@#/ /rgya gar skad du/ Ar+ya a tsa la ma hA gu h+ya tan+t+ra/ bod skad du/ 'phags pa mi g.yo ba'i gsang rgyud chen po/ 'phags pa 'jam dpal gzhon nur gyur pa la phyag 'tshal lo/ /'di skad bdag gis thos pa dus gcig na/ bcom ldan 'das rnam par snang mdzad chen po 'og min gyi gnas na rab tu dgyes shing bdud 'joms pa zhes bya ba'i ting nge 'dzin la snyoms par zhugs so/ /de'i tshe na byang chub sems dpa' 'jam dpal gzhon nur gyur pa dang / rdo rje chos dang / phyag na rdo rje dang / sems bskyed ma thag tu chos kyi 'khor lo bskor ba dang / rdo rje gnod sbyin dang / rdo rje khu tshur la sogs te rab tu dga' ba'i tshogs dpag tu med pa dang thabs gcig tu bzhugs te/ de nas bcom ldan 'das kyis badzra rak+Sha rak+Sha hU~M zhes gsungs te rdo rje khro bos phyogs mtshams gtams so/ /bsrungs ba'i don du rab brtson zhing / /bgegs kyi sbyor ba brlag par mdzad/ /hU~M phaT de nas bcom ldan 'das kyis ha~M zhes gsungs te rang gi thugs ka nas khro bo'i rgyal po mi g.yo ba phyung ste/ g.yas na ral gri g.yon bsdigs mdzub/ /char sprin lta bur shin tu gnag /sbrul dang thod pas yang dag brgyan/ /mi bskyod pas ni byin brlabs shing / /bde gshegs 'od zer dpag med 'phros/ /dngos grub bde ba kun stsol mdzad/ /o~M badzra sid+hi hU~M/ de nas yang dag bshad bya ba/ /A li kA li rab sbyar zhing / /zla ba rdo rje sbyor ldan pas/ /yang dag rdzogs te mngon sangs rgyas/ /sna tshogs rdo rje'i dbus su ni/ /brkyang bskum tshul du yang dag gnas/ /dga' byed ma ni mdun du ste/ /rin chen phreng ma g.yas su dgod/ /glu mkhan mo ni g.yon du ste/ /brtson 'grus gar byed rgyab tu gnas/ /'gugs byed ma ni shar du ste/ /rnam par 'ching ma lho ru dgod/ /gnyis med ma ni nub tu ste/ /rnam par 'phel ma byang du dgod/ / 88.14a 'di dag ni bcom ldan 'das sku yongs su rdzogs pa'i dam tshig go/ /'phags pa mi g.yo ba'i rgyud gsang ba chen po las gleng gzhi'i le'u ste dang po'o// // de nas bcom ldan 'das kyis dbang bskur ba'i dam tshig rdo rje zhes bya ba'i ting nge 'dzin la snyoms par zhugs te/ de nas bcom ldan 'das kyi thugs ka nas 'od zer spros te lha thams cad kyi dbu la 'od zer thim par gyur to/ /rigs kyi bdag pos dbu brgyan par gyur to/ /de nas yang dag bshad bya ba/ /dkyil 'khor chen po dam pa ru/ /mchod pa'i tshogs ni rnam par bstim/ /gzugs dang sgra dang dri dang ro/ /reg bya lha mo dpag med de/ /mchod pa'i tshogs kyis yang dag mchod/ /kye kye mtha' gnyis rnam par ma g.yos shing / /sprul pa'i gzugs kyis 'gro don dpag med mdzad/ /'jigs byed chen po 'gro ba kun sgrol zhing / /srid pa gsum na dgyes par gar mdzad pa/ /srid pa'i chu bo skems shing mi mthun bdud rnams 'joms/ /srid pa'i rlung gis ma g.yos thugs rje mi g.yo mgon/ /rab brjid mi g.yo mgon la phyag 'tshal bstod/ /bcom ldan 'das kyi bstod pa chen po'i dam tshig go/ /de nas yang dag bshad bya ba/ /rgyal po rtag ldan thod pa ru/ /lcags kyu lnga sogs gzhag par bya/ /rlung dang me yi dkyil 'khor bzhag /thod pa ru ni yang dag gnas/ /bcom ldan 'das kyi bdud rtsi chen po'i dam tshig go/ /de nas yang dag bshad bya ba/ /tshangs pa brgya byin gshin rje dang / /chu bdag gnod sbyin khyab 'jug sogs/ /me dang srin po rlung gi lha/ /'byung po sa yi lha mo dang / /lha ma yin sogs 'khor bcas dgug /o~M a kA ro mu khaM sarba d+harmA NAM A d+ya nut+pa pan+na twata swA hA/ o~M khA hi khA hi pheM pheM swA hA/ bdud rtsi sha dang khrag la 88.14b sogs/ /gtor ma thams cad sbyin par bya/ /'phags pa mi g.yo ba'i rgyud gsang ba chen po las mngon par rtogs pa'i le'u ste gnyis pa'o// // de nas yang dag bshad bya ba/ /thugs kyi dkyil 'khor dam pa ni/ /khru bzhi pa yi tshad du bya/ /sar pa las ni bkal nas kyang / /dkyil 'khor nyis 'khor ring thung la/ /mkhas pas dkyil 'khor thig gdab bo/ /'khor lo lta bur byas nas kyang / /rdo rje phreng bas yongs su bskor/ /gru bzhir bgyi zhing sgo bzhir bgyi/ /rta babs bzhi dang yang dag ldan/ /dbus su ral gri chen po dgod/ /shar du rdo rje yang dag dgod/ /lho ru rin chen phreng ba ste/ /nub du chos kyi pi bang ste/ /byang du rdo rje rtse gsum mo/ /sgor ni lcags kyu zhags pa dang / /lcags sgrog dril bu mkhas pas gzhag /bcom ldan 'das dkyil 'khor chen po dgod pa'i dam tshig go/ /de nas char pa mi 'bab na/ /stegs bu gru bzhi'i steng du yang / /dngul gyi gzhong pa bzhag nas kyang / /bag zan las ni byas pa'i gzugs/ /pad ma sum brtsegs dag tu bya/ /steng du klu yi gzugs bzhag la/ /gur gum gyis ni byugs byas la/ /mtshams su o~M dang bam bkod de/ /tsan dan dkar pos sbyin sreg bya/ /kha dog mang po sbyor ldan pas/ /klu yi gzugs ni nges par dgug /des kyang 'bab par ma gyur na/ /kham pa'i gab tshe dkar po ru/ /pri yang ku yi khu ba yis/ /ral gri brgyad pa'i 'khor lo bri/ /rgya mtsho'i ngos las sa blangs la/ /klu yi gzugs ni mngon byas te/ /nam mkha' lding gi khu bas byug /til mar la ni sbyin sreg bya/ /de nas yang dag bshad bya ba/ /kham phor ser po'i nang du ni/ /bsgrub bya gzugs gzhug ldong ros kyis/ /ri rab rtse mo brgyad pa bri/ /des ni yang dag gnas par bya/ /shin tu rno ba'i lcags dag la/ /khru do tshad kyi ral gri 88.15a bya/ /maN+Dal dkar po'i steng du bzhag /zla ba drug ni rig pa bzlas/ /til mar gyis ni bskus byas nas/ /zla ba gzas zin tshe na bsgrub/ /thogs pa'i mkha' la lding bar 'gyur/ /bdud rtsi lnga dang sha sna lnga/ /grib ma dag la bskams byas te/ /lcags gsum dag gis dkris byas te/ /shar bltas zas ni smyung bar gnas/ /gzas zin tshe na khar gzhug bya/ /mnyam par gzhag ste nyi shu bzlas/ /khar bcug gzhan gyis mngon mi 'gyur/ /bcom ldan 'das dngos grub chen po'i dam tshig go/ /de nas yang dag bshad bya ba/ /sa gzhi dkar la zlum pa la/ /tsan dan dkar po'i me sbar te/ /ser skya'i mar gyis sbyin sreg bya/ /dngos grub chen po thob par 'gyur/ /yungs kar gyis ni sbyin sreg bya/ /rig pa 'dzin pa'i dngos grub 'thob/ /til nag pos ni sbyin sreg bya/ /sdig pa thams cad zhi bar 'gyur/ /dur ba'i myu gus sbyin sreg bya/ /tshe yi rig 'dzin thob par 'gyur/ /seng ldeng dag la phur pa bya/ /gsang sngags nyi shu gcig bzlas nas/ /'dod pa'i gzugs la dbang bar bya/ /dgyes pas dngos grub ster bar 'gyur/ /'phags pa mi g.yo ba'i rgyud gsang ba chen po las dngos grub kyi le'u ste gsum pa'o// // de nas bcom ldan 'das yongs su dgyes nas 'jam dpal la sogs pa rnams la rnam par gzigs nas/ o~M AHhU~M zhes bya ba'i sgra gsungs te mi snang bar gyur to/ /de nas rab tu dga' 88.15b ba'i tshogs kyis rang gi bdag po mthong bar ma gyur te/ phyogs bzhi nas mngon du phyogs nas 'di yis gsol ba btab bo/ /e ma bcom ldan ngo mtshar che/ /stong pa'i ngang la ci ste bzhugs/ /bdag ni tshangs spyod byams pa ste/ /mya ngan 'das pa kun nas slong / /e ma'o bde ba chen po'i sku/ /tshig kun gyis ni ma spros pa/ /bdag ni rjes chags snying rje che/ /'gro ba yang dag sgrol bar mdzad/ /e ma dri med dag pa'i sku/ /stong pa'i ngang las ma bzhugs par/ /rab tu dga' bas bdag la rol/ /'gro ba'i don la rjes chags brjod/ /e ma'o don kun grub mdzad pa/ /dag pa'i ye shes dri med sku/ /bdag gis 'gro kun gzung ba'i phyir/ /gtso bo khyod ni yang dag bzhengs/ /de nas bcom ldan 'das rab tu dgyes te sku yongs su rdzogs pa/ rdzogs par mdzad nas gsang sngags kyi rgyal po 'di dag gsungs so/ /o~M Ar+ya a tsa la hU~M phaT/ o~M badzra kI li kI la ya/ sarba bi gA na ban+d+ha ya hU~M phaT/ gsang sngags dang phur bu'i sngags so/ /o~M na maHsa maN+ta badzra tsaN+Ta ma hA ro Sha Na s+pho Ta ya/ hU~M hU~M hU~M tra Ta hU~M/ maM paM haM maM ta sha hU~M/ ma ma hU~M phaT swA hA/ shin tu rno ba'i sngags te las thams cad pa'o/ /de nas 'khor rnams kyis gsang sngags kyi don khong du chud par gyur to/ /'phags pa mi g.yo ba'i rgyud gsang ba chen po las gsang sngags kyi le'u ste bzhi pa'o// //'phags pa mi g.yo ba'i rgyud gsang ba chen po rdzogs so/ / zhus dag / |