/'phags pa dkon mchog brtsegs pa chen po'i chos kyi rnam grangs le'u stong phrag brgya pa las le'u nyi shu rtsa lnga pa ste lhag pa'i bsam pa bskul ba/ bam po dang po/ rgya gar skad du/ Ar+ya a d+h+yA sha ya san tso da na nA ma ma hA yA na sU tra/ bod skad du/ 'phags pa lhag pa'i bsam pa bskul ba zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das bA rA Na sI na drang srong lhung ba ri dgas kyi nags na/ dge slong stong tham pa'i dge slong gi dge 'dun chen po dang / byang chub sems dpa' lnga brgya phal cher dge ba'i rtsa ba yongs su smin pa/ las kyi sgrib pa bsal ba sha stag dang thabs gcig tu bzhugs te/ de'i tshe de na byang chub sems dpa' kha cig 'du 'dzi la dga' bar gnas shing gnyid la dga' ba dang / las la dga' ba dang / smra ba la dga' ba dang / spros pa la dga' ba dang / spag pas spags par gyur ba dang / rigs pa med pa dang / mi brtson pa dang / le lo can dang / brtson 'grus dman pa dang / sbyor ba btang bar gnas 82.148a te/ byang chub sems dpa' sems dpa' chen po byams pas byang chub sems dpa' de dag yon tan ma yin pa'i spyod pa 'di lta bu dang ldan par mthong ngo / /de nas byang chub sems dpa' sems dpa' chen po byams pa 'di snyam du sems te/ kye ma byang chub sems dpa' 'di dag ni byang chub kyi yan lag yongs su rdzogs par bya ba las yongs su nyams kyis bdag gis byang chub sems dpa' 'di dag bskul bar bya/ dran par bya gor ma chag go snyam mo/ /de nas byang chub sems dpa' sems dpa' chen po byams pa phyem red kyi nus kyi tshe nang du yang dag par 'jog las langs nas byang chub sems dpa' de dag ga la ba der song ste/ phyin nas byang chub sems dpa' sems dpa' chen po de dag dang lhan cig tu yang dag par mgu bar bya ba dang / yang dag par dga' bar bya ba'i gtam rnam pa sna tshogs byas nas byang chub sems dpa' de dag la 'di skad ces smras so/ /ci rigs kyi bu dag khyed dge ba'i chos rnams kyis 'phel ba 'am/ yongs su nyams par ma gyur tam/ de dag gis smras pa/ tshe dang ldan pa byams pa bdag cag ni dge ba'i chos rnams las yongs su nyams te 'phel bar ma gyur to/ /bdag cag de bzhin gshegs par 'gyur ram mi 'gyur snyam pa'i the tshom gyis kyang bdag cag gi sems kun nas dkris shing 'dug go/ /bdag cag log pa ltung ba'i chos can yin nam/ log par ltung ba'i chos can ma yin zhig gu snyam pa'i 'gyod pas kyang bdag cag gi sems kun nas dkris shing 'dug ste/ bdag cag ni dge ba'i chos rnams la yang 'dun pa mi skye'o/ /de skad ces smras pa dang / byang chub sems dpa' sems dpa' chen po byams pas byang chub sems dpa' 82.148b de dag la 'di skad ces smras so/ /rigs kyi bu dag khyed tshur shog /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa ga la bzhugs pa der 'dong ngo / /de ci'-i phyir zhe na/ bcom ldan 'das de ni thams cad mkhyen pa/ thams cad gzigs pa/ ye shes sgrib pa mi mnga' ba dang ldan pa/ sems can thams cad kyi spyod pa la 'jug pa la mkhas pa ste/ des khyed kyi spyod pa'i rim pa ji lta ba bzhin du chos ston par 'gyur ba'i phyir ro/ /de nas byang chub sems dpa' drug bcu tsam po de dag byang chub sems dpa' sems dpa' chen po byams pa dang lhan cig tu bcom ldan 'das ga la ba der dong ste/ lhags nas bcom ldan 'das kyi zhabs la mgo bos phyag 'tshal te/ ngu zhing bcom ldan 'das la yan lag lngas yang dang yang du phyag 'tshal nas gdong la mchi ma zag cing mgo ma bteg go/ /byang chub sems dpa' sems dpa' chen po byams pas kyang bcom ldan 'das kyi zhabs la mgo bos phyag 'tshal te bcom ldan 'das la lan gsum bskor ba byas nas phyogs gcig tu 'dug go/ /de nas bcom ldan 'das kyis byang chub sems dpa' de dag la 'di skad ces bka' stsal to/ /rigs kyi bu dag khyed ma ngu ma 'gyod par longs/ khyed nyid kyis rnam par smin pa la mi rtog par dga' zhing mgu la yi rangs pas gzhan la gtse zhing gshe ba byas te/ las kyi sgrib pa de lta bu mngon par 'dus byas pas da ltar khyed bsgribs shing tshod de kun nas bskor cing kun nas dkris nas brtson par mi nus so/ /de nas byang chub sems dpa' drug bcu tsam po de dag gis bla gos phrag pa gcig tu gzar nas pus mo g.yas pa'i 82.149a lha nga sa la btsugs te bcom ldan 'das ga la ba de logs su thal mo sbyar nas bcom ldan 'das la 'di skad ces gsol to/ /bdag cag gis gang thos na rang gi sems zlog par bgyi cing las kyi sgrib pa gzhan yang mngon par 'du mi bgyid par 'gyur ba'i bdag cag gi las kyi sgrib pa bcom ldan 'das kyis legs par bka' stsal du gsol/ de skad ces gsol pa dang / bcom ldan 'das kyis gang zag byang chub sems dpa'i theg pa pa drug bcu po de dag la 'di skad ces bka' stsal to/ /rigs kyi bu dag sngon byung ba 'das pa'i dus na de bzhin gshegs pa logs par dad sel gyi gsung rab la khyed rab tu byung ste 'khod pa na tshul khrims kyi rgyags pas myos pa dang / thos pa'i rgyags pas myos pa dang / sbyangs pa'i yon tan dang / yo byad bsnyungs pa la mngon par zhen bas dge slong chos smra ba gnyis la 'di ltar rnyed pa dang bkur sti'i rgyu dang / mdza' bshes kyi khyim dang / slongs mo ster ba'i khyim gyi gzhi las phrag dog dang ser sna dang ldan pas 'khrig pa'i skur bas bskur te/ chos smra ba'i dge slong de gnyis kyi mdza' bshes kyi khyim dang / slongs mo ster ba'i khyim du gyur ba gang yin pa de dag kyang khyed kyis phye ste/ the tshom bskyed cing ma dad par byas la/ dge slong chos smra ba de gnyis kyi mi snyan pa mang po dag kyang smras/ sems can de dag gi dge ba'i rtsa ba yang bcad cing dge ba la sgrib pa byas te/ mi dge ba'i las kyi sgrib pa des khyed lo drug khrir sems can dmyal ba chen po mnar med par skyes so/ /lo bzhi khrir ni sems can dmyal ba chen po yang sos su skyes so/ /lo nyi khrir ni sems can dmyal ba chen po thig nag tu skyes so/ /lo brgyad stong du ni sems 82.149b can dmyal ba chen po tsha bar skyes so/ /khyed de nas shi 'phos nas mi'i lus rnyed pa rnyed nas tshe rab lnga brgyar mig med de dmus long du gyur to/ /khyed las kyi sgrib pa de nyid kyis bsgribs nas gang dang gang du skyes pa de dag thams cad du sems rtul ba dang / brjed ngas par gyur to/ /mi dge ba'i rtsa ba'i sgrib pas bsgribs shing dbang chud par grags par gyur to/ /mi stug pa'i skyon gyis zil gyis non pa dang / smad pa dang / bshung ba dang / skur ba mang bar yul ngan pa dang / yul 'khor ngan pa dang / ljongs ngan pa dag tu rigs ngan dang / dbul po'i rigs dag tu skyes nas rnyed pa chung ba dang / bkur sti chung ba dang / mi bkur ba dang / mi mchod par gyur to/ /khyed 'di nas shi 'phos nas lnga brgya pa tha ma la dam pa'i chos nub pa'i dus kyi tshe yul ngan pa sha stag tu rigs dma' ba dang / dbul po dag tu skye bar 'gyur te/ skur ba mang ba dang / brjed ngas pa dang / dge ba'i rtsa ba spong ba dang / brtson pa byas kyang bar chad 'byung ba dang / snang ba byung yang phyir nub par 'gyur ro/ /khyed lnga brgya pa tha ma la las kyi sgrib pa thams cad zad par 'gyur te/ zad par byas nas de bzhin gshegs pa 'od dpag med kyi sangs rgyas kyi zhing 'jig rten gyi khams bde ba can du skye bar 'gyur te/ de bzhin gshegs pa 'od dpag med des kyang khyed bla na med pa yang dag par rdzogs pa'i byang chub tu lung ston par 'gyur ro/ /de nas rigs kyi bu byang chub sems dpa'i theg pa pa drug bcu po de dag gis gdong las mchi ma phyis nas skyo zhing skyo ba'i yid kyis yang dag par dga' ste/ spu zing zhes byed par gyur nas bcom ldan 'das la 'di skad ces gsol to/ /bcom ldan 'das bdag cag gis byang chub sems dpa'i theg pa pa'i gang zag 82.150a rnams la tha ba'i nongs pa'i sems bskyed pa gang lags pa'i nongs pa dang / gzhan yang las kyi sgrib pa gang ci mngon par 'dus bgyis pa rnams bdag cag gis bshags so/ /bcom ldan 'das deng slad chad bdag cag 'di rnams kyis de bzhin gshegs pa'i spyan sngar yi dam 'di lta bu bca' bar bgyi'o/ /bcom ldan 'das gal te bdag cag gis deng slad chad byang chub sems dpa'i theg pa pa'i gang zag gi ltung ba mang ba 'am/ mang ba ma lags pa yang rung ste/ gleng na bdag cag gis de bzhin gshegs pa dgra bcom pa yang dag par rdzogs pa'i sangs rgyas la bslus bar 'gyur ro/ /bcom ldan 'das gal te bdag cag gis deng slan chad byang chub sems dpa'i theg pa pa'i gang zag la brnyas sam/ de la mi snyan pa brjod na bdag cag gis de bzhin gshegs pa dgra bcom pa yang dag par rdzogs pa'i sangs rgyas la bslus par 'gyur ro/ /bcom ldan 'das gal te bdag cag gis deng slan chad byang chub sems dpa'i theg pa pa'i gang zag khyim pa 'am rab tu byung ba yang rung ste/ 'dod pa'i yon tan lnga la rtse zhing yongs su spyod pa mthong na ma dad par bgyid pas ma gus pa bskyed dam/ de la ston par 'du shes ma bskyed na bdag cag gis de bzhin gshegs pa la bslus bar 'gyur ro/ /bcom ldan 'das gal te bdag cag gis deng slan chad mdza' bshes kyi khyim dang / slongs mo ster ba'i khyim gyi rgyus byang chub sems dpa'i theg pa pa'i gang zag rnams kyi lus la gnod pa 'am/ sems la gnod pa bgyis na bdag cag gis de bzhin gshegs pa la bslus bar 'gyur ro/ /bcom ldan 'das gal te bdag cag gis deng slan chad byang chub sems dpa'i theg pa pa'i gang zag 82.150b mthong nas yid du mi 'ong ba'i tshig gcig tsam zhig smras na yang bdag cag gis de bzhin gshegs pa la bslus par 'gyur ro/ /bcom ldan 'das gal te bdag cag gis deng slan chad nyin lan gsum mtshan lan gsum du byang chub sems dpa'i theg pa pa'i gang zag la phyag ma bgyis na bdag cag gis de bzhin gshegs pa la bslus par 'gyur ro/ /bcom ldan 'das gal te bdag cag gis deng slan chad brtul zhugs yang dag par blangs pa 'di'i slad du rgyal srid thob pa 'am/ nor thob pa 'am/ lus dang / srog dang yang ma bsngos na bdag cag gis de bzhin gshegs pa la bslus bar 'gyur ro/ /bcom ldan 'das gal te bdag cag gis deng slan chad nyan thos kyi theg pa pa 'am/ rang sangs rgyas kyi theg pa pa'i gang zag la brnyas te/ bdag cag ni tshes drag gis de dag ni de lta ma yin no snyam na bdag cag gis de bzhin gshegs pa la bslus bar 'gyur ro/ /bcom ldan 'das gal te bdag cag gis deng slan chad dma' ba'i sems dang / gdol ba dang / khyi'i sems lta bur gnas par ma bgyis na bdag cag gis de bzhin gshegs pa la bslus par 'gyur ro/ /bcom ldan 'das gal te bdag cag gis deng slan chad bdag la bstod tam/ gzhan la smod na bdag cag gis de bzhin gshegs pa la bslus par 'gyur ro/ /bcom ldan 'das gal te bdag cag gis deng slan chad gnod sems dang / rtsod pa'i 'jigs pas bskul ma thag tu dpag tshad dam dpag tshad brgyar ma byol na bdag cag gis de bzhin gshegs pa la bslus par 'gyur ro/ /bcom ldan 'das gal te bdag cag gis deng slan chad bdag nyid tshul khrims dang ldan par khas 'che ba 'am/ mang du thos pa 'am/ sbyangs pa'i yon tan dang ldan pa'am/ yon tan gang yang rung ba zhig gis bdag brjod na bdag cag gis de bzhin gshegs pa la bslus par 'gyur ro/ /bcom ldan 'das gal te bdag cag gis deng slan chad dge ba mi spyoms shing sdig pa mi bcab par gnas par ma bgyis 82.151a na bdag cag gis de bzhin gshegs pa dgra bcom pa yang dag par rdzogs pa'i sangs rgyas la bslus bar 'gyur ro/ /de nas bcom ldan 'das kyis byang chub sems dpa'i theg pa pa'i gang zag de dag la legs so zhes bya ba byin te/ rigs kyi bu dag legs so/ /legs so/ /tshig 'di khyod kyis legs par smras so/ /yang dag par slang ba 'di legs par byas so/ /khyed yang dag par blang ba 'di la gnas na las kyi sgrib pa rnam par byang bar 'gyur zhing dge ba'i rtsa ba rnam par dag pa yang thob par 'gyur ro/ /de'i tshe bcom ldan 'das kyis byang chub sems dpa' sems dpa' chen po byams pa la bka' stsal pa/ byams pa rigs kyi bu 'am/ rigs kyi bu mo las kyi sgrib pa sbyang bar 'dod pas ji ltar rigs kyi bu 'di dag gis byas pa de bzhin du yi dam bca'o/ /de nas bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das ci rigs kyi bu 'di dag yi dam 'di yongs su rdzogs par bgyid par 'gyur lags sam/ 'on ti yongs su gtong bar 'gyur lags bka' stsal pa/ byams pa rigs kyi bu 'di dag ni yi dam 'di lus dang srog gis phyir yang spong bar mi 'gyur ro/ /de nas bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das byang chub sems dpa'i theg pa pa'i gang zag chos du dang ldan na lnga brgya pa tha ma la dam pa'i chos rnam par 'jig pa'i tshe ma snang cing ma rmas la bde bar yongs su thar bar 'gyur lags/ de skad ces gsol ba dang / bcom ldan 'das kyis byang chub sems dpa' sems dpa' chen po byams pa la 'di skad 82.151b ces bka' stsal to/ /byams pa byang chub sems dpa'i theg pa pa'i gang zag chos bzhi dang ldan na lnga brgya pa tha ma la dam pa'i chos rnam par 'jig pa'i tshe ma snang cing ma rmas la bde ba yongs su thar bar 'gyur ro/ /bzhi gang zhe na/ bdag gis 'khrul pa la so sor rtog pa dang / byang chub sems dpa'i theg pa pa'i gang zag gzhan gyis nyes pa mi gling ba dang / mdza' bshes kyi khyim dang / slongs mo ster ba'i khyim la mi lta ba dang / yid du mi 'ong ba'i tshig spong ba ste/ byams pa byang chub sems dpa'i theg pa pa'i gang zag chos bzhi po de dag dang ldan na lnga brgya pa tha ma la dam pa'i chos rnam par 'jig pa'i tshe ma snang cing ma rmas la bde bar yongs su thar bar 'gyur ro/ /byams pa gzhan yang byang chub sems dpa'i theg pa pa'i gang zag chos bzhi dang ldan na lnga brgya pa tha ma la dam pa'i chos rnam par 'jig pa'i tshe ma snang cing ma rmas la bde bar yongs su thar bar 'gyur te/ bzhi gang zhe na/ thos pa nyung ngu'i sems can yongs su spong ba dang / 'khor mi bsdu ba dang / bal mtha'i gnas mal la bsten pa dang / bdag dul ba dang / zhi ba dang / zhi gnas kyi sbyor ba la brtson pa ste/ byams pa byang chub sems dpa'i theg pa pa'i gang zag chos bzhi po de dag dang ldan na lnga brgya pa tha ma la dam pa'i chos rnam par 'jig pa'i tshe ma snang cing ma rmas la bde bar yongs su thar bar 'gyur ro/ /byams pa de lta bas na/ byang chub sems dpa'i theg pa pa'i rigs kyi bu 'am rigs kyi bu mo lnga brgya pa tha ma la dam pa'i chos rnam par 'jig pa'i tshe ma snang cing ma rmas la bde bar yongs su thar bar 'gyur bar 'dod pa dang / las kyi sgrib pa thams cad zad par byed par 'dod pas 'du 'dzi la mi dga' ba dang / dgon pa dang / nags dang / bas 82.152a mthar gnas pa dang / sems can rigs pa med cing mi brtson pa yongs su spong ba dang / bdag gi 'khrul pa la rtog cing gzhan gyi 'khrul pa mi tshol ba dang / mi smra ba la dga' ba dang / shes rab kyi pha rol du phyin pas gnas pa la dga' bar bya'o/ /gal te de la sems can gzhan dag la brda sprad par 'dod pa'i sems skyes na des zang zing med pa'i sems la gnas te chos kyi sbyin pa sbyin par bya'o/ /byams pa nyi shu po 'di dag ni zang zing med pa'i chos kyi sbyin pa rnyed pa dang / bkur sti mi 'dod par chos kyi sbyin pa sbyin pa gang yin pa de'i phan yon yin te/ nyi shu gang zhe na/ 'di lta ste/ dran pa dang ldan par 'gyur ba dang / blo gros dang ldan par 'gyur ba dang / blo dang ldan par 'gyur ba dang / brtan pa dang ldan par 'gyur ba dang / shes rab dang ldan par 'gyur ba dang / 'jig rten las 'das pa'i shes rab rjes su rtogs par 'gyur ba dang / 'dod chags chung bar 'gyur ba dang / zhe sdang chung bar 'gyur ba dang / gti mug chung bar 'gyur ba dang / bdud kyis de la glags mi rnyed par 'gyur ba dang / sangs rgyas bcom ldan 'das rnams kyis dgongs par 'gyur ba dang / mi ma yin pa rnams de la srung bar 'gyur ba dang / lha rnams de la gzi byin skyed par 'gyur ba dang / mi mdza' ba rnams kyis de la glags rnyed par mi 'gyur ba dang / de'i mdza' bshes rnams mi phyed par 'gyur ba dang / tshig btsun par 'gyur ba dang / des mi 'jigs pa 'thob par 'gyur ba dang / yid bde ba mang bar 'gyur ba dang / mkhas pas bsngags par 'gyur ba dang / de'i chos kyi sbyin pa de yang rjes su dran par bya bar 'os par 'gyur ba ste/ byams pa nyi shu po de dag ni zang zing med pa'i chos kyi sbyin 82.152b pa rnyed pa dang bkur sti yongs su spangs shing gos dang zas la re ba med par phan pa'i dngos po sngon du 'gro ba'i sems kyis rgyun mi chad par yang dang yang du chos kyi sbyin pa sbyin pa gang yin pa de'i phan yon yin no/ /byams pa zang zing med pa'i sems dang ldan pa'i chos kyi sbyin pa la gzhan yang phan yon nyi shu yod de/ nyi shu gang zhe na/ de'i spobs pa ma skyes pa skyes bar 'gyur ba dang / de'i spobs pa skyes pa chud mi za bar 'gyur ba dang / gzungs thob par bya ba'i phyir de'i sems drang por 'gyur ba dang / tshigs chung ngus sems can mang po dag gi don byed par 'gyur ba dang / tshigs chung ngus sems can rnams de la gus par rim gro byed par 'gyur ba dang / lus kyi sdom pa thob par 'gyur ba dang / ngag gi sdom pa thob par 'gyur ba dang / yid kyi sdom pa thob par 'gyur ba dang / ngan 'gro'i 'jigs pa las 'da' bar 'gyur ba dang / rab tu dga' bzhin du 'chi ba'i dus byed par 'gyur ba dang / phas kyi rgol ba thams cad chos dang mthun pas tshar gcod par 'gyur ba dang / de'i gzi brjid sems can rigs mthon po dag gis kyang mi bzod na phal dag gis lta ci smos pa dang / dbang po zil gyis mi non par 'gyur ba dang / lhag pa'i bsam pa phun sum tshogs pa 'dzin par 'gyur ba dang / zhi gnas dang lhag mthong thob par 'gyur ba dang / dka' ba spyad pa dag yongs su rdzogs par 'gyur ba dang / brtson 'grus brtsams pa las yongs su nyams par mi 'gyur ba dang / dam pa'i chos kun du srung bar 'gyur ba dang / phyir mi ldog pa'i sa myur du non par 'gyur ba dang / byang chab sems dpa'i spyod pa thams cad la 'thun par gnas par 'gyur ba ste/ byams pa nyi shu po de dag ni zang zing med pa'i sems dang ldan pa'i chos kyi 82.153a sbyin pa'i phan yon yin no/ /byams pa phyi ma'i dus na byang chub sems dpa'i theg pa pa'i zang zing dang bcas pa'i chos kyi sbyin pa la ches yi rangs par 'gyur la/ zang zing med pa la ni ma yin te/ shes rab 'chal bar 'gyur ba de dag la ltos/ de dag 'di ltar mdza' bshes kyi khyim dang / slongs mo ster ba'i khyim la rten cing ji ltar bdag la dad cing bkur sti byed par 'gyur snyam ba'i sems de lta bus chos kyi sbyin pa sbyin par byed de/ de dag gis zang zing med pa'i chos kyi sbyin pa bor nas gos dang / zas dang / mal cha dang / stan dang / nad kyi gsos sman dang / yo byad kyi phyir gzhan dag la chos ston par 'gyur ro byams pa 'di lta ste/ dper na mi la la zhig la khyi ro 'am/ mi ro 'am/ spre'u yi ro yang rung ste/ shi ba rul pa mnam po zhig mgul bar btags na gtsang sbra 'dod pa'i phyir ngo tsha zhing mi dga' la yongs su spong bar byed do/ /de bzhin du de dag zang zing med pa'i chos kyi sbyin pas ngo tsha zhing mi dga' bar byed de/ mnog med par shes nas skyo ste 'dor zhing 'gro bar 'gyur ro/ /gang gi phyir bdag cag la gos dang zas mi sbyin par sems pas na bdag cag gi chos kyi sbyin pa ni don med pa yin te/ bdag cag ni 'di na don med par mi dga' zhing 'dug go zhes zer nas de dag lus brgyan pa cher cher bya ba'i phyir slob ma sdud par byed kyi/ sems can bsdu ba cher cher bya ba'i phyir ni ma yin no/ /de dag 'di skad du bdag cag ni snying brtse bas 'khor bsdu bar byed kyi bdag cag la ni bsnyen bkur byed pa ci yang dgos pa med do/ /bdag cag ni phan pa'i dngos pos sems can yongs su smin par bya ba'i phyir grong dang / grong khyer dang / grong rdal dang / yul 'khor dang / rgyal po'i pho brang dag tu 'gro bar zang ngo zhes skye bo mang po dag shes par byed 82.153b de/ de dag gi sems ni gos dang zas la song bar 'gyur ro/ /byams pa nga ni sems zang zing dang bcas pa la sems can yongs su smin par byed pa zhes mi smra'o/ /de ci'i phyir zhe na/ de ni bdag nyid kyang yongs su ma smin na sems can rnams yongs su smin par byed pa lta ci smos te/ gnas 'di ni thob par sla ba'i ngo bo ma yin pa'i phyir ro/ /byams pa nga ni bsnyen bkur lhur len cing lus kyi bsnyen bkurgyi bde ba'i sbag pas sbags par gyur ba la phan pa'i dngos po nyid du mi smra'o/ /de ci'i phyir zhe na/ de ni lus la bde bar bsnyen bkur bya ba'i phyir 'khor sdud par zad kyi/ nan tan du sgrub pa la gnas pa'i phyir ni ma yin pa'i phyir ro/ /byams pa nga ni tshul 'chol ba la dgon pa na gnas pa zhes mi smra'o/ nga ni bsod nams chung ngu la 'dod pa chung ba zhes mi smra'o/ /nga ni kha zas bzang po 'dod pa la bsod snyoms pa zhes mi smra'o/ /nga ni gos sdug gu 'dod pa la phyag dar khrod pa zhes mi smra'o/ /nga ni khyim pa dang rab tu byung ba dang 'dres pa la ma 'dzis pa zhes mi smra'o/ /nga ni g.yo sgyu can la sangs rgyas byung ba dang phrad pa zhes mi smra'o/ /nga ni gzhan gyi 'khrul pa tshol ba la rnal 'byor la brtson pa zhes mi smra'o/ /nga ni khong khro ba mang ba la tshul khrims kyi phung po yongs su dag pa zhes mi smra'o/ /nga ni nga rgyal can la mang du thos pa zhes mi smra'o/ /nga ni phyogs 'dzin pa la 'dul ba 'dzin pa zhes mi smra'o/ /nga ni rgod pa la chos smra ba zhes mi smra'o/ /nga ni khyim pa dang 'dris pa la zhal ta byed pa yongs su dag pa zhes mi smra'o/ /nga ni yon gnas 'dam pa la zang zing med par yongs su gtong ba zhes mi smra'o/ /nga ni lan du phan 'dogs su re ba la bsdu ba'i dngos po zhes mi smra'o/ /nga ni rnyed pa dang bkur sti la chags pa la lhag pa'i bsam pa yongs su dag pa zhes mi smra'o/ /nga ni ma dad 82.154a pa mang pa la rab tu byung ba zhes mi smra'o/ /nga ni pha rol la shes par byed pa la bslab pa 'dod pa zhes mi smra'o/ /nga ni ma gus pa la chos sbyin pa zhes mi smra'o/ /nga ni 'jig rten pa'i gsang sngags la brtson pa la chos la dga' ba zhes mi smra'o/ /nga ni stong pa nyid la mi brtson pa la nges par 'byung ba zhes mi smra'o/ /nga ni mngon par mi sgrub pa la las mngon par 'du byed pa zhes mi smra'o/ /nga ni de mi sgrub pa la byang chub kyi yan lag yongs su rdzogs par byed pa zhes mi smra'o/ /nga ni dmigs pa can la mngon par rtogs pa zhes mi smra'o/ /nga ni mthu med pa la bzod pa yongs su rdzogs pa zhes mi smra'o/ /nga ni ma gtses pa la bzod pa'i stobs kyi go cha can zhes mi smra'o/ /nga ni rang bzhin gyis 'dod chags chung ba la tshangs par spyod pa la gnas pa dka' ba byed pa zhes mi smra'o/ /nga ni sbyor ba la mi gnas pa la ji skad smras pa de bzhin byed pa zhes mi smra'o/ /nga ni lhag pa'i bsam pa yongs su dag pa la log par ltung bar 'gro ba zhes mi smra'o/ /nga ni shes rab spyod pa la 'dzings par spyod pa zhes mi smra'o/ /nga ni thabs dang ldan par gyur ba la g.yo sgyu can zhes mi smra'o/ /nga ni rnyed pa dang bkur sti mi 'dod pa la rdzun du smra ba zhes mi smra'o/ /nga ni bar ma dor gnas pa la chos spong ba zhes mi smra'o/ /nga ni dam pa'i chos kun du srung bar 'dod pa la lus dang srog la chags pa zhes mi smra'o/ /nga ni sems zhum pa la nga rgyal med pa zhes mi smra'o/ /byams pa g.yo sgyu'i tshig gang dag lnga brgya pa tha ma la byang chub sems dpa' rnams dmu rgod du 'gyur ba dang / gang dag byang chub sems dpas khong du chud par bya zhing khong du chud nas kyang yongs su spong bar bya ba ni de dag yin no/ /de nas bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das ci byang chub sems 82.154b dpa' drug bcu po 'di dag nye tshe las kyi sgrib pas bsgribs par 'gyur ram/ 'on te gzhan dag kyang bsgribs par 'gyur lags/ de skad ces gsol pa dang / bcom ldan 'das kyis byang chub sems dpa' byams pa la 'di skad ces bka' stsal to/ /byams pa lnga brgya pa tha ma la/ byang chub sems dpa' phal cher las kyi sgrib pas bsgribs par 'gyur te/ de dag las byang chub sems dpa' kha cig ni las kyi sgrib pa zad par byed do/ /kha cig ni 'phel bar byed do/ /byams pa gzhan yang byang chub sems dpa' drug bcu po 'di dag las byang chub sems dpa' nyi shu las kyi sgrib pa chung zhing las kyi sgrib pa phra ba lnga brgya pa tha ma la skye bar 'gyur ba gang yin pa de dag ni grong khyer dang / grong rdal dang / rigs chen po sna tshogs dag tu mkhas pa/ khong bzo ba/ yid gzhungs ba/ shes rab dang thabs la mkhas pa/ sems mnyen pa/ phan pa'i dngos po phun sum tshogs pa/ snying rje che ba/ mdzes pa/ blta na sdug pa/ dge ba mi spyoms pa/ yon tan sped pa/ spyod pa brtan pa dag tu 'gyur ro/ /de dag rigs sna tshogs las rab tu byung nas bskal pa grangs med par bla na med pa yang dag par rdzogs pa'i byang chub bsgrubs pa 'di kun du srung zhing 'dzin par byed de/ lus dang srog dang yang bsngos nas dgon pa dang / nags khrod dang / bas mtha'i gnas mal sten cing rnyed pa dang / bkur sti mi 'dod par 'gyur te/ rtag tu brtson zhing rab tu brtson la/ sems can gyi spyod pa la 'jug pa la mkhas pa/ gsang sngags dang bstan bcos la mkhas pa/ 82.155a mgo smos pas go ba/ lhag mthong la mkhas pa/ spobs pa chags pa med pa dag tu 'gyur ro/ /gzungs mi zad pa thob pa de dag sangs rgyas kyi mthu dang / sangs rgyas kyi byin gyi brlabs kyis 'khor bzhi po dag la chos ston cing de bzhin gshegs pas gsungs pa mdo'i sde dang / dbyangs kyis bsnyad pa'i sde dang / lung bstan pa'i sde dang / tshigs su bcad pa'i sde dang / ched du brjod pa'i sde dang / gling gzhi'i sde dang / rtogs pa brjod pa'i sde dang / de lta bu byung ba'i sde dang / skyes pa'i rabs kyi sde dang / shin du rgyas pa'i sde dang / rmad du byung ba'i chos kyi sde dang / gtan la bab par bstan pa'i sde'i mdo dag la spobs par 'gyur ro/ /deng byang chub sems dpa' thabs la mkhas pa nyi shu po gang yin pa de dag slob dpon gyi lung rjod cing mkhan po'i lung rjod par 'gyur te/ slob dpon che ge mo zhig dang / mkhan po che go mo zhig las chos kyi rnam grangs 'di bdag gis kun chub par byas so zhes rjod cing skyes bu dam pa de dag gi sems kun nas dkris te 'dug par mi 'gyur ro/ /der byang chub sems dpa' thabs la mi mkhas pa 'byung bar 'gyur ba gang yin pa de dag ni dge ba spyoms pas gnas shing spobs pas de la mi lta bar skye bo mang po dag shes par byas de/ de dag gis dam pa'i chos 'dzin par mi 'gyur ro/ /'di skad du yang 'phya bar byed de/ khyed ni rang gi spobs pas chos ston par byas kyi/ de bzhin gshegs pas gsungs pa ni ma yin no/ /chos 'di khyed kyis rang dgar byas pa yin no/ /khyed kyis chos gang dag bstan pa ni rang bzor gzhung du byas pa yin gyis/ khyed kyis 'di la ni gus par bya ba yang med/ ri mor 82.155b bya ba yang med do zhes zer te/ der sems can mang po dag chos kyi rnam grangs 'di spong bar byed de/ de skad smras pas skye bo mang po 'dun pa las zlogs par 'gyur ro/ /'di skad du yang dge slong de dag ni sbyin pa la sogs pa zang zing kun du spyod pa yin gyi/ mdo las 'byung ba dang / 'dul ba las 'byung ba'i chos mi ston to/ /'di ni chos ma yin gyis 'di la ri mor bya ba ma skyed cig ces zer te/ skyes bu blun po de dag gis ni legs par smras pa gang ci yang rung ba de dag thams cad ni sangs rgyas kyi bka' yin par de ltar mi shes so/ /de dag gis bdud kyi byin gyi brlab kyis dge slong chos 'dzin pa de dag gi chos de spangs pas chos kyis phongs par 'gyur ba'i las mngon par 'du byed do/ /chos kyi phongs par 'gyur ba'i las mngon par 'dus byas pas log par ltung bar 'gro bar 'gyur ro/ /byams pa de lta bas na byang chub sems dpa' dam pa'i chos kun du srung bar 'dod pas thabs la mkhas par bya ste/ ci nas sems can mos pa tha dad pa de dag gi khong khro ba'i sems mi skye bar kun du bsrung bar bya'o/ /de nas bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das 'di ltar lnga brgya pa tha ma la dam pa'i chos rnam par 'jig pa'i tshe byang chub sems dpa' shes rab 'chal ba de dag 'byung bar 'gyur te/ spobs pa yang tshol la spobs pa la mos par yang mi bgyid pa dang / gzungs kyang tshol la dge slong chos 'dzin pa rnams kyi chos la yang sun 'byin par bgyid pa ni ngo mtshar lags so/ /bcom ldan 'das dper bgyi na mi la la zhig gis chab mig gam/ khron pa 'am/ mtsho las chab 'tshal bar 'tshal la/ des der sla tshwa bor te/ sla tshwa bor 82.156a nas chab 'tshal bar bsams te/ de'i sna'i dbang pos chab de bsnams nas bdag nyid kyis nongs par glo bar ma chud de/ 'di ltar kye mchu 'di ni mnam mo zhes chab la skyon 'dogs par sems so/ /bcom ldan 'das de la sangs rgyas kyi mthus chos kyi tshul 'di la spobs pa'i dge slong chos smra ba gang lags pa de dag ni chab mig gam/ khron pa 'am/ mtsho ji lta ba de bzhin du blta bar bgyi'o/ /bcom ldan 'das lnga brgya pa tha ma la byang chub sems dpa' 'byung bar 'gyur ba rnams ni ji ltar byis pa'i rang bzhin can gyi chab mig gam/ khron pa 'am/ mtsho'i nang du sla tshwa bor nas chab 'tshal bar 'tshal la/ de chab la skyon 'dogs pa bzhin te/ shes rab 'chal pa'i rang bzhin can de dag chos smra ba de dag dang / chos la yang sun 'byin par bgyid de/ sun phyung nas kyang de dag nyid las chos kyi ro 'tshal bar sems te/ bdag nyid kyis nongs par glo bar ma chud nas rna ba'i dbang po skyon dang ldan pas dge slong chos 'dzin pa de dag la sting zhing khyad du gsod la/ 'di skad du 'di ltar dge slong chos smra ba 'di dag ni nyes pa mang pos sun phyung ba yin no zhes mchi ste/ dge slong chos smra ba de dag gi chos kyi ro la sun 'byin cing 'khrul pa tshol te/ skyon sa 'dor zhing mchi bar sems lags so/ /de nas bcom ldan 'das kyis byang chub sems dpa' sems dpa' chen po byams pa la legs so zhes bya ba byin te/ byams pa legs so/ /legs so/ /ji ltar yang 'khrul pa mi tshol zhing skyon thams cad dang bral ba khyod kyis bshad pa 'di'i dpe de legs par smras so/ /byams pa gzhan yang rgyu bzhi sa na spobs pa thams cad ni sangs rgyas kyis gsungs par rig par bya'o/ /bzhi gang zhe na/ byams pa 'di la spobs pa don dang ldan pa yin gyi don dang mi ldan pa ma yin pa dang / chos dang ldan pa yin gyi 82.156b chos dang mi ldan pa ma yin pa dang / nyon mongs pa zad par byed pa yin gyi nyon mongs pa 'phel bar byed pa ma yin pa dang / mya ngan las 'das pa'i yon tan dang phan yon ston pa yin gyi 'khor ba'i nyes pa 'phel bar byed pa ma yin pa ste/ byams pa rgyu bzhi po 'di dag dang ldan na spobs pa thams cad sangs rgyas kyis gsungs par rig par bya'o/ /byams pa dge slong ngam/ dge slong ma 'am/ dge bsnyen nam/ dge bsnyen ma gang su yang rung ste/ rgyu bzhi po 'di dag gi spobs pas spobs pa 'am/ spobs par 'gyur yang rung ste/ de la rigs kyi bu 'am/ rigs kyi bu mo dad pa can dag gis de dag la sangs rgyas su 'du shes bskyed par bya zhing ston par 'du shes bskyed par byas nas dam pa'i chos mnyan par bya'o/ /de ci'i phyir zhe na/ byams pa legs par smras pa gang ci yang rung ba de dag thams cad ni sangs rgyas kyis gsungs pa yin pa'i phyir ro/ /byams pa de la gang zag la sdang ba'i phyir 'di dag ni sangs rgyas kyis gsungs pa ma yin no/ /zhes spobs pa bzhi po de dag spong zhing de dag la ma gus pa skyed par byed pa des ni sangs rgyas kyis gsungs pa'i spobs pa thams cad spangs pa yin te/ chos spangs nas chos kyis phongs par 'gyur ba'i las mngon par 'du byed pas ngan song du 'gro bar 'gyur ro/ /byams pa de lta bas na rigs kyi bu 'am/ rigs kyi bu mo dad pa can gang chos kyis phongs par 'gyur ba'i las las yongs su grol bar 'dod pas gang zag sdang ba'i phyir chos la sdang bar mi bya'o/ /byams pa spobs ba bzhi po 'di dag ni sangs rgyas rnams kyis spangs pa yin te/ byams pa bzhi gang zhe na/ spobs pa don med pa yin gyi don dang ldan pa ma yin pa dang / chos dang mi ldan pa yin gyi chos dang ldan pa ma yin pa dang / nyon mongs pa 'phel bar byed pa yin gyi 82.157a nyon mongs pa zad par byed pa ma yin pa dang / 'khor ba'i nyes pa 'phel bar byed pa yin gyi mya ngan las 'das pa'i yon tan dang phan yon mi ston pa ste/ byams pa spobs pa bzhi po de dag ni sangs rgyas kyis spangs shing ma gnang ba yin no/ /de nas bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das gal te 'khor ba 'phel bar bgyid pa'i spobs pa sangs rgyas kyis ma gnang ba lags na byang chub kyi yan lag yongs su rdzogs par bgyid pa'i slad du bcom ldan 'das kyis nyon mongs pa ni byang chub sems dpa' rnams la phan 'dogs pa lags par bstan cing 'khor ba yongasu 'dzin pa'i bsngags pa yang bka' stsal pa 'di ji lta zhig lags te/ bcom ldan 'das spobs pa 'di sangs rgyas kyi spobs pa lags par mi 'gyur lags grang / bcom ldan 'das kyis bka' stsal pa/ byams pa 'di ji snyam du sems/ byang chub sems dpa' rnams kyi byang chub kyi yan lag yongs su rdzogs par bya ba'i phyir nyon mongs pa phan 'dogs pa yin par ngas bstan cing 'khor ba yongs su 'dzin pa'i bsngags pa bstan pa gang yin pa de don dang ldan pa yin nam/ 'on te don dang ldan pa ma yin/ gsol pa/ bcom ldan 'das yang dag par smra bas smra bar bgyid na byang chub sems dpa' rnams kyi byang chub kyi yan lag yongs su rdzogs par bgyi ba'i slad du nyon mongs pa la dga' ba ni don dang ldan pa lags shing chos dang ldan pa lags shes mchi na yang dag par smra bas smra ba lags so/ /bka' stsal pa/ byams pa de lta bas na rnam grangs 'dis kyang 'di ltar byang chub sems dpa' rnams kyi byang chub kyi yan lag yongs su rdzogs par bya ba'i phyir nyon mongs pa phan 'dogs par gyur bar bstan pa dang / 'khor ba yongs su 82.157b 'dzin pa'i bsngags pa brjod pa ni legs par smras pa thams cad sangs rgyas kyis gsungs pa yin par rig par bya'o/ /de ci'i phyir zhe na/ byams pa don gang la byang chub sems dpa'i chos kyi dbang phyug thabs la mkhas pa rnams kyis dbang bya ba dang / gang na nyan thos dang / rang sangs rgyas thams cad kyis yod pa ma yin pa de ni nyon mongs par blta bar mi bya ste nyon mongs pa'i gnod pa ma yin no/ /byams pa de lta mod kyi nyon mongs pa gzhan dag la phan par mi 'gyur ba dang / byang chub kyi yan lag yongs su rdzogs pa'i don du mi 'gyur ba dang / don dang ldan pa ma yin pa dang / dge ba'i rtsa ba chung ngu'i rgyur yang mi 'gyur ba gang yin pa de la ni byang chub sems dpas lus dang srog dang yang bsngo bar bya'i/ nyon mongs pa de'i dbang du 'gro bar ni mi bya'o/ /de ci'i phyir zhe na/ byams pa byang chub sems dpa' ye shes kyi stobs bskyed pa thob pa'i nyon mongs pa bstan pa yang gzhan yin la/ byang chub sems dpa' stobs bskyed pa ma yin pa'i sa la chags pa rnams kyi yang gzhan yin pa'i phyir ro/ /de nas bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das kyis bka' stsal pa'i don bdag gis 'tshal pa ltar na byang chub sems dpa' gang las kyi sgrib pa mngon par 'du mi bgyid par 'tshal ba dang / las kyi sgrib pa sbyang bar 'tshal ba dang / ma snang cing ma rmas la bde bar yongs su thar par 'tshal bas lnga brgya pa tha ma la byang chub sems dpa'i spyod pa thams cad la mos par bgyi'o/ /the tshom ma mchis pa mang bar bgyi'o/ /gzhan gyi 'khrul pa mi tshol pa dang / phan yon yongs su bzung ba dang / snying po btsal bar bgyi'o/ /bka' stsal pa/ 82.158a byams pa de de bzhin te/ byang chub sems dpas byang chub sems dpa'i spyod pa rnams la the tshom med pa mang bar bya'o/ /de ci'i phyir zhe na/ byams pa byang chub sems dpa' shes rab spyod pa rnams kyi spyod pa ni 'jig rten thams cad dang mi mthun pa'i phyir ro/ /byams pa dper na rgyun du zhugs pa ni so so'i skye bo'i spyod pa na yang snang la/ byis pa so so'i skye bo'i nyes pa dag gis kyang gos par mi 'gyur te/ 'dod chags dang / zhe sdang dang / gti mug gang dag gis byis pa so so'i skye bo rnams log par ltung bar 'gro ba'i 'dod chags dang / zhe sdang dang / gti mug de dag nyid kyis rgyun du zhug pa log par ltung bar 'gro bar mi 'gyur te/ 'di ltar 'jig tshogs yongs su rtogs pa'i phyir ro/ /byams pa de bzhin du byang chub sems dpa' shes rab spyod pa rnams ni bag chags ma spangs pa'i phyir chags shing spang la rmongs par gyur du zin kyang de dag gis yang gzhan la byi pa so so'i skye bo rnams kyis yang gzhan no/ /de ci'i phyir zhe na/ de dag gi bag la nyal ni sems la kun nas dkris shing 'dug pa gang gis byis pa so so'i skye bo rnams sam/ byang chub sems dpa'i sems rtul zhing nges par 'byung ba la mi mkhas pa rnams dang mnyam par 'gyur ba ma yin pa'i phyir ro/ /byams pa byang chub sems dpa' sems dpa' chen po shes rab spyod pa rnams ni nyes pa thams cad kyi nang na lci ba byung du zin kyang shes rab kyi stobs kyis rdul du rlog par byed de/ de'i rgyus log par ltung bar 'gro bar yang mi 'gyur ro/ /byams pa dper na me'i phung po 'bar ba la ni shing gi tshogs chen pos bsnan na ji lta ji ltar bsnan pa de lta de ltar de phyir zhing cher 'bar bar 'gyur gyi me shi bar mi 'gyur ro/ /byams pa de bzhin du byang chub sems dpa' shes rab spyod pa'i shes rab kyi me 82.158b 'bar ba de la ni nyon mongs pa'i len pa ji lta ji ltar bsnan pa de la de ltar de'i shes rab kyi me 'bar bar 'gyur gyi shi zhing zad par mi 'gyur ro/ /byams pa de lta bas na rnam grangs 'dis kyang 'di ltar byang chub sems dpa' shes rab spyod pa rnams kyi spyod pa ni 'jig rten thams cad dang mi mthun par rig par bya'o/ /de nas bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das las dang po pa'i byang chub sems dpa' khyim gyi gnas nas mngon par byung ba shes rab kyi stobs bskyed pa thob pas chos gang dag ni yongs su spang bar bgyi/ chos gang dag ni kun du bsten par bgyi/ chos gang dag yongs su spong zhing kun du bsten par bgyid na shes rab kyi stobs bskyed pa ma skyes pa ni skye par 'gyur la/ skyes pa yang rnam par 'phel zhing yongs su 'grib par mi 'gyur ba lags/ de skad ces gsol pa dang / bcom ldan 'das kyis byang chub sems dpa' sems dpa' chen po byams pa la 'di skad ces bka' stsal to/ /byams pa byang chub sems dpa' las dang po pas khyim gyi gnas nas mngon par 'byung ba dang / shes rab kyi stobs bskyed pa thob pa dang / rnyed pa dang / bkur sti yongs su spang ba dang / rnyed pa dang / bkur sti'i nyes pa mthong bar bya'o/ /'du 'dzi la dga' ba yongs su spang ba dang / 'du 'dzi la dga' ba'i nyes pa mthong bar bya'o/ /smra ba la dga' ba yongs su spang ba dang smra ba la dga' ba'i nyes pa mthong bar bya'o/ /gnyid la dga' ba yongs su spang ba dang gnyid la dga' ba'i nyes pa mthong bar bya'o/ /las la dga' ba yongs su spang ba dang las la dga' ba'i nyes pa mthong bar bya'o/ /spros pa la dga' ba yongs su spang 82.159a ba dang spros pa la dga' ba'i nyes pa mthong bar bya'o/ /rnyed pa dang / bkur sti dang tshigs su bcad pa yongs su spangs ba des ni 'dod pa chung ba bsgom par bya'o/ /'du 'dzi la dga' ba yongasu spangs pas ni gcig pur dga' ba kun du bsten par bya'o/ /smra ba la dga' ba yongs su spangs pas ni don la rtog pa kun du bsten par bya'o/ /gnyid la dga' ba yongs su spangs pas ni nam gyi cha stod dang nam gyi cha smad la mi nyal ba kun du bsten par bya'o/ /las la dga' ba yongs su spangs pas ni sems can thams cad la byams pa kun du bsten par bya'o/ /byams pa las dang po pa'i byang chub sems dpa' khyim gyi gnas nas mngon par byung ba shes rab kyi stobs bskyed pa rjes su thob par 'dod pas yongs su spang bar bya ba'i chos rnams ni yongs su spang bar bya'o/ /kun du bsten par bya ba'i chos rnams ni kun du bsten par bya'o/ /de ci'i phyir zhe na/ byams pa ye shes kyang rkyen la rag las pa yin la/ mi shes pa yang rkyen la rag las pa yin te/ de ni rkyen ma tshogs par thob par sla ba ma yin pa'i phyir ro// // bam po gnyis pa/ de nas bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das byang chub sems dpas rnyed pa dang / bkur sti'i skyon ji ltar mthong bar bgyi/ rnyed pa dang bkur sti'i nongs dmigs ni gang lags/ byang chub sems dpas gang dag la brtags na 'dod pa chung ngu la dga' zhing yongs su mi gdung bar 'gyur ba lags/ bka' stsal pa/ byams pa byang chub sems dpa' sems dpa' chen pos rnyed pa dang bkur sti ni 'dod chags skyed pa yin par brtag par bya'o/ / 82.159b rnyed pa dang bkur sti ni dran pa 'jom par byed par brtag par bya'o/ /rnyed pa dang bkur sti ni rnyed pa dang ma rnyed pas khengs pa dang 'dung bar brtag par bya'o/ /rnyed pa dang bkur sti ni gti mug skyed par brtag par bya'o/ /rnyed pa dang bkur sti ni bdag gi don sgrub pas khyim la ser sna byed pa dang / chags par byed par brtag par bya'o/ /rnyed pa dang bkur sti ni g.yo skyed par brtag par bya'o/ /rnyed pa dang bkur sti ni 'phags pa'i rigs bzhi yongs su spong bas ngo tsha med pa dang / khrel med pa skyed par brtag par bya'o/ /rnyed pa dang bkur sti ni sangs rgyas thams cad kyis ma gnang bar brtag par bya'o/ /rnyed pa dang bkur sti ni nga rgyal dang rgyags pa dang dregs pa bskyed par brtag par bya'o/ /rnyed pa dang bkur sti ni bla ma rnams la khyad du gsod par brtag par bya'o/ /rnyed pa dang bkur sti ni bdud kyi phyogs su brtag par bya'o/ /rnyed pa dang bkur sti ni gcig tu bag med pa'i rtsa ba yin par brtag par bya'o/ /rnyed pa dang bkur sti ni dge ba'i rtsa ba 'phrog par brtag par bya'o/ /rnyed pa dang bkur sti ni glog dang / 'khor lo dang / lce 'bab pa lta bur brtag par bya'o/ /rnyed pa dang bkur sti ni spag pa mang pos spags par brtag par bya'o/ /rnyed pa dang bkur sti ni mdza' bshes kyi khyim dang / slong mo ster ba'i khyim la lta bar brtag par bya'o/ /rnyed pa dang bkur sti ni yid mi bde ba skyed par brtag par bya'o/ /rnyed pa dang bkur sti ni blo rnam par 'khrul bar byed par brtag par bya'o/ /rnyed pa dang bkur sti ni sdig pa'i dngos po 'gyur ba byed pa'i phyir mya ngan skyed par brtag par bya'o/ /rnyed pa dang bkur sti ni dran pa nye bar gzhag pa bzhi rjed par byed par brtag par bya'o/ /rnyed pa dang bkur sti ni dkar po'i chos nyam chung bar byed par brtag 82.160a par bya'o/ /rnyed pa dang bkur sti ni yang dag pa'i spong ba bzhi yongs su nyams par byed par brtag par bya'o/ /rnyed pa dang bkur sti ni pha rol gyi dad pa'i bar chad byed par brtag par bya'o/ /rnyed pa dang bkur sti ni rdzu 'phrul dang mngon par shes pa nyams par byed par brtag par bya'o/ /rnyed pa dang bkur sti ni sngar bkur sti byed la phyis bkur sti mi byed par brtag par bya'o/ /rnyed pa dang bkur sti ni mi mdza' ba dag dang gnas par byed par brtag par bya'o/ /rnyed pa dang bkur sti ni mdza' bo spong bar brtag par bya'o/ /rnyed pa dang bkur sti ni pha rol 'drid pa'i phyir smad 'tshong ma dang 'dra bar brtag par bya'o/ /rnyed pa dang bkur sti ni bsam gtan dang / tshad med pa yongs su spong bar brtag par bya'o/ /rnyed pa dang bkur sti ni sems can dmyal ba dang / dud 'gro'i skye gnas dang / gshin rje'i 'jig rten du ltung bar byed par brtag par bya'o/ /rnyed pa dang bkur sti ni lhas byin dang / lhag spyod gyi cho ga dang mthun par brtag par bya'o/ /byams pa byang chub sems dpas rnyed pa dang bkur sti la nyes dmigs gang dag brtag par bya ba ni 'di lta bu 'di dag go/ /brtags nas kyang 'dod pa chung bar bya'i yongs su gdung bar ni mi bya'o/ /de ci'i phyir zhe na/ byams pa byang chub sems dpa'i 'dod pa chung ba la skyon 'di lta bu 'di dag med pa'i phyir te/ de'i sangs rgyas kyi chos rnams la bar chad med pa yin/ khyim pa dang rab tu byung ba dag yid 'byung bar mi 'gyur ba yin/ lha dang mi rnams yongs su dga' bar bya ba'i phyir gnas pas rjes su bsrung bar 'os pa yin/ ngan 'gro log par ltung ba 82.160b thams cad kyis skrag pa med pa yin/ bsdigs pa dang bral bas zil gyis mi non pa yin/ bdud kyi yul las yongs su grol bas mi 'phrogs pa yin/ sdug bsngal thams cad kyis mi tshugs pa yin/ lha dang mi rnams kyis mngon par 'dod par bya ba yin/ bsam gtan la goms par byed par gnas pas gsal ba yin/ g.yo dang sgyu spangs pa dang / 'dod pa'i yon tan lnga la skyon du lta bas bag yod pa yin/ 'phags pa'i rigs la gnas pas ji skad smras pa de bzhin byed pa yin/ mkhas pa rnams dang tshangs pa mtshungs par spyod pa rnams kyis 'dod pa yin te/ byams pa phan yon 'di lta bu 'di dag shes nas byang chub sems dpa' sems dpa' chen po mkhas pa rnyed pa dang bkur sti yongs su spangs pas rnyed pa dang bkur sti thams cad spang ba'i phyir lhag pa'i bsam pas 'dod pa chung ba la gnas par bya zhing 'dod pa chung ba la kun du bsten par bya'o/ /de skad ces bka' stsal pa dang / bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das byang chub sems dpas 'du 'dzi la dga' ba'i skyon rnams ji ltar brtag par bgyi/ 'du 'dzi la dga' ba'i skyon de dag ni gang lags/ byang chub sems dpas gang dag la brtags na gcig pur dga' ba la dga' zhing yongs su skyo bar yang mi 'gyur ba lags/ bcom ldan 'das kyis bka' stsal pa/ byams pa 'du 'dzi'i nyes dmigs ni nyi shu po 'di dag yin te/ nyi shu gang zhe na/ byams pa 'di la lus kyis ma bsdams pa yin/ ngag gis ma bsdams pa yin/ yid kyis ma bsdams pa yin/ 'dod chags che ba yin/ zhe sdang che ba yin/ gti mug 82.161a che ba yin/ 'jig rten pa'i gtam gyis kyang gos pa yin/ 'jig rten las 'das pa'i gtam las yongs su nyams pa yin/ chos la ma gus pa la sten pa yin/ chos yongs su spangs pa yin/ de la bdud kyis glags rnyed pa yin/ bag med pa la bsten pa yin/ bag med pa dang ldan pa yin/ de rtog pa dang dpyod pa shas che ba yin/ mang du thos pa las yongs su nyams pa yin/ zhi gnas dang lhag mthong mi 'thob pa yin/ myur du tshangs par spyod par mi 'gyur ba yin/ sangs rgyas la dga' ba las yongs su nyams pa yin/ chos la dga' ba las yongs su nyams pa yin/ dge 'dun la dga' ba las yongs su nyams pa yin te/ byams pa nyi shu po de dag ni 'du 'dzi la dga' ba'i nyes dmigs yin par rig par bya ste/ byang chub sems dpas gang dag la brtags na gcig pur dga' ba la dga' zhing yongs su skyo bar yang mi 'gyur ba yin no/ /de nas bcom ldan 'das kyis de'i tshe tshigs su bcad pa 'di dag bka' stsal to/ /'dod chags spangs shing zhe sdang rab spangs nas/ /rnal 'byor can ni 'du 'dzir mi gnas te/ /de ni de la gzhol zhing de la 'bab/ /nyes pa des na dga' bar byed mi 'gyur/ /rgod dang dgod dang de bzhin rnam rtog pa/ /'di dag thams cad 'du 'dzi rnams las byung / /snying po med pa'i 'du 'dzi su byed pa/ /de ni lang long spyod cing ma bsdams yin/ /byis pa dag ni 'jig rten smra la dga'/ /byis pa de dag mchog gi gtam las nyams/ /zhe sdang 'phel zhing rnam rtog shas kyang che/ /nyes pa des na de la mi chags so/ /rigs pa ma yin smra la dga' bskyed nas/ /dge slong thos pa rnam par 'phel ni byed/ / 82.161b de lta bas na mi rigs smra spongs la/ /chos la rtag tu dga' ba thob par gyis/ /byang chub mngon par 'dod phyir nga yis ni/ /rang gi yan lag lan stong snyed du btang / /chos nyan pas ni nga la ngoms med na/ /de dag chos nyan pa na skyo bar 'gyur/ /tshig bzhi pa yi tshigs su bcad pa'i phyir/ /nga ni chung ma bu la dga' ma gyur/ /rgyal srid dag dang longs spyod ngas spangs na/ /mkhas pa ji ltar chos ni nyan mi byed/ /rigs mi smra dang dam pa min smra ba/ /rnam pa kun du yongs su spang bar bya/ /bskal pa brgya phrag du mar gang dkon pa/ /chos kyi dam pa de la dga' skyed cig /thar pa 'dod pa yon tan don gnyer bas/ /'jig rten bya ba yongs su btsal mi bya/ /gang zhig zas dang gos kyi don tsam 'dod/ /de ni mchog dang gtso bor bsngags ma yin/ /gang zhig 'dri zhing dge slong legs par 'ongs/ /bstan yang gding gis tshur shog 'dug par gyis/ /mi yi rnyed pa rab dkon rnyed gyur gyis/ /gcig la gcig ni chos kyi gtam yang bya/ /lung mnod kha ton bya dang bsam gtan rnams/ /khyod kyi dkar po'i phyogs rnams 'phel gyur tam/ /gal te khyod ni 'dod na dri bar gyis/ /khyod la'ang bdag 'dri skabs ni dbye bar gyis/ /de bzhin gshegs pa mya ngan yongs 'das nas/ /bstan pa rnam par 'jig par 'gyur ba na/ /dge slong dag ni shin du rgod cing khengs/ /dgon pa bor nas 'di 'dzir dga' bar 'gyur/ /rnyed pa dang ni de bzhin zas ched du/ /nyin dang mtshan rnams su yang gtam byed la/ /byis pa dag ni gnyid log gyur na yang / /lo tog skye ba'i rmi lam rmi bar 'gyur/ /byis pa 'di kun shes pa 82.162a rab tu nyams/ /ngan song ngan 'gro gsum du gzhol 'gyur gyis/ /dga' ba dang ni mos pa bskyed nas kyang / /bse ru lta bur rtag tu nags gnas gyis/ /yon tan 'dod pa nags na gnas pa yis/ /pha rol dag gi skyon la brtag mi bya/ /bdag ni khyad par 'phags shing bdag mchog ces/ /de snyam du ni sems bskyed mi bya'o/ /rgyags 'di bag med kun gyi rtsa ba ste/ /dge slong dman la brnyas par yong mi bya/ /bskal pa gcig gis thar pa 'thob mi 'gyur/ /'di ni bstan pa 'di la go rims yin/ /de ltas dge slong yon tan 'dod gyur pa/ /dpa' bos mi rigs brjod pa spangs nas kyang / /dga' zhing mgu la rab tu dga' ba yis/ /bse ru 'dra bar dgon par gnas par bya/ /de nas bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das 'di ltar dkar po'i chos yongs su spong ba'i slad du 'du 'dzi nongs pa mang po'i skyon chags shing yon tan ma mchis la gnod pa dang ldan te/ 'du 'dzi nyon mongs pa 'phel bar bgyid cing spyod pa bzang po ma lags pa ni ngo mtshar lags te/ bcom ldan 'das byang chub sems dpa' mkhas pa dge ba 'tshal ba su zhig gcig pur dga' ba la mngon par dga' bar mi bgyid/ bcom ldan 'das byang chub sems dpas smra ba la dga' ba'i skyon rnams ji ltar brtag par bgyi/ byang chub sems dpas gang rtogs na don rnam par nges pa la dga' zhing don la rtog pas yongs su bdud par yang mi 'gyur ba lags/ de skad ces gsol pa dang / bcom ldan 'das kyis byang chub sems dpa' sems dpa' chen po byams pa la 'di 82.162b skad ces bka' stsal to/ /byams pa 'di la byang chub sems dpa' smra ba la dga' ba'i nyes dmigs nyi shu yod par brtag par bya'o/ /nyi shu gang zhe na/ byams pa 'di la dge slong smra ba la dga' ba ni mang du thos pas rgyags shing dregs pas gus pa med par 'gyur ba dang / rtsod pa smra ba lhur len pas phyogs la mngon par zhen par 'gyur ba dang / nang du tshul bzhin yid la byed pa dang bral bas dran pa brjed par 'gyur ba dang / lus dang sems shin du ma sbyangs pas shes bzhin med par spyod par 'gyur ba dang / /chos la bzod pa las nyams pas khengs pa dang 'dud par 'gyur ba dang / zhi gnas dang lhag mthong yongs su spangs pas sems kyi rgyud dmu rgod du 'gyur ba dang / smra ba'i spag pas spags pas dus ma yin par smra bar 'gyur ba dang / 'phags pa'i shes pa ma thob pas ma bsdams par 'gyur ba dang / lha dang klu rnams kyis mi bkur bar 'gyur ba dang / so so yang dag par rig pa thob pa rnams kyis brnyas par 'gyur ba dang / lus mngon sum du gyur ba rnams kyis spyo bar 'gyur ba dang / sgrub pa la mi gnas pas yid la gcags par 'gyur ba dang / the tshom ma spangs pas rab tu mi brtan par 'gyur ba dang / sgra lhur len pas thos pa dang bye brag phyed pa nyams par 'gyur ba dang / rnam par shes pa'i spyod yul can yin pas 'dod pa'i yon tan la chags par 'gyur ba dang / yang dag pa ji lta ba bzhin du rtog par mi byed pas myur du chos spong bar byed pa dang / gzhan dang gzhan rtsom pas mi brtan zhing rten med par 'gyur ba dang / sems yongs su ma dul bas bkur sti med par thob par 'gyur ba dang / chos kyi dbyings khong 82.163a du ma chud pas gzhan gyi dring 'jog par 'gyur ba dang / dbang po rnams yongs su ma shes pas nyon mongs pa'i dbang du 'gyur ba ste/ byams pa nyi shu po de dag ni byang chub sems dpa' smra ba la dga' zhing sgra lhur len la don la rtog pa dang bral ba'i nyes dmigs yin no/ /de nas de'i tshe bcom ldan 'das kyi tshigs su bcad pa 'di dag bka' stsal to/ /thos pas rgyags nas gus par mi 'gyur te/ /rnam par 'gyed pa'i smra ba rnams la chags/ /brjed par 'gyur zhing shes bzhin med par 'gyur/ /smra la dga' ba'i nyes pa 'di dag go/ /nang gi sems las shin du ring bar 'gyur/ /lus dang sems kyang rab sbyangs ma yin 'gyur/ /khengs pa dang ni 'dud par mang por 'gyur/ /smra la dga' ba'i nyes pa 'di dag go/ /byis pa dam pa'i chos bsam rab tu nyams/ /sems ni mi mnyen shin du rtsub par 'gyur/ /zhi gnas lhag mthong dag dang rab tu ring / /smra la dga' ba'i nyes pa 'di dag go/ /rtag tu bla ma dag la gus pa med/ /spags pa'i gtam dag la ni dga' ba skyed/ /snying po med la gnas shing shes rab nyams/ /smra la dga' ba'i nyes pa 'di dag go/ /de ni lha tshogs rnams kyis mi bkur zhing / /de tshe de la'ang 'dod pa mi skyed la/ /so so yang dag rig las nyams 'gyur te/ /smra la dga' ba'i nyes pa 'di dag go/ /gang dag lus ni mngon sum mang yod pa/ /mkhas pa 'di dag gis ni spyo bar 'gyur/ /de yi srog ni don med 'gyur ba ste/ /smra la dga' ba'i nyes pa 'di dag go/ /bdag ni sgrub nyams nga ni ci bya zhes/ /'chi ba'i dus tshe byis pa mya ngan byed/ /gting rnyed ma gyur shin du sdug bsngal 'gyur/ /smra la dga' ba'i nyes pa 82.163b 'di dag go/ /rtswa bskyod bzhin du 'gul zhing g.yo ba ste/ /de ni de ltar the tshom 'gyur du nges/ /de ni nam yang blo brtan mi 'gyur te/ /smra la dga' ba'i nyes pa 'di dag go/ /gar la lta ba'i khrod na 'dug pa zhig /dpa' bo gzhan gyi yon tan brjod pa bzhin/ /bdag nyid nan tan nyams par 'gyur ba ste/ /smra la dga' ba'i nyes pa 'di dag go/ /de yi sems ni rna ba'i rnam shes la/ /rab tu chags shing sgras rgyags shes rab nyams/ /log par sems shing lam ngan 'gro bar 'gyur/ /smra la dga' ba'i nyes pa 'di dag go/ /de ni g.yo ldan yang zhing re chad 'gyur/ /phyi phyir zhing ni rnam par 'gyed pa rtsom/ /'phags pa'i dam pa'i chos las rab tu ring / /smra la dga' ba'i nyes pa 'di dag go/ /mthu chung sti stang gis ni dgar 'gyur te/ /mi shes ldan pa g.yo zhing 'gyur ba yin/ /spre'u ltar de yi sems ni g.yo bar 'gyur/ /smra la dga' ba'i nyes pa 'di dag go/ /rang gi blo ni shes pas dman pa'i phyir/ /rmongs pa de ni gzhan gyi dring la 'jog /de ni nyon mongs phyogs kyi dbang du 'gro/ /smra la dga' ba'i nyes pa 'di dag go/ /mig kyang 'khrul cing de bzhin rna ba'ang 'khrul/ /sna yang 'khrul cing de bzhin lce yang 'khrul/ /lus kyang 'khrul cing yid kyang 'khrul par 'gyur/ /smra la dga' ba'i nyes pa 'di dag go/ /yun ring dus nas smra la dga' bas na/ /de ni bdag nyid dag pa mi 'thob bo/ /tshig gang dga' ba mtha' yas 'thob 'gyur pa/ /tshig gcig tsam zhig bsams kyang mchog yin no/ /bu ram shing shun snying po ci yang med/ /dga' bar bya ba'i ro ni nad na 'dug /shun pa zos pas mis ni bu ram ro/ /zhim po rnyed par nus 82.164a pa ma yin no/ /ji ltar shun pa de bzhin smra ba ste/ /ro lta bu ni 'di la don sems yin/ /de lta bas na smra la dga' spongs te/ /rtag tu bag yod byos la don soms shig /smra ba'i nyes pa 'di 'dra rtogs gyur cing / /don gyi yon tan mchog 'di shes nas ni/ /'di na byang chub mkhas pa gang yin pa/ /des ni don bsam pa la dga' bar gyis/ /de nas bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das 'di ltar smra ba la dga' ba'i skyon rnams dang / don la sems pa'i yon tan rnams de bzhin gshegs pas legs par gsungs pa ni ngo mtshar lags so/ /bcom ldan 'das byang chub sems dpa' snying po 'tshal ba rnams kyis ni don bsam pa gtang ste snying po ma mchis pa'i smra ba la dga' bar bgyid pa'i rngo mi thog lags so/ /bcom ldan 'das byang chub sems dpa' sems dpa' chen pos gnyid kyi dga' bas dga' ba'i skyon ji ltar brtag par bgyi/ byang chub sems dpas ji ltar brtags na rmugs pa dang / gnyid kyi nongs dmigs mthong nas brtson 'grus rtsom zhing yongs su skyo bar yang mi 'gyur ba lags/ bcom ldan 'das kyis bka' stsal pa/ byams pa 'di la gnyid la dga' ba'i nyes dmigs ni rnam pa nyi shur brtag par bya ste/ byang chub sems dpa' de dag la rtog na brtson 'grus rtsom pa la dga' zhing skyo bar yang mi 'gyur ro/ /nyi shu gang zhe na/ byams pa 'di la byang chub sems dpa' gnyid che ba ni rmugs pa dang / gnyid kyis non te le lo che bar 'gyur ba dang / 82.164b lus shes che ba dang / mdog yongs su ma dag pa dang / de'i 'byung ba chen po rnams nang bzhis non par 'gyur ba dang / de'i me'i khams chung bar 'gyur ba dang / de'i kha zas legs par 'ju bar mi 'gyur ba dang / de'i lus la 'bras dang phol mig 'byung bar 'gyur ba dang / le lo can du 'gyur ba dang / de'i gti mug gi dra ba rnam par 'phel bar 'gyur ba dang / de'i shes rab nyam chung bar 'gyur ba dang / de kha zas 'dod pa las yi ga 'chu bar 'gyur ba dang / de gti mug gi mun pa rab tu 'dzin par 'gyur ba dang / de la mi ma yin pa rnams bkur sti mi byed pa dang / sems rtul bar 'gyur ba dang / mi ldang ba mang bar 'gyur ba dang / de'i sems bag la nyal gyis kun nas bkris shing 'dug par 'gyur ba dang / de dge ba'i chos la 'dun par mi 'gyur ba dang / dge ba'i chos thams cad las nyams par 'gyur ba dang / spyod pa zhum par gyur nas brtson 'grus rtsom pa rnams kyi spyod pa la smod pa dang / 'khor gyi nang du song na brnyas par 'gyur ba ste/ byams pa nyi shu po de dag ni byang chub sems dpa' gnyid la dga' zhing rmugs pa dang / gnyid mang ba'i nyes dmigs yin te/ byang chub sems dpa' de dag la rtog na brtson 'grus rtsom pa la dga' zhing yongs su skyo bar mi 'gyur ro/ /de nas de'i tshe bcom ldan 'das kyis tshigs su bcad pa 'di dag bka' stsal to/ /gang zhig rmugs pa dang gnyid la dga' 'gyur ba/ /de yi lus ni sha che mkhregs ma yin/ /le lo de che blun zhing 'thun mi byed/ /de yi mdog kyang dag par mi 'gyur ro/ /gang zhig rmugs dang gnyid la dga' 'gyur ba/ /bad kan rlung dang 82.165a de bzhin mkhris pa rnams/ /de dag de yi lus la shas cher 'byung / /de yi khams rnams rab tu 'khrug par 'gyur/ /gang zhig rmugs dang gnyid la dga' 'gyur ba/ /kha zas nyes pas lto ni ma dag cing / /lus kyang lci la zo bdog bde ma yin/ /de yi tshig kyang gsal bar mi 'gyur ro/ /gang zhig rmugs dang gnyid la dga' 'gyur ba/ /de yi lus la phol mig mang po 'byung / /de ni nyin dang mtshan du bde bar nyal/ /de la rma rnams mi bzang 'byung bar 'gyur/ /gang zhig rmugs dang gnyid la dga' 'gyur ba/ /le lo byed cing brtson 'grus yongs su nyams/ /de ni bde las nyams shing nor rnams 'gribs/ /de ni rtag tu zhan cing sems kyang rmongs/ /gang zhig rmugs dang gnyid la dga' 'gyur ba/ /gti mug dra ba chen po 'phel 'gyur zhing / /de ni the tshom can de lta ba thob/ /de ni lta bar gyur ba mang bar 'gyur/ /gang zhig rmugs dang gnyid la dga' 'gyur ba/ /de yi shes rab shin du nyam chung 'gyur/ /de yi blo yang yongs su nyams par 'gyur/ /ye shes las ni rtag tu de nyams 'gyur/ /gang zhig rmugs dang gnyid la dga' 'gyur ba/ /mi shes le lo snyom las shes rab 'chal/ /mi ma yin pa dag gis glags rnyed de/ /nags na gnas pa'i tshe ni 'tshe bar 'gyur/ /gang zhig rmugs dang gnyid la dga' 'gyur ba/ /sems kyang rtul zhing de yi dran pa rmongs/ /lung nod kha ton byed la de mi gnas/ /chos smra na yang de ni rtag tu thogs/ /gang zhig rmugs dang gnyid la dga' 'gyur ba/ /de yi nyon mongs kun nas ldang bar 'gyur/ /rnam par 'khor zhing g.yo la rmongs pa dang / /de yi sems ni rtag tu gdung bar 'gyur/ /gang zhig rmugs dang gnyid la dga' 'gyur ba/ /de yi 82.165b bya ba mang po nyams shing 'gags/ /lus kyang gdungs shing yid kyang yongs su gdungs/ /bag la nyal ba 'phel bar nges mi shes/ /gang zhig rmugs dang gnyid la dga' 'gyur ba/ /de ni dge sems rtag tu mi 'dod de/ /de ni chos la 'dud pa skyed mi byed/ /phyir zhing chos ma yin la de dgar 'gyur/ /gang zhig rmugs dang gnyid la dga' 'gyur ba/ /de ni rmongs shing chos la 'dun pa nyams/ /byis pa yon tan kun las yongs su nyams/ /dkar po 'jom zhing mun par 'gro bar 'gyur/ /gang zhig rmugs dang gnyid la dga' 'gyur ba/ /'jigs par 'gyur zhing sems kyang rab tu zhum/ /de ni rtag par mchog tu dga' mi 'gyur/ /gnyid kyis non pa lus kyang lhod par 'gyur/ /gang zhig rmugs dang gnyid la dga' 'gyur ba/ /bdag nyid mi shes le lo can gyur nas/ /brtson 'grus stobs dang ldan la phrag dog byed/ /brtson 'grus ldan pa rnams la mi snyan smra/ /nyes pa 'di 'dra 'di dag rtogs gyur nas/ /mkhas pa su zhig rmugs gnyid dga' bar byed/ /shin du gti mug lta ba mang po'i rgyu/ /don bzang dam chos yon tan chud gzon pa/ /gnyid 'di brtson 'grus 'phrog par rtogs gyur nas/ /mkhas pa yon tan ldan pa su der dga'/ /sdug bsngal kun dang mun pa sel byed cing / /ngan song yongs su spong ba'i gzhir gyur pa/ /sangs rgyas kun gyis bsngags pa'i brtson 'grus 'phags/ /gang yin de ni rtag tu brten par gyis/ /'jig rten 'di ni bzo gang ci yod dang / /'jig rten 'das bzo gang dag ci yod pa/ /brtson 'grus brtsams la rnyed par mi dka' na/ /mkhas pa su dag brtson 'grus stobs kyis skyo/ /gang dag sangs rgyas byang chub zhugs gyur ba/ /de dag rmugs gnyid skyon rnams mthong nas ni/ /rtag tu brtson 'grus rtsom la gnas par byed/ /'di ni nga yis de dag bskul byas yin/ /de nas bcom ldan 'das la byang chub sems dpa' sems dpa' chen po byams pas 82.166a 'di skad ces gsol to/ /bcom ldan 'das byang chub sems dpa' gang dag rmugs pa dang gnyid kyi skyon 'di lta bu 'di dag thos nas spong bar mi bgyid cing skyo bar mi bgyid pa de dag dang brtson 'grus rtsom pa mi skyed pa de dag de tsam du rmongs par 'gyur ba ni ngo mtshar lags so/ /bcom ldan 'das byang chub sems dpa' slob par 'tshal ba dang / lhag pa'i bsam pas bla na med pa yang dag par rdzogs pa'i byang chub mngon par rdzogs par 'tshang rgya bar 'tshal ba su zhig yang dag pa'i gnas 'di lta bu 'di dag thos nas le lo bgyid cing dge ba'i chos rnams bskyed par mi bgyid/ brtson 'grus kyi yon tan dang / phan yon 'di lta bu thos nas byang chub kyi yan lag yongs su rdzogs par bgyi ba'i slad du su zhig brtson 'grus rtsom par mi bgyid de/ de bzhin gshegs pas gnyid la dga' ba'i nongs dmigs dang / brtson 'grus rtsom pa'i phan yon 'di dag legs par bka' stsal lags so/ /bcom ldan 'das byang chub sems dpas las la dga' zhing 'jig rten pa'i sbag pas sbags pa'i nongs dmigs ji ltar brtag par bgyi/ byang chub sems dpa' gang dag la brtags na 'dod pa chung zhing bgyi ba nyung la/ dam pa'i chos btsal ba'i slad du rtag tu brtson zhing sbyor ba la gnas par 'gyur ba lags/ bcom ldan 'das kyis bka' stsal pa/ byams pa 'di la byang chub sems dpa' sems dpa' chen pos las la dga' ba'i nyes dmigs nyi shur brtag par bya ste/ byang chub sems dpa' de dag la rtog na 'dod pa chung zhing bya ba nyung la dam pa'i chos btsal ba'i phyir rtag tu brtson zhing sbyor ba la gnas par 'gyur ro/ /nyi shu gang zhe na/ byams pa 'di la byang chub sems dpa' las la dga' ba 'jig rten pa'i las rnams la brtson pa 'gyur ba dang / las ngan pa thams cad la gnas par 'gyur ba dang / lung nod pa dang / kha don la brtson pa dag gis brnyes par 'gyur ba dang / nang du yang dag 'jog la dga' ba rnams kyis 82.166b smad pa dang / 'khor ba thog ma dang tha ma med pa yongs su 'dzin pa'i las rtsom par 'gyur ba dang / bram ze dang khyim bdag dad pa rnams kyi yon sbyong bar mi byed pa dang / de'i sems dngos por 'dzin pa la 'jug par 'gyur ba dang / chags pa mang bar 'gyur ba dang / khyim so rnams la rgyun du sbyor bar 'gyur ba dang / dbang byed par mi 'gyur ba dang / zlog byed kyi ngang tshul can yid smon mang po la rgyun du gnas pa dang / khyim gyi bya ba dag la brtson pa dang / de ro dag la shas cher 'dun cing chags pa skyed pa dang / len pa med par mi dga' ba dang / kun nas mnar sems mang ba'i las kyi sgrib pa rgyun du mngon par 'du byed pa dang / dge bsnyen dang / dge bsnyen ma la rton par 'gyur ba dang / de zas kyi rnam par rtog pas nyin mtshan 'da' bar byed pa dang / 'jig rten pa'i bya ba dag rgyun du 'dri bar byed pa dang / mi rigs pa'i smra ba dag la mngon par dga' bar 'gyur ba dang / zhal ta byed pa'i rgyags pas tshangs pa mtshungs par spyod pa rnams dbang phyug gis tshar gcod par byed pa dang / pha rol gyi 'khrul pa la rtog cing bdag gi 'khrul pa la mi rtog par 'gyur ba dang / don dang ldan zhing rnam par nges pa'i gtam dag la skyen par brnyas par 'gyur ba ste/ byams pa nyi shu po de dag ni byang chub sems dpa' las la dga' zhing zhal ta byed pa'i spag pas spags pa'i nyes dmigs yin te/ byang chub sems dpa' de dag la rtog na 'dod pa chung zhing bya ba nyung bar 'gyur la 'jig rten pa'i bya ba spangs nas 'jig rten las 'das pa'i bya ba la brtson par 'gyur ro/ /de nas de'i tshe bcom ldan 'das kyis tshigs su bcad pa 'di dag bka' stsal to/ /de ni las ngan dag la gnas 'gyur zhing / /las mchog dag las de ni rgyang yang ring / /'dir ni rnyed pa che las ring bar 'gyur/ /rnam par chags sems nyes pa 'di dag yin/ /dge slong lung nod kha ton dga' rnams kyis/ /de la brnyas shing 'dod par mi byed la/ /bsam gtan byed pa rnams kyis smad par 'gyur/ /rtag tu las gnas 82.167a skyon ni 'di dag yin/ /'khor ba'i las la mngon par brtson pa dang / /thar pa las ni rgyang ring bcings par gnas/ /de ni yul 'khor zas la mi rigs spyod/ /nyes pa 'di dag las la chags pa'i yin/ /rtag tu dngos po dag ni len par byed/ /yongs su 'dzin pa med la dga' mi skyed/ /nor med nor ni don du gnyer bar byed/ /nyes pa 'di dag las la chags pa'i yin/ /khyim du rgyu ba dag la chags par 'gyur/ /'du 'dzi dga' bas thams cad 'jig par byed/ /gzeb kyi nang du bya bcug bzhin du 'gyur/ /nyes pa 'di dag las la chags pa'i yin/ /khyim pa'i las la de rtag mya ngan byed/ /yongs su gdungs par gyur kyang yid mi 'byung / /nams kyang tshig ni btsun par mi 'gyur te/ /nyes pa 'di dag las la dga' ba'i yin/ /bla mas bskul nas bka' blo mi bde zhing / /rjes su bstan pa 'thun par 'dzin mi byed/ /de ni myur du tshul khrims nyams par 'gyur/ /nyes pa 'di dag las la dga' ba'i yin/ /khyim na gnas pa'i las rnams rtag sems pas/ /de ni rtag tu 'dod par 'gyur ba ste/ /bsam gtan dang ni spong ba de mi byed/ /nyes pa 'di dag las la dga' ba'i yin/ /de yi 'dod chags shas ni che bar skye/ /de ni ro bro rnams la chags shing zhen/ /de ni ngan ngon tsam gyis dgar mi 'gyur/ /nyes pa 'di dag las la dga' ba'i yin/ /de ni 'khor phal che na dga' 'gyur te/ /de nyams na ni shin du sdug bsngal 'gyur/ /de ni bong bu bzhin du lang long 'gyur/ /nyes pa 'di dag las la dga' ba'i yin/ /de sems rtag tu gnod sems ldan par 'gyur/ /las rnams 'phel zhing zad par mi 'gyur te/ /sred pa'i 'khri shing dag gis dam du bcings/ /nyes pa 'di dag las la dga' ba'i yin/ /de ni rtag tu bla ma rnams mi sten/ /phyogs 'dod khyim pa la ni sten par byed/ /tshul khrims 82.167b gnas pa dag la'ang phrag dog byed/ /nyes pa 'di dag las la dga' ba'i yin/ /nyin dang mtshan du sems gzhan med par ni/ /zas dang gos la rgyun du sems par byed/ de ni rtag tu yon tan 'dod ma yin/ /nyes pa 'di dag las la dga' ba'i yin/ /de ni 'jig rten pa yi bya ba 'dri/ /rigs pa min pa'i smra ba rnams la dga'/ rigs pa'i smra la de ni dga' mi 'gyur/ /nyes pa 'di dag las la dga' ba'i yin/ /sdom brtson rnams la de ni rtag tu gshe/ /dbang phyug nyes pas de dag des tshar gcod/ /mi sdug las rnams mngon par 'du byed de/ /nyes pa 'di dag las la dga' ba'i yin/ /de ni rtag tu gzhan gyi skyon rtog cing / /bdag la yod pa'i skyon rnams mi mthong la/ /yon tan ldan pa rnams la 'khrul pa tshol/ /nyes pa 'di dag las la dga' ba'i yin/ /byis pa de ni gzhan gyis myur du brnyas/ /de ni pha rol dag la chos ston tshe/ /blo nyams pas na mngon par shes mi 'gyur/ /nyes pa 'di dag las la dga' ba'i yin/ /gnod 'gyur nyes pa 'di dag mthong nas ni/ /las ngan dag la su zhig dga' bar byed/ /dpa' bo dag ni rtag tu las mchog byed/ /byas pa gang yin chud ni gzon mi byed/ /lan stong brjod kyang tshig gcig mi 'dzin pa/ /de ni blo can dag gis spyo ba yin/ /gang zhig las ngan dag ni byed pa la/ /dam pa dag gis de ltar rtag tu smad/ /de lta bas na mkhas mis 'di rtag tu/ /las ngan dag ni rnam par spangs nas kyang / /thub dbang rnams kyis rtag tu bsngags pa yi/ /bzang po'i las rnams gang yin de dag bya/ /de nas bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das byang chub sems dpa' gang dag chos kyi mchog yongs su spangs nas las ngan pa rtsom pa de dag ni shes rab shin du chung zhing shes rab kyis dman par 'gyur ba lags so/ /de skad ces gsol pa dang / bcom ldan 'das 82.168a kyis byang chub sems dpa' sems dpa' chen po byams pa la 'di skad ces bka' gsol to/ /byams pa de de bzhin te/ de de bzhin no/ /ji skad smras pa bzhin te/ byang chub sems dpa' gang dag chos kyi mchog yongs su spangs nas las ngan pa rtsom pa de dag ni shes rab shin du chung zhing shes rab kyis dman par 'gyur ba yin no/ /byams pa gzhan yang khyod mos par bya'o/ /khyod kyi khong du chud par bya'o/ /byang chub sems dpa' gang dag la sbyor ba med cing bsam gtan med la spong ba med cing 'don pa med pa dang / mang du thos pa yongs su tshol ba med pa de dag ni de bzhin gshegs pa'i bstan pa la rab tu byung ba ma yin no/ /byams pa de bzhin gshegs pa'i bstan pa ni bsam gtan dang spong bas phye ba dang / ye shes kyis 'dus byas pa dang / ye shes kyis mnyam par bzhag pa dang / brtson pas phye ba yin gyi/ khyim pa'i las dang zhal ta byed pas phye ba ni ma yin te/ 'di ltar zhal ta byed pa'i las de ni mi rigs pa la sbyor ba rnams dang / 'du byed la mngon par dga' ba rnams dang / 'jig rten pa'i bya bas spags pa ste/ byang chub sems dpas de la 'dod pa bskyed par mi bya'o/ /byams pa gal te byang chub sems dpa' zhal ta byed pa la brtson pas rin po che sna bdun gyi mchod rten dag gis stong gsum gyi stong chen po'i 'jig rten gyi khams 'di bkang na des ni da mnyes par byas pa ma yin/ ri mor byas pa ma yin/ bkur stir byas pa ma yin gyi/ byams pa gal te byang chub sems dpa' tha na pha rol du phyin pa dang ldan pa'i tshig bzhi pa'i tshigs su bcad pa gcig tsam 'dzin tam/ 'chang ngam/ klog gam/ kun chub par byed dam/ 'chang na des ni nga la bkur stir byas/ bla mar byas/ ri mor byas/ mchod par byas par 'gyur ro/ /de ci'i phyir zhe na/ byams pa de bzhin gshegs pa rnams kyi byang chub ni mang du thos pa las byung ba yin gyi/ dngos po yongs su 'dzin pa las byung ba ni ma yin pa'i 82.168b phyir ro/ /byams pa gal te byang chub sems dpa' zhal ta byed pa la brtson pas byang chub sems dpa' lung nod pa dang / kha ton byed pa la brtson pa zhal ta byed pa'i spag pas spags par byed na bsod nams 'dod pa des ni bsod nams ma yin pa'i phung po chen po skyed par 'gyur te/ las kyi sgrib pa yang yongs su 'dzin par 'gyur ro/ /de ci'i phyir zhe na/ bsod nams bya ba'i gzhi gsum po gang yin pa de dag thams cad ni shes rab las byung ba'i phyir ro/ /byams pa de lta bas na byang chub sems dpa' zhal ta byed pa la brtson pas byang chub sems dpa' lung nod pa dang / kha ton byed pa la brtson pa'i bar chad mi bya'o/ /'dzam bu'i gling 'di zhal ta byed pas yongs su gang bar gyur ba'i zhal ta byed pa de dag thams cad kyis ni byang chub sems dpa' lung nod pa dang / kha ton byed pa la brtson pa gcig la rim gro dang bsnyen bkur bya'o/ /byang chub sems dpa' lung nod pa dang / kha ton byed pa la brtson pa 'dzam bu'i gling gang bsnyed kyis ni byang chub sems dpa' nang du yang dag 'jog la brtson pa gcig la rim gro dang bsnyen bkur bya'o/ /de ltar byas na de bzhin gshegs pas rjes su yi rang ba dang gnang ba yin te/ de dag gi bsnyen bkur ni legs par byas pa yin no/ /gang zhig shes rab spyod pa la mos nas rim gro dang bsnyen bkur byed pa'i bsod nams kyi phung po ni tshad med par skyed par 'gyur ro/ /de ci'i phyir zhe na/ 'di ltar shes rab kyi las ni dka' ba'i las dang / bla na med pa dang / gong na med pa dang / 'jig rten gsum po thams cad las khyad par du 'phags shing mngon par 'phags pa'i phyir ro/ /byams pa de lta bas na byang chub sems dpa' mngon par brtson pa don du gnyer zhing brtson 'grus rtsom par 'dod pas shes rab la brtson par bya zhing shes rab 82.169a yongs su btsal ba la brtson 'grus brtsam par bya'o/ /de nas bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das byang chub sems dpa' 'du 'dzi la dga' ba dang / las la dga' ba rnams kyi nongs dmigs rnams ni bka' stsal lags na/ bcom ldan 'das byang chub sems dpas spros pa la dga' ba'i nongs dmigs rnams ji ltar brtag par bgyi/ byang chub sems dpas gang dag la brtags na nye bar zhi ba la gnas shing rtsod pa ma mchis par gnas par 'gyur lags/ bcom ldan 'das kyis bka' stsal pa/ byams pa byang chub sems dpas spros pa la dga' ba'i nyes dmigs rnams mdor bsdu na nyi shu po 'di dag tu brtag par bya'o/ /rgyas par ni de bzhin gshegs pas mtha' yas par bstan te mthar thug par yang mi 'gyur ro/ nyi shu gang zhe na/ byams pa byang chub sems dpa' spros pa la dga' ba ni tshe 'di nyid la sdug bsngal ba dang yid mi bde ba mang bar gnas pa dang / bzod pa las yongs su nyams par 'gyur ba dang / de'i mi mdza' ba rnams yi rangs par 'gyur ba dang / de la bdud kyang mgu bar 'gyur ba dang / de la bdud kyi 'khor kyang dga' bar 'gyur ba dang / de'i dge ba'i chos ma skyes pa rnams skye bar mi 'gyur ba dang / skyes pa rnams med par 'gyur ba dang / 'thab ba dang mkhon du 'dzin pa dang / rtsod pa dang / 'gyed pa mang bar 'gyur ba dang / 'thab pa dang / rtsod pa dang / 'gyed pas ngan song du 'gro bar 'gyur ba'i las mngon par 'du byed par 'gyur ba dang / bag med par 'gyur ba'i lam 'dzin pa dang / de'i lce'i dbang po rtsub par 'gyur ba dang / de'i lung mnos pa'i chos rnams legs par gnas par mi 'gyur ba dang / mdo sde lung ma mnos pa rnams rna lam du grag par mi 'gyur ba dang / dge ba'i bshes gnyen thams cad kyis yongs su 82.169b spangs par 'gyur ba dang / sdig pa'i grogs po rnams dang myur du phrad par 'gyur ba dang / dka' ba'i lam gyis nges par 'byung bar 'gyur ba dang / rgyun mi 'chad par yid du mi 'ong ba'i tshig thos par 'gyur ba dang / gang dang gang du skyes pa de dang der the tshom can du 'gyur ba dang / de la mi khom pa brgyad po dag nye bar 'gyur ba dang / rtag tu de'i dkar po'i phyogs la brtson pa la bar chad 'byung bar 'gyur ba ste/ byams pa nyi shu po de dag ni spros pa la dga' ba'i nyes dmigs rnams mdor bsdus pa yin te/ de dag yongs su spang bar bya'o/ /de nas de'i tshe bcom ldan 'das kyis tshigs su bcad pa 'di dag bka' stsal to/ /de ni tshe 'dir bde bar mi 'gyur to/ /bzod dang ring zhing khro ba'i phyogs la gnas/ /de yi dgra rnams dga' bar 'gyur ba ste/ /spros sbyong de yi nyes pa 'di dag go/ /bdud kyang de la dga' zhing mgu bar 'gyur/ /bdud kyi phyogs kyang de la dga' bar 'gyur/ /de yi dge ba'i chos skyes chud zar 'gyur/ /spros spyod de yi nyes pa 'di dag go/ /de ni nams kyang dge ba mi skyed de/ /'chi kar tha dad rgyu la gnas pa dang / /ngan song 'gro ba'i las ni byed par 'gyur/ /spros spyod de yi nyes pa 'di dag go/ /mi mdzes pa dang blta na mi sdug dang / /de ni rtag tu dus rigs dma' bar 'gyur/ /de yi lce yi dbang po rtsub 'gyur te/ /spros spyod de yi nyes pa 'di dag go/ /lung mnos chos rnams legs par mi gnas shing / /lung mnos ma byas mdo sde thos mi 'gyur/ /dge ba'i bshes gnyen rnams yang rnam par spong / /spros spyod de yi nyes pa 'di dag go/ /sdig pa'i grogs po dag dang phrad par 'gyur/ /dga' ba'i theg pas rnam par dag 'gyur zhing / /mi 'dod pa'i tshig rnams rgyun du thos/ /spros spyod de yi nyes pa 'di dag go/ /byis pa'i blo can de ni gar skyes der/ /yin nam ma yin snyam du de rtog cing / /rtag tu des ni the 82.170a tshom rnyed par 'gyur/ /spros spyod de yi nyes pa 'di dag go/ /de ni mi khom brgyad dang ring mi 'gyur/ /de ni dal ba ldan pa'i mchog mi 'gyur/ /de la gnod pa 'di dag rtag 'byung ste/ /spros spyod de yi nyes pa 'di dag go/ /de yi dge ba dag la bar chad mang / /bgegs su 'gyur bas myur du 'thob mi 'gyur/ /brtson dang ldan yang de la dgra rnams 'byung / /spros spyod de yi nyes pa 'di dag go/ /mkhas pas nyes 'di yang dag rig nas ni/ /spros pa thams cad yongs su spang bar bya/ /spros spyod dag ni gnod pa rnyed par sla/ /de lta bas na spros la gnas mi bya/ /gang la spros pa'am rtsod pa yod pa las/ /dpag tshad brgya yi pha rol 'gro ba mchog /gang na nyon mongs yod pa de dag tu/ /yud tsam zhig kyang gnas shing 'dug mi bya/ /rab byung don 'dod yon tan 'dod pa rnams/ /sdang ba'i sems kyis rtsod par ma byed cig /khyed la zhing med zhing las tshong bya med/ /gang la nor phyir 'di dag 'byung ba spros/ /khyed la chung ma bu dang bu mo med/ /khyim dang gnyen gyi tshogs kyang yod ma yin/ /bran pho bran mo med cing dbang phyug med/ /rab tu byung nas rtsod par ma byed cig /zhi zhing rab tu zhi bas bsten pa yi/ /ngur smrig gos rnams dang bas blangs nas ni/ /zhi zhing rab zhi nye bar zhi bar byos/ /spros pa rnam par spongs la bzod pa skyed/ /mi bzang sems ni sbrul dug 'dra ba srungs/ /spros la spyod pa sems can dmyal ba dang / /dud 'gro gshin rje'i yul dang ring mi 'gyur/ /de lta bas na bzod dang brtson 'grus skyed/ /tshogs pa gzhig phyir spros par byed na ni/ /sdug bsngal gsod dang 'ching ba ci yang rung / /go ra brdeg dang bsdigs pa de dag ni/ /'jig rten 'di na gnas pa rnams la 'byung / /tshogs par gyur la nyes pa 'di dag dkon/ /tshogs gyur bag la nyal ba 'phel ba med/ /tshogs gyur rnams la dga' ba 'byung 'gyur na/ /mkhas pa su zhig tshogs pa skyed mi byed/ /glags tshol dag gis skyon rnams rnyed mi 'gyur/ /nams kyang 'khor rnams 82.170b phyed par mi 'gyur te/ /de yi mdza' bshes dag kyang rgyun du 'byung / /spros pa spangs pa'i phan yon de dag yin/ /theg pa'i stobs 'di yis ni dag 'gyur zhing / /las kyi sgrib pa ma lus byang nas ni/ /stobs dang bcas shing bzhon bcas bdud thul cig /brtan pa gang yin des ni bzod pa bskyed/ /spros pa rgyas pa la ni skyon mang chags/ /nyes pa de dag ngas ni bstan mi nus/ /rtag tu spros med bsngags pa mtha' yas 'gyur/ /su zhig don gnyer des ni bzod pa skyed/ /de nas bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das kun nas nyon mongs pa de tsam du gling ba ni de bzhin gshegs pas legs par gsungs te ngo mtshar lags so/ /bcom ldan 'das ci lnga brgya pa tha ma la byang chub sems dpa' rnams kyis tshig gi mchog 'di lta bu 'di dag thos na skyo bar 'gyur zhing kun nas nyon mongs pa'i spyod pa yang spong bar 'gyur lags sam ba de dagbka' stsal pa/ byams pa lnga brgya pa tha ma la byang chub sems dpa'i theg pa pa'i gang zag rnams tshig gi mchog 'di lta bu 'di dag thos na skyo bar 'gyur zhing kun nas nyon mongs pa'i spyod pa yang spong bar 'gyur ba 'byung ba de dag mi nyung ngo / /byams pa gang sems kyi rgyud khengs par 'gyur zhing gus pa med pa dang / mngon ba'i nga rgyal la gnas pa dang / gcig la gcig the tshom za ba mang ba dag ni phal che ste/ de dag ni de bzhin gshegs pas gsungs pa'i mdo sde zab mo bstan pa'i yon tan dang phan yon zab pa dag lung nod par mi byed/ kha ton du mi byed/ 'chang bar mi byed/ kun chub par mi byed de/ de dag gi las kyi sgrib pa shas che bas yon tan de dag dang phan yon de dag 'byung bar mi 'gyur ro/ /de dag dad pa med pa des mdo sde de dag la the tshom za bar 'gyur te/ phyis kyang lung nod par mi byed/ 'chang bar mi byed/ kun chub par mi byed de/ de dag gi drung du bdud sdig can dge slong gi cha lugs su 82.171a 'dug nas 'di skad du mdo sde 'di dag ni rang bzor byas pa yin te/ 'di dag ni de bzhin gshegs pas gsungs pa ma yin no/ /de ci'i phyir zhe na/ mdo sde 'di dag las yon tan dang phan yon bshad pa gang yin pa de dag khyed kyi 'di las mi 'byung zhing med pa'i phyir ro zhes mos pa zlog par byed do/ /de dag de ltar mos pa zlog pas mdo sde zab mo dag mi 'dod cing the tshom du 'gyur te/ lung nod par mi byed/ kha ton du mi byed de/ mi blun po de dag gis yon tan dang phan yon de dag thos na 'di ltar chos spong bar 'gyur ba'i las kyi rnam par smin pa ni sbyang bar mi nus so snyam du mi sems so/ /de nas bcom ldan 'das la byang chub sems dpa' sems dpa' chen po byams pas 'di skad ces gsol to/ /bcom ldan 'das de bzhin gshegs pa tshe dpag med kyi yon tan de bzhin gshegs pas gsungs pa gang lags pa 'di dag las gang gis sems bskyed pa gang yang rung ba zhig yid la bgyid cing / de bzhin gshegs pa tshe dpag med yid la bgyid pa de sangs rgyas kyi zhing der skye bar 'gyur na/ bcom ldan 'das sems bskyed pa de dag gang lags/ de skad ces gsol pa dang / bcom ldan 'das kyis byang chub sems dpa' sems dpa' chen po byams pa la 'di skad ces bka' stsal to/ /byams pa sems bskyed pa gang dag gis de bzhin gshegs pa tshe dpag med kyi sangs rgyas kyi zhing 'jig rten gyi khams bde ba can du skye bar 'gyur bar byed pa de dag ni byis pa'i sems bskyed pa ma yin/ skyes bu dam pa ma yin pa'i sems bskyed pa ma yin/ kun nas nyon mongs pa'i sems bskyed pa ma yin te/ byams pa sems bskyed pa ni bcu po 'di dag yin no/ / 82.171b bcu gang zhe na/ byams pa 'di lta ste/ sems can thams cad kyi spyod pa la zhe 'gras pas ni de bzhin gshegs pa tshe dpag med kyi sangs rgyas kyi zhing du skye bar mi nus te/ sems can thams cad la byams pa'i sems bskyed pa dang / 'tshe ba yongs su spangs te/ sems can thams cad la snying rje ba'i sems bskyed pa dang / lus dang srog la mi lta bar dam pa'i chos bsrung ba'i sems bskyed pa dang / zab mo'i bzod pa la nges par gyur bas dam pa'i chos la mngon par zhen pa'i sems bskyed pa dang / rnyed pa dang bkur stis ma gos pas bsam pa yongs su dag pa'i sems bskyed pa dang / brjed pa med pas thams cad mkhyen pa nyid la rin po cher sems bskyed pa dang / zhum pa med pas sems can thams cad la bla ma bzhin du gus pa'i sems bskyed pa dang / byang chub kyi yan lag la nges pas nyi tshe ba'i bsam gtan gyi ro myang bar mi bya ba'i sems bskyed pa dang / ma 'dres pas dge ba'i rtsa ba rnam pa sna tshogs kyi sems bskyed pa dang / mtshan ma yongs su spangs te/ sangs rgyas rjes su dran pa bsgom pa'i sems bskyed pa ste/ byams pa sems bskyed pa bcu po ni de dag yin te/ sems bskyed pa bcu po de dag las sems bskyed pa gang yang rung ba'i sems bskyed pa gang yin pa de ni sems bskyed pa de dag dang ldan na sangs rgyas kyi zhing der skye bar mi 'gyur ba de ni gnas med do/ /de nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das lhag pa'i bsam pa bskul ba'i chos kyi rnam grangs 'di de tsam du bsam gyis mi khyab pa ni ngo mtshar lags so/ /de skad ces gsol pa dang / bcom ldan 'das kyi tshe dang ldan pa kun dga' bo la legs so zhes bya ba byin te/ kun dga' bo legs so 82.172a legs so/ /kun dga' bo de'i phyir khyod kyis lhag pa'i bsam pa bskul ba zhes bya ba'i chos kyi rnam grangs 'di zung shig /bcom ldan 'das kyis de skad ces bka' stsal nas/ byang chub sems dpa' sems dpa' chen po byams pa dang / byang chub sems dpa' de dag dang / tshe dang ldan pa kun dga' bo dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa dkon mchog brtsegs pa chen po'i chos kyi rnam grangs le'u stong phrag brgya pa las lhag pa'i bsam pa bskul ba'i le'u zhes bya ste nyi shu lnga pa rdzogs so// //rgya gar gyi mkhan po dzi na mi tra dang / su ren dra bo d+hi dang / zhu chen gyi lo ts+tsha ba ban de ye shes sde la sogs pas sgyur cing zhus te gtan la phab pa/ |