// rgya gar skad du/ Ar+ya aR+sha pra sha ma ni sU tra/ bod skad du/ 'phags pa gzhang 'brum rab tu zhi bar byed pa'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na/ 'od ma'i tshal bya ka lan da ka gnas pa'i tshal na dge slong lnga brgya tsam gyi dge slong gi dge 'dun chen po dang thabs gcig tu bzhugs te/ de nas bcom ldan 'das bcwa lnga'i gso sbyong zla ba nya ba de nyid kyi tshe dge 'dun gyi mdun du gdan bshams pa la bzhugs so/ /de'i tshe dang ldan pa kun dga' bo bcom ldan 'das kyi snam logs na rnga yab thogs te/ bcom ldan 'das la g.yob cing 'dug par gyur to/ /de nas tshe dang ldan pa kun dga' bo bla gos phrag pa gcig tu gzar te/ pus mo g.yas pa'i lha nga sa la btsug nas/ bcom ldan 'das ga la ba de logs su thal mo sbyar ba btud de/ bcom ldan 'das la 'di skad ces gsol to/ /bcom ldan 'das rgyal po'i khab 'di na dge slong gzhang 'brum can mang po dag gzhang 'brum gyi bro nad kyis gzir te/ sdug bsngal mi bzad pa drag po mi bde ba yid du mi 'ong ba'i tshor ba myong bar gyur na/ btsun pa bcom ldan 'das de dag la bdag gis ji ltar bsgrub par bgyi/ de skad ces gsol pa dang / bcom ldan 'das 97.285a kyis tshe dang ldan pa kun dga' bo la 'di skad ces bka' stsal to/ /kun dga' bo khyod kyis gzhang 'brum sel ba'i mdo long shig /kun dga' bo gang la la zhig gzhang 'brum sel ba'i mdo ming dang / tshig dang / yi ge shes na de ji srid 'tsho ba'i bar du gzhang 'brum gyi nad kyis btab par mi 'gyur ro/ /tshe rabs bdun gyi bar du tshe rabs dran par 'gyur ro/ /tad+ya thA/ a lan te/ a ma le/ shwa li tsi ni ku she sam b+ha be swA hA/ kun dga' bo 'di lta ste/ byang phyogs na ri'i rgyal po gangs shes bya ba de na sa la'i shing rnam par rgyal byed ces bya ba de'i me tog gsum yod de/ gcig ni 'phel ba zhes bya/ gnyis pa ni 'jam pa zhes bya/ gsum pa ni skam ba zhes bya ste/ ji ltar de skam ba de bzhin du sems can rnams kyi rlung gi 'brum bu skams par gyur cig /mkhris pa'i 'brum bu skams par gyur cig /bad kan gyi 'brum bu skams par gyur cig /mi gtsang ba'i 'brum bu skams par gyur cig /khrag gi 'brum bu skams par gyur cig /'dus pa'i 'brum bu skams par gyur cig /de bzhin du bdag dang sems can thams cad kyi bad kan gyi 'brum bu skams par gyur cig /mi gtsang ba'i 'brum bu skams par gyur cig /khrag gi 'brum bu skams par gyur cig /'dus pa'i 'brum bu skams par gyur cig /sna'i 'brum bu skams par gyur cig /'phyang ba'i 'brum bu skams par gyur cig /tad+ya thA/ sha me sha mA ne/ sha me sha mA ne swA hA/ na bar ma gyur cig /rengs par ma gyur cig /sgra 'byung bar ma gyur cig /'dzag par ma gyur cig /sdug bsngal bar ma gyur cig /rab tu sdug bsngal bar ma gyur cig zag par ma gyur cig /rab tu zag par ma gyur cig /'di nyid du zad pa dang / yongs su zad pa dang / med par gyur cig /sa'i 'og tu song shig /na mo b+ha ga ba ti/ bud d+ha sa t+ya ba tI na~M/ sid d+h+yan tu man tra pa daiHswA hA/ bcoM ldan 'das kyis de skad ces bka' stsal nas/ tshe dang 97.285b ldan pa kun dga' bo yi rangs te/ bcom ldan 'das kyis gsungs pa la mngon par bstod do/ /de la cho ga ni 'di yin te/ bklags pas grub pa 'di srad bu dmar po la lan bdun bzlas pa byas la/ mdud pa bdun bor te mgul du gdags so/ /'phags pa gzhang 'brum rab tu zhi bar byed pa'i mdo rdzogs so// //rgya gar gyi mkhan po dzi na mi tra dang / dA na shI la dang / zhu chen gyi lots+tsha ba ban+de ye shes sdes bsgyur cing zhus te gtan la phab pa/ / |