@#/ /rgya gar skad du/ shrI ag+ni mA le tan+t+ra rA dzA/ bod skad du/ dpal me'i phreng ba'i rgyud kyi rgyal po/ dpal rdo rje sems dpa' la phyag 'tshal lo/ /ha ha hi hi he he kye/ /bdag la khyed la zhu ba mchis/ /shrI ni gang lags he gang lags/ /ru ni gang lags ka gang lags/ /dbang bzhi he ru ka gang lags/ /bcom ldan 'das kyis bka' stsal pa/ /shrI ni gnyis med ye shes te/ /he ni rgyu sogs rnam par spangs/ /ru ni tshogs dang bral ba nyid/ /ka ni gang du'ang mi gnas so/ /de lta'i dpal ldan he ru ka / rtag tu lus dang sems la gnas/ /de nyid la yang rnam pa bzhi/ /dbang bzhi grangs kyis nges pa ste/ /dang po bum dbang he ru ka / sku dang phyag mtshan snang ba'i tshe/ /rang sems las su rung ba ste/ /de tshe 'jig rten tha mal pa'i/ /rgyu drug rkyen bzhi 'bras bu bzhi/ /spangs pa'i phyir na he zhes brjod/ /las dang nyon mongs tshogs dang bral/ /de yi phyir na ru zhes brjod/ /'jig rten tha mal rnam rtog gi/ /gzung 'dzin gang yang mi gnas pa'i/ /phyir na ka zhes gsungs pa'o/ /thabs dang shes rab zung 'jug pas/ /gzung 'dzin gnyis bgags gnyis su med/ /de yi phyir na shrI ru brjod/ /bskyed pa'i rim pa he ru ka / phag mo la gnas tshogs dang ldan/ /zag med rgyu rkyen kun dang ldan/ /thabs dang shes rab gnyis kyi tshul/ /de nas gsang dbang he ru ka / nyi zla phyag mtshan yig 'bru'i tshogs/ /bskyed rim rgyu rkyen kun 87.68a spangs te/ /rlung sogs las su rung bas na/ /de yi phyir na he zhes brjod/ /phyi yi sbyin sreg gtor ma dang / /mchod pa dkyil 'khor la sogs pa'i/ /tshogs dang bral ba'i phyir na ru/ /bskyed pa'i rdo rje phag mo dang / /dmigs dang lta spyod gang la yang / /mi gnas phyir na ka zhes brjod/ /bskyed pa'i gzung 'dzin gnyis med ma'o/ /phyir na shrI zhes gsungs pa ste/ /rgyu rnams lam la sogs dang ldan/ /rlung sogs thabs dang shes rab tshul/ /rlung sogs sgyu ma'i ngo bor gnas/ /rtsa rlung rang bzhin gnas la sogs/ /nang gi rgyu dang rkyen sogs ldan/ /nang gi dpal ldan he ru ka / de nas gsum pa'i he ru ka / rlung sogs rang bzhin gnas pa yi/ /rgyu spangs phyir ni he zhes brjod/ /rlung sogs lam la brten pa yi/ /tshogs dang bral phyir ru zhes brjod/ /rlung dang rtsa dang thig le dang / /tsaN+DA li yi kha dog dang / /dbyibs la mi gnas phyir na ka / sems nyid bde bar gnas pas so/ /nang gi thabs dang shes rab med/ /de'i phyir na shrI ru gsungs/ /mig ser nad kyis btab pa ltar/ /rang sems bde bar gnas pas so/ /sems nyid bde bar gnas pa dang / /bde ba la bsten tshogs dang ldan/ /lhan cig skyes pa'i rgyu rkyen ldan/ /sems dang bde ba tha dad med/ /sems dang bde ba gang gnas pa/ /mchog dang chad pa'i dbus gnas pa/ /gsum pa'i dpal ldan he ru ka / de nas bzhi pa'i he ru ka / rang rig stong par gnas pa'i tshe/ /lhan cig skyes pa'i rgyu rkyen bral/ /de yi phyir na he zhes brjod/ /pha rol phyin drug bde ba'i lam/ /thams cad stong par ro gcig pas/ /tshogs gnyis bral phyir ru zhes brjod/ /bde ba tsam la 'ang mi gnas phyir/ /ka zhes nges par brjod pa yin/ /sems nyid rang rig stong par gnas/ /stobs sogs phun sum tshogs pas na/ /rang bzhin lhan cig skyes pa dang / /gzugs sku'i rgyu rkyen la sogs ldan/ /shrI zhes bya ba mngon par brjod/ /dbyings dang ye shes gnyis su med/ /dngos por ro mnyam mtha' yas pa'i/ /sems kyi de 87.68b nyid la gnas pa/ /bzhi pa'i dpal ldan he ru ka / bdud rnams kun la tho 'tsham zhing / /lhan cig skyes pa'i dur khrod rol/ /mi gsal gsal ba'i rang bzhin med/ /snang zhing gsal la rang bzhin med/ /me long bzhin 'dra chu zla bzhin/ /mkhas pas 'bad de 'khrul pa spang / /de ltar don ni ma rtogs par/ /kha cig sku mdog phyag mtshan la/ /he ru ka yi rnam par rtog /kha cig gzugs brnyan rnam par rtog /kha cig rang gi ngo bor 'dod/ /de bzhin rtsa dang rlung 'dod sogs/ /de bzhin rang rig he ru ka / bla ma ma bsten brtson 'grus med/ /shes rab mi ldan bzod sogs med/ /rigs dang rig pa'i nga rgyal can/ /khe dang grags pa rnyed dang dga'/ /rgyu des log rtog sna tshogs bskyed/ /de bas he ru kar grags pa'i/ /dngos grub 'dod pa'i rnal 'byor pas/ /dad ldan gus bcas pha rol phyin/ /rdzogs byas bla ma dam pa las/ /man ngag yang dag blang bar bya/ /ma mo'i tshogs kyis yang zhus pa/ /he ru ka dpal de ltar na/ /rdo rje phag mo ji ltar lags/ /bcom ldan 'das kyis bka' stsal pa/ /rdo rje gsum ste phag ni gnyis/ /don gyi rdo rje de nas rtags/ /tha ma rdzas kyi rdo rje ste/ /don gyi rdo rje bzhi pa ste/ /gzung 'dzin rnam par rtog pa yis/ /mi phyed phyir na rdo rje ste/ /dbang bzhis rdo rje re re'o/ /rtags kyi rdo rje gsum yin te/ /rtse gsum rtse lnga rtse dgu ste/ /rtse gsum sku gsung thugs kyi rtags/ /rtse lnga ye shes lnga yin te/ /khams gsum sa dgu 'joms pa yi/ /rtags su rdo rje rtse dgu'o/ /rdzas kyi rdo rje bzhi yin te/ /zlum po la sogs rnam pa bzhi/ /mi shes dri mas ches gos pa'i/ /dud 'gror skyes pa'i phag mo dang / /shes rab char byung phag mo ste/ /de nyid rnam pa bzhi ru nges/ /bum dbang zhe sdang gti mug phag /gsang dbang rlung gi gti mug phag /gsum pa chags dga' gti mug phag /bzhi pa chos dbyings gti mug phag /'di nyid khyod la legs par gtad/ /thams cad rjes su yi rang ngo / /dpal me'i 87.69a phreng ba'i rgyud kyi rgyal po shrI he ru ka'i nges par 'byung ba rdzogs s+ho// // rgya gar gyi mkhan po gA ya d+ha ra dang / lots+tsha ba dge slong shAkya ye shes kyis bsgyur cing zhus pa'o/ / |