// rgya gar skad du/ Ar+ya mai tre ya pras+thA na nA ma ma hA yA na sU tra/ bod skad du/ 'phags pa byams pa 'jug pa zhes bya ba theg pa chen po 'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan du yod pa na rgyal bu rgyal byed kyi tshal mgon med zas sbyin gyi kun dga' ra ba na dge slong lnga stong tham pa'i dge slong gi dge 'dun chen po dang / byang chub sems dpa' khri'i byang chub sems dpa'i dge 'dun chen po thams cad kyang mngon par shes pas mngon par shes pa yin zhing / byang chub sems dpa' sems dpa' chen po thams cad kyang phyir mi ldog pa sha stag dang thabs gcig tu bzhugs so/ /de'i tshe 'jam dpal gzhon nur gyur pa yang 'khor de nyid du 'dus par gyur te 'dug go/ /byang chub sems dpa' spobs pa brtsegs pa dang / byang chub sems dpa' rnam par rtse ba dang / byang chub sems dpa' spyan ras gzigs dbang phyug dang / byang chub sems dpa' mthu chen thob dang / byang chub sems dpa' zla 'od gzhon nur gyur pa dang / byang chub sems dpa' sems dpa' chen po byams pa yang 'khor de nyid du 'dus par gyur te 'khod do/ /de nas byang chub sems dpa' sems dpa' chen po byams pa stan las langs te bla gos phrag pa gcig tu 56.308a gzar nas pus mo g.yas pa'i lha nga sa la gtsugs te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /bcom ldan 'das gal te zhus nas zhu ba lung bstan pa'i slad du/ bcom ldan 'das kyis bdag skabs phye na/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas la bdag phyogs 'ga' zhig zhu'o/ /de nas byang chub sems dpa' byams pas zhus nas/ de'i tshe bcom ldan 'das cang mi gsung bar dus yol bar mdzad do/ /de nas 'jam dpal gzhon nur gyur pas byang chub sems dpa' sems dpa' chen po byams pa la 'di skad ces smras so/ /byams pa 'di ltar byas dang / zhus nas zhu ba lung bstan pa'i phyir khyod la de bzhin gshegs pa skabs 'byed par mdzad do/ /gal te de bzhin gshegs pa la sangs rgyas kyi theg pa las brtsams te zhu bar mi byed/ rang sangs rgyas kyi theg pa las brtsam sa te zhu bar mi byed/ nyan thos kyi theg pa las brtsams te zhu bar mi byed/ phung po dang / khams dang skye mched yongs su shes par bya ba'i phyir zhu bar mi byed/ 'dod chags dang / zhe sdang dang / gti mug zad par bya ba'i phyir zhu bar mi byed/ pha rol du phyin pa las brtsams te zhu bar mi byed/ pha rol du phyin pa yongs su rdzogs par bya ba'i phyir zhu bar mi byed na/ de ltar na zhus nas zhu ba lung bstan pa'i phyir khyod la de bzhin gshegs pa skabs 'byed par mdzad do/ /gal te khyod 'du byed rnams las yang dag par 'da' bar bya ba dang / mya ngan las 'das pa 'thob par bya ba'i phyir zhu bar mi byed dam/ gal te khyod bden pa khong du chud par bya ba'i phyir zhu bar mi byed dam/ lam dang / lam bsgom par bya ba'i phyir zhu bar mi byed dam/ gal te khyod 'bras bu thob par bya ba dang / mngon sum du bya ba'i phyir zhu bar mi byed dam/ gal te khyod mi gnas pa'i phyir de bzhin gshegs pa la zhu bar mi byed dam/ yi ge 56.308b rnams mi brjod par zhu bar byed na/ de lta na zhus nas zhu ba lung bstan pa'i phyir khyod la de bzhin gshegs pas skabs 'byed par mdzad do/ /de ci'i phyir zhe na/ byams pa ji tsam du sgro 'dogs pa de tsam du chags pa yod la/ sangs rgyas bcom ldan 'das rnams kyi chos bstan pa ni chags pa med pa'i phyir ro/ /de nas tshe dang ldan pa shA ri'i bus 'jam dpal gzhon nur gyur pa la 'di skad ces smras so 'jam dpal sgro btags pa sgro btags pa zhes bya ba/ 'jam dpal ji tsam gyis na sgro btags par 'gyur/ 'jam dpal gyis smras pa/ btsun pa shA ra dwa ti'i bu chos thams cad ni stong pa nyid mnyam pa nyid kyis mnyam pa yin/ mtshan ma med pa mnyam pa nyid kyis mnyam pa yin/ smon pa med pa mnyam pa nyid kyis mnyam pa yin/ ji lta ba bzhin mnyam pa nyid kyis mnyam pa yin/ de bzhin nyid mnyam pa nyid kyis mnyam pa yin/ chos kyi dbyings mnyam pa nyid kyis mnyam pa yin/ yang dag pa'i mtha' mnyam pa nyid kyis mnyam pa yin/ mi skye mi 'gag mi gnas pa mnyam pa nyid kyis mnyam pa yin/ ma skyes ma byung ba mnyam pa nyid kyis mnyam pa yin/ chos thams cad nam mkha' dang mnyam pa nyid kyis mnyam pa yin na/ btsun pa shA ra dwa ti'i bu gang dag 'di ltar chos thams cad mnyam pa la mi mnyam par brtags nas med bzhin du sgro 'dogs pas sgro 'dogs par byed de/ 'di ni sangs rgyas so/ /'di ni chos so/ /'di ni dge 'dun no/ /'di ni bdag go/ /'di ni sems can no/ /'di ni gang zag go/ /'di ni shed las skyes pa'o/ /'di ni shed bu'o/ /'di ni byed pa po'o/ /'di ni tshor ba po'o/ /'di ni chad pa'o/ /'di ni rtag pa'o/ /'di ni so so'i skye bo'o/ /'di ni nyan thos so/ /'di ni rang sangs rgyas so/ /'di ni byang chub sems dpa'o/ /'di ni kha na ma tho ba dang bcas pa'o/ /'di ni kha na ma tho ba med pa'o/ /'di ni zag pa dang bcas pa'o/ /'di ni zag pa med pa'o/ /'di ni 'dus byas so/ /'di ni 'dus ma byas so/ /'di ni kun nas nyon mongs pa'o/ / 56.309a 'di ni rnam par byang ba'o/ /'di ni dge ba'o/ /'di ni mi dge ba'o/ /'di ni 'jig rten pa'o/ /'di ni 'jig rten las 'das pa'o/ /'di ni 'khor ba'o/ /'di ni mya ngan las 'das pa'o/ /'di ni dngos po'o/ /'di ni dngos po ma yin pa'o/ /'di ni yod pa'o/ /'di ni med pa'o/ /'di ni thob pa'o/ /'di ni mngon par rtogs pa'o/ /'di ni mngon sum du bya ba'o/ /'di ni lam mo/ /'di ni lam gyi 'bras bu'o zhes bya ba 'di ni sgro btags pa zhes bya'o/ /de ci'i phyir zhe na/ btsun pa shA ra dwa ti'i bu mnyam pa nyid ni rnam par rtog pa med cing gang dag 'di ltar rnam par rtog pa de dag ni mnyam pa nyid du sgro 'dogs pa yin te/ mi mnyam par sgro 'dogs pa ni ma yin la/ gang dag mthong ba med par mnyam pa nyid mthong ba de dag ni mnyam pa nyid mthong ba yin/ sgro 'dogs pa la spyod pa ni mi mnyam par mthong ba yin zhing / gang dag mnyam pa nyid la sgro mi 'dogs pa de dag ni mnyam pa nyid du mthong ba yin la/ sgro 'dog pa la spyod pa ni mnyam pa nyid mthong ba ma yin pa'i phyir ro/ /bstan pa 'di bshad pa na dge slong nyis brgya len pa med par zag pa rnams las sems rnam par grol te/ dge slong de dag 'dul ba la dbang mdzad pa'i phyir bcom ldan 'das cang mi gsung bar dus yol bar mdzad do/ /de nas byang chub sems dpa' sems dpa' chen po byams pas 'jam dpal gzhon nur gyur pa la 'di skad ces smras so/ /'jam dpal kho bo ni nyan thos kyi theg pa las brtsams te de bzhin gshegs pa la zhu bar mi byed do/ /rang sangs rgyas kyi theg pa las btsams/ yang dag par rdzogs pa'i sangs rgyas kyi theg pa las brtsams te de bzhin gshegs pa la zhu bar mi byed pa nas kho bo ni mi gnas pa'i bar du de bzhin gshegs pa la zhu bar mi byed do/ /'jam dpal kho bo ni de bzhin gshegs pa la ci nas de bzhin nyid dang mi 'gal ba de ltar zhu bar byed do/ /'jam 56.309b dpal kho bo ni gang dag de bzhin nyid dang 'gal bar mi byed pa dang / gang dag chos thams cad dben pa nyid kyi phyir chos ci yang mi dmigs pa dang / gang dag chos kyi dbyings mi g.yo ba nyid kyi phyir 'dod chags dang / zhe sdang dang / gti mug rnams kyis mi gos pa dang / gang dag 'khor ba mi dmigs pa nyid kyi phyir 'khor ba las 'da' bar mi byed pa dang / gang dag gang nas kyang 'ong ba med pa nyid dang / gang du 'ang 'gro ba med pa nyid kyi phyir mya ngan las 'das pa thob par mi byed pa de dag gi phyir de bzhin gshegs pa la zhu bar byed do/ /'jam dpal kho bo ni ci nas kyang yi ge rnams kyang mi brjod tshig gi lam la yang mi dpyod la/ shes rab kyis kyang bye brag phyed par 'gyur ba dang / shes pa yang gang yang med la/ 'di la rnam par grol ba yang gang yang med pa de ltar de bzhin gshegs pa la zhu bar byed do/ /de ci'i phyir zhe na/ yi ge stong pa nyid kyi phyir dang / thams cad skye ba med pa nyid kyi phyir ro/ /de nas 'khor der byang chub sems dpa' gang dag 'dus par gyur pa de dag 'di snyam du sems te/ kye ma byang chub sems dpa' sems dpa' chen po byams pa 'di ni de kho na ltar ldem po ngag snel zhir 'dug pa'i tshig 'di dag kyang ston la brjod pa thams cad kyang chos nyid dang 'thun par sbyor ba las na zab mo'i shes rab dang ldan no snyam mo/ /de nas bcom ldan 'das la byang chub sems dpa' sems dpa' chen po rnam par rtse bas 'di skad ces gsol to/ /bcom ldan 'das byang chub sems dpa' sems dpa' chen po byams pa 'di de tsam du zab mo'i bzod pa la nges shing shes rab dang / spobs pa ston pa la mkhas pa ni ngo mtshar lags so/ /bcom ldan 'das byang chub sems dpa' sems dpa' chen po byams pas yun ji srid cig nas bla na med pa yang dag par rdzogs pa'i byang chub tu sems bskyed pa de bcom ldan 'das skye bo mang po la sman pa dang / skye bo mang po la 56.310a bde ba dang / lha dang mi rnams kyi don dang / sman pa'i slad du de bzhin gshegs pas legs par bka' stsal du gsol/ de ltar bgyis na byang chub sems dpa'i theg pa pa'i rigs kyi bu 'am/ rigs kyi bu mo rnams kyis gnas de dag kyang thos la/ 'jug pa de yang thos nas slar zhing bla na med pa yang dag par rdzogs pa'i byang chub la brtson par 'gyur lags so/ /de skad ces gsol pa dang / bcom ldan 'das kyis byang chub sems dpa' sems dpa' chen po rnam par rtse ba la 'di skad ces bka' stsal to/ /rigs kyi bu byang chub sems dpa' sems dpa' chen po byams pas ni yun ring po nas tshangs par spyad pa spyod do/ /rigs kyi bu byang chub sems dpa' sems dpa' chen po byams pas ni sngon gyi rgyal ba rnams la bya ba byas so/ /dge ba'i rtsa ba bskyed do/ /zab mo'i bzod pa dang ldan no/ /rigs kyi bu byang chub sems dpa' sems dpa' chen po byams pa yang dag par zhugs te/ bskal pa brgyad khri bzhi stong lon nas de'i 'og tu gdod ngas bla na med pa yang dag par rdzogs pa'i byang chub tu sems bskyed do/ /de skad ces bka' stsal pa dang / bcom ldan 'das la byang chub sems dpa' sems dpa' chen po rnam par rtse bas 'di skad ces gsol to/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas gang gi thad du/ byang chub sems dpa' sems dpa' chen po byams pas bla na med pa yang dag par rdzogs pa'i byang chub tu sems bskyed pa'i mtshan ci lags pa/ de bzhin gshegs pa dgra bcom pa yang dag par rdzogs pa'i sangs rgyas kyis legs par bka' stsal du gsol/ de skad ces gsol pa dang / bcom ldan 'das kyis byang chub sems dpa' sems dpa' chen po rnam par rtse ba la 'di skad ces bka' stsal to/ /rigs kyi bu de'i phyir legs 56.310b par rab tu nyon la yid la zung shig dang ngas khyod la bshad do/ /bcom ldan 'das de ltar 'tshal lo zhes gsol nas/ byang chub sems dpa' sems dpa' chen po rnam par rtse ba dang / thams cad dang ldan pa'i 'khor de bcom ldan 'das kyi ltar nyan pa dang / bcom ldan 'das kyis de dag la 'di skad ces bka' stsal to/ /rnam par rtse ba sngon byung ba 'das pa'i dus na bskal pa grangs med pa bas kyang ches grangs med pa/ yun ring zhing tshad med/ bsam gyis mi khyab/ dpag tu med pa'i snga rol de'i tshe de'i dus na de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das gser bzangs 'od ces bya ba 'jig rten du byung ngo / /rigs kyi bu de bzhin gshegs pa gser bzangs 'od kyi spu'i khung bu re re nas 'od zer bye ba khrag khrig 'bum phrag mang po byung ste/ de bzhin gshegs pa'i 'od zer de dag kyang gser gyi 'od ltar bzang la 'od zer re res kyang stong gsum gyi stong chen po 'jig rten gyi khams re re 'od kyis snang bar byed do/ /'od zer re res kyang pad ma bye ba khrag khrig 'bum phrag mang po dag gis shar phyogs 'gengs par byed do/ /lho phyogs dang / nub phyogs dang / byang phyogs dang / phyogs mtshams dang / steng dang / 'og kyang de dang 'dra'o/ /phyogs re rer yang de bzhin gshegs pa re res sangs rgyas kyi zhing bye ba khrag khrig 'bum phrag du ma 'gengs par mdzad do/ /de bzhin gshegs pa'i sku re res kyang sems can bye ba khrag khrig 'bum phrag du ma sangs rgyas dang / chos rnams la 'dul bar mdzad de/ phyir mi ldog pa la 'god de/ rigs kyi bu de bzhin gshegs pa dgra bcom pa yang dag par rdzogs pa'i sangs rgyas gser bzangs 'od 56.311a de'i gser gyi 'od kyis 'jig rten gyis khams/ rtag tu snang bar byed do/ /sangs rgyas kyi zhing de na nyi ma dang zla ba gnyis kyi ming med do/ /rgyu skar dang / gza' dang / skar ma dang / me'i 'od kyi ming yang mi grag go/ /de skad ces bka' stsal pa dang bcom ldan 'das la byang chub sems dpa' sems dpa' chen po rnam par rtse bas 'di skad ces gsol to/ /btsun pa bcom ldan 'das da ltar sangs rgyas kyi zhing de na ji ltar gdugs mtshan rnam par gzhag par 'gyur lags/ de skad ces gsol pa dang / bcom ldan 'das kyis byang chub sems dpa' sems dpa' chen po rnam par rtse ba la 'di skad ces bka' stsal to/ /rigs kyi bu de bzhin gshegs pa dgra bcom pa yang dag par rdzogs pa'i sangs rgyas gser bzangs 'od kyi sangs rgyas kyi zhing de nas gzhi chen po de rin po che sna bdun las grub pa yin te/ lag mthil ltar mnyam par 'gyur la rin po che snar bdun gyi sa gzhi chen po de las kyang rin po che sna bdun gyi pad ma shing rta'i phang lo tsam la mdzes shing blta na sdug pa dang / dri zhim po'i ngad ldang la yid du 'ong ba dag mngon par 'phags te/ pad ma re re las dri bsung gi ngad ldang ba'i dri des kyang stong gsum gyi stong chen po'i 'jig rten gyi khams khyab ste/ sems can gang dag gis dri de tshor ba de dag thams cad kyang bla na med pa yang dag par rdzogs pa'i byang chub tu nges so/ /pad ma de dag kyang snga dro'i dus kyi tshe na me tog rgyas la/ phyem red kyi dus kyi tshe ni rnyis par 'gyur te/ des na sems can de dag 'di snyam du sems te/ phyem red kyi dus la bab po snyam mo/ /rigs kyi bu de ltar na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas gser bzangs 'od de'i sangs rgyas kyi zhing de na nyin mtshan rnam par gzhag par mngon pa yod do/ /rigs 56.311b kyi bu sangs rgyas kyi zhing de na mi khom pa brgyad ni tha na ming tsam yang med do/ /sdug bsngal ba'i ming tsam dang / nyan thos dang rang sangs rgyas rnams kyang ming tsam yang med do/ /sangs rgyas kyi zhing de ni byang chub sem sa dpa' 'khrig pa'i chos dang bral ba/ dri nga ba med pa 'ba' shig gis yongs su gang bar gyur to/ /'dus pa re re la byang chub sems dpa' khrag khrig phrag bcu gnyis yod de/ de'i mjug tu bcom ldan 'das de'i byang chub sems dpa' dpag tu med grangs med pa 'dus par gyur to/ /de bzhin gshegs pa dgra bcom pa yang dag par rdzogs pa'i sangs rgyas gser bzangs 'od de yang chos gzhan mi ston te/ byang chub sems dpa'i sde snod phyir mi ldog pa'i 'khor lo 'ba' shig ston par mdzad do/ /byang chub sems dpa'i sde snod phyir mi ldog pa'i 'khor lo'i chos kyi rnam grangs gang zhe na/ 'di lta ste/ chos gang yang de bzhin nyid las phyir mi ldog pa dang / chos gang yang chos kyi dbyings las phyir mi ldog pa dang / chos gang yang yang dag pa'i mtha' las phyir mi ldog pa dang / 'dod chags 'dod chags kyi ngo bo nyid las phyir mi ldog pa dang / zhe sdang zhe sdang gi ngo bo nyid las phyir mi ldog pa dang / gti mug gti mug gi ngo bo nyid las phyir mi ldog pa dang / gzugs gzugs kyi ngo bo nyid las phyir mi ldog pa dang / tshor ba dang / 'du shes dang / 'du byed rnams dang / rnam par shes pa rnam par shes pa'i ngo bo nyid las phyir mi ldog pa dang / mig mig gi ngo bo nyid las phyir mi ldog pa dang / rna ba dang / sna dang / lce dang / lus dang / yid yid kyi ngo bo nyid las phyir mi ldog pa dang / ngo bo nyid gang yin pa de ni dngos po med la/ dngos po med pa gang yin pa de ni gang nas kyang phyir mi ldog la/ gang du yang mi 'jug pa'o/ /rigs kyi bu de ltar na de bzhin gshegs pa dgra bcom pa yang dag par rdzogs pa'i sangs rgyas gser bzangs 'od de/ 56.312a sangs rgyas kyi zhing de na byang chub sems dpa' de dag la byang chub sems dpa'i sde snod phyir mi ldog pa'i 'khor lo'i chos gyi rnam grangs yang dag par ston to/ /de'i tshe chos kyi rgyal po chos dang ldan pa gling bzhi pa'i dbang phyug 'khor los sgyur ba'i rgyal po gser mdog bya ba zhig byung ngo / /rigs kyi bu rgyal po gser mdog des bcom ldan 'das de bzhin gshegs pa dgra bcom pa yang dag par rdzogs pa'i sangs rgyas gser bzangs 'od de byang chub sems dpa'i dge 'dun chen po dang bcas pa la lo bye ba phrag brgyad bcu rtsa bzhi'i bar du mchod pa dang bsnyen bkur thams cad kyis bsnyed bkur byas/ bla mar byas/ ri mor byas/ mchod pa byas so/ /rigs kyi bu 'di ltar rgyal po chen po bzhi dang lha'i dbang po brgya byin dang / mi mjed kyi bdag po tshangs pa 'khor dang bcas pas kyang rgyal po gser mdog gi bsam pa rig nas/ bcom ldan 'das de bzhin gshegs pa gser bzangs 'od de la bsnyen bkur bya bar spro bar gyur to/ /rigs kyi bu rgyal po gser mdog des 'khor gyi khyams dpag tshad brgyad bcu rtsa bzhi pa zhig byas te/ 'khor gyi khyams der dar gyi lda ldi ni bres/ me tog gis ni pus mo nub pa tsam du khyab par byas/ steng gi bar snang la ni mu tig dmar po'i dra ba bres/ snying po'i spos kyi mchog gis ni bdugs te/ 'khor gyi khyams der de bzhin gshegs pa de'i gdan bye ba 'bum phrag dgu bcu rtsa dgu ri ba'i ras bcos bu bye ba khrag khrig 'bum phrag du ma bting ba khri'i rkang pa rin po che du mas spras pa zhig bshams so/ /byang chub sems dpa' re re'i stan yang bye ba phrag 'bum ri ba dag bshams so/ /de'i tshe de bzhin gshegs pa de dpag tshad nyis stong na bzhugs te/ rigs kyi bu 'di ltar rgyal po gser mdog gis gshegs shul dpag tshad nyis stong legs par rgyan 56.312b nas/ 'di lta ste/ lam de'i ngos g.yas g.yon du stegs bu rin po che sna tshogs kyis spras pa dag byas so/ /lam de yang pus mo nub pa tsam du me tog gis khebs par byas so/ /steng gi bar snang la ni rin po che sna tshogs kyi dra ba'i bla re bres so/ /stegs bu de dag la yang rin po che'i shing ljon pa 'phang du mda' rgyang gang tsam yod pa dag btsugs so/ /rin po che'i shing ljon pa gcig nas rin po che'i shing ljon pa gcig tu rin po che'i thag gu bres so/ /rin po che'i shing ljon pa gnyis gnyis kyi bar du rdzing rin po che'i stegs bus bskor ba gser gyi bye ma bdal ba/ bai dUr+ya'i them skas kyi rim pa dang bcas pa/ me tog ud pa la dang / pad ma dang / ku mu da dang / pad ma dkar pos gang ba/ ngur pa skad 'byin pa dang ldan pa dag byas so/ /de bzhin du rin po che'i shing ljon pa'i bar thams cad du yang rdzing dag byas te bkod pa de kho na dang 'dra bar bkod do/ /rin po che'i shing ljon pa thams cad kyi drung du me tog sil ma thogs pa'i mi lnga brgya lnga brgya bkod do/ /rin po che'i spos kyi snod thogs pa'i mi lnga brgya lnga brgya bkod do/ /rnga bo che dang / rdza rnga dang / khar rnga dang / kim pa la dang / pi bang dang / khar dkrol la sogs pa rol mo'i cha spyad rnam pa sna tshogs thogs pa'i mi lnga brgya lnga brgya bkod do/ /gdugs dang / rgyal mtshan dang / ba dan thogs pa'i mi lnga brgya lnga brgya bkod do/ /de ltar rin po che'i shing ljon pa re re'i drung thams cad du mi brgya phrag de snyed de snyed bkod nas/ gang gi tshe bcom ldan 'das de bzhin gshegs pa gser bzangs 'od phan tshun du gshegs pa de'i tshe khyod kyis me tog sil ma 'di dag gis gtor cig /tsan dan gyi phye ma 'di dag gis gtor cig /pog por 'di dag gis bdugs par gyis shig /sil snyan 'di dag kyang dkrol cig /gdugs dang / rgyal mtshan dang / ba dan 'di dag kyang sgrengs shig ces bsgo'o/ /rin po che'i shing ljon pa thams cad kyi 56.313a drung du rin po che'i me tog gi snod thogs pa'i mi lnga brgya lnga brgya yang bkod do/ /lhag ma rnams kyang de bzhin du sbyar te/ gang gi tshe de bzhin gshegs pa de lam 'di nas phan tshun du gshegs pa de'i tshe khyod kyis rin po che'i me tog 'di dag gis gtor cig ces bsgo'o/ /rigs kyi bu 'di ltar bcom ldan 'das de bzhin gshegs pa gser bzangs 'od de gtsug lag khang de nas byung ma thag du 'khor gyi khyams su gshegs te de'i bar du gtsug lag khang nas byang chub sems dpa' rnams la snang ba byung ngo / /rigs kyi bu 'di ltar lam dpag tshad nyis stong po de dag byang chub sems dpa' sems dpa' chen pos gang ste/ byang chub sems dpa' sems dpa' chen po re re phan tshun du 'dom re re tsam na 'greng ngo / /rigs kyi bu 'di ltar de bzhin gshegs pa de phan tshun du gshegs pa na/ 'di lta ste/ sangs rgyas kyi mthus byang chub sems dpa' re re'i mgo bo'i drang thad kyi steng na dngul gyi gdugs dkar po gser gyi rtsa ba can/ mu tig dmar po'i dra bas g.yogs pa gser gyi dril bu g.yer ka'i dra bas bskor ba/ ma bzung bar nam mkha' la phan tshun du 'gro'o/ /byang chub sems dpa' thams cad kyang de dang 'dra'o/ /rin po che'i gdugs de dag la dril bu g.yer ka'i dra ba btags pa gang yin pa de dag rlung gis bskyod pa las sgra snyan cing yid du 'ong ba 'byung ste/ rin po che'i gdugs de dag rlung gis bskyod pa las sgra ji lta bu 'byung ba de 'dra ba ni sil snyan yan lag 'bum dang ldan pa las kyang mi 'byung ngo / /rin po che'i gdugs dang dril bu g.yer ka de dag dang / rin po che'i shing ljon pa'i lo ma de dag dang / rin po che'i thag gu de dag dang / rin po che'i stegs bu de dag dang / sil snyan dang glu dbyangs de dag las kyang sangs rgyas kyi mthus chos kyi sgo rnam pa sna tshogs kyi sgra 'byung ste/ de na sems can gang dag sbyin pa la mos pa de dag gis ni 56.313b sbyin pa'i sgra thos so/ /gang dag tshul khrims la mos pa de dag gis ni tshul khrims kyi sgra thos so/ /de bzhin du gang dag bzod pa dang / brtson 'grus dang / bsam gtan la mos pa dang / gang dag shes rab la mos pa de dag gis ni shes rab kyi sgra thos so/ /de bzhin du stong pa nyid dang / mtshan ma med pa dang / smon pa med pa dang / skye ba med pa dang / 'gag pa med pa'i sgra dang / de bzhin du dbang po dang / stobs dang / byang chub kyi yan lag dang / lam gyi sgra dang / de bzhin du mngon par shes pa dang / stobs dang / mi 'jigs pa dang / so so yang dag par rig pa dang / sangs rgyas kyi chos ma 'dres pa dag gi sgra 'byung ste/ sems can rnams ji lta bur mos pa de lta bu'i sgra 'byung zhing thos so/ /chos kyi sgra de thos nas kyang sems can dpag tu med grangs med pa dag bla na med pa yang dag par rdzogs pa'i byang chub tu nges par gyur to/ /rigs kyi bu de bzhin gshegs pa dgra bcom pa yang dag par rdzogs pa'i sangs rgyas gser bzangs 'od de lam de nas phan tshun du gshegs pa na/ dbu'i drang thad kyi steng gi bar snang la rin po che 'bum phrag du mas spras pa'i lha'i rin po che'i gdugs ma bzungs bar 'phags te phan tshun du 'gro'o/ /rin po che'i gdugs de dang / dril bu g.yer ka de dag rlung gis bskyod pa las kyang sgra snyan cing yid du 'ong ba 'byung ste/ de bzhin gshegs pa'i phyag rgya zhes bya ba'i chos bstan pa byung ngo / /de skad ces bka' stsal pa dang / bcom ldan 'das la byang chub sems dpa' sems dpa' chen po rnam par rtse bas 'di skad ces gsol to/ /bcom ldan 'das de bzhin gshegs pa gser bzangs 'od de'i rin po che'i gdugs de las byung ba de bzhin gshegs pa'i phyag rgya zhes bgyi ba'i chos bstan pa gang lags pa de/ bcom ldan 'das de bzhin gshegs pas legs par bka' stsal du gsol/ de skad ces gsol pa dang / bcom ldan 'das kyis byang chub sems dpa' sems 56.314a dpa' chen po rnam par rtse ba la 'di skad ces bka' stsal to/ /rigs kyi bu de'i phyir legs par rab tu nyon la yid la zung shig dang / de bzhin gshegs pa'i phyag rgya'i brtsam pa tsam ngas bshad par bya'o/ /rigs kyi bu chos thams cad ni stong pa nyid kyi phyag rgya dang / mtshan ma med pa'i phyag rgya dang / smon pa med pa'i phyag rgya dang / skye ba med pa dang / 'gag pa med pa dang / gnas pa med pa'i phyag rgya dang / dngos po med pa'i phyag rgya dang / chos kyi dbyings kyi phyag rgya dang / de bzhin nyid kyi phyag rgya dang / yang dag pa'i mtha'i phyag rgya dang / ji lta ba bzhin gyi phyag rgya dang / 'dod chags dang bral ba'i phyag rgya dang / dben pa'i phyag rgya dang / rnam par grol ba'i phyag rgya dang / mtshan nyid med pa'i phyag rgya dang / byed pa med pa dang 'gro ba med pa'i phyag rgya dang / gzung du med pa dang gnas med pa'i phyag rgyas btab pa'o/ /rigs kyi bu chos thams cad ni nam mkha'i phyag rgyas btab pa'o/ /rigs kyi bu dper na nam mkha' la ni phyag rgya brko bar sla ba yang ma yin la phyag rgyar yang 'dug pa dang / phyag rgya'i 'bur yang gdab tu med de/ de ci'i phyir zhe na/ gnas kyang med/ rkyen yang med/ rgyu yang med/ skyed pa yang med/ rten yang med pa'i phyir ro/ /rigs kyi bu de bzhin du byang chub sems dpa' sems dpa' chen po gang chos thams cad nam mkha' dang 'dra ba dang / nam mkha'i rnam pa can dang / nam mkha'i ngo bo nyid dang / nam mkha' ston par yang dag par shes pa dang / nam mkha' la ni chos thams cad gdags su med par gnas te gdags pa tsam du zad do/ /ji ltar nam mkha'i chos thams cad gdags su med par gnas te gdags pa tsam du zad pa de bzhin du chos thams cad la yang gdags su med par gnas te/ gdags pa tsam du zad par yang dag par shes pa dang / gang chos rnams gdags pa tsam du shes pa de ni de bzhin nyid dang 'gal bar mi byed pa'o/ /gang de bzhin nyid dang 'gal bar mi byed pa de ni de 56.314b bzhin gshegs pa'i phyag rgya shes pa'o/ /'di ni de bzhin gshegs pa'i phyag rgya ste/ des na de bzhin nyid la rmongs par mi 'gyur ro/ /bstan pa 'di bshad pa na byang chub sems dpa' lnga rgyas mi skye ba'i chos rnams la bzod pa thob par gyur to/ /de nas bcom ldan 'das kyis byang chub sems dpa' sems dpa' chen po rnam par rtse ba la bka' stsal pa/ rigs kyi bu 'di ltar de bzhin gshegs pa dgra bcom pa yang dag par rdzogs pa'i sangs rgyas gser bzangs 'od de byang chub sems dpa'i dge 'dun dang bcas par 'khor gyi khyams der gshegs te der byon pa na lha 'bum dag mchod pa'i las bya ba la spro bar gyur te/ me tog ud pa la dang / pad ma dang / ku mu da dang / pad ma dkar po rnams 'thor bar byed do/ /lha'i me tog man dA ra ba'i char yang 'bebs so/ /sil snyan bye ba phrag 'bum dag kyang dkrol bar byed do/ /rigs kyi bu 'di ltar de bzhin gshegs pa gser bzang 'od de 'khor gyi khyams der bzhugs pa na rgyal po chen po bzhi dang / lha'i dbang po brgya byin dang / mi mjed kyi bdag po tshangs pa mchod pa'i las bya ba dang / bsnyen bkur bya ba dang / bla mar bya ba'i phyir nye bar gnas par gyur to/ /mchod pa ji lta bu dag gi phyir spro bar gyur ce na/ 'di lta ste/ de bzhin gshegs pa de byang chub sems dpa'i dge 'dun dang bcas par bzhugs pa la/ byang chub sems dpa' re re'i rgyab na glang po che dkar po rgyan thams cad kyis brgyan pa nye bar gnas la/ glang po che'i rgyal po de'i sna la yang 'di lta ste/ rlung dang nyi ma bskyab pa'i phyir rin po che'i gdugs gsal zhing blta na sdug pa thogs pa dang / glang po che'i rgyal po thams cad kyi sna la yang mu tig sngon po gsal ba'i mu tig gi do shal 'phyang ba dang / mu tig gi do shal de las kyang chu bsil zhing bai dUr+ya sngon po 'dra la yan lag brgyad dang ldan pa 'bab ste/ chu des chu'i bya ba byed pa'o/ /byang chub sems dpa' 56.315a dag 'khod ma thag tu 'di lta ste/ lha'i mthus lag pa g.yas pa la rin po che'i lhung bzed byung bar gyur to/ /lha rnams kyang byang chub sems dpa' de dag gi lhung bzed 'dzin par byed do/ /de bzhin gshegs pa gser bzangs 'od de la ni tshangs pa nyid rin po che'i gdugs thogs te snam logs na 'dug go/ /rin po che'i gdugs de las kyang mu tig gi do shal dag 'phyang ngo / /mu tig gi do shal de dag las kyang chu bsil zhing bai dUr+ya sngon po 'dra la yan lag brgyad dang ldan pa 'bab ste/ chu des de bzhin gshegs pa de'i chu'i bya ba mdzad do/ /lha'i dbang po brgya byin ni bcom ldan 'das de'i lhung bzed 'dzin to/ /rigs kyi bu 'di ltar de bzhin gshegs pa de byang chub sems dpa'i 'khor dang bcas par bzhugs ma thag tu byang chub sems dpa' de dag la lha mo re re mdun na 'dug ste/ lha'i spos dri zhim po sna du ma mchis la 'thag par byed do/ /spos de 'thag pa na yang rdzi phyogs dang rdzi phyogs ma yin par ser bu ldang ste/ ser bu des byang chub sems dpa' de dag gi lus la spos kyis phog par byed do/ /skyes bu dam pa de dag ni dri nga ba med pa ste/ de dag ni lha mo'i 'du shes kyang 'jug par mi byed la de dag ni spos kyi mtshan ma yang mi skyed na chags par lta ga la 'gyur te de ni gnas med do/ /rigs kyi bu 'di ltar rgyal po gser mdog des de bzhin gshegs pa gser bzangs 'od bzhugs par rig nas bu stong dang / bud med brgyad khri bzhi stong dang / rgyal po brgyad khri bzhi stong dang / khyim bdag brgyad khri bzhi stong dang / tshong dpon brgyad khri bzhi stong dang / blon po brgyad khri bzhi stong dang / bu mo brgyad khri bzhi stong dang / gzhan yang skye bo'i tshogs mang po dag dang lhan cig tu rang gi lag nas bca' ba dang bza' ba bsod pa mang po mchog tu gtsang bas tshim par byas te ci bzhed pa 56.315b bstabs so/ /tshim par byas shing ci bzhed pa bstabs te bshos gsol nas stsang sder gyur ste phyag bcabs par rig nas/ de bzhin gshegs pa la bye ba 'bum phrag dgu bcu rtsa dgu ri ba'i ras bcos bu phrugs gcig phul lo/ /byang chub sems dpa' re re la yang bye ba phrag 'bum ri ba'i ras bcos bu phrugs re re phul lo/ /phul nas skye bo'i tshogs chen po de dag dang / yul mi gtso bo rnams dang lhan cig tu thal mo sbyar nas 'di lta ste/ chos mnyan pa la gus pa'i phyir de bzhin gshegs pa'i spyan sngar 'khod do/ /rigs kyi bu 'di ltar de bzhin gshegs pa gser bzangs 'od des skye bo'i tshogs chen po gus par 'khod pa dang / byang chub sems dpa' rnams chos 'dod par thugs su chud nas sgo so so ba zhes bya ba'i chos kyi rnam grangs bstan to/ /de skad ces bka' stsal pa dang / bcom ldan 'das la byang chub sems dpa' sems dpa' chen po rnam par rtse bas 'di skad ces gsol to/ /bcom ldan 'das gang bcom ldan 'das de bzhin gshegs pa gser bzangs 'od des bstan pa'i byang chub sems dpa' rnams kyi sgo so so ba zhes bgyi ba'i chos kyi rnam grangs de gang lags/ bcom ldan 'das kyis chos kyi rnam grangs de legs par bka' stsal du gsol/ de ltar bgyis na byang chub sems dpa'i theg pa pa'i rigs kyi bu 'am/ rigs kyi bu mo rnams kyang sgo so so ba'i chos kyi rnam grangs de la slob par 'gyur lags so/ /de skad ces gsol pa dang / bcom ldan 'das kyis byang chub sems dpa' rnam par rtse ba la 'di skad ces bka' stsal to/ /rigs kyi bu de'i phyir legs par rab tu nyon la yid la zung shig dang / sgo so so ba'i chos kyi rnam grangs de las brtsam pa tsam zhig bshad par bya'o/ /rigs kyi bu byang chub sems dpa' rnams kyi sgo so so ba ni gzhan ma yin gyi pha rol tu phyin 56.316a pa drug kho nar zad de/ 'di lta ste/ sbyin pa'i pha rol du phyin pa dang / tshul khrims kyi pha rol du phyin pa dang / bzod pa'i pha rol du phyin pa dang / brtson 'grus kyi pha rol du phyin pa dang / bsam gtan gyi pha rol du phyin pa dang / shes rab kyi pha rol du phyin pa ste/ rigs kyi bu byang chub sems dpa' rnams kyi sgo so so ba ni de yin no/ /de ci'i phyir zhe na/ 'di nyid la sngon gyi de bzhin gshegs pa rnams kyis kyang bslabs nas bla na med pa yang dag par rdzogs pa'i byang chub mngon par rdzogs par sangs rgyas te chos kyi 'khor lo yang bskor/ sems can rnams kyang yongs su smin par mdzad nas yongs su mya ngan las 'das la/ ma 'ongs pa'i de bzhin gshegs pa rnams kyang sgo so so ba 'di nyid la bslabs nas bla na med pa yang dag par rdzogs pa'i byang chub mngon par rdzogs par 'tshangs rgya bar 'gyur zhing / da ltar byung ba'i dus kyi de bzhin gshegs pa dgra bcom pa yang dag par rdzogs pa'i sangs rgyas gang dag 'jig rten gyi khams dpag tu med grangs med pa dag na bzhugs shing 'tsho la gzhes pa'i de bzhin gshegs pa'i de dag kyang sgo so so ba'i chos kyi rnam grangs 'di nyid la bslabs nas bla na med pa yang dag par rdzogs pa'i byang chub mngon par rdzogs par sangs rgyas te chos kyi 'khor lo bskor bar mdzad pa'i phyir ro/ /rigs kyi bu gang byang chub sems dpa'i sgo so so ba yang dag par smra bas smra ba ni pha rol du phyin pa drug po 'di dag nyid yang dag par smra bas smra ba'o/ /de la sgo so so ba de'i bye brag ni gang yin/ nyes pa ni gang yin/ rnam par gnon pa ni gang yin/ nges par 'byung ba ni gang yin zhe na/ ser sna'i sems ni byang chub sems dpa'i nyes pa'o/ /kun du 'dzin pa'i sems ni byang chub sems dpa'i nyes pa'o/ /yongs su 'dzin pa'i sems ni byang chub sems dpa'i nyes pa'o/ /nor kun du 56.316b srung la bgo bsha' mi byed pa ni byang chub sems dpa'i nyes pa'o/ /de la byang chub sems dpa' gang ser sna'i sems rnam par gnon cing bcom nas sbyin pa yid la byed pa skyed pa de ni de'i rnam par gnon pa yin no/ /de longs spyod ji ltar chung yang rung / longs spyod rgya chen po dag yod kyang rung ste/ dge sbyong dang / bram ze dang / slong ba rnams la bgo bsha' byed la de dga' ba'i sems dang / kun du 'dzin pa med pa'i sems dang / mgu ba'i sems dang / rnam par smin pa la re ba med par sems can thams cad la snying rje bas phan pa'i dngos po sngon du btang ba'i sems bskyed pas lag pa brkyang ste/ sbyin pa sbyin par byed pa'i byang chub sems dpa' de ni sgo so so ba la slob pa yin te/ 'di ni byang chub sems dpa'i nges par 'byung ba'o/ /rigs kyi bu 'chal pa'i tshul khrims ni byang chub sems dpa'i nyes pa'o/ /nyams pa'i tshul khrims dang / 'dres pa'i tshul khrims dang / zhig pa'i tshul khrims dang / ral ba'i tshul khrims dang / nag nog gi tshul khrims ni byang chub sems dpa'i nyes pa'o/ /byang chub sems dpa'i 'chal pa'i tshul khrims dang / nyams pa'i tshul khrims dang / 'dres pa'i tshul khrims dang / zhig pa'i tshul khrims dang / ral ba'i tshul khrims dang / nag nog gi tshul khrims gang zhe na/ byang chub sems dpa' gang nyan thos kyi sems sam/ rang sangs rgyas kyi sems sam/ dmigs pa can gyi sems bskyed pa dang / nyan thos kyi theg pa 'am/ rang sangs rgyas kyi theg pa 'am/ dmigs pa'i lta ba 'dod pa dang / nyan thos kyi gtam 'am/ rang sangs rgyas kyi gtam 'am/ dmigs pa can gyi gtam la dga' bar 'dzin pa 'di ni byang chub sems dpa'i tshul khrims 'chal ba dang / tshul khrims nyams pa dang / tshul khrims 'dres pa dang / tshul khrims zhig pa dang / 56.317a tshul khrims ral ba dang / tshul khrims nag nog can zhes bya'o/ /byang chub sems dpa'i sgo so so ba la mi spyod pa dang / mi slob pa ni tshul khrims 'chal ba'i rab yin no/ /de skad ces bka' stsal pa dang / bcom ldan 'das la byang chub sems dpa' sems dpa' chen po rnam par rtse bas 'di skad ces gsol to/ /bcom ldan 'das ci'i slad du byang chub sems dpa' sems dpa' chen pos de bzhin gshegs pa'i bslab pa gzhan las 'gal ba bgyi na ni tshul khrims 'chal bar mi 'gyur la/ gang gi tshe nyan thos kyi sems sam/ rang sangs rgyas kyi sems sam/ dmigs pa can gyi sems bskyed pa de'i tshe ni tshul khrims 'chal ba'i rab tu 'gyur lags/ de skad ces gsol pa dang / bcom ldan 'das kyis byang chub sems dpa' sems dpa' chen po rnam par rtse ba la 'di skad ces bka' stsal to/ /rigs kyi bu byang chub sems dpas de bzhin gshegs pa'i bslab pa gzhan las 'gal bar byas sam/ ngas ltung bar 'gyur ba'i chos bzhi gang dag gsungs pa de dag gi nyes pa byas sam/ mi dge ba bcu'i las kyi lam yang dag par blangs te 'dug gam/ mtshams med pa lnga byas su zin kyang / byang chub sems dpa' de byang chub kyi sems kyang ma btang ma spangs te/ byang chub kyi sems dang ma bral la/ dmigs pa can gyi sems dang / mngon par zhen pa'i sems kyang mi skyed na byang chub sems dpa' de ni tshul khrims dang ldan pa kho na yin pa dang / tshul khrims ma nyams pa dang / tshul khrims ma 'dres pa dang / tshul khrims ma zhig pa dang / tshul khrims ma ral ba dang / tshul khrims nag nog can ma yin par gzung bar bya ste/ byang chub sems dpa'i sgo so so ba la spyod pa dang slob pa yang yin no/ /de ci'i phyir zhe na/ de dag ni byang chub sems dpa'i 56.317b byang chub la bar du gcod par byed pa ma yin pa'i phyir ro/ /byang chub sems dpa' sdig pa'i las byas pas srid par 'gro ba skyed du zin kyang 'on kyang byang chub sems dpa' ni ji tsam du srid par 'gro ba skyed pa de tsam du pha rol du phyin pa drug yongs su rdzogs par 'gyur ro/ /byang chub sems dpa' de bzhin gshegs pa'i bslab pa ji ltar bcas pa la bslabs su zin kyang de nyan thos kyi sems sam/ rang sangs rgyas kyi sems sam/ dmigs par lta ba dang lhan cig bsten par byed na byang chub sems dpa' byang chub sems dpa'i tshul khrims las nyams par 'gyur ro/ /rigs kyi bu dang byang chub sems dpa' gang byang chub kyi sems mi gtong la/ dmigs par lta ba'i sems kyang mi skyed pa'i byang chub sems dpa' de ni byang chub sems dpa'i sgo so so ba la spyod pa dang slob pa yin no/ /rigs kyi bu gzhan yang gnod sems kyi tha ba'i nyes pa'i sems ni byang chub sems dpa'i nyes pa'o/ /sems can rnams la mi snyoms pa'i yid la byed pa ni byang chub sems dpa'i nyes pa'o/ /sems can rnams dang chos rnams la tha dad par 'du shes pa ni byang chub sems dpa'i nyes pa'o/ /sems can rnams la dmigs pa la rten pa'i byams pa phyogs gcig pa ni byang chub sems dpa'i nyes pa'o/ /stong pa nyid la mi bzod pa ni byang chub sems dpa'i nyes pa'o/ /'di la ni sbyin no/ /'di la ni mi sbyin no snyam pa de ni byang chub sems dpa'i nyes pa'o/ /'di la ni yon dbul lo/ /'di la ni mi dbul lo snyam pa de ni byang chub sems dpa'i nyes pa'o/ /'di la ni chos bshad par bya'o/ /'di la ni chos bshad par mi bya'o snyam pa de ni byang chub sems dpa'i nyes pa'o/ /'di la ni bsnyen bkur bya'o/ /'di la ni bsnyen bkur mi bya'o snyam pa de ni byang chub sems dpa'i nyes pa'o/ / 56.318a byang chub sems dpa' ji tsam du so sor 'gyed par byed de/ 'di ni tshul khrims dang ldan pa'o/ /'di ni tshul khrims 'chal ba'o snyam du so sor phye nas tshul khrims 'chal ba la brnyas par byed pa de ni byang chub sems dpa'i nyes pa'o/ /de ci'i phyir zhe na/ byang chub sems dpa' ni sems can thams cad la sems mnyam pa dang / chos thams cad la sems mnyam par bya dgos shing nyi ma dang zla ba'i dkyil 'khor 'dra ba dang / sa dang chu dang me dang / rlung dang / nam mkha' lta bur snyoms pa'i sems dang / stong pa nyid la bzod pa dang ldan par bya dgos pa'i phyir ro/ /byang chub sems dpa' gang sems can gang yang yongs su mi gtong la/ mi gnas pa'i sems dang / tshad nges par mi byed pas sems can thams cad kyi phyir snying rje bskyed cing byams pas mos par byas te/ khyab par byas nas bsgrubs te gnas la/ chos rnams la yang stong ngo snyam du bzod pa de ni byang chub sems dpa'i sgo so so ba la spyod pa dang slob pa yin no/ /gzhan yang byang chub sems dpa' gang 'khor ba la tshad nges par byed pa de ni byang chub sems dpa'i nyes pa ste/ bskal pa 'di tsam gyi bar du ni bdag 'khor bar bya'o/ /bskal pa 'di tsam gyi bar du ni 'khor bar mi bya'o snyam pa de ni byang chub sems dpa'i nyes pa'o/ /sems can 'di snyed cig ni bdag gis grol bar bya'o/ /sems can 'di snyed cig ni bdag gis grol bar mi bya'o/ snyam pa de ni byang chub sems dpa'i nyes pa'o/ /'di ni brtson 'grus so/ /bdag ni brtson 'grus can no/ /bla na med pa yang dag par rdzogs pa'i byang chub 'di mngon par rdzogs par 'tshang rgya bar bya'o snyam pa de ni byang chub sems dpa'i nyes pa'o/ /de la byang chub sems dpa'i rnam par gzhom pa gang zhe na/ rigs kyi bu 'di la byang chub sems dpas 'di ltar go cha bgo bar bya ste/ 'khor ba'i sngon gyi mtha' 56.318b mi mngon no zhes ji skad du 'byung ba de srid du bdag 'khor ba na 'khor 'khor to/ /gal te bdag sems can re re'i phyir yang bskal pa de kho na snyed du 'khor ba na 'khor bar bya dgos par gyur na yang bdag gis spro bar bya'o/ /rnam grangs 'di bzhin du sems can thams cad kyi don gyi phyir phyi ma'i mtha'i mur thug pa de ji srid pa de srid du 'khor ba na 'khor dgos na yang bdag gis spro ste/ de yang brtson 'grus dang / nga rgyal dang / byang chub la mngon par zhen pa spangs la mi dmigs pa'i brtson 'grus kyi go chas spro bar bya'o snyam te/ de ltar byang chub sems dpa' go cha bgos pa de ni byang chub sems dpa'i sgo so so ba la spyod pa dang slob pa yin no/ /rigs kyi bu gzhan yang byang chub sems dpa' gang grong dang / grong khyer dang grol rdal dang / yul 'khor dang / rgyal po'i pho brang dag tu song na sems can rnams kyi don nus shing lcogs la/ 'os yin bzhin du de dgon pa'i phyogs dben pa cig tu 'dug nas dben pa na spyod cing bsam gtan gyi ro'i dga' ba dang / bde ba la rten cing gnas pa de ni byang chub sems dpa'i nyes pa'o/ /byang chub sems dpa' gang sbyin pa yang sbyin par byed la skyo ba yang med/ sems kyi dmigs pa la yang mi sten/ nang du yang dag 'jog kyang 'phel bar byed/ bsam gtan gyi ro myong ba yang med mi gnas pa'i bsam gtan pa yang yin na byang chub sems dpa' de ni byang chub sems dpa'i sgo so so ba la spyod pa dang slob pa yin no/ /rigs kyi bu gzhan yang byang chub sems dpa' gang shes rab kyi pha rol tu phyin pa la spyod pa na chos thams cad rang bzhin gyis stong par shes nas 'di la bdag gam/ sems can nam/ srog gam/ gang zag gang yang med do snyam du de ltar shes nas bdag nyid dul bar bya ba dang / zhi gnas la rnal 'byor du brtson par gnas la 56.319a sems can gzhan phyin ci log tu dmigs pa'i 'dzin 'khris zin pa de dag la stong pa nyid bdag med pa'i tshul de mi rjod mi ston/ brda sprod par mi byed pa de ni byang chub sems dpa' de'i thabs la mi mkhas pa yin par rig par bya ste/ nyes pa byed pa yang ma yin no/ /byang chub sems dpa' gang shes rab kyi pha rol tu phyin pa la spyod pa na chos thams cad ngo bo nyid med par shes shing chos thams cad ngo bo nyid kyis stong par shes nas 'di la bdag gam/ sems can nam/ srog gam/ gang zag gang yang med do snyam ste/ 'di ltar ngo bo nyid kyis stong pa'i chos 'di dag lus kyis mngon sum du byas te/ thams cad la mi dmigs pa'i sems dang ldan la/ sems can phyin ci log tu sems shing dmigs pa can gang yin pa de dag kyang phyin ci log gis zin cing dmigs pa'i sems su gyur pa de las rab tu grol bar byas nas/ de dag la yang chos thams cad ngo bo nyid med do zhes chos ston cing de dag kyang chos thams cad rang bzhin gyis stong ngo zhes bya ba la 'dzud par byed pa'i byang chub sems dpa' de ni thabs la mkhas pa yin par rig par bya ste/ byang chub sems dpa'i sgo so so ba la spyod pa dang slob pa yang yin no/ /rigs kyi bu de ltar na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas gser bzangs 'od bshos gsol nas/ 'khor gyis khyams der 'khor de'i nang du byang chub sems dpa'i sgo so so ba zhes bya ba'i chos kyi rnam grangs 'di rgyas par bshad do/ /bcom ldan 'das des chos kyi rnam grangs 'di bshad pa na sems can tshad med pa dag bla na med pa yang dag par rdzogs pa'i byang chub tu nges par gyur to/ /rigs kyi bu ngas bskal pa 'am/ bskal pa las lhag par byang chub 56.319b sems dpa'i sgo so so ba'i chos kyi rnam grangs las brtsams te/ chos bstan du zin kyang spobs pa 'am/ chos kyi sgo rnams zad par mi 'gyur mod kyi 'on kyang de'i brtsam pa tsam bstan pa yin no/ /rigs kyi bu de ltar na rgyal po gser mdog des de bzhin gshegs pa de byang chub sems dpa'i dge 'dun dpag tu med pa dang thabs gcig tu lo bye ba phrag brgyad bcu rtsa bzhi tham par bkod pa de lta bu dang / bsnyen bkur dang / phu dud du bya ba de lta bus bkur sti byas/ bla mar byas/ rim gro byas mchod pa byas so/ / de nas bcom ldan 'das la byang chub sems dpa' sems dpa' chen po rnam par rtse bas 'di skad ces gsol to/ /btsun pa bcom ldan 'das rgyal po gser mdog des de bzhin gshegs pa de dang / byang chub sems dpa' de dag gi gtsug lag khang ma bgyis lags sam/ de bzhin gshegs pa de dang / byang chub sems dpa' de dag gang na bzhugs bzhugs lags/ de skad ces gsol pa dang / bcom ldan 'das kyis byang chub sems dpa' sems dpa' chen po rnam par rtse ba la 'di skad ces bka' stsal to/ /rigs kyi bu de bzhin gshegs pa de dang / byang chub sems dpa' de dag gi rang rang gis sprul pa'i khang pa brtsegs pa'i nang na gnas gnas so/ /de nas bcom ldan 'das kyis byang chub sems dpa' sems dpa' chen po rnam par rtse ba la bka' stsal pa/ rigs kyi bu de ltar lo bye ba phrag brgyad bcu rtsa bzhi po de dag 'das pa'i tha ma'i nyin par rgyal po gser mdog gis de bzhin gshegs pa de la bshos gsol phul te/ slar gshegs par rig nas bsam pa 'di lta bu zhig bsams te/ ci bdag dge ba'i rtsa ba 'di brgya byin du 'gyur bar yongs su bsngo bar bya 'am/ 'on te tshangs par 'gyur ba yongs su bsngo bar bya 'am/ 'on te 'khor los sgyur ba thob par bya ba'i phyir yongs su bsngo bar bya snyam mo/ /de nas de'i sems bskyed pa bcom ldan 'das de bzhin gshegs pa gser bzangs 'od des thugs su chud 56.320a do/ /de nas de bzhin gshegs pas rgyal po de'i sems kyi yongs su rtog pa thugs kyis mkhyen nas rgyal po dang / skye bo'i tshogs mang po de dag gi mdun du steng gi bar snang la de bzhin gshegs pa'i sku de kho na bzhin du rnam pa thams cad yongs su rdzogs pa'i lus shig sprul te/ de steng gi bar snang de la 'dug nas rgyal po gser mdog la tshigs su bcad pa 'di skad ces smras so/ /dper na mi ni shes rab 'chal/ /byis pa'i rang bzhin gyur pa zhig /rgyal po bsnyen bkur byas nas ni/ /bya dga' chung ngu gsol bar byed/ /de bzhin la las sangs rgyas la/ /bsam gyis mi khyab mchod byas nas/ /tshangs pa brgya byin rgyal po'i srid/ /dma' ba'i gnas la 'dod par byed/ /rgyal por gyur dang brgya byin dang / /de bzhin tshangs par 'gyur ba rnams/ /'di dag mi rtag brtan ma yin/ /brnyan ma yin te 'jig tshul can/ /srogs chags kun la phan pa'i phyir/ /byang chub sems ni bskyed par gyis/ /sangs rgyas 'jig rten mkhas rnams kyis/ /de 'dra'i sems ni bsngags pa yin/ /rgyal po khyod ni yul 'khor bcas/ /mchod pa rgya chen byas zin gyis/ /byang chub sems ni bla na med/ /rgya chen sems ni khyod kyis bskyed/ /dma' ba'i smon lam ma 'debs shig /de ni byis pa'i spyod yul yin/ /shes rab bzang po mkhas par gyis/ /byang chub mchog la 'jug par gyis/ /mya ngan 'das pa 'dod pa'i phyir/ /sangs rgyas de bzhin gshegs rnams la/ /gang gis stong gsum thams cad kyang / /rin chen bkang ste phul ba bas/ /gang gis thal mo sbyar byas nas/ /sems kyi byang chub bsngo byas la/ /tshig tu brjod pa ma byas kyang / /de ni de bas shin du che/ /gang gis sems can thams cad la/ /bskal pa bye ba brjod med du/ /sems can kun 56.320b la bsnyen byas kyang / /de yi bcu drug char mi phod/ /gang zhig thal sbyar byang chub sems bskyed dang / /phyogs bcu dag na 'jig rten don mdzad pa/ /rnam 'dren sangs rgyas gang dag bzhugs rnams la/ /bsod nams 'dod pa'i mi 'gas sngon chad kyi/ /'khor bar bskal pa bye bar mchod pa bas/ /mi gang mkhas shing 'dzangs pa'i rang bzhin can/ /bde bar gshegs pa'i bstan la yid ches shing / /byang chub sems ni brtan por bskyed nas kyang / /bde gshegs mchod rten la ni me tog 'bul/ /'di ni de bas bsod nams khyad par brjod/ /byang chub sems kyis me tog 'bul byed la/ /bsod nams snga ma de ni dper mi rung / /rgya mtsho dang ni chu yi thigs pa bzhin/ /sangs rgyas zhing 'dir sems can ji snyed pa/ /bskal pa re re la ni sangs rgyas gyur/ /bskal pa mang por las gzhan mi byed par/ /bsod nams bshad kyang mtha' ni thug pa med/ /de dag byang chub sems kyi rnam smin bstan/ /bskal pa mtha' yas bar du bshad na yang / /chung zad tsam yang yongs su brjod mi 'gyur/ /sa gzhi dag las rdul ni blangs pa bzhin/ /de ltar rgyal po skyes mchog khyod kyis kyang / /byang chub sems kyi phan yon 'di thos nas/ /myur du blo gros dma' ba kun spangs la/ /byang chub phyir ni rgya chen sems skyed cig /'jig rten 'dren pa gser gyi mchod sdong 'od/ /bsam gyis mi khyab yon tan kun ldan pa/ /de yis byang chub sems kyi rnam par smin/ /'di 'dra zhes ni phan yon 'di dag bstan/ /byang chub sems kyi rnam smin bstan pa yi/ /bsod nams de la gal te gzugs yod na/ /zhing rnams gang gA'i bye snyed gang byas kyang / /de dag bkang bas cha tsam zad pa med/ /rjes su bstan pa 'di 'dra thos nas kyang / /rgyal po'i gtso bo sems ni dga' gyur te/ /sor mo bcu yi thal mo sbyar byas nas/ /sangs rgyas phyag 'tshal 56.321a zhes ni tshigs tu smras/ /byang chub phyir ni bdag gis sems bskyed do/ /bdag ni chos rje sangs rgyas grub par shog /byang chub rdul bral 'dus ma byas rtogs nas/ /sems can gang gA'i bye snyed dgrol bar bgyi/ /sangs rgyas sku des tshigs bcad 'di brjod nas/ /de tshe rgyal po'i gtso bo dga' gyur pa/ /shes nas stong gsum thams cad rab g.yos te/ /ngang pa'i rgyal po bzhin du mkha' las song / /rgyal po gser mdog sems ni dang gyur nas/ /bu dang bu mo de bzhin chung ma dang / /rgyal po dang ni tshong dpon khyim bdag rnams/ /sangs rgyas la ni phyag 'tshal 'dong zhes bos/ /bye ba brgya phrag drug bcus yongs bskor cing / /me tog rnams dang phreng dang bdug pa thogs/ /sangs rgyas ga la bar ni gnyi rgyud song / /zhabs la phyag 'tshal nas ni phyogs gcig 'dug /de bzhin bu dang bu mo chung ma dang / /blon po dang ni tshong dpon khyim bdag dang / /rgyal po gzhan dang de bzhin 'khor gyi rnams/ /de dag kyang ni phyag 'tshal gus par 'khod/ /lha rnams kyis kyang de bzhin bar snang thams cad khyab/ /sil snyan dkrol zhing me tog char pa phab/ /gser gyi mdog de yul gyi mis bskor nas/ /thal mo sbyar byas sangs rgyas zhu bar byed/ /stobs bcu ldan pa dpag med lha yi lha/ /mi 'dul kha lo sgyur ba khyod la zhu/ /gang gis byang chub sems ni brtan por bskyed/ /de yi bsod nams ji tsam skyed 'gyur lags/ /bcom ldan ji ltar spyod pa spyad bgyis na/ /bskal pa mang por sdug bsngal mi mthong bar/ /nges par bde dang bde blag tshim gyur pas/ /byang chub bdud rtsi mya ngan med pa rtogs/ /bdag gzhar rkang lag btang yang mi 'tshal zhing / /mgo dang rang sha stsal bar mi 'tshal bar/ /bdag ni nges par bde gnas spyod pa yi/ /thabs 'dir thub pas bdag la bstan du gsol/ /rtag tu bde dang bde blag 56.321b ldan par shog /nams kyang bdag lus sdug bsngal ma gyur cig /byams dang bzod dang dul dang sdom pa la/ /gnas nas bdag gis byang chub mchog rig shog /le lo ma mchis rtag tu bslab la slob/ /bdag gis bslab pa nams kyang gzhig mi bgyi/ /'dren pa bdag ni dam bcas brtan par bgyi/ /nams kyang tshig tsam lhur len yong mi bgyid/ /rang byung bsod nams 'bras bu bdag la gsungs/ /de bzhin gshegs pa theg pa bde ba gsungs/ /ji ltar spyod pa'i bslab pa bka' stsal gsol/ /thos nas ji ltar bstan bzhin gnas par bgyi/ /gser 'od gser bkod 'od bzangs des gsungs pa/ /kye kye sa yi bdag po mnyan par gyis/ /bde ba'i rgyu'i bsod nams khyod la bshad/ /bslab pa 'ang bshad kyis de phyir nga las nyon/ /gang gis stong gsum rin chen gang byas la/ /stobs bcu mnga' ba rnams la 'bul byed pa/ /de bas byang chub tu ni smon byed pa/ /bsod nams shin du mang po 'phel bar 'gyur/ /gang gis zhing rnams gang gA'i bye ma snyed/ /rin chen gang bar byas nas sbyin pa byin/ /de bas byang chub tu ni smon byed pa/ /bsod nams shin du mang po 'phel bar 'gyur/ /gang gis bskal pa bye ba khrag khrig tu/ /sems can thams cad la ni mchod pa byed/ /de bas byang chub tu ni smon byed pa/ /bsod nams shin du mang po 'phel bar 'gyur/ /gal te sems can thams cad dgra bcom gyur/ /ye shes dbang thob gyur pa de dag la/ /bsod nams 'dod pa'i gang zag la la zhig /bskal pa khrag khrig bar du mchod pa byed/ /gang gis snying rje bskyed nas byang chub tu/ /rgya chen sems ni skyed par byed gyur te/ /sems can la la gang gis byang chub tu/ /sems kyi gtso bo bskyed pa byas nas kyang / /gom pa bdun ni bor ba'i bsod nams 'di/ /de bas khyad par 'phags par 'gyur ba yin/ / 56.322a gal te sems can mtha' dag sangs rgyas te/ /spobs pa mtha' yas ldan pa nyid gyur la/ /ji ltar sngon gyi 'khor ba'i bskal pa'i bar/ /sems can gcig pus mchod pa byas pa dang / /mkhas pa'i mi ni gang yang rung ba yis/ /byang chub mchog tu sems ni bskyed nas kyang / /me tog gcig pu phul ba'i bsod nams 'di/ /de bas khyad par 'phags par 'gyur ba yin/ /bskal pa bye ba khrag khrig mang por ni/ /bsod nams de yi bshad pa brtsams byas kyang / /bsod nams 'bras bu de yi bshad pa ni/ /nams kyang zad par 'gyur ba ma yin no/ /rigs kyi bu 'di ltar bcom ldan 'das de bzhin gshegs pa gser bzangs 'od des rgyal po gser mdog de la 'di skad ces bka' stsal to/ /rgyal po chen po chos gcig dang ldan na/ byang chub sems dpa' sems dpa' chen po myur du theg pa bde bas bla na med pa yang dag par rdzogs pa'i byang chub mngon par rdzogs par 'tshang rgya bar 'gyur la/ sdug bsngal ba dang / yid mi bde ba yang mi 'gyur ro/ /chos gcig po gang zhe na/ 'di lta ste/ bag yod pa ste/ rgyal po chen po byang chub sems dpa' bag yod pa ni myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /de la bag yod pa gang zhe na/ 'di lta ste/ bslab pa yongs su mi gtong ba dang / dam bcas pa las mi nyams pa dang / sems can thams cad la byams pas gnas pa dang / sems can thams cad yongs su mi gtong ba dang / byang chub la 'dun pa brtan pa dang / brtson 'grus mi gtong ba dang / dge ba'i bshes gnyen rnams la sten cing bsnyen bkur byed pa dang / chos la gus pa dang / thos pa mang pos chog mi shes pa dang / gzhan dag la chos kyi bgo bsha' byed pa dang / zang zing med par chos ston pa dang / sbyangs pa'i yon tan dang / 56.322b yo byad bsnyungs pa rnams mi gtong ba dang / 'dod pa nyung ba dang / chog shes pa dang / nga rgyal bcom pa dang / chos mnyan pa la rna blags te nyan pa dang / bla ma la gus pa dang / bzod pa la gnas pa dang / gnod sems kyi tha ba'i nyes pa rnam par spangs pa dang / zab mo stong pa nyid kyi chos la mos pa dang / dmigs par lta ba thams cad rnam par spangs pa dang / nang du yang dag 'jog la 'dun pa drag po dang ldan pa dang / sems can yongs su smin par bya ba la mi g.yel ba dang / 'du shes zlog pa dang / bre mo'i gtam rnam par spong ba dang / lus dang sems dben par gnas pa dang / dgon par gnas pa dang / sems mnyen pa dang / tshul khrims mchog tu mi 'dzin pa dang / bdag la mi bstod pa dang / gzhan la mi smod pa dang / 'gyod pa thams cad las nges par 'byung bar byed pa dang / mngon par 'byung ba dang / dge sbyong gi tshul la rgyun du dga' ba dang / gsong por smra ba dang / bzhin khro gnyer med pa dang / chos thams cad skye ba med pa dang / 'gag pa med pa la 'dzud pa dang / chos thams cad nam mkha' dang 'dra bar rtogs pa 'di ni byang chub sems dpa'i bag yod pa zhes bya'o/ /rgyal po chen po gzhan yang byang chub sems dpa'i bag yod pa ni 'di lta ste/ nyan thos dang rang sangs rgyas kyi sems dang / dmigs par lta ba'i sems tha na rmi lam du yang yid la mi byed pa ste/ rgyal po chen po 'di ni byang chub sems dpa'i bag yod pa'o/ /rgyal po chen po chos bzhi dang ldan pa'i byang chub sems dpa' ni myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur te/ mgo bo dang / rkang lag dang / mig dang / yan lag dang / sha dang / khrag dang / rus pa dang / rkang dang / tshil dang / mdog dang / lpags pa dang / lus thams cad yongs su gtang ba yang yongs su gtang mi dgos par bdog pa thams cad yongs su gtong bar yang 56.323a 'gyur la/ theg pa bde bas kyang bla na med pa yang dag par rdzogs pa'i byang chub mngon par rdzogs par 'tshang rgya bar 'gyur te/ bzhi gang zhe na/ rgyal po chen po 'di la byang chub sems dpa' ni dge ba'i chos yongs su btsal ba la yi dam brtan pa yin te/ de ni dge ba'i rtsa ba gang ci skyed kyang rung ste/ de la brtan por gnas shing zhum pa med pa'i sems dang ldan la theg pa chen po la shin du brtan no/ /rgyal po chen po gzhan yang byang chub sems dpa' ni tshul khrims kyi phung po shin du yongs su dag pa/ 'phags pa dang mkhas pas bsngags pa/ bla na med pa yang dag par rdzogs pa'i byang chub kyis yongs su zin pa dang ldan pa yin te/ des ni bdag nyid tshul khrims la gnas par rig nas chos kyi dga' ba nyams su myong ngo / /rgyal po chen po gzhan yang byang chub sems dpa' ni byams pas gnas pa dang / bsam gtan la bsam gtan pa dang / mi gnas pa'i bsam gtan pa yin te/ rgyal po chen po byang chub sems dpa' ting nge 'dzin la gnas shing mi gnas pa yid la byed pa dang / sems can thams cad la snyoms pa'i sems dang ldan pa'i bde bar gnas pa ci 'dra ba de lta bu'i bde ba'i rnam pa gzhan med de/ rgyal po chen po gzhan yang byang chub sems dpa' ni ji lta ba bzhin du chos la rtog pa yin te/ de ni 'di ltar ji lta ba bzhin du yongs su rtog ste/ 'du byed kyi rnam pa 'di dag thams cad ni stong pa ste/ 'di la bdag gam/ sems can nam/ srog gam/ gang zag gam/ yongs su gtong ba gang yin pa 'am/ yongs su btang ba gang yin pa 'am/ len pa gang yin pa 'am/ bzod par byed pa gang yin pa 'am/ gang la bzod par bya ba 'am/ bzod par bya ba gang yin pa 'am/ rtsom pa gang yin pa 'am/ gang gi phyir rtsom pa 'am/ bsam gtan byed pa gang yin pa 'am/ bsam gtan du bya ba gang 56.323b yin pa 'am/ sgom par byed pa gang yin pa 'am/ bsgom par bya ba gang yin pa gang yang med do snyam mo/ /de de ltar ji lta ba bzhin du rtog pa na 'dus byas kyi chos thams cad rang bzhin gyis stong par rig nas dmigs par lta ba gang la yang mngon par zhen pa med la bde bar yang gnas te/ rgyal po chen po chos bzhi po de dag dang ldan pa'i byang chub sems dpa' sems dpa' chen po ni bde ba thams cad dang ldan par myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /rigs kyi bu de ltar rgyal po gser mdog des bye ba khrag khrig 'bum phrag dgu bcu rtsa dgu ri ba'i gos kyi sbyin pa de bzhin gshegs pa de la phul nas bcom ldan 'das de bzhin gshegs pa dgra bcom pa yang dag par rdzogs pa'i sangs rgyas gser gzangs 'od de la 'di skad ces gsol to/ /bcom ldan 'das sems can thams cad la glo ba rje ba'i slad du bdag gis bla na med pa yang dag par rdzogs pa'i byang chub tu sems bskyed do zhes gsol nas/ de'i tshe tshigs su bcad pa 'di dag gsol to/ /bdag ni zhum pa ma mchis sems kyis su/ /mi mchog spyan sngar tshig ni gsol bar bgyi/ /sems can kun la snying rje bskyed nas kyang / /'dren pa sems ni byang chub gzhol bar bgyi/ /bdag la nams kyang g.yo sgyu ma mchis te/ /stobs bcu ldan pas bdag gi bsam pa mkhyen/ /yon tan mnga' ba grags chen 'dra ba ni/ /lha mi gzhan la bdag gis dbang ma mchis/ /bdag ni sdug rnams skyabs dang skyob pa dang / /dpung gnyen gyur te sdug bsngal chos rnams dgrol/ /khyu mchog bdag nyid bde la gnas nas kyang / /srog chags rnams ni bdag gis de la dgod/ /'dren pa bde gshegs gsungs pa'i chos gang dag /de la bdag ni spyad phyir gnas par bgyi/ /'dren 56.324a pa ji ltar khyod ni lha mis mchod/ /de ltar bdag kyang mi rnams mchod rten shog /byang chub thams cad mchog ni tshol bgyid cing / /bskal pa mang por sbyin pa sbyin par bgyi/ /zas skom gos dang shing rta bzhon pa dang / /gser dngul rin chen du ma'i sbyin pa bgyi/ /'dren pa bdag ni bslab la gus par bgyid/ /de ni ji bzhin yongs su bsrung bar bgyi/ /nyams par mi bgyid gang la 'ang gnas mi bgyid/ /'dren pa bdag ni tshul khrims dag par bgyid/ /sems can kun la snyoms pa'i bsam pa yis/ /srog chags rnams la byams pa'i sems su bgyi/ /bkur sti bgyis dang bkur sti ma bgyis la/ /mtho bar 'gyur dang dma' bar 'gyur ma mchis/ /bskal pa bye ba mang po bsam yas par/ /bdag ni ji srid sngan chad 'khor bar gyur/ /mi dpa' khyod la brten nas de srid du/ /sems can gcig gi phyir yang spro bar bgyi/ /lha mi'i 'dren pa bde gshegs gsungs pa yi/ /bsam gtan bde ba de la gnas par bgyi/ /'dren pa bsam gtan bde la reg gnas shing / /rtag tu dgon pa'i gnas su gnas par bgyi/ /bdag ni stong pa nyid la nges par bgyi/ /lta ba la ni rten par yong mi bgyid/ /dma' ba'i spyod pa rtag tu rnam par spang / /mchog gi spyod pa dri med spyad par bgyi/ /rigs kyi bu de ltar rgyal po gser mdog gis bla na med pa yang dag par rdzogs pa'i byang chub tu sems bskyed ma thag pa de'i mod la stong gsum gyi stong chen po'i 'jig rten gyi khams 'di rnam pa drug tu rab tu g.yos so/ /rgyal po brgyad khri bzhi stong po de dag gis kyang bla na med pa yang dag par rdzogs pa'i byang chub tu sems bskyed do/ /khyim bdag brgyad khri bzhi stong po de dag dang / tshong dpon brgyad khri bzhi stong po de dag dang / bu dang bu mo dang / chung ma de dag dang / gzhan skye bo'i tshogs chen po de dag dang / lha'i bu brgyad khri bzhi stong rnams rgyal po gser mdog de'i 56.324b rjes su slob cing thams cad kyis bla na med pa yang dag par rdzogs pa'i byang chub tu sems bskyed do/ /rigs kyi bu 'di ltar rgyal po gser mdog des bu thu bo rgyal por bcug go/ /bcug nas kyang bu rnams dang / bu mo rnams dang / chung ma rnams dang / tshong dpon dang / khyim bdag dang / blon po dang / rgyal phran rnams dang lhan gcig tu srog chags bye bas bskor te dad pas khyims nas khyim med par rab tu byung ngo / /de dag de ltar rab tu byung nas lo khri'i bar du tshangs par spyod pa yongs su dag pa yongs su byang ba spyad do/ /rgyal po gser mdog gis kyang mngon par shes pa bsgrubs nas mang du thos pa'i mthar phyin par gyur to/ /byams pa'i ting nge 'dzin kyang bsgrubs so/ /de dge ba'i rtsa ba de dang / lhag pa'i bsam pa yang dag par zhugs pa des 'khor los sgyur ba'i rgyal por gyur pas sangs rgyas nyi khri mnyes par byas te/ sangs rgyas bcom ldan 'das de dag thams cad la yang na bza' dang / zhal zas dang / gzims cha dang / gdan dang / snyun gyi gsos sman dang / yo byad kyis bsnyen bkur byas/ bla mar byas nas sangs rgyas bcom ldan 'das de dag thams cad kyi thad du dad pas khyim nas khyim med par rab tu byung ngo / /rigs kyi bu de'i tshe de'i dus na rgyal po gser mdog tu gyur pa de gzhan zhig yin pa snyam du khyod som nyi 'am/ yid gnyis sam/ the tsom za na rigs kyi bu khyod kyis de ltar mi blta'o/ /de ci'i phyir zhe na/ byang chub sems dpa' sems dpa' chen po byams pa 'di de'i tshe de'i dus na rgyal po gser mdog tu gyur to/ /rigs kyi bu de'i tshe de'i dus na tshangs par gyur pa bcom ldan 'das de bzhin gshegs pa dgra bcom pa yang dag par rdzogs pa'i sangs rgyas gser gzangs 'od de la mchod pa'i las la brtson par gyur pa gang yin pa de gzhan zhig yin pa snyam du khyod som nyi 'am/ yid 56.325a gnyis sam/ the tshom za na rigs kyi bu khyod kyis de ltar mi blta'o/ /de ci'i phyir zhe na/ rnam par rtse ba khyod nyid de'i tshe de'i dus na tshangs par gyur to/ /rigs kyi bu de'i tshe de'i dus na lha'i dbang po brgya byin bcom ldan 'das gser bzangs 'od la bsnyen bkur dang rim gro byed par spro bar gyur pa gang yin pa de gzhan zhig yin pa snyam du khyod som nyi 'am/ yid gnyis sam/ the tsom za na rigs kyi bu khyod kyis de bltar mi blta'o/ /de ci'i phyir zhe na/ nga nyid de'i tshe de'i dus na lha'i dbang po brgya byin du gyur te/ byang chub tu sems ma bskyed par mi gnas pa'i sems kyis de bzhin gshegs pa de la bsnyen bkur byas so/ /rigs kyi bu de'i tshe de'i dus na sems can ji snyed kyis rgyal po gser mdog dang lhan cig tu bla na med pa yang dag par rdzogs pa'i byang chub tu sems bskyed pa de dag gi nang na tha na sems can gcig kyang bla na med pa yang dag par rdzogs pa'i byang chub las phyir ldog pa ngas ma mthong ste/ de dag thams cad ni shes rab che ba dang / brtson 'grus che ba sha stag ste/ byang chub kyi phyogs kyi chos rnams yang dag par bsgrubs shing / pha rol du phyin pa drug yongs su rdzogs par byas nas sangs rgyas kyi zhing tha dad pa dag tu mtshan tha dad pa'i de bzhin gshegs par gyur te 'jig rten du byung nas thams cad kyis chos kyi 'khor lo bskor te/ chos kyi 'khor lo bskor nas yongs su mya ngan las 'das so/ /de bzhin gshegs pa dgra bcom pa yang dag par rdzogs pa'i sangs rgyas de dag thams cad kyang nga dang / khyod dang / byang chub sems dpa' byams pa dang / 'khor 'dir byang chub sems dpa' sems dpa' chen po 'dus pa gang yin pa 'di dag gis kyang mthong ngo / /mchod pa byas so/ /bsnyen bkur byas so/ /de bzhin gshegs 56.325b pa de dag gi dam pa'i chos kyang bzung ngo / /de nas bcom ldan 'das la byang chub sems dpa' sems dpa' chen po rnam par rtse bas 'di skad ces gsol to/ /bcom ldan 'das bla na med pa yang dag par rdzogs pa'i byang chub de tsam du yun ring du thogs pa dang / bla na med pa yang dag par rdzogs pa'i byang chub tu sems bskyed pa yang de tsam du dka' ba ni ngo mtshar lags so/ /de ci'i slad du zhe na/ der srog chags bye ba khrag khrig 'bum phrag de snyed kyis bcom ldan 'das de bzhin gshegs pa dgra bcom pa yang dag par rdzogs pa'i sangs rgyas gser bzangs 'od de'i gsung rab la bla na med pa yang dag par rdzogs pa'i byang chub tu sems bskyed la/ bcom ldan 'das kyis ni ma bskyed pa'i slad du'o/ /de skad ces gsol nas/ bcom ldan 'das kyis byang chub sems dpa' sems dpa' chen po rnam par rtse ba la 'di skad ces bka' stsal to/ /rigs kyi bu de ni de bzhin te/ khyod ji skad zer ba bzhin du bla na med pa yang dag par rdzogs pa'i byang chub 'di ni yun ring du thogs so/ /bla na med pa yang dag par rdzogs pa'i byang chub tu sems bskyed pa yang dka'o/ /rigs kyi bu ngas mngon par shes pa bcom ldan 'das de bzhin gshegs pa dgra bcom pa yang dag par rdzogs pa'i sangs rgyas gser bzangs 'od de'i sngon rol dang de'i 'og tu yang sangs rgyas mang po bye ba khrag khrig phrag 'bum dag la ngas ri mo byas/ mchod pa byas/ bkur sti byas/ bla mar byas mod kyi/ de srid du ngas bla na med pa yang dag par rdzogs pa'i byang chub tu sems ma bskyed de gzhan du na nga 'di snyam du sems te/ sangs rgyas bcom ldan 'das 'di dag de tsam du mdzes shing de tsam du blta na sdug la/ de tsam du snying du sdug pa ni ngo mtshar to snyams ste/ de dag la nga'i sdug 56.326a pa'i sems dang / dga' ba dang / gus pa skyed par zad de/ des bla na med pa yang dag par rdzogs pa'i byang chub tu ni sems ma bskyed do/ /rigs kyi bu de bas na rnam grangs 'dis khyod kyis 'di ltar rig par bya ste/ sangs rgyas bye ba khrag khrig 'bum phrag dpag tu med grangs med pa dag dang / rang sangs rgyas bye ba khrag khrig 'bum phrag dpag tu med grangs med pa dag dang / nyan thos bye ba khrag khrig 'bum phrag dpag tu med grangs med pa dag la byang chub sems dpa' rnams kyis ji ltar mchod pa byas su zin kyang de srid du yang de dag bla na med pa yang dag par rdzogs pa'i byang chub tu sems mi skyed de/ gzhan du na phyis gang gi tshe dge ba'i rtsa ba yongs su 'dus par gyur pa de'i 'og tu bla na med pa yang dag par rdzogs pa'i byang chub tu sems bskyed par zad do/ /de nas bcom ldan 'das kyis de'i tshe tshigs su bcad pa 'di dag bka' stsal to/ /dang po dag ni don dam gzigs pa dang / /grags pa chen po shes rab pha rol son/ /mi mchog sangs rgyas bye ba khrag khrig dang / /bsam yas rnams la gus pas mchod pa byed/ /dang por yon tan 'byung gnas rnams mchod kyang / /bdag ni mkhas pa chos kun shes pa'i mchog /'jig rten mchod rten sangs rgyas gyur cig ces/ /de srid du yang sems ni skyed mi byed/ /de dag rang rgyal bye ba snyed la yang / /gus pa bskyed nas mchod pa byed mod kyi/ /mi 'dul kha lo sgyur ba rdzogs sangs rgyas/ /gyur ces sems ni de srid skyed mi byed/ gus pa rgya chen yang dag bskyed nas kyang / /dbang du gyur pa bye snyed mchod mod kyi/ /ye shes rgya mtsho mi mchog 'dra bar ni/ /de srid du yang sems ni skyed mi byed/ /don dam gzigs pa rnams kyi 56.326b gzugs mthong nas/ /dga' ba'i shugs ni rgya chen bsam mi khyab/ /mkhas pa mi 'dul rdzogs pa'i sangs rgyas su/ /gyur ces sems ni de srid skyed mi byed/ /gang tshe de dag bsod nams rgya chen bsag /lus dang yid kyis bden pa bsgoms pa na/ /'dren pa mi rnams mchog tu gyur cig ces/ /byang chub don du sems ni skyed par byed/ /de dag gis ni bskal pa bye ba snyed/ /bsnyen bkur byas pas bsod nams tshogs bsags nas/ /sems dge ba dang 'jam zhing mnyen pa yis/ /de tshe byang chub tu yang sems skyed de/ /bdag gis dge ba'i rtsa ba gang bsags pa/ /des ni bdag kyang thams cad gzigs gyur cig /nams kyang bdag gi smon lam nyams ma gyur/ /de dag de skad smon lam 'jug par 'gyur/ /bdag gis dge ba'i rtsa ba gang bsags pa/ /des ni srog chags thams cad rgal gyur cig /mi dge'i las ni bdag gis gang byas pa/ /de yi 'bras bu mi bzad bdag gis spang / /mthu dang brtson 'grus brtan po bskyed nas ni/ /phyi nas byang chub mchog tu sems kyang bskyed/ /sems ni nams kyang zhum par ma gyur cig /dga' ba rgya chen bsam yas thob gyur cig /mkhas pa sems la dmigs par mi byed de/ /byang chub mi dmigs bdag nyid kun mi dmigs/ /chos 'di mtha' dag stong par shes na ni/ /des na byang chub sems ni brjed mi 'gyur/ /de skad ces bka' stsal pa dang / bcom ldan 'das la byang chub sems dpa' sems dpa' chen po rnam par rtse bas 'di skad ces gsol to/ /bcom ldan 'das ci'i slad du byang chub sems dpa' sems dpa' chen po byams pa la/ byams pa zhes bgyi/ byang chub sems dpa' sems dpa' chen po byams pa 'dis ming 'di ga las rnyed lags/ de skad ces gsol pa 56.327a dang / bcom ldan 'das kyis byang chub sems dpa' sems dpa' chen po rnam par rtse ba la 'di skad ces bka' stsal to/ /rigs kyi bu sngon byung ba 'das pa'i dus na bskal pa grangs med pa bas kyang ches grangs med pa yun ring po tshad med pa 'das pa de'i tshe de'i dus na de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das rin chen gdugs shes bya ba 'jig rten du byung ste/ rigs kyi bu de bzhin gshegs pa rin chen gdugs de btsas ma thag tu gom pa bdun bor ba na gnas gtsang ma'i ris kyi lha rnams kyis steng gi bar snang la rin po che sna bdun gyi gdugs bzung ngo / /rin po che'i gdugs des kyang stong gsum gyi stong chen po'i 'jig rten gyi khams thams cad snang bar byas so/ /der lha rnams kyis kye ma 'di ni de bzhin gshegs pa rin chen gdugs shes bya bar 'gyur ro zhes sgra bsgrags te/ des na de bzhin gshegs pa de'i mtshan rin chen gdugs shes bya bar gyur to/ /de'i tshe de'i dus na de bzhin gshegs pa dgra bcom pa yang dag par rdzogs pa'i sangs rgyas rin chen gdugs de'i brtan gsung rab la dge slong blo gros brtan po zhes bya ba tshong dpon gyi rigs las rab tu byung ba zhig yod de/ rigs kyi bu dge slong blo gros brtan po de bsod snyoms par gyur to/ /de'i tshe de'i dus na de bzhin gshegs pa rin chen gdugs de'i bstan pa la bab pa na 'dzam bu'i gling de na grong brgyad khri bzhi stong yod do/ /grong khyer brgyad khri bzhi stong yod do/ /grong rdal brgyad khri bzhi stong yod do/ /yul 'khor brgyad 56.327b khri bzhi stong yod do/ /tshong 'dus brgyad khri bzhi stong yod do/ /dge slong blo gros brtan po de yang grong dang / grong khyer dang / grong rdal dang / yul 'khor dang / tshong 'dus de dag thams cad du bsod snyoms kyi phyir rgyu bar gyur la/ de 'di snyam du sems te/ nam srog chags brgya tshang bar bslab pa'i gzhi lnga la ma bkod kyi bar du bdag gis zan mi bza'o snyam mo/ /rigs kyi bu 'di ltar dge slong blo gros brtan po des de lta bu'i yi dam de bcas nas grong ngam/ grong khyer ram/ grong rdal lam/ yul 'khor ram/ tshong 'dus gang dang gang du bsod snyoms kyi phyir rgyu ba de dang der nam srog chags brgya tshang bar bslab pa'i gzhi lnga la ma bkod kyi bar du zan mi za'o/ /rigs kyi bu dge slong blo gros brtan po des gang gi tshe nyi ma gcig gis srog chags brgya bslab pa'i gzhi lnga la bkod pa de'i dus dang de'i skabs kyang yod do/ /gang gi tshe nyi ma gnyis kyis srog chags brgya bslab pa'i gzhi lnga la bkod pa de'i dus dang de'i skabs kyang yod do/ /des zan bcad nas nyi ma gsum pa'i tshe zan za'o/ /gang gi tshe nyi ma gsum gyis srog chags brgya bslab pa'i gzhi lnga la bkod pa de'i dus dang de'i skabs kyang yod do/ /nyi ma bzhis srog chags brgya tshang bar bslab pa'i gzhi lnga la bkod pa de'i dus dang de'i skabs kyang yod do/ /rigs kyi bu gang gi tshe nyi ma lnga dang / drug dang / bdun gyis srog chags brgya bslab pa'i gzhi lnga la bkod pa de'i dus dang / de'i skabs kyang yod de/ de zhag bdun gyi bar du zan chad kyang sems can rnams la snying rje ba'i phyir sems yongs su mi skyo ste zhag brgyad pa'i tshe zan za'o/ /rigs kyi bu rnam grangs de lta bus dge slong blo gros brtan 56.328a po des lo brgyad khri bzhi stong gi bar du yongs su mi skyo ba'i sems kyis grong khyer chen po de dag tu song zhing grong dang / grong khyer dang / grong rdal dang / yul 'khor dang / tshong 'dus de dag tu song nas sems can de dag bslab pa'i gzhi lnga la bkod do/ /rigs kyi bu dge slong blo gros brtan po des lo brgyad khri bzhi stong po de dag 'das nas srog chags skyes pa dang / bud med dang / khye'u dang / bu mo bye ba khrag khrig 'bum phrag sum bcu rtsa drug bslab pa'i gzhi lnga la bkod do/ /rigs kyi bu 'di ltar dge slong blo gros brtan po de 'di snyam du sems te/ bdag gis sems can mang po 'di dag bslab pa'i gzhi lnga la bkod zin gyis/ bdag gis 'di dag bla na med pa yang dag par rdzogs pa'i byang chub la gzud gor ma chag go snyam ste/ de de dag gi thad du song nas lo bzhi khri nyis stong gi bar du sangs rgyas kyi bsngags pa brjod do/ /chos kyi bsngags pa brjod do/ /dge 'dun gyi bsngags pa brjod do/ /theg pa chen po'i bsngags pa brjod do/ /sems can bslab pa'i gzhi lnga la bkod pa gang yin pa'i sems can de dag gi nang nas lo brgyad khri bzhi stong po gzhan 'das nas srog chags bye ba phrag sum bcu tshang ba gang dag sngon gyi sangs rgyas rnams la dge ba'i rtsa ba bskyed pa rgya chen po la mos pa de dag bla na med pa yang dag par rdzogs pa'i byang chub la btsud do/ /lhag ma dman pa la mos pa rkyen gyi mthu dang ldan pa de dag ni rang sangs rgyas kyi byang chub dang / nyan thos kyi theg pa la sems bskyed du bcug go/ /rigs kyi bu 'di ltar dge slong blo gros brtan po de 'di snyam du sems te/ bdag gis sems can 'di dag theg pa gsum po la mos par byas zin gyis/ bdag gis 56.328b sems can 'di dag bag yod par gnas par bya ba'i phyir ting nge 'dzin la gzud pa bstan to snyam mo/ /rigs kyi bu de ltar dge slong blo gros brtan po des yang lo nyi khri chig stong gi bar du srog chags bye ba khrag khrig 'bum phrag sum bcu rtsa drug po de dag la ting nge 'dzin la dmigs pa'i lung phog go/ /rigs kyi bu dge slong blo gros brtan po des srog chags bye ba khrag khrig 'bum phrag sum bcu rtsa drug po'i sems can de dag thams cad ci nas byams pa'i ting nge 'dzin sgrub par 'gyur ba de lta de lta bur gdams ngag bstan cing / de lta de lta bur rjes su ston to/ /rigs kyi bu 'di ltar dge slong blo gros rtan po de gang gi tshe grong du 'gro ba de'i tshe byams pa'i ting nge 'dzin la snyoms par zhugs te 'gro'o/ /de byams pa'i ting nge 'dzin la snyoms par zhugs nas grong ngam/ grong khyer ram/ grong rdal lam/ yul 'khor ram/ tshong 'dus su bsod snyoms kyi phyir 'gro ste/ de 'gro ba na de na sems can byams pa la gnas pa gang yin pa de dag thams cad dge slong blo gros brtan po de'i rkang pa sgo'i them pa la bzhag pa'i tshe byams pa'i ting nge 'dzin la snyoms par zhugs par gyur to/ /rigs kyi bu lhag pa'i bsam pa dang / dge ba'i rtsa ba la yid ches pa dang / stong pa nyid la mos pa'i khyad par la ltos/ de'i phyir dge slong blo gros brtan po'i rkang pa sgo'i them pa la bzhag pa'i tshe sems can de dag thams cad byams pa'i ting nge 'dzin la ji ltar 'dzud pa bzhin du byams pa'i ting nge 'dzin la snyoms par zhugs so/ /de nas de'i tshe dge slong blo gros brtan po de'i byams pa'i ting nge 'dzin gyi rnam par 'phrul pa de lta bu mthong nas sa bla pa'i lha rnams kyis a la la byang chub 56.329a sems dpa' sems dpa' chen po 'di ni byams par 'gyur te/ 'di ltar 'di grong dang / grong khyer dang / grong rdal dang / yul 'khor dang / tshong 'dus su 'gro ba na sems can rnams byams pa'i ting nge 'dzin la snyoms par 'jug pa'i phyir ro zhes sgra sgrogs shing skad 'byin par byed do/ /sa bla pa'i lha rnams kyi sgra thos nas bar snang gi lha rnams kyis sgra bsgrags shing skad phyung ngo / /de dag gi sgra thos nas rgyal chen bzhi'i ris kyi lha rnams dang / sum bcu rtsa gsum pa'i lha rnams dang / 'thab bral dang / dga' ldan dang / 'phrul dga' dang / gzhan 'phrul dbang byed kyi lha rnams nas gnas gtsang ma'i lha rnams kyi bar du gcig nas gcig tu sgra thos nas a la la byang chub sems dpa' sems dpa' chen po 'di ni byams par 'gyur te/ 'di ltar 'di grong dang / grong khyer dang / grong rdal dang / yul 'khor dang / tshong 'dus su song ba na sems can rnams byams pa'i ting nge 'dzin la snyoms par zhugs pa'i phyir ro zhes sgra bsgrags shing skad phyung ngo / /de'i ming de la yang bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rin chen gdugs des rjes su yi rang bar mdzad de/ 'di skad du byang chub sems dpa' dge slong blo gros brtan po 'di ni srid par 'gro ba'i 'chi 'pho dang skye ba thams cad du byang chub sems dpa' sems dpa' chen po byams pa zhes bya bar 'gyur te/ mngon par grags par 'gyur ro/ /byang chub thob pa'i tshe yang 'di'i ming de nyid du 'gyur te 'jig rten du nyan thos kyi dge 'dun dpag tu med pa dang / rin po che bkod pa'i sangs rgyas kyi zhing gi bde ba thams cad dang ldan pa'i sems can rnams 'dus pa'i nang du de bzhin gshegs pa dgra bcom pa yang dag par rdzogs pa'i sangs rgyas byams pa zhes bya bar 'gyur ro zhes lung bstan to/ /rigs kyi bu de'i tshe de'i dus na dge slong 56.329b blo gros brtan po zhes bya bar gyur pa de gzhan zhig yin pa snyam du khyod som nyi 'am/ yid gnyis sam/ the tsom za bar srid de/ de tshun chad tshe rabs thams cad du ming 'di lta ste/ byams pa zhes bya ba 'ba' shig tu gyur to/ /byang chub thob pa'i tshe yang 'di'i ming 'di lta ste/ de bzhin gshegs pa dgra bcom pa yang dag par rdzogs pa'i sangs rgyas byams pa zhes bya ba de kho nar 'gyur te/ rigs kyi bu rgyu ni de yin no/ /rkyen ni de yin te/ des na byang chub sems dpa' sems dpa' chen po byams pa la byams pa zhes bya'o/ /de nas bcom ldan 'das kyis byang chub sems dpa' sems dpa' chen po byams pa'i sngon byung ba 'di bshad ma thag pa de'i mod la stong gsum gyi stong chen po'i 'jig rten gyi khams 'di rnam pa drug tu g.yos so/ /steng gi bar snang la yang lha'i glu dbyangs grag go/ /me tog gi char yang bab po/ /de nas de'i tshe rgyal po chen po bzhi dang / lha'i dbang po brgya byin dang / mi mjed kyi bdag po tshangs pa dang / gzhan yang lha'i bu 'bum phrag du ma dag gis lha'i me tog mAn dA ra ba dag khyer nas byang chub sems dpa' sems dpa' chen po byams pa ga la ba der gtor te/ tshig 'di skad du kye ma byang chub sems dpa' sems dpa' chen po byams pa 'di ni skye bo mang po la phan pa'i phyir zhugs te/ skye bo mang po la bde ba dang / 'jig rten la snying brtse ba dang / lha dang / mi rnams kyi skye bo phal po che'i don dang / phan pa dang bde ba'i phyir go cha chen po bgos te/ 'di ltar thams cad mkhyen pa nyid ma thob par yang sems can bye ba khrag khrig 'bum phrag de snyed kyi don byas pa'i phyir ro/ /sems can gang dag byang chub sems dpa' sems dpa' chen po byams pa'i ming tsam thos pa de dag kyang rnyed pa'i mchog legs par rnyed pa yin na sha'i mig gis mngon sum du mthong nas dga' ba thob pa de dag lta ci smos/ 56.330a btsun pa bcom ldan 'das byang chub sems dpa' sems dpa' chen po byams pa la bdag cag phyag 'tshal lo zhes smras so/ /de nas lha'i bu de dag gis tshig de skad ces smras ma thag pa de'i mod la skye bo'i tshogs chen po dang bcas/ lha dang / mi dang / lha ma yin dang bcas pa'i 'jig rten gyis tshig 'thun par tshig 'di skad du byang chub sems dpa' sems dpa' chen po byams pa la phyag 'tshal lo/ /byang chub sems dpa' sems dpa' chen po byams pa la phyag 'tshal lo/ /phyag 'tshal lo zhes smras so/ /chos kyi rnam grangs 'di bstan pa na srog chags khri nyis stong chos rnams la chos kyi mig rdul med cing dri ma dang bral ba rnam par dag go/ /dge slong lnga stong ni len pa med par zag pa rnams las sems rnam par grol lo/ /srog chags stong phrag du ma ni dge ba'i rtsa ba yongs su smin par gyur te/ de dag kyang de bzhin gshegs pa dgra bcom pa yang dag par rdzogs pa'i sangs rgyas byams pa'i 'khor 'dus pa gnyis pa la dgra bcom pa mngon sum du byed par 'gyur ro zhes de dag kyang bcom ldan 'das kyis lung bstan to/ /de nas tshe dang ldan pa kun dga' bo stan las langs te/ bla gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /bcom ldan 'das chos kyi rnam grangs 'di'i ming ci lags/ 'di ji ltar gzung bar bgyi/ de skad ces gsol pa dang / bcom ldan 'das kyis tshe dang ldan pa kun dga' bo la 'di skad ces bka' stsal to/ /kun dga' bo de'i phyir khyod kyis chos kyi rnam grangs 'di'i ming byams pa'i dang po sems bskyed pa zhes bya bar zung shig /byang chub sems dpa' rnam par rtse bas zhus pa zhes bya bar yang zung shig / 56.330b byang chub sems dpa' lung bstan pa zhes bya bar yang zung shig /de bzhin gshegs pa'i phyag rgya bstan pa zhes bya bar yang zung shig /byang chub sems dpa'i sgo so so ba zhes bya bar yang zung shig /kun dga' bo chos kyi rnam grangs 'di gzung ba'i phyir dang / gzhan dag la yang rgyas par yang dag par bstan par bya ba'i bar gyi phyir khyod la gtad do/ /kun dga' bo rigs kyi bu 'am/ rigs kyi bu mo gang gis stong gsum gyi stong chen po'i 'jig rten gyi khams 'di rin po che sna bdun gyis gang bar byas te/ de bzhin gshegs pa rnams la phul ba bas ni gang gis byang chub sems dpa' sems dpa' chen po byams pa'i dang po 'jug pa 'di thos nas sems kyi rgyud byang chub tu gzhol ba dang / byang chub tu smon pas mos par byed dam/ 'dzin tam/ 'chang ngam/ kun chub par byed dam/ sgom 'am/ gzhan dag la rgyas par yang dag par ston par byed na 'di ni de bas ches bsod nams mang du skyed par 'gyur ro/ /de nas de'i tshe bcom ldan 'das kyis tshigs su bcad pa 'di dag bka' stsal to/ /mi lus 'thob pa rnyed par dka'/ /sangs rgyas 'byung ba'ang rnyed par dka'/ /sangs rgyas dad pa rnyed par dka'/ /byang chub sems kyang rnyed par dka'/ /gnas skabs bzhi po 'di dag ni/ /bskal pa bye bar rnyed dka' ste/ /de phyir thob nas ma spangs shig /mthu rtsal dag kyang chud ma gzan/ /mi lus thob pa rnyed pa dang / /sangs rgyas 'byung ba rnyed pa dang / /sangs rgyas dad pa 'ang rnyed pa dang / /byang chub sems ni bskyed gyur na/ /de phyir brtson 'grus bskyed nas kyang / /rtag tu bag ni yod par gyis/ /drang srong chen po de dag gis/ /bag yod pas ni byang chub brnyes/ /sangs rgyas chos rnams thams cad kyi/ /rtsa ba'i sgo dang tshul gyi lam/ /bag yod pa dang brtson 'grus yin/ /mkhas pa rnams 56.331a kyang 'di la slob/ /bcom ldan 'das kyis de skad ces bka' stsal nas/ byang chub sems dpa' rnam par rtse ba dang / byang chub sems dpa' byams pa dang / thams cad dang ldan pa'i 'khor de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa byams pa 'jug pa zhes bya ba theg pa chen po'i mdo rdzogs so// // rgya gar gyi mkhan po pradz+nyA bar ma dang / dzi na mi tra dang / su ren dra bo d+hi dang / zhu chen gyi lots+tsha ba ban d+he ye shes sde la sogs pas bsgyur cing zhus te gtan la phab pa/ / |