// @#/ /rgya gar skad du/ nan+do pa nan+da nA ga rA dza da ma na sU tra/ bod skad du/ klu'i rgyal po dga' bo nyer dga' 'dul ba'i mdo/ 'phags pa dkon mchog gsum la gus pas phyag 'tshal lo/ /'di skad bdag gis thos pa dus gcig na/ bcom ldan 'das mnyan yod rgyal byed tshal mgon med zas sbyin gyi kun dga' ra ba na bzhugs so/ /khyim bdag mgon med zas sbyin dus gcig na/ bcom ldan 'das kyis chos bstan pa thos nas/ btsun pa dge slong lnga brgya dang bcas pa sang nang par bdag gi khyim du gdugs tshod la 'byon par zhu zhes mgron du gnyer to/ /bcom ldan 'das kyis de la gnang nas/ de'i nyin mo'i lhag ma dang mtshan mo'i mtha' 'das nas tho rangs kyi dus su stong phrag bcu'i 'jig rten gyi khams la thugs kyis rnam par dgongs so/ /de nas klu'i rgyal po dga' bo nyer dga' zhes bya ba ye shes kyi sgo nas mngon du byas so/ /de la nges par legs pa'i sa bon yod dam zhes brtags pa na/ 'di ni log par lta ba can dkon mchog gsum la dad pa med par gzigs so/[ ]/gzigs nas gang zhig 'di ni log par lta ba las/ rnam par grol bar bya ba'i phyir/ 'dul bar byed pa/[ ]gnas brtan chen po maud gal gzigs so/ /de nas mtshan mo tho rangs kyi dus su sku'i byi dor mdzad 39.280a nas/ tshe dang ldan pa kun dga' bo bos te bka' stsal pa/ kun dga' bo/[ ]dge slong lnga brgya dang bcas pa'i bcom ldan 'das lha'i 'jig rten du gshegs so zhes ston cig /des btsun pa bka' bzhin 'tshal lo zhes gsol nas dge slong rnams la don de smras so/ /de'i nyi ma la dga' bo nyer dgas nyer bsdogs byas so/ /de lha'i rin po che'i steng du skyil dkrungs kyis gnas te/ lha'i gdugs dkar po bzung ngo / /klu dang klu mo gar byed cing klu'i 'khor g.yog du mas bskor te lha'i snod nye bar bzhag nas bza' ba dang btung ba rnam pa sna tshogs pa la rtog par byed do/[ ]/de nas bcom ldan 'das kyis klu'i rgyal po ji lta bar gzigs so/ /de ltar byas pa gzigs nas de'i mgo bo'i steng gi bla bres kyi steng nyid nas/ bcom ldan 'das dge slong lnga brgya dang bcas pas gshegs te/ sum bcu rtsa gsum gyi lha'i bar mngon sum du gyur to/ /de'i tshe de'i dus na klu'i rgyal po dga' bo nyer dga' de lta bu'i gzugs kyis sdig pa'i lta bar lhung ba lta ba ngan pa'i sems skyes so/ /dge sbyong mgo reg 'di nga'i steng nas sum bcu rtsa gsum gyi lha'i 'jig rten gyi gnas su gshegs par 'gyur ro/ /'di ni da lta nas nga'i mgo bo la rkang pa'i rdul mgo bo'i steng du lhung bar byed pas 'gro ru mi ster ro snyam ste/[ ]langs nas ri rab kyi rtsa bar song ngo / /rang gi gzugs bor te ri bo mchog rab steng 'og thams cad rang gi lus kyis lan bdun du dkris nas/ steng du gdengs ka byas te/ sum bcu rtsa gsum pa rnams kyis mi mthong bar bya ba'i phyir ro/ /de nas tshe dang ldan pa yul 'khor skyong gis bcom ldan 'das la 'di skad ces gsol to/ /btsun pa sngar bzhin gnas 'di'i phyogs su 'dug nas ri bo mchog rab mthong ngo / /ri bo mchog rab 'khor dang bcas pa mthong ngo / /sum bcu rtsa gsum mthong ngo / /rnam par rgyal ba'i khang bzang mthong ngo / /rnam par rgyal ba'i khang bzang gi steng gi rgyal 39.280b mtshan mthong ngo / /btsun pa ci'i rgyu ci'i rkyen lags/ da ni ri bo mchog rab mi mthong bar gyur/[ ]bcom ldan 'das kyis bka' stsal pa/ yul 'khor skyong 'di ni klu'i rgyal po dga' bo nyer dga' zhes bya ba khyed rnams la khros par gyur te/ ri bo mchog rab lan bdun du lus kyis dkris nas steng du gdengs kas bsgribs so/ /mun pa mun nag tu byas nas gnas so/ /gsol pa/ btsun pa bdag gis gdul bar bgyi 'am/ bcom ldan 'das kyis gnang ba ma byin no/ /de nas tshe dang ldan pa bzang ldan dang / tshe dang ldan pa sgra gcan 'dzin te/ go rims bzhin du dge slong thams cad kyis zhus so/ /bcom ldan 'das kyis rjes su gnang ba ma byin no/ /thams cad kyi rjes su gnas brtan chen po maud gal gyi bus btsun pa bdag gis gdul bar bgyi 'am zhes zhus pa dang / maud gal gyi bu thul cig ces bcom ldan 'das kyis gnang ba byin no/ /gnas brtan rang gi lus bor la klu'i rgyal po'i lus chen por sprul te/ dga' bo nyer dga'i lus kyi steng du lan bcu bzhi lus kyis dkri ba dang / de'i gdengs ka'i steng du rang gi gdengs ka bya'o/ /ri bo mchog rab dang bcas pa thams cad non cig ces bka' stsal pa dang / gnas brtan maud gal gyi bus de bzhin du byas so/ /de nas klu'i rgyal po dga' bo nyer dgas kha brlangs kyi du ba btang ngo / /gnas brtan gyis kyang khyed kyi lus la kha brlangs kyi du ba yod la nged la med pa yin nam zhes kha brlangs btang ngo / /klu'i rgyal po dga' bo nyer dga'i du bas gnas brtan la gnod par ma gyur to/ /gnas brtan gyi kha brlangs kyi du bas klu'i rgyal po la gnod par gyur to/ /klu'i rgyal po rab tu 'bar ro/ /gnas brtan gyis khyed kyi lus la 'bar ba yod pa bzhin nged la med dam zhes 'bar bar byas so/ /klu'i rgyal po'i me 'od kyis gnas brtan la gnod par 39.281a ma gyur to/ /gnas brtan gyi me 'od kyis klu'i rgyal po la gnod par gyur to/ /klu'i rgyal pos bsams pa 'di ni bdag gi lus ri bo mchog rab dang bcas pa nges par mnan nas du ba dang me 'bar bar byed do snyam nas/ khyed gang yin zhes dris so/ /bdag maud gal zhes bya'o/ /btsun pa rang gi gzugs kyis gnas par gyis shig /gnas brtan gyis klu'i lus dor nas/ de'i rna ba g.yas pa'i bu ga nas zhugs te/ rna ba g.yon pa'i bu ga nas 'thon no/ /yang rna ba g.yon pa'i bu ga nas zhugs nas/ rna ba g.yas pa'i bu ga nas 'thon no/ /de bzhin du sna g.yas pa'i bu ga nas zhugs nas/[ ]sna g.yon pa'i bu ga nas 'thon te/ yang sna g.yon pa'i bu ga nas zhugs nas/[ ]sna g.yas pa'i bu ga nas 'thon no/ /de nas klu'i rgyal po'i kha gdangs so/ /gnas brtan khar zhugs nas/ gsus pa'i nang du mdun rgyab du yang dang yang du rgyus so/ /bcom ldan 'das kyis maud gal rdzu 'phrul cher yid la gyis shig klu rdzu 'phrul chen po dang ldan pa yin no zhes bka' stsal to/ /gnas brtan gyis btsun pa/ bdag gis rdzu 'phrul gyi rkang pa bzhi bsgoms pa dang /[ ]mang du byas pa dang / brtson par byas pa dang / gzhir byas pa dang / rjes su bsgrubs pa dang / 'dris par byas pas legs par brtsams so/ /btsun pa/ dga' bo nyer dga' lta zhog /dga' bo nyer dga' dang mtshungs par brgya'i tshogs dang / /stong gi tshogs dang / 'bum gyi tshogs kyang bdag gis gdul bar nus so/ /zhes gsol to/ /klu'i rgyal pos bsams pa nang na rgyu ba bdag gis ma mthong ngo / /phyir 'byung ba'i tshe mche ba gnyis kyi bar du bza' bo snyam nas/ btsun pa phyir shog /nga'i lto ba'i nang du yang dang yang du rgyu ba dang sdod pas ci bya zhes pas/ gnas brtan phyir byon nas gnas so/ /klu'i rgyal pos mthong nas/ 'di yin nam zhes smras te/ sna'i rlung phyir btang ngo / /gnas brtan bsam gtan bzhi po mnyam par thob pas/ ba spu'i bu ga gcig tu yang 39.281b sna'i rlung gis bskyod par mi nus so/ /de las gzhan pa'i dge slong rnams kyis dang po rnams kyi cho 'phrul thams cad byed par nus kyis/[ ]gnas 'di rnams la rab tu zhugs nas/ bsam gtan bzhi po myur du bsgrub par mi nus so/ /de'i phyir bcom ldan 'das kyis klu'i rgyal po 'dul ba de rnams la gnang ba ma byin no/ /klu'i rgyal po bdag gis dge slong 'di'i ba spu'i bu ga tsam yang sna'i rlung gis bskyod par ma nus pas rdzu 'phrul chen por bsams so/ /gnas brtan gyis dge slong gi gzugs dor nas/ 'dab bzang bya khyung gi gzugs su mngon par sprul to/ /'dab bzang kyi lus de mthong nas klu'i rgyal po bros par gyur to/ /'dab bzang kyi rjes su 'brel bar klu'i rgyal pos rang gi gzugs dor nas bram ze'i khye'u'i gzugs su sprul te/ btsun pa khyed la skyabs su 'gro'o zhes brjod par byed cing gnas brtan gyi zhabs la phyag btsal lo/ /gnas brtan gyis ston pa'i thad du shog cig 'gro ba yin no zhes klu'i rgyal po btul nas dug med par byas te bcom ldan 'das kyi drung du phyin no/ /klu'i rgyal pos bcom ldan 'das la phyag byas te/ btsun pa khyed la skyabs su 'gro'o zhes gsol to/ /bcom ldan 'das kyis legs so zhes bka' stsal nas/ dge slong 'khor dang bcas pa mgon med zas sbyin gyi gnas su gshegs so/ /mgon med zas sbyin gyis/ btsun pa yun ring por mi 'byon pa ci zhes gsol pa dang / bcom ldan 'das kyis maud gal gyi bu dang / dga' bo nyer dga' gnyis g.yul bkye'o zhes bka' stsal to/[ ]/btsun pa su zhig pham su zhig rgyal bar gyur zhes gsol pas/ khyim bdag maud gal gyi bu rgyal bar gyur/ dga' bo nyer dga' pham par gyur to zhes bka' stsal to/ /mgon med zas sbyin gyis btsun pa bcom ldan 'das la zhag bdun du gdugs tshod gsol bar zhus/ gnas brtan la bkur sti dang sti btang bgyid par zhus so/ / 39.282a sangs rgyas la sogs pa'i dge slong lnga brgya po rnams la bkur sti dang /[ ]sti stang zhag bdun du bgyid par 'tshal lo/[ ]/bcom ldan 'das kyis bka' stsal pa dang / dge slong de rnams bcom ldan 'das kyis gsungs pa la mngon par bstod do/ /klu'i rgyal po dga' bo nyer dga' 'dul ba'i mdo rdzogs s+ho//[ ]//[ ] |