@#/ /rgya gar skad du/ shrI dz+nyA na rA dza tan+t+ra rA dza/ bod skad du/ dpal ye shes rgyal po'-i rgyud kyi rgyal po/ / dpal bde ba chen po la phyag 'tshal lo/ /kye ma sangs rgyas kye sangs rgyas/ /kye ma sangs rgyas mdzad pa legs/ /gang phyir sems can thams cad kyis/ /mya ngan 'das pa thob bya'i phyir/ /dad dang brtson 'grus rdzogs byas te/ /bla ma'i rjes su 'jug par bya/ /rang rig gnyis su med pa la/ /gzhan rig gnyis su 'dzin pas 'khrul/ /gzod nas ma skyes ma grub la/ /skye dang grub par 'dzin pas 'khrul/ /dngos po ro mnyam gyur pa la/ /dman dang gya nom 'dzin pas 'khrul/ /'khor ba yongs su shes pa nyid/ /mya ngan 'das par brjod pa la/ /sangs rgyas sems can rtog pas 'khrul/ /rang bzhin lhun gyis grub pa la/ /rgyu dang rkyen gyis skye bas 'khrul/ /brda dang tha snyad bral ba la/ /blo yi spyod yul byed pas 'khrul/ /mtha' bral dbu mar gnas pa la/ /rtag dang chad par 'dzin pas 'khrul/ /shes brjod yul las 'das pa la/ /bdag dang bdag gir 'dzin pas 'khrul/ /dngos po mtshan ma la sogs pa'i/ /rnam rtogs kun gyis stong pa la/ /dngos por rjesu 'dzin pas 'khrul/ /rang nyid gnyis su med pa la/ /bden pa gnyisu 'dzin pas 'khrul/ /gdul bya sna tshogs 'dul ba yi/ /theg pa du ma'i gong 'og la/ /sgro dang skur ba 'debs pas 'khrul/ /sems can 'khrul pa sna tshogs kyis/ /las kyis rnam smin la sogs la/ /lta bas skur ba 'debs pas 'khrul/ /rang rig gzod nas 'od gsal la/ /sku mdog phyag mtshan la sogs pa/ /rdo rje 'dzin par 'dod pas 'khrul/ /'khrul pa dang ni 87.48a 'khrul pa'i gzhi/ /'dod chags 'dod chags chen po ste/ /'khrul gzhi 'khrul pa las 'das na/ /'dod chags chen po bcom ldan 'das/ /zhe sdang zhe sdang bcom ldan 'das/ /de bzhin zhe sdang bcom ldan 'das/ /gti mug gti mug chen po ste/ /de bzhin gti mug bcom ldan 'das/ /'di yis nges par grol 'gyur gyis/ /'di spangs gzhan gyis grol ba min/ /bdag po lha dang bla ma spun/ /bdag po lhan cig rnal 'byor tsam/ /theg pa spyi bsdus de las gzhan/ /skye bo'-i bems po cha dang brgyad/ /de dag rang rig thob pa'i rgyu/ /de phyir dam tshig gtso bor bsrung / /'bras bu'i khyad par rang rig 'byung / /kye ma mgon po kye sangs rgyas/ /'dod chags dbye ba de ltar na/ /de yi ngo bo ji ltar lags/ /zhe sdang la sogs de dang 'dra/ /rdo rje snying po snying rje che/ /legs par nyon la yid la zung / /las dang las kyi rnam smin gyi/ /rgyu 'bras mi shes gti mug ste/ /lus sems kun nas 'khrug pa dag /zhe sdang yin te sgo gsum gyis/ /kun nas bslang ste nor bu'i mthar/ /sa bon 'byung ba 'dod chags so/ /dbang sogs ngo bo gang las shes/ /'dod chags la sogs chen por nges/ /rang rig ngo bo gang la gnas/ /'og ma spong ba'i gnyen po ste/ /ngo bor sgyu mar gang shes dang / /dbang po'i sgo bsdus thabs yin no/ /gong ma skye ba'i rgyur 'gyur ba'i/ /phyir yang chen por gyur pa ste/ /gzhan gyi don du gyur pa dang / /de las gzhan dag mos 'gyur dang / /mang po mi mos spong ba dang / /nyon mongs spyi yis zil ma non/ /bye brag 'dod chags zhe sdang sogs/ /zil gyis mi non 'og ma yi/ /rnam rtog gang yang mi skye dang / /nyon mongs spyi dang bye brag spong / /gnyen po yin par nges pa dang / /nyon mongs skra rtse tsam mi skye/ /gnyis ni gong 87.48b dang 'dra ba ste/ /bcu yis 'dod chags chen po dag /bcom ldan 'das su gsungs pa ste/ /zhe sdang la sogs de bzhin no/ /zab mo'-i lta spyod ma rtogs par/ /sngags spyod bzlas pa la sogs byed/ /de dag ngal ba don med yin/ /de dag bla ma dam pa las/ /man ngag dam pa btsal bya ste/ /'khrul pa dang ni 'khrul gzhi las/ /sad par byed pa'i cho ga blang / /de'i tshe rgyud kyi don la dga' zhing rjes su yi rang bar gyur to/ /dpal ye shes rgyal po zhes bya ba'i rgyud kyi rgyal po rdzogs s+ho// // rgya gar gyi mkhan po gA ya d+ha ra dang / lots+tsha ba dge slong shAkya ye shes kyis bsgyur ba'o/ / |