@#/ /rgya gar skad du/ Ar+ya a wa lo ki te shwa ra mA tA nA ma d+hA ra NI/ bod skad du/ 100.57a @#/ /'phags pa spyan ras gzigs dbang phyug gi yum zhes bya ba'i gzungs/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das grong khyer yangs pa can na/ 'khor chen pos yongs su bskor cing mdun gyis bltas te/ nyan thos chen po shA ri'i bu la sogs pa dge slong lnga brgya dang byams pa la sogs pa/ byang chub sems dpa' sems dpa' chen po rab tu mang pos yongs su bskor cing mdun gyis bltas nas/ bcom ldan 'das gdan bshams pa la bzhugs so/ /'khor der byang chub sems dpa' sems dpa' chen po kun tu bzang po zhes bya ba 'dus te 'dug par gyur pa rang gi stan las langs nas bla gos phrag pa gcig tu bzar nas pus mo g.yas pa'i lha nga sa la btsugs te/ bcom ldan 'das kyi zhabs la mgo bos phyag 'tshal nas/ bcom ldan 'das la 'di skad ces gsol to/ /bcom ldan 'das spyan ras gzigs dbang phyug gi ma zhes bgyi ba'i gzungs kyi rig sngags chen mo gsang sngags kyi gzhi/ 'das pa dang ma byon pa dang da ltar byung ba'i sangs rgyas bcom ldan 'das rnams kyis sngon gsungs shing da ltar gsung ba/ bcom ldan 'das byang chub sems dpar gyur te byang chub yongs su tshol ba na sems can thams cad rjes su bzung ba dang don dang byang chub sems dpa'i don gyi bar gyi phyir sngon gsungs pa/ byang chub sems dpa'i theg pa pa'i rigs kyi bu 'am rigs kyi bu mo rnams kyi phar gyur pa mar gyur pa skyabs ma mchis pa rnams kyi skyabs dang / dpung gnyen ma mchis pa rnams kyi dpung gnyen dang mgon ma mchis pa rnams kyi mgon du gyur pa sdig pa thams cad zad par bgyid pa mchis te gzungs de thos ma thag tu bsam pa thams cad yongs su rdzogs par 'gyur/ rig sngags thams cad kyang grub par 'gyur ro/ /bcom ldan 'das 100.57b kyis bka' stsal pa/ byang chub sems dpa' sems dpa' chen po nga sngon byang chub sems dpar gyur te byang chub yongs su tshol ba na 'jig rten gyi khams gang gA'i klung gi bye ma snyed kyi pha rol gyi yang ches pha rol na 'jig rten gyi khams bde ba can zhes bya ba de na de bzhin gshegs pa dgra bcom pa yang dag par rdzogs pa'i sangs rgyas 'od dpag tu med ces bya ba da ltar yang bzhugs te 'tsho zhing gzhes la chos kyang ston to/ /'khor de nyid na bram ze dbang phyug 'od ces bya ba byang chub sems dpa'i sa gsum pa thob par gyur pa zhig 'dus pa des spyan ras gzigs dbang phyug gi ma zhes bya ba'i gzungs/ rig sngags kyi rgyal mo chen mo 'di bram ze brgya stong mang po dang sems can bye ba khrag khrig phrag du ma la bsgrags bshad bstan te/ de dag thams cad kyis gzungs 'di thos ma thag tu sdig pa ltung bar byed pa thams cad las rnam par grol ba dang skye ba dran par gyur pa ngas dran no/ /byang chub sems dpa' chen po de smros shig /phyi ma'i dus na 'jig rten gyi khams kun nas nyon mongs pa can du sems can sdig pa byed pa mtshams med pa byed pa/ bye ba khrag khrig 'bum phrag du ma'i sdig pa zad par 'gyur/ phan pa dang bde bar 'gyur/ mgon med pa rnams kyi mgon du 'gyur ro/ /ngas kyang gnang zhing rjes su yi rang ngo / /bcom ldan 'das kyis bka' stsal pa/ de nas byang chub sems dpa' sems dpa' chen po kun tu bzang pos spyan ras gzigs dbang phyug gi ma zhes bya ba'i gzungs kyi rig sngags chen mo'i gsang sngags kyi gzhi 'di dag smras so/ /dkon mchog gsum la phyag 'tshal lo/ /bcom ldan 'das de bzhin gshegs pa 'od dpag med la phyag 'tshal lo/ /byang chub sems dpa' sems dpa' chen po snying rje chen po dang ldan pa 'phags pa spyan ras gzigs dbang phyug la phyag 'tshal lo/ /de dag la phyag 'tshal nas/ spyan ras gzigs dbang phyug gi yum zhes bya ba'i gzungs/ 100.58a rig sngags chen mo'i gsang sngags kyi gzhi 'di dag brjod par bya'o/ /bdag la rig pa 'di grub par gyur cig /tad+ya thA/ i li mi li/ tsi li mi li/ kun tu la/ kun du le/ tu le/ se re si si le/ bi si re/ bi rA yA gau ri/ gan+d+ha ri drA ma Te/ mA tang+gi/ puk+kA si/ kaSh+Ta ya/ mA tsaN+Da lI/ huT+Tu ma li ni/ hud D+hu D+hu ma li ni/ tsi le mi le/ gr-ih+Na sau mya dar sha ni/ ku ru tsaN+Da mu khe/ lA g+hu mA na yaM te/ Ar+ya dak+Shi Na b+hu dze sarba bid+yA nA ma/ pra sA d+ha ne/ sarba bid+yA na ma/ A shwa ri swA hA/ bklags pas 'grub pa'i gzungs 'di'i cho ga ni 'di yin te thos ma thag tu las kyi sgrib pa thams cad byang bar 'gyur ro/ /'jigs pa thams cad las bsrung ngo / /dus gsum du bzlas pa byas na zhag bdun gyis byang chub sems dpa' sems dpa' chen po kun tu bzang po mthong bar 'gyur ro/ /gzhan du mi sems pa'i yid kyis bzlas pa byas na/ zla ba gcig gis 'phags pa spyan ras gzigs dbang phyug gi ma rig pa chen mo bdag nyid ston te/ 'phags pa 'od dpag med kyang mthong ngo / /bla na med pa'i byang chub las phyir mi ldog par 'gyur ro/ /skye ba dran pa dang thos pa 'dzin par yang 'gyur ro/ /gang dang gang du skyes pa de dang der dam pa'i chos dang mi 'bral bar 'gyur ro/ /longs spyod chen por 'gyur ro/ /bcom ldan 'das kyis de skad ces bka' stsal nas/ byang chub sems dpa' sems dpa' chen po kun du bzang po dang / byang chub sems dpa' de dag dang / dge slong de dag dang / thams cad dang ldan pa'i 'khor de dag yi rangs te/ bcom ldan 'das kyis gsungs pa la mngon par bstod do/ /'phags pa spyan ras gzigs dbang phyug gi yum zhes bya ba'i gzungs rdzogs s+ho// //rgya gar gyi mkhan po dzi na mi tra dang / dA na shI la dang / zhu chen gyi lots+tsha ba ban de ye shes sdes bsgyur cing zhus te/ skad gsar bcad kyis kyang bcos te/ gtan la phab pa/ stag lung rgyud 'bum la gtug+sa nas zhus dag / // |