@#/ /rgya gar skad du/ Ar+ya man dzu shrI bi ha ra nA ma ma hA yA na su tra/ bod skad du/ 'phags pa 'jam dpal gnas pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod kyi phung po'i ri la dge slong lnga brgya tsam gyi dge slong gi dge 'dun chen po dang / byang chub sems dpa'i dge 'dun chen po dang yang thabs gcig tu bzhugs te/ de nas bcom ldan 'das phyem red kyi dus kyi tshe nang du yang dag 'jog las bzhengs nas 'khor mang pos yongs su bskor cing mdun gyis bltas nas chos ston to/ /de nas 'jam dpal gzhon nur gyur pa 'chag cing dge slong lnga brgya po thams cad kyi gnas khang nas gnas khang du byung ste/ gnas brtan shA ri'i bu'i gnas khang ga la ba der song ste phyin nas/ 'jam dpal gzhon nur gyur pas gnas brtan shA ri'i bu gcig pu dben par 'dug ste nang du yang dag bzhag nas bsam gtan byed par mthong ngo / /mthong nas gnas brtan shA ri'i bu la 'di skad ces smras so/ /btsun pa shA ri'i bu khyod bsam gtan byed dam/ smras pa/ 'jam dpal de bzhin no/ /'jam dpal gyis smras pa/ ci btsun pa shA ri'i bu khyod nyon mongs pa spangs pa 56.299a rnams spang ba'i phyir bsam gtan byed dam/ 'on te ma spangs pa rnams spang ba'i phyir bsam gtan byed/ ci btsun pa shA ri'i bu khyod 'das pa la gnas te bsam gtan byed dam/ 'on te ma 'ongs pa la gnas te bsam gtan byed dam/ 'on te da ltar byung ba la gnas te bsam gtan byed/ ci btsun pa shA ri'i bu khyod gzugs la gnas te bsam gtan byed dam/ 'on te tshor ba dang / 'du shes dang / 'du byed rnams dang / rnam par shes pa la gnas te bsam gtan byed/ ci btsun pa shA ri'i bu khyod mig la gnas te bsam gtan byed dam/ 'on te rna ba dang / sna dang / lce dang / lus dang / yid la gnas te bsam gtan byed/ ci btsun pa shA ri'i bu khyod gzugs la gnas te bsam gtan byed dam/ 'on te sgra dang / dri dang / ro dang / reg bya dang / chos rnams la gnas te bsam gtan byed/ ci btsun pa shA ri'i bu khyod 'dod pa'i khams la gnas te bsam gtan byed dam/ 'on te gzugs kyi khams dang / gzugs med pa'i khams la gnas te bsam gtan byed/ ci btsun pa shA ri'i bu khyod nang la gnas te bsam gtan byed dam/ 'on te phyi rol la gnas te bsam gtan byed dam/ 'on te phyi nang la gnas te bsam gtan byed/ ci btsun pa shA ri'i bu khyod lus la gnas te bsam gtan byed dam/ 'on te sems la gnas te bsam gtan byed/ shA ri'i bus smras pa/ 'jam dpal 'di ltar tshe 'di la bde bar gnas par bya ba dang / brjed pa med par gnas par bya ba'i phyir te de lta bu'i phyir bsam gtan byed do/ /'jam dpal gyis smras pa/ btsun pa shA ri'i bu chos gang dag tshe 'di la bde bar gnas pa 'am/ tshe 'di ma yin pa la bde bar gnas pa 'am/ brjed pa med pa'i chos de dag dmigs sam/ shA ri'i bus smras pa/ 'jam dpal bdag gis chos gang dag tshe 'di la bde 56.299b bar gnas pa 'am/ tshe 'di ma yin pa la bde bar gnas pa'i chos de dag yang dag par rjes su mi mthong zhing mi dmigs mod kyi/ 'on kyang 'jam dpal de bzhin gshegs pas nyan thos rnams la rab tu dben pa'i chos su gsungs pa gang yin pa de la bdag rten cing gnas so/ /'jam dpal gyis smras pa/ btsun pa shA ri'i bu gang de bzhin gshegs pas nyan thos rnams la rab tu dben pa'i chos su gsungs pa gang yin/ btsun pa shA ri'i bu gang la rten cing gnas/ shA ri'i bus smras pa/ 'jam dpal 'di la dge slong ni 'das pa la rten cing gnas so/ /ma 'ongs pa la rten cing gnas so/ /da ltar byung ba la rten cing gnas so/ /de bzhin du sbyar te/ sems kyi bar la rten cing gnas par khong du chud par bya ste/ 'jam dpal chos de dag ni de bzhin gshegs pas nyan thos rnams la rab tu dben par gsungs pa yin te/ bdag chos de dag la rten cing gnas so/ /'jam dpal gyis smras pa/ btsun pa shA ri'i bu gang gi phyir 'di skad ces 'das pa la rten cing gnas/ ma 'ongs pa la rten cing gnas/ da ltar byung ba la rten cing rab tu dben pa la gnas pa nas de bzhin du sbyar te/ sems kyi bar la rten cing rab tu dben pa la gnas shes smra/ btsun pa shA ri'i bu 'di lta ste/ gang 'das pa'i de bzhin nyid de yang yod pa ma yin/ gang ma 'ongs pa'i de bzhin nyid de yang yod pa ma yin/ gang da ltar byung ba'i de bzhin nyid de yang yod pa ma yin te/ de ltar chos de dag ni yod pa ma yin na/ ji ltar gnas brtan shA ri'i bu de 'di skad ces 'das pa la rten cing gnas/ ma 'ongs pa la rten cing gnas/ da ltar byung ba la rten cing gnas shes smra/ yod pa ma yin pa'i chos la ni gnas pa med do/ /yang btsun pa shA ri'i bu 'das pa'i de bzhin nyid dang / ma 'ongs pa dang / da ltar byung ba'i de bzhin nyid gang yin pa de ni ci yang ma yin/ 56.300a gang gis kyang ma yin/ gang gi yang ma yin/ gang la yang mi gnas te/ gang mi gnas pa de'i gnas dmigs su med do/ /yang btsun pa shA ri'i bu gang 'das pa dang / ma 'ongs pa dang / da ltar byung ba'i de bzhin nyid ces brjod cing kun tu gnas nas smra ba de dag ni de bzhin gshegs pa la skur ba 'debs pa'o/ /de ci'i phyir zhe na/ 'di ltar de bzhin nyid ni g.yo ba med pa rlom sems med pa'o/ /'di ltar de bzhin nyid ni nyams pa med pa'o/ /'di ltar de bzhin nyid ni stong pa'o/ /mtshan ma med pa'o/ /smon pa med pa'o/ /yang btsun pa shA ri'i bu gang 'das pa'i de bzhin nyid de yang dmigs su med/ gang ma 'ongs pa'i de bzhin nyid de yang dmigs su med/ gang da ltar byung ba'i de bzhin nyid de yang dmigs su med pa nas de bzhin du sbyar te/ sems kyi bar gyi de bzhin nyid de yang dmigs su med do/ /'on kyang btsun pa shA ri'i bu de bzhin nyid ma gtogs par gang bstan pa 'am/ rab tu bshad par nus pa'i chos gzhan gang yang mi dmigs so/ /shA ri'i bus smras pa/ 'jam dpal de bzhin gshegs pa de bzhin nyid la bzhugs nas chos ston tam/ 'jam dpal gyis smras pa/ btsun pa shA ri'i bu de bzhin nyid yod pa ma yin na/ ji ltar de bzhin gshegs pa de bzhin nyid la bzhugs te chos ston/ btsun pa shA ri'i bu chos kyang yod pa ma yin na/ ji ltar de bzhin gshegs pa de bzhin nyid la bzhugs te chos ston/ de bzhin gshegs pa yang yod pa ma yin na/ ji ltar de bzhin gshegs pa de bzhin nyid la bzhugs te chos ston/ chos thams cad kyang yod pa ma yin te/ dmigs su med/ de bzhin gshegs pa yang yod pa ma yin te dmigs su med do/ /de'i chos bstan pa na 'di 'dra ste/ 'di la dmigs pa 'am mi dmigs pa 56.300b gnyis kyis rab tu phye ba med do/ /de bzhin gshegs pa ni brjod pa'am mi brjod pas rab tu phye ba ma yin no/ /de ci'i phyir zhe na/ btsun pa shA ri'i bu 'di ltar de bzhin gshegs pa ni brjod pa yang dag par chad pa/ btags pa med pa/ gdags par bya ba ma yin pa'o/ /shA ri'i bus smras pa/ 'jam dpal su zhig chos bstan pa 'di lta bu 'di'i snod du 'gyur/ 'jam dpal gyis smras pa/ btsun pa shA ri'i bu gang 'dus byas kyi khams rnam par 'khrugs par mi 'gyur zhing yongs su mya ngan las 'da' bar 'dod par yang mi 'gyur ba de ni chos bstan pa 'di lta bu 'di'i snod du 'gyur ro/ /gang 'das pa'i chos rnams mi dmigs shing 'das pa'i chos rnams kun shes par mi 'gyur ba dang / gang 'das pa dang / ma 'ongs pa dang / da ltar byung ba'i chos rnams mi dmigs shing 'das pa dang / ma 'ongs pa dang / da ltar byung ba'i chos rnams kun shes par mi 'gyur ba de chos bstan pa 'di lta bu 'di'i snod du 'gyur ro/ /gang kun nas nyon mongs pa dang / rnam par byang ba mi mthong zhing de nye bar len par yang mi 'gyur ba de chos bstan pa 'di lta bu 'di'i snod du 'gyur ro/ /gang bdag dang bdag med par yang spyod par mi 'gyur ba dang / gang len pa dang / 'dor bar yang spyod par yang mi 'gyur ba de chos bstan pa 'di lta bu 'di'i snod du 'gyur te/ de ni bshad pa 'di'i don kun shes par 'gyur ro/ /shA ri'i bus smras pa/ 'jam dpal 'di la ci zhig kun shes par 'gyur/ 'jam dpal gyis smras pa/ btsun pa shA ri'i bu bshad pa 'di'i don shes par 'gyur ba ci zhig yod na/ 'di la ci zhig kun shes par 'gyur zhes de skad 'dri/ shA ri'i bus smras pa/ 'jam dpal chos zab mo bstan pa 'di mngon sum du 'gyur ba nyung / 'di ni yongs su 'dzin par 'gyur ba nyung ngo / / 56.301a 'jam dpal dgra bcom pa dang / slob pa dang / mi slob pa rnams kyang / phyogs 'di la sgyid lug par 'gyur na byis pa so so'i skye bo rnams lta ci smos/ 'jam dpal gyis smras pa/ btsun pa shA ri'i bu dgra bcom pa rnams la ni sa med do/ /de ci'i phyir zhe na/ 'di ltar dgra bcom pa yang med na sa gang la dgra bcom pa gnas par 'gyur/ dgra bcom pa dag ni gnas med pas rab tu phye ba'o/ /dgra bcom pa dag ni dmigs su med pas rab tu phye ba'o/ /dgra bcom pa dag ni brjod pa dang / mi brjod pa shin du chad pas rab tu phye ba'o/ /de ci'i phyir zhe na/ 'di ltar dgra bcom pa dag ni brjod pa dang / mi brjod pa yang dag par chad pa ste btags pa med pa'o/ /dgra bcom pa dag ni sar dbye ba dag dang bral ba/ 'dus ma byas kyis rab tu phye ba/ 'jug pa med pa/ 'dus ma byas kyis rab tu phye ba ste/ dgra bcom pa dag ni 'dus ma byas pa gnas pa med pa yin na ci zhig dgra bcom pa dag sar 'gyur/ dgra bcom pa dag ni ming dang gzugs kyis rab tu phye ba ma yin no/ /byis pa so so'i skye bo rnams ni ming dang gzugs la rnam par rtog go/ /ming dang gzugs de yang rtog pa med cing rnams par rtog pa med par dgra bcom pa rnams kyis shes te/ de'i phyir dgra bcom pa dag ni ming dang gzugs kyis rab tu phye ba ma yin no/ /byis pa rnams kyang mi dmigs/ byis pa'i chos dang / dgra bcom pa dang / dgra bcom pa'i chos rnams kyang mi dmigs so/ /nam mi dmigs pa de'i tshe na mi rtog go/ /kun du mi spyod do/ /de spyod pa med/ spros pa med cing nye bar zhi ba ste/ yod do zhes khas mi len/ med do zhes khas mi len/ yod kyang yod la med kyang med do zhes khas mi len/ yod pa yang ma yin/ med pa yang ma yin zhes de skad kyang khas mi len to/ /nam khas mi len pa de na dmigs pa med do/ /de dmigs pa thams cad dang bral bas sems 56.301b med cing sems dang bral te gnas med pa'i tshul gyis dge sbyong gi chos la gnas pa zhes bya'o/ /de nas 'jam dpal gzhon nur gyur pas bstan pa 'di bshad pa na 'khor de'i dge slong lnga brgya po stan las langs nas 'di skad ces 'jam dpal gzhon nur gyur pa mi blta'o/ /'jam dpal gzhon nur gyur pa la mi mnyan to/ /'jam dpal gzhon nur gyur pa phyogs gang na gnas pa'i phyogs de yang spang bar bya'o/ /de ci'i phyir zhe na/ 'di ltar 'jam dpal gzhon nur gyur pa ni ston pa mngon sum du gyur bzhin du kun nas nyon mongs pa dang / rnam par byang ba mtshan nyid gcig tu ston pas chos ma yin pa smra'o zhes brjod nas de dag yang 'di snyam du sems te/ bdag cag ji ltar bcom ldan 'das kyis legs par gsungs pa'i chos 'dul ba la tshangs par spyod pa spyad snyam nas dong ngo / /de nas gnas brtan shA ri'i bus 'jam dpal gzhon nur gyur pa la 'di skad ces smras so/ /'jam dpal khyod 'di ltar sems can rnams kyis chos kun shes par 'gyur bar bya ba'i phyir chos mi ston tam/ 'jam dpal gyis smras pa/ btsun pa shA ri'i bu de bzhin no/ /shA ri'i bus smras pa/ dge slong lnga brgya po de dag bstan las langs te 'phya smod/ mi snyan par zer zhing dong ngo / /'jam dpal gyis smras pa/ btsun pa shA ri'i bu gang gi phyir dge slong lnga brgya po de dag 'di skad ces/ 'jam dpal gzhon nur gyur pa mi blta'o/ /'jam dpal gzhon nur gyur pa la mi mnyan to/ /'jam dpal gzhon nur gyur pa gang na gnas pa'i sa phyogs de yang spang bar bya'o zhes zer ba de ni legs so legs so/ /shA ri'i bu dge slong de dag gi tshig de ni legs par smras pa'o/ /de ci'i phyir zhe na/ 'di ltar 'jam dpal gzhon nur gyur pa ni yod pa ma yin te dmigs su med do/ /gang yod pa ma yin te dmigs su med pa de la blta ba dang 56.302a mnyan par mi nus so/ /'jam dpal gzhon nur gyur pa phyogs gang na gnas pa'i phyogs de yang spang bar bya'o/ /de ci'i phyir zhe na/ 'jam dpal gzhon nur gyur pa yod pa ma yin te dmigs su med pas gang de'i gnas kyang yod pa ma yin te/ dmigs su med do/ /gang yod pa ma yin te dmigs su med pa de ni bsten par bya ba ma yin no/ /de nas dge slong lnga brgya po de dag 'jam dpal gzhon nur gyur pas bstan pa 'di thos pa dang / slar phyogs der log nas 'jam dpal gzhon nur gyur pa la 'di skad ces smras so/ /'jam dpal bdag cag ni ji ltar khyod kyis bstan pa de ltar mi shes so/ /'jam dpal gyis smras pa/ dge slong dag legs so legs so/ /de lta bu ni ston pa'i nyan thos rnams kyis bya ba ste/ dge slong dag 'di la ni kun shes par bya ba med/ rnam par shes par bya ba med do/ /de ci'i phyir zhe na/ 'di ltar chos kyi dbyings 'di ni gnas med pa'i tshul gyis gnas pa nyid do/ /chos kyi dbyings gang yin pa de dbyings ma yin no/ /de ni yod pa ma yin te dmigs su med cing g.yo ba med la 'chi 'pho med do/ /gang g.yo ba med cing 'chi 'pho med pa de kun shes par bya ba ma yin/ rnam par shes par bya ba ma yin no/ /gang kun shes par bya ba dang / rnam par shes par bya ba'i rlom sems med pa de ni ston pa'i nyan thos shes bya/ mchog thob pa zhes bya/ gtso bo zhes bya/ sbyin gnas shes bya'o/ /bstan pa 'di bshad pa na dge slong lnga brgya po de dag las dge slong bzhi brgya ni len pa med par zag pa rnams las sems rnam par grol lo/ /dge slong brgya ni sems cher 'khrugs nas lus de nyid dang sems can dmyal ba chen po ngu 'bod du lhung ngo / /de nas tshe dang ldan pa shA ri'i bus 'jam dpal gzhon nur gyur pa la 'di skad ces smras so/ /'jam dpal khyod sems can rjes su bsrung ba'i chos mi ston pas dge slong brgya po de dag chud zos te ngo mtshar byas so/ /de nas 56.302b bcom ldan 'das kyis gnas brtan shA ri'i bu la 'di skad ces bka' stsal to/ /shA ri'i bu khyod de skad ma zer cig /de ci'i phyir zhe na/ shA ri'i bu dge slong brgya po de dag sems can dmyal ba chen po ngu 'bod du reg pa thang cig reg nas dga' ldan gyi lha rnams dang skal ba mnyam par skye bar 'gyur ro/ /shA ri'i bu gal te dge slong de dag gis chos kyi rnam grangs 'di ma thos su zin na de dag gdon mi za bar sems can dmyal bar 'gro bar 'gyur te/ las de zad nas mir skye bar 'gyur ba zhig na de dag gis chos kyi rnam grangs 'di la brten pas bskal par sems can dmyal ba myong bar 'gyur ba'i las de yang cung zad cig myong bar byas so/ /shA ri'i bu de'i phyir dge slong brgya po de dag de bzhin gshegs pa byams pa'i nyan thos thog ma 'dus par dgra bcom pa zag pa zad par 'gyur ro/ /shA ri'i bu de lta bas na chos kyi rnam grangs 'di som nyi dang bcas pas thos na ni dam pa yin gyis/ bsam gtan bzhi la snyoms par zhugs pas ni de lta ma yin/ tshad med pa bzhis ni de lta ma yin/ gzugs med pa'i snyoms par 'jug pa bzhi bsgoms pas ni de lta ma yin no/ /de ci'i phyir zhe na/ chos 'di lta bu ma thos par 'khor ba las yongs su ma grol/ skye ba dang / rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrugs pa rnams las yongs su ma grol zhes bshad do/ /de nas tshe dang ldan pa shA ri'i bus 'jam dpal gzhon nur gyur pa la 'di skad ces smras so/ /'jam dpal 'di ltar sems can yongs su smin par bya ba'i phyir khyod kyis chos kyi rnam grangs 'di legs par bshad pa ngo mtshar to/ /'jam dpal gyis smras pa/ btsun pa shA ri'i bu de bzhin nyid ni 'bri ba ma yin/ 'phel ba ma yin no/ /chos kyi dbyings kyang 'bri ba ma yin/ 'phel ba yang ma yin no/ /sems can gyi khams kyang 'bri ba ma yin/ 56.303a 'phel ba ma yin/ kun nas nyon mongs pa ma yin/ rnam par byang ba ma yin no/ /de ci'i phyir zhe na/ 'di ltar de dag ni yod pa ma yin zhing dmigs su med de tha snyad tsam du zad pas ci yang ma yin/ gang gis gang gi yang ma yin/ gang la yang mi gnas te gnas pa med do/ /btsun pa shA ri'i bu gang 'di lta bu'i mi 'gag pa de ni byang chub bo/ /byang chub gang yin pa de ni thar pa'o/ /thar pa gang yin pa de ni rnam par mi rtog pa'o/ /gang rnam par mi rtog pa de ni mi byed cing 'gyur ba med do/ /gang mi byed cing 'gyur ba med pa de ni yongs su mya ngan las 'das pa'o/ /de nas bcom ldan 'das kyis gnas brtan shA ri'i bu la 'di skad ces bka' stsal to/ /shA ri'i bu 'jam dpal gzhon nur gyur pas ji skad bstan pa de bzhin te/ de bzhin nyid ni 'bri ba ma yin/ 'phel ba ma yin no/ /chos kyi dbyings kyang 'bri ba ma yin/ 'phel ba ma yin no/ /sems can gyi khams kyang 'bri ba ma yin/ 'phel ba ma yin no/ /kun nas nyon mongs pa ma yin/ rnam par byang ba ma yin no/ /de ci'i phyir zhe na/ 'di ltar de dag yod pa ma yin zhing dmigs su med de tha snyad tsam du zad pas ci yang ma yin/ gang gis kyang ma yin/ gang la 'ang mi gnas te gnas pa med do/ /de nas bcom ldan 'das kyis de'i tshe tshigs su bcad pa 'di dag bka' stsal to/ /'das pa dag dang ma 'ongs dang / /da ltar byung chos brjod pa ni/ /don gyis ma yin tha snyad tsam/ /gcig dang sna tshogs mtshan nyid min/ /mtshan nyid med par gang rtog pa/ /de dag nyid ni mtshan nyid 'gyur/ /mtshan nyid med la rtog pa med/ /rtog pa nyid kyang mtshan nyid min/ /'dus ma byas la gang rtog dang / /mya ngan 'das la gang rtog pa/ /gnyi ga bdud kyi las yin zhes/ /de ni mkhas pa rnams kyis bshad/ /phung po skye mched khams kyi rnams/ /de dag ming 56.303b gis brjod pa ste/ /ming dang skye mched gang yin pa/ /de gnyis mtshan nyid gcig pa yin/ /tshul bzhin la ni gang rtog pa/ /de nyid tshul bzhin ma yin no/ /mkhas pa cung zad mi rtog ste/ /stong pa ji bzhin spyod yul lo/ /gang dag rtog pa de dag g.yo/ /rtog pa med pa g.yo ba med/ /rtog pa rnams ni g.yo bar 'gyur/ /rtog pa med pa mya ngan 'da'/ /gang gis rang bzhin 'di shes pa/ /de ni ye shes ldan zhes bya/ /de phyir zag pa rjes su thob/ /de ni rtog med ye shes so/ /ye shes kyis ni ye shes brjod/ /ye shes brjod pa rnams kyang gsog /ye shes 'di ltar gang bzod pa/ /de ni ye shes ldan zhes bya/ /gang gis stong gsum 'di dag rnams/ /rin chen bkang ste byin pa bas/ /gang gis dam chos 'di 'dra la/ /bzod pa de ni bzod pa mchog /bskal pa bye ba bsam yas su/ /sbyin dang tshul khrims bzod pa dang / /brtson 'grus bsam gtan bsnyen pas ni/ /mdo sde 'di dang mtshungs ma yin/ /chos 'di dang ni theg pa 'di/ /yang dag rdzogs pa'i sangs rgyas gsungs/ /mdo sde 'di la brten byas na/ /thams cad de bzhin gshegs par 'gyur/ /chos kyi rnam grangs 'di bshad pa na srog chags 'bum ni chos rnams la chos kyi mig rdul dang bral zhing dri ma med par rnam par dag go/ /dge slong lnga brgya ni len pa med par zag pa rnams las sems rnam par grol lo/ /gzugs na spyod pa'i lha'i bu brgyad khri ni bla na med pa yang dag par rdzogs pa'i byang chub tu sems bskyed nas de dag thams cad bskal pa skar ma lta bu zhes bya ba la bla na med pa yang dag par rdzogs pa'i byang chub mngon par rdzogs par 'tshangs brgya bar 'gyur te/ de dag thams cad kyang 'di ltar de bzhin gshegs pa dgra bcom pa yang dag par rdzogs pa'i sangs rgyas me tog ces bya bar ming 'thun par 'gyur ro zhes bcom ldan 'das kyis 56.304a lung bstan to/ /bcom ldan 'das kyis de skad ces bka' stsal nas/ 'jam dpal gzhon nur gyur pa dang / tshe dang ldan pa shA ri'i bu dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par stod do/ /'phags pa 'jam dpal gnas pa zhes bya ba theg pa chen po'i mdo rdzogs so// // rgya gar gyi mkhan po su ren dra bo d+h-i dang / zhu chen gyi lots+tsha ba ban d+he ye shes sdes bsgyur cing zhus te gtan la phab pa/ / |