@#/ /'phags pa dkon mchog brtsegs pa chen po'i chos kyi rnam grangs le'u stong phrag brgya pa las le'u sum bcu rtsa gcig pa ste/ gang gA'i mchog gis zhus pa lung bstan pa/ rgya gar skad du/ Ar+ya gang god ta ra pa ri pr-its+tshA nA ma ma hA yA na sU tra/ bod skad du/ 'phags pa gang gA'i mchog gis zhus pa zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs te/ de'i tshe grong khyer chen po mnyan yod na dge bsnyen ma gang gA'i mchog ces bya ba zhig gnas so/ /de nas dge bsnyen ma gang gA'i mchog mnyan yod nas byung nas rgyal bu rgyal byed kyi tshal mgon med zas sbyin gyi kun dga' ra ba ga la ba der song ste phyin nas bcom ldan 'das kyi zhabs la mgo bos phyag 'tshal te phyogs gcig tu 'dug go/ /phyogs gcig tu 'dug pa dang / bcom ldan 'das kyis mkhyen bzhin du dge bsnyen ma gang gA'i mchog la gang gA'i mchog khyod da gzod gang nas 'ongs shes smras so/ /gang gA'i mchog gis gsol pa/ bcom ldan 'das gang zhig gis sprul pa la smras te/ khyod da gzod gang nas 'ongs shes de skad bgyis na ji skad lan 'debs par 'gyur lags/ bcom ldan 'das kyis bka' stsal pa/ gang gA'i mchog sprul pa la ni 'greng ba med/ 'dug pa med/ nyal ba med/ 'ong ba med/ 'gro ba med/ 'chi 'pho med/ skye ba med na 'di nas 'ongs so zhes de ci zhig ston par 'gyur/ gang gA'i mchog gis gsol pa/ bcom ldan 'das chos thams cad sprul 82.249b pa lta bu lags sam/ bka' stsal pa/ gang gA'i mchog de bzhin no/ /gsol pa/ bcom ldan 'das gal te chos thams cad sprul pa lta bu lags na/ gang gA'i mchog khyod da gzod gang nas 'ong shes ci'i slad du smra/ bcom ldan 'das kyis bka' stsal pa/ gang gA'i mchog sprul pa ni ngan song du mi 'gro/ mtho ris su mi 'gro/ yongs su mya ngan las 'das par mi 'gro na ci gang gA'i mchog kyang ngan song du mi 'gro/ mtho ris su mi 'gro/ yongs su mya ngan las 'das par mi 'gro 'am/ gang gA'i mchog gis gsol pa/ bcom ldan 'das gal te bdag gis dge bsnyen ma gang gA'i mchog sprul pa'i rang bzhin las gzhan lags par mthong na ni dge bsnyen ma gang gA'i mchog ngan song du mchi ba 'am mtho ris su mchi ba 'am yongs su mya ngan las 'das par mchi ba ma lags so zhes bdag sprul pa dang bstun pa yang mi rung lags na/ bcom ldan 'das bdag gis dge bsnyen ma gang gA'i mchog sprul pa'i rang bzhin las gzhan lags par ma mthong ste/ bcom ldan 'das de ltar bdag gis ma mthong na dge bsnyen ma gang gA'i mchog ngan song du mchi ba 'am/ mtho ris su mchi ba 'am/ yongs su mya ngan las 'das par mchi ba zhes ji skad bstan par bgyi/ bcom ldan 'das de lta lags kyis kyang g.yo ba dang / rlom sems dang / bskyod pa dang / spros pa mchis na ji ltar 'di snyam du bdag ngan song du 'gro ba 'am/ mtho ris su 'gro ba 'am/ yongs su mya ngan las 'das par 'gro ba'o snyam du sems lags te/ bcom ldan 'das mya ngan las 'das pa'i dbyings ni nams kyang ngan song du mchi ba 'am/ mtho ris 82.250a su mchi ba 'am/ yongs su mya ngan las 'das par mchi ba ma lags te/ bcom ldan 'das dge bsnyen ma gang gA'i mchog kyang de lta bu'i dbyings can lags so/ /bcom ldan 'das kyis bka' stsal pa/ gang gA'i mchog khyod ci yongs su mya ngan las 'das pa la yang dag par ma zhugs sam/ gsol pa/ bcom ldan 'das su zhig gis mi skye ba la smras te/ khyod yongs su mya ngan las 'das pa la yang dag par ma zhugs sam zhes de skad bgyis na ji skad lan 'debs par 'gyur lags/ bcom ldan 'das kyis bka' stsal pa/ gang gA'i mchog mi skye ba zhes bya ba ni mya ngan las 'das pa'i tshig bla dgas yin na de ci zhig lan 'debs par 'gyur/ gang gA'i mchog gis gsol pa/ bcom ldan 'das ci chos thams cad ni mya ngan las 'das pa dang mtshungs pa lags sam/ bka' stsal pa/ gang gA'i mchog de de bzhin te/ chos thams cad ni mya ngan las 'das pa dang mtshungs so/ /gsol pa/ bcom ldan 'das gal te chos thams cad mya ngan las 'das pa dang mtshungs pa lags na gang gA'i mchog khyod yongs su mya ngan las 'das pa la yang dag par ma zhugs sam zhes da ci zhig smra ste/ bcom ldan 'das su zhig gis sprul pa la smras te/ khyod yongs su mya ngan las 'das pa la yang dag par ma zhugs sam zhes de skad bgyis na ji skad lan 'debs par 'gyur lags/ bcom ldan 'das kyis bka' stsal pa/ gang gA'i mchog dri ba 'di ni dmigs pa med pa'o/ /gsol pa/ ci bcom ldan 'das kyis dmigs pa dang bcas pa'i smra bas smras lags sam/ 82.250b bka' stsal pa/ gang gA'i mchog dri ba 'di ni dmigs pa med mod kyi/ 'on kyang 'khor 'di ni rigs kyi bu 'am/ rigs kyi bu mo 'du ba dag yod de/ de dag gi don chen por 'gyur bas dris so/ /de ci'i phyir zhe na/ gang gA'i mchog de bzhin gshegs pas ni chos nyid ces bya ba yang mngon par rdzogs par sangs ma rgyas na gang de las byung ba'i chos yongs su mya ngan las 'das pa la gnas pa lta ga la yod/ gsol pa/ gal te bcom ldan 'das kyis chos nyid ces bgyi ba yang mngon par rdzogs par sangs ma rgyas te/ de las byung ba'i chos lta gang zhig mchis par gyur na bcom ldan 'das kyis byang chub kyi slad du ji ltar dge ba'i rtsa ba yang dag par bsgrubs lags/ bcom ldan 'das kyis bka' stsal pa/ gang gA'i mchog gang dmigs pa de ni dge ba'i rtsa ba ma yin te/ byang chub sems dpa' dge ba'i rtsa ba de ni gang gi tshe yang dag par sgrub pa de'i tshe yang bsam gyis mi khyab pa nyid mi 'dor ro/ /gang gi tshe yang dag par mi sgrub pa de'i tshe yang bsam gyis mi khyab pa nyid mi 'dor ro/ /gsol pa/ bcom ldan 'das bsam gyis mi khyab pa la bsam gyis mi khyab pa zhes bgyi ba ci'i slad du bsam gyis mi khyab pa la bsam gyis mi khyab pa zhes bgyi/ bcom ldan 'das kyis bka' stsal pa/ gang gA'i mchog chos 'di ni sems pas thob par bya ba ma yin te/ sems pas thob par byar mi nus/ de ci'i phyir zhe na/ 'di ltar 'di la ni sems nyid kyang mi dmigs na gang sems las rab tu byung ba'i chos lta ga la yod/ gang gA'i mchog sems mi dmigs pa ni bsam gyis 82.251a mi khyab pa'i rgyud ces bya'o/ /bsam gyis mi khyab pa'i rgyud gang yin pa de ni thob pa ma yin/ mngon par rtogs pa ma yin/ shes pa ma yin/ mngon sum du byas pa ma yin te/ de ni thob par bya ba ma yin/ kun nas nyon mongs pa ma yin rnam par byang ba ma yin no/ /de ci'i phyir zhe na/ gang gA'i mchog 'di ltar de bzhin gshegs pas ni chos thams cad nam mkha' ltar nges par thugs su chud de/ gang gA'i mchog chos thams cad ni nam mkha' dang mtshungs pa gnyen po med pa'o/ /gsol pa/ bcom ldan 'das gal te chos thams cad nam mkha' dang mtshungs pa gnyen po ma mchis pa lags na bcom ldan 'das kyis gzugs shes btags pa dang / tshor ba dang / 'du shes dang / 'du byed rnams dang rnam par shes pa zhes btags pa dang / phung po rnams dang / khams rnams dang / skye mched rnams dang / rten cing 'brel bar 'byung ba dang / zag pa dang bcas pa dang / zag pa ma mchis pa dang / kun nas nyon mongs pa dang / rnam par byang ba dang / 'khor ba dang / mya ngan las 'das pa zhes btags pa ji lta bu lags/ bcom ldan 'das kyis bka' stsal pa/ gang gA'i mchog 'di lta ste dper na bdag bdag ces 'dogs kyang bdag gang yang mi dmigs pa de bzhin du gang gA'i mchog ngas gzugs shes btags te gzugs gang yang mi dmigs so/ /de bzhin du ngas tshor ba dang / 'du shes dang / 'du byed rnams dang / rnam par shes pa zhes btags te rnam par shes pa gang yang mi dmigs so/ /phung po rnams dang / khams rnams dang / 82.251b skye mched rnams dang / rten cing 'brel bar 'byung ba dang / zag pa dang bcas pa dang / zag pa med pa dang / kun nas nyon mongs pa dang / rnam par byang ba dang / 'khor ba dang / mya ngan las 'das pa zhes bya ba yang ngas btags te mya ngan las 'das pa gang yang mi dmigs so/ /gang gA'i mchog 'di lta ste dper na smig rgyu rnams la ni chu yod med de mi dmigs so/ /gang gA'i mchog de bzhin du ngas gzugs shes bya bar btags kyang gzugs gang yang mi dmigs so/ /ngas tshor ba dang / 'du shes dang / 'du byed rnams dang / rnam par shes pa zhes btags kyang rnam par shes pa gang yang mi dmigs so/ /phung po rnams dang / khams rnams dang / skye mched rnams dang / rten cing 'brel bar 'byung ba dang / zag pa dang bcas pa dang / zag pa med pa dang / kun nas nyon mongs pa dang / rnam par byang ba dang / 'khor ba dang / mya ngan las 'das pa zhes bya bar ngas btags kyang don dam par na de dag thams cad med cing mi dmigs so/ /gang gA'i mchog gang chos la mchog tu 'dzin pa med par tshangs par spyad pa spyod pa de lta bu ni legs par gsungs pa'i chos 'dul ba la tshangs par spyod pa la gnas pa yin no/ /gang gA'i mchog mngon pa'i nga rgyal can gnas dmigs nas tshangs par spyad par spyod pa de dag gi tshangs par spyod pa de ni yongs su ma dag pa'o zhes nga smra'o/ /gang dag tshangs par spyod pa yongs su ma dag pa de dag ni zab mo rgyud chad pa'i chos 'di lta bu 'di thos na dngangs skrag par 'gyur te/ de dag skye ba dang / rga ba dang / na ba dang / 'chi ba dang / mya ngan dang / smre sngags 'don pa dang / 82.252a sdug bsngal ba dang / yid mi bde ba dang / 'khrug pa rnams las yongs su mi 'grol te/ de dag ni sdug bsngal gyi skal pa can du 'gyur ro zhes nga smra'o/ /gang gA'i mchog da ltar ram nga 'das pa'i phyin yang rung ste/ gang dag zab mo rgyud chad pa 'di lta bu'i chos ston pa de dag la mi gti mug pa dag gsod pa po'i 'du shes skyed par 'gyur te/ de ltar mi gti mug pa de dag log par zin pas bsad pa'i zhe sdang bskyed nas ngan song du 'gro bar 'gyur ro/ /gang gA'i mchog gis gsol pa/ bcom ldan 'das rgyud chad pa rgyud chad pa zhes bgyi ba ci'i slad du rgyud chad pa zhes bgyi/ bcom ldan 'das kyis bka' stsal pa/ gang gA'i mchog chos 'di ni rgyud gcad pa 'am/ dbye ba 'am/ rnam par gzhig pa ma yin te/ de'i phyir rgyud chad pa zhes bya ste/ 'di ni yang dag pa'i mtha' zhe bya/ bsam gyis mi khyab pa'i rgyud ces bya'o/ /de nas bcom ldan 'das kyis de'i tshe 'dzum pa mdzad do/ /de nas bcom ldan 'das kyi zhal gyi sgo nas 'od zer kha dog sna tshogs kha dog du ma 'di lta ste/ sngon po dang / ser po dang / dmar po dang / dkar po dang / btsod ka dang / shel dang / dngul gyi kha dog lta bu dag byung nas de dag gis 'jig rten gyi khams mtha' yas mu med pa dag snang bar byas te 'od kyis khyab par byas nas tshangs pa'i 'jig rten gyi bar du mngon par byung ste slar log nas bcom ldan 'das kyi zhal gyi sgor nub bo/ /de nas tshe dang ldan pa kun dga' bos bla gos phrag pa gcig tu gzar te pus mo g.yas pa'i lha nga sa la btsugs nas bcom ldan 'das ga la ba de logs su thal mo sbyar 82.252b ba btud de bcom ldan 'das la 'di skad ces gsol to/ /bcom ldan 'das de bzhin gshegs pa rnams ni rgyu ma mchis par 'dzum pa mi mdzad na 'dzum pa mdzad pa'i rgyu gang lags rkyen gang lags/ bcom ldan 'das kyis bka' stsal pa/ kun dga' bo ngas mngon par shes te/ sa phyogs 'di nyid du de bzhin gshegs pa stong gis gang gA'i mchog ces bya ba kho na'i dge bsnyen ma sha stag las brtsams te/ chos kyi rnam grangs 'di bshad do/ /dge bsnyen ma de dag thams cad ni rab tu byung nas phung po med pa'i mya ngan las 'das pa'i dbyings su yongs su mya ngan las 'das so/ /de nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das chos kyi rnam grangs 'di'i ming ci lags/ ji ltar gzung bar bgyi/ bcom ldan 'das kyis bka' bstsal pa/ kun dga' bo chos kyi rnam grangs 'di ni dri ma med pa zhes bya ste/ 'di dri ma med pa zhes bya bar zung shig /chos kyi rnam grangs 'di bstan pa na dge slong bdun brgya dang / dge slong ma bzhi brgya len pa med par zag pa rnams las sems rnam par grol lo/ /de nas 'dod pa na spyod pa dang / gzugs na spyod pa'i lha'i bu rnams kyis lha'i me tog rnams dang / tsan dan gyi phye ma rnams mngon par sprul te/ bcom ldan 'das la gtor nas tshig 'di skad ces 'di ltar grong khyer mnyan yod na dge bsnyen ma 'di lta bu gnas la de de bzhin gshegs pa dang lhan cig tu smra yang de'i lus ngal bar yang mi 'gyur ba dang / ji ltar yang gang gA'i mchog 'di sngon gyi rgyal ba la lhag par bya ba byas shing dge ba'i rtsa ba bskyed pa dang / yun ring po nas dge ba spyad pa dang / yun ring po nas 82.253a tshangs par spyad pa dang / sangs rgyas mang po la bsnyen bkur byas pa 'di ni ngo mtshar to zhes smras so/ /bcom ldan 'das kyis bka' stsal pa/ lha'i bu dag de de bzhin te/ 'di ni sngon gyi rgyal ba la lhag par bya ba byas pa/ dge ba'i rtsa ba bskyed pa/ yun ring du tshangs par spyad pa la gnas pa'o/ /bcom ldan 'das kyis de skad ces bka' stsal nas/ dge bsnyen ma gang gA'i mchog dang / lha dang / mi dang lha ma yin dang / dri zar bcas pa'i 'jig rten yi rangs te/ bcom ldan 'das kyi gsungs pa la mngon par bstod do/ /'phags pa dkon mchog brtsegs pa chen po'i chos kyi rnam grangs le'u stong phrag brgya pa las gang gA'i mchog gis zhus pa'i le'u zhes bya ste sum bcu rtsa gcig pa rdzogs so// //rgya gar gyi mkhan po dzi na mi tra dang / dA na shI la dang / zhu chen gyi lo ts+tsha ba ban de ye shes sde la sogs pas bsgyur cing zhus te skad gsar chad kyis kyang bcos nas gtan la phab pa/ |