@#/ /rgya gar skad du/ shrI ma hA bA la dz+nyA na rA dza tan+t+ra rA dza/ bod skad du/ dpal stobs chen ye shes rgyal po'i rgyud kyi rgyal po/ dpal rdo rje sems dpa' la phyag 'tshal lo/ /'di skad bdag gis thos pa dus gcig na/ /bcom ldan 'das de kho na nyid btsun mo'i b+ha ga la 'khor dpa' bo rdo rje la sogs pa mkha' 'gro ma dang / ma mo'i tshogs kyis bskor te bzhugs pa'i dus su/ dpa' bo rdo rje mkha' 'gro ma la sogs pas g.yon phyogs su bskor ba lan gsum byas nas phyogs gcig tu 'khod do/ /dpa' bo rdo rjes bcom ldan 'das la spyi bos gtugs te/ ha ha zhes pa gsum brjod nas bcom ldan 'das la gsol pa/ rtsa ni gang lags rlung gang lags/ /thig la gang lags grangs ni du/ /de la sems gzung ji ltar lags/ /'khor lo ji ltar lags pa dang / /de yi grangs ni du zhig mchis/ /rtsa rnams rang bzhin ji ltar lags/ /yi ge dgod thabs ji ltar lags/ /de rnams dbus kyi lte bar ni/ /yi ge dgod pa gang dang gang / /gtum mo sbar ba ji ltar lags/ /zla ba nyi ma ji ltar lags/ /gnas ni gang du gzung bar bgyi/ /rkyen gnyis 'khor lo ji ltar lags/ /go bzlog tshul ni ji ltar lags/ /gsang ba'i 'khor lo bzhi gang lags/ /de rnams kyi ni dgongs pa dang / /de la dga' sogs ji ltar 'byung / /stong pa bcu drug ji ltar lags/ /sa yi rim pa ji ltar lags/ /de rnams kyi ni dgongs pa dang / /dgos pa'i dgongs pa ji ltar lags/ /bcom ldan 'das kyis bka' stsal pa/ /nyon cig dpa' bo rdo rje khyod/ /khyod la bshad kyis legs par zung / /rtsa rnams kyi ni rang bzhin ni/ /nam mkha' gnyis med thams cad bskyed/ /der gnas rlung gi rang bzhin ni/ /g.yo ba rnam shes g.yo ba yin/ /thig le stong nyid ngo bo ste/ /stong nyid bsam du med pa'o/ /thig le grangs ni bcu drug ste/ /rtsa dang rlung yang de bzhin no/ /de nas sems gzung bstan pa ni/ /rtsa rlung dang ni thig le la/ /gnyis med rtse gcig sems dang po/ /'khor lo'i 87.71b grangs ni bzhi yin te/ /bde chen 'khor lo longs spyod chos/ /de 'og sprul pa'i 'khor lo ste/ /de re la yang bzhi bzhi ste/ /bcu drug grangs su shes par bya/ /me rlung gnyis ni rkyen yin te/ /ro ma'i 'khor lo nyid dang ni/ /spyi gtsug 'khor lo dbang bskur gnas/ /gsang ba'i 'khor lo bzhi yin te/ /bde skyong 'khor lo dang po ste/ /rta mgrin longs spyod 'khor lo yin/ /rig pa'i 'khor lo gsum pa'o/ /gsang ba'i 'khor lo bzhi yin no/ /nyi shu rtsa bzhi grangs su bstan/ /rtsa rnams rang bzhin nga yis bshad/ /rtsa ni sa yi rang bzhin te/ /rlung dang thig le'i rang bzhin no/ /de nas yi ge dgod pa ni/ /bde chen 'khor lo sum bcu gnyis/ /gsal byed sum bcu rtsa gnyis ni/ /g.yas nas bskor te dgod par bya/ /longs spyod 'khor lo'i rtsibs bcu drug /dbyangs yig bcu drug g.yon nas dgod/ /chos kyi 'khor lo 'dab ma brgyad/ /yum bzhi'i sa bon g.yon nas dgod/ /thabs ni mtshams te g.yas nas bskor/ /sprul pa'i 'khor lo'i 'dab ma ni/ /drug bcu rtsa bzhi gang yin la/ /gsal byed g.yas bskor dgod par bya/ /dbyangs yig gnyis ldan g.yon nas bskor/ /bde chen 'khor lo'i lte dbus su/ /ha~M ni dkar po thur bltas bsam/ /longs spyod 'khor lo'i lte dbus su/ /o~M ni dkar po gyen bltas bsam/ /chos kyi 'khor lo'i lte dbus su/ /hU~M ni sngon po thur bltas bsam/ /sprul pa'i 'khor lo'i lte dbus su/ /a ni dmar po gyen bltas bsam/ /rkyen gyi 'khor lo gnyis yin te/ /dang po'i gnas su yi ge ya~M/ /gtum mo 'bar ba'i ya~M yin te/ /nag po yongs su gyur ba las/ /rlung 'khor mdog gnag gzhu yi dbyibs/ /dbus su d+ha lnga dgod byas nas/ /ba dan lnga ni mdzes pa'o/ /gru gsum gnas su yi ge ra~M/ /me yi 'khor lo gru gsum dmar/ /dbus su o~M AHhU~M ni dgod/ /zur la rdo rje gsum gyis mtshan/ /rkyen gyi 'khor lo de ltar yin/ /rlung gis bskyod pas dam tshig mes/ / 87.72a ye shes me ni bskul ba mkhas/ /'khor lo bzhi 'am brgyad gnyis bshad/ /bde chen ma rtogs gnyis tsam bsregs/ /bde chen ha~M ni bsros byas nas/ /zhu ba 'chi med bdud rtsi ni/ /zla ba zhu ba'i bdud rtsi yis/ /srog gi rtsa yi nang nas 'bab/ /rgyun du 'bab par gyur pa yis/ /'chi med thigs pa gnyis yin te/ /gzung ba mdud pa'i nang du gzung / /go bzlog lugs su bzlog pa ste/ /mthar thug gnas su gzung ba'o/ /gsang ba'i 'khor lo bzhi pa ni/ /gsang ba bde skyong 'khor lo ste/ /hU~M ni lte bar dgod byas nas/ /'dab ma lnga bcu brgyad kyi grangs/ /gsal byed lugs bzhin dgod par bya/ /dbyangs yig rim gnyis dag bkod nas/ /tha ma bzung ste spangs pa'o/ /sdig pa spong phyir bde skyong ste/ /de phyir bde skyong zhes ni bshad/ /rta mgrin 'khor lo'i 'dab bzung la/ /dbyangs yig lugs dang lugs min dgod/ /lte bar u ni dgod par bya/ /bde ba'i longs spyod myong ba'i phyir/ /rta mgrin 'khor lo ru ni bshad/ /rig pa'i 'khor lo 'dab ma lnga/ /lte bar ha~M ni dgod byas nas/ /'dab ma lnga la o~M hU~M tra~M a/ /g.yas nas rims gyis dgod par bya/ /bzhi pa'i don ni rig pa'i phyir/ /rig pa'i 'khor lo zhes ni bshad/ /gsang ba'i 'khor lo rim pa drug /lte ba 'dab bzhi 'dab ma brgyad/ /bcu drug sum bcu rtsa gnyis te/ /drug bcu rtsa bzhi bshad pa yin/ /lte bar a ni dgod pa ste/ /e ba~M ma ya de rnams ni/ /'dab ma bzhi la g.yon nas dgod/ /'dab ma brgyad la dgod bya ba/ /sde brgyad kyi ni dang po brgyad/ /g.yon gyi rim pas dgod par bya/ /'dab ma bcu drug gang yin la/ /ma mo bcu drug g.yon nas dgod/ /'dab ma sum bcu gnyis sogs la/ /dbyangs yig yi ge bcu drug ni/ /g.yas dang g.yon gyi rim pas dgod/ /'dab ma drug bcu rtsa bzhi la/ /g.yas nas kA li lugs bzhin dgod/ /A li rim 87.72b gnyis g.yon nas dgod/ /gsang ba'i dbang bskur ba'i phyir/ /gsang ba'i 'khor lo zhes ni bshad/ /de nas ro ma'i 'khor lo ni/ /'dab ma gnyis la lte bar bcas/ /ma ning bzhi yi 'dab gnyis la/ /lte bar de nyid thur la dgod/ /rin chen rtse mo bsam bya ba/ /b+h+ya ni gyen la dgod par bya/ /yi ge gnyis kyi dbus su ni/ /byang chub sems kyi bde ba'i ro/ /nyams su myong bar bya ba'i phyir/ /nyams myong ro ma'i 'khor lor bshad/ /de nas dbang bskur 'khor lo ni/ /steng gi tshangs sgo'i 'dab ma brgyad/ /lte bar a~M ni dgod pa ste/ /da~M la~M kha~M ru~M/ g.yon nas brtsams te phyogs bzhir dgod/ /hU~M trA~M hrI a/ g.yas nas mtshams su rim par dgod/ /byang chub sems kyi chu rgyun gyis/ /lus ngag yid gsum sgrib pa dag /'khrud pa'i phyir na dbang bskur te/ /de phyir dbang bskur 'khor lor bshad/ /de nas yang ni bshad bya ba/ /mdor bsdus bsgom pa bshad par bya/ /gong du bstan pa gang yin pa/ /sgyu ma tsam du shes par bya/ /rang rig sems las gzhan min te/ /rang gi sems kyi stong pa nyid/ /'od gsal ba yi rang bzhin du/ /ci yang mi rtog shes 'gyur na/ /ma bsgoms na yang bsgom pa nyid/ /de ltar sems la legs par zung / /bcom ldan 'das kyis de skad ces bka' stsal pa dang / dpa' bo rdo rje la sogs pa'i dpa' bo dang / mkha' 'gro ma dang / ma mo la sogs pa'i 'khor dpag tu med pa rjes su yi rang bar gyur te/ phyi nang gsang ba'i mchod pas mchod nas mi snang bar gyur to/ /dpal stobs chen ye shes rgyal po'i rgyud kyi rgyal po rmad du byung ba rdzogs s+ho// //rgya gar gyi mkhan po gA ya d+ha ra dang / lots+tsha ba dge slong shAkya ye shes kyis bsgyur ba'o/ / |