@#/ /rgya gar skad du/ shrI dz+nyA na gu h+ya tan+t+ra rA dzA/ bod skad du/ dpal ye shes gsang ba'i rgyud kyi rgyal po/ dpal bde ba chen po la phyag 'tshal lo/ /byang chub phyogs chos sum bcu rtsa bdun gyi/ /rang lus rtsa yi 'khor lo bzhi'i gtso bo/ /snying po de la yang dag phyag 'tshal lo/ /dbang bzhi'i de nyid bdag la gsungs/ /nyon cig rdo rje snying po'i bdag /bskyed pa'i rim pa'i lha rnams kyi/ /de nyid dang por bshad bya ste/ /drug bcu rtsa bzhi dpe byad yin/ /sum bcu rtsa bdun byang chub phyogs/ /lnga ni ye shes lnga yin te/ /dpa' bo gcig pa chos kyi dbyings/ /phyag mtshan sku mdog gzhan nas gsungs/ /gu h+ya'i rdo rje dril bu'i tshad/ /nas dang sor tshigs yin par 'dod/ /de nyid thabs dang shes rab yin/ /don dam nyid la dbyer med de/ /bsgom bya med de sgom pa med/ /bsgoms pas thob pa ci yang med/ /rgyu dang rkyen gyis bskyed du med/ /sems kyi gzhi la sku lnga dang / /ston pa med cing bstan pa med/ /'jigs dang rnam rtog kun dang bral/ /de nyid bzhi pa'i de nyid do/ /dang po rlung gi de nyid de/ /srog rtsol gnyis ni a dang ha~M/ /a ni chos rnams thog ma nas/ /ma skyes pa yi don yin no/ /ha~M ni gzung 'dzin gnyis kyis stong / /ldang 'jug gsum ni sku gsung thugs/ /sems kyi gzhi dang sku lnga dang / /rnam par thar dang stong pa dang / /de bzhin mtshan dang dpe byad sogs/ /de dag rlung gi de nyid de/ /de nas thig le'i de nyid kyang / /nyi zla thabs dang shes rab ste/ /sngags kyi phreng ba mtshan dpe yin/ /thig le ye shes lnga rang bzhin/ /gnyis su med pa'i de nyid yin/ /phra mo la sogs gzhan nas shes/ /de nas 'og gi sgo dag ni/ /de nyid yang dag bshad bya ste/ /rtsa gsum sku gsung thugs kyi ste/ /rtsa lnga ye shes lnga yin no/ /tsaN+DA li ni nyi shu bzhi/ /de nyid ye shes nyi shu bzhi/ / 87.37a chos sku'i phrin las nyi shu bzhi/ /kha sbyar thabs dang shes rab ste/ /'dzag dang 'bar ba gnyis med yin/ /'khor lo bzhi ni sku bzhi ste/ /drug ni de nyid drug yin te/ /sgrol ma rlung gi de nyid de/ /me ni gos dkar ngo bo nyid/ /bcu drug stong pa bcu drug yin/ /bzhi ni ye shes bzhi yin no/ /rnam par thar dang stong pa dang / /de bzhin mtshan dang dpe byad dang / /rig sngags snyoms 'jug phra ba dgu/ /ye shes lnga bcu la sogs pa/ /rtsa 'dab de nyid yin par nges/ /rtsa de gnas pa'i rim pa yang / /'khor lo ba thag khug pa las/ /g.yas g.yon sbrul ltar 'khril ba ste/ /phyi yi g.yas g.yon gzhu lta bu/ /gsum pa'i dbang gi de nyid kyang / /sih+la shes rab chos dbyings te/ /ga pur thabs kyi ye shes bzhi/ /rtsa ni 'og min gnas yin te/ /dga' ba mchog dga' byang chub phyogs/ /rang bzhin dga' ba chos sku ste/ /bral ba'i dga' ba gzugs sku gnyis/ /bcu drug stong pa bcu drug go/ /rgyud kyi tshul du sgyu ma tsam/ /gang zhig rang rig 'dod pas kyang / /dang por ngo bo shes bya ste/ /de nas de nyid shes par bya/ /gal te de nyid mi shes na/ /zab mo'-i lam nyid sgom byed na/ /'bras bu med c-ing brlag par nges/ /lha yi de nyid ma shes na/ /dur khrod gnas pa'i srin po 'dra/ /de bzhin dur khrod srin mo 'dra/ /spyod pa'i de nyid ma shes na/ /grong khyer gnas pa'i smyon pa 'dra/ /khyi phag srin po rak+Sha 'dra/ /phyag mtshan de nyid ma shes na/ /brgya byin lag na mtshon thogs 'dra/ /phyag rgya'i de nyid ma shes na/ /rgyal po pang gi btsun mo 'dra/ /rlung gi de nyid ma shes na/ /brgya byin spyi bo'i du ba 'dra/ /rtsa yi de nyid ma shes na/ /tsan dan shing gi sbrul sogs 'dra/ /lus kyi gnyer ma dag dang 'dra/ /lus kyi dri ma chu dang 'dra/ /thig le'i de nyid ma shes na/ /tsan dan shing gi 'dzer pa 'dra/ /'khor lo'i 87.37b de nyid ma shes na/ /brgya byin lag na 'khor lo 'dra/ /de bzhin srid pa'i 'khor lo 'dra/ /pad ma'i de nyid ma shes na/ /'dam bu tshal gyi pad+ma 'dra/ /stug po'i de nyid ma shes na/ /mchod rten gyi ni 'khor lo 'dra/ /kha sbyor de nyid ma shes na/ /thal mo g.yas g.yon sbyar ba 'dra/ /gnas kyi de nyid ma shes na/ /'khor lo sgyur rgyal pho brang 'dra/ /byang sems de nyid ma shes na/ /mi gtsang sgo yi lud pa 'dra/ /sih+la'i de nyid ma shes na/ /mtshon sogs las byung khrag dang 'dra/ /dga' ba de nyid ma shes na/ /smad 'tshong ma yi 'dod chags 'dra/ /spang bya'i de nyid ma shes na/ /grong khyer med pa'i rgyal po 'dra/ /gnyen po'i de nyid ma shes na/ /rgyal po med pa'i grong khyer 'dra/ /rang rig de nyid ma shes na/ /'dus byas nam mkha' stong pa 'dra/ /gzhan yang de nyid bcwa brgyad ni/ /bla ma'i zhal nas shes par bya/ /thams cad sgyu ma'i tshul dang ni/ /rmi lam glog dang sprin lta bu/ /de nyid shes na grol bar 'gyur/ /kye ho mgon po thugs rje che/ /rang rig ye shes tshol ba la/ /rang dang gzhan gyi sde pa la/ /'di la khyad par med dam ci/ /bcom ldan 'das kyis bka' stsal pa/ /khyad par chen po de nyid de/ /gzhan ni khyad par dbang bzhi dang / /de yi lam gyi de nyid brtags/ /chang ba bdag dang dbang phyug dang / /phyab dang byed pa po nyid las/ /rgyu sogs rgyud las khyad par 'phags/ /gang zag bdag dang bral ba'i phyir/ /nyan thos rang rgyal theg chen dang / /rlung sogs chos kyi bdag gis bcings/ /dman pa rnams kyi snang bas khyad/ /theg chen rang bzhin lha yis khyad/ /rnal 'byor rnal 'byor chen po sogs/ /de nyid kyi ni khyad par che/ /legs par bstan gyis legs par bzung / /de nas 'khor thams cad dga' zhing yid rangs par gyur to/ /dpal rdo rje sems dpa' ye shes gsang ba'i de kho na nyid kyi rgyud kyi rgyal po rdzogs s+ho// // 87.38a rnal 'byor ma tsan dra mA le dang / lots+tsha ba dge slong shAkya ye shes kyis bsgyur ba'o/ / |