@#/ /rgya gar skad du/ Ar+ya ga yA shIR+Sha na ma ma hA yA na sU tra/ bod skad du/ 'phags pa ga yA mgo'i ri zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa'i dus gcig na/ bcom ldan 'das mngon par rdzogs par sangs rgyas nas yun ring po ma lon par bcom ldan 'das ri ga yA na ga ya mgo'i mchod rten na/ dge slong stong du tshang ba'i dge slong gi dge 'dun chen po thams cad kyang sngon ral pa can du gyur pa/ bya ba byas pa/ byed pa byas pa/ khur bor ba/ bdag gi don rjes su thob pa/ srid pa kun du sbyor ba yongs su zad pa/ yang dag pa'i shes pas sems shin du rnam par grol ba/ sems kyi dbang thams cad kyi dam pa'i pha rol du son pa/ dgra bcom pa sha stag dang / byang chub sems dpa' sems dpa' chen po rab tu mang po dang thabs cig tu bzhugs te/ de nas bcom ldan 'das gcig pu dben par gshegs pa nang du yang dag bzhag nas chos kyi dbyings nyid la brtags te/ bdag gis byang chub ni thob/ bdag gis ye shes ni khong du chud/ bya ba ni byas/ bdag gis khur ni bor/ bdag gis 'khor ba'i 'brog dgon pa las ni rgal/ bdag gis ma rig pa ni bsal/ bdag gis rig pa ni sgrub/ bdag gis zug rngu ni phyung / bdag gi sred pa ni zad/ bdag gis chos kyi gru ni sbyar/ bdag gis chos kyi rnga ni brdungs/ bdag gis chos kyi dung ni bus/ bdag gis chos kyi rgyal mtshan ni bsgreng / bdag gis 'khor ba'i lugs ni bzlog /bdag gis chos kyi lugs ni bsnyad/ bdag gis lam ngan pa ni bcad/ bdag gis lam ni yang dag par bstan/ bdag gis zhing ngan pa dag ni rnam par bzlog /bdag gis bsod nams kyi zhing dag ni yang dag par bstan na/ 'di ltar bdag gis byang chub de ji ltar khong du chud pa dang / gang gis khong du chud pa dang / sus khong du chud par 'gyur ba'i chos de la nges par brtag par bya ste/ ci lus kyis khong du chud dam/ 'on te sems kyis khong du chud/ gal te lus kyis khong du chud du ni lus ni bems po/ g.yo ba med pa/ rtswa dang / shing dang / rtsig pa dang / bong ba dang / mig yor lta bu ste/ sems med pa/ 'byung ba chen po bzhi 44.307a las gyur pa/ pha ma'i mi gtsang ba las byung ba dang / mi rtag pa dang / rtag tu bsku ba dang / bkru ba dang / mnye dgos pa dang / 'jig pa dang / rnam par 'gyes pa dang / rnam par 'jig pa'i chos can no/ /sems ni sgyu ma dang mtshungs pa/ rten cing 'brel par 'byung ba/ gnas med pa/ mtshan nyid med pa/ dngos po med pa/ bla gab med pa'o/ /byang chub ni ming tsam tha snyad tsam ste/ sgra skad med pa/ dpyad du med pa/ grub pa med pa/ rgyu ba med pa/ 'jug pa med pa/ rnam par rig pa med pa/ gdags par bya ba ma yin pa/ 'ong ba dang 'gro ba las yang dag par 'das pa/ gdags pa las yang dag par 'das pa/ khams gsum pa las yang dag par 'das pa/ ma mthong ba/ ma thos pa/ bye brag ma phyed pa/ gzhi med pa/ dmigs pa med pa/ rgyu ba med pa/ spros pa med pa/ 'jug pa med pa/ brtag tu med pa/ dpag tu med pa/ bstan du med pa/ sgra med pa/ yi ge med pa/ tshig gi lam med pa'o/ /de ltar na su mngon par rdzogs par 'tshang rgya/ gang gis mngon par rdzogs par 'tshang rgya/ mngon par rdzogs par 'tshang rgya bar bya ba ni gang yin/ chos 'di dag thams cad ni ming tsam/ btags pa tsam/ brda tsam/ tha snyad tsam ste/ brtags pa/ yongs su brtags pa/ ma byung ba med pa/ rdzas ma yin pa/ rdzas med pa/ len pa med pa/ bstan du med pa/ mngon par chags pa med pa yin te/ de la ni mngon par rdzogs par 'tshang rgya ba su yang med/ cis mngon par rdzogs par 'tshang rgya ba yang med/ mngon par rdzogs par 'tshang rgya bar bya ba ci yang med/ rnam pa pa gang gis mngon par rdzogs par 'tshang rgya bar bya ba yang med de/ 'di la gang de ltar mngon par rdzogs par byang chub pa de'i phyir byang chub mngon par rdzogs par 'tshang rgya ba zhes bya ste/ de la byang chub ni 'gyur ba med pa/ mi 'gyur ba/ mtshan nyid med pa'o snyam mo/ /de nas bcom ldan 'das la 'jam dpal gzhon nur gyur pas 'di skad ces gsol to/ /bcom ldan 'das gal te byang chub kyi mtshan nyid de lta bu lags na/ bcom ldan 'das rigs 44.307b kyi bu'am/ rigs kyi bu mos ji ltar byang chub kyi slad du 'jug par bgyi/ bcom ldan 'das kyis bka' stsal pa/ 'jam dpal byang chub de ji lta ba de bzhin du byang chub sems dpas byang chub kyi phyir 'jug par bya'o/ /'jam dpal gyis gsol pa/ bcom ldan 'das byang chub ji ltar rab tu 'tshal bar 'gyur/ bcom ldan 'das kyis bka' stsal pa/ 'jam dpal byang chub ni khams gsum pa las yang dag par 'das pa/ tha snyad las yang dag par 'das pa/ yi ge'i sgra skad las yang dag par 'das pa/ sgra las yang dag par 'das pa/ 'jug pa med pa/ gzod ma nyid nas 'jug pa med pa'o/ /'jam dpal de lta bas na/ byang chub sems dpa' 'jug pa la yang dag par 'das pa rnams kyis byang chub kyi phyir 'jug par bya'o/ /'jam dpal 'jug pa med pa'i 'jug pa ni byang chub la 'jug pa'o/ /'jam dpal dngos po med pa la 'jug pa ni byang chub la 'jug pa'o/ /'jam dpal bla gab med pa la 'jug pa ni byang chub la 'jug pa'o/ /'jam dpal chos kyi dbyings kyi rang bzhin la 'jug pa ni byang chub la 'jug pa'o/ /'jam dpal chos thams cad la mngon par zhen pa med pa la 'jug pa ni byang chub la 'jug pa'o/ /'jam dpal yang dag pa'i mtha' dbyer med pa la 'jug pa ni byang chub la 'jug pa'o/ /'jam dpal dor ba med pa dang / gzhag pa med pa la 'jug pa ni byang chub la 'jug pa'o/ /'jam dpal tha dad pa ma yin pa dang / tha dad pa med pa la 'jug pa ni byang chub la 'jug pa'o/ /'jam dpal so so yang dag par rig pa'i mig yor dang / brag ca dang / nam mkha' dang / chu zla dang / smig rgyu la 'jug pa ni byang chub la 'jug pa'o/ /de nas lha'i bu zla ba dri ma med pa'i gzi brjid 'od zer gyi 'od kyis 'jam dpal gzhon nur gyur pa la 'di skad ces smras so/ /'jam dpal byang chub sems dpa' rnams kyi spyod pa rtsom pa ni ci/ gnas ni gang / 'jam dpal gyis smras pa/ lha'i bu byang chub sems dpa' rnams kyi spyod pa'i rtsom pa ni 44.308a snying rje chen po'o/ /gnas ni sems can no/ /smras pa/ 'jam dpal byang chub sems dpa' rnams kyi snying rje chen po cis bsdus/ 'jam dpal gyis smras pa/ lha'i bu byang chub sems dpa' rnams kyi snying rje chen po ni g.yo med pas bsdus so/ /smras pa/ 'jam dpal g.yo med pa cis bsdus/ 'jam dpal gyis smras pa/ lha'i bu byang chub sems dpa' rnams kyi g.yo med pa ni sems can thams cad la snyoms pa'i sems kyis bsdus pa'o/ /smras pa/ 'jam dpal sems can thams cad la snyoms pa'i sems cis bsdus/ 'jam dpal gyis smras pa/ lha'i bu byang chub sems dpa' rnams kyi sems can thams cad la snyoms pa'i sems ni tha dad pa ma yin pa dang / tha dad pa med pa'i spyod pas bsdus so/ /smras pa/ 'jam dpal tha dad pa ma yin pa dang / tha dad pa med pa'i spyod pa cis bsdus/ 'jam dpal gyis smras pa/ lha'i bu byang chub sems dpa' rnams kyi tha dad pa ma yin pa dang / tha dad pa med pa'i spyod pa ni bsam pa dang / lhag pa'i bsam pas bsdus pa'o/ /smras pa/ 'jam dpal bsam pa dang / lhag pa'i bsam pa ci'i phyir byung / smras pa/ lha'i bu byang chub sems dpa' rnams kyi bsam pa dang lhag pa'i bsam pa ni byang chub kyi sems kyi phyir byung ngo / /smras pa/ 'jam dpal byang chub kyi sems ci'i phyir byung / smras pa/ lha'i bu byang chub sems dpa' rnams kyi byang chub kyi sems ni pha rol tu phyin pa drug gi phyir byung ngo / /smras pa/ 'jam dpal pha rol tu phyin pa drug ci'i phyir byung / smras pa/ lha'i bu byang chub sems dpa' rnams kyi pha rol tu phyin pa drug po dag ni thabs dang shes rab gnyis kyi phyir byung ngo / /smras pa/ 'jam dpal thabs dang shes rab ci'i phyir byung / smras pa/ lha'i bu byang chub sems dpa' rnams kyi thabs dang shes rab ni bag yod pa'i phyir byung ngo / /smras pa/ 'jam dpal bag yod pa ci'i phyir 44.308b byung / smras pa/ lha'i bu byang chub sems dpa' rnams kyi bag yod pa ni legs par spyod pa rnam pa gsum gyi phyir byung ngo / /smras pa/ 'jam dpal legs par spyod pa rnam pa gsum ci'i phyir byung / smras pa/ lha'i bu byang chub sems dpa' rnams kyi legs par spyod pa rnam pa gsum ni dge ba bcu'i las kyi lam gyi phyir byung ngo / /smras pa/ 'jam dpal dge ba bcu'i las kyi lam dag ci'i phyir byung / smras pa/ lha'i bu byang chub sems dpa' rnams kyi dge ba bcu'i las kyi lam dag ni sdom pa'i phyir byung ngo / /smras pa/ 'jam dpal sdom pa ci'i phyir byung / smras pa/ lha'i bu byang chub sems dpa' rnams kyi sdom pa ni tshul bzhin yid la bya ba'i phyir byung ngo / /smras pa/ 'jam dpal tshul bzhin yid la bya ba ci'i phyir byung / smras pa/ lha'i bu byang chub sems dpa' rnams kyi tshul bzhin yid la bya ba ni so sor rtog pa'i phyir byung ngo / /smras pa/ 'jam dpal so sor rtog pa ci'i phyir byung / smras pa/ lha'i bu byang chub sems dpa' rnams kyi so sor rtog pa ni dran pa'i phyir byung ngo / /smras pa/ 'jam dpal byang chub sems dpa' rnams kyi sems bskyed pa dag rgyur bsdu ba dang / 'bras bur bsdu bar 'gyur ba du/ 'jam dpal gyis smras pa/ lha'i bu byang chub sems dpa' rnams kyi sems bskyed pa dag rgyur bsdu ba dang / 'bras bur bsdu bar 'gyur ba ni bzhi po 'di dag ste/ bzhi gang zhe na/ dang po sems bskyed pa dang / spyod pa dang 'brel pa dang / phyir mi ldog pa dang / skye ba gcig gis thogs pa'o/ /de la dang po sems bskyed pa ni spyod pa dang 'brel pa'i rgyur blta'o/ /spyod pa dang 'brel pa ni phyir mi ldog pa'i rgyur blta'o/ /phyir mi ldog pa ni skye ba gcig gis thogs pa'i rgyur blta'o/ /skye ba gcig gis thogs pa ni 'bras bu dang 'brel pa'i rgyur blta'o/ /lha'i bu gzhan yang dper na sa bon btab pa de lta bur ni dang po sems bskyed pa blta'o/ /dper na sa bon las myu gu mngon par 'grub pa de lta bur ni spyod pa dang 'brel pa'i sems bskyed pa 44.309a blta'o/ /dper na sdong bu dang / 'dab ma dang / me tog dang / 'bras bu 'byung ba de lta bur phyir mi ldog pa'i sems bskyed pa blta'o/ /dper na 'bras bu yongs su smin pa de lta bur ni skye ba gcig gis thogs pa'i sems bskyed pa blta'o/ /lha'i bu gzhan yang dper na shing rta mkhan shing bsdu ba shes pa de lta bur ni dang po sems bskyed pa blta'o/ /dper na shing rta'i yan lag yongs su sbyang ba shes pa de lta bur ni spyod pa dang 'brel pa'i sems bskyed pa blta'o/ /dper na shing rta yan lag sbyor ba shes pa de lta bur ni phyir mi ldog pa'i sems bskyed pa blta'o/ /dper na khal dgal ba shes pa de lta bur ni skye ba gcig gis thogs pa'i sems bskyed pa blta'o/ /lha'i bu gzhan yang zla ba tshes pa'i dkyil 'khor mngon par 'grub pa de lta bur ni dang po sems bskyed pa blta'o/ /dper na tshes lnga dang / drug dang / bdun gyi nub mo zla ba'i dkyil 'khor shar ba de lta bur ni spyod pa dang 'brel pa'i sems bskyed pa blta'o/ /dper na tshes bcu'i nub mo zla ba'i dkyil 'khor shar ba de lta bur ni phyir mi ldog pa'i sems bskyed pa blta'o/ /dper na tshes bcu bzhi'i nub mo zla ba'i dkyil 'khor shar ba de lta bur ni skye ba gcig gis thogs pa'i sems bskyed pa blta'o/ /dper na tshes bcwa lnga'i nub mo zla ba'i dkyil 'khor shar ba de lta bur ni de bzhin gshegs pa'i ye shes blta'o/ /lha'i bu gzhan yang sems bskyed pa dang po ni nyan thos kyi sa las yang dag par 'da'o/ /sems bskyed pa gnyis pa ni rang sangs rgyas kyi sa las yang dag par 'da'o/ /sems bskyed pa gsum pa ni ma nges pa'i sa las yang dag par 'da'o/ /sems bskyed pa bzhi pa ni nges pa'i phung po la gnas so/ /lha'i bu gzhan yang dang po sems bskyed pa ni yi ge'i phyi mo 'dzin pa'i tshul du blta'o/ /dper na rnam par dbye ba rab tu rnam par 'byed pa shes pa de lta bur ni spyod pa dang 'brel pa'i sems bskyed pa blta'o/ /dper na grangs dang / rtsis dang / shod dgod pa de lta bur ni phyir mi ldog pa'i sems bskyed pa blta'o/ /dper na bstan bcos rnams khong du chud pa de lta bur ni skye ba 44.309b gcig gis thogs pa'i sems bskyed pa blta'o/ /lha'i bu gzhan yang sems bskyed pa dang po ni rgyur 'brel pa'o/ /sems bskyed pa gnyis pa ni ye shes dang 'brel pa'o/ /sems bskyed pa gsum pa ni spong ba dang 'brel pa'o/ /sems bskyed pa bzhi pa ni 'bras bu dang 'brel pa'o/ /lha'i bu gzhan yang sems bskyed pa dang po ni rgyus bsdus pa'o/ /sems bskyed pa gnyis pa ni ye shes kyis bsdus pa'o/ /sems bskyed pa gsum pa ni spong bas bsdus pa'o/ /sems bskyed pa bzhi pa ni 'bras bus bsdus pa'o/ /lha'i bu gzhan yang sems bskyed pa dang po ni rgyu las yang dag par byung ba'o/ /sems bskyed pa gnyis pa ni ye shes las yang dag par byung ba'o/ /sems bskyed pa gsum pa ni spong ba las yang dag par byung ba'o/ /sems bskyed pa bzhi pa ni 'bras bu las yang dag par byung ba'o/ /lha'i bu gzhan yang sems bskyed pa dang po ni rgyu rab tu dbye ba'i yan lag go/ /sems bskyed pa gnyis pa ni ye shes rab tu dbye ba'i yan lag go/ /sems bskyed pa gsum pa ni spong ba rab tu dbye ba'i yan lag go/ /sems bskyed pa bzhi pa ni 'bras bu rab tu dbye ba'i yan lag go/ /lha'i bu gzhan yang sems bskyed pa dang po ni sman bsdu ba'i tshul du blta'o/ /sems bskyed pa gnyis pa ni sman rab tu dbye ba la mkhas pa'i tshul du blta'o/ /sems bskyed pa gsum pa ni sman sbyor ba la mkhas pa'i tshul du blta'o/ /sems bskyed pa bzhi pa ni nad pa gso ba la mkhas pa'i tshul du blta'o/ /lha'i bu gzhan yang sems bskyed pa dang po ni chos kyi rgyal po'i rigs kyi rgyud du 'byung ba'i tshul du blta'o/ /sems bskyed pa gnyis pa ni chos kyi rgyal po'i rigs kyi rgyud kyi bslab pa yang dag par 'dzin pa'i tshul du blta'o/ /sems bskyed pa gsum pa ni chos kyi rgyal po'i rigs kyi rgyud kyi bslab pa tshar phyin pa'i tshul du blta'o/ /sems bskyed pa bzhi pa ni chos kyi rgyal po'i rigs kyi rgyud kyi bslab pa la dbang sgyur ba'i tshul du blta'o/ /de nas lha'i bu 'od rnam par nges pa'i 'od zer gyi 'od kyis 'jam dpal gzhon nur gyur pa la 'di skad ces smras so/ /'jam dpal 44.310a byang chub sems dpa' rnams lam gang dang ldan na myur du bla na med pa yang dag par rdzogs pa'i byang chub mngon par rdzogs par 'tshang rgya ba'i byang chub sems dpa' rnams kyi lam mdor bsdus pa gang / 'jam dpal gyis smras pa/ lha'i bu byang chub sems dpa' rnams kyi lam ni mdor bsdus na 'di gnyis te/ byang chub sems dpa' dag lam 'di gnyis dang ldan na myur du bla na med pa yang dag par rdzogs pa'i byang chub mngon par rdzogs par 'tshang rgya'o/ /gnyis gang zhe na 'di lta ste/ thabs dang / shes rab bo/ /de la thabs ni bsdu ba shes pa'o/ /shes rab ni yongs su gcod pa shes pa'o/ /thabs ni sems can la blta ba'o/ /shes rab ni chos thams cad la mi lta ba'o/ /thabs ni chos la sbyor ba shes pa'o/ /shes rab ni bral ba shes pa'o/ /thabs ni rgyu la dmigs pa shes pa'o/ /shes rab ni rgyu zad par 'gro ba'o/ /thabs ni chos tha dad pa shes pa'o/ /shes rab ni chos kyi dbyings dbyer med pa shes pa'o/ /thabs ni sangs rgyas kyi zhing gi rgyan shes pa'o/ /shes rab ni sangs rgyas kyi zhing mnyam pa nyid dbyer med par shes pa'o/ /thabs ni sems can gyi dbang po dang spyod pa la 'jug pa shes pa'o/ /shes rab ni sems can dmigs su med par shes pa'o/ /thabs ni byang chub kyi rgyan thob par byed pa shes pa'o/ /shes rab ni sangs rgyas kyi chos thams cad mngon par rdzogs par byang chub pa shes pa'o/ /lha'i bu gzhan yang mdor bsdus pa'i lam gnyis te/ gnyis gang zhe na/ tshogs kyi lam dang / yongs su gcod pa'i lam mo/ /de la tshogs kyi lam ni pha rol tu phyin pa lnga po dag go/ /yongs su gcod pa'i lam ni shes rab kyi pha rol tu phyin pa'o/ /gzhan yang mdor bsdus pa'i lam gnyis te/ gnyis gang zhe na/ chags pa dang bcas pa'i lam dang / chags pa med pa'i lam mo/ /de la chags pa dang bcas pa'i lam ni pha rol tu phyin pa lnga po dag go/ /chags pa med pa'i lam ni shes rab kyi pha rol tu phyin pa'o/ /gzhan yang mdor bsdus pa'i lam gnyis te/ gnyis gang zhe na/ zag pa dang bcas 44.310b pa'i lam dang / zag pa med pa'i lam mo/ /de la zag pa dang bcas pa'i lam ni pha rol tu phyin pa lnga po dag go/ /zag pa med pa'i lam ni shes rab kyi pha rol tu phyin pa'o/ /gzhan yang mdor bsdus pa'i lam gnyis te/ gnyis gang zhe na/ tshad yod par byas pa'i lam dang / tshad med par byas pa'i lam mo/ /de la tshad yod par byas pa'i lam ni mtshan ma'i gnas so/ /tshad med par byas pa'i lam ni mtshan ma med pa'i gnas so/ /gzhan yang mdor bsdus pa'i lam gnyis te/ gnyis gang zhe na/ shes pa'i lam dang / spong ba'i lam mo/ /de la shes pa'i lam ni sa dang po nas bzung ste sa bdun pa'i bar du'o/ /spong ba'i lam ni sa brgyad pa nas bzung ste sa bcu pa'i bar du'o/ /de nas byang chub sems dpa' sems dpa' chen po ye shes sgrub pa dpa' bos 'jam dpal gzhon nur gyur pa la 'di skad ces smras so/ /'jam dpal byang chub sems dpa' sems dpa' chen po ji ltar na don gyis rab tu phye ba yin/ ji ltar na ye shes kyis rab tu phye ba yin/ 'jam dpal gyis smras pa/ rigs kyi bu don ni ldan pa med pa'o/ /ye shes ni ldan pa'o/ /smras pa/ 'jam dpal ci'i phyir don ni ldan pa med la ye shes ni ldan pa yin/ 'jam dpal gyis smras pa/ rigs kyi bu don ni 'dus ma byas pa ste/ chos gang dang yang ldan pa'am mi ldan pa ma yin par khong du chud par bya'o/ /de ci'i phyir zhe na/ don ni 'gyur ba med pa'i mtshan nyid yin te/ de ni chos gang dang yang ldan pa'am/ mi ldan pa ma yin par khong du chud par bya'o/ /don ni gzod ma nas yongs su grub pa med pa'i phyir chos gang dang yang ldan pa'am mi ldan pa ma yin par khong du chud par bya'o/ /don ni dor ba med pa dang gzhag pa med pa'i phyir chos gang dang yang ldan pa'am mi ldan pa ma yin par khong du chud par bya'o/ /ye shes zhes bya ba ni lam ste/ lam ni sems dang yang dag par ldan pa yin gyi mi ldan pa ma yin te/ rigs kyi bu de'i phyir ye shes ni ldan pa zhes bya ste/ mi ldan pa ma yin no/ /ye shes ni spong ba dang yang dag 44.311a par ldan pa yin gyi mi ldan pa ma yin te/ rigs kyi bu de'i phyir ye shes ni ldan pa zhes bya ste/ mi ldan pa ma yin no/ /ye shes zhes bya ba ni phung po la mkhas pa dang / khams la mkhas pa dang / skye mched la mkhas pa dang / rten cing 'brel par 'byung ba la mkhas pa dang / gnas dang gnas ma yin pa rnam par dpyad pa la mkhas pa ste/ rigs kyi bu de'i phyir ye shes ni ldan pa zhes bya ste/ /mi ldan pa ma yin no/ /rigs kyi bu gzhan yang byang chub sems dpa' sems dpa' chen po rnams kyi shes pa rnam pa bcu ste/ rnam pa bcu gang zhe na/ 'di lta ste/ rgyu shes pa dang / 'bras bu shes pa dang / don shes pa dang / thabs shes pa dang / shes rab shes pa dang / bsdu ba shes pa dang / pha rol tu phyin pa shes pa dang / snying rje chen po shes pa dang / sems can yongs su smin par bya ba shes pa dang / chos thams cad la mngon par zhen pa med par shes pa ste/ rigs kyi bu rnam pa de bcu ni byang chub sems dpa' sems dpa' chen po rnams kyi shes pa'o/ /rigs kyi bu gzhan yang byang chub sems dpa' sems dpa' chen po rnams kyi rtsom pa rnam pa bcu ste/ rnam pa bcu gang zhe na/ 'di lta ste/ sems can thams cad kyi lus kyi las yongs su sbyang ba'i phyir lus kyi rtsom pa dang / sems can thams cad kyi ngag gi las yongs su sbyang ba'i phyir ngag gi rtsom pa dang / sems can thams cad kyi yid kyi las yongs su sbyang ba'i phyir sems kyi rtsom pa dang / sems can thams cad la mngon par zhen pa med par bya ba'i phyir nang gi rtsom pa dang / sems can thams cad la mtshungs par sbyar bar bya ba'i phyir phyi'i rtsom pa dang / sangs rgyas kyi ye shes yongs su rdzogs par bya ba'i phyir ye shes kyi rtsom pa dang / sangs rgyas kyi zhing thams cad kyi yon tan bkod pa kun du bstan pa'i phyir zhing gi rtsom pa dang / nyon mongs pa'i nad kyi sman yongs su shes par bya ba'i phyir sems can yongs su smyin par bya ba'i rtsom pa dang / nges pa'i phung po yongs su 44.311b rdzogs par bya ba'i phyir de kho na'i rtsom pa dang / khams gsum pa thams cad la sems mngon par zhen pa med par bya ba'i phyir 'dus ma byas kyi ye shes yongs su rdzogs par bya ba'i rtsom pa ste/ rigs kyi bu rnam pa 'di bcu ni byang chub sems dpa' sems dpa' chen po rnams kyi rtsom pa'o/ /rigs kyi bu gzhan yang byang chub sems dpa' sems dpa' chen po rnams kyi sbyor ba bcu ste/ bcu gang zhe na/ 'di lta ste/ pha rol tu phyin pa'i sbyor ba dang / bsdu ba'i dngos po'i sbyor ba dang / shes rab kyi sbyor ba dang / thabs kyi sbyor ba dang / snying rje chen po'i sbyor ba dang / bsod nams kyi tshogs yongs su tshol ba'i sbyor ba dang / ye shes kyi tshogs yongs su tshol ba'i sbyor ba dang / bsam pa rnam par sbyong ba'i sbyor ba dang / bden pa rnam par dpyad pa'i sbyor ba dang / sdug pa dang mi sdug pa thams cad la mngon par zhen pa med pa'i sbyor ba ste/ /rigs kyi bu bcu po de dag ni byang chub sems dpa' sems dpa' chen po rnams kyi sbyor ba'o/ /rigs kyi bu gzhan yang byang chub sems dpa' sems dpa' chen po rnams kyi mi zad pa la rtog pa bcu ste/ bcu gang zhe na/ 'di lta ste/ lus mi zad pa la rtog pa dang / dngos po mi zad pa la rtog pa dang / chos mi zad pa la rtog pa dang / sred pa mi zad pa la rtog pa dang / lta ba mi zad pa la rtog pa dang / tshogs mi zad pa la rtog pa dang / nye bar len pa mi zad pa la rtog pa dang / mngon par zhen pa med pa mi zad pa la rtog pa dang / 'du ba mi zad pa la rtog pa dang / byang chub kyi snying po shes pa mi zad pa la rtog pa ste/ rigs kyi bu bcu po de dag ni byang chub sems dpa' sems dpa' chen po rnams kyi mi zad pa la rtog pa'o/ /rigs kyi bu gzhan yang bcu po 'di dag ni byang chub sems dpa' sems dpa' chen po rnams kyi 'dul ba'i dngos po ste/ bcu gang zhe na/ 'di lta ste/ gtong ba'i char rab tu 'bebs pas ser sna'i sems 'dul ba nyid dang / las rnam gsum yongs su sbyong bas 'chal 44.312a pa'i tshul khrims kyi sems 'dul ba nyid dang / byams pa sgom pas khong khro ba'i sems 'dul ba nyid dang / sangs rgyas kyi chos yongs su btsal ba la mi skyo bas le lo'i sems 'dul ba nyid dang / bsam gtan dang rnam par thar par rnam par 'phrul pas mi dge ba'i sems 'dul ba nyid dang / shes rab kyi pha rol tu phyin pas gtan la 'bebs pa la mkhas pa'i tshogs stsogs pas mi shes pa'i sems 'dul ba nyid dang / lam gyi tshogs bskyed pas nyon mongs pa 'dul ba nyid dang / phyin ci ma log pa'i lam bskyed pas bden pa'i tshogs stsogs pas 'dul ba nyid dang / dus dang dus ma yin par dbang sgyur bas sems 'dul ba nyid dang / bdag med pa'i chos la rtogs pas bdag 'dul ba nyid de/ rigs kyi bu bcu po de dag ni byang chub sems dpa' sems dpa' chen po rnams kyi 'dul ba'i dngos po'o/ /rigs kyi bu gzhan yang bcu po 'di dag ni byang chub sems dpa' sems dpa' chen po rnams kyi dul ba'i sa te/ bcu gang zhe na/ 'di lta ste/ lus kyi las mi dge ba rnam pa gsum yongs su spong bas lus dul ba nyid dang / ngag gi las rnam pa bzhi yongs su spong bas ngag dul ba nyid dang / yid kyi nyes par spyod pa rnam pa gsum yongs su spong bas sems dul ba nyid dang / rang gi lus la mngon par zhen pa med pa'i tshul gyis nang dul ba nyid dang / chos thams cad la mngon par zhen pa med pa'i tshul gyis phyi rol gyi yul dul ba nyid dang / lam la mngon par zhen pa med pa'i tshul gyis ye shes kyi tshogs la mngon par zhen pa med pa dul ba nyid dang / 'phags pa'i sa'i ngo bo nyid la rtog pa'i tshul gyis bdag la stod pa dul ba nyid dang / shes rab kyi pha rol tu phyin pa la gnas pa'i tshul gyis phyi ma'i mtha' rnam par dag pa yongs su sbyong ba dul ba nyid dang / sems can thams cad la mi slu ba'i tshul gyis tha snyad shin du yongs su dul ba nyid dang / sems 44.312b can thams cad yongs su smin par byed pa'i snying rje chen po'i tshul gyis lus dang sems la mi lta ba dul ba nyid de/ rigs kyi bu bcu po de dag ni byang chub sems dpa' sems dpa' chen po rnams kyi dul ba'i sa'o/ /rigs kyi bu gzhan yang byang chub ni sgrub pa snying por byed pa'i byang chub sems dpa' sems dpa' chen po rnams kyi yin te/ log par sgrub pa snying por byed pa rnams kyi ni ma yin no/ /de la sgrub pa snying por byed pa ni ji skad smras pa de bzhin du byed pa yin no/ /log par sgrub pa snying por byed pa ni tshig gi dngos po kho na'o/ /de ni sgrub pa snying por byed pa mang ba yin gyi/ log par sgrub pa snying por byed pa mang ba ni ma yin no/ /rigs kyi bu gzhan yang gnyis po 'di dag ni byang chub sems dpa' sems dpa' chen po rnams kyi sgrub pa ste/ gnyis gang zhe na/ 'di lta ste/ lam sgrub pa dang / spong ba sgrub pa ste/ /rigs kyi bu gnyis po de dag ni byang chub sems dpa' sems dpa' chen po rnams kyi sgrub pa'o/ /rigs kyi bu gzhan yang byang chub sems dpa' sems dpa' chen po rnams kyi sgrub pa gnyis te/ gnyis gang zhe na/ 'di lta ste/ bdag 'dul ba'i sgrub pa dang / sems can yongs su smin par bya ba'i sgrub pa ste/ rigs kyi bu gnyis po de dag ni byang chub sems dpa' sems dpa' chen po rnams kyi sgrub pa'o/ /rigs kyi bu gzhan yang byang chub sems dpa' sems dpa' chen po rnams kyi sgrub pa gnyis te/ gnyis gang zhe na/ 'di lta ste/ rtsol ba dang bcas pa'i shes pas sgrub pa dang / lhun gyis grub pa'i ye shes kyis sgrub pa ste/ rigs kyi bu gnyis po de dag ni byang chub sems dpa' sems dpa' chen po rnams kyi sgrub pa'o/ /rigs kyi bu gzhan yang byang chub sems dpa' sems dpa' chen po rnams kyi sgrub pa gnyis te/ gnyis gang zhe na/ 'di lta ste/ sa rnam par gzhag pa 44.313a la mkhas par sgrub pa dang / sa dbyer med pa la mkhas par sgrub pa ste/ rigs kyi bu gnyis po de dag ni byang chub sems dpa' sems dpa' chen po rnams kyi sgrub pa'o/ /rigs kyi bu gzhan yang byang chub sems dpa' sems dpa' chen po rnams kyi sgrub pa gnyis te/ gnyis gang zhe na/ 'di lta ste/ sa'i nyes pa rnam par spong ba'i sgrub pa dang / sa nas sar 'phar ba la mkhas pa yongs su rdzogs par bya ba'i sgrub pa ste/ rigs kyi bu gnyis po de dag ni byang chub sems dpa' sems dpa' chen po rnams kyi sgrub pa'o/ /rigs kyi bu gzhan yang byang chub sems dpa' sems dpa' chen po rnams kyi sgrub pa gnyis te/ gnyis gang zhe na/ 'di lta ste/ nyan thos dang / rang sangs rgyas kyi sa bstan pa'i sgrub pa dang / sangs rgyas kyi byang chub las phyir mi ldog pa la mkhas pa'i sgrub pa ste/ rigs kyi bu gnyis po de dag ni byang chub sems dpa' sems dpa' chen po rnams kyi sgrub pa'o/ /rigs kyi bu byang chub sems dpa' sems dpa' chen po rnams kyi sgrub pa ni 'di lta bu 'di dag ste/ de la byang chub sems dpa' sems dpa' chen po rnams kyis 'bad par bya'o/ /rigs kyi bu byang chub sems dpa' sems dpa' chen po de ltar sgrub pa rnams la bla na med pa yang dag par rdzogs pa'i byang chub rnyed dka' ba ma yin no/ /de nas bcom ldan 'das kyis 'jam dpal gzhon nur gyur pa la bka' stsal pa/ 'jam dpal khyod kyis tshig 'di legs par bshad pa legs so legs so/ /bcom ldan 'das kyis de skad ces bka' stsal nas/ 'jam dpal gzhon nur gyur pa dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa ga yA mgo'i ri zhes bya ba theg pa chen po'i mdo rdzogs so// // rgya gar gyi mkhan po su ren dra bo d+hI dang / zhu chen gyi lo ts+tsha ba ban de ye shes sdes bsgyur cing zhus te gtan la phab pa// # |