@#/ /rgya gar skad du/ shrI badzra b+hai ra ba bi dA ra NA tan+t+ra rA dza/ / bod skad du/ dpal rdo rje 'jigs byed rnam par 'joms pa'i rgyud kyi rgyal po/ dpal he ru ka la phyag 'tshal lo/ /'di skad bdag gis thos pa dus gcig na/ bcom ldan 'das 'khor dpag tu med pa dang / ri rab kyi steng du bzhugs pa'i dus su byang chub sems dpa' rdo rje snying pos/ bcom ldan 'das la lan gsum bskor ba byas te thal mo sbyar nas 'di skad ces gsol to/ /thugs rje che ldan bcom ldan 'das/ /rdo rje gang lags 'jigs byed gang / /'joms pa gang lags rgyud gang lags/ /rgyal po gang lags bshad du gsol/ /bcom ldan 'das kyis bka' stsal pa/ /rdo rje rnam pa gsum yin te/ /nyon mongs bdud sogs 'jigs par byed/ / 87.67a nyon mongs dgra sogs rnam par 'joms/ /rgyu yi rgyud dang 'bras bu'i rgyud/ /mthar thug rgyud ni gang yin la/ /rgyal po zhes ni bstan pa yin/ /rdo rje snying pos yang gsol pa/ /re re'i bye brag ma 'tshal bas/ /de yi dbye ba bshad du gsol/ /bcom ldan 'das kyis bka' stsal pa/ /rdo rje rnam pa gsum yin te/ /don gyi rdo rje de nas rtags/ /rdzas kyi rdo rje dang ni gsum/ /de nas don gyi rdo rje bshad/ /gzung 'dzin rtog pas mi phyed phyir/ /don gyi rdo rje bshad pa'o/ /dbang bzhi rdo rje re re ste/ /rdo rje bzhi ru bshad pa yin/ /rtags kyi rdo rje gsum yin te/ /rtse gsum rtse lnga rtse dgu pa/ /rtse gsum sku gsung thugs kyi rtags/ /rtse lnga ye shes lnga yi rtags/ /rtse dgu khams gsum sa dgu'i rtags/ /don gyi rdo rje bzhi yin te/ /bum pa'i dbang dang 'brel pa yi/ /sku mdog phyag mtshan la sogs pa/ /gzung dang 'dzin pa'i rnam rtog ni/ /'jigs dang 'joms pas rdo rje'o/ /gsang ba'i dbang dang 'brel pa yi/ /rtsa dang rlung dang thig le la/ /gzung 'dzin gnyis su gang rtog pa/ /'jig cing 'joms pas rdo rje'o/ /shes rab ye shes dang 'brel pa'i/ /lhan cig skyes dga' la sogs la/ /gzung dang 'dzin par gang rtog pa/ /'jig cing 'joms pas rdo rje yin/ /bzhi pa'i dbang dang 'brel pa yi/ /rang rig sems nyid stong nyid la/ /gzung 'dzin gnyis su gang rtogs pa/ /'jig cing 'joms pas rdo rje'o/ /de nas rtags kyi rdo rje ni/ /rtse gsum sku gsung thugs su bshad/ /'dod chags zhe sdang gti mug gsum/ /'jig cing 'joms pas rdo rje ste/ /rtse lnga ye shes lnga yi rtags/ /nga rgyal la sogs rnam pa lnga/ /'jig cing 'joms pas rdo rje'o/ /de nas rdzas kyi rdo rje ni/ /rnam pa bzhi ru bstan pa ste/ /zur gsum rno la 'bigs pa dang / /gru bzhi dag ni gsal bar byed/ /zlum pos rdzas rnams 'joms par byed/ /zur lngas 'dod bsgrub rdzas rdo rje/ /rgyud kyi don ni rnam pa bzhi/ /rgyu dang 'bras bu gnyis ka'i rgyud/ /mthar thug rgyud ni 87.67b rgyal po ste/ /de rnams kun la dbang byed pas/ /log lta'i rgyud sogs spong bar byed/ /bcom ldan 'das kyis de skad ces bka' stsal pa dang / byang chub sems dpa'i 'khor dpag tu med pa rnams dga' zhing mgu nas rjes su yid rangs te/ g.yas phyogs nas lan gsum bskor nas so so'i rdzu 'phrul gyis mi snang bar gyur to/ /dpal rdo rje 'jigs byed rnam par 'joms pa'i rgyud kyi rgyal po rdzogs s+ho// // paN Di ta gA ya d+ha ra dang / lots+tsha ba dge slong shAkya ye shes kyis bsgyur ba'o/ / |