'i mtshan/ /dpal dang gzi brjid dag gis lus kyang 'bar/ /de dag nga yi bstan la rab byung nas/ /rab tu 'jig dus byang chub dam pa 'di/ /de bzhin gshegs pa'i mdzod kyang bzung nas ni/ /sangs rgyas bye ba stong dag mthong bar 'gyur/ /byang chub mchog 'di legs par bzung nas su/ /rtag tu ri mo byas shing bcang byas na/ /de dag skye dgu'i don chen byas nas ni/ /mi yi gtso bo mi 'khrugs mthong bar 'gyur/ /de dag spyod pa bla med 'di thos nas/ / 50.132b dga' ba zang zing med pa 'phags pa 'thob/ /de dag bdag gi sngon spyad thos nas ni/ /sangs rgyas dag la mchod pa rgya cher byed/ /dge slong mkhas pa tshul khrims ldan mthong nas/ /g.yo med par ni rtag tu bsnyen par bya/ /zhe sdang tha ba dag kyang rnam spangs te/ /dge slong chos smra rtag tu bsnyen par gyis/ /gnod sems khro ba dag kyang rnam spangs la/ /nga yi sras po chos skyong mchod par gyis/ /bskal pa bye ba mang por long ba dang / /log par ltung zhing sdug bsngal gyur ta re/ /gcig la gcig kyang gnod sems byas na ni/ /de la tshul khrims thos pa skyob mi nus/ /bsam gtan mi skyob dgon gnas skyob mi nus/ /sbyin pa mi skyob sangs rgyas mchod pa min/ /ye shes ldan gyi le'u ste sum bcu rtsa lnga pa'o// // de nas yang tshe dang ldan pa kun dga' bo stan las langs te bla gos phrag pa gcig tu bzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /gal te zhus nas zhu ba lung bstan pa'i slad du bcom ldan 'das kyis bdag la skabs phye na/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas la bdag phyogs 'ga' zhig zhu'o/ /de skad ces gsol pa dang bcom ldan 'das kyis tshe dang ldan pa kun dga' bo la 'di skad ces bka' stsal to/ /de'i phyir kun dga' bo bdag gi stan la 'dug la de bzhin gshegs pa dgra bcom pa yang dag par rdzogs pa'i sangs rgyas la ci dang ci 'dod pa dris shig dang dris pa de dang de lung bstan pas ngas khyod kyi sems rangs par bya'o/ /de skad ces bka' stsal pa dang / tshe dang ldan pa kun dga' bos bcom ldan 'das la 'di skad ces gsol to/ /zhus pa lung bstan pa'i slad du bcom ldan 'das bdag la skabs phye'o/ /bde bar gshegs pa bdag la skabs phye'o/ /de nas tshe dang ldan pa kun dga' bo bcom ldan 'das kyis gnang ba dang / 50.133a bcom ldan 'das kyi spyan sngar stan la 'dug nas bcom ldan 'das la 'di skad ces gsol to/ /bcom ldan 'das gang gi rgyu gang gi rkyen gyis byang chub sems dpa' sems dpa' chen po byang chub sems dpa'i spyad pa mtha' yas pa spyod pa dag lag pa bcad pa dang / rkang pa bcad pa dang rna ba bcad pa dang sna bcad pa dang / mig dbyung ba dang mgo bcad pa dang lus bcad pa dang yan lag bcad par gyur/ sdug bsngal rnam pa sna tshogs gzhan dag kyang myong bar gyur cing bla na med pa yang dag par rdzogs pa'i byang chub las kyang nyams par mi 'gyur ba'i rgyu gang lags rkyen gang lags/ de skad ces gsol pa dang bcom ldan 'das kyis tshe dang ldan pa kun dga' bo la 'di skad ces bka' stsal to/ /kun dga' bo bla na med pa yang dag par rdzogs pa'i byang chub 'di yang dag par sgrub pa na/ ngas sdug bsngal ji snyed myong bar gyur pa khyod kyis shes shing de dag dran na ci'i phyir de bzhin gshegs pa la 'di yongs su 'dri bar sems/ kun dga' bo 'di lta ste dper na 'di la skyes bu la la zhig rkang pa nas spyi bo'i bar du 'bar bar gyur te/ rab tu 'bar zhing me lce gcig tu gyur pa de la skyes bu la la zhig der nye bar 'ongs te/ 'di skad du kye skyes bu tshur shog /lus la me 'bar ba ma zhi bar 'dod pa'i yon tan lnga dang phrad cing ldan par rtses shig /dga' bar gyis shig /yongs su spyod cig ces zer na/ kun dga' bo 'di ji snyam du sems/ skyes bu de lus la me 'bar ba ma zhi bar 'dod pa'i yon tan lnga dang phrad cing ldan par gyur te rtse ba dang dga' ba dang yongs su spyod par byed dam/ kun dga' bos gsol pa/ bcom ldan 'das de lta ma lags so/ /bcom ldan 'das kyis bka' stsal pa/ kun dga' bo yongs su brtag pa bzung ste/ skyes bu de lus la me 'bar ba ma zhi bar 'dod pa'i yon tan lnga dang phrad cing ldan par gyur te rtse ba dang dga' ba dang yongs su spyod pa byed du zin kyang de bzhin gshegs pa sngon byang chub sems dpa'i spyad pa spyod pa na sems can rnams ngan song gsum gyi sdug bsngal bar gyur cing dbul ba dag 50.133b mthong nas yid bde ba'am sems dga' ba ma byung ngo / /kun dga' bo byang chub sems dpa' sems dpa' chen po gang dag sngon spyad pa spyod pa na tshul khrims ma nyams pa dang tshul khrims ma zhig pa dang tshul khrims 'dren ma ma yin pa dang / tshul khrims sra srer ma gyur pa dang / tshul khrims ma 'bags pa dang tshul khrims ma g.yos pa dang tshul khrims ma glongs pa dang / tshul khrims ma 'khrugs pa dang tshul khrims mi yang ba dang tshul khrims gzhan la ston pa ma yin pa dang tshul khrims mi slu ba dang tshul khrims drang ba dang tshul khrims dam bcas pa bzhin du byed pa dang / tshul khrims sems can rnams la phan 'dogs pa yin te/ de lta bu'i tshul khrims dang ldan par 'gyur ro/ /kun dga' bo byang chub sems dpa' sems dpa' chen po spyad pa mtha' yas pa spyod pa de dag ni lag pa bcad pas yongs su nyams par mi 'gyur/ rkang pa bcad pas yongs su nyams par mi 'gyur/ rna ba bcad pa dang sna bcad pas yongs su nyams par mi 'gyur/ mig phyung ba dang mgo bcad pas yongs su nyams par mi 'gyur/ lus dang yan lag bcad pas yongs su nyams par mi 'gyur te/ sdug bsngal sna tshogs kyang mi myong la bla na med pa yang dag par rdzogs pa'i byang chub kyang myur du mngon par rdzogs par 'tshang rgya'o// // 'phags pa ting nge 'dzin gyi rgyal po'i mdo/ bam po bcu gnyis pa/ kun dga' bo rnam grangs 'dis kyang 'di ltar rig par bya ste/ kun dga' bo sngon byung ba 'das pa'i dus na bskal pa grangs med pa bas kyang ches grangs med pa/ tshad med pa/ bsam gyis mi khyab pa/ gzhal du med pa/ mtshungs pa med par gyur pa de'i tshe de'i dus na/ de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba/ bla na med pa lha dang / 50.134a mi rnams kyi ston pa/ sangs rgyas bcom ldan 'das rin po che'i pad ma'i zla ba rnam par dag pa mngon par 'phags pa'i rgyal po zhes bya ba 'jig rten du byung ngo / /yang de'i tshe de'i dus na rin po che'i pad ma'i zla ba rnam par dag pa mngon par 'phags pa'i rgyal po de bzhin gshegs pa dgra bcom pa yang dag par rdzogs pa'i sangs rgyas kyi tshe'i tshad ni bskal pa bye ba khrag khrig phrag dgu bcu rtsa dgur gyur to/ /nyi ma thams cad la nyin re zhing yang sems can bye ba khrag khrig brgya stong phrag dgu bcu rtsa dgu dgu sangs rgyas kyi chos las phyir mi ldog pa la bkod do/ /rab tu bkod cing yongs su mya ngan las 'das nas sems can grangs med dpag tu med pa rnams zag pa zad pa dgra bcom pa nyid la bkod do/ /rab tu bkod cing yongs su mya ngan las 'das na sems can grangs med dpag tu med pa dag bla na med pa yang dag par rdzogs pa'i byang chub las phyir mi ldog pa la bkod de yongs su mya ngan las 'das par gyur to/ /kun dga' bo de'i tshe bcom ldan 'das rin po che'i pad ma'i zla ba rnam par dag pa mngon par 'phags pa'i rgyal po de bzhin gshegs pa dgra bcom pa yang dag par rdzogs pa'i sangs rgyas de yongs su mya ngan las 'das nas lnga brgya pa tha ma la dam pa'i chos nub par 'gyur ba'i dus kyi tshe dam pa'i chos rab tu 'jig par 'gyur ba na/ kun dga' bo rgyal po dpa' bas byin zhes bya ba zhig byung ste/ rgyal po dpa' bas byin de la btsun mo'i 'khor ni bud med brgyad khri bzhi stong yod do/ /bu ni stong yod do/ /bu mo ni lnga brgya yod do/ /de'i tshe de'i dus na rgyal po dpa' bas byin gyi rgyal po'i pho brang 'khor rin chen ldan zhes bya ba yangs shing rgya che la sgo bzhi yod pa/ stegs bu dang sgo gang dang rta babs dang skar khung dang pu shu dang khang pa dang khang pa brtsegs pa dang / bskyed mos tshal gyis brgyan cing rnam par bkra ba/ blta na sdug pa/ lha'i gnas bzhin snang ba/ sems can grangs med dpag tu med pa'i gnas su gyur pa zhig 50.134b yod do/ /kun dga' bo de'i tshe de'i dus na mdo sde 'di lta bu dag ni skye bo mang pos smad cing skye bo mang pos spangs te/ skye bo mang po dang mi 'phrod cing skye bo mang pos bor bar gyur te/ 'jigs pa chen po mi bzad pa'i dus su gyur pa/ gtse ba mang zhing char ches pa'i dus kyi tshe char mi 'bab pa'i dus kyi tshe/ dus ma yin par char 'bab pa'i dus kyi tshe/ sbrul 'byung ba'i dus kyi tshe/ lce 'bab pa'i dus kyi tshe/ mu ge 'byung ba'-i dus kyi tshe/ log par lta ba'i dus kyi tshe/ yang dag pa ma yin par lta ba'i dus kyi tshe/ mu stegs can gyi gsang sngags yongs su tshol ba'i dus kyi tshe/ sangs rgyas kyi byang chub rab tu 'jig par 'gyur ba'i dus kyi tshe/ byang chub sems dpa' bdun stong grong dang grong khyer dang grong rdal dang / yul 'khor dang rgyal po'i pho brang 'khor dang ljongs nas bskrad nas de dag chos smra ba me tog zla mdzes dang lhan cig kun du bzang po zhes bya ba'i nags khrod der rten cing gnas te dge slong de dag la gzungs kyi chos kyi rnam grangs 'di ston to/ /kun dga' bo nags khrod de yang dus thams cad du snang ba'i me tog sna tshogs dang / snye ma dang 'khri shing dang 'bras bu dag dang ldan pa/ dpag bsam gyi shing dang 'dra ba/ shing sna tshogs kyis gang zhing sa'i gzhi yang gzugs dang kha dog du ma dang sa bon dang myu gu thams cad kyis brgyan pa/ brag dang rdo ba sna tshogs mdzes shing dri ma med pa/ yangs shing mtho ba dang gser gyi ri dag gis mdzes par byas shing sdug pa/ grub pa'i rig sngags 'chang dang dri za 'am skyes bu 'am drang srong dang mi 'am ci dag gnas pa/ byad gzugs dang kha dog che zhing rnam pa sna tshogs mang po gnas pa/ sangs rgyas du ma bzhugs bzhugs pa/ dga' tshal dang 'dra ba kun du bzang zhing rnal 'byor dang 'thun pa'i nags tshal dam pa kun du bzang po de na byang chub sems dpa' de dag rnal 'byor la rjes su brtson zhing gnas par gyur to/ /yang kun dga' bo chos smra ba me tog zla mdzes de gcig pu dben par song nas/ 50.135a nang du yang dag 'jog la zhugs te/ lha'i mig rnam par dag pa mi'i las 'das pas bltas na/ byang chub sems dpa' khrag khrig mang po dge ba'i rtsa ba bskyed pa sangs rgyas kyi zhing sna tshogs nas 'dir skyes te/ de dag gzungs kyi chos kyi rnam grangs 'di mnyan pa rnyed na ni bla na med pa yang dag par rdzogs pa'i byang chub las phyir mi ldog par 'gyur/ gal te gzungs kyi chos kyi rnam grangs 'di mnyan pa ma rnyed na bla na med pa yang dag par rdzogs pa'i byang chub las phyir ldog pa dag mthong ngo / /de nas chos smra ba me tog zla mdzes dran zhing shes bzhin du ting nge 'dzin de las langs nas byang chub sems dpa'i tshogs chen po ga la yod pa der song ste phyin nas byang chub sems dpa'i tshogs chen po de la 'di skad ces smras so/ /rigs kyi bu dag kho bo ni 'gro'o/ /grong dang grong khyer dang grong mdab dang ljongs dang yul 'khor dang rgyal po'i pho brang 'khor du song la sems can rnams la chos bstan par bya'o/ /de nas byang chub sems dpa'i tshogs chen po de dag gis chos smra ba me tog zla mdzes la 'di skad ces smras so/ /khyod nags khrod 'di nas grong dang grong khyer dang grong mdab dang ljongs dang yul 'khor dang rgyal po'i pho brang 'khor du 'gro ba 'di ni kho bo cag 'dod pa ma yin no/ /de ci'i phyir zhe na/ dge slong dang dge slong ma dang / dge bsnyen dang dge bsnyen ma lhag pa'i nga rgyal can mang po dam pa'i chos spong ba dag byung ba'i dus la bab kyis/ de dag tshe dang ldan pa'i srog gcod par gyur na ma legs so/ /tshe dang ldan pa ni shin du mdzes shing byad bzhin bzang la blta na sdug ste/ dang po'i lang tsho dang ldan zhing / na tshod dar la bab ste/ mdog ni gser btso ma bzang po 'dra/ dpral ba ni dung dang zla ba dang me tog kun da'i kha dog lta bu'i mdzod spus brgyan/ skra dang gtsug tor ni mthon thing la lcang lor 'khyil pa yin pas rgyal po 'am rgyal po'i blon po'am/ de dang 'dra ba gzhan dag kyang phrag dog dang 'jungs pas non pa'i sems kyis khyod kyi srog bcad na ma legs so/ /de nas chos smra ba 50.135b me tog zla mdzes kyis byang chub sems dpa'i tshogs chen po de la 'di skad du gal te kho bos bdag nyid bsrung ba byas na kho bos 'das pa dang ma byon pa dang da ltar byung ba'i sangs rgyas bcom ldan 'das rnams kyi bstan pa bsrungs bar mi 'gyur ro/ /zhes zer nas de'i tshe tshigs su bcad pa 'di dag smras so/ /bdag tu 'du shes 'di la gnas nas su/ /bstan pa 'di la bsrung bar yong mi nus/ /mi bzad phyi dus bde bar gshegs pa yi/ /byang chub bstan pa bkod pa chen po yin/ /gang gis bdag tu 'du shes kun spangs shing / /sems can 'di dang gang zag smra gnas dang / /gzugs dang sgra dang dri dang ro rnams dang / /reg bya spong ba de ni bstan pa bsrung / /bskal pa bye ba gang gA'i bye snyed du/ /dang ba'i sems kyis zas dang skom rnams dang / /gdugs dang ba dan mar me'i phreng ba yis/ /sangs rgyas bye ba khrag khrig rim gro byas/ /gang gis dam chos rab tu 'jig pa dang / /bde gshegs bstan pa 'gag par 'gyur ba'i tshe/ /nyen mtshan du ni bslab pa gcig spyod pa/ /bsod nams 'di ni de bas bye brag 'phags/ /skyes bu khyu mchog gi ni dam pa'i chos/ /'jig par 'gyur tshe gang dag btang snyoms sgom/ /de yis rgyal ba bkur sti byas ma yin/ /'dren pa dag la ri mor des ma byas/ /khyed bde rang gi don gyis la/ /bdag nyid rab tu bsrung bar gyis/ /khyed ni rtag tu byams gnas shing / /'dul ba 'di la bag yod gyis/ /ma 'dres dag gtsang dri med pa/ /tshul khrims dang por bsrung bar gyis/ /gang gis tshul khrims dri ma med/ /sangs rgyas bsngags pa bsrungs pa ni/ /de yis ji snyed sngon byung ba/ /bde gshegs thams cad ri mor byas/ /de yis thams cad bskyabs pa yin/ /skye bo'i tshogs rnams byang chub bkod/ /sngon gyi sangs rgyas dag gis bstod pa yi/ /tshul khrims dri ma med pa sus bsrungs pa/ /de dag gis ni sems can mang po yang / /sems can dmyal 50.136a ba dang ni sdig las drangs/ /chos mchog rin chen sbyin pa sbyin par gyis/ /bzod pa dag kyang rtag tu bsrung gyis la/ /dgon par gnas shing ting 'dzin mkhas pa dang / /'jam zhing mnyen pa dag kyang bsgom par gyis/ /rnam pa kun du rtsod pa ma byed par/ /spyad pa zhi mchog 'di la rnam par spyod/ /bdag ni sems can rnams kyang bskyab pa'i phyir/ /grong dang rgyal po'i pho brang 'gro bar bya/ /blo gros che 'chang sems can dam pa'i mchog / /drang srong de ni 'gro bar byas pa dang / /kha cig rkang pa la yang 'ju bar byed/ /snying rje bar yang ngu zhing mchi ma zag /mkhas pa blo gros chen po ma bzhud par/ /sgra 'jam yid du 'ong zhing mdzes pa yi/ /shing 'di rnams la gzigs shing rtog pa mdzod/ /bdag nyid bsrung ba mdzod la ma bzhud cig /sngon gyi stobs bcu 'dren pa de dag kyang / /dbang po zhi zhing shin du des pa rnams/ /nags tshal brag dang ri yi rtser gshegs nas/ /byang chub dam pa dag ni thugs su chud/ /byang chub rgyur yang spyod pa dam pa spyad/ /de dag bsod nams ye shes mchog dang ldan/ /de dag rjes slobs nags khrod gnas par mdzod/ /brtul zhugs bzang po 'di nas ma bzhud cig /lus ni shin du mdzes pa'i mtshan gyis brgyan/ /khyod kyi skra yang mthon mthing kha dog ste/ /gser gyi kha dog dang 'dra 'od byed pa/ /sa 'di kun kyang rab tu snang bar gyur/ /khyod kyi mdzod spu bzhin gyi smin mtshams na/ /shin du mdzes pa dung dang 'dra ba'i 'od/ /rgyal po dag kyang de bzhin srid kyi phyir/ /phrag dog bskyed nas khyod kyi lus bshig 'gyur/ /de nas chos smra ba me tog zla mdzes kyis byang chub sems dpa'i tshogs chen po de la tshigs su bcad pas smras pa/ ji snyed sngon gyi bde gshegs byung ba ni/ /thams cad mkhyen cing zag pa zad pa rnams/ /de dag thams cad 'jig rten don mdzad de/ /srid pa gsum du byang chub dam pa rtogs/ /spyad 50.136b pa'i dam pa byang chub rgyu spyad de/ /de dag bsod nams ye shes mchog dang ldan/ /de yi rjes bslabs byang chub sems dpa' yang / /sems can khrag khrig rnams kyi skyabs byed 'dod/ /drang srong mkhas la kun gyis bskor byas te/ /rkang pa la yang phyag 'tshal shugs phyung nas/ /mi bzad snying rje bar ni sgra 'byin cing / /nyam thag mi bde cho nges 'bebs par byed/ /kha cig rab tu 'gyel cing brgyal nas su/ /sa la lhung ba rtsal bcad 'gyel bzhin/ /'on kyang drang srong sems can don 'dod pa/ /bsod nams bsags pas de las phyir ma log /drang srong chos gos lhung bzed thogs nas chas/ /ji ltar seng ge ral pa can dag bzhin/ /de ni chos kyi rang bzhin gnas pas na/ /de la yon tan nyes par bya ba med/ /'jig rten 'dir na nags khrod bdag gnas pas/ /sems can ngan song song na ma legs shes/ /de ni sems can bskyab pa'i don gyi phyir/ /grong khyer pho brang mchog tu song bar gyur/ /de nas chos smra ba me tog zla mdzes grong dang grong khyer dang grong rdal dang ljongs dang yul 'khor dang rgyal po'i pho brang du 'ongs nas sems can rnams la chos bstan te/ de'i snga dro der 'ongs nas srog chags khrag khrig phrag dgu bcu rtsa dgu bla na med pa yang dag par rdzogs pa'i byang chub las phyir mi ldog pa la bkod do/ /da dung rgyal po'i pho brang der ma phyin pas de mthar gyis rgyal po'i pho brang 'khor rin chen ldan pa der phyin pa dang rgyal po'i pho brang 'khor rin chen ldan pa der nye bar song ste/ shing blag sha dang sA la'i drung du 'dug go/ /de de'i nub mo 'das pa dang rgyal po'i pho brang 'khor rin chen ldan du zhugs par gyur te/ zhugs nas srog chags bye ba khrag khrig phrag sum bcu rtsa drug sangs rgyas kyi chos las phyir mi ldog par bkod kyang da dung zas kyi bya ba ma byas so/ /de zas gcad pa bcad nas rgyal po'i pho brang 'khor rin chen ldan nas byung ste/ bcom ldan 'das kyi sen mo'i mchod rten gang na yod pa der song ste/ 'greng bzhin du nyin mtshan 'das par byas so/ / 50.137a de de'i nub mo 'das nas de snga dro gnyis pa la rgyal po'i pho brang 'khor rin chen ldan du zhugs nas srog chags bye ba phrag nyi shu rtsa gsum sangs rgyas kyi chos las phyir mi ldog par bkod de da dung zas kyi bya ba ma byas so/ /de zas gnyis pa gcad pa bcad nas rgyal po'i pho brang 'khor rin chen ldan nas byung ste/ bcom ldan 'das kyi sen mo'i mchod rten gang na yod pa der song ste/ 'greng bzhin du nyin mtshan 'das par byas so/ /de de'i nub mo 'das nas de snga dro gsum pa la rgyal po'i pho brang 'khor rin chen ldan du zhugs nas srog chags bye ba brgya stong phrag dgu bcu rtsa dgu sangs rgyas kyi chos las phyir mi ldog par bkod de da dung zas kyi bya ba ma byas so/ /de zas gsum pa gcad pa bcad nas rgyal po'i pho brang 'khor rin chen ldan nas byung ste/ bcom ldan 'das kyi sen mo'i mchod rten gang na yod pa der song nas 'greng bzhin du nyin mtshan 'das par byas so/ /de de'i nub mo 'das nas de snga dro bzhi pa la rgyal po'i pho brang 'khor rin chen ldan du zhugs nas srog chags bye ba khrag khrig brgya stong phrag dgu bcu rtsa dgu bla na med pa yang dag par rdzogs pa'i byang chub las phyir mi ldog par bkod de da dung zas kyi bya ba ma byas so/ /de zas bzhi pa gcad pa bcad nas rgyal po'i pho brang 'khor rin chen ldan nas byung ste/ bcom ldan 'das kyi sen mo'i mchod rten gang na yod pa der song nas 'greng bzhin du nyin mtshan 'das par byas so/ /de de'i nub mo 'das nas de snga dro lnga pa la btsun mo'i 'khor gyi nang du song nas bud med brgyad khri bla na med pa yang dag par rdzogs pa'i byang chub las phyir mi ldog par bkod do/ /grong khyer de nas kyang sems can grangs med dpag tu med pa dag bla na med pa yang dag par rdzogs pa'i byang chub las phyir mi ldog par bkod de da dung zas kyi bya ba ma byas so/ /de nyi ma lnga zas gcad pa bcad nas rgyal po'i pho brang 'khor rin chen ldan nas byung ste/ bcom ldan 'das kyi sen mo'i mchod rten gang na yod pa der song nas 'greng bzhin du nyin mtshan 'das par 50.137b byas so/ /de de'i nub mo 'das nas de snga dro drug pa la rgyal po'i pho brang 'khor rin chen ldan du zhugs nas rgyal po'i bu stong bla na med pa yang dag par rdzogs pa'i byang chub las phyir mi ldog par bkod de da dung zas kyi bya ba ma byas so/ /de nyi ma drug zas gcad pa bcad nas rgyal po'i pho brang 'khor rin chen ldan nas byung ste/ bcom ldan 'das kyi sen mo'i mchod rten gang na yod pa der song nas 'greng bzhin du nyin mtshan 'das par byas so/ /de de'i nub mo 'das nas de snga dro bdun pa la rgyal po'i pho brang 'khor rin chen ldan du zhugs pa dang rgyal po dpa' bas byin bskyed mos tshal du 'gro ba mthong ste/ gser gyi shing rta la ngos ni dngul mda' ni sbrul gyi snying po'i tsan dan/ 'khor lo ni bai dUr+ya/ gdugs dang rgyal mtshan dang ba dan bsgreng ba dang rin po che'i shing rta sna tshogs kyis brgyan pa/ shing rta'i mda' la dar gyis bkris shing ras bcos bu phrugs kyis g.yogs pa de bu mo gzhon nu brgyad brgyas rin po che'i tha gus btags shing 'dren te/ de dag byad bzhin bzang zhing mdzes pa/ blta na sdug pa/ kha dog bzang po rgyas pa'i mchog dang ldan pa/ byis pa rnams dga' bar byed cing tshim par byed pa ste/ mkhas pa rnams la ni ma yin no/ /rgyal rigs shing sa la chen po lta bu brgyad khri bzhi stong yang zhabs 'bring mthon dman du 'gro'o/ /bram ze shing sA la chen po lta bu brgyad khri bzhi stong yang zhabs 'bring mthon dman du 'gro'o/ /khyim bdag shing sA la chen po lta bu brgyad khri bzhi stong yang zhabs 'bring mthon dman du 'gro'o/ /rgyal po'i bu mo lnga brgya yang rin po che'i khyogs kyi nang du zhugs nas mdun thog thag tu 'gro ste/ de dag gis dge slong de mthong ma thag tu bla na med pa yang dag par rdzogs pa'i byang chub las phyir mi ldog par gyur to/ /btsun mo'i 'khor brgya stong phrag drug bcu rtsa brgyad kyang dge slong de mthong ma thag tu bla na med pa yang dag par rdzogs pa'i byang chub las phyir mi ldog par 50.138a gyur to/ /skye bo'i tshogs chen po de dag kyang nor bu dang gdu bu rnams bkrol te lham rnams bzhags nas bla gos phrag pa gcig tu gzar te pus mo g.yas pa'i lha nga sa la btsugs nas/ dge slong de ga la ba de logs su thal mo sbyar te phyag 'tshal zhing 'khod do/ /de nas bu mo gzhon nu de dag kyang sngon gyi dge ba'i rtsa ba dag gis bskul bas khyogs de dag las babs nas nor bu dang gdu bu dag bkrol te lham rnams bzhag nas bla gos phrag pa gcig tu gzar te pus mo g.yas pa'i lha nga sa la btsugs nas dge slong de ga la ba de logs su thal mo sbyar te tshigs su bcad pa 'di dag smras so/ /dge slong 'di ni byon pa'i tshe/ /nyi ma lta bur thams cad du/ /'di dag rab tu snang bar bgyis/ /skye bo'i tshigs kyang 'dun par gyur/ /'dod chags zhe sdang rgyun bcad cing / /gti mug dag kyang bsal bar gyur/ /de tshe zhe sdang khro ba dang / /phrag dog thams cad bcad par gyur/ /rgyal po dpa' bas byin pa yi/ /zhabs 'bring sras la sogs pa yang / /su yang rgyal po mi lta ste/ /su yang zhabs 'bring mi bgyid do/ /ji ltar zla ba nya ba ni/ /skar ma dag gis bskor ba bzhin/ /rgyal po'i bu yi mdun bdar bas/ /dge slong 'di yang mdzes par gyur/ /ji ltar gser gzugs ri mo dag /mkhas pas ri mor bris pa dang / /sA la'i rgyal po rgyas pa ltar/ /de bzhin dge slong mdzes par gyur/ /mthu chen brgya byin lha yi dbang po ni/ /grong khyer 'jig pa bdag po mig stong ldan/ /ri rab spyi la sum bcu rtsa gsum dbang / /de bzhin dge slong byon pa 'di yang mdzes/ /tshangs pa'i 'jig rten tshangs pa gnas pa 'dra/ /rab 'phrul lha yi bu ni lha dbang bzhin/ /'dod khams 'thab bral mchog gi lha bzhin du/ /dge slong byon pa 'di yang de bzhin mdzes/ /nyi ma bzhin du bar snang lhan ner bgyis/ /'od zer stong ldan mun nag rab tu sel/ /phyogs rnams kun du snang bar bgyid pa ltar/ /de bzhin dge slong byon pa 50.138b mdzes par gyur/ /bskal pa mtha' yas rgya cher sbyin pa byin/ /tshul khrims ma 'dres rtag tu bsrung ba bgyis/ /bzod pa mtshungs med 'jig rten kun du bsgoms/ /de ni mtshan gyis brgyan cing 'di ltar mdzes/ /'phags pa'i skye bos rab bstod brtson 'grus bskyed/ /bsam gtan bzhi yang zhum med sems kyis bsnyen/ /nyon mongs dra ba bsal cing shes rab bskyed/ /de phyir dge slong 'jig rten kun du gda'/ /sangs rgyas bstan pa mtshungs med sems can snying po ste/ /dpa' bo 'das pas chos mchog dag kyang rab tu bshad/ /ma 'ongs dus dang de bzhin da ltar byung ba yi/ /chos kyi rgyal po dbang brnyes rnams kyi sras de lags/ /dge slong khyod ni mi rtag nam yang ma gyur cig /gzugs ni 'di ltar 'jig rten kun na rab tu lhan/ /gzi brjid che zhing dbyangs sgra shin du snyan par gda'/ /rgyal po'i gzi brjid shin du lham me snang mi bgyid/ /chos 'di ji ltar khyod bdag nyid kyis rab rtogs shing / /sangs rgyas dag gis bka' stsal 'jig rten kun du rgyu/ /de bzhin bdag cag bud med dngos po kun spangs te/ /bdag cag thams cad dge slong 'di bzhin 'gyur bar bgyi/ /de dag thams cad sor bcu thal mo sbyar byas nas/ /tshigs bcad 'di dag smras te gos rnams 'thor bar byed/ /gser gyi phreng ba dang ni rin chen do shal dang / /rna ba'i rgyan dang mgul gyi rgyan dag rnam mang 'thor/ /ji ltar 'khor los sgyur ba'i rgyal po dag /stobs ldan sa 'di kun la rnam par lta/ /sras su 'du shes dag ni nye bar 'jog /gling rnams bzhi po 'di dag kun du 'gro/ /rgyal rigs dang ni tshong dpon bram ze dang / /khyim bdag mkhar gyi rgyal po bdag gi mi/ /de dag gcig la lhag par sdug pa med/ /thams cad la yang byams pa mnyam par bskyed/ /de bzhin dge slong des pa 'di yang ni/ /gzungs dang dbang rnams la ni shin du bslabs/ /byang chub yan lag 50.139a stobs dang dbang po dang / /yan lag brgyad ldan lam yang rnam par 'byed/ /mtshan mo zla ba skar tshogs dbus na yang / /ji ltar rab tu mdzes par snang ba bzhin/ /ji ltar nyi ma'i dkyil 'khor 'char ba'i tshe/ /gzi brjid ldan zhing rnam par snang bgyid bzhin/ /dbang po zhi zhing stobs bcu ldan pa yi/ /sangs rgyas nges pa kun la phyag 'tshal lo/ /de dag gis ni bsngags pa bskal pa brgyas/ /zad par byed nus skyes bu su yang med/ /bskal pa bye ba stong phrag mang por ni/ /yon tan brjod kyang zad pa yong med de/ /'jig rten rab mchog gi ni spu gcig kyang / /bsngags pa dag ni zad par mi 'gyur ro/ /des ni mtshungs med 'khor lo rab tu bskor/ /ye shes dag gi gnas kyang shin du bstan/ /zhib cing rdul bral chos rnams bshad pa mdzad/ /de ni gang na'ang snang bar 'gyur ba med/ /dge sbyong dang ni bram ze lha dang klu/ /lha min bdud dang tshangs par bcas la sogs/ /sangs rgyas thams cad mkhyen pa'i yon tan gyis/ /rgya mtsho dag ni zad par yong mi nus/ /gang gis thugs sras 'di 'dra mnga' ba yi/ /sman rgyal mtshungs med rgyal la phyag 'tshal lo/ /tshigs bcad 'di dag smras nas de yi tshe/ /rgyal po'i bu mo gzhon nu thams cad dga'/ /gser dang gser phye dag kyang 'thor bar byed/ /gos rnams kyang ni rab tu 'ding bar byed/ /gtsug gi nor bu do shal mdzes pa dag /rin thang bye ba phrag ni brgya ri bas/ /dge slong de la mngon par g.yogs nas ni/ /dga' nas byang chub phyir yang rab tu zhugs/ /de nas rgyal po dpa' bas byin 'di snyam du sems te/ kye ma btsun mo'i 'khor 'di dag ni log par zhugs te skye bo'i tshogs kyang log go snyam mo/ /skye bo de dag kyang nor bu dang gdu bu bkrol lham bzhag nas gos phrag pa gcig tu bgos te/ pus mo g.yas pa'i lha nga sa la btsugs nas dge slong de ga la ba de logs su thal mo sbyar 50.139b nas phyag 'tshal lo/ /dge slong de byad gzugs bzang ba tsam du rgyal po dpa' bas byin byad bzhin mi bzang / de tsam du blta na sdug pa ma yin/ de tsam du mdzes pa ma yin te/ de rgyal po'i srid kyi phyir shin du sdangs par gyur to/ /dge slong de'i gzugs kyi lus yongs su rdzogs pa mthong nas shin du khros so/ /dge slong de rgyal po'i lam na 'dug pa'i mig tu rdul song ba dang de 'di snyam du sems te/ dge slong 'dis chags pa'i sems kyis nga'i btsun mo'i 'khor la bltas te/ 'dis mig gis kyang brda byas so/ /de 'di snyam du sems te/ da dge slong 'di la srog gcod par byed pa su yod snyam mo/ /de nas rgyal po dpa' bas byin gyi zhabs 'bring du bu stong 'brang ba de dag bos nas gzhon nu dag dge slong 'di srog dang phrol cig ces byas na/ gzhon nu de dag rgyal po dpa' bas byin la slar zlog go/ /dge slong de'i phyir de 'di snyam du sems te/ bdag gi bu dag kyang bka' mi nyan te/ bdag gcig pu gnyis su med par bzhag na da dge slong 'di srog dang bral bar byed pa su yod snyam mo/ /de nas rgyal po dpa' bas byin la gsod pa'i gshed ma dga' byed ces bya ba gtum po btsam pa med pa ma rungs pa zhig yod pa de rgyal po'i lam na rgyal po dpa' bas byin dang ha cang yang mi ring ba zhig na 'dug go/ /rgyal po dpa' bas byin gyis de mthong nas dga' mgu yi rangs te/ rab tu dga' ba dang mos pa dang yid bde ba skyes nas de sems 'di snyam du sems te/ dga' byed 'dis dge slong 'di srog dang dbral bar byed snyam mo/ /de nas gsod pa'i gshed ma dga' byed rgyal po dpa' bas byin gang na 'dug pa der 'ongs pa dang dga' byed la 'di skad ces smras so/ /khyod bya dga' cher sbyin na dga' byed khyod dge slong 'di srog dang bral bar byed nus sam/ dga' byed kyis smras pa/ lha shin du rngo thog go/ /bka' bzhin 'tshal/ da dge slong 'di srog dang dbral bar 'tshal lo/ /rgyal pos smras pa/ dga' byed de'i phyir de'i dus la bab par shes na mtshon rnon po thogs la dge slong 'di'i lag pa dang rkang pa chod cig /rna ba dang sna yang chod cig / 50.140a 'dis chags pa'i sems kyis nga'i btsun mo'i 'khor la bltas kyis de'i phyir 'di'i mig kyang skam pas phyung shig ces byas so/ /de nas gsod pa'i gshed ma dga' byed kyis de'i tshe ral gri rnon po thogs nas dge slong de'i lag pa dang rkang pa bcad do/ /rna ba dang sna yang bcad do/ /mig gnyis kyang phyung ngo / /de nas dge slong de'i mgo dang rna ba dang rkang lag bcad pa las 'od zer bye ba khrag khrig brgya stong du ma yang byung / 'o ma'i rgyun du ma yang byung ste/ phyogs bcur bskor nas slar yang dge slong de'i lus kyi nang du nub bo/ /bcad cing gtubs pa'i 'phro nas dpal be'u dang bkra shis dang 'khor lo la sogs pa nang nas byung ste skyes bu chen po'i mtshan sum bcu rtsa gnyis kun du snang ngo / /de nas rgyal po de skye bo'i tshogs chen po dang dong nas skye bo'i tshogs chen po des dge slong de lam na bcad gtubs shing 'dug pa mthong nas/ de dag sdug bsngal zhing yid mi bde ste/ ngo mtshar du gyur nas ngu zhing cho nges btab ste smre sngags bton nas phyir yang rgyal po'i pho brang 'khor rin chen ldan par song ngo / /de nas rgyal po dpal bas byin zhag bdun 'das pa dang bskyed mos tshal mchog na 'dug pa mi dga'/ mi rtsi yongs su mi spyod de/ bskyed mos tshal nas de logs nas zhag bdun 'das pa dang rgyal po'i pho brang 'khor rin chen ldan du zhugs pa dang des dge slong de rgyal po'i lam du bor ba shi nas zhag bdun lon yang lus kyi mdog ma gyur pa mthong nas de 'di snyam du sems te/ dge slong 'di'-i lus kyi mdog ma gyur pa las bltas na dge slong 'di ni gdon mi za bar bla na med pa yang dag par rdzogs pa'i byang chub las phyir mi ldog pa yin te/ bdag gis sems can dmyal ba chen por skye bar 'gyur ba'i sdig pa'i las byas kyis bdag ni myur du sems can dmyal ba chen por ltung bar 'gyur ro zhes de de ltar sems pa na/ steng gi bar snang las lha'i bu brgyad khris sgra skad dbyangs gcig tu smras pa/ rgyal po chen po 'di ni de bzhin te/ khyod ji skad zer ba ltar dge slong 'di ni bla na med pa 50.140b yang dag par rdzogs pa'i byang chub las phyir mi ldog pa yin no zhes zer ro/ /bar snang las lha dag gi sgra thos nas de shin du 'jigs shing skrag nas bag tsha zhing spu zing zhes byed de 'gyod par gyur to/ /de nas rgyal po dpa' bas byin sdug bsngal zhing yid mi bde ste 'gyod par gyur pas de'i tshe cho nges cher btab nas tshig 'di skad zer ro/ /rgyal po'i srid dang rgyal po'i pho brang dang / /nor bu rin chen mu tig gser dbyig spang / /bdag nyid mtshon thogs bdag nyid 'chi bar bya/ /bdag ni byis pa'i blo can las ngan ldan/ /dge slong me tog zla mdzes 'dir byung ba/ /sum bcu rtsa gnyis mtshan gyi go bgos te/ /snang bar byed cing rgyal po'i pho brang 'ongs/ /zla ba nya tshe skar ma'i rgyal po bzhin/ /'dod pa'i longs spyod ngan pas bdag dkrugs te/ /rab tu dga' bar bud med tshogs rnams dang / /shing rta'i nang du zhugs te de nas dong / /rgyal rigs rnams kyis yongs su 'khor bar bskor/ /dge slong dri mchog mig bzang 'di nyid ni/ /'dir byon dge slong de'ang mthong nas su/ /bud med tshogs rnams rab tu dgar gyur cing / /mos pa skyes nas gser gyi phreng ba gtor/ /thams cad sor bcu'i thal mo sbyar byas nas/ /tshigs bcad dbyangs kyis dge slong de la bstod/ /rgyal po yi ni klu yi dbyangs sgra rnams/ /de dag thams cad rab tu zhi bar gyur/ /de yang shing rta'i nang du zhugs nas ni/ /rgyal rigs rnams kyis yongs su bskor bar gyur/ /bde bar gshegs pa'i sras mchog mthu che ba/ /dge slong dri mchog mig bzang 'dir byon na/ /bdag gi sems ni rab tu ngan gyur te/ /dge slong rgyal po'i pho brang 'jug pa'i tshe/ /bud med tshogs chen dga' bar lta mthong nas/ /rmongs pas de la phrag dog khro ba bskyed/ /phyogs bzhi kun du snang bar bgyis pa ni/ /zla ba sgra gcan zin thar mdzes pa bzhin/ /dge slong rgyal po'i pho brang 'jug mthong nas/ /bud med tshogs rnams dga' zhing sgra yang 'byin/ /bdag gis 50.141a der ni gtum po'i tshig smras te/ /bu stong dag la nga nyid khyod song la/ /dge slong 'di ni dum bu dum bur gyis/ /'di ni nga yi dgra mchog ma rungs pa/ /gzhon nu thams cad mnyen zhing tshul ldan te/ /bdag la phan sems dge slong de la 'dud/ /rgyal po 'di 'dra'i bka' bzhin bgyir mi rung / /de tshe bdag ni mya ngan non par gyur/ /dge slong shin du tshul khrims mchog ldan pa/ /byams ldan pha bzhin zhugs pa mthong nas ni/ /shin du gtum pa'i sems kyis gsod du btang / /phyi dus bdag ni lhung nas mnar med sreg /dga' byed de ni rgyal po'i lam 'dir gnas/ /ma rungs las bgyid mi la sdug bsngal skyed/ /bdag gi bka' bzhin de 'drar des bgyis te/ /me tog phreng brgyus 'dra ba'i dge slong gtubs/ /nags mchog kun du bzang po dga' ba na/ /bya yis gang zhing me tog dri zhim rgyas/ /de na dge slong tshogs gzhan rab mang ba/ /bu gcig pa ni ma dang bral ba bzhin/ /dge slong bzhengs la nags su gnas par mdzod/ /mi yi don kyang shin du rgya cher bgyis/ /rgyal po'i pho brang 'khor 'dir byon pa'i tshe/ /dge slong shin du snying rjer ngu zhing tshol/ /lag pa g.yas pas me tog rgyal mtshan thogs/ /g.yon pa yis kyang blta sdug mdzes pa gzhan/ /lam yang sbyangs shing gos kyis khebs par g.yogs/ /dge slong bzhengs la chos mchog bshad pa mdzod/ /rgyal po'i khab 'dir khyod zhugs ring lon kyang / /dge slong rab tu snying rjer ngu zhing tshol/ /rgyal ba mchog gi bstan pa 'jig pa'i tshe/ /khyod kyi srog gi bar chad 'gyur du dogs/ /ji ltar skyes bu mthu chen la la dag /phyogs dang phyogs mtshams rtag tu sgra grags pa/ /srid gsum 'di kun thams cad zil mnan nas/ /g.yang sa chen por mchongs te sar lhung ltar/ /de bzhin dge slong mtshan mchog rab brgyan pa/ /byad bzhin bzang po sa 'dir 'gyel bar gyur/ /me tog zla mdzes zhe sdang gtum med pa/ /bdag gi sdig pa'i sems kyis dum bur blags/ / 50.141b me tog zla mdzes bkrongs nas sar lhung ba/ /chos smra 'di ni mthong nas myur bar yang / /dge slong thams cad sdug bsngal gzer gyur te/ /mi dga' skyes 'gyur de bzhin sems mi bde/ /me tog zla mdzes ri yi rgyal po ltar/ /sum bcu rtsa gnyis mtshan gyi go bgos te/ /phreng ba brgyus pa bud med thogs pa 'dra/ /'dir ni dum bu dum bur rnam par bcad/ /bdag gis dngos sdig shin du mi bzad bgyis/ /mgon med mnar med gshin rje'i yul du mchi/ /'dir yang dge slong dum bur rlags pa yis/ /bdag ni sangs rgyas rnams dang ring bas ring / /bdag gis shin du las ngan bgyis pas na/ /bu dang gnyen bshes tshogs rnams skyabs mi 'gyur/ /blon po dang ni zhabs 'bring bkrabs pa yang / /de dag dmyal bar bdag song skyabs mi 'gyur/ /sangs rgyas 'das dang de bzhin ma byon dang / /phyogs bcu dag na gang su bzhugs pa yi/ /ded dpon stobs bcu nyon mongs med pa rnams/ /rdo rje stug sra sku mnga'i skyabs su mchi/ /der ni dge slong dum bur byas mthong nas/ /lha rnams rab tu snying rje cho nges 'debs/ /de dag der song dge 'dun go bar byas/ /me tog zla mdzes rgyal po'i khab 'dir bsad/ /chos smra ba ni mkhas shing rtogs pa de/ /mthu chen phyogs dang phyogs mtshams rab tu grags/ /byang chub sems dpa' gzungs la gnas pa de/ /me tog zla mdzes rgyal po'i khab 'dir bsad/ /bskal pa mtha' yas sbyin pa sna tshogs byin/ /tshul khrims mi g.yo skyon med gang srung zhing / /'jig rten kun du mtshungs med bzod sgom pa/ /me tog zla mdzes rgyal po'i khab 'dir bsad/ /bskal pa mtha' yas rtag tu brtson ldan zhing / /zhum med sems kyis bsam gtan bzhi la sgom/ /nyon mongs 'joms pa'i shes rab gang bsten pa/ /me tog zla mdzes rgyal po'i khab 'dir bsad/ /lus la phangs pa thams cad rab spangs shing / /de bzhin srog la ma chags gyur nas ni/ /kun du bzang po'i nags nas 50.142a babs nas su/ /me tog zla mdzes rgyal po'i khab 'dir bsad/ /lha yi cho nge'i snying rje thos nas ni/ /dge slong de kun shin du sdug bsngal nas/ /me tog zla mdzes nyes med bsad pa la/ /lta ba'i phyir yang thams cad grong du lhags/ /des pa de dag rgyal po'i khab 'ongs nas/ /dge slong dum bu dum bur byas mthong ste/ /nyam thag skad kyis mi bzad cho nges 'debs/ /de dag thams cad brgyal nas sa la 'gyel/ /dge slong dge 'dun rgyal po de la smra/ /tshul khrims skyon med shin du bsdams pa yi/ /dge slong 'dis ni nyes pa ci zhig byas/ /'di ni sngon gyi skye ba bsam yas dran/ /'di ni ye shes gzungs dbang pha rol phyin/ /'di ni 'dus byas 'di dag stong par shes/ /'di ni 'gro ba dag la mtshan med ston/ /'di ni smon lam 'du shes thams cad spangs/ /'di ni yid 'ong snyan pa'i sgra dbyangs 'byin/ /'di ni nges shing dbang po rab tu zhi/ /'di ni sngon gyi gnas kyi pha rol phyin/ /'jig rten thams cad las kyang mngon par 'phags/ /'di ni sangs rgyas rang byung ye shes kyis/ /khyu mchog gyur cing 'jig rten ri mor byas/ /dag cing rab rib med pa'i mig gis lta/ /byams pa dang ni snying rje shin du che/ /'dod pa ngan cing gtsog la sdug bsngal bskyed/ /mtho ris rnam par ma rung byed pa ste/ /'dod pa bsnyen na rna ba med par 'gyur/ /mi dag shes rab dang yang bral bar 'gyur/ /mi rnams 'dod pa dag ni bsnyen byas na/ /long bar 'gyur zhing pha dang ma yang gsod/ /'dod pa bsnyen byas tshul khrims ldan pa gsod/ /de bas mi yis 'dod pa rnam par spang / /rgyal pos 'dod pa dag ni bsnyen byas na/ /sa bdag dam pa 'byor pa 'di bor nas/ /mi bzad sdug bsngal rtsub byed sems dmyal nas/ /sems can dmyal ba 'jigs pa chen por 'gro/ /'di 'dra'i dge slong mkhas pa gsod byed de/ /sdig pa'i las rnams rtag tu byed par 'gyur/ /de phyir byang chub zhi ba su 'dod pa/ /sdig pa rnam pa sna tshogs spang bar bya/ / 50.142b lus ni sgyu ma gsog dang 'dra ba dang / /de bzhin rna mig sna lce rig nas ni/ /gzugs dang sgra dang de bzhin dri mchog dang / /reg bya chos rnams zhum med sems kyis gtong / /sbyin la bslabs shing tshul khrims mnyam pa med/ /bzod pa dang ni brtson 'grus de bzhin te/ /bsam gtan sten cing shes rab pha rol song / /sems can dag gi don kyang rab tu byed/ /'jig rten lha dang mir bcas thams cad kyang / /byams pas rgyal ba la ni rab tu lta/ /de phyir mig ni mun gnag gtibs gyur kyang / /byang chub zhi ba nyid ni 'tshang rgya 'gyur/ /rta dang bal glang yang thogs khri rnams dang / /khyogs dang sngas rnams kyang ni de bzhin te/ /glang po dag dang bzhon dang dgal ba dang / /grong dang yul 'khor dga' ba gtong bar byed/ /grong khyer dang ni rgyal srid yongs gtong zhing / /gser dang dngul dang shel dang byi ru dang / /de bzhin gnas dang bu dang bu mo dang / /rang gi mgo yang gtong zhing byang chub zhugs/ /me tog dang ni spos dang bdug pa dang / /gdugs dang rgyal mtshan lha yi ba dan dang / /rol mo'i cha spyad sna tshogs thogs nas ni/ /dga' nas mchod pa mtshungs pa med pa byed/ /srid pa dag ni stong par shes nas kyang / /srid pa'i 'gro ba dag la dga' mi byed/ /de phyir stobs bcu mtshan gyis rnam brgyan cing / /phyogs bcu thams cad du yang snang bar byed/ /byang chub sems dpa' gzungs la gang gnas pa/ /'dod pa'i khams rnams dang ni gzugs kyi khams/ /gzugs med khams la de dag mi chags te/ /khams gsum dag la snga nas chags pa med/ /byang chub sems dpa' gzungs la gang gnas pa/ /bdag tu 'du shes sems can 'du shes med/ /srog tu 'du shes gang zag 'du shes med/ /tshangs par spyod pa ma 'dres rtag tu spyad/ /byang chub sems dpa' gzungs la gang gnas pa/ /dngos por 'du shes dngos med 'du shes med/ /bde bar 50.143a 'du shes mi bder 'du shes med/ /grangs su 'du shes grangs med 'du shes med/ /byang chub sems dpa' gzungs la gang gnas pa/ /yod par 'du shes med par 'du shes med/ /bud med 'du shes skyes par 'du shes med/ /grong gi 'du shes grong khyer 'du shes med/ /byang chub sems dpa' gzungs la gang gnas pa/ /yul 'khor 'du shes grong mdab 'du shes med/ /'dod chags 'du shes 'dod bral 'du shes med/ /zhe sdang 'du shes sdang bral 'du shes med/ /gti mug 'du shes rmongs bral 'du shes med/ /byang chub sems dpa' gzungs la gang gnas pa/ /nga rgyal nga rgyal bral ba'i 'du shes med/ /ma rig ma rig ma yin 'du shes med/ /lta dang lta ba ma yin 'du shes med/ /byang chub sems dpa' gzungs la gang gnas pa/ /de dag dbang po stobs la mi chags te/ /byang chub yan lag bsam gtan chags pa med/ /khams gsum nyes pa thams cad rab tu spongs/ /'dod chags chags med zhe sdang gtum pa med/ /gti mug rmongs med rtag tu g.yo med 'gyur/ /sangs rgyas stobs bcu mthong nas bkur sti byed/ /blo gros ldan pa mtho ris smon mi byed/ /su dag gzhan las chos mchog thos nas ni/ /de la nam yang nem nur mi byed pa/ /'bru mar gang ba'i snod bzhin dang zhing dag /bcad dang ma bcad gzhan gyi blo yang shes/ /mdza' ba byas na rjes su chags pa skye/ /de yang nyon mongs pa ni chen po yin/ /zhe sdang byas na khong khro skye bar 'gyur/ /dgra dang 'jigs pa sdig pa rnams kyang 'byung / /'di gnyis rab tu rnam par spang byas te/ /blo gros ldan pa dag ni byang chub zhugs/ /de dag mi yi khyu mchog stobs bcur ni/ /'jig rten du yang mngon par 'byung bar 'gyur/ /nang dang phyi rol dag kyang rnam spangs te/ /chos kyi ngo bo nyid la rab gnas shing / /tshul khrims phung po dag kyang rnam par sbyangs/ /ral ba med cing ma 'dres skyon yang med/ /nam yang de dag gi ni tshul khrims dag /'phags shing 'dres pa dag tu 50.143b mi 'gyur te/ /mtha' 'di dag ni gnyis po yongs spangs nas/ /blo gros 'chang ba byang chub zhi rtogs 'gyur/ /de nas rgyal po dpa' bas byin gyis dge slong gi dge 'dun las chos smra ba me tog zla mdzes kyi yon tan bye brag chen po yangs shing rgya che ba thos nas sdug bsngal zhing yid mi dga' nas de'i tshe byang chub sems dpa'i tshogs chen po la tshigs su bcad pas slar smras pa/ nags khrod stug po kun du bzang po ni/ /sdong po chen pos gang zhing 'bras bus mdzes/ /dus kun skye ba me tog sdug pas brgyan/ /sna tshogs tha dad bya rnams sgra yang 'byin/ /gser gyi ri yang mdzes shing mtho bas brgyan/ /mi'am ci yi glu dbyangs snyan pa dang / /rol mo shin du thabs ldan yid 'ong grag /grub pa'i bu mo rtag tu gar yang byed/ /nags de lha yi dga' ba'i tshal bzhin te/ /gzugs bzang gzugs 'bar ba yi shing gis dkrigs/ /me tog rnam pa sna tshogs tha dad bkram/ /ud pal pad mos brgyan cing chu yang 'bab/ /'di 'dra ba yi nags mchog nyams dga' ba/ /drang srong rtag tu gnas par 'thun pa dag /bor nas sems can don dang phan bzhed pas/ /sdig pa'i phung po bdag drung grong du byon/ /de ltar chos smra yon tan 'chang ba 'di/ /me tog zla mdzes grong khyer 'dir byon te/ /byon nas sdig pa bgyid pa bdag gis bkrongs/ /'di bkrongs pas ni bdag kyang dmyal bar ltung / /byang chub sems dpa'i thugs rje'i stobs ldan gang / /dpa' bo sems can phan phyir 'jig rten spyod/ /de dag sdig bgyid bdag gi skyabs mdzod cig /byang chub sems dpa' de skyabs bdag mchi'o/ /gang yang rang rgyal dag ni gnyis pa dang / /gang gzhan nyan thos rdzu 'phrul ldan pa ste/ /zag pa zad cing tha ma'i lus 'dzin pa/ /bdag ni sdug bsngal mnar med mchi ba skyobs/ /de nas yang bcom ldan 'das kyis tshe dang ldan pa kun dga' bo la bka' stsal pa/ de lta bas na kun dga' bo/ byang chub sems dpa' sems dpa' chen pos lus dang srog la ma chags par bya'o/ /de ci'i phyir zhe na/ kun dga' bo lus dang srog la chags pa'i 50.144a sems can rnams mi dge ba'i las mngon par 'du byed par 'gyur ro/ /de la 'di skad ces bya ste/ rtag tu rul ba'i lus 'di dang / /srog kyang g.yo zhing dbang med de/ /rmi lam sgyu ma 'dra ba la/ /sems can gang dag chags pa ni/ /shin du ma rungs las byas nas/ /gti mug dbang song de dag ni/ /sems can dmyal ba mi bzad par/ /mi mkhas bdud kyi bzhon bas song / /dbu ba rdos 'dra'i lus dang ni/ /chu yi chu bur 'dra srog la/ /mi gang chags par mi byed pa/ /de dag 'gro ba mchog tu 'gro/ /de nas yang bcom ldan 'das kyis tshe dang ldan pa kun dga' bo la bka' stsal pa/ kun dga' bo de lta bas na byang chub sems dpa' sems dpa' chen po ting nge 'dzin 'di 'dod pa dang / myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas lus dang srog la mi lta bar byas te/ mgo dang gos la me 'bar ba bzhin du brtson 'grus brtsams pas sems can thams cad la snying rje chen po bskyed de dben pa na bde bar gnas pa dang dgon pa dang nags khrod spangs te grong dang grong khyer dang grong rdal dang ljongs dang yul 'khor dang rgyal po'i pho brang 'khor dang ri khrod rnams su zhugs te/ ci nas sems can de dag nyan thos kyi byang chub dang rang sangs rgyas kyi byang chub las phyir mi ldog pa dang / bla na med pa yang dag par rdzogs pa'i byang chub las phyir mi ldog par 'gyur ba de lta de lta bur sems can rnams la chos bstan par bya'o/ /de nas yang bcom ldan 'das kyis de'i tshe tshe dang ldan pa kun dga' bo la sngon byung ba'i gtam bstan pa 'di nyid rgya cher tshigs su bcad pa'i dbyangs kyis rgyas par rab tu bstan to/ /ngas sngon spyad pa dag ni spyod pa na/ /de tshe rgyal po dpa' bas byin par gyur/ /rgyal po'i pho brang rin chen ldan zhes bya/ /bskyed mos tshal gyi sar ni byung bar gyur/ /shing rtar zhugs pas de tshe dge slong mthong / /kun nas mdzes shing blta na sdug pa ste/ /sum bcu rtsa gnyis mtshan gyi go bgos pa/ /phyogs rnams thams cad du yang snang bar byed/ /me tog zla mdzes phyogs su grags pa ste/ /snying rje gnas 50.144b pa phan zhing snying brtse ba/ /dpal dang gzi brjid dag gis mdzes pa ni/ /sems can rnams la brtse phyir grong du 'ongs/ /nga ni gzugs kyang de tsam mi phod pas/ /de la nga yang 'jungs pa ma rungs skyes/ /'dod la chags shing srid la bcings pas na/ /'di ni bdag gi srid las skyod snyam ste/ /nga yi bu rnams stong du tshang ba yang / /shing rtar zhugs shing zhabs 'bring mthon dman 'gro/ /cod pan dang ni sna tshogs rgyan gyis brgyan/ /sum bcu dbang phyir lha yi bu 'brang bzhin/ /de na nga yi bu mo lnga brgya dag /nor bu thogs shing lham gyon blta na sdug / /mgo rgyan dang ni lhab lhub rgyan gyis spud/ /de dag gser gyi dra bas shing rta 'dren/ /nga yi bud med dag ni brgyad khri yang / /gzugs mdzes shin du blta na sdug pa dag /shing rtar zhugs pas dge slong de mthong ste/ /r-i rab bzhin du gzugs bzang dpal 'bar ba/ /mthong nas de dag phar yang 'du shes bskyed/ /byang chub dam pa mchog tu sems skyes te/ /de tshe tshangs pa'i spyod par yang dag btsud/ /yid du 'ong ba'i rgyan rnams de la gtor/ /de tshe nga ni phrag dog skyes par gyur/ /gnod sems zhe sdang tha ba mi bzad de/ /dbang phyug rgyags pas bu la 'di skad smras/ /mdun na 'dug pa'i dge slong bsad par gyis/ /gzhon nu de dag nga yi tshig thos nas/ /shin du sdug bsngal yid kyang mi dgar gyur/ /yab cig de skad kyi ni tshig ma gsung / /dge slong 'di 'dra bdag cag mi 'gums so/ /bskal pa bye ba gang gA'i bye snyed du/ /bdag cag lus dang yan lag bcad gtubs kyang / /dge slong 'di ni 'gums par mi bgyid de/ /'di ltar bdag cag byang chub sems skyes so/ /rgyal po de tshe bu yi tshig thos nas/ /khros te gsod pa'i gshed ma 'bangs la smras/ /nga yi btsun mo'i mdun na 'dug pa yi/ /dge slong 'di ni myur du sod de phul/ /de nas gsod pa'i gshed ma phyi bzhin 'ongs/ /shin du gtum sems dga' byed snying rje med/ /'bru mar ngar btags ral gri thogs nas su/ /de yis dge slong dum bu brgyad du byas/ /de yi lus dang yan lag bcad pa las/ / 50.145a khrag kyang mi zag 'od zer stong byung ste/ /bcad pa'i 'phro na dpal be'u 'khor lo dag /mtshan rnams de yi lus kyi nang na yod/ /shin du ma rungs las ni byas nas su/ /bskyed mos tshal du de yi mod la byung / /dge slong me tog zla mdzes dran nas ni/ /de yi rtsed mo dga' bar ma gyur to/ /rings pa'i gzugs su myur zhing mgyogs par ni/ /de nas bdag gi rgyal po'i pho brang song / /gang du dge slong dum bu brgyad byas pa/ /sa phyogs der ni shing rtar zhugs nas phyin/ /lha rnams khrag khrig mang po bar snang la/ /cho nges 'debs pa'i sgra dag des thos te/ /rgyal po khyod kyis mi dge sdig mang bgyis/ /shi 'phos nas ni mnar med mi bder 'gro/ /rgyal po des ni lha yi sgra thos nas/ /shin du sdug bsngal mi dga' sems skrag gyur/ /bdag gis me tog zla mdzes bkrongs pa ni/ /bdag gis sdig pa mi bzad mang po bgyis/ /de bzhin gshegs pa ye shes mtha' yas ldan/ /sangs rgyas mi yi khyu mchog sras po gang / /dbang po bsrungs shing des pa zhi ba'i yid/ /de ni 'dod pa'i don phyir bdag gis bkrongs/ /de bzhin gshegs pa'i chos rnams gang 'dzin cing / /zad pa'i dus la dam pa'i chos kyi mdzod/ /'jig rten kun du chos kyi sgron ma mdzad/ /de ni 'dod pa'i don phyir bdag gis bkrongs/ /'jig rten kun na sman pa'i rgyal po gang / /sems can na ba rtag tu gso byed cing / /bdud rtsi dag gis bkru sman gtong ba yi/ /dge slong bdag gis 'dod pa'i don phyir bkrongs/ /zhib cing zab la zhi ba blta dka' ba'i/ /chos rnams skye dgu dag la gang 'chad cing / /byang chub snying po mchog kyang gang ston pa/ /de ni 'dod pa'i don phyir bdag gis bkrongs/ /'dren pa rnams kyi chos kyi mdzod 'dzin cing / /'jig rten ldongs pa'i sgron mar gyur pa ste/ /gzungs dang mdo sde'i rgyal po gang 'dzin pa/ /de ni ci slad bdag gis 'dod phyir bkrongs/ /nyon mongs med cing rnam dag ye shes can/ /zhi ba rab zhi rtag tu mnyam bzhag pa/ /'dod pas ldongs pas bdag gis deng bkrongs te/ / 50.145b des ni shin du ma rungs dmyal bar ltung / /sangs rgyas gang dag 'das dang de bzhin ma byon dang / /mi yi dam pa rgyal ba gang yang bzhugs pa ni/ /bsngags pa mtha' yas yon tan rgya mtsho ldan pa rnams/ /de dag kun la thal mo sbyar te skyabs su mchi// // 'phags pa ting nge 'dzin gyi rgyal po'i mdo/ bam po bcu gsum pa/ de nas rgyal po dpa' bas byin gyis chos smra ba me tog zla mdzes bsad de shi ba'i lus kyi mdog ma gyur par sa la 'gyel cing 'dug pa mthong nas sdug bsngal zhing yid mi bde ste 'gyod cing myos par gyur nas de'i tshe cho nges rab tu cher btab po/ /chos smra ba me tog zla mdzes de la yang 'di lta bur yang dag pa'i yon tan gyis bstod pa dang snying rje dang ldan pa'i tshigs su bcad pa 'di dag smras so/ /kun du bzang por 'phags pa'i dge 'dun gyis/ /khyod la rnam pa mang po bsgo ba bgyis/ /khyod kyi srog gi bar chad byung ta re/ /rin chen ldan par rgyal po'i khab ma bzhud/ /khyod kyis dge slong dge 'dun tshig ma bzung / /mgon po grong khyer du ni ci slad byon/ /khyod ni gang gi don du byon pa yi/ /don de sgron ma mdzad pa mdzad du gsol/ /lha rdzas myu gu sna tshogs brgyan pa'i sa/ /gzugs bzang gzugs 'bar shing ljon mang pos dkrigs/ /grub pa'i rig 'dzin gnod sbyin mchog gis bsrungs/ /lha rnams zhugs shing bya rgyal sgra yang sgrog /kun du bzang po sangs rgyas rtag bzhugs pa/ /nags tshal dam pa dga' ba bor nas ni/ /bgyi ba gang phyir khyod ni 'dir byon pa/ /des pa bgyi ba de deng bdag la gsungs/ /khyod kyi tshig thos nas ni bka' bzhin bgyi/ /sangs rgyas sras po bzhengs la bka' stsol cig /kye ma da ni ci bgyi lha yi lha/ /bdag ni mgon med khyod kyi skyabs su mchi/ /gcig pu seng ge ri dgas rgyal po ltar/ /dge slong dge 'dun mchog gi khyu bor nas/ /sems can mtha' yas pa la thugs brtse'i phyir/ /rang gi srog kyang btang ste 'dir byon na/ /'dod chags zil non shin du 'jungs pa yis/ /bdag gis dpa' bo dum 50.146a bu dum bur bcad/ /'di ni dge slong dge 'dun mtha' dag kyang / /khyod la lta bar pho brang ma lhags par/ /bdag ni 'jigs skrag khyod la ci gsol pa/ /bde bar gsol ba gcig ni mdzad par 'os/ /me tog zla mdzes mi 'jigs bdag stsol la/ /nya dus zla ba nya 'drar bzhengs su gsol/ /sems can gtso bo bdag la gnang bar mdzod/ /chos smra khyod ni zhe sdang rnam par grol/ /de ring bdag la sna gcig gnang bar mdzod/ /nyi ma bzhin du snang mdzad bzhengs su gsol/ /chos smra mchog ni bdag gis bkrongs bgyis te/ /sdig pa ma legs bdag gis deng bgyis pa/ /'di nas 'chi 'phos mi bzad dmyal bar skye/ /bdag la de yi skyabs su 'gyur ba med/ /nyon mongs byed pa sdig sems ci ru rung / /rgyags pas khengs pa'i rgyal srid ci ru rung / /thams cad spangs te gcig pu 'gro bar 'gyur/ /'di nas bdag gis snying po ci ma blangs/ /'dod chags zhe sdang bcom pa rnam dag chos/ /snyan par gsung ba bdag thul thugs rje can/ /'gro ba'i gnyen gcig sun 'byin mi mdzad pa/ /me tog zla mdzes bdag gis ci phyir bkrongs/ /kye ma bzod dang dka' thub nor phyug brtul zhugs bzang / /kye ma gzugs dang des pa dag gi yon tan ldan/ /kye ma g.yo med dpal stug spros pa mi mnga' ba/ /bdag cag bor nas khyod ni gang du bzhud par mdzad/ /'phags pa khyod kyi lus dang yan lag bcad pa na/ /'o ma rab tu zag cing 'od zer stong dag byung / /'jig rten 'di dag thams cad shin du ngo mtshar gyur/ /ngo mtshar che ba'i rang bzhin 'dren pa bzhengs su gsol/ /kye ma me tog zla ba dul ba thugs rje can/ /kye ma byams dang snying rje'i phung po ri bo tshur/ /kye ma chos rnams zab mo shin du ston pa'i mchog /lha khyod bzhengs shig bdag la thugs brtser mdzad du gsol/ /kye ma zla ba nya zhal tshur spyon cig /kye ma sa bcu legs gnas tshur spyon cig /kye ma dpa' bo stobs bcu mngon 'phags pa/ / 50.146b tshe la khyod dbang bdag po gang du bzhud/ /kye ma dpa' bo tshur spyon bdag la gsungs/ /khyod kyis yun ring bzod pa bsgoms pa dang / /brtson 'grus thugs rje de dag gang du mchis/ /byams pa chen po bzhengs la gsung phyung zhig /kye ma shin du mchod 'os lha yi lha/ /chos smra cang mi gsung bar ci slad bzhugs/ /mkhas pa bzhengs la bdag gi khyim du bzhud/ /bud med tshogs la khyod kyis chos ston cig /lha khyod lus ni gcad par mi nus te/ /lha dang lha min gnod sbyin srin pos kyang / /khyod kyi lha yi lus 'di mi shigs kyis/ /mkhas pa khyod deng sgyu dag ma mdzad cig /lha khyod sgyu mdzad bzhugs pa ga la gda'/ /byang chub sems dpa' sgyu ma mi mdzes so/ /sgyu ma thams cad spongs la bzhengs su gsol/ /rin chen ldan pa'i grong du chos shod cig /kye ma 'phags pa me tog zla mdzes tshur/ /kye ma khams gsum 'dod chags bral ba tshur/ /kye ma pha ma lta bu 'dren pa tshur/ /bdag gi sems dmyal sgo ni bcad du gsol/ /ngan song skyes pa rnams kyi rten dang dpung / /srog chags mnar med chen por lhung ba yi/ /skyabs mdzad me tog zla mdzes tshur spyon cig /bdag gi bde 'gro'i sgo yang dbye bar gsol/ /mgon po khyod ni dgung bdun bshos ma gsol/ /re shig deng bzhengs bdag gi bshos gsol cig /bdag gis bshos gsol rin chen ldan pa 'dir/ /sems can du ma chos la dgod pa mdzod/ /kye ma chos mchog rtogs pa bdag gi yab/ /kye ma sems can rnams la khon med sems/ /kye ma tshur spyon bdag mdun chos ston cig /kye ma tshur spyon khyod smon myur grub shog /dge slong dge 'dun de ni mgon med gyur/ /kye ma mdongs shing mi dran mya ngan bgyid/ /sems can snying po khyod ni myur bzhengs la/ /dge slong dge 'dun dbugs kyang dbyung bar mdzod/ /kye ma 'jig rten gsum na sgron gyur pa/ /kye ma tshur spyon kun du bzang por bzhud/ /kun 50.147a du bzang po'i nags khrod bzhud nas ni/ /dge slong dag la phan phyir khyod ston cig /kye kye chos 'dzin yon tan rmad byung che/ /a shwad me tog bzhin du rnyed par dka'/ /shes rab thugs rje'i spyan ni dri med pa/ /kye kye dge slong dge 'dun gzigs su gsol/ /tshig gi lam dang bral ba'i gzugs de yang / /kye kye dge slong dag la bstan du gsol/ /kye kye zla ba shar ba bzhin du 'dir/ /me tog zla ba de ring bzhengs su gsol/ /kye kye rgyal sras bdag la thugs brtse ba/ /dbugs 'byin mdzad pa ston pa bla na med/ /kye kye mtshon dang dbyug pas btab pa bzod/ /bzod pa'i stobs dang ldan zhing rab tu des/ /kye kye me tog zla mdzes thugs rje can/ /rab sbyin 'dren pa khyod ni bzhengs su gsol/ /kye kye khyod ni bzhengs la bdag la yang / /mthong bar dka' ba'i gzungs rnams bshad du gsol/ /kye kye 'jig rten kun du snang mdzad pa/ /shes rab kyi ni sgron ma dam pa'i mchog / /kye kye sems can dag gi phan don la/ /brtson mdzad 'dren pa thugs rje'i stobs dang ldan/ /kye kye me tog zla mdzes bzhengs su gsol/ /dpa' bo sems can dag gi don mdzad pa/ /kye kye sems can dag ni bye ba dang / /khrag khrig rnams kyang zhi ba'i grong du khod/ /kye kye tshul khrims nor ldan blo gros che/ /mkhas pa bslabs pa'i nor gyis shin du phyug /kye kye tshul khrims brtul zhugs rab gnas shing / /chos kyi shing gi myu gu mngon par dga'/ /kye kye chos gos ngur smrig kha bsgyur 'chang / /rtag tu mngon par byung la dga' bar mdzad/ /kye kye me tog zla ba brtul zhugs mchog /rab sbyin dka' thub bzang po khyod bzhengs shig /kye kye dul ba sems can ma dul 'dul/ /rtag par dul ba'i gnas dang rjes su ldan/ /kye kye dul ba rab dul rjes su bzhud/ /zhi ba dbang po rab zhi khong nas des/ /kye kye sems can nyal zhing gnyid log pa/ /chos kyi sgra yis rtag tu sad par mdzod/ /kye kye sems can bye ba khrag khrig dag /sad par bgyis nas theg pa mchog la 50.147b khod/ /kye kye sbyin pa yi ni spang leb la/ /brtson 'grus thag gus sbrel ba'i gru sbyor te/ /kye kye sems can rgya mtsho chen por ni/ /rab tu lhung zhing srid pas ded pa rnams/ /kye kye stobs bcu ldan pa me tog mchog /mnyan pa gdos 'dzin mkhas pa bzhengs su gsol/ /kye kye shin du sra ba'i grur yang ni/ /zhugs nas bdag dang de dag bsgral bar mdzod/ /kye kye sman pa'i dam pa brtul zhugs la/ /shin du spyad cing rig mdzad sman pa'i mchog /kye kye ye shes rnam grol pha rol phyin/ /dam pa'i chos kyi rtsi dag sbyin mdzad pa/ /kye kye nad ni rnam pa sna tshogs kyis/ /btab pa'i sems can na ba rnams gzigs nas/ /kye kye myur du bzhengs la de dag la/ /chos kyi sman rnams shin du stsal bar mdzod/ /kye kye ye shes sman pa'i rgyal po mchog /mtshungs med ye shes 'phags shing pha rol phyin/ /kye kye nad rnams shin du gso mdzad cing / /thugs rjes sems can dag gi don kyang mdzad/ /kye kye na bar gyur pa'i sems can khams/ /'dod chags nad kyis ma lus bcom pa rnams/ /des ni sems can thams cad bde ba dang / /nad rnams med cing mya ngan 'das par 'gyur/ /kye kye mkhas pa ye shes rgya chen bslabs/ /chos kyi rnga dag shin du brdung bar mdzod/ /kye kye 'jig rten gyi ni the tsom gyi/ /'khri shing thams cad ye shes rgya mtshos chod/ /kye kye legs thos chos rnams 'dzin mdzad pa/ /rdul bral mdo sde bye ba brgya dag kyang / /'khor gyi nang du gdan la rab bzhugs la/ /mi mchog mkhas pa brjod pa mdzad du gsol/ /me tog zla ba mtshan mchog brgyan pa kye/ /dpe byad bzang po brgyad bcu tshang ba kye/ /dpe byad bzang po brgyad bcus lus brgyan kye/ /srid pa'i mtsho rgal spros med tshur spyon kye/ /srid pa'i btson rar chud khrol bzhengs shig kye/ /ye shes mchog rig tshangs pa 'dra ba kye/ /me tog zla ba thugs rje chen po kye/ /byams dang snying rje skyed la bzhengs shig kye/ /me tog zla ba khyod la gsol ba 'debs/ /dge slong dge 'dun khyod kyis 50.148a ma dor bar/ /tshur gshegs dge 'dun yongs su bsdu ba mdzod/ /bzhengs la nags khrod der yang gshegs sam kye/ /me tog zla ba bsam gtan dgyes pa mchog /mdza' dang mi mdza' mtshungs par byams shing phan/ /gzungs la rab tu gnas pa tshur spyon kye/ /ye shes sdong po mtshungs med khyod bzhengs shig /ri rab bzhin du mi g.yo brtan pa kye/ /sangs rgyas sangs rgyas sems can mnyam yid kye/ /me tog zla ba brtul zhugs rdzogs pa kye/ /bzhengs la shing gi drung du 'tshang rgya mdzod/ /lha yi rna ba chos kyi mchog 'chang kye/ /lha yi mig mkhas ye shes rtogs pa kye/ /bzhengs te bdag la gzigs shig thugs rje can/ /grags pa mtha' yas bdag gi tshig gson kye/ /'jig rten kun la phan dang don mdzad kye/ /me tog zla ba shin du sbyin dgyes kye/ /bzhengs la myur du bdag gi re rdzogs mdzod/ /khyod 'dir dum bu dum bur ma bzhugs shig /grong 'dir skyes pa bud med tshogs rnams kyang / /khyod mthong thams cad shing bzhin sa la 'gyel/ /snying skabs 'gyur ba'i mya ngan rnams kyang bgyid/ /thugs rje mchog gi spyan gyis de la gzigs/ /gang gi slad du byams pa bsgoms pa dang / /ye shes shes rab thabs kyi stobs rnams dang / /khyod kyi thugs rje btang snyoms dga' ba yangs/ /de dag rdzogs mdzod bzhengs shig me tog mdzes/ /lha klu lha min rdzu 'phrul chen po dang / /gnod sbyin srin po mi dang mi 'am ci/ /snyim pa me tog bdug pas bkang nas ni/ /thams cad mthong bar dga' nas lhags shing 'khod/ /drang srong chen po'i tshig ni deng rtogs te/ /skye dgu'i 'dod pa gnod byed gsod pa yin/ /yid kyi nad du 'gyur ba ngan 'gro'i rgyu/ /de phyir 'dod pa'i spyod pa spang bar bya/ /dge slong bdag gis bsad pa sdig gi las/ /shin du ma legs mi bde byas pas na/ /bdag ni mi bzad dmyal ba mnar med 'gro/ /bdag la de yi mgon skyabs byed pa med/ /bdag ni rgyal po'i srid btang 50.148b tshangs spyod gzhol/ /spos dang me tog byug pa rnams kyis ni/ /mchod pa dam pa rnams kyang rab tu bya/ /shin du mdzes par mchod rten bdag gis bya/ /bu dang bu mo bud med khyim bdag dang / /blon po dang ni tshong dpon de dag dang / /grong ba dang ni rgyal rigs mang po rnams/ /de dag thams cad la ni ngas bsgo ba/ /a ga ru dang tsan dan shug pa dang / /shin du zhim pa'i spos mchog ci yod pas/ /myur du sgrom gyi snying po'i khyogs chos la/ /dge slong 'di ni bsreg pa'i cho ga gyis/ /grong khyer mi kun rgyal po'i tshig thos nas/ /spos mchog dag kyang thogs nas khyogs bcas te/ /spos rab bzang po yid du 'ong las byas/ /der ni dge slong der yang bcug nas su/ /a ga ru dang tsan dan tsam pa ka /rgya spos spri ka de bzhin pa ta la/ /me tog dang ni phreng ba byug pa dag /shin du bzang dang 'bru mar dag gis bsregs/ /de yi rus pa'i sgrom ni byas par gyur/ /dge slong dag gis de yang der bsregs te/ /rgyal pos de yi mchod rten byas nas su/ /'di la ngas ni mchod pa bya zhes zer/ /me tog dang ni phreng ba byug pa dang / /gdugs dang ba dan rgyal mtshan thogs nas su/ /rgyal pos der ni sil snyan stong dag dang / /bye ba khrag khrig rnams kyang len du btsud/ /nyi ma gcig la rgyal po dus gsum du/ /dge slong de yi mchod rten de drung du/ /sdig pa sngan cad cung zad ci byas pa/ /de tshe dus gsum du yang shin du 'chags/ /lo stong bye ba phrag ni dgu bcu lngar/ /nyes pa byas pa dag kyang rab bshags te/ /phyis kyang tshul khrims dam pa ma ral bsrungs/ /rnam par dag cing gtsang la dri ma med/ /lo stong bye ba phrag ni dgu bcu lngar/ /gso sbyong dag kyang de tshe rab gsos te/ /de ni de tshe bdag gi lus zhig nas/ /mnar med mi bzad par ni de lhung gyur/ /'dod phyir snying rje med pa'i las byas pas/ /sdug bsngal mang po dag kyang myong bar gyur/ /sangs rgyas bye ba stong phrag dgu bcu lnga/ /de tshe de dag bdag gis ma mnyes byas/ /lo stong bye ba phrag ni dgu bcu lngar/ /de yi tshe na nga ni long 50.149a bar gyur/ /bskal pa bye ba khrag khrig drug bcu gnyis/ /sngan chad nga yi mig kyang bcar bar gyur/ /bskal pa bye ba khrag khrig phrag stong dang / /shin du mang bar nga yi mig phyung phrogs/ /mgo dang rna ba dang ni rkang lag kyang / /bskal pa mtha' yas khrag khrig bcad par gyur/ /bskal pa dag ni bye ba khrag khrig tu/ /mir gyur pa dang skye ba gzhan du yang / /'khor ba'i sdug bsngal dag gis rab gtses shing / /sdug bsngal tshor ba yun ring myong bar gyur/ /sdig pa'i las rnams byas pas 'khor ba na/ /yun ring shin du sdug bsngal myong bar gyur/ /de phyir byang chub zhi ba su 'dod pa/ /srid pa gsum du sdig pa mi bya'o/ /rgyal po mchog gis sngon gyi las bshags kyang / /snga ma'i nyes byas rnams las de ma thar/ /mi bzad gzugs kyi las rnams sngar byas pas/ /de shi dmyal ba mi bzad mnar med song / /nga yi rna ba de bzhin rkang lag bcad/ /bskal pa mtha' yas mang por sna yang bcad/ /spyod pa spyod tshe mtshon cha dbyug thogs nas/ /'debs byed nan gyis nga yi mig kyang phyung / /byang chub phyir ni mgo lag lus bcad dang / /bu dang chung ma mig dang rang gi sha /rkang lag dga' ba'i sems kyis yongs btang yang / /sngon gyi sdig pa'i las ni zad ma gyur/ /kun dga' de ltar bskal pa mtha' yas spyod/ /sangs rgyas dpal stug dpag tu med pa mthong / /byang chub spyod mchog 'di ni spyod pa na/ /de tshe sdug bsngal 'di dag sngon myong gyur/ /byang chub sems dpa' gzungs la gang gnas shing / /byams spyod rtag tu mi g.yo mi 'gul ba/ /sangs rgyas rdul sbyangs lha yi lha mchod nas/ /de dag nam yang ngan song sar mi 'gro/ /sum bcu rtsa gnyis mtshan gyis go bgos pa/ /chos rje sangs rgyas bdag 'gyur su 'dod pa/ /tshul khrims ma 'dres g.yo ba med par srungs/ /gzungs la rab gnas chos kyang bstan par gyis/ /nga ni de tshe rgyal po dpas byin yin/ /nga yi bu rnams phyi dus chos skyong ba/ / 50.149b me tog zla mdzes pad ma bla ma yin/ /dga' byed de ni zhi ba'i rgyal bar gyur/ /'jig rten gsum dpa' 'gro ba'i gnyen gcig pa/ /de bzhin gshegs pa rkang gnyis gtso bor gyur/ /skye dgu dag gi don chen mdzad nas ni/ /mar me bzhin du 'dren pa mya ngan 'das/ /bud med tshogs dang rgyal rigs mang po dang / /khyim bdag dang ni blon po stobs chen dang / /tshong dpon de bzhin grong ba'i mkhar gyi rgyal/ /thams cad stobs bcu nyon mongs med par gyur/ /me tog zla mdzes kyi le'u ste sum bcu rtsa drug pa'o// // de nas bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po ci nas bdag bla na med pa yang dag par rdzogs pa'i byang chub bde bar mngon par rdzogs par 'tshang rgya bar 'dod na/ gzhon nu byang chub sems dpa' sems dpa' chen po des chos thams cad kyi rang bzhin mnyam pa nyid rnam par spros pa'i ting nge 'dzin 'di mnyan par bya/ gzung bar bya/ kun chub par bya/ bcang bar bya/ klag par bya/ rab tu gdon par bya/ lung mnod cing kha ton du bya/ nyon mongs pa med pa'i bsgom pas mang du bsgom par bya/ gzhan la yang rgya cher yang dag par rab tu bstan par bya'o/ /tshul khrims kyi phung po la yang rab tu gnas par bya'o/ /de nas yang bcom ldan 'das kyis de'i tshe tshigs su bcad pa 'di dag gsungs so/ /byang chub sems dpa' tshul khrims tshogs gnas shing / /bdag la phan sems spyad pa gang spyod pa/ /mngon dga'i sangs rgyas zhing du myur song nas/ /bzod pa des thob chos kyi rgyal por 'gyur/ /de phyir gnod sems med cing kun 'thun gyis/ /thams cad rtag tu yid du 'ong bar bgyis/ /dpal stug sangs rgyas dpag med mthong nas ni/ /byang chub reg nas chos kyi bdag por 'gyur/ /de phyir phan yon mchog 'di thos nas ni/ /dge slong tshul khrims mchog dang 50.150a ldan mthong na/ /mkhas pas g.yo med rtag tu bsten par bya/ /ring por mi thogs ting 'dzin 'di 'thob 'gyur/ /gal te gter rnams dpag med tshad kyang med/ /rin chen sna bdun nor bus gang gyur pa/ /de bzhin zhing rnams gang gA'i bye ma snyed/ /nor bu rin po che yis gang ba rnams/ /byang chub sems dpa' sbyin la mos pa yis/ /nyin mtshan re rer sbyin pa 'di dag byin/ /de bzhin bskal pa gang gA'i bye ma snyed/ /rgyun mi 'chad par sbyin pa byin pa bas/ /byang chub sems dpa' gang gis ting 'dzin 'di/ /thos nas bde gshegs mdzod mchog 'dzin byed pa/ /bsod nams phung po des ni gang bzung ba/ /sbyin pa de kun de yi char mi phod/ /mi gang rjes su 'thun la dad pa dag /ting 'dzin rdul bral mchog 'di 'dzin pa ni/ /bsod nams phung po dpe med mchog 'di yin/ /ye shes mdzod de dpag med 'byung gnas so/ /ting 'dzin rdul bral zhi ba 'di bzung na/ /byang chub sems dpa' de ni nor chen 'gyur/ /rgya mtsho chen po bzhin du thos pa'i gter/ /de la bsod nams tshad yod yong mi 'gyur/ /chos kyi mchog rnams bsam gyis mi khyab pas/ /shin du rgyas byas byang chub sems dpar brjod/ /ting 'dzin 'di ni su dag ston byed pa/ /de ni nam yang byang chub the tshom med/ /bsod nams phung po mchog dang gang ldan zhing / /gang la tshad med bsam gyis mi khyab pa/ /'jig rten slob dpon sangs rgyas rnam par 'dren/ /rang byung thugs rje chen po ma gtogs par/ /de yi 'og tu sems can su dag kyang / /stong chen 'di ni bsod nams phung po dang / /mtshungs med bsam gyis mi khyab ye shes kyis/ /mnyam par gyur pa nam yang yong med do/ /ting 'dzin 'di ni thos nas 'dzin pa dang / /klog cing yongs su chub par byed pa dang / /mtshungs med sangs rgyas byang chub tshol ma gtogs/ /de yi ye shes mtshungs pa med par 'gyur/ /ting 'dzin 'di ni bzung zhing 50.150b blags pa yis/ /bsod nams phung po ji snyed bsags pa yang / /gzhon nu ji ste chos de gzugs yod na/ /'jig rten khams mang 'dir yang shong mi 'gyur/ /gzhon nu de phyir byang chub sems dpa' gang / /'das dang 'byung ba'i de bzhin gshegs pa dang / /sangs rgyas thams cad mchod par 'dod pa yis/ /ting 'dzin 'di ni gzung zhing bklag par gyis/ /de bzhin gshegs pa'i byang chub 'di yin te/ /gzhon nu nga yi tshig la dad par gyis/ /de bzhin gshegs pa brdzun gyi tshig mi gsung / /'di 'dra'i sems can brdzun du smra ba med/ /sngon gyi bskal pa brgya phrag bsam yas su/ /byang chub spyad pa mchog 'di rab spyod cing / /ting 'dzin 'di ni yongs su tshol ba'i phyir/ /ngas ni bdag tu lta ba 'dir sbyangs so/ /de phyir chos kyi mdzod 'di mnyan par gyis/ /'di las mdo sde bye ba khrag khrig 'byung / /'di ni bsod nams phung po bsam yas yangs/ /'dis ni sangs rgyas ye shes myur du 'thob/ /mkhas pa 'jigs med de dag gang ston pa/ /'di ni mdo sde kun gyi dam pa'i mdo/ /dge ba bsam gyis mi khyab 'byung gnas te/ /chos de rnams la mtha' thug rnyed mi 'gyur/ /stong chen dag ni bcad cing bshig nas su/ /rdul gyi tshogs rnams bgrang bar nus na yang / /mdo sde brgya phrag bsam yas tshad med pa/ /rgyun mi chad par de stong bgrang mi nus/ /sangs rgyas zhing gi sems can thams cad kyi/ /phyi nang rgyu ba'i dbugs ni bgrang nus kyang / /ting 'dzin 'di la gnas nas gang ston pa/ /mdo sde de dag mthar thug nus mi 'gyur/ /sangs rgyas zhing ni gang gA'i bye ma snyed/ /'gro ba der yang sems can gang skyes pa/ /de dag sems ni bgrang bar nus kyang srid/ /rtag ston mdo sde de dag bgrang mi nus/ /rgya mtsho chen po'i bye ma ci yod dang / /klung dang mtshe'u dang gshong gi bye ma dag /bskal pa bye ba dag gis bgrang nus kyang / /de dag 'chad pa'i mdo sde mtha' yas so/ /sangs rgyas zhing ni bye ba mang po na/ /chu yi phung po rtag 'dug ci yod pa/ /brgya tshal skra yi rtse mos bgrang nus kyang / /de yi dbyangs kyi yan lag kun mi 'grangs/ / 50.151a gang sngon 'dir ni sems can ci 'byung ba/ /rang gi lus la snying por 'dogs pa rnams/ /bskal pa bye ba mang pos bgrangs nus kyang / /de dag mdo sde sgrub pa shes mi nus/ /phyogs bcu dag na sems can ci yod pa/ /srog chags kun gyi sgra skad bgrang nus kyang / /de dag rtag tu mi 'chad ston pa yi/ /mdo sde de dag bgrang bar yong mi nus/ /chos rnams thams cad bstan par rab shes shing / /nges pa'i tshig dang bstan pa tshig don mkhas/ /gtan la bab pa'i yang dag tshul la bslabs/ /blo gros yangs shing rtag dga' shes rab can/ /yangs pa'i don sems rab tu phye ba'i blo/ /bsam dang mi bsam pa yang rtag tu shes/ /dbyangs kyi rang bzhin rgya chen thams cad rig /sgra dbyangs de dag ston kyang chags mi 'gyur/ /thogs med de ni chos smrar brjod pa ste/ /'gro ba kun la ston kyang chags mi 'gyur/ /dra ba nges par bstan pa brgya la mkhas/ /de ltar de yis don dam rab tu rtogs/ /mdo sde gcig gis phyogs kyang bye ba snyed/ /bsam gyis mi khyab des ston chags pa med/ /chags med ston pa tshig gi don la mkhas/ /'khor gyi nang du de 'chad chags mi 'gyur/ /ting 'dzin 'di la legs par gang gnas pa/ /byang chub sems dpa' de ni g.yo ba med/ /chos la stobs bskyed bye brag thob pas ni/ /srog chags bye ba mang po'i don de byed/ /ji ltar ri rab mi g.yo mi 'gul te/ /rlung rnams kun gyis 'gul bar mi nus pa/ /de bzhin dge slong chos smra mkhas pa yang / /pha rol rgol ba kun gyis bskyod mi nus/ /stong chen gyi ni 'jig rten khams 'di na/ /ri gang mi g.yo bar ni brjod pa rnams/ /de dag rlung gis rab tu bskyod nus kyang / /stong pa'i chos gnas dge slong bskyod mi nus/ /su dag stong pa nyid la rtag brtson pa/ /sangs rgyas gnas su nges pa de yin te/ /gtan la bab pa stong pa'i chos rab shes/ /de ni rgol ba kun gyis dkrug mi nus/ /phas kyi rgol ba dag gis mi bskyod cing / /smra ba thams cad kyis kyang zil mi non/ /ting 'dzin zhi ba 'di ni bstan byas 50.151b na/ /zil gyis mi non smad pa med par 'gyur/ /ting 'dzin zhi ba 'di ni bshad byas na/ /de yis stong nyid rtogs par khong du chud/ /de ni chos rnams kun la nem nur med/ /ye shes mtha' yas dag la khor mor gnas/ /ting 'dzin 'di ni bzung zhing blags pa na/ /stobs dang byang chub yan lag rnyed mi dka'/ /yang dag rig dang rdzu 'phrul bsam mi khyab/ /de la mngon par shes pa rnyed mi dka'/ /mtha' yas ye shes rgyal ba mthong ba yang / /srid par grub pa dag ni rnyed mi dka'/ /sangs rgyas bye ba khrag khrig bsam mi khyab/ /ting 'dzin 'di 'chang de yis mthong bar 'gyur/ /de ni rgyal ba de dag thams cad las/ /ting 'dzin zhi ba 'di yang thos 'gyur te/ /yang dag rig dang dbang gi pha rol phyin/ /sangs rgyas ye shes mchog dang ldan par 'gyur/ /stong chen gyi ni 'jig rten khams 'di dag /lha rdzas nor bu rin chen bzang mchog gis/ /'og nas bzung ste srid pa'i rtse mo'i bar/ /nor bu rin chen dag gis gang gyur dang / /zhing yang mtha' yas rnam mang ji snyed pa/ /'dzam bu'i chu bo'i gser bkram gang ba kun/ /sa yi 'og nas srid pa'i rtse mo'i bar/ /thams cad rgyal ba'i mchog la sbyin pa byin/ /sems can rnam pa mang po ji snyed pa/ /bskal pa mtha' yas mang por sbyin pa byin/ /sangs rgyas rnams la khor mor mi chad byin/ /byang chub 'dod phyir byin pa'i sbyin tshogs la/ /dge slong gang dag stong nyid mngon dga' zhing / /stobs bcu la ni thal sbyar phyag 'tshal na/ /byang chub sems dpa' stong nyid mngon dga' la/ /sbyin pa'i phung po snga mas char mi 'phod/ /bsod nams ldan pa'i mi des de rnyed nas/ /sangs rgyas byang chub mtshungs med tshol ba'i phyir/ /dad pa rgya cher bskyed nas sbyin pa byin/ /de yi dpe 'di skyes bu dam pas bstan/ /su dag ting 'dzin dam pa'i mchog 'di las/ /tshig bzhi'i tshigs bcad sems dga' 'dzin pa yang / /de yi bsod nams phung po bsags pa la/ /sbyin pa de kun brgya yi char mi phod/ /ting 'dzin rdul bral zhi ba ma thos par/ /phan byed byang chub sems dpas sbyin byin kyang / / 50.152a thos pas sangs rgyas ye shes myur thob ltar/ /de tsam sangs rgyas ye shes myur mi 'thob/ /gang gis zhing mchog sa 'di thob nas su/ /rdul bral ting 'dzin stong pa'i rigs 'di ni/ /byang chub sems dpa' dga' bas rtogs byed pa/ /des ni sangs rgyas ye shes myur du 'thob/ /gang gis 'di lta bu yi gter rnyed pa/ /zhing rnams mtha' yas gang gA'i bye ma snyed/ /de dag lha dang de bzhin mi rnams kyi/ /nor bu rin po che yis gang bar gyur/ /byang chub sems dpas ting 'dzin 'di thob ste/ /rtag tu chub par byed cing mi ngoms pa/ /thul bar dka' zhing mdzod rnams shin du mang / /nor yang mang zhing rin chen nor dang ldan/ /ji ltar ting 'dzin rdul bral 'di thob nas/ /byang chub sems dpa' dga' zhing rangs pa ltar/ /rgyal srid shin du 'byor cing rgyas thob kyang / /mkhas pa de dag nam yang dgar mi 'gyur/ /de dang de dag sangs rgyas kun mkhyen gyi/ /chos rnams rtag tu 'dzin par byed pa yin/ /zad pa'i mthar thug dus su gyur pa'i tshe/ /chos kyi tshul mchog rgya cher 'dzin par 'gyur/ /chos kyi mdzod 'chang blo gros chen po 'chang / /thams cad mkhyen pa'i mdzod kyang 'chang ba yin/ /de dang de dag sems can bye mang dang / /khrag khrig chos kyi dbyangs kyis mgu bar byed/ /de dag tshul khrims nor ldan blo gros can/ /skyes bu de dag bslabs pa'i nor gyis phyug /de dang de dag tshul khrims brtul zhugs gnas/ /mngon dga' chos kyi sdong po'i myu gu yin/ /de dag chos gos ngur smrig rin chen 'chang / /khyim nas 'byung la rtag tu dga' bar byed/ /de dag sems can phan phyir mnyam pa med/ /thams cad mkhyen pa nyid la rab tu zhugs/ /de dag dul ba sems can ma dul 'dul/ /rtag par dul ba'i gnas dang rjes su ldan/ /de dag dul zhing rab dul rjes su song / /zhi ba'i dbang po rab tu zhi ba yin/ /de dag sems can nyal ba gnyid log pa/ /rtag tu chos kyi skad kyis sad par byed/ /sems can dag ni sad par byas nas su/ /rin chen chos 50.152b bzang mchog la 'god par byed/ /de dang de dag sbyin pa'i bdag po yin/ /khor mor rtag tu gtong la brkyang ba ste/ /mkhas pa de dag 'jungs dang 'grogs mi byed/ /gtong ba chen po dag la rtag tu dga'/ /de dag sems can dbul zhing sdug bsngal rnams/ /mthong nas longs spyod kyis kyang tshim par byed/ /de dag sems can bde zhing phan pa'i phyir/ /thams cad mkhyen pa nyid la rtag par zhugs/ /de dag ye shes rtag tu bslabs pa ste/ /chos kyi rnga yang rgya cher shin du rdung / /skye bo kun gyi the tshom 'khri shing gcod/ /rtag par ye shes la yang rab tu zhugs/ /de dag legs thos chos 'dzin rdul bral ba/ /'khor gyi nang du stan la 'dug nas su/ /mkhas pa blo gros 'chang ba de dag ni/ /mdo sde bye ba brgya dag rab tu ston/ /de dang de dag mang du thos pa yin/ /thos pa 'dzin pa sangs rgyas chos rnams 'dzin/ /chos kyi mdzod rnams shin du 'dzin byed de/ /thub pa'i chos kyi gter la dga' ba yin/ /de dang de dag shes rab yangs pa yin/ /dga' ba dag kyang rgya cher rtag tu skyed/ /zhib cing 'byung bar 'gyur ba blta dka' ba/ /zhi ba'i chos mchog rnams kyang rab tu ston/ /de dag chos dang chos min shes pa ste/ /des shing blo gros ldan pa chos la gnas/ /chos kyi rgyal srid rab tu ston byed cing / /mtshungs med chos kyi mchog la rtag tu spyod/ /de dag chos kyi mchog la lhur byed de/ /bla ma la yang ri mo byed par gnas/ /chos kyi grong khyer mchog la gnas pa ste/ /blo gros ldan pa chos kyi rgyal mtshan sgreng / /de dag dregs shing rgyags pa'i sems can rnams/ /rtag tu bag med pa la gnas pa mthong / /rab tu ma rung log pa'i lam song zhing / /'khor ba'i lam la gnas pa mthong nas ni/ /de la byams dang snying rje rgya cher bskyed/ /dga' dang btang snyoms dag la'ang rab gnas te/ /de dag la ni yan lag brgyad ldan pa/ /lam mchog zhi ba blta dka' rab tu ston/ /de dang de dag legs byas chos kyi gru/ / 50.153a bshams nas 'khor ba'i rgyun du song ba dag /rgya mtsho chen por lhung zhing khyer ba yi/ /sems can mang po dag ni sgrol bar byed/ /byang chub yan lag stobs dang dbang po yis/ /go bgos dam pa'i chos kyi gru zhugs nas/ /pha rol 'gram bde rtag tu 'jigs med par/ /khor mor sems can rnams kyang 'god par byed/ /de dag sman pa'i gtso bo dka' thub la/ /shin du spyad pa rig byed sman pa'i mchog /rig pa ye shes rnam grol pha rol phyin/ /dam pa'i chos kyi rtsi yang sbyin par byed/ /nad ni rnam pa mang pos btab pa yi/ /sems can na ba dag kyang mthong nas su/ /de dag la ni chos kyi bkru sman gtong / /chos rnams kyis ni de dag gso ba byed/ /de dag smra ba pha rol rgol ba 'joms/ /'jig rten dbang po tshig gi dbang phyug ldan/ /shes bya kun la 'od byed blo gros 'chang / /ye shes dam pa'i sa la rab tu gnas/ /dpa' bo ye shes stobs ldan stobs 'joms pa/ /ye shes ldan pa dag gis yang dag bsngags/ /sems can bye ba khrag khrig mang po dag /chos la gnas nas shes pas mgu bar byed/ /de dang de dag bdag po ded dpon te/ /gsal ba sems can rnams kyi skyabs 'dod pa/ /sems can rin chen lam la rmongs gyur cing / /rtag tu bdud kyi snying zhugs mthong nas ni/ /de dag la yang lam mchog zhi zhing bde/ /rtag par mya ngan 'das pa rab tu ston/ /mkhas pa dag ni ye shes lam de yis/ /sems can mang po bye brgya 'dren par byed/ /de dang de dag gnas dang rten du 'gyur/ /skyabs dang mig dang sgron ma byed pa yin/ /'jigs pa rnams la mi 'jigs rab tu sbyin/ /skrag pa rnams kyang rtag tu dbugs 'byin byed/ /de dag sems can shin du sdug bsngal dang / /dmus long gyur pa 'di dag rig nas ni/ /yang dag tshul bslabs rin chen chos rnams kyis/ /chos kyi snang ba dag kyang byed par 'gyur/ /'jig rten na ni bzo mchog ci yod pa/ /bzo bo byed pas sems can phan 'gyur zhing / /gang gis sems can rtag tu bder 'gyur ba/ /bzo yi rnam pa de dag shin du bslabs/ / 50.153b su dag byang chub tu ni mngon zhugs te/ /blo gros ldan zhing 'jig rten mig sbyin pa/ /bslabs pa rnams la mchog gi pha rol phyin/ /mkhas rab 'jig rten na yang ngo mtshar thob/ /sangs rgyas dag gi chos mchog thos pa yis/ /mtshungs pa med pa ngoms par yong mi 'gyur/ /tshul khrims bzod dang ting 'dzin pha rol phyin/ /zab mo yi ni chos rnams shin du thos/ /de dag zhi ba rin chen chos rnams ni/ /gzhan la ston pas ngoms par mi 'gyur te/ /thar ba'i thabs kyi char yang rab 'bebs shing / /chos kyis skyes bu dag ni tshim par byed/ /de yi drung du sems can mang po ni/ /chos 'dod mkhas pa ji snyed lhags nas su/ /chos mchog bzang po dam pa rin po che/ /drang zhing gsal ba'i lam rnams mnyan snyam pa/ /de dag blo gros 'chang bas the tshom bcad/ /chos kyis de dag shin du mgu bar byed/ /tshul khrims bzod dang ting 'dzin pho rol phyin/ /sems can rnams kyi bsam pa rab tu shes/ /ye shes ldan zhing ye shes mchog rab kyi/ /pha rol phyin pa sems can bsam la mkhas/ /sems can pha rol sems dang spyod pa dang / /gang dag gtam ni ci 'dra'i chos brjod pa/ /ye shes gtam ni brjod la gang dag gis/ /sems can khrag khrig chos mchog mig thob 'gyur/ /de dag ye shes bye brag pha rol phyin/ /lam rnams kyang ni nye bar ston par byed/ /mkhas pa de dag gi ni sems rnams kyang / /bdud rnams bye ba stong gis yong mi shes/ /ji ltar nam mkha' la ni bya song ba/ /de yi rjes ni gang du'ang shes mi nus/ /ye shes stobs ldan dul zhing rab tu zhi/ /zhi ba 'phags pa'i ye shes dag la gnas/ /dpa' bo khyu mchog bdud rnams thams cad bcom/ /byang chub zhi ba mngon par 'tshang yang rgya/ /rtag tu rdzu 'phrul dag gi pha rol phyin/ /zhing yang brgya phrag mang por 'gro bar byed/ /sangs rgyas mang po bye ba khrag khrig mthong / /ji bzhin gang gA yi ni bye ma snyed/ /de yi mig kyang thogs par mi 'gyur te/ /phyogs bcu dag 50.154a gi gzugs mang mthong bar 'gyur/ /ji snyed phyogs bcu yi ni srid pa na/ /sems can yod dgu de dag 'dren par gyur/ /bskal pa bye ba brgya phrag mang por ni/ /de dag de yi phan yon kun brjod cing / /spobs pa yi ni rab tu bshad mdzad kyang / /sngon gyi spyod pa'i bsngags pa zad mi nus/ /ting 'dzin mtshungs med rdul dang bral ba 'di/ /skyes bu su gang 'dzin par byed pa ni/ /sangs rgyas dag gi nor rnams mi zad de/ /shin du rgya che ye shes rgya mtsho bzhin/ /tshul khrims kyi phung po nges par bstan pa'i le'u ste sum bcu rtsa bdun pa'o// // de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na byang chub sems dpa' sems dpa' chen po ngo mtshar dang / rmad du byung ba'i byang chub sems dpa'i chos 'di dag dang / gzhan yang tshad med pa 'dod pa dang / myur du bla na med pa yang dag par rdzogs pa'i byang chub mngon par rdzogs par 'tshang rgya bar 'dod pas chos thams cad kyi rang bzhin mnyam pa nyid rnam par spros pa'i ting nge 'dzin 'di mnyan par bya/ gzung bar bya/ kun chub par bya/ bcang bar bya/ klag par bya/ rab tu gdon par bya/ lung mnod cing kha ton du bya/ nyon mongs pa med par bsgom pas bsgom par bya/ gzhan la yang rgya cher rab tu bstan par bya/ des bzod pa'i stobs bsgom par bya/ bzod pa bsten par bya/ mang du bya/ chos la don du gnyer ba dang / chos 'dod pa dang / chos yongs su 'dzin pa dang / chos dang rjes su 'thun pa'i chos la zhugs par bya'o/ /sangs rgyas mchod pa la mngon par brtson par bya'o/ /des gnas gsum la brtson par bya ste/ gsum gang zhe na/ 'di lta ste/ nyon mongs pa zad pa dang / bsod nams kyi zhing du gyur pa dang / sangs rgyas kyi ye shes 'dod pas dge ba'i rtsa ba rnams bskyed par bya'i 'jig rten gyi bde ba la reg par 'dod pa'i phyir ni ma 50.154b yin te/ gnas gsum po de dag la mngon par brtson par bya'o/ /de nas bcom ldan 'das kyis de'i tshe zla 'od gzhon nur gyur pa la don 'di nyid bstan pa'i phyir sngon byung ba'i gtam bstan pa 'di dag tshigs su bcad pa'i dbyangs kyis yang dag par rab tu bstan to/ /bskal pa stong du ji ltar ngas spyad pa/ /gzhon nur gyur pa nga las mnyan par gyis/ /ting 'dzin bzang po dam pa 'di tshol phyir/ /sangs rgyas dag ni stong phrag brgya yang mchod/ /de ltar bskal pa 'das pa bsam yas su/ /zhing brgya yi ni bye ma ci yod pa/ /dper bsten de snyed 'das par gyur pa na/ /tshogs kyi dbang phyug ces bya rgyal ba byung / /bye ba stong phrag drug cu mi nyung ba/ /rgyal ba de yi tshogs ni byung gyur te/ /thams cad zag pa med cing nyon mongs zad/ /rnam thar brgyad la gnas pa'i bsam gtan pa/ /de yi dus na sa 'di thams cad kyang / /bde zhing lo legs 'khrug pa med par gyur/ /mi rnams thams cad skyid cing bde dang ldan/ /mi yi bde ba dag gis rgyas par gyur/ /thams cad bsod nams stobs dang ldan pa ste/ /blta na sdug cing de bzhin dga' bar gyur/ /thams cad phyug cing nor mang 'byor ba ste/ /lus ni lha yi bde dang ldan par gyur/ /des shing brtul zhugs bzang la nyon mongs chung / /bzod pa'i stobs la dpa' zhing byad gzugs bzang / /lha yi gnas na lha yi sras po bzhin/ /tshul khrims yon tan 'chang zhing blo gros ldan/ /de yi dus na sa bdag byung ba ni/ /rgyal po me tog mchog ces bya ba yin/ /de yi bu yang lnga brgyar tshang bar byung / /dran dang ldan zhing rtogs dang ldan par gyur/ /rgyal po'i bu de yis kyang rgyal ba yi/ /bskyed mos tshal brgya stong phrag drug bcu dag /thams cad me tog 'bras bus brgyan pa yang / /thugs rje ldan pa de la rab tu phul/ /bskyed mos tshal ni brgya stong sna tshogs dag /'chag sa mal 50.155a stan bzhugs gnas stong rnams dang / /chos gos kyang ni bye ba brgya stong gis/ /'chag sa bzhugs gnas rnams su gding ba byas/ /de ltar rnam pa du ma stong dag dang / /dge sbyong dag gi longs spyod ji snyed pa/ /rgyal ba'i bu ni shin du yid dad pas/ /bde gshegs de la thams cad nye bar phul/ /rgyal po de yang dge ba'i las bcu yi/ /lam la rab tu gnas par gyur nas su/ /skye bo srog chags khrag khrig brgya stong gis/ /mdun du bdar te 'dren pa lta bar song / /me tog dang ni byug pa bdug pa dang / /gdugs dang rgyal mtshan sil snyan thogs nas su/ /rgyal ba de la de yis mchod byas te/ /thal mo sbyar nas spyan sngar 'dug par gyur/ /lha dang mi dang lha min gnod sbyin dang / /dge slong stong yang de tshe dga' bar gyur/ /rgyal ba mchod pa 'di ni lung ston tam/ /mi yi dbang po legs par chos gsung ngam/ /rgyal po'i bu de yi ni bsam pa dang / /bla med sems kyang rang byung mkhyen nas ni/ /mos pa'i gnas la pha rol phyin pa yis/ /de la ting 'dzin zhi ba 'di bshad do/ /gang tshe bde bar gshegs pas gsung phyung ba/ /de tshe nags tshal bcas pa'i sa yang g.yos/ /nam mkha' las ni me tog char kyang bab/ /sa las pad ma brgya dag byung bar gyur/ /ston pa don gyi tshig la rab bslabs pas/ /bsam pa mkhyen nas 'dren pas lung bstan te/ /mi yi dbang pos ting 'dzin zhi ba bshad/ /de yi don tshig rnams kyang mnyan par gyis/ /srid pa thams cad srid pa med pa ste/ /kun brtags gsog dang smig rgyu 'dra ba yin/ /sgyu ma ji bzhin glog dang sprin 'dra ste/ /stong g.yo bdag dang sems can srog kun med/ /gzod ma nas ni stong zhing ma 'ongs chos/ /song ba med cing gnas med gnas kyis dben/ /sgyu ma'i rang bzhin rtag tu snying po med/ /thams cad dag cing rnam dag nam mkha' bzhin/ /mi sngo mi ser dkar po ma yin te/ /ming ni gsog gyur sgra yi rang bzhin yin/ /sems ni dben zhing sems med rang bzhin te/ /skad cig yin pas thams cad sgra dang bral/ /bshad pa na yang yi ge 'pho ba med/ /ma bshad 50.155b na yang yi ge 'grib mi 'gyur/ /yi ge dag ni phyogs su'ang mi 'gro ste/ /yi ge gang nas kyang ni 'ongs ma yin/ /yi ge mi zad zad cing 'gags pa ste/ /bshad par byas sam bshad par ma byas kyang / /yi ge 'di dag rtag par mi zad brjod/ /gang gis yongs shes de yang zad mi 'gyur/ /chos ni stong phrag brgya dag rab brjod nas/ /sangs rgyas brgya stong dag ni gang 'das pa/ /chos kyang ma zad yi ge'ang zad ma gyur/ /skye ba yang med de phyir mi zad pa/ /gang gis mi zad chos rnams rab shes pa/ /rtag tu mi zad pa yi chos shes pas/ /mdo sde brgya stong dag ni bshad byas kyang / /chos rnams thams cad yi ge med par shes/ /rgyal ba'i chos ni gang dag rab ston pa/ /de yang mi zad pas na mi mthong ste/ /chos 'di snga nas bdag med sems can med/ /de dag rab tu ston kyang zad mi 'gyur/ /mkhas pa de ni tshig kun smra byed kyang / /tshig gis sems ni 'phrogs par mi 'gyur te/ /tshig rnams thams cad ri yi brag cha bzhin/ /de phyir nam yang tshig la chags mi 'gyur/ /de ni sgyu ma'i tshig gis chos ston te/ /tshig de thams cad de yi mod la 'gags/ /tshig de yi ni mtshan nyid ci 'dra ba/ /chos rnams kun kyang mtshan nyid de 'drar gyur/ /chos kun mtshan gzhi med cing mtshan gzhi bral/ /thams cad mtshan med mtshan nyid rnam par dag /rtag tu dben zhing gtsang ba nam mkha' bzhin/ /mdor na de dag bgrang bar nyer mi 'gyur/ /'dus byas 'dus ma byas kun dben pa ste/ /drang srong de dag la ni rnam rtog med/ /'gro ba kun du 'dus ma byas thob pas/ /lta ba dag las khor mor rnam par dben/ /gang dag 'di 'dra'i chos rnams shes pa ni/ /rtag tu ma chags mi gtum ma rmongs te/ /de yi sems ni rang bzhin mnyam par bzhag /de ni ting 'dzin stobs can stobs dang ldan/ /brag phug ri dang gcong rong klung rnams su/ /rkyen kyis ji ltar brag cha 'byung ba ltar/ /de bzhin 'dus byas 'di kun rig par gyis/ /'jig rten thams cad sgyu ma smig rgyu bzhin/ /gang du ting 'dzin zhi ba 'di bshad pa/ /yon tan chos su gyur pa shes 50.156a rab stobs/ /drang srong ye shes stobs kyis mngon par shes/ /tshig ni thabs mkhas pa yi nges pa'i tshig /brtags pa tsam du brtags nas brjod pa yin/ /'khor ba la ni mtha' ma mi rnyed de/ /gang dag sngon byung mtha' ni mtshan nyid med/ /ma 'ongs dus kyang shes par bya ba'i phyir/ /las dang bya bas de ltar zhugs gyur te/ /rab dang tha ma dag tu'ang 'byung bar 'gyur/ /chos rnams rtag tu dben zhing rang bzhin stong / /thams cad bdag med par yang shes par gyis/ /kun rdzob tu ni rgyal bas chos bshad de/ /'dus byas 'dus byas ma yin de ltar ltos/ /yang dag nyid du bdag dang mi med de/ /'gro ba kun gyi mtshan nyid de 'dra'o/ /dge dang nag po'i las rnams mi 'jig ste/ /bdag gis byas pa dag ni myong bar 'gyur/ /las kyi 'bras bu 'pho bar mi 'gyur te/ /rgyu med par yang myong bar mi 'gyur ro/ /srid pa thams cad sgyu ma dbang med pa/ /gsog dang gsob tu gyur pa dbu ba bzhin/ /sgyu ma smig rgyu lta bur rtag tu stong / /sgra yis de bshad de dag dben pa yin/ /de ltar rnam par rig pa rlom sems med/ /tshul khrims la yang chags pa med pa'i sems/ /bzod pa'i stobs kyis cung zad mi rtog ste/ /de ltar spyod pa mnyam par gzhag par 'gyur/ /rgyal po des ni ji tsam chos rigs pa/ /de tsam du ni rgyal ba des bshad de/ /rgyal pos rgyal ba'i chos 'di thos nas ni/ /'khor dang bcas pas bslab pa yang dag bzung / /rgyal po'i bu des ting 'dzin 'di mnyan nas/ /dga' zhing yi rangs tshig kyang 'di skad smra/ /shin du legs par ting 'dzin 'di bshad de/ /khyod kyi zhabs la bdag ni phyag 'tshal lo/ /der yang srog chags stong phrag brgyad bcu dag /yang dag don dam nges par bstan pa 'di/ /chos kyi rang bzhin bzang po 'di thos nas/ /de dag mi skye ba yi bzod pa thob/ /skyes bu la ni skye dang 'gag pa med/ /de bzhin chos 'di rtag tu snga nas dben/ /de ltar rab shes yongs su mi 'bri ste/ /rgyal pos mi skye bzod pa thob par gyur/ /de tshe rgyal pos rgyal 50.156b srid rnam spangs te/ /rgyal ba de yi bstan la rab tu byung / /rgyal po'i sras kyang lnga brgya mi nyung ba/ /de dag kun kyang rjes su rab tu byung / /rgyal po sras dang bcas pa rab byung nas/ /de tshe srog chags mang po stong gzhan yang / /bde bar gshegs pa'i drung du rab tu byung / /rgyal ba de la chos rnams tshol bar byed/ /lo ni brgya phrag nyi shur yongs tshang bar/ /rgyal ba des ni chos rnams rab tu bshad/ /rgyal po bur bcas skye bor bcas pa yis/ /lo yang brgya phrag nyi shur chos rnams spyad/ /de nas dus kyang gzhan du gyur pa'i tshe/ /rgyal ba de yang yongs su mya ngan 'das/ /rgyal ba'i nyan thos rnams kyang 'das par gyur/ /de yi chos rnams kyang ni nyung bar gyur/ /de tshe rgyal po de yi bu yod pa/ /bsod nams blo gros dad cing dang ba ste/ /de yi khyim du nyer 'gro dge slong yod/ /des ni ting 'dzin zhi ba 'di yang bshad/ /de ni 'jam zhing mnyen par gyur pa ste/ /srog chags brgya stong dag gis bkur sti byas/ /lha yang bye ba brgya dag phyir 'brang zhing / /grong du 'ongs nas bsngags pa rjod par byed/ /de ni dran dang ldan zhing rtogs par ldan/ /brtul zhugs bzang zhing des pa tshul khrims dga'/ /dbyangs kyang snyan cing mi rtsub 'jam pa ste/ /khams rnams shes pa'i dbang mchog rab tu thob/ /dge slong de ni snyan pa'i 'od ces bya/ /chos gos bye ba brgya yang rab tu rnyed/ /de yi bsod nams stobs ni mi bzod pas/ /de tshe dge slong stong dag phrag dog skyes/ /bsod nams stobs dang gzugs kyi stobs rnams dang / /ye shes stobs dang rdzu 'phrul stobs rnams dang / /tshul khrims stobs dang ting 'dzin stobs rnams dang / /chos kyi stobs kyis dge slong yang dag 'phags/ /skye bo'i yid du 'ong zhing phangs pa ste/ /dge slong dge bsnyen dang ni dge slong ma/ /rgyal ba'i bstan la sems can gang dad pa/ /de dag gis ni mchod cing bkur ba yin/ /rgyal po'i bu ni der yang gang byung ba/ /bsod nams blo gros rtag tu dad mos te/ /dge slong mang po yid 'khrug rig nas ni/ /slob dpon de la srung ba byed du btsud/ /srog 50.157a chags dag ni stong phrag lnga brgya rnams/ /go bgos mtshon cha ral gri dbyug thogs pa/ /de dag gis ni dge slong rtag tu bskor/ /yang dag spyod pa mu med 'chad cing smra/ /de ni 'khor la chos rnams rab ston te/ /chos 'di bdag med stong pa srog med 'chad/ /dmigs par lta ba bdag la chags pa rnams/ /de dag dge slong ci smra mos mi byed/ /su dag stong pa zhi ba mi 'dod pa/ /dge slong 'di ni chos min rab ston gyis/ /'di bsad na ni bsod nams 'gyur zhes nas/ /dge slong dag ni lag na mtshon thogs 'ongs/ /mthong nas dge slong mtshon gyis mi 'jigs te/ /'di la sems can skyes bu gsod pa med/ /chos 'di rnams ni gsog ste rtsig pa 'dra/ /stong pa nyid kyi chos rnams rjes su dran/ /dge slong des ni spyi bor thal sbyar te/ /tshig smras rgyal ba rnams la phyag 'tshal lo/ /bden pa gang gis chos 'di stong pa na/ /mtshon cha 'di rnams me tog mAn 'dAr gyur/ /thub pa tshul khrims brtul zhugs ldan pa yis/ /gzhan du mi 'gyur tshig 'di smras ma thag /nags tshal bcas pa'i sa yang rab tu g.yos/ /mtshon cha de dag me tog mAn 'dAr gyur/ /dmigs pa can dag mtshon cha thogs pa yi/ /dge slong de tshe lus ni zhum gyur nas/ /tshur yang de nas nye bar 'ong ma nus/ /skrag cing shin du ngo mtshar chen por gyur/ /su dag thub dbang la ni dad mos shing / /gang dag stong pa zhi ba 'dod pa rnams/ /de dag a la la stong brjod nas su/ /ras bcos brgya yis dge slong mngon par g.yogs/ /dge slong de ni de la byams bskyed nas/ /sems can su dag nga la sdang byed pa/ /de dag phyir ni byang chub bdag spyod ces/ /skye bo thams cad kyi yang mdun du smra/ /des ni lo yang brgyad cu mi nyung bar/ /stong pa rgyal ba rnams kyi mdzod bshad de/ /phyir rgol ba yang dge slong stong dag byung / /de dag rgyal po'i bu yis phyir bzlog byas/ /de yang de tshe yongs su brnyas gyur te/ /de yi dge slong dag kyang nyung bar gyur/ /de tshe mi snyan pa yi tshig thos kyang / / 50.157b bzod pa'i stobs las nam yang nyams ma gyur/ /de ni gzhan gyi dus su gyur pa'i tshe/ /srog chags brgya dag gi yang don chen byas/ /bsam gyis mi khyab chos kyang rjes su dran/ /bsod nams blo gros dga' ba chen po skyes/ /der yang ri mo rgya cher byas nas ni/ /dge slong de la bsod nams blo gros smras/ /bdag gi slob dpon la ni su yis kyang / /sems la mi 'thad ci zhig ma bgyis sam/ /des smras rgyal sras gzhon nu gsan du gsol/ /bzod pa'i stobs kyis sangs rgyas yang dag byung / /su yis bdag la mi snyan tshig smras pa/ /de la bdag ni byams pa rgya yang che/ /gang gis bskal pa stong phrag brgya dag tu/ /sngon gyi srid pa la ni bzod bsgoms pa/ /dge slong snyan 'od de ni nga yin zhes/ /bcom ldan shAkya thub pas tshig brjod do/ /gang gis dge slong snyan 'od bsrungs pa yi/ /bsod nams blo gros rgyal po'i bu de ni/ /tshe rabs stong du nga yi grogs gyur te/ /sangs rgyas byams par ngas ni lung bstan to/ /gang gis ston pa tshogs kyi dbang phyug mchod/ /gang gis gnas khang bzang po mchog byas pa/ /gang sngon me tog bzang zhes bya ba de/ /rkang gnyis gtso bo mi yi dbang por gyur/ /de ltar bskal pa mang po mtha' yas par/ /rgyal ba dag gi dam chos ngas bzung ste/ /ngas sngon bzod pa'i stobs kyang yang dag bsgrubs/ /gzhon nu thos nas nga yi rjes su slobs/ /nga ni mya ngan 'das gyur phyi ma'i tshe/ /dam pa'i chos ni rnam par 'jig pa na/ /dge slong mu stegs blo la brtson pa dag /de dag nga yi zhi ba'i chos la spong / /khengs shing rgod la gtum zhing spyi rtol che/ /sdig pa'i grogs po'i zas la chags pa dag /chos gos lhung bzed dag la chags shing brkam/ /rnyed la gnas shing de dag chos la spong / /de dag yid gtum zhe sdang byas mi gzo/ /dma' ba'i rigs dang dbul ba'i rigs las ni/ /nga yi bstan pa 'di la rab byung nas/ /de dag zhi ba'i chos 'di spong bar byed/ /bdud kyi blo yis sems can mun gtibs shing / /'dod chags dbang du song bas 50.158a mngon par chags/ /gti mug dbang gis byis pa rmongs pas na/ /de dag stong pa zhi ba'i chos mi 'dod/ /dge slong dge slong ma dang khyim pa rnams/ /sdig pa'i blo yis 'dzin bcug rmongs byas te/ /de dag dbang du rtag par song gyur pas/ /phyi ma'i dus la byang chub spong bar byed/ /nga yi tshig 'di gzhon nu thos nas su/ /dge slong dgon pa pa dag rtag tu sten/ /su dag stong pa zhi la dga' ba ni/ /de dag rgyal ba'i chos 'di bzung ba yin/ /su dag ting 'dzin 'di ni 'dzin gyur pa/ /de dag nga yi bstan la rab byung zhing / /dge slong bsnyen rdzogs gso sbyong las rnams byas/ /zas la mi chags mi brkam za ba yin/ /lus dang srog la lta ba rab spongs la/ /stong pa shin du zhi ba sgom par gyis/ /brtson zhing rab tu brtson pa'i yid kyis kyang / /ri dgas bzhin du dgon par gnas par gyis/ /rgyal ba dag la rtag tu mchod pa gyis/ /gdugs dang rgyal mtshan bsgreng ba gnas khang gis/ /bde bar gshegs pa'i mchod rten mchod par gyis/ /ting 'dzin 'di ni myur du thob par 'gyur/ /byang chub phyir ni sems kyang skyed gyis la/ /bde bar gshegs pa rnams kyi mchod rten dag /gser gyis brgyan cing dngul gyis bskus pa dang / /rin chen sna tshogs gzugs legs byed du chug /byang chub phyir ni yi dam bca' gyis la/ /'jig rten mchod pa bzang po ji snyed pa/ /lha dang mi yi dga' bar 'gyur ba rnams/ /thams cad tshol la sangs rgyas mchod pa gyis/ /chos nyid du yang mi dbang thams cad ltos/ /phyogs bcu'i 'jig rten dag na gang bzhugs dang / /rgyal ba mya ngan 'das pa kun snang ste/ /chos nyid kyis ni sangs rgyas mngon sum bzhugs/ /gtong ba kun la shin du mos par gyis/ /tshul khrims dag par gyur cing brtan pa'i sems/ /bzod la dga' zhing rtag tu byams la dga'/ /chos rnams thams cad stong par shes par gyis/ /ma zhum ma gong brtson 'grus rab skyed la/ /bsam gtan dga' zhing rab tu dben la mos/ /shes rab rnam dag shes rab rab shes 50.158b kyis/ /ring por mi thogs snying rje ldan par 'gyur/ /mi gtsang bas ni 'dod chags rtag zhi gyis/ /bzod pa'i stobs kyis zhe sdang tshar chod cig /shes rab stobs kyis gti mug bsal bar gyis/ /rgyal bas bsngags pa'i byang chub thob par 'gyur/ /lus ni snying po med cing dbu ba 'dra/ /sdug bsngal rul ba dri nga bsgom par gyis/ /phung po thams cad gsog tu shes par gyis/ /ye shes bla med myur du thob par 'gyur/ /bdag dang skyes bu dang ni srog rnams su/ /sdig pa'i lta ba nam yang ma 'dzin cig /chos rnams thams cad stong par shes par gyis/ /bla med byang chub myur du reg par 'gyur/ /rnyed la chags par nam yang ma byed cig /zas rnams ma rnyed na yang gdung ma byed/ /bstod dang smad pa dag gis ma g.yo bar/ /ri rab bzhin du rab tu mi 'gul gyis/ /gus pa skyed la chos rnams btsal bar gyis/ /thos nas de tshe de yang myong bar gyis/ /rgyal ba kun gyi spyod yul gnas gyis dang / /bde ba can gyi zhing du myur du 'gro/ /'gro ba kun la sems kyang mnyam gyis la/ /sdug dang mi sdug pa yi sems ma byed/ /rnyed dang snyan pa dag ni ma tshol cig /myur du sangs rgyas thub pa'i dbang por 'gyur/ /yon tan gang thos sems can dad 'gyur zhing / /sangs rgyas yon tan dag la mos skyed pa/ /yang dag yon tan nges pa'i tshig rnams kyis/ /sangs rgyas yon tan rtag tu bshad par gyis/ /rtag tu slob dpon dang ni pha dang ma/ /de bzhin 'gro ba kun la gus par gyis/ /nga rgyal dag gi dbang du ma 'gro shig /sum bcu rtsa gnyis mtshan rnams thob par 'gyur/ /'du 'dzi dag ni ma lus rnam spangs nas/ /rtag tu dben pa la yang dga' bar gyis/ /des shing brtul zhugs bzang la rtag tu zhi/ /bdag la phan zhing sems can gzhan la phan/ /byams pa dang ni snying rje bsgom par gyis/ /dga' dang btang snyoms la yang rtag mos gyis/ /rtag tu rgyal ba'i bstan pa rjes su ltos/ /'jig rten du yang myur du phan byed 'gyur/ / 50.159a sdig pa'i grogs po nam yang ma sten par/ /grogs po gang dag rgya cher bsten par gyis/ /su dag stong pa zhi ba 'di 'dod pa/ /de dag byang chub mchog la zhugs pa yin/ /nyan thos sar ni nam yang ma slob shig /de yi spyod la'ang dga' bar ma byed cig /sangs rgyas yon tan dag las sems ma btang / /myur du sangs rgyas rgyal ba'i dbang por 'gyur/ /bden tshig dam pa rtag tu smra bar gyis/ /brdzun rnams dang ni rtsub po'i tshig ma smra/ /rtag tu 'jam zhing dga' ba smra bar gyis/ /'jig rten slob dpon dag gi gsung thob 'gyur/ /lus dang srog la chags par ma byed cig /gzhan la smod cing bdag la stod ma byed/ /bdag gi yon tan yang dag sgrub gyis la/ /gzhan gyi spyod pa dag la btang snyoms gyis/ /rnam thar stong la rtag tu dga' bar gyis/ /'gro ba rnams su smon par ma byed cig /mtshan ma thams cad ma lus rnam par spongs/ /rtag tu mtshan ma med la gnas par gyis/ /dus kun du ni mtha' yang rnam par spongs/ /rtag dang chad la gnas par ma gyur cig /thams cad rkyen las gyur par rtag rig gyis/ /de ltar byas na ston pa ji bzhin 'gyur/ /'dod pa'i dga' ba rnams la dga' ba spangs/ /zhe sdang tha ba dri ma rnam spangs shing / /gti mug mun pa thams cad rnam bsal na/ /zhi bar dga' ba'i mi yi seng ger 'gyur/ /rtag pa mi rtag par yang rtag tu ltos/ /srid pa kun gyis sdug bsngal bde grol zhing / /bdag dang gtsang la mi gtsang bdag med par/ /bsgom par byas na mi yi dbang por 'gyur/ /'jig rten sgron mdzad rgyal ba rnams kyis ni/ /gang la tshul bzhin chos rnams rab bstan pa/ /de yis bdud kyi stobs rnams bcom nas su/ /bla na med pa'i byang chub yangs pa thob/ /yon tan ji snyed ngas bshad thob byas te/ /nyes pa brgya dag ngas ni gang bstan pa/ /rnam par spangs nas slob par byed pa ni/ /gzhon nu de tshe 'dir yang sangs rgyas 'gyur/ /snyan pa'i 'od kyi le'u ste 50.159b sum bcu rtsa brgyad pa'o// // 'phags pa ting nge 'dzin gyi rgyal po'i mdo/ bam po bcu bzhi pa/ de nas yang bcom ldan 'das kyis zla 'od gzhon nur gyur pa la bka' stsal pa/ de lta bas na gzhon nu lus kyi sdom pas bsdam par bya'o zhes gzhon nu de ltar bslab par bya'o/ /gzhon nu de la lus kyi sdom pa gang zhe na/ lus kyi sdom pa gang dang ldan pas/ byang chub sems dpa' sems dpa' chen po chos thams cad la chags pa med par 'gyur ba de ni lus kyi sdom pa zhes bya'o/ /gzhon nu lus kyi sdom pa gang dang ldan pas byang chub sems dpa' sems dpa' chen po skyes bu chen po'i mtshan sum bcu rtsa gnyis 'thob par 'gyur ba de ni lus kyi sdom pa zhes bya'o/ /lus kyi sdom pa gang dang ldan pas byang chub sems dpa' sems dpa' chen po dpe byad bzang po brgyad cu 'thob par 'gyur ba de ni lus kyi sdom pa zhes bya'o/ /lus kyi sdom pa gang dang ldan pas byang chub sems dpa' sems dpa' chen po stobs bcu 'thob pa dang / mi 'jigs pa bzhi dang / sangs rgyas kyi chos ma 'dres pa bcwa brgyad 'thob par 'gyur ba 'di ni/ gzhon nu lus kyi sdom pa zhes bya'o/ /lus kyi sdom pa gang dang ldan pas byang chub sems dpa' sems dpa' chen po rnam par thar pa'i sgo gsum 'thob ste/ gsum gang zhe na 'di lta ste/ stong pa nyid dang / mtshan ma med pa dang / smon pa med pa dang / rnam par thar pa'i sgo 'di gsum 'thob par 'gyur ba 'di ni gzhon nu lus kyi sdom pa zhes bya'o/ /lus kyi sdom pa gang dang ldan pas byang chub sems dpa' sems dpa' chen po tshangs pa'i gnas pa chen po bzhi 'thob ste/ bzhi gang zhe na/ 'di lta ste byams pa chen po dang / snying rje chen po dang / dga' ba chen po dang / btang snyoms chen po dang / tshangs pa'i gnas pa chen po 'di bzhi 'thob par 'gyur ba de ni gzhon nu lus kyi sdom pa zhes bya'o/ /lus kyi sdom pa gang dang ldan pas byang chub sems dpa' sems dpa' chen po so so yang dag par rig pa bzhi 'thob ste/ bzhi gang zhe na 'di lta ste/ don so so yang dag par rig pa dang / chos so so yang dag par 50.160a rig pa dang / nges pa'i tshig so so yang dag par rig pa dang / spobs pa so so yang dag par rigs pa dang / so so yang dag par rig pa 'di bzhi 'thob par 'gyur ba de ni gzhon nu lus kyi sdom pa zhes bya'o/ /lus kyi sdom pa gang dang ldan pas byang chub sems dpa' sems dpa' chen po byang chub kyi phyogs kyi chos sum cu rtsa bdun 'thob ste/ sum cu rtsa bdun gang zhe na/ 'di lta ste/ dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa dang / byang chub kyi phyogs kyi chos sum cu rtsa bdun po 'di dag 'thob par 'gyur ba de ni lus kyi sdom pa zhes bya'o/ /lus kyi sdom pa gang dang ldan pas byang chub sems dpa' sems dpa' chen po snying rje chen po la gnas pa thob pa dang / btang snyoms chen po la gnas pa 'thob pa dang / bde ba'i rnam par rtog pa 'thob pa dang / rab tu dben pa'i chos rnams 'thob par 'gyur ba de ni gzhon nu lus kyi sdom pa zhes bya'o/ /gzhan yang gzhon nu lus kyi sdom pa gang dang ldan pas byang chub sems dpa' sems dpa' chen po srog gcod pa spong bar 'gyur ba dang / ma byin par len pa dang / mi tshangs par spyod pa dang / brdzun du smra ba dang / phra ma'i tshig dang / tshig rtsub po dang / khyal par smra ba dang / brnab sems dang / gnod sems dang / log par lta ba dang / srang la g.yo byed pa dang / tshad la g.yo byed pa dang / nor la g.yo byed pa dang / gzung ba dang / bcing ba dang / btsa' ba dang / brdeg pa dang / bsdigs pa dang / gcad pa dang / dbug pa dang / zhe la gnon pa dang / chags pa dang / ser sna spangs par 'gyur ba dang / lag pa rgod pa dang / rkang pa rgod pa dang / rkang lag ma bsdams pa dang / de'i lus dang ngag dang yid kyi gnas ngan len spongs shing ta la'i mgo bcad pa bzhin du ma 'ongs pa'i dus na mi skye ba'i chos can du 'gyur ba de ni gzhon nu de'i lus kyi sdom pa zhes bya'o/ /gzhon nu de lta bas na rnam grangs 'dis kyang 'di ltar rig par bya ste/ gzhon nu sngon byung ba 'das 50.160b pa'i dus na bskal pa grangs med pa bas kyang ches grangs med pa/ yangs pa/ tshad med pa/ bsam gyis mi khyab pa de'i tshe de'i dus na ye shes snang ba zhes bya ba de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das 'jig rten du byung ste/ gzhon nu de'i tshe de'i dus na bcom ldan 'das ye shes snang ba de bzhin gshegs pa dgra bcom pa yang dag par rdzogs pa'i sangs rgyas de'i tshe'i tshad ni lo bye ba phrag drug cur gyur to/ /dgra bcom pa bye ba phrag drug cu'i nyan thos kyi dge 'dun byung ngo / /byang chub sems dpa' sems dpa' chen po dam pa'i chos yongs su 'dzin pa yang dpag tu med pa byung ngo / /gzhon nu de'i tshe de'i dus na rgyal po khyad par sems shes bya ba zhig byung ste/ rgyal po khyad par sems de srog chags bye ba phrag brgyad bcu dang lhan cig tu de bzhin gshegs pa'i drung du 'ongs so/ /'ongs nas de bzhin gshegs pa'i zhabs la mgo bos phyag 'tshal te/ bcom ldan 'das la lan gsum bskor ba byas nas phyogs gcig tu 'dug go/ /rgyal po khyad par sems phyogs gcig tu 'dug nas de bzhin gshegs pa la bsnyen bkur byed do/ /de nas ye shes snang ba de bzhin gshegs pa dgra bcom pa yang dag par rdzogs pa'i sangs rgyas kyis rgyal po khyad par sems 'khor dang bcas pa'i lhag pa'i bsam pa mkhyen nas chos kyi rnam grangs 'di las lus kyi sdom pa'i ting nge 'dzin gyi sgor 'jug pa'i tshigs su bcad pa'i dbyangs kyis yang dag par rab tu bstan to/ /ji ltar bar snang nam mkha' rnam dag ste/ /shin du dag cing rang bzhin 'od gsal ba/ /de bzhin lus kyi sdom pa dag pa yang / /dbyangs kyis bstan par nam yang nus mi 'gyur/ /lus kyi sdom pa 'di ni dben zhing stong / /'di 'dra gnyis po lus kyi mtshan nyid de/ /de dag mtshan nyid med pa bar snang bzhin/ /lus kyi sdom pa de yi mtshan nyid bshad/ /sdom pa'i mtshan 50.161a nyid de 'drar sus shes pa/ /de la sdom pa nam yang med mi 'gyur/ /mi 'jug de yi spyod yul ga la yin/ /zag pa med pa la ni skye ba med/ /gzugs dang longs spyod la ni srid bskyed nas/ /'dod pa dag la sten pas mi nus te/ /srid pa dag gi nyes pa mi shes pas/ /lus kyi sdom pa 'di ni shes mi nus/ /zag med sdom pa gang gis rab shes pa/ /de la skye ba nam yang yod mi 'gyur/ /dgra bcom pa yi chos ni de 'dra ste/ /mu stegs can gyis shes par sla ma yin/ /gang dag khams gsum kun la yid skrag cing / /'dod pa'i longs spyod la yang 'dod mi skyed/ /rgyal po'i srid dang longs spyod yong mi 'dod/ /de dag lus kyi sdom pa 'di 'dra shes/ /lus kyi sdom pa 'di ni don ces bya/ /don ni sgra yis bstan par mi nus te/ /'di 'dra'i chos kyi tshul ni gang shes pa/ /de ni sdom pa 'di la gnas pa yin/ /don la zhugs la ngas ni don bstan te/ /mkhas pa su dag don gyi tshul la mos/ /don med rnam spangs don la gnas pa rnams/ /de dag sdom la rtag tu gnas pa yin/ /rgyal ba'i bstan la don du gang brjod dang / /ji lta bur ni don yin rnam rig ste/ /don tshul rang bzhin gang gis shes pa ni/ /lus kyi sdom pa la yang gnas shes bya/ /gang gis bdag med gsog dang stong nyid dang / /mtshan ma med par rnam par rig gyur pa/ /de la nam yang sdom pa med mi 'gyur/ /'di ltar des ni yang dag nges la bslabs/ /dngos po dag ni dngos med gang rig pa/ /de ni dngos po dag la yong mi chags/ /dngos po kun la nam yang mi chags pa/ /de ni mtshan med ting 'dzin reg par 'gyur/ /ngo bo nyid stong rang bzhin 'od gsal ba/ /bdag med chos rnams de yis rnam rig na/ /de la nam yang sdom pa med mi 'gyur/ /'di ltar des ni yang dag nges par rtogs/ /gang gis phung po lnga rnams stong par shes/ /rang bzhin stong zhing bdag med rig na ni/ /lus kyis las gang yang dag spyod byed pa/ /de la nam yang sdom pa med mi 'gyur/ /mtshan ma dag la 'dzin cing ma bsdams te/ /khor mor bdag tu 'du shes rab 50.161b gnas pa/ /gzugs la chags par gyur pa'i skye bo dag /ma bsdams pa yi 'dod chags rab tu ldang / /gang rnams yang dag mtha' la bslabs gyur cing / /stong pa rtogs par rig pa des pa dag /sdom med gang gis ngan 'gror 'gro ba yis/ /'dod chags de la nam yang ldang ba med/ /ji ltar ri rab dag ni chen po la/ /grog ma kun gyis g.yos shing 'gul mi nus/ /de bzhin mkhas pa yang dag tshul bslabs pas/ /lha yi gzugs kyis kyang ni de mi g.yos/ /nam mkha' la ni ri mor bri nus shing / /lag pas nam mkha' gzung du rung gyur kyang / /'dod chags zhe sdang bdud rnams bye ba yis/ /de la rnam par bskyod par yong mi nus/ /la las brag cha dag ni gzung nus shing / /chu yi steng na rdo yang 'phyo gyur kyang / /lus kyi sdom pa 'di 'dra sus bslabs pa/ /de yi bsam pa dag kyang bltar mi nus/ /'jig rten kun na sgra mang ji snyed pa/ /gzung ste sgrom du bzhugs par nus gyur kyang / lus kyi sdom pa'i gnas dang mi gnas pa/ /sus kyang rnam par rig par byed mi nus/ /sprin las sgra bsgrags glog rnams rgyu ba dang / /nyi ma'i 'khor los 'od zer gzung nus kyang / /lus kyi sdom pa 'di la sus bslabs pa/ /de yi rang bzhin shes par nus mi 'gyur/ /rlung gi dkyil 'khor phyogs bzhir ldang ba ni/ /rgya dang snyi yis gzung bar nus gyur kyang / /lus kyi sdom pa 'di la gang gnas pa/ /de yi lus ni nams kyang shes mi nus/ /srog chags kun gyi spyod yul de ma yin/ /sems sdom gang la mkhas pa de gnas shing / /spyod yul gang gnas lus kyi sdom pa ni/ /'jig rten chos kyis mi gos nam mkha' bzhin/ /phyogs bzhir nam mkha' la ni rgyu ba yis/ /srog chags kun rjes so sor blta nus kyang / /de yi lus dang sems kyi spyod yul la/ /tshad gzung bar ni su yang nus pa med/ /lus kyi sdom pa 'di la gang gnas pa'i/ /nyon mongs rnam mang thams cad med par 'gyur/ /de yi nyon mongs nye ba rab tu 50.162a spangs/ /'di ltar des ni lus kyi sdom pa bslabs/ /de la mtshon cha dang ni mes mi tshugs/ /de ltar de yi lus ni gzung du med/ /de ni zhi ba rab zhi ting 'dzin gnas/ /'di ltar des ni lus kyi sdom pa bslabs/ /de ltar gnas pa 'jigs med skrag pa med/ /de la 'khrug sems mi skye phrag dog med/ /lus kyi sdom pa 'di 'dra sus bslabs pa/ /de ni gtse ba kun las thar ba yin/ /dug dang mtshon gyis nam yang mi 'jigs shing / /me dang chu yi nang na 'ang 'jigs pa med/ /lus kyi sdom pa 'di 'dra sus bslabs pa/ /de ni gtse ba kun las thar ba yin/ /chom rkun g.yon can sdig pa byed pa dang / /sbrul gdug nang du song yang 'jigs med de/ /'di ltar de ni bdag tu 'du shes med/ /'du shes rnam par grol la 'jigs mi 'byung / /'jigs las rnam par grol ba skrag mi skye/ /skrag pa med la g.yo ba mi 'byung ste/ /mi g.yo ba la skrag pa ga la yod/ /de ni bdud rnams bye bas bskyod mi nus/ /byang chub sems dpa' rnams la phan pa'i phyir/ /sdom pa gang spyod bshad cing rab bstan pa/ /'di 'dra'i lus kyi sdom pa sus bslabs pa/ /de ni bdud rnams bye bas bskyod mi nus/ /chos rnams kun la ye shes thogs pa med/ /dpe byad bzang po brgyad cu yongs su tshang / /sum cu rtsa gnyis mtshan gyi ri mo dag /sdom par gnas la rnyed par dka' mi 'gyur/ /sangs rgyas chos rnams bsam gyis mi khyab cing / /tshad kyang med par rtogs par su 'dod pa/ /'di 'dra'i lus kyi sdom pa des slobs shig /'jig rten thams cad kyi yang mchod rten 'gyur/ /sangs rgyas stobs bcu mnga' ba bsam mi khyab/ /drang srong chen po'i chos 'di gang 'dod pa/ /des ni lus kyi sdom pa 'di 'dra slobs/ /gang slob de la stobs rnams rnyed mi dka'/ /'di 'dra'i lus kyi sdom la gang slob pa/ /sangs rgyas chos ni ma 'dres bcwa brgyad po/ /rgyal ba gang la rab tu gnas pa yang / /de dag de la rnyed par dka' mi 'gyur/ /'di 'dra'i lus kyi sdom pa 50.162b gang slob pa/ /drang srong chen po'i byang chub yan lag bdun/ /so so yang dag rig dang rdzu 'phrul rkang / /de la de dag rnyed par dka' mi 'gyur/ /tshangs pa'i gnas bzhi dang ni bsam gtan dang / /rnam par thar pa'i sgo rnams gang bshad dang / /bde ba'i rnam rtog rab tu dben pa yang / /sdom par gnas pa la ni rnyed mi dka'/ /lus kyi sdom pa la ni gang gnas pa/ /snying rje'i gnas dang btang snyoms thob par 'gyur/ /de bzhin spyod pa 'jug pa byams pa'i mchog /'gro ba kun la'ang phan pa'i sems su 'gyur/ /dran pa nyer gzhag yang dag spong ba dang / /drang srong chen po'i dbang lnga stobs lnga dang / /'phags pa'i lam mchog yan lag brgyad po yang / /lus kyi sdom par gnas la rnyed mi dka'/ /gzhan yang dam pa sangs rgyas chos rnams ni/ /bsam gyis mi khyab gang la tshad med pa/ /lus kyi sdom pa 'di 'dra sus bslabs pa/ /de la thams cad rnyed par dka' mi 'gyur/ /'di 'dra'i lus kyi sdom pa thos nas ni/ /rgyal po glang mchog khyad par thob gyur te/ /dga' ba mtshungs med rangs shing mgu ba skyes/ /rgyal ba de yi bstan la rab tu byung / /rab tu de byung lo yang bye phrag cur/ /tshangs par spyod mchog gtsang ma spyad par gyur/ /lha dang bcas pa'i 'jig rten phan pa'i phyir/ /tshangs pa'i gnas bzhi la yang bsgom pa byas/ /tshangs pa'i gnas la shin du bsgom byas pas/ /sangs rgyas bye ba brgyad cu mthong bar gyur/ /de las lhag par gang gA'i bye ma snyed/ /des ni tshangs spyod mchog 'di rab tu spyad/ /thams cad kyi yang bstan par rab byung ste/ /tshangs par spyod pa bzang zhing dag par spyad/ /mang du thos shing spobs par ldan pa yi/ /dge slong chos smra ba yang mchog tu gyur/ /lus kyi sdom pa 'di ni rab shes na/ /tshul khrims ma dral tshul khrims skyon med 'gyur/ /tshul khrims rnam dag tshul khrims 'dres pa med/ /'phags pa'i tshul khrims zag pa med la gnas/ /de tshe rgyal po glang mchog khyad par sems/ /gzhon nu gzhan zhig yin par sems gyur na/ /de ni gzhan zhig yin par mi 50.163a blta ste/ /nga ni spyad pa spyod tshe der gyur to/ /de phyir gzhon nu nga yi rjes slobs la/ /lus kyi sdom pa 'di la gnas par gyis/ /srog chags bye ba gzhan la'ang rab ston dang / /ring por mi thogs ji bzhin nga 'drar 'gyur/ /de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na lus kyi spyod pa yongs su dag par bya'o zhes gzhon nu de ltar khyod kyis bslab par bya'o/ /de ci'i phyir zhe na/ gzhon nu lus kyi spyod pa yongs su dag pa'i byang chub sems dpa' sems dpa' chen po ni sems can dmyal ba dag la mi 'jigs/ dud 'gro'i skye gnas dang / gshin rje'i 'jig rten dang / ngan song dag gis 'jigs par mi 'gyur ro/ /chus mi 'jigs/ mes mi 'jigs/ dug dang / mtshon dang / seng ge dang / stag dang dred dang bal glang dang glang khyu ba dang / mi dang mi ma yin pa dag gis 'jigs par mi 'gyur ro/ /gzhon nu lus kyi spyod pa yongs su dag pa'i byang chub sems dpa' sems dpa' chen po ni stong gsum gyi stong chen po'i 'jig rten gyi khams 'di lag mthil du gzhag ste/ ta la gcig tsama'am/ ta la gnyis tsama'am/ ta la gsum tsama'am/ ta la bzhi tsama'am/ ta la lnga tsama'am/ ta la drug tsama'am/ ta la bdun tsam du steng du 'phen to/ /ji tsam du 'dod pa de tsam du'ang 'phen to/ /gzhan yang gzhon nu lus kyi spyod pa yongs su dag pa'i byang chub sems dpa' sems dpa' chen po ni rdzu 'phrul gyi cho 'phrul mchog gi pha rol tu phyin pa yin te/ de rdzu 'phrul gyi rkang pa'i rnam par smin pa rnam par dag pa'i bsod nams yongs su bzung zhing dben par gyur te/ thams cad du rjes su song zhing de lta bu'i ting nge 'dzin thob pas zag pa med pa'i bsod nams yongs su rdzogs pa/ 'jig rten gyi khams thams cad la thogs pa med pa'i mig tu gyur pas de lta bu'i rdzu 'phrul gyi cho 'phrul dang ldan par 'gyur ro/ /de la rdzu 'phrul gang zhe na/ gang 'grub pa dang / smon pa dang / 'byor pa dang / yongs su rdzogs pa 'di ni rdzu 'phrul zhes bya'o/ /de la rdzu 'phrul gyi cho 'phrul gang zhe na/ rdzu 'phrul gang dang ldan pas byang chub sems dpa' 50.163b sems dpa' chen po rdzu 'phrul gyi yul rnam pa mang po myong bar byed pa yin te/ gcig tu gyur nas mang por 'gyur/ mang por gyur nas gcig tu 'gyur/ snang bar gyur cing mi snang bar yang 'gyur/ rtsig pa la yang thad kar 'gro/ ra ba la yang thad kar 'gro/ ri la yang mi thogs par 'gro/ nam mkha' la yang 'gro ste/ dper na 'dab chags bya bzhin no/ /sa la yang steng du 'byung ba dang / byi'u zul byed de/ dper na chu la bya ba bzhin no/ /chu la yang mi nub par 'gro ste/ dper na sa'i phung po chen po la bya ba bzhin no/ /du ba 'thul bar yang byed 'bar bar yang byed de/ dper na me'i phung po chen po bzhin no/ /bdag gi lus las chu'i rgyun chen po khrag khrig brgya stong du ma 'byin te/ dper na sprin chen po bzhin no/ /chu'i rgyun de dag gis stong gsum gyi stong chen po'i 'jig rten gyi khams 'di bsregs shing rab tu tshig ste/ mes rab tu 'bar zhing 'bar ba gcig tu gyur pa zhi bar byed do/ /zla ba dang nyi ma 'di gnyis 'di ltar rdzu 'phrul che ba/ 'di ltar mthu che ba/ 'di ltar gzi brjid che ba yang lag pas 'dzin cing kun du nyug par byed do/ /tshangs pa'i 'jig rten gyi bar du sems can rnams la lus kyis dbang sgyur ro/ /de nas yang bcom ldan 'das kyis de'i tshe tshigs su bcad pa 'di dag gsungs so/ /sa la byi'u zul byed cing steng byung byed/ /chu dag la yang thogs pa med par 'gro/ /bya bzhin nam mkha'i ngos la 'gro bar byed/ /rdzu 'phrul gyis ni dud 'thul 'bar bar byed/ /ji ltar bar snang la ni rlung mi thogs/ /sprin gyi phung po mang po 'gro ba ltar/ /de bzhin rnal 'byor pa yang nam mkha' la/ /rlung dang sprin bzhin du ni thogs med 'gro/ /zhing rnams me yis tshig cing 'bar ba dag /byang chub sems dpa' mkhas pas de mthong nas/ /des ni rang gi lus las chu phyung ste/ /bye ba snyed kyi zhing de zhi bar byed/ /byang chub sems dpa' mkhas pa 'dug bzhin du/ /nyi zla la ni lag pas yongs su 'dzin/ /des ni tshangs pa'i 'jig rten nyer rig nas/ /tshangs pa bye ba dag la chos ston byed/ /gang tshe de ni chos ston 'dod gyur na/ /stong gsum chen po des ni go bar byed/ / 50.164a 'dod na de ni zhing mang bye bar yang / /srog chags bye ba mang la chos rnams ston/ /de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na lus kyi spyod pa yongs su dag par bya'o zhes gzhon nu khyod kyis de ltar bslab par bya'o/ /de ci'i phyir zhe na/ gzhon nu lus kyi spyod pa yongs su dag pa'i byang chub sems dpa' sems dpa' chen po ni lha'i rna ba'i khams kyis sgra rnams lha'i dang / mi'i dang / sems can dmyal ba pa rnams kyi dang / dud 'gro'i skye gnas su song ba rnams kyi dang / gshin rje'i 'jig rten pa rnams kyi sgra nye ba'am rgyang ring po yang thos so/ /gzhan yang gzhon nu lus kyi spyod pa yongs su dag par bya'o zhes gzhon nu khyod kyis de ltar bslab par bya'o/ /de ci'i phyir zhe na/ gzhon nu lus kyi spyod pa yongs su dag pa'i byang chub sems dpa' sems dpa' chen po ni stan la 'dug bzhin du lha'i sna'i dbang pos stong gsum gyi stong chen po'i 'jig rten gyi khams na lha'i yid du 'ong ba'i chos kyi dri ji snyed yod pa nye'ang rung rgyang ring po 'ang rung ste de dag thams cad tshor ro/ /de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na lus kyi spyod pa yongs su dag par bya'o zhes gzhon nu khyod kyis de ltar bslab par bya'o/ /de ci'i phyir zhe na/ gzhon nu lus kyi spyod pa yongs su dag pa'i byang chub sems dpa' sems dpa' chen po ni sems can pha rol dang gang zag pha rol gyi sems kyi rnam par rtog pa dang / spyod pa sems kyis yang dag pa ji lta ba bzhin du rab tu shes te/ 'dod chags dang bcas pa'i sems kyang 'dod chags dang bcas pa'i sems su yang dag pa ji lta ba bzhin du rab tu shes/ 'dod chags dang bral ba'i sems kyang 'dod chags dang bral ba'i sems su yang dag pa ji lta ba bzhin du rab tu shes so/ /gong ma bzhin du sbyar te/ zhe sdang dang bcas pa dang / zhe sdang dang bral ba dang / gti mug dang bcas pa dang / gti mug dang bral ba dang / sred pa dang bcas pa dang / sred pa dang bral ba dang / len pa dang bcas pa dang / len pa dang bral ba dang / bsdus pa dang g.yengs pa dang / 50.164b log pa dang ma logs pa dang / chen por gyur pa dang / chen por gyur pa ma yin pa dang / 'od gsal ba dang / 'od gsal ba ma yin pa dang tshad dang bcas pa dang / tshad med pa dang / bla na yod pa dang / bla na med pa dang / mnyam par bzhag pa dang / mnyam par bzhag pa ma yin pa dang / rnam par grol ba dang / rnam par grol ba ma yin pa dang / nyon mongs pa dang bcas pa'i sems kyang nyon mongs pa dang bcas pa'i sems su yang dag pa ji lta ba bzhin du rab tu shes so/ /nyon mongs pa med pa'i sems kyang nyon mongs pa med pa'i sems su yang dag pa ji lta ba bzhin du rab tu shes so/ /gzhon nu lus kyi spyod pa yongs su dag pa'i byang chub sems dpa' sems dpa' chen po ni sngon gyi gnas rnam pa du ma rjes su dran te/ skye ba gcig kyang rjes su dran/ gnyis dang / gsum dang / bzhi dang / lnga dang / bcu dang / nyi shu dang / sum bcu dang / bzhi bcu dang / lnga bcu dang / skye ba brgya yang rjes su dran no/ /skye ba stong dang / skye ba brgya stong dang / skye ba bye ba khrag khrig brgya stong du ma'i bar du yang rjes su dran no/ /sdud pa'i bskal pa dang / 'byung ba'i bskal pa yang rjes su dran no/ /sdud pa dang / 'byung ba'i bskal pa du ma'i bar du yang rjes su dran no/ /bskal pa yang rjes su dran no/ /bskal pa brgya dang / bskal pa stong dang / bskal pa brgya stong dang / bskal pa bye ba khrag khrig brgya stong du ma'i bar du yang rjes su dran no/ /sngon gyi mtha' bye ba'i bar du yang rjes su dran no/ /bdag sngon che ge mo zhig tu skyes te/ ming ni 'di zhes bya/ rus ni 'di zhes bya/ rigs ni 'di zhes bya/ kha dog ni 'di 'dra zas ni 'di lta bu zhig za za/ 'tsho ba ni 'di 'dra/ tshe ni 'di tsam zhig tu thub/ yun ni 'di srid cig tu gnas gnas/ bde ba dang sdug bsngal ni 'di lta bu zhig myong / de nas shi 'phos nas che ge mo zhig tu skyes te/ de nas kyang shi 'phos nas 'dir skyes so/ /zhes rnam pa dang bcas pa dang / yul phyogs dang bcas pa dang / gzhi ci las gyur pa dang bcas par sngon gyi gnas rnam pa du ma yang dag par rjes su dran no/ /gzhon nu lus kyi spyod pa yongs su dag pa'i byang chub sems dpa' sems 50.165a dpa' chen po ni lha'i mig rnam par dag pa mi'i las 'das pas sems can rnams 'chi 'pho ba dang / skye ba dang / kha dog bzang ba dang / kha dog ngan pa dang / bde 'gror song ba dang / ngan 'gror song ba dang / ngan pa dang bzang po dang / bzang 'gror 'gro ba dang / ngan 'gror 'gro ba'i sems can las bzhin du nye bar 'gro ba dag kyang yang dag pa ji lta ba bzhin du rab tu shes so/ /sems can 'di rnams ni lus kyis nyes par spyod pa dang ldan/ ngag gis nyes par spyod pa dang ldan/ yid kyis nyes par spyod pa dang ldan te/ 'phags pa rnams la skur pa log par lta ba dag log par lta ba yang dag par 'dzin pa'i rgyus lus zhig nas shi ba'i 'og tu ngan song ngan 'gro sems can dmyal ba rnams su skyes so/ /sems can 'di rnams ni lus kyis legs par spyod pa dang ldan/ ngag gis legs par spyod pa dang ldan/ yid kyis legs par spyod pa dang ldan te/ 'phags pa rnams la mi skur pa yang dag par lta ba dag /yang dag par lta ba yang dag par bzung ba'i rgyus lus zhig nas shi ba'i 'og tu bde 'gro mtho ris kyi 'jig rten du lha'i nang du skyes so zhes de ltar lha'i mig rnam par dag pa mi'i las 'das pas sems can rnams 'chi 'pho ba dang / skye ba dang kha dog bzang ba dang / kha dog ngan pa dang / bde 'gror song ba dang / ngan 'gror song ba dang / ngan pa dang / bzang po dang / bzang 'gror 'gro ba dang / ngan 'gror 'gro ba'i sems can las bzhin du nye bar 'gro ba dag kyang yang dag pa ji lta ba bzhin rab tu shes so/ /gzhon nu lus kyi spyod pa yongs su dag pa'i byang chub sems dpa' sems dpa' chen po ni skad cig gcig dang ldan pa'i shes rab kyis gang cung zad shes par bya ba dang / blta bar bya ba dang / mnyan par bya ba dang / mngon par rdzogs par 'tshang rgya bar bya ba dang / rnam par 'phrul bar bya ba de thams cad yang dag pa ji lta ba bzhin du rab tu shes so/ /thos so/ /mthong ngo / /rtogs so/ /de nas yang bcom ldan 'das kyis de'i tshe tshigs su bcad pa 'di dag gsungs so/ /byang chub sems dpa' skyob pa yi/ /mngon 50.165b par shes pa'i rim pa bstan/ /ting nge 'dzin la gnas pas na/ /byang chub sems dpa' zhes kyang bya/ /de dag rna ba rnam sbyong ste/ /lha yi rna ba bsam mi khyab/ /sangs rgyas kun gyis bshad pa yi/ /chos rnams de yis thos par 'gyur/ /stong gsum chen po'i 'jig rten khams dag na/ /lha yi dri rnams ji snyed yod pa kun/ /lha yi sna yis ji ltar 'dug bzhin du/ /byang chub sems dpa' mkhas pa de snom byed/ /'dod chags bcas dang 'dod chags med pa dang / /zhe sdang bcas dang zhe sdang bral ba dang / /gti mug bcas dang gti mug bral ba yi/ /sems rnams srog chags kun gyi rab tu shes/ /bskal pa bye ba stong du ni/ /gang du de dag sngon gnas pa/ /sngon gyi gnas rnams rab tu shes/ /de dag la ni thogs pa med/ /de dag mig kyang rnam sbyong ste/ /bla na med pa'i lha yi mig /des ni sems can skye ba dang / /'chi 'pho de dag rab tu mthong / /skad cig gcig dang ldan pa yi/ /shes rab kyis ni tshe rabs kun/ /chos rnams la ni shes bya ba/ /ci yod pa yang yang dag shes/ /de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na ngag gi sdom pas bsdam par bya'o zhes khyod kyis de ltar bslab par bya'o/ /gzhon nu de la ngag gi sdom pa gang zhe na/ ngag gi sdom pa gang dang ldan pas byang chub sems dpa' sems dpa' chen po rnam pa drug bcu dang ldan pa'i sangs rgyas kyi gsung dbyangs thogs pa med pa/ bsam gyis mi khyab pa 'thob par 'gyur ba de ni gzhon nu ngag gi sdom pa zhes bya'o/ /ngag gi sdom pa gang dang ldan pas byang chub sems dpa' sems dpa' chen po tshig btsun pa 'thob par 'gyur ba de ni gzhon nu ngag gi sdom pa zhes bya'o/ /ngag gi sdom pa gang dang ldan pas byang chub sems dpa' sems dpa' chen po skyes bu chen po'i mtshan sum bcu rtsa gnyis 'thob par 'gyur ba de ni gzhon nu ngag gi sdom pa zhes bya'o/ /ngag gi sdom pa gang dang ldan pas byang chub sems dpa' sems dpa' 50.166a chen po dpe byad bzang po brgyad bcu 'thob par 'gyur ba de ni gzhon nu ngag gi sdom pa zhes bya'o/ /ngag gi sdom pa gang dang ldan pas byang chub sems dpa' sems dpa' chen po de bzhin gshegs pa'i stobs bcu 'thob pa dang / mi 'jigs pa bzhi dang / sangs rgyas kyi chos ma 'dres pa bcwa brgyad 'thob par 'gyur ba de ni gzhon nu ngag gi sdom pa zhes bya'o/ /ngag gi sdom pa gang dang ldan pas byang chub sems dpa' sems dpa' chen po rnam par thar pa'i sgo gsum 'thob ste/ gsum gang zhe na/ 'di lta ste/ stong pa nyid dang / mtshan ma med pa dang / smon pa med pa dang / rnam par thar pa'i sgo 'di gsum 'thob par 'gyur ba de ni gzhon nu ngag gi sdom pa zhes bya'o/ /ngag gi sdom pa gang dang ldan pas byang chub sems dpa' sems dpa' chen po tshangs pa'i gnas pa chen po bzhi 'thob ste/ bzhi gang zhe na/ 'di lta ste/ byams pa chen po dang / snying rje chen po dang / dga' ba chen po dang / btang snyoms chen po dang / tshangs pa'i gnas pa chen po 'di bzhi 'thob par 'gyur ba de ni gzhon nu ngag gi sdom pa zhes bya'o/ /ngag gi sdom pa gang dang ldan pas byang chub sems dpa' sems dpa' chen po so so yang dag par rig pa bzhi 'thob ste/ bzhi gang zhe na/ 'di lta ste/ don so so yang dag par rig pa dang / chos so so yang dag par rig pa dang / nges pa'i tshig so so yang dag par rig pa dang / spobs pa so so yang dag par rig pa dang so so yang dag par rig pa 'di bzhi 'thob par 'gyur ba de ni gzhon nu ngag gi sdom pa zhes bya'o/ /ngag gi sdom pa gang dang ldan pas byang chub sems dpa' sems dpa' chen po byang chub kyi phyogs kyi chos sum bcu rtsa bdun 'thob ste/ sum bcu rtsa bdun gang zhe na/ 'di lta ste/ dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa dang / byang chub kyi 50.166b phyogs kyi chos sum cu rtsa bdun po 'di dag 'thob par 'gyur ba de ni gzhon nu ngag gi sdom pa zhes bya'o/ /ngag gi sdom pa gang dang ldan pas byang chub sems dpa' sems dpa' chen po snying rje chen po la gnas pa 'thob pa dang / btang snyoms chen po la gnas pa 'thob pa dang / bde ba'i rnam par rtog pa 'thob pa dang / rab tu dben pa'i chos rnams 'thob par 'gyur ba de ni gzhon nu ngag gi sdom pa zhes bya'o/ /gzhan yang gzhon nu ngag gi sdom pa gang dang ldan pas byang chub sems dpa' sems dpa' chen po srog gcod pa spong bar 'gyur ba dang / ma byin par len pa dang / mi tshangs par spyod pa dang / brdzun du smra ba dang / phra ma'i tshig dang tshig rtsub po dang / khyal par smra ba spangs par 'gyur ba dang / pha ma dang slob dpon dag la mi bden pa'i tshig mi 'byin pa dang / sangs rgyas dang chos dang dge 'dun la mi smod pa dang / tshig gzhan la yang gang nyes pa dang ldan pa'i tshig de dag byang chub sems dpas spangs pa yin te/ tshig de dag kyang brag cha lta bur shes so/ /sprul pa lta bu dang / smig rgyu lta bu dang / mig yor lta bu dang / sgyu ma lta bur 'jug par byed do/ /de lta bur gyur pas tshig de la mi dmigs/ mi rtog /rlom sems su mi byed/ mi lta/ mngon par chags par mi byed de/ gzhon nu de ni ngag gi sdom pa zhes bya'o/ /de nas yang bcom ldan 'das kyis zla 'od gzhon nur gyur pa la bka' stsal pa/ gzhonu de lta bas na ngag gi spyod pa yongs su dag par bya'o zhes gzhon nu de ltar khyod kyis bslab par bya'o/ /gzhon nu ngag gi spyod pa yongs su dag pa'i byang chub sems dpa' sems dpa' chen po ni ngan song thams cad kyis mi 'jigs shing sangs rgyas kyi chos thams cad thob par 'gyur ro/ /sangs rgyas kyi rdzu 'phrul thams cad dang / mngon par shes pa thams cad kyang thob par gyur te/ gzhon nu de ni ngag gi sdom pa zhes bya'o/ /de la 'di skad ces bya ste/ ngag gi sdom pa gang dang ldan pa yis/ /byang chub sems dpa' de yang chos kun la/ /thogs pa med par gdon mi za bar 'gyur/ /de ni ngag gi sdom pa de zhes bya/ /ngag gi sdom pa gang gis blo ldan rnams/ /de ni yan 50.167a lag drug bcu mtshungs ldan pa/ /thogs med bsam yas sangs rgyas dbyangs thob pa/ /de ni ngag gi sdom pa de zhes bya/ /ngag gi sdom pa gang gis blo ldan rnams/ /stobs bcu dang ni ma 'dres sangs rgyas chos/ /sum bcu rtsa gnyis mtshan rnams thob 'gyur ba/ /da ni ngag gi sdom pa de zhes bya/ /ngag gi sdom pa gang gis blo ldan rnams/ /gang sngar 'di las ngas ni brjod pa yi/ /sangs rgyas chos kyang thams cad thob 'gyur ba/ /de ni ngag gi sdom pa de zhes bya/ /ngag gi sdom pa gang gis blo ldan rnams/ /gnas pa dang ni so so yang dag rig /shin du rmad byung chos ni bsam yas 'thob/ /de ni ngag gi sdom pa de zhes bya/ /ngag gi sdom pa gang gis blo ldan rnams/ /dran pa nyer gzhag yang dag spong ba dang / /de bzhin rdzu 'phrul rkang dang dbang stobs 'thob/ /de ni ngag gi sdom pa de zhes bya/ /ngag gi sdom pa gang gis blo ldan rnams/ /btang snyoms chen po 'jigs pa med pa dang / /snying rje chen po dag pa'i gnas pa 'thob/ /de ni ngag gi sdom pa de zhes bya/ /ngag gi sdom pa gang gis blo ldan rnams/ /bde ba'i rnam rtog rnam par dag pa dang / /de bzhin rnam rtog rab dben zhi ba 'thob/ /de ni ngag gi sdom pa de zhes bya/ /ngag gi sdom pa gang gis blo ldan rnams/ /brdzun dag dang ni phra ma'i tshig mi smra/ /khyal pa'i tshig dang tshig rtsub mi smra ba/ /de ni ngag gi sdom pa de zhes bya/ /ngag gi sdom pa gang gis blo ldan rnams/ /nam yang dam pa'i chos la spong mi byed/ /sangs rgyas dge 'dun dag kyang mi spong ba/ /de ni ngag gi sdom pa de zhes bya/ /ngag gi sdom pa gang gis blo ldan rnams/ /pha dang ma dang slob dpon dag gi yang / /mdun du mi bden tshig rnams mi smra ba/ /de ni ngag gi sdom pa de zhes bya/ /ngag gi sdom pa gang gis blo ldan rnams/ /tshig gzhan gang dag skyon dang ldan pa rnams/ /de dag ma lus par yang spong bar 'gyur/ /de ni ngag gi sdom pa de zhes bya/ /ngag gi sdom pa gang gis blo ldan rnams/ /tshig rnams kyang ni brag cha 'dra ba dang / /rmi lam lta bur 'jigs pa med par 'jug /de ni ngag gi 50.167b sdom pa de zhes bya/ /bdag med srog med g.yo ba med pa dang / /rkyen las skyes pa rmi lam slu ba bzhin/ /tshig la byang chub sems dpa' gang 'jug pa/ /de ni ngag gi sdom pa de zhes bya/ /'gog pa rtag tu rmi lam ji bzhin te/ /mya ngan 'das pa'ang rmi lam ji bzhin du/ /tshig la byang chub sems dpa' gang 'jug pa/ /de ni ngag gi sdom pa de zhes bya/ /tshig ni gang yang rnyed par mi 'gyur te/ /rtog par mi byed rlom sems de mi byed/ /nam yang mi lta chags par mi byed de/ /de ni ngag gi sdom pa de zhes bya/ /de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na yid kyi sdom pas bsdam par bya'o zhes khyod kyis de ltar bslab par bya'o/ /yid kyi sdom pa gang dang ldan pas byang chub sems dpa' sems dpa' chen po sangs rgyas kyi chos 'jigs pa med pa rnams dang / mi 'khrugs pa'i sems rnam par grol ba 'thob par 'gyur ba de ni gzhon nu yid kyi sdom pa zhes bya'o/ /yid kyi sdom pa gang dang ldan pas byang chub sems dpa' sems dpa' chen po rdo rje lta bu'i ting nge 'dzin 'thob par 'gyur ba de ni gzhon nu yid kyi sdom pa zhes bya'o/ /yid kyi sdom pa gang dang ldan pas byang chub sems dpa' sems dpa' chen po 'bar ba'i bye brag dang 'dra ba zhes bya ba'i 'od zer 'thob par 'gyur ba de ni gzhon nu yid kyi sdom pa zhes bya'o/ /yid kyi sdom pa gang dang ldan pas byang chub sems dpa' sems dpa' chen po yan lag drug bcu dang ldan pa'i sangs rgyas kyi gsung dbyangs phun sum tshogs pa 'thob par 'gyur ba de ni gzhon nu yid kyi sdom pa zhes bya'o/ /yid kyi sdom pa gang dang ldan pas byang chub sems dpa' sems dpa' chen po tshig btsun pa 'thob par 'gyur ba de ni gzhon nu yid kyi sdom pa zhes bya'o/ /yid kyi sdom pa gang dang ldan pas byang chub sems dpa' sems dpa' chen po skyes bu chen po'i mtshan sum bcu rtsa gnyis 'thob par 'gyur ba de ni gzhon nu yid kyi sdom pa zhes bya'o/ /yid kyi sdom pa gang dang ldan pas byang chub sems dpa' sems dpa' chen po dpe byad bzang po brgyad bcu 'thob par 'gyur ba de ni gzhon nu 50.168a yid kyi sdom pa zhes bya'o/ /yid kyi sdom pa gang dang ldan pas byang chub sems dpa' sems dpa' chen po de bzhin gshegs pa'i stobs bcu 'thob pa dang / mi 'jigs pa bzhi dang / sangs rgyas kyi chos ma 'dres pa bcwa brgyad 'thob par 'gyur ba de ni gzhon nu yid kyi sdom pa zhes bya'o/ /yid kyi sdom pa gang dang ldan pas byang chub sems dpa' sems dpa' chen po rnam par thar pa'i sgo gsum 'thob ste/ gsum gang zhe na/ 'di lta ste/ stong pa nyid dang / mtshan ma med pa dang / smon pa med pa dang / rnam par thar pa'i sgo 'di gsum 'thob par 'gyur ba de ni gzhon nu yid kyi sdom pa zhes bya'o/ /yid kyi sdom pa gang dang ldan pas byang chub sems dpa' sems dpa' chen po tshangs pa'i gnas pa chen po bzhi 'thob ste/ bzhi gang zhe na/ 'di lta ste/ byams pa chen po dang / snying rje chen po dang / dga' ba chen po dang / btang snyoms chen po dang / tshangs pa'i gnas pa chen po 'di bzhi 'thob par 'gyur ba de ni gzhon nu yid kyi sdom pa zhes bya'o/ /yid kyi sdom pa gang dang ldan pas byang chub sems dpa' sems dpa' chen po so so yang dag par rig pa bzhi 'thob ste/ bzhi gang zhe na/ 'di lta ste/ don so so yang dag par rig pa dang / chos so so yang dag par rig pa dang / nges pa'i tshig so so yang dag par rig pa dang / spobs pa so so yang dag par rig pa dang / so so yang dag par rig pa 'di bzhi 'thob par 'gyur ba de ni gzhon nu yid kyi sdom pa zhes bya'o/ /yid kyi sdom pa gang dang ldan pas byang chub sems dpa' sems dpa' chen po dran pa nye bar gzhag pa bzhi 'thob pa dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa 'thob par 'gyur ba de ni gzhon nu yid kyi sdom pa zhes bya'o/ /yid kyi sdom pa gang dang ldan pas byang chub sems dpa' sems dpa' chen po snying rje chen po la gnas pa 'thob pa dang / btang snyoms chen po la gnas pa 'thob pa dang / bde ba'i rnam 50.168b par rtog pa 'thob pa dang / rab tu dben pa'i chos rnams 'thob par 'gyur ba de ni gzhon nu yid kyi sdom pa zhes bya'o/ /yid kyi sdom pa gang dang ldan pas byang chub sems dpa' sems dpa' chen po phan par 'dod pa dang / spyod pa dang / 'jug pa 'thob par 'gyur ba de ni gzhon nu yid kyi sdom pa zhes bya'o/ /gzhan yang gzhon nu yid kyi sdom pa zhes bya ba ni/ yid kyi sdom pa gang dang ldan pas byang chub sems dpa' sems dpa' chen po log par lta ba spangs pa'i phyir log par lta ba dang 'grogs par mi byed/ brnab sems spangs pa'i phyir brnab sems dang 'grogs par mi byed/ gnod sems spangs pa'i phyir gnod sems dang 'grogs par mi byed/ le lo spangs pa'i phyir le lo'i sems dang 'grogs par mi byed/ bla ma rnams dang / pha ma dang slob dpon dag la g.yo'i sems mi skyed/ 'dod chags dang zhe sdang dang gti mug gi sems mi skyed cing de dag dang 'grogs par mi byed/ byang chub kyi sems kyang mi gtong / lhag pa'i sems kyang 'khrugs par mi byed cing gzhan yang nyes pa dang ldan pa'i yid kyi rtogs pa de dag thams cad byang chub sems dpa' rab tu spong zhing de dag dang mi 'grogs te/ de ni gzhon nu yid kyi sdom pa zhes bya'o/ /yid de yang sgyu ma lta bu'o zhes bya ba la 'jug go/ /rmi lam lta bu'o zhes bya ba dang / smig rgyu lta bu'o zhes bya ba dang / sprul pa lta bu'o zhes bya ba dang / mig yor lta bu'o zhes bya ba la 'jug ste/ gang nas kyang ma 'ongs pa dang gang du yang mi 'gro bar 'jug go/ /bde ba la rmi lam lta bur 'jug go/ /rmi lam lta bur mi rtag par 'jug go/ /rmi lam lta bur bdag med par 'jug go/ /rmi lam lta bur srog med par 'jug go/ /rmi lam lta bur stong par 'jug ste/ yid de yang mi dmigs/ mi rtog /rlom sems su mi byed/ mi lta/ mngon par mi chags te/ gzhon nu de ni yid kyi sdom pa zhes bya'o/ /de nas yang bcom ldan 'das kyis zla 'od gzhon nur gyur pa la bka' stsal pa/ gzhon nu de lta bas na yid kyi spyod pa yongs su dag par bya'o zhes gzhon nu khyod kyis de ltar bslab par bya'o/ / 50.169a de ci'i phyir zhe na/ gzhon nu yid kyi spyod pa yongs su dag pa'i byang chub sems dpa' sems dpa' chen po ni mi khom pa thams cad rnam par spong zhing / sangs rgyas kyi chos bsam gyis mi khyab pa'ang thob par 'gyur ro/ /sangs rgyas thams cad las kyang sangs rgyas kyi mngon par shes pa thams cad dang / mi 'khrugs pa'i sems rnam par grol ba thob par 'gyur ba de ni gzhon nu yid kyi sdom pa zhes bya'o/ /de nas bcom ldan 'das kyis de'i tshe tshigs su bcad pa 'di dag gsungs so/ /yid kyi sdom pa dag ni ngas bshad kyis/ /g.yeng ba med pa'i yid kyis thams cad nyon/ /ji ste myur du 'tshang rgya 'dod na yang / /nga las thos nas de la nan tan byos/ /yid kyi sdom pa gang gis mkhas pa dag /mchog tu rab zhi rgya che mi g.yo ba/ /rgyal chos bsam yas rmad du byung ba 'thob/ /'di ni yid kyi sdom pa dag par brjod/ /yid kyi sdom pa gang gis mkhas pa dag /sems kyang rnam grol rtag tu mi g.yo 'thob/ /de bzhin rdo rje lta bu'i ting 'dzin mchog /'di ni yid kyi sdom pa dag par brjod/ /mkhas pa gang gis nye bar spyod pa yi/ /'od zer don chen byed pa sgrub par byed/ /gang gis yan lag drug bcu'i dbyangs thob pa/ /de ni yid kyi sdom pa rnam dag brjod/ /yid kyi sdom pa gang gis mkhas pa dag /sum bcu rtsa gnyis mtshan rnams myur thob 'gyur/ /stobs bcu sangs rgyas yon tan ma lus 'thob/ /de ni yid kyi sdom pa mchog tu brjod/ /yid kyi sdom pa gang gis mkhas pa dag /so so yang dag rig dang mi 'jigs dang / /yon tan mchog tu rmad byung bsam yas 'thob/ /de ni yid kyi sdom pa mchog tu brjod/ /yid kyi sdom pa gang gis mkhas pa dag /dran pa nye bar gzhag dang rdzu 'phrul rkang / /yang dag spong dang dbang stobs lnga 'thob pa/ /de ni yid kyi sdom pa mchog tu brjod/ /yid kyi sdom pa gang gis mkhas pa dag /tshangs pa'i gnas bzhi ma lus de bzhin te/ /stong nyid mtshan med smon med sgo 'thob pa/ /de ni yid kyi sdom pa'i mchog tu brjod/ / 50.169b yid kyi sdom pa dag dang gang ldan pa/ /snying rje gnas dang btang snyoms chen po dang / /spyod 'jug byams pa chen po zhi ba 'thob/ /srid pa kun la de ni phan sems 'gyur/ /yid kyi sdom pa gang gis mkhas pa dag /byang chub yan lag bdun yang myur 'thob cing / /lam mchog yan lag brgyad pa de bzhin te/ /de ni yid kyi sdom pa'i mchog tu brjod/ /yid kyi sdom pa gang gis mkhas pa dag /btang snyoms che la gnas pa dam pa dang / /snying rje gnas mchog dri ma med pa 'thob/ /de ni yid kyi sdom pa mchog tu brjod/ /yid kyi sdom pa gang gis mkhas pa dag /bde ba'i rnam rtog zhi ba dag pa'i yid/ /yon tan phyug pas rab tu dben thob pa/ /de ni yid kyi sdom pa mchog tu brjod/ /yid kyi sdom pa gang ldan mkhas pa dag /log pa'i lta ba phan dang mi 'grogs shing / /gnod sems brnab sems skyed par mi byed pa/ /de ni yid kyi sdom pa mchog tu brjod/ /yid kyi sdom pa gang ldan mkhas pa dag /skad cig tsam yang tshul 'chos mi byed cing / /bla ma la yang g.yo sgyu mi byed de/ /de ni yid kyi sdom pa mchog tu brjod/ /yid kyi sdom pa gang ldan mkhas pa dag /'dod chags zhe sdang yid ni skyed mi byed/ /de bzhin gang du'ang gti mug mi skyed de/ /de ni yid kyi sdom pa'i mchog tu brjod/ /yid kyi sdom pa gang ldan mkhas pa dag /byang chub las ni sems kyang mi gtong zhing / /lhag pa'i bsam pa dag kyang 'khrug mi byed/ /de ni yid kyi sdom pa mchog tu brjod/ /yid kyi sdom pa gang ldan mkhas pa dag /yid kyi nyes pa mang po ji snyed gzhan/ /kun dang lhan cig gnas par mi byed pa/ /de ni yid kyi sdom pa mchog tu brjod/ /yid la sgyu ma lta bur 'jug byed de/ /rmi lam 'dra zhing de bzhin smig rgyu 'dra/ /rtag tu mig yor gyi ni mtshan nyid de/ /de ni yid kyi sdom pa'i mchog tu brjod/ /bde ba rmi lam lta bur 'jug byed de/ /de bzhin mi rtag stong pa ther zug mun/ /yid la de ltar mkhas pa 'jug par byed/ / 50.170a de ni yid kyi sdom pa'i mchog tu brjod/ /yid la srog dang sems can med par 'jug /rkyen las byung ba mgal me bskor ba bzhin/ /ga las ma 'ongs gang du mi 'gro ste/ /de ni yid kyi sdom pa'i mchog tu brjod/ /yid de gang na'ang nye bar mi dmigs shing / /rtog pa med par rlom sems mi byed de/ /de yang mi lta mngon par zhan mi byed/ /de ni yid kyi sdom pa'i mchog tu brjod/ /don dam bden pa rmi lam 'dra ba dang / /mya ngan 'das pa rmi lam mtshungs par 'jug /gang gis mkhas pa de ltar 'jug pa yang / /de ni yid kyi sdom pa'i mchog tu brjod// // 'phags pa ting nge 'dzin gyi rgyal po'i mdo/ bam po bcwa lnga pa ste tha ma/ gzhon nu de la las yongs su dag pa ni 'di lta ste/ srid pa gsum rmi lam lta bur mthong nas de la 'dod chags dang bral ba skyed de/ gzhon nu 'di ni las yongs su dag pa zhes bya'o/ /gzhon nu de la dmigs pa las yang dag par 'da' ba gang zhe na/ 'di lta ste/ phung po dang khams dang skye mched rnams sgyu ma lta bur rig nas de dag 'dor ba ste/ 'di ni dmigs pa las yang dag par 'da' ba zhes bya'o/ /de la phung po yongs su shes pa gang zhe na/ 'di lta ste/ phung po rnams la smig rgyu lta bur 'jug pa'o/ /de la khams mnyam pa nyid gang zhe na/ 'di lta ste/ khams rnams sprul pa lta bur nges par spong ba'o/ /de la skye mched sel ba gang zhe na/ 'di lta ste/ skye mched mig yor lta bur nges par spong ba'o/ /de la sred pa spong ba gang zhe na/ 'di lta ste/ chos thams cad la mi lta ba'o/ /de la skye ba med pa mngon sum du byed pa gang zhe na/ 'di lta ste/ chos thams cad mi dmigs pa'o/ /de la bya ba la 'jug pa gang zhe na/ 'di lta ste/ brtson 'grus las byung ba'i sdug bsngal chud mi za ba'o/ /de la rgyu bstan pa gang zhe na/ 'di lta ste/ phung po drag cha lta bur mngon par sgrub pa'o/ /de la 'bras bu chud mi za ba gang zhe na/ 'di lta ste/ las kyi 'bras bu rmi lam lta bur chud mi za ba'o/ /de la chos mthong ba gang zhe na/ 'di lta ste/ chos thams cad mi mthong ba'o/ /de la lam bsgom pa gang zhe na/ 'di lta ste/ chos thams 50.170b cad mi dmigs par sgom pa'o/ /de la de bzhin gshegs pa dang phrad pa gang zhe na/ 'di lta ste/ sangs rgyas thams cad kyi bslab pa sgrub pa'o/ /de la shes rab rno ba gang zhe na/ 'di lta ste/ chos thams cad skye ba med par bzod pa'o/ /de la sems can gyi rjes su 'jug pa shes pa gang zhe na/ 'di lta ste/ dbang po mchog dang mchog ma yin pa shes pa'i ye shes so/ /de la chos shes pa gang zhe na/ 'di lta ste/ chos thams cad mi dmigs pa'o/ /de la so so yang dag par rig pa la 'jug pa shes pa gang zhe na/ 'di lta ste/ chos kyi tshul yang dag pa ji lta ba bzhin du rtog pa'o/ /de la yi ge rab tu dbye ba shes pa gang zhe na/ 'di lta ste/ gsang sngags gsum sbyor bar shes pa dang / rnam pa dang rnam pa ma yin pa shes pa'o/ /de la dngos po las yang dag par 'da' ba shes pa gang zhe na/ 'di lta ste/ dngos po med par rtogs pa'o/ /de la dbyangs shes pa gang zhe na/ 'di lta ste/ brag cha lta bur shes pa'o/ /de la mchog tu dga' ba 'thob pa gang zhe na/ 'di lta ste/ chos thams cad mi dmigs shing / 'byung ba dang sdug bsngal spangs pa dang / khur dor ba'o/ /de la chos kyi dga' ba myong ba gang zhe na/ 'di lta ste/ gdams par bya ba dang / mgu bar bya ba mi gtong ba dang / rang gi theg pa'i legs pa mthong ba'o/ /de la gnas pa po gang zhe na/ 'di lta ste/ 'phags pa'i bden pa rtogs pa'o/ /de la drang po gang zhe na/ 'di lta ste/ spyod lam bcos pa med pa'o/ /de la bzhin khro gnyer med pa gang zhe na/ 'di lta ste/ zhe sdang med pa'o/ /de la dge ba gang zhe na/ 'di lta ste/ 'grogs na bde ba'o/ /de la mnyen pa gang zhe na/ 'di lta ste/ pha rol la phan pa'i dngos po'o/ /de la gsong por smra ba gang zhe na/ 'di lta ste/ tshur shog legs par 'ongs so/ /zhes byas pa dang myur du ldang ba'o/ /de la bla ma la gus pa gang zhe na/ 'di lta ste/ bla ma la 'jigs shing dge ba'i bshes gnyen du 'du shes pa'o/ /de la bla ma la sri zhu byed pa gang zhe na/ 'di lta ste/ bla ma la rim gro dang g.yog bya ba'o/ /de la skye bas chog shes pa gang zhe na/ 'di lta ste/ skye 50.171a ba thams cad la chags pa med pa'o/ /de la dkar po'i chos kyis mi ngoms pa gang zhe na/ 'di lta ste/ dkar po'i chos thams cad yongs su tshol zhing dge ba gang yin zhes tshol ba'o/ /de la 'tsho ba yongs su dag pa gang zhe na/ 'di lta ste/ ngan ngon gyis chog shes pa dang / tshul 'chos pa med pa dang kha gsag med pa dang / thob kyis 'jal ba med pa dang / rnyed pas rnyed pa la 'dod pa med pa'o/ /de la dgon par gnas pa mi gtong ba gang zhe na/ 'di lta ste/ dge ba'i chos rnams la brtson pa mi 'dor zhing bas mtha'i gnas mal la mngon par dga' ba dang / nags stug po dang / gcong rong dang / phug dang sman shong du mngon par dga' ba dang / chos kyi dga' ba myong bar byed pa dang / khyim pa dang rab tu byung ba rnams dang mi 'dri ba dang / rnyed pa dang bkur sti dang / tshigs su bcad pa la ma chags pa dang / sred pa spong ba dang / bsam gtan gyi dga' ba myong ba ste/ 'di ni dgon pa la gnas pa mi gtong ba zhes bya'o/ /de la sa la gnas pa shes pa gang zhe na/ 'di lta ste/ nyan thos kyi 'bras bu rnam par gzhag pa shes pa dang / rang sangs rgyas kyi sa rnam par gzhag pa shes pa dang / byang chub sems dpa'i sa rnam par gzhag pa shes pa'o/ /de la dran pa mi nyams pa gang zhe na/ 'di lta ste/ mi rtag pa dang / sdug bsngal ba dang / stong pa dang / bdag med par yid la byed pa'o/ /de la phung po la mkhas pa'i shes pa gang zhe na/ 'di lta ste/ phung po dang khams dang skye mched rab tu dbye ba yang shes shing de la mi dmigs pa'o/ /de la mngon par shes pa mngon sum du byed pa gang zhe na/ 'di lta ste/ rdzu 'phrul gyi rkang pa bzhi thob pa dang / rdzu 'phrul rnam par 'phrul pa'o/ /de la nyon mongs pa sel ba gang zhe na/ 'di lta ste/ 'dod chags dang / zhe sdang dang / gti mug spong ba'o/ /de la bag chags kyi mtshams sbyor ba legs par 'joms pa shes pa gang zhe na/ 'di lta ste/ sngon gyi byis pa'i spyod pa la smad pa dang / nyan thos dang rang sangs rgyas kyi sa mi 'dod pa'o/ /de la khyad par du 'gro ba gang zhe na/ 'di lta ste/ sangs rgyas kyi 50.171b stobs dang / mi 'jigs pa dang / so so yang dag par rig pa sgrub pa'o/ /de la sgom pa'i rgyu 'thun pa gang zhe na/ 'di lta ste/ rjes su chags pa dang / khong khro ba spangs pa'o/ /de la ltung ba las 'byin pa la mkhas pa gang zhe na/ 'di lta ste/ so sor thar pa dang / 'dul ba sdom pa'o/ /de la yongs su dkris pa gnon pa gang zhe na/ 'di lta ste/ nyes pa bshags pa dang / phyis sdom pa'i las dge ba'o/ /de la rjes su chags pa spong ba gang zhe na/ 'di lta ste/ khams gsum gyi sred pa'i khri shing thams cad yang dag par 'jom pa dang / dge ba'i chos ma skyes pa rnams bskyed pa dang / dge ba'i chos skyes pa rnams chud mi za bar bya'o/ /de la srid pa las yang dag par 'da' ba gang zhe na/ 'di lta ste/ khams gsum la ma dmigs shing yid la mi byed pa'o/ /de la skye ba dran pa gang zhe na 'di lta ste/ sngon gyi gnas shes pa'o/ /de la las kyi rnam par smin pa la nem nur med pa gang zhe na/ 'di lta ste/ chad pa dang rtag pa rnam par spong ba'o/ /de la chos sems pa gang zhe na/ 'di lta ste/ yang dag pa ji lta ba bzhin du sems pa'o/ /de la thos pa yongs su tshol ba gang zhe na/ 'di lta ste/ nyan thos kyi sde snod dang / rang sangs rgyas kyi sde snod dang / byang chub sems dpa'i sde snod kun 'dzin cing sgom pa'o/ /de la ye shes rno ba gang zhe na/ 'di lta ste/ rmi lam lta bur ma skyes pa shes pa'o/ /de la ye shes la sred pa gang zhe na/ 'di lta ste/ ye shes yongs su tshol ba'o/ /de la ye shes khong du chud pa gang zhe na 'di lta ste/ bla na med pa yang dag par rdzogs pa'i byang chub mngon par sgrub pa'o/ /de la cang shes kyi sa gang zhe na/ 'di lta ste/ byang chub sems dpa'i bslab pa'i gnas so/ /de la ri lta bu'i sems gang zhe na/ 'di lta ste/ byang chub kyi sems mi gtong ba'o/ /de la mi g.yo ba gang zhe na/ 'di lta ste/ nyon mongs pa dag gis mi 'phrogs pa'o/ /de la mi sgul ba gang zhe na/ 'di lta ste mtshan ma thams cad yid la mi byed pa'o/ /de la phyir mi ldog pa gang zhe na/ 'di lta ste/ pha rol du phyin pa drug mi 'jig pa dang / 'jig rten gyi khams gzhan na bzhugs pa'i 50.172a sangs rgyas rnams rgyun mi 'chad par mthong ba'o/ /de la dge ba'i chos phun sum tshogs pa gang zhe na/ 'di lta ste/ bla na med pa yang dag par rdzogs pa'i byang chub tu nye bar gyur pa'o/ /de la sdig pa'i las la smod pa gang zhe na/ 'di lta ste/ sdom pa dang sdig pa rnams gzod ma nas ma skyes pa'o/ /de la nyon mongs pa mi 'byung ba gang zhe na/ 'di lta ste/ ma rig pa dang / srid pa'i sred pa dang / khro ba mi skyed pa'o/ /de la bslab pa yongs su mi gtong ba gang zhe na/ 'di lta ste/ las kyi rnam par smin pa la yid ches pa dang / sangs rgyas la ri mor byed pa'o/ /de la ting nge 'dzin rnam par gzhag pa gang zhe na/ 'di lta ste/ sems dang sems las byung ba'i chos rnams skye ba dang / 'jig pa med pa la mkhas pa dang / sems rtse gcig pa'o/ /de la sems can gyi bsam pa shes pa gang zhe na/ 'di lta ste/ dbang po mchog dang mchog ma yin pa shes pa'i ye shes so/ /de la skye ba'i khyad par shes pa gang zhe na/ 'di lta ste/ 'gro ba lnga rnam par gzhag pa shes pa'o/ /de la ye shes mtha' yas pa gang zhe na/ 'di lta ste/ 'jig rten gyi dang 'jig rten las 'das pa'i bzo lhun gyis grub pa shes pa'o/ /de la tshig gi mtshams sbyar ba shes pa gang zhe na/ 'di lta ste/ de bzhin gshegs pa'i ldem po'i ngag shes pa'o/ /de la khyim gyi gnas yongs su spangs pa gang zhe na/ 'di lta ste/ lus dang sems dben zhing mngon par byung ba'o/ /de la khams gsum la mngon par mi dga' ba gang zhe na/ 'di lta ste/ khams gsum yang dag pa ji lta ba bzhin du mthong ba'o/ /de la sems ma god pa gang zhe na/ 'di lta ste/ sems yongs su mi gtong ba dang / mnyam par bzhag pa yongs su mi gtong ba'o/ /de la chos rnams la mngon par ma chags pa gang zhe na/ 'di lta ste/ sdug pa thams cad spong ba'o/ /de la dam pa'i chos yongs su 'dzin pa gang zhe na/ 'di lta ste/ sangs rgyas kyi byang chub yongs su srung ba dang / mdo sde 'di lta bu 'dzin pa'o/ /de la chos srung ba gang zhe na/ 'di lta ste/ sangs rgyas kyi chos la smod pa rnams chos dang 'thun pas tshar gcod pa'o/ /de la las kyi rnam par smin pa la yid ches 50.172b pa gang zhe na/ 'di lta ste/ khrel yod pas sdig pa'i las rnams spong ba dang / dge ba'i chos rnams yongs su btsal ba la mngon par brtson pa'o/ /de la 'dul ba la mkhas pa gang zhe na/ 'di lta ste/ rang bzhin gyis ltung ba dang / ltung ba ma yin pa shes pa dang / bcas pa'i ltung ba dang / ltung ba ma yin pa shes pa'o/ /de la rtsod pa rnam par zhi ba gang zhe na/ 'di lta ste/ 'dus pa rnam par spangs pa'o/ /de la 'thab pa med pa dang / rtsod pa med pa gang zhe na/ 'di lta ste/ 'jig rten pa'i gtam mi 'dod pa'o/ /de la bzod pa'i sa gang zhe na/ 'di lta ste/ lus dang sems la gnod pa bzod pa'o/ /de la bzod pa yang dag par 'dzin pa gang zhe na/ 'di lta ste/ pha rol gyis ngan du smras pa dang / ngan du brjod pa'i tshig gi lam rnams btang snyoms su 'jog cing bzod pa mi 'dral ba'o/ /de la chos rab tu 'byed pa gang zhe na/ 'di lta ste/ phung po dang khams dang skye mched rnams rab tu dbye ba dang / kun nas nyon mongs pa dang / rnam par byang ba'i phyogs rab tu dbye ba dang / de dag mi dmigs pa'o/ /de la rnam par gtan la dbab pa la mkhas pa gang zhe na/ 'di lta ste/ chos thams cad brjod du med pa'o/ /de la rab tu dbye ba shes pa gang zhe na/ 'di lta ste/ chos thams cad rnam par gzhag pa gang la nges par rtog pa'o/ /de la chos kyi tshig bsgrub pa la mkhas pa'i shes pa gang zhe na/ 'di lta ste/ chos rnams yang dag pa ji lta ba bzhin du ston pa'o/ /de la don dang don ma yin pa 'dres pa bsgrub pa la mkhas pa shes pa gang zhe na/ 'di lta ste/ chos rnams rang bzhin gyis blang ba dang / gzhag pa med pa'o/ /de la sngon gyi mtha' shes pa gang zhe na/ 'di lta ste/ rgyu shes pa'o/ /de la phyi ma'i mtha' shes pa gang zhe na/ 'di lta ste/ rkyen shes pa'o/ /de la dus gsum mnyam pa nyid gang zhe na/ 'di lta ste/ chos thams cad la tha dad du bya ba med pa'i dngos po'i lugs kyi chos nyid do/ /de la 'khor gsum yongs su dag pa'i shes pa gang zhe na/ 'di lta ste/ 'das pa dang ma 'ongs pa dang da ltar byung ba'i chos rnams mi dmigs shing yid la mi byed pa'o/ /de la sems gnas pa gang zhe na/ 'di lta ste/ sems mi dmigs pa'o/ /de la lus rnam par gzhag pa gang zhe na/ 'di lta ste/ lus la zhugs 50.173a pa'i rjes su dran pa'o/ /de la spyod lam srung ba gang zhe na/ 'di lta ste/ gang 'di bslad pa med pa'o/ /de la spyod lam mi 'khrugs pa gang zhe na/ 'di lta ste/ dge ba mi spyoms pa'o/ /de la spyod lam rnam par mi rtog pa gang zhe na/ 'di lta ste/ sdig pa 'dod pa dang bral ba'o/ /de la dbang po dang ba gang zhe na/ 'di lta ste/ chos la zhugs pa'i yid la byed pa dang / rigs par smra ba dang / dus shes pa dang / yang dag pa ji lta ba'i chos rnams yang dag par rab tu ston pa'o/ /de la 'jig rten shes pa gang zhe na/ 'di lta ste/ phar 'gro ba dang / phyir 'ong ba rab tu shes pa'o/ /de la lhug par gtong ba gang zhe na/ 'di lta ste/ dngos po rnams mi sbed pa dang / ser sna med pa'o/ /de la lag brkyang ba gang zhe na/ 'di lta ste/ 'ged pa'i ngang tshul can no de la sems 'dzin pa med pa gang zhe na/ 'di lta ste/ dad pa rnyog pa med pa'o/ /de la khrel yod pa gang zhe na/ 'di lta ste/ mu cor mi smra ba'o/ /de la ngo tsha shes pa gang zhe na/ 'di lta ste/ mngon du gyur pa'o/ /de la mi dge ba'i sems smad pa gang zhe na/ 'di lta ste/ byis pa'i chos rtogs pa dang / de dag dang mi 'grogs pa'o/ /de la sbyangs pa mi gtong ba gang zhe na/ 'di lta ste/ yi dam la brtan pa'o/ /de la spyod pa yang dag par 'dzin pa gang zhe na/ 'di lta ste/ spyod pa la brtul ba bskyed pa'o/ /de la dga' ba yang dag par spyod pa gang zhe na/ 'di lta ste/ dge ba'i las kyi phan yon la sems pa'o/ /de la bla ma dag gi stan 'ding zhing ldang ba gang zhe na/ 'di lta ste/ nga rgyal bcom zhing snyom las med pa'o/ /de la nga rgyal tshar gcod pa gang zhe na/ 'di lta ste/ bdag nyid rjes su mi dmigs shing rtsom pa med pa'o/ de la sems rab tu gzung ba gang zhe na/ 'di lta ste/ dkar po'i chos chud mi za bar shes pa'o/ /de la sems spro bar bya ba gang zhe na/ 'di lta ste/ brtson 'grus chud mi za bar shes pa'o/ /de la don so so yang dag par rig pa'i shes pa gang zhe na/ 'di lta ste/ bden pa yang dag pa ji lta ba bzhin du rtogs pa'i ye shes so/ /de la ye shes khong du chud pa gang zhe na/ 'di lta ste/ 'jig rten dang 'jig rten las 'das pa'i chos rnams khong du chud pa'o/ /de la mi shes pa dang bral ba gang zhe na/ 'di lta ste/ chos yang dag pa ji lta ba bzhin la sgro 'dogs pa dang bral ba'o/ /de la sems kyi 'jug pa 50.173b shes pa gang zhe na/ 'di lta ste/ skye ba dang 'jig pa med pa shes pa'o/ /de la zas sgrub pa la mkhas pa gang zhe na/ 'di lta ste/ shes rab rno ba'o/ /de la sgra brjod pa shes pa gang zhe na/ 'di lta ste/ chos yang dag pa ji lta ba bzhin du rab tu bstan pa'o/ /de la rnam par gzhag pa shes pa gang zhe na/ 'di lta ste/ yang dag pa ji lta ba bzhin du 'jug pa shes pa'o/ /de la don rnam par gtan la dbab pa gang zhe na/ 'di lta ste/ 'du byed kyi phung po chad pa'o/ /de la gnod pa rnam par spong ba gang zhe na 'di lta ste/ srid pa las yang dag par 'da' ba dang / gzhan dag kyang srid pa las yang dag par 'da' ba la 'dzud pa'o/ /de la skyes bu dam pa la sten pa gang zhe na/ 'di lta ste/ sangs rgyas dang mi 'bral ba'o/ /de la skyes bu dam pa dang 'grogs pa gang zhe na/ 'di lta ste/ sangs rgyas dang byang chub sems dpa' dang / rang sangs rgyas dang / nyan thos la sten pa'o/ /de la skyes bu dam pa ma yin pa rnam par spong ba gang zhe na/ 'di lta ste/ dmigs pa can dang / le lo can rnams rnam par spong ba'o/ /de la bsam gtan mi 'dor ba gang zhe na/ 'di lta ste/ 'dod pa'i tsher ma rnam par spong ba dang / bsam gtan mi gtong zhing dga' ba mi 'dor ba'o/ /de la bsam gtan la ma chags pa gang zhe na/ 'di lta ste/ khams gsum las yang dag par 'da' bar mos pa dang / sems can yongs su smin par bya ba la mos pa dang / gong du shes rab kyi snang ba la mos pa'o/ /de la mngon par shes pas rnam par 'phrul pa gang zhe na/ 'di lta ste/ mngon par shes pa lnga la gnas nas sangs rgyas kyi chos shes par dka' ba rnams gzhan la yang dag par rab tu ston pa'o/ /de la ming gi brda gang zhe na/ 'di lta ste/ yongs su ma grub pa rnams ming gis khong du chud pa'o/ /de la brtags pa'i tha snyad gang zhe na/ 'di lta ste/ 'jig rten gyi tha snyad do/ /de la btags pa 'joms pa gang zhe na/ 'di lta ste/ brjod par shes pa'o/ /de la 'khor ba las ldog pa gang zhe na/ 'di lta ste/ 'khor ba'i nyes pa la so sor rtog pa'o/ /de la rnyed pa mi 'dod pa gang zhe na/ 'di lta ste/ yang dag par 'dod pa nyung ba'o/ /de la rnyed pa dang bkur sti mi len pa gang zhe na 'di lta ste/ gdung ba med pa dang / sdig pa 'dod pa dang 50.174a bral ba'o/ /de la bsngags pa ma yin pas zhum par mi 'gyur ba gang zhe na/ 'di lta ste/ phung po dang / khams la yongs su rtog pa shes pa'o/ /de la yang dag par bsngags pa mi len pa gang zhe na/ 'di lta ste/ dge ba mi spyoms pa dang / rnyed pa dang bkur sti la bar chad du rig pa'o/ /de la bkur sti la btang snyoms su byed pa gang zhe na/ 'di lta ste/ las kyi rnam par smin pa rtogs pa'o/ /de la sti stang med pa la zhum par mi 'gyur ba gang zhe na 'di lta ste/ rnal 'byor mi gtong ba'o/ /de la smad pas mi 'khrugs pa gang zhe na/ 'di lta ste/ 'jig rten gyi chos la so sor rtog pa'o/ /de la bstod pa la btang snyoms su byed pa gang zhe na 'di lta ste/ dge ba'i chos tshol zhing 'byung ba'o/ /de la rnyed pa med kyang sems 'gong ba med pa gang zhe na 'di lta ste/ bdag gis byas pa'i chos rnams la so sor rtog pa'o/ /de la khyim pa dang mi sten pa gang zhe na/ 'di lta ste/ zang zing ci yang rnam par spong ba'o/ /de la rab tu byung ba dang mi sten pa gang zhe na 'di lta ste/ mi rigs pa yongs su spong ba dang / rigs pa yongs su tshol ba'o/ /de la spyod yul ma yin pa rnam par spong ba gang zhe na/ 'di lta ste/ sgrib pa lnga rnam par spong ba'o/ /de la spyod yul la rab tu spyod pa gang zhe na/ 'di lta ste/ dran pa nye bar gzhag pa bzhi sgom pa'o/ /de la cho ga phun sum tshogs pa gang zhe na/ 'di lta ste/ pha rol rjes su srung ba'o/ /de la cho ga ma yin pa rnam par spong ba gang zhe na/ 'di lta ste/ bdag gi dge ba'i chos rjes su srung ba'o/ /de la rigs sun par mi byed pa gang zhe na/ 'di lta ste/ shes kyi khe rnam par spong ba'o/ /de la bstan pa srung ba gang zhe na 'di lta ste/ chos yongs su btsal ba sgrub pa dang / chos kyi rjes su 'thun pa'i chos kyi nan tan no/ /de la smra ba nyung ba gang zhe na 'di lta ste/ zhi gnas thob pa'o/ /de la mnyen pa gang zhe na 'di lta ste/ lhag mthong thob pa'o/ /de la tshig gi lan la mkhas pa gang zhe na 'di lta ste/ lan dang / yang lan shes pa'o/ /de la phas kyi rgol ba tshar gcod pa gang zhe na/ 'di lta ste/ chos rnams yang dag pa ji lta ba bzhin du ston pa dang / rnam par gzhag par byed pa dang / glan ka tshol ba tshar gcod pa'o/ /de la dus su 'gro ba gang zhe na 'di lta ste/ dus shes pa'o/ /de la 50.174b so so'i skye bo la yid mi rton pa gang zhe na/ 'di lta ste/ byis pa'i chos la skyon du lta ba'o/ /de la sdug bsngal ba rnams la brnyas pa med pa gang zhe na 'di lta ste/ sems can thams cad la sems mnyam pa'o/ /de la sdug bsngal ba rnams la nor rab tu sbyin pa gang zhe na 'di lta ste/ 'jig rten gyi zang zing gi sbyin pa'o/ /de la dbul po rnams la mi smod pa gang zhe na/ 'di lta ste/ pha rol la snying brtse ba'i blo'o/ /de la tshul khrims 'chal pa rnams la snying brtse ba gang zhe na 'di lta ste/ pha rol ltung ba las byung zhing tshul khrims la rab tu 'god pa'o/ /de la phan pa'i dngos po gang zhe na 'di lta ste/ gzhan la phan par byed pa'o/ /de la snying rje ba'i blo gang zhe na/ 'di lta ste/ sems can gyi ma 'ongs pa'i sdug bsngal la lta ba'o/ /de la chos kyis phan gdags pa gang zhe na/ 'di lta ste/ gzhan dag yang dag pa ji lta ba bzhin du chos la gzud pa'o/ /de la zang zing yongs su gtong ba gang zhe na/ 'di lta ste/ phung po yongs su gtong ba dang / gzhan la zang zing gis phan 'dogs pa'o/ /de la sogs pa'i gnas med pa gang zhe na/ 'di lta ste/ zang zing la smod pa dang / srung ba'i nyes pa mthong ba'o/ /de la tshul khrims bsngags pa gang zhe na/ 'di lta ste/ tshul khrims yongs su rig pa'o/ /de la 'chal pa'i tshul khrims la smad pa gang zhe na 'di lta ste/ 'chal pa'i tshul khrims kyi nyes pa khong du chud pa'o/ /de la tshul khrims phun sum tshogs pa dag la g.yo med par sten pa gang zhe na 'di lta ste/ tshul khrims dang ldan pa la rnyed par dka' ba'i 'du shes su shes pa'o/ /de la yod pa thams cad gtong ba gang zhe na/ 'di lta ste/ bsam pa dge ba'o/ /de la lhag pa'i bsam pas 'gron du gnyer ba gang zhe na 'di lta ste/ pha rol la bde ba 'dod pa'o/ /de la smras pa bzhin byed pa gang zhe na 'di lta ste/ bsam pa dge ba phun sum tshogs pa'o/ /de la rgyun mi chad par bsnyen bkur byed pa gang zhe na/ 'di lta ste/ dge ba gang yin zhes tshol zhing 'dri ba'o/ /de la dga' ba myong ba gang zhe na 'di lta ste/ khong du chud pa'i shes pa dang lung gi shes pa'o/ /de la dpe shes pa gang zhe na 'di lta ste/ 'dra ba shes pa dang / gdams pa shes pa'o/ /de la sngon byung ba 50.175a la mkhas pa gang zhe na/ 'di lta ste/ skye ba dran pa dang / thos pa mang ba'o/ /de la dge ba'i rtsa ba sngon du 'gro ba gang zhe na/ 'di lta ste/ byang chub la shin du 'dul ba dang / gzhan dag kyang spro bar byed pa'o/ /de la thabs mkhas pa gang zhe na/ 'di lta ste/ so sor 'chags pa dang / rjes su yi rang ba dang / gsol ba 'debs pa dang / dge ba'i rtsa ba yongs su bsngo ba la mkhas pa'o/ /de la mtshan ma spong ba gang zhe na/ 'di lta ste/ chos rnams rmi lam lta bur rtogs nas dngos po rnam par 'jig pa'o/ /de la 'du shes zlog pa gang zhe na/ 'di lta ste/ phyin ci log 'dor ba'o/ /de la dngos po'i mtshan nyid 'dor ba gang zhe na/ 'di lta ste/ mtshan nyid med par shes pa'o/ /de la mdo sde mngon par sgrub pa la mkhas pa gang zhe na/ 'di lta ste/ dge ba dang mi dge ba'i chos yang dag pa ji lta ba rnams dpe dang rtogs pa brjod pas yang dag par rab tu ston pa'o/ /de la bden pa rnam par gtan la dbab pa gang zhe na/ 'di lta ste/ rnam par shes pa 'gog pa dang / ming dang gzugs mi skye ba'o/ /de la rnam par grol ba mngon sum du byed pa gang zhe na 'di lta ste/ rdo rje lta bu'i ting nge 'dzin las mi g.yo ba dang / mi 'khrug pa'o/ /de la gcig tu brjod pa gang zhe na/ 'di lta ste/ mu stegs can gyi gnas smad pa dang / mi skye bar shes pa'o/ /de la mi 'jigs pa thob pa gang zhe na/ 'di lta ste/ sangs rgyas kyi chos rnams rtogs shing stobs bskyed pa'o/ /de la tshul khrims kyi gnas gang zhe na/ 'di lta ste/ lus kyi sdom pa dang so sor thar pa'i sdom pa'o/ /de la snyoms par 'jug pa la 'jug pa gang zhe na/ 'di lta ste/ khams gsum la 'dod chags dang bral ba'o/ /de la shes rab thob pa gang zhe na/ 'di lta ste/ nus pa shes pa dang / mi dmigs pa'o/ /de la gcig pur dga' ba gang zhe na 'di lta ste/ 'du 'dzi'i nyes pa rnam par spong ba dang / chos dkar po mi gtong ba'o/ /de la shes kyi khe chu ngus chog shes pa gang zhe na 'di lta ste/ ngan ngon gyis mgu ba'o/ /de la sems la rnyog pa med pa gang zhe na/ 'di lta ste/ sgrib pa rnams rnam par gnon pa'o/ /de la lta bas byas pa rnam par spong ba gang zhe na/ 'di lta ste/ dmigs pa'i lta ba rnam par spong ba'o/ /de la 50.175b gzungs thob pa gang zhe na/ 'di lta ste/ chos ji ltar mthong ba rnams yang dag pa ji lta ba bzhin du chags pa med par rab tu ston pa'o/ /de la ye shes snang ba gang zhe na/ 'di lta ste/ rang bzhin la 'jug pa'o/ /de la gnas gang zhe na/ 'di lta ste/ tshul khrims kyi gnas so/ /de la gzhi gang zhe na 'di lta ste/ sems kyi gzhi'o/ /de la rten gang zhe na 'di lta ste/ dad pa la rten pa'o/ /de la nan tan gang zhe na/ 'di lta ste/ lam gyi nan tan no/ /de la rgyu gang zhe na 'di lta ste/ ma rig pa 'khor ba'i rgyu'o/ /de la rigs pa gang zhe na 'di lta ste/ rigs pa ni thar pa'i rigs pa'o/ /de la tshul gang zhe na/ 'di lta ste/ sred pa rab tu spangs pa'o/ /de la sgo gang zhe na/ 'di lta ste/ nyes pa spangs pa'o/ /de la lam gang zhe na/ 'di lta ste/ mi rtag pa dang / sdug bsngal ba dang stong pa dang / bdag med par shes pa'o/ /de la sa gang zhe na/ 'di lta ste/ smon pa med pa'i sa bcu'o/ /de la skye ba dang bral ba gang zhe na/ 'di lta ste/ skye ba bcad pa'o/ /de la ye shes kyi sa gang zhe na/ 'di lta ste/ rmongs pa med pa'o/ /de la mi shes pa spangs pa gang zhe na 'di lta ste/ gti mug spangs pa'o/ /de la ye shes gnas pa gang zhe na 'di lta ste/ mi gnas pa'o/ /de la rnal 'byor spyod pa'i sa gang zhe na/ 'di lta ste/ byang chub kyi phyogs kyi chos sum bcu rtsa bdun gyi chos rnams sgom pa'o/ /de la byang chub sems dpa'i spyod yul gang zhe na/ 'di lta ste/ pha rol tu phyin pa drug go/ /de la skyes bu dam pa sten pa gang zhe na/ 'di lta ste/ sangs rgyas la sten pa'o/ /de la skyes bu dam pa ma yin pa spangs pa gang zhe na/ 'di lta ste/ mu stegs can dmigs par lta ba rnams rnam par spong ba'o/ /de la de bzhin gshegs pas gsungs pa gang zhe na 'di lta ste/ sangs rgyas kyi stobs la gnas pa nas rang bzhin shes pas thar pa'o/ /de la sangs rgyas kyi sa gang zhe na 'di lta ste/ dge ba'i chos thams cad thob pa'o/ /de la mkhas pas rjes su yi rang ba gang zhe na/ 'di lta ste/ 'das pa dang ma byon pa dang da ltar byung ba'i sangs rgyas bcom ldan 'das dang nyan thos dag gis rjes su yi rang ba'o/ /de la byis pa dag gis spangs pa gang zhe na 'di lta ste/ 50.176a byis pa thams cad kyis rig par dka' ba'o/ /de la nyan thos dang rang sangs rgyas kyis shes par dka' ba gang zhe na/ 'di lta ste/ sangs rgyas kyi chos bsam gyis mi khyab pa'o/ /de la mu stegs can gyis ma yin pa gang zhe na/ 'di lta ste/ rnal 'byor pa dag gi log pa'i nga rgyal lo/ /de la byang chub sems dpa' dag gis yongs su bzung ba gang zhe na 'di lta ste/ rnyed par dka' ba dang rtsi chen por gyur pa'o/ /de la stobs bcu dag gis khong du chud pa gang zhe na/ 'di lta ste/ dka' ba'i tshul gyis so/ /de la lha rnams kyis mchod par bya ba gang zhe na 'di lta ste/ bde ba thams cad thob par byed pa'i phyir ro/ /de la tshangs pa dag gis phyag bya ba gang zhe na 'di lta ste/ thar pa thams cad thob par byed pa'i tshul gyis so/ /de la klu rnams kyis phyag bya ba gang zhe na 'di lta ste/ bag chags thams cad gcod pa'i phyir ro/ /de la gnod sbyin dag gis rjes su yi rang bar bya ba gang zhe na 'di lta ste/ ngan 'gro thams cad kyi lam gcod pa'i phyir ro/ /de la mi'am ci dag gis phyag bya ba gang zhe na 'di lta ste/ thar pa'i rab tu bde ba thams cad thob par bya ba'i phyir ro/ /de la lto 'phye chen po dag gis rab tu bsngags pa gang zhe na 'di lta ste/ 'khor ba gcod pa'i phyir ro/ /de la byang chub sems dpa' dag gis bsgom par bya ba gang zhe na 'di lta ste/ thams cad mkhyen pa'i ye shes thob par byed pa'i phyir ro/ /de la mkhas pa dag gis kun chub par bya ba gang zhe na/ 'di lta ste/ phyir mi ldog pa'i sa thob par byed pa'i phyir ro/ /de la nor bla na med pa gang zhe na 'di lta ste/ lha dang mi'i skye dgu phun sum tshogs pa thob par byed pa dang / thar pa thob par byed pa'i phyir ro/ /de la sbyin pa zang zing med pa gang zhe na/ 'di lta ste/ nyon mongs pa thams cad gcod pa'i phyir ro/ /de la na ba rnams kyi rtsi gang zhe na/ 'di lta ste/ 'dod chags dang zhe sdang dang gti mug rab tu zhi bar byed pa'i phyir ro/ /de la mdzod shes pa gang zhe na 'di lta ste/ bsgom pa'i phyir ro/ /de la spobs pa mi zad pa gang zhe na 'di lta ste/ yang dag pa ji 50.176b lta ba bzhin du shes pa dang mthong ba'i phyir ro/ /de la mya ngan dang bral ba gang zhe na 'di lta ste/ gnod pa dang / sdug bsngal don med par rtogs shing 'byung ba dang / sdug bsngal bdag med par shes pa'i phyir ro/ /de la khams gsum yongs su shes pa gang zhe na/ 'di lta ste/ sgyu ma dang rmi lam lta bur rtogs pa'o/ /de la pha rol du 'gro ba dag gi gzings gang zhe na/ 'di lta ste/ lhag pa'i bsam pas yongs su mya ngan las 'da' bar 'dod pa dag mi rtag pa dang sdug bsngal ba dang / stong pa nyid du sgom pa'i phyir ro/ /de la chu bo'i nang du song ba dag gi gru gang zhe na/ 'di lta ste/ mya ngan las 'da' ba thob par byed pa'i phyir ro/ /de la snyan pa 'dod pa dag gi grags pa gang zhe na/ 'di lta ste/ chos rgya chen po thob par byed pa'i phyir ro/ /de la sangs rgyas rnams kyi bsngags pa gang zhe na/ 'di lta ste/ yon tan mtha' yas pa'i rtsi'i sbyin bdag tu gyur pa'i phyir ro/ /de la de bzhin gshegs pa rnams kyi snyan pa gang zhe na 'di lta ste/ yon tan dang bde ba thams cad dang thar pa'i sbyin bdag tu gyur pa'i phyir ro/ /de la stobs bcu dag gis bstod pa gang zhe na/ 'di lta ste/ chos rin po che rnyed par dka' ba'i sbyin bdag tu gyur pa'i phyir ro/ /de la byang chub sems dpa' rnams kyi yon tan gang zhe na/ 'di lta ste/ chos 'di la bslabs pa'i phyir ro/ /de la snying rje can dag gi btang snyoms gang zhe na 'di lta ste/ sangs rgyas kyi bya ba byas pa'i phyir ro/ /de la byams pas zhe sdang zhi ba gang zhe na 'di lta ste/ gnyen por gyur pa'i phyir ro/ /de la theg pa chen po pa rnams dbugs 'byin pa gang zhe na 'di lta ste/ sangs rgyas kyi chos la bsam pa thams cad yongs su rdzogs pa'i phyir ro/ /de la seng ge'i sgra sgrog pa dag gi nan tan gang zhe na/ 'di lta ste/ chos mchog dang chos dam pa thob par byed pa'i phyir ro/ /de la sangs rgyas kyi ye shes kyi lam gang zhe na 'di lta ste/ dge ba'i chos thams cad thob par byed pa'i phyir ro/ /de la chos thams cad kyi phyag rgya gang zhe na/ 'di lta ste/ pha rol nas tshu rol rtogs pa'i phyir ro/ /de la thams cad mkhyen pa'i ye shes mi 'phrogs pa gang zhe na 'di lta ste/ 50.177a mi dge ba'i chos thams cad spong bar 'gyur ba dang / dge ba'i chos thams cad sgrub pa dang / thar pa thams cad sgrub par 'gyur ba'o/ /de la byang chub sems dpa' rnams kyi bskyed mos tshal gang zhe na 'di lta ste/ bdag gi bde ba dang dga' ba dang / mgu ba thams cad kyis sems can thams cad kyi bde ba sgrub pa'i phyir ro/ /de la bdud kyi sde rnams 'jig par byed pa gang zhe na 'di lta ste/ stobs thams cad yongs su sgrub pa dang / nyon mongs pa thams cad zhi bar byed pa'i phyir ro/ /de la bde bar 'gro ba'i rig pa gang zhe na 'di lta ste/ gtse ba thams cad zad par 'gyur ba'o/ /de la don grub pa rnams kyi don gang zhe na 'di lta ste/ phun sum tshogs pa thams cad yongs su sgrub pa'i phyir ro/ /de la dgra'i nang du song ba'i skyabs gang zhe na 'di lta ste/ dmigs pa can thams cad dang log par lta ba rnams pham par byed par 'gyur ba'i phyir ro/ /de la chos dang ldan pas mu stegs can rnams tshar gcod pa gang zhe na/ 'di lta ste/ chos dang ldan pas mu stegs can tshar gcod pa'o/ /de la mi 'jigs pa'i bden pa'i rnams pa gang zhe na/ 'di lta ste/ chos thams cad yongs su brtags pa dang / phyir brtag pa bzod pa'i phyir ro/ /de la stobs rnams yang dag par btsal ba gang zhe na/ 'di lta ste/ ma log pa'i tshul gyis so/ /de la sangs rgyas kyi chos ma 'dres pa bcwa brgyad kyi snga ltas gang zhe na 'di lta ste/ dkar po'i chos thams cad thob par byed pa'i phyir ro/ /de la rgyan gang zhe na 'di lta ste/ skyes bu chen po'i mtshan sum bcu rtsa gnyis thob par byed pa'i phyir ro/ /de la thar pa 'dod pa dag gi dga' ba gang zhe na 'di lta ste/ thog ma dang dbus dang tha mar dge ba'i phyir ro/ /de la bu'i thu bo dag gi dga' ba gang zhe na 'di lta ste/ pha'i nor sangs rgyas kyi nor myong ba thob par byed pa'i phyir ro/ /de la sangs rgyas kyi ye shes rdzogs pa gang zhe na 'di lta ste/ dkar po'i chos thams cad rjes su srung ba dang / dkar po'i chos thams cad gzhan ma yin par gso ba thob par byed pa'i phyir ro/ /de la nyan thos dang rang sangs rgyas thams cad kyi sa ma yin pa gang zhe na 'di lta ste/ sangs rgyas kyi chos dpag tu med pa rgya chen po yongs su sgrub pa'i phyir ro/ /de la sems rnam par dag pa 50.177b gang zhe na/ 'di lta ste/ dri ma thams cad spong bar 'gyur ba'o/ /de la lus yongs su dag pa gang zhe na 'di lta ste/ nad thams cad rab tu zhi ba'i phyir ro/ /de la rnam par thar pa 'dod pa rnams kyi yongs su rdzogs pa gang zhe na 'di lta ste/ mi rtag pa dang sdug bsngal ba dang / stong pa dang / bdag med pa dang / zhi bar so sor rtog pa yongs su sgrub pa'i phyir ro/ /de la 'dod chags kyis kun nas nyon mongs pa med pa gang zhe na 'di lta ste/ mi 'chi ba'i gnas yongs su sgrub pa'i phyir ro/ /de la zhe sdang dang bral ba gang zhe na/ 'di lta ste/ byams pa chen po yongs su sgrub pa'i phyir ro/ /de la gti mug gi sa ma yin pa gang zhe na/ 'di lta ste/ chos yang dag pa nyid yongs su sgrub pa'i phyir ro/ /de la ye shes 'byung ba gang zhe na/ 'di lta ste/ 'jig rten pa dang 'jig rten las 'das pa'i dgos pa shes pa thams cad skyed pa'i phyir ro/ /de la rig pa skye ba gang zhe na/ 'di lta ste/ tshul bzhin yid la byed pa thams cad yongs su sgrub pa'i phyir ro/ /de la ma rig pa spong ba gang zhe na 'di lta ste/ tshul bzhin ma yin pa yid la byed pa dang bral bar 'gyur ba'i phyir ro/ /de la rnam par grol ba'i snying pos ngoms pa gang zhe na 'di lta ste/ 'phags pa'i che ba nyid yongs su sgrub pa'i phyir ro/ /de la ting nge 'dzin snying por byed pa dag gi mthu gang zhe na 'di lta ste/ bde ba dang dga' ba'i bde ba thams cad dang / sems rtse gcig pa yongs su sgrub pa'i phyir ro/ /de la mthong bar 'dod pa rnams kyi mig gang zhe na/ 'di lta ste/ bdag nyid lta ba'i phyir ro/ /de la rnam par 'phrul par 'dod pa rnams kyi mngon par shes pa gang zhe na/ 'di lta ste/ sgrib pa med pa dang / 'dod par 'gyur ba'i chos nyid kyi phyir ro/ /de la mngon par sgrub par 'dod pa rnams kyi rdzu 'phrul gang zhe na 'di lta ste/ chos thams cad la mi rtog pa'i shes pa sgrib pa med pa'i phyir ro/ /de la thos par 'dod pa rnams kyi gzungs gang zhe na/ 'di lta ste/ chos thams cad mya ngan las 'das pa dang mnyam pa'i phyir ro/ /de la dran pa mi nyams pa gang zhe na 'di lta ste/ mya ngan las 'das par dmigs pa rang bzhin gyis rnam par zhi ba'i phyir ro/ /de la sangs rgyas rnams kyi byin gyis rlabs 50.178a gang zhe na/ 'di lta ste/ mtha' yas pa yongs su sgrub pa'i phyir ro/ /de la mgon po rnams kyi thabs mkhas pa gang zhe na/ 'di lta ste/ thams cad bde ba dang legs par 'gro ba'i phyir ro/ /de la phra mo gang zhe na/ 'di lta ste/ mya ngan las 'das pa la dmigs pa rnam par zhi ba'i phyir ro/ /de la shes par dka' ba gang zhe na/ 'di lta ste/ so sor rig par dka' ba'i phyir ro/ /de la mi brtson pa rnams kyis rig par dka' ba gang zhe na/ 'di lta ste/ sngon ma thos pa'i phyir ro/ /de la yi ge rnams ldog pa gang zhe na/ 'di lta ste/ tshig gi lam thams cad mi dmigs pa'i phyir ro/ /de la sgras shes par dka' ba gang zhe na/ 'di lta ste/ chos thams cad bsam gyis mi khyab pa'i phyir ro/ /de la mkhas pa dag gis yongs su shes pa gang zhe na/ 'di lta ste/ rin po che don che ba'i phyir ro/ /de la nges pa dag gis shes pa gang zhe na 'di lta ste/ bkur sti kun shes pa'i phyir ro/ /de la 'dod pa nyung bas rtogs pa gang zhe na/ 'di lta ste/ bkur sti mi skyed pa'i phyir ro/ /de la brtson 'grus brtsams pa rnams kyis gzung ba gang zhe na/ 'di lta ste/ brtson pa mi 'dor ba'i phyir ro/ /de la dran pa can gyis bcangs pa gang zhe na/ 'di lta ste/ byas pa chud mi za ba'i phyir ro/ /de la sdug bsngal zad pa gang zhe na/ 'di lta ste/ 'dod chags dang zhe sdang dang / gti mug spong bar 'gyur ba'i phyir ro/ /de la chos mi skye ba gang zhe na/ 'di lta ste/ rnam par shes pa thams cad 'gog par 'gyur ba'i phyir ro/ /de la bstan pa gcig gang zhe na/ 'di lta ste/ srid pa'i 'gro ba dang / 'chi 'pho dang / skye ba'i gnas thams cad kyi chos thams cad rmi lam lta bu'o zhes chos thams cad mi skyed pa'i phyir ro/ /'di ni tshig sum brgya po 'di rnams rgyas par bstan par rig par bya ste/ gzhon nu 'di ni chos thams cad kyi rang bzhin mnyam pa nyid rnam par spros pa'i ting nge 'dzin zhes bya'o/ /de nas bcom ldan 'das kyis de'i tshe tshigs su bcad pa 'di dag gsungs so/ /sangs rgyas chos ni rgya che ste/ /tshul yang rgya cher bstan pa yin/ /chos rnams rgya cher bstan pas na/ /yon tan rgya chen thob par 'gyur/ / 50.178b ji ltar nam mkha' rgya che ba/ /chos kyi mtshan nyid de bzhin te/ /rin chen 'od zer rgya chen gang / /de phyir shin du rgyas shes bya/ /sems can spyod pa rgya che ste/ /de dag bstan pa'ang rgya che'o/ /lung gi don yang rgya che bas/ /de phyir shin du rgyas shes bya/ /chos thams cad kyi rang bzhin mnyam pa nyid rnam par spros pa'i ting nge 'dzin nges par bstan pa'i chos kyi rnam grangs 'di bcom ldan 'das kyis bshad pa na sems can dpag tu med pa dag gis bla na med pa yang dag par rdzogs pa'i byang chub tu sems bskyed do/ /sems can dpag tu med pa dag kyang bla na med pa yang dag par rdzogs pa'i byang chub las phyir mi ldog par gyur to/ /sems can dpag tu med pa dag rang byang chub tu sems skyes so/ /sems can dpag tu med pa dag dgra bcom pa'i 'bras bu mngon du bya ba la sems skyes so/ /stong gsum gyi stong chen po'i 'jig rten gyi khams 'di yang rnam pa drug tu g.yos rab tu g.yos/ kun du rab tu g.yos/ 'gul rab tu 'gul/ kun du rab tu 'gul/ ldeg rab tu ldeg /kun du rab tu ldeg 'khrugs rab tu 'khrugs/ kun du rab tu 'khrugs/ chem chem rab tu chem chem/ kun du rab tu chem chem/ 'ur 'ur rab tu 'ur 'ur/ kun du rab tu 'ur 'ur/ shar phyogs dma' na nub phyogs mtho/ nub phyogs dma' na shar phyogs mtho/ byang phyogs dma' na lho phyogs mtho/ lho phyogs dma' na byang phyogs mtho/ mtha' dma' na dbus mtho/ dbus dma' na mtha' mtho ste/ 'jig rten du snang ba dpag tu med pa dag byung bar gyur to/ /lha'i spos kyi char chen po yang mngon par bab bo/ /lha dag kyang me tog gi char chen po 'bebs so/ /lha'i sil snyan brgya stong dag kyang steng gi bar snang la rdung ngo / /lha'i na bza' dag kyang steng gi nam mkha' la g.yog cing tshig 'di skad ces zer ro/ /gang gis snying rje chen po la 'jug pa'i chos kyi rnam grangs 'di thos par 'gyur ba'i sems can de dag ni rnyed pa legs par rnyed pa yin te/ sems can de dag sangs rgyas mang po la bsnyen bkur byas par 50.179a 'gyur ro/ /gang gis chos thams cad kyi rang bzhin mnyam pa nyid rnam par spros pa'i ting nge 'dzin 'di thos par 'gyur zhing thos nas kyang yi ger 'dri ba dang / 'dzin pa dang / 'chang ba dang / klog pa dang / kun chub par byed pa dang / nyon mongs pa med par bsgom pas bsgom pa dang / mang du byed pa dang / gzhan la yang rgya cher yang dag par rab tu ston pa de dag ni sems can thams cad kyi sbyin gnas su 'gyur ro/ /de nas bcom ldan 'das kyis tshe dang ldan pa kun dga' bo la bka' stsal pa kun dga' bo chos kyi rnam grangs 'di khyod kyis zung shig dang / lhogs shig /kun chub par gyis shig /gzhan dag la yang rgya cher yang dag par rab tu ston cig /de nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das chos kyi rnam grangs 'di'i ming ci lags/ ji ltar gzung bar bgyi/ bcom ldan 'das kyis bka' stsal pa/ kun dga' bo mdo sde 'di snying rje chen po la 'jug pa zhes bya bar zung shig /chos thams cad kyi rang bzhin mnyam pa nyid rnam par spros pa zhes bya ba'i ting nge 'dzin zhes bya bar yang zung shig /kun dga' bos gsol pa/ bcom ldan 'das chos kyi rnam grangs 'di bdag gis bzung lags so/ /bcom ldan 'das kyis de skad ces bka' stsal pa dang / zla 'od gzhon nur gyur pa dang / tshe dang ldan pa kun dga' bo dang 'khor bzhi po dge slong dang / dge slong ma dang / dge bsnyen dang / dge bsnyen ma de dag dang / gnas gtsang ma'i ris kyi lha'i bu du ma dag dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do// //chos thams cad kyi rang bzhin mnyam pa nyid rnam par spros pa'i ting nge 'dzin ji snyed pa rdzogs so// //rgya gar gyi mkhan po shI len dra bo d+hi dang / zhu chen gyi lots+tsha ba ban de d+harma tA shI las bsgyur cing zhus te/ skad gsar chad kyis kyang bcos nas gtan la phab pa// //yang zhus kun/ / 50.179b [This is a blank page without image] |