@#/ /rgya gar skad du/ shrI sa~M ba ra kha sa ma tan+t+ra rA dza nA ma/ bod skad du/ dpal bde mchog nam mkha' dang mnyam pa'i rgyud kyi rgyal po zhes bya ba/ 'jam dpal ye shes sems dpa' la phyag 'tshal lo/ /'di skad bdag gis thos pa dus gcig na/ bcom ldan 'das de bzhin gshegs pa thams cad kyi sku dang gsung dang thugs rdo rje btsun mo'i b+ha ga la bzhugs so/ /de nas de bzhin gshegs pa thams cad kyi byin gyis brlabs kyis rdo rje snying pos gsol pa/ kye bcom ldan 'das gsang ba bas kyang ches gsang ba/ gsang ba chen po de bshad du gsol/ bcom ldan 'das kyis bka' stsal pa/ /rdo rje snying po khyod nyon cig /srog dang lnga pa de bzhin du/ /lam dang 'bras bu nyid yin no/ /rdo rje snying pos gsol pa/ bcom ldan 'das srog gang lags/ /bcom ldan 'das kyis bka' stsal pa/ /srog ni 'dzin par byed pa ste/ /sngags dang rlung dang rten nyid do/ /rdo rje snying pos gsol pa/ bcom ldan 'das lnga pa gang lags/ bcom ldan 'das kyis bka' stsal pa/ /sangs rgyas lnga dang 'byung ba lnga/ /lnga pa yang ni gcig nyid do/ /rdo rje snying pos gsol pa/ bcom ldan 'das lam gang lags/ bcom ldan 'das kyis bka' stsal pa/ smin pa dang ni grol ba'o/ /rdo rje snying pos gsol pa/ smin pa'i 87.80b lam ni gang lags/ /bcom ldan 'das kyis bka' stsal pa/ /bum pa gsang ba shes rab dang / /bzhi pa'i rang bzhin ngo bo ste/ /de yi rnam pa de la gnas/ /rdo rje snying pos gsol pa/ bcom ldan 'das grol ba'i lam gang lags/ /bcom ldan 'das kyis bka' stsal pa/ /snying rje chen po las skyes pa/ /dga' ba'i shugs las rnam par grub/ /thabs dang shes rab gnyis med mchog /bde ba chen po lam yin no/ /rdo rje snying pos gsol pa/ bcom ldan 'das snying rje chen po ni gang / dga' ba ni gang / thabs ni gang / shes rab ni gang / gnyis su med pa ni gang lags/ bcom ldan 'das kyis bka' stsal pa/ /dmigs pa med pa snying rje'i mchog /dga' ba gnyis med bde ba che/ /thabs ni he ru ka dpal nyid/ /shes rab rdo rje rnal 'byor ma/ /gnyis su med pa zung 'jug mchog /rdo rje snying pos gsol pa/ bcom ldan 'das he ru ka ni gang lags/ rnal 'byor ma ni gang lags/ bcom ldan 'das kyis bka' stsal pa/ /he ru ka ni phung po nyid/ /phung po yang ni he ru ka /khams ni rdo rje ma dpal te/ /rdo rje ma dpal khams nyid do/ /skye mched de yang de bzhin du/ /lha yi ngo bor shes par bya/ /rdo rje snying pos gsol pa/ bcom ldan 'das phung po'i he ru ka gang lags/ khams kyi rdo rje rnal 'byor ma gang lags/ bcom ldan 'das kyis bka' stsal pa/ /he ru ka dpal bdag nyid dngos/ /dri ma med pa'i kha dog can/ /rdo rje dril bu 'dzin pa ste/ /drug gis brgyan cing dgu dang ldan/ /zla tshes sna tshogs rdo rje dang / /rigs kyi bdag pos rnam par brgyan/ /spyan gsum dag gis mdzes pa ste/ /chags pa med pa'i sham thabs can/ /shes rab rang bzhin rnal 'byor ma/ /ban+du dmar po'i kha dog can/ /gcer bu phyag rgya lngas brgyan cing / /dag pa lnga bcu yi phreng bas mdzes/ /rdo rje pad ma'i snod snams pa/ /yab la 'khyud cing brkyang bskum bzhugs/ /gnyis med 87.81a bde ba la dgyes pa/ /chu skyes nyi ma'i dbus na 'gying / /khams nyid kyang ni lha nyid do/ /dpal bde mchog nam mkha' dang mnyam pa'i rgyud las bskyed pa'i rim pa'i dum bu ste le'u dang po'o// // rdo rje snying pos gsol pa/ bcom ldan 'das rang bzhin gyis rnam par dag pa ni gang lags/ ngo bo nyid kyis 'od gsal ba ni gang lags/ bcom ldan 'das kyis bka' stsal pa/ /brtan dang g.yo ba thams cad kun/ /shes rab rang bzhin ma nyid de/ /lnga pa'i ngo bo 'od gsal nyid/ /ma skyes rtog pa bral ba'i sku/ /brjod du med cing bsam mi khyab/ /rtog pa med pa nam mkha'i dbus/ /gnyis med bde ba'i rnam pa can/ /gsal ba'i rang bzhin g.yo ba med/ /gnyisu med pa bde ba'i mchog /'bras bu lam gyi rnam pa'o/ /dpal bde mchog nam mkha' dang mnyam pa'i rgyud las rdzogs pa'i rim pa'i dum bu ste le'u gnyis pa'o// // rdo rje snying pos gsol pa/ bcom ldan 'das rnam par rtog pa rnam par dag pa ni gang lags/ /bcom ldan 'das kyis bka' stsal pa/ /sngags dang sbyin sreg gtor ma dang / /dbang gi rnam par dag pa dang / /maN+Dal dang ni de bzhin du/ /bum pa'i ngo bo lhar shes pa/ /sngags kyi de bzhin gnas pa'o/ /rdo rje snying pos gsol pa/ bcom ldan 'das sngags ni gang / sbyin sreg ni gang / gtor ma ni gang / dbang ni gang / maN+Dal ni gang / bum pa ni gang / sngags kyi de bzhin nyid ni gang lags/ bcom ldan 'das kyis bka' stsal pa/ sngags ni gsang sngags rgyal po ste/ o~M shrI badzra he he ru ru ka~M hu~M hU~M phaT/ DA ki nI dzA la sam+ba ra swA hA/ o~M hrIHha ha hUM phaT/ sar+b+ba bu d+ha DA ki nI ye badzra war+N+Na nI ye hu~M hU~M phaT swA hA/ o~M badzra bai ro tsa nI ye hu~M hU~M phaT swA hA/ gsang sngags rgyal po 'di dag gis/ /bskal pa stong la sogs pa yi/ /sdig pa ma lus dag byed chu/ /gru bzhi pa la sgo bzhi pa/ /'khor lo dag gis rnam par mdzes/ /a shwat+tha dang n+ya gro d+ha/ /dUr ba la sogs de bzhin du/ /bzhi 87.81b ba'i ngo bor yang dag shes/ /sha lnga dang ni bdud rtsi lnga/ /gyen du pheM gyi sgra bsgrags pas/ /dpa' bo rnal 'byor ma kun dgyes/ /dbang ni tha ma'i lam nyid do/ /bdud rtsi chu yis legs byugs nas/ /me tog dmar pos mchod pa'o/ /rin chen snod bzangs bru~M gyis mdzes/ /dpa' bo bdud rtsi dag byed chu/ /zhal bzhi sngags kyi 'od zer gyis/ /gdug pa ma lus kun 'dul zhing / /spro dang bsdu ba'i rnam pa can/ /rdo rje snying pos gsol pa/ kye bcom ldan 'das skye mched kyi mkha' 'gro ma gang lags/ bcom ldan 'das kyis bka' stsal pa/ /gcer bu thal ba'i mdog can te/ /nyi shu rtsa bzhi'i yul rnams 'grim/ /lnga pa dang ni drug pa'o/ /rdo rje snying pos gsol pa/ bcom ldan 'das sngags ni gang / gtor ma ni gang lags/ bcom ldan 'das kyis bka' stsal pa/ o~M dz+wa la mu khi DA ki nI ka~M ka ni hU~M phaT/ o~M pa ri nA ya ni DA ki nI hU~M phaT/ o~M ma Di ra DA ki nI hU~M phaT/ o~M pa ra mu khi DA ki nI hU~M phaT/ o~M u lu ka ti DA ki nI hU~M phaT/ o~M a ra na ma ni DA ki nI hU~M phaT/ chu skyes dag gis rnam brgyan cing / /bdud rtsi lnga yis rnam par mdzes/ /dpa' mo drug ni mnyes par 'gyur/ /rdo rje snying pos gsol pa/ bcom ldan 'das rnam pa'i ngo bo ni gang / /sprul pa'i ngo bo ni gang lags/ bcom ldan 'das kyis bka' stsal pa/ /rnam pa'i ngo bo lha nyid de/ /sprul pa tshogs kyi bdag por bshad/ /rdo rje snying pos gsol pa/ bcom ldan 'das tshogs kyi bdag po ni gang / bcom ldan 'das kyis bka' stsal pa/ /dbang gi kha dog dmar po ste/ /zhal gcig pa la phyag bzhi pa/ /sprul pa 'khor lo'i rtsibs la gnas/ /brkyang bskum tshul gyis mnan pa'o/ /rdo rje snying pos gsol pa/ bcom ldan 'das bsnyen par bya ba gang lags/ bcom ldan 'das kyis bka' stsal pa/ /bsnyen par bya ba sngags nyid de/ /o~M ga Na pata ye swA hA/ nag po 'bru yi ri lu la/ /bsnyen dang sgrub pa'i lhar gnas 87.82a pa/ /sngags kyi ngo bor shes par bya/ /dpal bde mchog nam mkha' dang mnyam pa'i rgyud las las sna tshogs kyi dum bu ste le'u gsum pa'o// //bcom ldan 'das kyis de skad ces bka' stsal pa dang / byang chub sems dpa' rdo rje snying po dang / byang chub sems dpa' rdo rje gnod gnas la sogs pa dang / rnal 'byor ma dpag tu med pa'i 'khor de dag rjes su yi rangs te/ bcom ldan 'das kyis gsungs pa la mngon par bstod do/ /kha che'i mkhan po dz+nyA na badzras rang 'gyur du mdzad pa rdzogs s+ho// // ye d+harmA he tu pra b+ha bA he tun to ShAn ta thA ga to h+ya ba data/ te ShAny+tsa yo ni ro d+ha e ba~M bA dI ma hA shra ma NAH/ /ma~M ga la b+ha ba tu/ shu b+hamastu sarba dzA ga ta~M/ shu b+ha/ ma~M ga la~M b+ha ba tu/ shu b+hamastu sarba dzA ga ta~M/ shu b+ha~M/ |