//@#/ / rgya gar skad du/ mai tri b+hA ba na sU tra/ bod skad du/ byams pa bsgom pa'i mdo/ 'phags pa dkon mchog gsum la gus pas phyag 'tshal lo/[ ]/'di skad bdag gis thos pa dus gcig na/ bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /de nas bcom ldan 'das kyis dge slong rnams bos nas/ dge slong dag btsun pa bcom ldan 'das kyi spyan sngar so sor 'ongs pa la bcom ldan 'das kyis kyang 'di skad ces bka' stsal to/ /sems rnam par grol bar bya ba'i phyir byams pa bsgom par bya'o/ / 39.270a bsam pa brtan par bya ba'i phyir ro/ /mang du byed pa dang / zhi bar byed pa dang / gzhir byed pa dang / rjes su gnas par byed pa dang / 'dris par bya bdang / shin du brtson par bya'o/ /phan yon bcu gcig po so sor bshad par bya'o/ /bcu gcig gang zhe na/[ ]bde bar nyal ba dang / bde bar sad pa dang / sdig pa'i rmi lam mi mthong ba dang / de la mi rnams dga' ba dang / mi ma yin rnams dga' ba dang /[ ]lha rnams kyis bsrung ba dang / me dang dug dang / mtshon rnams kyis gnod par mi 'gyur ro/ /dus rtag tu sems shin du dga' bar gnas pa dang /[ ]bzhin gyi mdangs rab tu gsal ba dang / sems gsal bar 'chi ba dang /[ ]ches cher bag yod par byas pas tshangs pa'i 'jig rten du skye ba'o/ /dge slong dag byams pa'i sems dang mi 'bral bar rig par bya'o/ /bsam pas brten par bya'o/ /bsgom par bya ba dang / mang du byed pa dang / zhi bar byed pa dang / gzhir byed pa dang / rjes su gnas par byed pa dang /[ ]'dris par bya ba dang / shin du brtson par bya'o/ /bcu gcig po rnams kyi phan yon rnams so sor bshad zin to/ /dge slong dag gzhan yang byams pa'i phan yon rnams bshad par bya'o/ /kha zas du ma thob pa dang / /rang gi yul du nye bar gnas/ /mang po rnams ni 'tsho ba ni/ /gang gis byams pa ma spangs na'o/ /grong rdal gang gang 'gro ba dang / /grong khyer rgyal po'i pho brang dang / /thams cad du ni mchod par 'gyur/ /gang gis byams pa ma spangs na'o/ /de la chom rkun mi 'byung zhing / /de la rgyal po gnod mi byed/ /sems can thams cad bshes su 'gyur/ /gang gis byams pa ma spangs na'o/ /khro med rang yul bde bar gnas/ /skye ba'i 'dun sar smod med dga'/ /mchog gi gnyen dang ldan par 'gyur/ /gang gis byams pa ma spangs na'o/ /mchod na mchod pa thob par 'gyur/ /'dud na so sor 'dud par byed/ / 39.270b snyan dang grags pa thob par 'gyur/ /gang gis byams pa ma spangs na'o/ /bkur sti byas na bkur sti thob/ /gus par byas na gus pa 'thob/ /kha dog gzi brjid ldan par 'gyur/ /gang gis byams pa ma spangs na'o/ /me ltar rab tu 'bar ba yi/[ ]/lha yi lus dang 'dra bar 'gyur/ /dpal dang bral bar mi 'gyur ro/ /gang gis byams pa ma spangs na'o/ /phyugs rnams mang po thob pa dang / /zhing la 'bru mang skye ba dang / /bu dang bu mo mang bar 'gyur/ /gang gis byams pa ma spangs na'o/ /ri las thur du lhung ba dang / /shing las 'og tu lhung ba na/ /ltung bar mi 'gyur gnas sa thob/ /gang gis byams pa ma spangs na'o/ /ba Ta'i shing steng 'dzegs gyur na/ /rlung gis bskyod par mi nus bzhin/ /dgra bos cung zad bya mi nus/ /gang gis byams pa ma spangs na'o/ /bcom ldan 'das kyis de skad ces bka' stsal pa dang / dge slong de dag bcom ldan 'das kyis gsungs pa la mngon par bstod do/ /byams pa bsgom pa'i mdo rdzogs s+ho//[ ]// |