@#/ /rgya gar skad du/ shrI DA ki nI gu h+ya dz+wa la tan+t+ra rA dza/ bod skad du/ dpal mkha' 'gro ma gsang ba 'bar ba'i rgyud kyi rgyal po/ dpal bde ba chen po la phyag 'tshal lo/ /kye a la la ho/ kye a la la ho/ mkha' 'gro gang lags ma gang lags/ /gsang dang rgyud dang rgyal po gang / /nyon cig byang chub sems dpa' khyod/ /mkha' 'gro bzhi ste ma ni gsum/ /gsang ba drug ste rgyud brgyad do/ /rgyal po bcu dgu dag tu bstan/ /dang po mkha' 'gro dbye ba yang / /rags pa'i rtog pa spang ba'i phyir/ /bum pa'i dbang 87.65b dang 'brel pa yi/ /sku mdog phyag mtshan dang po'o/ /sku mdog phyag mtshan spang ba'i phyir/ /gsang ba'i dbang dang 'brel ba yi/ /rlung dang rtsa sogs tsaN+DA li/ /'di dag mkha' 'gro gnyis pa ste/ /dman pa rnams la sku dang phyag /rlung dang rtsa sogs kha dog dbyibs/ /de nyid spang bar bya ba'i phyir/ /shes rab ye shes dang 'brel ba'i/ /lhan cig skyes pa dga' ba'i ro/ /'di dag gsang ba'i mkha' 'gro ste/ /mkha' 'gro 'di rnams rim pa las/ /dman pa rnam la phra ba'i gzugs/ /lus sems tshor ba bde ba las/ /'das pa'i bde ba chen po dag /spang phyir rang rig ye shes te/ /sems kyi de nyid stong ba'i ro/ /de nyid mkha' 'gro bzhi pa ste/ /shes brjod kun gyi yul ma yin/ /de nyid lnga la sogs pa yi/ /mkha' 'gro 'di rnams rim pa yang / /sku mdog phyag mtshan rags pa'i gnyen/ /rlung dang rtsa sogs bum dbang spong / /bde bas rlung dang rtsa sogs spong / /rang rig stong pas bde ba spong / /gzugs sku gnyis kyis stong pa spong / /de phyir gong ma gnyan por bshad/ /rags pa phung sogs bum dbang rgyu/ /bum dbang gsang dbang rgyu yin te/ /gsang ba gsum pa'i rgyu ru nges/ /bde ba rang rig skyed pa yi/ /rgyu dang 'bras bu nges pa ste/ /'bras bu bzhi dang mi mthun bzhi/ /mkha' 'gro rnams kyis rim pa'o/ /ma ni rnam pa gsum yin te/ /'dod chags chen pos bcom ldan 'das/ /zhe sdang chen pos bcom ldan 'das/ /gti mug chen pos bcom ldan 'das/ /nga rgyal la sogs de dang 'dra/ /thun mong ma yin sras 'byung bas/ /ma zhes gsungs pa yin par 'dod/ /snod min gsang ba sgrogs thos pa/ /skrag pa thun mong ma yin bskyed/ /bskyed pa'i phyir na ma zhes bya/ /skye ba gcig gis sangs rgyas pas/ /sras rnams thun mong ma yin skyed/ / 87.66a de'i phyir na ma zhes bya/ /thun mong bla ma'i zhal nas shes/ /de nas gsang ba bshad bya ste/ /bdud rtsi drug dag gsang ba ste/ /gzugs dang sgra dang dri dang ro/ /reg bya de bzhin chos yin te/ /rgyud ni dbang bzhi ngo bo ste/ /brjod bya brjod byed brgyad du bshad/ /gsang ba lnga ni rgyal po lnga/ /lta ba spyod pa zung 'jug lam/ /rgyu dang 'bras bu sa la sogs/ /bcu dgu rgyal po yin par gsungs/ /kye bo dpa' bo 'jigs pa che/ /gnod sbyin gzugs dang srin po gzugs/ /gzhan yang bdud la sogs pa'i gzugs/ /sna tshogs ston na ji ltar bgyi/ /lha 'am klu la sogs pa'i gzugs/ /sdug pa ston na ji ltar bgyi/ /gnod sbyin sgra dang srin po sgra/ /shin du 'jigs pa'i sgra grag na/ /de la bdag gis ji ltar bgyi/ /tshangs pa'i sgra dang ngang pa'i sgra/ /sgra snyan byung na ji ltar bgyi/ /bya rgod dri dang bla rtsi dri/ /ngan skyugs la sogs dri byung na/ /de la bdag gis ji ltar bgyi/ /gur kum tsan dan ga pur sogs/ /dri zhim byung na ji ltar bgyi/ /bdud rtsi la sogs drug bcu sogs/ /bzang po ston na ji ltar bgyi/ /ngan skyugs la sogs dman pa'i ro/ /sna tshogs ston na ji ltar bgyi/ /reg bya lcags kyi spu gri sogs/ /rtsub pa byung na ji ltar bgyi/ /dar men la sogs lus kyis reg /'jam pa byung na ji ltar bgyi/ /'jig rten chos rnams sna tshogs dang / /'jig rten 'das pa'i chos rnams ston/ /de la bdag gis ji ltar bgyi/ /bcom ldan 'das kyis bka' stsal pa/ /gzugs ngan khong khro mi bskyed cing / /gzugs bzang 'dod par mi bya ste/ /de la lus kyi phyag rgya bstan/ /lan byed dpa' bo mkha' 'gro yi/ /dngos grub sprul pa yin par nges/ /brtul zhugs can gyis dngos grub blang / /lan med bdud kyi bar chad de/ /bdud bsal ba yi cho ga brtsam/ /kun la mkhas pas sbyor bar bya/ /sgra snyan 'dod pa mi bskyed cing / /'jigs pa'i sgra la khong mi khro/ /de la btang snyoms sems bya ste/ /rdo rje glu yis brtag par bya/ /de bzhin dri bzang mi chags zhing / /dri ngan kho khro 87.66b mi bya bar/ /mnyam par dmigs la brtag par bya/ /dri'i phyag rgya de la bstan/ /lan byed mkha' 'gro'i sprul pa ste/ /lan med bdud kyi sprul pa'o/ /ro bzang bza' bar mi bya zhing / /ro ngan dor bar mi bya'o/ /mnyam par gzhag la brtag par bya/ /de la ro yi phyag rgya bstan/ /de bzhin bye brag shes par bya/ /de bzhin chos la chos phyag rgya/ /brtags te bdud rnams bsal bar bya/ /lus la byung ba'i bdud rnams kyang / /kha dog dbyibs la shes par bya/ /dang po dngos grub blang ba yang / /mig gis gzugs la rna bas sgra/ /sna yis dri dang lce yis ro/ /lus kyis reg dang yid kyis chos/ /brtul zhugs can gyis dngos grub blang / /de nas bdud ni bsal bya ste/ /yang na stong pa'i rdzong la gnas/ /yang na phrin las bzhi yis bsal/ /chu yis bde ba 'jam sogs pas/ /nang gi bdud ni bsal ba'o/ /bad mkhris steng sgo 'dus pa'i bar/ /rlung can mgo yi sgo ru ste/ /rgyud 'di gtad kyis legs par zung / /de ltar byas na dngos grub thob/ /dpal mkha' 'gro ma gsang ba 'bar ba'i rgyud kyis rgyal po rdzogs s+ho// // rgya gar gyi mkhan po gA ya d+ha ra dang / bod kyi lots+tsha ba dge slong shAkya ye shes kyis bsgyur ba'o/ / |