@#/ /rgya gar skad du/ Ar+ya dwI da sha bud+d+ha ka~M nA ma ma hA yA na sU tra/ bod skad du/ 'phags pa sangs rgyas bcu gnyis pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod phung po'i ri la dge slong stong nyis brgya lnga bcu'i dge slong gi dge 'dun chen po dang thabs cig tu bzhugs te/ byang chub sems dpa' ma pham pa la sogs pa byang chub sems dpa' khri nyis stong gi 95.21b byang chub sems dpa'i dge 'dun chen po dang yang thabs cig go /de nas bcom ldan 'das kyis byang chub sems dpa' sems dpa' chen po byams pa la bka' stsal pa/ byams pa sangs rgyas kyi zhing 'di nas shar phyogs logs su sangs rgyas kyi zhing bye ba khrag khrig 'bum phrag brjod du med pa bcu'i rdul phra rab kyi rdul snyed kyi sangs rgyas kyi zhing 'das pa na/ 'jig rten gyi khams mu tig can zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas nam mkha'i dpal dri med rdul sel rab mdzes yon tan gyi tog gi 'od me tog pad+ma bai dUr+ya'i 'od zer rin po che'i gzugs lta bu 'i sku dang ldan pa spos mchog dam pas mchod pa sku rnam par spras shing legs par brgyan pa gtsug tor gyi gtsug nas nyi ma'i 'od zer dpag med zla 'od smon lam gyis brgyan pa rab sprul bkod pa chen po chos kyi dbyings las mngon 'phags chags med rin chen rgyal po zhes bya ba da ltar yang bzhugs te 'tsho zhing gzhes la chos kyang ston to/ /su rgyal ba de'i mtshan 'dzin pa de bskal pa chen po 'dzam bu'i gling gi rdul phra rab kyi rdul snyed kyi bskal par 'khor ba las ldog go /des byang chub sems dpa' sems dpa' chen po 'dra ba med ces bya ba lung bstan te/ de de bzhin gshegs pa dgra bcom pa yang dag par rdzogs pa'i sangs rgyas nam mkha'i dpal dri med rdul sel rab mdzes yon tan gyi tog gi 'od me tog pad+ma bai dUr+ya'i 'od zer rin po che'i gzugs lta bu'i sku dang ldan pa spos mchog dam pas mchod pa sku rnam par spras shing legs par brgyan pa gtsug tor gyi gtsug nas nyi ma'i 'od zer dpag med zla 'od smon lam gyis brgyan pa rab sprul bkod pa chen po chos kyi dbyings las mngon 'phags chags med rin chen rgyal po de yongs su mya ngan las 'das 95.22a pa'i dam pa'i chos nub ma thag tu bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur te/ de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das chu lha gzhon nu nyi ma'i sgron ma zla ba'i me tog pad+ma gser sdug nam mkha' lta bu'i sku ldan rnam par snang mdzad 'od zer rab brgyan thogs med 'khor lo'i dkyil 'khor phyogs bcur 'od zer rab 'byin 'jig rten khams kun snang byed tog gi rgyal mtshan rgyal po zhes bya bar 'jig rten du 'byung bar 'gyur ro/ /shar phyogs de nyid kyi de bzhin gshegs pa dgra bcom pa yang dag par rdzogs pa'i sangs rgyas bkod pa thams cad dri med 'od ces bya ba'i mtshan yang gzung ngo / /tshig 'don to/ /phyag bya'o/ /lho phyogs kyi de bzhin gshegs pa dgra bcom pa yang dag par rdzogs pa'i sangs rgyas spobs pa'i rgyan la dgongs pa zhes bya ba'i mtshan yang gzung ngo / /yid la bya'o/ /nub phyogs kyi de bzhin gshegs pa dri med zla ba'i tog gi rgyal po grags ldan zhes bya ba'i mtshan yang gzung ngo / /phyag bya'o/ /byang phyogs kyi de bzhin gshegs pa me tog gi bkod pa snang bar mdzad pa zhes bya ba'i mtshan yang gzung ngo / /phyag bya'o/ /shar lho'i phyogs mtshams kyi de bzhin gshegs pa 'od mdzad ces bya ba'i mtshan yang gzung ngo / /phyag kyang bya'o/ /lho nub kyi phyogs mtshams kyi de bzhin gshegs pa rin chen mchog gi tog grags ldan zhes bya ba'i mtshan yang gzung 95.22b ngo / /phyag bya'o/ /nub byang gi phyogs mtshams kyi de bzhin gshegs pa 'jigs med rnam par gzigs zhes bya ba'i mtshan yang gzung ngo / /phyag bya'o/ /byang shar gyi phyogs mtshams kyi de bzhin gshegs pa 'jigs bral bag tsha mi mnga' spu zing mi byed ces bya ba'i mtshan yang gzung ngo / /phyag bya'o/ /'og gi phyogs kyi de bzhin gshegs pa seng ge bsgyings pa'i mid pa zhes bya ba'i mtshan yang gzung ngo / /phyag bya'o/ /steng gi phyogs kyi de bzhin gshegs pa gser 'od gzi brjid 'jigs bral rgyal po zhes bya ba'i mtshan yang gzung ngo / /phyag bya'o/ /byams pa dad pa'i rigs kyi bu'am rigs kyi bu mos bcom ldan 'das de bzhin gshegs pa dgra bcom pa yang dag par rdzogs pa'i sangs rgyas bcu gnyis po 'di dag gi mtshan brjod la nyi ma bcur sdig pa thams cad kyi nyes pa bshags par bya/ dge ba'i rtsa ba thams cad la rjes su yi rang bar bya/ sangs rgyas thams cad la bskul ba dang / sangs rgyas thams cad la gsol ba gdab pa dang / dge ba'i rtsa ba thams cad chos kyi dbyings su yongs su bsngo bas yongs su bsngo bar bya'o/ /'on kyang sdig pa thams cad zad par 'gyur ro/ /las kyi sgrib pa thams cad rnam par byang bar 'gyur ro/ /de'i 'og tu sangs rgyas kyi zhing gi yon tan bkod pa phun sum tshogs pa dang / mi 'jigs pa phun sum tshogs pa dang / mtshan phun sum tshogs pa dang / byang chub sems dpa'i dge 'dun phun sum tshogs pa dang / gzungs phun sum tshogs pa yang 'thob bo/ /ting nge 'dzin phun sum tshogs pa yang 'thob bo/ /bsam pa ji lta ba bzhin sangs rgyas kyi zhing yongs su dag pa phun sum tshogs pa dang / dge ba'i bshes gnyen phun sum tshogs pa'ang myur du yongs su 'dzin to/ /bla na med pa yang dag par rdzogs pa'i byang chub las nyams par mi 'gyur zhing 95.23a yongs su nyams par yang mi 'gyur ro/ /'khor ba na 'khor ba'i tshe na'ang kun du mdzes pa dang / de'i longs spyod phun sum tshogs pa dang / rigs phun sum tshogs pa dang / skye ba phun sum tshogs pa dang / rus phun sum tshogs pa dang / gzugs phun sum tshogs pa dang / ris 'dra ba'i skye bo'i 'khor phun sum tshogs pa'ang yongs su 'dzin to/ /de la 'di skad ces bya ste/ gang dang gang du skyes pa yi/ /tshe rabs tshe rabs thams cad du/ /mthong na dga' zhing dga' byed dang / /'od byed pa dang mthu chen dang / /'byor pa chen por 'gyur ba yin/ /gzungs kyi gsang sngags kyi gzhi 'di rnams kyang brjod par bya'o/ /tad+ya thA/ a khe ma khe sa man+ta mu khe/ sau ti yuk+te/ ni ruk+te pra b+he/ sa ma yo ge/ tsit+ta tsit+te/ a khe ma khe/ pa da ne/ bi brte/ sa man+ta gu Ni/ sat+yA ra me/ yuk+te pra yuk+te/ hi li mi li/ ma sa le/ A na le/ tsa me/ a tsi ti/ tso tse/ a ra he/ ba hu ts+tshe/ mA yu gra he/ he ma ba ti/ dz+yo ti ba ti/ d+harma tsi te/ ts+yuta pang ke a bi k+Sha pe ra d+h+rI k+Sha me/ skan+d+ha bi b+hak+te/ sangs rgyas dang / byang chub sems dpa' thams cad la phyag 'tshal lo/ /sangs rgyas kyi byin gyis brlabs kyis gsang sngags kyi gzhi 'di rnams grub par gyur cig /de la 'di skad ces bya ste/ gzungs 'di dag ni bzung byas na/ /phyogs bcu dag na gang bzhugs pa'i/ /bye ba drug cu'i drang srong rnams/ /de dag de la dgongs par 'gyur/ /skye ba dag ni kun du yang / /dge ba'i bshes gnyen rnyed par 'gyur/ /chung zad dge ba gang yin pa/ /don rnams thams cad 'byor par 'gyur/ /pad+ma'i snying por bzhugs pa yi/ /sangs rgyas rnams ni mngon sum mthong / /gzungs 'di dag ni 'dzin byed pa/ /mkhas pa dpal ldan rdzus te skye/ /dran dang blo gros rtogs pa dang / /mos pa shes rab rab tu 'phel/ /thos pa thams cad 'dzin par 95.23b 'gyur/ /thos pa thams cad 'dzin mi nyams/ /'jig rten mgon po 'di dag gi/ /mtshan rnams su zhig rjod byed pa/ /ngan 'gro thams cad spangs nas ni/ /bzang 'gror myur du 'gro bar 'gyur/ /ting nge 'dzin dang gzungs kyi mchog /de dag de la mngon par 'gyur/ /byang chub rab tu de 'tshang rgya/ /zhing ni bye ba phrag stong dag /gser gyis bkang ste sbyin byin pas/ /gang zhig de bzhin gshegs rnams kyi/ /mtshan rnams 'dzin par byed pa yi/ /bsod nams phung po de ches mang / /rtag tu tshe rabs dran par 'gyur/ /byang chub spyad pa spyod pa'i tshe/ /mi khom thams cad rnam spangs te/ /sangs rgyas 'byung ba rab mdzes rnyed/ /rdzogs pa'i sangs rgyas mnyes par byed/ /dad pa bla na med pa 'thob/ /sangs rgyas rnams la rab dad cing / /mchod pa dam pa byed par 'gyur/ /sangs rgyas 'byung ba mnyes byed de/ /mthong nas ston la rab tu dad/ /'jig rten sgron ma mthong nas ni/ /mchod pa bzang po byed par 'gyur/ /mtshan rnams 'di dag 'dzin byed pa/ /bskal pa bye ba grangs med du/ /'khor ba rnam par spangs nas su/ /byang chub myur du 'tshang yang rgya/ /nyin zhag bdun du tshang bar ni/ /mtshan rnams 'di dag 'dzin byed na/ /gang gis 'dren rnams mthong 'gyur ba'i/ /rgya chen mig ni sbyangs par 'gyur/ /'jig rten mgon po de dag gi/ /mtshan rnams mi gang 'dzin byed pa/ /skye ba gang dang gar skye bar/ /de ni phyag bya'i 'os su 'gyur/ /mtshan rnams 'di dag 'dzin byed pa/ /bskal pa bye ba bsam yas su/ /bkur sti ma yin thob mi 'gyur/ /'jig rten dag na grags pa 'thob/ /mtshan rnams 'di dag 'dzin byed pa/ /de la bskal pa du mar ni/ /lha rnams bsti stang byed par 'gyur/ /byang chub myur du 'tshang yang rgya/ / 95.24a mtshan rnams 'di dag 'dzin byed pa/ /mos med shes rab 'chal mi 'gyur/ /g.yo dang sgyu ni rnam par spangs/ /rtag tu sangs rgyas rnams kyang mthong / /mtshan rnams 'di dag 'dzin byed pa/ /lha dang dri za klu dbang dang / /mkha' lding lha min gsang ba pa/ /rtag tu de la srung bar byed/ /gzugs dang mtshan ni phun sum tshogs/ /nor chen khyim du skye bar 'gyur/ /sems can kun la sbyin par byed/ /dpa' zhing gtong phod ser sna med/ /bskal pa bye ba brgya mang por/ /lha yi tsan+dan dmar po dang / /shin tu dri zhim spos kun gyi/ /spos ngad de yi kha nas 'byung / /mtshan rnams 'di dag 'dzin byed pa/ /bskal pa bye bar sgra skad ni/ tshangs pa'i dbyangs dang ldan par 'gyur/ /rtag tu chos rgyal tshul dang ldan/ /mtshan rnams 'di dag 'dzin byed pa/ /rin chen sna bdun pad+ma'i 'dab/ /bye ba stong phrag mang yod las/ /'byor chen de skye lha gzugs ldan/ /mtshan rnams 'di dag su 'dzin pa/ /de ni pha ma spun sdug dang / /skye bo dag gi tshogs rnams dang / /'bral bar 'gyur ba mi mthong ngo / /drang srong chen po rnams kyi mtshan/ /bud med kyis ni gzung byas na/ /bud med lus la ma chags nas/ /skyes pa blo gros ldan par 'gyur/ /mi yi lus ni thob gyur nas/ /bla med byang chub thob 'gyur te/ /chos kyi 'khor lo rab bskor nas/ /'dod pa ji bzhin mya ngan 'da'/ /mtshan rnams 'di dag su 'dzin pa/ /de yi lus la mtshon dang ni/ /dug dang me dang rgyal po dang / /g.yon can rnams kyis mi tshugs so/ /mtshan rnams 'di dag su 'dzin pa/ /de yi sems la nam yang ni/ /dpung dang bzhon par bcas pa yi/ /bdud kyis glags rnyed mi 'gyur ro/ /'di dag gi ni mtshan gyi rnams/ /mi gang 'dzin par byed pa de/ /zhing ni bye ba bsam yas par/ /nam mkha' las 95.24b ni 'gro bar 'gyur/ /sangs rgyas bstan pa rnams mchod nas/ /'jigs pa med par zhu ba zhu/ /de dag de yi bsam mkhyen nas/ /rgyal ba de dag lung ston 'gyur/ /sangs rgyas mgon po de dag las/ /lung bstan pa pa ni thob gyur nas/ /de ni shin tu yi rangs te/ /rgyal ba'i bstan la the tsom med/ /mtshan rnams 'di dag 'dzin byed pa/ /'jig rten mgon po rnams las ni/ /zab mo'i chos ni thos 'gyur te/ /thos nas thams cad 'dzin par 'gyur/ /de nas pha rol phyin pa dang / /mi 'jigs pa dang stobs rnams dang / /mtshan dang dpe byad bzang po rnams/ /ma lus par ni rdzogs par 'gyur/ /sangs rgyas de dag rnams kyi ni/ /gang gi zhing du 'dod gyur pa/ /der ni bla med yang dag rdzogs/ /byang chub rtogs nas 'tshang rgyar 'gyur/ /skyes pa 'am ni bud med gang / /mtshan rnams 'di dag 'dzin pa yi/ /yon tan 'di dang gzhan dag kyang / /sangs rgyas bskal par rgyun du gsung / /bag yod ldan par gyur nas ni/ /yon tan phun sum 'di thos nas/ /rdzogs pa'i sangs rgyas grags ldan pa/ /de dag mtshan rnams 'dzin par 'gyur/ /sangs rgyas 'di dag dpal snying po/ /sprin gyi rgyal po mi yi mchog /'jig rten mgon po 'di dag gi/ /mtshan ni bskal par gang nyan dang / /gang dag 'di rnams mtshan nyan cing / /thos nas gus par byed 'gyur ba/ /de dang de dag shes rab che/ /rkang gnyis rnams kyi mchog tu 'gyur/ /drang srong chen po de dag gi/ /'di 'dra'i mtshan dag thos gyur nas/ /bag yod ldan zhing mkhas gyur la/ /shes rab ldan pa su mi 'dzin/ /bcom ldan 'das kyis de skad ces bka' stsal nas/ byang chub sems dpa' sems dpa' chen po byams pa dang / byang chub sems dpa' de dag dang / dge slong de dag dang / thams cad dang ldan pa'i 'khor de dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa sangs rgyas bcu gnyis pa zhes bya ba theg pa chen po'i mdo rdzogs 95.25a s+ho// //rgya gar gyi mkhan po dzi na mi tra dang / dA na shI la dang / zhu chen gyi lo ts+tsha ba ban de ye shes sdes bsgyur cing zhus te/ skad gsar chad kyis kyang bcos nas gtan la phab pa/ / |