@#/ /rgya gar skad du/ karma bi b+hang ga nA ma d+ha rma gran tha/ bod skad du/ las kyi rnam par 'gyur ba zhes bya ba chos kyi gzhung / bam po gcig go/ /sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan du yod pa na rgyal bu rgyal byed kyi tshal mgon med zas sbyin gyi kun dga' ra ba na/ dge slong gi dge 'dun chen po brgya phrag phyed dang bcu gsum dang lhan cig tu bzhugs te/ de nas to 'u te ya'i bu shu ko ma na ba/ bcom ldan 'das ga la ba der song ste phyin nas/ bcom ldan 'das dang lhan cig tu yang dag par mgu ba dang / yang dag par rangs pa'i gtam rnam pa mang po bshad de phyogs gcig tu 'dug go/ /to'u te ya'i bu shu ko ma na ba phyogs gcig tu 'dug nas/ bcom ldan 'das la 'di skad ces gsol to/ /gau ta ma khyod la bdag cung shas shig 'dri na dris pa'i lan slar bka' stsal du gsol/ de skad ces gsol pa dang / bcom ldan 'das kyis to'u te ya'i bu shu ko ma na ba la 'di skad ces gsungs so/ /ma na ba ji ltar 'dod pa bzhin du dris shig /ngas khyod la bshad par bya'o/ /de nas to 'u te ya'i bu shu ko ma na bas bcom ldan 'das la 'di skad ces gsol to/ /kye gau ta ma sems can rnams la tshe thung ba dang / tshe ring ba dang / nad mang ba dang / nad nyung ba dang / mi sdug pa dang / bzang po dang / dbang chung ba dang / dbang che ba dang / ma rabs kyi rigs dang / ya rabs kyi rigs dang / dbul po dang / phyug po dang / ngan pa dang / shes rab che chung dang / skyid sdug la sogs pa rnam pa mang du mchis na kye gau ta ma las kyi rnam par smin pa gang gi phyir na sems can sna mang por 'gyur 67.317a bcom ldan 'das kyis bka' stsal pa/ ma na ba khyod nyon la dge bar shin du yid la zung shig dang / de'i phyir ngas bshad do/ /ma na ba sems can rnams ni tshe rabs kyi las las gyur te/ sbyin pa'i rnams kyang las/ skye ba'i rnams kyang las/ so sor rgyu ba yang las te/ ma na ba sems can rnams ni las kyis rnam par bsgyur ro/ /de bas na ngan pa dang / bar ma dang / bzang po'i phyir sems can rnam pa mang po yang las rnam pa mang po dang / mya ngan rnam pa mang po dang / lta ba rnam pa mang por sbyar ba de 'di ltar nag po dang / dkar po las rnam par smin pa'i 'bras bu bshad do/ /ma na ba 'di lta ste/ las nag po rnams kyis ni sems can dmyal ba dang / byol song dang / yi dgas dang / ring du 'khyams pa dang / a su ra la sogs pa ngan song du skye'o/ /las dkar po bgyis pa rnams kyis ni lha dang mir skye'o/ /ma na ba de lta bas na las kyi rnam par smin pas tshe thung ba yang yod/ las kyis tshe ring por gyur pa yang yod/ las kyis nad mang por gyur pa yang yod/ las kyis nad nyung ngur 'gyur ba yang yod/ las kyis mi sdug par 'gyur ba yang yod/ las kyis bzang por 'gyur ba yang yod/ las kyis dbang chung ngur 'gyur ba yang yod/ las kyis dbang che bar 'gyur ba yang yod/ las kyis ma rabs kyi rigs su 'gyur ba yang yod/ las kyis ya rabs kyi rigs su 'gyur ba yang yod/ las kyis dbul por 'gyur ba yang yod las kyis phyug por 'gyur ba yang yod/ las kyis ngan par 'gyur ba yang yod/ las kyis shes rab chen por 'gyur ba yang yod/ las kyis sems can dmyal bar 'gyur ba yang yod/ las kyis byol song gi skye gnas su 'gyur ba yang yod/ las kyis ring du 'khyam par 'gyur ba yang yod/ las kyis a su rar skye bar 'gyur ba yang yod/ las kyis mir skye bar 'gyur ba yang yod/ las kyis gzugs yod pa'i lhar skye ba 67.317b yang yod/ las kyis gzugs med pa'i lhar skye ba yang yod/ las bzhin du mi 'gyur bar skye ba yang yod/ las kyis 'gyur bar skye ba yang yod/ las kyis yul gzhan du skye bar 'gyur ba yang yod/ las ma bsams par byas pas skye bar 'gyur ba yang yod/ las bsams te ma byas kyang skye bar 'gyur ba yang yod/ las bsams te byas nas skye bar 'gyur ba yang yod/ las ma bsams ma byas kyang skye bar 'gyur ba yang yod do/ /gang zag las 'di lta bu 'dus pas na sems can dmyal bar skyes nas sems can dmyal ba'i tshe kun rdzogs te/ skye ba'i las kyang yod/ gang zag las 'di lta bu 'dus pas na sems can dmyal ba'i tshe phyed zad nas skye ba'i las kyang yod do/ /sems can dmyal bar phyin ma thag tu skyes pa yang yod/ gang zag yang las 'di lta bu 'dus pas na sngar bde ba la phyi nas mi bde ba'i las kyang yod/ gang zag yang 'di lta bu 'dus pas na sngar mi bde ba la phyi nas bde bar gyur pa'i las kyang yod/ sems can gang zag thams cad kyang 'di lta bu 'dus pas na sngar bde la phyis kyang bde bar 'gyur ba'i las kyang yod/ gang zag yang 'di lta bu 'dus pas na ser sna byed pa'i las kyang yod/ gang zag yang 'di lta bu 'dus pas na dbul ba gtong phod pa'i las kyang yod/ gang zag yang 'di lta bu 'dus pas na phyug por 'gyur zhing gtong phod pa'i las kyang yod/ gang zag yang 'di lta bu 'dus pas na dbul ba ser sna can du 'gyur ba'i las kyang yod do/ /gang zag tshe zad la las ma zad pa yang yod/ gang zag las zad la tshe ma zad pa yang yod/ gang zag tshe dang las bcas te zad par 'gyur ba yang yod/ gang zag tshe dang las bcas te ma zad kyang mya ngan spangs par 'gyur ba yang yod/ gang zag lus bde la sems mi bde bar 'gyur ba yang yod/ gang zag lus kyang bde la sems kyang bde bar 'gyur ba 67.318a yang yod/ gang zag lus mi bde la sems kyang mi bde bar 'gyur ba yang yod/ gang zag las 'di lta bu 'dus pas na sems can ngan pa'i sar skyes te/ gzugs ngan pa dang / bzang po dang / sdug gu dang / kha dog mdzes pa dang / mdog snum pa dang / mthong na dga' ba'i las kyang yod/ gang zag yang las 'di lta bu 'dus pas na ngan pa'i sar yang skyes la gzugs ngan pa dang / lus rtsub pa dang / mi sdug par snang ba dang / mthong na yid du mi 'ong ba'i las kyang yod de/ ma na ba yang 'di lta ste/ mi dge ba bcu'i las kyi lam byas pa'i rgyus phyi rol gyi yul sa'i don ngan du 'gyur ba yang yod do/ /de la ji ltar las kyis tshe thung bar 'gyur zhe na/ chos bcus na tshe thung bar 'gyur zhe na/ bcu gang zhe na/ srog gcod pa/ srog gcod du bcug pa/ srog gcod pa la stod pa/ srog gcod pa la smin pa/ mngal gnas med par byed pa/ mngal gnas med par byed du bcug pa dgra bo la bsad par sems pa/ mi mdza' ba shi na dga' ba/ rten bcas shing sems can bsad pa/ thab mo la lta zhing dad pa dang bcu ste/ chos 'di bcus na tshe thung zhing nad mang bar 'gyur ro/ /ji ltar las bzang po byas pas tshe ring por 'gyur zhe na/ chos rnam pa bcus na tshe ring por 'gyur te/ bcu gang zhe na/ srog gcod pa spangs pa/ srog gcod pa spong bar byed pa/ srog gcod pa spangs pa la stod pa/ srog gcod pa spangs pa la smon pa/ bsad par chad pa'i sems can rnams gtong ba/ bsod par chad pa'i mi rnams gtong ba/ 'jigs shing skrag pa'i sems can rnams skyabs byas pa/ mgon med pa'i sems can rnams la snying rje bar sems pa/ na ba'i sems can rnams la byams pas sdud pa/ brel zhing phongs pa'i sems can rnams la gos dang zas skom sbyin pa dang chos bcus na tshe ring zhing nad med par 'gyur ro/ /ji ltar las kyis nad mang po 'gyur zhe na/ chos bcus na nad mang por 'gyur te/ bcu 67.318b gang zhe na/ dbyug pa dang thal mo la sogs pas btsogs pa dang / dbyug pa dang / thal mo la sogs pas 'tshog tu bcug pa dang / dbyug pa dang thal mo la sogs pas 'tshog pa la stod pa dang / dbyug pa dang thal mo la sogs pas 'tshog pa la smon pa pha ma rnams kyi sems nyon mongs pa/ mya ngan bsring ba rnams kyi sems nyon mongs pa mi mdza' ba rnams na na dga' ba/ mi mdza' ba rnams nad mi sos na dga' ba/ sman log pa byin pa/ zas mi zhu ba za ba dang bcu ste/ chos 'di bcus na nad mang bar 'gyur ro/ /ji ltar las bzang po byas pas nad nyung ngur 'ong zhe na/ chos bcus na nad nyung bar 'gyur te/ bcu gang zhe na/ dbyug pa dang thal mo la sogs pas gzhan mi 'tshog pa/ dbyug pa dang thal mo la sogs pas 'tshog tu mi gzhug pa/ dbyug pa dang thal mo la sogs pas 'tshog pa la mi stod pa/ dbyug pa dang thal mo la sogs pas 'tshog pa la mi smon pa/ pha ma la sogs pa na ba rnams la rim gro byed pa/ mya ngan bsrings pa rnams na ba la rim gro byed pa/ mi mdza' ba rnams na na mi dga' ba/ mi mdza' ba rnams nad sos na dga' ba/ nad pa la sman byin pa/ zas zhu nas za ba dang bcu ste/ chos 'di bcus nad nyung bar 'gyur ro/ /ji ltar las kyis mi sdug par 'gyur zhe na/ chos bcus mi sdug par 'gyur te/ bcu gang zhe na/ khro ba gnong bcabs pa/ cung zad las kyang 'khon du 'dzin pa/ gtum pa pha ma rnams la ngan du smra ba/ mya ngan bsrings pa rnams la ngan du smra ba/ mya ngan bsrings pa'i spyad pa kun la ngan du byed pa/ yang dag par gshegs pa'i mchod rten la 'od gcod pa/ gang zag mi sdug pa rnams la mngon can byed pa ci la yang mi gtsang bar byed pa 'di dang chos bcu'o/ /ji ltar las kyis bzang por 'gyur zhe na/ chos bcus bzang por 'gyur te/ bcu gang zhe na/ mi khro ba gos byin pa/ yang dag par gshegs pa'i mchod rten la rtag tu phyag dar byed pa/ gtsug lag khang la byi dor byed pa/ pha ma la snyan du 67.319a smra ba/ mya ngan las bsrings pa rnams la snyan du smras pa/ gang zag mi sdug pa rnams la mngon can mi byed pa/ ci la yang gtsang bar byed ste/ chos 'di dang bcu'o/ /ji ltar na las kyis dbang chung ngur 'gyur zhe na/ chos bcus na dbang chung ngur 'gyur te/ bcu gang zhe na/ gzhan gyis thob pa la phrag dog pa dang / gzhan gyis ma thob pa la dga' ba dang / gzhan gyis thob pa la mi dga' ba dang / gzhan skyid pa dang / grags pa dang / tshigs su bcad cing sgra bstod pa med pa la dga' ba gzhan skyid pa dang / grags pa dang / tshigasu bcad cing sgra bstod pa la mi dga' ba/ pha ma dang dge ba'i gshegs gnyen la sri zhu mi byed pa/ mya ngan bsings pa rnams la rim 'gro mi byed pa/ dbang chung ngu la mi dge ba'i rtsa ba bskyed pa/ dbang chen po la dge ba'i rtsa ba bcod pa/ gang zag ngan pa byed pa rnams la stod pa 'di dang bcu'o/ /ji ltar las kyis dbang che bar 'gyur zhes na/ chos bcus na dbang che bar 'gyur te/ bcu gang zhe na/ gzhan gyis thob pa la phrag dog mi byed pa/ gzhan gyis thob na dga' ba/ gzhan gyis ma thob pa la mi dga' ba/ gzhan skyid pa dang / grags pa dang / tshigasu bcad cing sgras stod pa med pa la mi dga' ba/ grags pa dang tshigs su bcad cing sgras stod pa la dga' ba/ byang chub kyis sems skyes bar byed pa/ yang dag par gshegs pa'i mchod rten dang gnas byed pa/ dbang chung ngu la mi dge ba'i rtsa ba gcod par byed pa/ dbang chen po rnams la dge ba'i rtsa ba skyed pa dang bcu'o/ /ji ltar las kyis ma rabs su skye bar 'gyur zhe na/ chos bcus na ma rabs su skye bar 'gyur te/ bcu gang zhe na/ pha ma la pha mar mi 'dzin pa/ dge sbyong du mi shes pa/ bram zer mi shes pa/ rigs kyis brtsun pa la mi bkur ba/ mkhan po dang / bla ma dang / thar par zhugs pa rnams la rim gro dang / sti stang du mi byed pa nams kyang 'gron mi gnyer ba/ pha ma la sri zhu/ 67.319b mi byed pa/ mkhan po dang bla ma dang / thar par zhugs pa rnams khyad du gsod cing sri zhu mi byed pa/ rigs chen po las skyes pa'i gang zag rnams spong ba/ rigs chung ngu las skyes pa'i gang zag rnams la bkur ba 'di dang bcu'o/ /ji ltar las kyis ya rabs su skyes par 'gyur zhes na/ chos bcus na ya rabs su skyes par 'gyur ste/ bcu gang zhe na/ pha ma dran pa thar par zhugs par shes pa/ bram zer shes pa rigs kyis btsun pa la bkur ba/ mkhan po dang / bla ma dang / thar par zhugs pa rnams dang / thar par spyod pa gzhan la yang stan las langs te spag cing sti stang ri mo dang / stan la sogs pa stobs pa dang / pha ma la sri zhu byed pa dang / mkhan po dang / bla ma thar par zhugs pa rnams la gzhan la yang sri zhu byed pa/ ya rab dang / ma rabs su yang khyad par mi 'byed cing snyoms pa/ yang dag par gshegs pa'i mchod rten gyis srog shing 'dzugs pa/ me togs gi 'phreng ba dang / gdugs 'dzugs pa dang bcu'o/ /ji ltar las kyis dbul por 'gyur zhe na/ chos bcus na dbul por 'gyur te/ bcu gang zhe na/ ma byin par len par 'jug pa/ ma byin par len pa la stod pa/ ma byin par len pa la smon pa/ pha ma la 'tsho ba rnams bcod pa mkhan po dang bla ma dang / thar par zhugs pa rnams kyi gtsug lag khang dang / gnas khang dang / mchod cing spyod pa/ kun gcod pa/ gzhan thob tu mi dga' ba/ gzhan gyis ma thob na dga' ba/ gzhan gyis thob pa la bgegs byed pa/ mu ge byung du smod pa dang / bcu'o/ /ji ltar las kyis phyug por 'gyur zhe na/ chos bcus na phyug por 'gyur te/ bcu gang zhe na/ ma byin par len pa spong ba/ ma byin par len pa spong bar 'jug pa ma byin par len pa spong ba la dga' ba/ pha ma la 'tsho ba la sbyin pa/ mkhan po dang bla ma lhag ma dang gzhan rnams la gtsug lag khang dang / gnas dang rim par spyod dang / chos gos pa dang / mal stan dang / na ba'i gsos sman dang / g.yog dang / 'tsho ba sbyin pa gzhan gyis 67.320a thob pa la dga' bar sems pa/ gzhan gyis don thob par nan tan du bsgrubs pa/ gzhan gyis ma thob pa la mi dga' ba/ phyogs bcu thams cad du lo legs par smon pa/ sbyin pa la sogs pa gtong ba'i gang zag rnams la rab tu dga' ba dang bcu'o/ /ji ltar las kyis ngan par 'gyur zhe na/ chos bcus na ngan par 'gyur te/ bcu gang zhe na/ gang zag su yang rung ste/ 'dri mi shes pa/ yang dag pa'i chos ma yin pa kun 'phel bar byed pa yang dag pa'i chos spong ba/ yang dag pa'i chos 'chad pa la sti stang dang ri mor mi byed pa/ ma gtsigs par smra ba la dge bar stod pa/ ngan pa'i gang zag rnams la 'khor zhing snyen pa/ yang dag pa la mkhas pa rnams spong ba log par lta ba la tshad mar 'dzin cing bstod pa/ yang dag par lta ba la spong ba/ shes rab dang ldan pa'i gang zag rnams la spong ba dang bcu'o/ /ji ltar las kyis shes rab chen por 'gyur zhe na/ chos bcus na shes rab chen por 'gyur te/ bcu gang zhe na/ gang zag su yang rung ste/ rim par 'dri shes pa/ mi mkhas pa'i dge sbyong dang / bram ze dang / ngan pa'i gang zag rnams la mi 'khor mi snyen cing ri mo sti stang mi byed pa/ mkhas pa'i gang zag rnams la 'khor zhing bsnyen nas ri mo sti stang byed pa/ yang dag pa'i chos ma yin pa kun gtong ba/ yang dag pa'i chos 'phel bar byed pa/ chos kyi snod gang zag rnams mi 'jigs pa la goms par byed pa/ yang dag pa'i tshig snyan par smra ba la dge'o zhes bstod pa/ ngan par smra ba la dge'o zhes mi bstod pa/ log par lta ba la mi smon pa/ yang dag par lta ba la bstod pa dang bcu'o/ /ji ltar las kyis sems can dmyal bar skye bar 'gyur zhe na/ chos bcus na sems can dmyal bar 'gyur te/ bcu gang zhe na/ lus kyis ngan pa cher spyod pa/ ngag gis ngan pa cher spyod pa/ yid kyis ngan pa cher spyod pa/ chad par lta ba/ rtag par lta ba/ bya ba'i mi rigs par lta ba/ phan pa 67.320b med par byed pa/ mya ngan bsrings pa la ngan du smra ba/ 'dod pas log par spyod du bcug pa dang bcu'o/ /ji ltar las kyis byol song du 'gyur zhe na/ chos bcus na byol song du 'gyur te/ bcu gang zhe na/ lus kyis ngan par 'bring du spyod pa/ ngag gis ngan pa 'bring du spyod pa/ yid kyis ngan pa 'bring du spyod pa/ 'dod pa sna tshogs kun g.yos pa'i las byas pa/ khro ba sna tshogs kun g.yos pa'i las byas pa/ glen pa sna tshogs kun g.yos pa'i las byas pa/ mi rigs pa byin pa byol song du 'gyur ba rnams la khro ba/ byang chub sems dpa'i smon lam gyi mthus seng ger skyes pa/ bram ze chad par byed pa/ kha ngan par byas pa'i lan gyis spre'ur skyes pa lta bu dang bcu'o/ /ji ltar las kyis ring du 'khyams pa'i 'jig rten du skye bar 'gyur zhe na/ chos bcus na ring du khyams pa'i 'jig rten du skyes bar 'gyur te/ lus kyis ngan pa chung ngu spyod pa/ ngag gis ngan pa chung ngu spyod pa/ yid kyis ngan pa chung ngu spyod pa/ ngan pa la dad pa/ shin tu dad pa/ log pas 'tsho ba/ ser sna la dad cing mi gtong ba/ sbyin pa la gegs byed pa/ 'dod pa la chags pa bzhin du shi ba/ bru ba tsha zhing skom bzhin du shi ba dang bcu'o/ /ji ltar las kyis a su ra'i 'jig rten par 'gyur zhe na/ chos bcus na a su ra'i 'jig rten du skye bar 'gyur te/ bcu gang zhe na/ thams cad la 'ang lus kyis ngan pa cung zad spyod pa/ thams cad la'ang ngag gis ngan pa chung zad spyod pa/ thams cad la 'ang yid kyis ngan pa chung zad spyod pa/ ngar sems pa/ mi mtshungs pa'i nga / zla las lhag pa'i nga / gong ma las lhag pa'i nga / gong ma las kyang gong ma'i nga / bdag la mi srid pa'i nga / dge ba'i rtsa ba bskyed pa la log par smon pa dang bcu ste/ chos 'di bcus na a su rar skye bar 'gyur ro/ /ji ltar las kyis mi'i 'jig rten du skye bar 'gyur zhe na/ chos bcus na mi'i 'jig rten du skye bar 'gyur te/ bcu gang zhe na/ dge ba 67.321a bcu'i lam ma nyams shing ma god pas mi'i 'jig rten du skye bar 'gyur ro/ /ji ltar las kyis 'dod pa drug na spyod pa'i lhar skye bar 'gyur zhe na/ chos bcus na 'dod pa drug na spyod pa'i lhar skye bar 'gyur te/ dge ba bcu'i lam las ma nyams shing brtson 'grus su bsdams pas na 'dod pa drug na spyod pa'i lhar skye bar 'gyur ro/ /ji ltar las kyis gzugs yod pa na spyod pa'i lhar skye bar 'gyur zhe na/ chos bcus na gzugs yod pa na spyod pa'i lhar skye bar 'gyur te/ bcu gang zhe na/ dge ba bcu'i las kyi lam la dad cing pha rol du phyin pa drug tshad med pa bzhi kun rdzogs pa ni gzugs yod pa na spyod pa'i lhar skye bar 'gyur ro/ /ji ltar las kyis gzugs med pa na spyod pa'i lhar skye bar 'gyur zhe na/ dge ba bcu'i chos dang / mi g.yo ba 'dzin pa bzhi'i chos spyad na gzugs med pa na spyod pa'i lhar skye bar 'gyur te/ mi g.yo ba bzhi ni gzugs thams cad las 'das te/ rig pa'i ming thams cad brjod du med pa nas chos sna tshogs smra bsam las 'das par nam mkha' mtha' yas pa bsams nas nam mkha' mtha' yas skye mched stengs kyi mi g.yo mi 'dzin pa dang / nam mkha' mtha' yas pa'i skye mched thams cad kun las 'das nas rnam par shes pa mtha' yas pa bsams nas rnam par shes pa mtha' yas pa'i skye mched stengs kyi mi g.yo mi 'dzin pa dang / rnam par shes pa mtha' yas pa'i skye mched thams cad las 'das nas cung zad kyang med par bsams te/ cung zad med pa'i skye mched stengs kyi mi g.yo mi 'dzin pa dang / cung zad med pa'i skye mched las 'das te/ sems med pa sems med pa ma yin pa bsams te/ sems med pa dang / sems med pa ma yin pa'i stengs kyi mi g.yo mi 'dzin pa dang / chos bzhin gzugs med pa na spyod pa'i lhar skye bar 'gyur ro/ /ji ltar las kyis 67.321b bzhin mi 'gyur bar skye ba gang zhe na/ dge ba'i rtsa ba las byas la des bdag cir smon lam btab pa dang / mtshams med pa'i sdig las byas pa de lta bu ni las kyis bzhin mi 'gyur bar skye bar 'ong ngo / /ji ltar las kyis 'gyur bar skye zhe na/ sus dge ba'i las byas nas smon lam btab pa ni las des 'gyur zhing skye bar 'ong ngo / /ji ltar las kyis gang yul gzhan du skye bar 'gyur zhe na/ sangs rgyas kyang rung / chos kyang rung / dge 'dun kyang rung / tshul khrims thub pa'i gang zag kyang rung ste/ de la shin du dad par bsams nas byin pas yul gzhan du smon lam btab pa dang / las gang byas kyang rung ste/ bzang po dang / ngan pa gar 'gyur ba ni 'di lta ste/ dper na tshong pa bzhin te/ las de lta bus yul gzhan du song nas rnam par smin par 'gyur ro/ /ji ltar las kyis ma bsams par byas pa gang zhe na/ las byas nas 'gyod pa dang / khrel gyis dogs pa dang / nyes par sems pa dang / mi rigs pa dang / 'chags pa dang / yal bar mi gtong ba dang / slar mi 'jug pa dang / da phyin cad mi byed par dam 'cha' ba dang / 'di lta bu'i las ni ma bsams par byas pa'o/ /ji ltar las bsams la ma byas pa gang zhe na/ lus kyis ma byas pa dang / sems rgyus shing las 'di bya'o zhes khar smras la ma byas pa de lta bu'i las ni bsams te ma byas pa'o/ /ji ltar las bsams te byas pa gang zhe na/ las gang byas kyang rung ste mi 'gyod pa khrel gyis mi dogs pa nyes par mi sems pa/ mi 'chags pa/ yal bar gtong ba/ slar 'jug pa/ phyin cad mi byed par dam mi 'cha' ba'o/ /ji ltar gang zag las 'di lta bu 'dus pas na sems can las dmyal bar skyes te/ sems can dmyal ba'i tshe kun rdzogs nas skye ba'i lam yin zhe na/ gang zag su yang rung ste/ sems can dmyal ba'i las bsams te byas nas/ des kyang mi 'gyod pa khrel gyis mi dogs pa dang / nyes par mi sems 67.322a pa/ mi rigs par mi sems pa/ mi 'chags pa/ yal bar gtong ba/ slar ngan du 'jug pa/ phyin cad byed par dam 'cha' ba/ de lta bu'i sems dga' ba de lta bu smon pa/ de lta bu'i las 'dus pa'i gang zag sems can dmyal bar skyes te/ sems can dmyal ba'i tshe kun rdzogs nas slar skye'o/ /ji ltar gang zag las 'di lta bu 'dus pas sems can dmyal bar skyes te sems can dmyal ba'i tshe phyed zad nas slar skyes ba'i las gang yin zhe na/ gang zag su yang rung / sems can dmyal ba'i las byas nas/ 'gyod pa/ khrel gyis dogs pa/ nyes par sems pa/ mi rigs par sems pa/ 'chags pa/ yal bar mi gtong ba slar ngan du mi 'jug pa/ phyin cad mi byed par dam 'cha' ba 'di lta bu'i las 'dus pa'i gang zag ni sems can dmyal bar skye ste/ sems can dmyal ba'i tshe phyed zad nas slar skye'o/ /ji ltar gang zag las 'di lta bu 'dus pas sems can dmyal bar skyes ma thag tu slar skye ba'i las gang yin zhe na/ gang zag su 'ang rung ste/ sems can dmyal ba'i las bsams te byas nas las de byas pa dang 'gyod pa/ khrel gyi dogs pa/ nyes par sems pa/ mi rigs par sems pa/ 'chags pa/ yal bar mi gtong ba/ slar ngan du mi 'jug pa/ phyin cad mi byed par dam 'cha' ba/ de lta bu'i las la phyis mi dga' zhing mi smon pa spong zhing gtong ba/ phyis shin du mi dga' ba'i yid skyod pa 'di lta bu'i las 'dus pa'i gang zag ni sems can dmyal bar skyes ma thag tu slar skyes te/ de ni rgyal po ma skyes dgra bzhin no/ /ji ltar gang zag las 'di lta bu 'dus pas na sngar bde la phyis mi bde ba'i las gang yin zhe na/ gang zag su 'ang rung ste sbyin pa byin yang yi rangs bzhin du mi byin dga' zhing bde ba yid du ma byas/ byin nas phyis 'gyod par sems pa/ gang zag de lta bu mir skyes na yang phyug po'i rigs su skye ste nor mang po dang / spyod pa mang po'i jo bor 'gyur te/ blon po dang / grogs po dang / gnyen dang / rigs 67.322b gcig pa mang du bdog pa dang / mdzod dang bang ba kun kyang gang ba/ shin tu bde zhing bzhon pa mang po dang ldan pa de lta bu ni skyid pa kun spyod de phyis dmas pa dang / zad par 'gyur te mi bde bar song ba las 'di lta bu 'dus pa'i gang zag ni sngar btsan phyug cing bde yang phyis bkres shing dmas pas mi bde bar 'gyur ro/ /ji ltar gang zag las 'dus pas sngar mi bde ba la phyis bde bar 'gyur ba'i las kyi 'bras bu ni gang yin zhe na/ gang zag su yang rung ste/ sbyin pa sngar ma dad par byin nas dad cing rangs pa sems yid la skyes pa'i gang zag de ni mir skyes na yang dbul po'i rigs su skye ste/ zas dang spyod pa nyung ba/ nyon mongs shing zas dang gos med pa las phyis btsan phyug cing skyid par gyur te/ ci 'ang 'phel te/ cis kyang mi brel bar 'gyur ba 'di lta bu'i gang zag ni sngar mi bde la phyis bde bar gyur pa'o/ /ji ltar gang zag las 'di lta bur gyur pas sngar kyang bde la phyis kyang bde bar 'gyur ba'i las gang yin zhe na/ gang zag su'ang rung ste sbyin pa byin pa yang mang po dang rangs par byin/ bdag kyang yid dga' ste byin pas phyis mi 'gyod pa'i gang zag de'i 'bras bu ni mir skyes na yang phyug pa'i rigs su skyes te/ nor mang po spyod pa dang / mang po'i jo bor gyur nas blon po dang / grogs po dang / gnyen dang rigs gcig pa mang du bdog pa dang / bang mdzod thams cad kyang gang ba/ shin du bde zhing bzhon pa mang po dang / de lta bu'i rigs su skye ste/ skyid pa de lta bu'i phyir skye zhing 'phel bar 'gyur te/ gang zag las 'di lta bu 'dus pas sngar yang bde/ phyis kyang / bde bar 'gyur ro/ /ji ltar gang zag las 'di lta bu 'dus pas sngar mi bde la phyis kyang mi bde bar 'gyur ba'i las kyis 'bras bu ni gang yin zhe na/ gang zag su yang rung ste/ dge ba'i grogs po spangs pa yin/ sus kyang sbyin pa la ma bcug pa yin/ bdag nyid kyis kyang gzhan la sbyin pa ma byas pa yin pa'i gang zag de lta bu ni mir skyes na yang dbul po bkres pa dang / zas 67.323a skom gyis phongs pa/ gos rgyab kyis phongs shing brel te/ nyon mongs bzhin du 'tsho ba dang / zas skom dang / gos rgyab kyis mi 'tsho ba dang / phyis kyang de las skyid cing spyod pa 'phel bar 'gyur ba yang med de/ gang zag las de lta bu 'dus pas na sngar yang mi bde/ phyis kyang bde bar mi 'gyur ro/ /ji ltar gang zag las 'di lta bu 'dus pas phyug la ser sna can du byed par 'gyur ba'i las kyi 'bras bu gang yin zhe na/ gang zag su yang rung ste sbyin pa'i gnas la ci yang bungs mi che zhing nyung ngu byin pa yin/ gtong ba la ni bsri zhing goms par byas pas gang zag de mir skyes na yang phyug po'i rigs su skye ste/ nor dang spyod pa mang po yod kyang ser sna byed par 'gyur te/ de lta bu'i las 'dus pa'i gang zag ni phyug la ser sna che ba yin no/ /ji ltar phyug la gtong phod pa'i las kyi 'bras bu ni gang zhe na/ gang zag su yang rung / sbyin pa'i gnas ma yin pa la mang du byin yang sbyin pa phyir zhing goms par byas pa yin pas gang zag de mir skyes na yang dbul po'i rigs su skye ste/ zas dang spyod pas mi 'tsho zhing nyon mongs nas sdug cing gos zas kyis mi 'tsho yang gtong ba yin te/ las de lta bu 'dus pa'i gang zag ni dbul la/ gtong phod pa'o/ /ji ltar gang zag las 'di lta bus 'dus pas dbul la ser sna byed pa'i las su gyur pa yin zhe na/ gang zag su yang rung / dge ba'i grogs po spangs pa sus kyang sbyin pa la ma bcug pa yin/ nyid kyis kyang sbyin pa ma byin pa yin/ sdig pa'i las kyang ma bsams ma byas pa yin te/ gang zag su yang rung ste/ de mir skyes na yang dbul po'i rigs su skye ste/ zas dang spyod pa la sogs pas mi 'tsho zhing nyon mongs nas sdug cing gos zas kyis brel nas ser sna byed pa yin te/ las de lta bu 'dus pa'i gang zag ni dbul po la ser sna byed pa'o/ /gang zag tshe zad la las ma zad pa gang zhe na/ gang zag su yang rung / sems can dmyal bar shi na 67.323b nas yang sems can dmyal bar skye ba/ byol song las shi nas yang byol song du skye ba/ ring du 'khyams pa las shi na yang ring du 'khyams par skye ba/ a su ra las shi nas yang a su rar skye ba/ mi las shi nas yang mir skye ba de lta bu'i gang zag ni tshe zad la las ma zad pa yin no/ /gang zag las zad la tshe ma zad pa gang zhe na/ gang zag su yang rung ste/ sngon skyid la phyis sdug par gyur pa/ snga na sdug la phyi nas skyid par gyur pa de lta bu'i gang zag ni las zad la tshe ma zad pa yin no/ /gang zag las dang tshe gnyis ka zad pa gang zhe na/ gang zag su yang rung ste/ sems can dmyal ba las shi nas byol song du skyes pa/ byol song las shi nas ring du 'khyams par skyes pa/ ring du 'khyams pa las shi nas a su rar skyes pa/ a su ra las shi nas mir skyes pa/ mi las shi nas lhar skyes pa/ de lta bu'i gang zag ni las dang tshe gnyis ka zad pa yin no/ /gang zag las gang gis na tshe yang ma zad las kyang ma zad la mya ngan spangs pa gang zhe na/ rgyun du zhugs pa dang / lan cig phyir 'ong ba dang / phyir mi 'ong ba dang / dgra bcom pa gang zag de rnams las dang tshe ma zad mod kyi mya ngan spangs pa'o/ /gang zag lus bde la sems mi bde ba gang zhe na/ ma rabs kyis bsod rnams byas nas 'khor lo skor ba'i rgyal por gyur pa de lta bu'i gang zag ni lus bde la sems mi bde ba'o/ /gang zag sems bde la lus mi bde ba gang zhe na/ bsod nams ma byas pa'i dgra bcom pa ste khrims rdzogs pa/ 'gug pa lta bu dgra bcom pa'i gang zag ni sems bde la lus mi bde zhes bya'o/ /gang zag lus dang sems gnyis ka bde ba gang zhe na/ bsod nams byas pa'i dgra bcom pa ste/ khrims rdzogs pa rdo stobs lta bu'i gang zag ni lus dang sems gnyis ka bde ba'o/ /gang zag lus dang sems gnyis ka mi bde ba gang zhe na/ ma rabs kyis bsod nams ma byas pa de lta bu'i gang zag ni lus dang 67.324a sems gnyis ka mi bde ba'o/ /ji ltar gang zag las 'di lta bu 'dus pas na ngan pa'i sar skyes la gzugs legs pa dang / bzang po dang / sdug gu dang / kha dog mdzes pa dang / mdog snum pa dang / mthong na dga' ba'i las gang zhe na/ chags pa g.yos te tshul khrims nyams pa dang ldan pa'i gang zag ni ngan pa'i sar skyes la gzugs legs pa dang / bzang po dang sdug gur 'gyur ro/ /ji ltar gang zag las 'di lta bu 'dus pas na ngan pa'i sar skyes la/ gzugs ngan pa dang / lus rtsub pa dang / mi sdug pa dang / mthong na mi sdug par 'gyur ba'i las gang zhe na khro ba skyes shing khrims mi thub pa dang ldan pa'i gang zag 'di lta bu 'dus pas na ngan pa'i sar skyes la gzugs ngan pa dang / lus rtsub pa dang / mi sdug par snang ba dang / mthong na yid du mi 'ong bar 'gyur ro/ /ji ltar gang zag las 'di lta bu 'dus pas na ngan pa'i sar skyes la dri mi zhim pa dang / dbang po ma tshang ba dang / dbang po mi mthun par 'gyur ba'i las gang yin zhe na/ glen par skyes shing khrims mi thub pa dang ldan pa gang zag las 'di lta bu 'dus pas na ngan pa'i sar skyes la dri mi zhim pa dang / dbang po ma tshang ba dang / dbang po mi mthun par 'gyur ro/ /ji ltar mi dge ba bcu'i las byas pa'i rgyus phyi rol gyi yul sa rnams ngan du 'ong bar 'gyur ba yin zhe na/ srog gcod na de'i las kyis sa'i mdog nyams par 'ong ngo / /ma byin par blangs pa de'i las kyis ser ba dang / bye ba dang / byi ba dang / srin mang du 'ong bar 'gyur ro/ /mi tshangs par spyod pa byas pas de'i las kyis khug rna dang / rlung dang rdul dang rdul chen po 'ong ba'i sar skye'o/ /brdzun mang du byas pa'i las kyi 'bras bu ni khar mnam por 'gyur ba/ dbugs mi zhim par 'ong ngo / /phra ma mang du byas pa'i las kyi 'bras bu ni yul mtho dman can dang / lcang lcong can dang / mi gtsang ba dang / na rkong dang / rdo ba gram khrod can gyi yul du skye'o/ /kha 'khyal pa byas pa'i las kyi 'bras bu ni grog po mang ba/ rtsi shing dang / 67.324b yal ga dang / 'dab ma tsher ma can dang / nags tshang tshing can gyi yul du skye'o/ /brkam par byas pa'i 'bras bu ni 'bru 'bras ci yang phra mar 'ong ngo / /khro ba byas pa'i las kyis sa bon 'bras bu tsha ba dang / skyur ba dang / kha bar 'ong ngo / log par bltas pa dang / byed du bcug pa'i las kyi rgyus ni sa bon dang 'bras bu chung zhing ngan par 'ong ngo / 'di ltar mi dge ba bcu'i las byas pas phyi rol gyi yul sa rnams ngan par 'gyur zhing mi bde ba'i gnas su skye bar 'gyur ro/ /bcom ldan 'das kyis yang bka' stsal pa/ ma na ba ngan pa rnam pa bcur 'gyur ba yang go zhing shes par byos shig /bcu gang zhe na/ dgra mang du 'gyur ba/ yid du mi 'ong bar snang ba/ tshe thung ba/ sdig pa'i las la sems pa/ sems can rnams 'jigs par 'gyur ba/ mi dga' bzhin nyal ba/ mi dga' bzhin sad pa/ rmi lam na sdig pa mthong ba/ phyis 'gyod pa/ tshe thung ba'i las sems shing byed pa yin te/ shi nas lus dang bral na lam ngan par ltung zhing sems can dmyal bar skye'o/ ma byin par blangs na las kyi rnam par smin pa bcur 'gyur te/ bcu gang zhe na/ dgrar 'gyur ba yin/ dogs par 'gyur ba yin/ mi rigs par 'gro ba yin/ mtshan mo 'khyam pa yin/ sdig pa'i grogs po kun gyi nad kyis zin pa yin/ dge ba'i grogs po kun spangs pa yin/ khrims mi thub pa yin/ rgyal pos gyod btab pa yin/ chad pas bcad pa yin/ mi skyid par byed par 'gyur ba'i las sems shing byed pa yin te/ shi nas lus dang bral nas lam ngan par ltung zhing sems can dmyal bar skye'o/ /mi tshangs par spyod pas na ngan pa bcur 'gyur ba shes par byos shig /bcu gang zhe na/ gzhan gyi khyo shug dang nyal ba yin/ glags tshol ba yin/ khyo shug dang 'thab pa yin/ khyo shug 'phrogs pa yin/ mi dge ba'i chos kun skye ba yin/ dge ba'i chos byang zhing 'bri bar 'gyur ba yin/ bdag kyang bden par mi srung ba yin/ bu smad la sogs pa yang bden par 67.325a ma bsrungs pa yin/ dogs par 'gyur ba yin/ gnyen dang / grogs po dang / rigs gcig pa dgrar 'gyur ba'i las sems shing byed pa yin te/ shi nas lus dang bral na lam ngan par ltung zhing sems can dmyal bar skye'o/ /brdzun byas na ngan pa bcur 'gyur te/ bcu gang zhe na/ de'i lus la lha rnams mi 'khor ba/ gzhan gyis slu ba/ bdag gi tshig mi brtan pa/ kha mnam pa/ drang por smras kyang su yang yid mi ches pa/ brdzun po che de la dri ba'i mi rigs shes zer ba/ de la tshigs su bcad cing bstod pa med par grags par 'gyur ba/ su yang mi nyan pa'i tshig tu 'gyur ba kun du ngan du rjod pa'i las sems shing byed pa yin te/ shi nas lus dang bral na lam ngan par ltung zhing sems can dmyal bar skye'o/ /chang 'thungs na ngan pa bag med pa sum bcu rtsa lngar 'gyur ba shes par byos shig /sum bcu rtsa lnga gang zhe na/ mngon par snang bzhin du nor zad pa/ nad mang po 'du ba/ 'thab mo dang rtsod pa rnams skye ba/ khrel zhing ngo tshas mi 'dzem pa/ mi snyan par grags par byed pa/ shes rab nyams par byed pa/ skyid pa sngan cad ma bsags pa/ da yang mi sogs pa/ skyid pa'i bsags pa kun zad cing med par byas pa/ gsang ba rnams smra ba/ las su bya ba rnams shor ba/ zhan te nyam chung bar gyur pa/ mya ngan gyi rtsa ba/ mar mi 'dzin pa/ phar mi 'dzin pa/ thar par mi shes pa/ bram zer mi shes pa/ rigs btsun pa la sti stang rim gro mi byed pa/ sangs rgyas la rim gro mi byed pa/ chos la rim gro mi byed pa/ dge 'dun la rim gro mi byed pa/ sdig byed pa'i grogs po la rim gro byed pa/ dge ba'i grogs po kun spong zhing khyad du gsod pa/ ngo tsha mi shes pa/ khrel gyis dogs pa med pa/ spa zhing mdzes pa'i bag mi byed pa/ g.yem pa la bag med pa/ 'gro ba mang po'i yid du mi 'ong ba/ 'gro ba mang pos smad pa/ rigs chen po dang / gnyen pa dang / rigs gcig pa spangs pa/ yang dag pa'i chos ma yin 67.325b pa/ kun 'dzin pa/ yang dag pa'i chos kun spong ba/ nyes par byed stod pa'i mi rigs shes bla mas smad pa/ mya ngan las 'das pa dang ring du bral ba/ smyon par gyur pa'i las sems shing ngan pa'i skyon rnams sna tshogasu byed pa yin te/ shi nas sems can dmyal bar ltung zhing lus dang bral na yang lam ngan par 'gro bas bla 'og kun gyis kyang mi btung zhing spong bar bya'o/ /ma na ba bde bar gshegs pa'i mchod rten la thal mo sbyar nas gus pas phyag byas nas legs pa bcu thob par 'gyur te/ bcu gang zhe na/ chen po'i rigasu skye ba/ gzugs che ba/ 'khor mang ba/ pha ma la rim 'gro sti stang che ba/ nor mang ba/ mang du thos pa/ dad pa dang ldan pa/ mang du dran pa shes rab chen po mtho rig kyi lam chen po thob par 'ong ngo / /yang dag par gshegs pa'i mchod rten la phyag 'tshal na legs pa bcu thob par 'gyur te/ bcu gang zhe na/ gzugs bzang por 'gyur/ skad snyan par 'gyur/ ngag kun gyis mnyan par 'gyur/ 'khor kun gyi bstod par 'gyur/ skyid pa dang ldan par 'gyur/ lha dang mi'i nang na yang dbang che bar 'gyur/ spyod pa mang por 'gyur/ tho rigasu skye bar 'gyur/ mya ngan las 'das pa yang myur du mthob par 'gyuro/ /yang dag par gshegs pa'i mchod rten la gdugs 'phul na legs pa bcu thob par 'gyur te/ bcu gang zhe na/ gdugs dang 'dra bar 'gyur/ 'jig rten la mi gnod par 'gyur/ smon pa'i gnasu 'gyur/ 'jig rten gyi dbang por 'gyur ba'i las sems shing byed par 'gyur phyi phyir 'khor los sgyur ba'i rgyal po thob par 'gyur/ dbang po chen por 'gyur/ spyod pa mang por 'gyur/ mtho risu skye bar 'gyur/ mya ngan las 'das pa yang myur du thob par 'gyuro yang dag par gshegs pa'i mchod rten la dril bu 'phul na legs pa bcu mthob par 'gyur te/ bcu gang zhe na/ gzugs bzang por 'gyur ba yin/ dbyang snyan pa yin/ yid du 'ong ba smra ba yin/ bya ka la ping ka'i sgra skad smra ba yin/ kun gyis mnyan par 'gyur ba yin/ 67.326a rtag tu dga' zhing rangs pa yin/ phyi phyir yid du 'ong ba'i sgra thos pa yin/ spyod pa mang po yin/ mtho ris su skye ba yin/ mya ngan las 'das par gyur ba yin no/ /yang dag par gshegs pa'i mchod rton la na bza' phul na legs pa bcu thob par 'gyur te/ bcu gang zhe na/ mdog 'jam pa yin/ lus rdul mi chags pa yin/ khrel ltas dang ldan pa yin/ mthong na dga' ba yin/ rtag tu gos dang ldan pa yin/ 'jam zhing bzang po'i gos rtag pa yin ci yang rnyed pa yin/ spyod pa mang po yin/ mtho ris su skye ba yin/ myur du mya ngan las 'das pa thob pa yin no/ /yang dag par gshegs pa'i mchod rten la me tog phul na legs pa bcu thob par 'gyur te/ bcu gang zhe na/ 'jig rten gyi nang na me tog dang 'dra bar 'gyur/ gsung gi dbang po gtsang mar 'gyur/ lus la bsnam pa dri zhim par 'gyur/ lus gtsang mar 'gyur/ phyogs bcur khrims thub pa'i gzugs rgyas par 'gro/ kun kyang de las 'du bar 'gyur/ 'jig rten gyi nang na rnyed par 'gyur/ dad pa'i chos rnams mang du 'grub par 'gyur/ mtho ris su skye bar 'gyur/ myur du mya ngan las 'das par 'gyur ro/ /yang dag par gshegs pa'i mchod rten la me tog phreng ba phul na de'i legs pa bcu thob par 'gyur te/ bcu gang zhe na/ 'jig rten gyi nang na me tog gi phreng ba dang 'dra bar lus la snam pa'i dri zhim par 'gyur/ lus gtsang bar 'gyur/ rtag tu dri zhim par 'gyur/ rgyan dang ldan par 'gyur/ 'khor rnams stong zhing nye bar 'gyur/ pho mo thams cad kyi yid du 'ong bar 'gyur/ spyod pa mang du 'gyur/ mtho ris su skye bar 'gyur/ myur du mya ngan las 'das pa thob par 'gyur ro/ /yang dag par gshegs pa'i mchod rten la mar me phul na legs pa bcu thob par 'gyur te/ bcu gang zhe na/ 'jig rten gyi nang na mar me dang 'dra bar 'gyur/ sha'i mig gtsang bar 'gyur/ 'phrul gyi mig thob par 'gyur/ mi shes pa'i mun pa nag po 67.326b med par 'gyur/ shes rab kyi 'od thob par 'gyur/ dge ba dang mi dge ba'i don rnams bye brag phyed par 'gyur/ 'khor ba na 'khor yang mun pa dang myos par mi 'gyur/ spyod pa mang por 'gyur/ mtho ris su skye bar 'gyur/ myur du mya ngan las 'das par 'gyur ro/ /yang dag par gshegs pa'i mchod rten la spos phul na legs pa bcu thob par 'gyur te/ bcu gang zhe na/ 'jig rten gyi nang na spos dang 'dra bar 'gyur/ sna'i dbang po rno bar 'gyur/ lus dri zhim pa gtsang mar 'gyur/ rtag tu dri zhim par 'gyur/ gzugs bzang por 'gyur/ sems can dga' zhing 'du bar 'gyur/ 'jig rten gyi nang na rnyed par 'gyur/ dad pa'i chos rnams mang du 'grub par 'gyur/ mtho ris su skye bar 'gyur/ myur du mya ngan las 'das par 'gyur ro/ /yang dag par gshegs pa'i mchod rten la rnga phul na legs pa bcu thob par 'gyur te/ bcu gang zhe na/ gzugs bzang por 'gyur/ skad snyan par 'gyur/ smras pa yid du 'ong bar 'gyur/ skyid pa dang ldan par 'gyur/ rtag tu dga' bar 'gyur/ tshig kun gyis nyan par 'gyur/ phyi phyir sgra skad snyan pa thob par 'gyur/ spyod pa mang por 'gyur/ mtho ris su skye bar 'gyur/ myur du mya ngan las 'das par 'gyur ro/ /yang dag par gshegs pa'i mchod rten brtsigs na legs pa bcu thob par 'gyur te/ bcu gang zhe na/ rigs chen por 'gyur/ gzugs dang mig bzang zhing sdug par 'gyur/ dbang che zhing 'khor mang la 'khor snying nye bar 'gyur/ spyod pa mang por 'gyur/ kun 'dum pa'i gnas su 'gyur/ tshigs su bcad pa dang / bstod cing bskyed pas phyogs bcur cher grags shing lha dang mi rnams kyis mchod par 'gyur/ phyi phyir nor mang zhing 'khor los sgyur ba'i rgyal por 'gyur/ byang chub sems dpa' rdo rje snying po'i lusu 'gyur/ myur du mya ngan las 'das par 'gyur ro/ /stan gyi 67.327a sbyin pa gtong ba byas na legs pa bcu thob par 'gyur te/ bcu gang zhe na/ 'jig rten gyi nang na bla mar 'gyur/ bzang por snang bar 'gyur/ 'gro ba mang po la skyid pa'i sgra grags par 'gyur/ spyod pa mang por 'gyur/ mtho ris su skye bar 'gyur/ myur du mya ngan las 'das par 'gyur ro/ /lham gyi sbyin pa byas pas legs pa bcu thob par 'gyur te/ bcu gang zhe na/ bzhon pa kun gyis mi brel bar 'gyur/ rkang pa legs par 'gyur/ lam du zhugs na mthu dang ldan par 'gyur/ lus mi zhan par 'gyur/ lam du zhugs na rdo shing gis mi snad par 'gyur/ rdzu 'phrul gyi rkang pa thob par 'gyur/ g.yog bran dang ldan par 'gyur/ mtho ris su skye zhing myur du mya ngan las 'das par 'gyur ro/ /snod kyi sbyin gtong byas na legs pa bcu thob par 'gyur te/ bcu gang zhe na/ snod spyad dang ldan par 'gyur/ 'jig rten gyi yon tan du 'gyur/ skom dad chung bar 'gyur/ skom na yang btung ba dang ldan par 'gyur/ sems mnyen par 'gyur ring du 'khyams par mi skye bar 'gyur/ lha dang mi kun dga' bar 'gyur/ spyod pa mang por 'gyur/ mtho ris su skye bar 'gyur/ myur du mya ngan las 'das par 'gyur ro/ /zas kyi sbyin pa gtong ba byas na legs pa bcu thob par 'gyur te/ bcu gang zhe na/ tshe ring bar 'gyur/ dbang dang ldan par 'gyur/ stobs dang ldan par 'gyur/ dran pa dang ldan par 'gyur/ smra ba dang ldan par 'gyur/ 'khor 'du zhing mgu bar byed par 'gyur/ lha dang mi kun mgu bar 'gyur/ longs spyod mang por 'gyur/ bde bar 'gyur/ mtho ris su skye bar 'gyur/ myur du mya ngan las 'das par 'gyur ro/ /gnas kyi sbyin gtong byas na legs pa bcu thob par 'gyur te/ bcu gang zhe na/ rgyal phran du 'gyur/ 'khor gyi rgyal por 'gyur/ gzhan gyis mi tshugs pa'i rgyal por 'gyur/ gling gcig gi rgyal por 'gyur/ gling gnyis 67.327b kyi rgyal por 'gyur/ gling gsum gyi rgyal por 'gyur/ gling bzhi'i rgyal por 'gyur/ spyod pa mang por 'gyur/ mtho ris su skye bar 'gyur/ myur du mya ngan las 'das par 'gyur ro/ /thar par zhugs na legs pa bcu thob par 'gyur te/ bcu gang zhe na/ bu dang chung ma dang / gnyen dang 'du 'dzi la ma chags pa dang / ser sna med pa yin/ 'dod pa len pa med pa yin/ shing khrod na gnas pa la mi dga' ba yin/ rin po che gsum la ri mo byed pa yin/ mi shes pa'i gnas dang bral ba yin/ ngan par 'gro ba'i chos dang bral ba yin/ dge ba'i chos kun tshol ba yin/ lha dang mi la dben pa yin/ rtag tu yang dag par gshegs pa'i 'phags pa bzhin du thar par zhugs shing chos byed pa yin/ myur du mi bde ba las thar te mya ngan las 'das pa yang thob par 'gyur ro/ /skom gyi sbyin pa byas na legs pa bcu thob ste/ bcu gang zhe na/ dbang po thams cad tshang bar 'gyur/ dpral ba'i dbyes legs par 'gyur/ smras pa kun mgu bar 'gyur ro/ /sems mnyam par 'gyur/ skom dad chung bar 'gyur/ skom na yang btung ba dang ldan par 'gyur/ ring du 'khyams par mi skye/ longs spyod mang bar 'gyur/ mtho ris su skye bar 'gyur/ myur du mya ngan las 'das par 'gyur ro/ /bzhon pa sbyin gtong byas na legs pa bcu thob par 'gyur te/ bcu gang zhe na/ rkang pa 'jam pa yin/ rkang pa'i dbyibs legs par 'gyur/ rkang gis 'gro na lus la gnod par mi 'gyur/ mi mdza' ba med par 'gyur/ rdzu 'phrul gyi rkang pa dang ldan par 'gyur/ bzhon pas mi brel bar 'gyur/ spyod pa mang bar 'gyur/ bde bar 'gyur/ mtho ris su skye bar 'gyur/ myur du mya ngan las 'das par 'gyur ro/ /khrod dben par gnas pa la legs pa bcu thob par 'gyur te/ bcu gang zhe na/ mang po 'dus pa rnams spangs pa/ shin tu dben par spyod pa/ bsam gtan la dmigs pa'i sems su 'gyur ba/ chung ngu byed pa/ 67.328a sangs rgyas la bsnyen pa/ lus dge zhing bde bar spyod pa/ bar ma dor mi 'khyam pa/ chos ji lta bur thos pa'i don rgyas par shes pa/ mi g.yo 'dzin rab tu thob pa/ shes rab shin tu thob pa'o/ /slong ba legs pa bcu thob par 'gyur te/ bcu gang zhe na/ 'gro ba la goms par 'gyur/ gnas kun ring bar 'gyur/ nga spangs par 'gyur/ bdag rang khe dang ldan par 'gyur/ gzhan bsod nams la bgod par 'gyur/ bstan pa'i chos rgyas par 'gyur/ phyis byung ba rnams la snang bar byed par 'gyur/ thar par zhugs pa'i tshul las mi 'gal bar byed par 'gyur/ smra ba'i sems su 'gyur/ dge ba'i khrims tshang ba'i sems slongs mo la zhugs pas phyogs gang du'ang mun par mi 'gyur ba yin no/ /thub cing mi 'jigs pas na legs pa bcu thob par 'gyur te/ bcu gang zhe na/ mi 'jigs bzhin du grong du 'jug pa/ mi 'jigs bzhin du grong nas 'byung ba/ mi 'jigs bzhin du rigs 'jug pa/ mi 'jigs bzhin du 'khor la chos 'chad pa/ mi 'jigs bzhin du dge 'dun gyi nang du 'jug pa/ mi 'jigs bzhin du mkhan po dang slob dpon gyi nang du 'jug pa/ byams pa'i stobs rnams la sbyong ba/ mi 'jigs bzhin du chos gos dang / zas dang / mal stan dang / sman dang / g.yog la sogs pa rnams spyod pa/ mi 'jigs par kha ton dang / klog pa dus zad pa'i tshe yang mi 'jigs pa yin no/ /bcom ldan 'das kyis de skad gsungs pa dang / to'u te ya'i bu shu ko ma na ba stan las langs te phyogs gcig tu 'dug te/ pus mo g.yas pa'i lha nga sa la btsugs te/ bcom ldan 'das logs su thal mo sbyar te phyag 'tshal nas 'di skad ces gsol to/ /bcom ldan 'das dkon mchog gsum la phyag 'tshal zhing skyabs su mchi'o/ /deng phan cad bdag gi nam du yang dge ba'i bshes gnyen mdzad par dgongs su gsol zhes gsol to/ /las kyi rnam par 'gyur ba rdzogs so// // |