@#/ /rgya gar skad du/ he badzra tan tra rA dzA nA ma/ bod skad du/ kye'i rdo rje zhes bya ba rgyud kyi rgyal po/ kye'i rdo rje la phyag 'tshal lo/ /'di skad bdag gis thos pa dus gcig na/ bcom ldan 'das de bzhin gshegs pa thams cad kyi sku dang gsung dang thugs kyi snying po rdo rje btsun mo'i b+ha ga rnams la bzhugs so/ /de bzhin gshegs pa thams cad kyi sku dang gsung dang thugs kyi snying po rje btsun gsang ba las shin du ches gsang ba'ang de nas bcom ldan 'das kyis bka' stsal pa/ e ma'o byang chub sems dpa' sems dpa' chen po rdo rje snying po snying rje chen po legs so legs so/ /rdo rje sems dpa' dang / sems dpa' chen po dang / dam tshig sems dpa' chen po dang snying po kye'i rdo rje zhes bya ba nyon cig /rdo rje snying pos gsol pa/ gang phyir rdo rje sems dpa' lags/ /ji ltar sems dpa' chen po lags/ /gang gis dam tshig sems dpa' lags/ /bcom ldan 'das kyis bdag la gsungs/ /bcom ldan 'das kyis bka' stsal pa/ /rdo rje mi phyed ces byar brjod/ /sems dpa' srid pa gsum gcig pa/ /'dis ni shes rab rigs pa yis/ /rdo rje sems dpa' zhes byar brjod/ /ye shes chen po'i ros gang ba/ /sems dpa' chen por brjod par bya/ /rtag tu dam tshig la spyod phyir/ /dam tshig sems dpar brjod par bya/ /rdo rje snying pos gsol pa/ ming bsdus pa ni ji lta bu/ /gang zhig kye yi rdo rje lags/ /he yi rnam pas ci zhig bshad/ /badzra yis kyang de bzhin cing / /bcom ldan 'das kyis bka' stsal pa/ /he ni snying rje chen po nyid/ /badzra'ang shes rab brjod par bya/ /thabs dang shes rab bdag nyid rgyud/ /de ni nga yis bshad kyis nyon/ /lta stangs dgug dang brda chen dang / /don chen rnams mang brjod pa dang / /rengs par byed dang skrod pa nyid/ /sde rengs byed dang mngon spyod dang / /ji ltar 84.235b [This is a blank page without image] 84.236a rigs pa rnal 'byor ma'i/ /bskyed dang gnas dang byed rgyu dang / /don byed ye shes rnam shes dang / /lha rnams ji ltar 'byung ba'o/ /he ru ka ni bskyed pa'i rgyu/ /dang por gcig ni bsgom par bya/ /rdo rje snying po snying rje che/ /dngos po nyid kyis rnam grol zhing / /dngos po'i 'ching bas 'ching bar 'gyur/ /yongs su shes pas grol ba yin/ /dngos po med par yongs shes pas/ /dngos po bsgom 'gyur shes rab can/ /dngos po med pa yongs shes pa/ /de ltar he ru ka bsgom bya/ /lus la ye shes chen po gnas/ /rtog pa thams cad yang dag spangs/ /dngos po kun la khyab pa po/ /lus gnas lus la ma skyes pa'o/ /rdo rje snying pos gsol pa/ kye bcom ldan 'das rdo rje'i lus la rtsa du lags/ bcom ldan 'das kyis bka' stsal pa/ rtsa rnams ni sum bcu rtsa gnyis te/ byang chub kyi sems sum bcu rtsa gnyis 'bab pa bde ba chen po'i gnas su 'dzag pa'o/ /de rnams kyi nang nas rtsa rnams pa gsum ni gtso mo ste/ rkyang ma dang ro ma dang / kun 'dar ma'o/ /rkyang ma shes rab rang bzhin gyis/ /thabs kyis ro ma yang dag gnas/ /kun 'dar ma ni dbus gnas su/ /gzung dang 'dzin pa rnam par spangs/ /rkyang ma mi bskyod 'bab pa ste/ /ro ma de bzhin khrag 'bab cing / /shes rab zla ba 'bab bshad pa/ /de ni kun 'dar ma rab grags/ /mi phyed ma dang phra gzugs ma dang rtse ba ma dang / g.yon pa ma dang thung ngu ma dang / rus sbal skyes ma dang sgom pa ma dang / dbang ma dang skyon ma dang 'jug ma dang ma mo dang / bsil sbyin ma dang tsha ba ma dang / brkyang ma dang kun 'dar ma dang ro ma dang / gzhol ma dang rangs ma dang / shin tu gzugs can ma dang / spyi ma dang rgyu sbyin ma dang / sbyor bral ma dang sdug gu ma dang / grub ma dang 'tshe ma dang / de bzhin du yid bzangs ma dang / gsum skor ma dang / 'dod ma dang khyim ma dang / gtum mo dang bdud bral ma'o/ /rdo rje snying pos gsol pa/ kye bcom ldan 'das sum bcu rtsa gnyis po 'di rnams ji ltar lags/ bcom ldan 'das kyis bka' stsal pa/ / 84.236b srid gsum yongs gyur thams cad ni/ /gzung dang 'dzin pa rnam par spangs/ /yang na thabs ni thams cad kyis/ /dngos po'i mtshan nyid du ni brtag /sdom pa'i dbye ba'ang bshad par bya ste/ A li dang kA li ni zla ba dang / nyi ma dang / shes rab dang thabs so/ /chos dang longs spyod rdzogs pa dang / sprul pa ni sku dang / gsung dang / thugs so/ /e ba~M ma ya ni/ e yi rnam pas lha mo spyan/ /ba~M gi rnam pas bdag mar brjod/ /ma ni lha mo gos dkar mo/ /ya yi rnam pas sgrol mar brjod/ /sprul pa'i 'khor lo la pad+ma 'dab ma drug bcu rtsa bzhi dang / chos kyi 'khor lo la 'dab ma brgyad dang / longs spyod rdzogs pa'i 'khor lo la 'dab ma bcu drug dang / bde ba chen po'i 'khor lo la 'dab ma sum bcu rtsa gnyiso/ /'khor lo'i grangs kyi rim pas rnam par gzhag pa/ skad cig ma bzhi ni rnam pa sna tshogs dang / rnam par smin pa dang rnam par nyed pa dang / mtshan nyid dang bral ba'o/ /'phags pa'i bden pa bzhi ni sdug bsngal ba dang / kun 'byung ba dang 'gog pa dang lam mo/ /de kho na nyid bzhi ni bdag gi de kho na nyid dang sngags kyi de kho na nyid dang / lha'i de kho na nyid dang ye shes kyi de kho na nyid do/ /dga' ba bzhi ni dga' ba dang mchog tu dga' ba dang dga' bral gyi dga' ba dang / lhan cig skyes pa'i dga' ba'o/ /sde pa bzhi ni gnas brtan pa dang / thams cad yod par smra ba dang / kun gyis bkur ba dang / dge 'dun phel chen no/ /zla ba dang nyi ma dang / A li dang kA li dang / 'pho ba bcu drug dang / dbyug gu drug bcu rtsa bzhi dang / chu tshod sum bcu rtsa gnyis dang / thun tshod bzhi ste/ de ltar thams cad bzhi bzhi'o/ /lte bar gtum mo 'bar ba yis/ /de bzhin gshegs pa lnga bsregs shing / /spyan la sogs pa yang bsregs te/ /bsregs nas ri bong can ha~M 'dzag /rdo rje rigs kyi le'u ste dang po'o// // sngags kyi le'u bshad par bya'o/ /\u0f00 a kA ro mu khaM sar+b+ba d+har+m+mA NAM Ad+ya nuta pan na twA ta \u0f00 AHhU~M phaT swA hA/ 'byung po thams cad kyi gtor ma'i sngags so/ / 84.237a buM A~M dzrI kha~M hU~M/ de bzhin gshegs pa rnams kyi sa bon no/ /\u0f00 de ba pi tsu badzra hU~M hU~M hU~M phaT swA hA/ kye'i rdo rje'i snying po'o/ /sngags thams cad kyi rkang pa dang por \u0f00 gyi rnam pa dang / mthar ni swA hA dang / hU~M phaT kyi rnam pa ni nang du gzhug go/ /\u0f00 a ka tsa Ta ta pa ya sha swA hA/ grong khyer dkrug pa'i sngags so/ /a A i I u U r-i r-I l-i l-I e ai o au aM aH rnal 'byor ma rnams kyi sa bon no/ /\u0f00 trai lo kyA k+She pA ya hU~M` hU~M hU~M phaT swA hA/ phyag gnyis pa'i 'o/ /\u0f00 dz+wa la dz+wa la b+h+yo hU~M hU~M hU~M phaT swA hA/ phyag bzhi pa'i 'o/ /\u0f00 ki Ti ki Ti badzra hU~M hU~M hU~M phaT swA hA/ phyag drug pa'i 'o/ /\u0f00 AHhU~M/ sku dang gsung dang thugs byin gyis brlab pa'i sngags so/ /\u0f00 rak+Sha rak+Sha hU~M hU~M hU~M phaT swA hA/ sa sbyang ba'i sngags so/ /\u0f00 hU~M swA hA/ rengs par byed pa'o/ /\u0f00 aM swA hA/ dbang du byed pa'o/ /\u0f00 kham swA hA/ skrod par byed pa'i'o/ /\u0f00 dzrA+oM swA hA/ sdang bar byed pa'o/ /\u0f00 buM swA hA/ mngon spyod kyi'o/ /\u0f00 hU~M swA hA/ 'gugs par byed pa'o/ /\u0f00 g+huHhA swA hA/ gsod par byed pa'i'o/ /\u0f00 ku ru kul+le hrIHswA hA/ ku ru kul+le'i sngags so/ /AHphuH'i rnam pas mtha' yas kyi gzugs brnyan byas la bdud rtsi lngas ni blugs/ me tog nag pos ni mchod/ klu 'dul bar byed pa'i khu bas ni byug /glang po che'i chang gis ni mgo bo byugs/ kham phor kha sbyor du ni bzhag /ba nag mo'i 'o mas ni dgang / gzhon nu ma nag mos bkal ba'i skud pas ni dkri/ rlung gi phyogasu rdzing bu byas te mtha' yas der bzhag go/ /de'i 'gram du dkyil 'khor bzhings par bya ste/ dur khrod kyi sol bas ni rdul tshon nag po/ skyes pa'i rus pa'i phye mas ni rdul tshon dkar po/ ldong ros kyis ni rdul tshon ser po/ dur khrod kyi so phag gis ni rdul tshon dmar po rkun ma'i lo ma dang / skyes pa'i rus pa'i phye ma dag gis ni rdul tshon ljang khu ste/ rdul tshon 'di rnams kyis dkyil 'khor bzhengs so/ /dur khrod kyi srad bus thig gdab cing dkyil 'khor khru gsum pa bya ste/ de'i dbus su mtha' yas 84.237b mnan pa'i kye'i rdo rje zhal brgyad pa/ zhabs bzhi pa phyag bcu drug gis brgyan pa/ spyan nyi shu rtsa bzhis phye ba/ 'jigs pa 'ang 'jigs par mdzad pa bri'o/ /de nas slob dpon gyis nang gi ma rungs pa'i sems kyis dben pa'i gnas su sngags bzla ste/[ \u0f00] g+hu ru g+hu ru g+hu Tu g+hu Tu/ ma sa ma sa g+ha Ta g+ha Ta/ g+ho Ta ya g+ho Ta ya/ a nan ta k+Sho b+ha ka rA ya nA gA d+hi pa ta ye he he ru ru ka sab+ta bA tA la/ ga tAM na n+Da ga A kar Sha ya bar Sha ya gar+dz+dza ya tar+dz+dza ya/ phuHphuHphuHphuHphuHphuHphuHphuHhUM hU~M hU~M phaT swA hA/ gal te char mi 'bab na de'i tshe sngags 'di bzlog la bzlas te char 'bab bo gal te mi 'bab na de'i tshe mgo ardza ka'i dog pa ltar 'gas so/ /char 'bab pa zhes bya ba'i cho ga'o/ /sprin dral ba bshad de dur khrod kyi ras la nye bar 'dug nas sngags bzlas shing dral te/[ \u0f00] Ar+ya sma shA ni pri yA ya hU~M hU~M hU~M phaT swA hA/ sprin dral ba'i cho ga'o/ /pha rol gyi sde rnam par gzhig par bya ba'i phyir kha Ti kA'i bsgrub pa bshad de/ kha Ti kA dang bdud rtsi lnga dang / ku thA rats+tshin na lhan cig btags la ril bu bya ste/[ \u0f00] badzra karta ri he badzrA ya hU~M hU~M hU~M phaT swA hA/ dngos grub kyi don du bye ba bzlas shing sngon du bsnyen pa 'bum bzlas te/ de bzlas la ril ba spyi blugs kyi mgrin pa bskor nas bcag na dgra thams cad kyi mgo med par 'gyur ro/ /rdo rje gri gug gi cho ga'o/ /lha rnams dag par 'dod pas thig le bsgrub ste tshangs pa'i sa bon rgyal la bsgrubs nas/ ku ThA rats+tshin na dang bsres la nyi ma gzas zin pa na mi bskyod pa dang btag cing btags nas dgra sta bya ste/ de rkang pas mnan nas sngags bzlas te/[ \u0f00] badzra ku ThA ra pA Ta ya pA Ta ya hU~M hU~M hU~M phaT swA hA/ bye ba bzlas la thig le byas te gang la phyag byas pa de 'gas so/ /lha dgas pa'i cho ga'o/ /tsha bas gdung bar bya bar 'dod pas ar+k+ka'i lo ma la dug dang ske tshe dang tsi tri ka'i khu bas dgra bo'i ming bri zhing 'bras phub kyi me la gdungs te sngags khri bzlas so/ /\u0f00 he badzra dz+wa ra dz+wa ra sha trUM b+h+rUM hUM hUM hUM phaT swA hA/ tsha ba'i cho ga'o/ /khri bzlas pas 'grub bo/ /chang skyug 84.238a par bya bar 'dod pas bsgrub bya'i lte bar yaM gi rnam par bsgom zhing maM gi rnam par gyur pa las chang lto bar rnam par bsgoms te skyugs par byed par bltas na chang skyug go/ /rab tu myos ma dbang du bya bar 'dod pas mya ngan med pa'i brgyud la mya ngan med pa'i 'og tu song ste gos dmar po bgos nas myos byed kyi 'bras bu bza' zhing / kA kA tsi kA'i khu bas thig le byas nas sngags bzlas te/[ \u0f00] a mu kI me hrIH ba si b+ha ba tu swA hA/ khri yis 'ong bar 'gyur ro/ /zla ba dang nyi ma dbang du bya bar 'dod pas sA lu btags pa tsam gyis 'gyur ba la zla ba dang nyi ma byas nas rdo rje'i chu la gzhug cing sngags bzlas te/[ \u0f00] badzra ar+k+ka mA tsa la mA tsa la tiSh+Tha tiSh+Tha he badzrA ya hU~M hU~M hU~M phaT swA hA/ bye ba phrag bdun bzlas te nyi ma dang zla ba yang dag par gnas shing nyin mtshan bye phrag med par 'gyur ro/ /zla ba dang nyi ma rnam par 'dzin pa zhes bya ba'i cho ga'o/ /\u0f00 na grA na grA zhes bya ba'i sngags 'dis dus ma yin pa'i dus su don bsgrub pa'i phyir gzhon nu ma'i mig dag la brgya rtsa brgyad mngon par bsngags nas me tog la sogs pa'i mchod pa rnam pa lngas yang dag par mchod cing snyan gsan dbab bo/ /bcu bzhi pa'am brgyad pa'i snga ba'i dus su bum pa la sogs pa gzhag cing 'bru mar dang a la k+Ta'i khu ba la sngags 'di nyid kyis lan brgya rtsa brgyad mngon par bsngag so/ /de nas mngon par bsngags pa'i a lak+ta'i khu bas sngags pa'i 'the 'ong rgan po la bskus nas 'bru mar gyis kyang blugs la gzhon nu ma la bstan te nga'i rdzas sus khyer smos de la des smras pa/ che ge mo zhes bya bas khyer ro/ /rdo rje skar ma'o be Tu yA be Tu yA zhes brjod na glang po che 'bros par 'gyur ro/ /mam+mA mam+mA zhes brjod na stag 'bros par 'gyur ro/ /te l+li yA te l+li yA zhes brjod na bse 'bros par 'gyur ro/ /i li mi li phuHphuHzhes brjod na sbrul 'bros par 'gyur ro/ /nor skyong 'dul ba'i phyag gis lag pa rab tu bstan na khyi 'bros par 'gyur ro/ /rdo rje ma dang / dkar mo dang / chu ma dang / rdo rje mkha' 84.238b 'gro ma dang / bdag med ma dang / sa spyod ma dang / mkha' spyod ma'i rnal 'byor las rengs par byed pa la sogs pa brtul zhugs can gyis byed do/ /sngags kyi le'u ste gnyis pa'o// // de nas lha'i le'u bshad par bya'o/ /dang por byams pa bsgom par bya/ /gnyis par snying rje rnam bsgom zhing / /gsum par dga' ba bsgom pa dang / /kun gyi mthar ni btang snyoms so/ /yang ni stong pa'i byang chub ste/ /gnyis pa la ni sa bon bsdu/ /gsum pa la ni gzugs brnyan rdzogs/ /bzhi pa la ni yig 'bru dgod/ /re phas nyi ma sngon du rnam bsgoms nas/ /nyi der hU~M byung sna tshogs rdo rje ste/ /rdo rje de nyid kyis ni ra ba dang / /gur bcing ba yang rnam par bsgom pa nyid/ /dang por ro ni rnam bsgoms pa/ /chos kyi dbyings kyi bdag nyid brjod/ /de stengs rnal 'byor pa gnas nas/ /he ru ka nyid rnam par bsgom/ /rang gi snying gar re pha bsgom/ /de las byung ba'i nyi dkyil 'khor/ /der ni hU~M gi rnam pa nyid/ /thabs dang shes rab rang bzhin can/ /hU~M las byung ba'i rdo rje ni/ /kha dog nag po 'jigs chen po/ /rdo rje lte ba'i dbus gnas par/ /yang ni hU~M gi de nyid bsgom/ /hU~M gi rnam pa gyur bltas nas/ /zhe sdang bdag nyid rnam par bsgom/ /rdo rje skye ba nag po che/ /'dam skyes sngon po 'dra ba'i mdog /yang na sngo dang nyi ma'i mdog /dad pas nges par rnam par bsgom/ /nam mkhar rje btsun bltas nas ni/ /rdo rje skye ba snying rje che/ /rgyan rnams thams cad 'dzin pa yi/ /lha mo brgyad po rnams kyis mchod/ /dkar mo ri dgas mtshan ma 'dzin/ /chom rkun bdud las rgyal ba'i snod/ /ro langs ma ni chu lag ma/ /g+hasma rI ni sman 'dzin cing / /puk+ka sI ni rdo rje'i lag /de bzhin ri khrod ma ro 'dzin/ /gdol pa mo ni cang te'u rdung / /'di rnams kyis ni gtso bo mchod/ /'dod chags chen po rjes chags pas/ /g.yung mos sku la 'khyud pa nyid/ /A li zla ba kA li nyi/ /sa bon nang du son gyur pa/ /de nyid sems dpa' zhes byar brjod/ /mchog tu dga' ba'i rang bzhin can/ / 84.239a nam mkha'i dkyil 'khor khyab pa yi/ /rang gis lus mtshungs rnam par spro/ /bsdus nas snying gar dgug pa na/ /yo gi zhe sdang bdag nyid 'gyur/ /sngo dang nyi ma mtshungs pa'i mdog /ban du dmar po'i spyan dang ldan/ /skra ser gyen du 'khyil ba dang / /phyag rgya lngas ni rnam par brgyan/ /'khor lo rna cha nor bu dang / /lag gdub dang ni ska rags nyid/ /sangs rgyas lnga ni rnam dag pa/ /'di rnams phyag rgyar rab tu grags/ /sdang mig brgyad gnyis lo yi tshul/ /g.yon na rdo rje thod pa dang / /g.yon pa nas kyang khaT+wA~M ga /g.yas na rdo rje nag po nyid/ /hU~M gi yi ge 'don pa'i bdag /rnal 'byor ma brgyad yongs bskor nas/ /dur khrod du ni mgon po rol/ /dbugs rgyu zhes bya'i rigs pa 'dis/ /dur khrod ces ni mngon par brjod/ /phyag bzhi ni bdud bzhi las rnam par rgyal ba rnam par dag pa ste/ gong du brjod pa'i gzugs dang / sku mdog dang hU~M las byung ba'o/ /phyag g.yon gyi dang po na skyes pa'i thod pa lha dang lha ma yin gyi khrag gis bkang ba/ de bzhin du g.yas kyi phyag na rdo rje/ phyag lhag ma dag ni shes rab la 'khyud pa/ shes rab rdo rje phag mo ni bcom ldan 'das kyi gzugs can no/ /phyag drug pa/ zhal gsum pa/ g.yon dmar ba/ g.yas zla ba dang nyi ma lta bu dang po sngon po/ gcer bu gong du brjod pa'i sku mdog dang gzugs can/ phyag rnams ni pha rol du phyin pa drug rnam par dag pa'o/ /phyag g.yon gyi dang po na rtse gsum pa/ phyag g.yas kyi dang po na rdo rje/ phyag g.yon gyi gnyis pa na dril bu/ phyag g.yas kyi gnyis pa na gri gug /phyag lhag ma dag gis rdo rje lu gu rgyud ma la snyoms par 'jug pa dang / bcom ldan 'das ji lta ba de ltar shes rab ste/ g.yas pa dang g.yon pa na gri gug dang thod pa/ khams gsum gyi bdag nyid can gyi ro mnan pa'o/ /lha'i le'u ste gsum pa'o// // de nas lha dbang bskur ba'i le'u bshad par bya'o/ /rang gi snying gar sa bon bsam mo/ /sa bon las 'od zer nag po lcags kyu'i rnam pa'i gzugs kyis phyung nas/ des khams gsum 84.239b du bzhugs pa'i sangs rgyas thams cad spyan drangs la ma mo brgyad kyis yang dag par mchod nas gsol ba gdab par bya'o/ /\u0f00 a b+hi Shiny+tsaM tu mAM sar+b+ba ta thA ga ta zhes sangs rgyas de rnams he ru ka'i rnam pa'i gzugs kyis de bzhin gshegs pa lnga'i bdag nyid kyi bdud rtsi lngas gang ba'i bum pas dbang bskur bar bya'o/ /dbang bskur ba na me tog gi char 'bab par 'gyur ro/ /rnga'i sgra 'byung bar 'gyur ro/ /gur gum gyi char 'bab par 'gyur ro/ /gzugs kyi rdo rje ma la sogs pa rnams kyis mchod par bya'o/ /rdo rje'i glu spyan ma la sogs pa rnams kyis blang bar bya'o/ /dbang bskur nas spyi bor rang gi rigs kyi bdag por 'gyur ro/ /'dis ni he ru ka rdzogs pa nyid do/ /thun gsum du byin gyis brlabs pa'i bsgom pa rnam par bsgoms nas langs te lha'i gzugs su gzhag go/ /dbang gi le'u ste bzhi pa'o// // de nas de kho na nyid kyi le'u bshad par bya'o/ /ngo bos gzugs med mthong ba po/ /sgra med thos pa po yang med/ /dri med snom pa po yang med/ /ro med myong ba po yang med/ /reg med reg pa po yang med/ /sems med sems las byung ba yang med/ /skyed byed ma dang sring mo nyid/ /rnal 'byor rig pas rtag tu mchod/ /gar ma chos ma rdo rje ma/ /gdol ma de bzhin bram ze mo/ /thabs dang shes rab cho ga yis/ /de nyid rig pas rtag tu mchod/ /ji ltar bye bar mi 'gyur bar/ /rab tu 'bad pas bsten pa nyid/ /ma gsang sbrul dang chom rkun dang / /sa spyod me yis sdug bsngal byed/ /rigs lnga'i phyag rgya zhes bya ba/ /thar pa'i rgyur ni brjod par bya/ /rdo rje 'dis ni gdab pa nyid/ /des na phyag rgyar brjod par bya/ /rdo rje pad+ma de bzhin las/ /de bzhin gshegs dang rin chen nyid/ /snying rje chen po dam pa yi/ /rigs ni rnam pa lnga ru brjod/ /rdo rje'i phyag rgya g.yung mo nyid/ /de bzhin pad ma'i gar ma nyid/ /las ni tshos mar rab tu bshad/ /de bzhin gshegs pa'i bram ze mo/ /rin chen gdol mar shes par bya/ /phyag rgya lngar ni rnam par nges/ / 84.240a 'di rnams de bzhin gshegs pa'i rigs/ /mdor bsdus pas ni brjod par bya/ /dpal ldan de bzhin nyid gshegs shing / /de bzhin slar yang gshegs pa nyid/ /'dis ni shes rab rigs pa yis/ /de bzhin gshegs zhes brjod par bya/ /rigs ni rnam pa drug brjod cing / /mdor bsdus pas ni rnam pa lnga/ /sku gsung thugs kyi dbye ba yis/ /phyi nas rnam pa gsum du 'gyur/ /rigs dang 'byung ba lnga rnams dang / /phung po lnga yi rang bzhin gyi/ /rigs dang bgrang bya 'di yis ni/ /rigs zhes mngon par brjod par bya/ /bsgom pa po med bsgom pa'ang med/ /lha med sngags kyang yod ma yin/ /spros pa med pa'i rang bzhin las/ /sngags dang lha ni yang dag gnas/ /rnam snang mi bskyod don yod dang / /rin chen dpag med sems dpa' dang / /tshangs pa khyab 'jug zhi ba dang / /thams cad sangs rgyas de nyid brjod/ /tshangs pa sgrib bral sangs rgyas nyid/ /'jug phyir khyab 'jug brjod par bya/ /rtag tu dge bas zhi ba nyid/ /thams cad kun gyi bdag nyid gnas/ /dam pa'i bde bas de nyid de/ /bde ba rtogs phyir rnam sangs rgyas/ /gang phyir lus las byung ba nyid/ /lha zhes mngon par brjod par bya/ /sangs rgyas 'di la b+ha ga mnga'/ /bcom ldan 'das zhes brjod par bya/ /b+ha ga rnam pa drug tu brjod/ /dbang phyug la sogs yon tan kun/ /yang na nyon mongs la sogs bdud/ /'jom phyir bcom ldan 'das zhes brjod/ /gang phyir skye 'gro skyed pa yis/ /shes rab ma zhes brjod par bya/ /gang phyir skal ba ston pa yis/ /shes rab sring mo zhes bya nyid/ /btso blag ma dang bu mo dang / /gar mkhan mar yang brjod par bya/ /sems can thams cad 'tshod pa'i phyir/ /btso blag ma zhes de bzhin brjod/ /yon tan 'jo phyir shes rab ni/ /bu mo zhes ni brjod par bya/ /snying rje chen po g.yo ba'i phyir/ /shes rab gar mar brjod par bya/ /gang phyir bcom 84.240b ldan mi reg pa/ /de phyir g.yung mor brjod par bya/ /A li kA li rab brtags pas/ /brjod pa bzlas par yang dag bshad/ /rkang pa'i rjes ni dkyil 'khor nyid/ /nyid phyir dkyil 'khor brjod par bya/ /lag pa sgyur ba phyag rgya yin/ /sor mo nyid pa'ang de bzhin no/ /gang phyir rnam sems bsam gtan ni/ /gang bsams de ni bsam gtan no/ /ji ltar ba las bde thob pa/ /de yi bde ba rang gis bza'/ /bde ba gang gis 'ching ba 'di/ /de yi bde ba bsam gtan brjod/ /de kho na nyid kyi le'u ste lnga pa'o// // de nas gzhan yang rab bshad bya/ /spyod pa pha rol phyin mchog nyid/ /gang gis dngos grub mthar 'gro ba/ /kye yi rdo rjes dngos grub rgyus/ /bsgom pa po yis rnam 'dzin pa/ /rna ba dag la sna cha bzang / /spyi bor 'khor lo rnam par 'dzin/ /lag pa dag la lag gdub gnyis/ /rked pa la yang ska rags nyid/ /rkang par de bzhin rkang gdub bo/ /lag pa'i rtsa bar dpung rgyan nyid/ /mgrin par rus pa'i phreng ba ste/ /bgo ba stag gi lpags pa nyid/ /bza' ba mi 'chi bcu phyed de/ /he ru ka sbyor skyes bu ste/ /kha dog lnga la rnam par gnas/ /rigs lnga dag dang mnyam ldan pa/ /rigs ni gcig tu rnam par brtag /kha dog du ma nyid kyis ni/ /gang phyir dbye ba mtshon mi bya/ /shing gcig dang ni dur khrod dang / /ma mo'i khyim dang mtshan mo dang / /yang na dben pa'am pas mtha' ru/ /bsgom pa bzang por brjod par bya/ /cung zad drod ni thob pa na/ /gal te spyod pa byed 'dod pas/ /gal te 'grub 'gyur 'dod yod na/ /'dis ni spyod pa bya ba nyid/ /shin du bzhin bzangs mig yangs ma/ /rang gis dbang bskur snying rje can/ /rdo rje'i bu mo 'di khyer nas/ /spyod pa bya bar rtogs par bya/ /rdo rje rigs kyi dngos med na/ /rang 'dod lha yi rigs kyis bya/ /yang na gzhan gyi rigs byung ba/ /byang chub sa bon gdab pa dang / /sbyang ba yis ni bzung bar bya/ /gal te dga' bas glu blang ste/ /de tshe rdo rje mchog ldan no/ /gal te dga' ba skyes pa na/ /thar pa'i rgyur 84.241a ni gar bya ste/ /de tshe rdo rje rkang pas gar/ /yo gis mnyam par bzhag pas byed/ /'khor lo'i gzugs kyis mi bskyod pa/ /rna cha'i bdag nyid 'od dpag med/ /mgul gyi phreng ba rin chen bdag /lag gdub rnam par snang mdzad brjod/ /ska rags la ni don yod gnas/ /khaT+wA~M ga gzugs shes rab ste/ /thabs kyi gzugs kyis cang te'u nyid/ /zhe sdang rnam dag rnal 'byor pa/ /glu ni rnam dag sngags su gnas/ /gar ni bsgom pa byas pa nyid/ /de yi phyir na glu dang gar/ /yo gi rtag tu rtag tu byed/ /sman ni rnam par bza' ba ste/ /chu ni rtag par btung ba nyid/ /rga shis zil gyis mi non cing / /rtag tu bsrung bar 'gyur ba yin/ /rkun ma'i skra las cod pan byas/ de la hU~M byung sbyar bar bya/ /sangs rgyas lnga yi thod pa rnams/ /rnal 'byor spyod pas rnam par 'dzin/ /thod pa sor lnga pa yi tshad/ /byas pas cod pan 'dzin par byed/ /thabs dang shes rab rang bzhin las/ /skra yi ska rags nyis skor nyid/ /thal ba skra yi mchod phyir thogs/ /rnal 'byor pa yi spyod pas 'dzin/ /cang te'u sgra ni bzlas pa ste/ /khaT+wA~M ga bsgom shes rab nyid/ /rdo rje thod pa'i sbyor ba yis/ /'di dag bzlas dang bsgom pa yin/ /brkam dang rmongs dang 'jigs dang khro/ /ngo tsha'i 'bras bu rnam par spang / /bdag nyid kyi ni gnyid spangs nas/ /the tshom med par spyod pa bya/ /lus kyis sbyin pa byin nas ni/ /phyi nas spyod pa yang dag spyad/ /skal dang skal min rnam dpyad pas/ /de phyir sbyin pa sbyin mi bya/ /bza' bca' de bzhin btung ba nyid/ /ji ltar rnyed pa rab tu bza'/ /yid 'ong mi 'ong rnam rtog phyir/ /zhen pa tsam du mi bya'o/ /bza' dang bza' min spyod pa dang / /de bzhin btung dang btung min nyid/ /bgrod dang bgrod min sngags pa yis/ /rnam rtog nyid du mi bya'o/ /dngos grub rnyed pa'i slob ma gang / /yang dag ye shes snang ba po/ /mnar med spang ba'i rgyu yi phyir/ /grub pas bla ma mngon phyag 'tshal/ / 84.241b bslab dang dbang las rnam par grol/ /de bzhin ngo tsha'i 'bras bu nyid/ /dngos po kun gyi rang bzhin gyi/ /yo gis rnam dpyad snying rje che/ /sbyin sreg mchod sbyin dka' thub 'das/ /sngags dang bsam gtan rnam par spangs/ /dam tshig sdom las rnam par grol/ /rnal 'byor ldan pas spyod pa byed/ /nges par sngon du lha min gang / /brgya byin lta bu yin na yang / /de la 'jigs par mi bya ste/ /seng ge'i gzugs kyis rnam par rgyu/ /sems can kun gyi don gyi phyir/ /rtag tu snying rje btung bar bya/ /rnal 'byor btung dga' rnal 'byor pa/ /gzhan gyis btung bas bzi ba med/ /spyod pa'i le'u ste drug pa'o// // de nas ts+tshom+mA'i le'u bshad par bya'o/ /gang gis spun dang sring mor yang / /the tshom med par shes par bya/ /gang zhig sor mo gcig ston dang / /gnyis kyis legs par 'ongs pa yin/ /g.yon pa'i 'the 'ong bcangs pa las/ /bsnyun gyi phyag rgyar rnam par shes/ /gang zhig srin lag ston pa lta/ /de yi 'the'u chung rnam par sbyin/ /gang zhig gung mo ston pa la/ /de yi 'dzub mo rnam par sbyin/ /gang zhig srin lag ston pa la/ /de la mgrin pa rab tu bstan/ /gang zhig gos ni ston pa la/ /de yi rtse gsum rab tu bstan/ /gang zhig nu ma ston pa la/ /de yi mtshams ni rab tu bstan/ /gang zhig so ni ston pa la/ /de yi kha ni rab tu bstan/ /gang zhig khro gnyer ston pa la/ /gtsug phud dgrol bar brjod par bya/ /gang zhig dpral ba ston pa la/ /de yi rgyab ni rab tu bstan/ /gang zhig rkang mthil ston pa la/ /lto yis rnam par rtse bar bya/ /phyag rgya phyag rgya'i lan gyis ni/ /dam tshig gis ni rnam par dbye/ /de la rnal 'byor mas smras pa/ /e ma bu ni snying rje che/ /gal te phreng ba lag ston na/ /'du bar bya zhes smra ba yin/ /phreng ba mngon par btang byas na/ /dam tshig la mnos brtul zhugs bzang / /de la phyi rol zhes 'du ba/ /bzang po'i spyod yul la gnas pa/ / 84.242a de la 'du bar rnal 'byor mas/ /gang smras de ltar thams cad bya/ /kye bcom ldan 'das 'du ba'i gnas du lags/ bcom ldan 'das kyis bka' stsal pa/ /gnas dang nye ba'i gnas dang ni/ /zhing dang nye ba'i zhing nyid dang / /ts+tshan do nye ba'i ts+tshan do dang / /de bzhin 'du ba nye 'du ba/ /'thung gcod nye ba'i 'thung gcod nyid/ /dur khrod nye ba'i dur khrod nyid/ /'di rnams ni bcu gnyis te/ /sa bcu'i dbang phyug mgon po nyid/ /'dis ni gzhan gyis brjod mi bya/ /kye bcom ldan 'das gnas la sogs pa gang lags/ bcom ldan 'das kyis bka' stsal pa/ /gnas ni dzA lan+d+ha rar bshad/ /de bzhin du ni u T+yan nyid/ /gnas ni kol la gi ri nyid/ /de bzhin du ni kAm rU nyid/ /nye gnas ma la wa zhes brjod/ /sin d+hu na ga ra nyid do/ /zhing ni mum+mu nir bshad de/ /zhing ni byed pa'i brang nyid do/ /de wi ko Ti de bzhin zhing / /zhing ni lcags pa'i brang nyid do/ /nye zhing ku la ta zhes brjod/ /de bzhin arbu da nyid dang / /ba yi mchog sbyin kha ba'i ri/ /nye ba'i zhing ni mdor bsdus pa'o/ /ts+tshan do ha ri ke la dang / /lan tshwa rgya mtsho'i nang skyes dang / lam pa ka dang kam tsi nyid/ /de bzhin saurASh+T+ra nyid do/ /nye ba'i ts+tshan do ka ling ka /gser dang ldan pa'i gling dang ni/ /kong ka NA yang nye ts+tshan dor/ /mdor bsdus pas ni brjod par bya/ /'thung gcod grong khyer gyi dang yang / /'thung gcod grong gi mthar gnas pa/ /tsA ri tra dang ko sa la/ /bin d+h+ya gzhon nu'i grong khyer ro/ /rdo rje snying po snying rje che/ /nye ba'i 'thung gcod de nye ba'o/ /dur khrod rab son dge 'dun dang / /dur khrod rgya mtsho'i 'gram nyid do/ /bskyed tshal ra ba rdzing bu'i 'gram/ /nye ba'i dur khrod brjod par bya/ /sems can kun gyi don gyi phyir/ /rnal 'byor ma rgyud kye'i rdo rje/ /rnal 'byor ma'i legs 'du ba/ /nyin par nyid kyang rab bshad bya/ /kye bcom ldan 'das nyi ma gang lags/ bcom ldan 'das 84.242b kyis bka' stsal pa/ /yid dgas zla phyed bcu bzhi dang / /de bzhin du yang brgyad pa nyid/ /rgyal mtshan dang ni mtshon bsnun nyid/ /lan bdun pa yang bza' bar bya/ /'bad pas snying rje bskyed pa yis/ /bsad par bya bar brjod pa nyid/ /snying rje med na mi 'grub pas/ /de phyir snying rje bskyed pa nyid/ /thams cad gdug pa gzhug pa ste/ /cho ga'i gtso bos dgag par bya/ /de la 'di ltar blta ba nyid/ /nyin mo bcom ldan rdo rje can/ /mtshan mo shes rab brtag par bya/ /mi bya cung zad yod ma yin/ /rtag tu mi bza' yod ma yin/ /'di la mi bsam yod ma yin/ /bzang ngan mi smra gang yang med/ /ji ltar bdag nyid de ltar gzhan/ /de bzhin bdag ni nga mchog nyid/ /'di ltar sems pa'i rnal 'byor bdag /bza' dang btung ba la sogs spyad/ /yan lag ji snyed bsgyur ba dang / /tshig rnams rab tu rgyas pa nyid/ /he ru ka dpal gnas bzhugs pas/ /de snyed sngags dang phyag rgya yin/ /shrI ni gnyis med ye shes te/ /he ni rgyu sogs stog pa nyid/ /ru ni tshogs dang bral ba nyid/ /ka ni gang du'ang mi gnas pa'o/ /rdo rje thod pa'i sbyor ba yis/ /skye bo gang dang gang rnams kyi/ /sha ni mkhas pas bza' bar bya/ /sems can de de dbang du 'gyur/ /brda dang gnas gtan la phab pa'i le'u ste bdun pa'o// // de nas rnal 'byor ma'i 'khor lo bshad par bya'o/ /nam mkha'i khams su b+ha ga bsam/ /dbus su rnam par bsgom pa ni/ /'khor lo sngon du ci rigs par/ /lha rnams ji ltar 'byung ba nyid/ /'khor lo sa dang chu ni sngo/ /ji ltar rigs par byin za dang / /lha rnams kyis ni rlung chen dang / /ji ltar bsgom pa 'byung ba yang / /chos 'byung las skyes 'khor lo nyid/ /'phar ma gnyis dag skyon med pa/ /ze'u 'bru las ni gcig 'gyur te/ /gru gsum gyis ni phyi mar brjod/ /de dbus shi ba bcwa lnga yi/ /gdan gyi bdag nyid rnam par bsam/ /de yi steng du zla ba yin/ /zla ba'i steng du sa 84.243a bon nyid/ /phyi nas bdud las rgyal bas mnan/ /gnyis 'dus pa las bde chen po/ /A li zla ba'i gzugs kyis gnas/ /kA li'i gzugs kyis snang byed do/ /zla ba nyi ma 'dus pa las/ /dkar bo la sogs rab tu grags/ /zla ba me long ye shes ldan/ /bdun gyi bdun pa mnyam nyid ldan/ /rang lha'i sa bon phyag mtshan ni/ /so sor rtogs par brjod par bya/ /thams cad gcig gyur nan tan nyid/ /rdzogs pa chos dbyings dag pa ste/ /mkhas pas cho ga gsungs pa yis/ /rnam pa lnga po bsgom pa nyid/ /A li kA li mnyam sbyor bas/ /rdo rje sems dpa'i nyid kyi gdan/ /yi ge las byung gong bu la/ /hU~M phaT rnam pa'ang 'dod mi bya/ /sems dpa'i gzugs brnyan las byung ba'i/ /dkyil 'khor bdag po rnam par bsgom/ /phyag mtshan zhal sogs gong ma bzhin/ /zla ba chu shel nor bu'i 'od/ /thabs dang shes rab rang bzhin las/ /'di ltar thams cad rdzogs pa nyid/ /zla ba nyi ma'i rab dbye bas/ /A li shes rab kA li thabs/ /'di las dkar mo la sogs pa/ /kha dog dbye bas so so yin/ /re shig nang gi 'phar ma la/ /rnal 'byor ma lnga nges gnas pa/ /phung po lnga yi rang bzhin gyis/ /rnal 'byor rig pas rtag tu bsgom/ /dbang por rdo rje gshin rjer dkar/ /chu bdag chu'i rnal 'byor ma/ /lus ngan rdo rje mkha' 'gro ma/ /dbus su bdag med rnal 'byor ma/ /phyi rol gyi ni 'phar ma la/ /dkar mo chom rkun ro langs ma/ /g+hasma rI dang puk+ka sI/ /ri khrod ma dang gdol pa ma/ /brgyad pa Dom bi nI ru brjod/ /'og ldan ma dang steng ldan nyid/ /mkha' spyod ma dang sa spyod brjod/ /srid dang zhi ba'i rang bzhin gyis/ /snying rje chen po 'di dag gnas/ /lha mo thams cad kha dog gnag /drag chen phyag rgya lnga yis brgyan/ /zhal gcig spyan ni dmar ba rnams/ /lag par gri gug thod pas khyab/ /'khor lo rna cha mgul rgyan dang / /lag par lag gdub ska rags nyid/ /sangs rgyas lnga ni rnam dag 84.243b pas/ /'di lnga phyag rgya dag pa'o/ /ji ltar bdag med rnal 'byor ma/ /de ltar thams cad par bshad/ /lag pa gcig ni thod pas brel/ /g.yas pa na ni gri gug 'dzin/ /g.yon pa khaT+wA~M ga nyid do/ /stag gi lpags pas rnam dkris shing / /ro la zhon zhing gzi brjid 'bar/ /phyag gnyis gyen du dbu skyes ser/ /nga rgyal la sogs skyon drug rnams/ /gcod phyir gri gug rnam par gnas/ /dngos dang dngos med rnam rtog gi/ /mgo bo'i pad ma'i snod du ni/ /bdud rnams rnam pa bzhi yi khrag /dngos grub phyir ni btung bar bya/ /sdong pa'i rnam pas khaT+wA~M ga /thabs kyis ro ni rnam par brtag /'dis ni'i 'khor lo rnam bsgoms na/ /dngos grub myur du thob par 'gyur/ /dang por nag po rab tu bsgom/ /gnyis par dmar po rnam par bsgom/ /gsum pa la ni ser po bsgom/ /bzhi par ljang khu de bzhin no/ /lnga par kha dog sngon po dang / /drug par dkar po'i lus can te/ /yan lag drug bsgom rnal 'byor pas/ /dga' bral mthar yang de bzhin no/ /skyed pa'i rim pa nyid dang ni/ /rdzogs pa'i yang ni rim pa nyid/ /rim gnyis mnyam par gnas nas ni/ /rdo rje can gyis chos 'chad do/ /bskyed pa yi ni cha bshad do/ /nam mkha'i khams ni pad+ma la/ /b+ha ga zhes bya ye shes brjod/ /bsgom pa zhes bya snyoms 'jug nyid/ /de yi bde ba 'khor lor brjod/ /sngon du byung ba zhu ba nyid/ rim pa ji bzhin rang rig nyid/ /lha zhes bya ba byang chub sems/ /ji ltar 'byung ba khu ba yin/ /lhan cig skyes pa rnam pa gnyis/ /re shig btsun mo shes rab yin/ /skyes bu thabs su brjod pa nyid/ /kun rdzob don dam dbye ba las/ /phyi nas de yi rnam pa gnyis/ /re shig skyes bu rnam pa gnyis/ /de yi khu ba'ang bde ba nyid/ /skyes bu ji bzhin shes rab la'ang / /de yi khu ba'ang bde ba nyid/ /de nyid phyir na dga' ba nyid/ /bzhi yi rab tu dbye ba yis/ /skye med rim pa'i phyogs las ni/ /'di ltar lhan cig skyes rnam bzhi/ /dga' ba dang po dpa' bo nyid/ /mchog tu dga' 84.244a ba rnal 'byor ma/ /shin tu bde dga' thams cad nges/ /de bde thabs las thams cad rig /dga' ba bde ba cung zad de/ /mchog tu dga' ba de las lhag /dga' bral dga' ba chags bral yin/ /lhag ma lhan cig skyes dga' nyid/ /dang por rig par 'dod pa dang / /gnyis pa bde bar 'dod pa nyid/ /gsum pa 'dod chags 'jig pa nyid/ /des na bzhi pa bsgom par bya/ /mchog tu dga' ba srid par brjod/ /dga' bral las ni mya ngan 'das/ /dbu ma dga' ba tsam nyid de/ /'dis ni lhan cig skyes pa spangs/ /'dod chags med cing chags bral med/ /dbu mar dmigs par mi 'gyur ro/ /'di la thabs dang shes rab med/ /yang dag de nyid snang ba'o/ /gzhan gyis brjod min lhan cig skyes/ /gang du yang ni mi rnyed do/ /bla ma'i dus thabs bsten pa yis/ /bdag gis bsod nams las shes bya/ /dman pa 'bring dang mchog rnams dang / /gzhan rnams gang rnams de rnams kyang / /ro mnyam de nyid bsgoms pa yis/ /'di kun mnyam pa nyid du blta/ /dman pa gnas ni phra ba'i don/ /mchog ni dngos por brjod par bya/ /dbu ma gnyis kyis spangs pa nyid/ /gzhan rnams zhes bya dbang po drug /gang rnams de rnams brtan dang g.yo/ /'di kun zhes bya nga nyid de/ /mnyam nyid mtshungs par 'dod pa nyid/ /ro mnyam de nyid bsgoms pas ni/ /mnyam zhes bya ba mtshungs par brjod/ /de yi 'khor lo ro zhes brjod/ /bsgoms pa ro gcig mnyam pa nyid/ /'dis ni don gyis brjod par bya/ /nga las 'gro ba thams cad 'byung / /nga las gnas gsum po yang 'byung / /nga yis 'di kun khyab pa ste/ /'gro ba'i rang bzhin gzhan ma mthong / /de ltar rnal 'byor pas shes na/ /shin du mnyam gzhag gang goms pa/ /bsod nams chung ba'i mi yis kyang / /de ni grub par the tshom med/ /bza' dang btung ba blugs pa dang / /nyal dang log dang sems pa na/ /phyag rgya chen po mngon 'dod pas/ /de nas sngon du 'gro 84.244b bar 'gyur/ /gang phyir yid kyis mi bsgom par/ /'gro ba thams cad bsgom par bya/ /thams cad chos ni yongs shes na/ /bsgom pa nyid ni bsgom pa min/ /brtan dang g.yo ba'i dngos po gang / /rtswa lcug 'khri shing la sogs pa/ /bdag gi dngos po'i rang bzhin las/ /dam pa'i de nyid nges bsgom bya/ /de rnams dam pa gcig yod min/ /rang rig bde ba chen po nyid/ /rang rig nas ni byang chub 'gyur/ /rang rig phyir na bsgom pa nyid/ /rang gis rig pa'i 'gyur ba las/ /dman pa las ni las skyes te/ /rang gis 'phrogs cing rang gis byed/ /rang rig rgyal po rang gtso bo/ /'dod chags zhe sdang phrag dog dang / /de bzhin gti mug nga rgyal nyid/ /de kun de gnas nyams dga' bar/ /bcu drug char yang mi phod do/ /chos 'byung las skyes ye shes ni/ /mkha' mnyam lhan cig thabs dang bcas/ /thabs dang shes rab rang bzhin las/ /'jig rten gsum po de las skyes/ /khu ba'i rnam pa bcom ldan nyid/ /de yi bde ba 'dod mar brjod/ /gcig dang du ma bral ba ste/ /skad cig gcig las mchog dga' ba/ /rang gis rig pa'i ye shes 'di/ /bdag gis lam 'das spyod yul te/ /'di ni byin brlabs rim pa'i phyir/ /kun mkhyen ye shes de lta bu/ /sa dang chu dang rlung dang ni/ /me dang nam mkha' nyid dag ni/ /rang gzhan rig pa'i tshor ba yis/ /kun gyis skad cig mi non de/ /mtho ris mi yul rkang 'og gi/ /skad cig las ni gzugs gcig 'gyur/ /rang gzhan cha yi rnam rtog gis/ /gnon pa nyid ni nus pa min/ /thams cad rig byed grub mtha' dang / /de bzhin las rgyas la sogs pas/ /srid pa dag 'gyur dngos grub min/ /yang ni srid mthar skye bar 'gyur/ /'jig rten 'di dang pha rol du/ /de med pas kyang dngos grub med/ /gang gis mi shes kye rdo rje/ /de yi ngal ba don med 'gyur/ /chu bo'i rgyun ni rab 'bab dang / /mar me'i rtse mo rab bcings ltar/ /rtag tu de 84.245a nyid rnal 'byor gyis/ /nyin dang mtshan du rnam par gzhag /rnal 'byor ma'i 'khor lo zhes bya ba 'du ba'i le'u ste brgyad pa'o// // de nas mchog tu rnam par dag pa'i le'u bshad par bya'o/ /nges par dngos po thams cad kyi/ /dag pa de bzhin nyid du brjod/ /phyi nas re rer dbye ba yis/ /lha rnams kyis ni brjod par bya/ /phung po lnga dang dbang po drug /skye mched drug dang 'byung chen lnga/ /rang bzhin gyis ni rnam par dag /nyon mongs shes bya'i sgrib sbyang bya/ /rang rig bdag nyid dag pa nyid/ /dag pa gzhan gyis rnam grol min/ /yul gyi dngos po dag pa'i phyir/ /rang gis rig pa'i bde ba mchog /gzugs la sogs pa'i yul rnams dang / /gzhan yang rnal 'byor pas mthong ba/ /dngos po de kun dag pa ste/ /'di ltar 'gro ba sangs rgyas bdag /kye bcom ldan 'das rnam par ma dag pa gang lags/ bcom ldan 'das kyis bka' stsal pa/ gzugs la sogs pa'o/ /de ci'i slad du zhe na/ gzung ba dang 'dzin pa'i dngos po'i phyir ro/ /rdo rje snying pos gsol pa/ kye bcom ldan 'das gzung ba dang 'dzin pa gang lags/ bcom ldan 'das kyis bka' stsal pa/ /mig gis gzugs ni gzung bar bya/ /sgra ni rna bas mnyan par bya/ dri ni sna yis tshor bar bya/ /lce yis ro ni myang bar bya/ /dngos po lus kyis reg par bya/ /yid kyis bde sogs thob pa ni/ /dag pas dug med byas nas ni/ /bsten bya 'di dag bsten pa nyid/ /gzugs phung rdo rje ma yin te/ /tshor ba la yang dkar mor brjod/ /'du shes chu yi rnal 'byor ma/ /'du byed rdo rje mkha' 'gro ma/ /rnam shes phung po'i tshul gyis ni/ /bdag med rnal 'byor ma gnas so/ /rtag tu 'di dag rnam dag pas/ /de nyid rnal 'byor pas 'grub 84.245b 'gyur/ /nang gi 'phar ma la'o/ /de nas phyi yi 'phar ma bshad/ /dbang ldan du ni puk+ka sI/ /mer ni de bzhin ri khrod ma/ /bden bral gdol pa mo gzhag cing / /rlung du g.yung mo rnam par bzhag /phyi nas lha mo dkar mo sogs/ /dbang dkar gshin rjer chom rkun ma/ /chu bdag phyogs su ro langs ma/ /lus ngan por ni g+hasma rI/ /'og tu sa spyod ma zhes brjod/ /steng du mkha' spyod ma zhes bshad/ /bskyed pa'i rim pa nyid kyi phyogs/ /srid dang zhi ba'i rang bzhin gyis/ /lha mo 'di gnyis rnam par gnas/ /gzugs la dkar mo rtag tu bshad/ /sgra la chom rkun ma rab grags/ /dri yi cha la ro langs ma/ /ro la g+hasma rI rab grags/ /reg la sa spyod ma zhes bshad/ /chos kyi dbyings la mkha' spyod ma/ /rtag tu 'di dag rnam dag pas/ /de nyid rnal 'byor pas 'grub 'gyur/ /phyag gi dag pa stong pa nyid/ /bdud dag pa las zhabs rnams nyid/ /rnam thar brgyad kyis zhal rnams nyid/ /rdo rje gsum gyis dag pa'i spyan/ /sa ni puk+ka si zhes bshad/ /chu khams rngon pa mo zhes brjod/ /me ni gtum mor shes par bya/ /rlung ni g.yung mor rab tu grags/ /zhe sdang zhes bshad rdo rje ma/ /'dod chags chu yi rnal 'byor ma/ /phrag dog rdo rje mkha' 'gro ma/ /ser sna gsang ba'i dkar mo nyid/ /gti mug de bzhin rdo rjer bshad/ /zhe sdang la sogs rnam sbyong ba/ /bskyed pa'i rim pa'i phyogs la ni/ /'dis ni phung po sbyang bar bya/ /gang dang gang gis 'jig rten 'ching 'gyur ba/ /de dang des ni 'ching ba las grol te/ /de nyid mi shes 'jig rten mi grol zhing / /de nyid rnams spangs dngos grub rnyed mi 'gyur/ /de phyir dri med sgra med gzugs nyid med/ /ro dang sems kyi rnam par dag pa med/ /reg med chos med thams cad rnam par dag /rang bzhin dag pa'i 'gro la 'gro bar shes/ /rnam par dag pa'i le'u ste dgu pa'o// // de nas ji ltar dkyil 'khor gyi/ / 84.246a rim pa yang dag rab tu bshad/ /gang gis slob ma dbang bskur ba'i/ /cho ga rab tu bshad par bya/ /dang por lha yi bdag nyid kyi/ /rnal 'byor pas ni nor 'dzin sbyang / /'bad pas hU~M las rdo rje can/ /byas te phyi nas dkyil 'khor bri/ /tshal dang skye bo med gnas dang / /byang chub sems dpa'i khyim dang ni/ /dkyil 'khor khang pa'i nang du yang / /dkyil 'khor dam pa rab tu bzhengs/ /rdul tshon dam pa'i tshon dang ni/ /yang na 'bring po nyid kyis te/ /rin chen lnga yi phye ma 'am/ /yang na 'bras la sogs pas so/ /de nas dkyil 'khor khru gsum dang / /'the bong gsum ni lhag par bya/ /der ni rigs lnga las byung ba'i/ /rig ma bzang mo rnams par gzhug /yang na ji ltar gang rnyed de/ /de ltar bcu drug lon pa nyid/ /ji srid khu ba ldan gyur pa/ /de srid phyag rgya bsten par bya/ /phyag rgya'i gdong ni bcing ba dang / /thabs kyi gdong yang de bzhin no/ /bsten pa de las gang byung ba/ /slob ma'i khar ni btung bar bya/ /ro mnyam slob ma'i spyod yul nyid/ /de nyid la yang bya bar bya/ /rang rig ye shes nyid du 'gyur/ /rang gzhan yang dag rig pa spangs/ /mkha' mnyam rdul bral stong pa nyid/ /dngos dang dngos med bdag nyid mchog /thabs dang shes rab shin tu 'dres/ /chags dang chags bral rnam par 'dres/ /de nyid srog chags rnams kyi srog /de nyid yi ge dam pa nyid/ /de nyid 'gro ba'i bdag nyid de/ /de nyid thams cad khyab pa po/ /thams cad lus la rnam par gnas/ /dngos dang dngos med de las byung / /gzhan dang gang rnams de rnams dang / /rnam par shes pa kun gyi tshul/ /skyes bu sngon rabs dbang phyug dang / /bdag dang gso ba sems can dang / /dus dang gang zag nyid dang ni/ /dngos po kun gyi rang bzhin 'di/ /sgyu ma'i gzugs kyis yang dag gnas/ /dang po dga' ba tsam nyid de/ /gnyis pa'i grangs las mchog dga' nyid/ /gsum pa las ni dga' bral bshad/ /bzhi pa lhan cig skyes par brjod/ /de bzhin gshegs 84.246b pa rnams dang ni/ /rdo rje snying po la sogs kun/ /mkhas pas de skad nges thos na/ /mchog tu ngo mtshar gyur nas ni/ /brgyal zhing sa la 'gyel bar 'gyur/ /dang po dga' ba 'gro ba'i gzugs/ /de bzhin mchog dga' 'gro ba nyid/ /dga' bral dga' ba'ang 'gro ba nyid/ /gsum pa lhan cig skyes pa med/ /bcom ldan bka' stsal kye'i rdo rje/ /sangs rgyas kun gyi sku gcig pa/ /rdo rje snying pos rtogs bya'i phyir/ /the tshom legs par sel ba ni/ /'dod chags med cing chags bral med/ /dbu mar dmigs par mi 'gyur ro/ /gsum po spangs pa nyid kyi phyir/ /lhan cig skyes pa byang chub brjod/ /yang na de nyid thams cad bdag /yang na kun gyis rnam par spangs/ /de yang dga' bral dang por mtshon/ /dga' ba gsum po rnam par spangs/ /dngos po sprin dang 'dra ba yin/ /grub pa sgyu ma lta bu 'gyur/ /nyal dang log pa'i khyad par las/ /rtag tu rmi lam 'dra bar 'gyur/ /dngos grub mtshan nyid mi phyed pa'i/ /phyag rgya rnal 'byor pa yis 'grub/ /ston pas dkyil 'khor 'di skad gsungs/ /gru bzhi yang dag 'bar ba nyid/ /sgo bzhi gzi brjid chen po ste/ /do shal do shal phyed pas brgyan/ /phreng ba sna tshogs rnga yab ldan/ /ka ba brgyad kyis nye bar brgyan/ /rdo rje srad bu mnyam par ldan/ /me tog sna tshogs nye bar brgyan/ /bdug pa mar me de bzhin dri/ /bum pa brgyad la sogs pa ldan/ /de yang yal ka la sogs brgyan/ /mgrin pa gos kyis dgab pa dang / /rin chen lnga ni yongs su gzhug /rnam par rgyal ba shar du sbyin/ /rang 'dod lha yi gzugs kyis ni/ /sar pa legs par bkal ba dang / /shin tu tshad ma mdzes pa yi/ /srad bus shes rab can gyis gdab/ /'khor lo'i bdag po'i bzlas pa 'bum/ /dkyil 'khor can gyi de bzhin khri/ /gong du gsungs pa'i sngags nyid kyis/ / 84.247a mkhas pas nor 'dzin rnam par sbyang / /gong gi a sogs sngags kyis ni/ /de la gtor ma rnam par sbyin/ /ji ltar bsam gtan de bzhin 'dir/ /bsrungs pa ji ltar gsungs pa nyid/ /gang zhig dbang ni rab phye ba/ /rang gi dkyil 'khor cho gas sbyin/ /mchod dang gsol ba gdab pa nyid/ /ji ltar bshad pa de bzhin 'dir/ /'phar ma gnyis bzang rnam bris nas/ /myur du dkar mo la sogs bri/ /shar du gri gug rnam par bri/ /lho dang nub du'ang de bzhin no/ /byang dang me yi mtshams dang ni/ /bden bral rlung du'ang de bzhin no/ /dbang ldan du ni ci gsungs pa/ /de lta de ltar 'og dang steng / /rdo rje sems dpa'i snyems byas nas/ /rkang pa g.yas pa brkyang byas te/ /phyag gnyis kye'i rdo rje sbyor bas/ /slob dpon dkyil 'khor 'jug pa nyid/ /khrus dang gtsang sbra dri zhim lus/ /sna tshogs rgyan gyis rnam par brgyan/ /hU~M hU~M snyems pa byas nas ni/ /hI hIHrnam par 'jigs byed bdag /phyi nas de nyid yang dag bshad/ /rnam dag ye shes gzugs can dang / /'khor ba dang ni mya ngan 'das/ /khyad par cung zad yod ma yin/ /mchog gar bsgom pa med cing sgom pa po yang med/ /lus kyang med cing gzung ba med dang 'dzin pa'ang med/ /sha dang khrag kyang med cing bshang dang gci ba'ang med/ /skyug bro rmongs med gtsang sbra mchod phyir thogs med dang / /chags med sdang ba med dang rmongs med phrag dog med/ /ser sna med dang nga rgyal med cing mthong bya med/ /sgom dang sgom pa po med bshes dang dgra med cing / /rlom sems med pa'i lhan cig skyes pa'i sna tshogs nyid/ /rdo rje snying pos 'di skad gsol/ /gzod nas rang bzhin med pa yi/ /lus kyi rang bzhin dag pa ni/ /ci slad 'byung ba'i bdag nyid lags/ /de nas bcom ldan rdo rje can/ /mkha' 'gro bde ba sbyin pas gsungs/ /rlom sems 84.247b med pa'i rang bzhin bdag /thams cad lus la rnam par gnas/ /kye bcom ldan 'das ci'i slad du 'byung ba chen po pa'i phung po lags/ bcom ldan 'das kyis bka' stsal pa/ /bo la kak+ko la sbyor bas/ /reg pa sra ba'i chos kyis ni/ /sa ni de las skye bar 'gyur/ /byang sems khu ba'i rnam pa las/ /chu yi khams ni 'byung bar 'gyur/ /bskyod pa las ni drod skye ste/ /'gro bas rlung du rab tu grags/ /bde ba namakha' nyid kyi khams/ /lnga po rnams kyis yongs su bskor/ /gang phyir 'byung ba che bde ba/ /de phyir bde ba de nyid min/ /lhan cig skyes pas gang skyes pa/ /lhan cig skyes par de brjod bya/ /rang bzhin lhan cig skyes zhes brjod/ /rnam pa thams cad sdom pa gcig /phyag rgya rgyu dang bral ba las/ /yo gi snying rje thabs su 'gyur/ /stong nyid snying rje dbyer med pa/ /byang chub sems zhes rab tu brjod/ /sngags kyi bzlas med dka' thub med dang sbyin bsreg med/ /dkyil 'khor can yang med cing dkyil 'khor yang ni med/ /de ni sngags bzlas de bka' thub dang de sbyin bsreg /de ni dkyil 'khor can dang de ni dkyil 'khor nyid/ /mdor bsdus nas ni sems ni 'dus pa'i gzugs can no/ /dbang gi le'u zhes bya ste bcu pa'o// // mnyam par ma rungs dpral ba can/ /rtag tu ltung bar byed par brjod/ /dbang gi lta stangs g.yon na gnas/ /g.yon pa nas ni gzugs brnyan gnyis/ /g.yas pa'i cha la dgug pa nyid/ /steng nas kyang ni gzugs brnyan gnyis/ /dbu ma rengs pa'i lta stangs nyid/ /sna yi rtse mo'i dbus su gnyis/ /dbyung ba nyid kyis ltung bar byed/ /rngub pa yis ni dbang du byed/ /dgang ba yis ni dgug pa nyid/ /gzhil ba yis ni rengs par byed/ /rlon pa'i shing la ltung byed nyid/ /dbang ni me tog rab tu grags/ /rdo rje'i shing la dgug pa nyid/ /g.yo bcas rtswa la rengs byed 84.248a nyid/ /zla drug goms pa'i sbyor ba yis/ /'grub 'gyur 'di la the tshom mid/ /'di la 'khrul pa mi bya ste/ /sangs rgyas rdzu 'phrul bsam mi khyab/ /lta stangs bzhi po bsgrubs nas ni/ /mkhas pas sems can gzhug par bya/ /gsad par 'di la bya ma yin/ /dam tshig nges par nyams par 'gyur/ /sems can slu ba spangs nas ni/ /bya ba ma yin thams cad bya/ /sems can gnod pa tsam gyis ni/ /phyag rgya'i dngos grub rnyed mi 'gyur/ /de la dam tshig bza' bya ba/ /na dang ga ha dang po dang / /mtha' yi shwa dang dang po'i shwa/ /kye'i rdo rje yi dngos grub phyir/ /bdud rtsi lnga yang de bzhin bza'/ /kye yi rdo rjes gsungs mtshan nyid/ /skye ba bdun pa de nas mtshon/ /dga' bral dga' ba la smod pa/ /lan bdun pas ni 'grub par 'gyur/ /skad snyan mig dang ldan pa dang / /dri lus gzi brjid chen po dang / /de yi grib ma bdun du 'gyur/ /mthong nas rnal 'byor pa yis mtshon/ /de ni zos pa tsam gyis ni/ /skad cig las ni mkha' spyod 'gyur/ /ku ru kul+le'i sgrub thabs bshad par bya ste/ gong du brtag pa bcu gnyis par/ /rgyas par gsungs pa mdo ru bsdu/ /hrIHlas byung ba'i lha mo ni/ /kha dog dmar zhing phyag bzhi ma/ /mda' dang gzhu yi lag pa ma/ /ud pa la dang lcags kyu 'dzin/ /'di ni bsgoms pa tsam gyis ni/ /'jig rten gsum po dbang du byed/ /'bum phrag gcig gis rgyal po rnams/ /khri yis 'jig rten phal pa nyid/ /bye bas phyugs dang gnod sbyin sogs/ /'bum phrag bdun gyis lha ma yin/ /'bum phrag gnyis kyis lha rnams nyid/ /brgya phrag gcig gis sngags pa nyid/ /kye'i rdo rje mkha' 'gro ma dra ba'i sdom pa las rdo rje snying po mngon par byang chub pa zhes bya ba brtag pa'i rgyal po rdzogas+ho// |