@#/ /rgya gar skad du/ na maHtA rA+e e ka biM sha ti sto tra gu Na hi ta sA ka / bod skad du/ sgrol ma la phyag 'tshal nyi shu rtsa gcig gis bstod pa phan yon dang bcas pa/ rje btsun ma 'phags ma sgrol ma la phyag 'tshal lo/ /phyag 'tshal sgrol ma myur ma dpa' mo/ /spyan ni skad cig glog dang 'dra ma/ /'jig rten gsum mgon chu skyes zhal gyi/ /ge sar phye ba'i las ni byung ma/ /phyag 'tshal ston ka'i zla ba kun du/ /gang ba brgya ni brtsegs pa'i zhal ma/ /skar ma stong phrag tshogs pa rnams kyis/ /rab tu phye ba'i 'od rab 'bar ma/ /phyag 'tshal gser sngo chu nas skyes kyis/ /pad+mas phyag ni rnam par brgyan ma/ /sbyin pa brtson 'grus dka' thub zhi ba/ /bzod pa bsam gtan spyod yul nyid ma/ /phyag 'tshal de bzhin gshegs pa'i gtsug tor/ /mtha' yas rnam par rgyal bar spyod ma/ /ma lus pha rol phyin pa thob pa'i/ / 88.47a rgyal ba'i sras kyis shin tu bsten ma/ /phyag 'tshal tuta tA ra hU~M yi ge/ /'dod dang phyogs dang nam mkha' gang ma/ /'jig rten bdun po zhabs kyis mnan te/ /lus pa med par 'gugs par nus ma/ /phyag 'tshal brgya byin me lha tshangs pa/ /rlung lha sna tshogs dbang phyug mchod ma/ /'byung po ro langs dri za rnams dang / /gnod sbyin tshogs kyis mdun nas bstod ma/ /phyag 'tshal trad ces bya dang phaT kyis/ /pha rol 'khrul 'khor rab tu 'joms ma/ /g.yas bskum g.yon brkyang zhabs kyis mnan te/ /me 'bar 'khrugs pa shin tu 'bar ma/ /phyag 'tshal tu re 'jigs pa chen mo/ /bdud kyi dpa' bo rnam par 'joms ma/ /chu skyes zhal ni khro gnyer ldan mdzad/ /dgra bo thams cad ma lus gsod ma/ /phyag 'tshal dkon mchog gsum mtshon phyag rgya'i/ /sor mos thugs kar rnam par brgyan ma/ /ma lus phyogs kyis 'khor los brgyan pa'i/ /rang gi 'od kyi tshogs rnams 'khrug ma/ /phyag 'tshal rab tu dga' ba brjid pa'i/ /dbu rgyan 'od kyi phreng ba spel ma/ /bzhad pa rab bzhad tuta tA ra yis/ /bdud dang 'jig rten dbang du mdzad ma/ /phyag 'tshal sa gzhi skyong ba'i tshogs rnams/ /thams cad 'gugs par nus ma nyid ma/ /khro gnyer g.yo ba'i yi ge hU~M gis/ /phongs pa thams cad rnam par sgrol ma/ /phyag 'tshal zla ba'i rtse mo dbu brgyan/ /brgyan pa thams cad shin tu 'bar ma/ /ral pa'i khrod na 'od dpag med las/ /rtag par shin tu 'od ni mdzad ma/ /phyag 'tshal bskal pa tha ma'i me ltar/ /'bar ba'i phreng ba'i dbus na gnas ma/ /g.yas brkyang g.yon bskum kun nas bskor dgas/ /dgra yi dpung ni rnam par 'joms ma/ /phyag 'tshal sa gzhi'i ngos la phyag gi /mthil gyis bsnun cing zhabs kyis brdung ma/ /khro gnyer can mdzad yi ge hU~M gi/ /rim pa bdun po rnams ni 'gems ma/ / 88.47b phyag 'tshal bde ma dge ma zhi ma/ /mya ngan 'das zhing spyod yul nyid ma/ /swA hA o~M dang yang dag ldan pas/ /sdig pa chen po 'joms pa nyid ma/ /phyag 'tshal kun nas bskor rab dga' ba'i/ /dgra yi lus ni rab tu 'gems ma/ /yi ge bcu pa'i ngag ni bkod pa'i/ /rig pa hU~M las sgrol ma nyid ma/ /phyag 'tshal tu re'i zhabs ni brdab pas/ /hU~M gi rnam pa'i sa bon nyid ma/ /ri rab man dA ra dang 'bigs byed/ /'jig rten gsum rnams g.yo ba nyid ma/ /phyag 'tshal lha yi mtsho yi rnam pa'i/ /ri dgas rtags can phyag na bsnams ma/ /ta ra gnyis brjod phaT kyi yi ges/ /dug rnams ma lus par ni sel ma/ /phyag 'tshal lha yi tshogs rnams rgyal po/ /lha dang mi'am ci yis bsten ma/ /kun nas go cha dga' ba'i brjid kyis/ /rtsod dang rmi lam ngan pa sel ma/ /phyag 'tshal nyi ma zla ba rgyas pa'i/ /spyan gnyis po la 'od rab gsal ma/ /ha ra gnyis brjod tuta tA ra yis/ /shin tu drag po'i rims ni sel ma/ /phyag 'tshal de nyid gsum rnams bkod pa'i/ /zhi ba'i mthu dang yang dag ldan ma/ /gdon dang ro langs gnod sbyin tshogs rnams/ /'joms pas tu re rab mchog nyid ma/ /rtsa ba'i sngags kyis bstod pa 'di dang / /phyag 'tshal ba ni nyi shu rtsa gcig /lha mo la gus yang dag ldan par/ /blo ldan gang gis rab tu brjod pas/ /srod dang tho rangs langs par byas nas/ /dran pas mi 'jigs thams cad rab ster/ /sdig pa thams cad rab tu zhi ba/ /ngan 'gro thams cad 'joms pa nyid do/ /rgyal ba bye ba phrag bdun rnams kyis/ /myur du dbang ni bskur bar 'gyur la/ /'di las che ba nyid ni 'thob cing / /sangs rgyas go 'phang mthar thug der 'gro/ /de yi dug ni drag po chen po/ /brtan gnas pa 'am gzhan yang 'gro ba/ /zos pa dang ni 'thungs pa nyid kyang / /dran pas rab tu sel ba nyid thob/ /gdon dang rims dang 88.48a dug gis gzir ba'i/ /sdug bsngal tshogs ni rnam par spong ste/ /sems can gzhan ma rnams la yang ngo / /gnyis gsum bdun du mngon par brjod na/ /bu 'dod pa ni bu thob 'gyur zhing / /nor 'dod pa ni nor rnams nyid thob/ /'dod pa thams cad thob par 'gyur te/ /bgegs rnams med cing so sor 'joms 'gyur/ /bcom ldan 'das ma sgrol ma la yang dag par rdzogs pa'i sangs rgyas kyis bstod pa gsungs pa rdzogs s+ho// //zhus dag / |