@#/ / rgya gar skad du/ de ba ta sU tra/ bod skad du/ lha'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs te/ de nas mtshan mo mi nyal tsam na lha mdog bzang po zhig bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te/ phyogs gcig tu 'dug go/ /de nas lha de'i mthus rgyal bu rgyal byed kyi tshal thams cad snang ba chen pos khyab par gyur to/ /de nas de'i tshe lha des tshigs su bcad pa 'di dag gsol to/ /mtshon cha rnon po de gang lags/ /ha la ha la'i dug gang lags/ /rab tu 'bar ba'i me gang lags/ /mun pa rab gnag de gang lags/ /bcom ldan 'das kyis bka' stsal pa/ 67.274b tshig dug mtshon cha rnon po yin/ /'dod chags ha la ha la'i dug /zhe sdang rab tu 'bar ba'i me/ /mun pa rab gnag ma rig pa/ /lhas gsol pa/ mi yis zin pa de gang lags/ /gang 'dir bor ba de gang lags/ /mi shigs go cha ci zhig lags/ /'di na mtshon du ci rno lags/ /bcom ldan 'das kyis bka' stsal pa/ bdag gis gang byin zin pa yin/ /khyim du gang bzhag 'dir bor yin/ /mi shigs go cha bzod pa yin/ /'di na mtshon du shes rab rno/ /lhas gsol pa/ chom rkun zhes bgyi de gang lags/ /dam pa rnams kyi nor gang lags/ /lha dang bcas pa'i 'jig rten na/ /bslus shes bgyi ba gang dag lags/ /bcom ldan 'das kyis bka' stsal pa/ rnam rtog chom rkun mkhas pa yin/ /tshul khrims dam pa rnams kyi nor/ /gang dag tshul khrims log lhung byas/ /de dag 'jig rten bslus pa yin/ /lhas gsol pa/ bde zhes bgyi ba de gang lags/ /dbang phyug dam pa de gang lags/ /rtag tu rnam par rgyan pa gang / /mtho brtsams gang lags bka' stsal gsol/ /bcom ldan 'das kyis bka' stsal pa/ 'dod chung bde bar shes par bya/ /chog shes dbang phyug dam pa yin/ /khrims ldan rtag tu rnam par brgyan/ /tshul khrims nyams pa mtho brtsams yin/ lhas gsol pa/ rtsa lag mnyes gshin de gang lags/ /bsam pa sdang ba'i dgra gang lags/ /sdug bsngal mi bzad de gang lags/ /mchog tu bde ba de gang lags/ /bcom ldan 'das kyis bka' stsal pa/ rtsa lag mnyes gshin bsod nams yin/ /sdig pa bsam pa sdang ba'i dgra/ /dmyal ba'i sdug bsngal mi bzad pa/ /phung po med pa'i bde ba'i mchog /lhas gsol pa/ sdug la mi phan de gang lags/ /phan yang mi sdug gang zhig lags/ / 67.275a gnod pa bgyid pa'i nad gang lags/ /sman pa'i mchog gcig de gang lags/ /bcom ldan 'das kyis bka' stsal pa/ 'dod pa sdug kyang mi phan pa/ /thar pa phan la mi sdug pa/ /'dod chags gnod pa med pa'i nad/ /sman pa'i mchog gcig sangs rgyas yin/ /lhas gsol pa/ gang gis 'jig rten 'di bsgribs lags/ /gang gis 'jig rten dbang du bgyis/ /gang gis mdza' bshes 'byed par bgyid/ /gang gis mtho ris mchi mi 'gyur/ bcom ldan 'das kyis bka' stsal pa/ mi shes pas ni 'jig rten bsgribs/ /gti mug gis ni dbang du byas/ /zhen pas mdza' bshes 'byed par byed/ /chags pas mtho ris 'gro mi 'gyur/ /lhas gsol pa/ gang gis mdza' bshes 'phel bar 'gyur/ /gang gis dgra rnams zhi bar bgyid/ /gang gis mtho ris 'thob par bgyid/ /gang gis thar par 'gro bar 'gyur/ /bcom ldan 'das kyis bka' stsal pa/ gtong bas mdza' bshes 'phel bar 'gyur/ /byams pas dgra rnams zhi bar byed/ /tshul khrims kyis ni mtho ris thob/ /shes pas thar par 'gro bar 'gyur/ /lhas gsol pa/ rgyal po dang ni chom rkun gyis/ /shin du bsgrim pa bgyis gyur na/ /skyes pa 'am bud med gang gi 'ang rung / /dbrog par mi tshugs ci zhig lags/ /bcom ldan 'das kyis bka' stsal pa/ rgyal po dang ni chom rkun gyis/ /shin du bsgrim pa byas gyur kyang / /skyes pa 'am bud med gang gi 'ang rung / /dbrog par mi tshugs tshul khrims so/ /lhas gsol pa/ 'jig rten 'di ni gang gis 'ching / /gang gis 'jig rten rnam par grol/ /gang zhig rnam par spangs pas na/ /mya ngan 'das shes bgyi bar bgyi/ /bcom ldan 'das kyis bka' stsal pa/ 'dod pas 'jig rten 'ching bar byed/ /'dod pa 67.275b med pas rnam par grol/ /sred pa rnam par spangs pas na/ /mya ngan 'das shes brjod pa yin/ /lhas gsol pa/ rlung dmar gyis kyang mi shigs shing / /zhugs kyis mi 'tshig de ci lags/ /dog sa gtam par bgyid pa yi/ /chab kyis mi 'drul ci zhig lags/ /bcom ldan 'das kyis bka' stsal pa/ rlung dmar gyis kyang mi shes shing / /mes kyang mi 'tshig bsod nams yin/ /sa rnams khebs par byed pa yi/ /chus kyang mi 'drul bsod nams so/ /lhas gsol pa/ su zhig shin du bslus gyur nas/ /'jig rten 'di nas pha rol mchis/ /da dung bdag gi dogs pa 'di/ /khyod kyis bsal bar mdzad pa'i rigs/ /bcom ldan 'das kyis bka' stsal pa/ /gang gis longs spyod yod bzhin du/ /bsod nams bsags pa ma byas pa/ /de ni shin du bslus gyur nas/ /'jig rten 'di nas pha rol song / /lhas gsol pa/ 'jigs pa kun las 'das gyur cing / /rgal ba'i 'jig rten mthu ldan pa'i/ /bram ze mya ngan yongs 'das par/ /kye ma bdag gis ring nas mthong / /bcom ldan 'das kyis de skad ces bka' stsal nas lha de yi rangs te/ bcom ldan 'das kyi zhabs la mgo bos phyag 'tshal nas rjes su yi rangs te de nyid du mi snang bar gyur to/ /lha'i mdo rdzogs so// // |