@#/ /rgya gar skad du/ shrI tsan+d+ra mA la tan+t+ra rA dza/ bod skad du/ dpal zla ba'i phreng ba'i rgyud kyi rgyal po/ dpal rdo rje sems dpa' la phyag 'tshal lo/ /kye ho mgon po rdo rje can/ /sgron ma nyi shu rtsa bzhi yi/ /nges pa gang lags tshad gang lags/ /rang bzhin grub pa ji ltar lags/ /mgon pos bdag la bshad du gsol/ /bcom ldan 'das kyis bka' stsal pa/ /rang bzhin grub pa sgrub 'dod pa/ /bla ma'i bka' drin legs mnos te/ /dur khrod la sogs sa phyogs su/ /bar chad gsum med yon tan ldan/ /brtags pa las dang po yi gnas/ /gang zag mchog la brtag tu med/ /yon tan ldan pa'i sar 'dug ste/ /bla med sems gzung rnal 'byor pas/ /sgo gsum dal ba'i tshad brtag ste/ /bcing ba gsum ni nges bsgoms pas/ /skye ba gcig gis grub par nges/ /dbugs bcing kun rdzob sna rtse yin/ /yid bcings sor bzhi nam mkha'i khams/ /sems bcings rang rig bsam mi khyab/ /rgyu rkyen las ni sna tshogs las/ /sems can mos pa sna tshogs 87.41b 'byung / /de dag bcings gsum dag pa yis/ /sems can bcings las nges par grol/ /bla ma'i zhal nas shes par bya/ /'du shes gsum gyi cha las grol/ /thig le cha gsum phra mo ni/ /yan lag lnga ldan 'byung ba'i rim/ /sgra dang rang rig re rer snang / /stong nyid thabs dang shes rab tshul/ /sa dang lam sogs rim pa kun/ /rang bzhin gyis gnas mkhas pas sbyar/ /de nas sgron ma'i tshad bstan te/ /tshad ni spyi dang bye brag ste/ /brgya phrag gnyis dang bcu gnyis dang / /yi ge gsum las nges 'byung ba/ /gsang ba gcod pa'i rgyud kyi tshad/ /brgya phrag gcig dang sum bcu lnga/ /yi ge bcu dgu las byung ba/ /rin chen phreng ba'i nges pa'i tshad/ /brgya phrag gcig dang sum bcu bzhi/ /mi 'gyur bcu gsum las byung ba/ /sku gsung thugs kyi sgron ma'o/ /brgyad bcu rtsa lngar yi ge bzhis/ /ma tshang pa las gang 'gyur ba/ /gsang ba bsam gyis mi khyab pa'o/ /brgyad bcu rtsa gnyis yi ge gcig /rin chen 'bar ba'i ldang tshad do/ /sum bcu rtsa gcig yi ge ni/ /nyi shu rtsa gnyis las byung ba/ /nam mkha' mnyam pa'i tshad yin no/ /drug bcu rtsa drug yi ge drug /dam tshig chen po'i rgyud kyi tshad/ /drug bcu yi ge nyi shu gcig /gsang ba rdo rjer rab tu grags/ /drug bcu rtsa gnyis mi 'gyur ba/ /bcu drug stobs po che yi tshad/ /bzhi bcu rtsa gcig yi ge lnga/ /nam mkha' chen po'i tshad yin no/ /drug bcu rtsa drug yi ge drug /ye shes 'bar ba'i ldang tshad do/ /sum bcu rtsa drug yi ge dgu/ /ye shes phreng ba'i tshad yin no/ /sum bcu rtsa bzhi nyi shu bzhi/ /mkha' 'gro gsang ba'i tshad yin no/ /sum bcu rtsa bzhi bcu bzhi dag /me yi phreng ba'i tshad yin no/ /nyi shu rtsa gnyis bcwa brgyad dag /ye shes rgyal po'i ldan tshad do/ /bdun bcu rtsa brgyad rkang ba phyed/ /chags pa'i rgyal po'i tshad yin no/ / 87.42a tshigasu bcad pa nyi shu lnga/ /ye shes bsam pa'i ldang tshad do/ /dgu bcu go brgyad las byung ba/ /ye shes gsang ba'i tshad yin no/ /nyi shu thams pa gang yin pa/ /gsang ba rdo rje rgyal po'i tshad/ /brgya dang nyi shu rtsa gnyis ni/ /rdo rje rgyal po ra li'i tshad/ /lnga bcu rtsa gsum yi ge bcu/ /dur khrod rgyan gyi ldang tshad do/ /sum bcu rtsa gsum yi ge ni/ /bcu drug mkha' 'gro ma sdom tshad/ /lnga bcu y-i ge bcwa lnga las/ /byung ba gsang ba bdud rtsi'i rgyal/ /bzhi bcu yi ge nyi shu bzhi/ /nyi ma'i 'khor lo'i gzhung tshad do/ /sum bcu yi ge bcu drug las/ /byung ba zla ba'i phreng tshad do/ /de nas nges par bshad bya ste/ /gsang ba'i 'khor lo gang ston pa/ /gsang ba'i rdo rje'i dam tshig dag /ston pa dam tshig chen por nges/ /dgra drug ston pa stobs po che/ /dbang bzhi dgag sgrub gsang ba gcod/ /rang rig de ston bsam mi khyab/ /yi ge gsum ston rin chen 'bar/ /sgo gsum lam ston nam mkha' mnyam/ /bcom ldan la sogs the tsom med/ /ston pa nam mkha' chen po ste/ /dbang bzhi'i de nyid gang ston pa/ /ye shes gsang ba'i rgyud du nges/ /lta spyod rmad du gang byung ba/ /ston pa ye shes phreng bar nges/ /gleng bslang rnam pa lnga yi don/ /ston pa mkha' 'gro gsang ba'i rgyud/ /he ru ka dpal gang ston pa/ /me yi phreng ba'i rgyud du grags/ /dbang gsum don ni gang ston pa/ /sku gsung thugs kyi ra lir nges/ /snod bcud rin chen ston byed pa/ /rin chen phreng ba'i ra lir nges/ /lhan cig skyes ston ye shes bsam/ /rdo rje rnyog pa med pa'o/ /lha yi de nyid gang ston pa/ /chags pa'i rgyal po'i ra lir nges/ /nges pa lnga ston rdo rje rgyal/ /A li dur khrod brgyad ston dur khrod brgyan/ /dam tshig sdom pa mkha' 'gro gsum/ /ston pa mkha' 'gro sdom pa'o/ /dkyil 'khor 87.42b la sogs drug ston pa/ /gsang ba bdud rtsi'i rgyal po'o/ /'khrul pa 'khrul gzhi de sad pa/ /gsum ston ye shes rgyal po'i rgyud/ /ma spangs nges ston nyi 'khor lo/ /tshad nges bsgrub gsum ston zla phreng / /rgyud sogs lnga ston ye shes 'bar/ /de nas 'khor thams cad dga' nas rgyud thams cad kyi don la yi rang bar gyur to/ /dpal zla ba'i phreng ba'i rgyud kyi rgyal po rdzogs s+ho// //rgya gar gyi mkhan po gA ya d+ha ra dang / lots+tsha ba dge slong shAkya ye shes kyis bsgyur ba'o/ / |