//rgya gar skad du/ Ar+yA ba lo ki te shwa ra s+ya nA ma aSh+Ta sha ta ka / 98.156a bod skad du/ / 'phags pa spyan ras gzigs dbang phyug gi mtshan brgya rtsa brgyad pa zhes bya ba/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das 'phags pa spyan ras gzigs dbang phyug gi gnas/ ri gru 'dzin gyi rtse mo me tog dri zhim po sna tshogs bkram pa/ 'dzam bu chu bo'i gser kha dog bzang po ltar snang ba/ rin po che sna tshogs sna ba'i sa phyogs na bzhugs te/ lha dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dang / mi dang / mi ma yin pa bye ba khrag khrig 'bum phrag du ma dag gis/ bcom ldan 'das la sti stang du byas/ bla mar byas/ ri mor byas te/ mchod cing rjed nas/ yongs su bskor cing mdun gyis bltas nas chos ston te/ tshangs par spyod pa/ thog mar dge ba/ bar du dge ba/ tha mar dge ba/ don bzang po/ tshig 'bru bzang po/ ma 'dres pa/ yongs su rdzogs pa/ yongs su byang ba yang dag par rab tu ston to/ /de nas tshangs pa la sogs pas 'phags pa spyan ras gzigs dbang phyug la bstod pa/ kye bcom ldan 'das/ dgongs pa mdzad pa/ mdzad rgyu mdzad pa/ khur bor ba/ bdag gi don rjes su brnyes pa/ srid par kun du sbyor ba yongs su bas ba/ yang dag pa'i mkhyen pas/ thugs shin du rnam par grol ba/ cang mkhyen pa/ glang po che chen po dang / sems can thams cad kyi dbang dam pa'i pha rol du byon pa/ ye shes kyi tshogs yongs su rdzogs pa/ srid pa'i dgon pa las rgal ba/ bzhan la sman pa/ thugs rje dang 'brel ba'i thugs mnga' ba/ skye dgu la mchog tu mnyes gshin pa/ bde ba rab tu stsol bar mdzad pa/ byams pas zhugs pa/ sems can mtha' yas pa sgrol ba la mkhas 98.156b pa/ bde bar gshegs pa'i sras po/ srid pa gsum gyi rtsa lag gcig pu/ 'dod chags mi mnga' ba/ zhe sdang mi mnga' ba/ gti mug mi mnga' ba/ dri ma gsum spangs pa/ rig pa gsum gyi pha rol du gshegs pa/ mngon par shes pa drug brnyes pa/ shing n+ya gro d+ha ltar chu zhing gab pa/ skyes bu chen po'i mtshan sum bcu rtsa gnyis mnga' ba/ dpe byad bzang po brgyad bcus brgyan pa/ lpags pa srab cing mdog ser ba/ sku ring rgyu bzang zhing dkar ba/ sku shing gi me tog sar pa dang / dmar ring lta bu'i dbu thor tshugs mnga' ba/ lcang lo 'khyil ba mang pos dbu khebs pa/ 'od dpag med kyis 'od zer btang ba/ 'bar ba'i 'od 'dom gang gis gser gyi ri bo ltar snyan par grags pa/ gzi brjid rgya che ba/ gzugs 'char ka'i ri lta bu gtsug tor mnga' ba/ nor bu rab tu 'bar ba/ mchod phyir thogs sku la se ral du thogs pa/ sa rab tu rnam par 'byed pa/ pha rol du phyin pa bcu'i zhabs dang ldan pa/ tshul khrims ma nyams pa/ tshul khrims ma zhig pa/ seng ge ltar thong ka phel ka che ba/ sku 'jam zhing mdzes pa/ gzigs pa dang gshegs thabs khyu chog gi dpang po 'dra ba/ mkhur ba g.yas su 'khyil pa/ dpral ba che zhing zla ba kham pa 'dra la thig le mnga' ba/ phyag pus mo slebs pa/ smin ma bar ma chad pa/ shangs mtho ba/ mgur bum pa'i mgrin pa 'dra ba/ phyag sor mo dang tshigs ring ba/ sen mo 'jam zhing zangs kyi mdog dang 'dra ba/ phyag dra bas 'brel pa/ phyag dang zhabs kyi mthil 'khor los brgyan pa/ ston ka'i pad ma 'dra ba/ sku 'jam zhing rgyal pa/ tshangs pa ltar dbyangs zab pa/ yid tu mchi ba sdug pa/ blta na sdug pa/ nyams dga' bar bgyid pa/ 'od pad ma 'dra ba/ pad ma las 'khrungs pa/ pad ma las byung ba/ pad ma'i 98.157a gdan la bzhugs pa/ phyag na pad ma mnga' ba/ phyag na ril ba spyi'u blugs bsnams pa/ ri dgas nags po'i lpags pa mnabs pa/ phyag mkhar bsnams pa/ bgrang ba'i nor bu bsnams pa/ gtsung ba stsangs pa/ gsong por gsung ba/ bdud rtsi'i char 'bebs pa/ yid bzhin gyi nor bu lta bu/ blta na sdug pa'i shing 'dra ba/ sems can thams cad mos par mdzad pa/ dga' bar mdzad pa/ sems can thams cad nye bar mtsho ba/ sangs rgyas kyi sprul pa/ bde bar gshegs pa'i cha byad mnga' ba/ bde bar gshegs pa'i ring bsrel 'dzin pa/ spu re re skyes pa/ sems can gyi snying po/ bsod nams mdzad pa/ dge ba mdzad pa/ nges par mdzad pa/ brtson 'grus 'bar ba/ 'khor ba las shin du gnas pa/ dam pa'i chos la rgyal tshab tu dbang bskur ba/ sgrol ma zhabs drung na gnas pa/ khro gnyer can bka' bzhin bgyid pa/ rgyal ba dang ldan pa/ tshul dang ldan pa/ dran pa dang ldan pa/ mthu rtsal che ba/ yon tan dang ldan pa/ byams pa dang ldan pa/ zhi ba dang ldan pa/ tshul khrims dang ldan pa/ skal pa dang ldan pa/ don dang ldan pa/ don rnams thugasu chud pa/ the rtsom rnams gcod pa/ chos rnams gsung ba/ 'jig rten rnams kyi ston pa/ zhal gyi dkyil 'khor yongs su rgyas pa/ sku rked pa'i phyogs rin po che thams cad kyis spras pa/ gser gyi mchod sdong lta bu/ sku nyi ma stong bas lhag par mdzes pa/ tshangs pa'i dbang po la sogs pas phyag bgyis pa lags so/ /gang la la zhig 'phags pa spyan ras gzigs dbang phyug gi mtshan brgya rtsa brgyad pas bstod pa sgrub pa byed pa de'i mtshams med pa lnga'i las kyi sgrib pa rnam par byang bar 'gyur ro/ /dkyil 'khor thams cad tu zhugs par 'gyur ro/ /de la gsang sngags thams cad grub par 'gyur ro/ /bskal pa bye ba 'bum phrag du mar ngan 'gror 'gro bar mi 'gyur ro/ / 98.157b mtshams med par 'jug par mi 'gyur ro/ /su zhig nang par langs nas 'dod tam/ klog gam/ kha ton byed na de'i lus la mdze dang / rkang shu dang / lud pa dang / mi bde ba mi 'byung zhing nad thams cad las thar bar 'gyur ro/ /tshe rabs so cog tu tshe rabs dran par 'gyur ro/ /lha'i bu dang 'dra bar 'gyur ro/ /'chi ba'i dus kyi tshe 'jig rten kyi khams bde ba can du skye bar 'gyur ro/ /tshe rabs so cog tu 'phags pa spyan ras gzigs dbang phyug dang mi 'bral bar 'gyur ro/ /rtag tu bzlas brjod byas na yid gzhungs par 'gyur/ dpa' bar 'gyur/ skad snyan par 'gyur/ skal ba bzang por 'gyur ro/ /bstan bcos thams cad la 'jigs pa med par 'gyur/ tshig btsun par 'gyur ro/ /bstod pa sgrub pa 'dis bstod pa byas na/ sangs rgyas bcom ldan 'das gang gA'i klung drug bcu rtsa gnyis snyed kyi bye ma snyed dag la mchod pa byas par 'gyur te/ rnam par smyin pa mtshung shing bye brag med par 'gyur ro/ /'phags pa spyan ras gzigs dbang phyug gi mtshan brgya rtsa brgyad pa rgyal ba thams cad kyi ring bsrel kyi za ma tog ces bya ba rdzogs s+ho// // |