@#//'phags pa dkon mchog brtsegs pa chen po'i chos kyi rnam grangs le'u stong phrag brgya pa las le'u sum bcu rtsa bdun pa ste 'phags pa seng ges zhus pa/ sho lo ka drug bcu/ @#/ /rgya gar skad du/ Ar+ya sing ha pa ri pr-i ts+tshA nA ma ma hA yA na sU tra/ bod skad du/ 'phags pa seng ges zhus pa zhes bya ba theg pa chen po'i mdo/ sangs rgyas dang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod kyi phung po'i ri la dge slong stong nyis brgya lnga bcu'i dge slong gi dge 'dun chen po dang thabs gcig tu bzhugs te/ byang chub sems dpa'i dge 'dun chen po dang yang thabs gcig go/ /thams cad mkhyen cing thams cad gzigs/ /rgyal ba gang zag mtshungs pa med/ /rgyal po ma skyes dgra yi bu/ /seng ge zhes ni grags pa zhig /tshong dpon bu pho lnga brgya yis/ /mdun du bdar te lhan cig tu/ /rgyal po'i khab nas de byung nas/ /rgyal po'i 'byor pa chen po yis/ /gser las byas pa'i gdugs thogs te/ /rdzogs sangs rgyas kyi gan song nas/ /zhabs la mgo bos phyag 'tshal te/ /lnga brgya po yis gdugs de dag /tshang bar thub pa che la phul/ /kun kyang byang chub don du zhugs/ /rdzogs sangs rgyas kyi mthu yis ni/ /de dag mi 'jigs skyes gyur nas/ / 83.27b seng ges thal mo sbyar byas te/ /rdzogs sangs rgyas la zhus pa ni/ /byang chub sems dpa'i spyod pa gang / /de ni 'dren pas bdag la gsungs/ /gang gis mdzes par 'gyur ba lags/ /gang gis rdzus te skye bar 'gyur/ /skye ba dran par ji ltar 'gyur/ /thub pa chen pos lung bstan gsol/ /de dag lhag bsam ye shes kyis/ /mkhyen nas sangs rgyas lung bstan pa/ /byang chub sems dpa' spyod gang zhes/ /khyod kyis dris pa de bstan to/ /bzod pa yis ni mdzes par 'gyur/ /tshangs par spyad pas rdzus te skye/ /chos kyi sbyin pas skye ba dran/ /gzhon nu de ltar shes par gyis/ /gang gis sum bcu rtsa gnyis mtshan/ /dpe byad bzang po brgyad bcu dang / /gser mdog 'dra ba'i lus 'gyur zhing / /de mthong sems can dga' bar 'gyur/ /sbyin pa kun gyis mtshan du 'gyur/ /byams pas de bzhin dpe byad bzang / /sems can kun la sems mnyam pas/ /rgyal ba gser gyi mdog 'drar 'gyur/ /gzungs ni gang gis thob par 'gyur/ /gang gis ting 'dzin skye 'gyur lags/ /gzung ba'i tshig tu gang gis 'gyur/ /thub pa chen pos lung bstan gsol/ /chos la bzod pas gzungs rnams 'thob/ /sems bsgoms pas ni ting 'dzin skye/ /kyal ba'i tshig rnams spang byas na/ /gzung bar 'os pa'i tshig tu 'gyur/ /dran dang ldan par ji ltar 'gyur/ /thub pa ji ltar blo gros ldan/ /ji ltar chos spyod 'gyur ba lags/ /skye bu dam pa mkhas cis 'gyur/ /g.yo med pas ni dran ldan 'gyur/ /don la sems pas blo gros ldan/ /gus dang bcas pas chos spyod 'gyur/ /chos kyi mtshan nyid rtogs pas mkhas/ /'jig rten mgon po'i spyan sngar ni/ /las gang gis ni skye bar 'gyur/ /'jig rten mgon gyi mngon sum du/ /zhu ba zhu bar ji ltar 'gyur/ /gang zhig chos kyi sbyin pa la/ /nam yang bar chad mi byed pa/ /de ni des na myur rab tu/ /'jig rten mgon dang phrad par 'gyur/ /gang gis mi khom spong bar 'gyur/ /gang gis bzang 'gror mchi 'gyur lags/ / 83.28a skye ba kun du skye ba na/ /bag mchis par ni ji ltar 'gyur/ /dad pas mi khom spong par 'gyur/ /tshul khrims kyis ni bzang 'gror 'gro/ /stong pa nyid ni bsgom byas na/ /rtag tu bag dang ldan par 'gyur/ /thub pa byang chub sems dpa' rnams/ /ji ltar las rnams dag par 'gyur/ /ji ltar bdud kyi snyis mi thogs/ /ji ltar chos kyi phongs 'gyur spong / /rnam par grol bas las rnams dag /brtson 'grus kyis ni bdud 'dul 'gyur/ /ci smras de bzhin byed pas ni/ /chos kyis phongs pa spong bar 'gyur/ /ka la ping ka'i sgra snyan dang / /tshangs pa'i dbyangs 'drar ji ltar 'gyur/ /thub pa mos pa sna tshogs kyi/ /sems can rnams ni gang gis dga'/ /bden par smras pas tshangs pa'i dbyangs/ /ngag rtsub spangs pas sgra snyan 'gyur/ /kyal ba'i tshig dang phra ma rnams/ /spangs pas sems can dga' bar 'gyur/ /ji ltar tshe ring 'gyur ba lags/ /bro nad nyung bar ji ltar 'gyur/ /rnam par 'dren pa gang gis na/ /g.yog 'khor rnams ni mi phyed 'gyur/ /gsod pa mi byed tshe ring 'gyur/ /mi 'tshe bas ni nad nyung 'gyur/ /mi mthun pa dag bsdums byas na/ /g.yog 'khor rnams ni mi phyed 'gyur/ /don rnams ji ltar 'grub 'gyur lags/ /gang gis longs spyod mi nyams 'gyur/ /gang dang gang du skye ba der/ /dbang chen grags par ji ltar 'gyur/ /chags pa med pas don rnams 'grub/ /ser sna med pas longs spyod 'phel/ /gang dang gang du skye ba der/ /phrag dog med pas dbang cher grags/ /ji ltar lha yi mig 'thob 'gyur/ /lha yi rna ba ji ltar 'thob/ /sems can 'chi 'pho skye ba dag /'dren pa gang gis 'tshal bar 'gyur/ /mar me byin pas mig 'thob 'gyur/ /rol mo'i sgra yis rna ba dag /'chi 'pho skye shes ye shes kyis/ /de dag de ltar 'grub par 'gyur/ /'dren pa byang chub sems dpa' yi/ /zag pa gang gis pas par 'gyur/ /tshe rabs snga dran cis 'gyur lags/ /rdzu 'phrul ci yis 'thob par 'gyur/ /bzhon pa byin pas rdzu 'phrul 'thob/ /dran pa bsgoms 83.28b pas rjes su dran/ /mtha' gnyis rab tu spang byas na/ /zag pa zad par reg par 'gyur/ /gang gis zhing ni phun sum tshogs/ /cis ni dge 'dun phun sum tshogs/ /gang gis phun sum tshogs 'od 'gyur/ /gang gis phyogs bcur lhang nger gda'/ /smon lam gyis ni phun sum zhing / /bsdu bas dge 'dun phun sum tshogs/ /'dir ni rin chen gdugs phul bas/ /phyogs bcur lhang nger snang bar 'gyur/ /chos rnams thams cad bsdu ba ni/ /chos gang gis ni thob par 'gyur/ /gang dang gang du skyes pa der/ /byang chub sems dpa' dga' ba 'thob/ /sems can thams cad thar bya'i phyir/ /byang chub don du sems btud pa/ /des ni chos rnams bsdu ba 'thob/ /der ni dga' ba 'ang 'thob par 'gyur/ /bslab pa ci 'dra bslabs pa dang / /sems ni ci 'dra bsgoms pa yis/ /thub pa chen po khyod 'dra ba'i/ /ston pa thams cad mkhyen par 'gyur/ /sems can ma lus thams cad la/ /mnyam pa'i sems nyid bslabs pa dang / mnyam par sems ni bsgoms pas na/ /thams cad zil gnon rgyal bar 'gyur/ /skye ba kun tu byang chub sems/ /rmi lam na yang sems de ni/ /'dor mi 'gyur na ma nyal tshe/ /smos ci 'tshal bar gang gis 'gyur/ /grong dang grong khyer rnams su'am/ /gang du gnas pa'i yul rnams su/ /byang chub la ni yang dag 'dzud/ /des na sems 'dor mi 'gyur ro/ /gang dang gang du skye bar yang / /ji ltar stobs ni cher 'gyur zhing / /rtag tu mthu yis 'phags pa dang / /bdud rnams bye bas mi tshugs 'gyur/ /'dir ni snying po lnga byin zhing / /skrag la mi 'jigs byin na ni/ /gang dang gang du skye bar yang / /des ni stobs ni cher 'gyur te/ /rtag tu mthu yis 'phags pa dang / /bdud rnams bye bas mi tshugs so/ / 83.29a byang chub sems dpa'i spyod pa de/ /'jig rten mgon gyis mngon sum du/ /lung bstan pa 'di thos nas su/ /seng ge yid ni dga' bar 'gyur/ /seng ge grogs dang lhan cig tu/ /'di skad kyi ni tshig smras te/ /spyod pa bstan pa 'di la ni/ /bdag cag rjes su bslab par bgyi/ /de nas sangs rgyas 'dzum mdzad de/ /stong gsum po yang g.yos gyur nas/ /ma pham pas ni sangs rgyas la/ /ci zhig slad du 'dzum mdzad pa/ /thub chen lung bstan gsol zhes zhus/ /de skad zhu ba zhus pa dang / /ma pham pa la sangs rgyas kyis/ /'di skad ces ni bka' stsal to/ /gang gi phyir ni 'dzum mdzad pa/ /ma pham nga las 'dir nyon cig /sangs rgyas bye ba brgyad bcu dang / /gzhan yang khrag khrig phrag bcu la/ /byang chub don du 'dus nas ni/ /mi yi 'dren pa rnams la mchod/ /rdzogs pa'i sangs rgyas rkang gnyis mchog /mar me mdzad pa tshun chad du/ /bram ze'i khye'u 'di dag rnams/ /nga yis yongs su smin par byas/ /snang ba che zhes bya ba yi/ /bskal pa mdzes pa 'byung 'gyur te/ /de dag bskal pa gcig de la/ /rnam par 'dren par 'gyur ba ste/ /ye shes rtog gi rgyal mtshan zhes/ /'jig rten 'dren pa rnams su 'gyur/ /'od dpag med kyi bkod pa ltar/ /de dag gi yang de 'drar 'gyur/ /byams pa nas ni bzung nas su/ /bskal pa sum brgya tshang bar ni/ /de yi bar du dus kun du/ /rtag tu sangs rgyas phrad par 'gyur/ /'di dag byang chub thob pa yi/ /ming ni gang sus thos pa rnams/ /de dag thams cad 'jig rten du/ /kun mkhyen gang zag mtshungs med 'gyur/ /gang zhig lung bstan 'di thos nas/ /mos pa skyed par byed pa ni/ /'jig rten gsum po 'di dag na/ /de dang mtshungs 83.29b pa'i bsod nams med/ /gang gis bskal pa drug stong du/ /sangs rgyas zhing rnams thams cad du/ /rin chen rnams kyis bkang byas nas/ /byang chub phyir 'dir byin pa bas/ /gang gis chos kyi rnam grangs 'di/ /thos nas byang chub phyir 'jug na/ /sngar smos pa yi bsod nams kyis/ /grangs dang char yang mi phod do/ /chos 'di bshad pa'i tshe na ni/ /'jig rten mgon po'i mthu yis ni/ /lha rnams me tog char pa 'bebs/ /stong gsum po yang g.yos par 'gyur/ /seng ge grogs dang bcas pa yis/ /mngon par shes pa lnga thob nas/ /nyin bdun par du mchod byas nas/ /bstan pa la ni rab tu byung / /de dag kun kyis ting 'dzin 'thob/ /zad mi shes pa'i gzungs kyang thob/ /sems can rnams kyi don byed de/ /sangs rgyas chos la 'dzud par byed/ /chos kyi rnam grangs 'di bstan pa na sems can bye ba phrag brgyad bcu byang chub mchog la zhugs so/ /bcom ldan 'das kyis de skad ces bka' stsal nas/ seng ge grogs dang bcas pa dang / lha dang mi dang lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do// //'phags pa dkon mchog brtsegs pa chen po'i chos kyi rnams grangs le'u stong phrag brgya pa las seng ges zhus pa'i le'u zhes bya ste sum bcu rtsa bdun pa rdzogs so// //rgya gar gyi mkhan po dA na shI la dang / mu ni bar ma dang / zhu chen gyi lo ts+tsha ba ban de ye shes sdes bsgyur cing zhus te skad gsar chad kyis kyang bcos nas gtan la phab pa// // |