@#/ /rgya gar skad du/ Ar+ya dzam b+ha la nA ma aSh+Ta sha ta ka / bod skad du/ 'phags pa gnod 'dzin gyi mtshan brgya rtsa brgyad pa zhes bya ba/ 'phags pa gnod 'dzin la phyag 'tshalo/ /de nas gnod sbyin 'brog gnas po/ /gser dag gis ni legs par brgyan/ /rin chen gyis ni rab mdzes shing / /me ni shing du 'bar 'dra ba/ /lcang lo can du zhugs nas kyang / /gsang bdag rdo rje 'chang ba yi/ /zhabs gnyis la ni rab 'jus nas/ /shin du mnyaM bzhag dris pa ni/ /bcom ldan gnod 'dzin rgyal dbang po/ /gsang sngags tshogs ni kun gyi bdag /rig sngags 'chang rnams kun gyis mchod/ /lha dang lha min phyag byas pa/ /ma rungs 'dul la brtson pa po/ /byang chub sems dpa'i yon tan ldan/ /mgon po sems can kun don mdzad/ /sangs rgyas kun gyi gsang ba 'dzin/ /sems can rnaMs la phan 'dod pas/ /snying rjes non pa'i yid kyis su/ /yang dag rdzogs pa'i byang chub phyir/ /bdag gis kyang ni sems bskyed de/ /mi rnams nor ni nyung ba dang / /bsod nams chung zhing dbang chung ba/ /mthong nas sdug bsngal chen po yis/ /rab tu gzer to gsang ba'i bdag /de nas gnod 'dzin gyis smras nas/ /bcom ldan gsang ba gsang ba'i bdag /snying rjes non te smras pa ni/ /legs par nyon cig gsang ba pa/ /mgon po gnod 'dzin dpal dang ldan/ /sems can kun gyi don byed pa/ /dbul ba'i nyon mongs sel ba po/ /nor ro cog gi dbang phyug gi /mtshan brgya rtsa brgyad bsod nams ldan/ /dbul ba'i nyes sdig sel byed pa/ /gang gA'i bye ma'i grangs snyed kyis/ / 98.160a rgyal mchog rnams kyis sngon gsungs pa/ /'od zer brgya pa zhes pa yi/ /zhing na sangs rgyas nyi ma'i zhal/ /chos ston pa na bdag gis kyang / /de ni rung gis sngon thos te/ /dbul ba sel cing bsod nams ldan/ /de ni bdagi shes rab kyis/ /sems can kun don brtson pa po/ /khyod la legs par bstan par bya/ /khyod ni mnyam zhag rab tu nyon/ /'phags pa lha dang lha min bla/ /shes rab ldan zhing chos la gus/ /snying brtse'i bdag nyid bzod ldan brtan/ /dbang po zhi ba dbang po thul/ /dge bas sdig 'joms shes nyen can/ /des shing don kun sgrub pa po/ /mi gnod mi slu dpal dang ldan/ /mdzod bdag gzhan gyis mi thub pa/ /dkon mchog gsum gyi skyabs gcig pa/ /sangs rgyas kun gyis gzigs pa po/ /gter rnams skyong ba gzi brjid can/ /rtag sbyin nor ni 'phel byed pa/ /rin chen 'byung gnas skye bo 'dul/ /chu yi bdag po chu 'bebs pa/ /gnod sbyin chu spyod bdag nyid can/ /gter don nye bar ston pa po/ /gser gyi ri bo lhun po ste/ /dbul ba'i gdon las thar byed pa/ /dbang po nye dbang 'gro ba'i mgon/ /chu yi dbang po sprin mdog can/ /'jig rten mig dang 'jig rten bla/ /nyi ma zla ba ther zug pa/ /nor chen rgyal po chen po ste/ /lag na ne'u le rab gnas pa/ /gzhon nu seng ge tog can te/ /gnod sbyin chen po rdzu 'phrul che/ /tshig gi bdag po bzhin 'dzum pa/ /gsong por snyan par smra ba po/ /bram ze 'dod pa'i lcags kyu ste/ /che ba don grub grub pas mchod/ /rig sngags 'chang ba 'khor los sgyur/ /ku be ra dang mi la zhon/ /bum pa'i lto can mig yangs pa/ /lha yi dri ldan yid ltar mgyogs/ /khyab bdag bde 'byung nor bzangs sras/ /sems can rna~Ms ni skyong la dga'/ /'dod dgur bsgyur gzugs yid kyi lha/ /cod pan can de rigs dga' ba/ /g.yon phyogs cod pan lag na dbyug /lag pa brgya pa stobs po 98.160b che/ /sa brgyad dbang phyug lha yul pa/ /zla ba nya ba'i zhal mdog can/ /ded dpon tshogs kyi bdag po ste/ /gnas brtan tshong pa skal bzang ba/ /yid bzhin nor bu bum pa bzang / /dpag bsam ljon shing mi yi bdag /mchog don 'os pa gtso bo ste/ /mchog sbyin mi'u thung khyab 'jug pa/ /skyabs 'os bkra shis srung ba po/ /rin chen phreng bas rnam par brgyan/ /lha yi seng ge'i khri la bzhugs/ /byang chub sems dpa' dpal gyi bdag /rab du dar ba nor mi zad/ /seng ge'i rtsal gyi mthu rtsal can/ /ston pa 'jig rten gsum las rgyal/ /gtso bo tshong pa rigs kyi mchog /pad ma'i lte ba thub med rgyal/ /tshangs par spyod pa rgya mtsho che/ /gnod 'dzin bdag nyid che ba yi/ /ming brgya rtsa brgyad ngas bshad 'di/ /sdig pa thams cad 'joms byed cing / /dbul ba'i nyon mongs sel byed pa/ /'byor dang skal bzang skyed pa po/ /glang po rta nor 'phel byed pa/ /gza' dang rgyu skar rmi lam ngan/ /ltas ngan sel bar byed pa ste/ /nags saM gal te grong dang ni/ /dur khrod yang na ri yang rung / /mkhas pa gang na klog pa der/ /g.yul dang dgra ni nyam nga ba/ /sbrul dang me chu chom rkun sogs/ /stag dang dom dang 'jigs pa che/ /rgya mtsho bgrod dka' mi bzad las/ /mi ni rab tu zhi bar 'gyur/ /dbang po me dang chu lha dang / /gshin rje srin bdag rlung lha dang / /nor sbyin dpal ldan ku bai rA/ /nor bu bzang sras lnga rtsen dang / /rtsed mo can dang 'brog gnas dang / /lha dang gnod sbyin gzhan dag kyang / /g.yel ba med par nyin mtshan du/ /rab tu dga' bzhin srung bar byed/ /gang na ming 'di klog pa der/ /glang chen rta dang ba lang dang / /lo tog rnam pa sna tshogs dang / /'bras bu me tog rnams kyang 'phel/ /mi nad dang ni 'go ba'i nad/ /gnod pa kun las byung ba rnaMs/ /tha~Md du ni bde legs 'gyur/ /lhag par byis pa rnams la shis/ /de la yi dgas klu rnams dang / / 98.161a ma mo dang ni gdon drag dang / /mkha'agro ma dang mi 'am ci/ /srin po rnams kyang 'tshe mi byed/ /nad do cog las rnam par grol/ /de bzhin bde zhing nor dang ldan/ /bu dag dang ni tsha bo dang / /dpal dang gtong ba rnams kyis rgyas/ /rigs mchog rgyal ba 'byung ba dang / /longs spyod chen po'i nang du skye/ /tshe dang dpal dang ldan pa dang / /nad med rims dang bral bar 'gyur/ /tshe rabs kun du skye ba dran/ /lobs skyen thos pa 'dzin pa dang / /byang chub sems dpa'i yon tan ldan/ /skal ba bzang po nyid tu 'gyur/ /phyag 'tshal phyag 'tshal gnod sbyin rje/ /gsang bdag khyod la phyag 'tshal te/ /ma rungs 'dul la brtson pa po/ /lag na rdo rje khyod la 'dud/ /sems can dad la mnyes gshin pa/ /nor bzang sras kyi grags pa 'di/ /dbul ba'i nad ni zhi byed pa/ /rab tu bshad pa legs par gsungs/ /don kun grub pa gsang ba'i sngags/ /bdagis kyang ni 'dir dbul te/ /de ni legs par dran tsam gyis/ /mi ni dbul las grol 'gyur zhing / /gzhan gyis mi tshugs srung bar 'gyur/ /dgra rnams kyis kyang mi choms shing / /skal ba bzang dang skal dang ldan/ /lo brgya yang ni 'tsho bar 'gyur/ /lha yi glang po rin chen dang / /rgyal dang rgyal srid 'os rnams kyang / /nges par myur du thob 'gyur te/ /rgyal srid kyang ni the tshom med/ /na mo rat+na tra yA ya/ na mo ma Ni b+ha drA ya/ ma hA yak+Sha se nA pa ta ye/ o~M hri~M hri~M k+ShA dzrA~M hri~M hra~M/ de ba bya rad no+o ga ba ri sha na a ta b+ha ga de ba yak+Sha sa ma ya ma nu sma ra hrI hUM phaT swA hA/ 'phags pa gnod 'dzin gyi mtshan brgya rtsa brgyad pa rdzogs s+ho// // |