// @#/ /rgya gar skad du/ Ar+ya tsan dra gar+b+he pra dz+nyA pa ra mi tA ma hA yA na sU tra/ bod skad du/ 'phags pa zla ba'i snying po shes rab kyi pha rol tu phyin pa theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab bya rgod kyi phung po'i ri la dge slong gi dge 'dun tshad med grangs med pa dang / byang chub sems dpa' rab tu mang po dang thabs gcig tu bzhugs te/ de'i tshe 'khor der byang chub sems dpa' sems dpa' chen po zla ba'i snying po 'dug pa stan las langs nas bcom ldan 'das la 'di skad ces gsol to/ /bcom ldan 'das byang chub sems dpa' rnams kyis shes rab kyi pha rol tu phyin pa la ji ltar bslab par bgyi/ de skad ces gsol pa dang / bcom ldan 'das kyis bka' stsal pa/ zla ba'i snying po chos thams cad dngos po dang bral ba gang yin pa de ni shes rab kyi pha rol tu phyin pa'o/ /'di lta ste dper na/ zla ba'i dkyil 'khor ni rtog pa med kyang gling bzhir 'khor bar byed cing mun pa rnams rab tu sel to/ /de bzhin du byang chub sems dpa' sems dpa' chen po shes rab kyi pha rol tu phyin pa la spyod pa ni rtog pa med kyang phyin ci log bzhi rnams la thugs rjes 'khor zhing rang bzhin gyis nyon mongs pa rnams sel bar byed kyang mi rtog pa'i phyir ro/ /zla ba'i snying pos gsol pa/ bcom ldan 'das byang chub sems dpa'i shes rab kyi pha rol tu phyin pa la du mchis/ bcom ldan 'das kyis bka' stsal pa/[ ]rigs kyi bu byang chub sems dpa'i shes rab kyi pha rol tu phyin pa la rnam pa gnyis te/[ ]zag pa dang bcas pa dang / zag pa med pa'o/ /rigs kyi bu de la zag 39.169b pa dang bcas pa'i shes rab ni mos pas spyod pa'i sa'i gnas skabs na gzung bar tog pa dang 'dzin par rtog pa ste/ de spong bar byed pa ni zag pa dang bcas pa'i shes rab kyi pha rol du phyin pa'o/ /rigs kyi bu de la zag pa med pa'i shes rab kyi pha rol du phyin pa ni mthong ba'i lam gyi rnam par mi rtog pa'i ye shes te/ ye shes de ni rtog pa thams cad dang bral ba'i phyir na mi rtog pa'i phyir ro/ /rigs kyi bu 'di lta ste/ shes rab kyi pha rol du phyin pa ni pha rol dang tshu rol gyi mtha' gang la yang mi gnas pa'i phyir ro/ /shes rab ni gzugs nas rnam pa thams cad mkhyen pa nyid kyi bar du rang bzhin med pas shes rab kyi pha rol du phyin pa rang bzhin med par shes par bya'o/ /gzugs la sogs pa'i chos rnams dus gsum du mi dmigs shing ma bcings ma grol bar shes par bya'o/ /rigs kyi bu chos thams cad mnyam pa nyid pas shes rab kyi pha rol du phyin pa mnyam pa nyid do/ /chos thams cad 'gag pa med pa nyid pas shes rab kyi pha rol du phyin pa 'gag pa med pa'o/ /chos thams cad mtshan ma med pas shes rab kyi pha rol tu phyin pa mtshan ma med pa'o/ /chos thams cad skye ba med pas shes rab kyi pha rol du phyin pa skye ba med pa'o/ /chos thams cad chad pa med pas shes rab kyi pha rol du phyin pa chad pa med pa'o/ /chos thams cad 'ong ba med pas shes rab kyi pha rol tu phyin pa 'ong ba med pa'o/ /chos thams cad 'gro ba med pa nyid pas shes rab kyi pha rol du phyin pa 'gro ba med pa nyid do/ /chos thams cad rtag pa med pa nyid pas shes rab kyi pha rol du phyin pa rtag pa med pa nyid do/ /chos thams cad tha dad pa med pa nyid pas shes rab kyi pha rol du phyin pa tha dad pa med pa nyid do/ /chos thams cad don gcig pa nyid pas shes rab kyi pha rol tu phyin pa don gcig pa nyid do/ /chos thams cad dngos po med pa'i ngo bo nyid pas shes rab 39.170a kyi pha rol tu phyin pa dngos po med pa'i ngo bo nyid do/ /mdor na thams cad mtshan ma dang / rang bzhin dang / ngo bo nyid las 'das pas ni shes rab kyi pha rol tu phyin pa'o/ /de lta bas na shes rab kyi pha rol tu phyin pa'i sngags so/ /tad+ya thA/ o~M pradz+nye pra dz+nye ma hA pra dz+nye tsan dra pra dz+nye/ sarba shA sa ka ri swA hA/ chos rnams thams cad rgyu las byung / /de nyid kun rdzob bden pa ste/ /rang bzhin med cing spros med pa/ /de nyid don dam spyod yul lo/ /bcom ldan 'das kyis de skad ces bka' stsal pa dang / byang chub sems dpa' zla ba'i snying po dang / thams cad dang ldan pa'i 'khor dang / lha dang / mi dang / lha ma yin dang /[ ]dri zar bcas pa'i 'jig rten yid rangs te/ bcom ldan 'das kyis gsungs pa la mngon par bstod do/[ ]/'phags pa zla ba'i snying po shes rab kyi pha rol du phyin pa theg pa chen po'i mdo rdzogs s+ho//[ ]// |