@#/ /rgya gar skad du/ Ar+ya a ba lo ki te shwa ra e ka da sha mu kha nA ma d+hA ra NI/ bod skad du/ 'phags pa spyan ras gzigs dbang phyug zhal bcu gcig pa zhes bya ba'i gzungs/ sangs rgyas dang byang chub sems dpa' thams cad la phyag 'tshal lo/ /de nas byang chub sems dpa' sems dpa' chen po spyan ras gzigs dbang phyug rig sngags 'chang du mas yongs su bskor te/ bcom ldan 'das ga la ba der song nas bcom ldan 'das kyi zhabs la mgo bos phyag 'tshal te/ bcom ltan 'das kyi zhabs la lan gsum bskor ba byas nas phyogs gcig tu 'dug ste/ bcom ldan 'das la 'di skad ces gsol to/ /bcom ldan 'das snying po gdong bcu gcig pa zhes bgyi ba 'di ni/ sangs rgyas bye ba phrag bcu gcig gis gsungs pa lags te/ de sems can thams cad la sman pa dang bro nad thams cad rab tu zhi bar bgyid pa dang sdig pa dang bkra mi shis pa dang / rmi lam ngan pa thams cad zlog par bgyid pa dang / dus ma lags par 'gum pa thams cad zlog par bgyid pa dang ma zhugs pa rnams dad par bgyi ba dang / bgegs dang log 'dren rnams rab tu zhi bar bgyi ba'i slad du bshad par bgyi'o/ /bcom ldan 'das snying po 'dis bsrung ba bgyis pa dang / yongs su bskyab pa dang / yongs su gzung ba bgyis pa dang / zhi ba dang bde legs su 'gyur ba bgyis pa dang chad pa spangs pa dang / mtshon cha spangs pa dang / dug gzhil ba bgyis pa dang / gang la la zhig 'gal ba bgyid pa de ma mchis te/ de ni 'jig rten 100.12b lha dang bcas pa/ bdud dang bcas pa/ tshangs pa dang bcas pa/ dge sbyong dang bram zer bcas pa na bdag gis ma mthong ste/ sngon gyi las kyi rnam par smin pa ni ma gtogs lags so/ /snying po 'di ni sangs rgyas bcom ldan 'das thams cad kyis bstod cing dgongs pa lags so/ /bcom ldan 'das bdag gi snying po 'di ni de bzhin gshegs pa thams cad kyis rjes su thugs rung bar mdzad pa lags so/ /bcom ldan 'das bdag gis dran lags te/ bskal pa gang gA'i klung gi bye ma snyed kyi snga rol na de bzhin gshegs pa pad ma brgya'i spyan gtsug gis chags pa'i dus 'joms pa'i 'od zer gyi rgyal po zhes bgyi ba byung ste/ bdag drang srong du gyur pas de bzhin gshegs pa de las 'di mnos lags te/ thos ma thag tu phyogs bcu'i de bzhin gshegs pa thams cad mngon du gyur/ mi skye ba'i chos la bzod pa yang thob ste/ de ltar bdag gi snying po 'di ni gces spras bgyid pa lags so/ /de ltar lags pas rigs kyi bu 'am rigs kyi bu mo dad pa dang ldan pas gus par bgyis la snying po 'di brjod par bya'o/ /gzhan yid la mi bgyid par rtag tu brjod par bgyi'o/ /nang par langs nas brgya rtsa brgyad bton na tshe 'di la yon tan bcu yongs su 'dzin par 'gyur te/ bcu gang zhe na/ bro nad ma mchis par 'gyur ba dang / de bzhin gshegs pa thams cad kyis yongs su gzung bar 'gyur ba dang / des bsgrim mi 'tshal bar nor dang 'bru dang dbyig rnams rnyed par 'gyur ba dang / dgra thams cad khugs shing thul bar 'gyur ba dang / rgyal po'i tshogs rnams gsong por smra bar sems par 'gyur ba dang / lus la dug gis mi tshugs pa dang / dbyig dug gis mi tshugs pa dang / rims kyis mi tshugs pa dang / mtshon gyis mi tshugs par 'gyur ba dang / chab kyis 'gum pa'i dus bgyid par mi 'gyur ba dang / 100.13a zhugs kyis 'gum pa'i dus bgyid par mi 'gyur ba dang / dus ma lags par 'gum pas 'gum pa'i dus bgyid par mi 'gyur ba lags so/ /gzhan yang yon tan bzhi yongs su 'dzin par 'gyur te/ 'gum pa'i dus kyi tshe de bzhin gshegs pa mthong bar 'gyur ba dang / ngan song rnams su skye bar mi 'gyur ba dang / ya nga ba ma spangs pas 'gum pa'i dus bgyid par mi 'gyur ba dang / 'di nas shi 'phos nas kyang 'jig rten gyi khams bde ba can du skye bar 'gyur ba lags so/ /bcom ldan 'das bdag gis dran lags te/ 'di nas bskal pa gang gA'i klung bcu'i bye ma snyed dag gi snga rol gyi yang ches snga rol na de bzhin gshegs pa man dA ra ba'i bsung zhes bgyi ba byung ste/ de na bdag khyim par gyur pas 'di gzung nas bskal pa bzhi khri'i 'khor ba phyir bsnyil lags so/ /bdag gis snying po 'di bton pas byang chub sems dpa'i rnam par thar pa/ rgyal ba thams cad kyi snying rje 'jug pa ye shes kyi snying po zhes bgyi ba thob lags so/ /gang dag bcing bas bcings pa rnams dang / gang dag bcing ba la thug pa rnams dang / chab dang / zhugs dang / sdug bsngal rnam pa sna tshogs kyis nyen pa'i sems can thams cad la bdag gi snying po 'dis gnas dang bskyab pa dang skyabs dang dpung gnyen bgyi'o/ /gnod sbyin dang / srin po sdang ba rnams kyang snying po 'dis bkug la byams pa'i sems dang snying rje'i sems su bgyi ste/ bla na med pa yang dag par rdzogs pa'i byang chub la dgod par bgyi'o/ /bcom ldan 'das bdag gi snying po 'di ni de ltar rdzu 'phrul che ba lags so/ /lan cig brjod pas rtsa ba'i ltung ba bzhi po dag kyang byang bar 'gyur/ mtshams ma mchis pa lnga po dag kyang ma lus par 'byang bar 'gyur na/ ji skad bshad pa bzhin du nan tan bgyid pa lta smos kyang ci 'tshal/ 100.13b de dag ni sangs rgyas bye ba khrag khrig 'bum phrag du ma la dge ba'i rtsa ba bskyed par 'gyur ba lags na/ bzlas brjod bgyid pa dang / sgrub pa lta smos kyang ci 'tshal te bsam pa thams cad yid bzhin du yongs su rdzogs par bgyi'o/ /su zhig bdag gi slad du tshes bcu bzhi'am bcwa lnga la smyung ba bgyis na/ de bskal pa bzhi khri'i 'khor ba bsnyil bar 'gyur ba lags so/ /bcom ldan 'das bdag gi ming 'dzin pa ni don mchis te sangs rgyas bye ba phrag 'bum gyi bas lhag lags so/ /bdag gi ming 'dzin pa'i sems can thams cad ni phyir mi ldog pa nyid la gnas par 'gyur/ bro nad thams cad las yongs su thar bar 'gyur/ sgrib pa thams cad dang / lus dang ngag dang yid kyi nyes par spyod pa thams cad las yongs su thar bar 'gyur ba lags so/ /gang la la zhig cho ga bzhin du sbyor ba bgyid na de dag gi sug par sangs rgyas kyi byang chub thob pa lags so/ /bcom ldan 'das kyis bka' stsal pa/ rigs kyi bu khyod sems can thams cad la de ltar snying rje che ba legs so legs so/ /rigs kyi bu thabs 'dis sems can thams cad bla na med pa yang dag par rdzogs pa'i byang chub la dgod par nus te/ ngas kyang snying po 'di gzung zhing rjes su yi rang ba byas kyis rigs kyi bu khyod smros shig /de nas byang chub sems dpa' sems dpa' chen po 'phags pa spyan ras gzigs dbang phyug stan las langs te bla gos phrag pa gcig tu gzar nas/ bcom ldan 'das kyi zhabs la mgo bos phyag 'tshal te snying po 'di smras so/ /na mo rat+na tra yA ya/ na ma Ar+ya dz+nyA na swa ga ra bai ro tsa na byu ha rA dzA ya/ ta thA ga tA ya/ na maHsarba ta thA ga te b+h+yaH /ar hata b+h+yaH samyak+sa m+bu b+h+yaH /na ma Ar+ya a ba lo ki te shwa rA ya/ bo d+hi satwA ya/ ma hA satwA ya/ ma hA kA ru Ni kA ya/ 100.14a tad+ya thA/ o~M d+ha ra d+ha ra/ d+hi ri d+hi ri/ d+hu ru d+hu ru/ iT+Te baT+Te/ tsa le tsa le/ pra tsa le pra tsa le/ ku su me/ ku su ma/ ba re/ i li mi li/ tsi ti dz+wa la ma pa na ya swA hA/ 'di yi cho ga ni bsgrub mi dgos par las thams cad byed de/ rims nyin gcig pa dang / nyin gnyis pa dang / nyin gsum pa dang / nyin bzhi pa dang / 'byung po dang / mkha' 'gro ma dang / 'dre dang lus srul po dang / brjed byed dang / lba ba dang / 'bras kyi phreng ba dang / bas lngags la sogs pa dang / dug dang / phol mig dang / g.yan pa la sogs pa la 'jim pa la bsngags te bsku'o/ /lan bdun bzlas brjod bgyis na las kyi sgrib pa sbyong bar bgyi'o/ /byis pa gdon gyis zin pa la ni 'bru mar ro/ /rna ba bro 'tshal ba la ni ru sta dang 'bru mar ro/ /rna ba bro 'tshal ba (zhes snar thang pa'i dpe ya )la blo la btags na des zhi bar 'gyur ro/ /bro nad thams cad la yang sbyar bar bgyis te bklags pas 'grub bo/ /'phags pa spyan ras gzigs dbang phyug gi zhal bcu gcig pa zhes bya ba'i gzungs rdzogs s+ho// //rgya gar gyi mkhan po shI len tra bo d+hi dang / zhu chen gyi lo ts+tsha ba ban de ye shes sdes bsgyur cing zhus te gtan la phab pa/ rdzogs s+ho/ /// | |