rgya gar skad du/ Ar+ya lo ha tuN+Da nA ma d+hA ra NI/ bod skad du/ 'phags pa lcags mchu zhes bya ba'i gzungs/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das yul ma ga d+ha na rgyu zhing / a mra'i tshal du gshegs te byon nas/ a mra'i tshal du lus 'phags ri'i dbang po'i brag phug na bzhugs so/ /de nas lha'i dbang po brgya byin gyis/ bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te phyogs gcig tu 'dug go/ /phyogs gcig tu 'dug nas lha'i dbang po brgya byin gyis bcom ldan 'das la 'di skad ces gsol to/ /bcom ldan 'das lha ma yin rnams dang / mi rnams ni bstan pa la gnod pa bgyid pa ste/ bcom ldan 'das lha ma yin dang / 'khor du mi gtogs pa'i bstan pa la yun ring bar gnod pa'i phyir rgol ba'i dgra lags na/ de la bcom ldan 'das kyis zhi bas mi 'dul na bdag la drag pos 'dul ba'i chos bstan du 101.128b gsol/ theg pa'i chos dgra bsrung du gsol/ de skad ces gsol pa dang / bcom ldan 'das kyis lha'i dbang po brgya byin la 'di skad bka' stsal to/ /lha'i dbang po khyod kyis thams cad la mi 'jigs pa sbyin pa'i lcags mchu'i gzungs ma rungs pa 'joms pa/ don thams cad byed pa/ dam pa'i chos bsrung ba/ 'jigs pa thams cad rab tu zhi bar byed pa/ nad thams cad rab tu zhi bar byed pa/ dug thams cad 'jil ba/ mtshon thams cad rengs par byed pa/ theg pa'i chos dgra bsrun pa/ rkang med dang rkang gnyis dang / rkang bzhi thams cad rengs par byed pa/ rkang gnyis thams cad skrag du 'jug pa/ dgra thams cad phung bar byed pa/ lha ma yin dang / nam mkha' lding dang / sbyin byed ma'i bu dang / sha za dang / brjed byed dang / smyo byed dang / bram ze dang / srin po dang / 'byung po dang / ro langs dang bya'i gdon dang / srul po dang / nam gru dang / gnon po'i gdon dang / gnon po dang / brjed byed kyi gdon dang / lha'i gdon dang / klu'i gdon dang / gnod sbyin gyi gdon dang / dri za'i gdon dang / mi 'am ci'i gdon dang / log 'dren gyi gdon dang / ma mo'i gdon phung bar byed pa/ zas kyi rigs mi mthun pa za ba phung bar byed pa/ rims nad thams cad dang / rlung las gyur ba dang / mkhris pa las gyur pa dang / bad kan las gyur pa dang / 'dus pa las gyur ba dang / 'gro ba drag shul du spyod pa phung bar byed pa/ 'thab pa dang / brtsod pa dang / mtshang 'dru ba thams cad rab tu zhi bar byed pa lcags kyi mchu'i gzungs nam mkha'i lding drag po'i gzungs 'di zung shig /bstan pa la gnod pa skrag par byed pa/ char drag po dang / ser ba drag po 'bebs par byed pa'i gzungs brjod par bya'o/ /tad+ya thA/ e te me te/ pra me tri tra/ go le 101.129a bo le bos se/ mod de/ pa da te/ khA rad te/ kha ra Ne/ gA nA gA ne/ nA gA mu ga ne/ mo ne pra tI mo ne/ kA li pra kA li tsan+ta/ ma hA tsan+te/ pra ti tsan+te/ be go so na/ go nA mo hA/ pra mo hA/ ma hA mo TA/ pra mo TA/ na sha Ni/ pra nA shA nA d+hi pa ti/ balgA Ni/ pra balgA Ni/ ni d+ya Ni/ pA nid ThA ni/ kro d+ha ni/ pra di kro d+ha Ni/ ha na ha na/ bi ha na bi ha na/ sarba duSh+Ta bra duSh+TaM/ nA sha ya sarba a b+ha ya pra dai hU~M phaT/ sngags 'di brjod pa tsam gyis phyogs bcu kun du g.yos/ rab tu g.yos/ 'gul rab tu 'gul lo/ /gnod pa thams cad khas bub tu brgyal lo/ /ske tshe dang / yungs nag tu bsres la/ chu bo dang / rgya mtsho dang / ri bo la gtor ro/ /de phyin cad char 'bebs par byed do/ /yang chu bo dang / rgya mtsho dang / chu mig dang / rdzing bu/ lu ma/ 'bab chu/ gnyan dgur bu ram/ sbrang / shing mngar/ sha ka ra/ klu sman sna tshogs 'o ma la/ sngags la gtor ro/ /de'i phyir ser ba chen po 'bebs so/ /yid zlos bgyis te/ sprin la bltas la lha phyag bya zhing bzlas na ji ltar 'dod pa'i ser ba chen po 'bab par 'gyur ro/ /shes rab can gyis 'phags pa lcags kyi mchu'i gzungs 'di zung shig / chongs shig /brjod cig /gzhan la ma spel cig /sbos shig /thun mong du min no/ /rgya mtsho'i chu rdo bzhin mi mngon par sbos shig /gzhan gyis mi thub pa'i drag po'i gzungs 'dis 'thab pa'am/ rtsod pa'am/ 'gyed pa'am/ gang du 'gro yang rungs te/ thams cad du rgyal bar 'gyur ro/ /rgyal mtshan gyi rtse mo la byang bu gzugs so sngags pa rigs kyi bu'am/ rigs kyi bu mo gang dang gang gis yid rtse cig tu bya'o/ /dge slong pha dang / dge slong ma dang / dge tshul pha dang / dge tshul ma'am/ dge bsnyen pha'am/ 101.129b dge bsnyen ma gang yang rung bas bstan pa la gnod pa bsnyung ba'i phyir yid la zung shig /chongs shig de skad ces bcom ldan 'das kyis bka' stsal ba dang lha'i dbang po brgya byin dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa lcags mchu zhes bya ba'i gzungs rdzogs s+ho// // stag lung rgyud 'bum la gtug ste zhus dag / |