/ bod skad du/ zas kyi 'tsho ba rnam par dag pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ 'di skad bdag gis thos pa dus gcig na/ bcom ldan 'das 'od ma'i tshal na dge slong gi dge 'dun chen po brgya phrag phyed dang bcu gsum dang / gzhan yang dge slong pha dang / 57.106b dge slong ma dang / dge bsnyen pha dang / dge bsnyen ma dang / lha klu sde brgyad dang / byang chub sems dpa' mang po dang thabs gcig tu bzhugs so/ /de nas maud gal gyi bu chen po 'dug pa las langs te/ bcom ldan 'das la phyag 'tshal te 'di skad ces gsol to/ /bcom ldan 'das bdag sngon grong khyer du bsod snyoms la mchis pa'i shul logs su mi grangs khri stong snyed mchis te/ de dag gi mgo bo ni ri bzhin du che/ khog pa ni ri rab lhun po tsam 'dra/ mgrin pa ni khab bzhin du phra/ phan tshun bskyod cing mchi ba na shing rta lnga brgya shin tu 'khrol ba'i sgra byung ste/ de yang mi zad pa'i gzhob kyi dud pa kun nas 'thul lo/ /de ci'i dngos po lags pa dang / ci las gyur pa bcom ldan 'das kyis bka' stsal du gsol/ de nas bcom ldan 'das kyis bka' stsal pa/ maud gal gyi bu de dag ni 'dre bkren ltogs pa yin te/ sngon 'das pa'i dus na mchod sdong bshig pa dang / mchod ston sbyar ba bshig pas de lta bu'i sdig pa rnam par smin pa yin no/ /yang gcig tu na gzhan gyi mchod ston zos nas za gcig par ma byas pa'i sdig gi rnam par smin pa de yin no/ /mchod ston lhag ma za gcig par mi byed pa la ma byin cig /yon bdag gis lhag ma rnams dge 'dun la sbags pa'i gsol ba byos la bzod par gsol cig /sbags pa'i zas rnams dge 'dun rnams kyis gnang ba byin cig /gnang ba ma byin na dge 'dun rnams kyang ltung bar 'gyur ro/ /de nas maud gal gyi bus gsol pa/ bcom ldan 'das kyis bka' stsal pa ni yang dag pa'o/ /yon bdag su yang rung ste chos bzhin du bsdu ba'i phyir mchod pa'i yo byad 'byor tshogs te/ zas gcig par byas pa rnams ni zas kyi 'tsho ba dang ldan par 'gyur ro/ / 57.107a bcom ldan 'das kyis bka' stsal pa/ za gcig par ma byas pa rnams ni zas dang mi ldan par 'gyur ro/ /de ltar na nyi ma gcig za gcig pa thub na nyi ma drug khrir bsod nams dang bza' ba rnam par 'phel bar 'gyur ro/ /de la de ltar ma byas pa rnams ni nyi ma khri phrag drug cur 'dre ltogs par 'gyur ro/ /de ci'i phyir zhe na/ de'i sbyin pa ni shin du lci ba yin te/ gnyis na lcags kyi thu lum zos kyang sla'i/ yon bdag dad pa can gyi zas ni shin du bzhu bar dka' ste/ shin du yun ring por sdug bsngal bar 'gyur te/ tshe rabs khri phrag brgyar 'dre ltogs pa'i dngos por 'gyur ro/ /bsod nams kyi zas bya'o/ /cog la nan tan cher byos shig /snam phrag gam phu rung gi nang du khyer bar byas na tshe rabs lnga brgyar dmyal bar ltung ste/ lcags kyi thu lum dmar po mchan khung g.yon pa nas thal te mchan khung g.yas par thal lo/ /lhag ma mi bkur bar byos shig /chung ngu na khre'i 'bru gcig tsam khyer na yang lcags kyi 'khor lo tsam du 'gyur ro/ /dge bsnyen gyis kyang rung ste bsod nams kyi zas sbyar ro cog la thog ma nas myang ba'i sbags par mi bya'o/ /de myangs pas sbyar ba thams cad lhag ma'i sbags pa mi bya'o/ /byas pa don med par 'gyur ro/ /gnyis na ma byas kyang sla'o/ /de ci'i phyir zhe na/ lha thams cad mi dgyes par 'gyur ro/ /gnyen po thams cad mi dga' bar 'gyur ro/ /gang zhig myangs pa zhig yod na tshe rabs lnga khrir 'dre ltogs par 'gyur ro/ /sdug bsngal mi bzad pa sna tshogs kyang myong bar 'gyur ro/ /gang zhig phyin chad bsod nams 'dod pas tshul bzhin du bsod nams kyi zas gtsang sbras phyed pa dang / shin du gus par sbyar la lag pa shin du dag par bkrus nas tshod ma la sogs pa drod bag tu sbyar ro cog shin du bkab pa dang / rim gro bskyed de de dag 57.107b kyang sngar myang bar mi bya'o/ /de nas bsod nams su gyur cing lha thams cad kyang dga' bar 'gyur ro/ /gnyen po thams cad kyang dga' bar 'gyur ro/ /lha la sogs pa thams cad kyis srung zhing byin gyis rlob par 'gyur te yang dag par smra ba yin no/ /bsod nams rnam par smin pa ni brag cha dang gzugs brnyan bzhin no/ /de ltar 'dre bkren ltogs pa ni thog ma mi las gyur te/ thog ma lag pa mi gtsang bas dge 'dun gyi kha zas gtsang ma la reg pa dang / bdag gi lag pa mi gtsang bas dge 'dun gyi kha zas gtsang ma'i nang du bsngogs sam/ zas gtsang ma'i nang du kha zas mi gtsang ba bsres te dge 'dun la sbyin pa byas pas tshe rabs lnga brgyar 'dre ltogs par ltung ste/ rtag tu mi gtsang ba za zhing snam phyi sar mi gtsang ba za na/ snam phyi sa'i srungs mas lcags kyi ber kas gdengs te 'dre ltogs pa de rnams phyi sa'i sar mi snyan par byed do/ /mi'i rnag dang / khrag dang / mchil snabs dang / ngar snabs dang / khrud ma mi gtsang ba btsog pa za zhing mi gtsang ba srung zhing bud med bu btsas pa'i khrag mi gtsang ba 'dzag pa za bar 'gyur ro/ /de nas tshe rabs khri phrag lnga brgyar khyi dang phag pa dang / sbur ba la sogs pa'i lus su gyur nas rtag par mnam zhing btsog pa dang mi gtsang ba za bar 'gyur te/ de lta bu'i sdug bsngal bskal pa grangs khri stong du myong ste thar pa'i dus med do/ /rnam par thar par dka'o/ /shin du mi zad pa yang brjod kyis mi lang ngo / /gal te lag pa pho mtshan la reg gam/ lag pa mo mtshan la reg gam/ lag pa mi gtsang bas dge 'dun gyi kha zas gtsang ma la reg gam/ dge 'dun gyi kha zas la mi gtsang ba nang du bcug gam/ mi gtsang ba'i zas dge 'dun zar bcug na de lta bu'i sdig pa rnam par smin pa ni thams cad mig nad kyi rims kyis btab 57.108a pa dang sdig par mi shes pa'o/ /phyin chad dge 'dun gyi kha zas gtsang bar byas pa dang / lag pa gtsang mas dge 'dun gyi kha zas kyi snod la bzung ba dang / lag pa gtsang mas khre 'bras bkru ba dang / kha zas gtsang ma sbyin pa byas pa ni bsod nams bsam gyis mi khyab pa thob par 'gyur ro/ /phyin chad 'di yongs su grags pa dang / myur bu'i yid kyis zung shig /'tsho ba rnam par dag pa'i mdo rdzogs so// // |