// rgya gar skad du/ ma hA sa ma ya sU tra/ bod skad du/ 'dus pa chen po'i mdo/ 'phags pa dkon mchog gsum la gus pas phyag 'tshal lo/ /'di skad bdag gis thos pa dus gcig na/ bcom ldan 'das shAkya'i yul ser skya'i gzhi'i tshal chen po na dge slong 39.259a gi dge 'dun chen po lnga brgya ste/ de thams cad kyang dgra bcom pa rnams dang lhan cig tu bzhugs so/ /'jig rten gyi khams bcu'i lha rnams de ma thag tu 'dus te/ bcom ldan 'das dang dge slong gi dge 'dun rnams blta ba'i phyir ro/ /de nas gnas gtsang ma'i ris kyi lha'i ris bzhi po rnams kyis 'di skad ces gsol to/ /'dir yang bcom ldan 'das kyis shAkya'i yul ser skya'i gzhi'i tshal chen po na dge slong gi dge 'dun chen po lnga brgya ste/ de thams cad kyang dgra bcom pa rnams dang lhan cig tu bzhugs so/ /'jig rten gyi khams bcu'i lha rnams de ma thag tu 'dus te/ bcom ldan 'das kyi dge slong gi dge 'dun rnams blta ba'i phyir ro/ /gang dag de bzhin du bcom ldan 'das ga la ba der de dag song ste song nas/[ ]bcom ldan 'das kyi thad du tshigs su bcad pa so sor brjod par bya'o/ /de nas lha de rnams kyis 'di lta ste skyes bu stobs dang ldan pa'i lag pa bskum pa las/ brkyang ba tsam dang brkyang ba las bskum pa de bzhin du gnas gtsang ma'i lha rnams mi snang bar gyur te bcom ldan 'das kyi thad du snang bar gyur to/[ ]/de nas lha de rnams kyis bcom ldan 'das la phyag byas nas phyogs gcig tu 'khod do/ /phyogs gcig tu 'khod nas yang lha de rnams kyis bcom ldan 'das kyi thad du tshigs su bcad pa 'di rnams gsol to/ /'dus pa chen po'i tshal 'di ru/ /lha yi tshogs rnams 'dus pa ste/ /chos 'di'i phyir du bdag 'ongs pa/ /dge 'dun mi pham 'dus pa blta/ /de nas lha gzhan rnams kyis bcom ldan 'das kyi thad du tshigs su bcad pa 'di gsol to/ /dge 'dun sems rnams dul ba dang / /rang gi sems ni drang por byas/ /kha lo sgyur bas drang por 'dzin/ /de bzhin mkhas pas dbang po bsrung / /de nas lha gzhan rnams kyis bcom ldan 'das kyi thad du tshigs su bcad pa 'di gsol to/ /khyim gyi 'ching ba bton pa dang / / 39.259b dbang po nas ni sems 'gro zhing / /dag cing dri med der 'gro ba/ /mig ldan glang po dul ba bzhin/ /de nas lha gzhan rnams kyis bcom ldan 'das kyi thad du tshigs su bcad pa 'di gsol to/ /gang zhig sangs rgyas skyabs 'gro ba/ /de ni ngan song 'gro mi 'gyur/[ ]/mi yi lus ni spangs nas su/ /lha yi lus ni yongs rdzogs 'gyur/ /de nas bcom ldan 'das kyis dge slong rnams bos te de ma thag tu dge slong dag 'jig rten gyi khams bcu'i lha rnams 'dus te de bzhin gshegs pa dge slong gi dge 'dun dang bcas pa blta ba'i phyir ro/ /dge slong gang de rnams su gyur pa 'das pa'i dgra bcom pa yang dag par rdzogs pa'i sangs rgyas de rnams bcom ldan 'das de tsam du gyur pa de bzhin du lha rnams 'dus par gyur to/ 'di lta ste/ bdag kyang dge slong dag de bzhin du 'dus par gyur to/[ ]/'di lta ste/[ ]bdag kyang 'di skad ces smra ste/ dge slong dag lha'i tshogs rnams kyi ming brjod par bya ste/ dge slong dag rab tu gsol bar byed pa zhes bya ba'i lha'i tshogs dang / dge slong dag lha'i tshogs ston par byed pa zhes bya ba'o/ /de thos nas legs par yid la zung shig dang ngas bshad par bya'o/ /de ltar btsun pa bcom ldan 'das la dge slong de rnams kyis so sor zhus nas/ bcom ldan 'das kyis 'di skad ces bka' stsal to/ /tshigs su bcad pa so sor bshad/ /gang du sa gzhi mthong gyur na/ /ri yi phug du gang gnas pa/ /de ru mnyam par 'jog par byed/ /sa gzhir seng ge 'jigs med bzhin/ /ba spu tsam yang g.yo ba med/ /sems ni dag cing dkar ba dang / /chu ni rab tu dngas bzhin du/ /lnga brgya po yis legs shes shing / /ser skya'i tshal gyi gnas mang po/ /de nas dge slong ston pas bos/ /bstan la dga' ba'i nyan thos rnams/ /lha yi tshogs rnams 'ongs nas ni/ /dge slong rnams kyis de shes bya/ / 39.260a lus ni gdung bar ma byed par/[ ]/sangs rgyas bstan pa thos pas so/ /de rnams ye shes snang bar 'gyur/ /mi ma yin rnams mthong 'gyur ba/ /gang zhig gis ni brgya mthong zhing / /stong dang bdun bcu mthong ba yin/ /brgya dang stong phrag gcig dang ni/ /mi ma yin rnams mthong bar 'gyur/ /gang zhig gis ni mtha' med mthong / /phyogs kun gang bar 'gyur ba mthong / /de rnams kyis ni rtogs pa dang / /spyan ldan rnam par dpyad nas ni/ /de phyir ston pa yis ni bos/ /bstan la dga' ba'i nyan thos kyis/ /lha yi tshogs rnams 'ongs nas ni/ /dge slong rnams kyis de shes bya/ /gang zhig la ni bdag bshad bya/ /go rims bzhin du mnyan par gyis/ /stong phrag bdun gyi gnod sbyin rnams/ /ser skya'i sa la gnas pa ni/ /rdzu 'phrul ldan zhing 'od dang ldan/ /kha dog dang ni grags par ldan/ /chos gtam bya phyir 'dir 'ongs te/ /zhi bas dge slong tshal du'o/ /stong phrag drug ni gangs can gyi/ /gnod sbyin kha dog sna tshogs lus/ /rdzu 'phrul ldan zhing 'od dang ldan/ /kha dog dang ni grags par ldan/ /chos gtam bya phyir 'dir 'ongs te/ /zhi ba dge slong tshal du'o/ /sna tshogs bshes gnyen lnga brgya po/ /gnod sbyin kha dog sna tshogs lus/ /rdzu 'phrul ldan zhing 'od dang ldan/ /kha dog dang ni grags par ldan/ /chos gtam bya phyir 'dir 'ongs te/[ ]/zhi bas dge slong tshal du'o/ /rgyal khab gnod sbyin chu srin ni/ /ngos yangs ri la gnas pa yin/ /stobs ldan 'bum phrag gcig po ni/ /gnod sbyin rnams kyi 'khor gyis bskor/ /rgyal khab gnod sbyin chu srin ni/ /zhi bas dge slong tshal du'o/ /shar gyi phyogs kyi rgyal po ni/ /ming ni yul 'khor srung zhes pa/ /dri za rnams kyi bdag po ste/ /rgyal po chen po grags chen ldan/ /de yi bu ni mang po rnams/ /ming ni gcig tu 39.260b thos pa ste/ /dbang po zhes bya stobs chen po/ /rdzu 'phrul ldan zhing 'od dang ldan/ /kha dog dang ni grags par ldan/[ ]/chos gtam bya phyir 'dir 'ongs te/ /zhi bas dge slong tshal du'o/ /lho yi phyogs kyi'ang rgyal po ni/ /ming ni 'phags skyes po zhes bya/ /grul bum rnams kyi bdag po ste/ /rgyal po chen po grags chen ldan/ /de yi bu ni mang po rnams/ /ming ni gcig tu thos pa ste/ /dbang po zhes bya stobs chen po/ /rdzu 'phrul ldan zhing 'od dang ldan/ /kha dog dang ni grags par ldan/ /chos gtam bya phyir 'dir 'ongs te/ /zhi bas dge slong tshal du'o/ /nub kyi phyogs kyi rgyal po ni/ /ming ni mig mi bzang zhes grags/ /klu rnams kyi ni bdag po ste/ /rgyal po chen po grags chen ldan/ /de yi bu ni mang po rnams/ /ming ni gcig tu thos pa ste/ /dbang po zhes bya stobs dang ldan/ /rdzu 'phrul ldan zhing stobs dang ldan/ /kha dog dang ni grags par ldan/ /chos gtam bya phyir 'dir 'ongs te/ /zhi bas dge slong tshal du'o/ /byang gi phyogs kyi rgyal po ni/[ ]/de ming lus ngan po zhes grags/ /gnod sbyin rnams kyi bdag po ste/ /rgyal po chen po grags chen ldan/ /de yi bu ni mang po rnams/ /ming ni gcig tu thos pa ste/ /dbang po zhes bya stobs chen po/ /rdzu 'phrul ldan zhing 'od dang ldan/ /kha dog dang ni grags par ldan/ /chos gtam bya phyir 'dir 'ongs te/ /zhi bas dge slong tshal du'o/ /shar phyogs na ni yul 'khor skyong / /lho phyogs na ni 'phags skyes po/ /nub phyogs na ni mig mi bzang / /byang phyogs na ni lus ngan po/ /de rnams rgyal po chen po bzhi/ /phyogs rnams bzhi po kun du'o/ /gzi brjid 'bar bas 'khod nas ni/ /ser skya'i gzhi yi tshal du'o/ /de rnams sgyu ma rtsed mo bsam/ /drung ldan rnams ni nam mkhar 'khod/ /sgyu ma sku Te t+ya bai Ta Nu/ /bir+ya ts+tsha bir+ya To bcas/ /tsan da na dang 'dod 39.261a mchog dang / /mgul pa mdzes dang mgul nges dang / /skye dgu'i bla mar gyur pa dang / /lha las byung ba'i kha lo pa/ /dri za sna tshogs sde dang ni/ /mi rgyal rgyal ba'i khyu mchog dang / /mdun du rtse mo lnga de bzhin/ /g.yer ma dang ni nyi zer dang / /de dang gzhan gyi rgyal po rnams/ /rgyal po dri za dang bcas dang / /chos gtam bya phyir 'dir 'ongs nas/ /zhi bas dge slong tshal du'o/ /de nas gzhan yang nam mkha'i klu/ /yangs pa can du lhan cig gnas/ /la ba rta yi mchog dang ni/ /rab 'gro gnyen dang lhan cig pa/ /ya mu na dang yul 'khor skyong / /klu yi spun dang grags ldan dang / /sa srung glang po chen po rnams/ /de yang nags kyi tshal du'o/ /gang zhig klu rgyal myur du len/ /lha dang bya dang rnam dag mig /nam mkha' las 'ongs tshal der sleb/[ ]/sna tshogs 'dab bzang ces de'i ming / /'jigs med byin pas klu yi rgyal/[ ]/mkha' lding bzod pa rtogs pas so/ /phan tshun du ni mi rtsod cing / /klu khyung sangs rgyas skyabs 'gro ba/ /rdo rje lag gis rgyal ba dang / /lha ma yin ni rgya mtshor gnas/ /spun rnams de yi gnas dang ni/ /gzi brjid ldan zhing grags dang ldan/ /nag po mig sman 'jigs byed ldan/ /lha ma yin rnams khro byed dang / /thag bzang dang ni thag bzang ris/ /mtshan 'joms na mo tsi dang bcas/ /stobs kyi bu ni brgyad po rnams/ /thams cad rnam par snang mdzad med/ /stobs kyi sde ni go bgos pa/ /sgra gcan bzang po sngon du 'gro/ /btsun pa de ni 'dus nas ni/ /zhi bas dge slong tshal du'o/ /chu dang lha dang sa dang ni/ /me dang rlung yang der 'ongs so/ /chu lha chu yi lha dang ni/ /zla ba dang ni grags par ldan/ /byams dang snying rje'i tshogs can dang / /lha ni grags ldan mdun du'o/ /phyogs bcu'i 'jig rten tshogs rnams ni/ /thams cad kha dog sna tshogs lus/ /rdzu 'phrul ldan zhing 'od dang ldan/ /kha dog dang ni grags par ldan/ /chos gtam bya phyir 'dir 'ongs te/ /zhi bas dge slong tshal du'o/ /khyab 'jug lha dang lhan 39.261b cig tu/ /tha dad tha dad 'ongs pa dang / /zla ba de yi 'khor gyi lha/ /zla ba'i mdun byas 'khor dang ni/ /nyi ma'i 'khor gyi lha rnams dang / /nyi ma'i mdun byas 'khor dang ni/ /rgyu skar de yi 'khor dang yang / /mdun byas pa la ha ka dang /[ ]/sa dang sa yi gtso bo dang / /brgya byin yang yang sbyin pa dang / /phyogs bcu'i 'jig rten tshogs rnams dang / /thams cad kha dog sna tshogs lus/ /rdzu 'phrul ldan zhing 'od dang ldan/ /kha dog dang ni grags par ldan/ /chos gtam bya phyir 'dir 'ongs te/ /zhi bas dge slong tshal du'o/ /de nas nyer spyod lha dang ni/ /chu dang me yi rtse mo bzhin/ /sgra ldan snang bar byed pa dang / /u ma'i me tog de bzhin du/ /chu lha dang bcas chos dang ni/ /a ts+tsu ta dang du ma rnams/ /bzang len mdzes pa'i mdun dang ni/ /mdun dang gnas dang du ma dang / /phyogs bcu'i 'jig rten tshogs dang ni/ /thams cad kha dog sna tshogs lus/ /rdzu 'phrul ldan zhing 'od dang ldan/ /kha dog dang ni grags par ldan/ /chos gtam bya phyir 'dir 'ongs te/ /zhi bas dge slong tshal du'o/ /'dus dang 'dus pa chen po ni/ /mi dang mi yi mchog dang ni/ /rol pa'i go 'phang mdun du dang / /yid mchog dang ni go 'phang rtse/ /de nas lha yi mchod 'os dang / /gang yang dmar po'i gos gyon dang / /pha rol pha rol son chen dang / /grags chen lha'i mdun gnas dang / /phyogs bcu'i 'jig rten tshogs dang ni/ /thams cad kha dog sna tshogs lus/ /rdzu 'phrul ldan zhing 'od dang ldan/ /kha dog dang ni grags par ldan/ /chos gtam bya phyir 'dir 'ongs te/ /zhi bas dge slong tshal du'o/ /dkar dang drod dang dmar po dang / /sngon shugs stug po lhan cig dang / /dkar po 'dzin pa la sogs dang / /mkhas pa'i lha ni sngon du'o/ /rtag tu glang chen myos 'phrang ba/ /'dres pa grags dang ldan pa dang / /pra dz+dzun mang po mdun du dang / /gang zhig phyogs ni mdzes pa dang / /phyogs bcu'i 'jig rten tshogs rnams dang / /thams cad kha dog sna tshogs 39.262a lus/ /rdzu 'phrul ldan zhing 'od dang ldan/ /kha dog dang ni grags par ldan/ /chos gtam bya phyir 'dir 'ongs te/ /zhi bas dge slong tshal du'o/ /dge ba dga' ldan 'thab bral dang / /grags ldan shing dang ldan pa dang / /'phyang ba gnas dang gtso bo dang / /'od dang bsam pa zhes bya dang / /'phrul dga' ba ni sngon du dang / /de nas gzhan 'phrul dbang byed sngon/ /phyogs bcu'i 'jig rten tshogs dang ni/ /thams cad kha dog sna tshogs lus/ /rdzu 'phrul ldan zhing 'od dang ldan/ /chos gtam bya phyir 'dir 'ongs nas/ /zhi bas dge slong tshal du'o/ /sna tshogs drug po'i sde pa ni/ /thams cad kha dog sna tshogs lus/ /ming ni grags dang ldan pa sngon/ /khang gzhan 'dra ba lhan cig tu/ /ma lus rigs ni brjod pa dang / /zag med tshogs ni pha rol brgal/ /glang chen tshogs ni blta ba dang / /zla ba bzhad pa gsum ldan dang / /tshangs bzang mchog gi thob pa dang / /rdzu 'phrul ldan pa'i bu dang ni/ /de yi dga' ba'i gzhon nu ni/ /de rnams zhi bas tshal du'o/ /tshangs pa'i 'jig rten stong du ni/ /tshangs pa chen po nye bar 'khod/ /'od dang ldan par skye ba dang / /grags ldan sna tshogs lus dang ni/[ ]/dbang phyug bcu po sngon du dang / /so so dbang du gyur pa dang / /de yi dbus dang sngon du dang / /'phrog ma 'khor dang bcas pa'o/ /de rnams thams cad 'ongs gyur nas/ /dbang po lha dang tshangs bcas 'ongs/ /bdud kyi sde rnams 'ongs nas ni/ /gau tam thugs ni blta ba dang / /'di ni zung cig chings shig brjod/ /chags pa glang po bcings pa bzhin/ /'khor dang bcas pas bskor nas ni/ /gang du 'ang stong pa ma yin no/ /de la 'di ni bde chen dang / /gau tam sde la gnod mi nus/ /lag pa thal mo rdebs pa dang / /'jigs par byed pa'i cho nge sgrogs/ /ji ltar rlung gis sprin rnams dang / /mun nag glog dang bcas pa ni/ /de ma thag tu 'jigs dang bral/ /bsam pa khro ba med par gnas/ /lha de rnams thams cad dang tshangs pas 39.262b bcom ldan 'das la phyag byas te bskor ba byas nas de nyid du mi snang bar gyur to/ /bdud kyi sde de rnams kyang cang mi smra ba'i tshul gyis song ngo / /ston pas nyan thos bstan pa la dga' ba rnams bos te/ de yang 'jigs pa med byed dang / /dag pa'i sangs rgyas bstan pa la/ /'jigs med 'dod chags bral ba ni/ /de yi ba spu'ang g.yo ba med/ /g.yul ni kun las rgyal ba dang /[ ]/'jigs pa 'das shing grags par ldan/ /lha dang lhan cig brjod pa dang / /nyan thos rnams ni der gnas so/ /bcom ldan 'das kyis de skad ces bka' stsal pa dang / dge slong de rnams bcom ldan 'das kyis gsungs pa la mngon par bstod do/[ ]/'dus pa chen po'i mdo rdzogs s+ho//[ ]//[ ] |