@#/ /'phags pa lag na rdo rje'i mtshan brgyad pa gsang sngags dang bcas pa/ sangs rgyas dang byang chub sems dpa' thams cad la phyag 'tshal lo/ /de nas byang chub sems dpa' sems dpa' chen po lag na rdo rje 'khor gyi nang nas langs te/ bcom ldan 'das gang na ba de logs su thal mo sbyar ba btud nas/ bcom ldan 'das la 'di skad ces gsol to/ /bcom ldan 'das sems can rnams kyi don gyi slad du rig pa mchog gi cho ga rgyas pa chen po gsang ba dang bcas pa/ gsang chen dang bcas pa bdag gis bshad lags kyis/ bcom ldan 'das rgyal po'i pho brang lcang lo can du mchis la sems can rnams gdul bar 'tshal lo/ /de skad ces gsol nas/ bcom ldan 'das kyis gsang ba'i bdag po lag na rdo rje la 'di skad ces bka' stsal to/ /lag na rdo rje gang khyod kyis rig pa mchog gi cho ga rgyas pa chen po 'di bshad pa ni/ khyod gtum pa yin bsten par dka' ba yin shin tu thub par dka' ba yin/ 'phags pa'i tshul med pa yin te/ lag na rdo rje khyod kyis rig pa mchog gi cho ga rgyas pa chen po bshad pa gang yin pa de dag thams cad ni gsang ba med par las mi byed do/ /lag na rdo rje de bas na rdo rje'i rigs 'di dang / rig pa mchog gi cho ga rgyas pa chen po 'di bde blag du 'grub par bya ba'i phyir khyod kyi ming brgyad pa gsang ba gsang sngags kyi 'khor dang bcas pa gang thos na 'tshams med pa lnga byed pa yang sdig pa 'byang bar 'gyur ba dang / lag na rdo rje khyod kyang mthong bar 'gyur ba dang / bgegs dang log 'dren thams cad kyang 'byer bar 'gyur ba dang / log 'dren bye ba khrag khrig brgya stong phrag brgyad bcu rtsa bzhi rnams kyang phyogs bcur 'byer bar 'gyur ba dang / gang thos na tshangs par ma spyad pa yang tshangs par spyad par 'gyur ba dang / thub par 101.64a ma byas pa yang thub par byas par 'gyur ba dang / basmyung bar ma byas pa yang basmyung ba byas par 'gyur ba dang / dge sbyong ma yin pa yang dge sbyong gi 'bras bu dang ldan par 'gyur ba dang / sangs rgyas dang byang chub sems dpa' thams cad kyang de la srung bar mdzad pa dang / las kyi dngos grub kyang stsol bar 'gyur ba bshad par bya'o/ /de nas bcom ldan 'das lag na rdo rjes bcom ldan 'das kyi zhabs gnyis la gtugs nas/ bcom ldan 'das la 'di skad ces gsol to/ /bcom ldan 'das bdag gi ming brgyad pa gsang ba gsang sngags kyi 'khor dang bcas pa rnams gang lags/ bcom ldan 'das kyis bka' stsal pa/ lag na rdo rje ngas bshad kyis nyon cig /'di lta ste/ khyod ni glang po che'i rna ba can yin/ khyod ni rgyan bzang po dang ldan pa yin/ khyod ni rnam par gnon pa yin/ khyod ni rin po che'i 'byung gnas yin/ khyod ni bden pa nyid yin/ khyod ni gzugs sdug pa'i rgyan dang ldan pa yin/ khyod ni 'bar ba'i me lce dang ldan pa yin/ khyod ni gzugs mdzes pa yin no/ /khyod kyi ming 'di dag mkhas pa dag gis thos na/ bskal pa bye ba khrag khrig brgya stong phrag bdun gyi bar du sems can dmyal bar skye bar mi 'gyur ro/ /sangs rgyas dang / byang chub sems dpa' thams cad kyang de 'chi ba'i dus kyi tshe mdun na bzhugs shing de dag de la chos ston par mdzad do/ /chos bstan pa des na de dag dga' ldan gyi lha rnams kyi nang du skye bar 'gyur te/ byang chub sems dpa' sems dpa' chen po rnams dang thabs cig tu gnas par 'gyur ro/ /na mo bud+d+ha s+ya/ na mo d+harma s+ya/ na maHsa~M g+ha s+ya/ na mo badzra pA Ni s+ya/ tad+ya thA/ aT+Te/ maT+Te/ kha raT+Te/ so me so mA su khi/ hi ri hi ri/ mi ri ki r-i/ b+hi ri bi sa ni sid+d+h+yan du/ sarba kA r+yA Ni/ sA d+ha ya man+t+ra pa da swA hA/ de nas byang chub sems dpa' 101.64b sems dpa' chen po lag na rdo rjes bcom ldan 'das la 'di skad ces gsol to/ /bcom ldan 'das legs so legs so/ /'di ltar gsang ba chen po bka' stsal pa gang lags pa de ni legs te/ bcom ldan 'das de de lags so/ /de de lags te/ bcom ldan 'das rig pa mchog sgrub pa ni bzlas brjod bgyid pa dang / sgrub pa'i tshe mchod pa bgyis la ming brgyad pa bklag par bgyi'o/ /bklags nas bdag bstod par 'gyur te/ dga' nas dngos grub stsal bar 'tshal lo/ /bgegs kyang 'byung bar mi 'gyur la/ lha rnams kyang dga' nas myur du dngos grub stsol bar bgyid do/ /nyal ba'i tshe bklags na rmi lam ngan pa mthong bar mi 'gyur/ sku gdung dang ldan pa'i mchod rten gyi drung du lan 'bum du bzlas brjod bgyis na sdig pa thams cad las grol bar 'gyur ro/ /mtshams med pa lnga bgyid pa yang bskal pa bzang por byang chub sems dpar 'gyur ro zhes bdag mchi'o/ /yang lan 'bum bzlas brjod bgyis na slob dpon du 'gyur ro/ /lag na rdo rje'i mtshan brgyad pa gsang sngags dang bcas pa rdzogs s+ho// ! // |