// dur khrod bdag mos gsol pa/ lha mo rnams kyi sku mdog ni/ /ji ltar shes na grol bar 'gyur/ /phag mo zhes bya gang la bya/ /yi ge'i don ni gang la bskyal/ /bskyed rdzogs ngo bo gang la bya/ /dpa' bo he ru kas bka' stsal pa/ nyon cig 87.93b dur khrod phag mo khyod/ /nyes pa'i skyon gyis ma gos pa/ /dkar zhing spros bral zhi bar byed/ /ma chags skyon gyis ma gos pa/ /dmar la gdang ba sgra sgrogs yum/ /skyon med sems nyid rang dbang 'dus/ /gnyan po gcig kyang mi 'gyur bas/ /khros ma nam mkha'i kha dog bzhin/ /mi 'gyur rang sems dbyings su grol/ /che ba ye shes lnga rgyas pa/ /ser mo skyon med don grub ma/ /ngo bo rgyal la g.yo dang bral/ /sna tshogs skyon gyis ma gos pas/ /in dra nI la'i mthar byin ma/ /sna tshogs ngo bo gcig tu 'dus/ /rnam pa gang yang 'gyur ba med/ /chos kyi dbyings las 'gyur ba med/ /rnam rtog cis kyang ma gos pas/ /pag ces bya ba rtog med yin/ /dbyings nyid rtog pa spros bral bas/ /mo zhes bya ba dbyings su thim/ /de la phye na rnam pa gsum/ /dam chos skye med phag mo ni/ /skye 'gag med pas chos sku yin/ /brjod pa sgra yi phag mo ni/ /phag ni kA li thabs yin la/ /mo ni A li longs skur 'dod/ /mtshon pa dbyings kyi phag mo ni/ /stong nyid mtshon pa'i sku mdog la/ /rtog med snying rje phag gi gdong / /thabs dang shes rab phag mo la/ /bde stong skyon bral gcer bu ni/ /rtog pa med pas sprul sku'o/ /yig 'bru gsal la mi rtog pas/ /thim pa na yang cang te'u/ /snang stong mtha' dang bral ba'o/ /bskyed rdzogs ngo bo dbyer med pas/ /mtshon pa snang ba stong pa'i ngang / /de nyid snang ba'i ngo bo nyid/ /dbyer med gzung 'jug khas len bral/ /gcig la gcig rgyas gdab par bya/ /grol 'gyur 'di la the tshom med ces gsungs so/ /mkha' 'gro ma thams cad kyi thugs gnyis su med pa'i ye shes bsam gyis mi khyab pa phag mo mngon par 'byung ba'i rgyud las rgyud phyi ma bskyed rims bstan pa'i le'u ste dang po'o// // de nas dur khrod bdag mo des dpa' bo chen 87.94a po la 'dzum pa dang bcas nas zhus pa/ gsang sngags rnams kyi sngags ni gang / /bzlas par bya ba'i yi ge gang / /'khor lo rnam bzhi dgod pa gang zhes zhus pas/ he ru kas bka' stsal pa/ dur khrod bdag mos gus par gyis/ /gsang sngags rnams kyi yi ge ni/ /thams cad byed pa yi ge o~M/ /dgyes pa sku yi yi ge ni/ /badzra bA ra hi zhes 'byung / /nus pa 'byung ba gsung gi kro tA kA li/ /rtogs pa thugs ni ha ri sa/ /yon tan 'byung ba a be sha ya/ /phrin las mdzad pa e ba~M ma ya/ /de las gzhan yang 'di lta ste/ /'khor lo lnga yi dbus nyid du/ /yi ge bzhi pas rgyas btab nas/ /bzlas pa phyi nang gsang ba gsum/ /zhi ba phyi yi bzlas pa ni/ /yig 'bru rnams ni kha dog dkar/ /de las 'od zer dkar po 'phros/ /nyon mongs shes bya'i sgrib pa kun/ /ba spu'i sgo nas bstan pa yis/ /sems can kun la phog pas kyang / /sgrib pa thams cad dag par bsam/ /de bzhin gshegs la phog pas kyang / /mnyes pa'i mchod pa phul bas so/ /bdag la slar thim zhi ba 'grub/ /rgyas pa ser po 'phro 'du yis/ /gong bzhin spro bsdu shes par bya/ /dmar po dbang gi 'phro 'du bya/ /drag po nag po'i 'phro 'du bya/ /sna tshogs 'phros pas phrin las bzhi'i/ /dngos grub thams cad 'grub pa yin/ /nang dang gsang ba'i bzlas pa yang / /gong bzhin spro bsdu shes par bya/ /dur khrod phag mos yang gsol pa/ /zad cing 'phel bar byed pa gang / /mthar thug pa'i yi ge gang / /zhes zhus so/ /dpa' bo chen pos yang gsungs pa/ /gti mug zad byed a yin te/ /has ni zhe sdang zad par byed/ /nga rgyal zad byed ri yin te/ /ni yis 'dod chags zad par byed/ /phrag dog zad byed sa yin no/ /a ni chos dbyings ye shes 'phel/ /ha ni me long ye 87.94b shes 'phel/ /ri yis mnyam nyid ye shes 'phel/ /ni yis so sor rtog byed 'phel/ /sa yi bya grub ye shes 'phel/ /a ni sangs rgyas mkha' 'gror snang / /ha ni rdo rje mkha' 'gror snang / /ri ni rin chen mkha' 'gror snang / /ni yis pad ma mkha' 'gror snang / /sa yis las kyi mkha' 'gror snang / /as ni de bzhin rigs thob ste/ /has ni rdo rje'i rigs chen thob/ /ri ni rin chen rigs thob ste/ /ni yis pad ma'i rigs thob bo/ /sa ni las kyi rigs chen thob/ /chos sku'i mthar thug a yin te/ /longs sku'i rnam pa yi ge ha/ /sprul pa sku ni ri yin no/ /ngo bo nyid sku'i yi ge ni/ /rdo rje'i sku ni yi ge sa zhes gsungs so/ /dur khrod bdag mos yang zhus pa/ /dbang po rab 'bring rim pa yis/ /ji ltar shes na grol bar 'gyur/ /dpa' bo chen pos yang gsungs pa/ /dbang po rab 'bring gsum yin te/ /dbang po rab kyi gang zag la/ /skad cig drug gi gdams ngag bstan/ /ye shes skad cig dang po yis/ /gzung ba'i rnam par rtog pa gcad/ /skad cig gnyis pa'i ye shes kyis/ /'dzin pa'i rnam par rtog pa gcad/ /skad cig gsum pa'i ye shes kyis/ /gzung 'dzin gnyis kyi rtog pa gcad/ /skad cig bzhi pa'i ye shes kyis/ /nyams la zhen pa'i rnam rtog gcad/ /skad cig lnga pa'i ye shes kyis/ /nyams myong bde ba'i rnam rtog gcad/ /skad cig drug pa'i ye shes kyis/ /yid la byed pa'i rnam rtog gcad/ /grol 'gyur rab la the tshom med/ /dbang po 'bring po'i gang zag la/ /rlung drug man ngag bstan pa ni/ /lhan cig skyes pa'i rlung goms pas/ /rang bzhin sgrib pa sel bar byed/ /thad kar 'byung ba'i rlung goms pas/ /mtshan mo lta bu'i sgrib pa sel/ /rang las skyes pa'i rlung goms pas/ /chod pa'i sgrib pa sel bar byed/ /spong byed rlung la goms pa yis/ /sngon du rgyu ba'i sgrib pa sel/ /sbyong byed rlung la goms pa yis/ /shes 87.95a bya'i sgrib pa sel bar byed/ /rdzogs byed rlung la goms pa yis/ /sa rnams rims kyis gnon par byed/ /ye shes rnams ni dus gcig 'char/ /shes bya thams cad dus gcig chod/ /rlung drug ma yin ye shes yin/ /mun pa rnams ni bsgribs pa yis/ /ye shes rims kyis skye ba dang / /sgrib pa rims kyis sel bar byed/ /grol 'gyur 'di la the tshom med/ /dbang po tha ma'i gang zag la/ /yul ni dag pa'i sangs rgyas zhing / /lus dag pa ni dkyil 'khor yin/ /rang sems dag pa phag mo'i sku/ /ngag dag pa ni sngags su gsungs/ /lta bsgom dag pa dngos grub yin/ /dpe don gnyis su med pa gang / /skal med dngos grub mi 'byung bas/ /lo drug bsgoms na the tshom med ces gsungs so/ /mkha' 'gro ma thams cad kyi thugs gnyis su med pa'i ye shes bsam gyis mi khyab pa phag mo mngon par 'byung ba'i rgyud las rgyud phyi ma rdzogs rim bstan pa'i le'u ste gnyis pa rdzogs s+ho// // paN Di ta gA ya d+ha ra'i zhal snga nas/ lots+tsha ba gyi jo zla ba 'od zer gyis bsgyur ba'o/ / |