// rgya gar skad du/ mai tri sU tra/ bod skad du/ byams pa'i mdo/ 'phags pa dkon mchog gsum la gus pas phyag 'tshal lo/ /ston pa dus gcig na ser skya'i gzhi dang / n+ya gro d+ha'i kun dga' ra ba dang / chu klung ro hi ni'i 'gram na bzhugs so/ /de nas tshe dang ldan pa shA ri'i bus ma 'ongs pa'i rgyal ba de'i phyir bcom ldan 'das la zhus pa/ khyed kyi rjes bstan blo brtan ni/ /ci 'dra'i sangs rgyas su 'gyur bar/ /spyan ldan yongs su rgyas par ni/ /bdag ni rab tu nyan par 'dod/ /gnas brtan zhus pa gsan nas ni/ /bcom ldan 'das kyis 'di skad gsungs/ /bsod nams phung po mi nyung ba'i/ /grags pa chen po mi pham pa'i/ /yon tan thams cad brjod mi nus/ /mdor bsdus nas ni legs bshad pa/ /phyogs gcig tsam ni bstan par bya/ /shA ri'i bu nyon nga yi tshig /'di ni bskal pa bzang po ste/ /skye ba bye ba'i lo ru ni/ /byams pa zhes pa'i ming nyid kyis/ /rkang gnyis mchog gi sangs rgyas so/ /ji ltar nga 'das nas dang por dus lnga 'byung ste/ 'bras bu'i bar gyi dus dang / bsgrub pa'i bar gyi dus dang / lung gi bar gyi dus dang / 39.263a rtags tsam gyi bar gyi dus dang / sku gdung gi bar gyi dus so/ /de la 'bras bu'i bar gyi dus ni/ sangs rgyas yongs su mya ngan las 'das nas/[ ]lo stong phrag gcig gi nang du rtogs pa bskyed par nus so/ /de song zhing song ba'i dus so/ /phyir mi 'ong ba rnams dang / lan cig phyir 'ong ba dang /[ ]rgyun du zhugs pa'o/ /de rnams yod pa na 'bras bu'i bar gyi dus med ces brjod par mi bya'o/ /lhag ma ni rgyun du zhugs pa ste/ de 'das nas 'bras bu'i bar gyi dus nub pa zhes bya'o/ /'di ni 'bras bu'i bar gyi dus nub pa zhes bya ba yin no/ /sgrub pa'i bar gyi dus zhes bya ba ni/ zhi gnas dang lhag mthong gi lam gyi 'bras bu bslab par mi nus par/ pham pa bzhi po bsrung bar nus pa tsam mo/ /song zhing song ba'i dus su/ pham pa bzhi po nyid bsrung ba tsam mo/ /pham pa bzhi po srung bar byed pa ni/ dge slong rnams stong phrag gcig gi nang na brgya tsam yod na yang sgrub pa'i bar gyi dus nub pa zhes mi bya'o/ /brgya'i nang na dge slong gcig tsam yod pa las sdom pa zhig pa dang / shi ba na sgrub pa'i bar gyi dus nub pa zhes bya'o/ /'di ni sgrub pa'i bar gyi dus nub pa zhes bya'o/ /lung gi bar gyi dus nub pa zhes bya ba ni/ sangs rgyas kyi gsung rab sde snod gsum po'i don mi go zhing sgra tsam klog pa dang / po ti yod pa'i bar ni lung gi bar gyi dus yongs su rdzogs pa zhes bya'o/ /song zhing song ba'i dus su rtsod pa'i dus kyi rgyal po rnams chos ma yin pa byed par 'gyur ro/ /blon po la sogs pa rnams kyang chos ma yin pa byed par 'gyur te/ de nas yul 'khor rnams dang / ljongs rnams kyang de bzhin no/ /de rnams kyi chos ma yin pa'i rgyu yis lha rnams char legs par mi 'bebs so/ /'bru rnams legs par mi smin no/ /de rnams kyi 'bru ma smin pas dge slong gi dge 'dun la bza' ba ster mi nus so/ /dge slong rnams kyis kha zas ma rnyed pas slob ma dang yang slob rnams 39.263b 'dzin par mi nus so/ /song zhing song ba'i dus su lung gi bar gyi dus dman pa'o/ /dang po ni rab tu byed pa chen po nyams par 'gyur ro/ /de nub nas ya ma ka~M gi tshigs su bcad pa dang / gzhi dang gang zag dang gdags pa dang / sku gdung gi gtam dang /[ ]rnam 'byed dang / chos bsdu ba nub par 'gyur ba'o/ /chos mngon pa'i sde snod nub nas/ mdo sde'i sde snod nub par 'gyur ro/ /de nas a~M ga phyi ma'i sde pa nub par 'gyur ro/ /a~M ga phyi ma'i sde pa nub nas/ yang dag par ldan pa'i sde pa nub par 'gyur ro/ /bar ma'i sde pa dang ring po'i sde pa nub par 'gyur ro/ /ring po'i sde pa nub nas 'dul ba dang bcas pa'i skyes rabs gnas so/ /'dul ba'i sde snod la yang ngo tsha dang ldan pa tsam 'dzin no/ /song zhing song ba'i dus su skyes pa'i rabs tsam yang 'dzin par mi nus so/ /dang po thams cad sgrol gyi skyes pa'i rabs nub par 'gyur ro/ /tha mar lo ma med pa'i skyes pa'i rabs nub par 'gyur ro/ /skyes rabs rnams nub nas 'dul ba'i sde snod 'ba' shig 'dzin no/ /song zhing song ba'i dus su/ mi gang zhig gis sangs rgyas kyi gsung rab kyi tshigs su bcad pa gcig tsam dar b.rabyed na/ lung gi bar gyi dus nub pa med do/ /gang zhig rgyal po chos la dad pa'i dus su glang po che'i rgyab du gser gyi za ma tog gcig bzhag ste/[ ]nor stong phrag gcig de ru bcug nas sangs rgyas kyis gsungs pa'i tshigs su bcad pa gcig gang gis shes pa des nor stong phrag de long zhes grong khyer gyi dbus su rol mo'i sgra lan gsum bsgrags nas de skad brjod de/ de len par ma nus pa na nor stong phrag de rgyal po'i mdzod du yang 'jog go/ /de'i dus ni lung gi bar gyi dus nub pa'i dus su 'gyur ro/ /'di ni lung gi bar gyi dus nub pa'i dus zhes bya ba yin no/ /song zhing song ba'i dus su/ chos gos 'dzin pa dang / lhung bzed 'dzin pa dang / gcer bu pa'i dge sbyong dang 'dra bar 39.264a chag tshang ku ba'i snod/ slong ba'i snod dang / lag pa'i rtse mo la 'phyang ba'i tshul dang 'dra ba dang / dra ba'i nang du khyer nas 'gro ba'o/ /song zhing song ba'i dus su/ gos ngur smrig gis bdag la ci byed/ cung zad chos su byas pa'i dum bu lag pa 'am/ mgrin pa 'am/ rna ba rnams su 'am/[ ]skra rnams la 'gebs so/ /bag ma len pa dang / so nam dang / tshong la sogs pa byas nas/ 'tsho ba'i phyir du spyod cing 'gro bar byed do/ /de'i tshe yon ster cing dge 'dun gyi ched du de thams cad ster bar byed de/ de'i tshe ngas kun dga' bo dge 'dun gyi yon gyi 'bras bu ni grangs med par bshad do/ /song zhing song ba'i dus su/ 'di ci bdag gi don du ngur smrig gi dum bu btogs nas dgon pa 'am nags tshal du skyur bar byed do/ /de rnams kyi dus su rtags tsam 'dzin pa'i bar gyi dus nub par 'gyur ro/ /'di ni rtags tsam 'dzin pa'i bar gyi dus nub pa'i dus zhes bya ba yin no/ /de nas yang dag par rdzogs pa'i sangs rgyas kyi bstan pa lo stong phrag lnga pa la rnyed pa dang bkur sti la sogs pa'i rnyed pa chung ngo / /sku gdung rnams rnyed bkur byed pa'i gnas su 'gro bar byed do/ /song zhing song ba'i dus su/ gnas cad du bkur sti dang sti stang ma thob nas/ bstan pa tha ma'i dus su klu'i yul dang /[ ]lha'i 'jig rten dang / tshangs pa'i 'jig rten gyi gnas thams cad nas 'ongs nas/ sku gdung thams cad byang chub kyi snying po kho nar bsdus te sangs rgyas kyi sku ru gyur nas/ gshin rje rdzu 'phrul du ma ston pa dang 'dra bar gzhan la ston no/ /de'i gnas su sems can mir gyur pa'i ming yang med do/ /stong phrag bcu'i lha'i 'jig rten gyi khor yug gi bar thams cad 'dus nas/ de ring stobs bcu pa yongs su mya ngan las 'da' bar byed do/ /deng nas bzung nas mun nag tu gyur to/ /zhes ngu bar byed do/ /sku gdung thams cad la me'i khams langs nas de'i sku lus lhag ma med par sreg par byed do/ /'di ni sku gdung gi bar gyi dus nub pa zhes bya ba yin no/ / 39.264b de nas lo stong phrag lnga po 'dir bstan pa nub par gyur nas 'jig rten pa rnams la mi dge ba lhag par 'phel bar byed do/ /zhes bya ba'i don no/ /mi rnams la ngo tsha dang khrel med par 'gyur zhing ma dang / bu mo dang / sring mo la sogs pa'i 'du shes med par 'gyur ro/ /phag dang ce spyang la sogs pa dang 'dra bar ngo tsha med par 'gyur ro/ /de nas mi dge ba la sbyor zhing tshe bri nas tshe lo bcu par 'gyur ro/[ ]/ lo lnga pa'i khye'u la lo lnga pa'i bu mo bag mar len no/ /yang lo lnga'i nang nyid du bu dang bu mo dang tsha bo dang tsha mo 'ang 'byung ngo / /de'i dus su mtshon gyi bskal pa bar ma 'byung bar 'gyur ro/ /bskal pa bar ma gsum ste/ mu ge'i bskal pa bar ma dang / nad kyi bskal pa bar ma dang / mtshon gyi bskal pa bar ma'o/ /de la gang gi tshe 'jig rten gyi sems can rnams la 'dod pa lhag par skyes nas mu ge'i bskal pa bar mar 'gyur ro/ /gang gi tshe gti mug lhag par che ste/ nad kyi bskal pa bar mar 'gyur ro/ /gang gi tshe skyon du gyur pa de'i dus su mtshon gyi bskal pa bar mar 'gyur ro/ /mu ge'i bskal pa bar mas sems can rnams brlag par byas nas yi dgas su skye bar 'gyur ro/ /nad kyi bskal pa bar mas sems can rnams brlag par byas nas dud 'gror skye bar byed do/ /mtshon gyi bskal pa bar mas sems can rnams brlag par byas nas dmyal bar skye bar 'gyur ro/ /de'i tshe mi rnams phan tshun du ri dgas kyi 'du shes dang bcas pa thob par gyur nas mtshon so gcig pa dang / mtshon so gnyis pa dang / spu gri'i so dang 'dra ba'i mtshon cha rnams bzung nas phan tshun gsod par byed do/ /de rnams su mkhas pa gang zhig 39.265a des 'joms par thos nas ri'i sul la sogs par zhag bdun gyi kha zas bzung ste yib nas sdod do/ /de rnams su ma yib pa'i sems can lhag ma rnams phan tshun du brdeg cing gsod do/ /sa gzhi thams cad sha dang khrag tu 'gyur ro/ /de'i dus su sprin chen po 'dus nas char 'bebs par byed do/ /lha yis char bab pa'i rjes su dri zhim pa'i char 'bab cing 'bab par byed do/ /de rnams kyi dus su gnas thams cad yid du 'ong bar 'gyur ro/ /gnas thams cad dag par gyur nas 'bras shun pa can gyi char 'bab cing 'bab par 'gyur ro/ /'bras shun pa can gyi char phab pa'i rjes su 'bras shun pa med pa'i char 'bab cing 'bab par 'gyur ro/ /de'i rjes su gos dang rgyan gyi char 'bab cing 'bab par byed do/ /de'i mthar pus mo nub tsam gyi tshad dang mnyam pa'i rin po che sna bdun gyi char 'bab cing 'bab par byed do/ /de'i phyir bcom ldan 'das kyis bka' stsal pa/ dri zhim pa yi char 'bab cing / /shun can shun med 'bras kyi char/ /gos dang rgyan gyi char 'bab pa/ /de ltar dga' tshal mdzes pa bzhin/ /rin chen sna bdun ma lus pa'i/ /de yi gnas su char 'bab po/ /gnas kun gang bar byas nas ni/ /de tshe dga' tshal mdzes pa bzhin/ /de rnams 'das nas mi yib pa rnams 'thon te/ de rnams 'thon nas phan tshun du 'khyud pa dang / ngu ba dang / tshul khrims lnga las sogs pa'i dge ba'i chos rnams rjes su dran par byas nas rdzogs par rtsom mo/[ ]/de nas tshe lo bcu pa'i mi rnams las skyes pa'i bu dang bu mo tshe lo nyi shu par 'phel lo/[ ]/de nas mi rnams la lhag par chos 'phel bas go rims bzhin du tshe 'phel te tshe lo grangs med par 'gyur ro/ /de'i tshe sems can rnams la rgas pa dang 'chi ba mi mthong bar 'gyur ro/ /de ltar sems can gzhan yang bag yod par 'gyur te/ dmyal ba'i sdug bsngal zhes bya ba ni ci zhes sems can rnams sems 39.265b pa med do/ /de nas tshe lo grangs med pa rnams 'bri bar byed do/ /sngar bzhin du bri nas tshe lo brgyad khri par 'gyur ro/ /de'i dus su 'dzam bu'i gling thams cad du lha'i bu mo'i skal ba dang 'dra bar bud med dang / de ltar skyes pa dang bcas pas gang bar 'gyur ro/ /lha'i char pa zla ba phyed du 'bab pa dang / zhag bcu dang / zhag lnga dang / nyin zhag phyed du sa'i bcud 'phel bar 'gyur ro/[ ]/de'i tshe sa gzhi thams cad kyi cha mnyam pa dang / tsher ma dang shing rad rod med cing / grong khyer la phyogs bzhi'i sgo dang ldan pa dang / grong khyer gyi dbus su dpag bsam gyi shing skye bar 'gyur ro/ /de'i phyir gsungs pa/ de nas de yi grong khyer ni/ /sna tshogs tshong 'dus so so dang / /legs par rab byung rdzing bu dang / /dga' zhing rab tu gnas pa dang / /dri ma med pa'i chu chen po/ /shin du grang zhing dri bzang ldan/ /rnyog med mnyam zhing tshim pa dang / /de nas rnyog ma yang dag gnas/ /pad ma ud pal gyis gang zhing / /rba rlabs dang ni rnyog pa med/ /ta la'i phreng ba bdun gnas zhing / /rin chen rang bzhin gyis khyebs pa/ /lcags ri bdun dang ldan pa dang / /grong khyer thams cad 'brel ba dang / /rtswa can rgyal po'i pho brang ni/ /de tshe tog dang ldan par 'gyur/ /grong khyer phyogs kyi sgo bzhi ru/ /dpag bsam shing ni skye bar 'gyur/ /sngon po ser po dmar po dang / /dkar po rab tu gsal ba'i 'od/ /lha yi gos ni skye bar 'gyur/ /lha yi drin gyis rgyan dang ni/ /longs spyod nye bar spyod pa rnams/ /thams cad steng nas 'phyang ba yin/ /de nas grong khyer dbus su ni/ /khang dmig bzhi dang ldan pa yin/ /bsod nams las kyis grub pa ni/ /dpag bsam shing gi steng nas 'byung / /ras bal ras ni bzang po dang / /ko ma u dum ba ra'i ras/ /bsod nams las kyis grub pa ni/ /dpag bsam shing gi steng nas 'byung / /mri daM ga ni lag pas rdung / /mu rardza dang a lam b+ha/ /bsod nams las las byung ba ni/ /dpag bsam shing gi steng nas 'byung / / 39.266a dpung rgyan dag gi rgyan dang ni/ /dpung rgyan dang ni do shal dang / /rin chen rang bzhin mgul pa'i rgyan/ /bsod nams las las byung ba ni/ /dpag bsam shing gi steng nas 'byung / /dpral ba kha yi rgyan dang ni/ /nor bu 'og pag lus la ldan/ /bsod nams las las byung ba ni/ /dpag bsam shing gi steng nas 'byung / /gzhan yang rnam pa sna tshogs pa'i/ /rgyan rnams kun gyis rnam par brgyan/ /bsod nams las las grub pa ni/ /dpag bsam shing gi steng nas 'byung / /ma rmos ma btab rang byung ba'i/ /bsod nams las kyis skyes pa ni/ /ma zhig spun med dri ma med/ /'bras kyi 'bras bu dri zhim ldan/ /'bras rnams bed par btsos pa na/ /mi rnams yongs su longs spyod do/ /de yi 'bras la zal zel med/ /stong phrag brgya ni 'byung ba yin/ /'bras kyi myu gu skye ba ni/ /thams cad du ni khyab par gnas/ /'bras snye re re skye ba la/ /phul ni re re 'byung bar 'gyur/ /mi rnams kyi ni 'bras kyi dri/ /thams cad du ni longs spyod do/ /stong phrag gnyis kyi shing rta'i tshad/ /shing rta brgya yi tshad tsam dang / /shing rta sum bcu rtsa dgu dang / /bre chen bcu drug pa yi khal/ /de nas yang ni ku ba gnyis/ /de lta bus 'bras 'byung ngo / /sa bon gcig la skye ba ni/ /skye bo rnams kyi bsod nams las/ /gang zhig tog dang ldan par gnas/ /dung gi rgyal po mi yi bdag /de yi tshe na de ltar 'gyur/ /yon tan gyi ni dpung rgyan 'dzin/ /bsam pa thams cad yongs su rdzogs/ /bzhin legs rna ba'i rgyan dang ldan/ /ha ri tsan dan lus la byugs/ /ga shi'i gos ni mchog tu gyon/ /nor ni rgya cher mang ba deng / /ting cag pi wang gis sad byed/ /rtag tu shin du skyid pa dang / /de yi lus dang sems bde zhing / /dpag tshad stong phrag bcu ru ni/ /'dzam bu gling ni gnas pa yin/ /tsher ma med cing shing med pa/ /mnyam zhing 'jam la sngo bsang gnas/ /de la nad ni gsum 'byung ste/ /'dod dang zhen dang rgas pa'o/ /lnga brgya'i lo lon bud med ni/ /rgan dang gzhon pa 39.266b bag mar len/ /gtan du gnyis ka bde ba yin/ /rtsod pa med par 'gyur ba yin/ /'bras bu lo tog phun sum tshogs/ /'khril shing gel pa shing gi tshal/ /rtswa ni sor bzhi pa ru skye/ /shin du 'jam pa'i shing bal 'dra/ /ha cang mi grang mi dro zhing / /char ni mnyam par 'bab pa dang / /rlung ni shin du chung ba dang / /dus tshod mnyam par ldan pa dang / /chu klung tA la mi dman zhing / /de dang de yi sa yi cha/ /sa la rdo ni chung ldan la/ /sran nag sran chung tshad tsam mo/ /mu tig 'dra bas yongs su gang / /rgyan rnams bskyed mos tshal dang 'dra/ /dga' zhing yid du 'ong bar 'gyur/ /grong dang grong rdal mang pos gang / /de dang de ni nye ba ru/ /'od ma smyug phran tshal bzhin no/ /bya gag 'phur ba tsam nyid do/ /dge zhing rgyas la rdzu 'phrul ldan/ /lugs la nye bar 'tshe ba med/ /rtag tu rtse zhing dga' ba dang / /gcig tu bde bas tshim pa dang / /rgyu skar bde bas bskor ba dang / /dga' zhing tshim la rab tu dga'/ /bza' dang btung ba mang po za/ /sha chang chu bzhin mang ba ni/ /lha yi pho brang cang lo bzhin/ /khang bzang rgyal po'i pho brang ni/ /nyams dga' sgra mi snyan bzhin no/ /'dzam bu'i gling yang de bzhin gyur/ /de'i dus su byang chub sems dpa' byams pa 'di ni bskal pa grangs med pa bcu drug dang bskal pa 'bum phrag gcig lhag tsam du sbyin pa'i pha rol du phyin pa dang / pha rol du phyin pa sum bcu rdzogs par byas nas thams cad sgrol bzhin du skye ba lhag ma'i lus sbyin pa chen por byas shing / pha rol du phyin pa yongs su rdzogs par byas te/ de'i lus zhig nas dga' ldan du skye ba rdzogs par byas nas/ sangs rgyas byon par 'gyur ro zhes sgrogs so/ /stong phrag bcu'i 'khor yug gi lha rnams ni sangs rgyas byon par 'gyur ro zhes dam 'cha'o/ /phyogs lngar gzigs te dga' ldan gyi lha'i tshogs rnams kyi 'khor gyis bskor la/ dga' ldan nas byon te/ tog ldan zhes bya ba'i rgyal po'i pho brang du/ dung gi rgyal po'i 39.267a tshangs bzang mdun na 'don bram ze'i rigs kyi tshangs ldan ma'i rum du zhugs te/ 'jig rten gyi khams stong phrag bcu g.yos so/ /zla ba bcu 'das nas drang srong lhung ba dang ri dgas rgyu ba'i gnas su ma'i rum nas 'thon te rim pa bzhin du shes pa dang ldan par gyur te/ bdag nyid kyi bsod nams kyi mthus sa gzhi btol nas steng du 'ongs te rin po che sna bdun gyi khang bzang bzhir rang nyid kyi lha bzhin du lha mo zla ba'i gdong can ma la sogs pa/ lha'i bu mo bzhin du bud med mang po de rnams dang 'grogs nas/ lo stong phrag gcig lha bzhin du rjes su myong bar gyur te/[ ]de'i nyin par rab tu byung ba'i gzugs gcig mthong nas gser gyi gzeb la mi dga' ba seng ge'i rgyal po bzhin du dpal 'byor ma lus pa rdzogs pa rin po che'i khang bzang rnams la shin du mi dga' bar gyur nas nges par 'byung ba'i 'dod pa skyes so/ /thams cad stong phrag bcu'i khor yug gi lha rnams lha'i me tog la sogs pa lag pas blangs nas 'jig rten gyi 'khor lo 'di gcig tu 'dus te/ dung gi rgyal po la sogs pa'i skye bo chen pos bzung nas dri bzang dang phreng ba dang bdug spos la sogs pas khang bzang la bskor nas 'dug go/ /nam mkha'i lha rnams kyis lha'i me tog lag pas bzung nas legs so zhes bya ba'i sgra gcig tu 'byin par byed do/ /'og min gyi bar du thams cad sgra gcig tu byed cing gnas so/ /de'i dus su rin po che'i khang bzang rdza mkhan gyi 'khor lo ltar 'khor zhing nam mkha' la 'gro'o/ /zla ba nya ba la rgyu skar gyi phreng bas bskor ba bzhin no/ /byang chub sems dpa'i btsun mo chen mo la sogs pa nam mkha' la bzhud do/ /gang zhig sems dpa' chen po dang 'grogs nas 'gro ba'i sems kyis de rnams kyis rang rang gi nam mkha' mthong ste tshangs pa chen pos dpag tshad gsum gyi tshad dang mnyam pa'i gdugs dkar po 'dzin no/ /brgya byin lha'i rgyal pos dung la sogs pa 39.267b bzung nas 'bud do/ /de ltar dpal dang skal pa bzang po dang ldan pa'i lha dang mi'i tshogs kyis bskor nas khang bzang gi klu shing byang chub shing drung du gshegs so/ /de'i tshad ni khru brgya nyi shu yal ga'i bar/ /yal ga'i mtho tshad de dang mnyam/ /'khril nas steng nas 'og tu 'phyang / /rma bya'i gdugs bzhin mdzes pa'o/ /rtag tu rtse mor me tog gsal/ /lha yi dri bzang bsung ldan zhing / /ge sar phul lu gang tsam mo/ /me tog bzang po 'khor lo tsam/ /phyogs phyogs rlung gis 'khyer bar byed/ /dpag tshad bcu ru khyab pa'o/ /steng gi me tog 'og tu lhung / /byang chub snying por me tog brtsegs/ /de'i dus su nam mkha' la 'gro ba'i bya rnam pa sna tshogs pa'i tshogs kyis sgra snyan pas mchod de/ de ltar klu shing gi byang chub kyi shing drung du gshegs te nam mkha' la 'phyang zhing sa'i cha thams cad nyams dga' ba'i gnas su sdod do/ /de la zhag bdun du dpal gyi snying por dka' ba spyod do/ /tshangs pa chen pos blangs nas dngos po rnams bzung nas rab tu byung ngo / /ji snyed pa'i 'khor thams cad kyang rab tu byung ngo / /de nas gzhan yang stong phrag brgyad bcu rtsa bzhi yis/ /bram ze'i rig byed mchog shes shing / /byams pa rab tu byung bar gyur/ /de dang de ni rab tu byung / /de la rab tu byung nas zla ba'i gdong can gyi lha mos shin du mngar ba'i 'o thug phul lo/ /yongs su longs spyad nas srod kyi thun la byang chub kyi shing drung du sa mnyams nas skyil dkrung gis ma pham pa bzhugs so/ /shar gyi 'jig rten gyi khams kyi phyogs su gzigs shing bzhugs so/ /rim pa bzhin du dus la thams cad mkhyen pa'i ye shes so sor rtogs so/ /'di skad gsungs pa/ 'khor ba'i skye bo ma lus pa/ /dug med pa ni btsal ba'i phyir/ /dug med pa ni byed pa ni/ /yang yang skye ba sdug bsngal ba/ /khyim ni byed pa mthong bar 'gyur/ /khyim ni gzhan ni byed pa med/ /sdug 39.268a bsngal thams cad gzhig pa dang / /dug ldan khyim ni gzhig pa'o/ /sems kyi dug ni spong ba dang / /sred pa zad nas grol bar 'gyur/ /ched du brjod pa gsungs pa'o/ /byang chub kyi shing gi drung du zhag bzhi bcu rtsa dgu bzhugs nas tshangs pas gsol ba 'debs pa'i phyir/ chos kyi 'khor lo bskor ba'i ched du drang srong lhung ba'i gnas su gshegs pa dang / de nas der gshegs pa na/ zhabs ni bteg dang bzhag pa na/ /me tog pad ma skyes par gyur/ /'dab mnyam khru ni sum bcu pa/ /'dab chung khru ni nyi shu lnga/ /ge sar khru ni nyi shu pa/ /lte ba khru ni bcu drug pa/ /ge sar rnams ni khyab par gnas/ /pad ma mdzod spu thams cad du'o/ /stobs bcu pa'i 'od kyis nyin mor byed pa'i 'od zil gyis mnan no/ /nyin mo dang mtshan mo mi phyed par gyur to/ /de la srod dang tho rangs bya rnams skad sgrogs so/ /me tog kha zum pa dang bye bas mtshan mo dang nyin mor shes par byed do/ /gang dang gang du chos ston par byed pa de dang de ru chos kyi sgra sgrogs so/ /de'i phyir gsungs pa/[ ]'od dang 'od zer tshad rnams ni/ /dbyangs dang dbyangs kyi tshad tsam mo/ /gzi brjid gzi yi tshad rnams ni/ /bsod nams bsod nams kyi ni tshad/ /shes rab shes rab kyi ni tshad/ /grags pa grags pa yi ni tshad/ /kha dog kha dog gi ni tshad/ /chos ni chos rnams kyi ni tshad/ /de nas stong phrag brgyad bcu rtsa bzhi'i bram ze dang / bye ba phrag bcwa brgyad kyi tshangs pa rnams kyis bdud rtsi'i btung ba mthungs nas/ ji ltar bcom ldan 'das bsod nams kyi mthu yis rnam pa brgya phrag du ma'i 'od zer 'phro zhing / rnam pa brgya phrag du ma'i mtshan rdzogs pa mtshan sum bcu rtsa gnyis mchog dang ldan pa dpe byad bzang po brgyad bcu dang ldan pa brgya phrag du ma'i sku mdog rnam pa du ma'i ya mtshan dang ldan par gyur pa brgya phrag du ma'i 'od zer de'i sku las 'thon par gyur to/ /de ni kha dog sngon po 39.268b dang kha dog ser po dang / kha dog dmar po dang / kha dog dkar po dang / btsod kyi mdog lta bu'i 'od zer dang ldan pa'i sku mdog can no/ /de'i sku lus la byung ba ni shing ta la'i tshad tsam gyi 'od zer 'phro'o/ /dus dang dus ma yin pa dang / zung dang zung ma yin pa dang /[ ]phung po dang phung po ma yin pa ni/ bcom ldan 'das kyi sku lus la lan gsum bskor ba byas nas rgyang ring du 'gro ba dang thung du 'gro ba'o/ /bcom ldan 'das de'i sku lus ni mtho tshad du khru brgyad bcu rtsa brgyad par 'gyur ro/ /zhabs kyi 'og nas dpus mo'i bar du khru nyi shu rtsa gnyis so/ /pus mo nas lte ba'i bar du khru nyi shu rtsa gnyis so/ /lte ba nas sgrog rus kyi bar du khru nyi shu rtsa gnyis so/[ ]/sgrog rus nas spyi gtsug gi bar du khru nyi shu rtsa gnyis so/ /dpung pa gnyis kyi bar du khru nyi shu rtsa lnga'i tshad do/ /sgrog rus re re'i dkyus ni khru lnga lnga'o/ /snyan gnyis kyi rtse mo nas rtsa ba'i bar la khru bdun bdun no/ /spyan re re'i mchu ru khru lnga lnga'o/ /smin ma gnyis kyi kyus su khru lnga lnga'o/ /smin ma gnyis kyi dbus kyi bar zheng la khru lnga'o/ /shangs la khru bdun no/ /ya mchu ma mchu gnyis kyi mchu ru khru bcu bcu'o/ /ljags kyi zlums su khru lnga'o/ /gtsug tor la khru lnga'o/ /gser gyi me long dang 'dra ba'i zhal gyi dkyil 'khor la khru nyi shu rtsa lnga'o/ /mgul pa la khru lnga'o/ /phyag gnyis kyi ring du khru bzhi bcu rtsa bzhi pa yin no/ /de ni 'di bzhin du dpe med pa'i sangs rgyas kyi dpal mtha' yas pa'i sangs rgyas kyi rol pa'o/ /stong phrag bcu'i 'jig rten gyi khor yug thams cad kyi lha rnams dang / de'i rjes su mi rnams kyi nang du gnas su chos kyi 'khor lo bskor ro/ /chos ston pa'i gnas dang bye ba 'bum phrag gcig gi lha dang / mi'i 'ching ba grol ba dang / chos kyi dang po thob pa dang /[ ]chos kyi dang po ma thob pa rnams mtho ris su skye bar 'gyur ro/ /de ltar mchog dang ldan pa'i byams pa su zhig gis mi mthong / nga ni ma bsad pa dang / pha bsad pa dang / dge slong ma sun 39.269a phyung ba dang / dge 'dun gyi dbyen byas pa dang / mtshams med pa lnga'i las byas pa dang / mchod rten bshig pa dang /[ ]byang chub kyi shing bcad pa dang / byang chub sems dpa' bsad pa dang /[ ]dge 'dun gyi kha zas brlag par byas pa dang / shin du ser sna che ba dang /[ ]log par lta bar nges pa dang / 'phags pa'i gang zag la skur pa 'debs pa dang / gcer bu pa'i rigs te de rnams kyis mi mthong ngo / /tshigs bcad stong phrag gcig gis so sor brgyan pa 'di thams cad sgrol gyi skyes rabs chen po nyi ma gcig la skye bo rnams kyis bshad pa dang mnyan pa dang / mar me stong phrag gcig gam/ stong phrag gcig gi me tog phal pa 'am/ stong phrag gcig gi u pa la sngon po'i me tog gam/ mchod rten byed pa 'am/ sangs rgyas kyi sku gzugs byed pa 'am/ de la mchod pa byed pas ni byams pa sangs rgyas pa'i dus su/ de'i drung du dang po'i chos thob cing skye bar 'gyur ro/ /sems can lhag ma rnams kyis sbyin pa byin pa dang / tshul khrims bsrungs pa dang /[ ]gtsug lag khang sbyangs pa dang / byang chub kyi shing bskrun pa dang / mchod rten byas pa dang / mchod rten dang byang chub kyi shing la rim gro byas pa dang / bskyed mos tshal bskrun pa dang / zam pa btsugs pa dang / lam bcos pa dang / 'gron khang byas pa dang / khron pa byas pa dang / bstan pa'i bya ba byas pa dang / chos kyi gnas la byi dor byas pa dang / dri dang phreng ba la stsogs pas mchod par byed pa dang / gus par byas nas chos mnyan pa dang /[ ]kha zas tsam gyi sbyin pa dge 'dun la gtong ba dang / pha dang ma la rnyed bkur byed pa dang / rigs kyi gtso bo la rnyed bkur byed pa dang / gso sbyong la gnas pa la kha zas ster ba dang / glo bur ba'i btsun pa la sbyin pa ster ba dang / bsod snyoms pa la ster ba dang / stan 'bul ba'i skye bos yang dag par rdzogs pa'i sangs rgyas byams pa mthong bar 'gyur ro/ / 39.269b tha na me tog snyim pa gang tsam 'am/ mar me gcig tsam 'bul ba 'am/ gzhan bsod nams byed pa rnams la rjes su yi rang ba dang / lha 'am mi rnams kyi dge ba 'di rnams byed pa ni de'i dus su byon pa'i yang dag par rdzogs pa'i sangs rgyas byams pa mthong bar 'gyur ro/ /de la yang dag par rdzogs pa'i sangs rgyas byams pa mthong bar 'dod pa rnams kyis sbyin pa gtong ba dang / tshul khrims srung ba dang / gso sbyong gi las byed pa dang / sgom par byed pa dang / dge ba'i las kyi bag yod par gyur na gdon mi za bar mthong ngo / /gang zhig tshangs par spyad pa spyod/ /thub pa'i gsung rab thos pa dang / /de rnams 'khor ba las grol zhing / /bla med mchog gyur 'chi ba med/ /tshangs par spyad pa spyod byed cing / /mchod 'os rnams la ster ba dang / /gso sbyong rnams la gnas pa dang / /legs par byams pa bsgom par gyis/ /bag yod par ni 'gyur ba dang / /rtag tu bsod nams bya ba byed/ /dge ba 'di rnams byas pa yis/ /sdug bsngal mthar ni byed pa'o/ /bcom ldan 'das kyis de skad ces bka' stsal nas/ da ge slong de dag bcom ldan 'das kyis gsungs pa la mngon par bstod do/[ ]/byams pa'i mdo rdzogs s+ho//[ ] |