@#/ /rgya gar skad du/ Ar+ya tsa tu sa t+ya sU tra/ bod skad du/ 'phags pa bden pa bzhi'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das dmar bu can gyi grong khyer dang rgyal po'i khab kyi bar gyi dbus na rgyal po'i gnas 'od ma'i dbyug pa can na nub mo nye bar rten cing dge slong gi dge 'dun chen po dang thabs gcig tu bzhugs so/ /de nas bcom ldan 'das kyis dge slong rnams la bka' stsal pa/ dge slong dag nga dang khyed cag kho nas 'phags pa'i bden pa bzhi po de dag ma shes ma mthong / khong du ma chud/ so sor ma rtogs pas lam ring po 'dir rgyug cing 'khor bar gyur to/ /bzhi po de gang zhe na/ nga dang khyed cag kho nas sdug bsngal 'phags pa'i bden pa ma shes ma mthong / khong du ma chud so sor ma rtogs pas lam ring po 'dir rgyug cing 'khor bar gyur to/ /nga dang khyed cag kho nas sdug bsngal kun 'byung 'phags pa'i bden pa ma shes ma mthong / khong du ma chud/ so sor ma rtogs pas lam ring po 'dir rgyug cing 'khor bar gyur to/ /nga dang khyed cag kho nas sdug bsngal 'gog pa 'phags pa'i bden pa ma shes ma mthong / khong du ma chud/ so sor ma rtogs pas lam ring po 'dir rgyug cing 'khor bar gyur to/ /nga dang khyed cag kho nas sdug bsngal 'gog par 'gro ba'i lam 'phags pa'i bden pa ma shes ma mthong / khong du ma chud/ so sor ma rtogs pas lam ring po 'dir rgyug cing 'khor bar gyur to/ /dge slong dag ngas sdug bsngal 'phags pa'i bden pa rjes su rtogs shing so sor rtogs te srid pa'i sred pa bcad pas 'khor ba'i skye ba zad de da ni srid pa gzhan med do/ /ngas sdug bsngal kun 'byung 'phags pa'i bden pa 67.185a rjes su rtogs shing so sor rtogs te/ srid pa'i sred pa de bcad pas 'khor ba'i skye ba zad de/ da ni srid pa gzhan med do/ /ngas sdug bsngal 'gog par 'phags pa'i bden pa rjes su rtogs shing so sor rtogs te/ srid pa'i sred pa de bcad pas 'khor ba'i skye ba zad de/ da ni srid pa gzhan med do/ /bcom ldan 'das kyis de skad ces bka' stsal te/ bde bar gshegs pas de skad gsungs nas ston pas gzhan yang 'di skad ces bka' stsal to/ /nga dang khyed cag kho na yis/ /'phags pa'i bden pa bzhi po dag /ji lta ba bzhin ma mthong bas/ /lam ring du ni 'khor bar gyur/ /bden pa de dag mthong nas ni/ /srid pa'i sred pa bcad nas su/ /'khor ba'i skye ba zad pas na/ /da ni srid pa gzhan med do/ /bcom ldan 'das kyis de skad ces bka' stsal pa dang / dge slong de dag yi rangs te/ bcom ldan 'das kyis gsungs pa la mngon par bstod do/ /'phags pa bden pa bzhi'i mdo rdzogs so// // |